ရှေးဦးအပျက်အစီး၏ ကပ်ဘေးဒုက္ခအကြွင်းအကျန်များ

အမှတ်လေးကြယ်တာရာစက်ဝန်း၏ အတွင်းပိုင်းထဲမှ ဟင်းလင်းပြင်အက်ကွဲကြောင်းထဲ၌…

ထိုနေရာက အလွန်ကျယ်ပြောလေရာ စကြာဝဠာအများအပြား ဝင်ဆံ့၏။ ထိုနေရာတစ်ခုလုံးကို အနီရောင်ဖုန်မှုန့်များက ဖုံးလွှမ်းထားသည်။ ယင်းက အမှတ်လေးကြယ်တာရာစက်ဝန်း၏ တားမြစ်နယ်မြေလေးခုအနက် တစ်ခုဖြစ်သည်။

သမိုင်းတစ်လျှောက်မှာ လူအနည်းစုသာလျှင် ထိုနေရာသို့ ဝင်ရောက်ပြီးနောက် အသက်ရှင်လျက် ပြန်ထွက်လာနိုင်ကြသည်။

ထို့ပြင် ထိုနေရာမှာ သေဆုံးသွားကြသော နတ်ဘုရားများက မည်သည့်အခါမှ ပြန်ရောက်မလာကြချေ။

ဤအခိုက်အတန့်မှာ ခေါင်းလောင်းမြည်သံက ပဲ့တင်ထပ်သွားသည့်အခါ ထိုတားမြစ်နယ်မြေက ပရမ်းပတာ တုန်ခါသွားသည်။

တားမြစ်နယ်မြေ၏ အနက်ပိုင်းထဲတွင် နတ်ဘုရားများမရောက်နိုင်သော နေရာတစ်နေရာ ရှိသည်။ ထိုနေရာတွင် နတ်ဘုရားအရိုးယဇ်ပလ္လင်တစ်ခုက ထောင်မတ်နေသည်။

ယင်းကို မရေမတွက်နိုင်သော နတ်ဘုရားအရိုးများဖြင့် ဆောက်လုပ်ထားပြီး ရက်စက်ကြမ်းကြုတ်သော အင်းဆက်များက ထိုအရိုးများထဲမှာ လူးလွန့်လှုပ်ရှားနေကြသည်။ ယဇ်ပလ္လင်ပေါ်တွင် ကြေးနီရောင်ခေါင်းတလားတစ်ခုက လဲလျောင်းနေပြီး ခေါင်းတလားကို ဖရိုဖရဲမြူခိုးက ဖုံးလွှမ်းထားသည်။

မရေမတွက်နိုင်သော သံကြိုးများက ယဇ်ပလ္လင်၏ ဘေးပတ်ဝန်းကျင်မှ ဟင်းလင်းပြင်ထဲမှ ဆန့်တန်းထွက်နေကြပြီး ကြေးခေါင်းတလားကို တင်းကျပ်စွာ ရစ်ပတ်ထားကြသည်။

မုန်တိုင်းက မှတ်ဉာဏ်ပင်လယ်မှ ထွက်ပေါ်လာပြီး ပစ္စုပ္ပန်လောကသို့ ရိုက်ခတ်သွားသည့်အခါ သံကြိုးများက အပြင်းအထန် တုန်ယင်သွားကြသည်။ နောက်အခိုက်အတန့်မှာ ခေါင်းတလားက ရုတ်တရက် ပေါက်ကွဲသွားသည်။

အစိတ်စိတ်အမွှာမွှာ ဖျက်ဆီးခံထားရသော ခန္ဓာကိုယ်တစ်ခုက နှစ်သန်းပေါင်းများစွာကြာအောင် အိပ်စက်နေပြီးနောက် ယခု ဖြည်းညင်းစွာ နိုးထလာသည်။

၎င်း၏ နိုးထလာမှုက တားမြစ်နယ်မြေတစ်ခုလုံးကို တုန်လှုပ်သွားစေသည်။ မရေမတွက်နိုင်သော နတ်ဘုရားမှော်သင်္ကေတများက အရပ်မျက်နှာအဘက်ဘက်မှာ ထွက်ပေါ်လာကြပြီး ၎င်းကို ဖိနှိပ်ရန် ကြိုးစားလိုက်ကြသည်။

အင်္ဂါမစုံသော ခန္ဓာကိုယ်က ထိုနတ်ဘုရားမှော်သင်္ကေတများကို လျစ်လျူရှုထားပြီး အက်ရှရှအသံဖြင့် ရယ်မောလိုက်သည်။

“ နတ်ဘုရင်နန်းခ… မင်းရဲ့ ကံကြမ္မာအခွင့်အာဏာက… လုယက်ခံနေရတယ် ”

“ အတိတ်မှာ မင်းက ရှေးဦးအပျက်အစီး ကပ်ဘေးဒုက္ခကို ကျော်လွှားနေတဲ့အချိန် ဝါးမျိုခြင်းအင်းဆက်အသွင်နဲ့ ရှေးဦးအပျက်အစီးရဲ့ ကံကြမ္မာအခွင့်အာဏာတစ်စိတ်တစ်ပိုင်းကို လုယက်ခဲ့တယ်… အခု အဲ့ဒီကပ်ဘေးဒုက္ခကို မင်းရင်ဆိုင်ရတော့မယ် ”

“ အဲ့ဒီနောက် ငါမင်းကို ဖိနှိပ်ပစ်မယ် ”

