အောင်မြင်ပြီ

Vol. 175 Ch. 2618

တည်ဆောက်သူသစ်ပင်တောင်ထွတ်ပေါ်မှာ ...။

ဆူဇီမိုက တည်ငြိမ်နေသော်လည်း သူက စိတ်ထဲမှာ အမှန်တကယ်ပင် အလွန်တရာစိုးရိမ်ပူပန်နေသည်။

အစိမ်းရောင်ကြာပန်း အစစ်အမှန်ခန္ဓာသည် ပါဝင်ပတ်သက်ခြင်းမရှိဘဲ သက်ရောက်ခံရလိမ့်မည် မဟုတ်သော်လည်း သိုင်းတာအိုပင်မခန္ဓာ၏ ရွေးချယ်မှုသည် သူက မအောင်မြင်ဘူးဆိုလျှင် သူ၏ တည်ရှိမှုက ရပ်စဲသွားတော့မည်ဟု အဓိပ္ပါယ်ရနေသည်။ ထိုသို့ဆိုလျှင်တောင် သိုင်းတာအိုပင်မခန္ဓာအနေဖြင့် အန္တရာယ်ကို စွန့်စားကြည့်ဖို့က ထိုက်တန်လေသည်။

ဤရွေးချယ်မှုသည် သိုင်းတာအိုပင်မခန္ဓာ၏ အနာဂတ်ကို ဆုံးဖြတ်ပေးပေလိမ့်မည်။

အဲဒါသည် မည်သူကမှမတုပနိုင်သည့် လမ်းကြောင်းတစ်ခုဖြစ်သည်။

အစိမ်းရောင်ကြာပန်း အစစ်အမှန်ခန္ဓာသည် ကောင်းကင်နှင့်မြေကြီးတက္ကသိုလ်မှာရှိနေသော်လည်း ဖော်မပြတတ်သော အန္တရာယ်အငွေ့အသက်ကို အမြဲတမ်းရရှိနေခဲ့၏။

သူ၏ ကျင့်ကြံမှုနယ်ပယ်က ပိုမိုနက်ရှိုင်းလာပြီး သူ၏ တိုက်ခိုက်ရည်ခွန်အားက ပိုမိုသန်မာလာသည်နှင့်အမျှ ထိုအန္တရာယ်အငွေ့အသက်က ပျောက်ကွယ်မသွားဘဲ ပို၍ပင်တိုးလာခဲ့၏။

ဆူဇီမိုသည် သိုင်းတာအိုပင်မခန္ဓာကို ရှေ့သို့ထပ်မံတက်လှမ်းပြီး လုံလောက်အောင်သန်မာသည့် အဆင့်တစ်ခုထိ ရောက်ရှိစေလိုသည်။

တစ်ဘက်မှာ သူပိုမိုသန်မာလာသည်နှင့် ထျန်ဟွမ်ဂိုဏ်းကို သူက ကောင်းကောင်းကာကွယ်ပေးနိုင်မည်ဖြစ်သည်။

အခြားတစ်ဘက်မှာ အစိမ်းရောင်ကြာပန်းအစစ်အမှန်ခန္ဓာက မဖြေရှင်းနိုင်မည့် အန္တရာယ်တစ်ခုနှင့် အနာဂတ်မှာကြုံတွေ့ရမည်ဆိုလျှင် သိုင်းတာအိုပင်မခန္ဓာသည် အစိမ်းရောင်ကြာပန်းအစစ်အမှန်ခန္ဓာအတွက် ထွက်ပေါက်တစ်ခုဖြစ်လာပေလိမ့်မည်။

အဲဒီမှာ နောက်ထပ်အချက်တစ်ချက်လည်းရှိသေးလေသည်။

သိုင်းတာအိုပင်မခန္ဓာသည် မဟာအရိုင်းကမ္ဘာသို့ သွားရောက်ဖို့ ရည်ရွယ်ထားသည်။ သူက အစစ်အမှန်သိုင်းနယ်ပယ်မှာသာရှိနေမည်ဆိုလျှင် သူသည် ခွန်အားအရာမှာ လိုအပ်နေပေဦးမည်။

သူသည် တျဲယွဲ့ကိုရှာဖွေရန် သူ့မှာ ယုံကြည်မှုနှင့် အခြေခံအုတ်မြစ်ကောင်းကောင်းရှိနေဖို့ သူက ပိုမိုသန်မာလိုလေသည်။

