ဧကရာဇ်များ ပေါ်ထွက်လာခြင်း

မိုးကောင်းကင်ကိုးလွှာအင်မော်တယ်မဟာနယ်မြေရှိရာဘက်မှ ကြောက်စရာကောင်းသော အော်ရာတစ်ခုနှင့်အတူ ပုံရိပ်တစ်ခုက ဖြည်းဖြည်းချင်းပေါ်ထွက်လာသည်။ ၎င်းသည် လောကကို ငုံ့ကြည့်နေပုံရပြီး ပြိုင်ဘက်ကင်း၍ အဆုံးမဲ့စွမ်းပကားတစ်ခုကို ထုတ်ဖော်ထားသည်။

ဤကဲ့သို့ ခန့်ညားသော စွမ်းပကားတစ်ခုနှင့် ရင်ဆိုင်ရချိန်မှာ ပကတိအင်မော်တယ်များနှင့် သူတော်စင်များကို မပြောနှင့်၊ လက်ရှိကောင်းကင်ဘုရင်များနှင့် အင်မော်တယ်ဘုရင်များပင်လျှင် အဲဒါကို မခုခံနိုင်ကြပေ။

အင်မော်တယ်ဧကရာဇ်တစ်ပါး ပေါ်ထွက်လာခဲ့လေပြီ။

ဆူဇီမိုက အာရုံစိုက်၍ ကြည့်ရှုလိုက်သည်။ ဤအင်မော်တယ်ဧကရာဇ်၏ မျက်နှာသွင်ပြင်က မင်းသားချင်စဲနှင့် အတော်လေးဆင်တူနေသည်။

သူထင်တာမမှားဘူးဆိုလျှင် ထိုလူသည် အင်မော်တယ်ဧကရာဇ် မဟာမိုးကောင်းကင် ဖြစ်ပေလိမ့်မည်။

အင်မော်တယ်ဧကရာဇ် မဟာမိုးကောင်းကင်သည် လေထဲမှာမတ်တတ်ရပ်ပြီး သူ၏ သိပ်သည်းပြင်းထန်သော စွမ်းပကားဖြင့် တည်ဆောက်သူသစ်ပင်ကို အဝေးကနေ ရင်ဆိုင်ကာ သစ်ကိုင်းပေါင်းထောင်ချီကို ယာယီအားဖြင့် ပိတ်ဆို့တားဆီးထားသည်။

သူက တည်ဆောက်သူသစ်ပင်နှင့် တစ်ခုခု ဆက်သွယ်ပြောဆိုနေသည့်အလားပင်။

သို့သော်လည်း တည်ဆောက်သူသစ်ပင်သည် ရူးသွပ်ပေါက်ကွဲသည့်အခြေအနေသို့ ကျဆင်းသွားခဲ့ပြီးဖြစ်ပြီး အင်မော်တယ်ဧကရာဇ် မဟာမိုးကောင်းကင်ကို မျက်နှာသာလုံးဝမပေးဘဲ ပို၍ပင်ကြောက်စရာကောင်းသော စွမ်းပကားတစ်ခုကို ထုတ်ဖော်လိုက်သည်။

တည်ဆောက်သူသစ်ပင်၏ သစ်ကိုင်းပေါင်းထောင်ချီက အင်မော်တယ်ဧကရာဇ် မဟာမိုးကောင်းကင်၏ ထိန်းချုပ်မှုကနေ ချက်ချင်းပင် လွတ်မြောက်လာပြီး တည်ဆောက်သူသစ်ပင်တောင်ကြောရိုး ရှိရာဘက်သို့ လွှမ်းခြုံလာခဲ့သည်။

တည်ဆောက်သူသစ်ပင်၏ သစ်ကိုင်းပေါင်းထောင်ချီက စိမ်းစိုလန်းဆန်း၍ ကောင်းကင်တစ်ခွင် အုပ်မိုးလာခဲ့သည်။ ကြီးမားသော အရိပ်တစ်ခုက မွန်းကျပ်ဖွယ်ရာပုံစံဖြင့် ကျဆင်းလာနေသည်။

