ရှေးခေတ်မိခင်ဂြိုလ်

မှိန်ဖျော့ဖျော့ အစိမ်းရောင်ကြယ်တာရာအလင်းက အချိန်လေဟာနယ်အက်ကွဲကြောင်းများထဲမှာ စီးဆင်းနေပြီး လရောင်ခြည်အဖြစ် ပြောင်းလဲသွားကာ အဆုံးမဲ့သော အနက်ရောင်ရေခဲမြစ်တစ်လျှောက် ဖြာကျနေသည်။

ကြယ်တာရာအလင်းက ပိုပြီးနက်ရှိုင်းစွာ စိမ့်ဝင်နေလေရာ အလင်းရောင်က ရေခဲအတွင်းမှာ ပျံ့နှံ့သွားသည်။ ထိုအခါ ကြယ်တာရာအလင်းက ရေခဲမြစ်အောက်မှ လောက၏ ကောင်းကင်သဖွယ် ဖြစ်လာသည်။

ထိုကောင်းကင်အောက်၌ ရှေးခေတ်အရှိန်အဝါကို ထုတ်လွှတ်နေသော ဘုရားကျောင်းပျက်တစ်ခုမှလွဲလျှင် ကျန်သည့်အရာအားလုံးကို ကျောချမ်းဖွယ်ကောင်းသော အမှောင်မြူခိုးက ဖုံးလွှမ်းထားသည်။

အမှောင်မြူခိုးထဲတွင် မည်သည့်အရာကိုမှ မမြင်နိုင်သော်လည်း ချောက်ချားဖွယ်ကောင်းသော အသံများက ရံဖန်ရံခါ ပဲ့တင်ထပ်နေသည်။

ယင်းတို့က အရိုးကိုက်ဝါးသံများ၊ ပလုပ်ပလောင်း မျိုချသံများနှင့် တဂျွတ်ဂျွတ် ဝါးစားသံများ ဖြစ်ကြသည်။

ဤနေရာမှာ မှိန်ဖျော့သော အလင်းရောင်က ဘုရားကျောင်းပျက်တစ်ခုတည်းကိုသာ ဝေဝေဝါးဝါး ဖုံးလွှမ်းထားသည်။

အဝေးမှကြည့်လျှင် ယင်းက အမှောင်ညထဲမှ ဖယောင်းတိုင်မီးနှင့် ဆင်တူသည်။

ယင်းက ရေခဲမြစ်အောက်ထဲတွင် ချိပ်ပိတ်ခံထားရသော ဘုရားကျောင်း ဖြစ်သည်။

နှစ်ပေါင်းမရေမတွက်နိုင်စွာ ကြာသည်အထိ ထိုဘုရားကျောင်းက မထိခိုက်မပျက်စီးဘဲ ဆက်လက် တည်ရှိနေသည်။ ယင်း၏ ပုံသဏ္ဍာန်သည်လည်း မည်သည့်အခါမှ မပြောင်းလဲသွားဘဲ ထာဝရတည်မြဲနေသည်။

ဘုရားကျောင်း၏ အတွင်းပိုင်းထဲတွင် ရုပ်တုအပျက်ဆယ့်နှစ်ခုက အနီရောင်ယဇ်ပလ္လင်တစ်ခုကို ဝန်းရံထားကြသည်။

ယဇ်ပလ္လင်ပေါ်တွင် အချိန်ကာလဖြင့် ယိုယွင်းတိုက်စားခံထားရသော ကြေးနီရောင်တံခါးတစ်ချပ်က ထောင်မတ်နေသည်။

ဤအခိုက်အတန့်မှာ ကြေးနီရောင်တံခါးက ဖြည်းဖြည်းချင်း စတင်ပွင့်သွားသည်။

ပုံရိပ်တစ်ခုက တံခါးနောက်မှ အမှောင်ထဲမှ ဖြည်ညင်းစွာ ထွက်ပေါ်လာသည်။

သူက အနက်ရောင်ဝတ်စုံကို ဝတ်ဆင်ထားပြီး ပိန်ပါးသေးသွယ်သည်။ သူ၏ မျက်နှာက ပြိုင်ဘက်ကင်းစွာ ချောမောခန့်ညားပြီး မိစ္ဆာဆန်သော အငွေ့အသက်ကို ပေးသည်။ သူက သတိကြီးစွာထားသော အမူအရာကို ထုတ်ဖော်လျက် အပြင်သို့ ထွက်လျှောက်လာသည်။ သူ၏ ခန္ဓာကိုယ်မှလည်း ကြောက်မက်ဖွယ်ကောင်းသော စွမ်းအင်အရှိန်အဝါကို ထုတ်လွှတ်နေသည်။

ထိုသူက ကြယ်တာရာစက်ဝန်းမြက် တည်နေရာပြောင်းရွှေ့ခြင်းအစီအရင်ကို အသုံးပြုခဲ့သော ရွှီချင်း ဖြစ်သည်။

“ ဒါဘယ်နေရာလဲ… ”