ထိုအသံ ပဲ့တင်ထပ်သွားသည့်အခါ ၎င်း၏ ရင်ဘက်ထဲမှ တစ်ဝက်ပျက်စီးနေသော နတ်ဘုရားစွမ်းအင်အမြူတေက သွေးနီရောင်အလင်းကို ထုတ်လွှတ်လိုက်သည်။ သွေးနီရောင်အလင်းက ၎င်းကို ချုပ်နှောင်ထားသော ဟင်းလင်းပြင်ထဲမှ သံကြိုးများကို တစ်ချောင်းပြီးတစ်ချောင်း ဖျက်ဆီးပစ်ရန် ကြိုးစားလိုက်သည်။

“ အင်မော်တယ်လမ်းစဉ်နဲ့ ငါတို့အဆင့်ထိ ရောက်လာခဲ့တဲ့ အဲ့ဒီပုဂ္ဂိုလ်က ရှေးဦးအပျက်အစီးရဲ့ ကမ္မကို အသုံးပြုပြီး ကံကြမ္မာကို မြင်နိုင်စွမ်းရှိတဲ့ မင်းရဲ့ အနန္တအသိဉာဏ်ကို ပိတ်ဆို့ခဲ့တယ်… ဘယ်လောက် ပြောင်မြောက်လိုက်တဲ့ အကွက်လဲ ”

အင်္ဂါမစုံသော ခန္ဓာကိုယ်ထံမှ စကားသံက ဟင်းလင်းပြင်ကို တုန်လှုပ်သွားစေပြီး ခေါင်းတလားပေါ်မှာ တွယ်ကပ်နေကြသော အင်းဆက်များကို ချက်ချင်း ဖုန်မှုန့်ဖြစ်သွားစေသည်။

သို့သော်လည်း နောက်အခိုက်အတန့်မှာ ယခင်ထက် အဆပေါင်းတစ်သောင်း ပိုပြီးအားကောင်းသော နတ်ဘုရားမှော်သင်္ကေတများက တားမြစ်နယ်မြေထဲမှာ ထွက်ပေါ်လာကြပြီး အင်္ဂါမစုံသော နတ်ဘုရားကို ဒီရေသဖွယ် လွှမ်းခြုံလိုက်ကြသည်။ စက္ကန့်ပိုင်းလေးအတွင်းမှာ အရာအားလုံးက နတ်ဘုရားမှော်သင်္ကေတများဖြင့် ဖုံးလွှမ်းခံလိုက်ရသည်။ အင်္ဂါမစုံသော နတ်ဘုရားက ပြန်ဖိနှိပ်ခံလိုက်ရသည်။

အက်ကွဲသွားသော ကြေးနီရောင်ခေါင်းတလားက အသစ်တဖန် ပြန်ဖွဲ့စည်းသွားပြီး သံကြိုးများက ဟင်းလင်းပြင်ထဲမှာ ပြန်ထွက်ပေါ်လာကြသည်။

အင်္ဂါမစုံသော ခန္ဓာကိုယ်က ကြေးနီရောင်ခေါင်းတလားထဲမှာ ချိပ်ပိတ်ခံလိုက်ရပြီး ခေါင်းတလားက သံကြိုးအထပ်ထပ်ဖြင့် ချည်နှောင်ခံလိုက်ရသည်။

၎င်း၏ ရယ်သံသည်သာ ခေါင်းတလားအပြင်သို့ ဖောက်ထွင်းသွားပြီး ဆက်လက် ပျံ့နှံ့သွားသည်။ နောက်ဆုံးမှာ ယင်းက နတ်ဘုရားအသံအဖြစ် ပြောင်းလဲသွားသည်။

“ ငါသိပြီ… ကံကြမ္မာက ပျက်စီးနိုင်တယ်… ဒါပေမဲ့ ကံတရားကိုတော့ လိုက်နာရမယ် ”

…..

အမှတ်လေးကြယ်တာရာစက်ဝန်းသည် နတ်ဘုရားတိုင်းပြည်အများအပြား၏ အိမ်ဖြစ်သည်။ မည်သည့်အစစ်အမှန်နတ်ဘုရားမဆို ၎င်းတို့၏ နတ်ဘုရားလောကကို ၎င်းတို့ကိုယ်ပိုင် နတ်ဘုရားတိုင်းပြည်အဖြစ် ပြောင်းလဲနိုင်ကြသည်။

နတ်ဘုရားတိုင်းပြည်များ၏ အထက်တွင် နတ်ဘုရားမင်းဆက်များ ရှိကြသည်။

အမှတ်လေးကြယ်တာရာစက်ဝန်းတွင် နတ်ဘုရားအရှင်သခင်(၁၂)ပါး ရှိကြသည်။ ထို့ကြောင့် အမှတ်လေးကြယ်တာရာစက်ဝန်းထဲတွင် နတ်ဘုရားမင်းဆက်(၁၂)ဆက် ရှိကြသည်။

နတ်ဘုရားမင်းဆက်များ၏ အထက်တွင် နတ်ဘုရားရုံးတော် ရှိသည်။ ယင်းက အမှတ်လေးကြယ်တာရာစက်ဝန်း၏ အထွတ်အထိပ်အခွင့်အာဏာဖြစ်ပြီး နတ်ဘုရားရုံးတော်ကို နတ်ဘုရင်က ကြီးကြပ်သည်။

