အခန်း (၄၅၄-၄၅၆)

အခန်း (၄၅၄) သွေးမင်းသား၏ ဒေါသ

သွေးမင်းသားသည် ချူးယွင်ဖန်းအပေါ် အလွန်ထူးခြားသည့် စိတ်ရှည်သည်းခံမှုကို ပြသခဲ့သည်။ ဤမြင်ကွင်းကို တခြားလူများမှ မြင်တွေခဲ့မည်ဆိုလျှင် ၎င်းတို့သည် သွေးမင်းသား၏ စိတ်ရှည်သည်းခံမှုကိုမြင်၍ အမှန်တကယ်အံ့ဩသွားမည်ဖြစ်သည်။

သိရှိထားမှုများအရ သွေးမင်းသားသည် စိတ်ရှည်သူမဟုတ်ပေ။ သွေးမင်းသားသည် အမှန်တကယ်ပင် စိတ်ရှည်သူမဟုတ်ပေ။ ချူးယွင်ဖန်းအပေါ် အလွန်စိတ်ရှည်နေသည့် အကြောင်းအရင်းမှာ သူ့ကို အဖွဲ့ဝင်အဖြစ် ခေါ်ယူလိုခြင်းကြောင့် ဖြစ်သည်။ မင်းသား လေးဦးအနက် တစ်ဦးစီသည် ထူးခြား၍ ထူးချွန်ထက်မြက်သော ပါရမီရှင်များဖြစ်ကြသည်။ ထိုကဲ့သို့ထူးချွန်မှုများကြောင့် ၎င်းတို့ကြားက ပြိုင်ဆိုင်မှုသည်လည်း အလွန်ပြင်းထန်သည်။ ၎င်းတို့ကြားက ပြိုင်ဆိုင်မှုအပြင် ၎င်းတို့၏ အင်အားစုများကို ဖွဲ့စည်းရာတွင်လည်း ပြိုင်ဆိုင်နေကြသည်ဖြစ်ရာ၊ အာဏာနှင့် အကျိုးအမြတ်အတွက် ပြိုင်ဆိုင်နေကြခြင်းဖြစ်သည်။ ၎င်းတို့၏ အင်အားစုများကို မြှင့်တင်ချင်လျှင် ၎င်းတို့ အလိုအပ်ဆုံးအရာသည် ပင်ကိုစွမ်းရည်ဖြစ်သည်။ ချူးယွင်ဖန်းသည် ထိုသို့သော ပင်ကိုစွမ်းရည်ရှိသူဖြစ်သည်။

ထို့ကြောင့် သွေးမင်းသားသည် ချူးယွင်ဖန်းကို အခွင့်အရေး ပေးလိုစိတ်ရှိနေခြင်းဖြစ်သည်။ ရှယင်းယင်းနှင့် အခြားလူများကို လွှတ်ပေးရခြင်းသည် ချူးယွင်ဖန်းကို အဖွဲ့ဝင်အဖြစ် စုဆောင်းခြင်းနှင့်ယှဉ်လျှင် မဖြစ်စလောက် ကိစ္စရပ်လေးသာ ဖြစ်သည်။ သွေးမင်းသား၏ အမြင်တွင်၊ ထိုအပေါင်းအဖော်များသည် ချူးယွင်ဖန်းတမျှ တန်ဖိုးမရှိပေ။ ရှယင်းယင်းနှင့် အခြားလူများသည် လူအများ၏အမြင်တွင် ပါရမီရှင်များအဖြစ် သတ်မှတ်ခံထားရသော်လည်း သွေးမင်းသားအတွက်မူ ၎င်းတို့သည် သမရိုးကျဆန်လွန်းသည်။

သွေးမင်းသားသည် ပြည်ထောင်စုတက္ကသိုလ်မှ လူများစွာကို လိုချင်သလောက် ဖမ်းယူနိုင်ခဲ့သည်။ ထိုသို့ ဖမ်းယူရခြင်းသည် ခက်ခဲသော ကိစ္စရပ်တစ်ခု မဟုတ်ခဲ့ပေ။

ချူးယွင်ဖန်းက တိတ်ဆိတ်သွားသည်။ သွေးမင်းသား၏ အပြုံးသည် တဖြည်းဖြည်း မှိန်ဖျော့လာ၍

"ဟိုလူတွေထွက်ပြေးနိုင်ဖို့၊ ငါ့ကို ဒီမှာ အချိန်ဆွဲတယ်ဆိုတာ ငါသိပါတယ်၊ ဒါပေမယ့် အပိုအလုပ်တွေ မလုပ်ဖို့တော့ မင်းကို ငါအကြံပေးလိုက်မယ်။ မင်းကို ငဲ့ညှာပေးတဲ့အနေနဲ့ ငါသူတို့ကို လွှတ်ပေးပြီးပြီ။ တစ်ခုခုလုပ်ဖို့ကြိုးစားရင်တော့ မင်း နောင်တရလိမ့်မယ်။ မင်းလို အရည်အချင်းရှိတဲ့လူကို ဦးနှောက်ဆေးတာမျိုး မလုပ်ချင်ဘူး။ အဲ့လိုလုပ်တာက မင်းရဲ့အနာဂတ် တိုးတက်မှုကို ဖျက်ဆီးလိုက်တာနဲ့ အတူတူပဲ။ ဒါပေမယ့် စဉ်းစားဉာဏ်မရှိတဲ့ ဇွန်ဘီမျိုးမလိုအပ်ဘူးဆိုပေမယ့် တခြားရွေးချယ်စရာမရှိရင်တော့ လုပ်သင့်ရင်လုပ်ရမယ်လေ မဟုတ်ဘူးလား"

သွေးမင်းသားသည် အမှန်အတိုင်းပြောနေခြင်းဖြစ်သည်။ နတ်ဆိုးဂိုဏ်းသည် ၎င်း၏ ဦးနှောက်ဆေးကြောရေးမူဝါဒဖြင့် လူသိများသော်လည်း အင်အားသုံး၍ ဦးနှောက်ဆေးကြောခြင်းခံခဲ့ရသူများ၏ အနာဂတ်သည် အကန့်အသတ်ဖြင့်ဖြစ်သွားသည်။ ငယ်ရွယ်စဉ်အချိန်ကတည်းက ဦးနှောက်ဆေးကြောထားလျှင် ပို၍ကောင်းမွန်မည်ဖြစ်သည်။ ချူးယွင်ဖန်းကဲ့သို့သော အရွယ်ရောက်ရှိပြီးသူများကို ဦးနှောက်ဆေးကြောသည့် နည်းလမ်းများသည် ပြင်းထန်၍ ပျက်စီးလွယ်သည်။

သွေးမင်းသားသည် ချူးယွင်ဖန်း၏ ရည်ရွယ်ချက်များကို မြင်တွေ့ခဲ့သော်လည်း ဂရုမစိုက်ခဲ့ပေ။

“အဲဒီလိုဆိုရင်လည်း မလေးစားမှုကို ခွင့်လွှတ်ပါ။ ကျွန်တော့်ရဲ့ ဒီဓားချက်ကို ခံယူလိုက်ပါဦး"

ချူးယွင်ဖန်းသည် တစ်ခွန်းချင်းစီ ပြောဆိုလိုက်သည်။ ရုတ်တရက်ဆိုသလိုပင် ကျယ်လောင်သော အသံနှင့်အတူ သူ၏လက်ထဲမှ ကျူးချွဲ့သည် သွေးမင်းသားကို ခုတ်ပိုင်းလိုက်သည်။ တည်နေရာမှာ သွေးမင်းသား၏လည်ပင်းဖြစ်၍ ကျူးချွဲ့သည် ၎င်းနေရာကိုဖြတ်သွားတော့မည်ဖြစ်သည်။

"မင်းကများ"

သွေးမင်းသား၏ မျက်လုံးများသည် ဒေါသကြောင့် ပြူးကျယ်လာခဲ့ရာ၊ ကြောက်မက်ဖွယ် သွေးစွမ်းအင်များ သူ၏ခန္ဓာကိုယ်မှ ထွက်ပေါ်လာသည်။ သူ၏အမြင်တွင် ချူးယွင်ဖန်းကို အလွန်သည်းခံနေခဲ့ပြီဖြစ်သော်လည်း သူ၏ ကောင်းမွန်သည့် ရည်ရွယ်ချက်များကို ချူးယွင်ဖန်းက လျစ်လျူရှုရဲခဲ့သည်။

