ဥပဒေသချင်းအားပြိုင်မှု

ရွှီချင်း၏ အသံက လူသားနန်းမြို့တော်၏ ကောင်းကင်ပေါ်မှာ တုန်ခါသွားပြီး အသင်္ချေမျိုးနွယ်စုများထဲမှ အစွမ်းထက်ပုဂ္ဂိုလ်များ၏ အသိစိတ်ထဲသို့ ပဲ့တင်ထပ်သွားသည်။

ပညာရှင်ကျင့်ကြံသူတိုင်းက ဝိညာဉ်တုန်လှုပ်သွားကြသည်။

ဤတိုက်ပွဲက ရှေးခေတ်အင်မော်တယ် သယ်ဆောင်လာသော မဟာကပ်ဘေးဖြစ်သည်ဟုသာ အစက သူတို့ယုံကြည်ခဲ့ကြသည်။ သို့သော်လည်း ယခု ရွှီချင်းနှင့် ရှေးခေတ်အင်မော်တယ်ကြားမှ အပြန်အလှန်စကားကို ကြားပြီးနောက် ထိုသို့မဟုတ်ဟန် ရသည်။

ဤတိုက်ပွဲက အပေါ်ယံမြင်ရသည်ထက် အများကြီး ပိုမိုရှုပ်ထွေးနက်နဲသည်။ ဖြစ်နိုင်သည်မှာ ဤကိစ္စကို တစ်စုံတစ်ယောက်က နောက်ကွယ်မှ ကြိုးကိုင်နေခြင်း ဖြစ်နိုင်၏။

ဧကရီက နက်နဲစွာ တွေးတောလိုက်သည်။

သတ္တမသခင်ကြီးက ခေါင်းမော့လိုက်ပြီး ကြယ်တာရာစကြာဝဠာကို ကြည့်လိုက်သည်။ ထို့နောက် သူက ရှေးဦးအပျက်အစီး၏ မျက်နှာပျက်ကြီးကို ကြည့်လိုက်သည်။ သူ၏ မျက်နှာပေါ်မှာ နက်နဲစွာ တွေးတောသော အမူအရာ ထွက်ပေါ်လာသည်။

ကျိုးကျန်းလီနှင့် တခြားလူများသည်တော့ သူတို့က ဤခရီးတစ်လျှောက်မှာ သူတို့တွေ့ကြုံခဲ့သော အမည်မသိ ရန်သူများကို ပြန်အမှတ်ရသွားသောအခါ သူတို့၏ မျက်လုံးထဲမှာ စူးရှသော အလင်းရောင် ထွက်ပေါ်လာသည်။ သူတို့က နက်နဲစွာ တွေးတောလိုက်ကြသည်။

ရွှီချင်း၏ အံ့ဖွယ်ကောင်းသော တိုက်ပွဲစွမ်းအားကြောင့်သာ မဟုတ်လျှင် သူတို့က လမ်းခရီးတစ်ဝက်မှာတင် အမြစ်ဖြတ်သုတ်သင်ခံရလိမ့်မည်။

ထိုနားလည်သဘောပေါက်မှုက ဝမ်ကူးကုန်းမြေတစ်လျှောက် တောမီးသဖွယ် ပျံ့နှံ့သွားသည်။

ကောင်းကင်ထက်တွင် ရှေးခေတ်အင်မော်တယ်က တစ်ခဏကြာ နှုတ်ဆိတ်သွားပြီး ရွှီချင်းကို စုန်ချည်ဆန်ချည် အကဲခတ်ကြည့်လိုက်သည်။ ထို့နောက် သူက အက်ရှရှအသံဖြင့် ရုတ်တရက် ရယ်လိုက်သည်။

" အံ့ဩစရာပဲ "

“ ကြည့်ရတာ မင်းက ဒီအဖိုးကြီးအပေါ် စူးစမ်းလေ့လာခဲ့တဲ့ပုံပဲ ”

“ ဘာပဲဖြစ်ဖြစ်… အဲ့ဒီကိစ္စတွေက ငါ့ရဲ့ ထိန်းချုပ်နိုင်စွမ်းထက် ကျော်လွန်နေတယ်… ဒီနေ့ မင်းနဲ့ ငါ့ကြားမှာ တိုက်ပွဲပဲ ရှိမယ် ”

“ မင်းက ငါ့ရဲ့ ဥပဒေသကို မြင်ချင်နေမှတော့… ဒါဆိုလည်း ကောင်းပြီ… အဲ့ဒါကို မင်းကိုယ်တိုင် ကြည့်ပေတော့ ”

ထိုသို့ကြေညာပြီးနောက် ရှေးခေတ်အင်မော်တယ်က သူ၏ ညာလက်ကို မြှောက်လိုက်ပြီး သူ၏ နဖူးပေါ်သို့ အားပြင်းပြင်း ရိုက်ချလိုက်သည်။

ဗုန်း…

ကောင်းကင်ဘုံအမျက်ဒေါသကို သယ်ဆောင်ထားသော မိုးခြိမ်းသံက ကောင်းကင်တစ်ခွင် ပဲ့တင်ထပ်သွားသည်။

