အခန်း (၇၉၃-၇၉၅)

အခန်း (၇၉၃) တစ်ယောက်ပြီးတစ်ယောက် မြေပြင်ပေါ်သို့ လဲကျသွားခြင်း

ဤကြည်လင်ပြတ်သားသော အသံနှင့်အတူ လူအုပ်ထဲမှ လူတစ်ဦး ထွက်ပေါ်လာသည်။ ထိုလူသည် အနက်ရောင်ဝတ်ရုံ ၀တ်ဆင်ထားသူဖြစ်ကြောင်း လူတိုင်းက မြင်လိုက်ရသည်။ ထိုအမျိုးသားသည် သူ၏လက်ထဲတွင် သံတောင်ဝှေးတစ်ချောင်းကို ကိုင်ဆောင်ထား၍ သူ၏မျက်နှာတွင် မျက်နှာဖုံးတပ်ဆင်ထားသောကြောင့် မည်သူမည်ဝါမှန်း မသိနိုင်သော်လည်း အလွန် ငယ်ရွယ်သူဖြစ်ကြောင်းကို သူ၏အသံမှတစ်ဆင့် ခန့်မှန်းနိုင်သည်။

ဤအလွတ်တန်း ကျင့်ကြံသူများသည် ကနဦးတွင် စိတ်ပျက်လက်ပျက် ဖြစ်နေကြသည်။ ဟွမ်မိသားစုများသည် ၎င်းတို့၏ သွားလမ်းကို ပိတ်ဆို့ထားသောကြောင့် ကျွန်းထဲသို့ ဝင်ရောက်ရန် အလွန်ခက်ခဲမည်မှာ သိသာထင်ရှားသည်။ ဒုက္ခများစွာကို ဖြတ်သန်း၍ ပင်လယ်ကို ဖြတ်ကျော်ပြီးသည့်နောက် အလွယ်တကူ အလျော့ပေးရန် ငြင်းဆန်ခဲ့ကြသည်။

သို့သော်လည်း ဤဟွမ်မိသားစု ကျွမ်းကျင်သူ၏ စွမ်းအင်ကို ကြုံတွေ့ပြီးချိန်တွင် ထိုစွမ်းအင်သည် ၎င်းတို့ ဆန့်ကျင်နိုင်သည့် အရာမဟုတ်ကြောင်း သိလိုက်ရသည်။ ၎င်းတို့၏ ခွန်အားအဆင့်ဖြင့်ဆိုလျှင် လူများများရှိခြင်းက အမြဲတစေ အသုံးမဝင်ကြောင်း နားလည်ခဲ့ကြသည်။ ထို့အပြင် ၎င်းတို့သည် မတူညီသော ဂိုဏ်းပေါင်းစုံမှ ဖရိုဖရဲအဖွဲ့အစည်းတစ်ခု ဖြစ်ကြသည်။ ၎င်းတို့သည် တစ်ဦးနှင့်တစ်ဦး အသုံးချရန်သာ ရည်ရွယ်ထား၍ အချင်းချင်း ပူးပေါင်းလုပ်ဆောင်ရန် မဆွေးနွေးခဲ့ကြပေ။

ဤသို့သော အခြေအနေမျိုးတွင် မည်သူမျှ ထပ်မံ မလှုပ်ရှားဝံ့ကြပေ။ စောစောက လှုပ်ရှားခဲ့သော အမျိုးသားကဲ့သို့ အဆုံးသတ်မည်ကို ၎င်းတို့ ကြောက်ရွံ့နေကြသည်။ ထိုသို့ဖြစ်ခဲ့လျှင် အမှန်တကယ် ကြောက်မက်ဖွယ်ကောင်းပေလိမ့်မည်။ သို့သော် ယခုအချိန်တွင် တစ်စုံတစ်ယောက်သည် ဆန့်ကျင်ရန် ဆန္ဒရှိနေသဖြင့် ၎င်းတို့သည်လည်း အခြေအနေနှင့် လိုက်လျောညီထွေစွာ ပြုမူလိုက်ကြသည်။ တစ်ချိန်တည်းမှာပင် ဟွမ်မိသားစု၏ ကျွမ်းကျင်သူ ဆယ်ဦးကျော်က ချူးယွင်ဖန်းကို လှည့်ကြည့်၍ မျက်မှောင်ကြုတ်လိုက်ကြသည်။ ချူးယွင်ဖန်းသည် မည်သူဖြစ်သည်ကို ရှင်းရှင်းလင်းလင်း မသိမြင်နိုင်စေရန် မျက်နှာဖုံးကို ဝတ်ဆင်ထားသောကြောင့် အမှန်တကယ် လိမ္မာပါးနပ်သည်ဟု ဆိုနိုင်သည်။

"ကောင်စုတ်လေး၊ မင်းကများ အရှက်မရှိ ဝါကြွားရတယ်လို့"

ဟွမ်မိသားစုရှိ ကျွမ်းကျင်သူတစ်ဦးက အရှေ့သို့ ခြေတစ်လှမ်းတိုး၍ ချူးယွင်ဖန်းကို ချက်ချင်း ချီတက်လိုက်သည်။ သူသည် လက်နက်အသုံးပြုရန်ပင် စိတ်မ၀င်စားခဲ့ဘဲ နဂါးလက်သည်းကဲ့သို့သော လက်သီးမျိုးဖြင့် ချူးယွင်ဖန်း၏ ဦးခေါင်းကို ချေမှုန်းရန် ရည်ရွယ်လိုက်သည်။ လူအများအပြားက ၎င်းတို့၏ အမြင်အာရုံများ ဝေဝါးသွားသည်ဟု ခံစားလိုက်ရပြီးနောက် ထိုဟွမ်မိသားစု ကျွမ်းကျင်သူသည် ချူးယွင်ဖန်း၏ အရှေ့သို့ ရောက်ရှိနေပြီဖြစ်သည်။

"အိုး သွားပြီ"

လူများစွာက တုန်လှုပ်သွားကြသည်။ ဤဟွမ်မိသားစု အဖွဲ့တွင် ပုန်းအောင်းနေသော နဂါးများနှင့် ဝပ်တွားနေသော ကျားများစွာ ရှိနေ၍ ၎င်းတို့အနက် ကျွမ်းကျင်သူများစွာရှိနေသည်။ သို့သော် ဆက်လက်ဖြစ်ပွားသွားသော မြင်ကွင်းသည် ၎င်းတို့ မျှော်လင့်ထားသကဲ့သို့ မဟုတ်ခဲ့ပေ။ ချူးယွင်ဖန်းကို ဖမ်းမိသွားမည်ဟု ထင်ခဲ့ကြသော်လည်း ဆန့်ကျင်ဘက်အနေဖြင့် ချူးယွင်ဖန်းက တစ်ပြိုင်တည်း ပြန်လည် တိုက်ခိုက်ခဲ့သည်။ သူ၏လက်ထဲရှိ တောင်ဝှေးသည် လျှပ်စီးကြောင်းကဲ့သို့သော အလျင်နှင့်အတူ လွင့်ထွက်သွားသည်။

ဘန်း

ဤဟွမ်မိသားစု၏ ကျွမ်းကျင်သူသည် အောက်ပွဲက လက်တစ်လှမ်းအကွာတွင် ရှိနေသည်အထင်ဖြင့် ချူးယွင်ဖန်းထံ နီးကပ်လာသောအခါ ကောင်းကင်မှ သံတောင်ဝှေးတစ်ခု ပေါ်ပေါက်လာသည်။ ဤအခိုက်အတန့်တွင် ရှောင်တိမ်းရန် နောက်ကျနေပြီဖြစ်သောကြောင့် ဟွမ်မိသားစုကျွမ်းကျင်သူ၏ ဦးခေါင်းကို ပြင်းပြင်းထန်ထန် ရိုက်မိသွားလေသည်။

