ခေါင်းလေးလုံး လက်ရှစ်ဖက်

တကယ်တော့ အနှိုင်းမဲ့နတ်ဘုရားစွမ်းအားဟု ခေါ်ဆိုသော နတ်ဘုရားစွမ်းအားများက လုံးဝအားမနည်းကြပေ။

သို့သော်လည်း အနှိုင်းမဲ့နတ်ဘုရားစွမ်းအားတချို့သည် မတူညီသော အားသာချက်များကို အလေးပေးထားကြသည်။

လင်းကျန့်ဆိုလိုသည့်အရာမှာ ကြယ်တာရာအကျဉ်းထောင်ကဲ့သို့ အနှိုင်းမဲ့နတ်ဘုရားစွမ်းအားတစ်ခု ဆင်းသက်လာမည်ဆိုလျှင် အဲဒါသည် ဆူဇီမိုအတွက် ခြိမ်းခြောက်မှုလျော့နည်းပေလိမ့်မည်။

သို့သော်လည်း အလွန်တရာကြောက်စရာကောင်းသည့် ဒဏ္ဍာရီလာ ပြန်ဝင်စားခြင်းလမ်းခြောက်သွယ်ကဲ့သို့ တစ်စုံတစ်ရာ ဆင်းသက်လာမည်ဆိုလျှင် ဆူဇီမိုက အန္တရာယ်ရှိလာပေလိမ့်မည်။

သူတို့လေးယောက်သည် တောင်ကြားအစပ်မှာ မတ်တတ်ရပ်၍ စောင့်ကြည့်နေသော်လည်း သူတို့က စိုးရိမ်ကြောင့်ကြနေကြဆဲဖြစ်သည်။

အဋ္ဌမမြောက်ကပ်ဘေး ပျက်ပြယ်သွားပြီးနောက် နောက်ဆုံးကပ်ဘေးသည် ဆူဇီမိုကို အနားယူခွင့်ပေးထားသည့်အလား အတန်ကြာသည်အထိ ပေါ်ထွက်မလာခဲ့ပေ။

နောက်ဆုံးမှာတော့ ကောင်းကင်ထက်ရှိ ကပ်ဘေးတိမ်စိုင်များက တရုန်းရုန်းထကြွလာပြီး ခန့်ညားသော စွမ်းပကားတစ်ခုကို​ ဖြာထုတ်ပေးနေသည့် ဧရာမဝဲကတော့တစ်ခု ဖြစ်ပေါ်လာလေသည်။

ဝဲကတော့၏ အလယ်မှာ ကြောက်စရာကောင်းသော သက်ရှိတစ်ဦးက နိုးထလာနေသည့်အလားပင်။ ၎င်း၏ အော်ရာက ပိုမိုသန်မာလာပြီး အဆက်မပြတ်မြင့်တက်လာနေ၏။

တောင်ကြား၏ အလယ်မှာရှိသော ဆူဇီမိုကို မျက်လုံးတစ်ဖက်က စိုက်ကြည့်နေသည့်အလား အလင်းနှင့်အမှောင်က ရောထွေးယှက်ဖြာနေ၏။

“အဲဒါက ဘာအနှိုင်းမဲ့နတ်ဘုရားစွမ်းအားလဲ”

လင်းလေက မေးလိုက်မိ၏။

အင်မော်တယ်ဘုရင်မ လင်းလုံက သူမ၏ ခေါင်းကို ညင်သာစွာခါပြီး စေ့စေ့စပ်စပ် ပြန်စဉ်းစားကြည့်နေ၏။ သူမက တွေဝေရှုပ်ထွေးစွာဖြင့် ပြောလိုက်သည်။

“ငါမသေချာဘူး… ဒီအနှိုင်းမဲ့နတ်ဘုရားစွမ်းအားရဲ့ ရှေ့ပြေးနိမိတ်နဲ့အော်ရာက ငါသိထားတဲ့ အနှိုင်းမဲ့နတ်ဘုရားစွမ်းအားတွေနဲ့ မတူဘူး”

