ဖျက်ဆီးခြင်း

အထက်ဘုံလောကမှာ ငရဲနှင့်ပတ်သက်သည့် မှတ်တမ်း အနည်းငယ်သာရှိပြီး သူတို့သည် တမလွန်လောကနှင့် ငရဲနှင့်ပတ်သက်သည့် ဒဏ္ဍာရီများသာဖြစ်သည်။

သို့သော်လည်း ငရဲက ဘယ်လိုပုံစံရှိသည်ကို မည်သူကမှ မတွေ့မြင်ဖူးခဲ့ပေ။

သက်ရှိများသည် တမလွန်လောကသို့ ဝင်ရောက်နိုင်မည် မဟုတ်ဟု ကောင်းကင်ဘုံဝံပုလွေက ပြောခဲ့ဖူးသည်။

သက်ရှိများ သေဆုံးသွားပြီးနောက် ကျန်ရစ်သော ဝိညာဉ်များကသာ တမလွန်လောကသို့ ဝင်ရောက်နိုင်မည် ဖြစ်သည်။

တမလွန်လောကနှင့် ငရဲက နေရာအတူတူပဲလား…။

သူသည် ဝိညာဉ်ရှာဖွေခြင်းကနေတစ်ဆင့် သတင်းအချက်အလက် အတော်အတန်ကို ရရှိခဲ့သော်လည်း သိုင်းတာအိုပင်မခန္ဓာအတွက် ဤပြင်ပကမ္ဘာက ဘာမှန်းမသိသော အရာများစွာနှင့် ပြည့်နှက်နေဆဲဖြစ်သည်။

သို့သော်လည်း ခေါင်းဆောင်တပ်မှူးချီ၏ မှတ်ဉာဏ်များကနေတစ်ဆင့် သိုင်းတာအိုပင်မခန္ဓာသည် ငိုကြွေးဝိညာဉ်တောင်ကြောရိုး၏ အလယ်ဗဟိုကို ရှာတွေ့သွားပြီဖြစ်သည်။

ငိုကြွေးဝိညာဉ်တောင်ကြောရိုး၏ ပိုင်နက်အရှင်သည် ငရဲဗိုလ်တစ်ယောက်၏ ကျင့်ကြံမှုမှာရှိပြီး သူသည် ကောင်းကင်ဘုံကမ္ဘာ၏ ပကတိအင်မော်တယ်တစ်ဦးနှင့် တူညီလေသည်။ ထိုသို့ဖြင့် ဤပြင်ပကမ္ဘာအပေါ် သူ၏ နားလည်သဘောပေါက်မှုက သေချာပေါက် ပို၍အသေးစိတ်ကျပေလိမ့်မည်။

သိုင်းတာအိုပင်မခန္ဓာက လေဟာနယ်ကို ဆုတ်ဖြဲပြီး တိုက်ရိုက်ခုန်ကူးလိုက်၏။

ငိုကြွေးဝိညာဉ်တောင်ကြောရိုးသည် တောင်ကြောရိုးတစ်သိန်းထဲမှ တစ်ခုသာလျှင် ဖြစ်သော်လည်း ၎င်းသည် အလွန်တရာကျယ်ပြန့်သော ဧရိယာတစ်ခုကို သိမ်းပိုက်ထားပြီး ပိုင်နက်အရှင်တစ်ယောက်၏ အုပ်ချုပ်မှုအောက်မှာ သက်ရှိပေါင်း သန်းရာချီရှိနေသည်။

သိပ်မကြာခင် သိုင်းတာအိုပင်မခန္ဓာသည် ငိုကြွေးဝိညာဉ်တောင်ကြောရိုး၏ အနက်ပိုင်းထဲသို့ ဆင်းသက်ပြီး ဗဟိုချက်ဒေသ၏ လေထဲမှာ ရပ်တန့်လိုက်၏။