ဘုံး

ဟွမ်မိသားစု ကျွမ်းကျင်သူသည် အမြောက်ကျည်ကဲ့သို့ မြေပြင်ပေါ်သို့ ပြုတ်ကျသွားခဲ့ရာ၊ ၎င်း၏အမြန်နှုန်းသည် သူ ရောက်ရှိချိန်ထက် ပို၍ပင် မြန်ဆန်နေခဲ့သည်။ သူသည် မြေပြင်ပေါ်သို့ မှောက်လျက်လဲကျကာ မြေပြင်နှင့် တိုက်မိသွားလေသည်။ ၎င်း၏ ဆိုးရွားသော အခြေအနေသည် အလွတ်တန်း ကျင့်ကြံသူများကိုပင် အနည်းငယ် သည်းမခံနိုင်ဖြစ်သွားစေသည်။ ဤသည်မှာ ဟာသတစ်ခုကဲ့သို့ ဖြစ်နေသည်။ မြေပြင်သည် ရိုက်ခတ်မှုကြောင့် ကြီးမားသော အက်ကွဲကြောင်းများ ဖြစ်ပေါ်သွားလေသည်။

အချိန်အတော်ကြာပြီးနောက် လူတိုင်းက အာရုံပြန်ကပ်လာကြသည်။ ဤအခိုက်အတန့်တွင် ၎င်းတို့အားလုံးက ချူးယွင်ဖန်းကို သိသိသာသာ လျှော့တွက်မိခဲ့ကြောင်း သတိထားမိသွားသည်။ ချူးယွင်ဖန်းသည် ထိုအချိန်က ဟွမ်မိသားစုတို့နှင့် ရင်ဆိုင် ပြဿနာရှာရန် အမြန်ထွက်လာခဲ့သည်။ သူသည် ဤမျှသွေးပူ၍ ကမူးရူးထိုးဆန်သူ မဟုတ်သည်မှာ သိသာထင်ရှားသည်။ ကမူးရူးထိုးဆန်၍ သွေးဆူတတ်သူများသည် ဤအဆင့်အထိ ကျင့်ကြံနိုင်မည် မဟုတ်ဘဲ ကျင့်ကြံခြင်းလမ်းစဉ်၌ပင် ယခင်ကတည်းက သေဆုံးသွားပေလိမ့်မည်။

၎င်းတို့ အရှေ့ရှိ ဤအမျိုးသားသည် ဖြောင့်မတ်သော စိတ်ထားဖြင့် ပြည့်နှက်နေသောကြောင့် အလျင်စလို ထွက်လာ၍ ပြဿနာရှာသူ မဟုတ်ဘဲ ထိုသို့သော ခွန်အားမျိုးရှိနေသောကြောင့်သာ ဖြစ်သည်။ လူများစွာသည် ချူးယွင်ဖန်းနှင့် ပတ်သက်သည့် အန္တရာယ်အဆင့်ကို အဆင့်များစွာ မြှင့်တင်လိုက်ကြသည်။ ဟွမ်မိသားစုကျွမ်းကျင်သူ၏ ခွန်အားက မည်မျှပင်ဖြစ်စေကာမူ ချူးယွင်ဖန်းသည် မွေးဖွားခြင်းနယ်မြေအဆင့် ကျွမ်းကျင်သူကို တုတ်ဖြင့် ရိုက်နှက်ခဲ့သည်။ ဤသည်မှာ သာမန်လူတစ်ဦး ပြုလုပ်နိုင်သော အရာမဟုတ်ပေ။

"တိုက်ခိုက်ကြ။ ဒီလူက ခွင့်မပြုဘဲ ကျွန်းပေါ်ကို ကျူးကျော်လာတာ၊ ကရုဏာမထားဘဲ သတ်ပစ်လိုက်" ဟွမ်မိသားစု၏ လူလတ်ပိုင်းအရွယ် အမျိုးသားက ဟိန်းဟောက်လိုက်ရာ၊ ပြင်းထန်သော သတ်ဖြတ်ချင်စိတ်များ သူ၏မျက်လုံးများတွင် ပေါ်ပေါက်လာသည်။

ချူးယွင်ဖန်းကို မဖြေရှင်းပါက ဤအလွတ်တန်း သိုင်းပညာရှင်များ တက်ကြွလာမည်ကို သူ သိနေသည်။ မိမိက မည်မျှ သန်မာနေပါစေ လူတိုင်းကို တားဆီးနိုင်မည် မဟုတ်ပေ။ ထိုကြောင့်သာ စောစောက ဦးဆောင်တိုက်ခိုက်သူကို အပြင်းအထန် ဒဏ်ရာရရှိသည်အထိ တိုက်ခိုက်ခဲ့ခြင်းဖြစ်သည်။ ၎င်းတို့အားလုံး တက်ကြွလာသည်နှင့် ဖရိုဖရဲအဖွဲ့သားများလျှင်ပင် အလွန် ကြောက်မက်ဖွယ်ကောင်းလာပေလိမ့်မည်။

အမိန့်ကိုရရှိပြီးနောက် ဟွမ်မိသားစု၏ ဒါဇင်နှင့်ချီသော ကျွမ်းကျင်သူများက ချူးယွင်ဖန်းဆီသို့ ပျံသန်းလာကြသည်။ ၎င်းတို့သည် ဟွမ်မိသားစု၏ ထိပ်တန်းကျွမ်းကျင်သူများဖြစ်ကြ၍ သူတို့အားလုံးက အနည်းဆုံးလျှင်ပင် မွေးဖွားခြင်းနယ်မြေ ပဉ္စမအဆင့်တွင်ရှိနေကြသည်။ ကနဦးတွင် ဒဏ်ရာပြင်းထန်စွာ ရရှိသွားသော အရပ်ရှည်ရှည် သက်လတ်ပိုင်းအရွယ် အမျိုးသားအောက် အားမနည်းသည့် မွေးဖွားခြင်းနယ်မြေ ဆဌမအဆင့် ကျွမ်းကျင်သူပင် ရှိနေသည်။

ဤလူများသည် ဂိုဏ်းပေါင်းစုံတွင် အဓိက အင်အားစုများအဖြစ် ဆောင်ရွက်နိုင်ကာ အကြီးအကဲများပင် ဖြစ်လာနိုင်သော်လည်း ၎င်းတို့သည် ဟွမ်မိသားစု၏ အစောင့်များသာဖြစ်ကြသည်။ ဤအချက်ဖြင့် ဟွမ်မိသားစုများ၏ ခွန်အားကို ပုံဖော်ကြည့်နိုင်မည်ဖြစ်သည်။ ကနဦးတွင် မည်သူမျှ မလှုပ်ရှားရဲကြပေ။ ဟွမ်မိသားစု၏ အင်အားကို ကြောက်ရခြင်းသည် အကြောင်းရင်းတစ်ခုဖြစ်သည့်အပြင် အဆုံးတွင် ဆေးဖက်ဝင်ဥယျာဉ်ကျွန်းက သေးငယ်သည့် ကိစ္စတစ်ခုမျှသာဖြစ်သည်။ အကယ်၍ ၎င်းတို့သာ ဟွမ်မိသားစုကို စော်ကားခဲ့မည်ဆိုလျှင် လိုက်ပါလာမည့် သေချာသော လက်တုံ့ပြန်မှုကို ၎င်းတို့ သည်းခံနိုင်မည်မဟုတ်ပေ။

ဤဒါဇင်နှင့်ချီသော ဟွမ်မိသားစု၏ ကျွမ်းကျင်သူများသည် ဖွဲ့စည်းပုံတစ်ခု တည်ဆောက်လိုက်ကြသည်။ ယခုအချိန်တွင် မည်သူမျှ ချူးယွင်ဖန်းကို နှိမ့်ချမဆက်ဆံရဲကြပေ။ သို့သော် ၎င်းတို့က ကိုယ့်ကိုယ်ကို သတိကြီးသည်ဟု ထင်နေကြသော်လည်း ချူးယွင်ဖန်းကို လျှော့တွက်နေကြဆဲဖြစ်သည်။ ဤဒါဇင်ချီသော ဟွမ်မိသားစုကျွမ်းကျင်သူများနှင့် ရင်ဆိုင်ရာတွင် ချူးယွင်ဖန်းသည် တုန်လှုပ်ခြင်းမရှိခဲ့ပေ။ သူသည် သူ၏တောင်ဝှေးနှင့်အတူ လျှပ်စီးအလျင်ကဲ့သို့ ချီတက်လိုက်သည်။