ရွှီချင်းက အပြင်သို့ ရောက်ရှိသွားသည်နှင့် သူ၏ နတ်ဘုရားစိတ်အာရုံကို ချက်ချင်း ထုတ်လွှတ်လိုက်သည်။ သူက ဘေးပတ်ဝန်းကျင်ကို စစ်ဆေးကြည့်နေရင်း ဖြစ်ပေါ်လာနိုင်သော အန္တရာယ်များအတွက် အသင့်ပြင်ထားလိုက်သည်။

မည်သည့်နေရာဆီသို့ သူတည်နေရာပြောင်းရွှေ့သွားကြောင်း ရွှီချင်း မသိပေ။ သူ၏ နတ်ဘုရားစိတ်အာရုံကို ဖြန့်ကြက်လိုက်သည်နှင့် ပထမဆုံး သူအာရုံခံမိသွားသည်မှာ ဤနေရာမှ ရှေးကျသော အငွေ့အသက်နှင့် တင်းကျပ်သော လေထု ဖြစ်သည်။

သူ၏ ကျင့်ကြံခြင်းအခြေခံနှင့် နတ်ဘုရားစိတ်အာရုံသာမက သူနှင့်ပတ်သက်သော အရာအားလုံးက ဤနေရာမှာ ကြီးကြီးမားမား ဖိနှိပ်ခံလိုက်ရသည်။ သူက မပျံသန်းနိုင်တော့ပေ။

ထိုသို့နားလည်သွားခြင်းက ရွှီချင်းကို မျက်မှောင်ကြုတ်သွားစေသည်။

ကံကောင်းစွာဖြင့် သူ၏ နတ်ဘုရားစိတ်အာရုံက ဖိနှိပ်ခံထားရသော်လည်း သူ၏ ဘေးပတ်ဝန်းကျင်ကိုတော့ အာရုံခံနိုင်ဆဲပင်။ ထို့ကြောင့် သူက ယဇ်ပလ္လင်၏ ဘေးပတ်ပတ်လည်မှ ရုပ်တုအပျက်ဆယ့်နှစ်ခုကို မြင်တွေ့သွားသည်။

ထိုရုပ်တုများက ထူးခြားဆန်းကြယ်ပြီး မွန်မြတ်သန့်စင်သော စိတ်ခံစားမှုကို ပေးသည်။ သို့တိုင် ၎င်းတို့၏ မျက်နှာပြင်ပေါ်မှာ နက်ရှိုင်းသော ဆေဘာဓားရာများဖြင့် ပြည့်နှက်နေသည်။ ဤသည်မှာ ကြောက်မက်ဖွယ်ကောင်းသော တည်ရှိမှုတစ်ခုက အချိန်ကုန်ဆုံးမှုကို ၎င်း၏ လက်သည်းများဖြင့် တိုင်းတာခဲ့သည့်အလားပင်။

ထိုရုပ်တုအပျက်များနှင့် ဘေးပတ်ဝန်းကျင်ကို အာရုံခံမိသွားသောအခါ ယဇ်ပလ္လင်ပေါ်မှ ကြေးနီရောင်တံခါးအောက်မှာ မတ်တတ်ရပ်နေသော ရွှီချင်းက သူ့ကိုယ်သူ အလွန်သေးနုတ်သည်ဟု ခံစားမိသွားသည်။ ဤသည်မှာ သူက လူ့ဘီလူးတိုင်းပြည်ထဲသို့ ရောက်ရှိသွားသည့်အလားပင်။

“ ဒီနေရာက ဘုရားကျောင်းတစ်ခုလား ”

အချိန်တစ်ခဏကြာပြီးနောက် ရွှီချင်းက မျက်လုံးမှေးကျဉ်းလိုက်ပြီး တိတ်တဆိတ် တွေးတောလိုက်သည်။ မည်သည့်မူမမှန်မှုမှ ရှာမတွေ့သည့်အခါ သူက ယဇ်ပလ္လင်ပေါ်မှ ခုန်ဆင်းလိုက်သည်။ သူ၏ ဖိနပ်က အနီရောင်အုတ်ကြွပ်ပြားနှင့် ထိသွားသည့်အခါ စေးပျစ်သော အနီရောင်အရည်က သူ၏ ခြေဖဝါးအောက်မှ စိမ့်ထွက်လာသည်။

အနီရောင်အရည်က ချောက်ချားဖွယ်ကောင်းစွာ ပေါလောပေါ်နေလေရာ ဤနေရာက သွေးရေကန်ထဲမှာ တည်ရှိနေဟန် အောက်မေ့ရသည်။

အေးစက်စက်အလင်းက ရွှီချင်း၏ မျက်လုံးထဲမှာ ဖြတ်ပြေးသွားသည်။ သို့သော်လည်း သူက မရပ်တန့်ဘဲ အရှေ့သို့ ဆက်လျှောက်သွားသည်။

သူက ဘုရားကျောင်းထဲမှ ထွက်သွားချင်ပြီး အပြင်လောကကို စူးစမ်းချင်သည်။ သို့မှသာ သူ၏ လက်ရှိတည်နေရာကို ဆုံးဖြတ်နိုင်လိမ့်မည်။