အင်မော်တယ်ဧကရာဇ် မဟာမိုးကောင်းကင်၏ အမူအရာက ပျက်ယွင်းသွားသည်။

သူ၏ တိုက်ခိုက်ရည်ခွန်အားနှင့်ပင်လျှင် သူသည် ဒေါသူပုန်ထနေသော တည်ဆောက်သူသစ်ပင်ကို ခုခံဆန့်ကျင်နိုင်ခြင်း မရှိပေ။

ဖျတ်ခနဲဆို အင်မော်တယ်ဧကရာဇ် မဟာမိုးကောင်းကင်က ဆုံးဖြတ်ချက်တစ်ခုချလိုက်သည်။ သူ၏ ဝတ်ရုံစကို ဝှေ့ယမ်းပြီး မဟာမိုးကောင်းကင်အင်မော်တယ်မဟာနယ်မြေမှ ကျင့်ကြံသူများကို ကာကွယ်ကာ ဤနေရာကနေ ဆုတ်ခွာလိုလေသည်။

သူ၏ ခွန်အားအရ သူသည် တည်ဆောက်သူသစ်ပင်တောင်ထွတ်မှ အင်မော်တယ်မဟာနယ်မြေနှင့် သုခဘုံသန့်စင်ကုန်းမြေမှ ကျင့်ကြံသူများအားလုံးကို ကာကွယ်ပေးလိုသည်ဆိုလျှင် သူက တည်ဆောက်သူသစ်ပင်၏ တိုက်ခိုက်မှုဖြင့် ဒဏ်ရာအပြင်းအထန် သေချာပေါက်ရရှိသွားပေလိမ့်မည်။

အင်မော်တယ်မဟာနယ်မြေတစ်ခုလုံးကို တာဝန်ယူထားရသည့် အင်မော်တယ်ဧကရာဇ်တစ်ပါးအနေဖြင့် သူသည် ဤကဲ့သို့သော အန္တရာယ်ကို မစွန့်စားလိုပေ။

သူ့အနေဖြင့် မဟာမိုးကောင်းကင်အင်မော်တယ်မဟာနယ်မြေမှ အင်မော်တယ်များကို ကာကွယ်ပေးခြင်းဖြင့် သူ၏ စေတနာမေတ္တာကို ပြသထားရာရောက်နေလေပြီ။

မဟာနယ်မြေနှစ်ခုမှ အခြားသော ကျင့်ကြံသူများက ထိုသည်ကို တွေ့မြင်သောအခါ သူတို့သည် အင်မော်တယ်ဧကရာဇ် မဟာမိုးကောင်းကင်၏ ရည်ရွယ်ချက်ကို အလျင်အမြန်နားလည်သိရှိသွားကြသည်။

သူတို့အားလုံးက နှလုံးသားမဲ့စွာဖြင့် စွန့်ပယ်ခံလိုက်ရလေပြီ။

အင်မော်တယ်များနှင့် ကိုယ်တော်များက မကျေမနပ်ဖြစ်နေကြသည်။ သို့သော် သူတို့မှာ မကျေမချမ်းမှု ရှိနေသော်လည်း သူတို့က မည်သို့ပင်ဆိုစေ အင်မော်တယ်ဧကရာဇ် မဟာမိုးကောင်းကင်ကို ဆန့်ကျင်ရဲခြင်းမရှိပေ။

ဒါ့အပြင် သူတို့မှာ ထိုအခွင့်အရေးလည်း ရှိတော့မည် မဟုတ်ပေ။

တည်ဆောက်သူသစ်ပင်၏ တိုက်ခိုက်မှုက ဆင်းသက်လာခဲ့ပြီဖြစ်ပြီး တည်ဆောက်သူသစ်ပင်တောင်ထွတ်ပေါ်မှာ မဟာနယ်မြေနှစ်ခုမှ ကျင့်ကြံသူများသည် နေရာမှာပင် သေရတော့မည့်ဆဲဆဲဖြစ်သည်။