သူသည် သူမနှင့် ရင်ဘောင်တန်းရပ်တည်ဖို့ အဆင့်မီနေရပေမည်။

တည်ဆောက်သူသစ်ပင်အောက်မှာ...။

အန္တိမအင်မော်တယ်ဘုရင်နှင့် ကောင်းကင်ဘုရင်ဆယ့်ကိုးဦးက သူတို့၏ ကောင်းကင်လိုဏ်ဂူအကြီးများကို ထုတ်ဖော်ပြီး သိုင်းတာအိုပင်မခန္ဓာကိုယ် အလယ်မှာထားကာ ဝိုင်းပတ်လိုက်ကြသည်။

သူတို့က သူတို့၏ နောက်ဆုံးတိုက်ခိုက်မှုများကို ထုတ်ဖော်ပြီး အဆက်မပြတ်ဖိခြေကာ ထိတွေ့ရိုက်ခတ်စေလိုက်သည်။

ကောင်းကင်လိုဏ်ဂူအကြီးဆယ့်ကိုးခုမှာ မတူညီသော ဓမ္မတာအိုဆယ့်ကိုးမျိုးပါဝင်နေပြီး သိုင်းတာအိုပင်မခန္ဓာကို အဆက်မပြတ်ဖိခြေကာ ထူးဆန်းသောအသံများ ထွက်ပေါ်လာသည်။

အစစ်အမှန်သိုင်းတာအိုခန္ဓာသည် အချိန်မရွေး ကျဆုံးသွားနိုင်ပုံရလေသည်။ ထိုအချိန်မှာ သိုင်းတာအိုပင်မခန္ဓာ၏ အသားများနှင့်အရိုးများက ဖုန်မှုန့်များအဖြစ် ကြေမွသွားပေလိမ့်မည်။

အသက်ရှူချိန်အနည်းငယ်မှာပင် သိုင်းတာအိုပင်မခန္ဓာက ဆက်လက်၍ တောင့်မခံနိုင်တော့ပေ။

အဲဒါက ကောင်းကင်လိုဏ်ဂူအကြီတစ်ခု သို့မဟုတ် နှစ်ခုသာဆိုလျှင် သူသည် သူ၏ မျိုးဆက်သွေးနယ်မြနှင့် ကောင်းကင်နှင့်မြေကြီးမီးဖိုနှင့်အတူ သူတို့ကို ယာယီအားဖြင့် ဆန့်ကျင်တိုက်ခိုက်ထားနိုင်မည်ဖြစ်သည်။

သို့သော်ယခု... ကောင်းကင်လိုဏ်ဂူအကြီးဆယ့်ကိုးခုက တလိပ်လိပ်ထိုးတက်နေသော ဓမ္မတာအိုများနှင့်အတူ တစ်စုတစ်ဝေးတည်းရောက်ရှိလာပြီး အစစ်အမှန်သိုင်းတာအိုခန္ဓာပင်လျှင် အဲဒါကို မခုခံနိုင်တော့ပေ။

ဖောက်... ဖောက်... ဖောက်...

သိုင်းတာအိုပင်မခန္ဓာ၏ ခန္ဓာကိုယ်က သွေးများဖြင့်ပြည့်နှက်လာပြီး အစစ်အမှန်သိုင်းတာအိုခန္ဓာသည် ဖိအားဒဏ်ကို ခံနိုင်ရည်မရှိတော့ပေ။

ကောင်းကင်လိုဏ်ဂူအကြီးဆယ့်ကိုးခု၏ ဖိနှိမ်မှုအောက်မှာ သူ၏ အရေပြားက ကွဲထွက်၍ အရိုးများက ကျိုးကြေပြီး ကိုယ်တွင်းအင်္ဂါများက တုန်ခါကာ သူ၏ တာအိုခန္ဓာသည် နီရဲနေသောသွေးများဖြင့် စိုရွှဲလာခဲ့သည်။

“အဟွတ်... အဟွတ်...”

