မရင်းနှီးသော ကြယ်တာရာစက်ဝန်း

မိုးကောင်းကင်သည် မီးခိုးရောင်စွန်းထင်နေသော ဧရာမကန့်လန့်ကာနှင့် ဆင်တူပြီး အကန့်အသတ်မဲ့စွာ ကျယ်ပြောသည်။

ဤနေရာတွင် နေနှင့် လမရှိပေ။ ဖြစ်နိုင်သည်မှာ ဤနေရာတွင် နေ့နှင့် ညဟူသော အချိန်ကွာခြားမှုမရှိဟန် ရ၏။ မြစိမ်းရောင် အလင်းစက်ဝိုင်းသုံးရာ့ခြောက်ဆယ်ခုသည်သာ မိုးကောင်းကင်၏ အမိုးခုံးပေါ်တွင် လွင့်မျောနေကြပြီး သိမ်မွေ့သော အလင်းရောင်ကို ထုတ်လွှတ်နေကြသည်။

ဤနေရာက အမည်မသိစကြာဝဠာထဲမှ ကြယ်ဂြိုလ်တစ်ခု ဖြစ်သည်။

ဤကြယ်ဂြိုလ်ထဲမှာ ပင်လယ်များ၊ ကုန်းမြေများ၊ တောင်တန်းများနှင့် ကျွန်းစုများ ရှိကြသည်။

သို့သော်လည်း ပင်လယ်ထဲမှ ပင်လယ်ရေသည် သာမန်မဟုတ်ဘဲ ဖော့စဖိတ်မီးတောက်၏ အရည်ဖြစ်သည်။

ကုန်းမြေသည်တော့ ကြယ်အမှုန်အမွှားများဖြင့် ဖွဲ့စည်းထားသော ဒြပ်ထည်အစိုင်အခဲ ဖြစ်သည်။

တောင်တန်းများက ခရမ်းရောင်သလင်းကျောက်အဖြစ် ဒြပ်ထည်ဖွဲ့စည်းနေကြပြီး အလွန်သိပ်သည်းသော ဒြပ်နှောများဖြင့် ပြည့်နှက်နေကြသည်။

ကျွန်းစုများသည်တော့ ယင်းတို့က ပင်လယ်ပြင်ပေါ်မှာ မတည်ရှိကြချေ။ ယင်းအစား ကျွန်းစုများက ခရမ်းရောင်သလင်းကျောက်တောင်များ၏ နံရံများပေါ်မှာ တန်းလန်းတည်ရှိနေကြသည်။

ထိုကျွန်းစုများကို ကျောက်နံရံများထဲမှ ထိုးထွက်နေသော အလင်းဝါးမျိုခြင်းသွေးကြောများဖြင့် ဖွဲ့စည်းထားသည်။

ထို့ပြင် တစ်ဝက်ကြည်လင်နေသော ထူးထူးဆန်းဆန်း သစ်ပင်များလည်း ရှိကြသည်။ ယင်းတို့က ဟင်းလင်းပြင်ပေါ်မှာ အမြစ်တွယ်ထားကြပြီး အမည်မသိအရာထံမှ အာဟာရဓာတ်ကို စုပ်ယူနေကြဟန် ရသည်။ သို့ဖြစ်၍ ယင်းတို့က လေထဲမှာ ရှင်သန်ကြီးထွားနေကြသည်။

ဤအခိုက်အတန့်မှာ ပုံရိပ်တစ်ခုက ထိုကျွန်းစုများထဲမှ တစ်ခုမှာ ရုတ်တရက် ထွက်ပေါ်လာသည်။

သူက အပိုင်းပိုင်းစုတ်ပြဲနေသော ဝတ်စုံကို ဝတ်ဆင်ထားပြီး ဆံပင်ဘိုသီဘတ်သီဖြစ်နေသည်။ သူက အလွန်အားနည်းသော အရှိန်အဝါကို ထုတ်လွှတ်နေလေရာ အချိန်မရွေး သတိလစ်သွားနိုင်ဟန် ရသည်။ ယခု သူက သွေးကြောများဖြင့် ရက်လုပ်ထားသော ကျွန်းစုပေါ်သို့ ပြုတ်ကျလာသည်။

မြေပြင်နှင့် ထိတွေ့သွားသည့်အခါ ထူးဆန်းသော လေကြမ်းက ထိုပုံရိပ်ထံမှ တခြားဒိုင်မန်းရှင်းထဲမှ ထွက်ပေါ်လာသည်။ ယင်းက သွေးကြောကျွန်းစုကို အပြင်းအထန် တုန်လှုပ်သွားစေသည်။

နောက်ဆုံးမှာတော့ ကျွန်းစုက ထိုပုံရိပ်ထံမှ ဖိအားကို ဆက်ပြီး မတောင့်ခံနိုင်တော့ပေ။ ထို့ကြောင့် ပုံရိပ်က ကျွန်းစုကို တိုက်ရိုက် ဖောက်ထွင်းသွားသည်။

ကျယ်လောင်သော မြည်ဟိန်းသံနှင့်အတူ ပုံရိပ်က ကျွန်းစုကို ဖောက်ထွင်းသွားပြီး အောက်ဘက်မှ တောအုပ်ပေါ်သို့ ပြုတ်ကျသွားသည်။

တောအုပ်က အလွန်ကျယ်ပြောသည်။ သို့သော်လည်း အကြောင်းအရင်းတချို့ကြောင့် ပုံရိပ်ပြုတ်ကျသွားသော နေရာ၏ ပေတစ်ထောင်အချင်းဝက်အတွင်းဝယ် မျက်စိတစ်မှိတ်အတွင်းမှာ အရာအားလုံးက ကြယ်အမှုန်အမွှားများအဖြစ် ပြောင်းလဲသွားပြီး ပုံရိပ်ကို ဖုံးလွှမ်းသွားသည်။

