ဒုက္ခရောက်သွားသော ရှေးဟောင်းဝိညာဉ်အင်ပါယာ

ရွှီချင်း စကားပြောလိုက်သည်နှင့်ချက်ချင်း သူ့အရှေ့မှ ဧရာမမြွေက အပြင်းအထန် တုန်ယင်သွားပြီး ဝိညာဉ်လှုပ်ခတ်စေနိုင်သော တရှဲရှဲမြည်သံကို ထုတ်လွှတ်လိုက်သည်။

စက်ဝိုင်းသဏ္ဍာန် အသံလှိုင်းများက ဝိညာဉ်ချောက်နက်ထဲမှ အမှောင်ထုတစ်လျှောက်သို့ ပျံ့နှံ့သွားကြသည်။

တစ်ချိန်တည်းမှာ ဧရာမမြွေခေါင်းပေါ်မှ မဟာလောကထဲတွင်…

ရှေးဟောင်းဝိညာဉ်အင်ပါယာ၏ ဧရာမမျက်လုံးအားလုံးက စူးရှစွာ ကျုံ့သွားကြသည်။ အလွန်ပြင်းထန်သော သေခြင်းရှင်ခြင်းသတိပေးမှုက ယခုမှ နိုးထလာသော ရှေးဟောင်းဝိညာဉ်အင်ပါယာ၏ နတ်ဘုရားဝိညာဉ်ကို ထိန်းချုပ်မရစွာ တုန်လှုပ်သွားစေသည်။

၎င်းက ထွက်ပြေးရန် ချက်ချင်း လုပ်ဆောင်လိုက်သည်။ မျက်စိတစ်မှိတ်အတွင်းမှာ လေဟာနယ်လှိုင်းအတတ်အကျများက ရှေးဟောင်းဝိညာဉ်အင်ပါယာ၏ မျက်လုံးအားလုံးထဲမှာ ထွက်ပေါ်လာကြသည်။

ထိုလှိုင်းအတတ်အကျများ ထွက်ပေါ်လာသည်နှင့်တစ်ပြိုင်နက် မျက်လုံးအားလုံးက စတင်ပျောက်ကွယ်သွားကြသည်။

ရွှီချင်း၏ အမူအရာက မပြောင်းလဲသွားချေ။ သူက တည်ငြိမ်စွာ ပြောသည်။

“ ပြန်ရောက်လာစမ်း ”

ရွှီချင်းသည် ဤနေရာသို့ သူရောက်လာသည်နှင့် လေဟာနယ်အားလုံးကို ချိပ်ပိတ်ထားခဲ့သည်။ ထိုထဲမှာ အချိန်သည်လည်း ပါဝင်သည်။

သူ၏ ကျင့်ကြံခြင်းအဆင့်ထက် သာလွန်သောသူ မဟုတ်လျှင် မည်သည့်သက်ရှိမှ သူ့ခွင့်ပြုချက်မရှိဘဲ အပြင်သို့ မထွက်သွားနိုင်ပေ။

သို့ဖြစ်၍ သူ့ထံမှ အကြည့်နှင့် အမိန့်ပေးမှုအောက်မှာ ပျောက်ကွယ်သွားခဲ့သော ရှေးဟောင်းဝိညာဉ်အင်ပါယာ၏ မျက်လုံးများက ပြန်ပေါ်လာကြသည်။

သို့သော်လည်း ၎င်းတို့က မူလတည်နေရာဖြစ်သော မဟာလောကထဲမှာ ထွက်ပေါ်မလာကြချေ။ ယင်းအစား ၎င်းတို့က ဧရာမမြွေ၏ ခန္ဓာကိုယ်ပေါ်မှာ တိုက်ရိုက် ထွက်ပေါ်လာကြသည်။

ရှေးဟောင်းဝိညာဉ်အင်ပါယာ၏ မျက်လုံးအားလုံးက လေထဲမှာ ထွက်ပေါ်လာကြပြီး ပုပ်သိုးဆွေးမြေ့နေသော ဧရာမမြွေ၏ အသွေးအသားထဲသို့ နစ်မြုပ်သွားကြသည်။ ၎င်းတို့က ရုန်းမထွက်နိုင်ကြချေ။

