ရွှီချင်း၏ အသန်မာဆုံး အသွင်သဏ္ဍာန်

ဤအခိုက်အတန့်မှာ ဝမ်ကူးကုန်းမြေက ပရမ်းပတာ လှုပ်ခတ်သွားသည်။

ကောင်းကင်နှင့် မြေပြင်က အရောင်ပြောင်းလဲသွားသည်။

ဝမ်ကူးကုန်းမြေ၏ ကောင်းကင်ပေါ်မှာ ဖြတ်သန်းစီးဆင်းနေသော နတ်ဘုရားမြစ် ထွက်ပေါ်လာသည့်အခိုက် အကန့်အသတ်မဲ့သော နတ်ဘုရားစွမ်းအင်က နတ်ဘုရားမြစ်ထဲမှ ပေါ်လျှိုးလာသည်။ ယင်းက ဝမ်ကူးကုန်းမြေမှ သက်ရှိအားလုံး၏ အသိစိတ်ထဲမှာ ကျယ်လောင်သော မိုးခြိမ်းသံကို မြည်ဟိန်းသွားစေသည်။

ဤအခိုက်အတန့်မှာ သူတို့အားလုံးက အတွေးမှန်သမျှကို ထိန်းချုပ်မရစွာ ဆုံးရှုံးသွားကြသည်။ သူတို့၏ ခန္ဓာကိုယ်နှင့် စိတ်ဝိညာဉ်က အပြင်းအထန် တုန်ယင်နေစဉ် သူတို့၏ အသိစိတ်ထဲမှာ ဟာလာဟင်းလင်းသာလျှင် ကျန်ရှိတော့သည်။

နတ်ဘုရားများသည်ပင် ချွင်းချက်မဟုတ်ကြချေ။ ၎င်းတို့တစ်ယောက်ပြီးတစ်ယောက်က ဤအခိုက်အတန့်မှာ ခေါင်းငုံ့လိုက်ကြသည်။

ယင်းက ၎င်းတို့ထက် ပိုပြီးအဆင့်မြင့်သော အထွတ်အမြတ်တည်ရှိမှုထံမှ အကြွင်းမဲ့ဖိနှိပ်မှု ဖြစ်သည်။

ထို့ပြင် အဆုံးမဲ့သော ဒြပ်နှောများက အလွန်ကျယ်ပြောသော နတ်ဘုရားမြစ်ထဲမှ စိမ့်ထွက်နေပြီး ကောင်းကင်နှင့် မြေပြင်ကြားမှာ ဒြပ်ထည်ဖွဲ့စည်းသွားသည်။ ဤအခိုက်အတန့်မှာ ဒြပ်နှောများက ဝမ်ကူးကုန်းမြေ၏ နေရာအနှံ့သို့ ဖုံးလွှမ်းသွားတော့မည့်ဟန် ရသည်။

သို့သော်လည်း ယင်းက တဒင်္ဂမျှသာ ကြာမြင့်ခဲ့သည်။

အဘယ့်ကြောင့်ဆိုသော် ကောင်းကင်ပေါ်မှာ တည်ရှိနေသော ရှေးဦးအပျက်အစီး၏ မျက်နှာပျက်ကြီးက အနည်းငယ် လှုပ်ခါသွားသောကြောင့် ဖြစ်သည်။

သို့ဖြစ်၍ နောက်အခိုက်အတန့်မှာ သက်ရှိအားလုံးကို တုန်လှုပ်ချောက်ချားစေခဲ့သော ရွှေရောင်မြစ်ရေတစ်စက်မှ ဖွဲ့စည်းသွားသည့် နတ်ဘုရားမြစ်ထဲမှ ဧရာမရွှေရောင်မျက်လုံးက လုံးဝ တုံ့ဆိုင်းမနေဘဲ တိုက်ရိုက် မျက်လုံးမှိတ်လိုက်သည်။

မိခင်မြစ်က ၎င်း၏ အရှိန်အဝါ(၉၉)ရာခိုင်နှုန်းကို အမြန်ရုပ်သိမ်းလိုက်သည်။

၎င်းက နတ်ဘုရင်တစ်ပါးဖြစ်သည့်တိုင် ရှေးဦးအပျက်အစီး၏ အရှေ့မှာ ကိုယ့်ကိုယ်ကိုယ် မထုတ်ဖော်ဝံ့ချေ။

