အတိတ်ဘဝ (၇)

အရင်ဘဝက အကြွေးကို ဒီဘဝမှာ ပြန်ဆပ်ရလိမ့်မယ်!

ရှောင်လင်းယွီသည် ယခင်က ထိုစကားကိုမယုံခဲ့သော်လည်း၊ သူမဖြတ်သန်းခဲ့ရသမျှ အရာအားလုံးပြီးနောက် ဘယ်လိုလုပ် မယုံဘဲနေနိုင်တော့မည်နည်း။ သူမ၏ ယခင်ဘဝတွင်၊ သူမ၏ခေါင်းမာမှု၊ စိတ်ရှုပ်ထွေးမှုနှင့် အသိပညာမဲ့မှုတို့ကြောင့် လူများစွာကို နာကျင်စေခဲ့သည်။ သူမ လူများစွာအပေါ် အကြွေးတင်ခဲ့သည်။

သူမ၏ နိုးထလာခြင်းက ပေးဆပ်မှုကြီးမားလွန်းခဲ့သည်။ သို့သော် ထိုကြီးမားသော ဝမ်းနည်းပူဆွေးမှုသည် သူမကိုယ်တိုင် ပြုလုပ်ခဲ့ခြင်းဖြစ်သည်။ ရှောင်ထုန်သည် ဖျားနာမှုဖြင့် သေဆုံးသွားခဲ့ပြီး သူမ ဘာမှမတတ်နိုင်ခဲ့ပေ။ ရှောင်လင်းယွီသည်လည်း ကြီးမားသော အပြစ်ရှိစိတ်ဖြင့် သေဆုံးသွားခဲ့သည်။

သို့သော် ကံကြမ္မာစက်ဝန်းက လည်ပတ်လာမည်ဟု သူမမမျှော်လင့်ခဲ့ပေ။ သူမ၏ဘဝ လမ်းမှားစတင်ခဲ့တဲ့ မူလအစမှတ်ဆီကို သူမ ပြန်ရောက်လာခဲ့သည်။ သူမ လမ်းမှန်ပေါ်သို့ ပြန်ရောက်လာခဲ့သည်။

သူမ၏ ယခင်ဘဝက လုပ်ခဲ့သော အမှားအယွင်းအားလုံးကို ဖျက်ပစ်ခဲ့သည်။ သို့သော် သူမနှင့် သူမ၏မိသားစုကို အနိုင်ကျင့်၊ အရှက်ခွဲ၊ ဆဲဆိုခဲ့သူများကို သူမ ဘယ်တော့မှ ခွင့်လွှတ်မည်မဟုတ်ပေ။ သူမ၏ ပြန်လည်မွေးဖွားခြင်းကြောင့် သူမ ပြန်လည်စတင်နိုင်ခဲ့သည်။

ရှောင်လင်းယွီနှင့် ကုန်းထျန်းဟောက်တို့သည် မြစ်ကမ်းဘေးရှိ အဖြူရောင်ကျောက်တုံးပေါ်တွင် တစ်ယောက်ကိုတစ်ယောက် မှီလျက် ထိုင်နေကြသည်။

ရှောင်လင်းယွီသည် သူ၏ကျယ်ပြန့်၊ သန်မာပြီး လုံခြုံသောပခုံးပေါ်တွင် မှီရင်း ရှေ့တည့်တည့်ကို ကြည့်နေသည်။

"ကျွန်မအသက် ၁၅ နှစ်မှာပဲ မိသားစုရဲ့ကန့်ကွက်မှုတွေကြားကနေ ရည်းစားနဲ့ တွဲခဲ့တယ်။ ပြီးတော့ ကျွန်မတို့ အထက်တန်းကျောင်းနဲ့ တက္ကသိုလ်ကို အတူတူတက်ခဲ့ကြတယ်။ တက္ကသိုလ်က ဘွဲ့ရပြီးတော့ ကုမ္ပဏီတစ်ခုတည်းကို အတူတူဝင်ခဲ့ကြတယ်။ ဒီလိုနဲ့ မျက်စိတစ်မှိတ်အတွင်းမှာ ဆယ်နှစ်ကုန်ဆုံးသွားခဲ့တယ်။ ကျွန်မတို့ ဆယ်နှစ်ကြာ ချစ်ခဲ့ကြတယ်။"

