အစစ်အမှန်နတ်ဘုရားများ ပိုက်စိတ်တိုက်ရှာဖွေလာခြင်း

ရွှီချင်းပြန်ရောက်လာသည့်အခါ အိပ်ခန်းဆောင်ထဲမှ အရာအားလုံးက ပုံမှန်ပြန်ဖြစ်သွားသည်။ အခန်းထဲမှ ညှို့ဓာတ်ပြင်းသော လေထုသည်လည်း ပျောက်ကွယ်သွားသည်။

ထို့နောက် ရွှီချင်း၏ မျက်လုံးကို ကြိုဆိုလိုက်သည်မှာ ထူးဆန်းသော တခြားမြင်ကွင်းတစ်ခု ဖြစ်သည်။

ကြယ်တာရာမျက်လုံးနတ်သမီးက နေရာမှာ မျက်လုံးမှိတ်လျက် ထိုင်နေသည်။

ရွှံ့မြေခွေးက ၎င်း၏ အနောက်မှာ မတ်တတ်ရပ်နေပြီး ဆံပင်ဖြီးပေးနေသည်။ သစ်သားဘီးက ပိုးသားသဖွယ် ပျော့ပျောင်းနူးညံ့သော ၎င်း၏ ဆံခြည်မျှင်များကို ဖြတ်သန်းသွားစဉ် နတ်သမီးက လှုပ်ရှားမှုကင်းမဲ့စွာ ဆက်ရှိနေသည်။

ရွှီချင်း၏ အမူအရာက ထူးဆန်းသွားသည်။ အနီးကပ် သူစိုက်ကြည့်လိုက်သည့်အခါ ယခင်က ခမ်းခြောက်သွားခဲ့သော နတ်သမီး၏ မူလအနှစ်သာရက ယခု ပြန်လည်သက်ဝင်လှုပ်ရှားလာကြောင်း ရှာတွေ့သွားသည်။

ထို့ပြင် မူလအနှစ်သာရပမာဏက သိသိသာသာ ပိုတိုးပွားလာသည်။

ထို့ကြောင့် သူက ရွှံ့မြေခွေးကို လှည့်မကြည့်ဘဲ မနေနိုင်ပေ။

ရွှံ့မြေခွေးက နူးညံ့စွာ တခစ်ခစ်ရယ်လိုက်သည်။

“ သခင်လေး… အခုကစပြီး ကြယ်တာရာမျက်လုံးကို ကြမ်းကြမ်းတမ်းတမ်း မဆက်ဆံရတော့ဘူးနော်… ဒီညီမလေးက ငါတို့နဲ့ အပြည့်အဝ ပူးပေါင်းဆောင်ရွက်မယ်လို့ သဘောတူလိုက်ပြီ ”

“ ဟုတ်တယ်မလား ကြယ်တာရာမျက်လုံး ”

ရွှံ့မြေခွေးက စကားပြောနေရင်း ခန္ဓာကိုယ်ကို ကိုင်းညွတ်လိုက်ပြီး ကြယ်တာရာမျက်လုံး၏ နားထဲသို့ ပူနွေးသော လေကို မှုတ်လိုက်သည်။

ကြယ်တာရာမျက်လုံးက ခန္ဓာကိုယ်တုန်ယင်သွားပြီး မျက်လုံးဖွင့်လိုက်ကာ ရွှီချင်းကို ကြည့်လိုက်သည်။

ဤတစ်ကြိမ်တွင် ရွှီချင်းအပေါ်ထားသော ၎င်း၏ မုန်းတီးမှုနှင့် အငြိုးအတေးက ကြီးကြီးမားမား လျော့ကျသွားသည်။

၎င်း၏ အမြင်တွင် ရွှီချင်းက အိမ်မက်ဆိုးမဟုတ်တော့ပေ။

ရွှီချင်းက သူ၏ ကျင့်ကြံခြင်းအတွက် ၎င်းထံမှ မူလအနှစ်သာရကိုသာ စုပ်ယူခဲ့သည်။ သူ၏ ကြမ်းတမ်းမှုက ထိုမျှသာ ဖြစ်သည်။ ၎င်းတို့က အစကတည်းက ရပ်တည်မှုမတူညီကြလေရာ ယင်းက ထူးဆန်းသောအရာ မဟုတ်ပေ။

သို့သော်လည်း ၎င်း၏ အနောက်မှ ရွှံ့မြေခွေးသည် တကယ့်အိမ်မက်ဆိုး ဖြစ်သည်။

သူက ၎င်း၏ နှလုံးသားထဲမှာ ခိုအောင်းနေသော မိစ္ဆာ၊ အသူရာချောက်နက်နှင့် အဆုံးမဲ့နတ်ဆိုး ဖြစ်သည်။