ရှေးခေတ်အင်မော်တယ်၏ ခန္ဓာကိုယ်က အပြင်းအထန် တုန်ယင်သွားသည်။ ဤသည်မှာ သူ၏ အသွင်သဏ္ဍာန်ကို ဖွဲ့စည်းထားသော မြူမှုန်အလွှာအထပ်ထပ်က တုန်လှုပ်သွားသည့်အလားပင်။

သူ၏ ညှိုးနွမ်းခြောက်သွေ့နေသော ဆံပင်က မူလအခြေအနေသို့ ပြန်ပြောင်းလဲသွားသည်။ သူ၏ မျက်နှာပေါ်မှ အက်ကွဲရာများက ပျောက်ကွယ်သွားပြီး အရေးအကြောင်းများအဖြစ် ပြန်ပြောင်းလဲသွားသည်။

သူ၏ ခန္ဓာကိုယ်ထဲမှ ညစ်ညမ်းနေသော အင်မော်တယ်အရိုးများက ရုတ်တရက် သလင်းကျောက်အလင်းရောင်ကို ထုတ်လွှတ်လိုက်သည်။

ပုန်းကွယ်နေသော မရီဒျန်သုံးသောင်းခြောက်ထောင်က တစ်ပြိုင်နက်တည်း ငွေရောင်ထွန်းလင်းလာကြသည်။ ယင်းတို့က သေဆုံးတော့မည့် ကြယ်ဂြိုလ်၏ နောက်ဆုံးပေါက်ကွဲမှုသဖွယ် ပိုပြီးတောက်ပသော အာဏာစက်မီးတောက်နှင့် ဥပဒေသမီးလျှံကို ထုတ်လွှတ်လိုက်ကြသည်။

ထိုမီးတောက်မီးလျှံများက သူ၏ ခန္ဓာကိုယ်ကို အပေါ်သို့ မြှောက်တင်ပေးလိုက်သည်။ သို့ဖြစ်၍ အရွယ်အစား အလွန်ကြီးမားသော အင်မော်တယ်ပုံရိပ်က မိုးကောင်းကင်ကို ဖုံးအုပ်သွားသည်။

ယင်းက အနန္တကြီးကျယ်ခမ်းနားမှုကို ဖော်ပြနေသော မြင်ကွင်းတစ်ခုပင်တည်း။

သူ၏ အရှိန်အဝါ၊ သူ၏ ကျင့်ကြံခြင်း၊ သူ၏ ဝိညာဉ်နှင့် အကြောင်းအကျိုးသည်ပင် ထိုလက်ဝါးရိုက်ချက်ကြောင့် အမြစ်ဖြတ်သုတ်သင်ခံရတော့မည့် အခြေအနေမှ မူလအခြေအနေသို့ ပြန်ရောက်သွားသည်။

ယင်းကို မြင်တွေ့သွားသောအခါ ရွှီချင်းက မျက်မှောင်ကြုတ်လိုက်သည်။

သူ၏ ကျင့်ကြံခြင်းအဆင့်ကြောင့် တစ်ဖက်လူ၏ ပြန်ကောင်းမွန်မှုက အခြေအနေပြောင်းပြန်လှန်ခြင်း သို့မဟုတ် ပုံမှန်ပြန်ကုသခြင်း မဟုတ်ကြောင်း ချက်ချင်း သူသိလိုက်သည်။

ယခင်က သူ၏ ဒဏ်ရာများတွင် တစ်ဝက်က အတုအယောင်ဖြစ်သော်လည်း တစ်ဝက်က အစစ်အမှန်ဖြစ်သည်။ သူ၏ အာဏာစက်မှတဆင့် ရွှီချင်းဖန်တီးခဲ့သော ဒိုင်မန်းရှင်းပုံရိပ်ပြန်မှုများက တစ်ဖက်လူ၏ အခြေခံအုတ်မြစ်ကို ထိခိုက်ပျက်စီးစေခဲ့သည်။

အင်မော်တယ်အရှင်သခင်တစ်ပါး၏ အစွမ်းမရှိလျှင် အချိန်ခဏလေးအတွင်းမှာ ထိုသို့ပြန်ကောင်းမွန်လာရန် မည်သို့မှ မဖြစ်နိုင်ပေ။

သို့တိုင် ရှေးခေတ်အင်မော်တယ်က ယင်းကို အောင်မြင်စွာ လုပ်ဆောင်နိုင်ခဲ့သည်။

“ အဲ့ဒါက ကုသတာ မဟုတ်သလို ဖယ်ရှားတာလည်း မဟုတ်ဘူး… ခင်ဗျားက ကိုယ့်ကိုယ်ကိုယ် အသစ်ပြန်ဖွဲ့စည်းလိုက်တာပဲ ”

“ အဲ့ဒါက ဗလာနတ္ထိကနေ ဖန်ဆင်းခြင်းပဲ… မဖြစ်နိုင်တာကို တကယ့်လက်တွေ့မှာ ဖြစ်လာစေတယ် ”

ရွှီချင်း၏ အသံက လေးနက်သည်။

“ ခင်ဗျားရဲ့ ဥပဒေသက… ”