ကြယ်အမှုန်အမွှားထဲတွင် အရာအားလုံးက မသဲကွဲသော်လည်း ထိုပုံရိပ်က တစ်ယောက်တည်းမဟုတ်ကြောင်း ထင်ရှားပေသည်။ သူ၏ လက်ထဲမှာ တစ်စုံတစ်ယောက်ကို ဆုပ်ကိုင်ထားသည်။

သူက သတိမေ့နေသည့်တိုင် သူ၏ ဖျစ်ညှစ်မှုက အလွန်တင်းကျပ်သည်။ ထို့ပြင် လည်ပင်းညှစ်ခံထားရသော လူသည်လည်း သတိမေ့မျောနေသည်။

မကြာမီ ဘေးပတ်ဝန်းကျင်က ပြန်တိတ်ဆိတ်ငြိမ်သက်သွားသည်။

ကြယ်အမှုန်အမွှားများက အောက်သို့ ဖြည်းညင်းစွာ ပြန်ကျသွားပြီး ပေတစ်ထောင်ကျယ်ဝန်းသော မြေကွက်လပ်ကို ပြန်ဖြည့်လိုက်သည်။ တဖြည်းဖြည်း တောအုပ်က ပုံမှန်အခြေအနေသို့ ပြန်ရောက်သွားသည်။

ဤတောအုပ်ထဲမှ သစ်ပင်များသည် တကယ့်အစစ်အမှန် မဟုတ်ကြပေ။ ယင်းတို့က ကြယ်အမှုန်အမွှားများ၏ စုဝေးမှုမှ ဖြစ်ပေါ်လာကြခြင်း ဖြစ်သည်။

ယင်းတို့က စကြာဝဠာထဲမှာ လွင့်မျောနေသော ကြယ်အလင်းရောင်ကို အာဟာရဓာတ်အဖြစ် စုပ်ယူပြီး ရှင်သန်ကြသည်။ ထို့ပြင် ထူးခြားချက်အနေဖြင့် တောအုပ်က ရှေးဟောင်းဥပဒေသတချို့ကို လိုက်နာဟန်ရပြီး စကြာဝဠာတစ်ခွင် ပြန့်ကျဲနေသော ကြယ်အလင်းရောင်ထံမှ မှတ်ဉာဏ်များကို ဆွဲထုတ်ပစ်လိမ့်မည်။ ထို့နောက် တောအုပ်က ထိုမှတ်ဉာဏ်များကို ပြန်လည်အသက်သွင်းလိမ့်မည်။

အချိန်က နှေးကွေးစွာ ကုန်ဆုံးသွားသည်။

မိုးက တဖွဲဖွဲ စတင်ရွာလာသည်။

သို့သော်လည်း ထိုမိုးက သာမန်မဟုတ်ပေ။ ယင်းက ဤကြယ်ဂြိုလ်၏ လေထဲမှာ လွင့်မျောနေကြသော မီးတောက်ပိုးစုန်းကြူး ဘီလီယံပေါင်းများစွာထံမှ ဖွဲ့စည်းဖြစ်ပေါ်လာခြင်း ဖြစ်သည်။

အဝေးမှကြည့်လျှင် ဟင်းလင်းပြင်ထဲမှ နတ်ဘုရားတစ်ပါးက စာအုပ်ထဲမှ စာမျက်နှာများကို အပိုင်းပိုင်းအစစ ဆုတ်ဖြဲပြီး လေထဲသို့ လွှင့်ပစ်နေသည့်အလား အောက်မေ့ရသည်။

ပြန့်ကျဲသွားသော ထိုစာရွက်အပိုင်းအစများက လေထဲမှာ လောင်ကျွမ်းသွားကြပြီး ကောင်းကင်ဘုံထက် သာလွန်သော အလင်းရောင်ကို ထုတ်လွှတ်လိုက်ကြသည်။ တစ်ချိန်တည်းမှာ နတ်ဘုရားရေရွတ်သံများက ထွက်ပေါ်လာသည်။

“ ဟွေကျူး… ဟွေကျူး… ”

ထိုတီးတိုးရေရွတ်သံများ ပျံ့လွင့်သွားသည်နှင့် ဝေဝါးသော ပုံရိပ်များက လောင်ကျွမ်းနေကြသော စာရွက်အပိုင်းအစများ၏ အလင်းရောင်ထဲမှာ စတင်ထွက်ပေါ်လာကြသည်။ ထို့နောက် ၎င်းတို့က တဖြည်းဖြည်း ကြည်လင်ထင်ရှားလာကြသည်။

ထိုပုံရိပ်အားလုံးက တစ်ပုံစံတည်း ဆင်တူကြသည်။

၎င်းတို့၏ ခန္ဓာကိုယ်ကို အလင်းရောင်ဖြင့် ဖန်တီးထားသည့်အပြင် ၎င်းတို့မှာ လိင်ခွဲခြားမှု မရှိပေ။ ဧရာမအလင်းအတောင်ပံ(၁၂)ခုက ၎င်းတို့၏ ကျောနောက်မှာ ဖြန့်ကားနေကြပြီး သက်တံ့ဝဲကတော့တစ်ခုကို ဖွဲ့စည်းထားကြသည်။

၎င်းတို့က ကောင်းကင်ဘုံမှ ထွက်ပေါ်လာပြီးနောက် အရပ်မျက်နှာအသီးသီးဆီသို့ စတင်လျှောက်သွားကြသည်။ ၎င်းတို့က လမ်းလျှောက်နေကြရင်း တီးတိုးရေရွတ်နေကြသည်။