၎င်းက ဤနေရာသို့ အစစ်အမှန်အသွင်သဏ္ဍာန်ဖြင့် မဆင်းသက်ဝံ့ချေ။

၎င်းက ဝမ်ကူးကုန်းမြေဆီသို့ နတ်ဘုရားစိတ်အာရုံအမျှင်တန်းတစ်ခုထက်ပို၍ မပို့လွှတ်ဝံ့ချေ။

ဧရာမရွှေရောင်မျက်လုံးက မျက်လုံးမှိတ်သွားသည့်အခိုက် ထိုနတ်ဘုရားစိတ်အာရုံအမျှင်တန်းက ရွှေရောင်မြစ်ရေစက်ဖြင့် ပေါင်းစပ်သွားပြီး ပုံရိပ်တစ်ခုကို ဖွဲ့စည်းသွားသည်။

ထိုပုံရိပ်၏ တစ်ကိုယ်လုံးက အပြာရောင်ဖြစ်ပြီး အရွယ်အစား အလွန်ကြီးမားသည်။ ၎င်းထွက်ပေါ်လာသည့်အခိုက် ကြောက်မက်ဖွယ်ကောင်းသော ဖိအားက ၎င်းထံမှ အထိန်းအချုပ်မဲ့စွာ ပေါ်လျှိုးလာသည်။

ထိုဖိအားက နတ်ဘုရားမြစ်ထဲမှ ဧရာမရွှေရောင်မျက်လုံးကဲ့သို့ ကြောက်မက်ဖွယ်မကောင်းသော်လည်း အံ့ဖွယ်ကောင်းနေဆဲပင်။ ၎င်းက နတ်ဘုရားမျက်နှာပျက်ကြီး၏ စိတ်ဝင်စားမှုကို မဖမ်းစားနိုင်ရုံမျှသာ ဖြစ်သည်။

သို့တိုင် မိခင်မြစ်စေလွှတ်လိုက်သော ထိုပုံရိပ်က နတ်ဘုရားအရှင်သခင်တစ်ပါး ဖြစ်နေဆဲပင်။

၎င်းက ထွက်ပေါ်လာသည်နှင့်ချက်ချင်း လုံးဝ တုံ့ဆိုင်းမနေဘဲ အမြန်လက်သီးဆုပ်လိုက်ပြီး လူသားလောကဓားထံသို့ တိုက်ရိုက် ထိုးချလိုက်သည်။

ဗုန်း…

ထိုတွေ့ဆုံမှုကြောင့် ကောင်းကင်နှင့်မြေပြင်က ပရမ်းပတာ လှုပ်ခတ်သွားသည်။

လူသားလောကဓားက တုန်ယင်သွားသည်။ ဧရာမလက်သီးထံမှ လွှမ်းမိုးဖိနှိပ်သော အင်အားကြောင့် ဓားက အနောက်သို့ လွင့်စင်သွားရန် ဖိအားပေးခြင်းခံလိုက်ရသည်။

လက်သီးသည်တော့ ထိုတွေ့ဆုံမှုပြီးသွားပြီးနောက် အရှေ့သို့ ဆက်လက် တိုးဝင်သွားပြီး ပေါက်ကွဲသွားသည်။

ထိုပေါက်ကွဲမှုက အပြာရောင်သမုဒ္ဒရာတစ်စင်းကို ဖွဲ့စည်းလိုက်ပြီး အရပ်မျက်နှာအဘက်ဘက်သို့ ပျံ့နှံ့သွားစေသည်။ သမုဒ္ဒရာက အကန့်အသတ်မဲ့သော နတ်ဘုရားစွမ်းအင်ကို သယ်ဆောင်လျက် ဟင်းလင်းပြင်ကို ဖြတ်သန်းသွားသည်။ သမုဒ္ဒရာ ဖြတ်သန်းသွားသည့်နေရာတိုင်း ဟင်းလင်းပြင်က အက်ကွဲသွားပြီး အချိန်လေဟာနယ်က ပျက်စီးသွားသည်။