ထိုစဉ်မှာပင် သုခဘုံသန့်စင်ကုန်းမြေရှိရာဘက်ကနေ ကျိန်းစပ်နေသော ရွှေရောင်အလင်းတစ်ခု လျင်မြန်စွာ ရွေ့လျားရောက်ရှိလာပြီး တည်ဆောက်သူသစ်ပင်၏ သစ်ရွက်များကြားကနေ တောင်ထွတ်ပေါ်ရှိ အင်မော်တယ်များနှင့်ကိုယ်တော်များပေါ်သို့ ဖြန်းပက်ကျဆင်းလာခဲ့သည်။

လူတိုင်းသည် ဝင်းထိန်တောက်ပနေသော ရွှေဆိုင်းပြားတစ်လွှာဖြင့် ဖုံးအုပ်ခံလိုက်ရသည့်ပုံပင်။

ဘန်း… ဘုန်း…

သစ်ကိုင်းပေါင်းထောင်ချီက ကျယ်လောင်သော မြည်သံများနှင့်အတူ ဖိခြေကျဆင်းလာခဲ့သည်။

လူတိုင်း၏ အောက်ဘက်မှာရှိသော တည်ဆောက်သူသစ်ပင်တောင်ကြောရိုးက လုံးဝကို ပြိုကျသွားခဲ့ပြီဖြစ်သည်။

သို့သော်လည်း အင်မော်တယ်များနှင့်ကိုယ်တော်များကို ဖုံးအုပ်ပေးထားသည့် ဂမ္ဘီရရွှေရောင်အလင်းတစ်လွှာသည် တည်ဆောက်သူသစ်ပင် ထုတ်ဖော်လိုက်သည့် ပျက်စီးထိခိုက်မှုအများစုကို ပိတ်ဆို့ထားလိုက်သည်။

မသိလိုက်မသိဘာသာနှင့်ပင် သက်လတ်ပိုင်းအရွယ်ကိုယ်တော်တစ်ပါးက တည်ဆောက်သူသစ်ပင်ထံကနေ လူတိုင်းကို ကာကွယ်ပေးထားလေသည်။

ဗုဒ္ဓကျောင်းတော်များမှ ဧကရာဇ်တစ်ပါးက ဆင်းသက်ရောက်ရှိလာခဲ့ပြီ။

တည်ဆောက်သူသစ်ပင်နှင့်ယှဉ်လျှင် ဤသက်လတ်ပိုင်းအရွယ်ကိုယ်တော်က မနှိုင်းယှဉ်သာအောင် သေးငယ်နေသည့်ပုံပေါ်သည်။

သူ၏ ခန္ဓာကိုယ်က တည်ဆောက်သူသစ်ပင်၏ သစ်ကိုင်းတစ်ကိုင်းလောက်ပင် တုတ်ခိုင်မှုမရှိပေ။

သို့သော်လည်း ထိုအခိုက်အတန့်မှာ လူတိုင်းအတွက် သက်လတ်ပိုင်းအရွယ်ကိုယ်တော်၏ နောက်ကျောသည် အလွန်တရာမြင့်မား၍ စွမ်းပကားကြီးမားနေပုံရသည်။

အထူးသဖြင့် သူတို့သည် သူ့ကို အင်မော်တယ်ဧကရာဇ် မဟာမိုးကောင်းကင်နှင့် နှိုင်းယှဉ်ကြည့်ချိန်မှာ ဖြစ်သည်။ ကွာဟချက်က သိသာထင်ရှားလေသည်။

“ဒကာတို့… မြန်မြန်ဆုတ်ခွာကြ… ကျုပ်က သိပ်ကြာကြာတောင့်ခံနိုင်မှာ မဟုတ်ဘူး”

