အခန်း (၅၉၅-၅၉၇)

အခန်း(၅၉၅) တက္ကသိုလ်တစ်ခုလုံး၏မုန်တိုင်း

ဤတိုက်ပွဲကို ကြည့်နေကြသော ပြည်ထောင်စုတက္ကသိုလ်ကျောင်းသားများအားလုံး တုန်လှုပ်ခြောက်ခြားသွားကြသည်။ ချူးယွင်ဖန်းက ကွမ်ဖူအသင်းကို အနိုင်ယူခဲ့သည့်အရှိန်အဟုန်ကိုကြည့်လျှင် ချက်ချင်းဖျက်ဆီးခြင်းဟု ဖော်ပြနိုင်၏။

စက္ကန့်ဖြင့်ပင် တွက်၍ရသည်ဖြစ်၍ တကယ်တမ်းတွင် တစ်မိနစ်ပင်မပြည့်ပေ။

ချူးယွင်ဖန်းမည်ကဲ့သို့ ကြောက်စရာကောင်းသည်ကို မည်သူမျှ မသိခဲ့ကြပေ။ ၎င်းသည် ယခင်က ရရှိခဲ့သော အချက်အလက်များနှင့် လုံးဝ ကွဲပြားသည်။ သူ၏ ခွန်အားသည် ခန့်မှန်းထားသည်ထက် အနည်းဆုံး ဆယ်ဆ ပိုမို ကြောက်မက်ဖွယ်ကောင်း၏။ ကွမ်ဖူအဖွဲ့၏ ပထမလှိုင်းတိုက်ခိုက်မှုသည် ချူးယွင်ဖန်းဒူးထောက်ရန် လုံလောက်မည်ဟု ၎င်းတို့က ထင်ကြသည်။ သို့သော် ဒူးထောက်အဆုံးသတ်ခဲ့ရသည်မှာ ကွမ်ဖူအသင်းဖြစ်သည်။

လူတိုင်း မျှော်လင့်ထားသကဲ့သို့ ဝမ်းနည်းဖွယ်ကောင်းလှသည်မျိုးမဟုတ်ပေ။ ဝမ်းနည်းဖွယ်ကောင်းသော်လည်း ၎င်းမှာ တစ်ဖက်သတ် အစုလိုက်အပြုံလိုက် သတ်ဖြတ်မှုကြောင့် ဖြစ်ပေါ်လာသော ကြေကွဲဖွယ် အခြေအနေတစ်ခုဖြစ်သည်။

ကွမ်ဖူအသင်းကို ချူးယွင်ဖန်း အဆုံးသတ်ခဲ့ခြင်းက ၎င်းတို့မျှော်လင့်ထားသောအရာနှင့် အလွန်ကွဲပြားခြားနားလှသည်။

သူတို့မျှော်လင့်ထားသည့် အကောင်းဆုံးအရာမှာ ချူးယွင်ဖန်းဒဏ်ရာပြင်းထန်စွာရပြီးနောက် လွတ်မြောက်သွားခြင်းပင်ဖြစ်သည်။ သို့သော် ချူးယွင်ဖန်းသည် အကန့်အသတ်မဲ့ စိတ်ကူးယဉ်ခြင်း၏ အဓိပ္ပါယ်ကို သင်ပေးခဲ့သည်။ သူ၏ ရက်စက်ကြမ်းတမ်းသော ခြေကွက်သည် လူတိုင်းကို ဆုံးရှုံးသွားသကဲ့သို့ ခံစားစေခဲ့သည်။

"သူ့ရဲ့ကန်ချက်က အရမ်းစွမ်းအားကြီးမှန်း ငါဘယ်တုန်းကမှ မသိခဲ့ဘူး"

“ညီလာခံမှာ သူ ဒီအရည်အချင်းကို မပြဘူး။ မကြာသေးခင်ကမှ သင်ယူခဲ့တာဖြစ်နိုင်မလား”

“လီကွမ်ဟွာလို မရီးဒျန်သန့်စင်ခြင်းအထွတ်အထိပ်အဆင့်တောင် ချက်ချင်းရှုံးသွားတယ်။ ချူးယွင်ဖန်းက ဘယ်အဆင့်မှာရှိလဲ။ မွေးဖွားခြင်းနယ်မြေအဆင့်ကိုများရောက်သွားပြီလား”

“မဟုတ်ဘူး၊ သူက မွေးဖွားခင်းနယ်မြေအဆင့်မှာ မဟုတ်လောက်ဘူး။ အဲ့အဆင့် ကျွမ်းကျင်သူတစ်ယောက်က တိုက်ခိုက်ရင် တစ်ချိန်တည်းမှာ ကောင်းကင်နဲ့ မြေကြီးရဲ့စွမ်းအားကို ဆွဲယူနိုင်တယ်တဲ့။ သူအဲ့လိုမျိုးသုံးကိုမသုံးသွားဘူး။”

"ဟမ်၊ ဒါတောင် သူကဒီလောက် ကိုင်တွယ်ရခက်တယ်ပေါ့”

ချူးယွင်ဖန်း၏ အင်အားကြောင့် လူအများ အံ့ဩသွားကြသည်။ နှစ်လအတွင်း ချူးယွင်ဖန်းပြသခဲ့သော ခွန်အားသည် ၎င်းတို့မျှော်လင့်ထားသည်ထက် သိသိသာသာ ကျော်လွန်သွားခဲ့သည်။ ယင်းသည် ၎င်းတို့၏ ယခင် ထင်ကြေးများကိုပင် ကျော်လွန်သွားပြီဖြစ်၍ ပြည်ထောင်စု တက္ကသိုလ်အတွင်း သတင်းများ လျင်မြန်စွာ ပျံ့နှံ့ခဲ့သည်။ ကွမ်ဖူအသင်း၏ သတင်းသည် ချက်ခြင်းပင် လျင်မြန်စွာ ပျံ့လွင့်လာကာ တစ်ချိန်တည်း၌ပင် လူများစွာကို တုန်လှုပ်စေခဲ့သည်။

ကွမ်ဖူအသင်းသည်ပြည်ထောင်စုတက္ကသိုလ်တွင် စွမ်းအားအပြင်းထန်ဆုံးအဖွဲ့မဟုတ်ကြောင်း လူများစွာကသိကြသည်။ သို့သော် ၎င်းကို သန်မာသူများထဲထဲမှ တစ်ဖွဲ့ဟု ယူဆ၍ရသည်။ ကွမ်ဖူအသင်းကို နှိမ်နှင်းနိုင်သည့် အဖွဲ့အစည်းများစွာ မရှိပေ။ ၎င်းတို့ထဲမှ အများစုသည် ၎င်းတို့နှင့် တူညီသော စွမ်းအားများရှိကြသည်။ သန်မာသော်လည်း အနည်းငယ်သာ သန်မာသည်။

သူတို့သည် အတွင်းအူတိုင်နှင့် ချူးယွင်ဖန်း၏လက်ထဲရှိ နတ်ဆိုးဆင်းသက်ခြင်းပန်းချီကားကို စိတ်ဝင်စားသော်လည်း ၎င်းတို့သာဖြစ်မည်ဆိုပါက ၎င်းတို့၏အဖွဲ့အစည်းတစ်ခုလုံးကို အတူတကွတိုက်ခိုက်လျှင်ပင် ကွမ်ဖူအသင်းကို ချက်ခြင်းဒူးထောက်စေနိုင်မည် မဟုတ်ကြောင်း သိထားကြသည်။

