ဂမ္ဘီရကျင့်စဉ်နှစ်ခု

သိုင်းတာအိုပင်မခန္ဓာသည် ငရဲဖိနှိမ်မီးဖိုကို ဆင့်ခေါ်ပြီး အဲဒါနှင့် တမလွန်ဘုံရတနာကြေးမုံကို ပစ်ရိုက်ချလိုက်၏။

ချွမ်း…

အဲဒီမှာ ကြယ်လောင်သော မြည်သံထွက်ပေါ်လာ၏။

ငရဲဖိနှိမ်မီးဖိုသည် တမလွန်ဘုံရတနာကြေးမုံနှင့် ထိတွေ့ရိုက်ခတ်ပြီး နီရဲနေသော အလင်းရောင်တစ်ခုက တမလွန်ဘုံရတနာကြေးမုံပေါ်တွင် ပေါ်ထွက်လာပြီး အလွန်တရာ နတ်ဆိုးဆန်၍ ဆိုးယုတ်သောစွမ်းအားတစ်ခုကို ဖြာထုတ်ပေးလိုက်၏။

ချက်ချင်းပင် ငရဲဖိနှိမ်မီးဖိုက ပြန်ကန်ထွက်ပြီး သိုင်းတာအိုပင်မခန္ဓာကို အုပ်မိုးလာခဲ့၏။

“ဟမ့်”

သိုင်းတာအိုပင်မခန္ဓာက ရင်တစ်ချက်ထိတ်သွား၏။

နတ်ဆိုးဆန်၍ ဆိုးယုတ်သောစွမ်းအားသည် အလွန်တရာစွမ်းအားကြီးမားပြီး ပြီးပြည့်စုံသော အစစ်အမှန်သိုင်းတာအိုခန္ဓာပင်လျှင် အဲဒါကို ခံနိုင်ရည်မရှိပေ။ သူ၏ အရိုးများနှင့် ခန္ဓာကိုယ်ထဲမှာ ပါဝင်သော ဓမ္မတာအိုမှော်စာလုံးများက ပျက်ပြယ်တော့မည့် လက္ခဏာများ ပြသလာ၏။

သိုင်းတာအိုပင်မခန္ဓာသည် ဆီးနှင်းစိမ့်စမ်းငရဲမှ စွမ်းအားကြီးမားသော ပြိုင်ဘက်တစ်ယောက်နှင့် မကြုံတွေ့ရခင် ရှေးဟောင်းနတ်ဆိုးကြေးမုံတစ်ချပ်ကြောင့် ကြီးမားသော အန္တရာယ်မှာ ကျရောက်လာခဲ့လေပြီ။

သိုင်းတာအိုပင်မခန္ဓာသည် စဉ်းစားနေဖို့ အချိန်မရပေ။ သူက ဝိညာဉ်မီးအိမ်ကို ဆင့်ခေါ်ပြီး သိုင်းစိတ်ဝိညာဉ်မီးကို ထုတ်ဖော်ကာ ထွန်းညှိလိုက်၏။

ဝိညာဉ်မီးအိမ်က လောင်ကျွမ်းလာပြီး ရွှေရောင်ရောင်လျှံစက်ဝန်းတစ်ခုအဖြစ် ပြည့်နှက်လာကာ နတ်ဆိုးဆန်၍ ဆိုးယုတ်သောစွမ်းအားကို ပျက်ပြယ်သွားစေလေသည်။

သိုင်းတာအိုပင်မခန္ဓာသည် ဝိညာဉ်မီးအိမ်ကို ကိုင်စွဲပြီး ၎င်းကို တမလွန်ဘုံရတနာကြေးမုံ၏ အောက်မှာထားကာ ဝိညာဉ်မီးအိမ်၏ မီးတောက်များနဲ့အတူ ၎င်းကို လောင်ကျွမ်းစေလိုက်၏။

“အား…”

တမလွန်ဘုံရတနာကြေးမုံထံမှ ခပ်စူးစူးအော်သံတစ်သံ ထွက်ပေါ်လာ၏။

ထို့နောက်ချက်ချင်းပင် တမလွန်ဘုံရတနာကြေးမုံက တဆတ်ဆတ်တုန်ခါလာပြီး သိုင်းတာအိုပင်မခန္ဓာ၏ လက်ပေါ်ရှိ ဒဏ်ရာကနေ ကျဆင်းကာ နောက်တစ်ဖန် တိတ်ဆိတ်ငြိမ်သက်သွား၏။