နောက်ဆုံးမှာတော့ ကပ်ဘေးတိမ်စိုင်များထဲကနေ မြင့်မားသော ပုံရိပ်တစ်ခုက တဖြည်းဖြည်းပေါ်ထွက်လာ၏။ သူသည် မိုးကြိုးလျှပ်စီးများ လွှမ်းခြုံထားပြီး သူ၏ ကြွက်သားများသည် သူ၏ ခန္ဓာကိုယ်ထဲမှာ မာကြောသော ကျောက်တုံးများကို ထည့်သွင်းထားသည့်အလား ဖုထစ်နေ၏။

ထိုသတ္တဝါသည် ပေတစ်ရာနီးပါးမြင့်ပြီး သူ့မှာ မည်သည့်မျက်နှာသွင်ပြင် သို့မဟုတ် မည်သည့်ရုပ်ရည်သွင်ပြင်မှ မရှိပေ။

ဤသည်မှာ ကောင်းကင်ဘုံကပ်ဘေး ကိုးခုထဲက ကိုးခု၏ စွမ်းအားကနေ စုဖွဲ့ထားသော သတ္တဝါတစ်ကောင်ဖြစ်လေသည်။

“ဘာဖြစ်နေတာလဲ”

ဆူဇီမိုက ရင်တစ်ချက်ထိတ်သွား၏။

သိုင်းတာအိုပင်မခန္ဓာသည် တစ်ခါက ထူးခြားအံ့မခန်း ဒသမကပ်ဘေးကို ဆွဲဆောင်မိခဲ့၏။

ဒသမကပ်ဘေးမှာသာ ဤကဲ့သို့ ကြောက်စရာကောင်းသော ပညာရှင်တစ်ဦးက ပေါ်ထွက်လာရပေလိမ့်မည်။

ယခု ကောင်းကင်ဘုံကပ်ဘေး ကိုးခုထဲက နောက်ဆုံးကပ်ဘေးများနှင့် ဤကဲ့သို့ ကြောက်စရာကောင်းသော သတ္တဝါတစ်ကောင်က ရုတ်တရက်ပေါ်ထွက်လာခဲ့လေပြီ။

ဆူဇီမိုသည် ပုရွက်ဆိတ်တစ်ကောင်လို အရေးမပါအရာမရောက်တော့သည့်အလား လေထဲမှာရှိသော မြင့်မားသည့် နတ်ဘုရားဆန်ဆန်သက်ရှိကို ရင်ဆိုင်နေရ၏။

လင်းကျန့်က မျက်မှောင်ကြုတ်ပြီး လေးနက်သောအသံဖြင့် ပြောလိုက်၏။

“ငါလည်း ဒီလိုမျိုး အနှိုင်းမဲ့နတ်ဘုရားစွမ်းအားတစ်ခုကို တစ်ခါမှမမြင်ဖူးဘူး… အဲဒီသတ္တဝါထဲမှာရှိတဲ့စွမ်းအားက အရမ်းကိုစွမ်းအားကြီးမားလွန်းတယ်”

သတ္တဝါက သူ၏ ခေါင်းကို အနည်းငယ်ငုံ့ပြီး သွင်ပြင်မရှိသော မျက်နှာဖြင့် ဆူဇီမိုကို မျက်နှာချင်းဆိုင်ကာ သူ့ရှေ့မှာရှိသော သေးငယ်သည့်လူသားကို ငုံ့ကြည့်နေသည့်အလားပင်။

ရုတ်တရက်ဆိုသလို…

မြင့်မားသော သတ္တဝါက သူ၏ လက်ညှိုးကို ဆန့်ထုတ်ပြီး ဆူဇီမို၏ ဦးခေါင်းပေါ်ကို ဖိချလိုက်၏။

ကြီးမားသော အရိပ်တစ်ခုက ဆူဇီမို၏ မြင်ကွင်းထဲမှာ ပေါ်ထွက်လာပြီး သူ၏ အမြင်အာရုံက မှောင်မည်းလာခဲ့၏။

လက်ညှိုးတစ်ချောင်းသည် မနှိုင်းယှဉ်သာအောင် ကြမ်းကြုတ်ခက်ထန်၍ ပြင်းထန်ကြမ်းတမ်းသော အော်ရာကို ထုတ်ဖော်ထားလေသည်။ ၎င်းသည် သူ့ကို သွေးမြူတစ်ခုအဖြစ် ခြေမွှပစ်တော့မည့်အလားပင်။

