ဂိုဏ်းချုပ်၏ အကြံအစည်

တက္ကသိုလ်ဂိုဏ်းချုပ်က ပြုံးပြလိုက်၏။

“အစကတော့ မဟာသူတော်စင်ကျောက်စိမ်းကျမ်းကို အရယူဖို့ ငါ့မှာ အခွင့်အရေးကောင်း မရှိခဲ့ဘူး… ဒါပေမဲ့ အထီးကျန်သိုင်းသခင် ပေါ်ထွက်လာတာက မိုးကောင်းကင်ကိုးလွှာတွေ့ဆုံပွဲမှာ အတော်လေး ကြီးကြီးမားမား ဂယက်ရိုက်သွားစေတယ်… တည်ဆောက်သူသစ်ပင်ကလည်း ရုတ်တရက် နိုးထလာတော့ အဲဒါက ငါ့အတွက် အခွင့်အလမ်းတစ်ခု ဖြစ်လာခဲ့တာပဲ”

ဆူဇီမိုက မိုးကောင်းကင်ကိုးလွှာတွေ့ဆုံပွဲ၏ အခြေအနေကို ပြန်လည်စဉ်းစားကြည့်လိုက်သည်။ ထိုစဉ်တုန်းက အခြေအနေသည် တကယ်ပင် ဖရိုဖရဲဖြစ်နေခဲ့ကြလေသည်။

မိုးကောင်းကင်ကိုးလွှာအင်မော်တယ်မဟာနယ်မြေနှင့် သုခဘုံသန့်စင်ကုန်းမြေမှ ကျင့်ကြံသူများနှင့် အင်မော်တယ်ဘုရင်ပညာရှင်များ အားလုံးနီးပါးသည် သိုင်းတာအိုပင်မခန္ဓာနဲ့ တည်ဆောက်သူသစ်ပင်အပေါ်ကိုသာ အာရုံရောက်ရှိနေခဲ့ကြ၏။ ထို့ကြောင့်ပင် တက္ကသိုလ်ဂိုဏ်းချုပ်သည် အခြေအနေပေါ် အခွင့်ကောင်းယူကာ အမြတ်ထုတ်နိုင်ခဲ့ခြင်း ဖြစ်လေသည်။

တက္ကသိုလ်ဂိုဏ်းချုပ်၏ အကြံအစည်သည် တကယ့်ကို ကြောက်စရာကောင်းလွန်း၏။ ယခု သူတော်စင်သုံးပါးကျောက်စိမ်းကျမ်းက သူ၏ လက်ထဲသို့ ကျရောက်သွားခဲ့ပြီ ဖြစ်လေသည်။

ပို၍အရေးကြီးသည်မှာ တက္ကသိုလ်ဂိုဏ်းချုပ်သည် သူ့ကိုယ်သူ ကောင်းကောင်းဖုံးကွယ်ထားခဲ့ပြီး ဘယ်တုန်းကမှ ပေါက်ကြားခဲ့ခြင်း မရှိပေ။ ထို့သို့ဖြင့် သူသည် ဘယ်တုန်းကမှ ပစ်မှတ်ထားမခံခဲ့ရပေ။

သူတော်စင်သုံးပါးကျောက်စိမ်းကျမ်းက တက္ကသိုလ်ဂိုဏ်းချုပ်၏ လက်ထဲမှာ ရှိနေသည်ကို သိရှိထားကြမည်ဆိုလျှင် ဧကရာဇ်များပင်လျှင် လောဘတက်လာပေလိမ့်မည်။

ယခုအချိန်မှာ ဘုရင်ယွင်ယိုနှင့် အခြားသူများပင် တက္ကသိုလ်ဂိုဏ်းချုပ်သည် ရတနာသူတော်စင်ကျောက်စိမ်းကျမ်းကိုသာ ရရှိထားသည်ဟု သိထားကြသည်။

