ဧကရာဇ်ဂူသင်္ချိုင်း၏ ပြန်လည်ပေါ်ထွက်လာမှု

ထိုစဉ်မှာပင် ညှိုးနွမ်းကြယ်၏ နောက်ဘက် လေဟာနယ်ထဲမှာ အက်ကွဲကြောင်းတစ်ခု ရုတ်တရက်ပေါ်ထွက်လာပြီး ကြီးမားသော အရိပ်တစ်ခုက မြင့်မားသော တောင်တစ်လုံးကဲ့သို့ ပေါ်ထွက်လာ၏။

ထိုအရိပ်နှင့် ရင်ဆိုင်ရချိန်မှာ ညှိုးနွမ်းကြယ်သည် ကျောက်စရစ်ခဲတစ်ခဲကဲ့သို့ သေးငယ်သွားလေသည်။

အရိပ်က အသက်ဓာတ်ကင်းမဲ့နေပြီး ချောက်ချားစရာကောင်းသော စွမ်းပကားတစ်ခုကို ဖြာထုတ်ပေးနေ၏။

တက္ကသိုလ်ဂိုဏ်းချုပ်၊ လူအိုကြီးရွှမ်နှင့် ဆူဇီမိုတို့က အလိုလိုမော့ကြည့်လိုက်ကြ၏။

အရိပ်က ကြယ်တာရာကောင်းကင်ထဲမှာ လွင့်မျောနေ၏။ သူတို့သည် အဝေးကနေ ကြည့်ရှုမည်ဆိုလျှင် ထိုအရိပ်သည် တောင်တစ်လုံးမဟုတ်ဘဲ ဧရာမအုတ်ဂူတစ်ခုနှင့် တူနေပေလိမ့်မည်။

“ဧကရာဇ်ဂူသင်္ချိုင်း”

လူအိုကြီးရွှမ်၏ အမူအရာက ပြောင်းလဲသွားပြီး အံ့အားတသင့် ရေရွတ်လိုက်၏။

ဆူဇီမိုကလည်း တုန်လှုပ်သွား၏။

တစ်ခါက အင်မော်တယ်ဧကရာဇ်တစ်ပါးကို မြှုပ်နှံပြီး ကျိန်စာများဖြင့် ပြည့်နှက်နေသည့် လျှို့ဝှက်ဆန်းကြယ်သော ဂူသင်္ချိုင်းက နောက်တစ်ဖန်ပေါ်ထွက်လာခဲ့လေပြီ။

တစ်ချိန်တည်းမှာပင် ဆူဇီမိုသည် အလွန်တရာ ပြတ်သားမှုရှိပြီး သူ၏ နောက်ဆုံးလက်ကျန် ခွန်အားနှင့်အတူ နောက်ဆုံးရွေးချယ်မှုကို ပြုလုပ်လိုက်၏။

သူသည် လေထဲသို့ ခုန်တက်ပြီး ပြတ်သားသော အမူအရာနှင့်အတူ ဧကရာဇ်ဂူသင်္ချိုင်းရှိရာသို့ ပြေးဝင်သွားလေ၏။

အစိမ်းရောင်ကြာပန်း အမြုတေစိတ်ဝိညာဉ်သည် မဟာသန့်စင်ခရမ်းရောင်တိမ်စိုင်အဆောင်ကို အတင်းအကျပ်လှည့်ပတ်ခဲ့ရပြီး လဲပြိုကျတော့မည့်ဆဲဆဲဖြစ်နေလေပြီ။

ဒါ့အပြင် သူသည် တက္ကသိုလ်ဂိုဏ်းချုပ်ကို တိုက်ခိုက်ခဲ့ပြီး ဆရာအာခံကျိန်စာက လုံးလုံးလျားလျားထွက်ပေါ်လာခဲ့ပြီဖြစ်၏။ အစိမ်းရောင်ကြာပန်း အမြုတေစိတ်ဝိညာဉ်သည် ကျိန်စာစွမ်းအားဖြင့် လုံးလုံးလျားလျား စိမ့်ဝင်ထိုးဖောက်ခံထားရပြီဖြစ်လေသည်။