သူက ရှေးခေတ်အင်မော်တယ်ကို စိုက်ကြည့်လိုက်သည်။

ရှေးခေတ်အင်မော်တယ်က အောင်နိုင်သူသဖွယ် လေထဲမှာ မတ်တတ်ရပ်နေပြီး ရွှီချင်းကို ငုံ့ကြည့်လိုက်သည်။

“ ငါ့ရဲ့ ဥပဒေသကို မင်းသိပြီလား ”

“ မသိသေးရင်… နောက်ထပ် ငါသရုပ်ပြပါရစေ ”

“ ကောင်းကင်ဘုံဖန်ဆင်းခြင်း ”

သူ၏ အသံက ကောင်းကင်ဘုံစွမ်းအားနှင့်တကွ ပဲ့တင်ထပ်သွားသည်နှင့် သူ၏ ခန္ဓာကိုယ်ပေါ်မှ အာဏာစက်မီးတောက်နှင့် ဥပဒေသမီးလျှံက အတုမဲ့သော ခမ်းနားထည်ဝါမှုကို ထုတ်လွှတ်လိုက်ကြသည်။ ထိုမီးတောက်မီးလျှံများကြောင့် ဘေးပတ်ဝန်းကျင်မှ ဟင်းလင်းပြင်က လောင်ကျွမ်းခံလိုက်ရသည်။

အက်ကွဲကြောင်းများက လောင်ကျွမ်းခံလိုက်ရသော ဟင်းလင်းပြင်ပေါ်မှာ ထွက်ပေါ်လာကြသည်။ ထို့နောက် အလွန်ရှေးကျသော ခရမ်းရောင်စွမ်းအားက ထိုအက်ကွဲကြောင်းများထဲမှ စိမ့်ထွက်လာသည်။

ထိုခရမ်းရောင်စွမ်းအားက ဖန်တီးမှုစွမ်းအင် ဖြစ်သည်။

နောက်အခိုက်အတန့်မှာ ခရမ်းရောင်ချည်မျှင်များက မြန်ဆန်စွာ ပေါင်းစည်းသွားကြပြီး မရေမတွက်နိုင်သော ပုံရိပ်များက ရှေးခေတ်အင်မော်တယ်၏ ဘေးပတ်ပတ်လည်မှာ ထွက်ပေါ်လာကြသည်။

တစ်သောင်း… တစ်သိန်း… တစ်သန်း…

ထို့နောက် ရေတွက်၍မရသည်အထိ တိုးပွားသွားသည်။

ပုံရိပ်တစ်ခုစီက ရှေးခေတ်အင်မော်တယ်နှင့် ဆင်တူကြသည်။

သူတို့က တိုက်ပွဲစွမ်းအားမရှိသော ဒြပ်မဲ့ပုံရိပ်တစ်ခုမျှသာ ဖြစ်သော်လည်း မည်သည့်တစ်ယောက်မဆို သူ့ကိုယ်စား ထိခိုက်ဒဏ်ရာခံယူပေးရန် မူလအစစ်အမှန်ဖြင့် ချက်ချင်း အစားထိုးနိုင်ပေသည်။

ထိုမြင်ကွင်းက ဝမ်ကူးကုန်းမြေကို တုန်လှုပ်သွားစေသည်။ အသင်္ချေမျိုးနွယ်စုများက ထိုသို့ကြောက်မက်ဖွယ်ကောင်းသော စွမ်းအားအောက်မှာ ထိတ်လန့်ချောက်ချားသွားကြသည်။

“ သေခြင်းရှင်ခြင်း… အဲ့ဒါကို ငါအမိန့်ပေးတယ် ”

သူက စကားဆုံးသည်နှင့် ညာခြေထောက်ကို မြှောက်လိုက်ပြီး ဖနောင့်ပေါက်လိုက်သည်။ ထိုအခါ သူ၏ ဘေးပတ်ဝန်းကျင်မှ ဟင်းလင်းပြင်က အက်ကွဲသွားသည်။ သို့တိုင် ငွေရောင်မှော်သင်္ကေတထောင်သောင်းချီက လေဟာနယ်အက်ကွဲကြောင်းများထဲမှ ထွက်ပေါ်လာကြသည်။

နောက်အခိုက်အတန့်မှာ မှော်သင်္ကေတများက သူ၏ ခြေဖဝါးအောက်တွင် “ အကြောင်းအကျိုးလှည်းဘီး ”တစ်ခုအဖြစ် စုဝေးသွားကြသည်။

လှည်းဘီး၏ မျက်နှာပြင်ပေါ်တွင် သူ၏ အင်မော်တယ်ဘဝတစ်လျှောက်မှ အဖြစ်အပျက်များကို မှတ်တမ်းတင်ထားသည်။

ယခု ထိုမှတ်ဉာဏ်များက ကြီးကျယ်မြင့်မြတ်သော စွမ်းအားနှင့်အတူ လောင်ကျွမ်းသွားပြီး ကြယ်အမှုန်အမွှားများအဖြစ် ပြောင်းလဲသွားသည်။

ယင်းတို့က သူ၏ အင်မော်တယ်အသွင်သဏ္ဍာန်ကို ပိုပြီးထွန်းလင်းတောက်ပသွားစေသည်။

“ အကြောင်းအကျိုး… အဲ့ဒါကို ငါအုပ်စိုးတယ် ”