ဤအခိုက်အတန့်မှာ နတ်ဘုရားမင်းဆက်(၁၂)ဆက်ထဲတွင် နတ်ဘုရားအရှင်သခင်များ၏ ကြောက်မက်ဖွယ်ကောင်းသော နတ်ဘုရားစိတ်အာရုံများက ၎င်းတို့၏ မူလနတ်ဘုရားရုပ်တုအသီးသီးထံမှ ပျံ့နှံ့ထွက်လာကြပြီး အမှတ်လေးကြယ်တာရာစက်ဝန်းတစ်ခုလုံးကို လွှမ်းခြုံသွားကြသည်။ ယင်းတို့အားလုံးက မှတ်ဉာဏ်ပင်လယ်ဆီသို့ ဦးတည်သွားကြသည်။

သို့သော်လည်း ၎င်းတို့က မဆင်မခြင် မလှုပ်ရှားကြချေ။ ယင်းအစား ၎င်းတို့က ပြိုင်ဘက်ကင်း နတ်ဘုရားအရှင်သခင်တစ်ပါး ထွက်ပေါ်လာတော့မည့် ရှေးခေတ်မိခင်ဂြိုလ်ပေါ်မှ အဖြစ်အပျက်များကို လေ့လာစောင့်ကြည့်နေကြသည်။

အဘယ့်ကြောင့်ဆိုသော် ၎င်းတို့၏ အထက်မှ နတ်ဘုရားရုံးတော်က တိတ်ဆိတ်ငြိမ်သက်နေသောကြောင့် ဖြစ်သည်။ နတ်ဘုရင်သည် အစမှ ယခုအချိန်ထိ မည်သည့်အမိန့်တော်မှ မထုတ်ပြန်သေးပေ။

ယင်းက ပုံမှန်မဟုတ်ပေ။

ခေါင်းလောင်းမြည်သံက နတ်ဘုရားမင်းဆက်(၁၂)ဆက်ထဲမှ တစ်ခုဖြစ်သော ထာဝရနတ်ဘုရားမင်းဆက်ထဲမှာ အသက်ကိုးခါရှူချိန်ကြာအထိ ပဲ့တင်ထပ်သွားပြီးမှသာလျှင် တုံ့ပြန်မှုရှိလာသည်။

အထွတ်အမြတ်နတ်ဘုရားပလ္လင်ပေါ်တွင် မဖော်ပြနိုင်သော ဧရာမပုံရိပ်တစ်ခုက ထိုင်နေသည်။

၎င်း၏ အသွင်သဏ္ဍာန်က ထူးခြားဆန်းကြယ်ပြီး အမြဲတမ်း ပြောင်းလဲနေသည်။ တစ်ခါတစ်ရံ လူသားအသွင်ရှိပြီး တစ်ခါတစ်ရံ လူကြီး၊ လူငယ်၊ ယောင်္ကျား၊ မိန်းမ အစရှိသဖြင့် အသွင်ပြောင်းလဲသွားလေ့ ရှိသည်။ ဤသည်မှာ ၎င်းက လူသားအားလုံးကို အတူတကွ ပေါင်းစည်းထားသည့်အလားပင်။

နောက်အခိုက်အတန့်မှာ ၎င်းက မျိုးနွယ်ခြားအဖြစ် အသွင်ပြောင်းလဲသွားသည်။ ရှေးခေတ်ကာလ၌ မျိုးတုန်းသွားခဲ့သော မျိုးနွယ်ခြားများ၏ အသွင်သဏ္ဍာန်များသည်ပင် ၎င်းဆီမှာ ထွက်ပေါ်လာကြသည်။

နောက်အခိုက်အတန့်မှာ ၎င်းက နတ်ဘုရားအဖြစ် အသွင်ပြောင်းလဲသွားပြီး ကြောက်မက်ဖွယ်ကောင်းသော နတ်ဘုရားအစွမ်းကို ထုတ်လွှတ်လိုက်သည်။

ထို့နောက် ၎င်းက ဝိညာဉ်အဖြစ် အသွင်ပြောင်းလဲသွားပြီး ဝိညာဉ်နှင့်ပတ်သက်သော အသွင်သဏ္ဍာန်အမျိုးမျိုးကို ထုတ်ဖော်လိုက်သည်။

၎င်း၏ အသွင်သဏ္ဍာန်က အမြဲတမ်း ပြောင်းလဲနေစဉ် ၎င်းအသက်ရှူသွင်းရှူထုတ်လိုက်တိုင်း အချိန်စီးဆင်းမှုက ကြိမ်ဖန်များစွာ ပြောင်းလဲသွားသည်။

သို့ဖြစ်၍ ၎င်းကို မဖော်ပြနိုင်သော ဧရာမပုံရိပ်ဟုသာ ဆိုနိုင်ပေသည်။

ဤအခိုက်အတန့်မှာ ၎င်းက ရုတ်တရက် မျက်လုံးဖွင့်လိုက်သည်။

၎င်းမျက်လုံးဖွင့်လိုက်သည့်အခါ ၎င်း၏ အသွင်သဏ္ဍာန်က ချက်ချင်း တည်ငြိမ်သွားပြီး ချုပ်ထိန်းခံလိုက်ရသည်။

၎င်းက ရွှေရောင်ကျောက်တုံးပုံရိပ်တစ်ခု ဖြစ်သည်။

၎င်းက အမှတ်လေးကြယ်တာရာစက်ဝန်း၏ နတ်ဧကရာဇ်(၁၂)ထဲမှ တစ်ပါးဖြစ်သော ထာဝရနတ်ဧကရာဇ် ဖြစ်သည်။