သူသည် ဆက်လက်၍ အသက်မရှင်နိုင်တော့ပေ။

သူလုပ်နိုင်သည့် တစ်ခုတည်းသောအရာမှာ တက္ကသိုလ်ဂိုဏ်းချုပ်၏ အကြံအစည်ကို မအောင်မြင်စေဖို့ဖြစ်သည်။

သူသည် တက္ကသိုလ်ဂိုဏ်းချုပ်၏ အကြံအစည်များအားလုံးကို အချည်းနှီးဖြစ်စေချင်သည်။

ဧကရာဇ်ဂူသင်္ချိုင်းက စွမ်းအားကြီးမားသော ကျိန်စာတစ်ခုဖြင့် ပြည့်နှက်နေ၏။

မဟူရာအင်မော်တယ်များ ဝင်ရောက်မည်ဆိုလျှင် သူတို့မှာ အသက်ရှင်လျက် ပြန်လာနိုင်မည့် အခွင့်အရေးတစ်ခု ရှိပေလိမ့်မည်။

ပကတိအင်မော်တယ်များက ဝင်ရောက်မည်ဆိုလျှင်တော့ သူတို့က သေချာပေါက် သေရပေလိမ့်မည်။

လူတစ်ယောက်၏ ကျင့်ကြံမှုနယ်ပယ်က ပိုမိုမြင့်မားလေလေ… ကျိန်စာ၏ ကြောက်မက်ဖွယ်ရာမှုကလည်း ပိုမိုပြင်းထန်လေဖြစ်ပေလိမ့်မည်။

ဤဧကရာဇ်ဂူသင်္ချိုင်းသည် ကြောက်စရာကောင်းသည်ဟု ကျော်ကြားနေခြင်းမှာ အထဲတွင် ဧကရာဇ်တစ်ပါးကိုသာမဟုတ်ဘဲ အင်မော်တယ်ဘုရင်များစွာကိုပါ မြှုပ်နှံထားသောကြောင့်ဖြစ်သည်။

မည်သည့်အင်မော်တယ်ဘုရင် သို့မဟုတ် မည်သည့်ဧကရာဇ်ပညာရှင်ကမှ ဤဧကရာဇ်ဂူသင်္ချိုင်းထဲကနေ အသက်ရှင်လျက် ပြန်ထွက်မလာနိုင်ခဲ့ကြပေ။

ယခု ဆူဇီမိုသည် ပကတိဧကနယ်ပယ်သို့ ရောက်ရှိနေပြီဖြစ်ပြီး သူက ဧကရာဇ်ဂူသင်္ချိုင်းထဲသို့ ဝင်ရောက်မည်ဆိုလျှင် အသက်ရှင်နိုင်စရာ နည်းလမ်းမရှိပေ။

သို့သော်လည်း သူသည် အစကတည်းက သေလူတစ်ယောက် ဖြစ်နေပြီးသားပင်။

အလွန်ဆုံး သူသည် ဧကရာဇ်ဂူသင်္ချိုင်းထဲသို့ ဝင်ရောက်မည်ဆိုလျှင် နောက်တစ်ဖန် သေရရုံသာရှိပေလိမ့်မည်။

ပို၍အရေးကြီးသည်မှာ သူသည် အစိမ်းရောင်ကြာပန်းအစစ်အမှန်ခန္ဓာကိုယ်ကို ဧကရာဇ်ဂူသင်္ချိုင်းထဲသို့ ပစ်ထည့်နိုင်မည်ဆိုလျှင် သူသည် တက္ကသိုလ်ဂိုဏ်းချုပ်၏ အကြံအစည်ကို မအောင်မြင်အောင် တားဆီးနိုင်မည်ဖြစ်လေသည်။