ဂါး…

သိုင်းတာအိုပင်မခန္ဓာ ပေါ်ထွက်လာသည့် ခဏမှာပင် ကြမ်းကြုတ်တောကောင်တစ်ကောင်၏ ဟိန်းဟောက်သံက အနီးနားတောအုပ်ထဲကနေ ထွက်ပေါ်လာ၏။

ငှက်များစွာက ကောင်းကင်ထက်သို့ ပျံတက်ပြီး သတိပေးသည့်အနေဖြင့် အော်ဟစ်လိုက်ကြသည်။

“အဲဒါ ဘယ်သူလဲကွ”

တောအုပ်ထဲကနေ ဟိန်းဟောက်သံတစ်သံ ထွက်ပေါ်လာသည်။

နက်မှောင်နေသော ရှေးဟောင်းသစ်ပင်များက ယိမ်းထိုးပြီး မရေမတွက်နိုင်သော သက်ရှိများက တောအုပ်၏ အဘက်ဘက်ကနေ စုဝေးရောက်ရှိလာကြသည်။

ထိုသက်ရှိများကြားမှာ လူသားကျင့်ကြံသူများသာမက အမျိုးမျိုးသော မျိုးနွယ်စုများလည်း ရှိနေသည်။

သက်ရှိတချို့မှာ လူသားမျက်နှာများ ရှိသော်လည်း သူတို့၏ နောက်ဘက်မှာ ဧရာမအရိုးတောင်ပံများ ရှိနေသည်။

သက်ရှိတချို့သည် အပေါ်ပိုင်းဗလာကျင်းထားပြီး ပေပေါင်းများစွာ မြင့်မားကာ လွှမ်းမိုးခြယ်လှယ်နိုင်စွမ်းရှိသော အော်ရာများနှင့်အတူ ထျန်ဟွမ်ကုန်းမြေတိုက်မှ လူရိုင်းမျိုးနွယ်နှင့် ဆင်တူနေသည်။

အဲဒီမှာ လူသားမျက်နှာနှင့် တောကောင်ခန္ဓာများနှင့် သက်ရှိများလည်း ရှိနေသည်။ သူတို့၏ နောက်ကျောမှာ ဧရာမတောင်ပံများရှိပြီး ရှားရှားပါးပါး ကြမ်းကြုတ်တောကောင်မျိုးနွယ်ဝင်များနှင့် တူညီနေသည်။

မရေမတွက်နိုင်သော သက်ရှိများသည် သတ်ဖြတ်လိုစိတ်ဖြင့် ပြည့်နှက်နေပြီး မရေမတွက်နိုင်သော အလောင်းများကို နင်းချေတက်လှမ်းလာကြသည်။ နက်မှောင်နေသော ဒီရေလှိုင်းတစ်လှိုင်းကဲ့သို့ သူတို့က တောအုပ်ကိုဖြတ်ပြီး လျင်မြန်စွာ ပြေးဝင်လာနေကြသည်။

“မင်းတို့ရဲ့ ပိုင်နက်အရှင်က ဘယ်နေရာမှာလဲ”

အဘက်ဘက်ကနေ ဝင်ရောက်လာသော သက်ရှိပေါင်းများစွာနှင့် ရင်ဆိုင်ရချိန်မှာ သိုင်းတာအိုပင်မခန္ဓာက တည်ငြိမ်သော အမူအရာဖြင့် မေးလိုက်၏။

“မင်းက ငါတို့ရဲ့ ပိုင်နက်အရှင်ကိုတွေ့ဖို့ အဆင့်မီတယ်လို့ ထင်လို့လား”

စကားပြောလိုက်သောသူက မူကွဲသက်ရှိတစ်မျိုးဖြစ်သည်။ သူ့မှာ လူပုံသဏ္ဌာန်ရှိသော်လည်း သူ့တွင် မည်သည့်မျက်နှာသွင်ပြင်မှ မရှိပေ။

