မိတ်ဖက်ရှာဖွေခြင်း

ရှောင်လင်းယွီ စိုက်ပျိုးရေးနေရာမှ ထွက်လာပြီးနောက် သူမအမေ၏ တွန့်ချိုးနေသောမျက်ခုံးများကို မြင်လိုက်ရသည်။ သူမက မျက်ခုံးပင့်ပြီး စိတ်ရှုပ်ထွေးစွာမေးသည်၊ "အမေ၊ ဘာဖြစ်လို့လဲ?"

သူမ လက်ထပ်ပြီးကတည်းက သူမ၏အမေသည် ပျော်ရွှင်မှုဖြင့် တောက်ပနေခဲ့သည်။ သူမ မျက်မှောင်ကြုတ်ခြင်း ရှားပါးသွားသည်။

မေမေရှောင်က "မန်နေဂျာတွေနဲ့သူဌေးတွေအများကြီး သမီးကို ပူးပေါင်းဆောင်ရွက်မှုအကြောင်းဆွေးနွေးဖို့ လာရှာကြတယ်။ ဒါပေမဲ့ အမေ သူတို့ကိုပြန်လွှတ်လိုက်ပြီ။"

"သူတို့က သမီးနဲ့ပူးပေါင်းဆောင်ရွက်ချင်တယ်?" ရှောင်လင်းယွီက မျက်မှောင်ကြုတ်ပြီး စိတ်ရှုပ်ထွေးစွာဖြင့် မေးသည်၊ "သူတို့အားလုံး အတူတူလာကြတာလား? ဘယ်နှစ်ယောက်ရှိလဲ?"

"ဆယ်ယောက်လောက်ရှိတယ်။"

"ဒီလောက်များတဲ့လူတွေက တစ်ချိန်တည်းမှာလာကြတာလား? ဒီလိုတိုက်ဆိုင်မှုရှိလို့လား?" ရှောင်လင်းယွီက မျက်မှောင်အနည်းငယ်ကြုတ်လိုက်သည်။

"အမေလည်း ဒီလောက်တိုက်ဆိုင်မှုဖြစ်နိုင်တယ်လို့မထင်ခဲ့ဘူး။ အမေ သူတို့ကိုအဲ့ဒီအကြောင်းမေးကြည့်တော့ သူတို့က အမေတို့ဟင်းသီးဟင်းရွက်တွေက ရိတ်သိမ်းရာသီနီးကပ်လာပြီဆိုတာသိလို့ အပြေးအလွှားလာကြတယ်လို့ပြောတယ်။ သူတို့ထဲကတချို့က တစ်ယောက်နဲ့တစ်ယောက်သိကြတော့ အတူတူလာဖို့ဆုံးဖြတ်ခဲ့ကြတာတဲ့။" မေမေရှောင်က ခဏစဉ်းစားပြီးပြောသည်၊ "သူတို့အားလုံးက အတူတူတွေပဲပြောကြတာဆိုတော့ တကယ်ပဲ တိုက်ဆိုင်ကြတာထင်တယ်။"

ရှောင်လင်းယွီက ခေါင်းညိတ်လိုက်သည်။

မေမေရှောင်က စိတ်ရှုပ်ထွေးနေသေးသော်လည်း မေ့ထားလိုက်တော့သည်။ "ကောင်းပြီလေ၊ ဒါက တိုက်ဆိုင်မှုတစ်ခုပဲ။ အမေ သမီးရဲ့ကျန်းမာရေးကိုစဉ်းစားပြီး သူတို့ကို သူတို့ရဲ့ဆက်သွယ်လို့ရမယ့်အချက်အလက်တွေချန်ထားခိုင်းပြီးမှ လွှတ်လိုက်တယ်။ လာ၊ ကြည့်လိုက်။ ဒါက အဲ့ဒီလူတွေပဲ။"

မေမေရှောင်က လုပ်ငန်းကတ်ပြားတစ်ပုံနှင့် အဖြူရောင်စက္ကူတစ်ရွက်ကို ရှောင်လင်းယွီအားပေးလိုက်သည်။

ရှောင်လင်းယွီက လုပ်ငန်းကတ်ပြားများနှင့် အဖြူရောင်စက္ကူပေါ်ကဆက်သွယ်ရန်အချက်အလက်များကိုယူလိုက်သည်။ ၎င်းတို့အားလုံးသည် Z မြို့ရှိ အဝယ်တော်မန်နေဂျာ၊ စူပါမားကတ်ပိုင်ရှင် သို့မဟုတ် ဟင်းသီးဟင်းရွက်ဆိုင်ပိုင်ရှင်တို့၏လုပ်ငန်းကတ်ပြားများဖြစ်သည်။ နှစ်ခုမှာ ဟော့ပေါ့ဆိုင်ပိုင်ရှင်များထံမှဖြစ်ပြီး နှစ်ခုမှာ ဟိုတယ်မန်နေဂျာများထံမှဖြစ်သည်။

မေမေရှောင်က "ယွီအာ၊ ဒါတွေမှာ တစ်ခုခုမှားနေလို့လား?"