အတိတ်မှာ ၎င်းက နတ်ဘုရင်၏ နောက်လိုက်ကျေးကျွန်တစ်ယောက် ဖြစ်ခဲ့သည်။ သို့သော်လည်း ၎င်းက ၎င်း၏ ကိုယ်တိုင်ကြိုးစားအားထုတ်မှုဖြင့် နတ်ဘုရားအရှင်သခင်တစ်ပါး ဖြစ်လာခဲ့သည်။

တခြားနတ်ဘုရားအရှင်သခင်များက မှတ်ဉာဏ်ပင်လယ်ကို လေ့လာစောင့်ကြည့်နေစဉ် ၎င်းက ထာဝရနတ်ဘုရားမင်းဆက်၏ အနှစ်သာရကို ကိုယ်စားပြုသော ၎င်း၏ အရှေ့မှ ရွှေရောင်ဖန်လုံးကို ကြည့်လိုက်သည်။

ဖန်လုံးက အရောင်မှေးမှိန်နေသည်။

ထို့ကြောင့် ၎င်းက မျက်လုံးပြန်မှိတ်လိုက်သည်။ သို့သော်လည်း အသက်ရှူချိန်အနည်းငယ်ကြာပြီးနောက် ၎င်းက ရုတ်တရက် မျက်လုံးပြန်ဖွင့်လိုက်ပြီး ၎င်း၏ ညာလက်ကို မြှောက်လိုက်သည်။

ထိုအခါ အရာအားလုံးကို ဖျက်ဆီးပစ်နိုင်ဟန်ရသော အင်အားက ချက်ချင်း ပေါ်လျှိုးလာပြီး ပုံရိပ်ယောင်နှင့် အစစ်အမှန်ကြားမှာ တည်ရှိသော မှတ်ဉာဏ်ပင်လယ်ဆီသို့ တိုက်ရိုက် ဦးတည်သွားသည်။ ထိုအင်အားက ယင်း၏ လမ်းကြောင်းရှေ့မှာရှိသော အရာအားလုံးကို ဆုတ်ဖြဲလိုက်သည်။

ထို့နောက် ထာဝရနတ်ဘုရားအမိန့်တော်(၇၂)ခုက အလင်းတန်းများအသွင် ပြောင်းလဲသွားကြပြီး ဟင်းလင်းပြင်ဆီသို့ ပျံသန်းသွားကြသည်။

“ သူ့ကို တားဆီးကြစမ်း… နတ်ဧကရာဇ်အသစ်တစ်ပါး ထွက်ပေါ်လာတာက မျှခြေညီမှုကို ဖျက်ဆီးပစ်လိမ့်မယ် ”

အမိန့်တော်ကို ထုတ်ပြန်လိုက်သည်နှင့်တစ်ပြိုင်နက် နတ်ဘုရားများ၏ မှတ်ဉာဏ်များထဲမှာတည်ရှိသော ရှေးခေတ်မိခင်ဂြိုလ်၏ အပြင်ဘက်မှ ကြယ်တာရာကောင်းကင်ထဲတွင် ချောက်ချားဖွယ်ကောင်းသော အစိမ်းရောင်ကြယ်တာရာအလင်းက ရုတ်တရက် မြန်ဆန်စွာ စုဝေးသွားသည်။

နောက်ဆုံးမှာတော့ အစိမ်းရောင်အလင်းဂိတ်တံခါးများက ကြယ်တာရာအလင်းထဲမှာ ထွက်ပေါ်လာကြသည်။

ဝုန်းခနဲ မြည်သံများနှင့်အတူ အလင်းဂိတ်တံခါးများက ပွင့်သွားကြသည်။

ထာဝရနတ်ဧကရာဇ်၏ အမိန့်တော်ကို ရရှိသွားကြသော အစစ်အမှန်နတ်ဘုရားများက အလင်းဂိတ်တံခါးများထဲမှ ပြေးထွက်လာကြသည်။

၎င်းတို့က ရှေးခေတ်မိခင်ဂြိုလ်ဆီသို့ တန်းမတ်စွာ ဦးတည်သွားကြသည်။

၎င်းတို့၏ မျက်လုံးထဲတွင် အဝေးမှ ရှေးခေတ်မိခင်ဂြိုလ်ဆီမှာ နောက်ထပ် အလွှာတစ်ခုရှိနေသည်။

ထိုအလွှာက မိုးသောက်သခင်လေး ဆွဲခွာခဲ့သော မိခင်ဂြိုလ်အရေပြား ဖြစ်သည်။ ဂြိုလ်အရေပြားက ရှေးခေတ်မိခင်ဂြိုလ်ကို အပေါ်မှ ဖုံးလွှမ်းထားပြီး ကောင်းကင်အသစ်သဖွယ် တည်ရှိနေသည်။

၎င်းတို့၏ တာဝန်က ထိုဂြိုလ်အရေပြားကို ချိုးဖောက်ပြီး ရှေးခေတ်မိခင်ဂြိုလ်ပေါ်မှာ ဖြစ်ပျက်နေသော ကိစ္စများကို တားဆီးရန် ဖြစ်သည်။