သန့်စင်သော အနှစ်သာရနှင့် တော်ဝင်သွေးမျိုးဆက်ကို ပိုင်ဆိုင်ထားသော နတ်ဘုရားတစ်ပါးအနေဖြင့် ၎င်းက တစ်ခါမှ ထိုသို့အစော်ကားမခံရဖူးပေ။ ၎င်း၏ အသိစိတ်က ပြိုကွဲသွားပြီး စိတ်ခံစားချက်များက ထိန်းချုပ်မရအောင် ပေါ်လျှိုးလာစဉ်…

၎င်းက မသန့်စင်တော့ကြောင်း ကိုယ့်ကိုယ်ကိုယ် သိလိုက်သည်။

ယခု ၎င်း၏ နှလုံးသားထဲမှာ စိတ်ခံစားချက်များနှင့် လိုအင်ဆန္ဒများဖြင့် ပြည့်နှက်နေသည်။ ယင်းတို့က ၎င်းမရင်းနှီးသော ခံစားချက်များ ဖြစ်သည်။

၎င်းက နတ်ဘုရားသဘာဝကို ဆုံးရှုံးသွားသည်။

ဤအခိုက်အတန့်မှာ နတ်သမီးက ရွှီချင်းထံသို့ လက်မြှောက်လိုက်သည်။

မူလအနှစ်သာရစီးကြောင်းများက ၎င်း၏ လက်ထဲမှ ပေါ်လျှိုးလာပြီး ရွှီချင်းထံသို့ ဦးတည်သွားသည်။ ယင်းက ရွှီချင်း၏ ဒွါရခုနစ်ပေါက်မှတဆင့် သူ၏ ခန္ဓာကိုယ်ထဲသို့ ဝင်ရောက်သွားပြီး သူ၏ ကျင့်ကြံခြင်းအခြေခံကို အာဟာရဖြည့်ပေးလိုက်သည်။

ထိုမြင်ကွင်းက ရွှီချင်းကို ပိုပြီးစူးစမ်းချင်စိတ်ဖြစ်ပေါ်စေသည်။

ကိုယ်တိုင်ပေးအပ်ခြင်းနှင့် အတင်းအဓမ္မထုတ်ယူခြင်းက လုံးဝမတူညီသောအရာ ဖြစ်သည်။ ယင်းက မူလအနှစ်သာရကို ပိုပြီးသန့်စင်စေသည်။

“ မင်း ဘယ်လိုလုပ်လိုက်တာလဲ ”

ရွှီချင်းက ရွှံ့မြေခွေးကို မေးသည်။

သူက ရွှံ့မြေခွေး၏ ဖယောင်းစက်ချပြီးနောက် လုပ်ဆောင်မှုများကို မေးနေခြင်း မဟုတ်ပေ။ ယင်းအစား ဤလုပ်ငန်းစဉ်တစ်ခုလုံး၏ နောက်ကွယ်မှ သဘောတရားနှင့် အကြောင်းအရင်းကို ဖြစ်သည်။

ရွှံ့မြေခွေးက ကြယ်တာရာမျက်လုံး၏ ဆံပင်ကို ညင်သာစွာ ဖြီးပေးနေရင်း ပြုံးလိုက်သည်။

“ ပုံမှန်အခြေအနေမှာဆိုရင် ကြယ်တာရာမျက်လုံးရဲ့ စိတ်ခံစားချက်တွေကို လှုံ့ဆော်ဖို့ ငါ့အတွက် မလွယ်ဘူး… ဘာပဲပြောပြော သူက အစစ်အမှန်နတ်ဘုရားတစ်ပါး ဖြစ်ခဲ့ဖူးတယ်မဟုတ်လား… ဒါပေမဲ့ သူ့ရဲ့ ကိုယ်ထဲက ချိပ်တံဆိပ်က သူ့ရဲ့ ခုခံနိုင်စွမ်းအားလုံးကို ဖြတ်တောက်ပစ်ခဲ့တယ် ”

“ ပြီးတော့ သခင်လေးလည်း အများကြီး ကူညီပေးခဲ့တယ်… မင်းရဲ့ အရင်က ကြမ်းတမ်းတဲ့ အနှစ်သာရဆွဲထုတ်မှုက ကြယ်တာရာမျက်လုံးရဲ့ စိတ်ကို ပြိုလဲစေခဲ့တယ်… သူက ကျိုးပျက်ခါနီးနေတဲ့ ဆည်နဲ့ တူတယ် ”

“ ငါလုပ်ခဲ့တာက အဲ့ဒီဆည် ကျိုးသွားအောင်လို့ နည်းနည်း တွန်းအားပေးလိုက်ရုံပါပဲ… ”

“ ပြီးတော့ ကြယ်တာရာမျက်လုံးက သေမျိုးလောကထဲ ကျရောက်သွားတဲ့အခါ ချိပ်ပိတ်မှုက ဖြေလျော့သွားတယ် ”