သူလက်ဝှေ့ယမ်းလိုက်သည့်အခါ အကြောင်းအကျိုးချည်မျှင်များက ပြောင်းပြန်စီးဆင်းသွားကြသည်။ ယင်းက သူ၏ ခန္ဓာကိုယ်ထဲမှ ညစ်ညမ်းမှုများကို သန့်စင်သော အင်မော်တယ်စွမ်းအင်အဖြစ် ပြောင်းလဲလိုက်ပြီး သူ၏ ခန္ဓာကိုယ်ကို ထပ်လောင်း အားဖြည့်ပေးလိုက်သည်။

ဝမ်ကူးကုန်းမြေတစ်ခုလုံးက ပွက်ပွက်ဆူနေသော အသက်သွေးကြောတစ်ခုပမာ ပရမ်းပတာ တုန်လှုပ်သွားသည်။ အသက်ရှင်နေကြသေးသော ကောင်းကင်ဘုံတာအိုများက လေထဲမှာ ဒြပ်ထည်ဖွဲ့စည်းသွားကြပြီး ရှေးခေတ်အင်မော်တယ်ကို ဝပ်တွားအရိုအသေပေးလိုက်ကြသည်။

ရှေးခေတ်အင်မော်တယ်၏ အနောက်တွင် သူ၏ အာဏာစက်မှ ဖွဲ့စည်းသွားသော အပြိုင်စကြာဝဠာများက တဖန်ပြန်ပေါ်လာကြသည်။

ယခင်က ရွှီချင်းကြောင့် ဖရိုဖရဲဖြစ်သွားခဲ့သော လောကများက ယခု ၎င်းတို့ဘာသာ ပြန်ဖွဲ့စည်းသွားကြသည်။

စောစောက ပုပ်သိုးဆွေးမြေ့သွားခဲ့သော လောကသစ်ပင်က ယခု ဟင်းလင်းပြင်ထဲမှာ အမြစ်အသစ်များ ထွက်ပေါ်လာသည်။ သစ်ပင်၏ အမိုးက သူ၏ ဓမ္မရုပ်တုကို အပေါ်သို့ မြှောက်တင်ပေးလိုက်စဉ် သစ်ရွက်တစ်ရွက်စီက သူ့တာအို၏ မြင့်မြတ်ထည်ဝါသော တေးသံများကို ထုတ်လွှတ်လိုက်ကြသည်။

တခြားလောကများမှာလည်း ထိုအတိုင်းပင်။

ဝိညာဉ်ရေပူစမ်းများက ကောင်းကင်ဘုံမြစ်များအဖြစ် အသွင်ပြောင်းလဲသွားကြသည်။

ရွှမ်ရေခဲတုံးက ရွှေရောင်ဓားမိုးအဖြစ် ပြန့်ကျဲသွားသည်။

ဖရိုဖရဲကိစ္စအားလုံးက ပုံမှန်အတိုင်း ပြန်လည်ပတ်သွားကြသည်။ ယင်းက ရှေးခေတ်အင်မော်တယ်အား အထွတ်အမြတ်စွမ်းအားကို အပ်နှင်းပေးလိုက်သည်။

“ မင်းရဲ့ အပြိုင်စကြာဝဠာတွေကိုတောင်… ငါထိန်းချုပ်နိုင်တယ် ”

“ ကောင်းကင်ဘုံတာအိုတွေကိုတော့ ပြောနေစရာ လိုသေးလား ”

ရှေးခေတ်အင်မော်တယ်၏ အပိုင်းပိုင်း စုတ်ပြဲနေသော ဝတ်စုံက ယခု ထွန်းလင်းတောက်ပလာသည်။ ထို့ပြင် ကောင်းကင်ဘုံတာအိုများထက် ပိုပြီးရှေးကျသော အစီအရင်မျဉ်းကြောင်းများက သူ၏ ဝတ်စုံပေါ်မှာ ထွက်ပေါ်လာကြသည်။

ထို့နောက် သူက အထွတ်အထိပ် တိုက်ပွဲစွမ်းအားနှင့်တကွ ရွှီချင်းကို ငုံ့ကြည့်လိုက်သည်။

“ ဂျူနီယာလေး… ငါ့ရဲ့ အာဏာစက်က ‘ ရေတွက်၍မရခြင်း ’ကနဲ့ အစပြုခဲ့ပြီး ‘ အနန္တ ’အဖြစ် ဆင့်ကဲပြောင်းလဲသွားခဲ့တယ်… နောက်ဆုံးမှာ ‘ အနန္တ ’က ဥပဒေသကို မွေးဖွားပေးခဲ့တယ် ”

“ အဲ့ဒါက အရင်က တစ်ခါမှမရှိဖူးတဲ့ ဥပဒေသ ”

“ ငါကတော့ အဲ့ဒါကို… အနန္တတန်ခိုးလို့ ခေါ်တယ် ”

