သားရဲဧကရီ သွေးလိပ်ပြာ

သူတို့သုံးယောက်သည် အားရပါးရ သောက်စားလိုက်ကြပြီး ဆူဇီမိုက တဖြည်းဖြည်း တည်ငြိမ်လာခဲ့သည်။ သူသည် သိုင်းတာအိုပင်မခန္ဓာ၏ ကိစ္စကို လောလောဆယ်မှာ တဖြည်းဖြည်း လွှတ်ချလိုက်၏။

သူက ထိုအကြောင်းကို တစ်ချိန်လုံး စဉ်းစားတွေးတောနေမည်ဆိုလျှင်တောင် ထူးခြားလာမည် မဟုတ်ပေ။

သိုင်းတာအိုပင်မခန္ဓာသည် မဟာအဝီစိမှာ ကျဆင်းသွားခဲ့စဉ်က သူသည် သိုင်းတာအိုပင်မခန္ဓာနှင့် ဆက်သွယ်မှု ပျောက်ဆုံးသွားခဲ့ဖူးသည်။

သို့သော်လည်း ထိုအချိန်တုန်းက ငရဲဖိနှိမ်မီးဖိုသည် အစိမ်းရောင်ကြာပန်း အစစ်အမှန်ခန္ဓာ၏ လက်ထဲမှာ ရှိနေခဲ့သည်။

အစိမ်းရောင်ကြာပန်း အစစ်အမှန်ခန္ဓာသည် အဝီစိသို့ ဝင်ရောက်လာပြီးနောက် သူသည် သိုင်းတာအိုပင်မခန္ဓာနှင့် ဆက်သွယ်မှုအသစ်တစ်ခု တည်ဆောက်ကာ သူ့ကို ကယ်တင်ပေးခဲ့သည်။

ဤတစ်ခေါက်မှာ ငရဲဖိနှိမ်မီးဖိုနှင့် ဝိညာဉ်မီးအိမ် နှစ်ခုစလုံးသည် သိုင်းတာအိုပင်မခန္ဓာနှင့်အတူ ရှိနေသည်။

အစိမ်းရောင်ကြာပန်း အစစ်အမှန်ခန္ဓာ၏ လက်ရှိကျင့်ကြံမှုအရ သူသည် သိုင်းတာအိုပင်မခန္ဓာကို ကယ်တင်ဖို့နေနေသာသာ သူသည် မဟာအဝီစိသို့ ဝင်ရောက်မည်ဆိုလျှင် သေချာပေါက် သေရပေလိမ့်မည်။

ဆူဇီမိုကို အနည်းငယ်စိတ်သက်သာရာရစေသည့် တစ်ခုတည်းသောအရာမှာ သိုင်းတာအိုပင်မခန္ဓာသည် နက်မှောင်နေသော ချောက်နက်ထဲသို့ ကျဆင်းမသွားခင် ဘုန်းကြီးအိုက လျှို့ဝှက်ဆန်းကြယ်သော အပြုံးတစ်ခုကို ထုတ်ဖော်ခဲ့သည်။

ထိုအပြုံးမှာ ရန်လိုစိတ် သို့မဟုတ် ကြမ်းကြုတ်ခက်ထန်မှု ရှိနေပုံမရဘဲ ပိုမိုနက်ရှိုင်းသော အဓိပ္ပာယ်တစ်ခု ရှိနေသည့်အလားပင်။

ယခင်က သူသည် သိုင်းတာအိုပင်မခန္ဓာနှင့် ဆက်သွယ်မှု ဆုံးရှုံးခဲ့စဉ် အနည်းဆုံးတော့ ထိုသူရှိနေသည့်နေရာကို သူက သိထားခဲ့သည်။

သို့သော်လည်း ဤတစ်ခေါက်မှာ သိုင်းတာအိုပင်မခန္ဓာက မည်သည့်နေရာသို့ ရောက်ရှိသွားပြီကို သူ မသိရပေ။