ဘန်း

ဟွမ်မိသားစု၏ ကျွမ်းကျင်သူတစ်ဦးက အခြေအနေကို အဖြေရှာမရနိုင်မီတွင် သူ၏ခေါင်းထက်၌ သံတောင်ဝှေးတစ်ချောင်း ရုတ်တရက် ပေါ်ပေါက်လာခြင်းကို ခံစားလိုက်ရပြီးနောက် ၎င်းတောင်ဝှေး ရုတ်တရက် ပြုတ်ကျလာလေသည်။ ၎င်းသည် ကနဦးတွင် တိုက်ခိုက်ခံရသည့် ဟွမ်မိသားစုကျွမ်းကျင်သူနှင့် တစ်ပုံစံတည်းဖြစ်နေသည်။ သူ၏ဦးခေါင်းကို မြေကြီးပေါ်သို့ ရိုက်ချခံလိုက်ရ၍ မြေပြင်၌ အက်ကြောင်းများ ဖြစ်ပေါ်သွားစေသည်။

ဘန်း

ဘန်း

ဘန်း

ချူးယွင်ဖန်းကို တိုက်ခိုက်နေသည့် ကျွမ်းကျင်သူများစွာရှိနေသော်လည်း သူသည် လူအရေအတွက်ဖြင့် အနိုင်ယူနိုင်သည့်အတိုင်းအတာကို ကျော်လွန်နေသူဖြစ်သည်မှာ သိသာထင်ရှားသည်။ သူသည် ဟွမ်မိသားစုကျွမ်းကျင်သူ တစ်ဒါဇင်ကျော်မျှဖြင့် တည်ဆောက်ထားသော ဖွဲ့စည်းပုံ၏အလယ်တွင် စိမ်ပြေနပြေ လမ်းလျှောက်နေပုံရသည်။ သူ၏ တောင်ဝှေးကို ပေါ့ပေါ့ပါးပါး ဝှေ့ယမ်းလိုက်ရုံဖြင့် အဆိုပါ ဟွမ်မိသားစုကျွမ်းကျင်သူများကို တိကျစွာ ထိမှန်သွားမည်ဖြစ်သည်။

ဟွမ်မိသားစုကျွမ်းကျင်သူတစ်ဦးသည် သူ၏ တောင်ဝှေးကို လှုပ်ရှားလိုက်သည့်အချိန်တိုင်း မြေပြင်ပေါ်သို့ လဲကျသွားခဲ့သည်။ ချူးယွင်ဖန်းသည် လူတစ်ဒါဇင်ကျော် ဖွဲ့စည်းထားသော တိုက်ပွဲဖွဲ့စည်းပုံကို ချက်ချင်း ဖြိုခွဲပစ်လိုက်သည်။ မကြာမီမှာပင် ဟွမ်မိသားစုကျွမ်းကျင်သူများအားလုံး မြေပြင်သို့ ရိုက်ချခံခဲ့ရကာ မည်သည့် လှုပ်ရှားမှုမျှ မမြင်တွေ့နိုင်တော့ပေ။

ယခုအခိုက်အတန့်တွင် ချူးယွင်ဖန်း ပြသခဲ့သော တောင်ဝှေးသိုင်းပညာသည် အလွန်အံ့အားသင့်ဖွယ် ကောင်းလှသည်။ ချူးယွင်ဖန်းက အားမစိုက်ထုတ်လျှင်ပင် တောင်ဝှေးသည် ပေါင်တစ်ထောင်မျှ အင်အားမျိုး ရှိနေဆဲဖြစ်သည်။ ရှင်ကျာမုနိ၏ ဆင်ပစ်သိုင်းပညာကို အသုံးပြုလိုက်သည်နှင့် သူ၏တောင်ဝှေးသည် ဧရာမ မွန်းစတားကြီးကိုပင် အပိုင်းပိုင်း ပြတ်တောက်သွားစေလိမ့်မည်။

"ဒါ...ဒါက တော်တော်လေး သန်မာတာပဲ"

"ဒီလူက ဘယ်သူလဲ၊ ဘယ်တုန်းက ဒီလို တောင်ဝှေးကျွမ်းကျင်သူမျိုး ပြည်ထောင်စုမှာ ပေါ်လာတာလဲ"

"မြောက်ပိုင်း တောင်ဝှေးဘုရင်များလား၊ မဟုတ်သေးပါဘူး၊ ဒါက သူတိုက်ခိုက်တဲ့ ပုံစံမဟုတ်ဘူး"

၎င်းတို့ပင် အဆောတလျင် မတိုက်ခိုက်ရဲသော ဒါဇင်ကျော်သော ဟွမ်မိသားစု ကျွမ်းကျင်သူများအဖွဲ့သည် ချူးယွင်ဖန်း၏လက်ထဲတွင် ကျရှုံးသွားကြောင်း တွေ့လိုက်ရသောအခါ အလွတ်တန်း ကျွမ်းကျင်သူများက ချက်ချင်းပင် ကြောက်ရွံ့ထိတ်လန့်သွားကြသည်။ ၎င်းတို့သည် ချူးယွင်ဖန်းက မည်သူမည်ဝါ ဖြစ်သည်ကို တစ်ယောက်ပြီး တစ်ယောက် ခန့်မှန်းလာကြသည်။ ပြည်ထောင်စု၏ တောင်ဝှေး ကိုင်ဆောင်ထားသော ပညာရှင်ကြီးများ၏ အမည်များကို ဆွဲထုတ်လာကြသော်လည်း ချူးယွင်ဖန်း၏ အချက်အလက်ကို မည်သူမျှ မခန့်မှန်းနိုင်ခဲ့ပေ။

"ချီးပဲ၊ မင်းကများ ကျုပ်တို့မိသားစုရဲ့ ကျွမ်းကျင်သူတွေကို သတ်ရဲရတယ်လို့ မင်းကို သတ်ပစ်မယ်။ မျက်နှာဖုံးနောက်ကွယ်မှာ ပုန်းနေတာနဲ့ ကျုပ်တို့က မင်းကို မရှာနိုင်ဘူးလို့ မထင်လိုက်နဲ့။ မင်းက ခေါင်းနဲ့အမြီးကို ဝှက်ထားတဲ့ အကောင်မျိုးပဲ" ဟွမ်မိသားစု၏ လူလတ်ပိုင်းအရွယ် အမျိုသားက သူ၏ဒေါသကို မထိန်းချုပ်နိုင်တော့ပေ။

အခန်း (၇၉၄) အတားအဆီးအားလုံးကို သုတ်သင်ရှင်းလင်းခြင်း

ဟွမ်မိသားစုရှိ လူလတ်ပိုင်းအရွယ် အမျိုးသားက အလွန် ဒေါသထွက်နေသည်။ ချူးယွင်ဖန်းသည် ရုတ်တရက် ပေါ်ပေါက်လာကာ ဟွမ်မိသားစုများကို လုံးလုံးလျားလျား ဂရုမစိုက်သကဲ့သို့ ပြုမူနေသည်။ ထိုလူများသည် ဟွမ်မိသားစု၏ လက်ရွေးစင်များဖြစ်ကြသည်။ ဟွမ်မိသားစုတွင် နွားတစ်ကောင်ရှိ အမွေးများသကဲ့သို့ များပြားလှသည့် ကျွမ်းကျင်သူများစွာရှိနေသည်။

သို့သော် မွေးဖွားခြင်းနယ်မြေအဆင့် ကျွမ်းကျင်သူများသည် မရီးဒျန်သန့်စင်ခြင်းအဆင့် ကျွမ်းကျင်သူများနှင့် မတူညီဘဲ အလွယ်တကူ လေ့ကျင့်ပေးရန် မဖြစ်နိုင်ပေ။ ထို့အပြင် ဤလူများသည် မွေးဖွားခြင်းနယ်မြေအဆင့် ပုဂ္ဂိုလ်များအနက် အားနည်းသူများ မဟုတ်ကြပေ။ ယခုကဲ့သို့ အများအပြား သေဆုံးသွားခြင်းမဆိုနှင့် တစ်ဦးသေဆုံးလျှင်ပင် အတော်လေး နာကျင်ရသည်ဟု ဆိုနိုင်သည်။ အဖွဲ့ခေါင်းဆောင်ဖြစ်သော သူသည် တာဝန်ယူမှုမရှိဘဲ မည်သို့မျှ ပြန်သွားရမည်နည်း။