တက္ကသိုလ်ဂိုဏ်းချုပ်၏ လှုပ်ရှားမှုတိုင်းသည် အလွန်တရာ စေ့စပ်သေချာပြီး ပြီးပြည့်စုံသည်ဟု ဆိုနိုင်သည်။

တက္ကသိုလ်ဂိုဏ်းချုပ်သည် အဲဒါကို ရှင်းရှင်းလင်းလင်း မပြောဆိုသော်လည်း တက္ကသိုလ်ဂိုဏ်းချုပ်သည် သူ့ကိုယ်သူ ကောင်းကောင်းဖုံးကွယ်ပြီး အကြီးအကဲရှစ်၏ သရုပ်သကန်ကို အသုံးချကာ အရာရာတိုင်းကို တိတ်တဆိတ် ကြံစည်နေခဲ့သည်မှာ သူက တျဲယွဲ့ကို စိုးရိမ်ပူပန်သောကြောင့်ဖြစ်သည်ဟု ဆူဇီမိုက ခန့်မှန်းမိလေသည်။

ဘုရင်ယွင်ယို၏ ကိုယ်ပွားကို ထျန်ဟွမ်ကုန်းမြေတိုက်မှာ တျဲယွဲ့က ဖျက်ဆီးခဲ့သည်ကို တက္ကသိုလ်ဂိုဏ်းချုပ်က သေချာပေါက် သိရှိထားပေမည်။

သူက တျဲယွဲ့လက်စားချေမှာကို စိုးရိမ်ပူပန်နေရပေမည်။ ထို့ကြောင့်ပင် သူက ဤမျှအထိ သတိကြီးကြီးထားကာ လှုပ်ရှားနေခြင်းဖြစ်သည်။

သို့သော်ယခု တက္ကသိုလ်ဂိုဏ်းချုပ်က နောက်ဆုံးမှာ ပေါ်ထွက်လာခဲ့၏။ သူက အခြေအနေတစ်ရပ်လုံးကို ထိန်းချုပ်ထားပြီး ဖြစ်နိုင်ခြေရှိသမျှ အလှည့်အပြောင်းအားလုံးကို ရှင်းလင်းပစ်ထားနိုင်ခဲ့ပြီကို သေချာသွားသောကြောင့်ဖြစ်သည်။

တက္ကသိုလ်ဂိုဏ်းချုပ်သည် ဤကဲ့သို့ ကြီးမားသည့် အကြံအစည်တစ်ခုကို ဖော်ဆောင်ခဲ့သည်မှာ သူတော်စင်သုံးပါးကျောက်စိမ်းကျမ်းကြောင့်သာလျှင် မဟုတ်ပေ။

လက်ရှိအခြေအနေအရ သူ့မှာ အခွင့်အရေး ဆက်လက်၍ မရှိတော့ဘူးဆိုတာကို ဆူဇီမိုက သူ၏ ရင်ထဲမှာ သိရှိထား၏။

သူတို့နှစ်ယောက်ကြား ကွာဟချက်က ကြီးမားသောကြောင့်သာလျှင် မဟုတ်ပေ။ တက္ကသိုလ်ဂိုဏ်းချုပ်၏ ရှေ့မှာ သူသည် ကူကယ်ရာမဲ့မှုကို ခံစားနေရပြီဖြစ်သောကြောင့်ပင်။

သူနှင့်ပတ်သက်သည့် အရာရာတိုင်းသည် တက္ကသိုလ်ဂိုဏ်းချုပ်၏ တွက်ချက်မှုများထဲမှာ တစ်စိတ်တစ်ပိုင်းမျှသာ ဖြစ်ခဲ့သည်။

ဒါ့အပြင် သူ၏ အမြုတေစိတ်ဝိညာဉ်သည် ဆရာအာခံကျိန်စာဖြင့် ရစ်ပတ်ခံလိုက်ရပြီဖြစ်သည်။

သူသည် ကံကောင်းထောက်မ၍ ထွက်ပြေးနိုင်ခဲ့မည်ဆိုလျှင်တောင် သူက မည်သည့်နေရာကို ရောက်ရှိသည်ဖြစ်စေ သူ၏ တည်နေရာကို တက္ကသိုလ်ဂိုဏ်းချုပ်က အာရုံခံမိနိုင်ပေလိမ့်မည်။

