အခန်း (၆၀၁-၆၀၃)

အခန်း (၆၀၁) လုဖေးယွီကို အနိုင်ယူ၍ သုန်ဖန်ဟောက်ကို တိုက်ခိုက်ခြင်း

ချူးယွင်ဖန်းနှင့် လုဖေးယွီတို့သည် ပထမဆုံးအကြိမ် တိုက်ခိုက်နေခြင်း မဟုတ်ပေ။ လုဖေးယွီသည် ချူးယွင်ဖန်းနှင့် နောက်ဆုံး ရင်ဆိုင်ခဲ့ချိန်က သွေးအန်ထွက်သည်အထိ အရိုက်နှက်ခဲ့ရသောကြောင့် ထွက်ပြေးတိမ်းရှောင်ခဲ့ရသည်။ လုဖေးယွီတွင် ယခုအချိန်အထိပင် ကြောက်ရွံ့မှုအချို့ ရှိနေသေးသည်။ ကြယ်တာရာကျွန်းတွင် ချူးယွင်ဖန်း၏ အစုလိုက်အပြုံလိုက် သတ်ဖြတ်မှုများအရ မိမိသာ အချိန်မီ မလွတ်မြောက်ခဲ့လျှင် မိမိ၏အဆုံးသတ်သည်လည်း အခြားသူများထက် ပိုမိုကောင်းမွန်မည် မဟုတ်ပေ။

ညီလာခံပြီးဆုံးခါနီးအချိန် လူတိုင်းက ချူးယွင်ဖန်းကို ဝန်းရံရန် တတ်သွားကြချိန်တွင် လုဖေးယွီသည် အရှေ့သို့ တိုးရန်ပင် သတ္တိမရှိခဲ့ပေ။ ချူးယွင်ဖန်းနှင့် အမှန်တကယ် တိုက်ခိုက်ဖူးသူမှသာလျှင် ချူးယွင်ဖန်းက မည်မျှ ကြောက်မက်ဖွယ်ကောင်းသည်ကို နားလည်နိုင်မည်ဖြစ်သည်။ ဤတစ်ကြိမ်တွင် လုဖေးယွီက ချူးယွင်ဖန်းနှင့် ထပ်မံတွေ့ဆုံသောအခါ သူ၏အမူအရာသည် အလွန်လေးနက်၍ နိုးကြားမှုရှိနေသည်။

"ကြည့်ရတာ ငါတို့က ကံစပ်ပုံရတယ်" ချူးယွင်ဖန်းက အနည်းငယ် ပြုံးလိုက်သည်။

လုဖေးယွီ၏အမြင်တွင် ချူးယွင်ဖန်းက မိမိကို သိသိသာသာ လှောင်ပြောင်နေခြင်းဖြစ်သည်။ သူ၏မျက်နှာသည် ဒေါသအရိပ်အမြွက်များဖြင့် ချက်ချင်း ပြည့်နှက်သွားသည်။ လက်တွေ့တွင် သူသည် ချူးယွင်ဖန်းကို တိုက်ခိုက်ရန် သတ္တိမရှိလျှင်ပင် ချူးယွင်ဖန်းက ဤအချက်ကို အခွင့်အရေးယူ၍ သူ့ကို ပြက်ရယ်ပြုမည်ကို မလိုလားပေ။ ယခုကဲ့သို့ ၎င်းတို့က virtual ကွန်ရက်တွင် ရှိနေချိန်သည် အရာအားလုံးသည် လုံးလုံးလျားလျား ကွဲပြားနေသည်။ လုဖေးယွီက ဤနေရာတွင် ရှုံးနိမ့်ခဲ့လျှင်ပင် သေဆုံးပြီး တစ်စက္ကန့်အကြာတွင် သူရဲကောင်းတစ်ဦးဖြစ်လာမည်ဖြစ်သည်။

"ချူးယွင်ဖန်း၊ မင်း သိပ်ပြီးဂုဏ်ယူမနေပါနဲ့။ သေပေတော့"

လုဖေးယွီ၏ဓားရှည် ပေါ်ထွက်လာသည်။ ၎င်းသည် သာမန်ဓားများထက် သုံးပုံတစ်ပုံမျှ ပို၍ ပါးလှပ်လွန်းသည့် ဓားရှည်ဖြစ်ရာ ချူးယွင်ဖန်း၏ အရှေ့သို့ လျင်မြန်စွာရောက်ရှိလာသည်။ လုဖေးယွီသည် ချူးယွင်ဖန်းနှင့် နောက်ဆုံးအကြိမ် တိုက်ခိုက်ခဲ့သည့်အချိန်နှင့် နှိုင်းယှဉ်ပါက ယခုအချိန်တွင် ပို၍အင်အားကြီးမားလာပြီဖြစ်သည်။ သူသည် မရီးဒျန်သန့်စင်ခြင်း ဆဋ္ဌမအဆင့်၏ အထွတ်အထိပ်မှ သတ္တမအဆင့်သို့ ရောက်ရှိသွားခဲ့သည်။ ကြမ်းတမ်းပြင်းထန်သော ကျင့်ကြံမှုများကို သုံးလကြာ ကျင့်ကြံခဲ့ပြီးနောက် သူသည် သတ္တမအဆင့်၏ အထွတ်အထိပ်သို့ အောင်မြင်စွာ တက်လှမ်းနိုင်ခဲ့သည်။

ကျွန်းပေါ်တွင်ရှိနေချိန်က သုန်ဖန်ဟောက်၏ ခွန်အားနှင့် နှိုင်းယှဉ်လျှင် လုဖေးယွီသည်လည်း ၎င်းထက် အားနည်းမည် မဟုတ်ပေ။ သို့သော် လက်ရှိ လုဖေးယွီမဆိုနှင့် ထိုအချိန်က သုန်ဖန်ဟောက်လျှင်ပင် ချူးယွင်ဖန်းကို ယှဉ်ပြိုင်နိုင်ခြင်း မရှိခဲ့ပေ။ ဤခုတ်ပိုင်းမှုသည် သတ်ဖြတ်လိုစိတ်ဖြင့် ပြုလုပ်ခဲ့ခြင်းဖြစ်သည်။ ၎င်းသည် အလွန်လျင်မြန်လွန်းသောကြောင့် စိတ်ကူးရန်ပင် ခက်ခဲလှသည်။ ကောင်းကင်မှ ဆင်းသက်လာသော ၎င်းသည် ခုခံနိုင်စွမ်းကင်းမဲ့သော စွမ်းအင်များကို သယ်ဆောင်၍ ချူးယွင်ဖန်းကို ခုတ်ထစ်လိုက်သည်။ ချူးယွင်ဖန်းသည် ၎င်းဓါးချက်ကို တစ်ချက်မျှပင် လှည့်မကြည့်ခဲ့ပေ။ သူ၏ ခန္ဓာကိုယ်တစ်ခုလုံးရှိ ချီစွမ်းအင်များ ချက်ချင်း ထွက်ပေါ်လာ၍ သူ၏ပတ်ဝန်းကျင်တွင် ပြင်းထန်သော စွမ်းအင်တွန်းအားများကို ဖြစ်ပေါ်စေတော့သည်။ လုဖေးယွီ၏ ထိုးနှက်ချက်သည် အလွန်လျင်မြန်၍ ၎င်း၏စွမ်းအင်သည် ထိတ်လန့်တုန်လှုပ်ဖွယ်ကောင်းသည်။ ၎င်းသည် သံမဏိကိုပင် တိုဟူးကဲ့သို့ ဖြတ်တောက်နိုင်သော စွမ်းအင်ဖြစ်သည်။

ယခုမူ ဓါးသည် ချူးယွင်ဖန်းနှင့် သုံးလက်မအကွာတွင်သာ ရပ်တန့်သွားသည်။ ဓါးသွားသည် သူနှင့် လုံးလုံးလျားလျား နီးကပ်နိုင်ခြင်း မရှိခဲ့ပေ။

"သေစမ်း"

လုဖေးယွီက ချက်ချင်း တုံ့ပြန်လိုက်သည်။ ချူးယွင်ဖန်း၏ ချီစွမ်းအင်သည် မယုံကြည်နိုင်ဖွယ်ကောင်းလှသည်အထိ အလွန်သိပ်သည်းလှသည်။ သူ၏ဓားသွားက ၎င်းကို မဖြတ်တောက်နိုင်ခြင်းက အံ့ဩဖွယ်ဖြစ်ရပ်သာဖြစ်သည်။