ဒါ့အပြင် ဤတစ်ခေါက်မှာ သိုင်းတာအိုပင်မခန္ဓာကို မည်သူကမှ မကယ်တင်နိုင်လောက်ပေ။

သိုင်းတာအိုပင်မခန္ဓာ အသက်ရှင်နိုင်မလား… ဘေးကင်းလုံခြုံစွာ ပြန်လာနိုင်မလားဆိုတာက သူ၏ ကိုယ်ပိုင်ကံကြမ္မာအပေါ်မှာသာ မူတည်နေပေမည်။

ဖုန့်စန်းထျန်နှင့် ထျန်ဟွမ်ဂိုဏ်းအကြောင်း ပြောဆိုချိန်မှာ သူတို့သည် မိစ္ဆာမဟာနယ်မြေ၏ အခြေအနေနှင့်ပတ်သက်၍ ဆွေးနွေးပြောဆိုမိကြသည်။

လင်းကျန့်က လေးနက်စွာ ပြောလိုက်သည်။

“မိစ္ဆာဧကရာဇ် ကမ္ဘာဖျက်ကပ်ဘေးရဲ့ တည်ရှိမှုကြောင့် ထျန်ဟွမ်ဂိုဏ်းက အနာဂတ်မှာ မိစ္ဆာမဟာနယ်မြေမှာ ခြေကုပ်ရယူဖို့ ခက်ခဲလာလိမ့်မယ်”

အင်မော်တယ်ဘုရင်မလင်းလုံက ထပ်ပြောလိုက်သည်။

“ဧကရာဇ်ပိုရွှင်းကလည်း ဒီဘက်မျိုးဆက်မှာ ပြန်ပေါ်လာပြီ… အနာဂတ်မှာ အဲဒီ မိစ္ဆာဧကရာဇ်နှစ်ဦးက မိစ္ဆာမဟာနယ်မြေမှာ သေချာပေါက် တိုက်ခိုက်ကြလိမ့်မယ်”

“ထျန်ဟွမ်ဂိုဏ်းက နောက်ပိုင်း မိစ္ဆာဧကရာဇ်နှစ်ဦးကြား စစ်မီးတောက်တွေကြားမှာ ဖျက်ဆီးမခံရအောင် ထွက်ပေါက်တစ်ခုကို ရှာထားသင့်တယ်”

ဧကရာဇ်ပိုရွှင်းနှင့် မိစ္ဆာဧကရာဇ်ကမ္ဘာဖျက်ကပ်ဘေးအကြောင်း ပြောဆိုချိန်မှာ ဆူဇီမိုက ရင်တစ်ချက်ထိတ်သွားသည်။

သူသည် သူ့ရင်ထဲမှာ တစ်ချိန်လုံး သိမ်းဆည်းထားသည့် မေးခွန်းတစ်ခုကို အမှတ်ရသွားပြီး မေးလိုက်သည်။

“ဒဏ္ဍာရီအရဆို မိစ္ဆာဧကရာဇ်ကမ္ဘာဖျက်ကပ်ဘေးက လွန်ခဲ့တဲ့ နှစ်ပေါင်းသန်းဆယ်ချီကာလက ဧကရာဇ်ပညာရှင်တစ်ဦးပဲ… သူက ဒီဘက်ခေတ်အထိ ဘယ်လိုလုပ်ပြီး ရှင်သန်နိုင်ခဲ့တာလဲ”

လူသားဧကရာဇ်နှင့် အင်မော်တယ်ဘုရင်မလင်းလုံသည် မည်သို့ပင်ဆိုစေ အင်မော်တယ်ဘုရင်များဖြစ်ကြသည်။ သူတို့သည် ဧကရာဇ်များ၏ ကျင့်ကြံမှုနယ်ပယ်များနှင့် စွမ်းအားများအကြောင်း သူ့ထက်ပို၍ များစွာသိရှိထားပေမည်။

