အခန်း (၈၄၁-၈၄၃)

အခန်း (၈၄၁) အဏ္ဏဝါမျိုးနွယ်များ စတင် ရန်ဆွလာခြင်း၊ တရားမျှတသော ဒေါသစိတ်တို့နှင့် ပြည့်နှက်နေခြင်း

ပြီးနောက် ချူးယွင်ဖန်း၏ မိသားစုကို တင်ဆောင်လာသော ဂျက်လေယာဉ်ဟု သံသယရှိသော ကိုယ်ပိုင်ဂျက်လေယာဉ်ကို ကျန်းမိသားစုမှ တိုက်ခိုက်ခဲ့သည့် သတင်းများလည်း ပျံ့နှံ့လာခဲ့သည်။ ကျန်းမိသားစုများသည် ချူးယွင်ဖန်းကို စစ်ကြေညာနေပြီဖြစ်ကြောင်း လူတိုင်းသိကြသည်။ ၎င်းတို့သည် သူ့ကို ဖြေရှင်းရန် နည်းမျိုးစုံ အသုံးပြုနေကြသည်။ မကြာမီမှာပင် ကျန်းဟီကို ပေါ့ပေါ့တန်တန် အနိုင်ယူခဲ့သော ချူးယွင်ဖန်း၏ ဗီဒီယိုသည် အင်တာနက်ပေါ်တွင် ပေါ်ပေါက်လာသည်။

ဗီဒီယိုသည် အကွာအဝေးကြောင့် အနည်းငယ် မှုန်ဝါးနေ၍ အများစုကို ရှင်းရှင်းလင်းလင်း မပြသနိုင်သော်လည်း ချူးယွင်ဖန်း၏ နတ်ဆိုးနတ်ဘုရားကဲ့သို့သော ခွန်အားကို လူတိုင်း မြင်နေကြဆဲဖြစ်သည်။ သူသည် လက်သီးတစ်ချက်ထိုးရုံဖြင့် မွေးဖွားခြင်းနယ်မြေ အထွတ်အထိပ်အဆင့် ကျွမ်းကျင်သူတစ်ဦးကို လွင့်ပျံသွားသည်အထိ ပြုလုပ်နိုင်ခဲ့သည်။ လူအများအပြားက သက်ပြင်းမချဘဲ မနေနိုင်ဖြစ်နေကြသည်။

[သူက သူ့အသက်အရွယ်အုပ်စုထဲမှာ နံပါတ်တစ် ကျွမ်းကျင်သူဖြစ်လာတာ မကြာသေးဘူးဆိုတာ ငါ မှတ်မိသေးတယ်။ အခုဆို မျိုးဆက်သစ်လူငယ်တွေရဲ့ နံပါတ်တစ်ဆိုတဲ့ သူ့ခေါင်းစဉ်က ခိုင်မြဲနေပုံရတယ်]

[မှန်တယ်။ ဒီမျိုးဆက်မှာ ဘယ်သူကမှ သူ့ကို မယှဉ်နိုင်မှာကို စိုးရိမ်မိသား]

[ပြီးခဲ့တဲ့နှစ်တွေအတွင်းမှာ သူ ဘယ်လိုများဖြတ်သန်းခဲ့ရလို့ ဒီလောက် အံ့ဩထိတ်လန့်စရာကောင်းနေရတာလဲ]

ချူးယွင်ဖန်း၏ ခွန်အားကြောင့် လူတိုင်း ညည်းတွားနေကြစဉ် အင်တာနက်ပေါ်တွင် သဘောထားကွဲလွဲသည့် အသံများစွာ ရုတ်တရက် ထွက်ပေါ်လာသည်။

[ချူးယွင်ဖန်းက တောင်ပေါ်မှာ ကျားမရှိတုန်း ဘုရင်လို့သတ်မှတ်နေတဲ့ မျောက်လိုပဲ။ လူသားခန္ဓာကိုယ်က အားနည်းလွန်းလို့ အဲဒီလူတွေကို လက်သီးတစ်ချက်နဲ့ ထိုးနိုင်တာပါ။ တကယ်လို့ ကျုပ်တို့ ရေနေမျိုးနွယ်က ကျွမ်းကျင်သူတွေနဲ့သာဆိုရင် သေတဲ့လူက ချူးယွင်ဖန်းဖြစ်သွားမှာ]

[မှန်တယ်။ ရေနေမျိုးနွယ်တွေရဲ့ ကာယကြံ့ခိုင်မှုနဲ့ဆိုရင် ချူးယွင်ဖန်း သေကြောင်းကြံစည်နေသလိုပဲ ဖြစ်သွားမှာ]

[ချူးယွင်ဖန်းက ဘယ်လောက်အင်အားကြီးနေပါစေ နတ်အဆင့်ကို မရောက်သေးသရွေ့ သူက သာမန်သတ္တဝါတစ်မျိုးပါပဲ]

အင်တာနက်ပေါ်တွင် သံသယရှိနေသော အသံများ ရုတ်တရက် ပေါ်ပေါက်လာသည်။ ဤအသံများသည် ရေနေမျိုးနွယ်များထံမှ ဖြစ်ကြောင်းကို လူအများစုသည်လည်း နားလည်ခဲ့ကြသည်။ လွန်ခဲ့သည့်လအနည်းငယ်က ရေနေမျိုးနွယ်များ အင်တာနက်ပေါ်တွင် ကြီးမားသော တိုက်ခိုက်မှုမျိုး စတင်ခဲ့ပြီးနောက် အင်တာနက်အသုံးပြုသူများသည် လူသားများသာ မဟုတ်ကြတော့ပေ။ ယခင်က အင်တာနက်ကို လျှို့ဝှက်အသုံးပြုကြသော နိုင်ငံခြားမျိုးစိတ်များ ရှိကောင်းရှိနိုင်သော်လည်း ၎င်းတို့သည် ရေနေမျိုးနွယ်များကဲ့သို့ ထင်ပေါ်ကျော်ကြားခြင်း မရှိခဲ့ပေ။

အဏ္ဏဝါမျိုးနွယ်များသည် ကမ်းပေါ်တက်ရန်အတွက် စိတ်ပိုင်းဖြတ်ထားသောကြောင့် လူသားများ၏ အဆင့်မြင့်နည်းပညာကို စတင်လက်ခံလိုက်သကဲ့သို့ ထင်မှတ်ရစေသည်။ ၎င်းတို့၏ အမျိုးမျိုးသော ရန်ဆွသည့် အပြောအဆိုတို့ကြောင့် လူသားတို့သည် တရားမျှတသော ဒေါသစိတ်တို့နှင့် ပြည့်နှက်လာကြ၏။ သို့သော် ၎င်းတို့ကို ချေပရန် နည်းလမ်းမရှိခဲ့ပေ။ ချူးယွင်ဖန်း၏ အလွန်သန်မာမှုကို ဗီဒီယိုမှ မြင်နိုင်သော်လည်း သူသည် နတ်အဆင့်သို့ မဝင်ရောက်သေးပေ။

မည်သို့ဆိုသော် နတ်အဆင့်ကျွမ်းကျင်သူတစ်ဦးသည် တိုက်ခိုက်ရာတွင် ဤကဲ့သို့မဟုတ်သောကြောင့် ချူးယွင်ဖန်းသည် မွေးဖွားခြင်းနယ်မြေ အထွတ်အထိပ်အဆင့်သို့သာ ရောက်ရှိနေသင့်သည်ဟု ခန့်မှန်းကြသည်။ ကျန်းဟီနှင့် ချူးယွင်ဖန်းနှစ်ဦးစလုံးသည် မွေးဖွားခြင်းနယ်မြေ အထွတ်အထိပ်အဆင့်တွင်ရှိကြသော်လည်း ချူးယွင်ဖန်းသည် သန်မာလွန်းခြင်းမဟုတ်လျှင် ကျန်းဟီသည် အားနည်းလွန်းနေခြင်းဖြစ်သည်။

ကနဦးတွင် လူအများက ချူးယွင်ဖန်းကို သန်မာလွန်းသည်ဟု ထင်ခဲ့ကြ၍ ရေနေမျိုးနွယ်များကမူ ကျန်းဟီသည် အားနည်းလွန်းသဖြင့် ချူးယွင်ဖန်းကို အံ့ဩဖွယ်ရာ တိုက်ပွဲမှတ်တမ်းမျိုး ရရှိစေခြင်းဟု ထင်ခဲ့ကြသည်။ နှစ်ဦးနှစ်ဖက်တို့၏ အမြင်များကို ထောက်ခံသူများရှိခဲ့သည်။ ချူးယွင်ဖန်းကို ထောက်ခံသူများသည် ချူးယွင်ဖန်း၏ အင်အားကို ယုံကြည်လိုသော်လည်း ၎င်းကို ထောက်ခံရန် ပို၍သင့်လျော်သည့် အကြောင်းပြချက်မျိုး ရှာမတွေ့ခဲ့ပေ။ ထိုအချိန်တွင် တတိယမြောက် မိချောင်းမင်းသားဟုအမည်ရှိသော အကောင့်တစ်ခု ရုတ်တရက် ပေါ်ပေါက်လာသည်။

[ချူးယွင်ဖန်းက အရမ်းသန်မာတယ်တဲ့လား။ တောင်ပေါ်မှာ ကျားမရှိလို့ ဒီမျောက်က ဘုရင်ဖြစ်နေတာပါ။ ဒီစွမ်းအင်အဆင့်မျိုးကို ကျုပ်တို့ ရေနေမျိုးနွယ်တွေရဲ့ နေရာတိုင်းမှာ တွေ့နိုင်တယ်။ လူတွေရဲ့ ရုပ်ပိုင်းဆိုင်ရာ ခန္ဓာကိုယ်က အားနည်းလွန်းတဲ့အတွက် ခင်ဗျားတို့ရဲ့ မွေးဖွားခြင်းနယ်မြေအဆင့်က ကျုပ်တို့ရဲ့ မွေးဖွားခြင်းနယ်မြေ နဝမအဆင့်နဲ့တောင် ယှဉ်လို့မရဘူး။ နှစ်လအတွင်း ကျုပ်ကိုယ်တိုင် ကမ်းပေါ်တက်လာပြီး ပြည်ထောင်စုရဲ့ ကျွမ်းကျင်သူအားလုံးကို စိန်ခေါ်မယ်။ ကျုပ် အရင်ဆုံးသတ်မယ့်လူက ဒီကောင်ပဲ။ ချူးယွင်ဖန်း၊ စိန်ခေါ်မှုကို ခင်ဗျား လက်ခံရဲ့လား]

ဤတိုက်ရိုက်စိန်ခေါ်စာသည် အင်တာနက်တွင် ရုတ်ရုတ်သဲသဲဖြစ်သွားစေသည်။ ရေနက်ပိုင်း ဝေလငါးများ၏ စကားကြီး စကားကျယ်ပြောဆိုမှုများအပြီးတွင် ယခုအခါ တတိယမိကျောင်းမင်းသားသည်လည်း ရုတ်တရက် ထွက်ပေါ်လာသည်။ တတိယမိကျောင်းမင်းသားက မည်သူဖြစ်သည်ကို ၎င်းတို့ မသိကြပေ။ ၎င်းသည် အလွန် ဂုဏ်ယူဝံ့ကြွားစွာ ပြုမူဝံ့ခဲ့သည်။ ချူးယွင်ဖန်းက အံ့ဩဖွယ်ရာ တိုက်ခိုက်ရေးစွမ်းအင်ကို ပြသပြီးသည့်တိုင် ၎င်းသည် ချူးယွင်ဖန်းကို စိန်ခေါ်ဝံ့ဆဲဖြစ်သည်။ သို့သော်လည်း မကြာမီတွင် အဏ္ဏဝါမျိုးနွယ်ကျွမ်းကျင်သူများဟု သံသယရှိသော အကောင့်များမှ ပို့စ်များသည် လူတိုင်းထံ ပျံ့နှံ့သွားခဲ့သည်။