"ဟွမ်မိသားစုက ဘာလုပ်နိုင်မှာမို့လို့လဲ" ချူးယွင်ဖန်းက လှောင်ရယ်လိုက်သည်။

ဟွမ်မိသားစုသည် တစ်ချိန်က မိမိကို ကြားဖြတ် သတ်ဖြတ်ရန် လူများစွာ စေလွှတ်ခဲ့ခြင်းကို ချူးယွင်ဖန်းက မှတ်မိနေသေးသည်။ ထိုအချိန်က လူအရေအတွက်သည် မနည်းပါးလှပေ။ နောက်ပိုင်းတွင် တိုက်ခိုက်လာသည့် အင်အားစုအနက် ကျန်းမိသားစုများသည် အဓိက အင်အားစုဖြစ်သော်လည်း ဟွမ်မိသားစုက မီးထဲသို့ လောင်စာထည့်နေသူများဖြစ်ကြောင်း သိသာထင်ရှားသည်။ အကယ်၍ ကျန်းမိသားစုသာ ဟွမ်မိသားစု၏ ပံ့ပိုးကူညီမှု မရှိခဲ့လျှင် ပြည်ထောင်စု၏ သတိပေးချက်နှင့် ချူးယွင်ဖန်းအနီးရှိ ချူးမိသားစု၏ အကာအကွယ်ပေးမှုကို လျစ်လျူရှုဝံ့မည် မဟုတ်ပေ။

ကျန်းမိသားစုတို့သည် ဟွမ်မိသားစုထံမှ အကူအညီနှင့် ကျောထောက်နောက်ခံကြောင့် အလွန်တရာ ရဲတင်း၍ ချူးမိသားစုကို လုံးလုံးလျားလျား ဂရုမစိုက်ကြခြင်းဖြစ်သည်။ ချူးယွင်ဖန်းနှင့် ကျန်းမိသားစုကြားရှိ ရန်ငြိုးများက ပင်လယ်တမျှ နက်ရှိုင်းသည်ကို လူတိုင်းသိထားကြသည်။ သို့သော် ဟွမ်မိသားစုနှင့် သူ၏ဆက်ဆံရေးသည်လည်း အလွန်ကောင်းမွန်ခြင်း မဟုတ်ပေ။ ရှေ့တန်းတွင် ကျန်းမိသားစုများရှိနေခြင်းကြောင့် ဟွမ်မိသားစုနှင့် ရန်ငြိုးများက အရိပ်ထဲတွင် ရှိနေခြင်းဖြစ်သည်။

"ဒီကျွန်းရဲ့ ဆေးဖက်ဝင်ဥယျာဉ်ကို လက်ဝါးကြီးအုပ်ချင်နေကြတာလို့တော့ ကျုပ်ကို မပြောပါဘူးနော်။ ခင်ဗျားတို့မှာ ဒီလိုမျိုးလုပ်ဖို့ ခွန်အားရှိမယ်လို့ ကျုပ် မထင်ဘူး။ မဟုတ်ရင် ပထမတစ်ခေါက် ရောက်လာတုန်းက ခွေးလေခွေးလွင့်တွေလို ရိုက်ထုတ်ခံခဲ့ရမှာ မဟုတ်ဘူးလေ" ချူးယွင်ဖန်းက ဟွမ်မိသားစု၏ နောက်ကြောင်းကို ဖော်ထုတ်၍ ၎င်းတို့၏ နောက်ဆုံးကျန်ရစ်သော ဂုဏ်သိက္ခာကို ဖျက်ဆီးပစ်လိုက်သည်။

အလွတ်တန်း ကျင့်ကြံသူများသည် ဤစကားများကို ကြားလိုက်ရချိန်တွင် အလွန် ဝမ်းသာသွားကြသည်။ ဟွမ်မိသားစု၏ လျစ်လျူရှုမှုနှင့် မထီမဲ့မြင်ပြုမှုများသည် ၎င်းတို့၏ ဂုဏ်သိက္ခာကို ရက်စက်ကြမ်းကြုတ်စွာ နင်းချေခြင်းနှင့် ဆင်တူသည်။ ၎င်းတို့အားလုံးက ကျော်ကြားသော ဂိုဏ်းများမှ မဟုတ်သောကြောင့် နှိမ့်ချဆက်ဆံရခြင်းဖြစ်သင့်လေသလော။

"ချီးပဲ"

၎င်းသည် ဟွမ်မိသားစု၏ လူလတ်ပိုင်းအရွယ် အမျိုးသားအတွက် မျက်နှာကို တိုက်ရိုက် ဖြတ်ရိုက်လိုက်ခြင်းနှင့် ဆင်တူသည်။

"မင်းရဲ့ လုပ်ရပ်အတွက် မင်း ပြန်ပေးဆပ်ရလိမ့်မယ်" ဟွမ်မိသားစု၏ လူလတ်ပိုင်းအရွယ် အမျိုးသားသည် သူ၏ဒေါသကို မထိန်းချုပ်နိုင်ဘဲ ပေါက်ကွဲသွားလေသည်။

"ကျုပ်တို့မိသားစုကို စော်ကားတဲ့အတွက် ဒီကမ္ဘာမှာ မင်းလွတ်မြောက်နိုင်တဲ့ နေရာမရှိတော့ဘူးဆိုတာကို မှတ်ထားလိုက်"

ဘုံး

ဟွမ်မိသားစု၏ လူလတ်ပိုင်းအရွယ် အမျိုးသားသည် ပေါက်ကွဲသွား၍ သူ၏ ခွန်အားကို အပြည့်အဝ ပြသလိုက်သည်။

"သူက မွေးဖွားခြင်းနယ်မြေအဆင့် သတ္တမအဆင့်မှာ ရှိနေတာပဲ"

အချို့သော အလွတ်တန်း ကျင့်ကြံသူများသည် ၎င်းတို့၏ အဆုတ်ထဲရှိ လေထုတစ်ခုလုံးကို အေးခဲသွားသကဲ့သို့ ခံစားလိုက်ရသည်။ မွေးဖွားခြင်းနယ်မြေ ကျွမ်းကျင်သူများအနက် သတ္တမအဆင့်သည် အဆင့်သတ်မှတ်ချက်တစ်ခုဖြစ်သည်။ ၎င်းသည် ကြီးမားသော မိသားစုများနှင့် အမွေဆက်ခံမှုများ ရရှိထားသည့် ဂိုဏ်းခွဲများရှိ ကျွမ်းကျင်သူများအတွက်ပင် ဖြတ်ကျော်ရန် အလွန်ခက်ခဲသော သတ်မှတ်ချက်တစ်ခုဖြစ်သည်။ ၎င်းအဆင့်ကို ဖြတ်ကျော်ပြီးသည်နှင့် ကမ္ဘာတမျှ ကွဲပြားသွားပေးလိမ့်မည်။

ဤကဲ့သို့သော မွေးဖွားခြင်းနယ်မြေအဆင့်တွင် ၎င်းသည် ကျွမ်းကျင်သူများအနက် ကျွမ်းကျင်သူတစ်ဦးဖြစ်သည်ဟု ဆိုနိုင်သည်။ ၎င်းတို့ကဲ့သို့သော အလွတ်တန်း ကျင့်ကြံသူများအတွက် မွေးဖွားခြင်းနယ်မြေ သတ္တမအဆင့်သို့ဖြတ်ကျော်ခြင်းသည် ကောင်းကင်ဘုံသို့ တက်လှမ်းခြင်းတမျှ ခက်ခဲလှသည်။ မွေးဖွားခြင်းနယ်မြေအဆင့်သို့ ဖြတ်ကျော်ရာတွင် ၎င်းတို့၏ ပင်ကိုယ်စွမ်းရည်နှင့် ကံတရားများ ကုန်ဆုံးသွားခဲ့ပြီဖြစ်သည်။ သတ္တမအဆင့်သို့ တက်လှမ်းခြင်းသည် ကံတရားအပေါ်တွင်သာ မူတည်နေသည်။