ရှောင်လင်းယွီက ခေါင်းခါလိုက်ပြီး၊ "ဘာမှမမှားပါဘူး။ ဒါတွေအားလုံးက လူသိများတဲ့လူတွေပဲ။ သမီးတို့ သူတို့နဲ့အလုပ်တွဲလုပ်နိုင်လောက်တယ်။"

ယခင်ဟင်းသီးဟင်းရွက်မြေဧကအနည်းငယ်သည် ရှင်းယင်ခရိုင်၏လိုအပ်ချက်များကိုသာ ဖြည့်ဆည်းပေးနိုင်ခဲ့သည်။

ယခု ဟင်းသီးဟင်းရွက်မြေဧကဒါဇင်ပေါင်းများစွာကို တီထွင်ပြီးဖြစ်သောကြောင့် သူတို့သည် မိတ်ဖက်တစ်ယောက်ရှာရန် သေချာပေါက်လိုအပ်သည်။

ကုန်းထျန်းဟောက်က လုပ်ငန်းကတ်ပြားပုံကိုကြည့်ပြီး မျက်မှောင်အနည်းငယ်ကြုတ်လိုက်သည်။ "ယွီအာ၊ ကိုယ် သူတို့အကြောင်း စုံစမ်းပေးရဦးမလား?"

တစ်ဒါဇင်လောက်ရှိတဲ့လူတွေက တစ်ချိန်တည်းမှာလာကြတယ်။ သူက ဒါက တိုက်ဆိုင်မှုတစ်ခုထက်ပိုတယ်လို့ထင်နေတုန်းပဲ။

ရှောင်လင်းယွီက ခေါင်းခါပြီးပြောသည်၊ "မလိုပါဘူး။ ကျွန်မက မိတ်ဖက်အသစ်တစ်ယောက်ရွေးချယ်ဖို့လိုနေတာပဲ။ ကျွန်မ သူတို့ထဲကနေရွေးချယ်နိုင်လောက်တယ်။"

Z မြို့တွင် ပို၍ပင်ချမ်းသာသောလူများရှိသည်။ ရှောင်လင်းယွီတွင် ယခု ဧက ၃၀ ကျော်ရှိသည်။ ၎င်းသည် များပြားပုံရသော်လည်း သူမသည် ဟင်းသီးဟင်းရွက်အမျိုးအစားများစွာကို စိုက်ပျိုးထားတာကြောင့် အမျိုးအစားခွဲလိုက်သောအခါ ၎င်းသည် တကယ်တော့ ထိုမျှမများပေ။

ရှောင်လင်းယွီသည် အဆင့်မြင့်ထုတ်ကုန်ဈေးကွက်သို့သွားရန် ဆုံးဖြတ်ပြီးဖြစ်သောကြောင့် သူမသည် စိတ်ထဲတွင် ဈေးနှုန်းတစ်ခုသတ်မှတ်ပြီးသည်မှာ သဘာဝပင်။ သီးနှံများစွာမလိုအပ်သော်လည်း အရည်အသွေးကတော့ မြင့်မားရန်လိုအပ်သည်။

မေမေရှောင်က ခေါင်းညိတ်လိုက်သည်။ သူတို့သည် ဟင်းသီးဟင်းရွက်များစွာစိုက်ပျိုးခဲ့ကြ၍ အားလုံးကို ကိုယ်တိုင်မရောင်းနိုင်သောကြောင့် မိတ်ဖက်များရှာရန်လိုအပ်သည်။

"အင်း။ ဒါဆိုရင်တော့ ဒီလူတွေထဲကနေ နှစ်ယောက်ရွေးလိုက်ပါလား?" မေမေရှောင်က ကတ်ပြားနှစ်ခုကိုကောက်ယူလိုက်သည်။ "ကျွင်းဟောင်ဟိုတယ်ရဲ့မန်နေဂျာနဲ့ ကျန့်မိသားစုဟင်းသီးဟင်းရွက်ဆိုင်ရဲ့ဘော့စ်က စိတ်နေစိတ်ထား အကောင်းဆုံးပဲ။"

"ဒီဂူကွမ်းစူပါမားကတ်ရဲ့မန်နေဂျာကတော့ သူက ငါတို့ကို တောရွာကဖြစ်လို့ အထင်သေးတယ်။ သူက မောက်မာပြီး ကြမ်းတမ်းတယ်။ ပြီးတော့ ဒီဟော့ပေါ့ဆိုင်ဘော့စ်ကတော့ ငါတို့ကပဲ သူ့ကိုအားကိုးမှရတော့မယ့်ပုံနဲ့။ သူက သူ့ကိုယ်သူ သိပ်အထင်ကြီးလွန်းတယ်..."