ချူးယွင်ဖန်းသည် ရိုးရှင်းစွာပင် သေကြောင်းကြံစည်နေခြင်းဖြစ်သည်။

ချွင်

သွေးမင်းသားသည် ကျူးချွဲ့၏ ခုတ်ပိုင်းမှုကိုတားဆီးရန် သူ၏လက်ကို မြှောက်လိုက်သည်။ လေးလံသောဓားသည် သွေးမင်းသား၏ အကာအကွယ်စွမ်းအင်ဒိုင်းကို ဖြတ်ကျော်နိုင်ခြင်းမရှိပေ။ ၎င်းနှင့် ချူးယွင်ဖန်းတို့ကြားက ကွာဟချက်သည် အလွန်ကြီးမားသည်။

သွေးနီရောင်ချီစွမ်းအင်သည် ချူးယွင်ဖန်း၏တိုက်ခိုက်မှုကို တားဆီးခဲ့သည်။

"ဒီလောက်သေချင်နေမှတော့၊ မင်းဆန္ဒကိုဖြည့်ဆည်းပေးရတာပေါ့"

သွေးမင်းသားက ဟိန်းဟောက်လိုက်သည်နှင့်တစ်ပြိုင်နက်၊ သူ၏ခန္ဓာကိုယ်အတွင်းမှ သွေးစွမ်းအင်များ ချက်ချင်း ပေါ်ထွက်လာကာ ချူးယွင်ဖန်းကို သူ၏ လက်သည်းများဖြင့် ခုတ်ပိုင်းလိုက်သည်။

ဘန်း

ဤခြေသည်းသည် ချူးယွင်ဖန်း၏ခန္ဓာကိုယ်ပေါ်သို့ တိုက်ရိုက်ကျရောက်သွားသည်။ ချူးယွင်ဖန်း၏ ခန္ဓာကိုယ်ပေါ်တွင် ကျောက်စိမ်းရောင်ကဲ့သို့ အရောင်တစ်ခု ပေါ်လာခဲ့၍ ယင်းသည် သူ၏ ဧကရာဇ်၏ ခန္ဓာကိုယ်နည်းစနစ် ကို အသက်သွင်းလိုက်ခြင်းဖြစ်သည်။ သူသည် သွေးမင်းသား၏ လက်သည်းဖြင့် ထိုးဖောက်ခံရခြင်း မရှိခဲ့သော်လည်း လွင့်ပျံသွားခဲ့သည်။ ၎င်းတိုက်ခိုက်မှုသည် ကြိုးပြတ်နေသည့် စွန်တစ်ခုနှယ် ချူးယွင်ဖန်းကို လွင့်ပျံသွားစေသည်။

ချူးယွင်ဖန်းသည် ပါးစပ်အပြည့်သွေးများ အန်ထွက်လာခဲ့၍ ဒဏ်ရာ ပြင်းထန်စွာ ရရိခဲ့သော်လည်း မြေပြင်ပေါ်သို့ ကျရောက်ပြီးနောက်၏ သူ၏ ပထမဆုံးတုံ့ပြန်မှုမှာ ထွက်ပြေးရန်သာဖြစ်သည်။

"ဉာဏ်များတဲ့ကောင် သေပေတော့"

သွေးမင်းသားက ဒေါသတကြီး အော်ဟစ်လိုက်သည်။ သူသည် ချူးယွင်ဖန်း၏လှည့်စားမှုအောက်သို့ရောက်သွားခဲ့ခြင်းဖြစ်ကြောင်း ချက်ချင်း သတိပြုမိသွားသည်။ ချူးယွင်ဖန်းသည် မိမိကို အချိန်ဆွဲ၍ မခံချိမခံသာဖြစ်အောင် ပြုလုပ်နေခြင်းဖြစ်သည်။ ချူးယွင်ဖန်းသည် မိမိကိုတိုက်ခိုက်ရန် မက်လုံးပေးပြီးနောက် တိုက်ခိုက်မှု အကွာအဝေးမှ လွတ်မြောက်ရန် မိမိ၏ တိုက်ခိုက်စွမ်းအင်ကို အချိန်ယူကာ ကသုတ်ကပျာ ထွက်ပြေးတော့သည်။

သွေးမင်းသားလေးသည် ချူယွင်ဖန်းကို ရိုက်ချက်တစ်ခုတည်းဖြင့် မည်သို့ကြောင့်မဖမ်းနိုင်ခဲ့သည်ကို နားမလည်နိုင်ခဲ့ပေ။ သူ၏မျက်နှာတွင် ဒေါသအမူအရာများ ပေါ်လာသည်။

"ချူးယွင်ဖန်း၊ မင်းလွတ်မယ်လို့ ထင်နေတာလား။ မင်းကတော့ တုံးချက်ပဲ”

သွေးမင်းသားသည် ကြီးမားလှသော သွေးစွမ်းအင်များဖြင့် ချူးယွင်ဖန်း၏အနောက်သို့ လိုက်သွားခဲ့သည်။ လျှင်မြန်သော ရွေ့လျားမှုအရှိန်ကြောင့် သူသည် တယ်လီပို့နေသကဲ့သို့ ဖြစ်နေသည်။ သူသည် မျက်စိတစ်မှိတ်အတွင်းမှာပင် တောင်ကုန်းတစ်ခု၏နောက်ကွယ်မှ ရှောင်ထွက်သွားခဲ့သော ချူးယွင်ဖန်းဆီသို့ ရောက်ရှိသွားသည်။ သို့သော် ထိုနေရာသို့ ရောက်သည့်အခါ ချူးယွင်ဖန်းသည် ပျောက်ချင်းမလှ ပျောက်ကွယ်သွားသည်ကို တွေ့လိုက်ရသည်။

'သူ မြေလျှိုးသွားတာလား' ဟုသွေးမင်းသားက စဉ်းစားနေခဲ့သည်။ မျက်လုံးများကိုမှိတ်၍ သူ၏အာရုံဖြင့် ကြည့်ရှု့ခဲ့သော်လည်း ပတ်ဝန်းကျင်တွင် မည်သည့်သက်ရှိများ၏ အရိပ်အယောင်ကိုမျှ မတွေ့ခဲ့ပေ။ သူသည် မြေအောက်ရှိ မွန်းစတားများကိုပင် အာရုံခံနိုင်ခြင်းမရှိပေ။ သူ၏ခန္ဓာကိုယ်အတွင်းမှ ကြောက်မက်ဖွယ် အင်အားကြီး သွေးစွမ်းအင်များကို အာရုံခံမိသော မွန်းစတားများအားလုံးသည် ကြောက်လန့်၍ထွက်ပြေးသွားကြသည်။

သာမန်မွန်းစတားများကို ချေမှုန်းရန် မွေးဖွားခြင်းနယ်မြေအဆင့် ကျွမ်းကျင်သူများ၏ စွမ်းအားသည် လုံလောက်သည်ထက်ပင် ပိုသည်။ ၎င်းတို့ မည်သို့မျှ ဤနေရာတွင် နေနိုင်ဦးမည်နည်း။ ထို့ကြောင့် သွေးမင်းသားသည် မည်သည်ကိုမှ အာရုံမခံစားနိုင်ပေ။ ၎င်းကိုကြည့်ခြင်းအားဖြင့် ချူးယွင်ဖန်းသည်လည်း အဝေးသို့ပြေးနိုင်ခဲ့မည် မဟုတ်ပေ။

"သေစမ်းကွာ"

သွေးမင်းသားသည် ချူးယွင်ဖန်းကို အာရုံခံနိုင်ခြင်းမရှိတော့သည်ကို သေချာသည်နှင့် အလွန်ဒေါသထွက်လာသည်။ သူ၏ ဒေါသသည် မြေပြင်ကျယ်တွင် မီတာတစ်ထောင်အတွင်း ကွဲအက်တိမ်မြုပ်မှုများ ဖြစ်ပွားခဲ့သည်အထိ ပေါက်ကွဲထွက်သွားတော့သည်။

