အဆင့် ၁၂ ဖန်တီးခြင်းကြာပဒုမ္မာ

လင်းကျန့်နှင့် အင်မော်တယ်ဘုရင်မ လင်းလုံပင်လျှင် တုန်လှုပ်သွားကြ၏။

တစ်ယောက်ယောက်က တစ်ဝက်တစ်ပျက်အနှိုင်းမဲ့နတ်ဘုရားစွမ်းအားတစ်ခုကို ထိန်းချုပ်နိုင်ပြီဆိုလျှင် သူသည် အစစ်အမှန် အနှိုင်းမဲ့နတ်ဘုရားစွမ်းအားတစ်ခုကို ကျွမ်းကျင်တတ်မြောက်လာဖို့ အခွင့်အရေး ရှိလေသည်။

သို့သော်ယခု ဆူဇီမိုသည် တစ်ဝက်တစ်ပျက်အနှိုင်းမဲ့နတ်ဘုရားစွမ်းအားသုံးခုကို တစ်ချိန်တည်းမှာ ထုတ်ဖော်လိုက်၏။

သူသည် နောက်ပိုင်းမှာ အနှိုင်းမဲ့နတ်ဘုရားစွမ်းအားသုံးခုကို ထိန်းချုပ်လာနိုင်သည်ဟု အဓိပ္ပာယ်ရနေသည်။

လူတစ်ယောက်သည် အနှိုင်းမဲ့နတ်ဘုရားစွမ်းအားတစ်ခုကို ထိန်းချုပ်နိုင်မည်ဆိုလျှင် သူတို့သည် ပကတိဧကနယ်ပယ်မှာ ပြိုင်ဘက်ကင်းလာပေလိမ့်မည်။

သူက အနှိုင်းမဲ့နတ်ဘုရားစွမ်းအားသုံးခုကို ထိန်းချုပ်နိုင်မည်ဆိုလျှင် ဘာဖြစ်လာမလဲ။

အင်မော်တယ်ဘုရင်မ လင်းလုံသည် ပိုမိုရှင်းလင်းပြတ်သားသော အနာဂတ်ကို တွေ့မြင်နိုင်လာ၏။

“အနှိုင်းမဲ့နတ်ဘုရားစွမ်းအား ခေါင်းလေးလုံး လက်ရှစ်ဖက်က ဒီဘက်မျိုးဆက်မှာ ဆူဇီမိုထံ ဘာကြောင့် ဆင်းသက်လာသလဲ ငါနောက်ဆုံးနားလည်သွားပြီ”

အင်မော်တယ်ဘုရင်မ လင်းလုံက ရုတ်တရက်ပြောလိုက်၏။

“ဘာလို့လဲ”

ဤတစ်ခေါက်မှာ လင်းလေနှင့် လင်းလောသာလျှင်မဟုတ်ဘဲ လင်းကျန့်ကပင် သိချင်စိတ်ဖြင့် လှည့်လာခဲ့၏။

အင်မော်တယ်ဘုရင်မ လင်းလုံသည် လေထဲမှာရှိသော ဆူဇီမိုပုံရိပ်ကို လက်ညှိုးထိုးပြပြီး လေးနက်သောအသံဖြင့် ပြောလိုက်၏။

“ဆူဇီမိုနဲ့ပတ်သက်ပြီး တကယ်တမ်း ကြောက်စရာကောင်းတဲ့အရာက အနှိုင်းမဲ့နတ်ဘုရားစွမ်းအားသုံးခုပဲ မဟုတ်ဘူး”

လင်းကျန့်သည် တစ်စုံတစ်ရာကို တွေးမိသွားဟန်ရပြီး နားလည်သဘောပေါက်လာခဲ့၏။ သူက ဆက်ပြောလိုက်သည်။

“သူက အနှိုင်းမဲ့နတ်ဘုရားစွမ်းအားသုံးခုကို တစ်ချိန်တည်းမှာ ထုတ်ဖော်နိုင်ဖို့ပဲ”

“အမှန်ပဲ”

အင်မော်တယ်ဘုရင်မ လင်းလုံက ခေါင်းညိတ်ပြလိုက်၏။

“အဲဒါ ဘာအဓိပ္ပာယ်လဲ”

လင်းလောက ငေးငိုင်နေပြီး လင်းကျန့်နှင့် အင်မော်တယ်ဘုရင်မ လင်းလုံအကြား အပြန်အလှန်ပြောဆိုစကားကို နားမလည်ပေ။