[တတိယမိကျောင်းမင်းသားက အဏ္ဏဝါမျိုးနွယ် မျိုးဆက်သစ်ငယ်ထဲမှာ ထိပ်တန်းဆရာတစ်ဆူပဲ။ သူက ပင်လယ်ထဲမှာ နှစ်ပေါင်းများစွာ တိုက်ပွဲဝင်ခဲ့တော့ သူနဲ့ ထိုက်တန်တဲ့ ပြိုင်ဘက်ကို ရှာဖွေဖို့ ခက်ခဲတယ်။ သေချာတာကတော့ သူက မျိုးဆက်သစ်လူငယ်တွေထဲမှာ ပထမဆုံးဖြစ်မယ့် ထိပ်တန်းပြိုင်ဘက်ပဲ။ ခင်ဗျားတို့ လူသားမျိုးနွယ်ရဲ့ ပထမဆုံးလို့ ခေါ်နေတဲ့လူက ကျုပ်တို့ရေနေမျိုးနွယ်တွေရဲ့ ကျွမ်းကျင်သူတွေနဲ့ ယှဉ်ရင် အားနည်းလွန်းတယ်။ ခင်ဗျားတို့က ဖန်လုံအိမ်မှာ ပေါက်နေတဲ့ ပန်းပင်တွေပဲ]

[မှန်တယ်။ ကျုပ်တို့ ရေနေမျိုးနွယ်တွေရဲ့ ကျွမ်းကျင်သူတွေက လူမျိုးပေါင်းစုံရဲ့ စစ်မြေပြင်တွေနဲ့ လေ့ကျင့်ထားတာ။ အန္တရာယ်များလေလေ၊ စိတ်ကို ထိန်းနိုင်လေပဲ။ ခင်ဗျားတို့လူသားတွေလိုမျိုး အရည်အချင်းရှိတဲ့သူတွေကို ကောင်းကောင်း အကာအကွယ်ပေးတာမျိုး မဟုတ်ဘူး။ သူတို့ကို ကြည့်ရင် လေ့ကျင့်သင်ကြားပေးထားပုံပေါ်ပေမယ့် သေရေးရှင်ရေးအခြေအနေမျိုးကို မဖြတ်သန်းဖူးရင် အားလုံးက အမှိုက်သရိုက်တွေပဲ]

[လူသားကျွမ်းကျင်သူတွေက အဏ္ဏဝါမျိုးနွယ်ကျွမ်းကျင်သူတွေထက် အများကြီး နိမ့်ကျတယ်။ ခင်ဗျားတို့ရဲ့ ရုပ်ခန္ဓာက အရမ်းအားနည်းလွန်းတယ်]

အဏ္ဏဝါမျိုးနွယ်အမြောက်အမြားက ရှင်းပြပြီးနောက် ဤတတိယ မိကျောင်းမင်းသား၏ ဇာစ်မြစ်ကို လူတိုင်း သိသွားကြသည်။ သူသည် ပင်လယ်နက်ထဲမှ ကြမ်းကြုတ်သော မိကျောင်းမျိုးနွယ်စု၏ ငယ်ရွယ်သော မျိုးနွယ်စုခေါင်းဆောင်ဖြစ်နေခဲ့၍ သူ၏ ခွန်အားသည် သက်တူရွယ်တူများထက် သာလွန်သည်။ သူသည် မျိုးနွယ်စုအသီးသီး၏ စစ်မြေပြင်တွင် နှစ်ပေါင်းများစွာ တိုက်ပွဲဝင်ခဲ့ကာ မရေတွက်နိုင်သော ကျွမ်းကျင်သူများကို မြှင့်တင်ပေးနိုင်သည့် ရေနေမျိုးနွယ်များကြားတွင်ပင် သူ၏ခွန်အားနှင့် ညီမျှသော ပြိုင်ဘက်ကို ရှာဖွေရန် ခက်ခဲလှသည်။ ဤမျှ ကြီးကြီးကျယ်ကျယ်ပြောရဲခြင်းက မထူးဆန်းလှပေ။

တတိယ မိကျောင်းမင်းသား၏ ရုတ်တရက် စိန်ခေါ်မှုသည် ချူးယွင်ဖန်းကို မျိုးဆက်သစ်လူငယ်များ၏ ပထမဆုံးပုဂ္ဂိုလ်ဟု လူများစွာက ပေးဆောင်ခဲ့သော ခေါင်းစဉ်ကြောင့် ဖြစ်နိုင်သည်ဟု လူအချို့က ခန့်မှန်းထားပြီးဖြစ်သည်။ ချူးယွင်ဖန်းသည် နံပါတ်တစ်ဖြစ်လာကတည်းက ဤခေါင်းစဉ်ကြောင့် ဖြစ်ပေါ်လာသော ဖိအားကို ခံနိုင်ရည်ရှိရပေလိမ့်မည်။ ၎င်းသည် ရှောင်လွှဲ၍ မရသော ဖြစ်စဉ်ဖြစ်၏။

လူအများအပြားက စိုးရိမ်နေကြသည်။ အဏ္ဏဝါမျိုးနွယ်များကြားတွင် ကျွမ်းကျင်သူများစွာရှိကြ၍ ၎င်းတို့တစ်ဦးချင်းစီအနက် ပထမတစ်ဦးက နောက်တစ်ဦးထက် ပို၍ ရက်စက်ကြမ်းကြုတ်ကြသည်။ လူသားများသည် ဤကဏ္ဍတွင် အားသာချက်မရှိခဲ့ပေ။ ၎င်းတို့၏ နည်းပညာလက်နက်များ ထပ်တိုးခြင်းအတွက်သာ မဟုတ်ပါက၊ လက်ရှိ သိုင်းပညာတာအို၏ ဖွံ့ဖြိုးတိုးတက်မှုကို အခြေခံခြင်းဖြင့် ပြည်ထောင်စုဘက်မှ ရေနေမျိုးနွယ်များကို ယှဉ်ပြိုင်ရန် ခက်ခဲမည်ဖြစ်သည်။

ရေနေမျိုးနွယ်ဦးရေသည် ခွန်းလွန်နယ်မြေရှိ ကုန်းမြေပေါ်ရှိ သတ္တဝါ အရေအတွက်ထက် အနည်းဆုံးလျှင် ဆယ်ဆ သို့မဟုတ် အဆတစ်ရာ ပိုများပြားသည်။ ၎င်းတို့ပိုင်ဆိုင်ထားသော ကျွမ်းကျင်သူ အရေအတွက်သည်လည်း မထင်မှတ်လောက်အောင် များပြားသည်။ အဏ္ဏဝါမျိုးနွယ်များကြားတွင် လွှမ်းမိုးနိုင်သူများသည် လူသားတို့ တွေးကြည့်နိုင်သည်ထက် အဆပေါင်းများစွာ အင်အားကြီးအားသည်။ အားလုံးသည် ချူးယွင်ဖန်းအတွက် စိတ်ပူစပြုလာသည်။ သူသည် ကြီးမားသော ခွန်အားကို ပြသထားသော်လည်း သူနှင့် ရေနေမျိုးနွယ်များကြားတွင် ကွာဟချက် ရှိနေပုံရသည်။ နောက်ဆုံးတွင် သူသည် နတ်အဆင့်သို့ မ၀င်ရောက်သေးပေ။ ဤစိန်ခေါ်မှုစာအပြီးတွင် တတိယမိကျောင်းမင်းသားသည် နောက်ထပ်ပို့စ်တစ်ခုကို ထပ်တင်ခဲ့သည်။

[ခင်ဗျားက ပြည်ထောင်စုရဲ့ ကျန်းမိသားစုကို စော်ကားခဲ့တယ်လို့ ကျုပ် ကြားတယ်။ ကျုပ်တို့ နှစ်လအတွင်း ဆုံနိုင်မယ်လို့ မျှော်လင့်တယ်။ ခင်ဗျားသာ သေသွားရင် အဓိပ္ပါယ်မဲ့သွားလိမ့်မယ်။ ပြည်ထောင်စုရဲ့ နံပါတ်တစ်ကျွမ်းကျင်သူ မျိုးဆက်သစ်လူငယ်တွေရဲ့ အရိုးက ဘယ်လောက်မာကျောလဲဆိုတာကို အရမ်း စိတ်ဝင်စားမိတယ်။ ဒါပေမယ့် လက်တစ်ဖက်တည်းနဲ့ ချေမှုန်းနိုင်မယ်ဆိုတာ သေချာပါတယ်]

ဤစကားများ ထွက်လာသည်နှင့်အမျှ အင်တာနက်သည် ပိုမို ဆူပွက်လာခဲ့သည်။ လူအများအပြားသည် ချူးယွင်ဖန်းကို အစပိုင်းတွင် အကောင်းမြင်စိတ် မရှိကြသော်လည်း ယခုမူ မခံနိုင်ကြတော့ပေ။ တတိယ မိကျောင်းမင်းသား၏ စကားများသည် ပြည်ထောင်စုကို နှိမ့်ချနေကြောင်း ရှင်းရှင်းလင်းလင်း ပြသနေသည်။ သူသည် လူသားမျိုးနွယ်တစ်ခုလုံးကို အထင်အမြင်သေးနေသောကြောင့် ဤမျှ ရန်ဆွနေခြင်းဖြစ်သည်။ မူလတွင် ချူးယွင်ဖန်းကို မကြိုက်နှစ်သက်သူများသည် ချူးယွင်ဖန်းဘက်မှ အောင်နိုင်ရန် မျှော်လင့်လာကြသည်။ ၎င်းတို့သည် သိုင်းပညာအရ ရေနေမျိုးနွယ်ရှိ တတိယမြောက် မိကျောင်းမင်းသားကို အဆုံးရှုံးမခံနိုင်ပေ။

[ဒီသောက်ကျိုးနည်း တတိယ မိကျောင်းမင်းသားကို သတ်လိုက်စမ်းပါ]

[မင်းက သားရဲတစ်ကောင်သာသာပဲရှိတာ။ ဒီမှာ လာပြီး မိုက်ရိုင်းရဲတယ်လို့]

[ပြည်ထောင်စုရဲ့ ကျွမ်းကျင်သူတွေကို စိန်ခေါ်ရဲတယ်လို့။ သူ့ကိုယ်သူ အထင်ကြီးနေတာပဲ]

