ဘာလို့ ငါလက်မခံရဲရမှာလဲ

နတ်ဘုရင်…

နတ်ဘုရင်သည် အမှတ်လေးကြယ်တာရာစက်ဝန်း၏ အထွတ်အထိပ်တည်ရှိမှု ဖြစ်သည်။

အချိန်အတော်ကြာတိတ်ဆိတ်နေပြီးနောက် နတ်ဘုရင်နန်းခသည် နောက်ဆုံးမှာတော့ နတ်ဘုရားရုံးတော်ထဲမှ ဖြည်းညင်းစွာ ထွက်လျှောက်လာသည်။

ကြယ်အလင်းရောင်က စတင်ပုံပျက်တွန့်လိမ်သွားပြီး မရေမတွက်နိုင်သော သက်တံ့လျှပ်စီးစက်ကွင်းများက လေထဲမှာ ထွက်ပေါ်လာကြသည်။ စက္ကန့်ပိုင်းလေးအတွင်းမှာ ယင်းတို့က ၎င်း၏ ခြေဖဝါးအောက်၌ ကြယ်လှေကားထစ်များအဖြစ် ဒြပ်ထည်ဖွဲ့စည်းသွားကြသည်။

၎င်းက လှေကားထစ်များပေါ်သို့ ခြေချလိုက်ပြီး အပေါ်သို့ တစ်ထစ်ပြီးတစ်ထစ် တတ်လှမ်းသွားသည်။

၎င်းက ခြေတစ်လှမ်း လှမ်းလိုက်တိုင်း စကြာဝဠာ၏ ဖွဲ့စည်းတည်ဆောက်ပုံက ထိခိုက်လွယ်သော ကြေးမုံသဖွယ် အက်ကွဲသွားသည်။ တဒင်္ဂအချိန်လေးအတွင်းမှာ ပုံရိပ်ယောင်မြင်ကွင်းများက ထိုအက်ကွဲကြောင်းများထဲမှ ထွက်ပေါ်လာကြသည်။

ထိုမြင်ကွင်းများထဲမှ တချို့တွင် အရာအားလုံး၏ ရှင်သန်ကြီးထွားမှုက ကပြောင်းကပြန်ဖြစ်သွားကြသည်။ ရှေးခေတ်သစ်ပင်များက မြန်ဆန်စွာ ကျုံ့သွားကြပြီး ပျိုးပင်များအဖြစ် ပြောင်းလဲသွားကြသည်။ အရွယ်ရောက်ပြီးသော သက်ရှိများက မြန်ဆန်စွာ သေးငယ်သွားကြပြီး သန္ဓေသားလောင်းများအဖြစ် ပြောင်းလဲသွားကြသည်။

တခြားမြင်ကွင်းများထဲတွင် ကြယ်ဂြိုလ်များက ခြောက်သွေ့သွားပြီး သေဆုံးသွားကြသည်။ ထို့ပြင် ယင်းတို့က မသေဆုံးသွားမီ စကြာဝဠာတစ်ခုလုံး လင်းထိန်သွားစေမည့် ရောင်စဉ်အလင်းတန်းများကို ထုတ်လွှတ်လိုက်ကြသည်။

ထိုမြင်ကွင်းများက ၎င်း၏ ခမ်းနားထည်ဝါမှုအတွက် သက်သေများဖြစ်ကြသည်။

အမှတ်လေးကြယ်တာရာစက်ဝန်းတစ်ခုလုံးက သက်ရောက်ခံလိုက်ရသည်။

ပျက်စီးလွယ်သော သက်ရှိများက ပေါက်ကွဲသွားကြသည်။ ၎င်းတို့၏ ခန္ဓာကိုယ်က သွေးကြာပန်းများသဖွယ် ပွင့်လန်းသွားကြပြီး ၎င်းတို့၏ ဦးနှောက်များက သက်တံ့တံတားများအဖြစ် ပြောင်းလဲသွားကာ ကောင်းကင်ဘုံအထိ ဆန့်တန်းသွားကြသည်။

ဘုရားကျောင်းအားလုံးက ကမ္ဘာတုန်လှုပ်သွားစေမည့် ဟိန်းသံကို ထုတ်လွှတ်လိုက်ကြသည်။ ယင်းတို့က အထွတ်အမြတ်နတ်ဘုရားတည်ရှိမှုထံမှ ဖိအားကို မတောင့်ခံနိုင်ကြလေရာ ချက်ချင်း အသွင်ပြောင်းလဲသွားကြသည်။ ယင်းတို့က ကြည်လင်ပြီး အရောင်တောက်ပသော နတ်ဘုရားရုပ်ဝတ္ထုများအဖြစ် ဖြည်းဖြည်းချင်း ပြောင်းလဲသွားကြသည်။

နေနှင့်ည၏ ကုန်လွန်မှုအတွက် အမှတ်အသားများဖြစ်သော ဂြိုလ်ပတ်လမ်းကြောင်းများသည်ပင် သလင်းကျောက်ရုပ်ဝတ္ထုများအဖြစ် ဒြပ်ထည်ဖွဲ့စည်းသွားကြသည်။