သိုင်းတာအိုပင်မခန္ဓာက ချောင်းများဆိုးပြီး သွေးများစွာကို ထွေးထုတ်လိုက်ရသည်။

တကယ်တော့ အန္တိမဘုရင်ဆယ့်ကိုးဦးသည် သူတို့၏ ခွန်အားအပြည့်အဝအပြည့်အဝကို ယခုအချိန်ထိ အသုံးမပြုကြသေးပေ။

သူတို့၏ ကျင့်ကြံမှုနယ်ပယ်များမှာ သူတို့တစ်ယောက်ချင်းစီသည် သေရေးရှင်ရေးအခြေအနေပေါင်းများစွာကို တွေ့ကြုံဖြတ်ကျော်ခဲ့ပြီး မုန်တိုင်းများစွာကို တွေ့မြင်ထားခဲ့သည်။ သူတို့က အလွန်တရာသတိကြီးကြလေသည်။

သူတို့သည် သိုင်းတာအိုပင်မခန္ဓာကိုဖိနှိမ်ဖို့ တိုက်ခိုက်နေကြသော်လည်း တစ်ခုခုဖြစ်ပျက်လာမည်ကိုစိုးရိမ်ပြီး သူတို့၏ စိတ်အာရုံအများစုက မိစ္ဆာမဟာနယ်မြေရှိရာဘက်သို့ ရောက်ရှိနေကြသည်။

အထီးကျန်သိုင်းသခင်၏ အပြုအမူသည် အပေါ်ယံမှာ မဆင်မခြင်လုပ်ရာကျလွန်းသည်ဟု ထင်ရသည်။

သူက ဤကဲ့သို့ အရမ်းကာရောပြုလုပ်နေသည်မှာ သူ့တွင် အခြားသောဝှက်ဖဲများရှိနေသည်ဟု အဓိပ္ပါယ်ရနေသည်။

အန္တိမအင်မော်တယ်ဘုရင်တစ်အုပ်စုသည် အထီးကျန်သိုင်းသခင်ကို ဖိနှိမ်နေစဥ် ဧကရာဇ်ပိုရွှင်းထွက်ပေါ်လာမည်ကို စိုးရိမ်နေကြသည်။

အန္တိမအင်မော်တယ်ဘုရင်နှစ်ဆယ်ကျော်ကျော်ထဲမှာ သူတို့ထဲမှအချို့သည် ဤကဲ့သို့စဥ်းစားမိကြသောကြောင့် တိုက်ခိုက်မှုမှာပါဝင်မလာကြပေ။

သို့သော်လည်း အချိန်ကြာလာသည်နှင့်အမျှ အန္တမအင်မော်တယ်ဘုရင်ဆယ့်ကိုးဦးသည် အထီးကျန်သိုင်းသခင်ကို ဒဏ်ရာအပြင်းအထန်ရရှိစေခဲ့ပြီဖြစ်သော်လည်း မိစ္ဆာမဟာနယ်မြေဘက်မှာ မည်သည့်အရိပ်အယောင်မှမရှိဘဲ ငြိမ်သက်နေဆဲဖြစ်သည်။

လူတိုင်းက တဖြည်းဖြည်းစိတ်ချလက်ချဖြစ်လာကြသည်။

“ဆိုတော့... အန္တိမအင်မော်တယ်ဘုရင်တွေရဲ့စွမ်းအားက ဒါအကုန်ပဲလား”

ထိုစဥ်မှာပင် သိုင်းတာအိုပင်မခန္ဓာ၏ အားနည်းနေသောအသံက ထွက်ပေါ်လာသည်။

“အထီးကျန်သိုင်းသခင်... မင်းက အခုချိန်မှာတောင် ငါတို့ကိုလှောင်ပြောင်နိုင်သေးတယ်ပေါ့... မင်းက ကောင်းမှန်းဆိုးမှန်း တကယ်ကိုနားမလည်ဘူးပဲ”

အင်မော်တယ်ဘုရင်ညတာရှည်က လှောင်ရယ်ပြီး လေးနက်သောအသံဖြင့် ပြောလိုက်သည်။

“အားလုံးပဲ ဘာမှစိုးရိမ်မနေနဲ့... ခင်ဗျားတို့ရဲ့ အစွမ်းကုန်ကိုထုတ်ဖော်ပြီး ဒီမိစ္ဆာကို သတ်ဖြတ်လိုက်ကြ... သူ့ရဲ့အမြုတေစိတ်ဝိညာဥ်နဲ့ ဝိညာဥ်ကို ဖျက်ဆီးပစ်ရမယ်”

“အဲဒါအမှန်ပဲ”

ကောင်းကင်ဘုရင်လောရှန်က ဗုဒ္ဓကျောင်းတော်များကနေလာသော်လည်း သူက ထိုအခိုက်အတန့်မှာ သူက ရန်လိုစိတ်များနေသည်။