ယခု မျက်လုံးအားလုံးက ပြူးကျယ်နေကြပြီး ပြင်းထန်သော ကြောက်လန့်မှုကို အထင်အရှား ဖော်ပြနေကြသည်။

ကျိုးကျန်းလီနှင့် တခြားလူများက ၎င်း၏ မဟာလောကထဲမှာ မွှေနှောက်ဖျက်ဆီးနေကြောင်း ရှေးဟောင်းဝိညာဉ်အင်ပါယာ သိသော်လည်း ၎င်းက နည်းနည်းမှ မခုခံဝံ့ပေ။

“ ရွှီချင်း… ငါမင်းကို ဘယ်တုန်းကမှ မဆန့်ကျင်ခဲ့ဘူး ”

ရှေးဟောင်းဝိညာဉ်အင်ပါယာ၏ မျက်လုံးအားလုံးက ၎င်း၏ နတ်ဘုရားအတွေးများကို စုစည်းလိုက်ပြီး ကြီးကျယ်မြင့်မြတ်သော အသံကို ထုတ်လွှတ်လိုက်သည်။

သို့တိုင် ထိုအသံ၏ ကြီးကျယ်မြင့်မြတ်မှုအောက်မှာ ဖော်မပြနိုင်သော စိုးရိမ်ကြောင့်ကြမှုနှင့် တုန်လှုပ်ချောက်ချားမှုက ကိန်းအောင်းနေသည်။

ရွှီချင်းသည် ဧရာမမြွေအရှေ့မှ ဟင်းလင်းပြင်ပေါ်မှာ မတ်တတ်ရပ်နေရင်း သူ၏ ညာလက်ကို မြှောက်လိုက်ပြီး ဖမ်းဆုပ်သော လက်ဟန်ကို ပြုလုပ်လိုက်သည်။

သူလှုပ်ရှားလိုက်သည်နှင့်ချက်ချင်း ဧရာမမြွေ၏ တုန်ယင်မှုက အထွတ်အထိပ်သို့ ရောက်ရှိသွားသည်။ ၎င်း၏ ခန္ဓာကိုယ်က ဝေဝါးလာပြီး ၎င်း၏ တရှဲရှဲမြည်သံက အော်ဟစ်ညည်းညူသံအဖြစ် ပြောင်းလဲသွားသည်။

ဧရာမမြွေ၏ ခန္ဓာကိုယ်က စတင်အရည်ပျော်သွားသည်။

မြွေ၏ အသွေးအသားပေါ်မှ ရှေးဟောင်းဝိညာဉ်အင်ပါယာ၏ မျက်လုံးများသည်လည်း နာကျင်သော အော်ဟစ်သံကို ထုတ်လွှတ်လိုက်ကြသည်။ ထို့နောက် မျက်လုံးများက အသွေးအသားထဲမှ ဆွဲခွာခံလိုက်ကြရပြီး ရွှီချင်း၏ အရှေ့မှာ စုဝေးသွားကြသည်။

သေခြင်းအရှိန်အဝါက ၎င်း၏ အကန့်အသတ်သို့ ရောက်ရှိသွားပြီး ပေါက်ကွဲသွားသည်။

ရှေးဟောင်းဝိညာဉ်အင်ပါယာ၏ အော်ဟစ်ညည်းညူသံများက အသနားခံမှုအဖြစ် ပြောင်းလဲသွားသည်။

“ ရွှီချင်း… အတိတ်မှာ ငါမင်းကို အကူအညီပေးခဲ့တယ်လေ ”

“ မင်းအားနည်းနေတဲ့ အချိန်မှာ ငါ့ကို ထပ်ခါထပ်ခါ ရန်စခဲ့ပေမဲ့လည်း ဘယ်တုန်းကမှ ငါမင်းကို ထိခိုက်အောင် မလုပ်ခဲ့ဘူး ”