ရွှံ့မြေခွေးက မျက်တောင်တဖျပ်ဖျပ်ခတ်လိုက်ပြီး ရွှီချင်းကို ကြည့်လိုက်သည်။

“ ဒါနဲ့… သခင်လေးရဲ့ ခရီးစဉ်ကရော အောင်မြင်ခဲ့လား ”

ရွှီချင်းက ရွှံ့မြေခွေးနှင့် ကြယ်တာရာမျက်လုံးကို ကြည့်လိုက်ပြီး ဤကိစ္စကို နောက်ထပ် နှိုက်နှိုက်ချွတ်ချွတ် မစူးစမ်းတော့ရန် ဆုံးဖြတ်လိုက်သည်။ သူက မထူးမခြားနား ပြောသည်။

“ ဒီကနေ ငါတို့ထွက်သွားပြီး နေရာသစ်ဆီ သွားကြမယ်… အဲ့ဒီနေရာက ပိုပြီးပုန်းအောင်းလို့ အဆင်ပြေလောက်တယ် ”

“ နတ်သမီးကိုတော့… အခုကစပြီး မင်းပဲ တာဝန်ယူလိုက်ပါ… ဘာအမှားမှမရှိဘဲ မင်းလုပ်နိုင်တယ်မလား ”

ရွှံ့မြေခွေးက မျက်လုံးဝင်းလက်သွားသည်။

“ သခင်လေး စိတ်မပူပါနဲ့… ငါဘယ်တုန်းက အမှားလုပ်ဖူးလို့လဲ ”

ထိုသို့ပြောပြီးနောက် ရွှံ့မြေခွေးက သူ၏ အင်္ကျီလက်ကို ဝှေ့ယမ်းလိုက်ပြီး နှုတ်ဆိတ်နေသော ကြယ်တာရာမျက်လုံးကို ကြယ်အလင်းရောင်ဖြင့် ဖုံးလွှမ်းလိုက်သည်။ ထို့နောက် သူတို့နှစ်ယောက်က ရွှီချင်း၏ လက်ဆီသို့ ပျံသန်းသွားကြပြီး အမှတ်အသားတစ်ခုအဖြစ် ဖွဲ့စည်းသွားသည်။

ရွှီချင်းက အမှတ်အသားကို တစ်ချက်ကြည့်လိုက်သည်။ ထို့နောက် သူက လှိုဏ်ဂူထဲမှ သူတို့၏ သဲလွန်စအားလုံးကို ဖျောက်ဖျက်လိုက်သည်။ ထို့နောက် သူ၏ ခန္ဓာကိုယ်က ဝေဝါးလာပြီး ရောင်စုံအတောင်ပံများရှိသော လိပ်ပြာတစ်ကောင်အဖြစ် အသွင်ပြောင်းလဲသွားကာ ခရမ်းရောင်သလင်းကျောက်တောင်ပေါ်သို့ ပျံတတ်သွားသည်။

လိပ်ပြာက အတောင်ပံတဖျပ်ဖျပ်ခတ်နေရင်း ဟင်းလင်းပြင်ထဲသို့ ဝင်ရောက်ပျောက်ကွယ်သွားသည်။ ကောင်းကင်ပေါ်တွင်တော့ သက်တံ့အလင်းစီးကြောင်းတစ်ခုသာ ကျန်နေခဲ့သည်။

ရွှံ့မြေခွေးကို သူပြောခဲ့သော နေရာသစ်က ထုံးစံအားဖြင့် အကြေးခွံနွားသိုးတိုင်းပြည်ထဲမှ ဘုရားကျောင်းမှလွဲ၍ တခြားမဟုတ်ပေ။

မကြာမီ အကြေးခွံနွားသိုးများ၏ ဝတ်ပြုမှုအောက်မှာ ရွှီချင်းက အသွင်ပြောင်းလဲထားသော လိပ်ပြာက ဘုရားကျောင်းထဲသို့ ပြန်ရောက်လာပြီး လိပ်ပြာနတ်ဘုရားရုပ်တုအဖြစ် ဖွဲ့စည်းသွားသည်။

အလွန်အားကောင်းသော နတ်ဘုရားစွမ်းအားက ရုပ်တုထံမှ ပျံ့နှံ့ထွက်လာပြီး ဘုရားကျောင်းကို ကျော်လွန်သွားကာ အကြေးခွံနွားသိုးတိုင်းပြည်တစ်ခုလုံးကို ဖုံးလွှမ်းသွားသည်။

နတ်ဘုရားစွမ်းအားကို ခံစားမိသွားသောအခါ အကြေးခွံနွားသိုးအားလုံးက ၎င်းတို့၏ အတောင်ပံများကို ဖြန့်ထုတ်လိုက်ကြသည်။ ကြည်ညိုလေးစားမှုက ၎င်းတို့၏ မျက်လုံးထဲမှာ ပြည့်နှက်နေစဉ် ၎င်းတို့က ဝမ်းလျားမှောက်၍ ဝတ်ပြုပူဇော်လိုက်ကြသည်။

