တာအိုချေးငှားခြင်း ကမ္မ

ကမ်းစပ်ကိုးခုအင်မော်တယ်အရှင်သခင် ထီးနန်းဆင်းသွားသည့်အခိုက် ခေတ်သစ်က အမှန်တကယ် ရောက်ရှိလာသည်။

အင်မော်တယ်အရှင်သခင်မီမင်၏ ဂုဏ်သတင်းသည် ကံကြမ္မာ၏ တုံ့ပြန်မှုကြောင့် အမှတ်ငါးကြယ်တာရာစက်ဝန်းတစ်ခုလုံးဆီသို့ ပျံ့နှံ့သွားပြီးပြီ ဖြစ်သည်။

ယခု သူက သူ့ဖခင် မိုးသောက်၏ လမ်းစဉ်အတိုင်း အမှတ်ငါးကြယ်တာရာစက်ဝန်းတစ်ခုလုံးကို အုပ်ချုပ်နေပြီး သူ၏ အဆင့်အတန်းက သက်ရှိအားလုံး၏ အထွတ်အထိပ်မှာ ရှိသည်။

ထို့ပြင် အမှတ်လေးကြယ်တာရာစက်ဝန်း၏ စစ်မြေပြင်ပေါ်၌ သူ၏ လုပ်ဆောင်မှုများက အလွန်အံ့ဖွယ်ကောင်းသည်။ အထူးသဖြင့် သူက နတ်ဘုရားအရှင်သခင်နှစ်ပါးကို သုတ်သင်ရှင်းလင်းခဲ့ပြီး စစ်ပွဲ၏ အကြွင်းမဲ့ဩဇာအာဏာကို အင်မော်တယ်အရှင်သခင်ကျန်းလူထံမှ လွှဲပြောင်းယူခဲ့သည်။

ထိုကိစ္စက ကံကြမ္မာဒီရေကို ပရမ်းပတာ လှုပ်ခတ်သွားစေပြီး အမှတ်ငါးကြယ်တာရာစက်ဝန်းထဲမှ မရေမတွက်နိုင်သော ကျင့်ကြံသူများကို စိတ်ဓာတ်တတ်ကြွသွားစေသည်။ ဝမ်းမြောက်သော အော်ဟစ်သံများက အထောက်အပံ့ကြယ်ဂြိုလ်များပေါ်မှာ ပဲ့တင်ထပ်သွားသည်။

တစ်ချိန်တည်းမှာ ရွှီချင်း၏ သရုပ်အဆင့်အတန်းက တစ်ဟုန်ထိုး မြင့်တတ်သွားသည်။

သူက မိုးသောက်ကောင်းကင်ဘုံအလွန်၏ အရှင်သခင်ဖြစ်ပြီး အင်မော်တယ်အရှင်သခင်မီမင်နှင့် နက်ရှိုင်းသော ဆက်ဆံရေးရှိသည်။ သူက မီမင်၏ အဆင့်တတ်လှမ်းခြင်းနှင့် လမ်းစဉ်ပြောင်းလဲခြင်းမှာ ဝင်ရောက်ကူညီပေးခဲ့ရုံသာမက မီမင် အင်မော်တယ်အရှင်သခင်ဖြစ်လာပြီးနောက် ပထမဆုံး ထုတ်ပြန်လိုက်သော အမိန့်တော်က ရွှီချင်းကို ရည်ညွှန်းသည်။

ထို့ကြောင့် လက်ရှိမိုးသောက်ခေတ်မှာ ရွှီချင်း၏ အဆင့်အတန်းက အမှတ်ငါးကြယ်တာရာစက်ဝန်းထဲတွင် အလွန်မြင့်မားသည်။ ကောလဟာလများတွင် အင်မော်တယ်အရှင်သခင်မီမင်က ရွှီချင်းကို သူ၏ ညီလေးကဲ့သို့ သဘောထားသည်ဟု ဆိုသည်။