လင်းလေကလည်း ဝေခွဲမရဖြစ်နေ၏။

အင်မော်တယ်ဘုရင်မ လင်းလုံက ရှင်းပြလိုက်သည်။

“အနှိုင်းမဲ့နတ်ဘုရားစွမ်းအားတစ်ခုရဲ့ စွမ်းအားက အရမ်းကိုကြီးမားတယ်… အဲဒါကို ထုတ်ဖော်လိုက်တာနဲ့ အဲဒါက ကျင့်ကြံမှုနယ်ပယ်တူမှာ အကုန်လုံးကို ဖယ်ရှားရှင်းလင်းပြီး ပကတိအင်မော်တယ်တွေအားလုံးကို ဖိနှိမ်နိုင်တယ်”

“ရှေးဟောင်းခေတ်ကတည်းက အနှိုင်းမဲ့နတ်ဘုရားစွမ်းအားတစ်ခုကို နားလည်ဆင်ခြင်နိုင်တဲ့ ပကတိအင်မော်တယ်တွေက အရမ်းကိုရှားပါးတယ်… အနှိုင်းမဲ့နတ်ဘုရားစွမ်းအားနှစ်ခုကို နားလည်ဆင်ခြင်နိုင်တဲ့ ပကတိအင်မော်တယ်တွေကတော့ ပိုပြီးတော့တောင် ရှားပါးတယ်”

“အနှိုင်းမဲ့နတ်ဘုရားစွမ်းအားတွေကို ထုတ်ဖော်ဖို့ကတော့ အမြုတေစိတ်ဝိညာဉ်ရဲ့ စွမ်းအင်သုံးစွဲမှုက အရမ်းကို ကြီးမားလိမ့်မယ်… တစ်ယောက်ယောက်က အနှိုင်းမဲ့နတ်ဘုရားစွမ်းအားတစ်ခုကို နားလည်ဆင်ခြင်ထားမယ်ဆိုရင်တောင် သူတို့တွေက အချိန်တိုအတွင်းမှာ အဲဒါကို ဆက်တိုက်ထုတ်ဖော်နိုင်မှာ မဟုတ်ဘူး”

လင်းလေနှင့် လင်းလောက ခေါင်းညိတ်ပြလိုက်၏။

အနှိုင်းမဲ့နတ်ဘုရားစွမ်းအားများကို မပြောနှင့်၊ အန္တိမနတ်ဘုရားစွမ်းအားနှစ်ခုကို အချိန်တိုအတွင်းမှာ ထုတ်ဖော်ဖို့ပင်လျှင် အမြုတေစိတ်ဝိညာဉ်အပေါ် ကြီးမားသော ဝန်ထုပ်ဝန်ပိုးတစ်ခု ဖြစ်လာပေလိမ့်မည်။

လင်းလေကဲ့သို့ ထိပ်တန်းပကတိအင်မော်တယ်များသာလျှင် အန္တိမနတ်ဘုရားစွမ်းအားများကို ဆက်တိုက်ထုတ်ဖော်နိုင်ကြသည်။

အနှိုင်းမဲ့နတ်ဘုရားစွမ်းအားများကတော့ အမြုတေစိတ်ဝိညာဉ်၏ စွမ်းအင်သုံးစွဲမှုက ပို၍ပင် ကြောက်စရာကောင်းလေသည်။ သူက အနှိုင်းမဲ့နတ်ဘုရားစွမ်းအားနှစ်ခုကို ဆက်တိုက်ထုတ်ဖော်လိုက်မည်ဆိုလျှင် သူ၏ အမြုတေစိတ်ဝိညာဉ်က ချက်ချင်းပင် လဲပြိုကျသွားနိုင်သည်။

ထိုသို့အတွေးဖြင့် လင်းလေနှင့် လင်းလောက တုန်လှုပ်သွားပြီး လေထဲမှာရှိသော ပုံရိပ်ကို တစ်ချိန်တည်းမှာ ကြည့်လိုက်ကြ၏။

လင်းကျန့်နှင့် အင်မော်တယ်ဘုရင်မ လင်းလုံ ဆိုလိုသည့်အဓိပ္ပာယ်ကို သူတို့က နောက်ဆုံးမှာ နားလည်သဘောပေါက်လာကြ၏။

