အများ၏ အာရုံစိုက်ခံရသော လောရုံ

လောရှောင်ရှောင်က ထိုသို့ပြောပြီး တိုက်ပွဲစင်မြင့်အောက်သို့ ဆင်းကာ လောရုံဆီသို့ လာလိုက်သည်။

" ဟား ဟား... မတိုက်နိုင်ရင် မတိုက်နိုင်ဘူးပေါ့ကွာ။ ဘာလဲ ပြိုင်မယ့်သူ ပြောင်းသလေး ဘာလေးနဲ့ ။ တော်တော်အရှက်မရှိတာပဲ "

ထိုစဥ် လူအုပ်ထဲမှ ဒဏ်ရာများ ပြန်သက်သာလာသော ကျွင့်ဟွမ်က အောက်ဆင်းလာသည့် လောရှောင်ရှောင်းကို ကြည့်ရင်း လှောင်လိုက်သည်။

လောရှောင်ရှောင်း ချက်ချင်း မျက်မှောင်ကြုံ့သွားကာ ကျွင့်ဟွမ်၏ ရင်ဘတ် အကျ်ီစကို ဆွဲကိုင်လိုက်သည်။

" နင်.. နင် ဘာလုပ်မလို့လဲ "

ကျွင့်ဟွမ် တအံ့တသြ ပြန်မေး၏။

" မကျေနပ်ဘူးလား... ဒါဆို ငါ နင့်ကို စင်ပေါ် ပစ်တင်ပေးလိုက်မယ်လေ။ ဟိုကောင်နဲ့ သူသေကိုယ်သေ သွားတိုက်ခိုက်ချည် "

လောရှောင်ရှောင်းက အေးစက်စက် ပြောလိုက်သည်။

ထိုစကားကို ကြားသောအခါ ကျွင့်ဟွမ်တစ်ယောက် ကြောက်လွန်း၍ တစ်ကိုယ်လုံး တုန်သွားပြီး မေ့လဲကျတော့မတတ် ဖြစ်သွား၏။

ယခုလို သူမ ဒဏ်ရာအပြင်းအထန် ရထားချိန် မဆိုထားဘိ..

သူမ အစွမ်းပြည့် သုံးနိုင်နေလျှင်ပင် တိုင်လင်ကို လူနှင့် တိုက်ခိုက်ပါက.. တစ်ချက်တည်းဖြင့်ပင် သူမ ရှုံးနိမ့်သွားရပေလိမ့်မည်။

" ငါ့ကို လွတ်စမ်း ၊ ငါ သွားစရာ ဘာအကြောင်းမှ မရှိဘူး ။ ငါ ခုနတည်းက ရှုံးထားပြီးသားလေ.. ဘာလို့ သွားရမှာလဲ "

ကျွင့်ဟွမ် ကြောက်လန့်တကြား ငြင်းလိုက်သည်။

ထိုစဥ် လောရှောင်ရှောင်းက သူမ၏ မျက်နှာကို ရိုက်ချလိုက်ရာ ကျွင့်ဟွမ်၏ ပါးတစ်ဖက် ချက်ချင်း ဖူးယောင်သွား၏။

" မသွားချင်ဘူးဆိုရင် ပါးစပ်ပိတ်ထား ။ နောက်ထပ် အဓိပ္ပါယ်မရှိတဲ့ စကားတစ်ခွန်း ထပ်ထွက်တာနဲ့ နင့်လျှာကို ဖြတ်ထုတ်ပစ်မယ်မှတ်။ အဲ့ကျ နင့်မိသားစုကလဲ နင့်ကို ကယ်နိုင်မှာ မဟုတ်ဘူး။ ငါပြောတာ ကြားလား "

လောရှောင်ရှောင်းက ဒေါသတကြီး ပြောလိုက်သည်။

ကျွင့်ဟွမ်မှာ လောရှောင်ရှောင်းအား အလွန်ကြောက်သွားပြီး ချက်ချင်း အသည်းအသန် ခေါင်းညိတ်ပြလိုက်၏။

လောရှောင်ရှောင်းက ထိုအချိန်မှသာ သူမအကျ်ီစကို လွတ်ပေးလိုက်ပြီး လောရုံဆီသို့ ဆက်လျှောက်သွားသည်။

" ရှောင်ရှောင်း... နင် အရင်က အဲ့လိုမဟုတ်ပါဘူး... "