ဆူဇီမို၏ အမူအရာက အေးစက်နေပြီး သူ၏ မျက်လုံးထဲရှိ တိုက်ပွဲဝင်စိတ်ဝိညာဉ်က နောက်တစ်ဖန်မြင့်တက်လာ၏။

အဲဒါက ပေတစ်ရာမြင့်မားသော သတ္တဝါတစ်ကောင်ဆိုတော့ရော ဘာဖြစ်လဲ။

သူသည် ပေတစ်ထောင် သို့မဟုတ် ပေတစ်သောင်းပင် မြင့်မားသော သက်ရှိများကိုလည်း သတ်ဖြတ်ခဲ့ဖူးလေသည်။

ဒါ့အပြင် ဤသတ္တဝါကို ကောင်းကင်ဘုံကပ်ဘေးကိုးခုထဲမှ နောက်ဆုံးကပ်ဘေးကနေ စုဖွဲ့ထားခြင်းသာဖြစ်ပြီး အဲဒါက အစစ်အမှန်သက်ရှိတစ်ဦး လုံးဝမဟုတ်ပေ။

“ဟမ်”

ဆူဇီမိုက သူ၏ ခန္ဓာကိုယ်ထဲရှိ စွမ်းအားကို စုစည်းပြီး လေထဲသို့ ခုန်တက်လိုက်၏။ သူက အာဒိကပ္ပသမဂ္ဂ မြင်းမြီးကျာပွတ်နှင့် သုံးပါးရတနာကျောက်စိမ်းတောင်ဝှေးတို့ကို မြင့်မားသောသတ္တဝါ၏ လက်ညှိုးထံ ဝှေ့ယမ်းလိုက်လေသည်။

ဘန်း…

ကျယ်လောင်သော မြည်သံက လေထဲမှာ ထွက်ပေါ်လာပြီး လက်ချောင်းက ရပ်တန့်သွား၏။

ထို့နောက် မြင့်မားသောသတ္တဝါက နာကျင်မှုကို ခံစားရကာ သူ၏ လက်က အနည်းငယ်တုန်ခါသွားပြီး ရုတ်တရက် နောက်သို့ပြန်ဆုတ်သွား၏။

“ဂါး…”

နက်ရှိုင်းသော ဟိန်းဟောက်သံက မြင့်မားသောသတ္တဝါ၏ ခန္ဓာကိုယ်ထဲကနေ ထွက်ပေါ်လာလေသည်။ ဆူဇီမို၏ တန်ပြန်တိုက်ခိုက်မှုက သူ့ကို ဒေါသူပုန်ထသွားစေသည့်အလားပင်။

ရုတ်တရက် မြင့်မားသောသတ္တဝါ၏ လက်တစ်ဖက်က ထူးဆန်းသော ဓမ္မပညာရပ်များကို စတင်ဆင့်ခေါ်လိုက်ပြီး သူ၏ လက်ချောင်းများက ယှက်ဖြာကာ အဆက်မပြတ်ပြောင်းလဲနေ၏။

အင်မော်တယ်ဘုရင်မ လင်းလုံ၏ မျက်လုံးက ဝင်းလက်သွားပြီး အလောတကြီးပြောလိုက်၏။

“အဲဒီဓမ္မပညာရပ်ကို သေသေချာချာကြည့်ထား”

လင်းလေနဲ့ လင်းလောတို့က ခပ်မြန်မြန်အာရုံစိုက်၍ ကြည့်လိုက်ကြ၏။

ဓမ္မပညာရပ်များ ဆက်တိုက်ထွက်ပေါ်လာပြီးနောက် မြင့်မားသောသတ္တဝါ၏ အော်ရာက ဆပွားမြင့်တက်လာခဲ့၏။

ရုတ်တရက် သူ၏ လည်ပင်းပေါ်မှာ အသစ်စက်စက် ဦးခေါင်းနှစ်လုံး ပေါ်ထွက်လာပြီး သူတို့ကို အသစ်စက်စက် လက်လေးဖက်က တွဲဖက်လာခဲ့လေသည်။

ထိုသည်ကို တွေ့မြင်သောအခါ လင်းလေက မှင်တက်သွားပြီး ရေရွတ်ပြောဆိုလိုက်၏။

“အဲဒါက ခေါင်းသုံးလုံး လက်ခြောက်ဖက်မလား… အဲဒါက အနှိုင်းမဲ့နတ်ဘုရားစွမ်းအားတစ်ခုပဲကိုး… အဲဒါက ဘာမှထူးခြားမနေဘူးလေ ဟုတ်တယ်မလား”