ခေါင်းသုံးလုံး လက်ခြောက်ဖက်၏ ကူညီမှုနှင့်အတူ ဆူဇီမိုသည် အနှိုင်းမဲ့နတ်ဘုရားစွမ်းအားသုံးခုကို တစ်ချိန်တည်းမှာ ထုတ်ဖော်ထားသည်။

ဤလုပ်ရပ်သည် အနှိုင်းမဲ့နတ်ဘုရားစွမ်းအားသုံးခုကို ဆက်တိုက်ထုတ်ဖော်ခြင်းထက် များစွာပို၍ ကြောက်စရာကောင်းလေသည်။

အနှိုင်းမဲ့နတ်ဘုရားစွမ်းအားများကို ဆက်တိုက်ထုတ်ဖော်သည့်အခါ ကြားထဲမှာ အကြားအလပ်တစ်ခု သေချာပေါက်ရှိလာပေလိမ့်မည်။

ခေါင်းသုံးလုံး လက်ခြောက်ဖက်နှင့်အတူ အနှိုင်းမဲ့နတ်ဘုရားစွမ်းအားသုံးခုကို သိပ်သည်းစုဖွဲ့ပြီး တစ်ချိန်တည်းမှာ ထုတ်ဖော်လိုက်၏။

ဤလုပ်ရပ်သည် အနှိုင်းမဲ့နတ်ဘုရားစွမ်းအားသုံးခု၏ စွမ်းအားကို ပေါင်းစည်းလိုက်ခြင်းနှင့် တူညီလေသည်။

အနှိုင်းမဲ့နတ်ဘုရားစွမ်းအားတစ်ခုကပင် ပကတိအင်မော်တယ်များအားလုံးကို ဖိနှိမ်ဖို့ လုံလောက်နေပြီဖြစ်၏။

အနှိုင်းမဲ့နတ်ဘုရားစွမ်းအားသုံးခုကို ထုတ်ဖော်သည့်အခါ ထိုစွမ်းအားက ဘယ်အဆင့်ထိ ရောက်ရှိသွားမလဲ။

လင်းလောက အသက်ပြင်းတစ်ချက်ရှိုက်ပြီး သူမကိုယ်သူမ ဣန္ဒြေဆည်ကာ မေးလိုက်၏။

“အမေ… အနှိုင်းမဲ့နတ်ဘုရားစွမ်းအား ခေါင်းလေးလုံး လက်ရှစ်ဖက်က ဒီဘက်မျိုးဆက်မှာ အစ်ကိုဆူထံ ဆင်းသက်လာတော့မယ်လို့ အမေ အခုပဲပြောတယ်… အဲဒါဆိုရင် နောက်ပိုင်းမှာ သူက အနှိုင်းမဲ့နတ်ဘုရားစွမ်းအား လေးခုကို…”

“အဲဒါတော့ ငါလည်းမသိဘူး”

အင်မော်တယ်ဘုရင်မ လင်းလုံက ခေါင်းခါပြလိုက်၏။

အနှိုင်းမဲ့နတ်ဘုရားစွမ်းအားတစ်ခုကို နားလည်ဆင်ခြင်နိုင်သော လူများက အနည်းအကျဉ်းသာ ရှိလေသည်။

အင်မော်တယ်ဘုရင်မ လင်းလုံသည် အနှိုင်းမဲ့နတ်ဘုရားစွမ်းအား သုံးခု သို့မဟုတ် လေးခုကို နားလည်ဆင်ခြင်နိုင်မည့် လူတစ်ယောက်အကြောင်းကို စဉ်းစားမကြည့်ရဲပေ။

လင်းကျန့်က စိတ်သက်သာစွာ သက်ပြင်းချလိုက်၏။

“တစ်ဝက်တစ်ပျက် အနှိုင်းမဲ့နတ်ဘုရားစွမ်းအားသုံးခုကို တစ်ချိန်တည်းမှာ ထုတ်ဖော်လိုက်သည့် စွမ်းအားက နောက်ထပ်အဆင့်တစ်ခုကို ရောက်လာခဲ့ပြီ။ သူက အနှိုင်းမဲ့နတ်ဘုရားစွမ်းအား ခေါင်းလေးလုံး လက်ရှစ်ဖက်ကို ခုခံဆန့်ကျင်နိုင်လောက်မယ်”

