အပိုင်း (၇၈၀)

ဘုန်း

နားကွဲလောက်စရာ အသံကြီး ထွက်ပေါ်လာခဲ့ပြီး ကောင်းကင်ယံတွင် တည်ရှိနေသည့် ကပ်ဘေးတိမ်များ အားလုံးက လွင့်စင်သွားခဲ့၏။ တည်နေရာတွင် တည်ရှိနေသည့် လျှိုချင်းဟုန်သည် ကောင်းကင်ဘုံ ကပ်ဘေးကြီး အလုံးစုံ ပျောက်ကွယ် သွားခဲ့သည် ဆိုလျှင်တောင်မှ အချိန်ကာလတစ်ခုအထိ တုံ့ပြန်နိုင်ခြင်း မရှိခဲ့ချေ။

သာမန်ထက်ပိုသည့် မြင်ကွင်းကို မြင်ရသည့်အချိန်မှာတော့ လူပေါင်းများစွာတို့သည် အံ့အားသင့်စွာဖြင့် ပါးစပ်အဟောင်းသား ဖြစ်လို့နေခဲ့၏။

“ဒီ.. ဒီနတ်ဘုရားသင်္ကေတတွေက ဘာတွေလဲ”

လွင့်မျောမြို့၏ အရှင်သည် လေထုထဲတွင် မတ်မတ်ရပ်လျက် ရှိနေပြီး အချိန်အတော်ကြာသည်အထိ ဆွံ့အလျက် ရှိနေ၏။ သူ ဘာပြောရမှန်းပင် မသိချေ။

မူလအားဖြင့် လျှိုချင်းဟုန်သည် ကျိန်းသေပေါက် ကျရှုံးတော့မည်ဟု သူ သိရှိ၏။ သို့ပေမဲ့ အရေးအကြောင်း အခြေအနေမျိုးတွင် နတ်ဘုရားသင်္ကေတများ ပေါ်ပေါက်လာခဲ့ပြီး ကပ်ဘေးအားလုံးကို ဖယ်ရှားသွားခဲ့၏။

လျှိုချင်းဟုန် အဆင့်တက်ရန် တားဆီးထားခဲ့သည့် နိယာမများ အားလုံးသည်လည်း ပျောက်ကွယ်သွားခဲ့ပြီ ဖြစ်၏။ တားဆီးပိတ်ပင်ထားသည့် အရာများ မရှိတော့သောကြောင့် လျှိုချင်းဟုန်၏ အဆင့်တက်မှု အခြေအနေသည် ပိုမိုကာ လွယ်ကူသွားခဲ့၏။ ၎င်း၏ မတည်ငြိမ်သည့် အော်ရာများသည် ပြန်လည်ကာ ကောင်းမွန်လာခဲ့ပြီး အင်မော်တယ်ဘုရင် အဆင့်ထက် သာလွန်သည့် အော်ရာများသည် ၎င်း၏ ခန္ဓာကိုယ်ကို ရစ်သိုင်းလာသည်။

ဆန်းကြယ်သည့် ရောင်စဉ်ရောင်ဝါများသည် ၎င်းကို လွှမ်းခြုံလျက် ရှိနေပြီး လေဟာနယ်ထဲတွင် မတ်မတ်ရပ်လျက် ရှိနေသည် ဆိုလျှင်တောင်မှ တကယ့်ကို ကြီးမားသည့် ဟိတ်ဟန်ကို ထုတ်ဖော်ပြသ နေ၏။ အသက်ရှူရှိုက်လိုက်သည်နှင့်တပြိုင်နက် လေဟာနယ် တစ်ခုလုံးက တုန်ယင်လျက် ရှိနေ၏။

“ကောင်းကင်လျှို့ဝှက်နန်းဆောင်သခင်က လှုပ်ရှားပေးခဲ့တာပဲ”

လျှိုချင်းကျီသည် ပျော်ရွှင်သွားမိ၏။ လျှိုချင်းဟုန် အဆင့်ချိုးဖြတ်နိုင်ရန် မည်သူက ကူညီမည်နည်း။ ကောင်းကင် လျှို့ဝှက်နန်းဆောင်သခင်မှလွဲ၍ တခြား မည်သူမှ မရှိနိုင်ချေ။