နောက်ဆုံးတွင် ချူးယွင်ဖန်းကို ရှာမတွေ့နိုင်ကြောင်း သေချာသောအခါ သွေးမင်းသားသည် နေရာမှ ထွက်ခွာသွားခဲ့သည်။ ချူးယွင်ဖန်း မည်ကဲ့သို့ လွတ်မြောက်ခဲ့သည်ကို သူမသိသော်လည်း ချူးယွင်ဖန်းသည် ယခုမှစ၍ သူ၏ သတ်ဖြတ်ရမည့်စာရင်းတွင် ပါဝင်နေပြီဖြစ်သည်။ သူသည် ချူးယွင်ဖန်းနှင့် နောက်တစ်ကြိမ် ထပ်မံ၍ တွေ့ဆုံခဲ့လျှင် မည်သည့်စကားမှ ပြောဆိုတော့မဟုတ်ဘဲ ချူးယွင်ဖန်းကို နေရာမှာတင် သတ်ဖြတ်မည်ဖြစ်သည်။

ဤနေ့သည် မတော်တဆမှု သက်သက်သာဖြစ်သည်။ သွေးမင်းသားသည် မိမိမှ အသေအချာအနိုင်ရမည်ဟု ထင်မှတ်ထားခဲ့သည်။ ချူးယွင်ဖန်းက မည်သို့မျှ လွတ်မြောက်ခဲ့ခြင်းဖြစ်သနည်း။ ချူးယွင်ဖန်းသည် ဤအာတိတ်သဲကန္တာရတွင် ပုန်းခိုရန်နေရာရှိမည် မဟုတ်ပေ။ သို့သော် ဤလက်တွေ့သည် သွေးမင်းသား၏ ပြိုင်ဘက်ကင်း ယုံကြည်မှုကို ပြင်းထန်စွာ ရိုက်ခတ်ခဲ့သည်။ သူလျှင်ပင် အမှားလုပ်မိခြင်းဖြစ်၏။ ချူးယွင်ဖန်းသည် ပျောက်ချင်းမလှ ပျောက်ကွယ်သွားခဲ့သည်။ သွေးမင်းသားသည် ချူးယွင်ဖန်းက မည်သို့မျှ ရုတ်တရက် ပျောက်ကွယ်သွားသည်ကို မသိသော်လည်း၊ သူ့ကို ရှာမတွေ့ခဲ့ပေ။

ပြင်းပြင်းထန်ထန် ဒေါသထွက်နေသော သွေးမင်းသားသည် ထိုနေရာတွင် နှစ်ရက်နှင့်နှစ်ညတိတိ စောင့်ဆိုင်းနေခဲ့သည်။ နောက်ဆုံးတွင် နှစ်ရက်ကြာပြီးသည့်နောက်မှ ထွက်သွားတော့သည်။ ချူးယွင်ဖန်းသည် ဤနေရာတွင် ရှိမနေခဲ့ကြောင်းကို အတည်ပြုခဲ့ပြီးဖြစ်သည်။ ချူးယွင်ဖန်းသည် နှစ်ရက်နှင့်နှစ်ညတိတိ မည်သို့ပင်သတိထား၍နေပါစေ၊ သွေးမင်းသား၏ ထိုးထွင်းဉာဏ်ကို ဖုံးကွယ်ထားနိုင်မည်မဟုတ်ပေ။

နောက်ဆုံးတွင် သူ့ကို ရှာဖွေတွေ့ရှိနိုင်လိမ့်မည်ဖြစ်သည်။

ချူးယွင်ဖန်းသည် နည်းလမ်းတစ်ခုခုကိုအသုံးပြု၍ ဤနေရာမှ ထွက်ခွာသွားခဲ့သည်မှာ အသေအချာပင်ဖြစ်၍၊ လိုက်လံဖမ်းဆီးရန် အဓိပ္ပာယ်ရှိမည်မဟုတ်ပေ။ ချူးယွင်ဖန်းသည် သွေးမင်းသား ထွက်သွားပြီး အချိန်အတော်ကြာမှသာ လေထုအတွင်းမှ ထွက်ပေါ်လာခဲ့သည်။ သူသည် ရုတ်တရက် ပျောက်ကွယ်သွားခြင်း မဟုတ်ပေ။ သူသည် တောင်မြစ်ပန်းချီကား၏ နေရာလွတ်အတွင်းတွင် ပုန်းအောင်းနေခဲ့ခြင်းဖြစ်သည်။ ထို့ကြောင့် သွေးမင်းသားက သူ့ကို မရှာဖွေနိုင်ခဲ့ခြင်းဖြစ်သည်။

သို့ဖြစ်သော်လည်း ချူးယွင်ဖန်းသည် အဆုံးတွင် နှစ်ရက်နှင့် နှစ်ညတိုင်အောင် ပုန်းနေခဲ့ရသေးသည်။

အခန်း (၄၅၅) သွေးနတ်ဆိုးများနှင့် ကျောင်းသားကောင်စီ

သွေးမင်းသား ထွက်သွားကြောင်း သေချာပြီးနောက် ချူးယွင်ဖန်းက သက်ပြင်းချလိုက်သည်။ သွေးမင်းသားသည် အလွန် ကြောက်မက်ဖွယ်ကောင်းသူဖြစ်သည်။

သွေးမင်းသားက ကျန်းလင်းရှောင်နှင့်ပတ်သက်၍ သူမည်သို့မျှ မလုပ်နိုင်ကြောင်းဆိုခဲ့သော်လည်း ၎င်းတို့နှစ်ဦးကြားတွင် မည်သူက ပို၍အင်အားကြီးသည်ကို ချူးယွင်ဖန်းမဆုံးဖြတ်နိုင်ပေ။ သူသည် မွေးဖွားခြင်းနယ်မြေအဆင့်သို့ မရောက်ရှိသေးသော်လည်း သွေးမင်းသားသည် ကျန်းလင်းရှောင်ထက် ပို၍အန္တရာယ်များသည်ဟု ချူးယွင်ဖန်းက ယူဆသည်။ ကျန်းလင်းရှောင်သည် ပြည်ထောင်စုတွင်ရှိနေရန် လိုအပ်သောကြောင့် စိတ်ဒွိဟဖြစ်ခြင်း အချို့ရှိနေဆဲဖြစ်သော်လည်း သွေးမင်းသားသည် ကွဲပြားခြားနား၏။ သူသည် ပြည်ထောင်စု၏ တစ်စိတ်တစ်ပိုင်း မဟုတ်သောကြောင့် မည်သည့် ကိုယ်ကျင့်တရားစောင့်ထိန်းမှုများမရှိဘဲ တိုက်ခိုက်နိုင်သည်။

ချူးယွင်ဖန်းသည် တောင်မြစ်ပန်းချီကားထဲတွင် နှစ်ရက်ကြာ ပုန်းအောင်းနေခဲ့သည်။ သွေးမင်းသား၏ လက်ဖဝါးဖြင့် ရိုက်ခတ်ခံရသော ဒဏ်ရာ သက်သာသွားခဲ့ခြင်းမှာ ကြာမြင့်ပြီဖြစ်သည်။ သို့သော် သူ၏မျက်နှာတွင် လေးနက်သော အမူအရာတစ်ခု ပေါ်လာသည်။ ဤသည်မှာ သွေးမင်းသားပြောကြားခဲ့သော စကားကြောင့်သာဖြစ်သည်။ မွန်းစတာဂိုဏ်းသည် ပြည်ထောင်စုကို ဆန့်ကျင်ရန် ကြီးမားသော ပူးပေါင်းကြံစည်မှုတစ်ခုကို စီစဉ်နေပြီဖြစ်ရာ၊ သွေးမင်းသား ပြောကြားခဲ့သည့်စကားအရ၊ ၎င်းအကြောင်းအရာကို လူအများက သိရှိထားနိုင်သည်ဖြစ်ရာ၊ ဖုံးကွယ်မထားသည့် ပူးပေါင်းကြံစည်မှုတစ်ခု ဖြစ်နိုင်ချေများသည်။

၎င်းသည် သတိပေးချက်မရှိဘဲ တိုက်ခိုက်မည့် ပူးပေါင်းကြံစည်မှုဖြစ်လျှင် ဂိုဏ်းသည် ပြည်ထောင်စုကို ဆိုးရွားစွာ ထိခိုက်ပျက်စီးစေနိုင်သည်။ သို့သော်၊ ၎င်းသည် လူသိများ၍ ပွင့်လင်းမြင်သာသော ပူးပေါင်းကြံစည်မှုတစ်ခုဖြစ်ခဲ့လျှင်မူ ဤသို့ယုံကြည်မှုမျိုးကို မည်သို့ရခဲ့သနည်း။