လောရုံက သူမကို ကြောက်ရွံ့မှုအငွေ့အသက်အချို့ ပါသော အကြည့်ဖြင့် ကြည့်၍ ဆိုလိုက်သည်။

လောရှောင်ရှောင်းက အံ့သြသွားဟန်ဖြင့် ပြန်ပြော၏။

" တကယ်ကြီးလား... ကျွန်မတော့ ဘာမှ ပြောင်းသွားတယ်လို့လဲ မခံစားမိပါဘူး။ ကြည့်ရတာ အရင်တစ်ခေါက် တစ်ကိုယ်တည်း ကျင့်ကြံတုန်းက တစ်ယောက်တည်းနေတာ အရမ်းများသွားလို့လား မသိဘူး "

လောရုံ မျက်နှာကြီး ရှုံ့မဲ့သွား၏။ အခြားသူများက အိပ်ရာနိုးစအချိန်တွင် စိတ်မကြည်မလင်ဖြစ်ပြီး ဒေါသကြီးတတ်သည်ဟုသာ သူ ကြားဖူးထားချိန်တွင်.. ယခု လောရှောင်ရှောင်းက တစ်ယောက်တည်း ကျင့်ကြံပြီး ပြန်ထွက်လာချိန် ထိုသို့ ဖြစ်နေသတဲ့လား။

ထိုစဥ် လောရှောင်ရှောင်းက ဆက်ပြောသည်။

" အကိုလောရုံ ၊ အဲ့ကောင်ကို အကို့ဆီ လက်လွှဲပေးလိုက်လို့ ရလား "

လောရုံ ချက်ချင်း ခေါင်းညိတ်ပြ၏။

" ရတာပေါ့... ငါက လုပ်ချင်နေတာ ကြာလှပြီ "

သူ ထိုသို့ပြောပြီး တိုက်ပွဲစင်မြင့်ထက်သို့ ချက်ချင်း ခုန်တက်လိုက်သည်။

" ဟင်.. ဘာတွေ ဖြစ်နေတာလဲ ။ လောရှောင်ရှောင်း ဆင်းသွားပြီးတော့ ဟိုကောင် တက်လာတာလား။ အဲ့ကောင်က ဘယ်သူလဲ "

" လူစားထိုးမယ့်ထိုးတော့ ချင်းရှောင်ရှန်တို့ ၊ ရှန့်မူချင်းတို့ကို အစားထိုးတာ မဟုတ်ဘူး ။ ဘာလို့ အဲ့လိုတွေ့ကရာလူနဲ့ လူစားထိုးလိုက်ရတာလဲ "

အားလုံးက လောရုံအား မယုံသည့်အကြည့်ဖြင့် ကြည့်လိုက်ကြသည်။

ချင်းဝူချုံသည်ပင် မျက်မှောင်ကြုံ့သွားပါ၏။

" နတ်ဘုရားသခင်မကြီး.. အဲ့လူကို သိလား "

သူ ယောင်ချီ နတ်ဘုရားသခင်မကြီးဘက် လှည့်ကာ မေးလိုက်သည်။

ယောင်ချီ နတ်ဘုရားသခင်မကြီးက ခေါင်းယမ်း၍ ပြန်ပြော၏။

" ကျွန်မလဲ မသိဘူးရှင့် ။ ဒါပေမယ့် လောရှောင်ရှောင်းမှာ အဲ့လူကို ခေါ်ထုတ်လိုက်ရတဲ့ ရည်ရွယ်ချက် ရှိမှာပါ "

ထိုစဥ်တွင် ရွှေယွဲ့ချီ ပြောဖူးသော စကားများကိုလည်း သူမ ပြန်သတိရမိသွားပါသည်။

" ရွှေယွဲ့ချီ ပြောတာတော့ ပျောင်ပိုင်မြို့က လောထျန်းက မူလအရှုပ်အထွေးခန္ဓာကိုယ်ကို အသက်သွင်းနိုင်တယ်တဲ့။ မဟုတ်မှလွဲ... ဒီလောရုံဆိုတဲ့ ကောင်လေးကရော.... "