ထိုသို့အဆင့်အတန်း၊ ထိုသို့ရာထူးနှင့် ထိုသို့ကံကြမ္မာကြောင့် အမှတ်ငါးကြယ်တာရာစက်ဝန်းထဲမှ အင်အားစုများသည် ရွှီချင်းအပေါ် ရှိန်လာကြသည်။ အထူးသဖြင့် အတိတ်မှာ ရွှီချင်းအပေါ် မကောင်းကြံစည်လိုခဲ့သော အင်အားစုများ ဖြစ်ကြသည်။ ယခု သူတို့က စိတ်မသက်မသာ ခံစားမိလာကြသည်။

သူတို့ထဲတွင် အဓိက စိတ်မသက်မသာ ခံစားနေရသူသည် လီမုန့်တု၏ ဆရာ အဆိပ်ဘုရင်ဖြစ်သည်။

ဤအခိုက်အတန့်မှာ သူက အမှတ်လေးကြယ်တာရာစက်ဝန်း၏ စစ်မြေပြင်မှာ ရှိနေပြီး ကြယ်တာရာဟင်းလင်းပြင်ထဲတွင် သေခြင်းရှင်ခြင်းကပ်ဘေးမှ လက်မလေးတင် လွတ်မြောက်သွားခဲ့သည်။ ယခု သူက အစောနက သူသတ်ဖြတ်ခဲ့သော အစစ်အမှန်နတ်ဘုရားတစ်ပါး၏ နယ်မြေထဲမှ မီးခိုးရောင်ဥက္ကာပျံတစ်စင်းပေါ်မှာ တင်ပျဉ်ခွေထိုင်နေပြီး နှုတ်ဆိတ်နေသည်။

သူ၏ ဘေးပတ်ပတ်လည်တွင် ဤတစ်ကြိမ်တာဝန်အတွက် သူနှင့်အတူ လိုက်ပါလာခဲ့ကြသော သူ၏ လက်အောက်ငယ်သားများ ရှိကြသည်။

အကယ်၍ ရွှီချင်းသာ ဤနေရာမှာ ရှိမည်ဆိုလျှင် ထိုကျင့်ကြံသူများက အတိတ်မှာ သူ့ကို ပြဿနာရှာခဲ့ကြသော ရိက္ခာထိန်းသိမ်းသူအဖွဲ့မှ ကျင့်ကြံသူများဖြစ်ကြောင်း ချက်ချင်း သူမှတ်မိသွားလိမ့်မည်။

သို့သော်လည်း ယခင်နှင့် နှိုင်းယှဉ်မည်ဆိုလျှင် ထိုအဖွဲ့ထဲမှာ လူအနည်းစုသာ ကျန်ရှိကြတော့သည်။ ထို့ပြင် သူတို့တစ်ယောက်ချင်းစီက ဒဏ်ရာအပြင်းအထန် ရရှိထားကြပြီး ပင်ပန်းနွမ်းနယ်နေကြသည်။

သူတို့သည်လည်း နှုတ်ဆိတ်နေကြသည်။ ရံဖန်ရံခါ သူတို့က သူတို့၏ အရှေ့မှ အဆိပ်ဘုရင်ဆီသို့ လှမ်းကြည့်ကြလေ့ ရှိသည်။ ဤသည်မှာ သူတို့က တစ်စုံတစ်ခုပြောချင်သော်လည်း တုံ့ဆိုင်းနေကြသည့်အလားပင်။

အဆိပ်ဘုရင်သည် အနောက်မလှည့်ပေ။ သို့သော်လည်း သူ၏ ကျင့်ကြံခြင်းအဆင့်ကြောင့် သူ၏ ဘေးပတ်ပတ်လည်မှ အဖြစ်အပျက်အားလုံးကို အလိုအလျောက် သူသိနိုင်သည်။

ခါးသီးမှုက သူ၏ နှလုံးသားထဲမှာ ပြည့်နှက်နေစဉ် ပြင်းထန်သော လှိုင်းလုံးများက သူ၏ စိတ်ထဲမှာ ထွက်ပေါ်လာသည်။