"နတ်နှံကောင် ကန်ချက်"

သို့သော် ချူးယွင်ဖန်းက လုဖေးယွီကို တုံ့ပြန်ရန် မည်သို့မျှ အခွင့်အရေးပေးမည်နည်း။

ချူးယွင်ဖန်းသည် သူ၏ခြေထောက်ကို မြှောက်၍ ကန်ထုတ်လိုက်သည်။ ဤကန်ချက်က လုဖေးယွီ၏ ခန္ဓာကိုယ်ကို သင်တုန်းဓားသွားတစ်ခုကဲ့သို့ ဖြတ်တောက်သွားသည်။ ပလုံးပထွေး ညည်းညူပြီးနောက်၊ လုဖေးယွီ၏ ခန္ဓာကိုယ်သည် အလင်းတန်းတစ်ခုအဖြစ်သို့ ပြောင်းလဲကာ ချက်ချင်း သေဆုံးသွားသည်။

သူသည် လှုပ်ရှားမှုတစ်ခုတည်းဖြင့် ချက်ချင်း သေဆုံးသွားခဲ့သည်။

“ဘာစွမ်းအင်လဲဟ။ ချူးယွင်ဖန်းရဲ့ ကျင့်ကြံမှုအဆင့်က မယုံနိုင်စရာကောင်းတဲ့အဆင့်ကို ရောက်နေပြီပဲ”

“လုဖေးယွီရဲ့ ကျင့်ကြံခြင်းအဆင့်က မရီးဒျန်သန့်စင်ခြင်း သတ္တမအဆင့်ကို ရောက်နေပြီ။ ငါတို့ကိုယ်တိုင် ဝင်တိုက်ခိုက်ရင်တောင် လုဖေးယွီကို ဒီလောက်ပြတ်ပြတ်သားသား တိုက်ခိုက်နိုင်မှာ မဟုတ်ဘူး။ ချူးယွင်ဖန်းက ကျောင်းသားသစ်ဆိုပေမယ့် သာမန်နည်းပြဆရာ တစ်ယောက်နဲ့တောင် ယှဉ်နိုင်နေပြီ။ သူ့ အရည်အချင်းက တကယ့်ကို အံ့မခန်းပဲ"

“ငါတော့ အဲလို မထင်ဘူး။ သာမာန် နည်းပြတစ်ယောက်တောင် သူနဲ့ ယှဉ်နိုင်မှာ မဟုတ်ဘူး။ သူရဲ့ ကျင့်ကြံမှုအဆင့်က ပြိုင်ဘက်ကင်းပြီး တော်တော်လေး နက်နဲလွန်းတယ်။ ကျန်းယွမ်ပင်က တကယ့် ရတနာကို ကောက်ရခဲ့တာပဲ"

"ဟုတ်တယ်။ အရင်ကဆိုရင် အချိန်မီ မလှုပ်ရှားနိုင်လို့ဆိုပြီး ကျန်းယွမ်ပင်ကို ငါတို့အကုန်လုံးက လှောင်ရယ်ခဲ့ကြတာ။ ကြည့်ရတာ သူက အကွက်ကောင်းကို နောက်ဆုံးမှ ကောင်းရခဲ့ပုံပဲ"

ဤမြင်ကွင်းကိုမြင်လိုက်ရသော နည်ပြဆရာများစွာက ၎င်းတို့အချင်းချင်း စတင်ဆွေးနွေးနေကြသည်။ ၎င်းတို့သည် သာမာန်ဆရာများထက် အလွန်အင်အားကြီးမားသူများ ဖြစ်ကြသည်။ ဤမြင်ကွင်းကို မြင်ပြီးနောက် ချူးယွင်ဖန်းက သာမန် မရီးဒျန်သန့်စင်ခြင်း အထွတ်အထိပ်အဆင့် နည်းပြဆရာတစ်ဦးထက်ပင် ပို၍သန်မာသည်ဟု ၎င်းတို့က ကောက်ချက်ချနိုင်သည်။ ပြည်ထောင်စုတက္ကသိုလ်သည် နှစ်စဉ်နှစ်တိုင်းတွင် မရီးဒျန်သန့်စင်ခြင်း အထွတ်အထိပ်အဆင့် နည်းပညာဆရာများနှင့် နှိုင်းယှဉ်နိုင်သည့် ထူးချွန်ပြောင်မြောက်သော ကျောင်းသားများစွာကို မွေးထုတ်ပေးခဲ့သော်လည်း ကျောင်းသားသစ်တစ်ဦးက ထိုသို့သောအဆင့်သို့ ရောက်ရှိခဲ့ခြင်းသည် အလွန်ရှားပါးနေသေးသည်။ ၎င်းတို့သိရသလောက် နောက်ဆုံးအကြိမ် ဤအဆင့်သို့ ရောက်ရှိခဲ့သူသည် ကျန်းမိသားစုမှ ကျန်းလင်းရှောင်ဖြစ်သည်။

ချူးယွင်ဖန်းနှင့် ကျန်းလင်းရှောင်တို့ကြားက မရဏတိုက်ပွဲကို နည်းပြဆရာဆရာများက စဉ်းစားမိချိန်တွင် ပို၍ပင် နှမြောတသဖြစ်ဖွယ်ကောင်းသည်ဟု ခံစားမိကြသည်။ ဤကဲ့သို့သော ကောင်းကင်ဘုံ၏ ပါရမီရှင်နှစ်ဦးအနက် တစ်ဦးက ကျဆုံးရမည်ဖြစ်ရာ ၎င်းသည် ပြည်ထောင်စုတက္ကသိုလ်ကို အလွန်နစ်နာစေမည့် အချက်ဖြစ်သည်။

လုဖေးယွီကို ကန်ချက်တစ်ချက်ဖြင့် အပြီးသတ်ပြီးနောက် ချူးယွင်ဖန်းသည် ဖိုင်နယ်ကို အတားအဆီးမရှိဘဲ ဝင်ရောက်ခဲ့သည်။ သူ၏ နောက်ထပ်ပြိုင်ဘက်မှာ ယခုနှစ် ပြည်ထောင်စုတက္ကသိုလ်၏ ထိပ်တန်း ၃ နေရာတွင်ရှိသည့် သုန်ဖန်ဟောက်မှလွဲ၍ အခြားလူ မဟုတ်ပေ။ ချူးယွင်ဖန်းကိုတွေ့လိုက်သည်နှင့် သုန်ဖန်ဟောက်၏အမူအရာ လေးနက်လာသည်။ လက်ရှိ ချူးယွင်ဖန်းသည် လမ်းဘေးရှိ သာမန်လူငယ်တစ်ဦးနှင့် ဆင်တူသော်လည်း ချူးယွင်ဖန်းကို အမှန်တကယ် တိုက်ခိုက်ဖူးသော မိမိက ၎င်းမည်မျှ အစွမ်းထက်သည်ကို သိရှိထားသည်။

ဤသို့ဖြစ်လေလေ ၎င်း၏ အန္တရာယ်ဖြစ်မှုကို သုန်ဖန်ဟောက်က ပို၍ခံစားရလေဖြစ်သည်။ သူ၏ခန္ဓာကိုယ်ရှိ အမွှေးအမျှင်များပင် ထောင်မတ်သွားသကဲ့သို့ ခံစားလိုက်ရသည်။ ဤခံစားချက်သည် သူ၏အရှေ့တွင်ရှိနေသော ချူးယွင်ဖန်းက ကြယ်တာရာကျွန်းတွင် ညီလာခံကျင်းပစဉ်ကထက် ပို၍ ကြောက်မက်ဖွယ်ကောင်းနေပြီဖြစ်ကြောင်း သူကို နားလည်သွားစေသည်။

သုန်ဖန်ဟောက်သည် ဦးစွာတိုက်ခိုက်၍ အသာစီးရယူရန် ဆုံးဖြတ်လိုက်သည်။ မည်သို့ဆိုသော် အခွင့်အရေးကို ဦးစွာဆုပ်ကိုင်နိုင်မှသာ ချူးယွင်ဖန်းကို အနိုင်ယူနိုင်မည်ကို သူ သိထားသောကြောင့်ဖြစ်သည်။ သူက စကားတစ်ခွန်းမှ မပြောဘဲ အရှေ့သို့ ချက်ချင်း တက်လှမ်းလာရာ ခဏအကြာတွင် ချူးယွင်ဖန်း၏ အရှေ့သို့ ရောက်ရှိလာသည်။ ချက်ချင်းဆိုသကဲ့သို့ပင် သူ၏သံမဏိဓားက လေထုထဲသို့ ဖြတ်သန်းသွားခဲ့ရာ ချူးယွင်ဖန်း၏အရှေ့တွင် မရေတွက်နိုင်သည့် လေအပိုင်းအစများ ပြိုလဲကျ၍ ဗလာနတ္ထိအဖြစ်သို့ ပြောင်းလဲသွားခြင်းကိုပင် တွေ့မြင်နိုင်သည်။