လျှိုချင်းဟုန်သည် ကောင်းကင်နှင့်မြေကြီး နိယာမများ၏ ဖိနှိပ်မှုကို ခံထားရ၏။ ပြောရမည်ဆိုလျှင် ဤကဲ့သို့သော အတားအဆီး အခြေအနေဆီမှ လွတ်မြောက်ကာဖြင့် ကွာစီအင်မော်တယ် အင်ပါယာ အဆင့်သို့ တက်လှမ်းနိုင်ဖို့ ဆိုသည်မှာ မည်သို့မှ မဖြစ်နိုင်ချေ။ သို့ပေမဲ့ ထိုအခြေအနေ တစ်ခုလုံးကို ကောင်းကင်လျှို့ဝှက်နန်းဆောင်သခင်က ဖယ်ရှားပေးခဲ့၏။ ကောင်းကင်လျှို့ဝှက်နန်းဆောင်သခင်သည် တကယ်ပဲ သူတို့ကို ကူညီခဲ့လေသည်လား။

အင်ပါယာပိုင်ယုနှင့် တခြားသူတို့၏ မျက်လုံးများကလည်း တောက်ပသွားခဲ့၏။ စီနီယာနန်းဆောင်သခင်သည် တကယ့်ကို ဆန်းကြယ်ပြီး ခန့်မှန်း၍ မရနိုင်ချေ။ ထို့ကြောင့် အားအင်အဆင့်ကလည်း တွက်ချက်သုံးသပ်၍ ရနိုင်သည့် လူမျိုး မဟုတ်ချေ။ အနည်းဆုံး ၎င်းသည် ကွာစီအင်မော်တယ် အင်ပါယာတစ်ယောက် ဖြစ်ရပေ လိမ့်မည်။ သို့ပေမဲ့ လက်ရှိ ကြည့်ရှုရမည်ဆိုလျှင် ကွာစီအင်မော်တယ် အင်ပါယာထက် ပိုမိုကာ သာလွန်သည့် အခြေအနေတွင် တည်ရှိနေသည့်ပုံပင်။

အဆိုးဆုံးအနေနှင့် ကောင်းကင်လျှို့ဝှက်နန်းဆောင်သခင်သည် အင်မော်တယ် အင်ပါယာတစ်ယောက် ဖြစ်ရပေလိမ့်မည်။ ငရဲလောက၏ အရှင်သည် တည်နေရာ တစ်ခုလုံးကို ဖြတ်သန်းကာ ရောက်ရှိလာမှုကို ငြိမ်ငြိမ်သက်သက်နှင့် စောင့်ဆိုင်းချင်သောကြောင့် ၎င်း၏ အားအင်အဆင့်ကို အပြည့်အဝ မထုတ်ဖော်သေး သည်လား။

ကောင်းကင်လျှို့ဝှက်နန်းဆောင်သခင်သည် တိုက်ရိုက် ဝင်ရောက်ပါဝင် လှုပ်ရှားရန်အတွက် နှောင့်နှေးနေ ခဲ့သည်ဆိုသော်လည်း အရေးအကြောင်း အခြေအနေမျိုးတွင် လျှိုချင်းဟုန် အဆင့်ချိုးဖြတ်နိုင်ရန်အတွက် ကူညီပေးခဲ့လေ၏။ ထို့ကြောင့် ၎င်းသည် အသင်္ချေ များပြားလှသည့် လောကအသီးသီးတို့ဘက်မှ ကူညီခဲ့ခြင်းဟု သုံးသပ်လို့ ရပေလိမ့်မည်။

ဌာနေအရှင်သည် ဂိတ်တံခါးကြီးအောက်တွင် ရပ်နေရင်း လျှိုချင်းဟုန်၏ အဆင့်ချိုးဖြတ်မှုကို ကြည့်ရှုနေသည်။ ဤမျှလွယ်ကူစွာဖြင့် ကပ်ဘေးကြီးကို ကျော်ဖြတ်နိုင်ခဲ့ခြင်းသည် ကောင်းကင်လျှို့ဝှက် နန်းဆောင်သခင် နောက်ကွယ်မှ ကူညီပေးခဲ့ခြင်းကြောင့် ဖြစ်ကြောင်း ချက်ချင်းသိရှိလိုက်သည်။ သူသည် လက်ရှိအချိန်၌ လျှိုချင်းဟုန်၏ အောင်မြင်မှုကို တားဆီးရန် မစွမ်းသာတော့ပေ။