သို့ဖြစ်၍ ထိုအစစ်အမှန်နတ်ဘုရားများက ထွက်ပေါ်လာသည်နှင့်ချက်ချင်း ၎င်းတို့၏ နတ်ဘုရားအစွမ်းကို ထုတ်လွှတ်လိုက်ကြပြီး နတ်ဘုရားအတတ်ပညာများကို ဖွဲ့စည်းလိုက်ကြသည်။

သို့သော်လည်း ရှေးခေတ်မိခင်ဂြိုလ်၏ အရေပြားသည် မိခင်ဂြိုလ်ထံမှ စွမ်းအင်စုပ်ယူသော စွမ်းရည်ကို အမွေရရှိထားသည်။ ထို့ပြင် အစောနက မိုးသောက်သခင်လေး၏ လုပ်ဆောင်မှုများက ဂြိုလ်အရေပြားကို ခုခံကာကွယ်မှု ပထမအလွှာအဖြစ် ပြောင်းလဲသွားစေသည်။

ထို့ကြောင့် အစစ်အမှန်နတ်ဘုရားများက ရောက်ရှိလာပြီး တိုက်ခိုက်လိုက်ကြသော်လည်း ဂြိုလ်အရေပြားက ချက်ချင်း မပျက်စီးသွားပေ။

ခပ်အုပ်အုပ်မြည်သံများသာ ပဲ့တင်ထပ်သွားသည်။

ထိုအသံများက ရွှီချင်းနှင့် ဝိညာဉ်ဖီးနစ်နတ်သမီး၏ နားထဲသို့ ဝင်ရောက်သွားသည်။

ရွှီချင်းက သူ၏ နှလုံးသားထဲမှ တုန်လှုပ်မှုကို ချက်ချင်း ဖိနှိပ်လိုက်ပြီး အပေါ်မှ သွေးနီရောင်ကောင်းကင်ကို မော့ကြည့်လိုက်သည်။

ကောင်းကင်က ဆက်လက် ဖောင်းကြွလာပြီး ပိုမိုများပြားသော သွေးကို ရွာသွန်းပေးလိုက်သည်။ သို့သော်လည်း ယင်း၏ ခုခံကာကွယ်မှုက အမှန်တကယ် အံ့ဖွယ်ကောင်းသည်။

ဤအခိုက်အတန့်မှာ နတ်ဘုရားအရှင်သခင်အဖြစ်သို့ တတ်လှမ်းနေသော မိုးသောက်သခင်လေး၏ အရှေ့တွင် တမူထူးခြားသော အနီရောင်သလင်းကျောက်တစ်ခု ထွက်ပေါ်လာသည်။

သလင်းကျောက်က သွေးရောင်အလင်းကို ထုတ်လွှတ်နေပြီး ယင်း၏ မျက်နှာပြင်က ကြေးမုံတစ်ချပ်နှင့် ဆင်တူသည်။

ယင်းက တုနှိုင်းမဲ့သော မွန်မြတ်သန့်စင်မှုနှင့် ကမ္ဘာတုန်လှုပ်စေနိုင်သော ဖိအားကို ထုတ်လွှတ်နေသည်။ အကြည့်တစ်ချက်ဖြင့်ပင် ယင်းက အထွတ်အမြတ်ရတနာတစ်ခုဖြစ်ကြောင်း မည်သူမဆို ပြောနိုင်ပေသည်။

ယင်းက နတ်ဘုရားစွမ်းအင်အမြူတေ ဖြစ်သည်။

အတိအကျဆိုရသော် ယင်းက နတ်ဘုရားစွမ်းအင်အမြူတေ၏ အပိုင်းအစတစ်ခု ဖြစ်သည်။

ယင်းက အမှတ်လေးကြယ်တာရာစက်ဝန်း၏ နတ်ဘုရားများထံမှ စွမ်းအားကို စုပ်ယူနေပြီး မြန်ဆန်စွာ ကြီးထွားနေသည်။ တစ်ချိန်တည်းမှာ နတ်ဘုရားစွမ်းအင်အမြူတေ ဖွဲ့စည်းနေသည့်အချိန် အမှတ်လေးကြယ်တာရာစက်ဝန်း၏ ဖွဲ့စည်းတည်ဆောက်ပုံနှင့် အခြေခံသဘောတရားများက ပြန်ပြင်ရေးသားခံလိုက်ရသည်။

“ မလုံလောက်သေးဘူး ”

နတ်ဘုရားစွမ်းအင်အမြူ‌တေကို ကြည့်နေရင်း မိုးသောက်သခင်လေး၏ အသံက သဏ္ဍာန်မဲ့သော ဥပဒေသလှိုင်းများအဖြစ် ပြောင်းလဲသွားပြီး အရပ်မျက်နှာပေါင်းစုံဆီသို့ ပဲ့တင်ထပ်သွားသည်။

ဥပဒေသလှိုင်းများ ဖြတ်သန်းသွားသည့်နေရာတိုင်း အချိန်လေဟာနယ်၏ ဖွဲ့စည်းမှုက အက်ကွဲနေသော ကြေးမုံသဖွယ် တစ်စစီ ပြိုကွဲပျက်စီးသွားလိမ့်မည်။

ထို့နောက် သူက ကောင်းကင်ပေါ်သို့ မော့ကြည့်လိုက်သည်။ သူ၏ သူငယ်အိမ်များက လှည့်ပတ်နေသော ရွှေရောင်အလင်း(၁၂)ကွင်းအဖြစ် ခွဲထွက်သွားကြသည်။