အချိန်အက်ကွဲကြောင်းများထဲမှာ ပုန်းအောင်းနေကြသော ရှေးဟောင်းသတ္တဝါများ၏ လက်တံများက အထွတ်အမြတ်နတ်ဘုရားရုံးတော်၏ ဦးတည်ရာဆီသို့ ကွေးညွတ်သွားကြသည်။ ၎င်းတို့က ကြောက်လန့်တကြား တုန်ယင်နေကြသည်။

နတ်ဘုရားအရှင်သခင်များသည်တော့ ၎င်းတို့၏ မြင့်မြတ်သော ဦးခေါင်းက နတ်ဘုရားရုံးတော်၏ ဦးတည်ရာဆီသို့ ကွေးညွတ်သွားကြသည်။

ယင်းတို့အားလုံးက ကိုးကွယ်ပူဇော်ခြင်း ဖြစ်သည်။

ဤအခိုက်အတန့်မှာ မျက်လုံးအားလုံးက နတ်ဘုရင်ပေါ်သို့ ကျရောက်သွားကြသည်။

၎င်းက တစ်လှမ်းချင်း တစ်လှမ်းချင်း လျှောက်သွားနေစဉ် အလွန်ကြီးမားကျယ်ပြောပြီး အံ့ဖွယ်ကောင်းသော ၎င်း၏ အန္တိမအသွင်သဏ္ဍာန်က စကြာဝဠာထဲမှာ ထွက်ပေါ်လာသည်။ ထိုအသွင်သဏ္ဍာန်က သေမျိုးများနှင့် နတ်ဘုရားသက်ရှိများ၏ နားလည်နိုင်စွမ်းထက် ကျော်လွန်နေသည်။

၎င်း၏ ခန္ဓာကိုယ်ကို သုံးထရီလီယံရှိသော ထပ်ဆင့်ပုံရိပ်အလွှာများဖြင့် ဖွဲ့စည်းထားသည်။

၎င်း၏ အပြင်ဘက်အကျဆုံး အလွှာတွင် နဂါးငွေ့တန်းများက လျှို့ဝှက်ဆန်းကြယ်စွာ စီးဆင်းနေကြသည်။ ၎င်း၏ အတွင်းဘက်အလွှာတွင်တော့ ပျက်စီးနေသော နဂါးငွေ့တန်းများက လူသားနှင့်ဆင်တူသော ပုံရိပ်တစ်ခုအဖြစ် ဖွဲ့စည်းနေကြသည်။

အကယ်၍ တစ်စုံတစ်ယောက်က ၎င်း၏ မျက်နှာကို ကြည့်ရှုရန် ကြိုးစားမည်ဆိုလျှင် ပြိုကွဲပျက်စီးသွားနေသော အာကာသဟင်းလင်းပြင်ဝဲကတော့ကြီးကိုသာ မြင်ရလိမ့်မည်။ ထိုဝဲကတော့ကြီးထဲမှာ အဆုံးမဲ့သော ပြန်လည်မွေးဖွားခြင်းစက်ဝန်းများနှင့် အမြစ်ဖြတ်သုတ်သင်ခြင်းယန္တရားစက်ဝန်းများက ပုန်းကွယ်နေဟန် ရ၏။

ထို့ပြင် ဒိုင်မန်းရှင်းအက်ကွဲကြောင်းများကို ဖန်တီးနိုင်သော စွမ်းအင်စီးကြောင်းများက ထိုဝဲကတော့ကြီးထဲမှ ထွက်ပေါ်နေသည်။

ရံဖန်ရံခါ အလင်းတန်းတချို့က အပြင်သို့ ပျံ့လွင့်ထွက်လာပြီး ကြယ်အမှုန်အမွှားများအဖြစ် ပြန့်ကျဲသွားကာ သေမျိုးလောကများဆီသို့ ကျဆင်းသွားလေ့ရှိသည်။ ထိုအခါ ဖုန်တစ်မှုန်စီက မိုင်သန်းပေါင်းများစွာအထိ ဖြန့်ကြက်သွားမည့် နတ်ဘုရားအလင်းရောင်အဖြစ် ပြောင်းလဲသွားသည်။

ထိုနတ်ဘုရားအလင်းရောင်အောက်မှာ ကြယ်ဂြိုလ်များပေါ်မှ လေက အေးခဲသွားပြီး မရေမတွက်နိုင်သော တိမ်တိုက်များက မဟူရာရွှေဖန်သားအဖြစ် ပြောင်းလဲသွားသည်။ တစ်ချိန်တည်းမှာ နတ်ဘုရားများ၏ နတ်လက်နက်များထဲ၌ မဟူရာရွှေအရည်က စတင်စိမ့်ထွက်လာသည်။

၎င်းတို့က အော်ဟစ်ညည်းညူလိုက်ကြသည်။

ထိုနတ်လက်နက်များက ထာဝရတည်ရှိနိုင်သည်အထိ ကြံ့ခိုင်သော်လည်း ယခု အထွတ်အမြတ်နတ်ဘုရားဖိအားအောက်မှာ စတင်ယိုယွင်းပျက်စီးသွားကြသည်။