တက္ကသိုလ်ဂိုဏ်းချုပ်သည် ဆူဇီမို၏ အတွေးအကြံကို ချက်ချင်းပင် သိမြင်သွားပြီး ရင်တစ်ချက်ထိတ်သွား၏။

သူ၏ အကြည့်က အေးစက်လာပြီး ဆူဇီမိုကို တားဆီးဖို့ပြင်လိုက်၏။

တစ်ချိန်တည်းမှာပင် လူအိုကြီးရွှမ်ကလည်း ဆူဇီမို၏ အကြံအစည်ကို နားလည်သဘောပေါက်သွား၏။

ယခုအချိန်မှာ သူလုပ်နိုင်တာ များစွာမရှိပေ။ သူလုပ်နိုင်သည့် တစ်ခုတည်းသောအရာမှာ အသေအကြေတိုက်ခိုက်ပြီး ဆူဇီမိုအတွက် တတ်နိုင်သမျှ အချိန်ဆွဲထားပေးဖို့ဖြစ်သည်။

လူအိုကြီးရွှမ်က အသက်ပြင်းပြင်းတစ်ချက်ရှိုက်ပြီး သူ၏ အမြုတေစိတ်ဝိညာဉ်ကို လှည့်ပတ်ကာ တက္ကသိုလ်ဂိုဏ်းချုပ်ထံ နောက်ထပ် လျှို့ဝှက်အတတ်တစ်ခုကို ထုတ်ဖော်လိုက်၏။

“မင်းက သေချင်နေတာပဲ”

လူအိုကြီးရွှမ်ကို လှည့်ကြည့်ခြင်းမရှိဘဲ တက္ကသိုလ်ဂိုဏ်းချုပ်က ရှေ့မှာရှိသော ဆူဇီမိုကိုသာ တစ်ချိန်လုံးစိုက်ကြည့်နေ၏။

သူ၏ ဝတ်ရုံစကို သာမန်ကာလျှံကာ ဝှေ့ယမ်းရင်း သူက လူအိုကြီးရွှမ်၏ လျှို့ဝှက်တိုက်ကွက်ကို ချေဖျက်လိုက်၏။

တစ်ချိန်တည်းမှာပင် သူ၏ ဝတ်ရုံစက လူအိုကြီးရွှမ်ကို ထိခတ်သွားလေသည်။

သိပ်သည်းပြင်းထန်ကြီးမားသော စွမ်းအားတစ်ခုက လူအိုကြီးရွှမ်၏ ခန္ဓာကိုယ်ထဲသို့ တလိပ်လိပ်တိုးဝင်လာပြီး အရိုးများကျိုးသံ တဖျောက်ဖျောက် ထွက်ပေါ်လာ၏။ ချက်ချင်းပင် သူက ပေပေါင်းရာချီ လွင့်စင်ထွက်သွားပြီး ဖုန်များ၊ သဲများက တစ်ထောင်းထောင်းထကာ သူ၏ ကံကြမ္မာကို မသိရတော့ပေ။

ထိုနှောင့်နှေးကြန့်ကြာမှုနှင့်အတူ ဆူဇီမိုက ဧကရာဇ်ဂူသင်္ချိုင်းနှင့် နီးကပ်သထက် နီးကပ်လာ၏။

ထိုစဉ်မှာပင် ဧကရာဇ်ဂူသင်္ချိုင်း၏ အောက်ဘက်ကနေ ဧရာမ ဝဲကတော့တစ်ခုက ရုတ်တရက် ပွင့်ထွက်လာပြီး အလွန်တရာ သန်မာသော ဝါးမျိုစွမ်းအားကို ထုတ်ဖော်ကာ ဆူဇီမိုကို အတင်းအကျပ် ဆွဲယူသွင်းလိုက်၏။