နောက်အခိုက်အတန့်မှာ သမုဒ္ဒရာက ရွှီချင်းကို ရပ်တန့်ရန် သူ့ထံသို့ ဦးတည်သွားသည်။

ထူးခြားသည်မှာ အကန့်အသတ်မဲ့ နတ်ဘုရားစွမ်းအင်မှ ဖွဲ့စည်းသွားသော သမုဒ္ဒရာက ရွှီချင်းကို လွှမ်းခြုံသွားသည်နှင့်တစ်ပြိုင်နက် မိခင်မြစ်စေလွှတ်လိုက်သော နတ်ဘုရားအရှင်သခင်က လူသားလောကဓားကို လျစ်လျူရှုလိုက်သလို ရွှီချင်းကိုလည်း နောက်ထပ် မတိုက်ခိုက်တော့ပေ။

ယင်းအစား ၎င်းက အနောက်သို့ ရုတ်တရက် ဆုတ်သွားပြီး အားနည်းနေသော ရှေးခေတ်အင်မော်တယ်ကို ဖမ်းဆုပ်လိုက်သည်။ ထို့နောက် ၎င်းက ကောင်းကင်ပေါ်သို့ တန်းမတ်စွာ ပျံသန်းသွားသည်။

၎င်း၏ အလျင်က အလွန်အံ့ဖွယ်ကောင်းပြီး ၎င်းက မျက်စိတစ်မှိတ်အတွင်းမှာ ကောင်းကင်ဘုံ၏ အစွန်းဆီသို့ ပျံသန်းသွားသည်။

၎င်း၏ တာဝန်က ဤစစ်တုရင်အရုပ်ကို မိခင်မြစ်ဆီသို့ ပြန်ခေါ်သွားရန် ဖြစ်သည်။

ထိုတာဝန်မှလွဲ၍ ၎င်းမှာ တခြားရည်ရွယ်ချက် မရှိပေ။

၎င်းက ဤနေရာမှာ အများကြီး မလုပ်ဆောင်ဝံ့သလို ဤနေရာမှာ အချိန်အကြာကြီးလည်း မနေဝံ့ချေ။

မည်သို့ကြောင့် မိခင်မြစ်က ၎င်းအား ဤတာဝန်ကို ပေးအပ်ခဲ့ကြောင်း နတ်ဘုရားအရှင်သခင် နားမလည်နိုင်ပေ။

မည်သို့ဖြစ်ပါစေ ဤစစ်တုရင်အရုပ်က တာဝန်ကျရှုံးသွားပြီး သူနှင့် ဝမ်ကူးကုန်းမြေကြားမှ ဆက်သွယ်မှုအားလုံးကို ဖြတ်တောက်ပစ်ခဲ့သည်။ သို့ဖြစ်၍ ဤစစ်တုရင်အရုပ်မှာ မည်သည့်တန်ဖိုးမှ မရှိတော့ပေ။ သို့တိုင် မိခင်မြစ်က ၎င်း၏ ပုံရိပ်ယောင်မြစ်နှင့် နတ်ဘုရားစိတ်အာရုံအမျှင်တန်းတစ်ခုကို စေလွှတ်၍ ၎င်းအား ဤစစ်တုရင်အရုပ်ကို ပြန်ခေါ်လာခိုင်းခဲ့သည်။

အကြောင်းအရင်းကိုတော့ ၎င်းမသိပေ။ သို့သော်လည်း မိခင်မြစ်၏ အမိန့်ကို ၎င်းနာခံရလိမ့်မည်။

အဘယ့်ကြောင့်ဆိုသော် မိခင်မြစ်၏ ဆန္ဒကို ၎င်းမလွန်ဆန်နိုင်ပေ။ ဤတာဝန်က အလွန်အန္တရာယ်များကြောင်း ၎င်းသိသည့်တိုင် မိခင်မြစ်၏ အမိန့်က ၎င်းဆန့်ကျင်နိုင်သောအရာ မဟုတ်ပေ။

“ ကံကောင်းစွာပဲ… မိခင်မြစ်က ငါ့ရဲ့ အသွင်သဏ္ဍာန် အပြည့်အစုံရဲ့ သုံးဆယ်ရာခိုင်နှုန်းကို ခွင့်ပြုပေးခဲ့တယ် ”

နတ်ဘုရားအရှင်သခင်က ရှေးခေတ်အင်မော်တယ်ကို သယ်ဆောင်လျက် ကောင်းကင်၏ အစွန်းဆီသို့ မြန်ဆန်စွာ ပျံသန်းသွားနေစဉ် ထိုအတွေးများက ၎င်း၏ နှလုံးသားထဲမှာ ထွက်ပေါ်လာသည်။