၎င်းက နတ်ဘုရင်ဖြစ်သည်။

ထိုစဉ် နတ်ဘုရားအသံတစ်သံက အမှတ်လေးကြယ်တာရာစက်ဝန်းတစ်ခုလုံးဆီသို့ ပဲ့တင်ထပ်သွားသည်။ ယင်းက သက်ရှိအားလုံးကို လွှမ်းမိုးနိုင်သော နတ်ဘုရားအမိန့်တော်ဖြစ်သည်။

“ နတ်ဘုရားသန္ဓေချက်ကြိုး… အကန့်အသတ်မဲ့ အဆုံးသတ်… နောက်ဆုံးတော့ ပွင့်သွားပြီ ”

“ ဒီဟာက နတ်ဘုရားလမ်းစဉ်ရဲ့ ဟိုးအနက်ပိုင်းထဲမှာ တကယ် ပုန်းအောင်းနေတာပဲ… ”

ထိုအသံက နတ်ဘုရားများ၏ နားထဲမှာသာ ပဲ့တင်ထပ်သွားခြင်း မဟုတ်ပေ။ ယင်းက ၎င်းတို့၏ အရိုးများထဲထိ ခေါင်းလောင်းမြည်သံပမာ နက်နက်ရှိုင်းရှိုင်း ပဲ့တင်ထပ်သွားသည်။

နတ်ဘုရားအမိန့်တော် ဆင်းသက်လာသည့်အခိုက် ဘာသာစကားအားလုံးက အဓိပ္ပာယ်ကင်းမဲ့သွားသည်။

နတ်ဘုရားများအပါအဝင် သက်ရှိအားလုံးသည် ၎င်းတို့၏ ဝိညာဉ်အနက်ပိုင်းထဲမှာ ထိုနတ်ဘုရားအမိန့်တော်ဖြင့် တိုက်ရိုက် တံဆိပ်ရိုက်ခတ်ခံလိုက်ကြရသည်။

ထို့နောက် တံဆိပ်ရိုက်ခတ်မှုက စတင်ပြိုကွဲသွားသည်။

အဘယ့်ကြောင့်ဆိုသော် ထိုနတ်ဘုရားအမိန့်တော်ထဲမှာ ပါဝင်သော စကားလုံးကိုးလုံးက မဟာတားမြစ်ချက်တစ်ခု ဖြစ်သောကြောင့် ဖြစ်သည်။

ထို့ပြင် ပြင်ပလောကအပေါ် ၎င်း၏ သက်ရောက်မှုက ၎င်းရည်ရွယ်ချက်ရှိစွာ လုပ်ဆောင်ခဲ့သောအရာ မဟုတ်ပေ။

ယင်းအစား ၎င်း၏ ဖြစ်တည်မှုမှ အသေးငယ်ဆုံး အစိတ်အပိုင်းတစ်ခု ပျံ့လွင့်သွားရုံမျှသာ ဖြစ်သည်။ သို့တိုင် ထိုပျံ့လွင့်မှုက အမှတ်လေးကြယ်တာရာစက်ဝန်းတစ်ခုလုံးကို ထူးဆန်းသော လောကတစ်ခုအဖြစ် စတင်ပြောင်းလဲသွားစေရန် လုံလောက်ပေသည်။

အစစ်အမှန်နတ်ဘုရားများဖြစ်စေ နတ်ဘုရားအရှင်သခင်များဖြစ်စေ သို့မဟုတ် တားမြစ်နယ်မြေထဲမှာ ချိပ်ပိတ်ခံထားရသော ခေါင်းတလားဖြစ်စေ ၎င်းတို့အားလုံးက ဤအခိုက်အတန့်မှာ တိတ်ဆိတ်ငြိမ်သက်သွားကြသည်။

နတ်ဘုရားသံကြိုးများက ဝဲကတော့ထဲမှာ လွင့်မျောနေကြသည်။

နတ်ဘုရင်နန်းခသည်တော့ ၎င်းက အစမှအဆုံးထိ ၎င်းအရှေ့မှာ မတ်တတ်ရပ်နေသော ကောက်ရိုးဖိနပ်နှင့် အဖိုးအိုတစ်ယောက်တည်းကိုသာ အာရုံစိုက်ထားခဲ့သည်။

“ ဒီနေရာက မင်းရဲ့ အစီအစဉ်တွေကို ငါမရပ်တန့်ခဲ့ဘူး… အခု… မင်းငါ့ကို တားဆီးမှာလား ”

နတ်ဘုရင်၏ အကြည့်က အဖိုးအိုပေါ်သို့ ကျရောက်သွားသည်။

အဖိုးအိုက ရှေးခေတ်မိခင်ဂြိုလ်၏ အပြင်ဘက်မှ ပွင့်နေသော ကြယ်ဂိတ်တံခါးကို အာရုံခံမိသွားသောအခါ စိတ်ရှုပ်ထွေးသော အရိပ်အယောင်က သူ၏ မျက်လုံးထဲမှာ ထွက်ပေါ်လာသည်။