အထီးကျန်သိုင်းသခင်ကို လုံးလုံးလျားလျား ဖျကိဆီးပစ်ပြီးမှသာ ငရဲဖိနှိမ်မီးဖိုသည် နောက်တစ်ဖန်ပိုင်ရှင်မဲ့ဖြစ်လာပေလိမ့်မည်။ ထိုနည်းလမ်းဖြင့်သာ သူက အဲဒါကို အရယူနိုင်မည်ဖြစ်လေသည်။

“သတ်”

အန္တိမအင်မေယ်တယ်ဘုရင်များက အော်ငေါက်လိုက်ပြီး ကောင်းကင်လိုဏ်ဂူများ၏ ဓမ္မတာအိုများကို သူတို့၏ အစွမ်းကုန်ဖြင့် လှည့်ပတ်လိုက်ကြသည်။

ကောင်းကင်လိုဏ်ဂူများ၏ စွမ်းအားများက တလိပ်လိပ်ထိုးတက်လာပြီး သိုင်းတာအိုပင်မခန္ဓာကို ဖိနှိမ်လိုက်သည်။

ဤတစ်ခေါက်မှာ သိုင်းတာအိုပင်မခန္ဓာက ဆက်လက်၍တောင့်မခံနိုင်တော့ပေ။

ဘုန်း... ဘုန်း...

ကျယ်လောင်သောမြည်သံနှင့်အတူတွဲဖက်၍ အစစ်အမှန်သိုင်းတာအိုခန္ဓာက ပေါက်ကွဲထွက်သွားပြီး သူ၏ အသားများက ဖျက်ဆီးခံလိုက်ရသည်။ သိပ်သည်းပြင်းထန်ကြီးမားသော စွမ်းအားတစ်ခုက လေဟာနယ်ကိုဆုတ်ဖြဲပြီး လေဟာနယ်၏ ကြီးမားသော အစိတ်အပိုင်းတစ်ခုက ချိုင့်ဝင်ကာ နက်မှောင်နေသော တွင်နက်တစ်ခုကို ဖြစ်ပေါ်လာစေသည်။

ကောင်းကင်လိုဏ်ဂူအကြီးဆယ့်ကိုးခုကနေ ထုတ်ဖော်လိုက်သော စွမ်းအားသည် သိုင်းတာအိုပင်မခန္ဓာ၏ ကိုယ်ကာယနှင့် အမြုတေစိတ်ဝိညာဥ်ကို ဖျက်ဆီးပစ်လိုက်ရုံသာမက ၎င်းသည် ကြီးမားသော လေဟာနယ်ကိုပင် ထိုးဖောက်လိုက်လေသည်။

လောကက ပုံမှန်အတိုင်း ပြန်ဖြစ်လာခဲ့သည်။

တည်ဆောက်သူသစ်ပင်ပတ်လည်မှာ ကျင့်ကြံသူများစွာသည် တုန်လှုပ်နေသော အမူအရာများနှင့်အတူ ကြက်သေသေနေကြသည်။

မိစ္ဆာမဟာနယ်မြေမှ အထီးကျန်သိုင်းသခင်သည် မိုးကောင်းကင်ကိုးလွှာတွေ့ဆုံပွဲမှာ ဤကဲ့သို့ ရုတ်ရုတ်သဲသဲဖြစ်စေခဲ့သည်။ သူသည် အဆင့်သတ်မှတ်ချက်ပေါ်မှ ပြိုင်စံရှားများကိုဖိနှိမ်ပြီး အန္တိမသူတော်စင်ကိုပင် သတ်ဖြတ်ကာ သာမန်အင်မော်တယ်ဘုရင်ခုနှစ်ဦးကို အနိုင်ယူခဲ့သည်။ သူသည် အကြောက်အလန့်ကင်းမဲ့ပြီး မောက်မာဝင့်ကြွားလွန်းလေသည်။

သို့သော်ယခု... သူသည် အန္တိမအင်မော်တယ်ဘုရင်ဆယ့်ကိုးဦး၏ ပူးပေါင်းတိုက်ခိုက်မှုမှာ အလောင်းပင်မကျန်ဘဲ သတ်ဖြတ်ခံလိုက်ရပြီး ဤကဲ့သို့သောအခြေအနေမှာ အဆုံးသတ်သွားရသည်။