၎င်းတို့ ဖြတ်သန်းသွားသည့်နေရာတိုင်း မြေပြင်ပေါ်မှ ကြယ်အမှုန်အမွှားများက လေထဲသို့ မြှောက်တတ်သွားကြပြီး ဝမ်းနည်းကြေကွဲဖွယ်ကောင်းသော လေတိုးဝှေ့သံကို ထုတ်လွှတ်လိမ့်မည်။

လေတိုးဝှေ့သံ ပျံ့လွင့်သွားသည်နှင့် ခရမ်းရောင်သလင်းကျောက်တောင်များက တုန်ယင်သွားကြပြီး ရှေးဟောင်းပုလွေသံကို တီးမှုတ်ကြလိမ့်မည်။ ဤသည်မှာ ခရမ်းရောင်သလင်းကျောက်တောင်များက ၎င်းတို့ကို လက်ခံကြိုဆိုနေကြသည့်အလားပင်။

ပင်လယ်ထဲမှ ဖော့စဖိတ်အရည်သည်လည်း အပေါ်သို့ မြှောက်တတ်သွားပြီး တလက်လက် ထွန်းလင်းတောက်ပသော ထောင့်တိုင်အများအပြားကို ဖွဲ့စည်းလိုက်ကြသည်။ ထို့နောက် ထောင့်တိုင်များက လွင့်မျောနေသော လှေကားများအဖြစ် စုစည်းသွားကြကာ ၎င်းတို့အတွက် ကပြဖျော်ဖြေလိုက်ကြသည်။

သွေးကြောများဖြင့် ရက်လုပ်ထားသော ကျွန်းစုများသည်ပင် ရွှေရောင်အရည်ဖြင့် ပြည့်လျှံသွားပြီး ဆဌဂံသလင်းကျောက်များအဖြစ် ဒြပ်ထည်ဖွဲ့စည်းသွားကြသည်။ ထိုဆဌဂံသလင်းကျောက်များက ကြယ်အလင်းရောင်ဖြင့် ထွန်းလင်းနေလေရာ စကြာဝဠာ၏ နိယာမများကို မှတ်တမ်းတင်ထားဟန် ရသည်။ နောက်အခိုက်အတန့်မှာ ထိုဆဌဂံသလင်းကျောက်များက လေထဲသို့ မြှောက်တတ်သွားကြပြီး ယဇ်ပူဇော်ခြင်းကို ဆောင်ရွက်လိုက်ကြသည်။

ကျွန်းစုများ၏ အောက်ဘက်မှ တောအုပ်ထဲတွင်တော့ ကြယ်အမှုန်အမွှားများက အပေါ်သို့ မြှောက်တတ်သွားကြပြီး သဲမုန်တိုင်းတစ်ခုအဖြစ် ဖွဲ့စည်းသွားကာ ၎င်းတို့ကို ကိုးကွယ်ပူဇော်လိုက်ကြသည်။

သို့သော်လည်း သဲမုန်တိုင်းထဲတွင် ပုံရိပ်တစ်ခုက လှုပ်ရှားမှုကင်းမဲ့စွာ လဲလျောင်းနေသည်။

သို့သော်လည်း မကြာမီ သူ၏ လက်ထဲမှ အမျိုးသမီးက တုန်ယင်လာသည်။ ၎င်းက ဖြည်းညင်းစွာ မျက်လုံးဖွင့်လိုက်လေရာ ၎င်း၏ မျက်တောင်က တဖျပ်ဖျပ်လှုပ်ခါသွားသည်။

ဘေးပတ်ဝန်းကျင်ကို တစ်ချက်ကြည့်ပြီးနောက် ၎င်းက အရင်ဆုံး အံ့ဩသွားသည်။ ထို့နောက် ၎င်း၏ မျက်လုံးက ဝမ်းသာပျော်ရွှင်မှုနှင့်အတူ လင်းလက်သွားသည်။ ၎င်း၏ အကြည့်က ၎င်း၏ ဘေးမှ လဲလျောင်းနေသော ပုံရိပ်ထံသို့ အမြန်ကျရောက်သွားသည်။ ထို့နောက် တုံ့ဆိုင်းမှုနှင့် စိုးရိမ်ကြောင့်ကြမှုက ၎င်း၏ မျက်လုံးထဲမှာ ထွက်ပေါ်လာသည်။

၎င်းက အလျင်စလို မလှုပ်ရှားဝံ့ချေ။ သို့တိုင် ၎င်းက ပါးစပ်ဟလိုက်ပြီး အဝေးမှ ကောင်းကင်ယံတွင် လှည့်ပတ်ပျံသန်းနေကြသော အလင်းပုံရိပ်များကို ကြည့်လိုက်ကာ ၎င်း၏ နတ်ဘုရားအသံကို ပို့လွှတ်ရန် ကြိုးစားလိုက်သည်။

၎င်းက ချိပ်ပိတ်ခံထားရလေရာ ၎င်း၏ နတ်ဘုရားစိတ်အာရုံကို မထုတ်လွှတ်နိုင်ပေ။ သို့သော်လည်း ၎င်း၏ နတ်ဘုရားအသံက ထိုနတ်ဘုရားဝိညာဉ်များ၏ စိတ်အာရုံကို ချက်ချင်း ဆွဲဆောင်နိုင်လိမ့်မည်ဟု ၎င်းမှာ ယုံကြည်မှုရှိသည်။

သို့သော်လည်း အသံက ၎င်း၏ လည်ချောင်းထဲမှ ထွက်ပေါ်လာတော့မည့်အချိန် ၎င်း၏ လည်ပင်းပေါ်မှ လက်၏ ဖျစ်ညှစ်မှုက ရုတ်တရက် ပိုတင်းကျပ်လာသည်။ ယင်းက ၎င်း၏ လည်ချောင်းထဲမှ ထွက်ပေါ်လာတော့မည့် အသံကို ချက်ချင်း ဖြတ်တောက်ပစ်လိုက်သည်။