ထို့နောက် သူက ခေါင်းခါလိုက်သည်။

နတ်ဘုရင်က နောက်ထပ် ဆက်မပြောတော့ဘဲ ၎င်း၏ ဘယ်လက်ကို မြှောက်လိုက်သည်။

၎င်း၏ လက်ဖဝါးထဲတွင် နေနှင့်လ သို့မဟုတ် မည်သည့်ဖရိုဖရဲမှ မထွက်ပေါ်လာပေ။ ယင်းအစား ရုပ်ဝတ္ထုထက် ကျော်လွန်သော ‘ နိယာမတည်ရှိမှု ’တစ်ခုက ထွက်ပေါ်လာသည်။

မရေမတွက်နိုင်သော အလင်းစက်ကွင်းများက ၎င်း၏ လက်ဖဝါးထဲမှာ တလက်လက် တောက်ပလာကြသည်။

ထိုအလင်းစက်ကွင်းတစ်ခုစီက မတူညီသော သက်ရှိအဖွဲ့အစည်းများ၏ အနိမ့်အမြင့်အတတ်အကျကို ဖော်ပြနေကြသည်။

ယင်းက ၎င်း၏ အထွတ်အမြတ်နတ်ဘုရားစွမ်းအင်အမြူတေဖြစ်ပြီး ဘုရင်မဟုတ်သူများ နားမလည်နိုင်သောအရာ ဖြစ်သည်။

၎င်း၏ လက်ဖဝါးကို တစ်ချက်ငုံ့ကြည့်ပြီးနောက် နတ်ဘုရင်က ဖြည်းညင်းစွာ လက်သီးဆုပ်လိုက်သည်။ ထို့နောက် ၎င်းက အရှေ့သို့ ခြေတစ်လှမ်း လှမ်းလိုက်သည်။

ထိုခြေတစ်လှမ်းနှင့်အတူ ၎င်း၏ အန္တိမအသွင်သဏ္ဍာန်က အတိုင်းအဆမဲ့သော အကွာအဝေးကို တိုက်ရိုက် ကျော်ဖြတ်သွားပြီး ရှေးခေတ်မိခင်ဂြိုလ်၏ အပြင်ဘက်သို့ ရောက်ရှိသွားသည်။

ထိုနေရာတွင် ၎င်းက ရှေးခေတ်မိခင်ဂြိုလ်ကို တစ်ချက်ပင် လှည့်မကြည့်ပေ။ ယင်းအစား ၎င်း၏ မျက်လုံးများက ပွင့်နေသော ကြယ်ဂိတ်တံခါးနှင့် ဂိတ်တံခါးအတွင်းမှ မီးခိုးရောင်လောကပေါ်သို့သာ ကျရောက်နေသည်။

၎င်းက တုံ့ဆိုင်းမနေပေ။ ဤသည်မှာ ခေတ်ပေါင်းမရေမတွက်နိုင်အောင် ၎င်းစောင့်ဆိုင်းပြီးမှ ရရှိလာခဲ့သော အခွင့်အရေးတစ်ကြိမ် ဖြစ်သည်။ သို့ဖြစ်၍ ၎င်းက ကြယ်ဂိတ်တံခါးထဲသို့ ခြေချလိုက်သည်။

၎င်းက ဉာဏ်အလင်းပွင့်နတ်ဘုရားဆီသို့ လမ်းစဉ်ကို ရှာဖွေတော့မည်။

၎င်း၏ အန္တိမအသွင်သဏ္ဍာန်က ကြောက်မက်ဖွယ်ကောင်းသော ဖိအားနှင့်တကွ ကြယ်ဂိတ်တံခါးထဲသို့ ဝင်ရောက်သွားသည့်အခါ ဂိတ်တံခါးက စတင်တုန်လှုပ်သွားသည်။ ဤသည်မှာ ကြယ်ဂိတ်တံခါးက ၎င်း၏ အလေးချိန်ကို မတောင့်ခံနိုင်သည့်အလားပင်။

အမှတ်လေးကြယ်တာရာစက်ဝန်း၏ နတ်ဘုရားလမ်းစဉ်က ၎င်းကို ဆန့်ကျင်လိုက်သည်။

သို့သော်လည်း ယင်းက အချည်းနှီးသာ ဖြစ်၏။ မည်သို့ဖြစ်ပါစေ ဂိတ်တံခါးက ပွင့်သွားပြီးပြီ ဖြစ်သည်။

ထို့ကြောင့် နောက်အခိုက်အတန့်မှာ နတ်ဘုရင်၏ ပုံရိပ်က အထဲသို့ အတင်းအကျပ် ဝင်ရောက်သွားပြီး မီးခိုးရောင်လောကထဲမှာ ပျောက်ကွယ်သွားကာ မြူခိုးထဲမှ အနက်ပိုင်းထဲသို့ လျှောက်သွားသည်။