" မဖြစ်နိုင်တာ... ငါ စိုးရိမ်စရာတွေ အရမ်းများနေတော့ အဓိပ္ပါယ်ရှိတဲ့ အတွေးမျိုးတောင် မတွေးနိုင်တော့ဘူး။ အရှုပ်အထွေး ခန္ဓာကိုယ်ဆိုတာ မဖြစ်နိုင်တာကြီးပဲ။ ဒါပေမယ့် သူလဲ တိုင်လင်လို အရှုပ်အထွေး နတ်ဘုရားအလင်းတန်းလေး နည်းနည်းအသက်သွင်းနိုင်မယ်ဆို သိပ်ကောင်းမှာ... "

သူမ ထိုသို့တွေးရင်း အနည်းငယ် စိတ်လှုပ်ရှားသွားသည်။

ထိုအချိန်တွင် လောရုံမှာ တိုက်ပွဲစင်မြင့်ထက်သို့ ရောက်နေခဲ့လေပြီ။

" အိုး.. ဟိုကောင်မလေးက သိပ်အစွမ်းမထက်တော့ အခု မင်းအလှည့်ပေါ့လေ.. ဟုတ်လား။ ဒါပေမယ့် ဘယ်သူလာလာ အရေးမကြီးပါဘူးကွာ။ ငါ့လို အရှုပ်အထွေး နတ်ဘုရားအလင်းတန်းပိုင်ရှင် ရှေ့မှာတော့ အားလုံးက အမှိုက်တွေချည်းပဲ "

တိုင်လင်က ဂုဏ်မောက်စွာ ပြောလိုက်သည်။

လောရုံ ခေါင်းတစ်ချက် ညိတ်လိုက်၏။

" ကောင်းပြီလေ "

သူ၏ မတုန်မလှုပ် တုန့်ပြန်ပုံကြောင့် တိုင်လင်တစ်ယောက် ချက်ချင်း ဒေါသူပုန် ထသွားတော့သည်။

" ဘာလဲ အဲ့စကားပြောတဲ့ ပုံစံက ။ မင်းက ငါ့ရဲ့ အရှုပ်အထွေး နတ်ဘုရားအလင်းတန်းကို အထင်သေးတာလား။ သြော်... သိပြီ ၊ မင်းတို့ရဲ့ တောကြီး ထျန်ယွမ်ကမ္ဘာမှာ အရှုပ်အထွေး နတ်ဘုရားအလင်းတန်းကို ကျင့်ကြံတဲ့သူ မရှိတာ ကြာလှနေပြီ မဟုတ်လား "

" ဒါဆိုလဲ မင်းကို ငါ ရှင်းပြပေးမယ်။ အရှုပ်အထွေးခန္ဓာကိုယ်ဆိုတာ ဒီ စကြဝဠာမှာ ရှိတဲ့ ထူးခြားတဲ့ခန္ဓာကိုယ် အမျိုးအစား မရေမတွက်နိုင်င် ရှိတဲ့ထဲကမှ အစွမ်းအထက်ဆုံး ခန္ဓာကိုယ်တစ်မျိုးပဲကွ။ အရှုပ်အထွေး နတ်ဘုရားအလင်းတန်း ဆိုတာကတော့ အရှုပ်အထွေးခန္ဓာကိုယ်ရဲ့ ရှေ့ပြေးအစွမ်းတစ်ခုပေါ့ကွာ "

" ရှေ့ပြေးအစွမ်း ဆိုပေမယ့် အဲ့အလင်းကို ရတာနဲ့ အစွမ်းတိုးသွားတဲ့ နှုန်းက မင်း ခန့်မှန်းလို့တောင် ရမှာမဟုတ်ဘူးကွ "

သူ့စကားကို နားထောင်ရင်း လောရုံ ခေါင်းတစ်ချက် ညိတ်လိုက်သည်။

" မင်းပြောတဲ့ အရှုပ်အထွေးခန္ဓာကိုယ်ဆိုတာ ဒါမျိုးလား... "

ဝီ...