ရှေးဟောင်းဝိညာဉ်အင်ပါယာ၏ အော်ဟစ်သံကို ကြားသော်လည်း ရွှီချင်းက နှုတ်ဆိတ်နေဆဲပင်။

အတိတ်တုန်းက သူနှင့် ရှေးဟောင်းဝိညာဉ်အင်ပါယာကြားမှ ဆက်ဆံရေးသည် အန္တရာယ်များသော အပေးအယူတစ်ခုမျှသာဖြစ်ကြောင်း ကောင်းမွန်စွာ သူနားလည်သည်။

အတိတ်မှာ တစ်ဖက်လူ သူ့ကို မသတ်ခဲ့သည့် အဓိကအကြောင်းအရင်းက သူ၏ အသုံးဝင်မှုနှင့် သူ့အပေါ် သတိထားမှုကြောင့်သာ ဖြစ်သည်။

ထို့ကြောင့် “ စားတော်ဆက်သခြင်း ”တာဝန်က ရှိလာခဲ့သည်။ နီလာနတ်သမီးနှင့် တိုက်ပွဲမှာ ၎င်းပါဝင်ခဲ့သည့် အကြောင်းအရင်းသည်လည်း ၎င်း၏ ကိုယ့်ကျိုးအတွက်ကြောင့်သာ ဖြစ်သည်။

ထို့ကြောင့် ရွှီချင်းက သူ၏ လက်ကို အကြမ်းပတမ်း ဖျစ်ညှစ်လိုက်သည်။

ဆုတ်ဖြဲခံရသော အသံက ထွက်ပေါ်လာသည့်အခါ ဧရာမမြွေ၏ အသွေးအသားပေါ်မှာ နစ်မြုပ်နေသော ရှေးဟောင်းဝိညာဉ်အင်ပါယာ၏ မျက်လုံး(၉၉)ခုစလုံးက အပြင်သို့ အတင်းအကျပ် ဆွဲထုတ်ခံလိုက်ကြရသည်။

မျက်လုံးအားလုံးက ရွှီချင်း၏ အရှေ့မှာ စုဝေးသွားကြပြီး ဧရာမအသားဘောလုံးတစ်လုံးအဖြစ် ဖိသိပ်ခံလိုက်ကြရသည်။

ထို့ပြင် ဖိအားက ဆက်လက် အားကောင်းလာနေသည်။

“ ရွှီချင်း… မင်းရဲ့ တာအိုလက်တွဲဖော်ကိုတောင် ငါကူညီပေးခဲ့သေးတယ်လေ ”

“ သူ့ရဲ့ အနာဂတ်လမ်းကြောင်းကို ငါကူညီပေးနိုင်တယ်… ငါ့ရဲ့ တည်ရှိမှုက ကျိန်စာအားလုံးကို သူ့ဆီ မကျရောက်အောင် ကာကွယ်ပေးနိုင်တယ်… မင်း သူ့ကို ကာကွယ်ပေးနိုင်တာ ငါသိတယ်… ဒါပေမဲ့ ငါက… ”

“ သူ့အတွက် ကပ်ဘေးဒုက္ခကို ကိုယ်စားခံယူပေးနိုင်တယ် ”

“ ရှေးဟောင်းဝိညာဉ်မျိုးနွယ်စုက သွေးမျိုးဆက်ကျိန်စာသင့်နေတယ်… သူရင်ဆိုင်ရမယ့် ကပ်ဘေးဒုက္ခကို ငါဖြေရှင်းပေးနိုင်တယ် ”

ရှေးဟောင်းဝိညာဉ်အင်ပါယာ၏ မျက်လုံးများက ကြီးမားသော ပြင်ပဖိအားအောက်မှာ ၎င်း၏ နတ်ဘုရားအတွေးများကို အရူးအမူး ပို့လွှတ်လိုက်သည်။

ထိုစကားများက အနည်းငယ် သက်ရောက်မှုရှိဟန် ရ၏။ ၎င်းအပေါ် ဖိနှိပ်နေသော အင်အားက အနည်းငယ် လျော့နည်းသွားသည်။