ထိုသို့ပျံသန်းနေစဉ်အတွင်း ၎င်းက ရှေးဦးအပျက်အစီး၏ မျက်နှာပျက်ကြီးကို တစ်ကြိမ် လှမ်းကြည့်လိုက်သည်။

ယင်းက အကြည့်တစ်ချက်သာဖြစ်သော်လည်း ၎င်း၏ နတ်ဘုရားဝိညာဉ်က ထိန်းချုပ်မရစွာ အပြင်းအထန် တုန်ယင်သွားသည်။

ထို့ကြောင့် ၎င်းက နောက်ထပ် အရှိန်မြှင့်တင်လိုက်ပြီး မိခင်မြစ်ထံမှ စွမ်းအားကို ချေးငှားလိုက်သည်။ နောက်အခိုက်အတန့်မှာ ၎င်းက ဝမ်ကူးကုန်းမြေ၏ ချိပ်တံဆိပ်ကို ချက်ချင်း ချိုးဖြတ်သွားပြီး ကောင်းကင်ဘုံအလွန်မှ ကြယ်တာရာကောင်းကင်ထဲသို့ ဝင်ရောက်သွားသည်။

ထို့နောက် ၎င်းက အဝေးသို့ ထွက်ပြေးသည်။

၎င်းက ဤကြောက်စရာကောင်းသော ဝမ်ကူးကုန်းမြေထဲမှာ တစ်စက္ကန့်ပင် ပိုမနေချင်ပေ။

၎င်းက ဤနေရာနားသို့ပင် မချဉ်းကပ်လာချင်ပေ။

“ ဝမ်ကူးကုန်းမြေရဲ့ နယ်နိမိတ်ကို ကျော်လွန်သွားတာနဲ့ မိခင်မြစ်က ငါ့ကို တိုက်ရိုက် လမ်းပြပေးလိမ့်မယ်… ”

ထိုအရာအားလုံးကို ဖော်ပြရန် အလွန်ကြာညောင်းသော်လည်း အမှန်မှာ ယင်းတို့က မျက်စိတစ်မှိတ်အတွင်း ဖြစ်ပျက်သွားခဲ့ခြင်း ဖြစ်သည်။

မိခင်မြစ်စေလွှတ်လိုက်သော နတ်ဘုရားအရှင်သခင်က ကြယ်တာရာကောင်းကင်ထဲသို့ ပျံသန်းသွားသည့်အခိုက် ဝမ်ကူးကုန်းမြေ၏ ကောင်းကင်ပေါ်မှ ရွှီချင်းက သူ၏ ဒိုင်မန်းရှင်းအာဏာစက်ဥပဒေသကို ထုတ်လွှတ်လိုက်သည်။ သူ၏ ဘေးပတ်ဝန်းကျင်မှ နတ်ဘုရားသမုဒ္ဒရာက ချက်ချင်း အပိုင်းပိုင်းအစစ ပြိုကွဲသွားပြီး ရေစက်များအဖြစ် အသွင်ပြောင်းလဲသွားသည်။ နောက်အခိုက်အတန့်မှာ ရေစက်များက မြူခိုးအဖြစ် အငွေ့ပျံသွားပြီး အရပ်မျက်နှာအသီးသီးသို့ လွင့်မျောသွားသည်။

ပါးလွှာသော မြူခိုးထဲ၌ ရွှီချင်းက လေထဲမှာ မတ်တတ်ရပ်နေလျက် ကြယ်တာရာကောင်းကင်ဆီသို့ ခေါင်းမော့လိုက်သည်။

ဤအခိုက်အတန့်မှာ သူ၏ အတွေးအားလုံးက ပြည့်စုံသွားသည်။

သူ၏ အိမ်အပြန်ခရီးမှာ သူက အမည်မသိရန်သူတစ်ယောက်ဖြင့် တွေ့ဆုံခဲ့သည်။ အကယ်၍ သူသာ အပြည့်အဝ မပြင်ဆင်ထားလျှင် ဝမ်ကူးကုန်းမြေဆီသို့ ဘေးကင်းလုံခြုံစွာ သူပြန်ရောက်ရန် အလွန်ခက်ခဲလိမ့်မည်။