မေမေရှောင်သည် အလွန်ပညာရှိသောသူဖြစ်သည်။

ရှောင်လင်းယွီသည် မိတ်ဖက်နှစ်ယောက်ရှာရန် ဆုံးဖြတ်ပြီးဖြစ်သောကြောင့် သူမသည် သူတို့၏သဘောထားများအကြောင်းကို ရှောင်လင်းယွီအားပြောပြလိမ့်မည်။ မိတ်ဖက်တစ်ယောက်ရွေးချယ်သောအခါ သူမ၏မျက်လုံးများက ပထမဆုံးဖမ်းမိသောအရာမှာ ငွေမဟုတ်ဘဲ သူတို့၏စရိုက်ဖြစ်သည်။ စရိုက်မကောင်းသောသူများနှင့်အလုပ်လုပ်ခြင်းသည် မကောင်းပေ။

ရှောင်လင်းယွီက ခေါင်းညိတ်လိုက်သည်။ "ကျေးဇူးတင်ပါတယ် အမေ။"

ခဏအကြာတွင် မေမေရှောင်က ရှောင်လင်းယွီ၏ဝမ်းဗိုက်ကို ခဏစိုက်ကြည့်ပြီး ချက်ချင်းတားလိုက်သည်၊ "ယွီအာ၊ သမီးက ကလေးမွေးတော့မှာလေ။ ဘာလို့ ဒီကိစ္စကို ထျန်းဟောက်နဲ့ ငါတို့ကျန်တဲ့သူတွေကို မထားခဲ့တာလဲ? မင်း ဒါနဲ့ပတ်သက်ပြီး စိုးရိမ်စရာမလိုဘူး။" ဤသို့စဉ်းစားရင်း သူမက ခိုင်မာစွာပြောသည်၊ "ဟုတ်တယ်၊ မွေးဖွားမည့်ရက်က ရက်အနည်းငယ်ပဲလိုတော့တယ်။ မင်း သေချာပေါက်ဒီကိစ္စတွေ မလုပ်သင့်ဘူး။"

ရှောင်လင်းယွီက ခဏစဉ်းစားလိုက်ပြီး၊ "အမေ၊ သမီးက ဒါတွေကို ဖတ်ကြည့်ရုံပါ။ ကျန်တာတွေကို တခြားတစ်ယောက်ယောက်က ကိုင်တွယ်လိမ့်မယ်။"

"မဟုတ်ဘူး!" မေမေရှောင်က ခိုင်မာစွာပြောသည်၊ "မင်း အနားယူဖို့လိုတယ်။ မင်းမှာ အဲ့လောက်အားအင်တွေရှိရင် မွေးခန်းမှာသုံးဖို့အတွက်ချန်ထား။ မင်းဗိုက်က တော်တော်ဖောင်းနေပြီ။ မင်းမွေးဖွားတဲ့အခါ အားပိုလိုလိမ့်မယ်။"

ကုန်းထျန်းဟောက်က သဘောတူစွာခေါင်းညိတ်သည်၊ "ယွီအာ၊ အမေပြောတာမှန်တယ်။ မင်း အနားယူဖို့လိုတယ်။ စီးပွားရေးကို ကိုယ့်ဆီထားခဲ့လိုက်။ မင်း ဘာလိုချင်လဲပြော။ ကိုယ် မင်းအတွက်လုပ်ပေးမယ်။"

ရှောင်လင်းယွီ၊ "..."

မွေးဖွားမည့်ရက်နှင့်နီးကပ်လာလေလေ သူတို့က သူမအပေါ်တွင် ကန့်သတ်ချက်များပိုမိုချမှတ်လာလေလေပင်။ သူမ လုပ်စရာဆိုလို့ ထိုင်ပြီးတော့ မွေးဖွားမည့်ရက်ကိုစောင့်ရန်သာ။ မည်သို့ပင်ဖြစ်စေ၊ သူမအတွက်ငြင်းဆန်ကန်ခြင်းသည် အဓိပ္ပာယ်မရှိပေ။

လူနည်းတဲ့ဘက် စကားနားထောင်ရမည်သာဖြစ်သည်။

ရှောင်လင်းယွီက ညင်သာစွာသက်ပြင်းချပြီး၊ "ကောင်းပြီလေ။ သမီး စီးပွားရေးကိစ္စတွေ မလုပ်တော့ဘူး။"