ယခု သူ၏ အသံက သေမျိုးများ၏ နားလည်နိုင်စွမ်းထက် ကျော်လွန်သွားပြီး အသင်္ချေမျိုးနွယ်စုများ၏ အသိစိတ်ထဲမှာ တိုက်ရိုက် ပေါက်ကွဲသွားသည်။

ထို့ကြောင့် အသင်္ချေမျိုးနွယ်စုများက သွေးအန်လိုက်ကြရပြီး ဒူးထောက်ကျသွားကြသည်။ သူတို့အားလုံးက ရှေးခေတ်အင်မော်တယ်၏ အင်မော်တယ်အသွင်သဏ္ဍာန်ကို ဝပ်တွားအရိုအသေပေးရန် အတင်းအဓမ္မ စေခိုင်းခံလိုက်ကြရသည်။

“ ငါ့မှာ သေခြင်းမရှိဘူး… ငါက မသေနိုင်ဘူး… ငါက မရေမတွက်နိုင်တဲ့ အာဏာစက်တွေကို ဖွဲ့စည်းနိုင်တယ်… ငါက အနန္တအခွင့်အာဏာတွေကို ဆုပ်ကိုင်ထားတယ်… တည်ရှိမှုမှန်သမျှကို ငါဖန်ဆင်းနိုင်တယ်… ဒီတော့ ကောင်လေး… မင်းငါ့ကို ဘယ်လိုတိုက်ခိုက်မလဲ ”

ရှေးခေတ်အင်မော်တယ်က ညာဖနောင့်တစ်ချက်ပေါက်လိုက်သည့်အခါ ကမ္ဘာဖျက်ကပ်ဘေးက သက်ရှိအားလုံးအပေါ်သို့ သက်ဆင်းသွားသည်။

တောင်တန်းများကို အမှုန့်ချေနိုင်ပြီး ပင်လယ်သမုဒ္ဒရာများကို ပွက်ပွက်ဆူစေနိုင်သော ဖိအားက ရွှီချင်းထံသို့ တန်းမတ်စွာ ဦးတည်သွားသည်။ ဤသည်မှာ ယင်းက သူ့ကို ဖုန်မှုန့်အဖြစ် ချေမွဖျက်ဆီးချင်နေသည့်အလားပင်။

ဤအခိုက်အတန့်မှာ ရွှီချင်းက လေပြင်းမုန်တိုင်းထဲမှ အထီးကျန်လှေငယ်လေးတစ်စင်းပမာ အောက်မေ့ရသည်။ သို့တိုင် သူ၏ အမူအရာက အေးဆေးတည်ငြိမ်သည်။ ကြီးမားသော ဖိအားကြောင့် သူ၏ အဝတ်အစားက တဖျပ်ဖျပ်လှုပ်ခတ်နေသော်လည်း သူ၏ ခန္ဓာကိုယ်က မြဲမြံနေဆဲပင်။

ဤသည်မှာ မည်သည့်အရာကမှ သူ့အား တုန်လှုပ်သွားစေရန် ဖိအားမပေးနိုင်သည့်အလားပင်။

မုန်တိုင်းကြားထဲမှာ သူက ရှေးခေတ်အင်မော်တယ်ကို စူးစမ်းလေ့လာလိုက်သည်။

နွေဦးအင်မော်တယ်တစ်ပါးဖြစ်လာပြီးနောက် ရွှီချင်းသည် ဆရာသခင်ပိုင်နှင့် သူ၏ အိမ်အပြန်ခရီးမှ တိုက်ပွဲများကြောင့် အင်မော်တယ်တိုက်ပွဲစွမ်းအားကို ကောင်းမွန်စွာ နားလည်သွားခဲ့သည်။

အင်မော်တယ်များကြားမှ သေခြင်းရှင်ခြင်းတိုက်ပွဲများက အမြဲတမ်း ထိုအတိုင်းဖြစ်ကြောင်း သူသိသည်။

ယင်းက အာဏာစက်ချင်းအားပြိုင်မှု ဖြစ်သည်။

ထိုသို့တိုက်ပွဲများက ပုံစံအမျိုးမျိုးရှိနိုင်သော်လည်း အဓိကအနေဖြင့် အပိုင်းနှစ်ပိုင်းသာ ခွဲခြားနိုင်သည်။

ယင်းတို့က အတတ်ပညာနှင့် တာအိုဖြစ်သည်။

အတတ်ပညာသည် အာဏာစက်ကို အပြင်သို့ ထုတ်လွှတ်နိုင်စေမည့် ကြားခံနယ် ဖြစ်သည်။

တာအိုသည် ဥပဒေသများ၏ အတွင်းပိုင်း ထိပ်တိုက်တွေ့ဆုံမှုဖြစ်ပြီး အမြစ်ဖြတ်သုတ်သင်ခြင်းနည်းလမ်း၏ အခြေခံအုတ်မြစ် ဖြစ်သည်။

အနှစ်ချုပ်ဆိုရသော် ဥပဒေသချင်း ထိပ်တိုက်တွေ့ဆုံမှုက ရန်သူ၏ အခြေခံနိယာမအပေါ် ပစ်မှတ်ထားခြင်း ဖြစ်သည်။ ယင်းက ရန်သူ၏ အခြေခံအုတ်မြစ်ကို အတွင်းဘက်မှ ပြိုကွဲပျက်စီးသွားစေရန် ရည်ရွယ်သည်။