ကြယ်ဂိတ်တံခါးသည်တော့ ထိုသို့အတင်းအကျပ် ဝင်ရောက်မှုကြောင့် အပိုင်းပိုင်းအစစ အက်ကွဲသွားပြီး နောက်ဆုံးမှာ လုံးဝပြိုကျပျက်စီးသွားသည်။

ကြိတ်ဂိတ်တံခါး၏ ပြိုကျပျက်စီးသံနှင့်အတူ အမှတ်လေးကြယ်တာရာစက်ဝန်း၏ နတ်ဘုရားလမ်းစဉ်က ဝမ်းနည်းဖွယ်ကောင်းစွာ အော်ဟစ်ညည်းညူလိုက်သည်။

နတ်ဘုရားလမ်းစဉ်က နိမ့်ကျသွားသည်။

သို့သော်လည်း ဤမတိုင်ခင် ကြယ်ဂိတ်တံခါးထဲမှ ထွက်ပေါ်လာသော သင်္ကေတများမှ ဖွဲ့စည်းသွားခဲ့သော သံကြိုးက အပြင်သို့ ဆန့်တန်းသွားပြီးပြီ ဖြစ်၏။ ကြယ်ဂိတ်တံခါးက ပြိုကျပျက်စီးသွားပြီး သံကြိုးက အစိတ်စိတ်အမွှာမွှာ အက်ကွဲသွားသော်လည်း သံကြိုးမှ အပိုင်းအစတစ်ခုက ရှေးခေတ်မိခင်ဂြိုလ်ပေါ်သို့ ပြုတ်ကျသွားဆဲပင်။

ချက်ချင်းဆိုသလို ထိုအစိတ်အပိုင်းက ဒိုင်မန်းရှင်းအားလုံးကို ဖောက်ထွင်းသွားသည်။ အမှတ်ငါးကြယ်တာရာစက်ဝန်းမှ ကံကြမ္မာသည်ပင် ယင်းကို မရပ်တန့်နိုင်ပေ။ သို့ဖြစ်၍ သံကြိုးအပိုင်းအစက ရှေးခေတ်မိခင်ဂြိုလ်၏ ကောင်းကင်ပေါ်မှာ ထွက်ပေါ်လာသည်။

ယင်းက လောကဝါးမျိုခြင်းစပါးအုံးမြွေတစ်ကောင်ပမာ အောက်ဘက်မှ မိုးသောက်သခင်လေးဆီသို့ ကျဆင်းသွားသည်။

ယင်းက မမျှော်လင့်ထားသောအရာ ဖြစ်သည်။

ထိုသံကြိုးအပိုင်းအစမှ ထုတ်လွှတ်နေသော ဖိအားက ရှေးခေတ်မိခင်ဂြိုလ်ကို တုန်ယင်သွားစေသည်။ နောက်အခိုက်အတန့်မှာ ဂြိုလ်၏ ကောင်းကင်က လုံးဝ အက်ကွဲသွားသည်။ ရွှီချင်းနှင့် ဝိညာဉ်ဖီးနတ်သမီး၏ စိတ်ဝိညာဉ်က အပြင်းအထန် တုန်လှုပ်သွားသည်။

ယင်းက နတ်ဘုရားစွမ်းအားမဟုတ်သလို အင်မော်တယ်လမ်းစဉ်မှ အစွမ်းလည်း မဟုတ်ချေ။

ယင်းက နတ်ဘုရားများနှင့် အင်မော်တယ်များထက် အများကြီး ပိုရှေးကျပြီး လျှို့ဝှက်ဆန်းကြယ်သည်။ ယင်းက သာမန်သက်ရှိများ၏ နားလည်နိုင်စွမ်းထက် ကျော်လွန်နေသည်။

ယင်းက မဟာကပ်ဘေးနှင့် ဆင်တူသည်။

မိုးသောက်သခင်လေးက အန္တရာယ်ထဲသို့ ကျရောက်သွားသည်။

“ အင်မော်တယ်လမ်းစဉ်က အသက်နဲ့ ဘဝကို တန်ဖိုးထားတယ်… နတ်ဘုရားလမ်းစဉ်က သေခြင်းတရားကို တန်ဖိုးထားတယ်… ငါ့ရဲ့ နတ်ဘုရားစွမ်းအင်အမြူတေကို အမြန်ဆွဲခွာဖို့ မင်းရဲ့ အစွမ်းကို ငါအသုံးပြုမယ် ”

ထိုသို့မဟာကပ်ဘေးဖြင့် ရင်ဆိုင်ရသောအခါ မိုးသောက်သခင်လေး၏ မျက်လုံးထဲတွင် ဆုံးဖြတ်ချက်ပြတ်သားသော အရိပ်အယောင်က ထွက်ပေါ်လာသည်။ သူက ကျယ်လောင်စွာ အော်ပြောပြီးနောက် သူ၏ ညာလက်ကို မြှောက်လိုက်ပြီး သူ၏ မျက်လုံးများထဲသို့ ထိုးစိုက်လိုက်သည်။