မေမေရှောင်နှင့် ကုန်းထျန်းဟောက်တို့ ချက်ချင်းကျေနပ်သွားကြသည်။

သို့သော် ရှောင်လင်းယွီက ဆက်ပြောသည်၊ "ဒါပေမဲ့ အဲ့ဒီလူတွေပြောတာမှန်တယ်။ ဟင်းသီးဟင်းရွက်တွေက ရိတ်သိမ်းတော့မှာ။ သမီးတို့ ဒါတွေကိုရောင်းဖို့ မိတ်ဖက်တွေရှာဖို့လိုတယ်။ ဒီလူတွေက သမီးတို့ဆီလာကြမှတော့ သူတို့နဲ့စကားပြောကြည့်သင့်တယ်။ ဒါတော့ အဆင်ပြေတယ်မဟုတ်လား?"

ရှောင်လင်းယွီက သူမအမေ၏အမြင်ကိုတောင်းခံနေခြင်းဖြစ်ပြီး ဟုတ်ပါတယ်၊ သူမက ကုန်းထျန်းဟောက်၏အမြင်ကိုလည်းတောင်းခံနေခြင်းဖြစ်သည်။

"ဒီတစ်ခါ ရေရှည်နဲ့ယုံကြည်စိတ်ချရတဲ့မိတ်ဖက်တစ်ယောက်ရှာရမယ်။ ထောင်ယွမ်ရွာက လတ်ဆတ်သောအသီးအနှံနဲ့ဟင်းသီးဟင်းရွက်ခြံရဲ့တာဝန်ရှိသူတစ်ယောက်အနေနဲ့ သမီးကိုယ်တိုင်မိတ်ဖက်တွေကို စိစစ်ရွေးချယ်ဖို့ရှိနေရမယ်မဟုတ်လား?"

မေမေရှောင်ရှိနေသောကြောင့် ကုန်းထျန်းဟောက်က ဘာမှပြောဝံ့ခြင်းမရှိပေ။ သူက မေမေရှောင်အား သူကန့်ကွက်စေချင်သောကြောင့် သူ၏မျက်လုံးများဖြင့် အချက်ပြလိုက်သည်။

သို့သော် မေမေရှောင်က မမြင်ဟန်ဆောင်လိုက်သည်။ သူမက ခဏစဉ်းစားပြီးပြောသည်၊ "ဒါက ပြဿနာမရှိဘူး။ ဒါပေမဲ့ ယွီအာ၊ အမေထင်တာတော့ မင်းဘေးမှာ မင်းကိုစောင့်ကြည့်ဖို့တစ်ယောက်ယောက်ရှိသင့်တယ်။ မင်း သတိထားရမယ်နော်၊ ဟုတ်ပြီလား?"

ရှောင်လင်းယွီက သူမ၏ပခုံးများကိုတွန့်လိုက်ပြီး အားကိုးရာမဲ့စွာပြောသည်၊ "အမေ၊ ထျန်းဟောက်နဲ့ကျွန်မလက်ထပ်ပြီးကတည်းက ကျွန်မတို့ ဘယ်တော့မှမခွဲဖူးဘူးဆိုတာ အမေမသိဘူးလား?" သူမက ကုန်းထျန်းဟောက်က သိပ်ကပ်တွယ်တတ်တယ်လို့ပြောဖို့ သိပ်ရှက်နေသည်။

မေမေရှောင်၊ "..."

ဒါက အဲ့လိုဖြစ်ပုံပဲ! ထျန်းဟောက်က သူတို့လက်ထပ်ပြီးနောက် သူမသမီးကို ပိုပြီးကပ်တွယ်လာတယ်။

မေမေရှောင်က ရယ်မောပြီး စိတ်လှုပ်ရှားသွားသည်။

ကုန်းထျန်းဟောက်၊ "..." ယွီအာက သူ့ကိုတိတ်တဆိတ်တိုင်တန်းနေတာကို သူမသိဘူးလို့မထင်နဲ့။ သူမက သူ့ကို သိပ်ကပ်တွယ်တတ်တယ်လို့ထင်နေတာပဲ။

'ငါ နည်းနည်းဝမ်းနည်းတယ်။ ငါတို့လက်ထပ်ပြီးတဲ့နောက် ငါ့ဇနီးက ငါ့ကိုပိုပြီးစိတ်မရှည်ဖြစ်လာတယ်... ပြီးတော့ အတိုင်ပါခံနေရတယ်!'