ထိုတွေ့ဆုံမှုက ရွှီချင်း၏ နှလုံးသားထဲ၌ ကြီးမားသော သံသယတစ်ခုကို မွေးဖွားစေသည်။

အထူးသဖြင့် အိမ်အပြန်ခရီးမှာ သူတွေ့ဆုံခဲ့သော ရန်သူက ကိုယ့်ကိုယ်ကိုယ် အထူးဖုံးကွယ်ထားခဲ့သော်လည်း ရွှီချင်းအာရုံခံနိုင်သော သဲလွန်စတချို့က ကျန်ရစ်နေဆဲပင်။ သူ၏ အသိပညာကြောင့် ထိုသဲလွန်စများမှတဆင့် တစ်စုံတစ်ခုကို သူနားလည်သွားခဲ့သည်။

ထို့ကြောင့် သူက ဝမ်ကူးကုန်းမြေပေါ်သို့ ဆင်းသက်လာပြီးနောက် ရှေးခေတ်အင်မော်တယ်နှင့် သေစေနိုင်သော ဓမ္မတိုက်ပွဲကို မဆင်နွှဲဘဲ အာဏာစက်တာအိုတိုက်ပွဲကိုသာ ဆင်နွှဲခဲ့ခြင်း ဖြစ်သည်။

ထိုအတွက် သူ့မှာ ရည်ရွယ်ချက်နှစ်ချက် ရှိသည်။

ပထမရည်ရွယ်ချက်က သူ၏ ရန်သူကို အကန့်အသတ်ထိရောက်အောင် တွန်းအားပေးပြီး ဝမ်ကူးကုန်းမြေနှင့် သူ့ကြားမှ ကမ္မဆက်သွယ်မှုအားလုံးကို သူ့ဘာသာ ဖြတ်တောက်စေရန် ဖြစ်သည်။

ဒုတိယရည်ရွယ်ချက်က သူ့ရန်သူ၏ နောက်ကွယ်မှာ ပိုပြီးအစွမ်းကြီးမားသော တစ်စုံတစ်ယောက်ရှိမရှိ သူစူးစမ်းလေ့လာရန် ဖြစ်သည်။

ထိုသို့စူးစမ်းလေ့လာရသည့် အဓိကအကြောင်းအရင်းက အိမ်အပြန်ခရီးမှာ သူတွေ့ကြုံခဲ့သော အမည်မသိရန်သူကြောင့် ဖြစ်သည်။

ထိုအမည်မသိရန်သူက သူ့ကို သတ်ရန် ရည်ရွယ်ချက်ဖြင့် ရောက်ရှိလာကြောင်း ထင်ရှားသည်။ ၎င်းက အစီအစဉ်ကျရှုံးသွားပြီးနောက် သူ့ကို အချိန်ဆွဲရန်သာ အဓိကဆောင်ရွက်တော့သည်။

ထိုအချင်းအရာကို ကြည့်ခြင်းအားဖြင့် ဝမ်ကူးကုန်းမြေပေါ်သို့ ကျရောက်လာတော့မည့် အန္တရာယ်ကပ်ဘေးက ရှေးခေတ်အင်မော်တယ်၏ ဆင်းသက်လာမှုတစ်ခုတည်း မဖြစ်နိုင်ကြောင်း ရွှီချင်း သံသယဝင်မိသည်။

အကယ်၍ ရှေးခေတ်အင်မော်တယ်၏ နောက်ကွယ်မှာ အမှန်တကယ်ပဲ တခြားတစ်ယောက်ရှိနေမည်ဆိုလျှင် အကယ်၍ ထိုနောက်ကွယ်မှ လက်မည်းကြီး၏ သရုပ်ကို သူမဖော်ထုတ်နိုင်ဘူးဆိုလျှင် ဝမ်ကူးကုန်းမြေက အနာဂတ်မှာ ပိုပြီးကြီးမားသော အန္တရာယ်ဖြင့် ရင်ဆိုင်ရနိုင်ခြေ ရှိသည်။

သို့ဖြစ်၍ အစောနက အဖြစ်အပျက်များက ဆက်တိုက် ဖြစ်ပေါ်ခဲ့ခြင်း ဖြစ်သည်။

ရှေးခေတ်အင်မော်တယ်က ဝမ်ကူးကုန်းမြေနှင့် သူ့ကြားမှ ကမ္မဆက်သွယ်မှုအားလုံးကို ဖြတ်တောက်လိုက်ပြီး သူ၏ အင်မော်တယ်အဆင့်အတန်းကို ဆုံးရှုံးသွားသည့်အချိန်၊ သေခြင်းတရားဖြင့် သူတွေ့ဆုံရတော့မည့်အချိန် ရှေးခေတ်အင်မော်တယ်၏ အနောက်မှာ လှိုင်းတစ်ခုလှုပ်ခတ်နေကြောင်း နောက်ဆုံးမှာ ရွှီချင်း အာရုံခံမိသွားသည်။