၎င်းတို့ထဲမှ နတ်ဆရာများက စိတ်လှုပ်ရှားသော တီးတိုးရေရွတ်သံများကို ထုတ်ဖော်လိုက်ကြသည်။ ၎င်းတို့က ၎င်းတို့၏ နတ်ဘုရားဘာသာစကားဖြင့် ဆုတောင်းလိုက်ကြသည်။

ရွှီချင်းက ယင်းကို အာရုံခံမိပြီးနောက် ဆက်လက် ငြိမ်သက်သွားသည်။

သူက နောက်ရက်များတွင် ဤဘုရားကျောင်းကို သိမ်းပိုက်ရန် စီစဉ်ထားပြီး လိပ်ပြာနတ်ဘုရား၏ ခန္ဓာကိုယ်ကို သူ့အတွက် အသုံးပြုလိမ့်မည်။

ယင်းက သူ၏ ဖုံးကွယ်မှုကို ပိုပြီးနက်ရှိုင်းစေလိမ့်မည်။

ဤကြယ်ဂြိုလ်ထံမှ ထွက်ခွာမည့်အချိန်နှင့်ပတ်သက်၍ ရွှီချင်းက ဆုံးဖြတ်ချက်အသစ်တစ်ခုကို ချမှတ်ခဲ့သည်။

လိပ်ပြာနတ်ဘုရား၏ မှတ်ဉာဏ်များမှတဆင့် သူက ဤကြယ်ဂြိုလ်၏ ဖွဲ့စည်းတည်ဆောက်ပုံကိုသာ နားလည်ခဲ့ခြင်း မဟုတ်ပေ။ ဤနေရာက စစ်မြေပြင်နှင့် အလွန်ဝေးကွာသည့်အပြင် ဤနေရာမှာ နတ်ဘုရားတည်နေရာပြောင်းရွှေ့ခြင်း အစီအရင်တစ်ခုရှိကြောင်းကိုလည်း သူရှာတွေ့ခဲ့သည်။

ထိုတည်နေရာပြောင်းရွှေ့ခြင်းအစီအရင်က အစစ်အမှန်နတ်ဘုရားတစ်ပါးကို မွေးထုတ်ပေးခဲ့ဖူးသော နတ်ဘုရားကလန်ထဲမှာ တည်ရှိသည်။ ထိုနတ်ဘုရားကလန်က ဤကြယ်ဂြိုလ်၏ အရှင်သခင်ဖြစ်သည်။

လိပ်ပြာနတ်ဘုရား၏ မှတ်ဉာဏ်များအရဆိုလျှင် ထိုကလန်ထဲမှာ အစစ်အမှန်နတ်ဘုရားတစ်ပါး မရှိတော့ပေ။ ယခု ကလန်ကို အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားတစ်ပါးက ဦးဆောင်နေသည်။ သို့တိုင် ၎င်းတို့က အတိတ်မှာ အစစ်အမှန်နတ်ဘုရားတစ်ပါးကို မွေးထုတ်ပေးနိုင်ခဲ့လေရာ ၎င်းတို့ဆီမှာ အစွမ်းထက်နည်းလမ်းတချို့ ရှိနေဆဲပင်။

အကယ်၍ ရွှီချင်းသာ နတ်ဘုရားကလန်ထဲသို့ တိုက်ရိုက် ထိုးဖောက်ဝင်မည်ဆိုလျှင် အောင်မြင်နိုင်ခြေက များလိမ့်မည်ဖြစ်သော်လည်း အကယ်၍ တစ်စုံတစ်ခု မှားယွင်းသွားမည်ဆိုလျှင် သူက သေချာပေါက် ဖော်ထုတ်ခံရလိမ့်မည်။

သူဖော်ထုတ်ခံရသည်နှင့် အစစ်အမှန်နတ်ဘုရားများက သူ့ဆီသို့ ရောက်ရှိလာကြလိမ့်မည်။ ယင်းက တည်နေရာပြောင်းရွှေ့မည့် သူ့အစီအစဉ်ကို အခက်အခဲဖြစ်စေလိမ့်မည်။

သို့ဖြစ်၍ သူက တစ်ခဏ တွေးတောပြီးနောက် အလျင်စလို မဆောင်ရွက်ရန် ဆုံးဖြတ်လိုက်သည်။

အဘယ့်ကြောင့်ဆိုသော် အခွင့်အရေးတစ်ခုက မကြာခင် ရောက်ရှိလာတော့မှာ ဖြစ်သည်။

လိပ်ပြာနတ်ဘုရား၏ မှတ်ဉာဏ်ထဲတွင် လွန်ခဲ့သော လအနည်းငယ်ခန့်က နတ်ဘုရားကလန်သည် ဤကြယ်ဂြိုလ်ပေါ်မှ နတ်ဘုရားအားလုံးကို ဆင့်ခေါ်ရန် အမိန့်ထုတ်ပြန်ခဲ့သည်။