ကုန်းထျန်းဟောက်က လက်ပိုက်ပြီး မကျေမနပ်ဖြစ်နေသည်။

မေမေရှောင်က ညင်သာစွာသက်ပြင်းချပြီး လေးနက်စွာပြောသည်၊ "ကောင်းပြီလေ။ ဘာပဲဖြစ်ဖြစ်၊ မင်း သတိထားရမယ်။ မင်းဗိုက်ထဲမှာ တစ်ခုခုမှားနေတယ်လို့ခံစားမိတာနဲ့ အမေတို့ကိုပြောရမယ်နော်၊ ကောင်းပြီလား?"

ရှောင်လင်းယွီက ခေါင်းညိတ်ပြီးပြောသည်၊ "ဟုတ်ကဲ့ပါ ဟုတ်ကဲ့ပါ သမီးနားလည်ပါတယ်။"

သူမသည် ဒီကလေး ရောက်ရှိလာမည့်အရေးကို ဆယ်လလောက် မျှော်လင့်စောင့်စားခဲ့ရသူဖြစ်တာကြောင့် သေချာပေါက် သတိထားပေမည်။

မေမေရှောင်၏သဘောတူညီချက်နှင့်အတူ ကုန်းထျန်းဟောက်ရော အခြားသူများပါ ကန့်ကွက်ဝံ့ခြင်းမရှိကြပေ။ အကယ်၍ ရှောင်လင်းယွီက ဤမိသားစုတွင် ဘုရင်မဖြစ်လျှင် မေမေရှောင်က ဧကရီဖြစ်သည်။

ရှောင်လင်းယွီက လုပ်ငန်းကတ်ပြားများကိုကြည့်ပြီး ဆယ့်နှစ်ခုထဲက ရှစ်ခုကိုရွေးချယ်လိုက်သည်။ ထို့နောက် ရှစ်ခုထဲကနေမှ သူမနှင့်အလုပ်တွဲလုပ်ရန် ပူးပေါင်းမည့် မိတ်ဖက်နှစ်ယောက်ကိုရွေးချယ်လိမ့်မည်။

နောက်ဆုံးရွေးချယ်မှုပြုလုပ်ရန်အတွက်ကတော့ ဤလူများကို ကိုယ်တိုင်တွေ့ဆုံပြီး သူတို့အကြောင်း မေးမြန်းစီစစ်ဖို့ရန်လိုအပ်သည်။ သူမသည် သူတို့၏စရိုက်နှင့် အခြားအသွင်အပြင်များကိုကြည့်ပြီးနောက် ရွေးချယ်မှုတစ်ခုပြုလုပ်လိမ့်မည်။

ကျန့်မိသားစုဟင်းသီးဟင်းရွက်ဆိုင်၏စီးပွားရေးသည် ပို၍ဆိုးရွားလာသည်။

ပထမနှစ်အနည်းငယ်တွင် စီးပွားရေးသည် ကောင်းမွန်ခဲ့သည်။ သူတို့တွင် မျှတသောဈေးနှုန်းများနှင့် လတ်ဆတ်သောဟင်းသီးဟင်းရွက်များရှိသည်။ ထို့အပြင် ဘော့စ်သည် လူကောင်းတစ်ယောက်ဖြစ်သည်။ အရေးပေါ်အခြေအနေတစ်ခုရှိလျှင် သူက အခမဲ့ပို့ဆောင်ပေးသည်။

သို့သော် ပိုကြီးမားသောဆိုင်မျက်နှာစာများနှင့် နိမ့်သောဈေးနှုန်းများရှိသော စူပါမားကတ်များပေါ်ပေါက်လာသည်နှင့်အမျှ သူ၏ဖောက်သည်များစွာ ထွက်ခွာသွားခဲ့ကြသည်။ ဤစူပါမားကတ်များသည် ၂၄ နာရီပို့ဆောင်ရေးဝန်ဆောင်မှုများကိုလည်း ပေးသည်။ သူ့ဆိုင်သည် သူ၏ပုံမှန်ဖောက်သည်ဟောင်းများ၏ထောက်ပံ့မှုဖြင့် မနည်းရပ်တည်နေရသည်။ သို့သော် ဤသို့ ကြာကြာဆက်ပြီး မတောင့်ခံနိုင်မှန်းကိုလည်းသိသည်။

ဘော့စ်ကျန့်သည် သူနှစ်ပေါင်းများစွာလုပ်ကိုင်ခဲ့သောဟင်းသီးဟင်းရွက်ဆိုင် မကြာမီပိတ်သိမ်းရတော့မည်ကို သိရှိသောအခါ အလွန်စိတ်ပျက်အားငယ်သွားသည်။ ထို့နောက် တစ်နေ့တွင် သူက သူ၏သူငယ်ချင်း ထောင်ယွမ်ရွာအကြောင်းပြောသည်ကိုကြားခဲ့သည်။