သက်လတ်ပိုင်းအရွယ်ကိုယ်တော်၏ ခန္ဓာကိုယ်က အနည်းငယ်ယိမ်းထိုးနေပြီး သူက အတော်အတန်ကြီးမားသည့် ရိုက်ချက်တစ်ခုကို ကြုံတွေ့နေရသည့်အလား သူ၏ အသံက ခြောက်သွေ့အက်ကွဲနေသည်။

အင်မော်တယ်များနှင့်ကိုယ်တော်များက အိမ်မက်ကနေ နိုးထလာပုံရပြီး သူတို့၏ လှုပ်ရှားမှုနည်းစနစ်များကို အလောတကြီးလှည့်ပတ်ကာ အဝေးသို့ပြေးထွက်လိုက်ကြသည်။

သက်လတ်ပိုင်းအရွယ်ကိုယ်တော်၏ ရွှေရောင်အလင်းက ယခင်တည်ဆောက်သူသစ်ပင်ကနေ ထုတ်ဖော်ထားသည့် အစိမ်းရောင်ရောင်လျှံစက်ဝန်းကို ဖျက်ဆီးပစ်လိုက်သည်။

အင်မော်တယ်ဘုရင်ပညာရှင်များသည် လေဟာနယ်ကို ဆုတ်ဖြဲပြီး ဤနေရာကနေ အချိန်မရွေးထွက်ခွာနိုင်ပြီဟု အဓိပ္ပာယ်ရနေသည်။

သိုင်းတာအိုပင်မခန္ဓာသည် ဧကရာဇ်တစ်ပါးပေါ်ထွက်လာသည်ကို တွေ့ရသောအခါ သူက တွေဝေတုံ့ဆိုင်းမနေရဲဘဲ လေဟာနယ်ကို အလောတကြီးဆုတ်ဖြဲကာ အာကာသဥမင်ထဲသို့ ဝင်ရောက်လိုက်သည်။

ထို့နောက် သူက ငရဲဖိနှိမ်မီးဖိုကို လျင်မြန်စွာဆင့်ခေါ်ပြီး ၎င်းကို သူ၏ နောက်ဘက်မှာ ကာထားကာ သက်လတ်ပိုင်းအရွယ်ကိုယ်တော်ရှိရာဘက်သို့ လှမ်းကြည့်လိုက်သည်။

ဧကရာဇ်ပညာရှင်တစ်ဦးအနေဖြင့် သက်လတ်ပိုင်းအရွယ်ကိုယ်တော်က သူ့ကို တိုက်ခိုက်လာနိုင်သည်။

သူသည် ငရဲဖိနှိမ်မီးဖိုကို ဆင့်ခေါ်လိုက်ခြင်းမှာ မတော်တဆဖြစ်ရပ်တစ်စုံတစ်ရာကို ကြိုတင်ကာကွယ်ဖို့ဖြစ်သည်။

ဘာကြောင့်ရယ်မသိ သက်လတ်ပိုင်းအရွယ်ကိုယ်တော်သည် တည်ဆောက်သူသစ်ပင်ကို ရင်ဆိုင်ရာမှာ အလုပ်များနေသောကြောင့်လား သို့မဟုတ် သူသည် ဒဏ်ရာရရှိထားသောကြောင့်လား မပြောတတ်ပေ။ သူက သိုင်းတာအိုပင်မခန္ဓာကို အရေးမလုပ်ပေ။

မည်သို့ပင်ဆိုစေ သိုင်းတာအိုပင်မခန္ဓာသည် လေဟာနယ်ကို ဆုတ်ဖြဲလိုက်ချိန်မှာ သူသည် ဤနေရာကနေ ထွက်ခွာချိန်အထိ သက်လတ်ပိုင်းအရွယ်ကိုယ်တော်က သူ့ကို တိုက်ခိုက်မလာခဲ့ပေ။