ဆရာအာခံကျိန်စာကတော့ သူသည် အဲဒါကို လုံးဝ မဖြေရှင်းနိုင်ပေ။

အဲဒါက လမ်းဆုံးတစ်ခု ဖြစ်နေခဲ့လေပြီ။

ကြားထဲမှာ အခြားသော အလှည့်အပြောင်းများ ရှိကောင်းရှိလာနိုင်သော်လည်း နောက်ဆုံးရလဒ်ကို ပြောင်းလဲပစ်ဖို့က ခက်ခဲပေလိမ့်မည်။

ထို့ကြောင့်ပင်လျှင် တက္ကသိုလ်ဂိုဏ်းချုပ်သည် သူ၏ အစစ်အမှန်ပုံပန်းသဏ္ဍာန်ကို ထုတ်ဖော်ပြသပြီး သူ၏ အကြံအစည်များ အားလုံးကိုပင် ထုတ်ဖော်ပြောဆိုလိုက်ခြင်း ဖြစ်လေသည်။

“တကယ်တော့ အင်မော်တယ်ဂိုဏ်းရွေးချယ်ပွဲကို နှစ်ပေါင်းများစွာ ကြိုတင်ပြီး စီစဉ်ထားတာပဲ”

တက္ကသိုလ်ဂိုဏ်းချုပ်က ပြောလိုက်၏။

“ငါက အင်မော်တယ်ဂိုဏ်းရွေးချယ်ပွဲကို ကြီးကြပ်ဖို့အတွက် ယန်လောရှုကို တာဝန်ပေးထားတယ်… ဘာလို့လဲဆိုတော့ ငါက မင်းကို စောင့်မျှော်နေတာမို့လို့ပဲ”

ဆူဇီမိုက ပြောလိုက်၏။

“စီနီယာအစ်ကိုယန်ရဲ့ စိတ်နေစရိုက်ကို ခင်ဗျားက ကောင်းကောင်းသိထားတာပဲ… သူက ဩဇာအာဏာရဲ့ စွမ်းပကားမှာ အလွယ်တကူ အညံ့ခံမှာ မဟုတ်ဘူးဆိုတာ ခင်ဗျားသိထားတာပဲ”

“အဲဒါကြောင့် အင်မော်တယ်ဂိုဏ်းရွေးချယ်ပွဲအတွင်း မထင်မှတ်ထားတဲ့ဖြစ်ရပ်တွေ ပေါ်ထွက်လာခဲ့ပေမဲ့ အကုန်လုံးက ခင်ဗျားမျှော်လင့်ထားတဲ့ အတိုင်းအတာအတွင်းမှာ ရှိနေခဲ့တာပဲ”

“ဟုတ်တာပေါ့”

တက္ကသိုလ်ဂိုဏ်းချုပ်က ခေါင်းညိတ်ပြလိုက်သည်။

“ဒါတွေအားလုံးကို စီစဉ်ထားတယ်ဆိုတာ မင်းရဲ့သတိကို လျှော့ချပြီး တိုက်ဆိုင်မှုတစ်ခုကြောင့် မင်းက တက္ကသိုလ်ကို ဝင်ရောက်မိလာတယ်လို့ ထင်နေအောင်လို့ပဲ”

ဆူဇီမိုက နှုတ်ဆိတ်နေပြီး သူ၏ ရင်ထဲမှ အေးစက်မှုကို ခံစားလာရ၏။

တက္ကသိုလ်ဂိုဏ်းချုပ်သည် ကောင်းကင်ဘုံလျှို့ဝှက်ချက်များကို တွက်ချက်နိုင်ရုံသာမက လူသားနှလုံးသားအပေါ် သူ၏ ဖမ်းဆုပ်နိုင်မှုကလည်း အလွန်တရာ တိကျလေသည်။