ဤသည်မှာ အင်အားကြီးမားသော ခြားနားချက်တစ်ခုဖြစ်သည်။

ပစ္စည်းနှစ်ခုသည် အလွန်ဆွဲဆောင်မှုရှိသော်လည်း ၎င်းတို့တွင် ခွန်အားမည်မျှရှိသည်ကို ထည့်သွင်းစဉ်းစားရမည်ဖြစ်သည်။ အကယ်၍ ၎င်းတို့သည် မြင့်မားသောစျေးနှုန်းကို ပေးဆောင်ရန်သာ လိုအပ်ပါက ၎င်းတို့ကို ရယူရန်အဆင်ပြေသည်။ ပြည်ထောင်စုတက္ကသိုလ်တွင် လူသတ်ခြင်းကို တားမြစ်ထားသည့် စည်းမျဉ်းများရှိသော်လည်း ယခုအချိန်၌မူ ၎င်းတို့တွင် မျှော်လင့်ချက်မရှိတော့ပေ။ ချူးယွင်ဖန်း၏ ကြံ့ခိုင်မှု တိုးတက်လာမှုကြောင့် ထိတ်လန့်သွားပြီးနောက် သူ့ကိုအနိုင်ယူရန် ယုံကြည်မှုအားလုံး ဆုံးရှုံးသွားကြသည်။

ဤတိုက်ပွဲသည် အခြေခံအားဖြင့် တက္ကသိုလ်ရှိ အဖွဲ့အစည်းများ၏ ၉၉ရာခိုင်နှုန်းကို ထိတ်လန့်စေခဲ့သည်။ ချူးယွင်ဖန်းကို တားရန် သတ္တိရှိသူ အများအပြားမရှိပေ။ ချူးယွင်ဖန်း၏ ကြံ့ခိုင်မှုသည် လွန်ခဲ့သော တစ်နှစ်နှင့် နှိုင်းယှဉ်ပါက ခုန်တက်ကာ တိုးတက်လာသည်ကို လူအများက သဘောပေါက်ကြသည်။ သူသည် တက္ကသိုလ်၏ ထိပ်တန်းကျွမ်းကျင်သူများနှင့် တန်းတူဖြစ်နေပြီဖြစ်သည်။ ချူးယွင်ဖန်း ယခုတစ်ခေါက်ပြန်လာသည်မှာ ဤအကြောင်းကြောင့်လည်းဖြစ်သည်။ သူ့လက်ထဲတွင်ရှိသော ပစ္စည်းများသည် အလွန် စွမ်းအားကြီးလှသော်လည်း ၎င်းတို့တွင် ယင်းကို ယူနိုင်ရန် ခွန်အားအလုံအလောက်ရှိမရှိ သေချာစဥ်းစားရမည်ဖြစ်သည်။

သို့သော် ကွမ်ဖူအသင်းကြီး ချက်ခြင်းရှုံးနိမ့်ပြီးနောက် ၎င်းတို့အောက်ရှိ အဖွဲ့အစည်းများအားလုံး ဖယ်ရှားပြီးသားဖြစ်သွား၏။ ချူးယွင်ဖန်း၏ရန်သူအစစ်အမှန်ဖြစ်သော ကျောင်းသားကောင်စီသည် နောက်ဆုံးတွင် စတင်၍ လှုပ်ရှားလာ၏။

ချူးယွင်ဖန်းပြန်လာချိန်တွင် ဝမ်ချီသည် ချက်ချင်းပင် စကားလက်ခံရရှိခဲ့သည်။

"ချူးယွင်ဖန်းမင်း အသေပဲ”

ဝမ်ချီသည် သတင်းရရှိပြီးနောက်တွင် သူသီးသန့်လေ့ကျင့်နေသောအခန်းမှ ချက်ချင်းထွက်ခွာသွားခဲ့သည်။ သူ့မျက်နှာတွင် ရှက်ရွံ့သော အပြုံးတစ်ခု ရှိနေသည်။ ယခင်က သူသည် သွေးနတ်ဆိုးများကို တိုက်ခိုက်ရန် ကြိုးစားခဲ့သည်။ နောက်ဆုံးတွင်၊ ထိုဂိုဏ်း၏ အရေးကြီးဆုံးရတနာဖြစ်သည့် နတ်ဆိုးဆင်းသက်ခြင်း ပန်းချီကားမှာ ပျောက်ကွယ်သွားခဲ့၏။

နတ်ဆိုးဆင်းသက်ခြင်း ပန်းချီကား၏တည်နေရာကို နောက်တစ်ကြိမ် ဖမ်းမိသောအခါ ချူးယွင်ဖန်း၏လက်ထဲတွင် ရှိနေသည်။ ထို့အပြင် အဖြစ်အပျက်ကို စုံစမ်းပြီးနောက် ထိုအချိန်က ချူးယွင်ဖန်းသည် အနီးနားတွင် ပေါ်လာကြောင်း သိရှိခဲ့သည်။ ထို့ကြောင့် မည်သို့ဖြစ်ပျက်ခဲ့ကြောင်း သူခန့်မှန်းကြည့်ရန် မခက်ခဲပေ။

ဝမ်ချီသည် ပန်းချီကားကိုရယူရန် ကြိုးစားခဲ့သော်လည်း နောက်ဆုံးတွင် အခြားသူတစ်ဦးမှ ခိုးယူသွားခဲ့သည်။

“ပြန်ယူဖို့ အချိန်တန်ပြီ။ ငါတို့ အတွင်းအူတိုင်ကို အတိုးအဖြစ်သဘောထားလိုက်မယ်”

ကျောင်းသားကောင်စီက စတင်၍ စကားပြောလာသည်။ ၎င်းတို့သည် မည်သည့်အဖွဲ့အစည်းကိုမျှ လုယူခွင့်ပြုမည်မဟုတ်ပေ။ မဟုတ်လျှင် ထိုအဖွဲ့အစည်းများသည် ကျောင်းသားကောင်စီ၏ လက်စားချေမှုကို ခံရပေလိမ့်မည်ဖြစ်၏။

ပန်းချီကားသည် ကျောင်းသားကောင်စီမှ ဆုံးရှုံးလိုက်ရခြင်းဖြစ်သဖြင့် ဤတစ်ကြိမ်တွင် ၎င်းတို့က ပြန်ယူပေလိမ့်မည်။ ၎င်းတို့ကို ဝင်နှောက်ယှက်ဝံ့သော မည်သူကိုမဆို ရန်သူအဖြစ် သတ်မှတ်လိုက်ကြပေလိမ့်မည်။ ဤသည်မှာ အလွန်အမင်း အစွန်းရောက်လွန်းသည်ဟု ယူဆ၍ ရသော်လည်း ကျောင်းသား ကောင်စီက ဤသို့သော အပြုအမူမျိုးကို ပြခဲ့သည်မှာ ကြာပြီဖြစ်သည်။ မွေးဖွားခြင်းနယ်မြေအဆင့်ရှိ ကျွမ်းကျင်သူများကကျောင်းသားကောင်စီကို နှောက်ယှက်ဝံ့မည်မဟုတ်ပေ။ ၎င်းတို့အားလုံးသည် ပန်းချီကားကို မေ့ထားလိုက်နိုင်သော်လည်း အတွင်းအူတိုင်ကိုမူ လက်လျှော့ကြလိမ့်မည်မဟုတ်ပေ။ နတ်စွမ်းအင်အဆင့် မွန်းစတားတစ်ကောင်၏ အတွင်းအတိုင်သည် အလွန်တန်ဖိုးကြီးလွန်းလှသဖြင့် တက္ကသိုလ်၏ စည်းမျဥ်းများကိုပင် ချိုးဖောက်ကာ ကျောင်းသားကောင်စီ၏ ဟန်ဆောင်မှုကိုလည်း ချိုးဖျက်ပစ်ပေလိမ့်မည်။