လေပြင်းတိုက်ခတ်မှုကိုအသုံးပြုသော ကျွမ်းကျင်သူသည် ဤမျှ ရိုးရှင်းသော ဓားချက်ကို မည်သို့ကြောင့် မတားဆီးနိုင်ခဲ့သည်ကို ၎င်းတို့ နောက်ဆုံးတွင် နားလည်သွားကြသည်။ သိုင်းပညာအဆင့် ကွာခြားရုံသာမကဘဲ ခွန်အားတွင်လည်း ကြီးမားသော ကွာခြားချက်ရှိနေခြင်းကြောင့် ဖြစ်ပေလိမ့်မည်။ ချူးယွင်ဖန်ကို ပြန်ကြည့်လိုက်ချိန်တွင် ၎င်းတို့၏မျက်လုံးများတွင် စိုးရိမ်မှုများဖြင့် ပြည့်နှက်သွားသည်။ ချူးယွင်ဖန်းသည် အလွန် ငယ်ရွယ်သူဖြစ်ပုံပေါ်သည်။ ငယ်ရွယ်သူဖြစ်သောကြောင့် အချိန်အတော်ကြာ ကျင့်ကြံခဲ့သူ မဟုတ်အကြောင်း သိသာထင်ရှားသည်။ သူသည် မည်မျှပင် အရည်အချင်းရှိနေပါစေ၊ လုံလောက်မည် မဟုတ်ပေ။

"သွားသေလိုက်"

ဟွမ်မိသားစု၏ သက်လတ်ပိုင်းအရွယ် အမျိုးသားသည် သူ၏လက်ထဲရှိ ဓားကို ဝှေ့ယမ်းနေစဉ် ဟိန်းဟောက်လိုက်သည်။ ပေပေါင်းများစွာ ရှည်လျားသော ဓားအလင်းရောင် လွင့်ထွက်သွားခဲ့ရာ၊ လေထုကိုပင် ပြတ်တောက်သွားစေသည်။ ကောင်းကင်နှင့် မြေကြီးကြားတွင် စိတ်ပျက်အားငယ်မှု လေလှိုင်းတစ်ခု ပေါ်ပေါက်လာသည်။ ဤအခိုက်အတန့်တွင် အခြားသော ခံစားချက်များအားလုံးကို ဖိနှိပ်သွားသည့်နှယ် လူတိုင်း၏စိတ်ခံစားမှုများ တုန်လှုပ်လာကြသည်။ ဓားအလင်းရောင်သည် ချူးယွင်ဖန်းဆီသို့ ပျံ့နှံ့သွားသည်။ ၎င်းသည် အလွန် လျင်မြန် ဖျတ်လတ်လှသည်။ ဤဂုဏ်သတင်းကြီး မိသားစုကြီးရှိ သိုင်းပညာကျွမ်းကျင်သူ၏ ခွန်အားသည် အမှန်တကယ်ပင် ထူးကဲလှသည်။

"ခင်ဗျားက လှည့်ကွက်လေးတစ်ခုလောက်နဲ့ ဟာသလာလုပ်နေတာပဲ" ချူးယွင်ဖန်းက လှောင်ရယ်လိုက်သည်။

ပြီးနောက် အနက်ရောင် သံတောင်ဝှေး လွင့်ထွက်သွား၍ ချူးယွင်ဖန်းဆီ ဦးတည်နေသော ဓားအလင်းရောင်သည် ချက်ချင်းပင် အပိုင်းပိုင်း ကွဲထွက်သွားလေသည်။ သံတောင်ဝှေးသည် ဓားနှင့် အပြင်းအထန် တိုက်မိသွားကာ ကျယ်လောင်သော သတ္တု ပွတ်တိုက်သံများ ထွက်ပေါ်လာသည်။ ၎င်းကျယ်လောင်သံများသည် လမ်းကြောင်းတစ်လျှောက် အရပ်ရပ်သို့ ပျံ့နှံ့သွားကာ အနောက်မှ ချီစွမ်းအင်လှိုင်းများ လိုက်ပါလာသည်။

ဘန်း

ဟွမ်မိသားစုကျွမ်းကျင်သူသည် သူ၏လက်မောင်းကို ကြောက်မက်ဖွယ် စွမ်းအင်တစ်ခု ဖြတ်သန်းသွားခြင်းကို ခံစားလိုက်ရသောကြောင့် ရှောင်ပြေးချင်သော်လည်း ရှောင်ပြေးရန် နေရာမရှိခဲ့ပေ။ သူသည် သူ၏လက်ထဲရှိ ဓားကို ထိန်းချုပ်ချင်ခဲ့သော်လည်း မအောင်မြင်ခဲ့ပေ။ သူ၏ဓားသည် တခဏချင်းမှာပင် လွင့်ထွက်သွားခဲ့ကာ သူ၏လက်ဖဝါး ကွဲထွက်သွားသောကြောင့် သွေးများ ယိုစီးလာကာ အရိုး အပိုင်းအစများ လွင့်ပျံသွားလေသည်။

ဟွမ်မိသားစု ကျွမ်းကျင်သူသည် သူ၏ခွန်အားကို အပြည့်အဝ အသုံးပြုထားခဲ့သည်။ သူသည် အစွမ်းကုန် မတိုက်ခိုက်ခဲ့ခြင်း မဟုတ်ဘဲ ချူးယွင်ဖန်း၏ ခွန်အားကသာ ကြောက်မက်ဖွယ်ကောင်းနေခြင်းဖြစ်သည်။ သူ၏စိတ်ထဲတွင် အန္တရာယ်အဆင့် မြင့်တက်လာခြင်းကို ခံစားလိုက်ရသောကြောင့် ကျွန်းဆီသို့ ချက်ချင်း လှည့်၍ ထွက်ပြေးလိုက်လေသည်။ ချူးယွင်ဖန်းသည် ကနဦး တိုက်ခိုက်မှုများတွင် အနည်းငယ်မျှ ထိန်းချုပ်ထားခြင်း မရှိသောကြောင့် ဟွမ်မိသားစုကို မကြောက်ရွံ့သူဖြစ်ကြောင်း ထင်ရှားလှသည်။

ဟွမ်မိသားစု ကျွမ်းကျင်သူ၏ အကြီးမားဆုံးအားသာချက်ဖြစ်သည့် သူ၏အကြီးမြတ်ဆုံးသော အကာအကွယ် ပျောက်ကွယ်သွားခဲ့သည်။ သို့သော် ချူးယွင်ဖန်းက ထိုအမျိုးသားကို မည်သို့မျှ လွတ်မြောက်ခွင့်ပေးမည်နည်း။ ဟွမ်မိသားစုသည် သူ့ကို ပွင့်လင်းစွာသော်လည်းကောင်း လျှို့ဝှက်စွာသော်လည်းကောင်း အကြိမ်ပေါင်းများစွာ ပစ်မှတ်ထားခဲ့သည်။ ချူးယွင်ဖန်းသည် အရာအားလုံးကို မှတ်မိနေသောကြောင့် ယခုအချိန်သည် အတိုးနှုန်းဖြင့် ပြန်လည်သိမ်းယူရမည့် အချိန်ဖြစ်သည်။

ဘုံး

ချူးယွင်ဖန်း၏ တောင်ဝှေး ပြိုလဲကျသွားသည်နှင့် လေထုသည်လည်း အစိတ်စိတ် အမွှာမွှာ ပြိုကွဲသွားခဲ့ရာ၊ ၎င်းကို သာမန်မျက်စိဖြင့်ပင် မြင်တွေ့နိုင်သည်။ မြင်ကွင်းသည် တုန်လှုပ် ချောက်ချားဖွယ်ကောင်းလှသည်။ ဤအရာအားလုံးသည် နှေးကွေးသည်ဟု ထင်ရသော်လည်း လက်တွေ့တွင် စက္ကန့်အနည်းငယ်အတွင်းသာ ဖြစ်ပျက်သွားခဲ့သည်။ ချူးယွင်ဖန်းသည် သူ၏တောင်ဝှေးဖြင့် ဓားကို ရိုက်ထုတ်ပြီးနောက် နောက်ထပ် တိုက်ခိုက်မှုတစ်ခုကို ထုတ်လွှတ်လိုက်သည်၊ ထိုအားလုံးသည် မျက်စိတစ်မှိတ်အတွင် ဖြစ်ပွားခဲ့ခြင်းဖြစ်သည်။