လျှိုချင်းဟုန်သည် အတားအဆီးအားလုံးကို ကျော်ဖြတ်ကာ ကွာစီအင်မော်တယ် အင်ပါယာအဖြစ်သို့ အောင်မြင်စွာ တက်လှမ်းသွားနိုင်ခဲ့သည်။ ၎င်းသည် အချိန်ဖြန်းမနေချေ။ ချက်ချင်းဆိုသလိုပဲ ဌာနေအရှင်ကို တိုက်ခိုက်လိုက်၏။

တိုက်ပွဲတွင် လျှိုချင်းဟုန်သည် အသစ်ရရှိထားသော စွမ်းအားဖြင့် အပြတ်အသတ် အသာစီးရခဲ့သည်။ ဌာနေအရှင်သည် ခန္ဓာကိုယ်အစစ်အမှန်မရှိဘဲ လက်နက်တစ်ခု၏ စိတ်ဝိညာဉ်သာဖြစ်ကြောင်း ပေါ်လွင်သွားပြီး လျှိုချင်းဟုန်၏ ကြမ်းတမ်းသော တိုက်ခိုက်မှုများကြောင့် သူ၏ စိတ်ဝိညာဉ်မှာ အကြီးအကျယ် ပျက်စီးသွားခဲ့သည်။

ဤမြင်ကွင်းကို မြင်တွေ့ရသော လောကအသီးသီးမှ မဟာမိတ်များ၊ အထူးသဖြင့် လျှိုကလန်နှင့် အင်ပါယာပိုင်ယုတို့သည် အောင်ပွဲမှာ သေချာပြီဟု တွက်ဆကာ အလွန်အမင်း ပျော်ရွှင်နေကြ၏။

သို့သော်လည်း ထိုသို့အောင်ပွဲခံနေသည်ဆိုသော်လည်း လျှိုချင်းကျီနှင့် အချို့သောအကြီးအကဲများသည် စိတ်ထဲတွင် မကောင်းသော အငွေ့အသက်ကို ခံစားမိလိုက်ကြသည်။

လျှိုချင်းကျီသည် သူတို့အနေဖြင့် ကောင်းကင်လျှို့ဝှက်နန်းဆောင်သို့ အကြိမ်ကြိမ်သွားရောက်ခဲ့ဖူးပြီး နန်းဆောင်သခင်၏ ဟောကိန်းမှာ အမြဲတမ်း မှန်ကန်သည့်အရာဖြစ်ကြောင်း ထုတ်ဖော်ပြောကြားလိုက်၏။ "ငရဲလောကကြီး ရောက်ရှိလာတဲ့အချိန်မှာ လောကအသီးသီးတို့က စုစည်းခြင်းကို ခံရမယ်"

သူ ထိုစကားကို ထုတ်ဖော်ပြောကြားလိုက်ချိန်မှာတော့ အားလုံးသော သူတို့သည် တိတ်ဆိတ် ငြိမ်သက်သွားပြီး စိုးရိမ်မှုများကိ ခံစားလိုက်မိကြသည်။

အခြားသူများသည် နန်းဆောင်သခင်၏ ထိုဟောကိန်း မှားယွင်းပါစေရန် ဆုတောင်းမိလိုက်ကြသည်။ ထိုအတောအတွင်း မှာပဲ လျှိုချင်းဟုန်သည် သူ၏ အဆုံးအဖြတ် တိုက်ကွက်ဖြင့် ငရဲလောကနှင့် ဆက်သွယ်ထားသော ဧရာမဂိတ်တံခါးကြီးကို အောင်မြင်စွာ ဖျက်ဆီးလိုက်သည်။ အောင်ပွဲသည် လက်တစ်ကမ်း အလိုသို့ ရောက်ရှိသွားခဲ့၏။

သို့သော် ထိုအောင်မြင်မှု၏ အထွတ်အထိပ်အချိန်မှာပင် အရာအားလုံး ပြောင်းပြန်ဖြစ်သွားခဲ့သည်။ ဖျက်ဆီးခံလိုက်ရသော လေဟာနယ်ထဲမှ အမှန်တကယ် ကြောက်မက်ဖွယ်ကောင်းသော ငရဲလောက၏ အရှင်သခင်သည် လူသားပုံသဏ္ဍာန်ဖြင့် ထွက်ပေါ်လာခဲ့သည်။