သစ်ကိုင်းခြောက်ကိုပင် ဖျက်ဆီးပစ်နိုင်သည့် ဤကြောက်မက်ဖွယ် ခုတ်ပိုင်းမှုသည် ညီလာခံကျင်းပချိန်က ခွန်အားထက် ပိုမိုပြင်းထန်သည်။ လွန်ခဲ့သော လအနည်းငယ်က သုန်ဖန်ဟောက်သည် မရီးဒျန်သန့်စင်ခြင်း သတ္တမအဆင့်၏ အထွတ်အထိပ်သို့ ရောက်ရှိနေပြီဖြစ်သည်။ ယခုမူ သူသည် အဋ္ဌမအဆင့်ကို ကျော်ဖြတ်ရုံသာမက နဝမအဆင့်ကိုပင် တစ်ပြိုင်နက်တည်း တက်လှမ်းသွားခဲ့သည်။ သုန်ဖန်ဟောက်သည် နဝမအဆင့်၏ ကနဦးတွင်သာရှိသေးသော်လည်း ၎င်းသည် တူညီသည့် တောင်ဖျက်သူသိုင်း ဖြစ်နေဆဲဖြစ်သည်။ ယခုတစ်ကြိမ် လှုပ်ရှားမှု၏ စွမ်းအင်သည် ယခင်ကထက် အဆပေါင်းများစွာ ပိုမို သန်မာခဲ့သည်။

“မရီးဒျန်သန့်စင်ခြင်း နဝမအဆင့်။ သုန်ဖန်ဟောက်က နဝမအဆင့် တက်လှမ်းခဲ့ပြီပဲ။ အရင်ကသာဆိုရင် သူက အတန်းရဲ့ ပထမနေရာက အကောင်းဆုံး ကျောင်းသားဖြစ်မှာ သေချာတယ်။ ကံမကောင်းစွာနဲ့ပဲ ဒီနှစ်မှာ ချူးယွင်ဖန်းရော မေ့ဟိုက်ယွင်ရောက အရမ်းထူးချွန်လွန်းနေတယ်။ သုန်ဖန်ဟောက်လို တောက်ပနေတဲ့ ပြိုင်ဆန်ရှား ပါရမီရှင်မျိုးတောင် နေရာမရနိုင်တော့ဘူး”

ဤခုတ်ပိုင်းမှုကို မြင်လိုက်ရသော နည်ပြဆရာတစ်ဦးက ထိတ်လန့်စွာ အော်ဟစ်လိုက်သည်။

ဤနှုန်းဖြင့်သာဆိုလျှင် သုန်ဖန်ဟောက်သည် လအနည်းငယ်အတွင်း မရီးဒျန်သန့်စင်ခြင်းအဆင့်၏ အထွတ်အထိပ်သို့ တက်လှမ်းနိုင်ကာ ၎င်းတို့နှင့် တန်းတူရင်ဘောင်တန်းနိုင်မည်ဖြစ်သည်။ ထို့အပြင် ကျောင်းသားအများစုက မရီးဒျန်သန့်စင်ခြင်းအဆင့်သို့ပင် မတက်လှမ်းနိုင်ကြသေးပေ။ ထိုမှတစ်ဆင့် သုန်ဖန်ဟောက်သည် မည်မျှ သန်မာ၍ ကြောက်မက်ဖွယ်ကောင်းသည်ကို မြင်တွေ့နိုင်သည်။

၎င်းတို့အားလုံးက ချူးယွင်ဖန်းဘက်သို့ လှည့်ကြည့်လိုက်ကြသည်။ ဤခုတ်ပိုင်းမှုသည် ကြောက်မက်ဖွယ်ကောင်းလှသည်။ မရီးဒျန်သန့်စင်ခြင်း အထွတ်အထိပ်ရှိ နည်းပြဆရာများလျှင်ပင် ၎င်းကို ပေါ့ပေါ့ဆဆ ကိုင်တွယ်ဖြေရှင်းနိုင်မည်မဟုတ်ပေ။ သုန်ဖန်ဟောက်နှင့် နှိုင်းယှဥ်ကြည့်မည်ဆိုလျှင် သူနှင့် ၎င်းတို့ကြားတွင် ကွာခြားချက် အလွန်များပြားမည် မဟုတ်ပေ။

ဤအခိုက်တွင် ချူးယွင်ဖန်းက စတင်လှုပ်ရှားလိုက်သည်။ သူသည် လက်သီးတစ်ချက်ကို အသာအယာ ပစ်ထုတ်လိုက်သည်။ ၎င်းသည် သာမန်လက်သီးချက် တစ်ချက်မျှသာဖြစ်သော်လည်း ပုပ်သိုးနေသောအရာများကို မှော်ဆန်သည့်အရာတစ်ခုအဖြစ် ပြောင်းလဲပေးနိုင်သည့် စွမ်းအင်မျိုးရှိနေသည်။ လက်သီးချက်သည် ဓားသွားတိုက်ခိုက်မှုမှ ဖြစ်ပေါ်လာသော ကြောက်မက်ဖွယ်စွမ်းအင်ကို ဗလာနတ္ထိအဖြစ်သို့ ချေမှုန်းခဲ့ပြီးနောက် ဓါး၏အလင်းရောင်ဖြင့် တိုက်ရိုက်ဝင်တိုက်ခဲ့သည်။

အခန်း (၆၀၂) ကွာခြားချက်က ယခင်ကထက် ပို၍ကြီးမားနေခြင်း

ဘုံး

ကြောက်မက်ဖွယ် ချီစွမ်းအင် လှိုင်းလုံးကြီးများ ပေါက်ကွဲထွက်လာသည်။ ချူးယွင်ဖန်း၏ လက်သီးသည် သံမဏိဓားပေါ်သို့ ကျရောက်သွား၍ ၎င်း၏ ကြောက်မက်ဖွယ် လက်သီးအလင်းရောင်သည် ဓားသွား၏အလင်းရောင်ကို ချက်ချင်း ဖျက်ဆီးပစ်လိုက်သည်။ ချူးယွင်ဖန်း၏ ထိုးနှက်ချက်တစ်ချက်ကိုပင် ခံနိုင်ရည်မည့် ဓားအလင်းရောင်ဟူ၍ မရှိပေ။

မရီးဒျန်သန့်စင်ခြင်း နဝမအဆင့်သို့ တက်လှမ်းလာသည့် သုန်ဖန်ဟောက်ကဲ့သို့ သန်မာသူလျှင်ပင် လက်ရှိ ချူးယွင်ဖန်း၏ ထိုးနှက်ချက်တစ်ချက်ကို ခံနိုင်ရည် ရှိမည်မဟုတ်ပေ။ သူသည် ချူးယွင်ဖန်း၏ ပြိုင်ဖက်မဟုတ်ခဲ့ပေ။

"ဘာလဲ ဟ…”

ချူးယွင်ဖန်းသည် ကြောက်မက်ဖွယ်ကောင်းသူဖြစ်ကြောင်း သုန်ဖန်ဟောက်က သိထားသော်လည်း၊ သူ၏ တောင်ဖျက်သူကို ဤမျှပေါ့တန်သော လက်သီးချက်ဖြင့် အောင်မြင်စွာ ချေမှုန်းနိုင်လိမ့်မည်ဟု သူ မထင်မှတ်ထားခဲ့ပေ။ ပြီးနောက် ချက်ချင်းဆိုသကဲ့သို့ပင် အကန့်အသတ်မဲ့ ချီစွမ်းအင်များပါဝင်သည့် ကြောက်မက်ဖွယ် စွမ်းအားတစ်ခု ပျံ့နှံ့သွားသည်။ သုန်ဖန်ဟောက်၏တိုက်ခိုက်မှုကို ချူးယွင်ဖန်းက အလွယ်တကူ ချိုးဖျက်နိုင်ခဲ့သော်လည်း ချူးယွင်ဖန်း၏တိုက်ခိုက်မှုသည် အရိပ်တစ်ခုကဲ့သို့ ဆက်လက်ပျံ့နှံ့နေခဲ့သည်။