အလှမ်းမကမ်းမှာ မိုချင်သည် ထိုသည်ကို တွေ့မြင်သောအခါ သူမ၏ ဝိညာဥ်ကို ဆုံးရှုံးသွားရသည့်ပုံပင်။ သူမ၏ မျက်နှာက ဖြူဖပ်ဖြူရော်ဖြစ်နေပြီး သူမ၏ ခန္ဓာကိုယ်က အနည်းငယိမ်းထိုးကာ လဲကျလုမတတ်ဖြစ်သွားရသည်။

ကံကောင်းထောက်မစွာဖြင့် ယွင်ကျုးက အချိန်မီတုံ့ပြန်ပြီး သူမက မိုချင်ကို အလောတကြီး ဖေးမပေးလိုက်သည်။

“အာ....”

ယွင်ကျူးက ညင်သာစွာသက်ပြင်းချပြီး တည်ဆောက်သူသစ်ပင်ထောင်ထွန်ပေါ်မှာ ဆူဇီမိုရှိရာဘက်ကို လှည့်ကြည့်လိုက်သည်။

ဤသည်က ဆူဇီမို၏ လျှို့ဝှက်ချက်ဖြစ်ပြီး သူမက ရှင်းရှင်းလင်းလင်းပြောမပြနိုင်ဘဲ ဘယ်လိုနှစ်သိမ့်ပေးရမည် မသိတော့ပေ။

“သူက ဒီလိုနဲ့ပဲသေသွားရတာလား”

ကျွင်းယုမှာ တွေဝေရှုပ်ထွေးသော အမူအရာတစ်ခုရှိနေပြီး သူမ၏ မျက်လုံးများက ငေးငိုင်နေ၏။

အထီးကျန်သိုင်းသခင်နှင့် သူမ၏ ထ်ိတွေ့ဆက်ဆံမှုက တိုတောင်းပြီး သူတို့က ခဏမျှသာတိုက်ခိုက်ဖလှယ်ခဲ့ကြသည်။

သို့သော်လည်း အထီးကျန်သိုင်းသခင် ချန်ထားရစ်ခဲ့သည့် ထင်မြင်ချက်က အရမ်းကို နက်ရှိုင်းလွန်းလေသည်။

သူမကျင့်ကြံမှု၏ ဤအဆင့်ထိ အထီးကျန်သိုင်းသခင်သည် သူမကို ကူကယ်ရာမဲ့စွာဖြင့် ခုခံဖို့မတက်နိုင်လောင်အောင်ဖြစ်စေသော ပထမဆုံးနှင့် တစ်ဦးတည်းသောသူဖြစ်လေသည်။

အထီးကျန်သိုင်းသခင်၏ တည်ရှိမှုသည် သူမကို စိတ်ပျက်အားငယ်မှုပင် ခံစားရစေသည်။

သူမက ဘယ်လိုပင်ကျင့်ကြံသည်ဖြစ်စေ သူမသည် ထိုလူကို လိုက်မီနိုင်လိမ့်မည် မဟုတ်ပေ။

ကျွင်းယုမှာ မိစ္ဆာမဟာနယ်မြေနှင့် မိစ္ဆာကျင့်ကြံသူများအပေါ် မလိုမုန်ထားမှုများစွာမရှိပေ။

သူမူသည် အထီးကျန်သိုင်းသခင်၏ သေဆုံးမှုအတွက် နက်ရှိုင်းသော စိတ်မကောင်းမှုတစ်ခုကို ခံစားနေရသည်။

“အမေ... အထီးကျန်သိုင်းသခင်က ဒီလိုမျိုသေသွားရတာလား”

လင်းလောက အဲဒါကို မယုံကြည်နိုင်ဘဲ သူမ၏ မျက်လုံးထဲတွင် ဝမ်းနည်းမှုတစ်စွန်းတစ်စ ထင်ဟပ်နေသည်။

သူတို့မောင်နှမသည် လန့်ဖုန်းမြို့တော်မှာ ပိတ်မိနေခဲ့စဥ်က အထီးကျန်သိုင်းသခင်၏ ပေါ်ထွက်လာမှုကြောင့်သာ သူတို့နှစ်ယောက်က ထွက်ပြေးလာနိုင်ခြင်းဖြစ်သည်။