ချူးယွင်ဖန်းအတွက်သာမကဘဲ ပြည်ထောင်စု၏ သိုင်းပညာရှင်တာအို ကျွမ်းကျင်သူများအတွက်မူ အင်တာနက်ပေါ်တွင် အော်ဟစ်ပြောဆိုမှု အမျိုးမျိုးရှိလာခဲ့သည်။ ဤကြီးမားသော ဖိအားအောက်တွင် ၎င်းတို့သည် တတိယ မိကျောင်းမင်းသား ထွက်ပေါ်လာပါက ပြင်းထန်စွာ ရိုက်နှက်ပစ်မည်ဟု မတ်တပ်ထရပ်ကာ ဆိုခဲ့ရသည်။ ပြည်ထောင်စုသည် ဤမျှအားမနည်းသည့်အပြင် လူသားများသည်လည်း ပျော့ညံ့သောသူများ မဟုတ်ကြောင်း ၎င်းတို့က ထိုမိချောင်းမင်းသားကို နားလည်အောင် ပြုလုပ်ရပေလိမ့်မည်။

ဤသိုင်းပညာ ကျွမ်းကျင်သူများက တစ်ဦးပြီး တစ်ဦး ပြောကြားပြီးနောက် ဤကိစ္စသည် အထွတ်အထိပ်သို့ ရောက်ရှိသွားခဲ့သည်။ အားလုံးက ချူးယွင်ဖန်း၏ ထုတ်ဖော်ပြောကြားမှုကို စောင့်ဆိုင်းနေကြသည်။ ချူးယွင်ဖန်းသည်လည်း လူတိုင်း၏မျှော်လင့်ချက်များကို စိတ်မပျက်စေဘဲ စိန်ခေါ်မှုကိုလက်ခံကြောင်း စာတိုတစ်စောင် ရေးခဲ့သည်။

[ခင်ဗျားက တီကောင်ရှည်တစ်ကောင်သာသာပဲ ရှိတာ။ ခင်ဗျားကို ကင်ပြီးစားဖို့က အလုပ်ရှုပ်လွန်းတယ်။ သေချင်ရင် လာခဲ့]

[ဟားဟား၊ ကျုပ် သိနေတယ်။ ချူးယွင်ဖန်းက ပြဿနာကို ကြောက်နေမယ့်လူ မဟုတ်ဘူး]

[ကျန်းမိသားစုတွေတောင် သူ့ကို ကြောက်အောင် မလုပ်နိုင်ခဲ့ဘူး။ ဒင်းက တီကောင်ရှည်လောက်ရှိတာကို။ ဘာကြောက်စရာရှိလို့လဲ]

[ဒါက စိတ်ဝင်စားစရာ ကောင်းတော့မှာပဲ။ သူများတွေ ဘယ်လိုပဲ ထင်နေပါစေ ကျုပ် ခင်ဗျားကို သေချာပေါက် ထောက်ခံတယ်။ ခင်ဗျားက ပြည်ထောင်စုရဲ့ မျိုးဆက်သစ်လူငယ်တွေကြားမှာ နံပါတ်တစ် ပုဂ္ဂိုလ်ပဲ။ ခင်ဗျားကို တခြားသူတွေ မထင်သေးလို့ မရဘူး]

လူအများအပြားက ချူးယွင်ဖန်းကို ထောက်ခံသည့်အနေဖြင့် အင်တာနက်ပေါ်တွင် မှတ်ချက်များ ချန်ရစ်ခဲ့ကြသည်။ တိုက်ပွဲသည် နှစ်လအတွင်း စတင်တော့မည်ဟု ထင်မှတ်ရစေသည်။ သို့သော် ဤလူများအနက် ချူးယွင်ဖန်းကို အမှန်တကယ် ပံ့ပိုးပေးနေသူက မည်မျှပါဝင်၍ မည်မျှသောလူများက ချူးယွင်ဖန်း၏ သေဆုံးမှုကို မျှော်လင့်ကာ လောင်စာဆီ ထည့်နေကြသည်ကို မည်သူ သိသနည်း။

ချူးယွင်ဖန်း ရှင်သန်နိုင်မည်ဟု လူအများက မထင်မှတ်ကြပေ။ အားလုံးသည် သူ့ကို သေဆုံးတော့မည်ဟု ထင်နေကြသောကြောင့်သာ အားပေးနေကြခြင်းဖြစ်သည်။ ဤအရာသည် အင်တာနက်ပေါ်တွင် လတ်တလော အကျော်ကြားဆုံး အကြောင်းအရာဖြစ်လာခဲ့သည်။ ထိုအချိန်တွင် ချူးယွင်ဖန်း၏ ရုတ်တရက် စွန့်လွှတ်အနစ်နာခံမှုကြောင့် ကျန်းမိသားစုတွင် ရုတ်ရုတ်သဲသဲ ဖြစ်သွားခဲ့သည်။ မူလက ချူးယွင်ဖန်းကို သေဆုံးနေပြီဟု ၎င်းတို့ ထင်ခဲ့ကြသော်လည်း သူအသက်ရှင်နေမည်ဟု မမျှော်လင့်ထားကြပေ။ ကျန်းမိသားစုအတွက်မူ ဤသည်မှာ ၎င်းတို့မျက်နှာကို ပြင်းပြင်းထန်ထန် ရိုက်လိုက်ခြင်း ထူးမခြားနားပေ။

ကျန်းမိသားစု၏ အကြီးအကဲများနှင့် အထက်အရာရှိများသည် နေရာမျိုးစုံမှ အလွန် လျင်မြန်စွာ ပြန်လာခဲ့ကြသည်။ အချိန်မီ မပြန်လာသေးသူများလျှင်ပင် virtual ပြစက်များဖြင့် ရောက်ရှိလာကြသည်။

"သူ သေကို သေရမယ်၊ သူက နေ့တိုင်း ကျုပ်တို့မိသားစုအတွက် အရှက်ရစရာပဲ" ကျန်းမိသားစုမှ အကြီးအကဲတစ်ဦးက မကျေမနပ်ဖြစ်စွာ ပြောလိုက်သည်။

ချူးယွင်ဖန်း၏ ဖြစ်တည်မှုသည် ကျန်းမိသားစုတစ်ခုလုံးအတွက် ကြီးမားသော ဂုဏ်သိက္ခာကျဆင်းမှုတစ်ခုဖြစ်သည်။

“သူ သေချာပေါက် သေမှာပါ၊ ဒါပေမယ့် ဒီအမျိုးယုတ်က အခု အရမ်း သန်မာနေတယ်။ ကျင့်ကြံမှုအရဆိုရင် သူ့ကို ဘယ်သူမှ မတားနိုင်ဘူး” အခြားသော အကြီးအကဲတစ်ဦးက သဘောထားကွဲလွဲစွာ ပြောကြားလိုက်သည်။

"နျူကလီးယားဗုံးနဲ့ အကြဲချခံရရင် သူ မသေနိုင်ဘူးလို့ ကျုပ် မယုံဘူး" အကြီးအကဲတစ်ဦးက အော်ဟစ်လိုက်သည်။

"နျူကလီးယားဗုံးသုံးတော့ရော ဘာထူးလဲ။ အရင်နှစ်ကြိမ်ရဲ့ ရလဒ်တွေကို အားလုံး မေ့နေကြပြီလား။ အခု နည်းလမ်းတစ်ခုပဲ ရှိတော့တယ်၊ အဲဒါက ဘိုးဘေးကြီးကို ကိုယ်တိုင်ကိုယ်ကျ လှုပ်ရှားခိုင်းဖို့ပဲ" တခြားသော အကြီးအကဲတစ်ဦးက ချက်ချင်း ထပြောလိုက်သည်။

ယခင် နျူကလီးယားဗုံးနှစ်လုံး ကြဲချမှု၏ ရလဒ်များသည် ၎င်းတို့ အရှေ့တွင်ရှိနေပြီဖြစ်သည်။ ချူးယွင်ဖန်းသည် ၎င်းတိုက်ခိုက်မှုတွင် အသက်ရှင်ကျန်ရစ်ခဲ့သည်။ မည်သို့ပင်ဆိုစေကာမူ ၎င်းတိုက်ခိုက်မှုများက မလုံလောက်ပေ။ နာရီဝက်ကြာသည်အထိ ငြင်းခုံပြီးနောက် အဆုံးတွင် ကျန်းရွှမ်လေ့က ဆုံးဖြတ်ချက်ချလိုက်သည်။

"သူ့ကို အခုလောလောဆယ် လွှတ်ထားကြရအောင်။ အခုအချိန်မှာ တန်မိသားစုနဲ့ ပန်းပွင့်လှုပ်ခတ်ခြင်းဂိုဏ်းတို့နဲ့ မဟာမိတ်ဖွဲ့တာက ဦးစားပေးကိစ္စပဲ။ ကျန်တာတွေအားလုံးကို ရပ်ထားမယ်။ သူ အခု မသေရင်တောင် ဘိုးဘေးကြီး ပြန်လာတဲ့အခါ သေရလိမ့်မယ်"

အခန်း (၈၄၂) ရေလှိုင်းများ တစ်ဟုန်ထိုးတက်လာပြီး မုန်တိုင်းတစ်ခု လာနေခြင်း

ကျန်းမိသားစုတို့သည် ဆုံးဖြတ်ချက်တစ်ခုကို အမြန်ချမှတ်လိုက်သည်။ ၎င်းတို့သည် နျူကလီးယားဗုံးကို အသုံးမပြုနိုင်ပါက ချူးယွင်ဖန်း၏ အင်အားသည် တားမြစ်ထားသော နည်းလမ်းအချို့ကိုသာ အသုံးပြုနိုင်သည်ဟု ဆိုလိုသည်။ အယုံကြည်ရဆုံးနည်းလမ်းသည် ၎င်းတို့၏ဘိုးဘေးကြီးကို ကိုယ်တိုင်ကိုယ်ကျ လှုပ်ရှားခိုင်းခြင်းသာဖြစ်သည်။ ကျန်းမိသားစု ဘိုးဘေးကြီး၏ အစွမ်းသတ္တိနှင့် ဂုဏ်သတင်းကို ဖော်ပြရန် မလိုအပ်ပေ။ အထူးသဖြင့် တန်မိသားစု ဘိုးဘေးကြီးကိုသတ်ဖြတ်၍ သက်ရှိရုပ်သေးရုပ်အဖြစ်သို့ ပြောင်းလဲခဲ့ကြောင်း အတည်ပြုပြီးနောက် သူ၏ဂုဏ်သတင်းသည် ကောင်းကင်ရှိ နေမင်းကဲ့သို့ ထွန်းတောက်လာခဲ့သည်။

ကျန်းမိသားစုတစ်ခုလုံး၏အမြင်တွင် ဤသည်မှာ ကျေအေးရန် မဖြစ်နိုင်သော အမုန်းတရားတစ်ခုဖြစ်သည်။ သို့သော် ပြင်ပလူများအတွက်မူ ဤအရာသည် ကြီးစွာသော အဟန့်အတားဖြစ်ခဲ့သည်။ ယခင်က မြင့်မြတ်သော မိသားစုကြီး ရှစ်ခုကို ဘေးချင်းယှဉ်နေသောအခါ မည်သူက ပိုမို သန်မာသည်ကို ပြောရန်ခက်ခဲလှသည်။ ယခုမူကား ကျန်းမိသားစု ဘိုးဘေးကြီးသည် ပိုမိုအားကောင်းလာ၍ မြင့်မြတ်သော မိသားစုကြီး ရှစ်ခုတို့တွင် ထင်ရှားပေါ်လွင်လာခဲ့သည်။