သိုင်းတာအိုပင်မခန္ဓာက စိတ်သက်သာစွာ သက်ပြင်းချလိုက်၏။

တမလွန်ဘုံရတနာကြေးမုံ၏ တုံ့ပြန်မှုသည် လက်နက်စိတ်ဝိညာဉ်ကြောင့် ဖြစ်ပေါ်လာခြင်း ဖြစ်နိုင်ခြေများလေသည်။

မြောက်ပိုင်းရိုးမမှ တိုက်ပွဲအတွင်း အဆုံးမဲ့ကောင်းကင်လိုဏ်ဂူစွမ်းအားများကို စုပ်ယူပြီးနောက် ဤလက်နက်စိတ်ဝိညာဉ်က နိုးထလာခဲ့ခြင်းဖြစ်ပေမည်။

လက်နက်စိတ်ဝိညာဉ် နိုးထလာပြီးနောက် ၎င်းသည် တမလွန်ဘုံရတနာကြေးမုံကို အသုံးချကာ အမြုတေသွေးများကို ရူးသွပ်စွာ ဝါးမျိုခဲ့၏။

စောစောက လက်နက်စိတ်ဝိညာဉ်သည် သိုင်းတာအိုပင်မခန္ဓာကိုပင် ဝါးမျိုစုပ်ယူလိုခဲ့လေသည်။

ဝိညာဉ်မီးအိမ်သည် စိတ်ဝိညာဉ်ပစ္စည်းများနှင့် ဝိညာဉ်များအပေါ် အလွန်တရာကြောက်စရာကောင်းသော သေစေနိုင်စွမ်းအားကို ပိုင်ဆိုင်ထားသည်။ ထို့ကြောင့် သိုင်းတာအိုပင်မခန္ဓာသည် ဝိညာဉ်မီးအိမ်ကို ဆင့်ခေါ်ပြီးနောက် တမလွန်ဘုံရတနာကြေးမုံကို ထိခိုက်ဒဏ်ရာ မရရှိစေနိုင်ခဲ့သော်လည်း ၎င်းသည် လက်နက်စိတ်ဝိညာဉ်ကို အပြင်းအထန် ပျက်စီးထိခိုက်သွားစေပုံရသည်။

သိုင်းတာအိုပင်မခန္ဓာသည် တမလွန်ဘုံရတနာကြေးမုံကို ဝိညာဉ်မီးအိမ်နှင့် ခဏကြာသည်အထိ ကင်ထားလိုက်သည်။ တမလွန်ဘုံရတနာကြေးမုံက တိတ်ဆိတ်နေပြီး မည်သည့်လှုပ်ရှားမှုမှ ထပ်ရှိမလာတော့ပေ။

လက်နက်စိတ်ဝိညာဉ်သည် ဝိညာဉ်မီးအိမ်၏ ဖျက်ဆီးခြင်းခံလိုက်ရပြီဖြစ်သည့်အလားပင်။

သိုင်းတာအိုပင်မခန္ဓာက ဝိညာဉ်မီးအိမ်ကို ငြှိမ်းသက်၍ သိမ်းဆည်းပြီးနောက် တမလွန်ဘုံရတနာကြေးမုံကို နောက်တစ်ဖန် ကောက်ယူလိုက်၏။

ဤတစ်ခေါက်မှာတော့ သူ၏ ရင်ထဲမှာ ထူးဆန်းသော ခံစားချက်တစ်ခု ရုတ်တရက်ပေါ်ထွက်လာ၏။

သူသည် တမလွန်ဘုံရတနာကြေးမုံနှင့် ခပ်ဖျော့ဖျော့ဆက်သွယ်မှုတစ်ခု တည်ဆောက်ခဲ့ပြီဖြစ်သည့်အလားပင်။