အချိန်တစ်ခုအကြာအထိ အင်တာနက်တွင် အဖွဲ့အစည်းကြီးများက တစ်ဘက်နှင့်တစ်ဘက်တိုက်ခိုက်သောကိစ္စများဖြင့် ပြည့်နေသည်။ မည်သို့ပင်ဆိုစေကာမူ ပါဝင်နေသော ချူးယွင်ဖန်းသည်မူ အခြားသူများ၏ မေ့လျော့ခြင်းခံထားရ၏။ လူတိုင်းက ချူးယွင်ဖန်း ရှုံးလိမ့်မည်ဟု ခံစားမိကြသည်။ မည်သို့ပင်ဖြစ်စေကာမူ ထိုအရာများကို တောင့်ခံနိုင်လိမ့်မည်မဟုတ်ပေ။ တစ်စုံတစ်ယောက်၏ လက်တွင် အသေအချာပင် ရှုံးနိမ့်ရပေလိမ့်မည်။ အမည်မသိစာတိုများချန်ထားခဲ့သူများလည်းရှိသည်။ ချူးယွင်ဖန်းသာ ပြည်ထောင်စုတက္ကသိုလ်အပြင်ဘက်သို့ ထွက်ပါက ပစ္စည်းများကို ပြင်ပမှလူများကလည်း လုယူသွားနိုင်ကြောင်း ပြောကြသည်။ ဤသို့ ဖြစ်လာပါက ထိုပစ္စည်းများကို မိမိတို့နှင့်ထားခဲ့သည်က ပိုကောင်းပေလိမ့်မည်။ နောက်ဆုံးတွင်မူ ၎င်းကို ပြည်ထောင်စုတက္ကသိုလ်က ပိုင်ဆိုင်ထားခြင်းဖြစ်၏။

ပြည်ထောင်စုတက္ကသိုလ်၏ ကျောင်းသားတစ်ယောက်အနေဖြင့် ချူးယွင်ဖန်းသည် ဤကိစ္စကို ရှင်းရှင်းလင်းလင်းဆောင်ရွက်သင့်သည်။

မှန်သည်။ ဤအဓိပ္ပါယ်မဲ့သော ထုတ်ပြန်ချက်ကို လူများစွာက ချက်ချင်းငြင်းဆိုခဲ့ကြသည်။ ၎င်းတို့သည် ချူးယွင်ဖန်းဘက်မှပြောပေးခြင်းမဟုတ်၊ ၎င်းတို့အတွက်သာဖြစ်သည်။ ၎င်းတို့ထဲတွင် မည်သူကမျှ ကံမကောင်းခဲ့သဖြင့် အကယ်၍ ၎င်းတို့အားလုံး ရှောင်ပုန်းနေမည်ဆိုပါက ၎င်းတို့၏ ကံကောင်းမှုများကို စွန့်လွှတ်လိုက်ရမည်မဟုတ်သလော။

ဤသည်က ၎င်းတို့၏ စိတ်ဝင်စားမှုကို အမှန်ပင် သက်ရောက်မှုရှိသည်။ ဗီလာသို့ အပြန်လမ်းတွင် အင်တာနက်တစ်ခွင်လုံး၌ အုတ်အုတ်သဲသဲဖြစ်လျက်ရှိသည်။ ချူးယွင်ဖန်းကိုယ်တိုင်က အလျင်လိုနေပုံရသည်။ လူတိုင်း၏ စောင့်ကြည့်မှုအောက်တွင် သူသည် အခြားသူများက သူ့နောက်လိုက်လာမည်ကို စိုးရိမ်နေသည့်ပုံမပေါ်ပေ။

ချူးယွင်ဖန်းက သူ့အိမ်ရာသို့ဝင်တော့မည့်အခိုက်အတန့်တွင် ရုတ်တရက် ကျယ်လောင်သော ကြုံးဝါးသံကြီးကို ကြားလိုက်ရသည်။

“ချူးယွင်ဖန်း၊ မင်းနောက်ဆုံးတော့ ပြန်ရောက်ပြီ”

ကြောက်မက်ဖွယ်ကောင်းသော လေလှိုင်းများကို ဖြစ်ပေါ်စေသည့် ပုဂ္ဂိုလ်တစ်ယောက်က ရုတ်တရက် အဝေးမှ ချဥ်းကပ်လာကာ ခဏအကြာတွင် ချူးယွင်ဖန်း၏ တံခါးဝသို့ရောက်လာ၏။ ထိုသူသည် အရပ်ရှည်၍ ကိုယ်ခန္ဓာသည်လည်း ဖြောင့်မတ်သည်။ မျက်နှာထက်တွင် ဒေါသအငွေ့အသက်များကိန်းအောင်းနေသော သူသည် ကျောင်းသားကောင်စီ၏ ဒုဥက္ကဌမတပါး အခြား မည်သူဖြစ်လိမ့်မည်နည်း။

ဝမ်ချီသည် ဤနေရာသို့ အမြန်ပြေးလာကာ ချူးယွင်ဖန်း အိမ်ပြန်မရောက်မီတွင် အမှီလိုက်နိုင်ခဲ့သည်။

အခန်း(၅၉၆) လူတစ်ယောက်ကျေနပ်သလို လုပ်ခြင်း

‘ရန်သူများတွေ့ဆုံလျှင် ၎င်းတို့ မျက်လုံးများ နီသွားသည်’ဟူသော ဆိုရိုးစကားအတိုင်းပင် ချူးယွင်ဖန်းနှင့် ကျောင်းသားကောင်စီအကြားမှ ရန်ငြှိုးသည် ကျန်းလင်းရှောင်နှင့် စတင်ခဲ့သော်လည်း စတင်ခဲ့သော်လည်း အချိန်ကြာလာသည်နှင့်အမျှ ပိုမိုလေးနက်လာသည်။ ကျောင်းသားကောင်စီသည် ချူးယွင်ဖန်းကဲ့သို့သော ဆူးများကို ကျောင်းသားကောင်စီ၏ ဂုဏ်သိက္ခာကို စိန်ခေါ်ရန် ခွင့်မပြုပေ။ ၎င်းတို့၏ ဂုဏ်သိက္ခာကို ထူထောင်ရန် သူ့ကို အသုံးချလိုကြသည်။ သို့သော် ချူးယွင်ဖန်းသည် လွယ်ကူသော ပစ်မှတ်မဟုတ်ပေ။ မျက်စိတစ်မှိတ်အတွင်း၌ပင် လူများစွာ ဆုံးရှုံးခဲ့ရ၏။

ဝမ်ချီတွင်မူ ချူးယွင်ဖန်းကို မုန်းရန် အကြောင်းပြချက် ပိုရှိနေသည်။ သူသည် သွေးနတ်ဆိုးများ၏ ခေါင်းဆောင်ကို ပြင်းပြင်းထန်ထန် တိုက်ခိုက်ခဲ့သော်လည်း နောက်ဆုံးတွင် ချူးယွင်ဖန်းက သူ့ကို ကြားဖြတ်ခဲ့သည်။ သူမည်သို့ပင် တွေးစေကာမူ နောက်ဆုံးတွင် ဒေါသဖြစ်သွားရသည်။ ဝမ်ချီက ချူးယွင်ဖန်းကို အေးစက်စွာကြည့်လိုက်သည်။

"နောက်ဆုံးတော့ မင်းပြန်လာပြီ။ အရမ်းကောင်းတယ်”

ဤသို့ပြော၍ ဝမ်ချီက ထူးဆန်းစွာပြုံးလိုက်သည်။

"ပြန်လာတာ အရမ်းထူးဆန်းနေလား" ချူးယွင်ဖန်းက အေးစက်စွာပြုံး၍ပြောသည်။

"ငါသာ မင်းသာဆိုရင် အဝေးမှာ ပုန်းနေလိုက်မယ်။ လက်ရှိမင်းလက်ထဲမှာရှိနေတဲ့ ပစ္စည်းနှစ်ခုကို ဆက်ယူထားလို့ရမှာမဟုတ်ဘူး။ မင်း အဲတာတွေကို အခု လွှဲပေးလိုက်ရင် အများကြီးသက်သာလိမ့်မယ်။ မင်း သူတို့ကို အဆုံးကျလွှဲပေးရမှာပဲကို ဘာတွေ စိတ်ရှုပ်ခံနေတာလဲ”

"ဒါဆို ဒါက မင်းလုပ်နိုင်တဲ့ တစ်ခုတည်းသော အရာပဲပေါ့” ချူးယွင်ဖန်းက နောက်ကျောတွင် လက်နှစ်ဖက်ယှက်၍ ပြောလိုက်သည်။ "သင်ဘွဲ့ရတော့မယ်ဆိုပေမယ့် မင်းရဲ့ ကျင့်ကြံစဥ်က ဒီလောက်ပဲပေါ့”