ဤသည်မှာ လွန်ခဲ့သည့် နှစ်အနည်းငယ်အတွင်း ကျန်းမိသားစုများ ကြုံတွေ့ခဲ့ရသည့် ဆုံးရှုံးမှုများကြောင့်လည်း ဖြစ်သည်။ ချူးယွင်ဖန်း၏လက်ချက်ကြောင့် မွေးဖွားခြင်းနယ်မြေအဆင့် ကျွမ်းကျင်သူတစ်ရာကျော်ခန့် သေဆုံးသွားခဲ့သောကြောင့် ကျန်းမိသားစုသည် အကြီးအကျယ် ဆုံးရှံးခဲ့ရသည်။ သို့ရာတွင် ကျန်းမိသားစု၏ ဂုဏ်သတင်းသည် ကျဆင်းမသွားပေ၊ ၎င်း၏အဓိကအကြောင်းအရင်း ကျန်းမိသားစု ဘိုးဘေးကြီး၏ အစွမ်းသတ္တိကြောင့်ဖြစ်သည်။

ကျန်းမိသားစုများသည် မွေးဖွားခြင်းနယ်မြေအဆင့် ကျွမ်းကျင်သူများစွာကို ဆုံးရှုံးခဲ့ရသော်လည်း မိမိတို့မိသားစု၏ စုစုပေါင်းအင်အားနှင့် နှိုင်းယှဉ်ပါက ကြီးမားသော ဆုံးရှုံးမှုမဟုတ်ကြောင်း လူတိုင်း သိကြသည်။ ကျန်းမိသားစုများကို ပြည်ထောင်စုအတွင်း နှစ်ပေါင်း နှစ်ရာကျော်ကတည်းက တည်ထောင်ခဲ့ကြသည်။ ၎င်း၏ နက်နဲသော အမွေအနှစ်များသည် ပြင်ပလူများ စိတ်ကူးယဉ်နိုင်သည့် အရာမဟုတ်ပေ။ ဤအရာအားလုံးကသာ ၎င်းတို့ပိုင်ဆိုင်ထားသမျှ အကုန်ဖြစ်ခဲ့လျှင် မြင့်မြတ်သော မိသားစုကြီး ရှစ်ခုဟူသော ဘွဲ့အမည်နှင့် ထိုက်တန်မည် မဟုတ်ပေ။

ထို့အပြင် မွေးဖွားခြင်းနယ်မြေအဆင့် ကျွမ်းကျင်သူများ ဆုံးရှုံးသွားမှုကို ပိုမို လေ့ကျင့်ခြင်းဖြင့် ဖန်တီးနိုင်သည်။ တိုက်ခိုက်ရေးစွမ်းအင်ဖြစ်သော အဆင့်မြင့် စက်လက်နက်များဖြင့်ဆိုလျှင် ဆုံးရှုံးမှုသည် များစွာ မရှိလှပေ။ ကျန်းမိသားစု ဘိုးဘေးကြီးတစ်ဦးတည်းကသာ တည်မြဲသော ကျောထောက်နောက်ခံတစ်ခုဖြစ်သည်။ ကျန်းမိသားစု ဘိုးဘေးကြီးကို ဆုံးရှုံးသွားသည်နှင့် ပြန်လည်ဖြည့်ဆည်းရန် နည်းလမ်းမရှိတော့ဘဲ နောက်ဆက်တွဲ ဆိုးကျိုးများကို တွေးကြည့်၍မရနိုင်ပေ။

ထုံးစံအတိုင်း ကျန်းမိသားစု ဘိုးဘေးကြီးသည် ဦးစားပေးဖြစ်သည်။ ကျန်းမိသားစုတို့သည် ချူးယွင်ဖန်းကို ကြောက်ရွံ့ကြသော်လည်း အနည်းငယ် ကြောက်ရွံ့ခြင်းသာဖြစ်သည်။ ၎င်းတို့၏မျက်လုံးထဲတွင် ချူးယွင်ဖန်းကို သတ်နိုင်သော စွမ်းရည်နှင့် တတ်ကျွမ်းမှုများ အမှန်တကယ်ရှိနေသည်။

ချူးယွင်ဖန်းသည် နျူကလီးယားဗုံး တိုက်ခိုက်မှုတိုင်းမှ မည်သို့ လွတ်မြောက်နိုင်သည်ကို ၎င်းတို့ မသိကြသော်လည်း သူသည် နျူကလီးယားဗုံးများကို မကြောက်ရွံ့ဘဲ နေလိမ့်မည်ဟု ၎င်းတို့ မယုံကြည်ကြပေ။ နတ်အဆင့် ကျွမ်းကျင်သူများလျှင်ပင် နျူကလီးယားဗုံး တိုက်ခိုက်မှုများကို ပေါ့ပေါ့ဆဆ မပြုမူဝံ့ကြပေ။ နျူကလီးယားဗုံး တိုက်ခိုက်မှု၏ အလယ်ဗဟိုတွင် ရှိနေလျှင် နတ်အဆင့် ကျွမ်းကျင်သူတစ်ဦးလျှင်ပင် သေဆုံးရပေလိမ့်မည်။

"ဒီလိုဆိုရင်တောင် ကျုပ်တို့က သူ့ကို လွှတ်ပေးလိုက်လို့ မရဘူး။ ပန်းပွင့်လှုပ်ခတ်ခြင်းဂိုဏ်းက ကျုပ်တို့၊ တန်မိသားစုတို့နဲ့ ပူးပေါင်းချင်နေတာ မဟုတ်လား။ ကျုပ်တို့က ပူးပေါင်းဆောင်ရွက်တော့မှာဆိုတော့ သူတို့ဘက်က စိတ်ရင်းအမှန်ကို ပြခိုင်းလိုက်ပေါ့။ ချူးယွင်ဖန်းလိုဟာမျိုးကိုတောင် မဖြေရှင်းနိုင်ရင် ပန်းပွင့်လှုပ်ခတ်ခြင်းဂိုဏ်းက အသုံးမကျလို့ပဲ"

ကျန်းရွှမ်လေ့က နောက်ဆုံး ဆုံးဖြတ်ချက်ကို ချမှတ်လိုက်သည်။ ခွန်းလွန်နယ်မြေရှိ တောင်ထွတ်တစ်ခုတွင် ပြင်းထန်သော အရောင်အဝါများ ရှိနေသူများသည် နှစ်ဖက်စလုံးတွင် စောင့်ဆိုင်းနေကြသည်။ ထိုအချိန်တွင် ကောင်းကင်ကြီးသည် စာလိပ်တစ်ခုကဲ့သို့ဖြစ်လာကာ ကြီးမားသော အက်ကွဲမှုကြီးအဖြစ် ပွင့်ထွက်သွားခဲ့သည်။ အက်ကွဲကြောင်း၏ အလင်းတန်းထဲမှ ရွှေရောင်တောက်ပနေသည့် နတ်ဘုရားနှင့် ဆင်တူသော ရုပ်သဏ္ဍာန်တစ်ခု ပျံသန်းလာလေသည်။ သူသည် ခဏအကြာတွင် အဖွဲ့၏အလယ်ဗဟိုသို့ ရောက်ရှိသွားသည်။

ဤသည်မှာ အသက်သုံးဆယ်မျှသာရှိပုံရသော အမျိုသားတစ်ဦးဖြစ်သည်။ သူသည် ချောမောသော မျက်နှာအသွင်အပြင်နှင့် အေးစက်သော အမူအရာမျိုးရှိနေ၍ ရွှေခရမ်းရောင် ၀တ်စုံနှင့် ကျောက်စိမ်းခါးပတ်ကို ၀တ်ဆင်ထားခဲ့ရာ၊ သူသည် သိက္ခာရှိ အမူအကျင့်မျိုးရှိနေသည်။

"မင်္ဂလာပါ ဒုတိယခေါင်းဆောင်"

အားလုံးက တညီတညွတ်တည်း အလေးပြုလိုက်ကြသည်။ တက်ရောက်လာသူများ၏ မျက်နှာပေါ်ရှိ အမူအရာသည် အလွန်တရာ လေးစားမှုရှိနေကြသည်။ တစ်ဖက်လူ၏ အဆင့်အတန်းသည် ဂိုဏ်းထဲတွင် ၎င်းတို့ထက် အဆင့်တစ်ဆင့်သာ မြင့်မားသော်လည်း ဤကွာဟချက်သည် ကောင်းကင်နှင့် ကမ္ဘာအကြားက ကွာခြားချက်နှင့် ဆင်တူသည် ဤလူသည် ပန်းပွင့်လှုပ်ခတ်ခြင်းဂိုဏ်း၏ အသက်အငယ်ဆုံး ဒုဂိုဏ်းခေါင်းဆောင်ဖြစ်သည်။

သူသည် ထိုမျဉ်းကြောင်းကို အမှန်တကယ် ဖြတ်ကျော်ခဲ့သည့် ကြောက်မက်ဖွယ်ဖြစ်တည်မှုဖြစ်သည်။ သူသည် ၎င်းကို တစ်နှစ်ကျော်မျှသာ ဖြတ်ကျော်ခဲ့ပြီးဖြစ်သော်လည်း သူသည် ဂိုဏ်းထဲတွင် သူ၏ဂုဏ်သတင်းကို ထူထောင်ထားပြီးဖြစ်သောကြောင့် မည်သူမျှ သူ့ကို ယှဉ်ပြိုင်နိုင်မည် မဟုတ်ပေ။

ဤနေရာ၌ နတ်ကုန်းမြေ၏ လူများရှိနေပါက ဤလူများသည် နတ်ကုန်းမြေ၏ ပန်းပွင့်လှုပ်ခတ်ခြင်းဂိုဏ်းမှ အထက်အရာရှိများ၊ အကြီးအကဲများ၊ ထိပ်တန်းပုဂ္ဂိုလ်များနှင့် အခြားလူများဖြစ်နေကြကြောင်း အသိအမှတ်ပြုနိုင်မည်ဖြစ်သည်။ ဤလူများသည် ပန်းပွင့်လှုပ်ခတ်ခြင်းဂိုဏ်းထဲတွင် ရာထူးကြီးမြင့်သူများဖြစ်ကြရာ၊ ၎င်းတို့ကို ဤနေရာတွင် စောင့်ခိုင်းစေသူသည် သာမန်လူများ မဟုတ်နိုင်ကြပေ။

ပြီးနောက် ဤအမျိုးသားသည် ပန်းပွင့်လှုပ်ခတ်ခြင်းဂိုဏ်း၏ အသစ်ခန့်အပ်ထားသည့် ဒုဂိုဏ်းခေါင်းဆောင်ဖြစ်သည်။ ထိုလူသည် ငယ်ရွယ်သော်လည်း မည်သူမျှ သူ့ကို မေးခွန်းထုတ်ဝံ့ခြင်း မရှိပေ။ ပန်းပွင့်လှုပ်ခတ်ခြင်းဂိုဏ်း၏ စည်းမျဉ်းများ အရ၊ နတ်အဆင့်သို့ တက်လှမ်းလာသူများသည် ရာထူးကြီးသူများ ဖြစ်လာနိုင်သည်။ ၎င်းတို့သည် ထိုမျဉ်းကို ဖြတ်ကျော်ပြီးသည်နှင့် နတ်ဘုရားများနှင့် သေမျိုးများကို ပိုင်းခြားနိုင်သည့် ကောင်းကင်ဘုံ ကျုံးကြီးနှင့် ဆင်တူပေလိမ့်မည်။