မကြာသေးမီက သူ၏စွမ်းအင်ကို အသုံးပြု၍ အလွတ်တန်း ကျင့်ကြံသူများကို လျစ်လျူရှုခဲ့သော ဟွမ်မိသားစု ကျွမ်းကျင်သူများ သေဆုံးသွားပြီဖြစ်သည်။ ချူးယွင်ဖန်း၏ တောင်ဝှေးနှင့် ရိုက်ခွဲခံရပြီးနောက် ကြောက်မက်ဖွယ်ကောင်းသော စွမ်းအင် ထုတ်လွှတ်မှုကြောင့် သူ၏ဦးခေါင်းခွံပင် ချိုင့်ဝင်သွားခဲ့သည်။ သူ၏ အတွင်းအင်္ဂါများ ပျက်စီးသွားကာ ဤမျှပို၍ မသေဆုံးနိုင်တော့ပေ။ နေ့တစ်နေ့ အဆုံးသတ်ရန် အချိန်တန်ပြီဖြစ်သည်။

ချူးယွင်ဖန်းသည် သူ၏တောင်ဝှေးကို မြှောက်တင်လိုက်ချိန်တွင် လတ်ဆတ်သော သွေးများ စီးကျလာသည်။ ၎င်းသည် ဤကြောက်မက်ဖွယ်ကောင်းသော အစုလိုက်အပြုံလိုက်သတ်ဖြတ်မှုမျိုး မဖြစ်ပွားခဲ့သကဲ့သို့ အလွန် လျင်မြန်စွာ အသစ်တမျှ သန့်ရှင်းသွားလေသည်။ ချူးယွင်ဖန်းသည် ဟွမ်မိသားစု၏ ကျွမ်းကျင်သူများကို သတ်ဖြတ်ပြီးနောက် တုံ့ဆိုင်းမနေခဲ့ပေ။ သူသည် တောင်ဝှေးကို မြှောက်တင်လိုက်ပြီးနောက် ခုန်ချက်အနည်းငယ်ဖြင့် ကျွန်းပေါ်ရှိ တောထဲသို့ ပျောက်ကွယ်သွားလေသည်။

တစ်ယောက်ကို တစ်ယောက် စိုက်ကြည့်နေကြသည့် အလွတ်တန်း ကျင့်ကြံသူများသာ ကျန်ရစ်ခဲ့သည်။ ၎င်းတို့ဘက်မှ အနိုင်ယူရန် မဖြစ်နိုင်သူများဟု ထင်မှတ်ထားသည့် အင်အားကြီး ရန်သူကို ချူးယွင်ဖန်း ချေမှုန်းခဲ့ခြင်းနှင့်ပတ်သက်၍ ၎င်းတို့အားလုံး မယုံကြည်နိုင်ဖြစ်နေသည်။ ၎င်းတို့အားလုံးသည် တစ်ချက်ပြီး တစ်ချက် ရိုက်နှက်ခံရပြီးနောက် မြေပြင်ပေါ်သို့ လဲကျသွားခဲ့ရသည်။

"ပြည်ထောင်စုမှာ ဘယ်အချိန်ကတည်းက ဒီလို တောင်ဝှေး ကျွမ်းကျင်သူမျိုး ရှိနေတာလဲ"

"ကြောက်စရာကောင်းတယ်ဆိုပေမယ့် ကျေနပ်စရာလည်း ကောင်းပါတယ်။ ဟွမ်မိသားစုတွေက မောက်မာလွန်းတယ်။ သူတို့က ကျုပ်တို့ကို ဘယ်တုန်းကမှ မလေးစားခဲ့ဘူး"

"မှန်တယ်။ မြန်မြန် သွားကြစို့၊ မဟုတ်ရင် တခြား ဟွမ်မိသားစု ကျွမ်းကျင်သူတွေ ရောက်လာတဲ့အခါ၊ ကျုပ်တို့ အထဲဝင်ဖို့ အခွင့်အရေးရှိမှာ မဟုတ်တော့ဘူး"

အားလုံးက စိတ်လှုပ်ရှားစွာ ဆွေးနွေးနေကြသည်။ ခဏအကြာတွင် ၎င်းတို့အားလုံး ထိုနေရာမှ ထွက်ခွာကာ ကျွန်းထဲသို့ ဝင်သွားကြလေသည်။

အခန်း (၇၉၅) အင်တာနက်ပေါ်ရှိ ပျံ့နှံ့နေသော ကိစ္စများ

အင်တာနက်ပေါ်တွင် ကျွန်း၏ဆေးဖက်ဝင်ဥယျာဉ်အကြောင်း ဆွေးနွေးမှုသည် ပိုပို၍ ပြင်းထန်လာကာ နေရာတိုင်းသို့ ခေါင်းစဉ်မျိုးစုံ ပျံ့လွင့်နေသည်။ လူအချို့သည် ၎င်းကို ကျွန်းပေါ်တွင် လူသားအသွင်ဆောင်ထားသည့် နတ်ဘုရားဆေးအဖြစ်ပင် မှတ်ယူနေကြသည်။ ၎င်းသည် တစေ့တစောင်းမျှသော သတင်းမျိုး ဖြစ်သော်လည်း အင်တာနက်ပေါ်တွင် ပြင်းထန်သော ဆွေးနွေးမှုများ ဖြစ်ပေါ်သွားစေသည်။ ကျွန်းပေါ်ရှိ ဆေးဖက်ဝင်ဥယျာဉ်ကို အတားအဆီး အမျိုးမျိုးဖြင့် လွှမ်းခြုံထားသောကြောင့် အတွင်းရှိ အခြေအနေကို ဂြိုလ်တုများဖြင့်ပင် ထောက်လှမ်း၍ မရနိုင်ဘဲ အချို့သော ရှုထောင့်များမှသာ ထိတ်လန့်ဖွယ်ရာ မြင်ကွင်းများကို ရံဖန်ရံခါ ဖမ်းမိနိုင်ကြသည်။

ဆေးဖက်ဝင် ဥယျာဉ်အတွင်း ကြီးမြတ်သော ဆေးဝါး အမျိုးမျိုးရှိနေသည်ဟူသော သတင်းသည် တောမီးကဲ့သို့ ပျံ့နှံ့သွားသည်။ ဤကြီးမြတ်သော ဆေးများသည် မွေးဖွားခြင်းနယ်မြေအဆင့် ကျွမ်းကျင်သူများကို နတ်အဆင့်သို့ ဖြတ်ကျော်ဝင်ရောက်နိုင်သည်ဟူသော ကောလဟာလများပင် ရှိနေသည်။ ဤသတင်းများသည် အင်တာနက်ပေါ်တွင် ရုတ်ရုတ်သဲသဲ ဖြစ်သွားစေသည်။ ပြည်ထောင်စုတွင် နတ်အဆင့် ကျွမ်းကျင်သူ နည်းပါးလွန်းလှသည်။ ကျွမ်းကျင်သူတစ်ဦး ပိုမို ရရှိခြင်းသည် လူသားမျိုးနွယ်၏ ခွန်အားအတွက် များစွာအကျိုးရှိမည်ဖြစ်သည်။

ဤအချက်အလက်များအပြင် ကျွန်း၏ ဆေးဖက်ဝင် ဥယျာဉ်တွင် ဖြစ်ပွားခဲ့သည့် တိုက်ပွဲများသည်လည်း အင်တာနက်ပေါ်တွင် ပျံ့နှံ့လာခဲ့သည်။ လူတိုင်းက ဆွေးနွေးနေကြစဉ် တောင်ဝှေး ကိုင်ဆောင်ထားသော ကျွမ်းကျင်သူတစ်ဦးက ဟွမ်မိသားစုကျွမ်းကျင်သူ တစ်ဒါဇင်ကျော်ကို ရိုက်နှက်နေသည့် ဗီဒီယိုဖိုင်ကို ဝဘ်ဆိုဒ်အမျိုးမျိုး၏ ထိပ်ဆုံးတွင် လျင်မြန်စွာ တင်လိုက်ကြသည်။ ဤအကြောင်းအရာသည် မြင့်မြတ်သော မိသားစုကြီး ရှစ်ခုအနက် တစ်ခုဖြစ်သော ဟွမ်မိသားစုနှင့် ပတ်သက်နေသဖြင့် အင်တာနက်သုံးစွဲသူအများစု၏ အာရုံစိုက်မှုကို ချက်ချင်းရရှိစေခဲ့သည်။

...