ကျန်းလင်းရှောင်သည် တတိယနှစ်ဆုံးခါနီးဖြစ်၍ ဝမ်ချီသည်မူ ကျန်းလင်းရှောင်ထက် တစ်နှစ်ပိုကြီးသောကြောင့် ဘွဲ့ရတော့မည်ဖြစ်သည်။

ထို့အတွက်ကြောင့် ဝမ်ချီသည် ချူးယွင်ဖန်း၏လက်ဝယ်ရှိပစ္စည်းများကို အထူးစွဲလမ်းနေခြင်းဖြစ်သည်။ သူ ဘွဲ့ရတော့မည် ဖြစ်၍ သူ့ကို ကာကွယ်ရန် ပြည်ထောင်စုတက္ကသိုလ် မရှိတော့ပေ။

"ဒါပဲလား ဟုတ်လား။ ဟားဟား၊ ချူးယွင်ဖန်းမင်းက မင်းလုပ်ချင်တာမှန်သမျှ လုပ်နိုင်တယ်လို့ မင်းတကယ်ထင်နေတာလား။"ဝမ်ချီက ကျယ်လောင်စွာ ရယ်မောလိုက်သည်။ သူ့တစ်ကိုယ်လုံးရှိ ချီစွမ်းအင်များ ထွက်ပေါ်လာသည်။ တခဏချင်း၌ပင် ကမ္ဘာပေါ်ရှိ ဝိညာဉ်စွမ်းအင်များ အစပျိုးလာကာ သူ့ ပတ်ဝန်းကျင်၌ ထူးဆန်းသော ဖြစ်ရပ်များဖြစ်ပေါ်လာသည်။

မွေးဖွားခြင်းနယ်မြေအဆင့်

ဤမြင်ကွင်းကို ငြိမ်သက်စွာကြည့်နေသော ကျောင်းသားအများအပြားသည် သူတို့၏မျက်လုံးအိမ်မှ မျက်စံများထွက်ကျလုမတက် ခံစားလာရသည်။ ပြည်ထောင်စုတက္ကသိုလ်တွင် မရီးဒျန်သန့်စင်ခြင်းအဆင့်သည် ဘွဲ့ရရန်အတွက် အခြေခံလိုအပ်ချက်ဖြစ်သည်။ သို့သော် မွေးဖွားခြင်းနယ်မြေအဆင့် နှင့် မရီးဒျန်သန့်စင်ခြင်းအဆင့် အကြား ခြားနားချက်သည် ပြည်ထောင်စုတက္ကသိုလ်၏ ပထမအဆင့်နှင့် နှင့် အထူးပထမအဆင့်ဟူသော အဆင့်နှစ်ရပ်ကို ကိုယ်စားပြုသည်။

မရီးဒျန်သန့်စင်ခြင်း အထွတ်အထိပ်အဆင့် ကျွမ်းကျင်သူသည် တက္ကသိုလ်၏ ထိပ်တန်းပုဂ္ဂိုလ်တစ်ဦးအဖြစ် သတ်မှတ်ခံရမည်ဖြစ်၍ ၎င်းတို့သည် နည်းပြဆရာအများစုထက်အဆင့်မနိမ့်ဘဲ၊ များစွာပို၍ စွမ်းအားကြီးသည်။ သို့သော် မွေးဖွားခြင်းနယ်မြေအဆင့်ကမူ မတူပေ။ ပြည်ထောင်စုတက္ကသိုလ်တစ်ခုလုံး မွေးဖွားခြင်းနယ်မြေအဆင့်သို့ တက်လှမ်းနိုင်သော ကျောင်းသားအများအပြားမရှိပေ။

ယခု ဝမ်ချီသည်ဘွဲ့ရတော့မည်ဖြစ်သော်လည်း မွေးဖွားခြင်းနယ်မြေအဆင့်သည် မွေးဖွားခြင်းနယ်မြေအဆင့် ဖြစ်နေဆဲပင်ဖြစ်သည်။ ယခု ဝမ်ချီသည် ချူးယွင်ဖန်းကို ဆန့်ကျင်ပြီဖြစ်၍ တက္ကသိုလ်အတွင်း ပဋိပက္ခများ ဖြစ်ပေါ်လာမည်ဖြစ်သည်။ တက္ကသိုလ်က သူ့ကို အပြစ်ပေးမည်ဖြစ်သော်လည်း

၎င်းတို့က သူ့ကို ရွေးချယ်ရန် လမ်းတစ်ချို့လည်းပေးလိမ့်မည်။ လအနည်းငယ်ကြာ၍ သူဘွဲ့ရပြီးနောက် ချူးယွင်ဖန်းနှင့် ရင်ဆိုင်ရလျှင်မူ ၎င်းသည် လုံးဝခြားနားသောကိစ္စတစ်ခုဖြစ်ပေလိမ့်မည်။

၏အမူအရာသည် အလွန်ဆိုးယုတ်လျက်ရှိသည်။ သူ့ရဲ့ သီးသန့် လေ့ကျင့်မှုက ယခုတစ်ကြိမ် အချည်းနှီး မဖြစ်ခဲ့ပေ။ ကျန်းလင်းရှောင်ပေးသော မွေးဖွားခြင်းနယ်မြေဆေး၏ အကူအညီဖြင့် သူသည် မွေးဖွားခြင်းနယ်မြေအဆင့်သို့ တက်လှမ်းနိုင်ခဲ့သည်။ ဆိုလိုသည်မှာ ဝမ်ချီသည် ပြည်ထောင်စု၏ အထက်တန်းစားအဆင့်သို့ အမှန်တကယ် ဝင်ရောက်လာခဲ့ခြင်း ဖြစ်သည်။ ဤအချက်ကို ယခင်ကနှင့်နှိုင်းယှဥ်၍မရပေ။ ထို့အပြင် သူ ဘွဲ့မရခင် မွေးဖွားခြင်းနယ်မြေအဆင့်သို့ ဝင်နိုင်ခဲ့ခြင်းက ပို၍ပင် မယုံကြည်နိုင်ဖွယ်ကောင်းသော အချက်ဖြစ်သည်။

သို့ရာတွင် ကျန်းလင်းရှောင်ထံမှ ဤမျှကြီးမားသောအကျိုးအမြတ်ကို ရရှိပြီးနောက်၊ သူသည် သဘာဝအတိုင်းပင် တူညီသောစျေးနှုန်းကို ပေးဆောင်ခဲ့ရသည်။ သူသည် သူ့ထက်တစ်နှစ်ငယ်သော ကျန်းလင်းရှောင်ကို လိုလိုလားလား အလုပ်အကျွေးပြုပေးရသည်။ ဤသည်က သူ၏ ရပ်တည်ချက်ကို ဖော်ပြသော နည်းလမ်းတစ်ခုဖြစ်သည်။

"ချူးယွင်ဖန်း၊ မင်းအနိုင်ရဖို့အခွင့်အရေးရှိတယ်လို့ မင်းထင်လား" ဝမ်ချီက ချူးယွင်ဖန်းကို ကြည့်၍ ကျယ်လောင်စွာ ရယ်မောလိုက်သည်။

"ဒါဆို မင်းက မွေးဖွားခြင်းနယ်မြေအဆင့်ကို ရောက်ပြီပေါ့။ ငါ့ကို ရန်စဖို့ ဘယ်လိုလုပ် သတ္တိတွေရှိနေတာလဲလို့ တွေးနေတာ။ ကွမ်ဖူအဖွဲ့ရဲ့အဖြစ်အပျက်က မင်းကို ဘာမှ မသင်ပေးခဲ့ဘူးလို့ ငါမြင်တယ်”