သူက ဆွဲထုတ်သော လက်လှုပ်ရှားမှုနှင့်အတူ သူ၏ မျက်လုံးများထဲမှ ရွှေရောင်အလင်းကို ဆွဲထုတ်လိုက်ပြီး ယင်းကို သူ၏ လက်ဖဝါးပေါ်မှာ ဖြတ်တောက်လိုက်သည်။

သွေးက သူ၏ မျက်လုံးပေါက်များထဲမှ ဒလဟော စီးကျလာသည်။

သူက နောက်ထပ် တုံ့ဆိုင်းမနေဘဲ သူ၏ ခန္ဓာကိုယ်ထဲမှ တာအိုအရိုးများကို လှုံ့ဆော်လိုက်ပြီး ကလေးဘဝမှာ သူနှင့်အတူ မွေးဖွားလာခဲ့သော စစ်မှန်သော အာဏာစက်ကို ပြန်ထုတ်ဖော်လိုက်သည်။

ယင်းက ကြေးမုံအာဏာစက် ဖြစ်သည်။

သူက ရှေးအကျဆုံး ထိုအာဏာစက်ကို အသုံးပြု၍ သူ၏ ဆုံးရှုံးသွားသော မျက်လုံးများနေရာမှာ အစားထိုးလိုက်သည်။

နောက်အခိုက်အတန့်မှာ အလင်းရောင်က သူ၏ မျက်လုံးထဲသို့ ပြန်ရောက်လာသည်။

သူက အမြင်အာရုံကို ပြန်လည်ရရှိသွားသည်။

ကြေးမုံအာဏာစက်အစွမ်း ကိန်းအောင်းနေသော ထိုမျက်လုံးများဖြင့် သူကြည့်လိုက်သည့်နေရာတိုင်း အရပ်မျက်နှာအဘက်ဘက်မှာ ကံကြမ္မာမြစ်က ပုံရိပ်ပြန်လာသည်။

ဤသည်မှာ ကံကြမ္မာမြစ်က သူ၏ ခန္ဓာကိုယ်ထဲမှ မြှောက်တတ်လာနေသည့်အလားပင်။

နောက်အခိုက်အတန့်မှာ ကံကြမ္မာမြစ်က သူ၏ ခန္ဓာကိုယ်ထဲသို့ ဒလဟော တိုးဝင်သွားသည်။

ဝုန်းခနဲ မြည်သံများကြားတွင် ကံကြမ္မာအစွမ်းက အတွင်းနှင့်အပြင်၌ အပြန်အလှန် ယှက်ထွေသွားကြပြီး အချင်းချင်း အားဖြည့်ပေးလိုက်ကြသည်။

ယင်းက မိုးသောက်သခင်လေး၏ ခန္ဓာကိုယ်ထဲမှ ကမ္ဘာတုန်ဟီးစေနိုင်သော အရှိန်အဝါကို အပြင်သို့ ထွက်ပေါ်လာစေသည်။ အမှတ်ငါးကြယ်တာရာစက်ဝန်း၏ ကံကြမ္မာနှင့် အပြည့်အဝ သူပေါင်းစပ်သွားပြီးနောက် သူ၏ အသံက ပဲ့တင်ထပ်သွားသည်။

“ ရွှီချင်း… ငါ့မှာ မင်းအတွက် လက်ဆောင်တစ်ခုရှိတယ်… အဲ့ဒါကို မင်းလက်ခံရဲလား ”

ယင်းကို ကြားသောအခါ ရွှီချင်း၏ မျက်လုံးက စူးစမ်းလိုစိတ်နှင့်အတူ ဝင်းလက်တောက်ပသွားသည်။

အမှန်မှာ ထိုလက်ဆောင်က မည်သည့်အရာဖြစ်နိုင်ကြောင်း သူခန့်မှန်းမိထားသည်။

ယင်းက နတ်ဘုရားတစ်ပါးအဖြစ်မှ အင်မော်တယ်တစ်ပါးအဖြစ်သို့ ကူးပြောင်းသွားနေသော မိုးသောက်သခင်လေး သူကိုယ်တိုင် မထိတွေ့နိုင်သည့် တစ်ခုတည်းသောအရာ ဖြစ်သည်။

ယင်းက နတ်ဘုရားအရှင်သခင်အဖြစ်သို့ မိုးသောက်သခင်လေး တတ်လှမ်းသွားခဲ့စဉ်အတွင်း အမှတ်လေးကြယ်တာရာစက်ဝန်း၏ နတ်ဘုရင်ထံမှ သူလုယက်ခဲ့သော ကံကြမ္မာနတ်ဘုရားအခွင့်အာဏာ ဖြစ်သည်။

ထို့ပြင် ယင်းက အင်မော်တယ်ဘုရင် သူ့ကို ဤနေရာဆီသို့ စေလွှတ်ခဲ့သည့် အကြောင်းအရင်းဖြစ်ကြောင်းကိုလည်း ရွှီချင်း နားလည်သည်။