နတ်သမီးက တုန်လှုပ်သွားသည်။ ၎င်း၏ မျက်လုံးထောင့်မှတဆင့် ရွှီချင်းက ယခု မျက်လုံးဖွင့်လိုက်ကြောင်း ၎င်းမြင်တွေ့သွားသည်။

၎င်းက ဆက်ပြီး မလှုပ်ဝံ့တော့ချေ။ ၎င်းက လုံးဝ တိတ်ဆိတ်ငြိမ်သက်သွားသည်။

ရွှီချင်း၏ အမူအရာက မပြောင်းလဲသွားပေ။ သူက နေရာမှာ လူသေကောင်ပမာ မလှုပ်ရှားဘဲ ဆက်လှဲနေသည်။

ကောင်းကင်ပေါ်မှ အလင်းပုံရိပ်များက လုံးဝပျောက်ကွယ်သွားပြီး ဘေးပတ်ဝန်းကျင်က ပုံမှန်ပြန်ဖြစ်သွားသည့်အခါမှသာ သူက ဘေးသို့ ခေါင်းလှည့်လိုက်ပြီး နတ်သမီးကို ကြည့်လိုက်သည်။ ထို့နောက် သူက ရုတ်တရက် အသက်ရှူသွင်းလိုက်ပြီး နတ်သမီးထံမှ နတ်ဘုရားအနှစ်သာရကို စတင်စုပ်ယူလိုက်သည်။

ကြောက်မက်ဖွယ်ကောင်းသော စုပ်အားက ၎င်း၏ တစ်ကိုယ်လုံးကို လွှမ်းခြုံသွားသည့်အခါ နတ်သမီးက ကူကယ်ရာမဲ့သွားပြီး စိတ်ပျက်အားလျော့သွားသည်။ လျှပ်တစ်ပြက်အတွင်းမှာ အစောနက ၎င်းအသစ်စုဆောင်းထားခဲ့သော မူလအနှစ်သာရများက ရွှီချင်း၏ စုပ်ယူဝါးမျိုခြင်းခံလိုက်ရသည်။

ထို့နောက် နတ်သမီး၏ ခန္ဓာကိုယ်က ပိန်ချုံးသွားပြီး ၎င်းက သတိမေ့သွားသည်။

သို့မှသာ ရွှီချင်းက နတ်သမီး၏ နတ်ဘုရားအသံကို ချိပ်ပိတ်လိုက်ပြီး တခြားချိပ်တံဆိပ်များကို ထပ်မံ အားဖြည့်ပေးလိုက်သည်။ နောက်ဆုံးမှာ သူက နတ်သမီးကို တင်းကျပ်စွာ ချည်နှောင်လိုက်ပြီး သိုလှောင်ထားလိုက်သည်။

ထိုသို့လုပ်ဆောင်ပြီးနောက် ရွှီချင်းက သူ၏ နတ်ဘုရားစိတ်အာရုံကို သတိကြီးစွာ ဖြန့်ကြက်လိုက်ပြီး ဘေးပတ်ဝန်းကျင်ကို စစ်ဆေးကြည့်လိုက်သည်။

တဖြည်းဖြည်း သူ၏ မျက်နှာက မည်းမှောင်သွားသည်။ တစ်ခဏကြာ တိတ်ဆိတ်နေပြီးနောက် သူက နူးညံ့စွာ ပြောသည်။

“ ကျေးဇူးတင်ပါတယ် ”

“ ငါ့ကို ကျေးဇူးတင်စရာမလိုပါဘူး သခင်လေး… ငါတို့ကြားက ဆက်ဆံရေးမှာ အဲ့လိုပြောစရာလိုလို့လား ”

ရွှံ့မြေခွေး၏ အသံက အားနည်းနေသော်လည်း သူ၏ ညုတုတုလေသံက ထင်ရှားနေဆဲပင်။

ရွှီချင်းက မည်သို့ကြောင့် သူ့ကို ကျေးဇူးတင်ရကြောင်း ရွှံ့မြေခွေး နားလည်သည်။ ဤကြယ်ဂြိုလ်ပေါ်သို့ သူတို့ပြုတ်ကျလာသည့်အခိုက် ရွှံ့မြေခွေးက ဤနေရာမှ မူမမှန်မှုကို သတိထားမိခဲ့ပြီး သူ၏ နတ်ဘုရားအရှိန်အဝါဖြင့် ရွှီချင်းကို ဖုံးကွယ်ပေးခဲ့သည်။

ထို့ပြင် သူက နတ်သမီး၏ ပုံမှန်မဟုတ်သော လုပ်ဆောင်မှုကိုလည်း သတိပြုမိခဲ့သည်။ ထို့ကြောင့် သူက သူ့ကိုယ်ပိုင်နတ်ဘုရားအနှစ်သာရများကို စတေး၍ ရွှီချင်း၏ နိုးထမှုကို အရှိန်မြှင့်တင်ကာ အစောနက ကပ်ဘေးကို တိမ်းရှောင်ခဲ့သည်။

“ ငါ့ကို ဆက်ပြီး ဖုံးကွယ်ပေးဖို့ မင်းရဲ့ အကူအညီကို လိုအပ်တယ် ”

ရွှီချင်းက နူးညံ့စွာ ပြောသည်။ ထို့နောက် သူက မျက်လုံးမှိတ်လိုက်ပြီး စတင်ကျင့်ကြံလိုက်ကာ သူ၏ ဒဏ်ရာများကို ပြန်ကုသလိုက်သည်။