ထို့ကြောင့် သူက တုံ့ဆိုင်းမနေဘဲ လူသားလောကဓားကို စေလွှတ်လိုက်ခြင်း ဖြစ်သည်။

သို့ဖြစ်၍ နောက်ဆုံးမှာ ရွှေရောင်မြစ်ရေတစ်စက်က ၎င်းဘာသာ ထွက်ပေါ်လာခဲ့သည်။

ထိုအတွေးများက ရွှီချင်း၏ အသိစိတ်ထဲမှာ ဖြတ်ပြေးသွားသည်နှင့် ပိုပြီးကြောက်စရာကောင်းသော အေးတိအေးစက်အလင်းက သူ၏ မျက်လုံးထဲမှာ ထွက်ပေါ်လာသည်။

“ ဒီတော့… မင်းကို ”

အစက သူ၏ သံသယရှိသော စာရင်းထဲမှာ အမှတ်ကိုးကြယ်တာရာစက်ဝန်းထဲမှ နတ်ဘုရင်များလည်း ပါဝင်ကြသည်။ သို့သော်လည်း မည်သည့်နတ်ဘုရင်ဖြစ်ကြောင်းကိုတော့ အသေးစိတ် သူမသိပေ။

ယခု သူက ဇစ်မြစ်ကို ရှင်းလင်းစွာ နားလည်သွားသည်။

“ မင်းစေလွှတ်လိုက်တာက နတ်ဘုရားအရှင်သခင်တစ်ပါးဆိုပေမဲ့ အဲ့ဒါက သူ့ရဲ့ ပုံရိပ်တစ်ခုပဲ ဖြစ်တယ်… ”

ရွှီချင်းက ကြယ်တာရာကောင်းကင်ပေါ်သို့ ခေါင်းမော့လိုက်သည်။ နောက်အခိုက်အတန့်မှာ သူ၏ ခန္ဓာကိုယ်က ဝှစ်ခနဲ ရွေ့လျားသွားပြီး ငွေရောင်သက်တံ့ရှည်အဖြစ် အသွင်ပြောင်းလဲသွားသည်။ သူက ကောင်းကင်ဘုံဆီသို့ တန်းမတ်စွာ ပျံသန်းသွားသည်။

သူ၏ အလျင်က အလွန်မြန်ဆန်ပြီး သူက စက္ကန့်ပိုင်းလေးအတွင်းမှာ ကောင်းကင်ဘုံ၏ အစွန်းဆီသို့ ရောက်ရှိသွားသည်။ ထိုနေရာသို့ သူရောက်ရှိသွားသည့်အခိုက် သူ၏ တည်ငြိမ်သော အသံက ဝမ်ကူးကုန်းမြေတစ်လျှောက် ပဲ့တင်ထပ်သွားသည်။

“ နတ်ဘုရားခန္ဓာကိုယ်… ပြန်ရောက်လာစမ်း ”

သူ၏ စကားသံက လောကကို တုန်လှုပ်သွားစေပြီး အရပ်မျက်နှာအသီးသီးသို့ ပဲ့တင်ထပ်သွားသည်။ ဤသည်မှာ မရေမတွက်နိုင်သော မိုးကြိုးသွားများက ဝမ်ကူးကုန်းမြေ၏ ကောင်းကင်ယံမှာ မရပ်မစဲ ပေါက်ကွဲသွားသည့်အလားပင်။

ဖုန်းဟိုင်ဒေသငယ်၏ မြေအောက်နန်းတော်ထဲမှ ဖီးနစ်နန်းဆောင်၏ အပြင်တွင်…

ပုံရိပ်တစ်ခုသည် တစ်ချိန်လုံး မျက်လုံးမှိတ်ထားလျက် တင်ပျဉ်ခွေထိုင်နေသည်။ ဤအခိုက်အတန့်မှာ ၎င်းက ရုတ်တရက် မျက်လုံးဖွင့်လိုက်သည်။

နတ်ဘုရားများသာ ပိုင်ဆိုင်သော ရွှေရောင်အလင်းက ၎င်း၏ ခန္ဓာကိုယ်ထဲမှ ထွန်းလင်းလာသည်။