၎င်းတို့က လျှို့ဝှက်နယ်မြေတစ်ခုကို စူးစမ်းရှာဖွေရန် နတ်ဘုရားကလန်နှင့် ပူးပေါင်းကြရလိမ့်မည်။

ထိုလျှို့ဝှက်နယ်မြေ၏ တည်နေရာက ဤကြယ်ဂြိုလ်၏ အပေါ်ယံမျက်နှာပြင်အောက်မှာ ဖြစ်သည်။

ရွှီချင်း၏ နတ်ဘုရားစိတ်အာရုံမှ စစ်ဆေးမှုအရ ထိုလျှို့ဝှက်နယ်မြေက ကြယ်ဂြိုလ်၏ အသက်ရှူထုတ်မှုကို ထုတ်လွှတ်ပေးနေသော ဇစ်မြစ်ဖြစ်သည်။

“ သူတို့တွေ လျှို့ဝှက်နယ်မြေထဲ ဝင်ရောက်တဲ့အချိန်က ငါ့အတွက် ထွက်ခွာဖို့ အကောင်းဆုံး အချိန်ပဲ ”

“ အခု နှစ်လလိုသေးတယ်… ”

ရွှီချင်းက မျက်လုံးမှေးကျဉ်းလိုက်သည်။ သူသိမ်းပိုက်ထားသော လိပ်ပြာနတ်ဘုရားကို လျှို့ဝှက်နယ်မြေအား စူးစမ်းလေ့လာခြင်းမှာ မပါဝင်နိုင်စေမည့် နည်းလမ်းကိုတော့ အစောကြီးကတည်းက သူစဉ်းစားထားပြီးပြီ ဖြစ်သည်။

“ ဒီကြယ်ဂြိုလ်ကနေ ချက်ချင်း ငါထွက်သွားမယ်ဆိုရင်တောင် ကြယ်တာရာကောင်းကင်ထဲက နတ်ဘုရားတွေရဲ့ ပိုက်စိတ်တိုက်ရှာဖွေတာကို ရှောင်ရှားနိုင်ဖို့ မလွယ်လောက်ဘူး… တည်နေရာပြောင်းရွှေ့ခြင်းအစီအရင်ကို အသုံးပြုတာက အလုံခြုံဆုံးနည်းလမ်းပဲ ”

“ အဲ့ဒါက အကွာအဝေးကို တိုတောင်းစေပြီး ငါ့ကို အမှတ်လေးကြယ်တာရာစက်ဝန်းရဲ့ အစွန်အဖျားဆီ ခေါ်ဆောင်သွားလိမ့်မယ် ”

“ အကာအကွယ်ကို ချိုးဖြတ်ဖို့ကတော့… ”

စိတ်ဓာတ်ပြတ်သားမှုက ရွှီချင်း၏ မျက်လုံးထဲမှာ ထွက်ပေါ်လာသည်။ သူ့မှာ ကြယ်တာရာစက်ဝန်းမြက်နှင့် ပြန်လည်ပြုပြင်မွမ်းမံထားသော ကောင်းကင်ဘုံသူတော်စင်စေတီ ရှိသည်။ ယင်းက သူ့ကို ကြယ်တာရာစက်ဝန်း၏ အကာအကွယ်အား ချိုးဖြတ်နိုင်စေပြီး အမှတ်ငါးကြယ်တာရာစက်ဝန်းဆီ ပြန်သွားနိုင်စေရန် ယုံကြည်မှုပေးသည်။

ထိုသို့တွေးတောပြီးနောက် ရွှီချင်းက မျက်လုံးမှိတ်လိုက်သည်။ သူက လိပ်ပြာနတ်ဘုရားရုပ်တုကို သူ၏ ခန္ဓာကိုယ်အဖြစ် အသုံးပြုထားစဉ် ကြယ်တာရာမျက်လုံးမှ ပေးကမ်းလာသော နတ်ဘုရားအနှစ်သာရကို တိတ်တဆိတ် စုပ်ယူလိုက်ပြီး စတင်ကျင့်ကြံလိုက်သည်။

အချိန်က တရွေ့ရွေ့ ကုန်ဆုံးသွားသည်။

နတ်ဘုရားများက ကိုယ်ပိုင်နယ်နိမိတ်ဖြင့် ရှိနေကြသောကြောင့် လိပ်ပြာနတ်ဘုရားကို ရွှီချင်းက သိမ်းပိုက်လိုက်ကြောင်း မည်သူမှ သတိမထားမိကြချေ။