အထီးကျန်သိုင်းသခင်က မည်သည့်နေရာက ရောက်ရှိလာသည်ဖြစ်စေ သူက သူတို့၏ အသက်သခင်ကျေးဇူးရှင်ဖြစ်သည်။

အင်မော်တယ်ဘုရင်မလင်းလုံက သက်ပြင်းချပြီး သူမ၏ ခေါင်းကို ညင်သာစွာခါယမ်းလိုက်သည်။

“သူက သေသွားလောက်ပြီ”

အင်မော်တယ်ဘုရင်မလင်းလုံသည် ကောင်းကင်ဘုံလျှို့ဝှက်ချက်များကို ရှာဖွေကြည့်ရှုနိုင်လျှင်တောင် ကောင်းကင်လိုဏ်ဂူအကြီးဆယ့်ကိုးခု၏ ဖိနှိမ်မှုအောက်မှာ အထီးကျန်သိုင်းသခင်က မည်သို့မည်ပုံရှင်သန်နိုင်မည်ကို စဥ်းစားမရဖြစ်နေ၏။

သူမသည် ဂမ္ဘီရမိုးကောင်းကင် အင်မော်တယ်မဟာနယ်မြေအဖွဲ့ဘက်မှာ ဆူဇီမိုရှိရာကို ကြည့်လိုက်၏။

တစ်ချိန်တည်းမှာပင် မိစ္ဆာမဟာနယ်မြေဘက်မှာ ဖုန့်စန်းထျန်၊ ယန်ပေးချန်၊ မင်းကျန်နှင့် နတ်ဆိုးမကျိတို့ကလည်း ဆူဇီမိုကို လှမ်းကြည့်နေကြသည်။

အထီးကျန်သိုင်းသခင်၏ အစစ်အမှန်သရုပ်သကန်ကို သိရှိထားသောလူတိုင်းက အဖြေတစ်ခုကို ရရှိလိုနေကြသည်။

အဲဒါထက် သူတို့သည် မျှော်လင့်ချက်ပါးပါးကလေးအတွက် အတည်ပြုလိုနေကြသည်။

ထိုအခိုက်အတန့်မှာ ဆူဇီမိုက တည်ဆောက်သူသစ်ပင်အောက်မှာ နက်မှောင်သောလေဟာနယ်ကို မမှိတ်မသုန်စိုက်ကြည့်နေသည်။ သူ၏ အကြည့်က သိပ်သည်းစုဖွဲ့လာပြီး သူ၏ မျက်နှာပေါ်မှာ အပြုံးတစ်ခုပင် ခိုတွဲလာလေသည်။

အောင်မြင်လေပြီ။

ဤနေရာမှာ ကျင့်ကြံသူများစွာရှိနေခြင်းကြောင့်မဟုတ်လျှင် ဆူဇီမိုက သူ၏ ဦးခေါင်းကိုမော့ပြီး ဝမ်းသားအားရဟစ်ကြွေးမိပေလိမ့်မည်။

သိုင်းတာအိုပင်မခန္ဓာ၏ ခန္ဓာကိုယ်နှင့် အမြုတေစိတ်ဝိညာဥ်က ကောင်းကင်လိုဏ်ဂူအကြီးဆယ့်ကိုးခုကြောင့် ပျက်စီးသွားပြီး သူက သိုင်းတာအိုပင်မခန္ဓာနှင့် တကယ်ပင် အဆက်အသွယ်ပျောက်ဆုံးသွားခဲ့သည်။

သို့သော်လည်း အဲဒါက ခတ္တခဏမျှသာဖြစ်သည်။

အသက်ရှုချိန်အနည်းငယ်အကြာမှာ သိုင်းတာအိုပင်မခန္ဓာ၏ အော်ရာကို နောက်တစ်ဖန်အာရုံခံမိလိုက်၏။

သူသည် သိုင်းတာအိုပင်မခန္ဓာ၏ အော်ရာက စစချင်းအားနည်းနေသည်ကို အာရုံခံမိခဲ့သည်။ သို့သော်လည်း ထိုအရာက လျင်မြန်စွာဖြန့်ကြက်လာပြီး စဥ်းစားကြည့်၍ မရနိုင်သော အလျင်အဟုန်ဖြင့် ပိုမိုသန်မာလာနေသည်။

ပို၍ပင်ကြောက်စရာကောင်းသော အထီးကျန်သိုင်းသခင်က ပေါ်ထွက်လာပေတော့မည်။