ဤခံစားချက်၏ ပေါ်ထွက်လာမှုသည် စောစောက တမလွန်ဘုံရတနာကြေးမုံသည် သူ၏ မျိုးဆက်သွေးကို ဝါးမျိုခဲ့ခြင်းနှင့် ဆက်စပ်နေနိုင်သည်ဟု သိုင်းတာအိုပင်မခန္ဓာက ယူဆလိုက်၏။

သူသည် နောက်ထပ်အကြိမ်ရေအနည်းငယ် အသက်သွင်းဖို့ ကြိုးစားကြည့်သော်လည်း တမလွန်ဘုံရတနာကြေးမုံထံမှ မည်သည့်တုံ့ပြန်မှုမှ ရှိမလာတော့ပေ။

ယခုအချိန်ထိ ဤရှေးဟောင်းကြေးမုံကို ဘယ်လိုအသုံးချရမလဲနှင့် အဲဒါကို ဘယ်လိုအသက်သွင်းရမလဲ သူ မသိသေးပေ။ သို့သော်လည်း ဤတစ်ခေါက်မှာ သူ၏ စိတ်ဝိညာဉ်အသိစိတ်က တမလွန်ဘုံရတနာကြေးမုံထဲသို့ ဝင်ရောက်သွားသောအခါ သူသည် တစ်စုံတစ်ရာကို အာရုံခံမိသွားပုံရသည်။ အတွေးတစ်ချက်နှင့်အတူ တမလွန်ဘုံရတနာကြေးမုံ၏ ကြေးမုံမျက်နှာပြင်ပေါ်မှာ ထူးဆန်းသော မှော်စာလုံးများက တဖြည်းဖြည်းပေါ်ထွက်လာ၏။

“အဲဒါ… အဲဒီစာလုံးတွေပဲ”

ကြင်ရာတော်ယုက တမလွန်ဘုံရတနာကြေးမုံပေါ်ရှိ ထူးဆန်းသော မှော်စာလုံးများကို ကြည့်ပြီး အံ့အားတသင့် ရေရွတ်ပြောဆိုလိုက်၏။

“အဲဒါ တမလွန်ဘာသာစကားပဲ”

သိုင်းတာအိုပင်မခန္ဓာက တစ်ချက်ကြည့်လိုက်၏။ တမလွန်ဘုံရတနာကြေးမုံပေါ်ရှိ ထူးဆန်းသော မှော်စာလုံးများသည် အစိမ်းရောင်ကြာပန်းအစစ်အမှန်ခန္ဓာ ရရှိထားသော ယင်ယန်အဆောင်သုတ္တန်နှင့် တူညီသော ဇာစ်မြစ်ကနေ လာပုံရလေသည်။

“ဒါက တမလွန်ဘာသာစကားလား”

သိုင်းတာအိုပင်မခန္ဓာက မေးလိုက်၏။

ကြင်ရာတော်ယုက ခေါင်းညိတ်ပြပြီး ခဏမျှရပ်တန့်ကာ ခေါင်းခါပြလိုက်၏။

“အသေးစိတ်ကိုတော့ ငါမသိဘူး… ဒါပေမဲ့ ငရဲသက်ရှိတွေက အဲဒါကို တမလွန်ဘာသာစကားလို့ ခေါ်ကြတယ်”

“စိမ့်စမ်းကိုးခုငရဲသုတ္တန်ကိုလည်း အဲဒီဘာသာစကားနဲ့ပဲ ရေးထားတယ်”

သိုင်းတာအိုပင်မခန္ဓာက ထပ်မေးလိုက်၏။

“တမလွန်ဘာသာစကားကို မင်းနားလည်နိုင်လား”

“အင်း”

ကြင်ရာတော်ယုက ခေါင်းညိတ်ပြလိုက်၏။

သူမသည် ငရဲဆီးနှင်းစိမ့်စမ်းမှာ အသွင်ပြောင်းလဲခြင်း ခံယူပြီး ဆီးနှင်းစိမ့်စမ်းငရဲတွင် နေထိုင်လာခဲ့သည်မှာ နှစ်ပေါင်းထောင်ချီကြာသွားခဲ့ပြီဖြစ်သည်။ ထို့ကြောင့် သူမသည် ဤကဲ့သို့ ထူးဆန်းသော မှော်စာလုံးများကို ကျွမ်းကျင်တတ်မြောက်နေလေပြီ။