ယခု သူတို့ရောက်ရှိနေသော နေရာနှင့်ပတ်သက်ပြီး သူ့မှာ ခန့်မှန်းမှုတချို့ ရှိသည်။ သို့သော်လည်း တည်နေရာအတိအကျကို အတည်ပြုနိုင်ရန်နှင့် ဤနေရာမှ ထွက်သွားနိုင်ရန် သူ၏ ကျင့်ကြံခြင်းအခြေခံကို ပြန်စုဆောင်းရလိမ့်မည်။

သို့ဖြစ်၍ ယခုအချိန်မှာ သူ့အတွက် အရေးကြီးဆုံးတာဝန်က စွမ်းအင်ပြန်ဖြည့်တင်းရန် ဖြစ်သည်။

သူ၏ ဒဏ်ရာများက အလွန်ဆိုးဝါးပြင်းထန်သည်။ အရှင်သခင်အဆင့် တာအိုလက်နက်ကို အသုံးပြုခြင်းနှင့် တည်နေရာပြောင်းရွှေ့ခြင်းမှာ သူတွေ့ကြုံခဲ့ရသော လေဟာနယ်အတားအဆီးများက သူ့အား အလွန်အားနည်းသော အခြေအနေသို့ တွန်းပို့ခဲ့သည်။

သို့သော်လည်း ကံကောင်းစွာဖြင့် သူ့မှာ စွမ်းအင်ပြန်ဖြည့်နိုင်သော အရင်းအမြစ်များ အလုံအလောက်ရှိသည်။

နတ်သမီးကို ဖမ်းဆီးပေးခဲ့သည့်အတွက် အတိတ်မှာ သူရရှိခဲ့သော ဆုလာဘ်များက သူ့အား စွမ်းအင်ပြန်ဖြည့်နိုင်စေရန် လုံလောက်ပေသည်။ ထို့ပြင် သူက မိုးသောက်အင်မော်တယ်နန်းတော်မှတဆင့် ချင်းကောင်းကင်ဘုံအလွန်ထဲမှာ ချိပ်ပိတ်ထားသော နာကျင်မှုနတ်ဘုရားထံမှလည်း မူလအနှစ်သာရကို အမြဲစုပ်ယူနိုင်သည်။ ထို့ပြင် နတ်သမီးက သူ၏ ဘေးမှာ ရှိနေသေးသည်မဟုတ်ပါလော။

အထူးသဖြင့် နတ်သမီးဖြစ်သည်။ ရွှီချင်းအတွက်တော့ အတိတ်မှာဖြစ်စေ ပစ္စုပ္ပန်မှာဖြစ်စေ နတ်သမီးက အဖိုးမဖြတ်နိုင်သော ရတနာဖြစ်သည်။

ထိုသို့ဖြင့် အချိန်က နှေးကွေးစွာ စီးဆင်းသွားသည်။

လဝက်ဟူသော အချိန်က မျက်တောင်တစ်ခတ်အတွင်း ကုန်ဆုံးသွားသည်။

ဤလဝက်အတွင်းမှာ ရွှံ့မြေခွေးထံမှ နတ်ဘုရားအရှိန်အဝါ၏ ဖုံးကွယ်ပေးမှုအောက်မှာ ရွှီချင်းက မူလအနှစ်သာရများကို မရပ်မနား စုပ်ယူခဲ့ပြီး သူ၏ ဒဏ်ရာများကို အမြန်ပြန်ကုသခဲ့သည်။ ဤအတောအတွင်းမှာ တောအုပ်က ရှေးဟောင်းမှတ်ဉာဏ်ပုံရိပ်များကို ပိုမိုများပြားစွာ မှတ်တမ်းတင်ခဲ့ပြီး ထူးဆန်းသော မိုးက တစ်ကြိမ်ထက်မက ပိုပြီးရွာသွန်းခဲ့သည်။

အတောင်ပံဆယ့်နှစ်ခုပါသော အလင်းပုံရိပ်များကို စစ်ဆေးစောင့်ကြည့်နေရင်း ရွှီချင်းက ၎င်းတို့ထံမှ နတ်ဘုရားတည်ရှိမှုကို အာရုံခံမိခဲ့သည်။

သို့သော်လည်း ၎င်းတို့က ယခင်သူတွေ့ကြုံခဲ့ဖူးသော နတ်ဘုရားများနှင့် ကွဲပြားခြားနားဟန် ရသည်။

သို့သော်လည်း သူ၏ ကျင့်ကြံခြင်းစွမ်းအားကို အတိုင်းအတာတစ်ခုထိ ပြန်မရသေးဘဲ နောက်ထပ် စစ်ဆေးလေ့လာရန် ရွှီချင်း မစဉ်းစားထားပေ။ သို့ဖြစ်၍ သူက ဒဏ်ရာများကို ဆက်ပြီး ကုသလိုက်သည်။

နောက်ထပ် လဝက်ကုန်ဆုံးသွားသည်။

တောအုပ်ထဲမှာ တရားထိုင်နေသော ရွှီချင်းက ရုတ်တရက် မျက်လုံးဖွင့်လိုက်လေရာ တောက်ပသော အလင်းက သူ၏ မျက်လုံးထဲမှာ ထွန်းလင်းသွားသည်။ ယခု သူ၏ ကျင့်ကြံခြင်းစွမ်းအားကို ခုနစ်ဆယ်ရာခိုင်နှုန်းအထိ ပြန်ဖြည့်တင်းနိုင်သွားသည်။

ကျန်ရှိသော ကျင့်ကြံခြင်းစွမ်းအားကို ပြန်ဖြည့်တင်းရန်တော့ အချိန်ပိုကြာမြင့်လိမ့်မည်။ အဘယ့်ကြောင့်ဆိုသော် အရှင်သခင်အဆင့် တာအိုလက်နက်ကို အတင်းအကျပ် အသုံးပြုခြင်း၏ ဘေးထွက်ဆိုးကျိုးက သူ၏ ဝိညာဉ်ကို အကြီးအကျယ် ဒဏ်ဖြစ်စေခဲ့သည်။