၎င်း၏ အရှိန်အဝါတစ်ခုတည်းကပင် လောကအားလုံးကို ဖိနှိပ်ထားပြီး ၎င်းသည် ထွက်လာလာချင်းမှာပဲ လောက၏နိယာမများကို မိမိစိတ်ကြိုက် ပြန်လည်ရေးဆွဲရန် ကြိုးပမ်းနေသည်။ ဟောကိန်း၏ အဓိပ္ပာယ် အမှန်ကို အားလုံးက နားလည်သွားကြ၏။

လျှိုချင်းဟုန်သည် ဒေါသတကြီးဖြင့် သူ၏ စွမ်းအားအစစ်အမှန်များကို ထုတ်ဖော်ကာ ငရဲအရှင်ကို တိုက်ခိုက်ခဲ့သည်။

သို့သော် ငရဲအရှင်သည် လှုပ်ရှားခြင်းပင်မရှိဘဲ မျက်လုံးကိုဖွင့်ကြည့်လိုက်ရုံမျှဖြင့် လျှိုချင်းဟုန်၏ အစွမ်းထက်ပါသည်ဆိုသော လှံသည် အမှုန်အမွှားများအဖြစ် ကြေမွသွားပြီး လျှိုချင်ဟုန် ကိုယ်တိုင်လည်း ပြင်းထန်စွာ ဒဏ်ရာရရှိကာ သွေးများအန်ထွက်သွားခဲ့၏။

ဘာတွေဖြစ်သွားမှန်း မသိလိုက်ခင်မှာပင် သူသည် အရှေ့တွင်ရှိနေသော ငရဲလောကအရှင်ကြောင့် အလိုလို ဒဏ်ရာရရှိနေခဲ့သည်။ သူ၏ ကွာစီအင်မော်တယ် အင်ပါယာစွမ်းအားသည် အစစ်အမှန် ငရဲအရှင်၏ ရှေ့မှောက်တွင် လုံးဝ အရာမထင်ခဲ့ချေ။ လျှိုချင်းဟုန်သည် ဘာတစ်ခုမှ မပြုလုပ်နိုင်သေးခင်မှာပဲ ရှုံးနိမ့်သွားခဲ့သည်။

လျှိုချင်းဟုန်သည် ကွာစီအင်မော်တယ်အင်ပါယာအဆင့်သို့ တက်လှမ်းပြီးခါစ ဖြစ်သော်လည်း ဘာမှန်းပင် မသိသည့် တိုက်ခိုက်ချက်ကြောင့် ပြင်းထန်စွာ ဒဏ်ရာရရှိနေခဲ့သည်။ သူ၏ ခန္ဓာကိုယ်အတွင်းရှိ စွမ်းအင် နိယာမများနှင့်အတူ သူ၏ သက်တမ်းသည် တဖြည်းဖြည်း တိုက်စားခံနေရသည်။

ထိုအချိန်မှာ ငရဲလောကအရှင်၏ ပုံရိပ်ယောင်သဏ္ဍာန်တစ်ခုသည် သူ၏ရှေ့မှောက်၌ ပေါ်လာသည်။ ထိုပုံရိပ်ယောင်၏ ဖိအားသည် လောကတစ်ခုလုံးကို ဖိနှိပ်ထားပြီး ၎င်း၏ စကားတစ်ခွန်းသည် လောကများစွာကို ဖြစ်တည်စေနိုင်သလို၊ ပျက်စီးစေနိုင်စွမ်းလည်းရှိ၏။

ထိုသူသည် လျှိုချင်းဟုန်အား တင်းမာခက်ထန်စွာဖြင့် မေးမြန်းလိုက်သည် "အရှေ့မှာရှိတဲ့လမ်းစဉ်က ဖျက်ဆီးခံရပြီးပြီ။ မင်းဘယ်လိုလုပ်ပြီး ကွာစီအင်မော်တယ်အင်ပါယာ ဖြစ်လာရတာလဲ"