သူစကားပြောလိုက်သော ပါးစပ်က သူ၏ ရင်ဘတ်ပေါ်မှာ ရှိနေပြီး သူ၏ သွားစွယ်များက ထက်ရှနေသည်။ သူ၏ မျက်လုံးများက သူ၏ လက်ဖဝါးထဲမှာ ပေါ်ထွက်လာပြီး သိုင်းတာအိုပင်မခန္ဓာရှိရာဘက်သို့ သုန်မှုန်နေသော အကြည့်ဖြင့် ကြည့်နေသည်။

ဤမူကွဲသက်ရှိ၏ ကျင့်ကြံမှုက အားမနည်းဘဲ သူက ငရဲဗိုလ်တစ်ဦး ဖြစ်လောက်သည်။

သို့သော်လည်း ဤပြင်ပကမ္ဘာ၏ ကျင့်ကြံမှုနယ်ပယ်များအရ ဤမူကွဲသက်ရှိကို အခြေခံအဆင့် ငရဲဗိုလ်တစ်ဦးအဖြစ်သာ သတ်မှတ်နိုင်ပြီး ပေါင်းစည်းခြင်း ပကတိအင်မော်တယ်တစ်ဦးနှင့် တူညီလေသည်။

“မင်းက တစ်ယောက်တည်းနဲ့ ငိုကြွေးဝိညာဉ်တောင်ကြောရိုးကို သိမ်းပိုက်ချင်လို့လား”

နောက်ထပ် ငရဲဗိုလ်တစ်ဦးက ကျယ်လောင်စွာ မေးခွန်းထုတ်လိုက်သည်။

သိုင်းတာအိုပင်မခန္ဓာက သက်ရှိများ၏ အစုအဖွဲ့ကို တွေ့ရသောအခါ မျက်မှောင်အနည်းငယ်ကြုတ်လိုက်၏။

သူသည် ယခုတင် ရောက်ရှိလာခါစဖြစ်ပြီး စိုးမိုးခြယ်လှယ်မှုများစွာ မပြုလုပ်လိုပေ။

သို့သော်လည်း ကြည့်ရသည်မှာ တစ်ဖက်အဖွဲ့သည် အပြန်အလှန်စကားပြောဆိုလိုက်သည့်ခဏမှာပင် သူ့ကို အပိုင်းပိုင်းဆုတ်ဖြဲပစ်ချင်နေသည့်အလားပင်။

သိုင်းတာအိုပင်မခန္ဓာက ဖြည်းဖြည်းချင်းပြောလိုက်သည်။

“ငါက ကောင်းကင်ဘုံကမ္ဘာက လာတာပဲ… ငါက ငိုကြွေးဝိညာဉ်တောင်ကြောရိုးနှင့် မတိုက်ခိုက်ချင်ဘူး… ငါက ဒီနေရာနဲ့ပတ်သက်တဲ့ သတင်းအချက်အလက်တချို့ကို ရယူဖို့ မင်းတို့ရဲ့ ပိုင်နက်အရှင်ကို လာရှာရုံပဲ”

“ကောင်းကင်ဘုံကမ္ဘာလား”

ငိုကြွေးဝိညာဉ်တောင်ကြောရိုးမှ သက်ရှိများစွာသည် ခဏမျှမှင်တက်သွားပြီးနောက် လှောင်ရယ်လိုက်ကြသည်။

“မင်းက ကောင်းကင်ဘုံကမ္ဘာက လာတယ်ဆိုမှတော့ မင်းကို ဝါးမျိုရမယ့်အတွက် ငါတို့ကို အပြစ်မတင်နဲ့တော့”

မူကွဲသက်ရှိ၏ ပါးစပ်ပေါက်က သွားရည်တမြားမြားကျလာပြီး ထက်ရှသော လက်သည်းများက သူ၏ လက်ချောင်းများကြားကနေ တဖြည်းဖြည်း ဆန့်ထွက်လာသည်။

“သတ်…”

ရုတ်တရက် လူအုပ်ကြားထဲကနေ ဟိန်းဟောက်သံတစ်သံ ထွက်ပေါ်လာ၏။

နောက်ခဏ၌ ငိုကြွေးဝိညာဉ်တောင်ကြောရိုးမှ သက်ရှိပေါင်းများစွာက ရှေ့သို့ပြေးဝင်လာကြသည်။