ကြင်ရာတော်ယုက တမလွန်ရတနာကြေးမုံပေါ်ရှိ ထူးဆန်းသော မှော်စာလုံးများကို ကြည့်ပြီး စိတ်လှုပ်ရှားစွာဖြင့် ပြောလိုက်သည်။

“ဒါက စိမ့်စမ်းကိုးခုငရဲသုတ္တန်ရဲ့ အချုပ်တွဲပဲ… အဲဒါကို မြန်မြန်သိမ်းထားလိုက်… ဘယ်သူ့ကိုမှ မပြနဲ့”

သိုင်းတာအိုပင်မခန္ဓာက သာမန်ကာလျှံကာ ပြောလိုက်၏။

“ရပါတယ်… မင်းစိတ်ရှိသလို အဲဒါကို ကြည့်လို့ရတယ်”

ကြင်ရာတော်ယုက ရင်တစ်ချက်ထိတ်သွားပြီး သိုင်းတာအိုပင်မခန္ဓာကို အလျင်အမြန်တစ်ချက်ကြည့်ပြီးနောက် သူမ၏ အကြည့်ကို ပြန်လည်ရုတ်သိမ်းလိုက်၏။

အချုပ်တွဲသည် ငရဲသုတ္တန်၏ အတွဲကိုးတွဲကို အစီအစဉ်တကျ နေရာချပေးနိုင်ပြီး ၎င်းမှာ ထိုလျှို့ဝှက်ကျမ်း၏ အဓိကကျသော ဓမ္မတာအိုပါဝင်နေ၏။ အဲဒါက သေးငယ်သောကိစ္စမဟုတ်ပေ။

အရင်တုန်းက ငရဲအရှင်ကသာ ဤအချုပ်တွဲကို ထိန်းချုပ်ထားလေသည်။

အခြားသော ငရဲအရှင်များက မဟာအကျိုးဆောင်မှုများကို ပြုလုပ်ထားမည်ဆိုလျှင် သူတို့သည် ငရဲအရှင်ထံမှ ဆုလာဘ်တစ်ခုကို ရရှိနိုင်ပြီး သူသည် အချုပ်တွဲမှ စာကြောင်းတချို့ကို သူတို့အား သင်ကြားပေးပေလိမ့်မည်။

ထို့သို့ဆိုလျှင်တောင် အဲဒါသည် ထိုငရဲအရှင်များအတွက် ကြီးမားစွာ အကျိုးအမြတ်ရရှိစေလေသည်။

သို့သော်ယခု သူမရှေ့မှလူသည် မည်သည့်အရာကိုမှ ဖုံးကွယ်မထားဘဲ လျှို့ဝှက်အတတ်သုတ္တန်ကို သူမ စိတ်ရှိသည့်အတိုင်း ဖတ်ရှုခွင့်ပေးထားသည်။

ကြင်ရာတော်ယုက ရင်ထဲမှာ လှုပ်ခတ်လာခဲ့၏။

ထိုစဉ်မှာပင် သိုင်းတာအိုပင်မခန္ဓာက ဆက်ပြောလိုက်၏။

“မင်း အဲဒါကို ဖတ်ပြီးရင် တမလွန်ဘာသာစကားရဲ့ အဓိပ္ပါယ်ကို ငါ့ကိုရှင်းပြနိုင်မယ်မလား”

လတ်စသတ်တော့ သူ့ရဲ့အကြံအစည်က ဒါကိုး…။

ကြင်ရာတော်ယုက သူမဘာသာသူမတွေးပြီး စိတ်ပျက်လက်ပျက်အနည်းငယ်ဖြစ်သွား၏။

သူမသည် ပျံ့လွင့်နေသော ထိုအတွေးများကို လွှတ်ချပြီး သိပ်မကြာခင် သူမ၏ စိတ်အာရုံကို စုစည်းကာ တမလွန်ဘုံရတနာကြေးမုံပေါ်ရှိ အချုပ်တွဲကို ဖတ်ရှုလိုက်၏။

သူမက သူမဘာသာသူမ ဖတ်ရှုရင်း တမလွန်ဘုံရတနာကြေးမုံပေါ်ရှိ တမလွန်ဘာသာစကားကို သိုင်းတာအိုပင်မခန္ဓာထံ တစ်လုံးပြီးတစ်လုံး ရှင်းပြပေးနေ၏။