ဆူဇီမိုသည် သူ၏ လျှာကို ညင်သာစွာကိုက်ပြီး အတတ်နိုင်ဆုံး သတိရှိနေဖို့ ကြိုးစားနေ၏။ သူက အားနည်းသော အမူအရာနှင့်အတူ တက္ကသိုလ်ဂိုဏ်းချုပ်ကို လှည့်ကြည့်လိုက်၏။ သို့သော်လည်း သူက ပြုံးနေဆဲဖြစ်ပြီး ပြောလိုက်လေသည်။

“ဂိုဏ်းချုပ်… ခင်ဗျား မတွက်ချက်နိုင်တဲ့ နောက်ထပ်အရာတစ်ခု ရှိနေပြန်ပြီ”

ဆူဇီမို၏ လှောင်ပြောင်သရော်မှုမှာ တက္ကသိုလ်ဂိုဏ်းချုပ်က မှင်သေသေဖြင့် ရှိနေပြီး ရပ်တန့်ဖို့ စိတ်ကူးမရှိဘဲ ဧကရာဇ်ဂူသင်္ချိုင်းရှိရာသို့ ဆက်လက်၍ ပြေးဝင်လာ၏။

“ဧကရာဇ်ဂူသင်္ချိုင်းရဲ့ ပေါ်ထွက်လာမှုက ငါ့ရဲ့တွက်ချက်မှုအတွင်းမှာ တကယ်ပဲ မပါဘူး… ဒါပေမဲ့ အဲဒါက အလှည့်အပြောင်းတစ်ခုလေးပဲ”

တက္ကသိုလ်ဂိုဏ်းချုပ်က မှင်သေသေဖြင့် ပြောလိုက်၏။

“ဒါပေမဲ့ မင်းမေ့နေတာတစ်ခု ရှိတယ်… ငါ့ရဲ့ခန္ဓာကိုယ်ထဲမှာ စုန်းမျိုးနွယ်ရဲ့ မျိုးဆက်သွေးတစ်ဝက်က စီးဆင်းနေတယ်… ငါက စုန်းမျိုးနွယ်ရဲ့ ကျိန်စာတွေအကြောင်း ကောင်းကောင်းသိတာပေါ့”

“ဧကရာဇ်ဂူသင်္ချိုင်းရဲ့ ကျိန်စာက ငါ့ကို ခြိမ်းခြောက်နိုင်မှာ မဟုတ်ဘူး”

ထိုစကားကို ကြားသောအခါ ဆူဇီမိုက ရင်ထဲမှာ နင့်ခနဲဖြစ်သွား၏။

ထိုအခိုက်အတန့်မှာ သူသည် ဧကရာဇ်ဂူသင်္ချိုင်းနှင့် အရမ်းကို နီးကပ်နေပြီဖြစ်၏။

သူ၏ လက်ရှိအခြေအနေအရ သူသည် ဧကရာဇ်ဂူသင်္ချိုင်း၏ ဝင်ပေါက်မှ ဝါးမျိုစွမ်းအားကို လုံးဝမခုခံနိုင်ပေ။

ဧကရာဇ်ဂူသင်္ချိုင်းက သူ့ကို ဝါးမျိုတော့မည်ကို ခွင့်ပြုပေးရုံသာ ရှိလေသည်။

တစ်ချိန်တည်းမှာပင် ညှိုးနွမ်းကြယ်၏ အခြားတစ်ဖက်မှာ လေဟာနယ်က ပွင့်ထွက်သွားပြီး ပုံရိပ်တစ်ခုက ခုန်ထွက်လာခဲ့၏။

အင်မော်တယ်ဘုရင်မ လင်းလုံက ရောက်ရှိလာပြီဖြစ်သည်။

သူမ ပေါ်ထွက်လာသည့်ခဏမှာပင် တက္ကသိုလ်ဂိုဏ်းချုပ်သည် ဧကရာဇ်ဂူသင်္ချိုင်း ရှိရာဘက်သို့ ဆူဇီမိုနောက်ကနေ ပြေးလိုက်သွားသည်ကို သူမက တွေ့မြင်လိုက်ရ၏။