အင်မော်တယ်ဘုရင်မ လင်းလုံကလည်း ခေါင်းညိတ်လိုက်၏။

အမှားအယွင်းတစ်စုံတစ်ရာ မရှိခဲ့လျှင် ဆူဇီမိုသည် ကောင်းကင်ဘုံကပ်ဘေးကိုးခုထဲမှ ကိုးခု၏ နောက်ဆုံးကောင်းကင်ဘုံကပ်ဘေးမှာ ရှင်သန်နိုင်ပေတော့မည်။

လင်းလေက မေးလိုက်သည်။

“ဆူဇီမိုရဲ့ ပထမဆုံး တစ်ဝက်တစ်ပျက်အနှိုင်းမဲ့နတ်ဘုရားစွမ်းအားနှစ်ခုက အင်မော်တယ်နှိမ်နင်းဓားနဲ့ ဗုဒ္ဓနဂါးဆင်ပဲ… နောက်ဆုံးတစ်ခုက ဘာလဲ”

အင်မော်တယ်ဘုရင်မ လင်းလုံက သူမ၏ စိတ်ဝိညာဉ်အသိစိတ်ကို ထုတ်လွှတ်ပြီး အဲဒါကို အာရုံခံကြည့်လိုက်၏။ ခဏမျှ စဉ်းစားတွေးတောပြီးနောက် သူမက ပြောလိုက်၏။

“ဒါက လူတစ်ယောက်ရဲ့ ဘဝသက်တမ်းကို လျှော့ချပေးနိုင်တဲ့ နတ်ဘုရားစွမ်းအားတစ်ခု…. မကောင်းတော့ဘူး”

သူမစကား မဆုံးသေးခင်မှာပင် အင်မော်တယ်ဘုရင်မ လင်းလုံ၏ အမူအရာက ပြောင်းလဲသွား၏။

“ဘာများဖြစ်လို့လဲ”

လင်းလောက တုန်လှုပ်စွာဖြင့် မေးလိုက်၏။

အင်မော်တယ်ဘုရင်မ လင်းလုံက ပြောလိုက်လေသည်။

“ဒီမြင့်မားတဲ့ သက်ရှိကို ကောင်းကင်ဘုံကပ်ဘေးကနေ စုဖွဲ့ထားတာပဲ… သူ့မှာ အစစ်အမှန်အသွေးအသား၊ အစစ်အမှန်အမြုတေစိတ်ဝိညာဉ် ဒါမှမဟုတ် အစစ်အမှန်ဘဝသက်တမ်း မရှိဘူး”

“ဒီတစ်ဝက်တစ်ပျက် အနှိုင်းမဲ့နတ်ဘုရားစွမ်းအားက သူ့အပေါ်မှာ သက်ရောက်မှုရှိမှာ မဟုတ်လောက်ဘူး”

သူတို့လေးယောက်က ဆွေးနွေးပြောဆိုနေစဉ်မှာပင် အနှိုင်းမဲ့နတ်ဘုရားစွမ်းအားသုံးခုက ပေါက်ကွဲထွက်ပေါ်လာခဲ့ပြီဖြစ်ပြီး တစ်ချိန်တည်းမှာပင် မြင့်မားသောသက်ရှိအပေါ်ကို ဆင်းသက်ရောက်ရှိလာ၏။

အင်မော်တယ်နှိမ်နင်းဓားက လေဟာနယ်ကို ဆုတ်ဖြဲပြီး သွေးမြူအလင်းတန်းတစ်ခုက ကောင်းကင်ထက်ကနေ ဆင်းသက်ကာ နေနှင့်လကို ခြေမွှဖျက်ဆီးပြီး မြင့်မားသောသတ္တဝါကို ခေါင်းဖြတ်ချလိုက်၏။

ဗုဒ္ဓပုံရိပ်များက တစ်ချိန်တည်းမှာ တိုက်ခိုက်လာပြီး ကောင်းကင်ထက်ကနေ ဧရာမရွှေရောင်လက်ဖဝါးတစ်ဖက်က ဆင်းသက်ကာ မြင့်မားသောသတ္တဝါ၏ ဒုတိယမြောက်ဦးခေါင်းကို ခြေမွှဖျက်ဆီးလိုက်၏။

နတ်ဆင်များနှင့် နတ်နဂါးများက ရှေ့သို့ပြေးတက်သွားပြီး မြင့်မားသောသတ္တဝါ၏ နောက်ကျောကို အဆက်မပြတ် ပစ်တိုက်ချလိုက်၏။