"ဘယ်လိုပြင်ဆင်ထားလဲ" ပန်းပွင့်လှုပ်ခတ်ခြင်းဂိုဏ်း၏ ဒုဂိုဏ်းခေါင်းဆောင်က မေးလိုက်သည်။

"အကုန်လုံးကို စနစ်တကျ ဆောင်ရွက်ထားပြီးပါပြီ။ ကျွန်တော်တို့ဂိုဏ်းရယ် ကျန်းမိသားစုနဲ့ တန်မိသားစုတို့ရဲ့ ပူးပေါင်းဆောင်ရွက်မှုက ပိုပြီး နက်ရှိုင်းလာပါပြီ။ ဒါပေမယ့် ကျန်းမိသားစုနဲ့ တန်မိသားစုတို့က ရုတ်တရက် တောင်းဆိုချက်တစ်ခု လုပ်ထားပါတယ်၊ ဒုတိယခေါင်းဆောင်က လူတစ်ယောက်ကို သတ်ပေးဖို့ပါ" ဦးဆောင်အကြီးအကဲများထဲမှ တစ်ဦးက လေးစားစွာ ဖြေကြားလိုက်သည်။

"ဘယ်သူကို သတ်ခိုင်းတာလဲ" ဒုဂိုဏ်းခေါင်းဆောင်၏ မျက်ခုံးများက သိသိသာသာ မပျော်မရွှင်ဖြစ်နေဟန်ဖြင့် ပင့်တက်သွားသည်။ "ဒါက သူတို့ရဲ့ ဘိုးဘေးကြီးရဲ့ အကြံလား၊ ဒါမှမဟုတ် တခြားတစ်ယောက်ရဲ့ အကြံလား"

"သူတို့မိသားစုထဲက ကျန်းရွှမ်လေ့ရဲ့ အကြံပါ။ ကျွန်တော်တို့တွေ့တဲ့ အချက်အလက်တွေအရ ဒီလူရဲ့ နာမည်က ချူးယွင်ဖန်းဖြစ်ပြီး သူက ပြည်ထောင်စုရဲ့ အဓိက မိသားစုတွေထဲက တစ်ခုဖြစ်တဲ့ ချူးမိသားစုက တိုက်ရိုက်ဆင်းသက်လာသူပါ။ ဒီလူရဲ့ ကျင့်ကြံမှုက အလွန်နက်နဲပြီး၊ ပြည်ထောင်စုရဲ့ မျိုးဆက်သစ်လူငယ်တွေထဲမှာ နံပါတ်တစ်အဖြစ် လူသိများပါတယ်။ မွေးဖွားခြင်းနယ်မြေ အထွတ်အထိပ်အဆင့် ကျွမ်းကျင်သူတွေတောင် သူ့ကို မတိုက်ခိုက်နိုင်ကြဘူး။ ကျန်းမိသားစုရဲ့ ဘိုးဘေးကြီးက အာကာသထဲကနေ လောလောဆယ် ပြန်မလာနိုင်သေးတဲ့အတွက် ကျန်းမိသားစုတွေ အခက်တွေ့နေကြပါတယ်။ ဒုတိယခေါင်းဆောင်ကို ဆောင်ရွက်ပေးဖို့ တောင်းဆိုလိုက်တာပါ”

“ ကျွန်တော့် အထင်တော့ သူတို့က ကျွန်တော်တို့ဂိုဏ်းရဲ့ အင်အားကို စမ်းသပ်နေတာပဲ” အကြီးအကဲက လေးလေးစားစား ဆက်ပြောလိုက်သည်။

ဤလူ၏ ကျင့်ကြံမှုအဆင့်သည် မွေးဖွားခြင်းနယ်မြေ အထွတ်အထိပ်အဆင့်သို့ ရောက်ရှိနေပြီဖြစ်သော်လည်း ဒုဂိုဏ်းခေါင်းဆောင်ကို အနည်းငယ်မျှပင် မလေးမစား မပြုမူဝံ့ပေ။ ခြေလှမ်းတစ်လှမ်းသည် အသက်နှင့် သေခြင်းကြားက ခြားနားချက်မျိုးဖြစ်သည်။

"ဟမ်၊ ဒီလူတွေက အာဏာ မပြရရင် ဘယ်လိုလုပ်ပြီး ကျေကျေနပ်နပ်ကြီး လက်ခံနိုင်ကြမှာလဲ၊ သူတို့လက်ထဲမှာ နျူကလီးယားလက်နက်လို အဆင့်မြင့်လက်နက်တွေရှိနေလို့ ကျုပ်တို့ကို စျေးလာဆစ်ရဲနေတာ" ပန်းပွင့်လှုပ်ခတ်ခြင်းဂိုဏ်း၏ ဒုဂိုဏ်းခေါင်းဆောင်၏ မျက်ခုံးများသည် ပို၍ပင် တွန့်တက်လာသည်။ "ဒါပေမယ့် ဒါတွေက အသေးစားလှည့်ကွက်တွေပါ။ ကောင်းပြီ၊ အချိန်ကျရင် ဒီချူးယွင်ဖန်းကို ကျုပ် ဖြေရှင်းလိုက်မယ်။ ပြည်ထောင်စုရဲ့ ပါရမီရှင်တွေက အရမ်း များလွန်းတယ်၊ ဒါက ကျုပ်တို့အတွက် မကောင်းဘူးလေ။ ဟားဟား"

ပန်းပွင့်လှုပ်ခတ်ခြင်းဂိုဏ်း၏ ဒုဂိုဏ်းခေါင်းဆောင်က ဤစကားများကို ပြောပြီးနောက် သူ၏ နှုတ်ခမ်းထောင့်စွန်းမှ မထီမဲ့မြင်ပြုသော အပြုံးတစ်ခု ပေါ်ထွက်လာသည်။ ဤခေါင်းစဉ်များသည် သူ၏အမြင်အရ ရယ်စရာများသာဖြစ်သည်။ မျိုးဆက်သစ်လူငယ်များအနက် နံပါတ်တစ်ကျွမ်းကျင်သူ ဂုဏ်ပုဒ်သည် မည်သည်ဖြစ်သနည်း။ အပြင်လူများ၏အမြင်တွင် ချူးယွင်ဖန်းသည် အလွန် အစွမ်းထက်၍ မွေးဖွားခြင်းနယ်မြေ အထွတ်အထိပ်အဆင့်ကျွမ်းကျင်သူကိုပင် အနိုင်ယူနိုင်သည်။

သို့သော် ထိုနတ်အဆင့်ဟူသော မျဉ်းကြောင်းကို ဖြတ်သန်းခဲ့သော မိမိကဲ့သို့သော တစ်စုံတစ်ဦး၏အမြင်တွင် နတ်အဆင့် မဟုတ်သူများသည် ပုရွက်ဆိတ်များသာဖြစ်သည်။ ပုရွက်ဆိတ်တစ်ကောင်သည် မည်မျှပင် သန်မာနေပါစေ၊ ခြေတစ်လှမ်းနှင့်ပင် နင်းသတ်နိုင်သည့် ပုရွက်ဆိတ်တစ်ကောင်သာဖြစ်သည်။

"ဒုတိယခေါင်းဆောင်၊ ကျွန်တော်တို့ရဲ့ အရင်စုံစမ်းစစ်ဆေးမှုတွေအရ ကျွန်တော်တို့ဂိုဏ်းမှာ အထင်ကြီးလေးစားခံရတဲ့ တပည့် လင်ချန်ဖုန်းက ပြည်ထောင်စုကို ရောက်လာပြီးနောက်ပိုင်း ပျောက်သွားခဲ့တယ်။ နောက်ပိုင်းမှာ ဒီကိစ္စက ချူးယွင်ဖန်းနဲ့ ပတ်သက်နေတာကို ကျွန်တော်တို့သိလိုက်ရတယ်" အကြီးအကဲက ပြောလိုက်သည်။

ပန်းပွင့်လှုပ်ခတ်ခြင်းဂိုဏ်း၏ ခွန်အားဖြင့်ဆိုလျှင် ၎င်းတို့၏ ပြည်ထောင်စုထဲသို့ ထိုးဖောက်ဝင်ရောက်မှုသည် အလွန် မနက်နဲသော်လည်း ၎င်းတို့ စုဆောင်းနိုင်သည့် အရင်းအမြစ်များသည် အနည်းငယ် မျှတလှသည်။ ထို့အပြင် ၎င်းတို့သည် ကျန်းမိသားစုကဲ့သို့သော အင်အားစုကြီးများ၏ အကူအညီကို ရရှိထားသောကြောင့် လုံးလုံးလျားလျား လျှို့ဝှက်ထားခြင်းမရှိသော အရာများကို ရှာဖွေရန် မခက်ခဲလှပေ။

ထို့ကြောင့် လင်ချန်ဖုန်းသည် ရှန်ဟဲဆေးပညာကုမ္ပဏီသို့ ဝင်ရောက်ပြီးနောက် သတ်ဖြတ်ခံခဲ့ရကြောင်း ၎င်းတို့ သိရှိနိုင်သည်။ ပုဂ္ဂလိကပိုင်ပစ္စည်းကို ပိုင်နက်ကျူးလွန်ကြောင်း ပြည်ထောင်စု၏ရဲတပ်ဖွဲ့က အများပြည်သူကို အသိပေးကြေညာခဲ့ပြီးနောက်ပိုင်းတွင် နောက်ထပ် စုံစမ်းစစ်ဆေးမှုများ ပြုလုပ်ခြင်း မရှိခဲ့ပေ။ ချူးယွင်ဖန်း၏ ပြည်ထောင်စု တက္ကသိုလ်ကျောင်းသားတစ်ဦးဟူသော ဂုဏ်ပုဒ်သည် လုံးလုံးလျားလျား အသုံးမဝင်ခြင်း မဟုတ်ပေ။ သူ၏ စီနီယာ အတန်းဖော် ကွန်ရက်သည် ပြည်ထောင်စုတစ်ခုလုံးတွင် ပျံ့နှံ့နေသည်။ လင်ချန်ဖုန်း သည် အခြေအမြစ်မရှိသော ပြင်ပလူတစ်ဦးဖြစ်သောကြောင့် သူ့အတွက်ကြောင့် မည်သူက ချူးယွင်ဖန်းကို ခက်ခဲအောင် ပြုလုပ်မည်နည်း။

ပန်းပွင့်လှုပ်ခတ်ခြင်းဂိုဏ်းတစ်ခုလုံးသည် အရှက်ရသွားကြသည်။ ထိုဖြစ်စဉ်သည် ချူးယွင်ဖန်းနှင့် ပတ်သက်နေကြောင်း ၎င်းတို့ သိသော်လည်း မည်သည့်အရာကိုမှ မပြုလုပ်နိုင်ခဲ့ပေ။ ၎င်းတို့က ချူးယွင်ဖန်းကို သတ်ဖြတ်ချင်ခဲ့သောအခါ သူသည် ရုတ်တရက် ပျောက်ဆုံးသွားသောကြောင့် သေဆုံးသွားသည်ဟုသာ ထင်မှတ်ခဲ့ကြသည်။ ချူးယွင်ဖန်းသည် တစ်ဖန် ပေါ်ပေါက်လာသောအခါ မွေးဖွားခြင်းနယ်မြေ အထွတ်အထိပ်အဆင့် ကျွမ်းကျင်သူတစ်ဦးကပင် သူ့ကို မယှဉ်နိုင်လိမ့်မည်ဟု မည်သူသိသနည်း။ ထို့ကြောင့် ၎င်းတို့က အလောတကြီး မပြုမူဝံ့ကြပေ။