သို့သော်လည်း အပြည့်အဝ သူကောင်းမွန်သွားသည်နှင့် သူ၏ ဝိညာဉ်က ထုဆစ်ပုံသွင်းခံလိုက်ရပြီး ယခင်ကထက် ပိုပြီးသန့်စင်လာလိမ့်မည်ဖြစ်ကြောင်း ရွှီချင်း ခံစားမိသည်။

“ အခု… ဒီနေရာက ဘယ်မှာလဲဆိုတာ ကြည့်ကြည့်ရအောင် ”

ရွှီချင်းက ခေါင်းမော့လိုက်သည့်အခါ စူးရှတောက်ပသော အလင်းက သူ၏ မျက်လုံးထဲမှာ လင်းလက်သွားသည်။ နောက်အခိုက်အတန့်မှာ သူ၏ နတ်ဘုရားစိတ်အာရုံက ရွှံ့မြေခွေး၏ နတ်ဘုရားအရှိန်အဝါ၏ ဖုံးကွယ်ပေးမှုအောက်မှာ ကြယ်ဂြိုလ်တစ်ခုလုံးကို ဖုံးလွှမ်းသွားသည်။ ထိုမှတဖန် သူ၏ စိတ်အာရုံက ကြယ်တာရာကောင်းကင်အထိ ဖြန့်ကြက်သွားသည်။

အရမ်းသိပ်သည်းတဲ့ ဒြပ်နှောတွေ… ပြီးတော့ နတ်ဘုရားအားလှိုင်းအတတ်အကျတွေ…

ဒီနေရာက အမှတ်ငါးကြယ်တာရာစက်ဝန်း မဟုတ်ဘူး…

ထိုအဖြေကို အစကတည်းက သူခန့်မှန်းထားပြီးသား ဖြစ်သော်လည်း ယခု ဤဧရိယာကို အပြည့်အဝ သူအာရုံခံမိသွားသောအခါ ရွှီချင်းက သက်ပြင်းမချမိဘဲ မနေနိုင်ပေ။

ဤနေရာမှာ အနီရောင်ကြယ်တာရာကောင်းကင်ရှိပြီး ယင်းက သူမရင်းနှီးသော ကြယ်တာရာကောင်းကင် ဖြစ်သည်။

ယခင်က နတ်သမီး၏ ဝမ်းသာပျော်ရွှင်မှုကို သူပြန်အမှတ်ရသွားသောအခါ ဤနေရာက အမှတ်လေးကြယ်တာရာစက်ဝန်းဖြစ်ရန် အတော်လေး ရာခိုင်နှုန်းများကြောင်း ရွှီချင်း သုံးသပ်လိုက်နိုင်သည်။

ယခု သူရှိနေသော ကြယ်ဂြိုလ်သည်တော့…

ရွှီချင်း၏ နတ်ဘုရားစိတ်အာရုံက အောက်ဘက်သို့ ရွှေ့ပြောင်းသွားသည်။ ယခု သူရှိနေသော ကြယ်ဂြိုလ်က ကြယ်စင်စုတစ်ခု၏ အစွန်အဖျားမှာ ဖြစ်သည်။

ကြယ်ဂြိုလ်သည် မြစိမ်းရောင်ဖြစ်ပြီး အာကာသထဲမှာ ဖြည်းညင်းစွာ လှည့်ပတ်နေသည်။ ရံဖန်ရံခါ အသက်ရှူထုတ်သံက ကြယ်ဂြိုလ်၏ အတွင်းပိုင်းထဲမှ အလွန်ထူထဲသော ကျောက်အလွှာများကြားထဲမှ ပေါ်ထွက်လာလေ့ ရှိသည်။

ကြယ်ဂြိုလ်၏ မျက်နှာပြင်ပေါ်တွင် သလင်းကျောက်လွင်ပြင်တစ်ခု တည်ရှိပြီး လွင်ပြင်ထဲတွင် မရေမတွက်နိုင်သော နွားသိုးများ နေထိုင်ကြသည်။ ထိုနွားသိုးများသည် သာမန်သားရဲများ ဖြစ်ပုံမရချေ။ အဘယ့်ကြောင့်ဆိုသော် ၎င်းတို့ဆီမှာ အတောင်ပံများနှင့် အကြေးခွံများ ရှိသည်။

၎င်းတို့၏ အကြေးခွံများက တမူထူးခြားပြီး ကမ္ဘာမြေ၏ သွေးကြောများကို ပဲ့တင်ပြန်နေဟန် ရသည်။ ၎င်းတို့ အတောင်ပံတဖျပ်ဖျပ်ခတ်လိုက်တိုင်း မရေမတွက်နိုင်သော အလင်းစက်များက နေရာအသီးသီးသို့ ပြန့်ကျဲသွားကြလိမ့်မည်။

ပိုပြီးထူးခြားဆန်းကြယ်သည်မှာ ၎င်းတို့က အသိဉာဏ်ရှိကြသည်။ သို့ဖြစ်၍ ၎င်းတို့ဆီမှာ ကိုယ်ပိုင်အမျိုးအနွယ်နှင့် တိုင်းပြည်တစ်ခုပင် ရှိသည်။

၎င်းတို့၏ တိုင်းပြည်ထဲမှာ နတ်ဘုရားများကို ကိုးကွယ်ပူဇော်ရန် ဘုရားကျောင်းများကို ဆောက်လုပ်ထားကြသည်။ နေ့စဉ်နေ့တိုင်း ၎င်းတို့က နတ်ဘုရားများကို ယဇ်ပူဇော်ပသကြသည်။