အကယ်၍ ၎င်းသည် အင်အားချင်း ထိပ်တိုက်တွေ့ဆုံမှုဖြစ်လျှင်၊ ပြည်ထောင်စုသည် နတ်ဆိုးဂိုဏ်းကို မြေပြင်ပေါ်သို့ ရိုက်ချရန် လက်တစ်ဖက်တည်းသာ လိုအပ်မည်ဖြစ်သည်။ နှစ်ဘက်ကြား ခွန်အားကွာခြားချက်သည် ကောင်းကင်နှင့်မြေကြီးတမျှ ကြီးမားလှသည်။

သို့သော် သွေးမင်းသားက ဤသို့ပြောခဲ့လျှင်၊ ဤအရာသည် ဖြစ်လာနိုင်ချေများ၏။ သွေးမင်းသားသည် တွေးတောဆင်ခြင်ခြင်းမရှိဘဲ စကားပြောမည်ဟု ချူးယွင်ဖန်းက မထင်ထားပေ။ အချက်အလက်ကျကျ ပြောရမည်ဆိုလျှင် ထိုသို့ပြောကြားရန်လည်း လိုအပ်မည်မဟုတ်ပေ။ အဆုံးတွင် သွေးမင်းသား၏ လက်ထဲတွင် အောင်နိုင်မှုကို ဆုတ်ကိုင်ထားနိုင်သည်ဖြစ်သဖြင့်၊ ချူးယွင်ဖန်းတွင် ဤသို့လွတ်မြောက်ရန် နည်းလမ်းရှိလိမ့်မည်ဟု မည်သူမျှ သိလိမ့်မည်မဟုတ်ပေ။ ထို့ကြောင့် ချူးယွင်ဖန်းသည် ဤပူးပေါင်းကြံစည်မှုနှင့် ပတ်သက်၍ မည်သူ့ကိုမျှ မသိထားကြမည်ကို စိုးရိမ်နေခြင်းဖြစ်သည်။

ချူးယွင်ဖန်းသည် ထိုသို့သောကိစ္စရပ်များကို ထိတွေ့ကိုင်တွယ်နိုင်ခြင်း မရှိခဲ့သောကြောင့်လည်း ဖြစ်ကောင်းဖြစ်နိုင်သည်။ သို့သော် မည်သို့ပင်ဆိုစေကာမူ၊ သူသည် အန္တရာယ်ကို ခံစားနိုင်၏။ သွေးမင်းသား ပြောခဲ့သည့်အတိုင်း မုန်တိုင်း အစပျိုးနေပြီဆိုသည်မှာ ဖြစ်ကောင်းဖြစ်နိုင်သည်။ ချူးယွင်ဖန်းနှင့် သူ၏မိသားစုတစ်စုလုံးသည် ပြည်ထောင်စုကို အမှီပြု၍ ရှင်သန်နေကြခြင်းဖြစ်သည်။ ပြည်ထောင်စု ပြိုလဲခဲ့လျှင် ဖြစ်ပွားမည့်အကျိုးဆက်သည် မှန်းဆလို့ပင် ရနိုင်မည်မဟုတ်ပေ။

'ထားလိုက်ပါ။ ဒီလိုကိစ္စမျိုးက ငါ ဝင်ပြီးစွက်ဖက်လို့ရတဲ့ ဟာမျိုးမဟုတ်ဘူး။ ဒီနေရာက သွားတာပဲ ပိုကောင်းမယ်' ချူးယွင်ဖန်းက တွေး၏။

ချူးယွင်ဖန်းသည် သူ၏မှတ်တမ်း စစ်ဆေးပြီးနောက် ပြည်ထောင်စုတက္ကသိုလ်သည် လွန်ခဲ့သည့် နှစ်ရက်အတွင်းတွင် အမှတ်သုံးသန်းကို သူ့ထံသို့ လွှဲပြောင်းပေးခဲ့ကြောင်း တွေ့ရှိခဲ့သည်။ အတော်အတန်ကြာစဉ်းစားပြီးနောက်၊ ကုလန်ကို နှိမ်နင်းခြင်းအတွက် ဆုလာဘ်ဖြစ်မည်ဟု သူကောက်ချက်ချခဲ့သည်။ ဆုကြေးကို အညီအမျှ ခွဲထားသင့်သော်လည်း ရှယင်းယင်းနှင့် အခြားလူများက မိမိကို ပိုပိုသာသာပေးထားခဲ့ကြောင်း သိသာထင်ရှားသည်။

ချူးယွင်ဖန်းသည်လည်း ဤအရာကို ကန့်ကွက်ခြင်းမရှိဘဲ ဖြစ်သင့်ဖြစ်ထိုက်သည်ဟု ထင်မှတ်သည်။ အဆုံးတွင် သူသည် နောက်တန်းတွင် ကာကွယ်ရန် နေကျန်ရစ်၍ အလွန်အားစိုက်ထုတ်ခဲ့သည်။

"ဒီသစ္စာဖောက်တွေကို သတ်ရတာ တကယ်အကျိုးရှိတာပဲ"

ချူးယွင်ဖန်း တစ်ယောက်တည်း ရေရွတ်လိုက်သည်။ သာမာန်အခြေအနေအောက်တွင်ဖြစ်ပါက၊ ကျောင်းသားအသစ်များကို အမှတ်သုံးသန်း ပေးဆောင်နိုင်မည့် မစ်ရှင်များစွာ ရှိလိမ့်မည်မဟုတ်ပေ။

ရုတ်တရက်၊ ချူးယွင်ဖန်းက သူ၏ စာဝင်ပုံးမှ စာတိုတစ်ခု လက်ခံရရှိခဲ့သည်။ ၎င်း၏ သူငယ်ချင်းတစ်ဦးမှ ပေးပို့ခဲ့ခြင်း မဟုတ်ဘဲ၊ ပြည်ထောင်စုတက္ကသိုလ် ကျောင်းသားကောင်စီမှ ပေးပို့သော စုပေါင်း သတင်းစကားသာဖြစ်သည်။ သတ်မှတ်ထားသော အကွာအဝေးအတွင်းတွင် ရှိနေသည့် ပြည်ထောင်စုတက္ကသိုလ် ကျောင်းသားတိုင်းမှ လက်ခံရရှိမည်ဖြစ်သည်။

[ကျောင်းသားကောင်စီသည် သွေးနတ်ဆိုးများကို သုတ်သင်ချေမှုန်းနေပါသည်။ ပြည်ထောင်စုတက္ကသိုလ်မှ ကျောင်းသားကျောင်းသူ အားလုံးကို မိမိတို့ တတ်စွမ်းသမျှ ဆောင်ရွက်ကြပါရန် တိုက်တွန်းအပ်ပါသည်။]

ချူးယွင်ဖန်းက ပြည်ထောင်စုတက္ကသိုလ်မှ ပေးပို့ခဲ့သော စာတိုကိုဖတ်ပြီးသည့်နောက် ထို သွေးနတ်ဆိုးများကို ရှာဖွေရန် စွယ်စုံကျမ်းကို ချက်ချင်း ဖွင့်ကြည့်လိုက်သည်။

သွေးနတ်ဆိုးများသည် အာတိတ်သဲကန္တာရတွင် အခြေစိုက်နေထိုင်သော ဂိုဏ်းတစ်ခုဖြစ်သည်။ ဂိုဏ်းသည် ၎င်း၏အမည်အတိုင်းပင်ဖြစ်ရာ၊ အလွန်အမင်း သွေးဆာကြသူများဖြစ်ကြသော်လည်း အမှန်တကယ် ခွန်အားမကြီးကြပေ။ သွေးနတ်ဆိုးများ၏ နောက်လိုက်များအနက် လူသိများသည့် တစ်ဦးတည်းသောကျွမ်းကျင်သူ၊ ၎င်းတို့၏ဂိုဏ်းချုပ်သည် မရီးဒျန်သန့်စင်ခြင်းအဆင့်၏ အထွတ်အထိပ်တွင်သာရှိသည်။ ထိုသို့သော ဂိုဏ်းကို အာတိတ် သဲကန္တာရတွင် သာမန်ဂိုဏ်းတစ်ခုဟု ယူဆနိုင်သည်။ ပြည်ထောင်စုနှင့် နှိုင်းယှဥ်ရန်မဆိုနှင့် နတ်ဆိုးဂိုဏ်းနှင့် နှိုင်းယှဉ်လျှင်ပင် အင်အားကွာခြားချက်မှာ ကြီးမားလွန်းသည်။ သွေးမင်းသားသည် သွေးနတ်သားများကို လက်တစ်ကမ်းတည်းဖြင့် အလွယ်တကူ သုတ်သင်နိုင်သည်။