သုန်ဖန်ဟောက်သည် ဤကြောက်မက်ဖွယ် စွမ်းအင်ကြောင့် ဖြစ်ပေါ်လာသော လွှမ်းမိုးမှု စွမ်းအင်ကို ခုခံနိုင်ခြင်းမရှိဘဲ ခြေလှမ်းအနည်းငယ်မျှ နောက်ပြန်ဆုတ်သွားခဲ့ရသည်။ ချူးယွင်ဖန်း၏ ခန္ဓာကိုယ်သည် ကြောက်မက်ဖွယ် စွမ်းအားများ ပါဝင်နေသည့် အောက်ခြေမရှိသော တွင်းနက်ကြီးတစ်ခုကဲ့သို့ ဖြစ်နေသည်ဟု သူ ချက်ချင်း ခံစားလိုက်ရသည်။ တစ်ချိန်တည်း၌ပင် ဤစွမ်းအင်သည် အဆုံးမရှိ များပြားလှသည်။ သူ၏တိုက်ခိုက်မှုများသည် ချူးယွင်ဖန်းကို လုံးလုံးလျားလျား မသက်ရောက်ခဲ့ပေ။

တကယ်ကိုပင် ချူးယွင်ဖန်းသည် သုန်ဖန်ဟောက် ခန့်မှန်းခဲ့သည့်အတိုင်း ညီလာခံကျင်းပချိန်ထက် ပိုမို သန်မာလာခဲ့သည်။

သုန်ဖန်ဟောက်၏ ဤတိုက်ခိုက်မှုသည် အဆင့်နိမ့် စက်လက်နက် တစ်စင်းကိုပင် ဖြိုခွဲနိုင်ခဲ့သော်လည်း ချူးယွင်ဖန်းက ၎င်းကို သူ၏လက်ဗလာဖြင့် ခုခံခဲ့သည့်အပြင် ခြစ်ရာတစ်ခုမျှ မကျန်ရစ်ခဲ့ပေ။ ၎င်းသည် လုံးလုံးလျားလျား ကြောက်မက်ဖွယ်ကောင်းသော စွမ်းအင်ဖြစ်သည်။ သို့သော် အခြေအနေအရ သုန်ဖန်ဟောက်တွင် ဤကိစ္စကို တွေးတောရန် အချိန်မရှိပေ။ သူ မသိလိုက်ခင်၌ပင် ချူးယွင်ဖန်းက သူ၏အရှေ့တွင် ရပ်နေပြီဖြစ်သည်။ အစွမ်းကုန် တိုက်ခိုက်ရုံမှလွဲ၍ သူ့တွင် တစ်ခြားရွေးချယ်စရာ မရှိတော့ပေ။ သူက ဟန်ချက်ထိန်းရန် ခန္ဓာကိုယ်ကို ထိန်းချုပ်၍ အရှေ့သို့ တစ်လှမ်းတိုးလိုက်ပြီးနောက် တန်ပြန်တိုက်ခိုက်ခဲ့၏။

"တောင်ဖျက်သူရဲ့ ဒုတိယသိုင်းကွက်၊ ကောင်းကင်ဖျက်ဆီးသူ"

ဤဓားချက်သည် ယခင်ကထက် ပိုမိုပြင်းထန်၍ ကြောက်မက်ဖွယ်ကောင်းသည်။ သို့သော် ၎င်းသည် သုန်ဖန်ဟောက်ကိုလည်း ကြီးမားသည့် သက်ရောက်မှုကြီးတစ်ခု ဖြစ်စေခဲ့သည်။ သူ၏မျက်နှာတွင် နာကျင်သော အမူအရာမျိုး ပေါ်ပေါက်လာသည်။

တောင်ဖျက်သူသည် အလွန်မြင့်မားသောအဆင့်တွင်ရှိနေသည့် သိုင်းပညာတစ်ခုဖြစ်သည်မှာ သေချာသည်။ ၎င်းသည် မွေးဖွားခြင်းနယ်မြေအဆင့်ကိုပင် ရောက်ရှိနေသော သိုင်းပညာဖြစ်သည်။ လက်ရှိ သုန်ဖန်ဟောက်၏ အခြေအနေသည် သိုင်းကွက်များပိုမိုအသုံးပြုလေ၊ သူ၏ခန္ဓာကိုယ် ပိုမိုနွမ်းနယ်လေဖြစ်သည်။

သုန်ဖန်ဟောက်သည် ဤလှုပ်ရှားမှုကို မေ့ဟိုက်ယွင်နှင့် တိုက်ခိုက်ချိန်တွင် အသုံးပြုရန်အတွက် သိမ်းဆည်းထားချင်ခဲ့သည်။ ယခုအချိန်တွင် အသုံးပြုရန် လိုအပ်မည်ဟု သူ မမျှော်လင့်ထားခဲ့ပေ။ သို့သော် သူ၏စိတ်ထဲတွင် ချူးယွင်ဖန်းက မေ့ဟိုက်ယွင်ထက် ပို၍အန္တရာယ်များကြောင်းကို သိထားသောကြောင့် ယင်းတိုက်ခိုက်မှုကို ဆုံးရှုံးသည်ဟု သူ မယူဆခဲ့ပေ။

"နတ်နှံကောင် ကန်ချက်"

ချူးယွင်ဖန်း၏မျက်လုံးများသည် ခံစားချက်ကင်းမဲ့နေပုံပေါ်သည်။ ကျယ်လောင်သောအော်သံနှင့်အတူ သူ၏ခြေထောက်ကို မြှောက်လိုက်ရာ ချူးယွင်ဖန်း၏ အနီးတစ်ဝိုက်ရှိ ချီစွမ်းအင်များ ပေါက်ကွဲထွက်လာသည်။ နှံကောင်တစ်ကောင်ကဲ့သို့သော အရောင်အဝါမျိုးသည် သူ၏ခန္ဓာကိုယ်ကို ချက်ချင်း ဖုံးလွှမ်းသွားသည်။

"ချူးယွင်ဖန်းက တိုက်ပွဲအတွင်းမှာ အဆင့်ဖြတ်ကျော်သွားတာပဲ"

နည်းပြဆရာတစ်ဦး၏ မျက်လုံးများသည် ယုံကြည်မှုကင်းမဲ့စွာ ပြူးကျယ်သွားကြသည်။ ချူးယွင်ဖန်းသည် ထိုသို့သောတိုက်ပွဲတွင် အဆင့်ဖြတ်ကျော်မှုတစ်ခုကို ပြုလုပ်နိုင်ခြင်းသည် မယုံကြည်နိုင်ဖွယ်ကောင်းလှသည်။

အစောပိုင်းတွင် ချူးယွင်ဖန်း အသုံးပြုခဲ့သည့် နတ်နှံကောင် ကန်ချက်သည် အလွန်သန်မာသော်လည်း ၎င်းသည် ပြစ်ချက်ကင်းအဆင့်တွင်သာ ရှိသေး၍ ပြီးပြည့်စုံအဆင့်သို့ မရောက်ရှိသေးပေ။ သို့သော် ဤကန်ချက်ဖြင့် ချူးယွင်ဖန်း၏ သိုင်းပညာသည် ပြစ်ချက်ကင်းအဆင့်မှ ပြီးပြည့်စုံအဆင့်သို့ အဆင့်ဖြတ်ကျော်သွားခဲ့သည်။

ချူးယွင်ဖန်းသည် ဤကဲ့သို့ ပြင်းထန်သော တိုက်ပွဲအတွင်းတွင် အဆင့်ဖြတ်ကျော်နိုင်ခြင်းကို နည်းပြဆရာများလျှင် ဆွံ့အနေကြသည်။ သူ၏အရည်အချင်းသည် ၎င်းတို့ ထင်မှတ်ထားသည်ထက် အရှိန်အဟုန်ကြီးမား၍ ကြောက်မက်ဖွယ်ကောင်းနေသည်။

ဘုံး

ကြောက်မက်ဖွယ် တိုက်ခိုက်မှုများ ထပ်မံရောက်ရှိလာပြန်သည်။ ချူးယွင်ဖန်း၏ ကန်ချက်သည် တောင်ဖျက်သူ၏ ဒုတိယလှုပ်ရှားမှုကို ဗလာနတ္ထိအဖြစ်သို့ ချက်ချင်း ပြောင်းလဲစေခဲ့သည်။