“ဒါ…”

အင်မော်တယ်ဘုရင်မ လင်းလုံနှင့် ဧကရာဇ်ဂူသင်္ချိုင်းက ဝေးကွာနေဆဲဖြစ်လေသည်။ သူမက အဲဒါကို တားဆီးချင်သည်ဆိုလျှင်တောင် နောက်ကျသွားပေလိမ့်မည်။

ဆူဇီမိုသည် သူ၏ မျက်ဝန်းထောင့်ကနေ အင်မော်တယ်ဘုရင်မ လင်းလုံကို တွေ့မြင်သွား၏။

ဧကရာဇ်ဂူသင်္ချိုင်းထဲသို့ မဝင်ရောက်ခင် သူက အသက်ပြင်းပြင်းတစ်ချက်ရှိုက်ပြီး သူ၏ နောက်ဆုံးလက်ကျန် ခွန်အားတစ်မျှင်ကိုသုံးကာ ကျယ်လောင်စွာ အော်ပြောလိုက်၏။

“စီနီယာ… ဒီနေရာကနေ မြန်မြန်ထွက်သွားတော့… သတိထား…..”

ဆူဇီမိုက စကားဆုံးအောင် မပြောရသေးခင်မှာပင် သူ့ကို ဧကရာဇ်ဂူသင်္ချိုင်း၏ ဝင်ပေါက်ဝက ဝါးမျိုသွားခဲ့ပြီဖြစ်သည်။

အင်မော်တယ်ဘုရင်မ လင်းလုံက ပါးရည်နပ်ရည်ရှိပြီး ဂမ္ဘီရအတွက်အချက်နှင့် ကောက်ချက်ချမှုများမှာ ကျွမ်းကျင်မှု ရှိလေသည်။ ဤမြင်ကွင်းကို တွေ့မြင်သောအခါ သူမက ကိစ္စများစွာကို အလျင်အမြန် နားလည်သဘောပေါက်လိုက်၏။

ဆူဇီမိုက သူမကို သတိထားစေချင်သည့်လူက တက္ကသိုလ်ဂိုဏ်းချုပ်ဖြစ်သည်မှာ သိသာလေသည်။

သူမထံတွင် တက္ကသိုလ်ဂိုဏ်းချုပ်ကို အလွန်တရာ ဆွဲဆောင်နိုင်သည့်အရာတစ်ခုသာ ရှိလေသည်။

နည်းစနစ်သိုလှောင်ရုံ၏ နောက်ထပ်အတွဲတစ်တွဲ ရန်ခြောက်ပါးဂမ္ဘီရအတွက်အချက်။

တက္ကသိုလ်ဂိုဏ်းချုပ်သည် သူမကို ဤနေရာသို့ ရောက်ရှိလာဖို့ တမင်မျှားခေါ်ခဲ့ခြင်း ဖြစ်နိုင်လေသည်။

အင်မော်တယ်ဘုရင်မ လင်းလုံက သူမ၏ ဘေးပတ်ဝန်းကျင်ကို အနည်းငယ်အာရုံခံကြည့်လိုက်၏။

ညှိုးနွမ်းကြယ်ပေါ်တွင် ကြီးမားသော တိုက်ပွဲတစ်ခု ယခုတင် ဖြစ်ပွားထားသည်မှာ သိသာနေ၏။

ကြွင်းကျန်ရစ်သော စွမ်းအားများကြားမှာ ဧကရာဇ်နယ်ပယ်၏ အော်ရာတစ်စွန်းတစ်စ ရှိနေ၏။

“အဲဒါ…”

အင်မော်တယ်ဘုရင်မ လင်းလုံက ရင်တစ်ချက်ထိတ်သွား၏။

အခြားတစ်ဖက်မှာ တက္ကသိုလ်ဂိုဏ်းချုပ်သည်လည်း အင်မော်တယ်ဘုရင်မ လင်းလုံ၏ ပေါ်ထွက်လာမှုကို တစ်ချိန်တည်းမှာပင် သတိထားမိလိုက်၏။