“ ပိုပြီးများတဲ့ အာဟာရဓာတ်ကို ငါလိုအပ်တယ် ”

သူစကားပြောလိုက်သည့်အခါ သူ့အနောက်မှ မရေမတွက်နိုင်သော သွေးကြောများက စတင်လူးလွန်သွားကြသည်။ သူက ရှေးခေတ်မိခင်ဂြိုလ်ကို ကြားခံနယ်အဖြစ် အသုံးပြု၍ နတ်ဘုရားများ၏ မှတ်ဉာဏ်ပင်လယ်နှင့် ချိတ်ဆက်လိုက်သည်။ ထို့နောက် မှတ်ဉာဏ်ပင်လယ်က အမှတ်လေးကြယ်တာရာစက်ဝန်းထဲမှ သက်ရှိအားလုံးဆီသို့ ပျံ့နှံ့သွားသည်။

လျှပ်တစ်ပြက်အတွင်းမှာ အမှတ်လေးကြယ်တာရာစက်ဝန်း၏ မှတ်ဉာဏ်ပင်လယ်က လှိုင်းတဝုန်းဝုန်းထသွားသည်။ မိုးသောက်သခင်လေး၏ စုပ်ယူမှုက မှတ်ဉာဏ်ပင်လယ်မှတဆင့် လောကအားလုံးနှင့် ချိတ်ဆက်သွားသည်။

အမှတ်လေးကြယ်တာရာစက်ဝန်းထဲမှ မရေမတွက်နိုင်သော နတ်ဘုရားများက အပြင်းအထန် တုန်ယင်သွားကြသည်။ အထွတ်အမြတ် တည်ရှိမှုတစ်ပါး၏ ဆင့်ခေါ်မှုက ၎င်းတို့၏ အသိစိတ်အနက်ပိုင်းထဲမှ ထွက်ပေါ်လာသည်။

ထို့ကြောင့် စက္ကန့်ပိုင်းလေးအတွင်းမှာ နတ်ဘုရားအများအပြားက ညှိုးနွမ်းခြောက်သွေ့သွားကြပြီး မရေမတွက်နိုင်သော ရွှေရောင်အလင်းစက်များအဖြစ် အသွင်ပြောင်းလဲသွားကြသည်။ ရွှေရောင်အလင်းစက်များက ကြယ်ဂြိုလ်ဘီလီယံပေါင်းများစွာထံမှ မြှောက်တတ်သွားကြပြီး ကြယ်တာရာမြစ်တစ်စင်းအသွင် စုဝေးသွားကြသည်။ ထို့နောက် ကြယ်တာရာမြစ်က ကြယ်တာရာကောင်းကင်ကို ဖြတ်သန်းသွားပြီး နတ်ဘုရားများ၏ မှတ်ဉာဏ်ထဲမှ ရှေးခေတ်မိခင်ဂြိုလ်ဆီသို့ ဦးတည်သွားသည်။

မြစ်က ဂြိုလ်အရေပြားကို ဖောက်ထွင်းသွားသည်။

ဂြိုလ်အရေပြားကို ဖြတ်သန်းပြီးနောက် မြစ်က နတ်ဘုရားတီးတိုးရေရွတ်သံများအဖြစ် ပြောင်းလဲသွားပြီး မိုးသောက်သခင်လေး၏ ခန္ဓာကိုယ်ထဲသို့ စီးဝင်သွားသည်။

ဤအခိုက်အတန့်မှာ သူ့အရှေ့မှ နတ်ဘုရားစွမ်းအင်အမြူတေ၏ ဖွဲ့စည်းမှုက တစ်ဟုန်ထိုး အရှိန်တိုးမြှင့်သွားသည်။

ယင်းကို ကြည့်ရှုနေသော ရွှီချင်းက အပြင်းအထန် နှလုံးတုန်လှုပ်သွားသည်။ အတိတ်မှာ သူက စီနီယာအကိုကြီးနှင့်အတူ ကြီးမားသော ကိစ္စများစွာကို လုပ်ဆောင်ခဲ့ဖူးသည်။ ဥပမာ ရှေးဟောင်းကောင်းကင်ဘုံတာအို၏ အဖေဖြစ်လာခြင်း၊ နီလာနတ်သမီးကို ဝါးမျိုရန် ကြံစည်ခြင်း… အစရှိသဖြင့် အံ့ဖွယ်ကောင်းသော ကိစ္စများကို သူလုပ်ဆောင်ခဲ့ဖူးသည်။

သို့သော်လည်း ထိုအံ့ဖွယ်ကိစ္စများထဲတွင် ရှေးဦးအပျက်အစီး၏ အသွေးအသားကို လုယက်ခဲ့သော ကိစ္စကြီးသည်သာ ယနေ့အဖြစ်အပျက်ကို နှိုင်းယှဉ်နိုင်လိမ့်မည်။

သက်ရောက်မှုအတိုင်းအတာနှင့် ပမာဏအရဆိုလျှင် ယနေ့အဖြစ်အပျက်က ပိုပြီးကြီးမားသည်။

ထိုအတွေးက သူ၏ စိတ်ထဲမှာ ထွက်ပေါ်လာသည်နှင့် ကောင်းကင်က ဝုန်းခနဲ မြည်ဟိန်းသွားသည်။

ဂြိုလ်အရေပြားက အတွင်းဘက်သို့ ချိုင့်ဝင်သွားသည်။ ဤသည်မှာ အလွန်ကြီးမားသော ပြင်ပအင်အားတစ်စုံတစ်ခုက ဂြိုလ်အရေပြားပေါ်သို့ ဝင်ဆောင့်သွားသည့်အလားပင်။ ထို့ကြောင့် ကြီးမားသော ချိုင့်ခွက်တစ်ခုက ဂြိုလ်အရေပြားပေါ်မှာ ထွက်ပေါ်လာသည်။