ထို့ပြင် နတ်ဘုရားအများအပြားက နတ်ဘုရားကလန်၏ ဆင့်ခေါ်မှုကို တုံ့ပြန်ခဲ့ကြပြီး ကြိုတင်ပြင်ဆင်နိုင်ရန်အလို့ငှာ ကောင်းကင်ပေါ်မှ မြစိမ်းရောင်အလင်းစက်ဝိုင်းများဆီသို့ စောစီးစွာ ပျံတတ်သွားကြသည်။

ရွှီချင်းသည်တော့ နတ်ဘုရားများအပေါ် သူ၏ နားလည်သဘောပေါက်မှုနှင့် ရွှံ့မြေခွေး၏ ကူညီပေးမှုကြောင့် ယခင်ကထက် ပိုပြီးကောင်းမွန်သော ဖုံးကွယ်မှုကို ပြုလုပ်နိုင်သွားခဲ့သည်။ ထို့ပြင် ယခု သူက နတ်ဘုရားတစ်ပါး၏ ခန္ဓာကိုယ်ကို သိမ်းပိုက်ထားသည် မဟုတ်ပါလော။

သို့သော်လည်း မည်သို့ဖြစ်ပါစေ အစစ်အမှန်နတ်ဘုရားများ၏ နတ်ဘုရားစိတ်အာရုံကိုတော့ သူမရှောင်ရှားနိုင်ပေ။

သို့ဖြစ်၍ နောက်ရက်များတွင် အစစ်အမှန်နတ်ဘုရားတစ်ပါး၏ နတ်ဘုရားစိတ်အာရုံကို သူအာရုံခံမိသည်နှင့် ကြယ်တာရာမျက်လုံး၏ ခန္ဓာကိုယ်ထဲမှ အင်မော်တယ်အရှင်သခင်၏ ချိပ်တံဆိပ်ကို သူအားကိုးပြီး ချက်ချင်း ပုန်းအောင်းလိမ့်မည်။

သို့သော်လည်း လျှို့ဝှက်နယ်မြေကို နတ်ဘုရားကလန် စူးစမ်းလေ့လာမည့်နေ့က တဖြည်းဖြည်း နီးကပ်လာသည်နှင့်အမျှ နတ်ဧကရာဇ်ချီအူဇီ၏ အမိန့်တော်ကို ရရှိထားကြသော အစစ်အမှန်နတ်ဘုရားများ၏ လိုက်လံရှာဖွေမှုက ပိုပြီးခပ်စိတ်စိတ် ဖြစ်လာသည်။ ဖြစ်နိုင်သည်မှာ ၎င်းတို့၏ ယခင်စစ်ဆေးရှာဖွေမှုများက မည်သည့်သဲလွန်စကိုမှ ရှာမတွေ့ခဲ့ဟန် ရသည်။

ထို့ကြောင့် ၎င်းတို့က အသစ်တဖန် ပြန်ရှာဖွေကြသည်။

ဤတစ်ကြိမ်တွင် ၎င်းတို့က ပိုပြီးအသေးစိတ် ရှာဖွေလာကြသည်။ အရေးကြီးဆုံးမှာ ၎င်းတို့က ယခင် ရွှီချင်းရှာတွေ့ခဲ့သော ပြစ်ချက်ကိုလည်း ပြုပြင်ခဲ့ကြသည်။

အစစ်အမှန်နတ်ဘုရားများသည် နတ်သမီးနှင့် အင်မော်တယ်အရှိန်အဝါကိုသာ အဓိက အာရုံမခံကြတော့ချေ။ ၎င်းတို့က သာမန်နတ်ဘုရားများကိုလည်း စတင်စစ်ဆေးရှာဖွေလာကြသည်။

ဤသည်မှာ ၎င်းတို့က အတူတကွ ဝိုင်းဝန်း၍ ပိုက်စိတ်တိုက် စစ်ဆေးနေကြသည့်အလားပင်။ အကယ်၍ ၎င်းတို့က မူမမှန်သော တစ်စုံတစ်ခုကို ရှာတွေ့မည်ဆိုလျှင် ချက်ချင်း စုဝေးသွားကြလိမ့်မည်။

ယင်းက ရွှီချင်းကို နှလုံးမွန်းကြပ်စေသည်။

ရွှံ့မြေခွေး ဖော်ထုတ်ခံရခြင်း မခံရခြင်းက ယခု အရေးမကြီးတော့ပေ။ ရွှီချင်း၏ လက်ရှိ ရုပ်ဖျက်မှုသည်လည်း အလွန်အန္တရာယ်များသော အခြေအနေမှာ ရှိနေသည်။

ထိုအတိုင်းသာဆိုလျှင် သူနှင့် ရွှံ့မြေခွေး နှစ်ယောက်စလုံးက ကြယ်တာရာမျက်လုံး၏ အသွေးအသားထဲမှာ ပုန်းအောင်းနေရလိမ့်မည်။