အင်မော်တယ်ဘုရင်မ လင်းလုံက ပြောလိုက်သည်။

“မဟာဧကရာဇ်ပဲဖြစ်ဖြစ်… ဧကရာဇ်တွေပဲဖြစ်ဖြစ်… သူတို့ရဲ့ဘဝသက်တမ်းက သိပ်မကွာကြဘူး… များသောအားဖြင့်တော့ နှစ်ပေါင်း ဆယ်သန်းဝန်းကျင်လောက်ပဲ… မှတ်တမ်းထဲမှာဆို မဟာဧကရာဇ် ဒီဃာယုတစ်ယောက်ပဲ နှစ်ပေါင်းသန်းနှစ်ဆယ်ကြာအောင် ရှင်သန်နေထိုင်နိုင်ခဲ့တယ်… အဲဒါက တကယ့်ကို ထူးခြားအံ့မခန်းဖြစ်နေပြီ”

“မိစ္ဆာဧကရာဇ်ကမ္ဘာဖျက်ကပ်ဘေးက သန်မာပေမဲ့ သူက နှစ်ပေါင်းသန်းဆယ်ချီကြာအောင်တော့ ရှင်သန်နေထိုင်နိုင်ခဲ့မှာ မဟုတ်ဘူး”

ခဏမျှရပ်တန့်ပြီးနောက် အင်မော်တယ်ဘုရင်မ လင်းလုံက ပြောလိုက်သည်။

“မိစ္ဆာဧကရာဇ်ကမ္ဘာဖျက်ကပ်ဘေးက လွန်ခဲ့တဲ့ နှစ်ပေါင်းသန်းဆယ်ချီကာလကတည်းက သေဆုံးခဲ့ပြီလို့ ငါထင်မိတယ်… ဒါပေမဲ့ သူက ဒီဘက်မျိုးဆက်မှာ ကောင်းကင်ဘုံကို ဖီဆန်တဲ့ ဓမ္မအစီအရင်တချို့ကိုသုံးပြီး ပြန်လည်ရှင်သန်လာနိုင်ခဲ့တာပဲ”

ပြန်လည်ရှင်သန်ခြင်း…

ထိုစကားကို ကြားသွားသောအခါ ဆူဇီမိုက မျက်မှောင်အနည်းငယ်ကြုတ်ပြီး အလေးအနက် စဉ်းစားတွေးတောမိသွားသည်။

သူသည် အလွန်တရာအရေးကြီးသော သတင်းအချက်အလက်တစ်ခုကို လျစ်လျူရှုမိထားသည်ဟု ခံစားနေရသည်။

ရုတ်တရက် အင်မော်တယ်ဘုရင်မ လင်းလုံက မေးလိုက်သည်။

“ဇီမို… နင်တက်လှမ်းလာပြီးတဲ့နောက် ငါတို့အပြင် အထက်ဘုံလောကမှာ နင် တခြားပညာရှင်တစ်ဦးဦးနဲ့ သိထားတာရှိလား”

“အထက်ဘုံက ပညာရှင်လား”

ဆူဇီမိုက ရင်တစ်ချက်ထိတ်သွားသည်။

လူသားဧကရာဇ်တို့ ဇနီးမောင်နှံအပြင် သူတက်လှမ်းမလာခင် သူသိရှိထားသည့် အထက်ဘုံမှ တစ်ဦးတည်းသော ပညာရှင်က တျဲယွဲ့ဖြစ်လေသည်။

“ကျုပ် တကယ်ပဲ တစ်ယောက်နဲ့တော့ သိထားတယ်”

ဆူဇီမိုက ခေါင်းညိတ်ပြီး တစ်စုံတစ်ရာကို ဖုံးကွယ်ထားခြင်း မရှိပေ။

“ဒါပေမဲ့ သူက ကောင်းကင်ဘုံကမ္ဘာက မဟုတ်ဘူး… သူက မဟာအရိုင်းကမ္ဘာကပဲ”

“စီနီယာလူသားဧကရာဇ် ဆင်းသက်လာတုန်းက ကျုပ်က သူ့အကြောင်းကို မေးခဲ့ပေမဲ့ အဖြေမရခဲ့ဘူး”