အင်မော်တယ်ဂိုဏ်းရွေးချယ်ပွဲအတွင်း အလှည့်အပြောင်းအားလုံးကို ထိန်းချုပ်နိုင်ဖို့အတွက် သူသည် ယန်လောရှုအကြောင်း ကောင်းကောင်းသိထားရမည်သာမက မင်းသားယွမ်ကျော၊ ဒုံမင်းအင်မော်တယ်မုန့်ယောင်၊ ပန်းချီအင်မော်တယ်မိုချင်နှင့် အခြားသူများကဲ့သို့ အင်မော်တယ်ဂိုဏ်းရွေးချယ်ပွဲမှာ ပါဝင်ခဲ့သည့်သူများအားလုံးကိုလည်း ကောင်းကောင်းနားလည်ထားရပေမည်။

တက္ကသိုလ်ဂိုဏ်းချုပ်သည် သူတို့တစ်ယောက်ချင်းစီ၏ တုံ့ပြန်ပုံ၊ အောက်စည်း၊ ခွန်အားနှင့် သူတို့ပြုလုပ်မည့် ရွေးချယ်မှုများကိုပါ နားလည်သဘောပေါက်ထားလေသည်။

လူသားနှလုံးသားအပေါ် သူ၏ ကျွမ်းကျင်ပိုင်နိုင်မှုက ကြောက်စရာကောင်းသော အဆင့်တစ်ခုထိ ရောက်ရှိနေပြီဖြစ်သည်။

ဆူဇီမိုက အခြားတစ်စုံတစ်ရာကို တွေးမိသွားပြီး မျက်မှောင်ကြုတ်ကာ ပြောလိုက်၏။

“ခင်ဗျားက ကျုပ်ရဲ့သတိကို လျှော့ချချင်တယ်ဆိုမှတော့ ခင်ဗျားက နောက်ပိုင်း ကျုပ်ကို ဘာလို့ခေါ်ယူပြီး အစိမ်းရောင်ကြာပန်းအစစ်အမှန်ခန္ဓာရဲ့ ကိစ္စကို ဖော်ထုတ် ပြောဆိုခဲ့တာလဲ”

သူက အဲဒါကို ဘယ်လိုပင် စဉ်းစားကြည့်သည်ဖြစ်စေ ဤလုပ်ရပ်သည် လိုအပ်မှုမရှိဘဲ ရန်သူကို သတိဝင်သွားစေပေလိမ့်မည်။

“ဟားဟား”

တက္ကသိုလ်ဂိုဏ်းချုပ်က ထိုအကြောင်းကို ကြားရချိန်မှာ သူက ဟားတိုက် ရယ်မောလိုက်၏။

“မင်းအဲဒါကို အခုချိန်ထိ မစဉ်းစားမိသေးဘူးလား… အဲဒီအချိန်တုန်းက ငါ့ရဲ့အကြံအစည်က ရန်သူကို တမင်သက်သက် ထိတ်လန့်စေဖို့ပဲ… ငါက မင်းထွက်ပြေးဖို့အတွက် ကြိုတင်ပြင်ဆင်မှုတွေ ပြုလုပ်ရအောင် မင်းကို သတိခေါ်ပေးလိုက်တာပဲ”

“ဟမ်…”

ဆူဇီမိုက တုန်လှုပ်သွား၏။

တက္ကသိုလ်ဂိုဏ်းချုပ်က ဆက်ပြောလိုက်၏။

“တကယ်တော့ မင်းတက္ကသိုလ်ကို ဝင်ရောက်လာတုန်းက စစချင်း ငါက မင်းကို သတိပေးဖို့ စိတ်ကူးမရှိခဲ့ဘူး… ဒါပေမဲ့ မင်းက အရမ်းကို ထူးချွန်လွန်းပြီး ကမ္ဘာမြေအဆင့်သတ်မှတ်ချက်နဲ့ ကောင်းကင်အဆင့်သတ်မှတ်ချက်ရဲ့ နံပါတ်-၁ နေရာကို ဆက်တိုက်ရရှိခဲ့တယ်… အပြင်ဘက်က စိတ်အာရုံတွေကို ငါက ဖုံးဖိထားချင်တယ် ဆိုရင်တောင်မှ ဖုံးဖိမထားနိုင်တော့ဘူး”