ထိုသို့သူပြောလိုက်သည့်ခဏမှာပင် မြင့်မားသော နတ်ဘုရားသက်ရှိ၏ ဦးခေါင်းသုံးလုံးဘေးမှာ နောက်ထပ်ဦးခေါင်းတစ်လုံးက ပေါ်ထွက်လာ၏။

တစ်ချိန်တည်းမှာပင် လက်ခြောက်ဖက်အပြင် နောက်ထပ်လက်နှစ်ဖက်က ထပ်မံ၍ပေါ်ထွက်လာ၏။

“ဒါက...”

လင်းလေက တုန်လှုပ်သွား၏။

“ခေါင်းလေးလုံး လက်ရှစ်ဖက်”

အင်မော်တယ်ဘုရင်မ လင်းလုံက အံ့အားတသင့် ရေရွတ်လိုက်၏။

လင်းကျန့်၏ မျက်လုံးထဲတွင် ဝေခွဲမရအကြည့်တစ်ခု ပေါ်ထွက်လာပြီး သူက ဘေးတစ်ဖက်ကိုကြည့်ကာ မေးလိုက်၏။

“ဒဏ္ဍာရီလာ အဆူရာမျိုးနွယ်ကပဲ ဧကရာဇ်နယ်ပယ်ကို တက်လှမ်းသည့်အခါ ခေါင်းသုံးလုံး လက်ခြောက်ဖက် ပင်ကိုနတ်ဘုရားစွမ်းအားကို ရရှိလာမယ်လို့ ငါကြားဖူးတယ်… ခေါင်းလေးလုံး လက်ရှစ်ဖက်ဆိုတာ ဘာလဲ”

လင်းကျန့်၏ အသိသညာနှင့်ပင်လျှင် သူသည် ခေါင်းလေးလုံး လက်ရှစ်ဖက်ကို တစ်ခါမှမကြားဖူးခဲ့ပေ။

အင်မော်တယ်ဘုရင်မ လင်းလုံက ရှင်းပြလိုက်သည်။

“ကျွန်မ အရင်တုန်းက မဟာဧကရီ မိုးကောင်းကင်ကိုးလွှာဆန်းကြယ်အပျိုစင်ရဲ့အမွေအနှစ်ကို လက်ခံရရှိတုန်းက အဲဒီအပျက်အစီးနယ်မြေမှာ ခေါင်းလေးလုံး လက်ရှစ်ဖက်ကို ထွင်းထုထားတဲ့ ရှေးဟောင်းပန်းချီကားတချို့ကို တွေ့မြင်ခဲ့တယ်”

“အဲဒီအနှိုင်းမဲ့နတ်ဘုရားစွမ်းအားက ပျောက်ဆုံးသွားခဲ့တာ နှစ်ပေါင်းများစွာကြာခဲ့ပြီ… အခုအဲဒါက ဒီဘက်မျိုးဆက်မှာ ဇီမို့ထံ ဆင်းသက်လာခဲ့ပြီဆိုတော့...”

လင်းလေ၏ မျက်လုံးထဲတွင် စိတ်ပျက်လက်ပျက်ဖြစ်သွားသော အကြည့်တစ်ခု ဖျတ်ခနဲပေါ်ထွက်လာ၏။

အစကတော့ သူသည် အင်မော်တယ်နှိမ်နင်းဓား၊ ပြန်ဝင်စားခြင်းလမ်းခြောက်သွယ်နှင့် ထာဝရညကဲ့သို့ အနှိုင်းမဲ့နတ်ဘုရားစွမ်းအားများကို နားလည်ဆင်ခြင်ကာ လေ့လာသင်ယူခွင့်ရဖို့ မျှော်လင့်စောင့်စားနေခဲ့၏။

သူ၏ အသိသညာအရ ခေါင်းလေးလုံးလက်ရှစ်ဖက်က အထင်ကြီးစရာ သိပ်ကောင်းမနေပေ။

လင်းလေက မကျေမနပ် ပြောလိုက်၏။

“အဲဒါက ခေါင်းသုံးလုံး လက်ခြောက်ဖက်ထက် နောက်ထပ်ခေါင်းတစ်လုံးနဲ့ လက်နှစ်ဖက်အပိုထွက်လာရုံပဲ… သူ့ရဲ့တိုက်ခိုက်ရည်ခွန်အားက သိပ်ပြီးများများစားစား တိုးလာမှာမဟုတ်ဘူး”