အစက သူသည် စစ်မြေပြင်ဆီသို့ ရောက်လာရန် မလိုအပ်ပေ။

သို့သော်လည်း လွန်ခဲ့သော ရက်အနည်းငယ်မှာ အမှတ်လေးကြယ်တာရာစက်ဝန်းထဲမှ အမိန့်တော်တစ်ခုက သူ့အား ဤနေရာသို့ အတင်းအကျပ် ရောက်လာစေခဲ့သည်။

ယင်းက အင်မော်တယ်အရှင်သခင်မီမင်၏ တိုက်ရိုက် အမိန့်တော်မဟုတ်သော်လည်း ယင်းက စစ်ပွဲအမိန့်ပေးမျှော်စင်ထံမှ ရောက်ရှိလာခြင်း ဖြစ်သည်။

တစ်စုံတစ်ယောက်က သူနှင့် သူ၏ လက်အောက်ငယ်သားများကို အမှတ်လေးကြယ်တာရာစက်ဝန်းဆီသို့ စေလွှတ်ခဲ့ပြီး စစ်ပွဲထဲမှာ ပါဝင်ခိုင်းခဲ့သည်။ ထို့ပြင် သူတို့ကို အထူးတာဝန်တစ်ခုလည်း ပေးအပ်ခဲ့သေးသည်။

ထိုလူက မည်သူဖြစ်နိုင်ကြောင်း အဆိပ်ဘုရင်က ခန့်မှန်းနိုင်ခဲ့သည်။ ထို့ပြင် ယင်းက အဓိကပြဿနာမဟုတ်ကြောင်း သူသိသည်။ မည်သို့ဖြစ်ပါစေ စစ်ပွဲကို အသုံးပြုပြီး သူ့ကို သတိပေးကာ ထိုပုဂ္ဂိုလ်ထံမှ မျက်နှာလို မျက်နှာရ လုပ်ချင်သူများက အများကြီး ရှိသည်။

“ ရွှီချင်းဆီကနေ မျက်နှာသာပေးမှုကို လိုချင်တာလား… ”

အဆိပ်ဘုရင်က တီးတိုးရေရွတ်လိုက်သည်။ သူ၏ နှလုံးသားထဲမှ ခါးသီးမှုက ပိုပြီးအားကောင်းလာသည်။

အကယ်၍ သူက ဤစစ်ပွဲထဲမှာ ပါဝင်ရုံမျှသာဆိုလျှင် ကိစ္စမရှိပေ။ မည်သို့ဖြစ်ပါစေ သူ၏ ကျင့်ကြံခြင်းစွမ်းအားဖြင့်ဆိုလျှင် သာမန်နတ်ဘုရားများက သူ့အတွက် ပြဿနာ မဟုတ်ပေ။ သို့သော်လည်း သူတို့ကို ပေးအပ်ထားသော အထူးတာဝန်က အလွန်ရက်စက်သည်။

သူက သူနှင့်အဆင့်တူသော အစစ်အမှန်နတ်ဘုရားကိုးပါးကို သုတ်သင်ရှင်းလင်းပစ်ရမည်။

လွန်ခဲ့သော ရက်များမှာ သူက အစစ်အမှန်နတ်ဘုရားတစ်ပါးကိုသာ သတ်ပစ်နိုင်ခဲ့သည်။

“ ငါနဲ့ ရွှီချင်းကြားက ကိစ္စကို လူအများကြီး သိထားကြတယ်… အဲ့ဒါက ကမ္မရဲ့ အကျိုးသက်ရောက်မှုလား ”

“ အတိတ်မှာ ငါက ငါ့ရဲ့ ရည်ရွယ်ချက်အတွက် သူ့ရဲ့ တာအိုကို ချေးငှားဖို့ ကြိုးစားခဲ့တယ်… အဲ့ဒါက ကျရှုံးသွားခဲ့ပေမဲ့ ကမ္မမျိုးစေ့က အပင်ပေါက်ပြီးနေပြီ ”