“မင်း နားမလည်သေဘူးလား။ မွေးဖွားခြင်းနယ်မြေအဆင့်နဲ့ မရီးဒျန်သန့်စင်ခြင်းအဆင့်ကို နှိုင်းယှဥ်လို့မရဘူးကွ မင်းက မရီးဒျန်သန့်စင်ခြင်းအထွတ်အထိပ်အဆင့် ကျွမ်းကျင်သူတွေကို အနိုင်ယူနိုင်ခဲ့ရင်တောင် မွေးဖွားခြင်းနယ်မြေအဆင့် သိုင်းသမားတစ်ယောက်ကို အနိုင်ယူနိုင်မှာမဟုတ်ဘူး” ဝမ်ချီက ခနဲ့တဲ့တဲ့ ပြုံးပြသည်။

ယခု သူ ချူးယွင်ဖန်းကို တွေ့လိုက်ရသည်နှင့် သူ လှုပ်ရှားရန် အလျင်လိုနေမိကာ ကြောင်က ကြွက်ဖမ်းသကဲ့သို့ ခံစားရသည်။ မွေးဖွားခြင်းနယ်မြေအဆင့်ကို ဖြတ်သွားပြီဖြစ်ကြောင်း တွေ့လိုက်ရသဖြင့် ချူးယွင်ဖန်းက အထိတ်တလန့်ဖြစ်သွားမည်ကို ဝမ်ချီက မြင်ချင်ခဲ့သည်။ ဤခွန်အားကြောင့် ချူးယွင်ဖန်း၏ ခွန်အား ခုန်ပျံကျော်လွှား၍ တိုးတက်လာသောခွန်အားကို ဂရုမစိုက်ခြင်းဖြစ်ခြင်းပင်ဖြစ်၏။

ချူးယွင်ဖန်းသည် ဝမ်ချီကို အေးစက်စွာပြုံး၍ ကြည့်လိုက်သည်။

"ကျန်းလင်းရှောင် ဒီမှာရှိနေရင်တောင် ဟုတ်ရင်ဟုတ်ဦးမယ်။ မင်းတစ်ယောက်တည်းနဲ့ဆိုရင်တော့ မင်းက အရည်အချင်းမပြည့်ဘူးကွ”

"မင်း ဘာပြောလိုက်တာလဲ” ဝမ်ချီက မျက်မှောင်ကြုတ်လိုက်သည်။ ချူးယွင်ဖန်းသည် ယခင်က အတိုင်းသာ သူ့ကို အထင်သေးနေဆဲဖြစ်ရာ၊ ဤအချက်က သူ့ကို အလွန်အမင်း ဒေါသထွက်စေ၏။

"ကောင်းပြီ ဒီလိုဆိုမှတော့ ငါဘယ်လောက် စွမ်းအားကြီးလဲဆိုတာ မင်းကို ငါကြည့်ခွင့်ပေးမယ်”

ဝမ်ချီက လမ်းဘေးမှ အလှဆင်ထားသော ကျောက်တုံးကြီးတစ်တုံးကို ကောက်ကိုင်ကာ ချူးယွင်ဖန်းကို ရိုက်ချလိုက်သည်။

ဝမ်ချီ၏ လှုပ်ရှားမှုကို မမျှော်လင့်ထားကြသဖြင့် လူတိုင်း တုန်လှုပ်သွားကြသည်။ ဒီကျောက်တုံးကြီးကို အလှဆင်ရန် အသုံးပြုခဲ့သော်လည်း ကျောက်တုံးကြီးသည် ကျောက်တုံးကြီးသာဖြစ်နေသေးသည်။

ချူးယွင်ဖန်းသည် ဤသည်မှာ ရိုင်းစိုင်းသော စွမ်းအားမဟုတ်သော်လည်း လျှို့ဝှက်နည်းပညာတစ်ခုဖြစ်ကြောင်း ပြောနိုင်သည်။ အချိန်အတော်ကြာ စဉ်းစားပြီးနောက် သူ ယခင်က ဖတ်ဖူးသော ကျင့်ကြံရေးစွယ်စုံကျမ်းမှ အဖြေကို ရှာတွေ့ခဲ့သည်။ ၎င်းသည် မွေးဖွားခြင်းနယ်မြေအဆင့် ကျွမ်းကျင်သူများသာ ကျင့်ကြံနိုင်သည့် လျှို့ဝှက်နည်းပညာတစ်ခုဖြစ်သည်။

ရှင်ကျာမုနိ၏ ဆင်ပစ်သိုင်းဟုခေါ်သည့် သိုင်းပညာတစ်မျိုးဖြစ်သည်။ ဗုဒ္ဓကျမ်းဂန်များတွင်ပါသည့် ဆိုရိုးတစ်ခုရှိသည်။ ရှင်ကျမုနိ အိမ်ရှေ့စံမင်းသားဖြစ်စဥ်က မြို့မှ ထွက်သွားသောအခါ ဆင်တစ်ကောင်က လမ်းကို ပိတ်ထားခဲ့သည်။ မင်းသားသည် ဆင်ကို ခြေထောက်မှ ကိုင်၍ ကောင်းကင်ယံသို့ ပစ်ထုတ်လိုက်ရာ၊ သုံးရက်အကြာတွင် ဆင်သည် ကောင်းကင်ယံမှပြန်ကျလာ၏။ ထို့နောက် မြေပြင်ပေါ်သို့ ပြန်လည်ပြုတ်ကျလာကာ ကြီးမား၍ နက်သော မြောင်းကြီးတစ်ခု ဖြစ်သွားစေသည်။ ယနေ့တွင် ၎င်းကို ဆင်ပစ်မြောင်းဟု ခေါ်ခဲ့ကြသည်။

ဤသည်မှာ ဗုဒ္ဓဓမ္မကို မယုံကြည်နိုင်ဖွယ်ကောင်းသော ဖြစ်ရပ်ဖြင့် ဖော်ပြထားသော ဒဏ္ဍာရီတစ်ခုဖြစ်သည်။ နောက်ပိုင်းတွင် မဟာကပ်ဘေးကာလတွင် ဗုဒ္ဓဘာသာဝင်အချို့သည် ဤဒဏ္ဍာရီကိုအခြေခံ၍ ပြင်ပအနုပညာကို ဖန်တီးခဲ့ကြသည်။ ၎င်းတို့သည် ကြီးမားသော ခွန်အားဖြင့် အရာဝတ္ထုများကို ပစ်ချရန် ဤနည်းပညာကို အသုံးပြု၍ ရနိုင်သောကြောင့် ဤကဲ့သို့ အမည်တွင်လာခဲ့သည်။

၎င်းကို အဆုံးစွန်သောသိုင်းပညာတစ်ခုဟု ဆိုရမည့်အစား တွန်းအားပေးသည့်နည်းလမ်းတစ်ခုနှင့် ပိုတူသည်။ ၎င်းသည် ၎င်းတို့၏ ခွန်အားနှင့် နတ်စွမ်းအင်ဖြင့် မွေးဖွားလာသော စစ်သည်တော်များကြား ခြားနားချက်ကို ဖန်တီးရန် မွေးဖွားခြင်းနယ်မြေအဆင့်ဆရာများ လေ့ကျင့်ခဲ့သောသိုင်းကွက်တစ်မျိုးဖြစ်သည်။ အထူးသဖြင့် မွန်းစတားများစွာသည် ကြီးမားသော အစွမ်းသတ္တိရှိသည်။ ဤသို့သော နည်းပညာများကို အသုံးမပြုလျှင် ၎င်းတို့၏ ခန္ဓာကိုယ်ကို မည်မျှပင် ကြမ်းတမ်းစွာလေ့ကျင့်စေကာမူ လူသားများက မွန်းစတားများကို အနိုင်ယူရန် ခက်ခဲပေလိမ့်မည်။ သို့သော် မွေးဖွားခြင်းနယ်မြေအဆင့် ကျွမ်းကျင်သူများသာ ၎င်းတို့ခန္ဓာကိုယ်အပေါ် ကြီးမားသော ဖိစီးမှုကို ဖြစ်စေသည့် ထိုကဲ့သို့သော နည်းပညာများကို ခံနိုင်ရည်ရှိသည်။