အလွန်ကျယ်ပြောသော ဘုရားကျောင်းထဲတွင် တဖြည်းဖြည်း ခြေလှမ်းသံများက ပဲ့တင်ထပ်လာသည်။

ပွက်… ပွက်… ပွက်…

ဤသည်မှာ တစ်စုံတစ်ယောက်က ရေပေါ်မှာ လမ်းလျှောက်နေသည့်အလားပင်။

ယင်းက သိမ်မွေ့ပြီး ထူးခြားဆန်းကြယ်သည်။

အချိန်တစ်ခဏကြာပြီးနောက် ခြေလှမ်းသံများက အပြင်ဘက်သို့ ဦးတည်နေသော အဝေးမှ စင်္ကြံလမ်းပေါ်မှာ ရုတ်တရက် ရပ်တန့်သွားသည်။

အလွန်ရှည်လျားသော စင်္ကြံလမ်းပေါ်တွင် ရွှီချင်းက ယိုယွင်းဆွေးမြေ့နေသော နံရံတစ်ခု၏ အရှေ့မှာ ရပ်လိုက်ပြီး ခေါင်းမော့လိုက်သည်။

သူ၏ တည်ရှိမှုက လေစီးကြောင်းတစ်ခုကို လှုံ့ဆော်လိုက်ဟန် ရ၏။ ဤအခိုက်အတန့်မှာ သိမ်မွေ့နူးညံ့သော လေပြေက နံရံကို ပွတ်သပ်သွားပြီး နံရံပေါ်မှ ဖုန်မှုန့်များကို လွင့်စင်သွားစေသည်။ ထိုအခါ ဖုန်မှုန့်များဖြင့် နှစ်ပေါင်းများစွာကြာအောင် ဖုံးကွယ်ခံထားခဲ့ရသော သွေးရောင်ပန်းချီကားတစ်ချပ်က ရှင်းလင်းစွာ ထွက်ပေါ်လာသည်။

ပန်းချီကားထဲတွင် မိုးကုပ်စက်ဝိုင်းပေါ်မှာ လဲလျောင်းနေသော နတ်ဘုရားတစ်ပါးကို ဖော်ပြထားသည်။ ထိုနတ်ဘုရားက အလွန်ပိန်ချုံးနေလေရာ အရိုးစုနှင့် မခြားပေ။ ပန်းချီကားထဲမှာ ၎င်း၏ နံရိုးများက တောင်တန်းများအဖြစ် ပြောင်းလဲနေပြီး ကြေးနီရောင်ကြယ်ဂြိုလ်များက ၎င်း၏ သွေးကြောများအတွင်းမှာ ရွေ့လျားနေကြသည်။

၎င်း၏ ဘေးပတ်ဝန်းကျင်တွင် လောဘစိတ်ဆန္ဒဖြင့် ပြည့်နှက်နေ‌သော အပြာရောင်မျက်လုံးများက မရေမတွက်နိုင်အောင် များပြားလှသည်။

အချိန်တစ်ခဏကြာပြီးနောက် ရွှီချင်းက အဝေးသို့ လှမ်းကြည့်လိုက်သည်။

စိတ်ရှုပ်ထွေးမှုနှင့် အမျိုးအမည်မသိသော စိတ်ခံစားမှုက သူ၏ နှလုံးသားထဲမှာ ပိုပြီးအားကောင်းလာသည်။

“ ဒီနေရာက တကယ်ပဲ ဘာလဲ ”

ရွှီချင်းက တွေးတောလိုက်သည်။ ထို့နောက် သူ၏ အကြည့်က စင်္ကြံ၏ လမ်းအဆုံးမှ ထွက်ပေါက်ဆီသို့ ကျရောက်သွားသည်။

တစ်ခဏကြာပြီးနောက် ရေပေါ်မှာ လမ်းလျှောက်သံများက တိတ်ဆိတ်နေသော ဘုရားကျောင်းထဲမှာ နောက်တစ်ကြိမ် ပဲ့တင်ထပ်လာသည်။ ယင်းက ဆယ့်ငါးမိနစ်ကြာမြင့်ခဲ့သည်။

ဘုရားကျောင်းအပြင်ဘက်မှ လောကက မည်းမှောင်နေစဉ် မှိန်ဖျော့ဖျော့ ထွန်းလင်းနေသော ဘုရားကျောင်း၏ တံခါးက အတွင်းဘက်မှ ဖြည်းညင်းစွာ တွန်းပွင့်သွားသည်။

ကျယ်လောင်သော မြည်သံက အမှောင်လောကထဲမှာ ချက်ချင်း ပဲ့တင်ထပ်သွားသည်။

ချက်ချင်းဆိုသလို တဂျွတ်ဂျွတ် ဝါးစားသံများက ရပ်တန့်သွားသည်။

ထို့နောက် အပြာရောင်မျက်လုံးများက ဘုရားကျောင်း၏ ဘေးပတ်ဝန်းကျင်မှ အမှောင်ထုထဲမှာ ရုတ်တရက် ထွက်ပေါ်လာကြသည်။ ၎င်းတို့အားလုံးက ဘုရားကျောင်း၏ တံခါးဆီသို့ စိုက်ကြည့်နေကြသည်။