“ အခု… တန်ပြန်ဆိုးကျိုးက စတင်လာနေပြီ ”

အဆိပ်ဘုရင်က အတိတ်ကို ပြန်စဉ်းစားလိုက်သည့်အခါ ဆန္ဒမရှိမှုက သူ၏ နှလုံးသားထဲမှာ ထွက်ပေါ်လာသည်။ ထို့နောက် ခါးသီးသော စိတ်ခံစားမှုက သူ၏ နှလုံးသားထဲမှာ ပြည့်နှက်သွားသည်။

ရွှီချင်းက မြင့်သထက် အမြင့်သို့ တစ်ဆင့်ပြီးတစ်ဆင့် တတ်လှမ်းသွားသည်ကို အထူးတလည် သူစောင့်ကြည့်နေခဲ့သည်။ နောက်ဆုံးမှာ တစ်ဖက်လူက သူမော်ကြည့်ရသော နေရာသို့ ရောက်ရှိသွားခဲ့သည်။

ယခုအချိန်မှာ တစ်ဖက်လူက သူ့အား ဖြေရှင်းရန် လက်မြှောက်စရာပင် မလိုတော့ပေ။ သူ့ကို မျက်နှာလို မျက်နှာရ လုပ်ချင်ကြသော လူများက သူ့အား စတင်သတိပေးနေကြပြီ ဖြစ်သည်။

ယင်းကို စဉ်းစားမိသောအခါ အဆိပ်ဘုရင်က နူးညံ့စွာ သက်ပြင်းချလိုက်သည်။

“ ငါစေလွှတ်ထားတဲ့ ကိုယ်ပွားက အခု အဲ့ဒီကို ရောက်သွားလောက်ပြီ… အဲ့ဒါက ဒီကပ်ဘေးကို ဖြေရှင်းနိုင်မယ်လို့ ငါမျှော်လင့်တယ် ”

အဆိပ်ဘုရင်က ခေါင်းလှည့်လိုက်ပြီး အမှတ်ငါးကြယ်တာရာစက်ဝန်း၏ ဦးတည်ရာဆီသို့ ကြည့်လိုက်သည်။

တစ်ချိန်တည်းမှာ အမှတ်ငါးကြယ်တာရာစက်ဝန်းထဲမှ ရွှီချင်း လက်ရှိနေထိုင်နေသော အဝါရောင်အထောက်အပံ့ကြယ်ဂြိုလ်၏ အပြင်ဘက်တွင် ဖရိုဖရဲပုံရိပ်တစ်ခုက ဟင်းလင်းပြင်ထဲမှာ ထွက်ပေါ်လာသည်။

ထိုပုံရိပ်က အဖိုးအိုတစ်ယောက်ဖြစ်ပြီး သူ့ကို အစိမ်းပုပ်ရောင်အဆိပ်မြူခိုးက ဝန်းရံထားသည်။ သူ၏ အသွင်သဏ္ဍာန်နှင့် အရှိန်အဝါက အဆိပ်ဘုရင်နှင့် တစ်ထပ်တည်း တူညီသည်။

၎င်းက အဆိပ်ဘုရင်စေလွှတ်ထားသော ကိုယ်ပွားမှလွဲ၍ တခြားမဟုတ်ပေ။

သို့သော်လည်း ထိုကိုယ်ပွားက လမ်းတစ်လျှောက်မှာ အစွမ်းထက်ရန်သူများဖြင့် ရင်ဆိုင်တွေ့ကြုံခဲ့ရကြောင်း ထင်ရှား၏။ သူက ဤနေရာသို့ အောင်မြင်စွာ ရောက်ရှိလာသော်လည်း ဒဏ်ရာအပြင်းအထန် ရရှိထားသည်။