၎င်းတို့ကိုးကွယ်ပူဇော်သော နတ်ဘုရားသည်တော့ ၎င်းက အရောင်တောက်ပသော လိပ်ပြာတစ်ကောင် ဖြစ်သည်။

ထိုနတ်ဘုရားက အစစ်အမှန်နတ်ဘုရားအဆင့်မှာ မဟုတ်ပေ။ ယင်းအစား ၎င်းက နတ်ဘုရားယဇ်ပလ္လင်အဆင့်မှာ ဖြစ်သည်။ သေဆုံးနေသော အကြေးခွံနွားသိုးတစ်ကောင်က ဘုရားကျောင်းတစ်ခု၏ အရှေ့မှာ လဲလျောင်းနေစဉ် ၎င်းက ရောင်စုံလိပ်ပြာအဖြစ် တဖြည်းဖြည်း အသွင်ပြောင်းလဲသွားပြီး ဘုရားကျောင်းနှင့် ပေါင်းစပ်သွားကြောင်း ရွှီချင်း မြင်တွေ့ခဲ့သည်။

သို့သော်လည်း နတ်ဘုရားများက ဤတစ်နေရာတည်းမှာသာ ရှိခြင်းမဟုတ်ပေ။

အကြေးခွံနွားအုပ်နှင့် အလွန်ဝေးကွာသော နေရာတစ်နေရာတွင် အရောင်တောက်ပသော မှိုပင်အများအပြားက စုဝေးရှိနေကြသည်။

မှိုပင်များက လေထဲမှာ သီချင်းညည်းနေကြပြီး ၎င်းတို့၏ သဘာဝအစိတ်အပိုင်းများဖြင့် မြေအောက်မှိုတိုင်းပြည်တစ်ခုကို တည်ဆောက်ထားကြသည်။ ထူးခြားချက်အနေဖြင့် ၎င်းတို့က ကောင်းကင်မီးတောက်ထဲသို့ ခုန်ဆင်းသွားကြလေ့ရှိပြီး ကိုယ့်ကိုယ်ကိုယ် လောင်ကျွမ်းပစ်ကာ အပြာရောင်မြူခိုးအဖြစ် ပြောင်းလဲစေသည်။

ထိုမြူခိုးထဲတွင် ပုစဉ်းရင်ကွဲများက ဝဲပျံနေကြပြီး ၎င်းတို့၏ ကြည်လင်သော ဝမ်းဗိုက်ထဲတွင် ၎င်းတို့မျိုးနွယ်၏ ကိုးကွယ်ပူဇော်ခံ နတ်ဘုရားပုံရိပ်က ထင်ရှားစွာ ထွက်ပေါ်နေသည်။

လူသားပုံသဏ္ဍာန် သက်ရှိများသည်လည်း ဤကြယ်ဂြိုလ်ပေါ်မှာ နေထိုင်ကြသည်။

၎င်းတို့က အနောက်တောင်ပိုင်းဒေသကြီး၏ သံလိုက်အားလှိုင်းပြင်းထန်သော နေရာတွင် နေထိုင်ကြသည်။ ၎င်းတို့က ၎င်းတို့၏ နေအိမ်များကို အမြဲတမ်း ရွေ့လျားနေကြသော သလင်းကျောက်တောအုပ်များပေါ်မှာ တည်ဆောက်ထားကြသည်။

ထူးဆန်းသော ထိုတောအုပ်များက လျှပ်စီးများ စားသုံးရခြင်းကို နှစ်သက်ကြသည်။ ထို့ပြင် တောအုပ်များမှ ပြန်ထုတ်လွှတ်လိုက်သော မိုးကြိုးသွားများကို ထိုလူသားသက်ရှိများက နတ်ဘုရားအပြစ်ဒဏ်အဖြစ် သတ်မှတ်ကြသည်။

ယင်းက အမှန်တကယ်ပင် နတ်ဘုရားအပြစ်ဒဏ် ဖြစ်သည်။ ရွှီချင်း၏ နတ်ဘုရားစိတ်အာရုံက ထိုမိုးကြိုးသွားများထဲမှ နတ်ဘုရားအရှိန်အဝါကို ရှင်းလင်းစွာ အာရုံခံမိခဲ့သည်။

ထိုအရာများအပြင် ရွှီချင်း၏ စိတ်အာရုံကို အမှန်တကယ် ဖမ်းစားနိုင်ခဲ့သည်မှာ မိုးကောင်းကင်ပေါ်မှ မြစိမ်းရောင်အလင်းစက်ဝိုင်း(၃၆၀)ခု ဖြစ်သည်။ ယင်းတို့က အတောင်ပံဆယ့်နှစ်ခုပါသော အလင်းပုံရိပ်များ၏ ဇစ်မြစ်ဖြစ်ပြီး ယင်းတို့က ရှေးဟောင်းဘုရားကျောင်းများနှင့် ဆင်တူကြသည်။

သို့သော်လည်း အများစုက အရောင်မှေးမှိန်နေကြသည်။

“ အစစ်အမှန်နတ်ဘုရားတွေ မရှိဘူး… ဒီနေရာက ပုန်းအောင်းဖို့ သင့်တော်တယ် ”

အချိန်အတော်ကြာပြီးနောက် ရွှီချင်းက သူ၏ နတ်ဘုရားစိတ်အာရုံကို ပြန်ရုပ်သိမ်းလိုက်သည်။ တစ်ခဏ တွေးတောစဉ်းစားပြီးနောက် ဤကြယ်ဂြိုလ်မှ သူမထွက်သွားမီ သူ၏ ကျင့်ကြံခြင်းစွမ်းအားကို အပြည့်အဝ ပြန်ဖြည့်တင်းရန် ဆုံးဖြတ်လိုက်သည်။