ယင်းကို မြင်သောအခါ ရွှီချင်းက သူ၏ ကျင့်ကြံခြင်းကို အသက်သွင်းလိုက်သည်။ အင်မော်တယ်သန္ဓေသားလောင်းက သူ၏ အနောက်မှာ ဒြပ်ထည်ဖွဲ့စည်းသွားနေစဉ် သံတုတ်က သူ၏ ဘေးမှာ ထွက်ပေါ်လာသည်။ အချိန်လေဟာနယ်ဒိုင်မန်းရှင်းများသည်လည်း သူ၏ ဘေးပတ်ပတ်လည်မှာ ထွက်ပေါ်လာကြပြီး သူ့ကို ထပ်ဆင့်လွှမ်းခြုံလိုက်ကြသည်။

ထို့ပြင် သူ၏ ဝိညာဉ်က လှုပ်ခတ်သွားသည်။ ရွှီချင်းက သူ့ကိုယ်ပိုင် အစစ်အမှန်နာမည်၏ အစွမ်းကိုလည်း ဆင့်ခေါ်လိုက်သည်။ သူက မိုးသောက်သခင်လေး၏ နတ်ဘုရားအရှင်သခင်အဖြစ် တတ်လှမ်းခြင်းကို ကာကွယ်ပေးရန် အသင့်ပြင်လိုက်သည်။

သို့သော်လည်း သူ့ဘေးမှ ဝိညာဉ်ဖီးနစ်နတ်သမီးက ရွှီချင်းကို တားဆီးလိုက်သည်။ သူက တည်ငြိမ်သော အမူအရာဖြင့် နူးညံ့စွာ ပြောသည်။

“ နင့်အကိုကြီးရဲ့ တတ်လှမ်းမှုက ငါတို့ရဲ့ ကာကွယ်ပေးမှုကို မလိုဘူး ”

“ အားနည်းတဲ့ လူတွေကပဲ ပြင်ပအကာအကွယ်အပေါ် မှီခိုလိမ့်မယ်လို့ တစ်ခါသူပြောဖူးတယ် ”

“ ပြီးတော့ သူက… အကာအကွယ်မလိုဘူး ”

“ ဒါ့အပြင် ကျောက်ဆူးကြိုးအနေနဲ့ ငါတို့ရဲ့ တာဝန်က အရေးကြီးပြီး အဓိကသော့ချက်ဖြစ်တယ်… အဲ့ဒါကို ပြင်ပအင်အားကြောင့် ယိမ်းယိုင်စေလို့ မဖြစ်ဘူး ”

ယင်းကို ကြားသောအခါ ရွှီချင်းက မိုးသောက်သခင်လေး၏ ရဲတင်းမှုနှင့် ကြောက်မက်ဖွယ်ကောင်းသော တိုက်ပွဲစွမ်းအားကို ပြန်အမှတ်ရသွားသည်။ သူက သဘောတူညီစွာ ခေါင်းညိတ်လိုက်သည်။

တစ်ချိန်တည်းမှာ ဂြိုလ်အရေပြား၏ အပြင်ဘက်တွင် အစစ်အမှန်နတ်ဘုရားများ၏ အနောက်၌ ဧရာမနတ်ဘုရားပုံရိပ်(၄၉)ယောက်က မှတ်ဉာဏ်ပင်လယ်ထဲမှ ထွက်ပေါ်လာကြသည်။ ၎င်းတို့၏ အရွယ်အစားက အလွန်ကြီးမားကျယ်ပြောလေရာ ကြယ်ဂြိုလ်များနှင့် နှိုင်းယှဉ်နိုင်ကြသည်။ ထိုနတ်ဘုရားများက ၎င်းတို့၏ ကျောပေါ်တွင် နတ်ဘုရားရုပ်တု(၄၉)ခုကို သယ်ဆောင်ထားကြသည်။

၎င်းတို့သယ်ဆောင်ထားသော နတ်ဘုရားရုပ်တုများက တစ်ခုနှင့်တစ်ခု အရွယ်အစားနှင့် အသွင်သဏ္ဍာန် မတူညီကြသော်လည်း ၎င်းတို့ထုတ်လွှတ်နေသော နတ်ဘုရားအစွမ်းက တစ်ထပ်တည်း တူညီကြသည်။

၎င်းတို့အားလုံးက နတ်ဘုရားအရှင်သခင်တစ်ပါး၏ လက်အောက်မှ ဖြစ်ကြသည်။

ထာဝရနတ်ဧကရာဇ်…

၎င်းတို့က ရှေးခေတ်မိခင်ဂြိုလ်ဆီသို့ ချဉ်းကပ်လာသည့်အခါ ဘေးပတ်ဝန်းကျင်မှ အစစ်အမှန်နတ်ဘုရားများက ဘေးဖယ်ပေးလိုက်ကြသည်။ ထို့နောက် ဧရာမမျှော်စင်သဖွယ် ကြီးမားကျယ်ပြောသော နတ်ဘုရား(၄၉)ပါးက တူညီသော ဟိန်းဟောက်သံကို ထုတ်လွှတ်လိုက်ကြသည်။ ၎င်းတို့၏ ကျောပေါ်မှ နတ်ဘုရားရုပ်တုများက အပေါ်သို့ မြှောက်တတ်သွားကြပြီး နတ်ဘုရားအရှင်သခင်၏ အစွမ်းကို ထုတ်လွှတ်လိုက်ကြသည်။