ဗီဒီယိုထဲတွင် အနက်ရောင်ဝတ်ရုံ ၀တ်ဆင်ထားသော အမျိုးသားတစ်ဦးသည် သံတောင်ဝှေးကို ကိုင်ဆောင်ထားကြောင်း လူအများအပြားက မြင်တွေ့လိုက်ကြသည်။ ထိုအမျိုးသားသည် သူ၏တောင်ဝှေးကို ပေါ့ပါးစွာ ရိုက်ခတ်နေစဉ် လူသတ်နတ်ဘုရားနှင့်ပင် ဆင်တူနေသည်။ သူသည် အလွန် အံ့အားသင့်ဖွယ်ကောင်းလှသည်။ အလွန် အင်အားကြီးမားသော ဟွမ်မိသားစု၏ ကျွမ်းကျင်သူများပင် ချက်ချင်း ရိုက်သတ်ခံခဲ့ရသည်။

ဒါဇင်ထက်ကျော်သော ဟွမ်မိသားစုကျွမ်းကျင်သူများထဲတွင် ဟွမ်မိသားစု၏ ထိပ်တန်းကျွမ်းကျင်သူမှလွဲ၍ မည်သူတစ်ဦးတစ်ယောက်ကမျှ သူ၏ တိုက်ခိုက်မှုတစ်ခုကိုပင် မတားဆီးနိုင်ခဲ့ပေ။ ဒါဇင်ကျော်မျှရှိသော ဟွမ်မိသားစု၏ ပညာရှင်များသည် ရှားပါးသော မွေးဖွားခြင်းနယ်မြေအဆင့် ကျွမ်းကျင်သူများဖြစ်ကြောင်းကို တစ်စုံတစ်ဦးက လျင်မြန်စွာ ထောက်ပြခဲ့သည်။ ဒါဇင်ကျော်မျှရှိသော ဟွမ်မိသားစု ကျွမ်းကျင်သူများသည် မွေးဖွားခြင်းနယ်မြေအဆင့် ကျွမ်းကျင်သူများအနက် အားနည်းသူများ မဟုတ်ကြောင်း ထောက်ပြခဲ့သည့် ထင်ရှားကျော်ကြားသော မွေးဖွားခြင်းနယ်မြေအဆင့် ကျွမ်းကျင်သူများပင် ရှိနေသည်။

သို့သော် ဤကဲ့သို့သော ဖြစ်တည်မှုများကို လူတစ်ဦးတည်းဖြင့် အမှန်တကယ် သုတ်သင်သွားခဲ့သည်။ သူသည် မည်မျှ အစွမ်းထက်သူမျိုး ဖြစ်လေသလော။ ပြီးနောက် မျက်နှာဖုံးတပ်ဆင်၍ တောင်ဝှေး အသုံးပြုသည့် ဤအနက်ရောင် ဝတ်ဆင်ထားသူက မည်သည့်နေရာမှ လာခဲ့ကြောင်း မည်သူမျှ အတိအကျမသိကြပေ။ အချိန်အတိုင်းအတာတစ်ခုအထိ အင်တာနက်တွင် သူ၏အထောက်အထားနှင့် ပတ်သက်သည့် ထင်မြင်ချက်များ ပြည့်နှက်နေသည်။

မည်သို့ဆိုသော် ပြည်ထောင်စုတွင် တောင်ဝှေး အသုံးပြုသည့် ကျွမ်းကျင်သူ များပြားလွန်းသော်လည်း လူသိများသည်အထိ ကျော်ကြားသူများ မရှိခဲ့ပေ။ ဗီဒီယိုထဲရှိ အမျိုးသား၏ အစွမ်းသတ္တိကို အခြေခံခြင်းအရ တောင်ဝှေးဖြင့် မွေးဖွားခြင်းနယ်မြေ သတ္တမအဆင့်ကျွမ်းကျင်သူကို တိုက်ခိုက်နိုင်လျှင် သူ၏ ခွန်အားသည် မွေးဖွားခြင်းနယ်မြေ အဋ္ဌမအဆင့်ထက် မြင့်မားနိုင်ခြေရှိသည်။

ထိုကဲ့သို့ ခွန်အားမျိုးဖြင့် တောင်ဝှေး အသုံးပြုသော ကျွမ်းကျင်သူ အများအပြားမရှိလှပေ။ လအများက သံသယရှိသူ စာရင်းများကို အလွန် လျင်မြန်စွာ ရေးဆွဲလိုက်ကြသည်။ မည်သို့သော လူမျိုးဖြစ်ပါစေ ဟွမ်မိသားစု၏ ကျွမ်းကျင်သူများအား သတ်ဖြတ်ဝံ့သူကို သိသည်နှင့် ဟွမ်မိသားစုက ပေးဆပ်ခိုင်းမည်ဟူသော သတင်းများ ထွက်ပေါ်လာသောကြောင့် စာရင်းထဲတွင် ဖော်ပြခံထားရသော ကျွမ်းကျင်သူများက အလွန် စိုးရိမ်ပူပန်လာကြသည်။

နာမည်ကျော်ကြားသော တောင်ဝှေး ကိုင်ဆောင်သူများကို ဟွမ်မိသားစုက ပစ်မှတ်ထားနေကြသည်။ ထိုကဲ့သို့သော အခြေအနေမျိုးတွင် စာရင်းထဲ ပါဝင်သူများနှင့် သံသယရှိခံရသူများသည် ကောလာဟလများကို ချေပရန်အတွက် ၎င်းတို့နှင့် မသက်ဆိုင်ကြောင်း ပြတ်ပြတ်သားသား ထုတ်ပြောလာကြသည်။ ၎င်းတို့သည် ဟွမ်မိသားစုနှင့် မကြာခဏ ငြင်းခုံစရာမရှိသော်လည်း ဗီဒီယိုထဲရှိ အမျိုးသားသည် ဟွမ်မိသားစုဝင်များကို အလွန်ရဲတင်းစွာ စော်ကားခဲ့သောကြောင့်ဖြစ်သည်။ ကောလာဟလများကို ငြင်းဆိုခြင်း မပြုလုပ်လျှင် ၎င်းတို့ပါဝင်ပတ်သက်နေသည်ဟု ဟွမ်မိသားစုက ထင်သွားပါက ၎င်းတို့အားလုံး အဆုံးသတ်သွားပေလိမ့်မည်။

ဟွမ်မိသားစုကဲ့သို့သော အင်အားစုကြီး၏ ဒေါသကို မည်သူမျှ ခံနိုင်ရည်ရှိမည် မဟုတ်ပေ။ တစ်ချိန်တည်းမှာပင် ဤတောင်ဝှေး ကိုင်ဆောင်သည့် ကျွမ်းကျင်သူများက အလွန်ဒေါသထွက်နေကြသည်။ ဤအမျိုးသားသည် မည်သူဖြစ်သနည်း။ သူသည် ရဲတင်းလွန်းသော်လည်း သူ၏မျက်နှာ အစစ်အမှန်ကို မပြဝံ့ဘဲ မျက်နှာဖုံးနောက်ကွယ်တွင် ပုန်းအောင်းနေသောကြောင့် ၎င်းတို့ကိုပင် ငြိစွန်းစေခဲ့သည်။

၎င်းတို့ကဲ့သို့ ကျင့်ကြံမှုအဆင့်ရှိသူများသည် ပြည်ထောင်စုအတွင်း အများအပြား မရှိလှပေ။ ၎င်းတို့အားလုံးသည် ကြီးမြတ်သော အာဏာရှိသူများဟုပင် ဆိုနိုင်သည်။ ယခုအခါ ၎င်းတို့သည် ဟွမ်မိသားစု၏ အတင်းအကြပ် စေခိုင်းမှုကြောင့် ကောလာဟလများကို ငြင်းဆိုခဲ့ရသည်။ ထို့ကြောင့် ၎င်းတို့အားလုံး မျက်နှာပျက်ခဲ့ရလေသည်။