သို့သော်လည်း သိုင်းတာအိုပင်မခန္ဓာက သက်လတ်ပိုင်းအရွယ်ကိုယ်တော်ကို လှည့်ကြည့်လိုက်သည့်အချိန်မှာ ထိုသူကလည်း သူ့ကိုကြည့်နေသည်ကို တွေ့ရှိလိုက်ရသည်။

သူတို့၏ အကြည့်များက လေထဲမှာ ဆုံမိသွားသည်။

ဘာကြောင့်ရယ်မသိ သိုင်းတာအိုပင်မခန္ဓာသည် ဖော်မပြတတ်သော ရင်းနှီးကျွမ်းဝင်မှုခံစားချက်တစ်ခုကို ရုတ်တရက်ရရှိလာခဲ့သည်။

သက်လတ်ပိုင်းအရွယ်ကိုယ်တော်မှာ ကြည့်ကောင်းတင့်တယ်သော ရုပ်ရည်သွင်ပြင်နှင့် ကောင်းမွန်သော ထင်မြင်ချက်တစ်ခုကို ကျန်ရစ်ခဲ့စေမည့် မေတ္တာတရားကြီးမားသော အမူအရာတစ်ခုရှိနေသည်။ သို့သော်လည်း သူသည် ဤလူကို အရင်က တစ်ခါမှ မတွေ့မြင်ဖူးကြောင်း သိုင်းတာအိုပင်မခန္ဓာက သေချာပြောနိုင်လေသည်။

အဲဒါက ဘယ်လိုဖြစ်နိုင်မှာလဲ။

ရင်းနှီးကျွမ်းဝင်နေသော ထိုခံစားချက်က ဘယ်ကနေရောက်လာတာလဲ။

သိုင်းတာအိုပင်မခန္ဓာတစ်ယောက်တည်းသာ မဟုတ်ဘဲ အစိမ်းရောင်ကြာပန်းအစစ်အမှန်ခန္ဓာကလည်း ပြန်ပြောင်းစဉ်းစားနေသည်။

စောစောက သိုင်းတာအိုပင်မခန္ဓာ၏ စိတ်ထဲ ပေါ်ထွက်လာသည့် ရင်းနှီးကျွမ်းဝင်မှုခံစားချက်သည် အကြောင်းရင်းမရှိဘဲ သေချာပေါက်ထွက်ပေါ်လာမည်မဟုတ်ဟု ဆူဇီမိုက ယုံကြည်ထားသည်။

မိုးကောင်းကင်ကိုးလွှာအင်မော်တယ်မဟာနယ်မြေနှင့် သုခဘုံသန့်စင်ကုန်းမြေမှ ကျင့်ကြံသူများသည် သက်လတ်ပိုင်းအရွယ်ကိုယ်တော် ဆွဲပေးထားသည့်အချိန်ကို အသုံးချကာ တည်ဆောက်သူသစ်ပင်၏ တိုက်ခိုက်မှုအဝန်းအဝိုင်းကနေ နောက်ဆုံးထွက်ပြေးလွတ်မြောက်လာကြသည်။

ကျင့်ကြံသူများသည် အကြောက်မပြေသေးဘဲ တည်ဆောက်သူသစ်ပင်ရှိရာဘက်သို့ လှည့်ကြည့်ပြီး သူတို့၏ မျက်နှာများက ဖြူဖတ်ဖြူရော်ဖြစ်နေကြသည်။

ဗုဒ္ဓကျောင်းတော်များမှ ဧကရာဇ်၏ ပေါ်ထွက်လာမှုကြောင့် မဟုတ်လျှင် လက်ရှိလူတိုင်းသည် တည်ဆောက်သူသစ်ပင်တောင်ထွတ်ပေါ်မှာ မြုပ်နှံခံခဲ့ရပေလိမ့်မည်။