သို့သော်လည်း သူက ​တွေဝေတုံ့ဆိုင်းမနေဘဲ ဆူဇီမိုကို အရင်ဖမ်းဆီးဖို့ ဆုံးဖြတ်လိုက်၏။

အင်မော်တယ်ဘုရင်မ လင်းလုံ၏ ရန်ခြောက်ပါးဂမ္ဘီရအတွက်အချက်နှင့် ယှဉ်လျှင် ဆူဇီမို၏ အဆင့်-၁၂ အစိမ်းရောင်ကြာပန်းအစစ်အမှန်ခန္ဓာက သိသိသာသာ ပိုမိုအရေးပါလေသည်။

အဲဒါသည် အဆင့်-၁၂ အစိမ်းရောင်ကြာပန်း၏ အသွေးအသားသာလျှင် မဟုတ်ဘဲ ယင်ယန်အဆောင်သုတ္တန်နှင့် ၎င်းကနေ ဆင်းသက်လာသော ရတနာများစွာ ရှိနေသောကြောင့်ဖြစ်သည်။

ထိုသုတ္တန်တစ်ခုတည်းကပင် ရန်ခြောက်ပါးဂမ္ဘီရအတွက်အချက်ထက် များစွာပိုမိုတန်ဖိုးရှိလေသည်။

ရန်ခြောက်ပါးဂမ္ဘီရအတွက်အချက်ကိုတော့ သူသည် နောက်ပိုင်းမှာသာ ရယူဖို့ အခြားသော အခွင့်အလမ်းများ ရှာဖွေရပေလိမ့်မည်။

ထို့သို့ အတွေးဖြင့် တက္ကသိုလ်ဂိုဏ်းချုပ်က ရပ်တန့်ခြင်းမရှိဘဲ ဧကရာဇ်ဂူသင်္ချိုင်းရှိရာသို့ ဆက်လက်ပြေးဝင်ကာ ဆူဇီမိုကို ဖမ်းဆီးဖို့ပြင်လိုက်၏။

သို့သော်လည်း သူက ဧကရာဇ်ဂူသင်္ချိုင်း၏ ဝင်ပေါက်ဝသို့ ရောက်ရှိလာသည့်ခဏမှာပင် သိပ်သည်းပြင်းထန်ကြီးမားသော စိတ်ဝိညာဉ်အသိစိတ် ဖိအားတစ်ရပ်က ရုတ်တရက်ဖြာထွက်လာပြီး အုပ်မိုးကျဆင်းလာခဲ့၏။ အဲဒါကို တားဆီး၍ မရနိုင်ပေ။

တက္ကသိုလ်ဂိုဏ်းချုပ်က တုန်လှုပ်သွားပြီး ခုခံဖို့အတွက် သူ၏ စိတ်ဝိညာဉ်အသိစိတ်များအားလုံးကို အလောတကြီး ထုတ်ဖော်လိုက်ရ၏။

ဝုန်း…

သို့သော်လည်း သူသည် ကြောက်စရာကောင်းသော စိတ်ဝိညာဉ်အသိစိတ်ဖိအားဖြင့် ဖိနှိမ်ခံလိုက်ရဆဲဖြစ်ပြီး ညှိုးနွမ်းကြယ်ပေါ်သို့ ပြင်းထန်စွာပစ်ကျကာ ကြီးမားသော တွင်းနက်ကြီးတစ်ခု ပေါ်ထွက်လာ၏။ သူ၏ နှုတ်ခမ်းထောင့်ကနေ သွေးများက စီးကျလာ၏။