သိုင်းတာအိုပင်မခန္ဓာ၏ အမူအရာက အေးစက်လာခဲ့၏။

ငိုကြွေးဝိညာဉ်တောင်ကြောရိုး၏ သက်ရှိများက ကောင်းကင်ဘုံကမ္ဘာမှသူများအပေါ် ဘာကြောင့် ဤမျှအထိ ရန်လိုနေသလဲ သူနားမလည်နိုင်ပေ။ သို့သော်လည်း ဤသက်ရှိများက သေချင်နေသည်ဆိုမှတော့ သူ့အနေဖြင့် ထိန်ချန်ထားစရာ မလိုတော့ပေ။

သိုင်းတာအိုပင်မခန္ဓာက ကိစ္စများကို ရှင်းပြဖို့ ကြိုးစားခြင်းဖြင့် သူ၏ စိတ်ရှည်မှုနှင့် တစ်ဖက်သူအပေါ် အခွင့်အရေးကို ပေးထားခဲ့ပြီဖြစ်သည်။

“သေစမ်း”

ရုတ်တရက် သိုင်းတာအိုပင်မခန္ဓာက ဟိန်းဟောက်လိုက်ပြီး အသံပိုင်းလျှို့ဝှက်အတတ်တစ်ခုကို ထုတ်ဖော်လိုက်၏။

တကယ်ဆို သူသည် အသင်္ချေသက်ရှိများအသံ၏ လျှို့ဝှက်အတတ်ကိုပင် အသက်သွင်းခဲ့ခြင်း မရှိပေ။

ဤသည်မှာ သူ၏ ကိုယ်ကာယ၊ မျိုးဆက်သွေးနှင့် စွမ်းအားကြီးမားသော အဆုတ်အားကနေ ထုတ်ဖော်လိုက်သော အသံပိုင်းတိုက်ခိုက်မှုသက်သက်မျှသာဖြစ်သည်။

ထိုသို့ဆိုလျှင်တောင် ငိုကြွေးဝိညာဉ်တောင်ကြောရိုးမှ သက်ရှိများက အဲဒါကို မခံနိုင်ရည် မရှိပေ။

ဖောင်း… ဖောက်… ဖောက်…

တောအုပ်၏ အပြင်ဘက်မှ သက်ရှိပေါင်းများစွာ၏ ကိုယ်ကာယများက တစ်ခုပြီးတစ်ခု ပေါက်ကွဲထွက်သွားသည်။ ကျိုးပြတ်သွားသော ခြေလက်များက အဘက်ဘက်မှာ လွင့်ပျံနေပြီး သွေးမြူတစ်ခုက သိပ်သည်းပြင်းထန်သော သွေးနံ့နှင့်အတူ ဖြန့်ကြက်သွားခဲ့သည်။

အသံပိုင်းတိုက်ခိုက်မှု၏ ရိုက်ခတ်မှုက တောင်ကြောရိုးတစ်ခုလုံးကို ပြင်းထန်ကြမ်းတမ်းစွာ တုန်ခါသွားစေသည်။ မရေမတွက်နိုင်သော တောင်တန်းများက ကြေမွပြိုကျသွားပြီး ကျောက်တုံးကျောက်ခဲများက လိမ့်ဆင်းလာကြသည်။

ချက်ချင်းပင် ဘေးပတ်ဝန်းကျင်မှာရှိသော သက်ရှိများ၏ ထက်ဝက်ကျော်က သိုင်းတာအိုပင်မခန္ဓာ၏ တိုက်ခိုက်မှုဖြင့် သေသည့်တိုင်အောင် လှုပ်ခါသွားကြသည်။

ထိုမျှသာမက သိုင်းတာအိုပင်မခန္ဓာမှ ဟိန်းဟောက်သံတစ်သံနှင့်အတူ ငိုကြွေးဝိညာဉ်တောင်ကြောရိုး၏ ကီလိုမီတာငါးသိန်းပတ်လည်အတွင်း တောင်တန်းများမှာ ကြီးမားသော ငလျင်တစ်ခု ဖြစ်ပွားလာခဲ့သည်။