“ဗုဒ္ဓကျောင်းတော်တွေက ကိုယ်တော်တစ်ပါးဆိုတဲ့အတိုင်းပဲ… သူက အခြားသူတွေကို ကယ်တင်ဖို့အတွက် မေတ္တာတရားကြီးမားစွာနဲ့ သူ့ကိုယ်သူ အနစ်နာခံလိုက်တာပဲ… သူက ငါတို့တွေနဲ့ မတူညီတဲ့အဆင့်တစ်ခုမှာ တကယ်ရှိနေတာပဲ… အထင်ကြီးစရာပါပဲ”

“အမှန်ပဲ… ဒီအောင်မြင်ပေါက်မြောက်တဲ့ကိုယ်တော်က ငါတို့အားလုံးကို ကယ်တင်ပေးခဲ့တယ်… ငါတို့တွေက ဒီအသက်ကယ်ကျေးဇူးကို သေချာပေါက်မှတ်ထားပြီး ငါတို့မသေမချင်း ပြန်ပေးဆပ်ရမယ်”

“ဗုဒ္ဓကျောင်းတော်တွေရဲ့ ဒီဧကရာဇ်က ဘယ်သူပါလိမ့်… သူ့ရဲ့ဓမ္မဘွဲ့က ဘာလဲမသိဘူး”

ထွက်ပြေးလွတ်မြောက်လာပြီးနောက် ကျင့်ကြံသူများစွာသည် အဝေးမှာရှိသော သက်လတ်ပိုင်းအရွယ်ကိုယ်တော်ကိုကြည့်ပြီး ဆွေးနွေးပြောဆိုလာကြသည်။

ဇင်ဆရာဟွေ့ဝမ်က ခဏမျှစဉ်းစားတွေးတောပြီး အဓိပ္ပာယ်ပါပါပြောလိုက်သည်။

“ကြည့်ရတာ ဒီစီနီယာက ကောင်းကင်အရှင် ဆဗြဟ္မနဲ့ တူသလိုပဲ”

သက်လတ်ပိုင်းအရွယ်ကိုယ်တော်က ပေါ်ထွက်လာပြီးနောက် သူသည် အင်မော်တယ်များနှင့် ကိုယ်တော်များကို ကျောပေးထားပြီး မည်သူကမှ သူ့ကို ရှင်းလင်းစွာ မတွေ့မြင်နိုင်ပေ။

သိပ်မကြာခင် သက်လတ်ပိုင်းအရွယ်ကိုယ်တော်က တည်ဆောက်သူသစ်ပင်ထံကနေ ထွက်ပြေးလွတ်မြောက်ပြီး ဤနေရာသို့ ရောက်ရှိလာခဲ့သည်။

သက်လတ်ပိုင်းအရွယ်ကိုယ်တော်၏ ရင်ဘတ်ပေါ်မှ သင်္ကန်းသည် သွေးများဖြင့် စွန်းထင်းနေသည်ကို လူတိုင်းက ရှင်းလင်းစွာ တွေ့မြင်လိုက်ရသည်။ သူက တည်ဆောက်သူသစ်ပင်နှင့် တိုက်ခိုက်ပြီးနောက် ဒဏ်ရာရရှိလာခဲ့သည်မှာ သိသာနေသည်။

“သူက တကယ်ကို ကောင်းကင်အရှင် ဆဗြဟ္မပဲကိုး”

ဇင်ဆရာဟွေ့ဝမ်က သက်လတ်ပိုင်းအရွယ်ကိုယ်တော်ကို တွေ့မြင်သောအခါ ရင်တစ်ချက်ထိတ်သွားသည်။ ကျေနပ်နှစ်ခြိုက်စွာဖြင့် သူက ရှေ့သို့အလောတကြီးတက်လှမ်းပြီး သူ၏ လက်ဖဝါးနှစ်ဖက်ကို ယှက်ဖြာကာ ဦးညွှတ်လိုက်သည်။

“မင်္ဂလာပါ စီနီယာ ဆဗြဟ္မ”