ဧကရာဇ်နယ်ပယ်…

အဲဒါသည် ဧကရာဇ်နယ်ပယ်မှာရှိသော စိတ်ဝိညာဉ်အသိစိတ်စွမ်းအားတစ်ခု ဖြစ်လေသည်။

တက္ကသိုလ်ဂိုဏ်းချုပ်သည် ညှိုးနွမ်းကြယ်ပေါ်မှာ ခက်ခက်ခဲခဲထရပ်ပြီး အိုးတိုးအမ်းတမ်း အမူအရာတစ်ခုနှင့်အတူ သူ၏ ဦးခေါင်းအထက်မှ ဧကရာဇ်ဂူသင်္ချိုင်းကို မော့ကြည့်လိုက်၏။

အဲဒါက ဘယ်လိုလုပ်ဖြစ်နိုင်မှာလဲ…

ဧကရာဇ်ဂူသင်္ချိုင်းထဲမှာ ဧကရာဇ်ပညာရှင်တစ်ဦးကို မြှုပ်နှံထားသည်ဆိုသည်မှာ တကယ်ပင်။ သို့သော်လည်း ဧကရာဇ်နယ်ပယ် ပညာရှင်တစ်ဦး၏ စိတ်ဝိညာဉ်အသိစိတ်ဖိအားက ဘာကြောင့် ဆင်းသက်လာရတာလဲ။

ဒါ့အပြင် စောစောက စိတ်ဝိညာဉ်အသိစိတ်ဖိအားသည် စုန်းမျိုးနွယ်ဧကရာဇ်တစ်ပါးထံမှ သေချာပေါက် မဟုတ်ပေ။

အခြားသော ဧကရာဇ်ပညာရှင်များသည် ကျိန်စာ၏ စွမ်းအားကို ခုခံနိုင်ပြီး ဧကရာဇ်ဂူသင်္ချိုင်းထဲသို့ အရင်ဝင်ရောက်ထားနိုင်တာလား။

တက္ကသိုလ်ဂိုဏ်းချုပ်၏ အမူအရာက ပျက်ယွင်းလာခဲ့၏။

ဧကရာဇ်ဂူသင်္ချိုင်း၏ ပေါ်ထွက်လာမှုက ရုတ်တရက်ဆန်လွန်းပြီး သူ၏ အထင်အမြင်ထက် များစွာကျော်လွန်နေ၏။

အဲဒါအပြင် ဒါက ဧကရာဇ်ဂူသင်္ချိုင်းတစ်ခုသာဆိုလျှင် အဆင်ပြေပေဦးမည်။

သို့သော်လည်း ဧကရာဇ်ဂူသင်္ချိုင်းထဲမှာ ကြောက်စရာကောင်းသော စိတ်ဝိညာဉ်အသိစိတ်က ဘာကြောင့်ရှိနေရတာလဲ။

အင်မော်တယ်ဘုရင်မ လင်းလုံက ထိုသည်ကို တွေ့မြင်သောအခါ ရင်ထဲမှာ ဆို့နင့်သွား၏။

ဆူဇီမိုသည် ဧကရာဇ်ဂူသင်္ချိုင်းထဲသို့ ဝင်ရောက်သွားသည်နှင့် သေချာပေါက် သေရပေတော့မည်။

စိတ်သက်သာရာရစေသည့် တစ်ခုတည်းသောအရာမှာ တက္ကသိုလ်ဂိုဏ်းချုပ်သည် ဤကဲ့သို့ တုန်လှုပ်စရာကောင်းသော စစ်တုရင်ကစားပွဲကို ခင်းကျင်းဖို့အတွက် ကြိုးစားအားထုတ်မှုများစွာ ပြုလုပ်ခဲ့ရ၏။ နောက်ဆုံးမှာတော့ သူသည် ရွှေ့ကွက်တစ်ကွက် နောက်ကျသွားရုံဖြင့် အဆင့်-၁၂ ဖန်တီးခြင်းကြာပဒုမ္မာကို လက်လွှတ်ဆုံးရှုံးရတော့မည်ဖြစ်လေသည်။