ချက်ချင်းမှာပင် လောရုံ၏ ကိုယ်မှ အရှုပ်အထွေး နတ်ဘုရားအလင်းတန်း လင်းလက်လာပြီး အရှုပ်အထွေးခန္ဓာကိုယ် အပြည့်အဝ အသက်ဝင်လာတော့၏။

တိုင်လင် ခေါင်းညိတ်၍ ပြန်ပြောသည်။

" ဟုတ်တယ် ၊ အမှန်ပဲ။ ဒါပေမယ့် အဲ့ဒါက မင်းဘဝ တလျှောက်လုံး ဘယ်တော့မှ နားလည်နိုင်မှာ မဟုတ်တဲ့ အစွမ်းမျိုးပဲကွ "

သို့သော် သူ ထိုသို့ ပြောပြီးချိန်မှာပင် တစ်စုံတစ်ခု လွဲနေသည်ကို ချက်ချင်း ခံစားမိလိုက်ပါ၏။

သူ မျက်လုံးနှစ်ဖက်လုံးကို ပွတ်၍ လောရုံအား သေချာထပ်ကြည့်လိုက်သည်။ ထို့နောက်တွင်မူ နောက်သို့ ခြေလှမ်းအနည်းငယ် ဆုတ်သွား၏။

" မင်း... မင်းက.... "

သူ အံ့သြမှင်သက်လွန်း၍ စကားပင် ဆက်မဆိုနိုင်တော့ပါချေ။

သူသည်သာမက ၊ အနီးနားတွင် ရှိနေကြသော လူများအားလုံးလည်း အံ့သြလွန်း၍ ပါးစပ်အဟောင်းသား ဖြစ်ကုန်ကြ၏။

တိုင်လင်၏ ကိုယ်မှ ထွက်ခဲ့သော မှိန်ဖျော့ဖျော့ အရှုပ်အထွေး နတ်ဘုရားအလင်းတန်းလေးကပင် အားလုံးကို ကြောက်လန့်သွားရအောင် လုပ်နိုင်ခဲ့ပါသည်။

သို့သော်.. ယခု လောရုံကိုယ်ပေါ်မှာ အလင်းတန်းက တိုင်လင်ထက် အဆများစွာ ပိုသိပ်သည်းပြီး..

ဒဏ္ဍာရီကျော် အရှုပ်အထွေး ခန္ဓာကိုယ်နှင့် တစ်ပုံစံထဲပါပင် ။

ဝုန်း..

ထိုစဥ် ယောင်ချီ နတ်ဘုရားသခင်မကြီးမှာ အံ့သြတုန်လှုပ်လွန်း၍ ခြေကို ဆောင့်ချမိသွားသဖြင့် သူမခြေထောက်အောက်မှ မြေကြီးပင် အက်ကွဲသွား၏။

သူမ လောရုံအား တအံ့တသြ ကြည့်နေရင်း ရင်ထဲတွင်လည်း ခံစားချက်ပေါင်းစုံ လှိုင်းထန်လာသည်။

" ဒါ... မဟုတ်မှလွဲရော... ရွှေယွဲ့ချီ ပြောခဲ့တာတွေက အမှန် ဖြစ်နေတာလား။ ဒီကမ္ဘာမှာ အရှုပ်အထွေးခန္ဓာကိုယ်ကို အသက်သွင်းနိုင်တဲ့သူ တကယ်ကြီး ရှိနေတာလား ။ ဒါပေမယ့် သူပြောတာတော့ လောထျန်းလို့ ပြောခဲ့တာပါ။ အခု ဘယ်လိုဖြစ်ပြီး လောရုံက.... "

" ငါ မှတ်မိတာပဲ မှားတာများလား.... ဒါမှမဟုတ်.. အရှုပ်အထွေးခန္ဓာကိုယ်ပိုင်ရှင်က နှစ်ယောက်ဖြစ်နေတာလား... "

ယောင်ချီ နတ်ဘုရားသခင်မကြီးမှာ သူ့မျက်လုံးသူပင် မယုံနိုင်တော့ပါချေ။

အရှုပ်အထွေးခန္ဓာကိုယ် မဆိုထားဘိ ၊ အရှုပ်အထွေး နတ်ဘုရားအလင်းတန်းလေး အနည်းငယ်အား ထုတ်လွှတ်နိုင်သူပင်လျှင် မသေမျိုးတစ်ယောက် ဖြစ်လာ​ပါက ကြောက်မက်ဖွယ် တိုက်ခိုက်စွမ်းရည်မျိုး ပိုင်ဆိုင်မည်ကို သေချာပြော၍ ရပါသည်။