အစိမ်းပုပ်ရောင်အဆိပ်မြူခိုးထဲတွင် ကိုယ်ပွား၏ ခန္ဓာကိုယ်က ညှိုးခြောက်နေပြီး သူ၏ ခန္ဓာကိုယ်ပေါ်မှာ ဒဏ်ရာအမျိုးမျိုး ရှိသည်။ သူ့ကိုယ်ပိုင် အာဏာစက်သည်ပင် ယိုယွင်းပျက်စီးသော အငွေ့အသက်ကို ထုတ်လွှတ်နေပြီး သူ၏ ဘယ်လက်က လုံးဝ ဖြတ်တောက်ခံထားရသည်။ ထို့ပြင် လူးလွန့်ရွေ့လျားနေသော အသားအဖုများက သူ၏ ဒဏ်ရာများကို ဖုံးလွှမ်းထားသည်။

ဤအခိုက်အတန့်မှာ ကိုယ်ပွားက အထောက်အပံ့ကြယ်ဂြိုလ်ကို စိုက်ကြည့်လိုက်လေရာ အနည်းငယ် တုံ့ဆိုင်းသွားသည်။ ထို့နောက် သူက အံတင်းတင်းကြိတ်လိုက်ပြီး ကြယ်ဂြိုလ်ဆီသို့ ဦးတည်သွားသည်။

မိတ်ဆွေဟောင်းတစ်ဦး၏ ဦးဆောင်မှုအောက်မှာ သူက စစ်ဆေးမှုအထပ်ထပ်ကို အောင်မြင်စွာ ဖြတ်ကျော်နိုင်သွားသည်။ နာရီအနည်းငယ်ကြာပြီးနောက် သူက ကြယ်ဂြိုလ်၏ အရှေ့တောင်ဘက်မှာ တည်ရှိသော စောင့်ကြည့်မျှော်စင်တစ်ခု၏ အရှေ့သို့ ရောက်ရှိသွားသည်။

ထိုစောင့်ကြည့်မျှော်စင်ကို ဥက္ကာခဲများဖြင့် တည်ဆောက်ထားပြီး ယင်းက မြင့်မားသော တောင်တစ်လုံး၏ အပေါ်မှာ တည်ရှိသည်။ မျှော်စင်၏ ဘေးပတ်ပတ်လည်မှာ အလွန်သိပ်သည်းသော အင်မော်တယ်စွမ်းအင်ဖြင့် ပြည့်နှက်နေသည်။

ထိုစောင့်ကြည့်မျှော်စင်က ရွှီချင်း၏ ယာယီနေအိမ် ဖြစ်သည်။

ထိုနေရာသို့ ရောက်သည့်အခါ ကိုယ်ပွားကို ခေါ်ဆောင်လာသော မိတ်ဆွေဟောင်းက နောက်ထပ် လိုက်မပို့တော့ပေ။ ယင်းအစား သူက အနောက်သို့ ဆုတ်သွားပြီး တိုးညင်းစွာ ပြောသည်။

“ အဆိပ်ဘုရင်… အခုကစပြီး ဒီကိစ္စကို မင်းဘာသာပဲ ဖြေရှင်းရတော့မယ် ”

ထိုသို့ပြောပြီးနောက် သူက စိတ်ထဲမှာ သက်ပြင်းချလိုက်သည်။

သူက ဤကြယ်ဂြိုလ်ပေါ်မှ မြို့စောင့်တပ်ဖွဲ့၏ တပ်မှူးတစ်ယောက်ဖြစ်ပြီး ရွှီချင်းနှင့် အဆိပ်ဘုရင်ကြားမှ ပဋိပက္ခကိုလည်း ကြားဖူးသည်။ အကယ်၍ သူသာ အတိတ်မှာ အဆိပ်ဘုရင်အပေါ် ကျေးဇူးအကြွေးတင်မနေခဲ့လျှင် ဤတစ်ကြိမ် ကိုယ်ပွားကို ဤနေရာသို့ သူခေါ်ဆောင်လာလိမ့်မည် မဟုတ်ချေ။