"နောက်ဆုံးတော့ အဆင့်ဖြတ်ကျော်သွားပြီ"

ချူးယွင်ဖန်းက သူ၏ခြေထောက်ကို ပြန်ရုပ်သိမ်း၍ ပြောလိုက်သည်။

ရက်အနည်းငယ်မျှ ကြာမြင့်ပြီးနောက် ချူးယွင်ဖန်း၏ နတ်နှံကောင်ကန်ချက်သည် အဆင့်ဖြတ်ကျော်၍ ပြီးပြည့်စုံအဆင့်သို့ ရောက်ရှိသွားခဲ့သည်။ သူ၏ ခွန်အားသည် ပြောင်းလဲသွားခြင်း မရှိသော်လည်း နတ်နှံကောင်ကန်ချက်၏ စွမ်းအင်နှင့် တိုက်ပွဲစွမ်းရည် အလွန်တိုးမြင့်လာသည်။

"မင်း ငါ့ကို ဓားသွေးကျောက်အဖြစ် သုံးလိုက်တာပဲ"

သုန်ဖန်ဟောက်၏ မျက်လုံးများ ပြူးကျယ်သွားသည်။ သူ၏လက်မောင်းမှ တစ်ဟုန်ထိုး ထွက်ပေါ်ကာ သူ၏ဓားသွားကို တုန်လှုပ်စေသည့် ကြောက်မက်ဖွယ် စွမ်းအင်ကို သူ ခံစားသိရှိနိုင်သည်။ ချူးယွင်ဖန်းသည် ၎င်း၏သိုင်းစွမ်းရည်ကို မြှင့်တင်ရန်အတွက် မိမိကို ဓားသွေးကျောက်တုံးအဖြစ် အသုံးပြုခဲ့သည်ဟူသော အချက်ကို သုန်ဖန်ဟောက်က လက်မခံနိုင်ခဲ့ပေ။

သုန်ဖန်ဟောက်သည် ယခင်အချိန်က ဤသို့အပြုအမူမျိုး ပြုလုပ်ဖူးသော်လည်း သူ့အတွက် ခြိမ်းခြောက်မှု လုံးလုံးလျားလျား မရှိသည့် ပြိုင်ဘက်များကိုသာ ဤသို့ပြုလုပ်ရန် ရွေးချယ်ခဲ့သည်။

တစ်နည်းအားဖြင့် ပြောရမည်ဆိုလျှင် ချူးယွင်ဖန်း၏မျက်လုံးထဲတွင် သုန်ဖန်ဟောက်က ခြိမ်းခြောက်မှုတစ်ခု မဟုတ်ခဲ့ပေ။

ဤသို့တွေးနေသော သုန်ဖန်ဟောက်က အလွန်ဒေါသထွက်လာသည်။ ချူးယွင်ဖန်းက အလွန်သန်မာသည်ဟု မိမိက ဝန်ခံထားသော်လည်း ၎င်းအပြုအမူသည် မကွယ်ဝှက်ထားသော ရိုင်းပျမှုဖြစ်သည်။

"ချူးယွင်ဖန်း၊ မင်းက ငါ့ကို အရမ်းလျှော့တွက်နေတာပဲ"

သုန်ဖန်ဟောက်၏ အရောင်အဝါသည် စူးရှ၍ ပြင်းထန်လာသည်။ သူ၏ခန္ဓာကိုယ်အတွင်းရှိ ချီစွမ်းအင်များ အရှိန်အဟုန်ပြင်းစွာ ချက်ချင်း ထွက်ပေါ်လာပြီးနောက် ချူးယွင်ဖန်းကို ခုန်အုပ်ကာ သူ၏လက်ထဲရှိ ဓားသွားဖြင့် ခုတ်ပိုင်းလိုက်သည်။ ကောင်းကင်တွင် မရေတွက်နိုင်သော ဓားပုံရိပ်များ ချက်ချင်း ပေါ်ပေါက်လာ၍ မိုးရေစက်များသကဲ့သို့ ဆင်းသက်လာခဲ့သည်။

ဘုံး၊ ဘုံး၊ ဘုံး

မရေတွက်နိုင်သော ချီစွမ်းအင်များသည် မြေမြှုပ်မိုင်းကြီးတစ်ခု ပေါက်ကွဲသွားသကဲ့သို့ လေထုထဲတွင် ပေါက်ကွဲသွားသည်။ ၎င်းတို့သည် ချူးယွင်ဖန်းဆီသို့ အပြင်းအထန် ကျဆင်းလာကြသည်။

"ငါ့ရဲ့ နတ်နှံကောင်ကန်ချက်ကို ပြီးပြည့်စုံအဆင့်ထိ အဆင့်ဖြတ်ကျော်အောင် ကူညီပေးခဲ့တာကို ကျေးဇူးတင်တဲ့အနေနဲ့ ငါတို့ကြားက ခွန်အားခြားနားချက်ကို ငါ မင်းကို တွေ့ခွင့်ပေးလိုက်မယ်"

ချူးယွင်ဖန်းက အော်ဟစ်လိုက်သည်နှင့် သူ၏ခန္ဓာကိုယ်ရှိ ချီစွမ်းအင်များ ပေါက်ကွဲလာသည်။ ပြီးနောက် ချူးယွင်ဖန်းက သူ၏ခြေထောက်ကို လျှပ်စီးချက်ကဲ့သို့ လှုပ်ရှားလိုက်ခြင်းကို လူတိုင်းက မြင်တွေ့လိုက်ရသည်။ သူ၏ခန္ဓာကိုယ်တစ်ခုလုံးကို ချီစွမ်းအင်များဖြင့် လွှမ်းခြုံထားရာ ၎င်းသည် တုနှိုင်းမဲ့သော ဧရာမနှံကောင်တစ်ကောင်အဖြစ်သို့ ပြောင်းလဲသွားသည်။ ကမ္ဘာတစ်ခုလုံးကို ထက်ဝက်ဖြတ်ပိုင်းသံကို ကြားလိုက်ရခြင်းကဲ့သို့ ပြင်းထန်နေသည်။

ဤကန်ချက်ကို စေလွှတ်လိုက်သည်နှင့် ကောင်းကင်မှ ရွာသွန်းနေသော ဓားသွားအလင်းရောင်သည် ဗလာနတ္ထိအဖြစ်သို့ ချက်ချင်း ပြောင်းလဲကာ ဒီရေကဲ့သို့သော ကြောက်မက်ဖွယ်ရာ ချီစွမ်းအင်များအတွင်း နစ်မြုပ်သွားခဲ့သည်။

ထိုဖြစ်စဉ်သည် ချူးယွင်ဖန်း၏ ကြွယ်ဝသော ကျင့်ကြံမှုစွမ်းအင်ကို ရှင်းလင်းစွာ ပြသခဲ့သည်။

ဤကန်ချက်သည် ဓားသွား အလင်းရောင်များကို ဖြတ်သန်းကာ အရှိန်အဟုန် လျော့ကျသွားခြင်းမရှိဘဲ သုန်ဖန်ဟောက်ဆီသို့ တိုက်ရိုက် ရောက်ရှိသွားသည်။

ဘန်း

ချူးယွင်ဖန်း၏ကန်ချက်သည် သုန်ဖန်ဟောက်၏ ချွန်ထက်သော ဓားအလင်းရောင်များဖြင့် ထိပ်တိုက်ရင်ဆိုင်လိုက်သည်။ ကြောက်မက်ဖွယ် ရိုက်ခတ်မှုသည် ကမ္ဘာမြေပေါ်သို့ ကျရောက်လာသော ကြယ်တံခွန်တစ်စင်းကဲ့သို့ဖြစ်နေခဲ့ရာ အကန့်အသတ်မဲ့သော ဒီရေလှိုင်းများကို ဖြစ်ပေါ်စေသည်။

သုန်ဖန်ဟောက်သည် သူ၏လက်မောင်းမှ တဆင့် အကန့်အသတ်မဲ့သော ချီစွမ်းအင်လှိုင်းလုံးကြီးကို ချက်ချင်းခံစားလိုက်ရသည်။ မိမိသည် ယခင်အချိန်က တားနိုင်သမျှကို တားဆီးခဲ့သော်လည်း ယခုအချိန်တွင် လုံးလုံးလျားလျား ခုခံနိုင်ခြင်း မရှိတော့ပေ။ တစ်ခဏချင်း၌ပင် သူ၏လက်ဖဝါး ပွင့်ထွက်သွား၍ သွေးများ နေရာအနှံ့သို ပြန့်ကျဲကုန်သည်။ ပြီးနောက် ဆက်လက်ထိန်းချုပ်နိုင်ခြင်း မရှိတော့သော သုန်ဖန်ဟောက်၏လက်ထဲရှိ ဓားရှည်သည် လွင့်ပျံသွားလေ၏။