ဤသည်က သိုင်းတာအိုပင်မခန္ဓာ၏ စွမ်းအားဖြစ်လေသည်။

အစကတော့ ဘေးပတ်ဝန်းကျင်သည် အော်ဟစ်သံများ၊ ကျယ်လောင်သော စွမ်းပကားများနှင့် ပြည့်နှက်နေခဲ့သည်။ သို့သော်လည်း သိုင်းတာအိုပင်မခန္ဓာ၏ ဟိန်းဟောက်သံအပြီး၌ သက်ရှိများအားလုံး၏ ဆူညံသံများက ချက်ချင်းပင် ပျောက်ကွယ်သွားခဲ့သည်။

တောင်တန်းများစွာ ပြိုကျနေသောအသံနှင့် ကျောက်တုံးကျောက်ခဲများ လိမ့်ဆင်းလာသော အသံကသာ ရှိတော့လေသည်။

သူကြည့်ရာနေရာတိုင်းမှာ တောင်တန်းများက ပြိုကျသွားပြီး မြေပြင်က အက်ကွဲလာခဲ့သည်။ အဲဒါက ကမ္ဘာပျက်ကပ်ဘေးတစ်ခု၏ မြင်ကွင်းဖြစ်လေသည်။

သိုင်းတာအိုပင်မခန္ဓာ၏ ဘေးပတ်လည်မှာ နေရာမှာတင် မတ်တတ်ရပ်နေသော သက်ရှိတချို့ ရှိနေဆဲဖြစ်သည်။ သူတို့သည် လိပ်ပြာလွင့်မတတ် ကြောက်လန့်နေပြီး သူတို့၏ မျက်နှာများက တုန်လှုပ်မှုဖြင့် ပြည့်နှက်နေကြ၏။

ထိုသက်ရှိများအားလုံးက ငရဲဗိုလ်များ ဖြစ်ကြသည်။

သူတို့၏ ကျင့်ကြံမှုနယ်ပယ်များသည် သိုင်းတာအိုပင်မခန္ဓာ၏ အသံပိုင်းတိုက်ခိုက်မှုကို ခုခံရန် လုံလောက်အောင် မြင့်မားသောကြောင့် မဟုတ်ပေ။

သိုင်းတာအိုပင်မခန္ဓာက သူတို့ကို တမင်သက်သက် အသက်ရှင်လျက် ထိန်းထားသောကြောင့်ဖြစ်သည်။

သိုင်းတာအိုပင်မခန္ဓာက ရှင်းပြမနေဘဲ သူ၏ လက်ကို ဆန့်ထုတ်လိုက်၏။ သက်ရှိများ၏ အမြုတေစိတ်ဝိညာဉ်များက ဖမ်းဆီးခံလိုက်ရပြီး သူက ဝိညာဉ်ရှာဖွေခြင်းအတတ်ကို အသုံးပြုဖို့ ပြင်လိုက်လေသည်။

ထိုစဉ်မှာပင် သိုင်းတာအိုပင်မခန္ဓာက ရင်တစ်ချက်ထိတ်သွား၏။

ဟမ့်…

ငိုကြွေးဝိညာဉ်တောင်ကြောရိုး၏ အနက်ပိုင်းထဲမှာ ပုံရိပ်တစ်ခုက ဖုန်တထောင်းထောင်းထနေသော တိမ်စိုင်များ နောက်ဘက်သို့ ပြေးထွက်သွားလေသည်။

ထိုလူ၏ အော်ရာက သူဖမ်းဆီးထားသော ငရဲဗိုလ်တချို့ထက် များစွာပိုမိုသန်မာလေသည်။

သူထင်တာ မမှားဘူးဆိုလျှင် ထွက်ပြေးသွားသောလူက ငိုကြွေးဝိညာဉ်တောင်ကြောရိုး၏ ပိုင်နက်အရှင်ဖြစ်ရပေမည်။