သူ၏ အသိစိတ်က အပြင်းအထန် တုန်လှုပ်သွားပြီး သူ၏ အသက်ရှူသံက မြန်ဆန်လာသည်။ သူက စိတ်ဓာတ်ပြတ်သားစွာ တုံ့ပြန်လိုက်သည်။

“ ဒါပေါ့… ဘာလို့ ငါလက်မခံရဲရမှာလဲ ”

ရှေးဦးအပျက်အစီးနှင့်ဆက်စပ်နေသော ကမ္မသည် တခြားလူများ မထိတွေ့ဝံ့သောအရာ ဖြစ်သည်။ သို့သော်လည်း ရွှီချင်းသည် အစကတည်းက ရှေးဦးအပျက်အစီးနှင့် နက်ရှိုင်းစွာ ဆက်နွယ်ပြီးနေပြီ ဖြစ်သည်။

သူ၏ နတ်ဘုရားကိုယ်ပွားကို ရှေးဦးအပျက်အစီး၏ အသွေးအသားများဖြင့် ဖွဲ့စည်းထားခဲ့သည် မဟုတ်ပါလော။

အတိတ်မှာ သူနှင့် သူ၏ စီနီယာအကိုကြီးက ရှေးဦးအပျက်အစီး၏ အသွေးအသားများကို ခိုးယူခဲ့ကြပြီး နောက်ပိုင်းမှာ ယင်းကို သူ့ဆရာက အမည်မသိနည်းလမ်းတစ်ခုဖြင့် ရုပ်ခန္ဓာကိုယ်တစ်ခုကို တည်ဆောက်ပေးခဲ့သည်။

သို့ဖြစ်၍ ကံကြမ္မာနတ်ဘုရားအခွင့်အာဏာကို ရယူခြင်းသည် သူ့အတွက် မထူးမခြားနားကိစ္စတစ်ခုမျှသာ ဖြစ်သည်။

ထိုသို့တွေးမိသောအခါ ရွှီချင်း၏ မျက်လုံးက ဝင်းလက်တောက်ပသွားသည်။

ကောင်းကင်ထက်တွင် မိုးသောက်သခင်လေးက ရွှီချင်း၏ တုံ့ပြန်မှုကို ကြားသောအခါ ရယ်လိုက်သည်။

သူက ညာလက်ကို မြှောက်လိုက်ပြီး ကောင်းကင်ကို ဖမ်းဆုပ်လိုက်သည်။ ထိုအခါ အမှတ်ငါးကြယ်တာရာစက်ဝန်းမှ ကံကြမ္မာက သူ၏ လက်ထဲမှာ စုဝေးသွားပြီး ကံကြမ္မာဆေဘာဓားတစ်လက်ကို ဖွဲ့စည်းသွားသည်။

ထို့နောက် သူက သူ၏ တာအိုအရိုးများမှ တုန်ခါမှုကို လောင်စာအဖြစ် အသုံးပြု၍ နတ်ဘုရားအရှင်သခင်နှင့် အင်မော်တယ်အရှင်သခင်၏ ပေါင်းစပ်စွမ်းအင်အောက်မှာ နတ်ဘုရားကပ်ဘေးမှ နတ်ဘုရားမီးပွားစကို လမ်းညွှန်မှုအဖြစ် သတ်မှတ်ကာ သူ၏ ကံကြမ္မာဆေဘာဓားကို ဆွဲမြှောက်လိုက်သည်။

သူက ကောင်းကင်ပေါ်မှ ကျဆင်းလာနေသော သံကြိုးအပိုင်းအစကို ကံကြမ္မာဆေဘာဓားဖြင့် ခုတ်ပိုင်းလိုက်သည်။

ဝုန်း…

ထိုဓားချက် ကျဆင်းသွားသည်နှင့် အမှတ်လေးကြယ်တာရာစက်ဝန်းမှ ကံကြမ္မာချည်မျှင်များက အက်ကွဲသွားပြီး အတိတ်နှင့် အနာဂတ်မှ အလင်းတန်းများက သွေးရေတံခွန်အဖြစ် ပေါင်းစည်းသွားကြသည်။

အမှတ်ငါးကြယ်တာရာစက်ဝန်းသည်လည်း တုန်ခါသွားသည်။ ကြယ်တာရာစက်ဝန်းထဲမှ သက်ရှိအားလုံးက တစ်ပြိုင်နက် ပဲ့တင်ပြန်လိုက်ကြသည်။

သူတို့အားလုံးက ဆေဘာဓားနောက်သို့ လိုက်၍ သံကြိုးဖြင့် အပြင်းအထန် တွေ့ဆုံသွားကြသည်။

ကောင်းကင်မြေပြင်အက်ကွဲစေနိုင်သော အသံက ရှေးခေတ်မိခင်ဂြိုလ်၏ အပြင်ဘက်မှာ ပေါက်ကွဲထွက်လာပြီး မှတ်ဉာဏ်ပင်လယ်တစ်ခုလုံးဆီသို့ ပဲ့တင်ထပ်သွားသည်။