ကြင်ရာတော်ယုသည် အချုပ်တွဲကို ကောက်ချက်ချထုတ်နုတ်ခြင်း ပြီးဆုံးဖို့အတွက် တစ်ညလုံးလုံး အချိန်ယူခဲ့ရ၏။

ဤတစ်ညတာသည် သူမ၏ စိတ်ဝိညာဉ်ကို အားအင်ကြီးမားစွာ ကုန်ခန်းသွားစေ၏။

အချုပ်တွဲမှာ ပါဝင်သော ဓမ္မတာအိုသည် တကယ့်ကို မနှိုင်းယှဉ်သာအောင် လေးနက်သိမ်မွေ့လေသည်။ သူမသည် ၎င်း၏ အနှစ်သာရကို နားလည်ဆင်ခြင်လိုသည်ဆိုလျှင် သူမအနေဖြင့် အဲဒါကို ပုံဖော်ဖို့ အချိန်တချို့ယူရပေလိမ့်မည်။

တကယ်တော့ ဤအချုပ်တွဲသည် သူမ၏ အနာဂတ်ကျင့်ကြံမှုလမ်းကြောင်းကို ရုတ်တရက် မနှိုင်းယှဉ်သာအောင် ကျယ်ပြန့်ပြီး လင်းထိန်တောက်ပလာစေခဲ့၏။

သူမသည် နောက်ပိုင်းမှာ ငရဲသုတ္တန်၏ အခြားသော အတွဲရှစ်တွဲကို ရရှိနိုင်မည်ဆိုလျှင် သူမသည် ပြီးပြည့်စုံသော စိမ့်စမ်းကိုးခုငရဲသုတ္တန်ကို ရရှိလာပေလိမ့်မည်။

သိုင်းတာအိုပင်မခန္ဓာ၏ ကျင့်ကြံမှုနယ်ပယ်က ပို၍ပင်မြင့်မားလေသည်။ သူသည် အဆင့်မြင့်ကျင့်ကြံရေးနည်းစနစ်များနှင့် တဗူးဂမ္ဘီရကျင့်စဉ်တချို့ကိုပင် ဖတ်ရှုထားခဲ့ဖူးသည်။ သူ၏ အကဲဖြတ်မှုနှင့် ပါရမီအရည်အချင်းအရ သူသည် ညတွင်းချင်းပင် အကျိုးအမြတ်ရရှိလာခဲ့၏။

အစကတော့ စိမ့်စမ်းကိုးခုငရဲသုတ္တန်သည် တဗူးဂမ္ဘီရကျင့်စဉ်တစ်ခု ဟုတ်ပါ့မလား သူက သံသယရှိနေခဲ့၏။

သို့သော်လည်း ဤအချုပ်တွဲကို ဖတ်ရှုပြီးနောက် စိမ့်စမ်းကိုးခုငရဲသုတ္တန်က တဗူးဂမ္ဘီရကျင့်စဉ်တစ်ခုဖြစ်ကြောင်း သူက သေချာသလောက်နီးပါးဖြစ်သွားသည်။

ဤသုတ္တန်မှာ ပါဝင်သော ဓမ္မတာအိုသည် အလွန်တရာပြောင်မြောက်ပြီး တဗူးဂမ္ဘီရကျင့်စဉ်များသာ ထိုအဆင့်ထိ ရောက်ရှိနိုင်သည်။

ထိုသို့ဆိုလျှင် အတိတ်ကာလတုန်းက ငရဲအရှင်သည် မဟာဧကရာဇ်တစ်ပါး၏ အဆင့်ထိ တကယ်ပင် ကျင့်ကြံနိုင်ခဲ့ပေလိမ့်မည်။

တကယ်တော့ သိုင်းတာအိုပင်မခန္ဓာသည် တဗူးဂမ္ဘီရကျင့်စဉ်တစ်ခု၏ အချုပ်တွဲသုတ္တန်ကိုသာ ညတွင်းချင်း ရရှိလာခဲ့ခြင်း မဟုတ်ပေ။