သူက ခန္ဓာကိုယ်ကို တစ်ချက်လှုပ်ရှားလိုက်ပြီး တောအုပ်ထဲမှ ပျောက်ကွယ်သွားသည်။

သူပြန်ပေါ်လာသည့်အခါ ခရမ်းရောင်သလင်းကျောက်တောင်တစ်လုံးပေါ်သို့ ရောက်ရှိသွားသည်။ သူက တောင်ပေါ်မှာ လှိုဏ်ဂူတစ်ခုကို တူးဖော်လိုက်ပြီး စတင်ကျင့်ကြံလိုက်သည်။

အချိန်က တရွေ့ရွေ့ ကုန်ဆုံးသွားသည်။

အပြင်ဘက်တွင် ကြယ်ဂြိုလ်က လှည့်ပတ်နေပြီး ကောင်းကင်မီးတောက်က ရံဖန်ရံခါ ရွာသွန်းလေ့ ရှိသည်။

အကြေးခွံနွားသိုးများက ၎င်းတို့၏ ယဇ်ပူဇော်မှုကို အကြိမ်သုံးဆယ် ပြုလုပ်ခဲ့ကြသည်။ တစ်ကြိမ်ယဇ်ပူဇော်ပြီးသွားတိုင်း ၎င်းတို့၏ နတ်ဘုရားက ပိုပြီးအရောင်တောက်ပလာလိမ့်မည်။

မှိုပင်များထံမှ သီချင်းညည်းသံက ကောင်းကင်မီးတောက်ထဲသို့ ခုန်ဝင်သွားကြသော ၎င်းတို့၏ ကိုယ့်ကိုယ်ကိုယ် ယဇ်ပူဇော်မှုအတွက် ဈာပနတေးသံများ ဖြစ်လာသည်။ အချိန်ကြာလာသည်နှင့်အမျှ ကောင်းကင်ပေါ်သို့ မြှောက်တတ်သွားသော မြူခိုးက ပိုပြီးသိပ်သည်းလာသည်။

တောအုပ်က ကြယ်အလင်းရောင်၏ မှတ်ဉာဏ်များကို ဆက်လက် မှတ်တမ်းတင်နေပြီး ကြယ်အမှုန်အမွှားများအဖြစ် ရက်လုပ်ပေးနေသည်။

ဤအတောအတွင်းမှာ တောအုပ်က အမည်မသိ လူသားကျင့်ကြံသူတစ်ယောက်၏ မှတ်ဉာဏ်များကို ကြယ်အလင်းရောင်ထံမှတဆင့် စုပ်ယူခဲ့သည်။

ထိုမြင်ကွင်းထဲတွင် ဆံပင်ဖြူနေသော ကျင့်ကြံသူတစ်ယောက်က သေဆုံးနေသော သူ့ဇနီးကို ပွေ့ဖက်လျက် ပူဆွေးသောကနှင့်တကွ ရူးသွပ်သွားသည်။ သူက ကောင်းကင်ဘုံကို မော့ကြည့်လျက် မိုးကောင်းကင်ကို ကျိန်ဆဲလိုက်သည်။ ထို့နောက် သူက လေပေါ်သို့ ပျံတတ်သွားပြီး ကောင်းကင်ဘုံဆန့်ကျင်သော တိုက်ပွဲကို ဆင်နွှဲလိုက်သည်။

တိုက်ခိုက်သံများကို မည်သူမှ မကြားနိုင်ပေ။ သို့သော်လည်း ထိုမြင်ကွင်းထဲမှ ရူးသွပ်မှုက တောအုပ်၏ ဘေးပတ်ဝန်းကျင်ကို သွေးလွှမ်းသွားစေသည်။

ရွှီချင်း၏ ကျင့်ကြံခြင်းသည်တော့ ဤတစ်လအတွင်းမှာ ကိုးဆယ်ရာခိုင်နှုန်းခန့် ပြန်ဖြည့်တင်းသွားခဲ့သည်။

သူက တစ်ရာရာခိုင်နှုန်း ပြန်ဖြည့်တင်းရန် ဆက်လက် ကျင့်ကြံနေစဉ်…

တစ်နေ့မှာတော့…

ထူးဆန်းသော အသံက ဤကြယ်ဂြိုလ်မှ ကမ္ဘာမြေသွေးကြောများ၏ နက်ရှိုင်းသော အသက်ရှူထုတ်မှုထဲမှ ရုတ်တရက် ထွက်ပေါ်လာသည်။

“ နတ်ဧကရာဇ်ချီအူဇီက အမိန့်ထုတ်ပြန်လိုက်တယ်… လူသားကျင့်ကြံသူတစ်ယောက်က နတ်သမီးနဲ့အတူ ထွက်ပြေးသွားခဲ့တယ်… နတ်ဘုရားတွေအားလုံး အမှတ်လေးကြယ်တာရာစက်ဝန်းထဲက ကြယ်အဖွဲ့အစည်းဘီလီယံပေါင်းများစွာထဲမှာ လိုက်လံရှာဖွေကြပါ… သူ့ကို ရှာတွေ့တဲ့ ဘယ်သူမဆို မူလအနှစ်သာရ တစ်ရာယူနစ် ချီးမြှောက်ခံရမယ်… သူ့ကို အရှင်ဖမ်းဆီးနိုင်တဲ့လူက နတ်ဘုရားအရှင်သခင်အဆင့် တာအိုလက်နက်တစ်ခု ချီးမြှောက်ခံရမယ် ”

ထိုနတ်ဘုရားအသံက ကြောက်မက်ဖွယ်ကောင်းသော နတ်ဘုရားစိတ်အာရုံနှင့်တကွ ဤကြယ်ဂြိုလ်၏ ကြယ်တာရာကောင်းကင်ပေါ်မှာ ပဲ့တင်ထပ်သွားသည်။