သူတစ်ယောက်တည်းလျှင် မဟုတ်ဘဲ ဗုဒ္ဓကျောင်းတော်များမှ အခြားသော ကောင်းကင်ဘုရင်တချို့ကလည်း သက်လတ်ပိုင်းအရွယ်ကိုယ်တော်ကို မှတ်မိသိရှိသွားပြီး သူ့ကိုနှုတ်ဆက်ဖို့အတွက် ရှေ့သို့အလောတကြီး တက်လာကြသည်။ သူတို့က အံ့အားသင့်နေပြီး သူတို့၏ မျက်လုံးများထဲရှိ နက်ရှိုင်းသော ရိုသေလေးစားမှုနှင့်အတူ ကျေနပ်နှစ်ခြိုက်နေကြသည်။

အခြားသော ကိုယ်တော်များက ထိုသည်ကို တွေ့မြင်သောအခါ သူတို့သည် ဆက်လက်၍ သံသယမရှိတော့ဘဲ ရွှင်မြူးအားရသော အမူအရာများဖြင့် အလောတကြီး ဒူးထောက်ချကာ ကောင်းကင်အရှင် ဆဗြဟ္မ၏ အမည်ကို တိုင်တည်ရွတ်ဆိုလိုက်ကြသည်။

“ကောင်းကင်အရှင် ဆဗြဟ္မ.....”

ရုတ်တရက် ဆူဇီမိုသည် ကောင်းကင်နှင့်မြေကြီးတက္ကသိုလ်မှာတုန်းက လျှိုဖျင် သူ့ကိုပြောပြခဲ့သည့် သတင်းအချက်အလက်ကို အမှတ်ရသွားသည်။

ဧကရာဇ်ပိုရွှင်းသည် ပေါ်ထွက်၍ ကောင်းကင်ဘုရင်တချို့ကို ဆက်တိုက်သတ်ဖြတ်ခဲ့ပြီးနောက် သူသည် ပျောက်ကွယ်သွားကာ ကောင်းကင်အရှင်ဆဗြဟ္မတစ်ဦးသာ ရှင်သန်နိုင်ခဲ့သည်ဟု ဆိုကြလေသည်။

ကောင်းကင်ဘုရင်ဆဗြဟ္မသည် ထိုကပ်ဘေးအပြီး၌ ဉာဏ်အလင်းပွင့်လာခဲ့သည်။ သူက ဗုဒ္ဓဝါဒမှာ ရဲဝံ့စွာဖြင့် ရှေ့သို့တက်လှမ်းပြီး ဧကရာဇ်တစ်ပါးဖြစ်လာခဲ့သည်။ ယခု သူက ကောင်းကင်အရှင်ဆဗြဟ္မဟူ၍ ကျော်ကြားနေပြီဖြစ်သည်။

ဤအောင်မြင်ပေါက်မြောက်သော ကိုယ်တော်သည် ဗုဒ္ဓကျောင်းတော်များမှ သုတ္တန်များကို ဟောကြားဖို့အတွက် ဆွေးနွေးကွင်းတစ်ခုကို ဖွင့်လှစ်ပြီး ဓမ္မတာအိုကို ကျယ်ပြန့်စွာ ဖြန့်ဝေပေးခဲ့သည်။ သူသည် မရေမတွက်နိုင်သော ဗုဒ္ဓကိုယ်တော်များကို ဆွဲဆောင်နိုင်ခဲ့ပြီး မကြာသေးခင်နှစ်များအတွင်း ကြီးမားသော သက်ရောက်မှုတစ်ခုရှိလာခဲ့သည်။

ဆူဇီမိုက မျက်မှောင်ကြုတ်ပြီး အလေးအနက် စဉ်းစားတွေးတောနေသည်။ သူသည် တစ်စုံတစ်ခုကို လျစ်လျူရှုထားမိသည့်အလား မသိစိတ်၏ လှုံ့ဆော်မှုကို ရရှိနေသည်။