တစ်ချိန်တည်းမှာ ဘုရားကျောင်းထဲမှ မှိန်ဖျော့ဖျော့အလင်းရောင်က တံခါးပေါက်ကို ဖြတ်သန်း၍ အပြင်ဘက်သို့ ပျံ့နှံ့သွားသည်။ ယင်းက နောက်ဆုံးလျှပ်စီးလက်ခြင်းမှ အလင်းရောင်သဖွယ် ဘေးပတ်ဝန်းကျင်ကို ထွန်းလင်းပေးလိုက်သည်။

ယင်းက ဘုရားကျောင်းထဲမှ ထွက်လျှောက်လာသော ရွှီချင်းကို အရာအားလုံးအား ရှင်းရှင်းလင်းလင်း မြင်နိုင်သွားစေသည်။

မြေပြင်ပေါ်မှာ အလောင်းများက ပြန့်ကျဲနေသည်။

၎င်းတို့က မရေမတွက်နိုင်သော နတ်ဘုရားအလောင်းများ ဖြစ်ကြသည်။

၎င်းတို့က မျိုးနွယ်စုအသီးသီးထံမှ ဖြစ်ကြသည်။

၎င်းတို့က မတူညီသော ခေတ်အသီးသီးထံမှ ဖြစ်ကြသည်။

၎င်းတို့ထဲမှ အများစုက အရိုးစုများအဖြစ် ပြောင်းလဲသွားကြသည်။ ၎င်းတို့ထဲမှ အနည်းစုသာလျှင် အသွေးအသားများ ကျန်ရှိကြတော့သည်။

၎င်းတို့က အလွှာအထပ်ထပ် စုပုံနေကြပြီး အဆုံးမဲ့သလို အကန့်အသတ်မဲ့သည်။

ယင်းကို မြင်သွားသည့်အခါ ရွှီချင်း၏ သူငယ်အိမ်က စူးရှသော အလင်းတန်းနှင့်အတူ ကျုံ့သွားသည်။

ဤသည်မှာ ထိုမျှများပြားသော နတ်ဘုရားအလောင်းများကို ပထမဆုံးအကြိမ် သူမြင်ဖူးခြင်း ဖြစ်သည်။ ကြယ်တာရာစက်ဝန်းနှစ်ခုကြားမှ စစ်မြေပြင်မှာပင် ထိုမျှများပြားသော နတ်ဘုရားအလောင်းများကို သူမမြင်ခဲ့ရပေ။

သူ့ကို ပိုပြီးနှလုံးတုန်သွားစေသည်မှာ မရေမတွက်နိုင်သော နတ်ဘုရားအလောင်းများကြားထဲမှ သက်ရှိများ ဖြစ်ကြသည်။

၎င်းတို့က ထူးခြားဆန်းကြယ်သော သက်ရှိများ ဖြစ်ကြသည်။

၎င်းတို့၏ ခန္ဓာကိုယ်က အရိုးစုနှင့် ဆင်တူပြီး အညိုရောင်ရှိသည်။ ၎င်းတို့၏ နံရိုးဆယ့်နှစ်ချောင်းသည်လည်း အချိုးအစားမညီဘဲ အပြင်သို့ ပြန့်ကားနေကြသည်။ ၎င်းတို့၏ ဘယ်ဘက်နံရိုးများက မဟူရာခရမ်းရောင်အမြှေးပါးဖြင့် ဆက်သွယ်ခံထားရပြီး အသက်ရှူသွင်းလိုက်တိုင်း အမြှေးပါးက ဖောင်းကြွလာလိမ့်မည်။ ထိုဘယ်ဘက်နံရိုးများပေါ်တွင် အစာချေဖျက်ခံနေရသော နတ်ဘုရားအသွေးအသားများက ထင်ရှားစွာ ထွက်ပေါ်နေသည်။

ညာဘက်နံရိုးများသည်တော့ သလင်းကျောက်သဖွယ် မာကျောပြီး နတ်ဘုရားမျက်နှာများက ယင်းတို့၏ မျက်နှာပြင်ပေါ်မှာ အပြင်ဘက်သို့ တိုးထွက်နေကြသည်။

ထိုမျက်နှာများက ရေစီးကြောင်းတစ်ခုသဖွယ် ဖွဲ့စည်းနေပြီး ဦးခေါင်းပေါ်မှ အသားပိုထဲသို့ ဆက်တိုက် စီးဆင်းနေကာ အလွန်ကျယ်ပြောသော ဧရိယာကို သိမ်းပိုက်ထားသည်။ အချိန်တိုင်းမှာ မျက်နှာများက တစ်ခုပြီးတစ်ခုဖြင့် အစားထိုးခံနေရသည်။

မျက်နှာတစ်ခုစီက မတူညီသော်လည်း ၎င်းတို့အားလုံးမှာ တူညီသော အပြာရောင်မျက်လုံးများ ရှိကြသည်။