၎င်းတို့သည် နျူကလီးယားလက်နက်ကဲ့သို့သော အဆင့်မြင့်လက်နက်များရှိနေသည့် ကျန်းမိသားစုများ မဟုတ်ကြပေ။ သို့သော် ယခုအရာများသည် ကွဲပြားသွားပြီဖြစ်သည်။ ဒုဂိုဏ်းခေါင်းဆောင် ရောက်ရှိလာသဖြင့် ပန်းပွင့်လှုပ်ခတ်ခြင်းဂိုဏ်းသည် နောက်ဆုံးတွင် ပြည်ထောင်စုအတွင်းရှိ အရာအားလုံးကို ဖိနှိပ်ချုပ်ချယ်ရန် အခွင့်အာဏာရှိလာခဲ့သည်။ နတ်အဆင့် ကျွမ်းကျင်သူတစ်ဦးသည် ပြည်ထောင်စုကို မွှေနှောက်ရန် လုံလောက်နေသည်။

"လင်ချန်ဖုန်းလား။ ဒါဆို ချူးယွင်ဖန်းက သူ့ကိုသတ်ခဲ့တာပေါ့၊ ဒီလိုဆိုရင် ချူးယွင်ဖန်းက ပိုလို့တောင် သေသင့်တယ်"

ပန်းပွင့်လှုပ်ခတ်ခြင်းဂိုဏ်း၏ ဒုဂိုဏ်းခေါင်းဆောင်၏ မျက်ခုံးများသည် အလွန် တင်းကြပ်သွားသည်။ သူသည် တပည့်တစ်ဦး သေဆုံးမှုအပေါ် အနည်းငယ်မျှပင် ဂရုမစိုက်ပေ။ ပန်းပွင့်လှုပ်ခတ်ခြင်းဂိုဏ်းတွင် မရေတွက်နိုင်သော တပည့်များရှိသည့်အပြင် အရည်အချင်းရှိသူ လူဦးရေသည် မနည်းပါးလှပေ။ သို့သော် သူသည် ဤကိစ္စကို လျစ်လျူမရှုနိုင်ပေ။ အဆုံးတွင် အဓိက တပည့်တစ်ဦး ဆုံးရှုံးသွားခြင်းဖြစ်သောကြောင့် မိမိက မလှုပ်ရှားခဲ့လျှင် အနာဂတ်တွင် ပန်းပွင့်လှုပ်ခတ်ခြင်းဂိုဏ်းကို လူတိုင်းက မထီမဲ့မြင်ပြုကြမည် မဟုတ်သလော။

"ဒီလိုဆိုရင် သူတို့အတွက် ချူးယွင်ဖန်းကို ကျုပ်ဖြေရှင်းလိုက်မယ်လို့ ကျန်းမိသားစုခေါင်းဆောင်ကို ပြောလိုက်။ ဒါပေမယ့် ဒါက ကျုပ်ဘက်က စမ်းသပ်ခံမှာ ဒီအကြိမ်ပဲ။ သူတို့မိသားစုရဲ့ ဘိုးဘေးကြီးကို လေးစားတဲ့အတွက် ကျုပ်က သူတို့နဲ့ မငြင်းခုံတော့ဘူး။ ဒါပေမယ့် နတ်အဆင့်ရဲ့ ဂုဏ်သိက္ခာကို အလွယ်တကူ မထိပါးဖို့ သေချာ မှတ်သားခိုင်းလိုက်။ နောက်တစ်ခါဆိုရင် ဒီကိစ္စကို လွယ်လွယ်နဲ့ ပြီးမယ်မထင်နဲ့" ပန်းပွင့်လှုပ်ခတ်ခြင်းဂိုဏ်း၏ ဒုဂိုဏ်းခေါင်းဆောင်က အေးစက်စွာ ပြောလိုက်သည်။

"နားလည်ပါပြီ" အကြီးအကဲက ကမန်းကတန်း ပြောလိုက်သည်။

"စကားမစပ်၊ ခင်ဗျား နတ်ကုန်းမြေကို နောက်ဆုံးသတင်းတစ်ခု ပို့လိုက်တုန်းက တန်မိသားစုဘိုးဘွားကြီး အသတ်ခံရတယ်လို့ ပြောခဲ့တာမလား" ဒုဂိုဏ်းခေါင်းဆောင်က မေးလိုက်သည်။

"မှန်ပါတယ်။ သူ့ကို သတ်ခဲ့တဲ့သူက ကျန်းမိသားစု ဘိုးဘေးကြီးပါ။ တန်းမိသားစု ဘိုးဘေးကြီးက ကျန်းမိသားစု ဘိုးဘေးကြီးအတွက် သက်ရှိရုပ်သေးရုပ်အဖြစ်တောင် ဖန်တီးခံလိုက်ရပါတယ်" အကြီးအကဲက လေးလေးစားစားဖြင့် အမြန်ပြန်ဖြေလိုက်သည်။

"ဟာဟားဟား၊ ဒါက တကယ့်ကို စိတ်ဝင်စားဖို့ကောင်းသားပဲ။ ကျန်းမိသားစုနဲ့ တန်မိသားစုတွေက အခုထိ ပေါင်းနိုင်တုန်းပဲ။ ကျန်မိသားစုက ဝှက်ဖဲတွေ ရှိနေပုံပဲ" ဒုဂိုဏ်းခေါင်းဆောင်က ရယ်မော၍ ပြောလိုက်သည်။

"ကျန်းမိသားစုတွေက ကိုင်တွယ်ဖို့ နည်းနည်းတော့ ခက်ခဲလောက်တယ်။ တန်မိသားစုတွေရဲ့ ပိုင်ဆိုင်မှုကို စုပ်ယူခွင့်ပေးလိုက်ရင် သူတို့က ကျုပ်တို့ကို အမိန့်ပေးလာမှာ မဟုတ်လား။ ကျန်းမိသားစုက သူတို့ ဘိုးဘေးကို သတ်ပစ်လိုက်တော့ တန်မိသားစုထဲမှာ မကျေနပ်တဲ့လူတွေ ရှိနေမှာ သေချာတယ်။ ဒီလူတွေကို လာဘ်ထိုးလုပ်လိုက်။ ကျန်းမိသားစုတွေက တန်မိသားစုရဲ့ ပိုင်ဆိုင်မှုတွေကို စုပ်ယူချင်တာလား။ ဒါဆိုရက် ကျုပ်တို့အတွက် တစ်ဝက်လောက်တော့ ချန်ထားခဲ့ရမယ်။ အထူးသဖြင့် အဲ့ဒီ့ အဆင့်မြင့် လက်နက်တွေ။ ပြည်ထောင်စုရဲ့ အဆင့်မြင့် လက်နက်တွေက အဖိုးတန်တယ်။ တိုက်ခိုက်မှုအရ အဓိကမကျပေမယ့် အင်အားကြီး ဖြည့်စွက်မှုတွေ ဖြစ်နေသေးတယ်"

“နားလည်ပါပြီ” အကြီးအကဲက ပြောလိုက်သည်။

ကျန်းမိသားစု၊ တန်မိသားစုတို့နှင့် ၎င်းတို့၏ မဟာမိတ်ဖွဲ့မှုသည် ယခုမှ စတင်ခဲ့သော်လည်း ပန်းပွင့်လှုပ်ခတ်ခြင်းဂိုဏ်းမှ လူများသည် မိသားစုနှစ်ခုကို ဆန့်ကျင်ရန် ကြံစည်ရာတွင် တစ်စုံတစ်ရာ မှားယွင်းနေသည်ဟု မခံစားရပေ။ ဤမဟာမိတ်ဖွဲ့မှုသည် အစကတည်းက အချင်းချင်း အသုံးချကြသော နည်းလမ်းတစ်ခုသာဖြစ်သည်။ ပို၍ အားကောင်းသူသည် ဤမဟာမိတ်ကို ဦးဆောင်နိုင်မည်ဖြစ်သည်။

၎င်းတို့သည် လွန်ခဲ့သော တစ်စက္ကန့်က မဟာမိတ်များဖြစ်ခဲ့လျှင်ပင် နောက်တစ်စက္ကန့်တွင် ဆာလောင်နေသော ဝံပုလွေများဖြစ်လာနိုင်ကာ အားနည်းသူများကို ခုန်အုပ်သွားနိုင်သည်။

"ကျုပ်တို့ဂိုဏ်းရဲ့အင်အားကို လူတိုင်းသိအောင်ပြောရမယ့် အချိန်ရောက်ပြီ" ဒုဂိုဏ်းခေါင်းဆောင်က ပြောလိုက်သည်။

"ချူးယွန်ဖန်းကတော့ မဟာမိတ်ပွဲ အခမ်းအနားပြီးရင် သူ့ကိုသတ်ဖို့ ကျုပ် အခွင့်အရေးရှာလိုက်မယ်"

၎င်းတို့၏ စိတ်ထဲတွင် မဟာမိတ် အခမ်းအနားသည် အရေးကြီးဆုံးအရာဖြစ်၍ ချူးယွင်ဖန်းသည် အသေးအမွှားကိစ္စသာဖြစ်သည်။

အခန်း (၈၄၃) တစ်လအအကြာတွင် မဟာမိတ် အခမ်းအနား စတင်ခြင်း

ကျန်းမိသားစုနှင့် ပန်းပွင့်လှုပ်ခတ်ခြင်းဂိုဏ်းတို့သည် အတူပူးပေါင်းကာ သူ့ကို ဖြေရှင်းရန် ပြင်ဆင်နေကြကြောင်း ချူးယွင်ဖန်းက မသိခဲ့ပေ။ သို့သော် သူသိခဲ့လျှင်ပင် စိတ်ထဲထည့်ထားမည် မဟုတ်ပေ။ သူ၏ လက်ရှိ ကျင့်ကြံမှုနှင့် သူ၏ တိုက်ခိုက်ရေး အင်အားသည် ထိုလမ်းကြောင်းကို ကျော်ဖြတ်နေပြီဖြစ်သည်။ ထူးကဲသော စွမ်းအင်ဖြင့်ဆိုလျှင် မည်သို့သော အကြံအစည်များ ပရိယာယ်များကမှ အရေးပါမည် မဟုတ်ပေ။ ယခုမူ သူ၏မိဘများ လုံခြုံနေသရွေ့ ချူးယွင်ဖန်းက စိတ်မပူပေ။

ယခုအခါ ရေနေမျိုးနွယ်ရှိ တတိယ မိကျောင်းမင်းသား၏ ရန်ဆွမှုကြောင့် အင်တာနက်ပေါ်တွင် ရုတ်ရုတ်သဲသဲများ ဖြစ်နေပြီဟု ဆိုလိုနိုင်သည်။ မရေတွက်နိုင်သောလူများသည် ဤကိစ္စကို အာရုံစိုက်နေကြသောကြောင့် ဤကိစ္စသည် မဟာမိတ် အခမ်းအနားကိုပင် လွှမ်းမိုးသွားခဲ့သည်။