"ဆယ်နှစ်ဆိုတာ ဘယ်စုံတွဲအတွက်မဆို အရမ်းကြာတဲ့အချိန်ကာလပေမယ့် ကျွန်မတို့အတွက်တော့ မကြာခဲ့ရဘူး။ နေ့တိုင်းက သိပ်ချိုမြိန်ခဲ့တယ်။ နောက်ဆုံးမှာတော့ ကျွန်မတို့ မိသားစုတစ်ခုထူထောင်ဖို့ ဆုံးဖြတ်ခဲ့ကြတယ်။ လက်ထပ်ဖို့ စီစဉ်ခဲ့ကြတယ်။"

"ဒါပေမဲ့ ကျွန်မတို့က မြို့ကြီးမှာပဲ နေချင်ခဲ့ကြတယ်။ ကျွန်မတို့ အိမ်တစ်လုံးလိုတယ်။ အဲ့ဒီလိုမှ မိသားစုတစ်ခုနဲ့ ပိုတူမှာလေ။ ဒါကြောင့် အိမ်တစ်လုံးရပြီးမှ လက်ထပ်ကြမယ်လို့ သဘောတူခဲ့ကြတယ်။"

ကုန်းထျန်းဟောက်သည် ကိုယ့်ချစ်သူက တခြားယောက်ျားတစ်ယောက်အပေါ်ထားတဲ့ အချစ်ဇာတ်လမ်းကို နားထောင်နေရသည်။ ဇာတ်လမ်းက သိပ်ကို ကြည်နူးစရာကောင်းနေသည်။ အဆုံးသတ်မလှမှန်း သိသော်လည်း သူ့ရင်ထဲမှာ မနာလိုစိတ်တွေ တောက်လောင်နေခဲ့သည်။

"ဒါပေမဲ့ ကံကြမ္မာက ကျွန်မတို့အတွက် တခြားအစီအစဉ်တစ်ခု ရှိခဲ့တယ်။ လူတွေရဲ့ ရက်စက်မှုက ကံကြမ္မာရဲ့ ရက်စက်မှုထက် ပိုဆိုးတယ်။ ကျွန်မအပေါ် သိပ်ကိုကြင်နာပြီး ချိုမြိန်ခဲ့တဲ့ ချစ်သူက တစ်နေ့မှာ ငွေကြေးအတွက် ကျွန်မတို့ရဲ့ ဆက်ဆံရေးကို သစ္စာဖောက်လိမ့်မယ်လို့ ဘယ်တုန်းကမှ မထင်ခဲ့ဘူး။

သူသာ ကျွန်မနဲ့ လမ်းခွဲသွားရုံသက်သက်ဆိုရင် ကျွန်မ ဒီလောက်အထိ အငြိုးအတေးထားမှာ မဟုတ်ဘူး။ သူ့ရဲ့နာမည်ဂုဏ်သတင်းကို ကယ်တင်ဖို့အတွက် သူနဲ့ သူ့ရည်းစားသစ်က ကျွန်မကို ဆေးခပ်ဖို့ ကြံစည်ခဲ့ကြတယ်။"

ရှောင်လင်းယွီသည် ဤသို့ပြောနေစဉ် အလွန်တည်ငြိမ်နေသည်။ သူမက တခြားလူတစ်ယောက်၏ ဇာတ်လမ်းကို ပြောပြနေသကဲ့သို့ပင်။

"ကျွန်မ ဆေးခတ်ခံထားရတဲ့အချိန်မှာတောင် သတိရှိနေတုန်းပဲ။ ကျွန်မ ထွက်ပြေးဖို့ ကြိုးစားခဲ့တယ်။ ဒါပေမဲ့ မတော်တဆ အခန်းတစ်ခန်းထဲကို ပြေးဝင်သွားမိတယ်။ အဲ့ဒီမှာ ယောက်ျားတစ်ယောက်နဲ့ တစ်ညတာ ကုန်ဆုံးခဲ့တယ်... နောက်နေ့မနက် နိုးလာတော့ မရင်းနှီးတဲ့အခန်းကို မြင်ပြီး သိပ်ကြောက်သွားတယ်။ ကျွန်မ အဝတ်အစားတွေဝတ်ပြီး ထွက်ပြေးခဲ့တယ်။"