အရှုပ်အထွေးခန္ဓာကိုယ်ပိုင်ရှင် ဆိုလျှင်ကား... ကမ္ဘာပေါ်မှ မသေမျိုးတစ်ယောက် မဟုတ်ဘဲ မသေမျိုးအစွမ်းကို စုပ်ယူ၍ မသေမျိုးတစ်ယောက် ဖြစ်လာလျှင်ပင်.. သာမာန် ကမ္ဘာပေါ်မှမသေမျိုးများထက် ပိုသာမည် ဖြစ်သည်။

ထို အရှုပ်အထွေးခန္ဓာကိုယ်မှာ ကြောက်မက်ဖွယ် ထူးခြားသော ခန္ဓာကိုယ်တစ်ခုပင် ။

အရှုပ်အထွေးခန္ဓာကိုယ်ပိုင်ရှင်က ကမ္ဘာပေါ်မှ မသေမျိုးတစ်ယောက် ဖြစ်လာလျှင်ကား... သူမ ဆက်ပင် မတွေးရဲတော့ပါ။

သူမ သိသလောက်ဆိုလျှင်လည်း ရှေးယခင်ခေတ်မှစ၍ ထိုသို့သော အစွမ်းထက်ကျင့်ကြံသူမျိုး ထျန်းယွမ်ကမ္ဘာ၌ လုံးဝ ပေါ်မလာခဲ့ဖူးပါချေ။

ရှေးခေတ်အလွန်တွင် ရှိခဲ့ဖူးလား ၊ မရှိခဲ့ဖူးလား ဆိုသည်ကိုမူ သူမ မသိပါ။

ထို အရှုပ်အထွေးခန္ဓာကိုယ်၏ အစွမ်းကြောင့်လည်းမည်သည့်အဖွဲ့တွင်ဖြစ်စေ ၊ အရှုပ်အထွေး ခန္ဓာကိုယ်၏ မျိုးစေ့ကို စရထားပြီ ဆိုသည်နှင့် ထိပ်သီးအဆင့် ကျင့်ကြံသူအဖြစ် သတ်မှတ်ခံရခြင်း ဖြစ်သည်။

ယခု လောရုံမှာကား.. အရှုပ်အထွေးခန္ဓာကိုယ်ပိုင်ရှင်တစ်ယောက် ဖြစ်နေပြီဖြစ်ရာ.. သူမ စိတ်လှုပ်ရှားနေခြင်းက မလွန်ပေ။

သို့သော် ထိုသို့ စိတ်လှုပ်ရှားနေသူမှာ သူမတစ်ယောက်တည်း မဟုတ်ပါ။

" ဂိုဏ်းချုပ်ကြီး ချင်း ၊ အကိုသွမ့်.... "

သခင်ကြီး ထျန်းလုံမှာလည်း စိတ်လှုပ်ရှားလွန်း၍ တစ်ကိုယ်လုံးပင် တုန်နေ၏။

ချင်းဝူချုံကလည်း အသက်ပြင်းပြင်း တစ်ချက်ရှိုက်၍ ဆိုသည်။

" ဒီလောက် နှစ်တွေကြာသွားပြီးတဲ့နောက်... ထျန်းယွမ်ကမ္ဘာမှာ အခုလို ပါရမီရှင်မျိုး ပေါ်လတော့ ကျုပ် ထင်တောင်မထင်ခဲ့ဘူးဗျာ။ ကျုပ် သူ့ကို ဝူလျန်နန်းတော် ခေါ်သွားမယ်။ သူသာ ကောင်းကောင်းမွန်မွန် အရွယ်ရောက်လာရင် ကျုပ်တို့ ကောင်းကင်ဘုံပျက်စီးခြင်း အပေါ်သုံးခုကိုလဲ ကြောက်စရာ မရှိတော့ဘူး "

" ခင်ဗျားပြောတာ အဓိပ္ပါယ်ရှိပါတယ်။ ဒါပေမယ့် ထျန်းယွမ်ကျောင်းတော်မှာဆို သူ ပိုပြီး ကောင်းကောင်းကျင့်ကြံနိုင်မယ်လို့ ကျုပ် ထင်တယ် "

တာအိုသခင်ကြီး ထျန်းလုံကလည်း ပြောလာ၏။

သူတို့စကားကို ကြားသောအခါ ယောင်ချီ နတ်ဘုရားသခင်မကြီးက မျက်မှောင်ကြုံ့၍ ဆိုသည်။

" ကျွန်မတို့ ယောင်ချီ အနေနဲ့လဲ ခြွင်းချက်ထားပြီးတော့ ယောကျ်ားလေး ဂိုဏ်းဝင်ကို လက်ခံလိုက်လို့ ရတယ်လေ "