သို့သော်လည်း ကြယ်တာရာမျက်လုံးကို အပြင်မှာ တစ်ယောက်တည်း ထားခြင်းက ရွှီချင်းခွင့်မပြုနိုင်သောအရာ ဖြစ်သည်။ ၎င်းက လက်တလောမှာ သူ့အပေါ် ရိုကျိုးနေသော်လည်း ရွှီချင်းက ၎င်းကို မယုံကြည်နိုင်ပေ။

သို့ဖြစ်၍ သူက ဘေးကျပ်နံကျပ်အခြေအနေသို့ ကျရောက်သွားသည်။

“ စောစောက အစစ်အမှန်နတ်ဘုရားနှစ်ပါးရဲ့ နတ်ဘုရားစိတ်အာရုံတွေက ငါ့ကို ရှာတွေ့လုနီးပါး ဖြစ်ခဲ့တယ် ”

“ သူတို့တွေ ငါ့အကြောင်းကို သိသွားကြပြီလား… နတ်ဘုရားတစ်ပါးက ငါနဲ့အတူ ရှိနေတာကို သူတို့သိသွားကြပြီလား… ဒါမှမဟုတ် ငါ့ကိုယ်ငါ နတ်ဘုရားတစ်ပါးအသွင် ရုပ်ဖျက်ထားတာကို သူတို့ရှာတွေ့သွားကြပြီလား ”

ရွှီချင်းက မျက်မှောင်ကြုတ်လိုက်သည်။

ကံကြမ္မာဆိုးဟူသည် အဖော်နှင့်တကွ ရောက်လာခြင်း မဟုတ်ပါလော။

အစစ်အမှန်နတ်ဘုရားများ၏ စစ်ဆေးရှာဖွေမှုက ပိုပြီးတင်းကျပ်လာနေစဉ် ကြယ်တာရာမျက်လုံး၏ ခန္ဓာကိုယ်ထဲမှ အင်မော်တယ်အရှင်သခင်၏ ချိပ်တံဆိပ်က နတ်ဘုရားစိတ်အာရုံများ၏ ထပ်ခါတလဲလဲ စူးစမ်းမှုကြောင့် စတင်ယိုယွင်းပျက်စီးလာသည်။

ယခု ချိပ်တံဆိပ်က တစ်ဝက်သာ အကောင်းတိုင်း ကျန်ရှိတော့သည်။

“ နောက်ထပ် ခုနစ်ရက်ကျန်သေးတယ်… ”

ရွှီချင်းက တိတ်တဆိတ် တွက်ချက်လိုက်စဉ် သူ၏ မျက်လုံးက မှိတ်တုတ်မှိတ်တုတ် လင်းလက်သွားသည်။ စိတ်မသက်မသာဖြစ်သော ခံစားမှုက သူ၏ နှလုံးသားထဲမှာ တစ်ဟုန်ထိုး အားကောင်းလာသည်။

“ အဲ့ဒီခုနစ်ရက်အတွင်းမှာ နောက်ထပ် အစစ်အမှန်နတ်ဘုရားတွေရဲ့ နတ်ဘုရားစိတ်အာရုံတွေ မရောက်လာနိုင်ဘူးလို့ ငါသေချာမပြောနိုင်ဘူး… ”

ရွှီချင်းက မျက်လုံးမှေးကျဉ်းလိုက်လေရာ စူးရှသော အလင်းတန်းက သူ၏ မျက်လုံးထဲမှာ ပေါ်လျှိုးလာသည်။ သူက မတ်တတ်ရပ်လိုက်ပြီး ဆုံးဖြတ်ချက်ချရန် ပြင်လိုက်သည်။

သို့သော်လည်း ထိုအခိုက်အတန့်မှာ ရွှံ့မြေခွေးက ရုတ်တရက် ပြောသည်။

“ သခင်လေး… ငါ့မှာ လျှို့ဝှက်အတတ်ပညာတစ်ခု ရှိတယ်… ”

ရွှီချင်းက ရပ်တန့်သွားသည်။

“ အဲ့ဒီအတတ်ပညာက အထူးနတ်ဘုရားမန္တန်တစ်ခုကို ရွတ်ဖတ်ဖို့ လိုအပ်ပါတယ်… အဲ့ဒါက ငါ့ရဲ့ နတ်ဘုရားအရှိန်အဝါကို ပြင်ပပတ်ဝန်းကျင်နဲ့ ရောနှောသွားစေပြီး ပိုပြီးကျယ်ပြောတဲ့ နတ်ဘုရားမန္တန်တစ်ခုကို လှုံ့ဆော်ပေးပါလိမ့်မယ် ”

“ တကယ်လို့ ပြင်ပပတ်ဝန်းကျင်က ရှင်းလင်းနေမယ်ဆိုရင် ဒီအတတ်ပညာက ကြီးကြီးမားမား သက်ရောက်မှုရှိမှာ မဟုတ်ပါဘူး ”