သို့သော်လည်း ရှေးဟောင်းဝိညာဉ်အင်ပါယာက စိတ်သက်သာရာရစွာ သက်ပြင်းမချနိုင်မီ ရွှီချင်းက သူ၏ ညာလက်ကို ရုတ်တရက် ဖျစ်ညှစ်လိုက်သည်။

မိုးခြိမ်းသံက ရှေးဟောင်းဝိညာဉ်အင်ပါယာ၏ နတ်ဘုရားဝိညာဉ်ထဲမှာ မြည်ဟိန်းသွားသည်နှင့် ရွှီချင်း၏ လက်က ဧရာမအသားဘောလုံး၏ အပေါ်မှ ဗလာလေဟာနယ်ကို ဖမ်းဆုပ်လိုက်သည်။

ရှေးဟောင်းဝိညာဉ်အင်ပါယာ၏ မျက်လုံးအားလုံးက အပြင်းအထန် ကျုံ့သွားကြသည်။

တစ်ချိန်တည်းမှာ စူးရှသော အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။

သူက သူ၏ လက်ထဲမှာ ဖမ်းဆုပ်ထားသော ဗလာလေဟာနယ်ကို စူးစိုက်ကြည့်လိုက်သည်။

ထိုနေရာတွင် တခြားလူများ အာရုံမခံနိုင်သော ရွှေရောင်ချည်မျှင်တစ်မျှင် ရှိသည်။

ယင်းက ချည်မျှင်နှင့် ဆင်တူသော်လည်း အပြည့်အဝ မမှန်ပေ။ တကယ်တော့ ယင်းက ဆံခြည်မျှင်တစ်မျှင် ဖြစ်သည်။

ထိုဆံခြည်မျှင်က ပုံရိပ်ယောင်နှင့် အစစ်အမှန်ကြားထဲမှာ တည်ရှိနေခြင်း ဖြစ်သည်။ ဆံခြည်မျှင်၏ အစွန်းတစ်ဖက်က ရှေးဟောင်းဝိညာဉ်အင်ပါယာ၏ မျက်လုံးများနှင့် ဆက်သွယ်ထားစဉ် အခြားအစွန်းတစ်ဖက်က အဝေးမှ အမှောင်ထုထဲသို့ ဆန့်တန်းနေသည်။

“ ငါခန့်မှန်းထားသလိုပဲ ”

ရွှီချင်းက သူ၏ စိတ်ထဲမှာ တီးတိုးရေရွတ်လိုက်သည်။ ရှေးဟောင်းဝိညာဉ်အင်ပါယာက ယနေ့ထိတိုင် အသက်ရှင်နေခြင်းသည် သူ့ကိုယ်ပိုင်စွမ်းရည်ကြောင့် မဖြစ်နိုင်ဘူးဟု အစကတည်းက ရွှီချင်း သံသယဖြစ်မိသည်။ ၎င်းမှာ ပြင်ပအကူအညီများ သေချာပေါက် ရှိရမည်။

မည်သို့ဖြစ်ပါစေ အကယ်၍ တစ်စုံတစ်ယောက်က စစ်တုရင်အရုပ်တစ်ရုပ်ကို ရွေးချယ်မည်ဆိုလျှင် လူအနည်းစုသာလျှင် ရှေးဟောင်းဝိညာဉ်အင်ပါယာကို ယှဉ်ပြိုင်နိုင်ကြလိမ့်မည်။

“ နောက်ကွယ်က ကြိုးကိုင်သူကတော့… ဒီဆံခြည်မျှင်က ငါ့ကို အဖြေပေးလိုက်ပြီ ”

ရွှီချင်းသည် တမူထူးခြားသော ဆံခြည်မျှင်ကို စစ်ဆေးလေ့လာလိုက်သည်။ ထို့နောက် သူ၏ နတ်ဘုရားစိတ်အာရုံက ဆံခြည်မျှင်နောက်သို့ လိုက်သွားပြီး အဝေးမှ အမှောင်ထုထဲသို့ ဦးတည်သွားသည်။