“တာအိုနှလုံးသားလှေကားမှာ ဒသမမြောက် ကျောက်လှေကားထစ်ကို မင်းစုဖွဲ့ခဲ့တဲ့ သတင်းကို ငါက ပိတ်ဆို့တားဆီးထားတာတောင်မှ အာရုံခံစိတ် ထက်ရှိတဲ့သူတွေက အဲဒါကို သတိထားမိဦးမှာပဲ… သူတို့တွေက မင်းကို အာရုံစိုက်လာကြဦးမှာပဲ”

“နောက်ပိုင်းမှာ ဘုရင်ယွင်ယို၊ အင်မော်တယ်ဘုရင်ယန်ယန်းနဲ့ အင်မော်တယ်ဘုရင်ချင်းယန်တို့က မင်းရဲ့ အစိမ်းရောင်ကြာပန်းမျိုးဆက်သွေးကို တစ်ယောက်ပြီးတစ်ယောက် ရှာဖွေတွေ့ရှိခဲ့ကြတယ်… သူတို့တွေက ဝေစုကို တောင်းဆိုဖို့အတွက် ရောက်လာခဲ့ကြတယ်… ဘုရင်ကျင်းက ငါ့ကို လာရှာတဲ့အချိန်မှာ ငါက အလိုက်သင့်မျှောချပြီး အဲဒီကိစ္စကို ဖုံးကွယ်မထားခဲ့ဘူး”

“သူတို့တွေက ကစားပွဲမှာ ပါဝင်ချင်တယ်ဆိုမှတော့ ငါက သူတို့ကို ပါဝင်ခွင့်ပေးလိုက်တာပေါ့… ဒါပေမဲ့ သူတို့ရဲ့အစွမ်းအစက ငါ့ဆီကနေ အမြတ်ထုတ်နိုင်ဖို့ အဝေးကြီးပဲ”

ဆူဇီမိုက နားလည်သဘောပေါက်လာပြီး တက္ကသိုလ်ဂိုဏ်းချုပ်၏ အစီအစဉ်ကို နောက်ဆုံးမှာ သိရှိသွားခဲ့လေသည်။

အစကနေ ယခုအချိန်အထိ တက္ကသိုလ်ဂိုဏ်းချုပ်သည် အစိမ်းရောင်ကြာပန်းအစစ်အမှန်ခန္ဓာကို အခြားသူများနှင့် မျှဝေဖို့ စိတ်ကူးမရှိခဲ့ပေ။

သို့သော်လည်း အစိမ်းရောင်ကြာပန်းအစစ်အမှန်ခန္ဓာက ပေါက်ကြားသွားသောကြောင့် တက္ကသိုလ်ဂိုဏ်းချုပ်သည် သူ၏ အစီအစဉ်ကို ပြောင်းလဲပြီး ဘုရင်ယွင်ယိုနှင့် အခြားသူများကို ကစားပွဲမှာ ပါဝင်ခွင့်ပေးကာ ဆူဇီမို၏ အစိမ်းရောင်ကြာပန်းအစစ်အမှန်ခန္ဓာကို ပေါက်ကြားစေခဲ့ခြင်း ဖြစ်သည်။

တက္ကသိုလ်ဂိုဏ်းချုပ်သည် သူက မိုးကောင်းကင်ကိုးလွှာတွေ့ဆုံပွဲမှာ ပါဝင်ခြင်းကနေ သို့မဟုတ် အင်မော်တယ်ဘုရင်မ လင်းလုံနှင့် တွေ့ဆုံခြင်းကနေ ဘယ်တုန်းကမှ သူ့ကို မတားဆီးခဲ့ပေ။