သုန်ဖန်ဟောက်၏လက်ထဲရှိ ဓားရှည်ကို ကန်ထုတ်ပြီးနောက်၊ အရှိန်အဟုန် ပျက်ပြယ်ခြင်း မရှိသော တိုက်ခိုက်မှုသည် သုန်ဖန်ဟောက်၏ ရင်ဘတ်ကို တိုက်ရိုက် ထိမှန်သွားသည်။

သူ၏ ရင်ဘတ်တစ်ခုလုံး နစ်ဝင်သွားသော သုန်ဖန်ဟောက်သည် ပလုံးပထွေး ညည်းညူလိုက်သည်။ ချူးယွင်ဖန်း၏ ကန်ချက်သည် သူ၏ရင်ဘတ်ပေါ်သို့ တိုက်ရိုက် ကျရောက်ကာ နစ်ဝင်ခဲ့သည်။ ပြီးနောက် ဒဏ်ရာမှ သွေးများ ထွက်လာတော့သည်။

ဤတိုက်ပွဲသည်သာ တိုက်ပွဲအစစ်အမှန် ဖြစ်မည်ဆိုလျှင် ၎င်းသည် သုန်ဖန်ဟောက်ကို သတ်ဖြတ်ရန်ပင် လုံလောက်သည့် ကန်ချက်ဖြစ်ပေလိမ့်မည်။

Pfft!

သုန်ဖန်ဟောက်၏ပါးစပ်မှ သွေးများ အန်ထွက်လာခဲ့သည်။ သူ၏မျက်လုံးများ ယုံကြည်မှုကင်းမဲ့စွာ ပြူးကျယ်သွားသည်။ ယခင်တိုက်ပွဲများနှင့် ယှဉ်လျှင် ၎င်းတို့ကြားရှိ ကွာဟချက်များ လျော့နည်းသွားခြင်း မရှိပေ။ ယင်းအစား ၎င်းသည် ပို၍ပင် ကြီးမားလာသည်။

ကံကောင်းထောက်မစွာဖြင့်၊ ၎င်းသည် virtual ကွန်ရက်တစ်ခုသာဖြစ်သည်။ အံ့အားသင့်နေသည့် အကြည့်ဖြင့် သုန်ဖန်ဟောက်သည် အလင်းတန်းတစ်ခုအဖြစ်သို့ ပြောင်းလဲ၍ ပျောက်ကွယ်သွားခဲ့သည်။

အခန်း (၆၀၃) နောက်ဆုံးပွဲစဉ်

"သုန်ဖန်ဟောက် ရှုံးသွားပြီ"

နည်းပြဆရာများအားလုံး နိုးကြားတက်ကြွလာကြသည်။ ၎င်းတို့သည် စိတ်ပိုင်းဆိုင်ရာအရ ပြင်ဆင်ထားသူများဖြစ်သည်။

ချူးယွင်ဖန်းသည် ယခင်က သုန်ဖန်ဟောက်ကို တစ်ကြိမ် အနိုင်ယူခဲ့ဖူးသည့်အပြင် ၎င်းတို့၏ ခွန်အားကွာခြားချက်မှာ ကြီးမားလှသည်။ သုန်ဖန်ဟောက်က လွန်ခဲ့သည့် လအနည်းငယ်အတွင်း ပိုမိုသန်မာလာခဲ့သော်လည်း ချူးယွင်ဖန်းသည်လည်း ပို၍အင်အားကြီးမားလာခြင်းဖြစ်သည်မှာ သိသာထင်ရှားသည်။ သူသည် အင်အား ပျော့ညံ့လာနိုင်ခြေ ရှိမည်မဟုတ်ပေ။

"သုန်ဖန်ဟောက်ရဲ့ ကောင်းကင်ဘုံက ပါရမီရှင် အရည်အချင်းနဲ့တောင် လအနည်းငယ်လောက်နဲ့ သူတို့ကြားက ခွန်အားကွာဟချက်ကို မဖြည့်နိုင်ခဲ့ဘူးပဲ"

နည်းပြဆရာတစ်ဦးက ပါးစပ်အဟောင်းသားဖြင့် ပြောလိုက်သည်။

"လအနည်းငယ်လောက်ပဲ ရှိသေးပေမယ့် ကွာဟချက်က အခုဆို ပိုတောင် ကြီးမားလာပုံပဲ"

နည်းပြဆရာများသည် ဝန်ခံရန် ဆန္ဒမရှိသော်လည်း ကွာဟချက်၏ အလွန်ကွာခြားမှုကို ၎င်းတို့ဝန်ခံရမည်ဖြစ်သည်။ ချူးယွင်ဖန်းသည် ပို၍ပင် ကြောက်မက်ဖွယ်ကောင်းလာခဲ့သည်။

သုန်ဖန်ဟောက်ကို လှုပ်ရှားမှုတစ်ခုတည်းဖြင့် အောင်မြင်စွာ အနိုင်ယူခြင်းသည် နည်းပြဆရာအများစုပင် ပြုလုပ်နိုင်သည့် အရာမဟုတ်ပေ။ ဤသည်မှာ ချူးယွင်ဖန်း၏ ခွန်အားသည် နည်းပြဆရာအများစုထက် သာလွန်နေသည်ဟု ဆိုလိုခြင်းမဟုတ်သလော။

ဤအချက်က လူအများကို ချက်ချင်း တုန်လှုပ်သွားစေသည်။ မရီးဒျန်သန့်စင်ခြင်းအဆင့်အထွတ်အထိပ်တွင်ရှိနေသည့် နည်းပြဆရာများဖြင့် ပခုံးချင်းယှဉ်ရပ်တည်ခြင်းနှင့် ၎င်းတို့ကို ကျော်တက်သွားခြင်းမှာ လုံးလုံးလျားလျား ကွဲပြားခြားနားသည့် ကိစ္စရပ်နှစ်ခုဖြစ်သည်။

အများစုသည် မရီးဒျန်သန့်စင်ခြင်း၏ အထွတ်အထိပ်တွင် အချိန်အတော်ကြာ ပိတ်မိနေကြသူများဖြစ်သည်။ ပြည်ထောင်စုတက္ကသိုလ်မှ နည်းပြဆရာများထဲတွင် ဆယ်နှစ်ကျော်ကြာသည်အထိ တိုးတက်မှု အနည်းငယ်မျှ မပြုလုပ်နိုင်ဘဲ ပိတ်မိနေကြသူများရှိသည်။

၎င်းကို ကူညီဖြေရှင်းရန် နည်းလမ်းမရှိပေ။ ပြည်ထောင်စုသည် မရီးဒျန်သန့်စင်ခြင်းအဆင့် အထွတ်အထိပ် ကျွမ်းကျင်သူတစ်ဦး၏ အဆင့်ဖြတ်ကျော်နိုင်ခြေကို ကျယ်ကျယ်ပြန့်ပြန့် တိုးမြှင့်နိုင်မည့် နည်းလမ်းမျိုးကို ရှာမတွေ့သေးပေ။ ထို့ကြောင့် ၎င်းတို့၏ ကံကိုသာ အားကိုးရပေလိမ့်မည်။

အကယ်၍ လူတစ်ဦးသည် မွေးဖွားခြင်းနယ်မြေဆေးကဲ့သို့သော အရာမျိုးကို ရရှိနိုင်ခဲ့လျှင် ၎င်းတို့တွင် အဆင့်ဖြတ်ကျော်နိုင်ခြေ အခွင့်အရေးရှိမည်ဖြစ်သည်။ ဤသည်မှာ မြင့်မြတ်သော မိသားစုကြီးရှစ်ခုကဲ့သို့သော အဖွဲ့အစည်းများ ပိုမိုကြီးမားလာရခြင်း၏ အကြောင်းရင်းဖြစ်သည်။ ဤမိသားစုများမှသာလျှင် ပိုမိုကောင်းမွန်သည့် ကျင့်ကြံခြင်းအရင်းအမြစ်များ ရရှိနိုင်မည်ဖြစ်သည်။