သို့ဖြစ်၍ အင်မော်တယ်များကြားမှ သေခြင်းရှင်ခြင်းတိုက်ပွဲများသည် များသောအားဖြင့် စက္ကန့်ပိုင်းလေးအတွင်းမှာ အဆုံးသတ်သွားလေ့ ရှိသည်။

သို့သော်လည်း ထိုသို့လုပ်ဆောင်နိုင်ရန် တစ်စုံတစ်ယောက်က သူ့ရန်သူ၏ ဥပဒေသကို ကောင်းမွန်စွာ နားလည်သဘောပေါက်ထားရလိမ့်မည်။

ထို့ပြင် ယခု ရွှီချင်းက ရှေးခေတ်အင်မော်တယ်၏ ဥပဒေသကို နားလည်သွားသည်။

" အနန္တတန်ခိုးလား ”

ရွှီချင်းက ဖြည်းညင်းစွာ ခေါင်းခါလိုက်သည်။

“ ခင်ဗျားရဲ့ အမှန်တရားကို ကျွန်တော်နားလည်ပြီးပြီ ”

“ ခင်ဗျားရဲ့ အာဏာစက်က ‘ အနန္တ ’မဟုတ်ဘူး… အကြောင်းအကျိုးပဲ… ခင်ဗျားရဲ့ ဥပဒေသက ‘ အနန္တတန်ခိုး ’ မဟုတ်ဘူး… အဲ့ဒါက ‘ ကိုယ်တိုင် အကြောင်းအကျိုး ’ပဲ ဖြစ်တယ် ”

“ အဲ့လိုအာဏာစက်က တကယ်ပဲ ရှားပါးတယ်… ”

“ အကြောင်းအကျိုးကို ကိုယ်တိုင်စဉ်းစားနိုင်အောင်လို့ ခင်ဗျားက ကိစ္စတိုင်းမှာ အကြောင်းအကျိုးရှိလာအောင် ဆောင်ရွက်ဖို့ လိုလိမ့်မယ်… အဲ့ဒီနည်းနဲ့ ခင်ဗျားက ‘ အနန္တတန်ခိုး ’ဆိုတဲ့ အကျိုးသက်ရောက်မှုကို အဓိပ္ပာယ်ဖွင့်ဆိုခဲ့တယ် ”

“ အဲ့ဒီအကျိုးသက်ရောက်မှုကိုပဲ အသုံးပြုပြီး ‘ အနန္တတန်ခိုး ’ဆိုတဲ့ အကြောင်းတရားကို ပြန်ရှာဖွေခဲ့တယ် ”

ရှေးခေတ်အင်မော်တယ်၏ အောင်နိုင်သူ အမူအရာက အေးခဲသွားပြီး သူ၏ သူငယ်အိမ်များက အပြင်းအထန် ကျုံ့သွားကြသည်။

“ တကယ်တော့ ခင်ဗျားကို ကျွန်တော် တိုက်ရိုက် ဖိနှိပ်နိုင်တယ်… ဒါပေမဲ့ ခင်ဗျားထွက်ပြေးလို့မရအောင် အမြစ်ဖြတ်သုတ်သင်ဖို့အတွက်… ”

ရွှီချင်းက ကမ္ဘာဖျက်ဖိအားကို တွန်းလှန်လိုက်ပြီး သူ၏ ညာလက်ကို မြှောက်လိုက်ကာ ရှေးခေတ်အင်မော်တယ်ထံသို့ လက်ညှိုးညွှန်လိုက်သည်။ တစ်ချိန်တည်းမှာ အေးစက်စက်အလင်းက သူ၏ မျက်လုံးထဲမှာ ပေါ်လျှိုးလာသည်။

“ ခင်ဗျားရဲ့ အာဏာစက်ကို အမြစ်ကနေ ဆွဲလှန်ပြီး ခင်ဗျားရဲ့ တည်ရှိမှုကို ကျွန်တော် ဖယ်ရှားပစ်မယ်… ”

“ ခင်ဗျားရဲ့ အာဏာစက်ကို ဘယ်လိုဖျက်ဆီးမလဲဆိုတာကတော့… ရိုးရှင်းပါတယ် ”

သူ၏ စကားဆုံးသွားသည်နှင့် မီးအိမ်ခုနစ်လုံးက ရွှီချင်း၏ အရှေ့မှာ ဒြပ်ထည်ဖွဲ့စည်းသွားကြသည်။

ယင်းက ငရဲမီးအိမ်ခုနစ်ခုမီးလျှံကျိန်စာ ဖြစ်သည်။

ဝိညာဉ်စုစည်းခြင်းအဆင့်မှာ သူရှိနေခဲ့စဉ်က ထိုကျိန်စာအတတ်ပညာက သူ့အတွက် အတော်လေး အသုံးဝင်ခဲ့သည်။ ယင်းက ဝိညာဉ်မီးတောက်မှတဆင့် အသက်ဓာတ်ကို အဓိကပစ်မှတ်ထားသော ကျိန်စာအတတ်ပညာဖြစ်သည်။ ယင်းက ရန်သူကို တစ်ခါတည်း အသက်သေစေနိုင်သော လူသတ်ကွက်ဖြစ်ပြီး ပုံရိပ်ယောင်မီးအိမ်များကို ကြားခံနယ်အဖြစ် အသုံးပြုသည်။