ဧရာမလှိုင်းလုံးများက ပေါ်လျှိုးလာကြသည်။

သံကြိုးက တုန်ယင်သွားသည်။

မိုးသောက်သခင်လေးသည်လည်း အပြင်းအထန် တုန်ယင်သွားပြီး အနောက်ဆုတ်သွားသည်။ မရေမတွက်နိုင်သော စကြာဝဠာများက သူ၏ ခန္ဓာကိုယ်ထဲမှာ ပေါက်ကွဲသွားသည့်အလား သူ၏ ခန္ဓာကိုယ်ပေါ်မှာ ဆုတ်ပြဲသော ဒဏ်ရာအများအပြား ထွက်ပေါ်လာသည်။ နတ်ဘုရားသွေးက သူ၏ ဒဏ်ရာများထဲမှ စီးကျလာပြီး အနီရောင်ရေခဲသလင်းကျောက်များအဖြစ် ပြောင်းလဲသွားကာ အရပ်မျက်နှာပေါင်းစုံသို့ ပြန့်ကျဲသွားသည်။

သလင်းကျောက်တစ်ခုစီမှာ မိုးသောက်သခင်လေး အင်မော်တယ်တစ်ပါးအဖြစ်မှ နတ်ဘုရားတစ်ပါးအဖြစ်သို့ ကူးပြောင်းသွားခဲ့စဉ်က မြင်ကွင်းများ ပုံရိပ်ပြန်နေသည်။

ထို့ပြင် သလင်းကျောက်များက ကံကြမ္မာနှင့် သံကြိုး၏ တွေ့ဆုံမှုအောက်မှာ မြန်ဆန်စွာ အရည်ပျော်သွားကြသည်။

ထိုစဉ် အင်မော်တယ်လမ်းစဉ်၏ အခြေခံအုတ်မြစ်မှ ပြန်ဖွဲ့စည်းသွားသော ဖရိုဖရဲဒီရေက မိုးသောက်သခင်လေးဆီသို့ တစ်ဟုန်ထိုး စီးဆင်းသွားသည်။

ယင်းက သူ၏ ဒန်တျန်ထဲသို့ စီးဆင်းသွားသည့်အခါ သူ၏ နတ်ဘုရားပင်လယ်က စတင်ပြိုကွဲသွားပြီး အသစ်တဖန် ပြန်ဖွဲ့စည်းသွားသည်။ တစ်ချိန်တည်းမှာ နတ်ဘုရားပင်လယ်၏ အနက်ပိုင်းထဲတွင် နစ်မြုပ်နေသော သူ၏ နတ်ဘုရားစွမ်းအင်အမြူတေက စတင်မြှောက်တတ်လာသည်။ ထို့ပြင် မရေမတွက်နိုင်သော ချည်မျှင်များက မိုးသောက်သခင်လေးနှင့် ဆက်သွယ်သွားကြသည်။

ယင်းက ပြင်ပမှ သက်ရောက်လာသော အင်အားကို ခုခံတားဆီးနေသည်။

ထိုချည်မျှင်များက ကမ္မဖြစ်သည်။

“ မလုံလောက်သေးဘူး ”

မိုးသောက်သခင်လေးက ရွှေရောင်နှင့် ငွေရောင်ရောနှောနေသော သွေးကို အန်ထုတ်လိုက်ပြီး မပျက်စီးသေးသော ကမ္မချည်မျှင်များကို ကြည့်လိုက်သည်။ ထို့နောက် သူ၏ အမူအရာက ရက်စက်ကြမ်းကြုတ်မှုနှင့်အတူ တင်းမာခက်ထန်သွားသည်။

ယခု သူ၏ သူငယ်အိမ်များထဲမှာ ယင်ယန်ငါးတစ်ကောင်၏ မှော်အစီအရင်က ထွက်ပေါ်လာသည်။

သူ၏ ဘယ်ဘက်မျက်လုံးက ကမ္မချည်မျှင်များဖြင့် ယှက်ထွေနေသော နတ်ဘုရားစွမ်းအင်အမြူတေကို ထုတ်ဖော်လိုက်သည်။ ယင်းထဲမှာ အမှတ်လေးကြယ်တာရာစက်ဝန်းထဲမှ ပြိုကွဲပျက်စီး‌နေသော ဥပဒေသအားလုံး ပါဝင်သည်။

သူ၏ ညာဘက်မျက်လုံးက အသစ်မွေးဖွားလာသော အင်မော်တယ်စွမ်းအင်ဝဲကတော့ကို ထုတ်ဖော်လိုက်ပြီး ယင်းထဲမှာ အမှတ်ငါးကြယ်တာရာစက်ဝန်းထဲမှ သက်ရှိအားလုံးက ပုံရိပ်ပြန်နေကြသည်။

ထို့နောက် သူက အပေါ်သို့ ခုန်တတ်လိုက်ပြီး ကောင်းကင်ပေါ်မှ ကျဆင်းလာနေသော သံကြိုးဆီသို့ ပျံသန်းသွားသည်။