သူက ထောင်ယွမ်ရွာတွင် အော်ဂဲနစ်ဟင်းသီးဟင်းရွက်များအထူးပြုစိုက်ပျိုးသောခြံတစ်ခြံရှိသည်ဟုပြောသည်။ အကယ်၍ သူသာ ထိုနေရာမှ ဟင်းသီးဟင်းရွက်အချို့ကိုရောင်းချရန်ရရှိနိုင်လျှင် သူ၏စီးပွားရေးသည် တက်လာလိမ့်မည်။

အကြောင်းမှာ သူသည် ထောင်ယွမ်ရွာမှ ဟင်းသီးဟင်းရွက်များကို ယခင်ကစားဖူးပြီး အရသာသည် ထူးခြားသောကြောင့်ဖြစ်သည်။

ဤမတိုင်မီက ခြံပိုင်ရှင်တွင် စိုက်ခင်းကြီးကြီးမရှိခဲ့ပေ။ သူမ၏ထောက်ပံ့မှုသည် ဒေသဈေးကွက်ကိုဖုံးလွှမ်းရန်သာ လုံလောက်ခဲ့သည်။ သို့သော် သူက ပိုင်ရှင်က ခြံကိုတိုးချဲ့ခဲ့သည်ဟုကြားခဲ့သည်။ ပိုင်ရှင်သည် မိတ်ဖက်များလိုအပ်လိမ့်မည်။

သူသည် ထိုပူးပေါင်းဆောင်ရွက်မှုအတွက် တိုက်ပွဲဝင်ရန်လိုအပ်သည်။ ၎င်းသည် သူ၏ဆိုင်ကိုပြန်လည်ရှင်သန်စေနိုင်သောအရာတစ်ခုဖြစ်သည်။

သို့သော် သူ၏သူငယ်ချင်းက ထိုခြံရှိဈေးနှုန်းများသည် အလွန်မြင့်မားကြောင်း အလေးပေးပြောကြားခဲ့သည်။ သို့သော် သီးနှံများသည် ဈေးနှုန်းနှင့်ထိုက်တန်သည်။

ဘော့စ်ကျန့် အိမ်ပြန်ပြီး စဉ်းစားလိုက်သည်။ သူက ဤသည်မှာ အခွင့်အရေးတစ်ခုဖြစ်သည်ဟုခံစားမိသည်။ ဟင်းသီးဟင်းရွက်များသည် ဈေးကြီးနိုင်သော်လည်း ၎င်းတို့သည် သေးငယ်သောခရိုင်တစ်ခုတွင် ကောင်းစွာရောင်းချခဲ့သည်။ ၎င်းတို့သည် Z မြို့တွင် ပို၍ပင်ကောင်းစွာရောင်းချလိမ့်မည်။

ဘော့စ်ကျန့် အွန်လိုင်းတွင်သွားပြီး မေးမြန်းလိုက်သည်။ သူက ထောင်ယွမ်ရွာရှိသီးနှံများသည် တကယ်ထူးခြားကြောင်း သိရှိခဲ့သည်။

ထို့အပြင် သူက စီးပွားရေးလုပ်ငန်းရှင်များစွာသည်လည်း ထောင်ယွမ်ရွာရှိဘော့စ်နှင့် ပူးပေါင်းဆောင်ရွက်လိုကြောင်း သိရှိခဲ့သည်။ ဘော့စ်ကျန့် အတော်လေးစိတ်ဓာတ်ကျသွားသည်။ သူ၏ပြိုင်ဆိုင်မှုသည် ကြီးမားသောဟိုတယ်များနှင့်စူပါမားကတ်များထံမှဖြစ်သည်။ သူတွင် သေးငယ်သောဆိုင်တစ်ဆိုင်သာရှိသည်။ သူ သူတို့နှင့်ယှဉ်ပြိုင်နိုင်မည်လား?

သို့သော် ဘော့စ်ကျန့်က ဤအခွင့်အရေးကို ဤမျှလွယ်လွယ်ကူကူ လက်မလွှတ်ချင်ခဲ့ပေ။ မည်သို့ပင်ဖြစ်စေ၊ သူက ကြိုးစားကြည့်ရန်လိုအပ်သည်။

ထို့ကြောင့် သူက ထောင်ယွမ်ရွာရှိခြံ၏ဟင်းသီးဟင်းရွက်များ ရိတ်သိမ်းတော့မည်ကိုကြားသောအခါ သူက ဤဘော့စ်နှင့်စကားပြောရန်လာခဲ့သည်။