ကံကောင်းထောက်မစွာဖြင့် လူ့အဖွဲ့အစည်းတွင် မရီးဒျန်သန့်စင်ခြင်း အထွတ်အထိပ်အဆင့် ကျွမ်းကျင်သူများ လုံလောက်စွာရှိနေသည်။ နှစ်စဉ် နှစ်တိုင်းတွင် လူအများအပြားက မွေးဖွားခြင်းနယ်မြေအဆင့် ကျွမ်းကျင်သူများအဖြစ်သို့ တက်လှမ်းလာကြသည်။ ၎င်းတို့အားလုံးသည် အရေအတွက်များကို အားကိုး၍ ဖန်တီးခဲ့ကြသူများဖြစ်သည်။

သို့သော် ချူးယွင်ဖန်း၊ သုန်ဖန်ဟောက်နှင့် မေ့ဟိုက်ယွင်တို့ကဲ့သို့သော ပုဂ္ဂိုလ်များက သာမန်လူများ မဟုတ်ကြသည်ကို ၎င်းတို့ သေချာစွာ သိထားကြသည်။ အတိတ်က မျိုးဆက်များ ချမှတ်ထားသည့် အချက်များအပေါ်အခြေခံ၍ မည်သည့်မှားယွင်းမှုများ မဖြစ်ပွားခဲ့သရွေ့ ၎င်းတို့သည် မွေးဖွားခြင်းနယ်မြေအဆင့်သို့ တက်လှမ်းကြမည်မှာ သေချာသည်။

၎င်းတို့သည် ကောင်းကင်ဘုံနှင့် လူသားမျိုးနွယ်တစ်ခုလုံး၏ လက်ရွေးစင်များဖြစ်ကြသည်။

အရည်အသွေးနှင့် အရေအတွက်သည် ပြည်ထောင်စုတွင် အမြဲတစေ တစ်ပြိုင်နက်တည်း ရှိခဲ့သော အရာဖြစ်သည်။ သာမန်လူများက အရေအတွက်ကို ကိုယ်စားပြု၍ ချူးယွင်ဖန်းနှင့် အခြားသူများက ပြည်ထောင်စု၏အမြင်တွင် အရည်အသွေးကို ကိုယ်စားပြုကြသည်။

ချူးယွင်ဖန်း၊ သုန်ဖန်ဟောက်နှင့် မေ့ဟိုက်ယွင်တို့သည် အနာဂတ်တွင် အကန့်အသတ်မဲ့ အလားအလာများရှိနိုင်မည့် အရေးကြီးပုဂ္ဂိုလ်များဖြစ်လာကြပေလိမ့်မည်။ ပြည်ထောင်စု၏ အထက်တန်းလွှာအဆင့်သို့ ဝင်ရောက်ရန် လက်မှတ် ကြိုတင်မှာယူထားသူများဟုပင် ဆိုနိုင်သည်။

မှန်ကန်စွာပြောရမည်ဆိုလျှင် ၎င်းတို့အများစုတွင် ချူးယွင်ဖန်းနှင့် ရင်ဆိုင်တိုက်ခိုက်နိုင်သူသည် အလွန်နည်းပါးကောင်း နည်းပါးကြပေလိမ့်မည်။

ချူးယွင်ဖန်းသည် သုန်ဖန်ဟောက်ကို အနိုင်ရပြီးနောက် အဆင့်သတ်မှတ်ချက် ပြိုင်ပွဲ၏ ဖိုင်နယ်သို့ ဝင်ရောက်ခဲ့သည်။ သူ၏နောက်ဆုံးပြိုင်ဘက်သည် မေ့ဟိုက်ယွင်ကလွဲ၍ တခြားလူမဟုတ်ပေ။

ချူးယွင်ဖန်း၏ သုန်ဖန်ဟောက်ကို အလွယ်တကူ အနိုင်ယူခဲ့ခြင်းအကြောင်းကို မေ့ဟိုက်ယွင်က ကြားသိထားပုံပေါ်သည်။ သူသည် ချူးယွင်ဖန်းနှင့် ရင်ဆိုင်နေစဉ်တွင် အလွန်သတိထားနေခဲ့သည်။ ချူးယွင်ဖန်းကို တစ်ကြိမ် ရှုံးနိမ့်ခဲ့ဖူးသော မေ့ဟိုက်ယွင်သည် ၎င်းက မည်မျှသန်မာ၍ ကြောက်မက်ဖွယ်ကောင်းသည်ကို သိရှိထားသည်။ သူသည် ယခင်ကနှင့်ယှဉ်လျှင် အလွန်ကြီးမားသော ပြောင်းလဲမှုကြုံတွေ့ခဲ့ရသော်လည်း ချူးယွင်ဖန်းက အလွယ်တကူ ကိုင်တွယ်နိုင်မည့် ပြိုင်ဘက် မဟုတ်သေးပေ။

၎င်းတို့နှစ်ဦးကြားက တိုက်ပွဲကို လူတိုင်းက အာရုံစူးစိုက်နေကြမည်မှာ သေချာသည်။ ဤတိုက်ပွဲသည် တစ်နှစ်တာ၏ နံပါတ်တစ်ပုဂ္ဂိုလ်ကို ဆုံးဖြတ်ပေးမည်ဖြစ်သည်။

ပြိုင်ပွဲတွင် အနိုင်ရရှိသူသည် ကျောင်းသားသစ်များကြားတွင် နံပါတ်တစ်ပုဂ္ဂိုလ်ဖြစ်ပေလိမ့်မည်။

“ချူးယွင်ဖန်းက အနိုင်ရနိုင်ခြေ ပိုများမယ်ထင်တယ်။ ပြီးခဲ့တဲ့ လအနည်းငယ်တုန်းက မေ့ဟိုက်ယွင်ကို သူ အနိုင်ယူခဲ့တဲ့အကြောင်းကို မေ့မထားနဲ့ဦး"

“ငါတော့ အဲလို မထင်ဘူး။ ချူးယွင်ဖန်းက သန်မာပေမယ့် မေ့ဟိုက်ယွင်ကလည်း ပေါ့သေးသေး မဟုတ်ဘူး။ အရင်ကဆိုရင် မေ့ဟိုက်ယွင်က လူတိုင်းကို လွယ်လွယ် အနိုင်ယူခဲ့တဲ့အပြင် သူနဲ့တန်းတူ ယှဉ်နိုင်တဲ့ ပြိုင်ဘက်တောင် ရှိခဲ့တာမဟုတ်ဘူး"

“ဒါပေမယ့် ခြုံငုံပြောရရင် ဒီနှစ်ယောက်က ရှေ့လျှောက်ဖို့ အဝေးကြီးလိုသေးတယ်။ သူတို့ကို သုန်ဖန်ဟောက်ကလွဲရင် တခြားလူတွေက တိုက်ခိုက်နိုင်ဖို့ တော်တော် ခက်ခဲမှာ"

“သူတို့က တကယ့်ကိုမှ ကောင်းကင်ဘုံရဲ့ ပါရမီရှင်တွေပဲ။ ပါရမီရှင်တွေ ပိုပိုများလာတော့ လူသားတွေ ပိုပြီး အားကောင်းလာတာပေါ့"

ထိုသို့သော အခြေအနေမျိုးနှင့် ရင်ဆိုင်နေရချိန်တွင် မေ့ဟိုက်ယွင်၏ အမူအရာသည် အင်အားကြီးရန်သူနှင့် ရင်ဆိုင်နေခြင်း မဟုတ်သကဲ့သို့ အလွန်တည်ငြိမ်နေသည်။ ကောင်းကင်နှင့်မြေကြီး၏ စိတ်ဝိညာဉ်စွမ်းအင်သည် သူ၏ခန္ဓာကိုယ်တစ်ဝိုက်တွင် အတက်အကျဖြစ်နေသည်။

'မရီးဒျန်အဆင့်၏ အထွတ်အထိပ်' မေ့ဟိုက်ယွင်၏ ကျင့်ကြံမှုသည် အထွတ်အထိပ်သို့ ရောက်ရှိသွားပြီဖြစ်ကြောင်း ချူးယွင်ဖန်းက ချက်ချင်းဆုံးဖြတ်လိုက်သည်။ မေ့ဟိုက်ယွင် သည် သုန်ဖန်ဟောက်ထက် အဆင့်တစ်ဆင့် ပိုမို အင်အားကြီးမားသည်။