ယင်း၏ အခြေခံသဘောတရားသည် မီးအိမ်များကို ငြိမ်းသတ်ခြင်းက ရန်သူ၏ အသက်ဝိညာဉ်ကို ငြိမ်းသတ်ခြင်း ဖြစ်သည်။

သို့သော်လည်း ယခု ရွှီချင်း၏ အာဏာစက်ဥပဒေသကြောင့် ငရဲမီးအိမ်ခုနစ်ခုမီးလျှံကျိန်စာ၏ အနှစ်သာရက ချက်ချင်း ပြန်လည်စီစစ်ခံလိုက်ရပြီး အသစ်ပြန်လည်ဖွဲ့စည်းခံလိုက်ရသည်။

သို့ဖြစ်၍ ကျိန်စာအတတ်၏ သေစေနိုင်သော စွမ်းအားက လုံးဝ ပြောင်းလဲသွားသည်။

“ ပုံရိပ်ယောင်တွေက လှောင်ချိုင့်တွေအဖြစ် ပြောင်းလဲသွားစေ… ”

“ မီးအိမ်ခုနစ်ခုက တစ်ခုတည်း ပေါင်းစည်းပြီး တိုက်ပွဲမြေပြင်နဲ့ အနီးဆုံးနေရာကို မြှောက်တတ်သွားစေ…”

“ ဝိညာဉ်မီးတောက်က မီးစာဖြစ်လာစေ… ”

“ မီးတောက်တွေက အင်မော်တယ်ဝိညာဉ်ကို ဆင့်ခေါ်ပြီး မီးထွန်းညှိဖို့ အသင့်ဖြစ်နေပါစေ… ”

“ အသက်ဓာတ်က မီးအိမ်ရဲ့ အုပ်ဆောင်းဖြစ်လာပြီး အရိပ်တွေကို ဒြပ်ထည်ဖွဲ့စည်းစေ… ”

ဤအခိုက်အတန့်မှာ ချောက်ချားဖွယ်ကောင်းသော အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။

မီးအိမ်အုပ်ဆောင်းက ဝိညာဉ်မီးတောက်၏ ဘေးပတ်ဝန်းကျင်မှာ ဒြပ်ထည်ဖွဲ့စည်းသွားသည်နှင့် မီးတောက်က တဟုန်းဟုန်း တောက်လောင်သွားပြီး ပုံရိပ်တစ်ခုကို ဖန်တီးလိုက်သည်။

ထိုပုံရိပ်က ရှေးခေတ်အင်မော်တယ်၏ ပုံရိပ်မှလွဲ၍ တခြားမဟုတ်ချေ။

ယင်းက ရုပ်သေးဇာတ်ပွဲနှင့် ဆင်တူသည်။

ပုံရိပ်က ရှေးခေတ်အင်မော်တယ်၏ အကြောင်းအကျိုးနှင့် တိုက်ရိုက် ချိတ်ဆက်သွားသည်။

“ ဇာတ်လမ်းရဲ့ အကြောင်းအရာကတော့… ”

ရွှီချင်း၏ အကြည့်က အဝေး၌ တုန်ယင်နေသော ရှေးခေတ်အင်မော်တယ်အပေါ်သို့ ကျရောက်သွားသည်။ သူက တည်ငြိမ်စွာ ပြောသည်။

“ ခင်ဗျားရဲ့ ဥပဒေသက အနန္တတန်ခိုးဖြစ်ပြီး အရာအားလုံးကို ဖန်ဆင်းနိုင်တဲ့ စွမ်းအားဖြစ်တယ်ဆိုတာ ဟုတ်ပါသလား ”

“ အခု ကျွန်တော်တို့ရဲ့ အကြောင်းအကျိုးတွေက ဒီအရိပ်ဇာတ်ပွဲကနေ အပြန်အလှန် ဆက်သွယ်သွားကြပြီ… ခင်ဗျားက ခင်ဗျားရဲ့ အကြောင်းအကျိုးကို အတွေးတစ်ချက်နဲ့ ဒီဇာတ်စင်ပေါ်မှာ သရုပ်ပြနိုင်လိမ့်မယ် ”

“ ကဲ ဒါဆိုရင်… အနန္တတန်ခိုးရှင်ကြီးခင်ဗျာ… ဒီဇာတ်စင်ပေါ်မှာ ခင်ဗျားမမနိုင်တဲ့ အရမ်းလေးတဲ့ ကျောက်တုံးတစ်တုံးကို ဖန်ဆင်းပြပေးပါလား ”

ရှေးခေတ်အင်မော်တယ်က ရွှီချင်းကို စူးစိုက်ကြည့်လိုက်သည့်အခါ သူ၏ မျက်နှာက ဖြူဖျော့သွားသည်။

ရွှီချင်းက အရှေ့သို့ ခြေတစ်လှမ်း တိုးလိုက်သည့်အခါ သူ၏ အကြည့်က စူးရှတောက်ပသွားသည်။