လင်းကျန့်က ပြုံးပြလိုက်သည်။

“ငါက အစိမ်းရောင်မိုးကောင်းကင်အင်မော်တယ်မဟာနယ်မြေက အင်မော်တယ်ဘုရင်တစ်ပါးပဲလေ… ငါက မဟာအရိုင်းကမ္ဘာကို တစ်ခေါက်ပဲ ရောက်ဖူးတာ… အဲဒီက ပညာရှင်တွေအကြောင်း ငါ ဘယ်သိပ်သိပါ့မလဲ”

အောက်ဘုံလောကမှာတုန်းက ဆူဇီမိုသည် တျဲယွဲ့၏ အမည်နှင့် လူသားဧကရာဇ်ကို မေးခဲ့သည်။

နောက်ပိုင်းမှာ တျဲယွဲ့သည် မိုးကောင်းကင်ကို မဖာထေးခင် အထက်ဘုံလောကမှာ တျဲယွဲ့ဟူသောနာမည်နှင့် သူမကို သိရှိထားသောသူ လူငါးယောက်ထက် ပိုမရှိကြောင်း သူ့ကို ပြောပြခဲ့သည်။

သူက တစ်ယောက်ယောက်ကို မေးမြန်းစုံစမ်းချင်သည်ဆိုလျှင် မဟာအရိုင်းကမ္ဘာမှာ သွေးလိပ်ပြာအကြောင်းကို မေးမြန်းနိုင်သည်ဟု တျဲယွဲ့က သူ့ကိုပြောခဲ့သည်။

ထိုသို့အတွေးဖြင့် ဆူဇီမိုက ထပ်မံ၍ မေးလိုက်သည်။

“စီနီယာလူသားဧကရာဇ်… ခင်ဗျားက မဟာအရိုင်းကမ္ဘာက သွေးလိပ်ပြာကို ကြားဖူးလား”

“အမ်…”

ထိုစကားလုံးကို ပြောဆိုချိန်မှာ လူသားဧကရာဇ်လင်းကျန့်သာလျှင် မဟုတ်ဘဲ အင်မော်တယ်ဘုရင်မ လင်းလုံ၏ အမူအရာကပါ ပြောင်းလဲသွားသည်။

“သွေးလိပ်ပြာလား”

လင်းကျန့်က တည်တံ့သော အမူအရာဖြင့် မေးလိုက်သည်။

“သားရဲဧကရီ သွေးလိပ်ပြာကို ပြောတာလား”

“အဲလိုဖြစ်မယ်လို့ ထင်တာပဲ”

ဆူဇီမိုက ပြောလိုက်သည်။

အရင်တုန်းက ဘုရင်ယွင်ယို၏ ကိုယ်ပွားက မသေဆုံးခင် သနားညှာတာပေးဖို့အတွက် တျဲယွဲ့ကို တောင်းပန်ခဲ့ပြီး သူ၏ ပါးစပ်မှ သွေးလိပ်ပြာနှင့် ဧကရီဟူသော စကားလုံးတချို့က ပြတ်တောင်းပြတ်တောင်း ထွက်ပေါ်လာခဲ့သည်။ သူသည် သူမ၏ နာမည် သားရဲဧကရီသွေးလိပ်ပြာကို ခေါ်ဆိုဖို့ ကြိုးစားနေခဲ့ခြင်းဖြစ်လောက်သည်။

အင်မော်တယ်ဘုရင်မ လင်းလုံက ခေါင်းညိတ်၍ ပြောလိုက်သည်။

“မဟာအရိုင်းကမ္ဘာမှာ သွေးလိပ်ပြာက တစ်ဦးတည်းပဲရှိတယ်”

“သူက မဟာအရိုင်းကမ္ဘာမှာ အတော်လေး ကျော်ကြားလား”

ဆူဇီမိုက အကဲစမ်းမေးလိုက်သည်။

လူသားဧကရာဇ်နှင့် အင်မော်တယ်ဘုရင်မ လင်းလုံ၏ တုံ့ပြန်မှုများအရ သူက အကြမ်းဖျင်း ခန့်မှန်းမိနိုင်ပြီဖြစ်သည်။

“မဟာအရိုင်းကမ္ဘာတင် ဘယ်ဟုတ်မလဲ”