မည်းမှောင်နေသော ဝိညာဉ်ချောက်နက်က သူ၏ နတ်ဘုရားစိတ်အာရုံအောက်မှာ နေ့အချိန်သဖွယ် ရှင်းလင်းနေသည်။

ဆံခြည်မျှင်၏ လမ်းပြပေးမှုနှင့်အတူ သူက ပစ်မှတ်ကို ရှာဖွေလိုက်သည်။

အသက်ရှူချိန်အနည်းငယ်ကြာပြီးနောက် ရွှီချင်း၏ နတ်ဘုရားစိတ်အာရုံက အသူရာချောက်နက်ထဲမှ မြူခိုးထဲမှာ အိပ်စက်နေသော ဧရာမသားရဲတစ်ကောင်ကို မြင်တွေ့သွားသည်။

၎င်းက မြေပုတ်သင်တစ်ကောင်နှင့် ဆင်တူပြီး ၎င်း၏ တစ်ကိုယ်လုံးက ရွှေရောင်ဖြစ်သည်။

ရွှီချင်း၏ နတ်ဘုရားစိတ်အာရုံက ၎င်းအပေါ်သို့ ကျရောက်သွားသည့်အခိုက် အိပ်စက်နေသော မြေပုတ်သင်က ဆတ်ခနဲ မျက်လုံးဖွင့်လိုက်သည်။

သူတို့နှစ်ယောက်က အကြည့်ချင်း တွေ့ဆုံသွားကြသည်။

မမြင်နိုင်သော အားလှိုင်းဂယက်များက ဝိညာဉ်ချောက်နက်တစ်လျှောက် ပျံ့လွင့်သွားကြသည်။

ရွှေရောင်မြေပုတ်သင် နိုးလာသည့်အခိုက် အဆုံးမဲ့သော ကျိန်စာစွမ်းအားက ဒီရေသဖွယ် စုစည်းသွားပြီး အရပ်ရှစ်မျက်နှာဆီသို့ ရိုက်ခတ်သွားသည်။

၎င်းသည် အမှတ်ကိုးကြယ်တာရာစက်ဝန်း၏ နတ်ဘုရင်လေးပါးထဲမှ ဧရာမသားရဲ ဖြစ်သည်။

သို့သော်လည်း ဤနေရာတွင် ရှိနေသည်မှာ ၎င်း၏ နတ်ဘုရားစိတ်အာရုံမှ အမျှင်တန်းတစ်ခုမျှသာ ဖြစ်သည်။

သို့တိုင် သူတို့နှစ်ယောက်၏ အကြည့်ချင်း တွေ့ဆုံသွားသည့်အခိုက် ရွှီချင်း၏ ဘေးပတ်ဝန်းကျင်မှ လေဟာနယ်က ပရမ်းပတာ လှုပ်ခတ်သွားပြီး ပြိုကွဲပျက်စီးတော့မည့် လက္ခဏာများ ဖော်ပြလာသည်။ အက်ကွဲကြောင်းများက ဟင်းလင်းပြင်တစ်လျှောက် မြန်ဆန်စွာ ပျံ့နှံ့သွားကြပြီး ဝိညာဉ်ချောက်နက်တစ်ခုလုံးကို ဖုံးလွှမ်းသွားကြသည်။

ရွှီချင်းက ယင်းကို ဂရုမစိုက်ပေ။ သူက အေးတိအေးစက် အမူအရာဖြင့် မြေပုတ်သင်ကို စိုက်ကြည့်လိုက်သည်။

ရွှေရောင်မြေပုတ်သင်၏ အကြည့်ထဲမှာလည်း တူညီသော အေးစက်မှုက ထွက်ပေါ်လာသည်။

“ မင်းလက်ထဲက ရှေးဟောင်းဝိညာဉ်အင်ပါယာကို ငါ့ဆီ လွှဲပေးပါ… ဒါဆိုရင် ငါထွက်သွားပေးမယ် ”