သွေးနတ်ဆိုးများသည် အာတိတ်သဲကန္တာရတစ်ခုလုံးတွင် ရာဇ၀တ်မှုမျိုးစုံကို ကျူးလွန်ခဲ့ကြသော်လည်း ၎င်း၏သေးငယ်သောအရွယ်အစားကြောင့် ပြည်ထောင်စု၏အာရုံကို မဆွဲဆောင်နိုင်ခဲ့ပေ။ ပြည်ထောင်စုတက္ကသိုလ်လျှင် သွေးနတ်ဆိုးများကို ဂရုစိုက်ခြင်းမရှိလှပေ။ သို့သော်၊ လွန်ခဲ့သည့် နှစ်ပတ်က ဖြစ်ပွားခဲ့သော မွန်းစတားအုပ်တွင် သွေးနတ်ဆိုးများပါဝင်ဝံ့လိမ့်သည်အထိ ရဲတင်းလိမ့်မည်ဟု မထင်မှတ်ထားကြပေ။

ထိုဝိုင်းရံမှုကြောင့် ပြည်ထောင်စုတွင် လူတစ်သန်းကျော် သေဆုံးခဲ့ရသည်။ ဒဏ်ရာရသူ အရေအတွက်မှာလည်း သေဆုံးသူဦးရေထက် အဆပေါင်းများစွာ များပြားသဖြင့်၊ ပြည်ထောင်စုက အကြီးအကျယ်နစ်နာခဲ့သည်။ မြို့တော်ကို တိုက်ခိုက်နေသော တပ်ဖွဲ့များထဲတွင် အပြင်းအထန်နစ်နာခဲ့သည်မှာ မွန်းစတားများဖြစ်သည်။ ၎င်းတို့အနက်မှ တစ်ကောင်တစ်လေမျှ မလွတ်မြောက်ခဲ့ခြင်းမရှိပေ၊ ဤမွန်းစတားအုပ်၏ နောက်ကွယ်တွင်ရှိနေသည့် အကြီးမားဆုံးကြိုးကိုင်သူမှာ နတ်ဆိုးဂိုဏ်းသာဖြစ်သည်။

သို့သော် ဤတစ်ကြိမ်တွင် အရာအားလုံးကို ကြိုးကိုင်ခဲ့ခြင်းမှာ နတ်ဆိုးဂိုဏ်း တစ်ခုတည်းတင် မဟုတ်ပေ။ သွေးနတ်ဆိုးများကဲ့သို့ သေးငယ်သော ဂိုဏ်းအများအပြားပါဝင်ခဲ့၍ အလွန်ကြီးမားသော သွေးကြွေးများကို ဖြစ်ပေါ်စေခဲ့သည်။

ပြည်ထောင်စုတက္ကသိုလ်၏ ကျောင်းသားကောင်စီသည် ဆိုးရွားစွာ သေဆုံးသွားခဲ့သော ပြည်သူသန်းပေါင်းများစွာ၏ သွေးကြွေးကို ပြန်လည်ပေးဆပ်ခြင်းရန် ပြည်ထောင်စု၏ ညွှန်ကြားချက်ကို လိုက်နာခဲ့သည်။ ဤသည်မှာ ပြည်ထောင်စု၏ မျက်လုံး တစ်လုံးအတွက် မျက်လုံးတစ်လုံးကို ပေးဆပ်မည့် တစိုက်မတ်မတ် တွေးခေါ်မှုဖြစ်သည်။ ချူးယွင်ဖန်းသည် နားမလည်စွာဖြင့် အံ့ဩမှင်သက်နေမိသည်။ သွေးနတ်ဆိုးများကဲ့သို့ ဤဂိုဏ်းငယ်များ စိတ်ရူးဖောက်ကုန်ခြင်းလော။

နတ်ဆိုးဂိုဏ်းသည်မူ ၎င်းတို့တွင် နက်ရှိုင်းသော အရင်းအမြစ်ရှိနေခြင်းကြောင့်၊ ပြည်ထောင်စုကို ဆန့်ကျင်ရဲခြင်းဖြစ်သည်။ သွေးနတ်ဆိုးများ၏ခေါင်းဆောင်သည် မရီးဒျန်သန့်စင်ခြင်းအဆင့်၏ အထွတ်အထိပ်တွင်သာရှိ၍ သေးငယ်သော ဂိုဏ်းတစ်ခုမျှသာဖြစ်သော်လည်း ပြည်ထောင်စုကို ပွင့်ပွင့်လင်းလင်း ရန်စရဲကြသည်။ ဤသည်မှာ သေကြောင်းကြံစည်နေခြင်း မဟုတ်လော။

ပြည်ထောင်စုသည် ၎င်းတို့ကို ကိုင်တွယ်ဖြေရှင်းခြင်းမရှိခဲ့ခြင်းမှာ ဖြေရှင်း၍မရနိုင်သောကြောင့် မဟုတ်ပေ။ ပြည်ထောင်စုတွင် မြောက်မြားစွာသော ရန်သူများရှိနေသောကြောင့်ဖြစ်သည်။ ပြည်ထောင်စုကို အမှန်တကယ် ခြိမ်းခြောက်နိုင်သည်မှာ၊ မရေမတွက်နိုင်သော မွန်းစတားများနှင့် မွန်းစတာဂိုဏ်းဖြစ်သည်။ ဤဂိုဏ်းငယ်များသည် အာတိတ်သဲကန္တာရတွင် ပုန်းခို၍ ထွက်လာခဲ့ခြင်းမရှိလျှင် ကောင်းမွန်မည်ဖြစ်သော်လည်း ၎င်းတို့သည် ယခုအချိန်တွင် ရဲဝံ့စွာထွက်လာ၍ ဒုက္ခရှာရဲကြသည်။ ဤသည်မှာ ၎င်းတို့အားလုံး အလျင်အမြန်ကျရှုံးချင်နေကြခြင်းကြောင့် မဟုတ်သလော။

သတင်းအလုံအလောက်မရှိသည့် အခြေအနေမျိုးတွင် သွေးနတ်ဆိုးများသည် ပြည်ထောင်စုကို အကြီးအကျယ်ပျက်ဆီးစေမည့် အခွင့်အရေးကို ရယူလိုခြင်းဟုသာ ချူးယွင်ဖန်းက ခန့်မှန်းနိုင်သည်။ နေရာတိုင်းတွင် ရူးနှမ်းနေသူများ ရှိနေပုံရသည်။

'အခြားတစ်ယောက်ယောက်က ဒီဆင့်ခေါ်စာ ပို့ထားရင် ဂရုစိုက်မှာမဟုတ်ပေမယ့် ဒါကကျောင်းသား ကောင်စီကနေဆိုတော့ သွားတော့ ကြည့်သင့်တယ်' ချူးယွင်ဖန်းက သူ၏ နှုတ်ခမ်းထောင့်များ တွန့်ကွေးသွားသည်အထိ အေးစက်စွာပြုံးလိုက်သည်။

လတ်တလောတွင်၊ ကျောင်းသားကောင်စီ၏ ကောင်းမှုဖြင့် ချူးယွင်ဖန်းအပေါ်သို့ အများအမြင်သည်ဆိုးရွားနေခဲ့သည်။ ကျောင်းသားကောင်စီက ချူးယွင်ဖန်းကို သိက္ခာကျဆင်းစေရန် များစွာ ပံ့ပိုးပေးခဲ့သည်။ ယခုအချိန်တွင် အထက်လူကြီးများကို ဆန့်ကျင်သူအဖြစ် လူအများကမှတ်ယူကြသည်။ ထို့ကြောင့် မိမိကို နေ့ရောညပါ လူသိရှင်ကြားဖြစ်သည်အထိ ထုတ်ပြန်ပေးသည့် ကျောင်းသားကောင်စီကို ကျေးဇူးတင်ရမည်မှာ အသေအချာပင်ဖြစ်သည်။ ချူးယွင်ဖန်းသည် ဤအရာများကို တွေးတော၍ မိုးကြိုးတောင်ပံသားရဲကို ခေါ်ဆောင်ကာ သွေးနတ်ဆိုးများ တည်ရှိရာ သွေးဆာသောမြို့ဆီသို့ ခရီးနှင်ခဲ့သည်။ ကျောင်းသားကောင်စီမှ ပေးပို့သော အချက်အလက်များတွင် ဤမြို့၏တည်နေရာလည်း ပါဝင်သည်။