ချူးယွင်ဖန်း၏ ခွန်အားနှင့် ပတ်သက်သော ဗီဒီယိုသည် မရှင်းလင်းသော်လည်း ရေခဲတောင်၏ အစွန်အဖျားမျှသာဖြစ်ကြောင်း သိသာထင်ရှားသည်။ သူ၏ ခွန်အားက အမှန်တကယ်ကို ကြောက်မက်ဖွယ်ကောင်းလှရာ ပြည်ထောင်စုကိုပင် တုန်လှုပ်သွားစေသည်။ မွေးဖွားခြင်းနယ်မြေအဆင့်တွင် ဤမျှ အံ့ဩဖွယ်ကောင်းသည့် တိုက်ခိုက်ရေးစွမ်းအင်ရှိသူကို ရှေးခေတ်ကတည်းက ယခုအချိန်အထိ မည်သူတစ်ဦးတစ်ယောက်ကမျှ မကြားဖူးကြပေ။ သူသည် မွေးဖွားခြင်းနယ်မြေ အထွတ်အထိပ်အဆင့် ကျွမ်းကျင်သူများကိုပင် နှလုံးသွင်းမထားခဲ့ပေ။

အကယ်၍ သူသည် နတ်အဆင့်သို့ ရောက်ရှိသွားပါက၊ မည်မျှ အင်အားကြီးသွားမည်နည်း။ ထို့ကြောင့် လူအများက သူ့ကို ပြည်ထောင်စုရှိ မျိုးဆက်သစ် လူငယ်များ၏ နံပါတ်တစ် ကျွမ်းကျင်သူအဖြစ် သတ်မှတ်ခဲ့ကြသည်။ ချူးယွင်ဖန်းသည် ပြိုင်ဘက်ကင်းသူ ဖြစ်သည်။ ဝါရင့် မွေးဖွားခြင်းနယ်မြေ အထွတ်အထိပ်အဆင့်ကျွမ်းကျင်သူလျှင်ပင် အလွန် ကြောက်လန့်နေပေလိမ့်မည်။ ကျန်းဟီသည် ဝါရင့်မွေးဖွားခြင်းနယ်မြေ အထွတ်အထိပ်အဆင့် ကျွမ်းကျင်သူဖြစ်သည်။ သူသည် ကျန်းချင်မျှ မကျော်ကြားသော်လည်း အင်အားအရ သိပ်ဝေးကွာမည်မဟုတ်ပေ။

ပြီးနောက် ချူးယွင်ဖန်း သူ့ကို လက်သီးတစ်ချက်တည်းဖြင့် ထိုးသတ်ပစ်လိုက်သည်။ ချူးယွင်ဖန်းသည် မည်မျှ သန်မာခြင်းဖြစ်သနည်း။ ချူးယွင်ဖန်းသည် နတ်အဆင့်သို့ ရောက်ရှိလာသည့် အရိပ်အယောင်မျိုး မပြသခဲ့လျှင် သူသည် ထိုမျဉ်းကြောင်းကို ဖြတ်ကျော်ပြီးပြီဟုပင် ၎င်းတို့ဘက်မှ မှန်းဆနိုင်မည်ဖြစ်သည်။ သူသည် ထိုမျဉ်းကို မဖြတ်ကျော်ခဲ့လျှင်ပင် နှစ်အနည်းငယ်အတွင်း ဤအဆင့်ထိ တိုးတက်လာခဲ့သည်။ ထိုကဲ့သို့သော တိုက်ပွဲမှတ်တမ်းသည် အမှန်တကယ် ထိတ်လန့်ဖွယ်ကောင်းလှသည်။

ဗီဒီယိုသည် အလွန် မရှည်သည့်အပြင် အဝေးမှရိုက်ကူးထားသောကြောင့် အလွန် မှုန်ဝါးနေခဲ့သည်။ သို့သော်ငြားလည်း ၎င်းတို့ကို ကြောက်ရွံ့တုန်လှုပ်သွားစေဆဲဖြစ်သည်။ သူသည် ရှေးဟောင်း လူသားများ ကာလ၏ အမွေဖြစ်ဖွယ်ရှိသည့် အံ့ဩဖွယ်ရာ အမွေအနှစ်မျိုးကို ရရှိခဲ့ကြောင်း အင်တာနက်ပေါ်တွင် ကောလဟာလများ ထွက်ပေါ်နေသည်။ ထိုသို့မှ မဟုတ်လျှင် သူသည် အချိန်တိုတိုအတွင်း ဤမျှ မြန်မြန်ဆန်ဆန် တိုးတက်လာရန် မဖြစ်နိုင်ပေ။ ဤအချက်သည် ညံ့ဖျင်းသော ဘဝများကို ဖြတ်သန်းခဲ့ရသကဲ့သို့ ၎င်းတို့ကို ခံစားရစေသည်။

ဤအရာက လူများစွာ၏ ချူးယွင်ဖန်းအပေါ် ထားရှိသော ယုံကြည်မှုများ တိုးမြင့်လာစေသည်။ တတိယ မိကျောင်းမင်းသားက မည်မျှ သန်မာနေပါစေ၊ ဗီဒီယိုထဲရှိ နတ်ဘုရားနှင့် ဆင်တူသော ချူးယွင်ဖန်းနှင် နှိုင်းယှဉ်ရန် မဖြစ်နိုင်ပေ။ သို့သော် ပြည်ထောင်စုသည် အမှန်တကယ်ပင် ဩဇာကြီးမားသည်။ တတိယ မိကျောင်းမင်းသား၏ မူလဇစ်မြစ်နှင့်ပတ်သက်သော အကြောင်းများကို တစ်စတစ်စ တူးဖော်ခဲ့ကြသည်။

တတိယ မိကျောင်းမင်းသားသည် ကြမ်းကြုတ်သော နဂါး၏ သွေးရောင် မိချောင်းဟုခေါ်သည့် ပင်လယ်နက်ထဲတွင် အလွန် အစွမ်းထက်သော မျိုးနွယ်စုမှ ဆင်းသက်လာသူဖြစ်သည်။ ဤမျိုးနွယ်စုသည် ရှေးနတ်နဂါး၏ သွေးနှောဖြစ်သည်ဟု ဆိုကြသည်။ ၎င်းတို့သည် ပင်လယ်နက်ထဲတွင် အမြဲတမ်း ကြောက်မက်ဖွယ်ကောင်းသော ဖြစ်တည်မှုဖြစ်သည်။ ၎င်းတို့သည် အခြားသော ရေနေမျိုးနွယ်စုများစွာနှင့် တိုက်ပွဲဝင်ခဲ့၍ အားနည်းချက် မရှိခဲ့ပေ။

တတိယ မိကျောင်းမင်းသားသည် အဏ္ဏဝါမျိုးနွယ်၏ စစ်မြေပြင်တွင် လေ့ကျင့်သင်ကြားခဲ့သူဖြစ်သည်။ သူသည် အလွန် ငယ်ရွယ်စဉ်ကတည်းက စစ်မြေပြင်သို့ ရောက်ရှိခဲ့၍ ကျင့်ကြံမှုများကို သတ်ဖြတ်ခြင်းရာမှ ရရှိခဲ့သည်။ မူလက ၎င်းအကြောင်းကို မည်သူမျှ မသိခဲ့သော်လည်း ယခုအခါ မွေးဖွားခြင်းနယ်မြေ အထွတ်အထိပ်အဆင့်တွင် ရှိနေသော ပြိုင်ဘက်ကို လွန်ခဲ့သည့် ဆယ်နှစ်ကျော်က သတ်ခဲ့ကြောင်း virtual ကွန်ရက်မှ ရှာဖွေ့တွေ့ရှိခဲ့သည်။ ထိုအပြင် သူသည် ထိုပြိုင်ဘက်ကို အလွယ်တကူ သတ်ပစ်ခဲ့သည့်အပြင် ဗီဒီယိုအတိုတစ်ခုကိုလည်း ရိုက်ကူးခဲ့သည်။

ပြိုင်ဘက်သည် နိုင်ငံရပ်ခြားဂိုဏ်းတစ်ခု၏ ဂိုဏ်းခေါင်းဆောင်ဖြစ်သည်။ သူသည် ကြီးမားသော လှိုင်းလုံးများပေါ်တွင် တတိယ မိကျောင်းမင်းသားကို တိုက်ခိုက်ခဲ့သည်။ နိုင်ငံရပ်ခြား ဂိုဏ်းခေါင်းဆောင်သည် သန်မာသူဖြစ်သည်မှာ သိသာထင်ရှားသည်။ သူသည် မွေးဖွားခြင်းနယ်မြေ အထွတ်အထိပ်အဆင့်တွင်ရှိနေကာ အဆုံးမဲ့ပင်လယ်ကို ဖြတ်ကျော်နေခဲ့သည်။ ထိုလူသည် မည်သိုမျှ အားနည်းသူဖြစ်သနည်း။ သို့သော် ဗီဒီယိုထဲတွင် တတိယ မိချောင်းမင်းသားသည် ထိုလူကို နှစ်ပိုင်းဖြတ်တောက်လိုက်သည်။

နက်ရှိုင်းသော ပင်လယ်ထဲမှ ပေဒါဇင်များစွာ ရှည်လျားသည့် ကြောက်မက်ဖွယ် နဂါးပုံသဏ္ဌာန်တစ်ခု ပေါ်ပေါက်လာသည်။ ၎င်းသည် နဂါးအသွင်ပြောင်းလဲကာ အချိန်မရွေး ထွက်သွားနိုင်ပုံရ၍ အလွန် ရက်စက်ကြမ်းကြုတ်ဖွယ်ရှိသည်။ နိုင်ငံရပ်ခြားဂိုဏ်းကသာ ပြည်ထောင်စုတပ်မတော်ကို အချိန်မီ အကူအညီတောင်းကာ တတိယ မိကျောင်းမင်းသားကို နှင်မထုတ်နိုင်ခဲ့လျှင် ထိုအချိန်တွင် ၎င်းတို့အားလုံး ဒုက္ခရောက်သွားပေလိမ့်မည်။

ဤဗီဒီယိုကို ကြည့်ပြီးနောက် ချူးယွင်ဖန်းအပေါ် အကောင်းမြင်နေသော လူသားအားလုံး အသက်ပြင်းပြင်း ရှူရှိုက်ရုံမှလွဲ၍ မတတ်နိုင်ခဲ့ပေ။ တတိယ မိကျောင်းမင်းသား၏ လွန်စွာ ကြမ်းတမ်းသော အပြုအမူများသည် အံ့ဩဖွယ် မဟုတ်ပေ။ သူ၏ ခွန်အားသည် မွေးဖွားခြင်းနယ်မြေ အထွတ်အထိပ်အဆင့်ကို ချေမှုန်းရန် လုံလောက်နေသည်။ လူသား သိုင်းပညာ ကျွမ်းကျင်သူများနှင့် နှိုင်းယှဉ်ပါက ဤမွန်းစတားများသည် ကြီးမားသော အားသာချက်မျိုးရှိနေသည်။ ၎င်းတို့၏ ကိုယ်ခန္ဓာ အားသာချက်က မဖြတ်ကူးနိုင်သော တောင်တစ်စင်းကဲ့သို့ ဖြစ်နေသည်။