ပထမလူ သုံးယောက်က ယောင်ချီနတ်ဘုရားသခင်မကြီးအား မျက်နှာမသာမယာ ကြည့်လာကြ၏။

ထိုသို့ ထျန်းယွမ်ကမ္ဘာမှ လူများ ပျော်ရွှင်နေကြစဥ်တွင် ယွဲ့ယန်ကမ္ဘာမှ လူများမှာကား ထိုသို့ ဟုတ်မနေပါ။

" သခင်ကြီး ယဲ့ကျီ "

ကမ္ဘာပေါ်မှ မသေမျိုးတစ်ယောက်က ယဲ့ကျီအား လှည့်ကြည့်လိုက်သည်။

ယဲ့ကျီက မျက်နှာကြီး သုန်မှုန်နေပြီး စိုးရိမ်မကင်းသည့် အကြည့်ဖြင့် လောရုံအား ကြည့်နေ၏။

" ဒီနေ့ အခုလို တိုက်ပွဲမျိုး စီစဥ်မိလိုက်တာ တော်သေးတာပေါ့။ မဟုတ်ရင် ထျန်းယွမ်ကမ္ဘာမှာ အဲ့လိုဘီလူးမျိုး ရှိနေတာ ငါတို့ သိလိုက်ရမှာ မဟုတ်ဘူး။ အားလုံး နားထောင်ကြဟေ့.. ဒီကောင့်ကို တိုက်ပွဲကွင်းပြင်ထဲမှာ မသတ်နိုင်ရင် ၊ပြီးသွားတဲ့အခါကျ ငါကိုယ်တိုင် သူ့ကို သတ်လိုက်မယ်။ မြင့်မြတ်နယ်မြေအဆင့် စိတ်စွမ်းအင်သွေးကြော မရဘူး ဆိုရင်တောင် သူ့ကိုတော့ သတ်ကိုသတ်မယ် ။ ငါပြောတာ ကြားကြလား "

ယဲ့ကျီ အေးစက်စက် ပြောလိုက်သည်။

အရှုပ်အထွေး ခန္ဓာကိုယ်မှာ သူတို့ ကမ္ဘာနှစ်ခုကြားမှ ဆက်ဆံရေးကို ပြောင်းပြန်လှန်ပစ်နိုင်ပါသည်။

သူ ထိုသို့ အဖြစ်မခံနိုင်ပေ။

" ဟုတ်ကဲ့ပါ "

ကျန်လူများကလည်း တစ်ယောက်ပြီးတစ်ယောက် ပြန်ဖြေလိုက်ကြသည်။

ထိုစဥ် တိုက်ပွဲစင်မြင့် တဖက်တွင် ရှိနေသော တိုင်လင်မှာမူ လောရုံအား သရဲတစ်ကောင်ကို တွေ့လိုက်သလို ကြည့်နေပါ၏။

အစောက... နတ်ဘုရားအလင်းတန်းလေး ထုတ်လွှတ်နိုင်အောင်ပင် သူ့အသက်ကို စွန့်စားခဲ့ရပါသည်။

သို့သော်... လောရုံက အရှုပ်အထွေး ခန္ဓာကိုယ်အား ဤမျှအလွယ်တကူ အသက်သွင်းလိုက်နိုင်သည့်အဖြစ်ကို သူ လုံးဝ လက်မခံနိုင်ပါ။

" ဟား ဟား.. သဘောပေါက်ပြီ ၊ မင်းက ဒီတိုင်း ဟန်ဆောင်နေတာပဲကွ။ မင်းက ထူးဆန်းတဲ့ မှော်လက်နက် တစ်မျိုးမျိုးကို သုံးပြီး အရှုပ်အထွေးခန္ဓာကိုယ်အဖြစ် ဟန်ဆောင်နေတာမလား။ ငါ့ကို လှည့်စားဖို့တောင် ကြိုးစားလိုက်သေးတယ် ။ နေဦး... မင်း တွေ့မယ် "

သူ ထိုသို့ပြောကာ လောရုံထံသို့ လက်သီးချက်တစ်ခု ပစ်လွှတ်လိုက်သည်။