အင်မော်တယ်ဘုရင်မ လင်းလုံက သူမရဲ့ခေါင်းကို ခါပြလိုက်၏။

“ခေါင်းလေးလုံး လက်ရှစ်ဖက်က နောက်ထပ်ခေါင်းတစ်လုံး လက်နှစ်ဖက် အပိုရလာသလောက် မရိုးရှင်းဘူး”

ဂမ္ဘီရမိုးကောင်းကင် အင်မော်တယ်တွေ့ဆုံပွဲမှာတုန်းက ဆူဇီမိုသည် ယွင်ထင်ကို ပကတိအသာစီးရယူပြီး ဖိနှိမ်နိုင်ခဲ့သည်မှာ ခေါင်းသုံးလုံး လက်ခြောက်ဖက်ကြောင့်ဖြစ်သည်။

သူ့မှာ နောက်ထပ်ခေါင်းတစ်လုံးနဲ့ လက်နှစ်ဖက်ရှိလာမည်ဆိုလျှင် ဆူဇီမို၏ တိုက်ခိုက်ရည်ခွန်အားက ဆပွားမြင့်တက်လာပေလိမ့်မည်။

အင်မော်တယ်ဘုရင်မ လင်းလုံက ခဏမျှစဉ်းစားတွေးတောပြီး​ ပြောလိုက်၏။

“ဒီအနှိုင်းမဲ့နတ်ဘုရားစွမ်းအားက ပျောက်ဆုံးသွားခဲ့တာ နှစ်ပေါင်းများစွာကြာခဲ့ပြီ… အဲဒါက ဒီဘက်မျိုးဆက် ဇီမို့ထံ ဆင်းသက်လာခဲ့တယ်ဆိုတာ ပိုပြီးတော့ နက်ရှိုင်းတဲ့အဓိပ္ပါယ်တစ်ခု ရှိနေရမယ်”

“အဲဒါကို ငါအခုအချိန်ထိတော့ ကွဲကွဲပြားပြား ရှင်းမပြနိုင်သေးဘူး”

အင်မော်တယ်ဘုရင်မ လင်းလုံက ရှင်းမပြမနေဘဲ ဆက်လက်၍ စောင့်ကြည့်လိုက်၏။

လေထဲမှာ ခေါင်းလေးလုံး လက်ရှစ်ဖက်ကို စုဖွဲ့ထားသည့် မြင့်မားသော သတ္တဝါကို တွေ့မြင်သောအခါ ဆူဇီမိုက မှင်တက်သွား၏။

မြင့်မားသောသတ္တဝါ၏ လက်ရှစ်ဖက်ထဲမှာ သူသည် လက်နှစ်ဖက်တွင် ကောင်းကင်ဘုံကပ်ဘေးကနေ စုဖွဲ့ထားသည့် နေနှင့်လကို ကိုင်စွဲထား၏။ သူ၏ လက်တစ်ဖက်မှာ ရတနာခေါင်းလောင်းတစ်လုံး၊ နောက်လက်တစ်ဖက်မှာ ရွှေရောင်ချိပ်စည်းတစ်ခု၊ နောက်လက်တစ်ဖက်မှာ လေးတစ်လက်နှင့် နောက်လက်တစ်ဖက်မှာ လှံပုဆိန်တို့ကို ကိုင်စွဲထား၏။

သူသည် ကျန်အားနေသော လက်နှစ်ဖက်နှင့် အင်မော်တယ်ဓမ္မချိပ်စည်းနှစ်ခုကို ကိုင်စွဲထားလေသည်။