ကောက်ယူခဲ့သော ကျောက်တုံးသည် လူပေါင်းများစွာတစ်ရပ်စာခန့်ကြီးမားကာ လေပြင်းများပင် တိုက်ခတ်သွားစေခဲ့သည်။ ၎င်းသည် ပစ်ပေါက်ခြင်းနည်းပညာဖြစ်၍ ၎င်း၏စွမ်းအားသည် အလွန်ကြောက်မက်ဖွယ်ကောင်းသည်။

သာမန်လူတစ်ယောက်သည် အချိန်မီရှောင်နိုင်မည်မဟုတ်ပေ။

သို့သော် ချူးယွင်ဖန်းက မတူ၊ ရှောင်တိမ်းရန်ပင် ကြိုးစားမနေဘဲ လက်နှစ်ဖက်ကို မြှောက်၍ ကြယ်တံခွန်ကဲ့သို့ လျင်မြန်လှသော တိုက်ခိုက်မှုကို လှမ်းဖမ်းလိုက်သည်။

ဘမ်း

ကျယ်လောင်သောအသံသည် ပစ်လွှတ်ခြင်း၏ ကြောက်မက်ဖွယ်စွမ်းအားကို ထင်ရှားစေသည်။

"ဘာလဲ? သူဖမ်းထားတာလား”

လူများစွာက မည်သို့ တုံ့ပြန်ရမည်ကို မသိကြတော့ပေ။ ၎င်းတို့သည် ချူးယွင်ဖန်းကြောင့် ရူးနှမ်း ကြောက်လန့်သွားသည်ဟုပင် ဆိုနိုင်၏။ ဤအရာသည် ရှင်ကျာမုနိ၏ ဆင်ပစ်သိုင်းဖြစ်သည်ကို လျင်မြန်စွာ သတိထားခဲ့မိကြကာ ဤနည်းက မည်မျှ ကြောက်မက်ဖွယ်ကောင်းသည်ကို သိကြသည်။ ၎င်းတို့သာ ကျောက်တုံးဖြင့် ပစ်ခံခဲ့ရပါက ဘဝဆုံးသွားပေလိမ့်မည်မှာ သေချာသည်။

ဤကဲ့သို့ ပစ်ချက်မျိုးကို ခံနိုင်ရည်ရှိသောသူကို ၎င်းတို့ တစ်ကြိမ်မျှ မမြင်ခဲ့ဖူးပေ။

အခန်း(၅၉၇) ဝမ်ချီကို အနိုင်ယူဖို့ ကန်ချက်နှစ်ချက်

ရှင်ကျာမုနိ၏ ဆင်ပစ်သိုင်းကို လူတိုင်းကြားခဲ့ဖူးကြသည်။ လက်တွေ့ဘဝတွင် မမြင်ဖူးသော်လည်း၊ virtual network တွင် ဥပမာအချို့ကို မြင်ဖူးကြသဖြင့် ဤနည်းပညာက မည်မျှ အစွမ်းထက်သည်ကို အားလုံးသိကြသည်။ ဤသိုင်းကွက်ကို လက်ဗလာဖြင့် လက်ခံသူ မည်သူကိုမျှ မတွေ့ခဲ့ဖူးပေ။ ဤသည်မှာ ရိုးရှင်းစွာပင် မဖြစ်နိုင်သော အရာတစ်ခုဖြစ်သည်။ မွေးဖွားခြင်းနယ်မြေအဆင့် ကျွမ်းကျင်သူများ၏ ရုပ်ပိုင်းဆိုင်ရာ အရည်အချင်းများသည် အလွန် အံ့အားသင့်ဖွယ်ကောင်းလှသည်။ ရှင်ကျာမုနိ၏ ဆင်ပစ်သိုင်း၏ ချဲ့ထွင်မှုနှင့်အတူ၊ ၎င်းသည် အမှန်တကယ် ကြောက်မက်ဖွယ်ကောင်းသည်။

နတ်စွမ်းအင်အဆင့် ကျွမ်းကျင်သူပင်လျှင် ဤသိုင်းကွက်ကို လက်ဗလာဖြင့် လက်ခံဝံ့မည်မဟုတ်ပေ။ ထိုကြောက်မက်ဖွယ်အစွမ်းသတ္တိသည်၎င်းတို့၏ ခန္ဓာကိုယ်ကို ကြီးမားသော ထိခိုက်မှုဖြစ်စေသည်။

"ချီးပဲ သူ့မှာ ဘယ်လောက်တောင် စွမ်းအားတွေရှိနေတာလဲ။ ဒါက လွန်လွန်းတယ်”

" ရှင်ကျာမုနိရဲ့ ဆင်ပစ်သိုင်းကို လက်ဗလာနဲ့လက်ခံလိုက်တယ်ဟုတ်လား။ အခုဖြစ်သွားတာတွေကို မှတ်တမ်းတင်ထားရင် အင်တာနက်မှာ ရေပန်းစားလာမှာ သေချာတယ်”

“သူက တကယ်ကို မွန်းစတားတစ်ကောင်ပဲ။ အရမ်းသန်မာလွန်းတယ်။ ဝမ်ချီက သူ့ကို ဖြုတ်ချဖို့ မလွယ်မှာစိုးတယ်”

ချူးယွင်ဖန်းသည် ရှင်ကျာမုနိ၏ဆင်ပစ်သိုင်းကြောင့် လူအများ အံ့အားသင့်ခဲ့ကြသည်။ ၎င်းတို့ထဲတွင် ဝမ်ချီလည်း ပါဝင်သည်။ သူ ခဏတာမျှ အေးခဲသွား၏။ ချူးယွင်ဖန်းသည် ရှင်ကျာမုနိ၏ ဆင်ပစ်သိုင်း ကို အသုံးပြု၍ သူပစ်ချသော ကျောက်တုံးကို အမှန်တကယ် ဖမ်းမိခဲ့သည်။ ထို့နောက် ဝမ်ချီက မတုံ့ပြန်နိုင်ခင်၌ပင် ချူးယွင်ဖန်းက သူ့လက်ကို လှန်၍ ကြီးမားလှသော ကျောက်တုံးကြီးကို သူ့ဆီသို့ ပြန်ပစ်လိုက်သည်ကို မြင်လိုက်ရ၏။ ရှင်ကျာမုနိ၏ ဆင်ပစ်သိုင်းကို အသုံးပြုခဲ့သော သိုင်း၏ အမြန်နှုန်းနှင့် နှိုင်းယှဉ်ပါက ၎င်းသည် ပို၍ပင် မြန်ဆန်သည်။

ဝမ်ချီသည် ကျောက်တုံးကို လက်ဗလာဖြင့် လက်ခံဝံ့သော ချူးယွင်ဖန်းနှင့် မတူဘဲ၊ ထိုသို့သာ လက်ခံယူလိုက်ပါက သူ၏ လက်များကျိုးသွားပေလိမ့်မည်ဖြစ်သည်။

ဝှစ်ရှ်

ဝမ်ချီသည် မြေပြင်ပေါ်သို့ ခြေဆောင့်၍ ကျောက်ဆောင်ကြီးကို အမြန်ရှောင်တိမ်းလိုက်သည်။ ကျယ်လောင်သောအသံတစ်ခုကြားပြီးနောက်၊ သူမသိလိုက်မီ၌ပင် ချူးယွင်ဖန်းသည် သူ့ရှေ့တွင် ရပ်နေပြီဖြစ်ကြောင်းတွေ့လိုက်ရ၏။

‘မြန်လိုက်တာ'

ထိုကဲ့သို့သော အတွေးတစ်ခု ဝမ်ချီ၏ စိတ်ထဲတွင် ရုတ်တရက် ပေါ်လာသည်။ ၎င်းသည် အလွန်လျင်မြန်လှသဖြင့် ဝမ်ချီက ရှောင်လိုက်သောအခိုက်အတန့်၌ပင် ချူးယွင်ဖန်းက သူ့အနားသို့ကပ်နေပြီဖြစ်သည်။