သိုင်းတာအိုပင်မခန္ဓာက ထိုသူ့နောက်သို့ ပြေးလိုက်သွား၏။

ငိုကြွေးဝိညာဉ်တောင်ကြောရိုး၏ ပိုင်နက်အရှင်က သိပ်ဝေးဝေးမပြေးရသေးခင် သူက နောက်ပြန်လှည့်ကြည့်ပြီး သူ၏ အမူအရာက ရုတ်ချည်းပြောင်းလဲသွား၏။

ငွေရောင်မျက်နှာဖုံးနှင့် ခရမ်းရောင်ဝတ်အမျိုးသားက သူ၏ နောက်ဘက်ကို ရောက်ရှိလာခဲ့ပြီဖြစ်၏။

သူက ဘယ်လောက်ပင် မြန်ဆန်သည်ဖြစ်စေ သူသည် သိုင်းတာအိုပင်မခန္ဓာထက် ဘယ်လိုလုပ်ပြီး ပိုမိုမြန်ဆန်နိုင်ပါ့မလဲ။

ငိုကြွေးဝိညာဉ်တောင်ကြောရိုး၏ ပိုင်နက်အရှင်က ထွက်ပြေးလွတ်မြောက်ဖို့ မျှော်လင့်ချက် မရှိတော့ဘူးဆိုတာ သိရှိလိုက်လေသည်။ သူ၏ မျက်လုံးထဲတွင် ရက်စက်ကြမ်းတမ်းသော အလင်းတစ်ခု ဖျပ်ခနဲလက်သွားပြီး သူက တစ်ဖက်သို့လှည့်ကာ သူ၏ အစစ်အမှန်ပုံစံသို့ ပြောင်းလဲလိုက်၏။ သူသည် ကြမ်းကြုတ်တောကောင် ချုံးချီဖြစ်ပြီး သိုင်းတာအိုပင်မခန္ဓာထံသို့ ခုန်ဝင်လာခဲ့သည်။

ထျန်ဟွမ်ကုန်းမြေတိုက်မှာဖြစ်စေ… အထက်ဘုံလောကမှာဖြစ်စေ… ချုံးချီကြမ်းကြုတ်တောကောင်များသည် စွမ်းအားကြီးမားသော မျိုးဆက်သွေးများကို ပိုင်ဆိုင်ထားသည့် သက်ရှိများဖြစ်ကြသည်။

သို့သော်လည်း သိုင်းတာအိုပင်မခန္ဓာ၏ ရှေ့မှာ ဤချုံးချီက ပုရွက်ဆိတ်တစ်ကောင်နှင့် မကွာခြားပေ။

သိုင်းတာအိုပင်မခန္ဓာထံမှ ရိုက်ချက်တစ်ချက်နှင့်အတူ ချုံးချီ၏ ဦးနှောက်ရည်များက ပြန့်ကြဲသွားပြီး သူ၏ ခန္ဓာကိုယ်က ပေါက်ကွဲထွက်သွား၏။

သိုင်းတာအိုပင်မခန္ဓာက လက်လှမ်းပြီး ချုံးချီ၏ အမြုတေစိတ်ဝိညာဉ်ကို ဖမ်းဆီးလိုက်သည်။

တစ်ချိန်တည်းမှာပင် ချုံးချီ၏ နဖူးထက်ကနေ အေးစက်နေသော သလင်းလုံးတစ်လုံး လိမ့်ဆင်းလာ၏။

သိုင်းတာအိုပင်မခန္ဓာက အဲဒါကို လှမ်းယူပြီး တစ်ချက်ကြည့်လိုက်သည်။

သူထင်တာ မမှားဘူးဆိုလျှင် ဤသလင်းလုံးသည် အထက်ဘုံလောကမှ ပကတိအင်မော်တယ်များ၏ တာအိုသစ်သီးနှင့် တူညီသော တမလွန်သလင်းလုံး ဖြစ်ရပေမည်။