မြင့်မားသောသတ္တဝါသည် သူ၏ လက်ရှစ်ဖက်ကို ဝှေ့ယမ်းပြီး ဆူဇီမိုထံသို့ ပြေးဝင်လာခဲ့၏။

ဆူဇီမိုက အကြောက်အလန့်မရှိပေ။

သူ၏ ခေါင်းသုံးလုံး လက်ခြောက်ဖက်၊ ကောင်းကင်ဘုံကိုးလွှာသက်ရှိမြေဆီလွှာ၊ အာဒိကပ္ပသမဂ္ဂ မြင်းမြီးကျာပွတ်၊ သုံးပါးရတနာကျောက်စိမ်းတောင်ဝှေးနှင့် အမြီးကိုးချောင်းနဂါးဖီးနစ်ယပ်တောင်တို့ကို ဝှေ့ယမ်းပြီး မြင့်မားသောသတ္တဝါနှင့် ဆန့်ကျင်တိုက်ခိုက်လိုက်၏။

အနီးကပ်တိုက်ခိုက်ရည်မှာ အစိမ်းရောင်ကြာပန်းအစစ်အမှန်ခန္ဓာ၏ သတ်ဖြတ်ခြင်းစွမ်းအားကို မည်သူကမှ မခုခံနိုင်ကြပေ။

သူသည် ခေါင်းသုံးလုံး လက်ခြောက်ဖက်အခြေအနေမှာ ရှိနေစဉ်က ယွင်ထင်ပင်လျှင် ဖိနှိမ်ခံခဲ့ရ၏။

ချွင်… ချွင်…

ဘုန်း… ဘုန်း… ဘုန်း…

ကြီးမားသော တိုက်ပွဲတစ်ခုက သူတို့နှစ်ယောက်ကြားမှာ ပေါ်ထွက်လာပြီး နတ်ဘုရားလက်နက်များနှင့် ဓမ္မရတနာများက အဆက်မပြတ်ထိတွေ့ရိုက်ခတ်နေ၏။ သူတို့သည် အနီးကပ်တိုက်ခိုက်ရည်မှာ တိုက်ခိုက်လိုက်ကြပြီး ပြင်းထန်ကြမ်းတမ်းသော လေခွင်းသံများ ထွက်ပေါ်ကာ သဲများက လွင့်ပျံထွက်နေ၏။ လောကကပင် တုန်ခါသွားလေသည်။

သူတို့တိုက်ခိုက်ဖလှယ်လိုက်သည့်ခဏမှာပင် ဆူဇီမိုက တစ်စုံတစ်ရာလွဲမှားနေသည်ကို နားလည်သဘောပေါက်သွား၏။

မြင့်မားသောသတ္တဝါ၏ ခွန်အားက သူ့ထက် လုံးဝမနိမ့်ကျဘဲ သူ့အထက်မှာပင် ရှိနေ၏။

ဒါ့အပြင် မြင့်မားသောသတ္တဝါသည် အလွန်တရာပြောင်မြောက်သော အနီးကပ်တိုက်ခိုက်ရည် သတ်ဖြတ်ခြင်းနည်းစနစ်များကို ထုတ်ဖော်ပြသနေ၏။

ဆူဇီမို၏ တိုက်ခိုက်မှုများနှင့် ရင်ဆိုင်ရသည့်အချိန်မှာ သူက သက်တောင့်သက်သာရှိနေပြီး တန်ပြန်တိုက်ခိုက်နိုင်လေသည်။

တကယ်တော့ ဤမြင့်မားသောသတ္တဝါကို ကောင်းကင်ဘုံကပ်ဘေးကိုးခုကနေ စုဖွဲ့ထားခြင်းသာဖြစ်သည်။

သမိုင်းတစ်လျှောက်မှာ ပြိုင်စံရှားများနှင့် ပြန်ဝင်စားမွန်းစတားများစွာသည် ကောင်းကင်ဘုံကပ်ဘေးကိုးခုထဲက ကိုးခုနှင့် ဆန့်ကျင်တိုက်ခိုက်ခဲ့ရ၏။

ထိုပြန်ဝင်စားမွန်းစတားများနှင့် ပြိုင်စံရှားများ၏ အနီးကပ်တိုက်ခိုက်ရည် သတ်ဖြတ်ခြင်းနည်းစနစ်များကို ကောင်းကင်ဘုံကပ်ဘေးက စုပ်ယူထားခဲ့ပြီးသားဖြစ်သည်။ ယခု ထိုအနီးကပ်တိုက်ခိုက်ရည် သတ်ဖြတ်ခြင်းနည်းစနစ်များအားလုံးသည် ဤမြင့်မားသောသက်ရှိထံမှာ အကုန်စုစည်းရောက်ရှိနေလေသည်။