“ တကယ်လို့ ခင်ဗျားက အဲ့ဒီကျောက်တုံးကို တကယ်ပဲ ဖန်ဆင်းနိုင်တယ်ဆိုရင်… အဲ့ဒါဆိုရင် အနက်အဓိပ္ပာယ်အရ ခင်ဗျားက အနန္တတန်ခိုးရှင်မဟုတ်တော့ဘူး ”

မီးအိမ်ပေါ်မှ အရိပ်ဇာတ်ပွဲက ချက်ချင်း ပုံပျက်တွန့်လိမ်သွားပြီး အကြောင်းအကျိုးဝိရောဓိအမှတ်ကို ဖွဲ့စည်းသွားသည်။

ရှေးခေတ်အင်မော်တယ်က အနောက်သို့ ဒယိမ်းဒယိုင် ဆုတ်သွားသည်။

“ တကယ်လို့ ခင်ဗျားက အဲ့ဒီကျောက်တုံးကို မဖန်ဆင်းနိုင်ဘူးဆိုရင်… အဲ့ဒါက ခင်ဗျားမှာ အနန္တတန်ခိုးမရှိဘူးလို့ ဖော်ပြလိုက်တာနဲ့ အတူတူပဲ ”

ရွှီချင်း၏ စကားများထဲမှာ စကြာဝဠာဥပဒေသ၏ အလေးချိန်က ကိန်းအောင်းနေသည်။

သူက ရှေးခေတ်အင်မော်တယ်၏ အာဏာစက်ကို ထွင်းဖောက်မြင်နိုင်ခဲ့ပြီး ယင်းကို သူဖျက်ဆီးပစ်ရန် အခြေအနေတစ်ခုကိုသာ လိုအပ်သည်။ ယင်းက…

ဝိရောဓိ ဖြစ်သည်။

ရွှီချင်းက ငရဲမီးအိမ်ခုနစ်ခုမီးလျှံကျိန်စာ၏ အကြောင်းအကျိုးသဘာဝကို အဆင့်မြှင့်ခြင်းဖြင့် “ အနန္တတန်ခိုး ”၏ နိယာမကို ၎င်းဘာသာ အချည်းနှီးဖြစ်သွားစေမည့် အခြေအနေတစ်ရပ်ကို ဖန်တီးလိုက်ခြင်း ဖြစ်သည်။

တစ်နည်းဆိုရသော် သူက “ အသက်ဝိညာဉ်ကို ငြိမ်းသတ်ခြင်း ”အတတ်ပညာကို “ အကြောင်းအကျိုးသဘာဝကို ငြိမ်းသတ်ခြင်း ”အတတ်ပညာအဖြစ် ပြောင်းလဲပစ်လိုက်ခြင်း ဖြစ်သည်။

ယင်းက ကျိန်စာတစ်ခုမျှသာ မဟုတ်တော့ပေ။

ယခု ယင်းက အကြောင်းအကျိုးအရိပ်ဇာတ်ပွဲ ဖြစ်လာသည်။

အရိပ်က ပုံပျက်တွန့်လိမ်သွားသည်နှင့် ရှေးခေတ်အင်မော်တယ်က အပြင်းအထန် တုန်ယင်သွားသည်။ သူ၏ အာဏာစက်က ပျက်စီးသွားပြီး သူ၏ ဥပဒေသက ဖရိုဖရဲဖြစ်သွားသည်။

အာဏာစက်ချင်းအားပြိုင်မှု သို့မဟုတ် ဥပဒေသများ၏ ထိပ်တိုက်တွေ့ဆုံမှုသည် အင်မော်တယ်များအတွက် သေခြင်းရှင်ခြင်းတိုက်ပွဲ ဖြစ်သည်။

သူ့ဥပဒေသ၏ အတွင်းပိုင်းဖွဲ့စည်းပုံက ပရမ်းပတာဖြစ်သွားသည်နှင့် ရှေးခေတ်အင်မော်တယ်က အသံမဲ့စွာ ပါးစပ်ဖွင့်ဟလိုက်သည်။

ရွှီချင်းက ခေါင်းခါလိုက်ပြီး လက်ဝှေ့ယမ်းလိုက်သည်။

ဝိညာဉ်မီးတောက်…

ဖူး…

…ငြိမ်းသတ်သွားသည်။

ချက်ချင်းဆိုသလို ရှေးခေတ်အင်မော်တယ်က ပါးစပ်အပြည့် သွေးအန်လိုက်ရပြီး သူ၏ ခန္ဓာကိုယ်က မြန်ဆန်စွာ ညှိုးခြောက်သွားသည်။ သူ၏ အရှိန်အဝါ၊ သူ၏ ဝိညာဉ်၊ သူ၏ ကျင့်ကြံခြင်းနှင့် အင်မော်တယ်အသွင်သဏ္ဍာန်သည်ပင် စတင်ပြိုကွဲပျက်စီးသွားသည်။

သူ၏ အာဏာစက်က အက်ကွဲသွားသည်။

သူ၏ ဥပဒေသက ပြိုကွဲသွားသည်။