၎င်းတို့၏ ခြေလက်များသည်တော့ သေးငယ်သော အရိုးအဆူးချွန်များဖြင့် ဖုံးလွှမ်းခံထားရသည်။ ၎င်းတို့၏ ကျောရိုးများသည် ဇောက်ထိုး ကြီးထွားနေကြသည်။

အရိုးအဆူးချွန်များက အရွယ်အစား ပိုပြီးကြီးမားလေ ပိုပြီးအပြာရောင်တောက်ပလေ ဖြစ်သည်။ ပိုပြီးကြီးမားသော အရိုးအဆူးချွန်များက ၎င်းတို့၏ ဇတ်ပိုးထဲမှ အပြင်ဘက်သို့ တိုးထွက်နေကြသည်။

ထိုအရိုးအဆူးချွန်များ၏ ထိပ်ဖျားတွင် ပိန်ချုံးနေသော လက်ချောင်းတစ်ချောင်းစီ ရှိကြသည်။

၎င်းတို့က ရွှီချင်းကို စူးစိုက်ကြည့်နေကြစဉ် ထိုလက်ချောင်းများက အရိုးအဆူးချွန်များနှင့်တကွ လူးလွန့်သွားကြသည်။

ယင်းကို မြင်သောအခါ စူးရှသော အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။ ပြင်းထန်သော အန္တရာယ်သတိပေးမှုက သူ၏ နှလုံးသားထဲမှာ ပေါ်လျှိုးလာသည်။ တစ်ချိန်တည်းမှာ သူက ရင်းနှီးကျွမ်းဝင်မှုကို ခံစားမိသွားသည်။

“ အဲ့ဒီသက်ရှိတွေကို အရင်က တစ်နေရာရာမှာ ငါမြင်ခဲ့ဖူးတဲ့ပုံပဲ ”

ရွှီချင်း နောက်ထပ် မတွေးတောနိုင်ခင်မှာ နားဝင်စူးရှသော အော်ဟစ်သံများက ဘုရားကျောင်းအပြင်ဘက်မှ ဆန်းကြယ်သက်ရှိများထံမှ ရုတ်တရက် ပဲ့တင်ထပ်လာသည်။

အလွန်စူးရှသော အသံလှိုင်းများက အရပ်မျက်နှာအဘက်ဘက်တွင် ပေါက်ကွဲသွားပြီး အလွန်အားကောင်းသော လောဘစိတ်ဆန္ဒက လွှမ်းမိုးဖိနှိပ်စွာ ထွက်ပေါ်လာသည်။

နောက်အခိုက်အတန့်မှာ လေကြမ်းက တိုက်ခတ်လာသည်။

မရေမတွက်နိုင်သော ဆန်းကြယ်သက်ရှိများက အရပ်မျက်နှာပေါင်းစုံမှ ရွေ့လျားလာကြပြီး ရွှီချင်းထံသို့ တန်းမတ်စွာ ဦးတည်သွားကြသည်။

အန္တရာယ်သတိပေးမှုက အပြည့်အဝ ပေါ်လျှိုးလာသည်။

ရွှီချင်းက လုံးဝတုံ့ဆိုင်းမနေဘဲ သူ၏ အင်မော်တယ်သန္ဓေသားလောင်းကို ထုတ်လွှတ်လိုက်သည်။ ထိုအခါ အရွယ်အစားကြီးမားပြီး ခမ်းနားထည်ဝါသော အင်မော်တယ်သန္ဓေသားလောင်းက သူ၏ အနောက်မှာ ဒြပ်ထည်ဖွဲ့စည်းသွားသည်။ အဆုံးမဲ့သော ဆန်းကြယ်သက်ရှိများက သူ့ဆီသို့ ဒီရေသဖွယ် ပြေးလာနေကြစဉ် အင်မော်တယ်သန္ဓေသားလောင်းက လှုပ်ရှားလိုက်သည်။

၎င်းဖြတ်သန်းသွားသည့်နေရာတိုင်း ဆန်းကြယ်သက်ရှိများက တုန်ယင်သွားကြပြီး ၎င်းတို့၏ အော်ဟစ်သံများက ပိုပြီးစူးရှလာလိမ့်မည်။ သို့သော် ၎င်းတို့၏ ခန္ဓာကိုယ်က ပြိုကွဲပျက်စီးသွားသည့်တိုင် နောက်အခိုက်အတန့်မှာ ၎င်းတို့က အသစ်တဖန် ဖွဲ့စည်းသွားကြလိမ့်မည်။

ဤသည်မှာ ၎င်းတို့က မသေမျိုးများ ဖြစ်ကြသည့်အလားပင်။

၎င်းတို့ထဲတွင် တချို့က အသွင်သဏ္ဍာန် ဆင်တူကြသော်လည်း ၎င်းတို့၏ ခန္ဓာကိုယ်ပေါ်မှာ တမူထူးခြားသော အပြာရောင်ရေခဲအမှတ်များ ရှိကြသည်။ ထိုသို့ရေခဲအမှတ်များရှိသော ဆန်းကြယ်သက်ရှိများက တခြားအကောင်များထက် ပိုပြီးကြီးမားသော အဖျက်စွမ်းအားကို ထုတ်လွှတ်နိုင်ကြသည်။