နာရီများစွာကြာပြီးနောက် ချူးယွင်ဖန်းသည် နောက်ဆုံးတွင် သွေးဆာသောမြို့သို့ ရောက်ရှိခဲ့သည်။ ၎င်းသည် သံမဏိဖြင့်ပြုလုပ်ထားသည့် ကြီးမားသည့်မြို့ကြီးဖြစ်သည်။ မြို့၏ထိပ်ဆုံးနေရာများတွင် အလွန်ရက်စက်ကြမ်းကြုတ်၍ ကြောက်မက်ဖွယ်ကောင်းသည့် ဧရာမ မျှော်စင်များစွာရှိသည်။ သို့သော် ဤမျှော်စင်များကို အသုံးပြုနိုင်မည့်ပုံမပေါ်ပေ။ ၎င်းတို့သည် ပြိုကျပျက်စီးနေခဲ့ရာ၊ ပစ်ခတ်နိုင်မည့် မျှော်စင်တစ်ခုမျှ မရှိတော့ပေ။

မြို့တော်၏လည်ပတ်မှုစနစ်ကို တစ်စုံတစ်ယောက်က ခိုးယူဝင်ရောက်ခဲ့ကြောင်း ချူးယွင်ဖန်းက ချက်ချင်း သဘောပေါက်ခဲ့သည်။

အခန်း (၄၅၆) ကြီးမြတ်သော ကျောင်းသားကောင်စီ

သွေးနတ်ဆိုးများကဲ့သို့ သေးငယ်သည့် ဂိုဏ်းတစ်ခုသည် ၎င်းတို့၏ ကိုယ်ပိုင်လက်နက်များကို ထုတ်လုပ်နိုင်စွမ်း မရှိကြပေ။ ၎င်းတို့သည် ပြည်ထောင်စုမှ လက်နက်များကို ရယူရန် လှည့်ကွက်များစွာ အသုံးပြုခဲ့မည် ဖြစ်သည်။ ပြည်ထောင်စု၏ ပင်ကိုစရိုက်အရ ဤလက်နက်များတွင် မှောင်ခိုလမ်းကြောင်းများမချန်ထားရန်မဖြစ်နိုင်ပေ။ ပြည်ထောင်စုသည် အခြားဂိုဏ်းများနှင့် ကွဲလွဲဆန့်ကျင်မှုများ ဖြစ်ပွားရန်မှာ ပုံမှန်ဖြစ်စဉ်သာဖြစ်သည်။ ပြည်ထောင်စုမှ စတင်လှုပ်ရှားသည်နှင့် ၎င်းတို့ကို အလွယ်တကူ အဆုံးသတ်နိုင်မည်ဖြစ်သည်။

သွေးဆာနေသောမြို့သည် ကျောင်းသားကောင်စီကဲ့သို့ ကျောင်းသားအဖွဲ့အစည်းတစ်ခုမှပင် ဝန်းရံ၍ သွေးနတ်ဆိုးများကို အမြစ်ပြတ်ချေမှုန်းနိုင်သည့် အခြေအနေအထိ ကျဆုံးသွားခဲ့သည်။ သွေးနီရောင်အ၀တ်အစားများ ဝတ်ဆင်ထားသော ပုံရိပ်များစွာသည် မြို့ရိုးများပေါ်တွင် ရပ်နေသည်ကို ချူးယွင်ဖန်း အဝေးမှတွေ့လိုက်ရသည်။ ၎င်းတို့အားလုံးသည် သွေးနတ်ဆိုးများ၏ အဖွဲ့ဝင်များဖြစ်သည်။ စွယ်စုံကျမ်းမှ အချက်အလက်များအရ သွေးနတ်ဆိုးများဂိုဏ်းတွင် သောင်းချီသော အဖွဲ့ဝင်များပါဝင်သည်။ ထိုသို့သော အင်အားစုသည် အာတိတ်သဲကန္တာရတွင် အလွန်ကြီးမားသော အင်အားစုတစ်ခုဖြစ်သည်။ ဤအခိုက်အတန့်တွင်၊ သွေးနတ်ဆိုးများသည် ရန်သူကြီးတစ်ယောက်နှင့် ရင်ဆိုင်နေရပုံရသည်။ ၎င်းတို့၏အရှေ့တွင် ကောင်စီ၏ ယူနီဖောင်းများကို ၀တ်ဆင်ထားသည့် ပြည်ထောင်စုတက္ကသိုလ် ကျောင်းသား ကောင်စီဝင် ထောင်ပေါင်းများစွာရှိနေသည်။

ကျောင်းသား ကောင်စီဝင်များသည် သွေးနတ်ဆိုးများထံသို့ ချီတက်လာကြခြင်းဖြစ်ရာ၊ တစ်ဦးချင်းတိုက်ခိုက်နေကြခြင်းမဟုတ်ပေ။ ၎င်းတို့၏ ချီစွမ်းအင်များ အချင်းချင်း ဆက်သွယ်ကာ ကြောက်မက်ဖွယ်ကောင်းသော တိုက်ပွဲဖွဲ့စည်းပုံကို ဖြစ်ပေါ်စေခဲ့သည်။ ၎င်းတို့၏ ခေါင်းဆောင်များသည် ရာဂဏန်းရှိသော မရီးဒျန်သန့်စင်ခြင်းအဆင့် ကျောင်းသားကောင်စီ အရာရှိများဖြစ်ကြသည်။ ကောင်စီအရာရှိများ၏ အနောက်တွင် ကောင်စီဝင်ထောင်ပေါင်းများစွာရှိသော်လည်း အဆိုပါကောင်စီဝင်များသည် သာမန်မျှသာဖြစ်သည်။ ၎င်းတို့အားလုံးသည်လည်း လက်ရွေးစင်များဖြစ်ကြ၏။

ကျောင်းသားတိုင်းက ကျောင်းသားကောင်စီတွင် ပါဝင်ရန် အရည်အချင်းပြည့်မီကြမည်မဟုတ်ပေ။ လက်ရွေးစင် ကျောင်းသားများကိုသာ ကျောင်းသားကောင်စီသို့ လက်ခံမည်ဖြစ်သည်။ ဤကျောင်းသားများသည် ထောင်သောင်းချီသော သွေးနတ်ဆိုးများထက် နိမ့်ကျခြင်းမရှိသည့်အပြင် အချို့မှာ ပို၍ မြင့်မားသောအဆင့်တွင် တည်ရှိနေကြသည်။

ပြတ်သားစွာပြောရမည်ဆိုလျှင် သွေးနတ်ဆိုးများသည်သာမန်လူများသာဖြစ်သည်။ ၎င်းတို့သည် လက်ရွေးစင်အချို့ကို အလွယ်တကူ ပျိုးထောင်နိုင်သည့် ပြည်ထောင်စုတက္ကသိုလ်ကဲ့သို့ ကြီးမားထင်ရှားသော တက္ကသိုလ်တစ်ခုနှင့် နှိုင်းယှဉ်နိုင်မည်မဟုတ်ပေ။ အထူးသဖြင့် ဤကျောင်းသား ကောင်စီဝင်များမှ တိုက်ပွဲဖွဲ့စည်းပုံ ပြုလုပ်သည့်အချိန်မျိုးတွင် ပို၍ပင် နှိုင်းယှဉ်နိုင်မည်မဟုတ်ပေ။ ၎င်းတို့၏ အကန့်အသတ်မရှိသော ခွန်အားကို ဤနည်းလမ်းဖြင့် သိရှိနိုင်သည်။

ခေတ်မီစစ်လက်နက်များအကူအညီမပါသော သွေးနတ်ဆိုးများအားလုံး နောက်သို့ပြန်ဆုတ်ခဲ့ရသည်။ ကိန်းဂဏန်းအရေအတွက်အရ အားသာချက်များရှိနေသော်လည်း ဤသို့အခြေအနေမျိုးတွင် အသာစီးမရနိုင်ပေ။

"သူတို့က တော်တော် အစွမ်းထက်သားပဲ"