ရှောင်လင်းယွီက တခြားယောက်ျားတစ်ယောက်နှင့် အတူရှိခဲ့ခြင်းအကြောင်း ပြောသည့်အခါ သူမ မျက်လုံးများကို မော့ကြည့်ပြီး ကုန်းထျန်းဟောက်၏ မျက်လုံးများနှင့် ဆုံမိသည်။

ကုန်းထျန်းဟောက်က သူမပြောနေသော ထိုယောက်ျားသည် သူဖြစ်မှန်း သိလိုက်သည်။

သူ ရှောင်လင်းယွီနှင့် ပထမဆုံးတွေ့ဆုံခဲ့ပုံကို ပြန်သတိရမိသည်။ နောက်နေ့တွင် လီယွမ်ဟန်သည် သူ့အခန်းထဲက အမျိုးသမီးက သူ့နာမည်သုံးပြီး ဟိုတယ်ရဲ့ စီစီတီဗီမှတ်တမ်းကို ရယူသွားကြောင်း ကြိုဆိုရေးဌာနမှ ဖုန်းလက်ခံရရှိခဲ့သည်။ ယခု ယွီအာ ပြောပြနေသော ဇာတ်လမ်းနှင့် လုံးဝကွဲပြားနေသည်။

ကုန်းထျန်းဟောက်သည် သူမက သူ့ကို သူမ၏ ယခင်ဘဝအကြောင်း ပြောပြနေမှန်း ချက်ချင်းသိလိုက်သည်။ သို့သော် တူညီသောလူတစ်ယောက်၏ ဘဝဇာတ်လမ်းများက အဘယ်ကြောင့် ဤမျှကွာခြားနိုင်သနည်း။

ကုန်းထျန်းဟောက်သည် သံသယများစွာ ရှိနေသော်လည်း ယခုအချိန်သည် မေးမြန်းရန်အချိန်မဟုတ်ကြောင်း သူသိသည်။

"အဲ့ဒီနောက် ကျွန်မဆီကို အလုပ်သွားဖို့ တိုက်တွန်းတဲ့ ဖုန်းတစ်ကောလ် ဝင်လာတယ်။ ဒီအချိန်မှာ ကျွန်မက စိတ်ရှုပ်ထွေးပြီး ကြောက်ရွံ့နေခဲ့တယ်။ ကျွန်မ သူစိမ်းယောက်ျားတစ်ယောက်နဲ့ အိပ်ခဲ့တာကို လူတွေသိသွားမှာ ကြောက်နေခဲ့တယ်။ ဒါပေမဲ့ ကျွန်မကို နှစ်သိမ့်ပေးဖို့ ရည်းစားကိုလည်း ရှာချင်ခဲ့တယ်။ အဲ့ဒီအချိန်မှာ သူက ကျွန်မအားကိုးလို့ရတဲ့ တစ်ဦးတည်းသောသူပဲ။

ရုတ်တရက် သူ့ဆီက ဖုန်းတစ်ကောလ် ဝင်လာတယ်။ သူက ကျွန်မကို ဆိုးရွားတဲ့နာမည်တွေနဲ့ ခေါပြီး အော်ငေါက်ခဲ့တယ်။ ကျွန်မရဲ့ သစ္စာဖောက်မှုအကြောင်းကို သူက စွပ်စွဲမေးမြန်းခဲ့တယ်။"

ကုန်းထျန်းဟောက်၏ မျက်နှာသည် မည်းမှောင်သွားပြီး သူက ကျိန်ဆဲလိုက်သည်၊ "သူက မင်းကို ချောက်တွန်းဖို့ ကြိုးစားနေတာပဲ။"

"ဟုတ်တယ်" ရှောင်လင်းယွီက ခေါင်းညိတ်သည်။ "ဒါပေမဲ့ အဲ့ဒီအချိန်တုန်းက ကျွန်မ နားမလည်ခဲ့ဘူး။ ကုမ္ပဏီတစ်ခုလုံးက ကျွန်မနဲ့ ဒီသူစိမ်းယောက်ျားအကြောင်း ကောလာဟလတွေ ဖြန့်နေတယ်လို့ သူပြောတယ်။