ယင်းကို မြင်သောအခါ ရွှီချင်းက လက်ဝှေ့ယမ်းလိုက်သည်။ ထိုအခါ သံတုတ်က ပျံသန်းထွက်လာပြီး သူ၏ ဘေးမှာ လှည့်ပတ်လိုက်သည်။

သူက အရှေ့သို့ ပြေးထွက်သွားသည်။

တစ်ချိန်တည်းမှာ သူ၏ မျဉ်းပြိုင်အာဏာစက်က အသက်ဝင်လာပြီး အချိန်လေဟာနယ်အလွှာများကို ဖွဲ့စည်းလိုက်သည်။ နောက်အခိုက်အတန့်မှာ မူကွဲရွှီချင်းများက မတူညီသော အချိန်လေဟာနယ်များထဲမှ ထွက်ပေါ်လာကြသည်။

သူတို့က မူလရွှီချင်းနှင့် အတူပူးပေါင်းလိုက်ပြီး သူတို့၏ အင်မော်တယ်သန္ဓေသားလောင်းကို ထုတ်လွှတ်လိုက်ကြသည်။ ထို့နောက် သူတို့က ဥက္ကာပျံများသဖွယ် အသွင်ပြောင်းလဲသွားကြပြီး အရပ်မျက်နှာအသီးသီးဆီသို့ ဦးတည်သွားကြသည်။

ထိုသို့ဖြင့် တိုက်ခိုက်သံများနှင့် ပေါက်ကွဲသံများက ရေခဲမြစ်ကောင်းကင်အောက်မှာ ရုတ်တရက် ထွက်ပေါ်လာသည်။

တစ်နာရီကြာပြီးနောက် ချောက်ချားဖွယ်ကောင်းသော အစိမ်းရောင်ကြယ်တာရာအလင်းအောက်မှာ ကျယ်လောင်သော အက်ကွဲသံက အနက်ရောင်ရေခဲမြစ်၏ တစ်နေရာမှ ရုတ်တရက် မြည်ဟိန်းထွက်လာသည်။ ရေခဲမြစ်ပေါ်တွင် အက်ကွဲကြောင်းများက ပင့်ကူအိမ်သဖွယ် ထွက်ပေါ်လာသည်။

နောက်အခိုက်အတန့်မှာ ရွှီချင်း၏ ပုံရိပ်က ရေခဲပြင်ကို ဆုတ်ဖြဲ၍ အပြင်သို့ ခုန်ထွက်လာသည်။

သွေးက သူ၏ ပါးစပ်ထောင့်မှာ စီးကျနေပြီး သူ၏ ပုံစံက အနည်းငယ် ဖရိုဖရဲဖြစ်နေသည်။ သူထွက်ပေါ်လာသည်နှင့် သူ့အနောက်မှ မူကွဲရွှီချင်းများက တစ်ယောက်ပြီးတစ်ယောက် ပျောက်ကွယ်သွားကြသည်။ အပြင်ဘက်တွင် ပျံသန်းခြင်းကန့်သတ်မခံထားရကြောင်း အာရုံခံမိသောအခါ သူက တုံ့ဆိုင်းမနေဘဲ ကောင်းကင်ပေါ်သို့ ပျံတတ်သွားပြီး သူ၏ လက်ကို အောက်သို့ ဖိချလိုက်သည်။

သူ့အောက်မှ ရေခဲက ဝုန်းခနဲ မြည်ဟိန်းသွားပြီး ပြိုကွဲပျက်စီးသွားသည်။ တစ်ချိန်တည်းမှာ အက်ကွဲကြောင်းများက ပြန်ဆက်သွားနေသည်။

အက်ကွဲကြောင်းများကြားတွင် မရေမတွက်နိုင်သော ဆန်းကြယ်သက်ရှိများကို သူမြင်တွေ့သွားသည်။ အရှေ့ဆုံးတွင် ရှည်လျားသော ဧရာမပုံရိပ်တစ်ခုက မတ်တတ်ရပ်နေပြီး ၎င်း၏ ခန္ဓာကိုယ်တစ်ခုလုံးမှ ဆယ်ပုံနှစ်ပုံက အပြာရောင်ပြောင်းလဲနေသည်။

၎င်း၏ လက်မောင်းတစ်ဖက်တွင် အပြာရောင်ရေခဲအမှတ်များဖြင့် လုံးဝ ဖုံးလွှမ်းခံထားရသည်။ အဝေးမှကြည့်လျှင် ယင်းက အပြာရောင်ရေခဲလက်နှင့် ဆင်တူသည်။

၎င်းက ရွှီချင်းကို လောဘစိတ်ဆန္ဒဖြင့် ပြည့်နှက်နေသော မျက်လုံးတစ်စုံဖြင့် စူးစိုက်ကြည့်နေသည်။ သို့သော်လည်း ၎င်းက ရေခဲထဲမှ မထွက်လာပေ။