ဤအရာများအားလုံးသည် အစကတည်းက တက္ကသိုလ်ဂိုဏ်းချုပ်၏ ရည်ရွယ်ချက်ဖြစ်နေသောကြောင့်ပင်။

တက္ကသိုလ်ဂိုဏ်းချုပ်သည် ဆူဇီမိုနှင့် အင်မော်တယ်ဘုရင်မ လင်းလုံကို ပူးပေါင်းစေချင်လေသည်။ သူက သူတို့ကို ရတနာသူတော်စင်ကျောက်စိမ်းကျမ်းကို တည်ကြက်အဖြစ်သုံးပြီး ဘုရင်ယွင်ယိုနှင့် အခြားသူများ၏ စောင့်ကြည့်မှုအောက်ကနေ ထွက်ပြေးလွတ်မြောက်ဖို့ အကြံအစည်ချစေချင်လေသည်။

ဆရာအာခံကျိန်စာ၏ လမ်းညွှန်မှုနှင့်အတူ တက္ကသိုလ်ဂိုဏ်းချုပ်က သူ့ကို အချိန်မရွေးလိုက်ရှာနိုင်မည်ဖြစ်သည်။

သို့သော် ဘုရင်ယွင်ယိုနှင့် အခြားသူများကတော့ အစိမ်းရောင်ကြာပန်းမျိုးဆက်သွေး တစ်စက်ကိုတောင် ရရှိတော့မည် မဟုတ်ပေ။

ကောင်းကင်နှင့်မြေကြီးတက္ကသိုလ်မှ မြင်ကွင်းသည် တက္ကသိုလ်ဂိုဏ်းချုပ် မျှော်လင့်ထားသည့် အတိုင်းအတာအတွင်းမှာ ရှိနေခဲ့သည်။

တက္ကသိုလ်ဂိုဏ်းချုပ်သည် တစ်ချိန်လုံး သရုပ်ဆောင်နေခဲ့ခြင်းမျှသာ ဖြစ်လေသည်။

ထို့နောက် တက္ကသိုလ်ဂိုဏ်းချုပ်သည် သူ၏ ကိုယ်ပွားကို စိတ်အာရုံလွှဲပြောင်းဖို့အတွက် အသုံးချကာ ဘုရင်ယွင်ယိုနှင့် အခြားသူများနှင့်အတူ တိုက်ပွဲနယ်မြေသို့ လိုက်ပါပြီး လင်းကျန့်နှင့် အင်မော်တယ်ဘုရင်မ လင်းလုံတို့နှင့် တိုက်ခိုက်မည်ဖြစ်လေသည်။

သူကတော့ သူ၏ အစစ်အမှန်ခန္ဓာနဲ့အတူ ညှိုးနွမ်းကြယ်မှာ ဆူဇီမိုကို လာရှာမည်ဖြစ်သည်။

ဤအစီအစဉ်သည် ဘုရင်ယွင်ယိုနှင့် အခြားအင်မော်တယ်ဘုရင်သုံးပါးကို အကွက်ချကြံစည်ရုံသာမက လင်းကျန့်နှင့် အင်မော်တယ်ဘုရင်မ လင်းလုံတို့ကိုပါ ပြဿနာထဲကို ဆွဲထည့်လိုက်လေသည်။

ရုတ်တရက် ဆူဇီမိုက ပို၍ပင် ကြောက်စရာကောင်းသော ခန့်မှန်းချက်တစ်ခုကို တွေးမိလိုက်၏။

တက္ကသိုလ်ဂိုဏ်းချုပ်သည် ဤကဲ့သို့သော စစ်တုရင် ကစားပွဲတစ်ခုကို ခင်းကျင်းခဲ့သည်မှာ သူတော်စင်သုံးပါးကျောက်စိမ်းကျမ်းနှင့် သူ၏ အစိမ်းရောင်ကြာပန်းအစစ်အမှန်ခန္ဓာအတွက်သာလျှင် မဟုတ်လောက်ပေ။