ချူးယွင်ဖန်းထွက်လာသောအခါ ခြေလှမ်းအနည်းငယ်သာ လှမ်းလိုက်သည်ကို ပတ်ဝန်းကျင်ရှိ လူအုပ်ကြီးက ပို၍ပင် ရှင်းရှင်းလင်းလင်း မြင်နေရသည်။ ဤခြေလှမ်းအနည်းငယ်တွင် သူသည် အကွာအဝေးအလွှာများကို ဖြတ်ကျော်ခဲ့၍ ယခု ဝမ်ချီ၏ရှေ့တွင် မတ်တပ်ရပ်နေ၏။

"နတ်နှံကောင် ကန်ချက်”

ချူးယွင်ဖန်းက ကြုံးဝါး၍ ခြေထောက်ဖြင့် ကန်ချလိုက်ရာ၊ ဝမ်ချီ၏ ရင်ဘတ်ဆီသို့ တန်းတန်းမတ်မတ် ရောက်သွားသော သူ၏ ရှည်လျားသော ခြေထောက်သည် ဓားတစ်စင်းနှင့်တူသည်။ ယခင်က ကွမ်ဖူအသင်းမှ လီကွမ်ဟွာကို ပြင်းထန်စွာကန်ချခဲ့၍ ဒဏ်ရာအပြင်းအထန်ရခဲ့သည်။ ယခုအခါ ချူးယွင်ဖန်းသည် အလားတူလှည့်ကွက်ကို ထပ်မံအသုံးပြုတော့မည်ဖြစ်သည်။

"ငါ့ကို လျှော့မတွက်နဲ့”

"မိုးကြိုးမီးတံခွန်"

ဝမ်ချီ၏လက်သည် စည်းချိပ်တစ်ခုကို ဖန်တီးလိုက်၏။ စည်းချိပ်အတွင်းမှ ချီစွမ်းအင်များသည် တောက်လောက်သောမီးကဲ့သို့ ပွက်ပွက်ဆူလာကာ လျှပ်စီးနှင့် မိုးကြိုးများကဲ့သို့ ထင်ရသည်။ ထို့နောက် ၎င်းသည် ချူးယွင်ဖန်း၏ ခြေထောက်သို့ တိုက်ရိုက်ထိမှန်သွား၏။

ဘမ်း

ချူးယွင်ဖန်း၏ ကန်ချက်သည် စည်းချိပ်နှင့် ထိမှန်သွား၍ တစ်ခဏချင်း၌ပင် အရာအားလုံး ပေါက်ကွဲကာ နှစ်ဖက်စလုံး၏ ချီစွမ်းအင်များ ပြင်းထန်စွာ တိုက်မိသွားသည်။ အထူးသဖြင့် မရီးဒျန်သန့်စင်ခြင်းအဆင့်ထက် အဆပေါင်းများစွာ ပိုမိုသန်မာသော ဝမ်ကျီ၏ မွေးဖွားခြင်းနယ်မြေအဆင့် စွမ်းအင်များသည် ကမ္ဘာမြေကြီးနှင့် ကောင်းကင်၏ စွမ်းအားဖြင့် ပေါက်ကွဲသွားသည်။

သို့သော် လူတိုင်းမမျှော်လင့်ထားသည့်အရာမှာ ချူးယွင်ဖန်း၏ မရီးဒျန်သန့်စင်ခြင်းအဆင့် စွမ်းအားများသည် ဝမ်ချီ၏မွေးဖွားခြင်းနယ်မြေအဆင့် ချီစွမ်းအင်များနှင့် ထိတိုက်မိသောအခါတွင် ချူးယွင်ဖန်းက အမှန်တကယ် အနိုင်ရသွားခြင်းဖြစ်သည်။

ချူးယွင်ဖန်း၏ နတ်ဘုရားကျင့်စဥ်၏ အရည်အသွေးနှင့် ဧကရာဇ်ခန္ဓာကိုယ်စနစ်တို့ ပေါင်းစပ်သွားသောအခါတွင် မွေးဖွားခြင်းနယ်မြေအဆင့်နှင့်ပင် နှိုင်းယှဥ်နိုင်၏။ ဤသို့မျှမဟုတ်လျှင် ချူးယွင်ဖန်းတွင် မွေးဖွားခြင်းနယ်မြေအဆင့်နှင့် ယှဥ်နိုင်သော တိုက်ခိုက်ရေးစွမ်းရည်ရှိလိမ့်မည်မဟုတ်ပေ။ မွေးဖွားခြင်းနယ်မြေအဆင့် ကျွမ်းကျင်သူများသည် စွမ်းအင်နှင့် ရုပ်ပိုင်းဆိုင်ရာ အရည်အသွေး နှစ်မျိုးစလုံးတွင် မရီးဒျန်သန့်စင်ခြင်းအဆင့် ကျွမ်းကျင်သူများထက် များစွာသာလွန်သည်။ ၎င်းသည် အဆင့်သစ်တစ်ခုပင်ဖြစ်သည်။ နတ်ဘုရားကျင့်စဉ်နှင့် ပေါင်းစပ်ထားသော ဧကရာဇ်ကိုယ်ခန္ဓာစနစ်သည် အလွန်အမင်း တုန်လှုပ်ခြောက်ခြားဖွယ်ကောင်းလှသည်။

ကန်ချက်တစ်ချက်က မိုးကြိုးမီးတံခွန်ကို ဖြိုခွဲပစ်လိုက်သည်။

"ဒါက ဘယ်လိုဖြစ်နိုင်မှာလဲ"

ဝမ်ချီသည် လုံးလုံးပြင်ဆင်ထားခြင်း မရှိပေ။ ချူးယွင်ဖန်း၏ ကန်ချက်က သူ့တိုက်ခိုက်မှုကို ဖျက်ဆီးပစ်နိုင်လိမ့်မည်ဟု သူမမျှော်လင့်ထားခဲ့ပေ။ ချက်ချင်းဆိုသကဲ့သို့ပင် သူသည် ချူးယွင်ဖန်း၏ ဓားနှင့်တူသော ကန်ချက်ကို တားဆီးရန် သူ့ရှေ့တွင် သူ့လက်များကို တိုက်ရိုက်ကာထားလိုက်သည်။

ဘမ်း

ချူးယွင်ဖန်း၏ ခြေထောက်သည် ဆက်လက် ထွက်ပေါ်လာ၏။ ကျိုးကြေသွားသံတစ်ခုနှင့်အတူ ကျယ်လောင်သော အသံကို ကြားလိုက်ရသည်။ ချူးယွင်ဖန်း၏ကန်ချက်ကြောင့် ဝမ်ချီ၏လက်များကို ကျိုးသွား၏။

ဝမ်ချီသည် သံချပ်ကာယာဉ်တိုက်ခံရသကဲ့သို့ ခံစားလိုက်ရသည်။ သူ့လက်များ ကျိုးသွားရုံသာမက သူ့ခန္ဓာကိုယ်ထဲမှ အရိုးများအားလုံးလည်း ကျိုးသွားသကဲ့သို့ ထင်ရသည်။ ကြံ့ခိုင်မှုအရ ဝမ်ချီသည် မွေးဖွားခြင်းနယ်မြေအဆင့်သို့ တက်လှမ်းနိုင်ခဲ့ကာ အကြီးအကဲကွမ်ထက် များစွာ အဆင့်နိမ့်သည်။ အကြီးအကဲကွမ်ပင်လျှင် လက်ရှိ ချူးယွင်ဖန်းကို မတားနိုင်ပေ။ ချူးယွင်ဖန်း၏ ဧကရာဇ်ခန္ဓာကိုယ်နှင့် နတ်ဘုရားကျင့်စဥ်သည် အကောင်းဆုံသိုင်းပညာများထဲမှ အချို့ဖြစ်သည်။ အဆင့်မကျော်ဖြတ်လျှင် အဆင်ပြေသော်လည်း အဆင့် ကျော်ဖြတ်နိုင်သွားသောအခါတွင် တိုက်ပွဲခွန်အားမှာ တစ်ရှိန်ထိုးတိုးမြင့်လာလိမ့်မည်ဖြစ်သည်။