ချူးယွင်ဖန်းက အဝေးကနေ လှမ်းကြည့်လျက် အံ့အားသင့်စွာ ပြောလိုက်သည်။ သူသည် ကျောင်းသားကောင်စီနှင့် ကောင်းမွန်သည့်ဆက်ဆံခြင်း မရှိသော်လည်း ၎င်းတို့ကို တမင်တကာ မနှိမ့်ချပေ။

အထူးသဖြင့် ကျောင်းသားကောင်စီသည် အထက်စီးဆန်သည့် ထောင်ပေါင်းများစွာသော ကျောင်းသားများကို စည်းရုံး၍ စစ်ပွဲဆင်နွှဲနိုင်ခဲ့သောကြောင့် ၎င်းတို့၏ ရှေ့တိုးခြင်းနှင့် ဆုတ်ခွာခြင်းတွင် ကန့်သတ်ချက်ရှိခဲ့သည်။ ဤအရာသည် လွယ်ကူသော စွမ်းဆောင်မှုမဟုတ်ပေ။ ဤကျောင်းသားများသည် အလွယ်တကူ ကိုင်တွယ်ဖြေရှင်းနိုင်မည့် လူများမဟုတ်ကြသော်လည်း ယခုမူ၊၎င်းတို့သည် အမိန့်ပေးမှုများကို နာခံနေကြသည်။ ဤအရာမှာ ကျောင်းသားကောင်စီက မည်မျှ အထင်ကြီးစရာကောင်းကြောင်းကို သက်သေပြခဲ့သည်။

ဤအချိန်တွင် နှစ်ဖက်စလုံးက အနီးကပ်တိုက်ပွဲများ စတင်နေပြီဖြစ်ရာ၊ ဤနေရာတွင် တိုက်ပွဲဖွဲ့စည်းပုံ၏ အရေးပါမှုကို မြင်နိုင်မည်ဖြစ်သည်။ ကျောင်းသားကောင်စီအဖွဲ့ဝင်များတွင် ရာနှင့်ချီသော ကျောင်းသားကောင်စီအရာရှိများ ဦးစီးခေါင်းဆောင်အဖြစ် ပါဝင်နေကြသည်။ ၎င်းတို့၏ တိုက်ခိုက်ရေး စွမ်းအင်သည် တွက်ချက်ရမည့် အင်အားဖြစ်သည်။ ထိုသွေးနတ်ဆိုးများသည် ရာနှင့်ချီသော မရီးဒျန်သန့်စင်ခြင်းအဆင့် ကျောင်းသားများ၏ ပူးပေါင်းတိုက်ခိုက်မှုကို ခံနိုင်ရည်မရှိပေ။

မွေးဖွားခြင်းနယ်မြေအဆင့် ကျွမ်းကျင်သူတစ်ဦးသာလျှင် ၎င်းတို့ကို တွန်းလှန်နိုင်မည်ဖြစ်၍ အခြားလူများသည်မူ ဤသို့ပြုလုပ်နိုင်မည်မဟုတ်ပေ။ ချူးယွင်ဖန်းလျှင်ပင် ဤမျှကြီးမားသောဖွဲ့စည်းပုံကြီးကို ရင်ဆိုင်ရလျှင် ထွက်ပြေးရန်မှတပါး တခြားရွေးချယ်စရာလမ်းရှိမည်မဟုတ်ပေ။ ဤမျှကြီးမားသော ဖွဲ့စည်းပုံ၏ အင်အားအောက်တွင် ထောင်နှင့်ချီသော လူများ ချေမှုန်းခံရလျက်ရှိရာ၊ မရီးဒျန်သန့်စင်ခြင်းအဆင့် ကျွမ်းကျင်သူလျှင်ပင် ပွဲချင်းပြီး အသတ်ခံရမည်ဖြစ်သည်။

သို့သော်၊ သွေးနတ်ဆိုးများသည် သောင်းနှင့်ချီ ကြီးမားသည့် ဂိုဏ်းတစ်ခုဖြစ်၍ ၎င်းတို့တွင် လက်ရွေးစင်များစွာရှိသည်။ ဤထောင်နှင့်ချီသော ကျောင်းသားများမှ မြို့ကိုလွှမ်းမိုးပြီးနောက်၊ လက်ရွေးစင်အဆင့် သွေးနတ်ဆိုးတစ်ထောင်ကျော်မျှ ပါဝင်သည့် အုပ်စုတစ်စု ပေါ်ပေါက်လာသည်။ ၎င်းတို့ထဲတွင် မရီးဒျန်သန့်စင်ခြင်းအဆင့် လက်ရွေးစင် တစ်ရာကျော်မျှရှိသည်။ ကျန်လူများသည် စွမ်းအင်မရီးဒျန်သန့်စင်ခြင်းအဆင့်၏ သတ္တမနှင့် အဋ္ဌမအဆင့်တွင်ရှိနေသည်။ အရည်အသွေးအရကြည့်လျှင် ကျောင်းသား ကောင်စီဝင်များထက် မနိမ့်ကျသော်လည်း ကျောင်းသားကောင်စီက အရေအတွက်အားဖြင့် သာလွန်သည်။ ထို့ကြောင့် ကျောင်းသားကောင်စီဝင်များနှင့် ယှဉ်ပြိုင်နိုင်ခြင်းမရှိသည်မှာ သိသာထင်ရှားသည်။

သို့သော် သွေးနတ်ဆိုးများသည် အချိန်ဆွဲနေကြပုံပေါ်သည်။

ချူးယွင်ဖန်းသည် ကျောင်းသားကောင်စီ၏ စစ်တပ်နောက်သို့ တိတ်တဆိတ် လိုက်သွားခဲ့သည်။ သူသည်မြို့ရိုးသို့တက်၍ သွေးနတ်ဆိုးအချို့ကို ခုတ်ထစ်ပြီးသည့်အခါ အဝေးမှရပ်၍ ကြည့်နေခဲ့သည်။

"ဒီလူတွေက လက်ရွေးစင်အဆင့် သွေးနတ်ဆိုးတွေပဲဖြစ်ရမယ်။ ဆုကြေးက အမှတ်နှစ်ဆရမှာမို့လို့ အားလုံးပဲ အစွမ်းကုန်သုံးပြီး သတ်ကြ"

ကျောင်းသားကောင်စီဝင်များထဲမှ ရုတ်တရက် ခုန်ထွက်လာသောပုံရိပ်တစ်ခုနှင့်အတူ၊ ၎င်းအနောက်တွင် လိုက်ပါလာသည့် ရှည်လျားသော ဝိစီသံတစ်ခုကို ကြားလိုက်ရသည်။ စက္ကန့်ပိုင်းလေးအတွင်းမှာပဲပင် ဤပုံရိပ်သည် လက်ရွေးစင်အဆင့် သွေးနတ်ဆိုးများဆီသို့ ရောက်သွားခဲ့သည်။ ၎င်းသည် လှောင်အိမ်ထဲမှ ခုန်ထွက်လာသည့် ကြမ်းကြုတ်သော ကျားကြီးတစ်ကောင်ကဲ့သို့ပင် ကြီးမားသော အပေါက်ကြီးတစ်ခုကို ထွင်းထု၍ သုတ်သင်ခဲ့သည်။

'ဘယ်လောက်တောင် ခွန်အားကြီးလိုက်လဲ ဒါက မရီးဒျန်သန့်စင်ခြင်းအဆင့်ရဲ့ အထွတ်အထိပ်မှာ ရှိနေတဲ့လူပဲ ဖြစ်ရမယ်။ မွေးဖွားခြင်းနယ်မြေအဆင့်ထက် နည်းနည်းပဲ အားနည်းလောက်တယ်'

ချူးယွင်ဖန်းက ထိုပုံရိပ်ကို ကြည့်၍ တွေးနေခဲ့သည်။ ထိုပုံရိပ်သည် တပ်ဖွဲ့ဝင်တစ်ထောင်ကို တစ်ယောက်တည်း သုတ်သင်နေသကဲ့သို့ ဖြစ်လျက်ရှိသည်။

ဤပုံရိပ်သည် မွေးဖွားခြင်းနယ်မြေအဆင့်တွင် ရှိနေသည့်လူများထက် အနည်းငယ်မျှသာ စွမ်းအားနည်းသော်လည်း ၎င်းကို အလွန်အစွမ်းထက်သူဟု ယူဆနိုင်သေးသည်။ မရီးဒျန်သန့်စင်ခြင်းအဆင့်တွင်ရှိနေသည့် လက်ရွေးစင် သွေးနတ်ဆိုးများသည် ဤပုံရိပ်၏ သိုင်းကွက်တစ်ကွက်ကိုပင် တားဆီးနိုင်ခဲ့ခြင်းမရှိပေ။ ဤလူသည် မရီးဒျန်သန့်စင်ခြင်းအဆင့်၏ အထွတ်အထိပ်တွင်ရှိနေသည်မှာ သေချာ၏။