“ဟဲဟဲ”

ဆူဇီမို၏ စိတ်ထဲမှာ ဖျတ်ခနဲပေါ်ထွက်လာသည့် အတွေးများကို တွေ့မြင်နိုင်သည့်အလား တက္ကသိုလ်ဂိုဏ်းချုပ်၏ မျက်လုံးများက ကြည်လင်နက်ရှိုင်းလာပြီး လင်းလက်တောက်ပလာခဲ့၏။ သူက ရယ်မော၍ အေးအေးလူလူပင် မေးလိုက်၏။

“မင်းရဲ့အမူအရာအရဆိုရင် မင်းက အဲဒါကို ခန့်မှန်းမိသွားပြီထင်တယ်”

“ခင်ဗျားက…”

ဆူဇီမိုက အေးစက်နေသော အမူအရာဖြင့် သူ၏လက်သီးနှစ်ဖက်ကို ဆုပ်လိုက်၏။

“ဟုတ်တာပေါ့”

တက္ကသိုလ်ဂိုဏ်းချုပ်က ခေါင်းညိတ်ပြလိုက်၏။

“အင်မော်တယ်ဘုရင်မ လင်းလုံက ဒီကစားပွဲမှာ ဝင်ပါချင်တယ်ဆိုမှတော့ ငါက သူ့ကို အလွယ်တကူ ဘယ်ထွက်ခွင့်ပေးပါ့မလဲ”

တကယ်ပင်။

ဆူဇီမိုက ရင်ထဲမှာ ဆို့နင့်သွား၏။

အဲဒီမှာ နည်းစနစ်သိုလှောင်ရုံ၏ တဗူးဂမ္ဘီရကျင့်စဉ်ထဲမှ နောက်ထပ်အမွေအနှစ် ရန်ခြောက်ပါးဂမ္ဘီရအတွဲအချက် ရှိနေလေသည်။ တက္ကသိုလ်ဂိုဏ်းချုပ်သည် အင်မော်တယ်ဘုရင်မ လင်းလုံထံကနေ အဲဒါကို ရယူချင်နေ၏။

တက္ကသိုလ်ဂိုဏ်းချုပ်သည် ယင်ယန်အဆောင်သုတ္တန်နှင့် ရန်ခြောက်ပါးဂမ္ဘီရအတွက်အချက်ကို ရရှိမည်ဆိုလျှင် သူသည် ပြီးပြည့်စုံသော နည်းစနစ်သိုလှောင်ရုံကို ကျွမ်းကျင်တတ်မြောက်လာသည်နှင့် တူညီပေလိမ့်မည်။

ဆူဇီမိုက အသက်ပြင်းပြင်းတစ်ချက်ရှိုက်ပြီး လေးနက်သော အသံဖြင့် ပြောလိုက်၏။

“တိုက်ပွဲဘုရင်နဲ့ အင်မော်တယ်ဘုရင်မ လင်းလုံတို့ နှစ်ယောက်စလုံးက တိုက်ပွဲနိုင်ငံမှာ ရှိနေတာပဲ… တိုက်ပွဲဘုရင်ရဲ့ ထိခိုက်ဒဏ်ရာတွေကလည်း အတော်များများ သက်သာပျောက်ကင်းလာပြီ… ခင်ဗျားအနေနဲ့ ရန်ခြောက်ပါးဂမ္ဘီရအတွက်အချက်ကို ရယူဖို့က လွယ်မှာမဟုတ်ဘူး”

“အဲ့လိုပြောလို့ ဘယ်ရမလဲ”

တက္ကသိုလ်ဂိုဏ်းချုပ်က ပြုံးစစဖြင့် ပြောလိုက်၏။

“ငါ့မှာ တည်ကြက်အဖြစ် မင်းရှိနေတာပဲ”

ဆူဇီမိုက တုန်လှုပ်ချောက်ချားသွားလေသည်။