လူသားဧကရာဇ်လင်းကျန့်က သူ၏ ခေါင်းကို ညင်သာစွာခါပြီး ရေရွတ်ပြောဆိုလိုက်သည်။

“သားရဲဧကရီသွေးလိပ်ပြာက အထက်ဘုံလောကရဲ့ အကျော်ကြားဆုံးနဲ့ အသန်မာဆုံး ဧကရာဇ်တွေထဲက တစ်ပါးပဲ”

“အထက်ဘုံလောက ပညာရှင်တွေက အင်မော်တယ်မဟာနယ်မြေအမျိုးမျိုးက အင်မော်တယ်ဧကရာဇ်တွေကို ကြားဖူးချင်မှ ကြားဖူးကြလိမ့်မယ်… ဒါပေမဲ့ သူတို့တွေက သားရဲဧကရီသွေးလိပ်ပြာကိုတော့ သေချာပေါက် ကြားဖူးကြမှာပဲ”

“အထက်ဘုံလောကက ဧကရာဇ်တွေကြားမှာ သားရဲဧကရီသွေးလိပ်ပြာက အမြင့်မားဆုံး ပါရမီအလားအလာနဲ့ မဟာဧကရာဇ်တစ်ပါးဖြစ်လာဖို့ အနီးစပ်ဆုံးသူဖြစ်တယ်လို့ အင်မော်တယ်ဧကရာဇ် အစိမ်းရောင်မိုးကောင်းကင်ကိုယ်တိုင်ပြောဆိုတာ ငါကြားဖူးခဲ့တယ်”

“အဲ့လောက်တောင် သန်မာတာလား”

ဆူဇီမိုက တိတ်တဆိတ် ဆွံ့အ၍ အံ့အားသင့်သွားရသည်။

တျဲယွဲ့သည် အထက်ဘုံလောကမှာ သေချာပေါက် ထူးခြားဖြစ်မည်ဟု သူက ကြိုတင်၍ တွက်ထားခဲ့သည်။

သို့သော်လည်း သူမက ဤမျှအထိ သန်မာနေလိမ့်မည်ဟု သူက ထင်မှတ်မထားခဲ့ပေ။

အင်မော်တယ်ဘုရင်မ လင်းလုံက ထပ်ပြောလိုက်သည်။

“လိပ်ပြာမျိုးနွယ်က မွေးရာပါ အားနည်းကြတယ်… ဧကရာဇ်လိပ်ပြာမျိုးဆက် ပေါ်ထွက်လာပြီးတာတောင် သူတို့တွေက စွမ်းအားကြီးမားတဲ့ တခြားသက်ရှိတွေကို မယှဉ်နိုင်ခဲ့ဘူး”

“ဒါပေမဲ့ သားရဲဧကရီသွေးလိပ်ပြာရဲ့ ပေါ်ထွက်လာမှုက မျိုးနွယ်စုတစ်သောင်းကြားမှာ လိပ်ပြာမျိုးနွယ်ရဲ့ အဆင့်အတန်းကို တစ်ဦးတည်းနဲ့ ပြောင်းလဲပေးနိုင်ခဲ့တယ်”

“အတိအကျပြောရရင် သူမရဲ့တည်ရှိမှုကြောင့် တခြားမျိုးနွယ်စုက သက်ရှိတွေက လိပ်ပြာမျိုးနွယ်ကို အထင်မသေးရဲကြတော့ဘူး”

ထိုသတင်းအချက်အလက်ကို ပြောဆိုချိန်မှာ အင်မော်တယ်ဘုရင်မ လင်းလုံ၏ လေသံက အထင်ကြီးလေးစားမှုနှင့် မျှော်လင့်တောင့်တမှုဖြင့် ပြည့်နှက်နေသည်။ သူမ၏ စစချင်းတည်ငြိမ်နေသော မျက်လုံးများကပင် ဝဲဂယက်ဖြာထွက်လာခဲ့သည်။

ဆူဇီမိုကလည်း စိတ်လှုပ်ရှားမိနေသည်။

သွေးနီရောင်ဝတ်ရုံနှင့် ပုံရိပ်တစ်ခုက သူ့ရှေ့မှာ နောက်တစ်ဖန် ပြန်လည်ပေါ်ထွက်လာသည့်အလားပင်။