တစ်ဝက်တစ်ပျက်အနှိုင်းမဲ့နတ်ဘုရားစွမ်းအားနှစ်ခုသည် မြင့်မားသောသတ္တဝါအပေါ် သိသာထင်ရှားသည့် ပျက်စီးထိခိုက်မှုများကို ဖြစ်စေလေသည်။

တတိယမြောက် တစ်ဝက်တစ်ပျက်အနှိုင်းမဲ့နတ်ဘုရားစွမ်းအား တဒင်္ဂအခိုက်အတန့်ကသာ မြင့်မားသောသတ္တဝါအပေါ် ဆင်းသက်ပြီးနောက် မည်သည့်ဝဲဂယက်မှ ဖြာမထွက်ဘဲ ပျောက်ကွယ်သွား၏။

“ဂါး... ဂါး...”

မြင့်မားသောသတ္တဝါက ဒဏ်ရာအပြင်းအထန်ရရှိသွားပြီး သူ၏ ခန္ဓာကိုယ်ထဲကနေ ဒေါသတကြီးဟိန်းဟောက်သံက ထွက်ပေါ်လာ၏။

တစ်ဝက်တစ်ပျက် အနှိုင်းမဲ့နတ်ဘုရားစွမ်းအားသုံးခုထဲမှ နှစ်ခုကသာလျှင် ပေါက်ကွဲထွက်ပေါ်လာ၏။ နောက်ဆုံးမှာ သူတို့သည် မြင့်မားသောသက်ရှိကို ချက်ချင်း မဖိနှိမ်နိုင်ပေ။

ယခု မြင့်မားသောသက်ရှိက ဆူဇီမိုထံသို့ နောက်တစ်ဖန် ပြေးဝင်လာခဲ့ပြီဖြစ်၏။

သူ၏ ဦးခေါင်းထက်မှာ အစက ကြေမွသွားသော ကပ်ဘေးတိမ်စိုင်များက နောက်တစ်ဖန် စုဖွဲ့လာတော့မည့် လက္ခဏာများ ပြသလာ၏။

ကောင်းကင်ဘုံကပ်ဘေး၏ အဆုံးမဲ့စီးကြောင်းတစ်ခုက မြင့်မားသောသတ္တဝါ၏ ခန္ဓာကိုယ်ထဲသို့ နောက်တစ်ဖန် တလိပ်လိပ်တိုးဝင်လာ၏။

သူ၏ ပြတ်တောက်သွားသော လည်ပင်းနှစ်ဖက်မှာ ဦးခေါင်းနှစ်လုံး၏ ကနဦးပုံစံက တဖြည်းဖြည်းပေါ်ထွက်လာ၏။

ခေါင်းလေးလုံး လက်ရှစ်ဖက် ပြန်လည်ပေါ်ထွက်လာသည်နှင့် မြင့်မားသော သက်ရှိ၏ တိုက်ခိုက်ရည်ခွန်အားက သူ၏ အထွတ်အထိပ်ကို ပြန်လည်ရောက်ရှိလာပေလိမ့်မည်။

တဒင်္ဂအခိုက်အတန့်က သက်ရောက်မှုမရှိသည်ကို တွေ့ရသောအခါ ဆူဇီမို၏ အကြည့်က တည်ငြိမ်နေပြီး သူက ဣန္ဒြေရနေ၏။

မြင့်မားသော သက်ရှိနှင့် စောစောက တိုက်ခိုက်ခဲ့သော သူ၏ အနီးကပ်တိုက်ခိုက်ရည်က လုံးလုံးလျားလျား အချည်းနှီးမဖြစ်ခဲ့ပေ။

သူတို့နှစ်ယောက် တိုက်ခိုက်နေစဉ် ကောင်းကင်ဘုံကပ်ဘေးကိုးခုထဲမှ ကိုးခု၏ ကြီးမားသော စွမ်းအားပမာဏက သူ၏ ခန္ဓာကိုယ်ထဲသို့ တိုးဝင်လာခဲ့ပြီး နောက်ဆုံးမှာ အစိမ်းရောင်ကြာပန်းအစစ်အမှန်ခန္ဓာကို သန့်စင်မွမ်းမံပေးလိုက်၏။