သို့သော် ချူးယွင်ဖန်းသာ ဤသည်ကိုသိ၏ ဝမ်ချီနှင့် အခြားသူများ အတွက်မူ ဤသည်မှာ သိပ္ပံနည်းကျမဟုတ်ပေ။ အနိုင်ရမည်ဟု ထင်ထားသော ဝမ်ချီသည်ပင်လျှင် ကန်ချက်ကြောင့် အပြင်းအထန်ဒဏ်ရာရသွားခဲ့သည်။

ဝမ်ချီ၏ ခြေထောက်သည် မြေကြီးပေါ်၌ တရွတ်ဆွဲနေသည်။ အလွန်ပြင်းထန်သော နာကျင်မှုနှင့် ဖိအားကြောင့် သူ့ကိုယ်သူ ဟန်ချက်ထိန်းရန်ပင် ခက်ခဲလှ၏။ ချူးယွင်ဖန်းက ဤသို့သော အခွင့်အရေးကို မည်ကဲ့သို့ လက်လွတ်ခံလိမ့်မည်နည်း။ သူက အခွင့်အရေးကို အရယူ၍ ခြေထောက်ကို မကာ ထပ်မံ၍ ကန်လိုက်သည်။

ဘမ်း

ဤအချိန်တွင် ဝမ်ချီက ဆက်လက်၍ မတ်တပ်မရပ်နိုင်တော့ပေ။ သူ့ခန္ဓာကိုယ်တစ်ခုလုံး လွင့်ထွက်၍ မြေပြင်ပေါ်သို့ ကျသွား၏။ သူက အကြိမ်အနည်းငယ်ခန့် ရုန်းကန်နေပြီးသော်လည်း ပြန်မထနိုင်သေးပေ။ သူ့ရင်ဘတ်မှ နံရိုးများအားလုံး ကန်ချက်တစ်ချက်တည်းကြောင့် ကျိုးကြေသွားသည်။ မွေးဖွားခြင်းနယ်မြေအဆင့်သို့ တက်လှမ်းနိုင်ခဲ့သည့် ဝမ်ချီသည်ပင်လျှင် ချူးယွင်ဖန်း၏ လက်ထဲတွင် လုံးဝရှုံးနိမ့်သွား၏။ သူက ဆက်လက်၍ တောင့်ခံမထားနိုင်တော့ပေ။

“ဘယ်လောက်တောင် ကြောက်ဖို့ကောင်းတဲ့ ကန်ချက်လဲ။ ဒီကန်ချက်ရဲ့ အားက ဒုုံးကျည်တစ်စင်းလိုပဲ”

“ဝမ်ချီက ဒါကို လုံးဝမခံနိုင်ဘူးပဲ။ သူ ပထမတည်းက အဲ့တာကို မတားနိုင်တာ အခု ဒုတိယအကြိမ်တားဖို့ဆို ပိုတောင် မဖြစ်နိုင်သေးတယ်”

“မွေးဖွားခြင်းနယ်မြေအဆင့် သိုင်းသမားတောင် ရှုံးနိမ့်သွားတယ်။ ချူးယွင်ဖန်းက ဘယ်လို ကျင့်ကြံရေးအဆင့်မျိုးမှာရှိနေတာလဲ။ သူမွေးဖွားခြင်းနယ်မြေအဆင့်ကို ရောက်နေပြီလား”

“ချူးယွင်ဖန်းက ဘယ်အဆင့်မှာပဲရှိရှိ သူက ကောင်းကင်ဘုံကို အံတုနေတာပဲ။ သူက ကျောင်းသားသစ်တစ်ယောက်ပဲရှိသေးတာလေ။ ဘယ်လိုလုပ်ဒီလောက် ကြောက်ဖို့ကောင်းမှာလဲ”

လူများစွာက မွန်းစတားတစ်ကောင် မွေးဖွားခြင်းကို မျက်မြင်တွေ့ရသကဲ့သို့ ၎င်းတို့၏ အဆုတ်များ အေးခဲသွားသည့်နှယ် ခံစားလိုက်ကြရသည်။

ချူးယွင်ဖန်းအတွက်မူ ဝမ်ချီကို အနိုင်ယူခြင်းသည် မျက်တောင်ခပ်ခြင်းကဲ့သို့ပင် လွယ်ကူလှ၏။ မှန်သည် ဝမ်ချီထက် ပို၍ သန်မာသော အကြီးအကဲကွမ်ပင်လျှင် ချူးယွင်ဖန်းကို မယှဥ်နိုင်ပေ။ ဝမ်ချီက မည်သို့ယှဥ်နိုင်လိမ့်မည်နည်း။

ချူးယွင်ဖန်း လျှို့ဝှက်စွာသိရှိခဲ့သည့် နတ်နှံကောင်ကန်ချက်သည် အမှန်တကယ်ပင် စွမ်းအားကြီးလှသည်။ လူတစ်ယောက်၏ ခြေထောက်များ၏ ခွန်အားသည် အလွန်မြင့်မားလှသဖြင့် ၎င်းတို့၏ လက်မောင်းဖြင့်ပင် နှိုင်းယှဥ်နိုင်၏။ ကန်ချက်သိုင်းကို အသုံးပြုခြင်းက ချူးယွင်ဖန်းကို ဧကရာဇ် ခန္ဓာကိုယ်စနစ်ကို ကျင့်ကြံခြင်း၏ အားသာချက်ကို အပြည့်အဝထုတ်ပြပေးနိုင်စေသည်။

ဝမ်ချီကို အနိုင်ယူပြီးနောက် ချူးယွင်ဖန်း၏ အတွေးများ ချက်ချင်းပင် ပြောင်းသွားသည် ။သူ၏ တိုက်ပွဲခွန်အားကို မြှင့်တင်ရန် ကျူးချွဲ့ကို သုံးရသော ကမ္ဘာသခင်ဓားသိုင်းအပြင် သူက လက်သီးသိုင်းနှင့် ခြေကန်သိုင်းအချို့ကို ကျင့်ကြံရမည်ဖြစ်သည်။ ချူးယွင်ဖန်းသည် နတ်နှံကောင်ကန်ချက်နှင့် ရှင်ကျာမုနိ၏ ဆင်ပစ်သိုင်းတို့ကို လဲလှယ်ရမည်ဖြစ်သည်။ ဤအရာများသည် ချူးယွင်ဖန်း သင်ယူလိုသည့် နတ်သိုင်းများဖြစ်သည်။ ၎င်းတို့သည် သူ၏ တိုက်ပွဲစွမ်းရည်ကို အလွန်တိုးတက်စေနိုင်သည်။

ချူးယွင်ဖန်းသည် သူ၏ စနစ်၌ စစ်ဆေးလိုက်သောအခါ နတ်နှံကောင်ကန်ချက်ကို သင်ယူရန် အမှန်၁၀သန်း အသုံးပြုရမည်ဖြစ်ကြောင်းနှင့် ရှင်ကျာမုနိသိုင်းကို သင်ယူလိုပါက သန်း၂၀ အသုံးပြုရမည်ဖြစ်ကြောင်း သိရှိသွားသည်။ သာမန်လူတစ်ဦးသာဖြစ်ပါက ယင်းကို တတ်နိုင်မည်မဟုတ်ပေ။ ကံကောင်းထောက်မစွာဖြင့် ချူးယွင်ဖန်းက သူ့အမှတ်များအားလုံးကို အသုံးမပြုရသေးပေ။

ဤသည်ကို တွေး၍ ချူးယွင်ဖန်းသည် ဆက်လက် တုံ့ဆိုင်းမနေတော့ပေ။ သူက အလျင်အမြန်ပင် ဗီလာထဲသို့ဝင်၍ ဤသိုင်းကွက်များအတွက် အမှတ်များနှင့်လဲလိုက်သည်။

ဤအခိုက်အတန့်တွင် တက္ကသိုလ်အတွင်း၌ ချူးယွင်ဖန်းစခဲ့သည့် မုန်တိုင်း အမှန်တကယ် စတင်ပြီဖြစ်သည်။