ကြင်ရာတော်ယု၏ ရှင်းလင်းချက်များကနေတဆင့် သူသည် တမလွန်ဘာသာစကားနှင့်ပတ်သက်၍ အတော်လေးနားလည်သဘောပေါက်လာခဲ့ပြီဖြစ်သည်။

ယင်ယန်အဆောင်သုတ္တန်၏ အပိုင်းနှစ်ပိုင်းမှာ စကားလုံးခြောက်ရာကျော်ကျော်သာလျှင် ရှိလေသည်။

ယခုအချိန်မှာ သိုင်းတာအိုပင်မခန္ဓာသည် ယင်ယန်အဆောင်သုတ္တန်ကို သူ့ဘာသာသူဖတ်ရှုနိုင်လာပြီဖြစ်သည်။

သိုင်းတာအိုပင်မခန္ဓာသည် အဲဒါကို အကြမ်းဖျင်းသာ လှန်လှောဖတ်ရှုပြီးနောက် ယင်ယန်အဆောင်သုတ္တန်မှာ ပါဝင်သော စကားလုံးခြောက်ရာသည် ပို၍ပင် လေးနက်သိမ်မွေ့နေသည်ကို တွေ့ရှိလိုက်ရ၏။

စကားလုံးတစ်လုံးချင်းစီနှင့် စာကြောင်းတစ်ကြောင်းချင်းစီမှာ မဟာတာအို၏ နိယာမတချို့ ပါဝင်နေပုံရသည်။

ခဏမျှ စဉ်းစားတွေးတောကြည့်မည်ဆိုလျှင် သူတို့သည် အဆုံးမဲ့လေးနက်သိမ်မွေ့မှုများနှင့်အတူ အခြားသော ဓမ္မတာအိုများကိုပါ နားလည်ဆင်ခြင်လာနိုင်ပေလိမ့်မည်။

ယင်ယန်အဆောင်သုတ္တန်သည် စိမ့်စမ်းကိုးခုငရဲသုတ္တန်ထက်ပင် ပိုမိုမြင့်မားသော အဆင့်တစ်ခုမှာ ရှိနေပုံရသည်။ အနည်းဆုံးတော့ ၎င်းသည်လည်း တဗူးဂမ္ဘီရကျင့်စဉ်တစ်ခုပင်ဖြစ်သည်။

“ဒါနဲ့….”

သူမက တစ်စုံတစ်ရာကို အမှတ်ရသွားသည့်အလား ကြင်ရာတော်ယုက တည်တံ့သော အမူအရာဖြင့် ပြောလိုက်၏။

“ဒီနေ့တိုက်ပွဲသတင်းက ပျံ့နှံ့သွားမယ်ဆိုရင် အခြားငရဲရှစ်ခုက ပညာရှင်တွေက ဒီအတိုင်းထိုင်နေကြမှာ မဟုတ်တော့ဘူး”

“အင်း”

သိုင်းတာအိုပင်မခန္ဓာ၏အတွေးများသည် ကျင့်ကြံရေးနည်းစနစ်သုတ္တန်နှစ်ခုပေါ်မှာ ရောက်ရှိနေပြီး သူမက စိတ်အာရုံပျံ့လွင့်စွာဖြင့် ပြန်ဖြေလိုက်၏။

“တကယ်ဆို ငရဲရှစ်ခုက နင့်ကို ကိုင်တွယ်ဖို့အတွက် ပူးပေါင်းလာလိမ့်မယ်လို့ ငါသံသယရှိတယ်”

သိုင်းတာအိုပင်မခန္ဓာက အကျိုးအပြစ်ကို နားမလည်မှာစိုးပြီး ကြင်ရာတော်ယုက ဆက်ပြောလိုက်သည်။

“နင် ထန်ခုံးကို ငရဲအရှင် ဆီးနှင်းစိမ့်စမ်းရာထူးပေးတုန်းက သူ့ရဲ့ခါးသက်တဲ့ အမူအရာကို မတွေ့ဘူးလား… သူကလည်း ဒီကိစ္စရဲ့ နောက်ပိုင်းအကျိုးဆက်တွေကို နားလည်ထားတာဖြစ်ရမယ်… နင် ပေါ့ပေါ့ဆဆမလုပ်သင့်ဘူး။”