ယင်းကို ကြားသောအခါ ကိုယ်ပွားက ညင်သာစွာ ခေါင်းညိတ်လိုက်သည်။ ထို့နောက် သူက အဝေးမှ တောင်ပေါ်မှ စောင့်ကြည့်မျှော်စင်ကို ကြည့်လိုက်သည်။ လျှပ်တစ်ပြက်အတွင်းမှာ သူက မျှော်စင်၏ အရှေ့သို့ ရောက်ရှိသွားသည်။

မကြာမီ သူက မျှော်စင်နှင့် ပေတစ်ထောင်အကွာမှာ ရပ်လိုက်သည်။ သူက လုံးဝတုံ့ဆိုင်းမနေဘဲ မျှော်စင်ဆီသို့ ဦးညွတ်လိုက်သည်။ ထို့နောက် သူ၏ အိုမင်းသော အသံက ပဲ့တင်ထပ်သွားသည်။

" ကျွန်တော်မျိုး အစစ်အမှန်ဦးသျှောင်နဲ့ တွေ့ခွင့်ရဖို့ တောင်းဆိုပါတယ် ”

ထိုအသံက အဝေးသို့ ပဲ့တင်ထပ်သွားပြီး ကောင်းကင်နှင့် မြေပြင်ကို ပရမ်းပတာ လှုပ်ခတ်သွားစေသည်။ သို့သော်လည်း ပေတစ်ထောင်အဝေးမှ မျှော်စင်က ဆက်လက် တိတ်ဆိတ်နေဆဲပင်။

အချိန်တစ်ခဏကြာပြီးနောက် ကိုယ်ပွားက သက်ပြင်းချလိုက်သည်။ သူက ညာလက်ကို ဝှေ့ယမ်းလိုက်ပြီး လက်ဝါးအရွယ်အစားရှိသော ကြေးရုပ်တုတစ်ခုကို ထုတ်လိုက်သည်။

ထိုကြေးရုပ်တုက အဆိပ်ဘုရင်နှင့် တစ်ထပ်တည်း ဆင်တူပြီး သူ၏ ရင်ဘက်ထဲမှာပင် အစိမ်းပုပ်ရောင်နှလုံးက တဒုန်းဒုန်း ခုန်မြည်နေသည်။

ကြေးရုပ်တုကို စိုက်ကြည့်နေရင်း ဆုံးဖြတ်ချက်ပြတ်သားမှုက ကိုယ်ပွား၏ မျက်လုံးထဲမှာ ထွက်ပေါ်လာသည်။ သူက လက်တစ်ချောင်းကို မြှောက်လိုက်ပြီး အနည်းငယ်မှ တုံ့ဆိုင်းမနေဘဲ သူ၏ လည်ပင်းကို လှီးလိုက်သည်။ သွေးစက်များက လည်ပင်းထဲမှ စီးကျလာသည့်အခါ ဟင်းလင်းပြင်က ယိုယွင်းတိုက်စားခံလိုက်ရပြီး အက်ကွဲကြောင်းများထသွားသည်။ နောက်ဆုံးမှာ သွေးစက်အားလုံးက ကြေးရုပ်တုပေါ်မှာ စုဝေးသွားကြသည်။

ထို့နောက် ကြေးရုပ်တုက အသက်ဝင်လာသည်။

ထိုစဉ် ကိုယ်ပွားက စတင်လွင့်ပြယ်သွားသည်။ သူက အပြည့်အဝ မလွင့်ပြယ်ခင် မျှော်စင်ကို နောက်တစ်ကြိမ် ဦးညွတ်လိုက်သည်။

“ ငါ့ရဲ့ မူလခန္ဓာကိုယ်က အမှတ်လေးကြယ်တာရာစက်ဝန်းထဲမှာ ရှိနေပြီး ငါနဲ့အဆင့်တူတဲ့ အစစ်အမှန်နတ်ဘုရားကိုးပါးကို သတ်ဖြတ်ဖို့ တာဝန်ပေးခံထားရပါတယ်… ဒါကြောင့် ငါ့ရဲ့ မူလခန္ဓာကိုယ်က ဒီနေရာကို ကိုယ်တိုင် ရောက်မလာနိုင်ပါဘူး… အခု ဒီလူစားထိုးကြေးရုပ်တုကို ငါပေးချင်ပါတယ် ”