အချိန်တစ်ခဏကြာ တိတ်ဆိတ်နေပြီးနောက် ရွှေရောင်မြေပုတ်သင်က ၎င်း၏ နတ်ဘုရားအသံကို ထုတ်လွှတ်လိုက်သည်။ ထိုနတ်ဘုရားအသံ ပဲ့တင်ထပ်သွားသည့်အခိုက် စိတ်ဆန္ဒများ၊ ဝိညာဉ်များနှင့် တည်ရှိမှုအားလုံးက လွှမ်းမိုးဖိနှိပ်ခံလိုက်ရသည်။

ရွှီချင်း၏ အာဏာစက်ဥပဒေသသည်ပင် ထိုစကားများကြောင့် တုန်ယင်သွားသည်။

မည်သို့ဖြစ်ပါစေ ၎င်းက နတ်ဘုရင်တစ်ပါး၏ နတ်ဘုရားစိတ်အာရုံဖြစ်နေဆဲပင်။

သို့တိုင် နတ်ဘုရင်များသည် ရွှီချင်း မရင်းနှီးသောအရာ မဟုတ်ပေ။ သူ၏ အာဏာစက်ဥပဒေသ အသက်ဝင်လာသည်နှင့်ချက်ချင်း မှိတ်တုတ်မှိတ်တုတ် အလင်းရောင်က သူ၏ အရှေ့မှာ ထွက်ပေါ်လာသည်။

ထို့နောက် သူ၏ လက်ထဲမှာ မီးအိမ်တစ်လုံး ထွက်ပေါ်လာသည်။

သူက မီးအိမ်ကို မြင့်မြင့်မြှောက်လိုက်သည်။

မီးအိမ်ထဲမှ နတ်ဘုရင်၏ မျက်လုံးက ရုတ်တရက် ပွင့်သွားသည်။

ဒြပ်ထည်ကင်းမဲ့ပြီး အလွန်ကျယ်ပြောသော ရွှေရောင်အလင်းပင်လယ်က နတ်ဘုရင်၏ မျက်လုံးထဲမှ ပေါ်လျှိုးလာပြီး ရွှေရောင်မြေပုတ်သင်ဆီသို့ ဦးတည်သွားသည်။

ထိုအကြည့်တစ်ချက်အောက်မှာ ဟင်းလင်းပြင်က ပြိုကွဲပျက်စီးသွားပြီး ဘေးပတ်ဝန်းကျင်က တုန်ယင်သွားသည်။ အမြစ်ဖြတ်သုတ်သင်ခြင်းစိတ်ဆန္ဒက စတင်ပေါ်လျှိုးလာသည်။

ရွှေရောင်မြေပုတ်သင်၏ ခန္ဓာကိုယ်က အပြင်းအထန် တုန်ယင်သွားပြီး ၎င်းက ဒယိမ်းဒယိုင် အနောက်ဆုတ်သွားသည်။ ၎င်း၏ အကြည့်က မီးအိမ်ပေါ်သို့ ကျရောက်သွားသည့်အခါ ၎င်း၏ မျက်နှာက မည်းမှောင်သွားသည်။ ထို့နောက် ၎င်းက မထွက်သွားမီ နောက်ဆုံးအနေဖြင့် ရွှီချင်းကို စူးစိုက်ကြည့်လိုက်သည်။

၎င်းက အနောက်ဆုတ်သွားပြီး ဟင်းလင်းပြင်ကို ဆုတ်ဖြဲလိုက်သည်။

နောက်ဆုံးမှာတော့ ၎င်းက ဤရှေးဟောင်းကုန်းမြေပေါ်မှာ အချိန်အတော်ကြာ ၎င်းစီစဉ်ထားခဲ့သော လျှို့ဝှက်အကြံအစည်ကို စွန့်လွှတ်လိုက်ပြီး ၎င်း၏ မူလခန္ဓာကိုယ်ဆီသို့ ပြန်သွားရန် ရွေးချယ်လိုက်သည်။