လေထဲတွင် မတ်တတ်ရပ်နေသော ရွှီချင်းက ခေါင်းငုံ့လိုက်ပြီး ထိုပုံရိပ်ကို စိုက်ကြည့်လိုက်သည်။ သူ၏ အမူအရာက တည်ကြည်လေးနက်သွားသည်။

ရေခဲမြစ်အောက်မှ ဆန်းကြယ်သက်ရှိများသည် တစ်ဦးချင်းစီတွင် အစွမ်းမထက်ကြပေ။ သို့သော်လည်း ၎င်းတို့က မသေမျိုးစွမ်းရည်ကို ပိုင်ဆိုင်ထားကြပြီး အရေအတွက် အဆုံးမဲ့သည်။ ထို့ပြင် သူက ရေခဲမြစ်အောက်မှာ ပျံသန်းခြင်းကန့်သတ်ခံထားရလေရာ ထိုဆန်းကြယ်သက်ရှိများက သူ့အတွက် ခြိမ်းခြောက်နိုင်စွမ်း ရှိကြသည်။

သို့သော်လည်း ထိုမျှသာဆိုလျှင် ရွှီချင်းက ယခုကဲ့သို့ အခြေအနေဆိုးဝါးလိမ့်မည် မဟုတ်ပေ။

သူ့ကို ဤအခြေအနေသို့ ကျရောက်စေခဲ့သည်မှာ အပြာရောင်ရေခဲအမှတ်များနှင့် ဆန်းကြယ်သက်ရှိများ ဖြစ်ကြသည်။ ၎င်းတို့မှာ ရေခဲအမှတ်ပိုပြီးများလေ ၎င်းတို့၏ အဖျက်စွမ်းအားက ပိုပြီးကြောက်စရာကောင်းလေ ဖြစ်သည်။ အထူးသဖြင့် လက်တစ်ဖက်လုံးက အပြာရောင်ရေခဲအရိုးအဆူးချွန်လက်အဖြစ် ပြောင်းလဲနေသည့် ဆန်းကြယ်သက်ရှိတစ်ကောင် ဖြစ်သည်။

၎င်းက ရွှီချင်းအား ပိုပြီးပြင်းထန်သော အန္တရာယ်ခံစားမှုကို ပေးသည်။

နောက်ဆုံးမှာ သူက မူကွဲရွှီချင်းများကို အားကိုး၍ အပေါ်သို့ တစ်ဟုန်ထိုး ဆန်တတ်သွားပြီး ထွက်ပြေးရန် ရေခဲမြစ်အလွှာကို ထိုးဖောက်ခဲ့ရသည်။

ယခု ထိုပုံရိပ်က သူ့နောက်သို့ လိုက်မဖမ်းတော့ကြောင်း ရွှီချင်းမြင်သွားသောအခါ သူက စိတ်သက်သာရာရသွားသည်။ သို့သော်လည်း အက်ကွဲကြောင်းထဲမှ ထိုပုံရိပ်ကို သူစိုက်ကြည့်လိုက်သည့်အခါ ရင်းနှီးကျွမ်းဝင်သော ခံစားမှုက ပိုပြီးအားကောင်းလာသည်။

“ အဲ့ဒါကို… စီနီယာအကိုကြီးဆီမှာ ငါမြင်ဖူးတယ် ”

ရွှီချင်းက ရင်းနှီးကျွမ်းဝင်သော ထိုခံစားမှု၏ ဇစ်မြစ်ကို ရှာတွေ့သွားသောအခါ မျက်လုံးမှေးကျဉ်းလိုက်သည်။

ထိုအပြာရောင်ရေခဲအရိုးအဆူးချွန်လက်က တစ်ချိန်က ချန်းအားညို၏ ရင်ဘက်ထဲမှ ထွက်ပေါ်လာခဲ့သော အရိုးလက်နှင့် အတော်လေး ဆင်တူသည်။

“ နတ်ဘုရားအပြစ်သားလား ”

ရွှီချင်း၏ အတွေးများက ပရမ်းပတာ လှုပ်ခတ်နေစဉ် ရေခဲမြစ်ပေါ်မှ အက်ကွဲကြောင်းက အပြည့်အဝ ပြန်ဆက်သွားပြီး ရေခဲအလွှာတစ်ခုကို ဖွဲ့စည်းလိုက်သည်။ ထိုရေခဲအလွှာက ရေခဲမြစ်အောက်မှ အမှောင်လောကကို အပြင်ဘက်နှင့် သီးခြားဖြစ်တည်စေပြီး အပြာရောင်ရေခဲလက်ရှိသော ထိုဆန်းကြယ်သက်ရှိ၏ စူးရှသော အကြည့်ကို တားဆီးပိတ်ဆို့လိုက်သည်။

ရွှီချင်းက မျက်မှောင်ကြုတ်လိုက်လေရာ မရေမတွက်နိုင်သော အတွေးများက သူ၏ စိတ်ထဲမှာ ဒလဟော ပေါ်လျှိုးလာသည်။ တစ်ချိန်တည်းမှာ သူ၏ နတ်ဘုရားစိတ်အာရုံက ဘေးပတ်ဝန်းကျင်ကို ဖြန့်ကြက်သွားပြီး စစ်ဆေးလိုက်သည်။