မရီးဒျန်သန့်စင်ခြင်း အထွတ်အထိပ်အဆင့် ကျွမ်းကျင်သူသည် ကမ္ဘာကြီး၏ စိတ်ဝိညာဉ်စွမ်းအင်ကို ထိန်းချုပ်နိုင်သည့် မွေးဖွားခြင်းနယ်မြေအဆင့် ကျွမ်းကျင်သူနှင့် မနှိုင်းယှဉ်နိုင်သော်လည်း မေ့ဟိုက်ယွင်သည် နောက်ဆုံးအဆင့်သို့ ရောက်ရှိနေပြီးဖြစ်သောကြောင့် အပြောင်းအလဲ အနည်းငယ်ကို ဖြစ်ပေါ်စေခဲ့သည်။

ဘုံး

မေ့ဟိုက်ယွင်၏မျက်လုံးများ ရုတ်တရက် ပြူးကျယ်လာ၍ ကြောက်မက်ဖွယ် စွမ်းအားတစ်ခု သူ၏ခန္ဓာကိုယ်အနှံ့ ပျံ့နှံ့လာသည်။

"ချူးယွင်ဖန်း၊ မင်း အရမ်းသန်မာလာတယ်ဆိုတာ ငါသိတယ်၊ ဒါပေမယ့် ငါကိုလည်း ပေါ့သေးသေးမထင်လိုက်နဲ့။ မင်းကို ငါ့အစွမ်းတွေ မြည်းစမ်းခွင့်ပေးလိုက်မယ်"

မေ့ဟိုက်ယွင်၏ ခန္ဓာကိုယ်ကို ထူးဆန်းသော စွမ်းအင်တစ်ခုက ဝိုင်းရံထားခဲ့ရာ မကြာမီတွင် ၎င်းစွမ်းအားက သူ၏ခန္ဓာကိုယ်တစ်လျှောက် လှိုင်းထန်သွားလေသည်။

အင်းကွက်များဖြင့် လွှမ်းခြုံထားသော မေ့ဟိုက်ယွင်၏ ခန္ဓာကိုယ်သည် အလွန်ဆန်းကြယ်၍ မွန်မြတ်နေပုံရသည်။

ဤအင်းကွက်စွမ်းအင်၏ ကောင်းချီးနှင့်အတူ၊ မေ့ဟိုက်ယွင်၏ခွန်အားသည် မရီးဒျန်သန့်စင်ခြင်းအဆင့်၏ အထွတ်အထိပ်ကို ရုတ်တရက်ကျော်လွန်ကာ မွေးဖွားခြင်းနယ်မြေအဆင့်နှင့်ပင် နှိုင်းယှဉ်လာနိုင်ပြီဖြစ်သည်။

ဘုံး

မေ့ဟိုက်ယွင်၏ ပတ်ဝန်းကျင်တွင် အဆုံးမဲ့ လေလှိုင်းများ ဖြစ်ပေါ်လာစေသည်။

"အဲဒါဘာလဲ။ မေ့ဟိုက်ယွင်က ရုတ်တရက် ဘယ်လိုလုပ် ပိုပြီးသန်မာလာတာလဲ"

ဤမြင်ကွင်းကို မြင်လိုက်ရသော နည်းပြဆရာအများအပြားက အလွန်အံ့အားသင့်သွားကြသည်။

“အဲဒါက အင်းကွက်စွမ်းအင်ပဲ။ သိုင်းပညာမှာ ဒီလို ကိုင်းခွဲတွေရှိတာကို ငါ မှတ်မိတယ်။ အဲ့ဒါတွေက အရမ်းရှားပါးပြီး သိပ်မကြာသေးခင်က တူးဖော်တွေ့ရှိခဲ့တဲ့ ရှေးဟောင်းလူသားများကာလရဲ့ အပျက်အစီးတွေကြားမှာပဲ တွေးဖူးသေးတယ်"

မေ့ဟိုက်ယွင်၏ပတ်၀န်းကျင်ရှိ စွမ်းအင်သည် အင်းကွက်စွမ်းအင်ဟုခေါ်သော ကိုင်းခွဲတစ်ခု၏ သိုင်းပညာတစ်ခုဖြစ်ကြောင်း တတ်သိနားလည်သော နည်းပြဆရာအချို့က အသိအမှတ်ပြုလိုက်ကြသည်။

ရှေးဟောင်းခေတ်တွင် အင်းကွက်များ ရေးဆွဲခြင်းကိုအားကိုး၍ လျှို့ဝှက်ဆန်းကြယ်သော စွမ်းအင်များကို အသက်သွင်းကာ ၎င်းတို့၏ ခန္ဓာကိုယ်ကို ကြံ့ခိုင်စေရန်ပြုလုပ်သူများရှိခဲ့သည်။ ၎င်းတို့သည် မူလကထက် များစွာသာလွန်သော စွမ်းအင်များကို ရရှိကြပေလိမ့်မည်။

ဤအင်းကွက်စွမ်းအင်သည် ပြည်ထောင်စု၏ လက်ရှိသိုင်းပညာစနစ်တွင် အလွန်ရှားပါးသည်။

"ငါတော့ မေ့ဟိုက်ယွင်က အနိုင်ရတော့မယ်လို့ ခံစားမိနေတယ်"

"ဟုတ်တယ်။ သူ့ခွန်အားက တော်တော်တိုးလာတာ။ မရီးဒျန်သန့်စင်ခြင်းအဆင့်ကိုကျော်ပြီး မွေးဖွားခြင်းနယ်မြေအဆင့်ကိုတောင် ရောက်နေပြီ"

ချူးယွင်ဖန်းသည် မေ့ဟိုက်ယွင်၏ အသွင်ပြောင်းမှုကို ကြည့်လိုက်သည်။ သူ၏စိတ်ထဲတွင် ဆေးဧကရာဇ်၏ မှတ်ဉာဏ်များရှိနေသောကြောင့် ဤအင်းကွက်စွမ်းအင်ကို သူ သတိထားမိလိုက်သည်။ သူ၏ထင်မြင်ချက်အရ အင်းကွက်စွမ်းအင်သည် ထိုကဲ့သို့သော အဆင့်တွင်သာ တည်ရှိနေခြင်းမဟုတ်ဘဲ ယခုထက် ပို၍ ကြောက်မက်ဖွယ်ကောင်းသော စွမ်းအင်ဖြစ်သည်။

အင်းကွက်စွမ်းအင်ကို တိုက်ပွဲတွင် အသုံးပြုနိုင်သည့်အပြင် ၎င်းသည် အမျိုးမျိုးသော လျှို့ဝှက်ဆန်းကြယ်သည့် နည်းလမ်းများဖြင့် ကောင်းကင်နှင့် ကမ္ဘာမြေကြီး၏ စွမ်းအင်ကို ဆွဲငင်နိုင်သည်။ ၎င်းသည် သိုင်းပညာနှင့် နှိုင်းယှဉ်နိုင်သည့် အင်အားကြီးစနစ်တစ်ခုဖြစ်သည်။

မေ့ဟိုက်ယွင်သည် ၎င်းကို အသုံးပြုမည့်နည်းလမ်းကိုသာ အကြမ်းဖျင်း နားလည်ထားပုံရသော်လည်း ၎င်းဖြစ်စဉ်သည် လက်ရှိ ပြည်ထောင်စုတစ်ခုလုံးကို အလွန်တရာမှ အံ့အားသင့်သွားစေသည်။

ယခင် မေ့ဟိုက်ယွင်က မိမိ၏ ပြိုင်ဘက်မဟုတ်ခဲ့လျှင် လက်ရှိ မေ့ဟိုက်ယွင်သည် ချူးယွင်ဖန်းကပင် အလေးအနက်ထား ကိုင်တွယ်ရမည့် ပြိုင်ဘက်တစ်ဦးဖြစ်မည်မှာ သေချာသည်။

"ချူးယွင်ဖန်း၊ ငါ ဒီစွမ်းအင်ကိုသုံးတာ ဒါပထမဆုံးပဲ။ ငါ့ကို ဒီလိုအတင်းအကြပ် အသုံးပြုစေတဲ့အထိ အရည်အချင်းရှိတဲ့လူ မရှိခဲ့ဖူးဘူး။ အခု မင်းနဲ့ လေးလေးနက်နက် ယှဉ်ပြိုင်ဖို့ကလွဲလို့ ငါ့မှာ တစ်ခြားရွေးချယ်စရာမရှိဘူး။ ဒီတစ်ခါ ငါ မင်းကို မျှမျှတတ အနိုင်ယူပြမယ်"