ဖျတ်ခနဲဆို ဆူဇီမိုက မြင့်မားသောသက်ရှိထံသို့ ပြေးဝင်သွားလေသည်။

တစ်ချိန်တည်းမှာပင် သူ၏ အော်ရာက လျင်မြန်စွာ မြင့်တက်လာနေ၏။

သူက မြင့်မားသောသက်ရှိနှင့် ထိတွေ့ရိုက်ခတ်မိသည့်အချိန်မှာ သူ၏ ခန္ဓာကိုယ်ထဲရှိ အော်ရာက အထွတ်အထိပ်ကို ရောက်ရှိလာခဲ့ပြီဖြစ်၏။

ထိုစဉ် သူသည် အဟန့်အတားတချို့ကို ချိုးဖျက်လိုက်သည့်အလား သူက ကောင်းကင်ထက်သို့ ခုန်တက်သွား၏။

ဘုန်း...

ကမ္ဘာတုန်လောက်သော ပေါက်ကွဲသံနှင့်အတူတွဲဖက်၍ ဘေးပတ်ဝန်းကျင်လေဟာနယ်က အဆက်မပြတ် တွန့်လိမ်သွားပြီး လောကက အနည်းငယ် တုန်ခါသွားလေသည်။

တောင်တန်းများက လဲပြိုကျသွားပြီး မြေပြင်က အက်ကွဲလာခဲ့၏။

လင်းကျန့်နှင့် အခြားသုံးယောက်၏ ခြေဖဝါးအောက်ရှိ တောင်ထွတ်ကပင်လျှင် စတင်၍ ပြိုကျသွားလေသည်။

သူတို့လေးယောက်က လေထဲမှာ မတ်တတ်ရပ်ပြီး တောင်ကြားအထက်ကောင်းကင်ကို မမှိတ်မသုန် စိုက်ကြည့်နေကြ၏။

သူတို့ရှေ့မှာ မနှိုင်းယှဉ်သာအောင် တုန်လှုပ်စရာကောင်းသည့် မြင်ကွင်းတစ်ခု ပေါ်ထွက်လာသည့်ပုံပင်။

လေထဲမှာ ဆူဇီမို၏ ပုံရိပ်က ပျောက်ကွယ်သွားခဲ့ပြီဖြစ်ပြီး သူ့နေရာမှာ မြင့်မားသော မြစိမ်းရောင်ကြာပင်တစ်ပင်က အစားထိုးဝင်ရောက်လာ၏။

မရေမတွက်နိုင်သော အမြစ်များက မြေပြင်မှာ ကုပ်ယူထားပြီး ကြာရိုးက ကောင်းကင်တစ်ခွင် ထိုးတက်ကာ အနည်းငယ် ယိမ်းနွဲ့နေ၏။

အပေါ်ဆုံးမှာရှိသော ကြာပွင့်က ကပ်ဘေးတိမ်စိုင်များကို ထိုးခွဲပြီး အလယ်မှာ တိတ်တဆိတ်ဖူးပွင့်လာ၏။

ကြာပွင့်ချပ်များက အဆက်မပြတ် ဖူးပွင့်လာပြီး အစိမ်းရောင်အလင်းရောင်ခြည် သန်းပေါင်းများစွာဖြင့် ပြည့်နှက်နေ၏။ သူတို့က မြူခိုးများကို ဖြိုခွဲပြီး ကပ်ဘေးတိမ်စိုင်များကို ဆုတ်ဖြဲပစ်လိုက်၏။

ပထမပွင့်ချပ်အလွှာ… ဒုတိယ… တတိယ…

ကြာပန်းပွင့်ချပ်အလွှာ ၁၁လွှာ ဖူးပွင့်လာပြီးနောက် ၁၂ခုမြောက် ပွင့်ချပ်အလွှာက ပေါ်ထွက်လာ၏။

အဆင့်-၁၂ ဖန်တီးခြင်းကြာပဒုမ္မာ…။

ဖန်တီးခြင်းကြာပဒုမ္မာကနေ ထုတ်ဖော်လိုက်သော စွမ်းအားသည် လောကနှင့် ချိတ်ဆက်ထားပြီး ၎င်း၏ အကန့်အသတ်ကို ရောက်ရှိသွားခဲ့ပြီဖြစ်၏။ ၎င်းက မြင့်မားသောသက်ရှိနှင့် ထိတွေ့ရိုက်ခတ်မိသည့်ခဏမှာပင် ထိုသတ္တဝါ၏ တတိယမြောက်ဦးခေါင်းက ကြေမွပျက်စီးသွားလေသည်။