“ ဒီကြေးရုပ်တုကို အသက်သွင်းလိုက်တာနဲ့ ငါ့ရဲ့ မူလခန္ဓာကိုယ်က မင်းကိုယ်စား တိုက်ခိုက်ပေးဖို့ ဆင့်ခေါ်ခံရပါလိမ့်မယ် ”

“ သေခြင်းရှင်ခြင်းက ပြဿနာမဟုတ်ပါဘူး… ဒီဟာနဲ့ အတိတ်မှာ မင်းရဲ့ တာအိုကို အတင်းအဓမ္မ ချေးငှားဖို့ ကြိုးစားခဲ့တဲ့ ကမ္မကို ဖြေရှင်းချင်ပါတယ် ”

ထိုအသံ ပဲ့တင်ထပ်သွားပြီးနောက် ကိုယ်ပွားက အပြည့်အဝ လွင့်ပြယ်သွားသည်။

မျှော်စင်က ဆက်ပြီး တိတ်ဆိတ်နေသည်။

အဝေးတွင် ကိုယ်ပွားကို ဤနေရာသို့ ခေါ်ဆောင်လာသော မြို့စောင့်တပ်မှူးက ယင်းကို မြင်သွားသောအခါ တိတ်တဆိတ် သက်ပြင်းချလိုက်သည်။ ထို့နောက် သူက မျှော်စင်ကို အရိုအသေပေးလိုက်ပြီး အနောက်လှည့်ကာ ထွက်သွားသည်။

အချိန်အတန်ကြာပြီးနောက် မြေပြင်ပေါ်မှ ကြေးရုပ်တုက ရုတ်တရက် ဝေဝါးသွားပြီး ပျောက်ကွယ်သွားသည်။

ကြေးရုပ်တု ပြန်ပေါ်လာသည့်အခါ ၎င်းက စောင့်ကြည့်မျှော်စင်အတွင်းမှ ရွှီချင်း၏ လက်ထဲသို့ ရောက်ရှိသွားသည်။

ကြေးရုပ်တုကို စိုက်ကြည့်နေရင်း ရွှီချင်း၏ အမူအရာက တည်ကြည်သွားသည်။ အချိန်အတန်ကြာပြီးနောက် သူက မထူးမခြားနား ပြောသည်။

“ တကယ်လို့ ဒီကြေးရုပ်တုကို ငါအသုံးပြုခဲ့မယ်ဆိုရင် ကမ္မက ပျက်ပြယ်သွားလိမ့်မယ်… တကယ်လို့ ငါမသုံးဘူးဆိုရင် ကမ္မက ဆက်ရှိနေလိမ့်မယ်… အရာအားလုံးက မင်းရဲ့ ကံကြမ္မာပေါ်မှာ မူတည်တယ် ”

ထိုစကားကို ပြောလိုက်သည်နှင့်ချက်ချင်း အမှတ်လေးကြယ်တာရာစက်ဝန်းထဲမှ အဆိပ်ဘုရင်၏ မူလခန္ဓာကိုယ်က ခပ်အုပ်အုပ် ညည်းညူလိုက်ရသည်။ သူနှင့် ရွှီချင်းကြားမှ ကမ္မချည်မျှင်က တစ်ဝက်နီးပါး ပြတ်တောက်သွားသည်။

ယင်းကို အာရုံခံမိသောအခါ အဆိပ်ဘုရင်က နောက်တစ်ကြိမ် သက်ပြင်းချလိုက်သည်။ လယ်သမားအဖိုးအိုနှင့်ဆင်တူသော သူ၏ အသွင်သဏ္ဍာန်က ယခု အများကြီး အရွယ်အိုမင်းသွားဟန် ရ၏။

" အတိတ်မှာတုန်းက ငါအဲ့လောက်ထိ လောဘမကြီးခဲ့သင့်ဘူး… "