ရုပ်တုတစ်ခုစီက လေထဲမှာ အရည်ပျော်သွားကြပြီး ရှေးခေတ်ကျောက်တုံးလှံ(၄၉)ချောင်းအဖြစ် အသွင်ပြောင်းလဲသွားကြသည်။ ထိုကျောက်တုံးလှံများက ရွှေရောင်အလင်းတန်းနှင့်အတူ ကြောက်မက်ဖွယ်ကောင်းသော အဖျက်စွမ်းအားကို သယ်ဆောင်လျက် ရှေးခေတ်မိခင်ဂြိုလ်၏ အရေပြားဆီသို့ ပျံသန်းသွားကြသည်။

ရွှေရောင်ကျောက်တုံးလှံများက ဂြိုလ်အရေပြားကို ထိမှန်သွားသည့်အခါ အရေပြားက နောက်ထပ် မတောင့်ခံနိုင်တော့သည့်အလား အပြင်းအထန် တုန်ခါသွားသည်။ အသက်ရှူချိန်အနည်းငယ်ကြာပြီးနောက် ဆုတ်ပြဲသွားသော ဂြိုလ်အရေပြားထံမှ အော်ဟစ်ညည်းညူသံများပင် ထွက်ပေါ်လာသည်။

ထို့နောက် ကျောက်တုံးလှံ(၄၉)ချောင်းက ဂြိုလ်အရေပြားကို ဖောက်ထွင်းသွားကြပြီး မိုးသောက်သခင်လေးဆီသို့ တန်းမတ်စွာ ပျံသန်းသွားကြသည်။

ထိုသို့အရေးကြီးအခိုက်အတန့်မှာ ရွှီချင်း၏ နှလုံးက တင်းကျပ်သွားစဉ် နတ်ဘုရားစွမ်းအင်အမြူတေကို ဖွဲ့စည်းနေသော မိုးသောက်သခင်လေးက ရုတ်တရက် ခေါင်းမော့လိုက်သည်။ ချက်ချင်းဆိုသလို ဒေါင်လိုက်မျက်လုံးတစ်လုံးက သူ၏ နဖူးပေါ်မှာ ထွက်ပေါ်လာသည်။

ယင်းက နတ်ဘုရားစွမ်းအင်အမြူတေကို ဖွဲ့စည်းနေစဉ်အတောအတွင်း သူ၏ အစစ်အမှန်နာမည်(၉၆၀၀၀)မှ ဖွဲ့စည်းသွားသော အနန္တမျက်စိ ဖြစ်သည်။

“ လူကိုယ်တိုင် မလာရဲဘဲ ဒီနည်းလမ်းကို အသုံးပြုပြီးတော့ ငါ့ရဲ့ စွမ်းအားကို စမ်းသပ်ချင်တယ်ပေါ့… နားငြီးလိုက်တာ ”

အေးစက်စက် နှာခေါင်းရှုံ့သံက စကြာဝဠာထဲမှာ ပဲ့တင်ထပ်သွားသည်။ နောက်အခိုက်အတန့်မှာ ကောင်းကင်ပေါ်မှ ရွှေရောင်ကျောက်တုံးလှံများက တုန်ယင်သွားကြပြီး အပိုင်းပိုင်းအစစ အက်ကွဲသွားကြသည်။

ယင်းတို့ထဲမှာ ကိန်းအောင်းနေသော နတ်ဘုရားအရှင်သခင်၏ အစွမ်းက မိုးသောက်သခင်လေး၏ အဆင့်အတန်းဖြင့် ရင်ဆိုင်ရသောအခါ တစ်ခုပြီးတစ်ခု ပေါက်ကွဲသွားကြသည်။

ပြန့်ကျဲသွားသော ဥပဒေသအပိုင်းအစများက လေထဲမှာ အပြည့်အဝ မလွင့်ပြယ်သွားမီ မိခင်ဂြိုလ်မှ အသွေးအသားကုန်းမြေ၏ ဝါးမျိုခံလိုက်ရသည်။ ထို့နောက် ယင်းတို့က မိုးသောက်သခင်လေး၏ နတ်ဘုရားစွမ်းအင်အမြူတေအတွက် အာဟာရဓာတ်များအဖြစ် ပြောင်းလဲသွားသည်။

ချက်ချင်းဆိုသလို နတ်ဘုရားစွမ်းအင်အမြူတေက မြန်ဆန်စွာ ကြီးထွားလာသည်။

“ နောက်ထပ်ရှိသေးလား ”

မိုးသောက်သခင်လေးက နှုတ်ခမ်းသပ်လိုက်ပြီး သူ့အရှေ့မှ အနီရောင်နတ်ဘုရားစွမ်းအင်အမြူတေကို ကြည့်လိုက်ကာ မထူးမခြားနား ပြောသည်။ ယခု နတ်ဘုရားစွမ်းအင်အမြူတေက ပြီးပြည့်စုံရန် သိပ်မလိုတော့ပေ။