အနက်ရောင်ရေခဲက ဤနေရာတစ်ခုလုံးကို အပြည့်အဝ ဖုံးလွှမ်းထားစဉ် ဖော်မပြနိုင်အောင် အလွန်သိပ်သည်းသော ဒြပ်နှောများက နေရာတိုင်းမှာ ပြည့်နှက်နေသည်။

သို့သော်လည်း ထိုဒြပ်နှောများထဲမှာ သေခြင်းအငွေ့အသက်က စိမ့်ဝင်နေသည်။

ရွှီချင်း နောက်ထပ် မစစ်ဆေးနိုင်ခင်မှာ ထူးဆန်းသော ထိတ်လန့်တုန်လှုပ်မှုက သူ၏ နှလုံးသားထဲမှာ ရုတ်တရက် ပေါ်လျှိုးလာသည်။ ထို့ကြောင့် သူက ဆတ်ခနဲ ခေါင်းမော့လိုက်ပြီး မိုးကုပ်စက်ဝိုင်းဆီသို့ ကြည့်လိုက်သည်။

ကောင်းကင်ပေါ်တွင် မဟူရာရွှေဥက္ကာပျံတစ်စင်းက အမြန်ဆင်းသက်လာနေလေရာ မြူခိုးက တအိအိလှုပ်ခတ်နေသည်။ ယင်းက သူနှင့် အနည်းငယ် ဝေးကွာသော တည်နေရာဆီသို့ ဦးတည်နေသည်။

“ အဲ့ဒါက… ”

ကောင်းကင်ပေါ်မှ ဥက္ကာပျံကို သေချာစိုက်ကြည့်လိုက်သည့်အခါ ရွှီချင်း၏ အသိစိတ်က ဝုန်းခနဲ မြည်ဟိန်းသွားသည်။

ယင်းက ဥက္ကာပျံမဟုတ်ပေ။ ယင်းအစား အရွယ်အစား အလွန်ကြီးမားသော နတ်ဘုရားအလောင်းတစ်လောင်း ဖြစ်သည်။

ထိုနတ်ဘုရားက သေဆုံးပြီးသားဖြစ်သော်လည်း ၎င်းထံမှ အစစ်အမှန်နတ်ဘုရားတစ်ပါး၏ အရှိန်အဝါကို ထုတ်လွှတ်နေဆဲပင်။

“ အဲ့ဒါက… ”

ရွှီချင်းက မျက်မှောင်ကြုတ်လိုက်သည်။ တစ်ချိန်တည်းမှာ ထိတ်လန့်မှုနှင့် မယုံကြည်နိုင်မှုဖြင့် ပြည့်နှက်နေသော အသံက သူ၏ နတ်ဘုရားစိတ်အာရုံထဲမှာ ထွက်ပေါ်လာသည်။

“ ရှေးခေတ်မိခင်ဂြိုလ် ”

စကားပြောလိုက်သူက နတ်သမီးဖြစ်သည်။

တစ်ချိန်တည်းမှာ ရေခဲလောက၏ အပြင်ဘက်၊ အချိန်နှင့်လေဟာနယ်အက်ကွဲကြောင်းများ၏ အခြားတစ်ဖက်မှ အလွန်ကျယ်ပြောသော အာကာသဟင်းလင်းပြင်ထဲတွင် နတ်ဘုရားအလောင်းတစ်လောင်းက မျောလွင့်နေသည်။

၎င်းက တစ်စုံတစ်ယောက်ထံမှ ညွှန်ကြားခံထားရသည့်အလား ရေခဲလောကတည်ရှိသော အက်ကွဲကြောင်းဆီသို့ မြန်ဆန်စွာ ချဉ်းကပ်သွားနေသည်။

ထိုနတ်ဘုရားအလောင်းထဲမှာ ပုံရိပ်နှစ်ခုက တင်ပျဉ်ခွေထိုင်နေကြသည်။

သူတို့က မိုးသောက်သခင်လေးနှင့် ဝိညာဉ်ဖီးနစ်နတ်သမီး ဖြစ်ကြသည်။

“ အမှတ်လေးကြယ်တာရာစက်ဝန်းရဲ့ ရှေးခေတ်မိခင်ဂြိုလ်ဆီ ကျွန်မတို့ရောက်တော့မယ်… ယောင်္ကျား… ရှင် ဆုံးဖြတ်ချက်ချပြီးပြီလား ”

ဝိညာဉ်ဖီးနစ်နတ်သမီးက မျက်လုံးဖွင့်လိုက်ပြီး နူးညံ့စွာ ပြောသည်။

မိုးသောက်သခင်လေးက ဖြည်းညင်းစွာ မျက်လုံးဖွင့်လိုက်သည်။

“ ဒီဟာက အင်မော်တယ်ဘုရင်ရဲ့ အစီအစဉ်ဖြစ်ပြီး ငါ့ရဲ့ ကံကြမ္မာဖြစ်တယ်… ”