ကျော်ကြားသော တောင်ဝှေးကျွမ်းကျင်သူများက အဆိုပါ ကောလာဟလများကို ငြင်းဆိုရန် ထွက်လာပြီးနောက် သူ၏ပုံစံသည် နာမည်ကြီး တောင်ဝှေးကျွမ်းကျင်သူများနှင့် မကိုက်ညီကြောင်း လူအများက အံ့အားသင့်ဖွယ် ရှာတွေ့သွားကြသည်။ အင်တာနက်တွင် သူ့ကို နှိုင်းယှဉ်ရန်အတွက် ကွန်ပြူတာ အသုံးပြုသူများပင် ရှိခဲ့ကြရာ၊ သူ၏ တိုက်ခိုက်မှုပုံစံသည် ထောင်သောင်းချီသော တောက်ဝှေးကျွမ်းကျင်သူများ၏ ဗီဒီယိုများအနက် မည်သူတစ်ဦးတစ်ယောက်နှင့်မျှ မတူညီခဲ့ပေ။

၎င်းအချက်သည် မျက်နှာဖုံး နောက်ကွယ်တွင်ရှိနေသူကို လူအများအပြားက ပို၍ပင် စိတ်ဝင်စားစေခဲ့သည်။ ဉာဏ်ကောင်းသူများကမူ ဤလူသည် သူ့ကို လူအများ မှတ်မိသွားမည်ကို စိုးရိမ်သောကြောင့် မျက်နှာဖုံး တပ်ဆင်ထားခြင်းဖြစ်သည်ဟု မှန်းဆနေကြသည်။ ပြီးနောက် သူအသုံးပြုသော သိုင်းပညာသည် လူသိနည်းသည့် တောင်ဝှေး သိုင်းပညာဖြစ်သောကြောင့် အချိန်အတော်ကြာအောင် ရှာဖွေပြီးသည့်တိုင် မည်သည့် သဲလွန်စကိုမျှ ရှာမတွေ့ခဲ့ကြပေ။

ဟွမ်မိသားစုသည် အလွန် ဒေါသထွက်လာသောကြောင့် ထိုလူကို လုံးလုံးလျားလျား အသက်ရှင်ခွင့် ပေးမည်မဟုတ်ကြောင်း ပြောကြားလာသည်။ သူသည် ကျွန်းပေါ်ရှိ ဆေးဖက်ဝင် ဥယျာဉ်တွင် ရှိနေသရွေ့ ဟွမ်မိသားစုကျွမ်းကျင်သူများနှင့် တွေ့ဆုံမည်ဖြစ်သည်။ ထိုအချိန်တွင် သူသည် သေခြင်းတရားကို တွေ့ကြုံရပေလိမ့်မည်။

ထိုအချိန်တွင် ချူးယွင်ဖန်းသည် ကျွန်းပေါ်ရှိ ဆေးဖက်ဝင် ဥယျာဉ်၏ တောအုပ်အတွင်း ပျံသန်းနေခဲ့သည်။ ဤဆေးဖက်ဝင် ဥယျာဉ်ရှိ ဝိညာဉ်စွမ်းအင်များသည် အပြင်ဘက်ထက် များစွာသိပ်သည်းလှသည်။ ဤနေရာတွင် တစ်ရက် ကျင့်ကြံခြင်းက ပြင်ပတွင် နှစ်ရက် သုံးရက် ကျင့်ကြံခြင်းနှင့် ညီမျှမည်ဖြစ်သည်။

ကျွန်းတစ်ကျွန်းလုံးတွင် ဖွဲ့စည်းပုံ အကာအကွယ်များစွာကို အချိန်မရွေးတွေ့ရှိနိုင်သည်။ ဖွဲ့စည်းပုံ အကာအကွယ်များစွာအတွင်း ဆေးဖက်ဝင်ဥယျာဉ် အများအပြားရှိနေသည်။ ကျွန်းတစ်ခုလုံးကို ဆေးဖက်ဝင် ဥယျာဉ်တစ်ခုအဖြစ် ပြုလုပ်ထားသည်မှာ သိသာထင်ရှားသည်။ ကျွန်းသည် အကြောင်းအရင်းတစ်ခုခုကြောင့် ပင်လယ်အောက်ခြေသို့ နစ်မြုပ်သွားခဲ့၍ မကြာသေးမီကမှ နေ့အလင်းရောင်ကို ပြန်လည် မြင်တွေ့ခဲ့ရခြင်းဖြစ်သည်။

ချူးယွင်ဖန်းသည် သူနှင့်ပတ်သက်သော အကြောင်းအရာများ အင်တာနက်ပေါ်တွင် အလွန် ပျံ့နှံ့နေခြင်းကို မသိခဲ့ပေ။ ဤသတင်း အချက်အလက်ခေတ်တွင် အကြောင်းအရာများ ပျံ့နှံ့မှုနှုန်းသည် အံ့ဩဖွယ်ကောင်းလှသည်။ အင်တာနက်တွင် ချူးယွင်ဖန်း ရှာတွေ့ခဲ့သော အချက်အလက်တွေအရ ထိုဖွဲ့စည်းပုံ အကာအကွယ်တစ်ခုစီတွင် နတ်ဆေးများ ရှိနေပုံပေါ်သည်။ အချို့သော ဖွဲ့စည်းပုံ အကာအကွယ်များကို ချိုးဖျက်ပြီးပြီဖြစ်သော်လည်း အများစုကို မချိုးဖျက်ရသေးပေ။ ၎င်းတို့ကို ချိုးဖျက်ရန် လုပ်ဆောင်နေသူများစွာ ရှိနေသည်။

"ရပ်လိုက်"

ချူးယွင်ဖန်းသည် ပိုမိုနက်ရှိုင်းသော နေရာသို့ ခရီးဆက်၍ တောင်ထိပ်တစ်ခုသို့ ဖြတ်သန်းချိန်တွင် ကျယ်လောင်သော အသံတစ်ခု ကြားလိုက်ရသည်။ ချက်ချင်းဆိုသလိုပင် လူနှစ်ယောက် ထွက်ပေါ်လာကာ ချူးယွင်ဖန်း၏ ဘယ်တစ်ယောက် ညာတစ်ယောက် ချီတက်လိုက်ကြသည်။

၎င်းတို့သည် အမျိုးသားတစ်ဦးနှင့် အမျိုးသမီးတစ်ဦးဖြစ်ကြသည်။ အမျိုးသားသည် ရုပ်ဆိုး၍ အရပ် ဆယ်ပေနီးပါးရှိရာ၊ မိုးကြိုးတောင်ပံသားရဲမျှ မြင့်မားသည့်အပြင် သူ၏ ခန္ဓာကိုယ်သည် သံမျှော်စင်ကဲ့သို့ သန်မာပုံပေါ်သည်။ အမျိုးသမီးသည်လည်း အလွန် အကျဉ်းတန်လှ၍ အရပ် ခြောက်ပေခွဲမျှရှိနေရာ၊ သူမသည် ချူးယွင်ဖန်းထက် ခေါင်းတစ်လုံး ပိုမြင့်သူဖြစ်သည်။ ၎င်းတို့နှစ်ဦးစလုံးသည် ရဲရင့်သော အရောင်အဝါများ ရှိနေကြသည်။

"မင်းက ဟွမ်မိသားစုလို့ခေါ်တဲ့ လူသားတွေကို တောင်ဝှေးသုံးပြီး စိန်ခေါ်ခဲ့တဲ့လူလား။ လူသားတွေက တော်တော် အသုံးမကျတာပဲ။ လူတစ်ယောက်ကိုတောင် မထိန်းချုပ်နိုင်ဘူး၊ ဒါပေမယ့် မင်း နောက်ထပ် ထွက်ပြေးနိုင်မှာ မဟုတ်တော့ဘူး"

ထိုလူ၏ စကားပြောသံသည် မိုးခြိမ်းသံကဲ့သို့ မြည်ဟည်းနေခဲ့ရာ၊ ၎င်းအသံသည် ကျယ်လောင်လွန်းသောကြောင့် နားစည်များပင် ပေါက်ကွဲသွားနိုင်သည်။

"ဒီလူသားက တော်တော် အရသာရှိလောက်တယ်။ ကျွတ်၊ ကျွတ်။ နူးညံ့ပြီး အရည်ရွှမ်းနေမယ့်ပုံပဲ" အမျိုးသမီး၏ ပြုံးရယ်မှုသည် သူမ၏မျက်နှာကို ပို၍ပင် ရုပ်ဆိုးသွားစေသည်။