သူက အခြားစီးပွားရေးလုပ်ငန်းရှင်များကိုတွေ့ဆုံမည်ဟု ဘယ်တုန်းကမှမထင်ခဲ့ပေ။ ဘော့စ်ကျန့် ပို၍ပင်စိတ်ဓာတ်ကျသွားသည်။ သို့သော် သူက လက်မလွှတ်ချင်သေးပေ။ သူတို့ ဘော့စ်၏အိမ်သို့ရောက်ရှိခဲ့ကြသော်လည်း သူတို့က ဘော့စ်ကိုမတွေ့ဘဲ သူမအမေကိုတွေ့ခဲ့ကြသည်။

သူ မောင်းထုတ်မခံရမီတွင် ဘော့စ်ကျန့်က သူ၏လုပ်ငန်းကတ်ပြားကိုချန်ထားခဲ့သည်။

စိုးရိမ်နေသောဘော့စ်ကျန့် အိမ်ပြန်သောအခါ သူ၏ဇနီးက သူ့ကိုနောက်ဆုံးရအခြေအနေကိုမေးသည်။ "ငါထင်တယ် ဒါက အလုပ်ဖြစ်မှာမဟုတ်ဘူး။ အဲ့ဒီဘော့စ်နဲ့အလုပ်လုပ်ချင်တဲ့လူတွေအများကြီးရှိတယ်၊ ပြီးတော့ သူတို့အားလုံးက စီးပွားရေးလုပ်ငန်းရှင်ကြီးတွေပဲ။ သူတို့နဲ့နှိုင်းယှဉ်ရင် ငါတို့ဆိုင်က ဘာမှမဟုတ်ဘူး။"

သူ၏ဇနီးက သူ့ကိုနှစ်သိမ့်ပြီးပြောသည်၊ "အဆင်ပြေပါတယ်။ ကျွန်မတို့သာဆိုင်ပိတ်လိုက်ရရင် အလုပ်အကိုင်ပြောင်းပြီး တခြားတစ်ခုခုလုပ်လို့ရတာပဲ။"

ဘော့စ်ကျန့်က လေးလံစွာသက်ပြင်းချပြီး၊ "ငါ ဒီဆိုင်ကို နှစ်တွေအများကြီးလုပ်ကိုင်ခဲ့တာ။ ငါ ဒီအတိုင်းလက်လွှတ်ဖို့ မတတ်နိုင်ဘူး။"

ဘုရားသခင်က သူ့ကိုသနားငဲ့ညှာပေးလေပြီ!

ထိုညနေတွင် ထောင်ယွမ်ရွာ၏ဘော့စ်ရှောင်က ဖုန်းခေါ်ပြီး သူမက သူ့ကိုတွေ့ချင်သည်ဟုပြောသည်။ သူ ချက်ချင်းသဘောတူလိုက်သည်။

ဤသည်မှာ သူတို့အတူတကွအလုပ်လုပ်ရန် ကြီးမားသောအခွင့်အရေးတစ်ခုရှိသည်ဟု အဓိပ္ပာယ်ရသည်။

....

နောက်နေ့တွင် ဘော့စ်ကျန့်က ပြင်ဆင်ပြီး ရှောင်မိသားစုသို့ တစ်လမ်းလုံးမောင်းသွားသည်။

သူ ရှောင်မိသားစုသို့ရောက်သောအခါ သူက ခြံထဲတွင်ထိုင်နေသော ကိုယ်ဝန်သည်အမျိုးသမီးတစ်ယောက်နှင့် ချောမောသောလူငယ်တစ်ယောက်ကိုမြင်လိုက်ရသည်။

သူက အမျိုးသမီးဆီသို့တန်းတန်းမတ်မတ်လျှောက်သွားပြီး စမ်းသပ်သလိုမေးသည်၊ "ဘော့စ်ရှောင်လား?"

ရှောင်လင်းယွီက မော့ကြည့်လာချိန်တွင်တော့ ဘော့စ်ကျန့် အနည်းငယ်ကြောင်သွားသည်။

ဒီအမျိုးသမီးက သိပ်လှတာပဲ။

သူမ၏အသားအရေသည် ဖြူဖွေးပြီး သူမ၏မျက်လုံးများသည် ကြီးမားသည်။ သူမသည် တကယ်ကြည့်ကောင်းသည်။

သို့သော် သူက ရှောင်လင်းယွီ၏အလှကြောင့်သာအံ့အားသင့်ခဲ့သည်။ သူက သူမကို အချိန်ကြာကြာ မရိုမသေကြည့်ခြင်းမရှိသလို မဖွယ်မရာအမူအရာလည်းမပြခဲ့ပေ။

ရှောင်လင်းယွီက လှုပ်ကုလားထိုင်တစ်လုံးတွင်ထိုင်နေခြင်းပင်။ သူမက ဒီနေ့၏ပထမဆုံးရောက်ရှိသူကိုမြင်သောအခါ သူမက ပြုံးပြီးမေးသည်၊ "ရှင်က?"