ဘာတွေဖြစ်နေမှန်း ကျွန်မ နားမလည်နိုင်ခဲ့ဘူး။ ဒါပေမဲ့ ဒီသတင်းက ကုမ္ပဏီမှာ ပျံ့နှံ့နေပြီလို့ ကြားလိုက်ရတော့ ကျွန်မ နှလုံးသား ပေါက်ကွဲထွက်သွားမတတ်ပဲ။ ကျွန်မ ချက်ချင်းပဲ ကုမ္ပဏီကို အပြေးသွားခဲ့တယ်။

ကျွန်မကို စောင့်ကြိုနေခဲ့တာက လူတိုင်းရဲ့ အဆုံးမရှိတဲ့ စော်ကားမှုတွေပဲ။ ကုမ္ပဏီတစ်ခုလုံးမှာ ကျွန်မက ဟိုတယ်တစ်ခုမှာ အသက်ကြီးကြီးလူတစ်ယောက်နဲ့ အတူရှိနေတဲ့ ဓာတ်ပုံတစ်ပုံ ပျံ့နေခဲ့တယ်။ အဲ့ဒီလူကြီးက နာမည်ကြီး မိန်းမလိုက်စားသူတစ်ယောက်ပဲ။"

"ဒါကြောင့် ကျွန်မကို နေရာမှာတင် ပြင်းပြင်းထန်ထန် ဝေဖန်ပြီး လမ်းခွဲခဲ့တယ်။ ပြီးတော့ ကျွန်မရဲ့သူဌေးကလည်း ကျွန်မကို အလုပ်ထုတ်ခဲ့တယ်။ အချိန်တိုအတွင်းမှာ ကျွန်မ ငရဲပြည်ထဲ တန်းကျသွားခဲ့တယ်။ ကျွန်မကို နှစ်သိမ့်ပေးမယ့်သူ၊ ကျွန်မနာမည်ကို ရှင်းပေးမယ့်သူ တစ်ယောက်မှ မရှိခဲ့ဘူး။ ကျွန်မ အယုံကြည်ဆုံးရည်းစားတောင် ကျွန်မကို မယုံချင်ခဲ့ဘူး။

ကျွန်မ အဲ့ဒီမှာ တစ်ယောက်တည်း ရပ်နေရင်း ဝေဖန်ခံရ၊ မထီမဲ့မြင်ပြုခံရ၊ ဆဲဆိုခံခဲ့ရတယ်။ လူတွေက ကျွန်မကို ပစ္စည်းတွေနဲ့တောင် ပစ်ပေါက်ခဲ့ကြတယ်။ ကျွန်မ သိပ်ကို အားငယ်ခဲ့တယ်။ တစ်ချိန်တည်းမှာပဲ အပြစ်ရှိသလိုလည်း ခံစားခဲ့ရတယ်။ ကျွန်မ ဘာလုပ်ရမှန်းမသိအောင် ဖြစ်နေခဲ့တယ်။"

"ကျွန်မ ရည်းစား၊ အလုပ်နဲ့ သူငယ်ချင်းအားလုံးကို ဆုံးရှုံးခဲ့ရတယ်။ တစ်ညတည်းနဲ့ ကျွန်မရဲ့နာမည်ဂုဏ်သတင်း ပျက်စီးသွားခဲ့တယ်။ အရာအားလုံး ပျောက်ဆုံးသွားခဲ့တယ်။ အိမ်ရှင်က ကျွန်မရဲ့အိတ်တွေကို အပြင်လွှင့်ပစ်ပြီး ကျွန်မကို နှင်ထုတ်ခဲ့တယ်။ လုပ်ငန်းနယ်ပယ်တစ်ခုလုံးက ကျွန်မကို လှောင်ရယ်နေခဲ့တယ်။ Z မြို့မှာ ကျွန်မအတွက် နေစရာနေရာမရှိတော့ဘူး။

ကျွန်မ စိတ်ပျက်အားငယ်စွာနဲ့ အိမ်ပြန်ရုံပဲ တတ်နိုင်ခဲ့တယ်။ ကျွန်မ တစ်ယောက်တည်း အထီးကျန်ပြီး လမ်းပျောက်နေခဲ့တယ်၊ နာကျင်ပြီး မျှော်လင့်ချက်မဲ့နေခဲ့တယ်။ သေတာထက်တောင် ဆိုးတဲ့ခံစားချက်မျိုးပဲ။"