“ ဒါပေမဲ့ တကယ်လို့ ပြင်ပပတ်ဝန်းကျင်မှာ ဖရိုဖရဲနတ်ဘုရားအရှိန်အဝါနဲ့ ပြည့်နှက်နေမယ်ဆိုရင် ဒီအတတ်ပညာကို ငါအသုံးပြုတဲ့အခါ… ငါက ဖရိုဖရဲရဲ့ တစ်စိတ်တစ်ပိုင်း ဖြစ်လာပါလိမ့်မယ် ”

ရွှံ့မြေခွေးက အလျင်စလို ပြောသည်။ သူက အလွန်စိုးရိမ်ကြောင့်ကြနေသည်။ အကယ်၍ ရွှီချင်းကို နတ်ဘုရားများက ဖမ်းမိသွားမည်ဆိုလျှင် ကြယ်တာရာမျက်လုံးအပေါ် သူလုပ်ဆောင်ခဲ့သော ကိစ္စများကြောင့် သူ၏ ကံကြမ္မာက ရွှီချင်းထက် ပိုပြီးဆိုးဝါးသွားလိမ့်မည်။

မည်သို့ဖြစ်ပါစေ နတ်ဘုရားအရှင်သခင်၏ အမိန့်တော်ထဲမှာ ရွှီချင်းကို အရှင်ဖမ်းဆီးရန်ဟု ပါရှိသည်။

ထို့ကြောင့် ရွှံ့မြေခွေးက နည်းလမ်းတစ်ခုရှာဖွေရန် သူ၏ ဦးနှောက်ကို အပြင်းအထန် အလုပ်ပေးလိုက်သည်။

ယင်းကို ကြားသောအခါ ရွှီချင်း၏ မျက်လုံးက စူးစမ်းလိုမှုဖြင့် တောက်ပသွားသည်။

“ မင်းဆိုလိုချင်တာက… ငါတို့ရဲ့ တည်ရှိမှုကို မဖုံးကွယ်နိုင်မှတော့ တခြားတည်ရှိမှုတွေနဲ့ ပြည့်နှက်နေတဲ့ နေရာတစ်နေရာကို ရှာဖွေသင့်တယ် ”

ရွှံ့မြေခွေးက ချက်ချင်း သဘောတူလိုက်သည်။

“ သခင်လေး… ဒီနည်းနဲ့ဆိုရင် ငါတို့က သွယ်ဝိုက်စွာ ဖုံးကွယ်နိုင်ပါလိမ့်မယ်… အနည်းဆုံးတော့ ငါတို့ရဲ့ ဘေးကင်းလုံခြုံမှုကို တိုးမြှင့်နိုင်ပါလိမ့်မယ် ”

“ မင်း ဘယ်လောက် ယုံကြည်မှုရှိလဲ ”

ရွှီချင်းက ချက်ချင်း မေးသည်။

“ ငါးဆယ်ရာခိုင်နှုန်းပါ…”

ရွှံ့မြေခွေးက တဒင်္ဂ တုံ့ဆိုင်းသွားပြီးနောက် ပြန်ပြောသည်။

ရွှီချင်းက ခေါင်းမညိတ်ခင် တစ်ခဏ စဉ်းစားလိုက်သည်။

“ အဲ့ဒီအတတ်ပညာကို ငါ့ကို သင်ပေးပါ… အချိန်ကျလာတဲ့အခါ အဲ့ဒါကို ငါတို့အတူတူ အသုံးပြုကြမယ် ”

ရွှံ့မြေခွေးက ထိုအတတ်ပညာကို သူ၏ နတ်ဘုရားစိတ်အာရုံမှတဆင့် ရွှီချင်းထံသို့ အမြန်ပို့လွှတ်လိုက်သည်။

ထိုအတတ်ပညာက မခက်ခဲပေ။ သို့ဖြစ်၍ စက္ကန့်အနည်းငယ်ကြာ ဆင်ခြင်သုံးသပ်ပြီးနောက် ရွှီချင်းက ယင်းကို အပြည့်အဝ နားလည်သဘောပေါက်သွားသည်။ ထို့နောက် သူက နောက်ထပ် တုံ့ဆိုင်းမနေဘဲ ပြောသည်။

“ ဖရိုဖရဲအရှိန်အဝါနဲ့ ပြည့်နှက်နေတဲ့ နေရာတစ်နေရာ ရှိတယ် ”

လျှပ်တစ်ပြက်အတွင်းမှာ ရွှီချင်း၏ ခန္ဓာကိုယ်က လှုပ်ရှားသွားပြီး ဘုရားကျောင်းထဲမှ ပျောက်ကွယ်သွားသည်။ နောက်အခိုက်အတန့်မှာ သူက ကောင်းကင်ပေါ်မှာ ပြန်ပေါ်လာပြီးနောက် မြစိမ်းရောင်အလင်းစက်ဝိုင်း(၃၆၀)ခုဆီသို့ ဦးတည်ပျံသန်းသွားသည်။