"ကျွန်တော်က ကျန့်မိသားစုရဲ့ဟင်းသီးဟင်းရွက်ဆိုင်ရဲ့ပိုင်ရှင် ကျန်းချင်းဟွာပါ!" ဘော့စ်ကျန့်က ယဉ်ကျေးစွာမိတ်ဆက်သည်။

ရှောင်လင်းယွီက မျက်ခုံးပင့်ပြီး ပြုံးကာပြောသည်၊ "ကျွန်မမှာလည်း ကျန့်မျိုးရိုးမိတ်ဖက်တစ်ယောက်ရှိတယ်။"

ကျန့်ချင်းဟွာက ပြုံးပြီးပြောသည်၊ "လွန်ခဲ့တဲ့နှစ်ပေါင်း ၅၀၀ လောက်က ကျွန်တော်တို့က မိသားစုဝင်တွေ ဖြစ်နိုင်တာပေါ့။"

ရှောင်လင်းယွီက ကျောက်စားပွဲကို လက်ညှိုးထိုးပြီးပြောသည်၊ "ဘော့စ်ကျန့်၊ ကျွန်မ ရှင့်ကို ဧည့်ခံဖို့ သိပ်အဆင်မပြေလို့ပါ။ ထိုင်ပါဦး!"

ဘော့စ်ကျန့်က ချက်ချင်းပြုံးပြီးပြောသည်၊ "ကျေးဇူးတင်ပါတယ်၊ ဘော့စ်ရှောင်။"

သို့သော် သူက သူ့ဘေးတွင်ထိုင်နေသော အေးစက်သောလူသည် မည်သူဖြစ်သည်ကို အလွန်သံသယဝင်နေသည်။ သူက အလွန်ဩဇာအာဏာရှိပုံရသည်။

ရှောင်လင်းယွီက ပြုံးပြီးမေးသည်၊ "ဘော့စ်ကျန့်၊ ရှင် ကျွန်မကို ဘော့စ်ရှောင်မှန်း ဘယ်လိုလုပ်သိတာလဲ?"

သူမ ကိုယ်ဝန်ရပြီးနောက် သူမသည် ဆိုင်သို့ ရှားရှားပါးပါးသာသွားသည်။ ပုံမှန်ဖောက်သည်အချို့မှလွဲ၍ လူအနည်းငယ်သာ သူမသည် ဆိုင်၏ပိုင်ရှင်ဖြစ်ကြောင်း သိကြသည်။ ဖောက်သည်အသစ်များကမူ ဆိုင်၏ဘော့စ်သည် အမျိုးသမီးတစ်ယောက်ဖြစ်သည်ကိုပင် မသိကြပေ။ ထို့အပြင် ဘော့စ်ကျန့်၏လေသံသည် ခရိုင်အပြင်ဘက်မှ လူနှင့်တူသည်။

ဟုတ်ပါတယ်၊ သူက ရွာတွင်ရှိနေစဉ် အနည်းငယ်စုံစမ်းခဲ့နိုင်သည်။

ဘော့စ်ကျန့်က ပြုံးပြီးပြောသည်၊ "ခင်ဗျားက မနေ့က ညီမလေးနဲ့ ၆၀-၇၀% တူတယ်။ ပြောရရင် သူက သိပ်ငယ်ရွယ်ပုံပဲ။ သူ ခင်ဗျားကိုမွေးတုန်းက ဘယ်လောက်အသက်ရှိပြီလဲ?"

ရှောင်လင်းယွီက ရယ်မောသည်။ "ကျွန်မအမေက ကျွန်မကို ၂၅ နှစ်မှာမွေးခဲ့တာပါ။ အခု သူက ၅၁ နှစ်ရှိပါပြီ။ ဘော့စ်ကျန့်၊ ရှင်ကရော အသက်ဘယ်လောက်ရှိပြီလဲ?"

"ဘာ?" ဘော့စ်ကျန့် အနည်းငယ်မှင်သက်သွားပြီး ကြောင်ငေးကာပြောသည်၊ "သူက တကယ်ပဲ ကျွန်တော့်ထက်ကြီးတာလား? တော်တော်လေးငယ်တဲ့ပုံပေါက်တာပဲ။ ကျွန်တော်က သူ့ကို အသက် ၃၀ ကျော် ဒါမှမဟုတ် အများဆုံး ၄၀ လောက်ပဲရှိတယ်လို့ထင်ခဲ့တာ။"

***