'ဒါက သွေးနတ်ဆိုးတွေကို တိုက်ခိုက်ဖို့ စုစည်းခဲ့တဲ့ ကျောင်းသားကောင်းစီရဲ့ ဒုဥက္ကဋ္ဌ၊ ဝမ်ချီ ပဲဖြစ်ရမယ်'

ချူးယွင်ဖန်းသည် ဤပုဂ္ဂိုလ်၏အမည်ကို ချက်ချင်းခန့်မှန်းလိုက်သည်။ ပြည်ထောင်စုတက္ကသိုလ်၏ ကျောင်းသားကောင်စီအမည်ဖြင့် ကြေညာချက်ကို ပေးပို့ခဲ့သူမှာ ဝမ်ချီမှတစ်ပါး အခြားလူမဟုတ်ပေ။

‘‘ကျောင်းသား ကောင်စီက တကယ်နက်နဲတဲ့ အခြေခံရှိတာပဲ။ သူတို့ထဲက ဒုဥက္ကဋ္ဌရဲ့ ခွန်အားကတောင် မရီးဒျန်သန့်စင်ခြင်းအဆင့် အထွတ်အထိပ်မှာ ရှိနေတယ်'

ထိုမြင်ကွင်းကိုကြည့်နေသော ချူးယွင်ဖန်း၏ မျက်လုံးများ တောက်ပလာခဲ့သည်။

ဒုဥက္ကဋ္ဌများသည် မွေးဖွားခြင်းနယ်မြေအဆင့်တွင် မရှိကြသော်လည်း၊ ၎င်းတို့ကို အလွန်အင်အားကြီးသည်ဟု ယူဆထားပြီးဖြစ်သည်။ မွေးဖွားခြင်းနယ်မြေအဆင့် ကျွမ်းကျင်သူများသည် ပြည်ထောင်စုတက္ကသိုလ်တွင် မည်သည့်အဆင့်အတန်းတွင်ရှိမည်နည်း။ ၎င်းတို့သည် အလွန်မြင့်မား၍ ကြီးမြတ်သော ပုဂ္ဂိုလ်များဖြစ်ကြသည်။ တက္ကသိုလ်၏ နည်းပြဆရာအများစုသည်ပင် မရီးဒျန်သန့်စင်ခြင်းအဆင့်၏ အထွတ်အထိပ်တွင်သာ ရှိကြသည်။

မွေးဖွားခြင်းနယ်မြေအဆင့်မှ ကျောင်းသားများသည် နည်းပြဆရာအများစုထက်သာလွန်ကြသည်။ တက္ကသိုလ်ရှိ ၎င်းတို့၏ရာထူးများသည် မွေးဖွားခြင်းနယ်မြေအဆင့်ရှိ ဆရာများနှင့် တန်းတူနီးပါးဖြစ်ကြသည်။ ဥပမာအားဖြင့်၊ ကျန်းလင်းရှောင်နှင့် သူ၏နည်းပြဆရာ ကျူးပုမီတို့၏ကြားတွင် စည်းကမ်းများစွာမရှိကြပေ။ ကျန်းလင်းရှောင်သည် မွေးဖွားခြင်းနယ်မြေအဆင့်သို့ ဝင်ရောက်လာသောကြောင့် အချင်းချင်း တန်းတူရည်တူ ပြောဆိုနိုင်ကြသည်။ ကျန်းလင်းရှောင်တွင် ကျူးပုမီနှင့် တန်းတူရည်တူ ရပ်တည်နိုင်ရန် လုံလောက်သည့် အဆင့်အတန်းရှိသည်။

ပြည်ထောင်စုတက္ကသိုလ်တွင် အကြီးတန်းကျောင်းသားများမှလွဲ၍ မွေးဖွားခြင်းနယ်မြေအဆင့်သို့ ဝင်ရောက်လာသူ လက်တစ်ဆုပ်စာမျှသာ ရှိသေးသည်။ အကြီးတန်းကျောင်းသားမျာထဲတွင်ပင်လျှင် မွေးဖွားခြင်းနယ်မြေအဆင့်သို့ ရောက်ရှိခဲ့သူဦးရေမှာ အများအပြားမရှိလှပေ။ မရီးဒျန်သန့်စင်ခြင်းအဆင့်၏ အထွတ်အထိပ်ရောက်သူများသည် သာမန်ပြည်သူလူထုကြားတွင် အကောင်းဆုံးများထဲမှ တစ်ဦးအဖြစ် သတ်မှတ်ခံထားရပြီးဖြစ်သည်။

မရီးဒျန်သန့်စင်ခြင်းအဆင့်နှင့် မွေးဖွားခြင်းနယ်မြေအဆင့်တို့၏ ကြားတွင် မျဉ်းပါးပါးလေးတစ်ခုသာရှိသော်လည်း ဤမျဉ်းကြောင်းသည် လူအများအပြားကို အခက်တွေ့စေခဲ့သည်။ ဆယ်နှစ် သို့မဟုတ် အနှစ်နှစ်ဆယ်ပေးခဲ့လျှင်ပင် အဆင့်ဖြတ်ကျော်နိုင်ခြင်းမရှိကြပေ။ ဤသို့မဟုတ်လျှင် တက္ကသိုလ်တွင် မရီးဒျန်သန့်စင်ခြင်းအဆင့် အထွတ်အထိပ်တွင်ရှိနေကြသော နည်းပြဆရာ အမြောက်အမြားရှိနေကြမည် မဟုတ်ပေ။ တချို့သည် အသက်ငါးဆယ်၊ ခြောက်ဆယ်ကျော်ခန့်ရှိနေကြပြီ ဖြစ်၏။

ချူးယွင်ဖန်းသာ ကျန်းလင်းရှောင်နှင့် ပုခုံးချင်းယှဉ်ရပ်တည်လိုလျှင် မွေးဖွားခြင်းနယ်မြေအဆင့်သို့ တက်လှမ်း၍ ပြည်ထောင်စုတက္ကသိုလ်တွင်လည်း အင်အားကြီး ပုဂ္ဂိုလ်တစ်ဦး ဖြစ်လာရမည်ဖြစ်သည်။ သို့မှာသာ သူ့တွင် ကျန်းလင်းရှောင်နှင့် ပခုံးချင်းယှဥ်နိုင်မည့် အခွင့်အလမ်းရှိမည်ဖြစ်သည်။

ရုတ်တရက်ဆိုသကဲ့သို့ပင် မြို့အတွင်းမှ ရှည်လျားသောဟစ်ကြွေးသံတစ်ခု ထွက်ပေါ်လာသည်။ ၎င်း၏အနောက်တွင် သွေးနီရောင်ပုံရိပ်တစ်ခုသည် သွေးစွမ်းအင် လမ်းကြောင်းရှည်တစ်ခု ပေါ်ပေါက်စေသည်အထိ ပြေးထွက်လာခဲ့သည်။ အဆိုပါ ပုံရိပ်သည် ဒုဥက္ကဋ္ဌဆီသို့ တိုက်ရိုက် ချီတက်ခဲ့သည်။

"ဝမ်ချီ၊ ငါတို့ကို တိုက်ခိုက်ဖို့ လူတွေခေါ်လာပြီး ဝိုင်းထားရဲတယ်ပေါ့လေ။ သွေးနတ်ဆိုးတွေထဲမှာ အင်အားကြီးတဲ့လူ မရှိဘူးလို့ ထင်နေတာလား။ ဘယ်မှာလဲ မင်းတို့ ဥက္ကဌ၊ ကျန်းလင်းရှောင်"

ဤသွေးနီရောင်ပုံရိပ်သည် ကြောက်မက်ဖွယ် ချီစွမ်းအင်လှိုင်းများ နေရာရပ်ရပ်သို့ ထုတ်လွှတ်ပျံ့နှံ့စေ၍ ပြင်းထန်သောလှိုင်းလုံးကြီးနှစ်ခု ပြင်းထန်စွာ ရိုက်ခတ်နေသကဲ့သို့ ဝမ်ချီထံသို့ ချီတက်လာသည်။