"ဒါပေမဲ့ အိမ်မှာ ကျွန်မကို စောင့်နေခဲ့တာက ငြိမ်းချမ်းမှုမဟုတ်ခဲ့ဘူး။ အိမ်ထဲဝင်လိုက်တာနဲ့ ချန်းမိသားစု ရောက်လာခဲ့တယ်။ သူတို့ ကျွန်မအိမ်ကို ရောက်လာတာနဲ့ ဖောက်ပြန်တဲ့သူ၊ သစ္စာမရှိတဲ့သူဆိုပြီး ကျွန်မကို ဆဲဆိုကြတော့တာပဲ။

ကျွန်မကြောင့် ကျွန်မမိသားစု ဒုက္ခရောက်ခဲ့ရတယ်။ ပြီးတော့ ချန်းမိသားစုက နာမည်ဂုဏ်သတင်းပျက်စီးမှု၊ စိတ်ပိုင်းဆိုင်ရာထိခိုက်မှုနဲ့ တခြားအသုံးစရိတ်အမျိုးမျိုးအတွက် လျော်ကြေးတောင်းခဲ့တယ်။ သူတို့က အဆုံးမရှိတဲ့ငွေကို လိုချင်ခဲ့ကြတယ်။

ကျွန်မ စိတ်တွေလေနေခဲ့တယ်။ မျှော်လင့်ချက်မဲ့မှုက ကျွန်မကို ခြောက်လှန့်နေခဲ့တယ်။ ကျွန်မ ကိုယ့်ကမ္ဘာထဲမှာ ပိတ်မိနေခဲ့တယ်။ နေ့တိုင်း ကိုယ့်ကိုယ်ကိုယ်သတ်သေဖို့ပဲ စဉ်းစားနေခဲ့တယ်။ ကျွန်မမိသားစု၊ ကျွန်မဆွေမျိုးအားလုံး ချန်းမိသားစုရဲ့ ဖိအားပေးမှုကြောင့် သူတို့လည်း ပြိုလဲလုနီးပါးဖြစ်နေတာကို ကျွန်မ သတိမထားမိခဲ့ဘူး။"

"နောက်ဆုံးမှာတော့ ကျွန်မ ကိုယ့်ကိုယ်ကိုယ်သတ်သေဖို့ ကြိုးစားနိုင်ခဲ့တယ်။ ကျွန်မမိသားစုက အချိန်မီ ကယ်တင်နိုင်ခဲ့တယ်။ ကျွန်မကို ဆေးရုံပို့ခဲ့ကြပြီး အဲ့ဒီအချိန်မှာပဲ ကျွန်မ ကိုယ်ဝန်ရှိနေမှန်း သိခဲ့ရတယ်။

ရည်းစားကို သစ္စာဖောက်ခဲ့လို့ စိတ်ပျက်အားငယ်နေပြီးသား ကျွန်မအတွက် ဒီအကောင်စုတ်ကလေးက ကျွန်မရဲ့စိတ်ပျက်အားငယ်မှုကို ပိုဆိုးစေခဲ့တယ်။ ကျွန်မ လုံးဝ ပြိုလဲသွားခဲ့တယ်။"

ဤနေရာတွင် ရှောင်လင်းယွီသည် သူမ၏ဝမ်းဗိုက်ကို မသိစိတ်ဖြင့် တို့ထိမိသည်။ ကုန်းထျန်းဟောက်၏ အကြည့်သည် သူမ၏ဝမ်းဗိုက်ပေါ်သို့ ကျရောက်သွားသည်။

ထိုအခါမှသာ ကုန်းထျန်းဟောက်သည် ရှောင်လင်းယွီက သူတို့ကလေးနှင့်ပတ်သက်၍ အဘယ်ကြောင့် ဤမျှစိတ်လှုပ်ရှားနေရသည်ကို နားလည်သွားသည်။ အဘယ်ကြောင့် သူမက အမြဲတမ်း သူမ၏ဝမ်းဗိုက်ကို အပြစ်ရှိသလို ခံစားမှုဖြင့် ကြည့်နေရသည်ကို သူနားလည်သွားသည်။