ဌာနေအရှင်သည် ဘေးတစ်ဖက်၌ ပေါ်ပေါက်လာသည်။ "အရှင်"

သူသည် လျှိုချင်းဟုန်၏ ဖိနှိပ်ခြင်းကို ခံခဲ့ရပြီး သူ၏ အရှင်သခင် ပြန်ရောက်လာသည်ကို မြင်ရချိန်မှာတော့ မျှော်လင့်ချက်ရောင်ခြည်များ သန်းလာခဲ့သည်။ သို့ပေမဲ့ ငရဲလောကအရှင်သည် ဌာနေအရှင်ကို အေးစက်စက် စိုက်ကြည့်ကာ ပြောလိုက်၏။ "မင်းက ငါ့ကို အများကြီး စိတ်ပျက်စေခဲ့တယ်"

သူ၏ အစီအစဉ်များကို အောင်မြင်အောင် မလုပ်နိုင်သည်သာမက တစ်ဖက်ခြမ်း၌ ကွာစီအင်မော်တယ် အင်ပါယာတစ်ဦးကိုပါ ပေါ်ပေါက်စေခဲ့သည်။ ထို့အတွက် သူသည် အပြစ်တင်လိုက်ခြင်းပင်။

ပြီးနောက် ဝိညာဉ်နှင့် နတ်ဆိုးတောအုပ်အရှင်အား တခါတည်း သတ်ဖြတ်ကာ ရှင်းပစ်လိုက်သည်။ ပြီးနောက် သူ၏ အာရုံကို လျှိုချင်းဟုန်ထံသို့ ပြန်လည် ပို့ဆောင်လိုက်သည်။

လျှိုချင်းဟုန်သည် ကောင်းကင်နှင့်မြေကြီးတစ်ခုလုံးက သူ့ကို ချုပ်နှောင်ထားသကဲ့သို့ပင် ခံစားနေရပြီး လုံးဝ မလှုပ်ရှားနိုင်ချေ။

ငရဲလောကအရှင်က အော်ငေါက်လိုက်သည် "အညံ့ခံစမ်း"

လျှိုချင်းဟုန်သည် ခပ်မာမာ ခွန်းတုံ့ပြန်လိုက်၏။ "မဖြစ်နိုင်ဘူး"

ကြောက်မက်ဖွယ်ဖိအားတစ်ခုသည် လျှိုချင်းဟုန်၏ ခန္ဓာကိုယ်ပေါ်သို့ ကျရောက်လာခဲ့ပြီး လျှိုချင်းဟုန် ၏ခြေထောက်များသည် သွေးမြူများအဖြစ်သို့ ပြောင်းလဲကာ ပျောက်ကွယ်သွားခဲ့သည်။

လျှိုချင်းဟုန်၏ အခြေအနေကို မြင်တွေ့ရချိန်မှာပဲ အင်ပါယာပိုင်ယုနှင့် အခြားအင်မော်တယ်ဘုရင်များသည် သူတို့၏ မျှော်လင့်ချက်ဖြစ်သူ လျှိုချင်းဟုန်ကို ကယ်တင်ရန် အတွက် အစွမ်းကုန် ဝင်ရောက် တိုက်ခိုက်ကြ၏။ သို့သော် ငရဲလောကအရှင်သည် ၎င်းတို့ကို အဖက်မလုပ်ဘဲ အေးစက်သော အကြည့်တစ်ချက်သာ ကြည့်လိုက်သည်။ ထိုအကြည့်သည် အစွမ်းထက်ဓားသွားများအဖြစ် ပြောင်းလဲကာ တိုက်ခိုက်လာသော အင်မော်တယ်ဘုရင်များစွာကို နေရာမှာပင် သုတ်သင်ရှင်းလင်းပစ်လိုက်သည်။ ၎င်းတို့၏ အစွမ်းထက် တိုက်ကွက်များသည် နေရောင်အောက်မှ ရေခဲမှုန်များကဲ့သို့ ချက်ချင်းပျော်ဝင်သွားခဲ့သည်။

လောကကြီးတစ်ခုလုံး သွေးများဖြင့် ပြည့်နှက်သွားပြီး အင်မော်တယ်ဘုရင်များစွာ၏ အလောင်းများသည် နေရာအနှံ့ ပြန့်ကျဲနေ၏။