၎င်းက ရွှီချင်း၏ နတ်ဘုရားခန္ဓာကိုယ် ဖြစ်သည်။

ထိတ်လန့်ဖွယ်ကောင်းသော နတ်ဘုရားစွမ်းအားက ကောင်းကင်ဘုံအထိ မြှောက်တတ်သွားသည်။ နောက်အခိုက်အတန့်မှာ နတ်ဘုရားခန္ဓာကိုယ်သည် မထူးမခြားနား အမူအရာဖြင့် ရုတ်တရက် မတ်တတ်ရပ်လိုက်ပြီး ထွန်းလင်းတောက်ပသော ရွှေရောင်သက်တံ့ရှည်အဖြစ် အသွင်ပြောင်းလဲသွားကာ ကောင်းကင်ဘုံဆီသို့ ပျံတတ်သွားသည်။

၎င်းက မြေအောက်နန်းတော်ကို ချိုးဖောက်သွားပြီး မြေကြီးထဲမှ တိုးထွက်လာသည်။ ၎င်းက ဖုန်းဟိုင်ဒေသငယ်မှ မရေမတွက်နိုင်သော ကျင့်ကြံသူများ၏ အံ့ဩသော အကြည့်အောက်မှာ ရွှေရောင်သက်တံ့အသွင်ဖြင့် ကောင်းကင်ဘုံဆီသို့ ပျံသန်းသွားသည်။

ရွှေရောင်သက်တံ့နှင့် ငွေရောင်သက်တံ့သည် မတူညီသော အရပ်ဒေသနှစ်ခုမှ မြှောက်တတ်သွားကြသည်။ နောက်ဆုံးမှာတော့ ဝမ်ကူးကုန်းမြေမှ အစွမ်းထက်ပုဂ္ဂိုလ်များ၏ အံ့ဩထိတ်လန့်သော အကြည့်အောက်မှာ သက်တံ့နှစ်စင်းက ကောင်းကင်ဘုံ၏ အစွန်းမှာ တွေ့ဆုံသွားကြသည်။

ပုံရိပ်နှစ်ခုက တုံ့ဆိုင်းမနေဘဲ ချက်ချင်း ပေါင်းစပ်လိုက်ကြသည်။

ရွှေရောင်သက်တံ့နှင့် ငွေရောင်သက်တံ့က ဤအခိုက်အတန့်မှာ အပြန်အလှန် ယှက်ထွေသွားကြသည်။

ရွှေရောင်ငွေရောင်အလင်းက ပင်လယ်ကြီးတစ်စင်းသဖွယ် ပြောင်းလဲသွားပြီး ကောင်းကင်ကို ဖုံးအုပ်သွားသည်။

ထိုပေါင်းစပ်မှုအတွင်းမှာ နတ်ဘုရားမီးပွားစတစ်စက ပေါ်လျှိုးလာသည်။

ယင်းက ကံကြမ္မာနတ်ဘုရားစွမ်းအင်အမြူတေ ဖြစ်သည်။

ကံကြမ္မာနတ်ဘုရားစွမ်းအင်အမြူတေ၏ အားဖြည့်ပေးမှုကြောင့် နတ်ဘုရားခန္ဓာကိုယ်က ယခင်ကထက် အဆပေါင်းများစွာ ပိုပြီးသန်မာလာသည်။

နောက်အခိုက်အတန့်မှာ အင်မော်တယ်နှင့် နတ်ဘုရားက တစ်သားတည်း ပေါင်းစပ်သွားကြသည်။

ထို့နောက် ဧရာမပုံရိပ်တစ်ခုက ကောင်းကင်ဘုံကို ထိုးဖောက်သွားပြီး ဝမ်ကူးကုန်းမြေ၏ အလွန်မှ ကြယ်တာရာကောင်းကင်ထဲမှာ ထွက်ပေါ်လာသည်။

သူက ပြိုင်ဘက်ကင်းပြီး တုနှိုင်းမဲ့သော အထွတ်အမြတ်ပုံရိပ်တစ်ခုအဖြစ် အသွင်သဏ္ဍာန်ပြောင်းသွားသည်။