ရှောင်လင်းယွီ၏ မျက်ဝန်းထောင့်များတွင် မျက်ရည်များ စတင်ဖွဲ့တည်လာသည်။

ကုန်းထျန်းဟောက်သည် သူမ၏မျက်ရည်များကို သုတ်ပေးပြီး သူ၏ကြီးမားသောလက်ဖဝါးပြင်ဖြင့် သူမ၏ဝမ်းဗိုက်ကို ပွတ်သပ်ပေးလိုက်သည်။

သူ ကြိုတင်ခန့်မှန်းခြင်းဖြစ်သော်လည်း၊ ရှောင်လင်းယွီသည် သူမ၏ယခင်ဘဝတွင် ဤကလေးကို မကြိုက်ခဲ့ကြောင်း သူပြောနိုင်သည်။

ရှောင်လင်းယွီက ဆက်ပြောသည်၊ "ဒီကလေးရှိနေမှန်း သိပြီးနောက် ကျွန်မရဲ့ ပထမဆုံးတုံ့ပြန်မှုက သူ့ကို ဖျက်ချပစ်ဖို့ပဲ။ ကျွန်မ သူ့ကို မမွေးချင်ခဲ့ဘူး။ သူ့ရဲ့တည်ရှိမှုက ကျွန်မရဲ့ရည်းစားကို သစ္စာဖောက်ခဲ့တာကို အမြဲတမ်း သတိပေးနေလိမ့်မယ်။"

"ဒါပေမဲ့ ကျွန်မရဲ့ကျန်းမာရေးအခြေအနေ မကောင်းတာကြောင့် ဆရာဝန်က ဒီကလေးကို ဖျက်ချလို့မရဘူးလို့ပြောတယ်။ ကျွန်မအသက်ကို အန္တရာယ်ဖြစ်စေနိုင်တယ်။ ကျွန်မတို့နှစ်ယောက်စလုံး သေသွားနိုင်တယ်။ ဒါကြောင့် ကျွန်မ ဖျက်ချချင်ရင်တောင် မလုပ်နိုင်ခဲ့ဘူး။ ကျွန်မမိဘတွေက ကျွန်မကို တင်းတင်းကျပ်ကျပ် စောင့်ကြည့်နေခဲ့ပြီး ကလေးကလည်း သိပ်သန်မာခဲ့တယ်။ ဘယ်သူမှမကြည့်တဲ့အချိန်မှာ ကြိုးခုန်တာ၊ အလေးအပင်တွေမတာ၊ ပြေးတာ စတဲ့နည်းလမ်းမျိုးစုံနဲ့ ကျွန်မကြိုးစားခဲ့ပေမယ့် ကလေးက တင်းတင်းလေး တွယ်ကပ်နေခဲ့တယ်။"

"ကျွန်မကိုယ်ဝန်ရှိတဲ့သတင်းက အမြန်ပျံ့နှံ့သွားခဲ့တယ်။ ချန်းမိသားစုက ရောက်လာပြီး လျော်ကြေးတစ်သိန်းပေးရမယ်ဆိုပြီး အော်ကြီးဟစ်ကျယ်နဲ့ ရန်ထပ်လုပ်ကြပြန်တယ်။ သူတို့က အိမ်ထဲက ပစ္စည်းအားလုံးကို ရိုက်ချိုးပစ်ခဲ့တယ်။ အဖေနဲ့မောင်လေးက သူတို့ကို တားဖို့ကြိုးစားခဲ့တယ်။ အဖေ့ကို အဆုတ်နေရာကို ကန်လိုက်တယ်။ မောင်လေးရဲ့ခြေထောက်က ကျိုးသွားခဲ့တယ်။"

"သူတို့ အချိန်မီ ဆေးကုသမှုမခံယူနိုင်ခဲ့ဘူး။ ပြီးတော့ ကျွန်မလုပ်ခဲ့တာတွေကြောင့် ကျွန်မတို့ ဆင်းရဲနေကြတယ်လေ။ အဲ့ဒီအချိန်ကစပြီး အဖေက နေ့တိုင်း သွေးအန်ပြီး မောင်လေးရဲ့ခြေထောက်က မသန်မစွမ်းဖြစ်သွားခဲ့တယ်။ သူ တုတ်ကောက်တော့မလိုပေမယ့် လမ်းလျှောက်ရင် ထော့နဲ့ထော့နဲ့ ဖြစ်သွားတယ်။"

***