သူမသည် ထျန်ဟွမ်ကုန်းမြေတိုက်မှာ ပြိုင်ဘက်ကင်းခဲ့ပြီး ထျန်ဟွမ်ကုန်းမြေတိုက်မှ စုန်းမျိုးနွယ်များအားလုံးကို လက်ဝါးတစ်ချက်တည်းဖြင့် သတ်ဖြတ်ခဲ့သည်။

တျဲယွဲ့၏ အတိတ်ကာလက ဘယ်လောက်တောင် ခမ်းနားထည်ဝါမလဲ သူစဉ်းစားမကြည့်နိုင်ပေ။

အင်မော်တယ်ဘုရင်မ လင်းလုံက ထပ်ပြောလိုက်သည်။

“ပိုပြီးတော့ ထူးခြားတာက သားရဲဧကရီသွေးလိပ်ပြာက တုန်လှုပ်စရာကောင်းတဲ့ ပါရမီအရည်အချင်းနဲ့ အမျိုးသမီးတစ်ဦးပဲ… သူက ဘယ်သူ့ကိုမှ အလျှော့မပေးဘူး”

“ငါ သူ့ကို ရင်ထဲ အသည်းထဲကနေ အထင်ကြီးလေးစားမိတယ်… ငါက အနာဂတ်မှာ သူ့ရဲ့ တစ်ဆယ်ရာခိုင်နှုန်းလောက်ကို ရောက်နိုင်မယ်ဆိုရင် အဲဒါက လုံလောက်နေပြီ”

ဆူဇီမိုက အသံထွက်၍ ရယ်မိသွားသည်။

ကြည့်ရသည်မှာ အင်မော်တယ်ဘုရင်မ လင်းလုံသည် တျဲယွဲ့ကို စံပြပုဂ္ဂိုလ်တစ်ဦးအဖြစ် ရှုမြင်ထားပြီး သူမ၏ ခြေရာကိုနင်းဖို့ ကြိုးစားနေသည်မှာ သိသာလေသည်။

ဒါ့အပြင် အင်မော်တယ်ဘုရင်မ လင်းလုံသည် တျဲယွဲ့ကို အရင်က တစ်ခါမှ မတွေ့မြင်ဖူးခဲ့ပေ။

အထက်ဘုံလောကမှာ တျဲယွဲ့က ဘယ်လောက်တောင် လွှမ်းမိုးနိုင်စွမ်းရှိသလဲ သိသာနေသည်။

ဆူဇီမိုသည် ထျန်ဟွမ်ကုန်းမြေတိုက်မှာတုန်းက တျဲယွဲ့သည် သူမ၏ မျိုးဆက်သွေးနယ်မြေကိုသုံးပြီး မည်သို့မည်ပုံ ဆင်းသက်လာပုံနှင့် စုန်းမျိုးနွယ်၏ ကပ်ဘေးကို ဖြေရှင်းကာ မိုးကောင်းကင်ကို ဖာထေးပြီး ထွက်ခွာသွားခဲ့သည့်အကြောင်းကို ပြန်ပြောပြလိုက်သည်။

လူသားဧကရာဇ်နှင့် အင်မော်တယ်ဘုရင်မ လင်းလုံသည် ဤအကြောင်းကို ပထမဆုံးအကြိမ် ကြားဖူးခြင်းဖြစ်ပြီး သူတို့က ပို၍ပင် တုန်လှုပ်နေကြသည်။

လင်းကျန့်က ပြောလိုက်သည်။

“ငါက အရင်တုန်းက အတင်းအကျပ် ဆင်းသက်လာတုန်းက ထျန်ဟွမ်ကုန်းမြေတိုက်မှာ ကြီးမားတဲ့ အန္တရာယ်တစ်ခု ပုန်းလျှိုးနေတာကို သတိထားမိခဲ့တယ်… အခု သူက အဲဒါကို ကိုယ်တိုင်ဝင်ဖြေရှင်းပေးခဲ့တာကိုး”