သူ၏ ခန္ဓာကိုယ်က နတ်ဘုရားတစ်ပါး၏ ခန္ဓာကိုယ်ဖြစ်ပြီး ယင်းပေါ်မှာ မရေမတွက်နိုင်သော နတ်ဘုရားအခွင့်အာဏာများကို ရေးထွင်းထားသည်။ ထိုနတ်ဘုရားအခွင့်အာဏာအားလုံး အတူတကွ ယှက်ထွေပေါင်းစည်းသွားကြသော သူ၏ ရင်ဘက်ပေါ်မှ အမြူတေနေရာတွင် ကံကြမ္မာနတ်ဘုရားစွမ်းအင်အမြူတေက နစ်မြုပ်နေသည်။

နွေဦးအင်မော်တယ်တစ်ပါး၏ အရှိန်အဝါက သူ၏ ဝိညာဉ်ထဲမှ ထွက်ပေါ်နေပြီး သူ၏ ခန္ဓာကိုယ်တစ်ဝိုက်ကို ရစ်ပတ်လွှမ်းခြုံထားကာ အာဏာစက်ဥပဒေသ အစီအရင်မျဉ်းကြောင်းများကို ဖွဲ့စည်းနေသည်။ ထိုအစီအရင်မျဉ်းကြောင်းတစ်ခုစီမှာ အချိန်လေဟာနယ်၏ အနှစ်သာရ၊ အပြိုင်စကြာဝဠာများ၏ အနှစ်သာရနှင့် မူလတစ်ခုတည်းသို့ ပြန်ခြင်းဟူသော သဘောတရားက ကိန်းအောင်းနေကြသည်။

သူ၏ မျက်လုံးများသည်တော့…

သူ၏ ဘယ်ဘက်မျက်လုံးထဲတွင် ငွေရောင်အလင်းက မြစ်တစ်စင်းသဖွယ် စီးဆင်းနေစဉ် သူ၏ ညာဘက်မျက်လုံးက အကန့်အသတ်မဲ့သော ရွှေရောင်အလင်းကို ထုတ်လွှတ်နေသည်။

သူ၏ ခရမ်းရောင်ဆံပင်ရှည်သည်တော့ ဂလက်စီတစ်ခု ကိန်းအောင်းနေသော ကြယ်တာရာမြစ်တစ်စင်းနှင့် ဆင်တူသည်။

သူ့ထံမှ ကောင်းကင်ဘုံ တုန်လှုပ်သွားစေမည့် နတ်ဘုရားအရှင်သခင်တစ်ပါး၏ နတ်ဘုရားစွမ်းအားကို ထုတ်လွှတ်နေသည်။

တစ်ချိန်တည်းမှာ…

အချိန်လေဟာနယ်အနှစ်သာရဖြင့် ပြည့်နှက်နေသော အင်မော်တယ်အရှင်သခင်တစ်ပါး၏ ဖိအားသည်လည်း သူ့ထံမှ ထွက်ပေါ်နေသည်။

ကြယ်တာရာကောင်းကင်တစ်ခုလုံးကို လှုပ်ခါသွားစေမည့် အင်မော်တယ်နှင့် နတ်ဘုရား၏ ထိုပေါင်းစပ်မှုက အမှတ်ကိုးကြယ်တာရာစက်ဝန်းထဲမှ အထွတ်အမြတ်တည်ရှိမှုအားလုံး၏ စိတ်အာရုံကို ဆွဲဆောင်သွားသည်။

ယင်းက ရွှီချင်း တစ်ခါမှ အသုံးမပြုရသေးသော သူ၏ အသန်မာဆုံး အင်မော်တယ်နတ်ဘုရားအသွင်သဏ္ဍာန် ဖြစ်သည်။

“ မင်း… မလွတ်မြောက်နိုင်ဘူး ”

ကြယ်တာရာကောင်းကင်ထဲတွင် အင်မော်တယ်နတ်ဘုရားအသွင်သဏ္ဍာန်သို့ ပြောင်းလဲသွားသော ရွှီချင်းက ဖြည်းညင်းစွာ ခေါင်းလှည့်လိုက်သည်။ သူ၏ ရွှေရောင်ငွေရောင်မျက်လုံးတစ်စုံက အဝေးမှ အာကာသဟင်းလင်းပြင်ထဲတွင် အသည်းအသန် ထွက်ပြေးနေသော နတ်ဘုရားအရှင်သခင်ထံသို့ ကျရောက်သွားသည်။

သူက အရှေ့သို့ ခြေတစ်လှမ်း လှမ်းလိုက်ပြီး အနောက်မှ လိုက်ဖမ်းသည်။