သို့သော်လည်း…

၎င်းသာ နယ်နိမိတ်စည်းကို သူရေးဆွဲခဲ့စဉ်က ချက်ချင်း ထွက်သွားခဲ့မည်ဆိုလျှင် ရွှီချင်းက ယခုကဲ့သို့ ဝင်ရောက်စွက်ဖက်လိမ့်မည် မဟုတ်ချေ။ ၎င်းက ဤနေရာမှာ ဆက်နေရန် ရွေးချယ်ခဲ့မှတော့ ရွှီချင်းက မည်သို့ကြောင့် ၎င်းကို အကောင်းပကတိအတိုင်း ပြန်လွှတ်ပေးနိုင်မည်နည်း။

ထို့ပြင် ရွှီချင်းက ဤအခွင့်အရေးကို အသုံးချ၍ ပြင်ပအင်အားစုများကို ဤနေရာမှာ ဆက်နေခြင်း၏ နောက်ဆက်တွဲအကျိုးဆက်အား သိစေချင်သည်။

ထို့ကြောင့် ရွှီချင်းသည် မီးအိမ်ကို ဆုပ်ကိုင်ထားရင်း အဝေး၌ အနောက်ဆုတ်သွားနေသော ရွှေရောင်မြေပုတ်သင်ကို ကြည့်လိုက်ကာ တည်ငြိမ်စွာ ပြောသည်။

“ ဖရိုဖရဲတိုင်းတာမှု… ”

ထိုစကားက သူ၏ နှုတ်မှ ထွက်သွားသည့်အခိုက် သူ၏ လက်ထဲမှ မီးအိမ်က အပြင်းအထန် တုန်ခါသွားသည်။ ရှေးဟောင်းအသက်ရှူသံပါဝင်သော အက်ရှရှအသံက ပြိုကွဲပျက်စီးနေသော ဟင်းလင်းပြင်ထဲမှာ ပဲ့တင်ထပ်သွားသည်။

ယင်းက အမှတ်ငါးကြယ်တာရာစက်ဝန်းမှ နတ်ဘုရင်၏ အသက်ရှူငွေ့ ဖြစ်သည်။

ထိုအသက်ရှူသံ ပဲ့တင်ထပ်သွားသည်နှင့်တစ်ပြိုင်နက် ရွှေရောင်အလင်းက နတ်ဘုရင်၏ မျက်လုံးထဲမှ ပေါ်လျှိုးလာပြီး အဆမတန် ကျယ်ပြောသွားသည်။ မျက်စိတစ်မှိတ်အတွင်းမှာ ဟင်းလင်းပြင်တစ်ခုလုံးက ရွှေရောင်ပြောင်းလဲသွားသည်။

ထို့နောက် ရွှေရောင်အလင်း၏ ဖုံးလွှမ်းမှုအောက်မှာ ဤလောကထဲမှ အရာအားလုံးက စတင်ပြောင်းလဲသွားသည်။

ယင်းတို့ထဲမှာ ဟင်းလင်းပြင်၊ အမှောင်ထု၊ မြူခိုးနှင့် မူလခန္ဓာကိုယ်ဆီသို့ ပြန်သွားရန် ကြိုးစားနေသော ရွှေရောင်မြေပုတ်သင်တို့ ပါဝင်ကြသည်။

မြေပုတ်သင်က တုန်ယင်သွားသည်။

၎င်းက နတ်ဘုရင်၏ နတ်ဘုရားအခွင့်အာဏာကို အာရုံခံမိသွားသည်။

ဖရိုဖရဲတိုင်းတာမှု…

ဖရိုဖရဲတိုင်းတာမှုဆိုသည်မှာ အစီအစဉ်တကျရှိသော အရာအားလုံး ဖရိုဖရဲဖြစ်သွားခြင်း ဖြစ်သည်။ ယင်းက တည်ရှိမှုအားလုံး၏ မည်သည့်သဘာဝတရားကိုမဆို အတိုးအလျော့လုပ်နိုင်သော နတ်ဘုရားအခွင့်အာဏာ ဖြစ်သည်။