ဤဗီဒီယိုကို ဖြန့်ဝေပြီးနောက် ချူးယွင်ဖန်းကို သိထားသော လူအများအပြားက စာတိုများ ချန်ရစ်ခဲ့ကြသည်။ ၎င်းတို့သည် မည်သည့်စကားကိုမျှ တိုက်ရိုက် မပြောကြသော်လည်း ချူးယွင်ဖန်းသည် တတိယ မိကျောင်းမင်းသားနှင့် ထိပ်တိုက် မရင်ဆိုင်ရန် တိတ်တဆိတ် မျှော်လင့်နေကြသည်။ ထိုသို့ဖြစ်ခဲ့လျှင် သေခြင်းတရားကို ရှာဖွေနေခြင်း ဖြစ်ပေလိမ့်မည်။ တစ်ဖက်လူသည် အလွန် ရက်စက်ကြမ်းကြုတ်လှသည်။

ချူးယွင်ဖန်း၏ လက်ရှိ အရည်အချင်းကို သုံးသပ်ကြည့်လျှင် သူသည် မကြာမီတွင် သက်ရှိသတ္တဝါအားလုံးကို ကျော်လွန်၍ နတ်အဆင့်သို့ ဝင်ရောက်နိုင်ခြေ အလွန်မြင့်မားသည်။ ထို့ကြောင့် ဤကိစ္စနှင့်ပတ်သက်၍ စိတ်ဆိုးနေရန် မလိုအပ်ပေ။ ချူးယွင်ဖန်းသည် ဤအချိန်တွင် အသက်ဆုံးရှုံးသွားခဲ့လျှင် ထိုက်တန်မည် မဟုတ်ပေ။ သူသည် ဆယ်နှစ်ကြာမျှ ကြိုးကြိုးစားစား လေ့ကျင့်မည်ဆိုလျှင် တတိယ မိကျောင်းမင်းသားကို ကျော်လွန်နိုင်မည်ဖြစ်သည်။

အမှန်တကယ်ပင် ဂေါင်ဟုန်ချီကဲ့သို့ တတိယ မိကျောင်းမင်းသားကို အသေရိုက်သတ်ရန် ပြောလာသည့် အားကိုးအားထားပြုရန် မသင့်သော စာတိုမျိုးလည်းရှိနေသည်။ ဤမှတ်ချက်များက ထောက်ခံသည်ဖြစ်စေ ဆန့်ကျင်သည်ဖြစ်စေ အားလုံးက မိမိအတွက် စိတ်ပူနေကြခြင်းဖြစ်ကြောင်း ချူးယွင်ဖန်း သိနေသည်။ သို့သော် သူသည် ဗီဒီယိုကို ကြည့်ပြီးနောက် အာရုံထဲပင် မထည့်ခဲ့ပေ။

ဗီဒီယိုထဲရှိ တတိယ မိချောင်းမင်းသားသည် ကြောက်မက်ဖွယ် ခွန်အားကို ပြသခဲ့သော်လည်း နောက်ဆုံးရလဒ်သည် ကျန်းဟီကို လက်သီးတစ်ချက်ဖြင့် ထိုးသတ်လိုက်ခြင်းနှင့် ထူးမခြားနားပေ။

မှန်ကန်စွာပြောရမည်ဆိုလျှင် ခြားနားချက်သည် ကောင်းကင်နှင့် မြေကြီးကဲ့သို့ ဖြစ်နေသည်။ တတိယ မိကျောင်းမင်းသားသည် နိုင်ငံရပ်ခြားဂိုဏ်းခေါင်းဆောင်နှင့် တိုက်ခိုက်ရန် အတတ်နိုင်ဆုံး ကြိုးစားခဲ့ခြင်းဖြစ်၍ သူ့အတွက်မူ ထိုအချိန်တွင် ခွန်အားအနည်းငယ် ကျန်ရစ်နေသေးသည်။ ဆယ်စုနှစ် တစ်ခုကျော်မျှ ကြာသွားသော်လည်း သက်တမ်းရှည်သော သတ္တဝါများအတွက်မူ ဆယ်စုနှစ်တစ်ခုကျော်သည် အချိန်ကာလတစ်ခု မဟုတ်ပေ။ တတိယ မိကျောင်းမင်းသားသည် နတ်အဆင့်ဟူသော မျဉ်းကြောင်းကို မဖြတ်ကျော်ခဲ့ပေ။

သို့သော် တတိယ မိကျောင်းမင်းသားက ၎င်းကို ဖြတ်ကျော်နိုင်ခဲ့လျှင်ပင် ချူးယွင်ဖန်းက ကြောက်ရွံ့မည် မဟုတ်ပေ။ သူကျင့်ကြံခဲ့သော ဧကရာဇ်ခန္ဓာကိုယ်သည် သာမန်မဟုတ်ပေ။ ရှေးဟောင်း လူသားများကာလအတွင်း ဧကရာဇ်ခန္ဓာကိုယ် ပိုင်ဆိုင်ထားသူများသည် မရေတွက်နိုင်သော နတ်ဆိုးကျွမ်းကျင်သူများကို သတ်ပစ်ခဲ့ကြသည်။ Thunderclap Physique နှင့် ပေါင်းစပ်ပြီးနောက် ဧကရာဇ်ခန္ဓာကိုယ်၏ စွမ်းအင်သည် ယခုအခါ ပို၍ပင် အင်အားကြီးမားလာသည်။

မဟာမိတ် အခမ်းအနား မစတင်မီ တစ်လသည် ချူးယွင်ဖန်း အနားယူရန်အတွက် ရှားရှားပါးပါး အချိန်ဖြစ်သည်။ ယခု သူသည် မွေးဖွားခြင်းနယ်မြေ သတ္တမအဆင့်၏ အထွတ်အထိပ်သို့ ရောက်ရှိနေသောကြောင့် သူ၏ ကျင့်ကြံမှုကို ခိုင်မြဲအောင် ပြုလုပ်သရွေ့ နောက်ထပ် အဆင့်ဖြတ်ကျော်မှုတစ်ခုကို ရရှိရန် အချိန်ကြာတော့မည် မဟုတ်ပေ။ ထိုအချိန်တွင် သူ၏ တိုက်ခိုက်မှုစွမ်းရည်သည် ပိုမို တိုးတက် ကောင်းမွန်လာမည်ဖြစ်သည်။

သူသည် ဤလအတွင်း အပန်းဖြေရန် ရှားရှားပါးပါး အခွင့်အရေး ရခဲ့သည်။ ချူးယွင်ဖန်းသည် လွန်ခဲ့သည့် နှစ်အနည်းငယ်အတွင်း သူ မပြုလုပ်ခဲ့သည့် အိမ်စာအားလုံးအတွက် ပြင်ဆင်နေခဲ့သည်။ သူ၏ အံ့ဩစရာကောင်းသော မှတ်ဉာဏ်နှင့် နားလည်မှုများကြောင့် ဤအရာများက ပြဿနာမဟုတ်ပေ။ ပြီးနောက် စာမေးပွဲများကို အင်တာနက်မှ ဖြေဆိုလိုက်သည်။ ကံကောင်းထောက်မစွာဖြင့် သူသည် ပြည်ထောင်စု တက္ကသိုလ်၏ အွန်လိုင်း ပေါ်တွင်စာမေးပွဲဖြေဆိုနိုင်သည်။

သူသည် နှစ်ကုန်စာမေးပွဲမှလွဲလျှင် တစ်လအတွင်း အခြားသော အကဲဖြတ်မှုများကို ပြီးမြောက်ခဲ့သည်။ သူ၏ အမှတ်စာရင်းများ ပြည့်နေပြီးဖြစ်သောကြောင့် အချိန်မရွေး ဘွဲ့ရနိုင်ပြီဖြစ်သည်။ သူ၏လက်ရှိ ကျင့်ကြံမှုဖြင့် ပြည်ထောင်စုတက္ကသိုလ်၏ ဘွဲ့လက်မှတ်ကို မလိုအပ်သော်လည်း သူ၏ မိဘများ အလိုရှိနေဆဲ ဖြစ်သည်။ ထို့အပြင် ချူးယွင်ဖန်းသည် ညီမဖြစ်သူကို လေ့ကျင့်ပေးခြင်းဖြင့် အချိန်အများစုကို ကုန်ဆုံးလိုက်သည်။ ချူးယွင်ဖန်း၏ လက်ရှိအင်အားသည် ပြည်ထောင်စုတက္ကသိုလ်ရှိ ဆရာများထက် သာလွန်ကောင်းမွန်နေ၍ သူ၏ အာရုံသည်လည်း ဆေးဧကရာဇ်၏ မှတ်ဉာဏ်များကြောင့် အကြောင်းကိစ္စများကို ပိုမိုမြင့်မားသော ကဏ္ဍမှ ကြည့်ရှုနိုင်ခဲ့သည်။

သူ၏ညီမ ချူးချင်ရွှမ်သည် မရီးဒျန်သန့်စင်ခြင်း စတုတ္ထအဆင့်သို့ တက်လှမ်းခဲ့ကာ သူမနှင့် ရွယ်တူများကြားတွင် ထူးချွန်သူအဖြစ် သတ်မှတ်ခံထားရသည်။ သူမသည် ချူးမိသားစုတစ်ခုလုံးတွင် အထူးချွန်ဆုံးဖြစ်သည်။ ဤအံ့ဩဖွယ် စွမ်းရည်သည် ချူးမိသားစုတစ်ခုလုံး၏ အာရုံကို ဆွဲဆောင်စေသည့်အပြင် ၎င်းတို့သည် သူမကို မျိုးဆက်သစ်များ၏ ခေါင်းဆောင်အဖြစ် လေ့ကျင့် သင်ကြားပေးလာကြသည်။ ၎င်းတို့ ကျင့်ကြံမှု အရင်းအမြစ်များ မချို့တဲ့သူများဖြစ်သောကြောင့် သူမသည် ကောလိပ်ဝင်ခွင့် စာမေးပွဲများကို ထိပ်တန်းအဆင့်ဖြင့် ဝင်ရောက်ရန် အခွင့်အရေးများစွာ ရှိနေသည်။

ချူးယွင်ဖန်း၏ စေ့စေ့စပ်စပ် လမ်းညွှန်မှုဖြင့် တစ်လအကြာတွင် ချူးချင်ရွှမ်သည် မရီးဒျန်သန့်စင်ခြင်း ဆဋ္ဌမအဆင့်သို့ ကျော်ဖြတ်သွားကာ သတ္တမအဆင့်နှင့် မဝေးကွာတော့ပေ။အကျိုးအမြတ်၏ တစ်စိတ်တစ်ပိုင်းသည် ဆေးလုံးအချို့ ထုတ်လုပ်ပေးခဲ့သည့် ချူးယွင်ဖန်းကြောင့် ဖြစ်သည်။ သူ၏ လမ်းညွှန်မှုဖြင့်ဆိုလျှင် ချူးချင်ရွှမ်သည် မချေဖျက်နိုင်ခြင်းနှင့် ကြွင်းကျန်သော အကျိုးဆက်များ ခံစားရမည်ကို ကြောက်ရွံ့ရန် မလိုအပ်ဘဲ ၎င်းတို့အားလုံးကို သူမ၏ ခွန်အားအဖြစ် ပြောင်းလဲနိုင်မည်ဖြစ်သည်။

ချူးမိသားစုအတွက်မူ ချူးယွင်ဖန်းသည် ချူးဟောက်ယွဲ့ကို နတ်အဆင့်ထဲသို့ ရောက်ရှိအောင် ကူညီပေးနိုင်မည်ဟု ပြောခဲ့သောကြောင့် ထိုအကြောင်းအရာကို လူအများအပြားက မသိကြသော်လည်း ၎င်းတို့အားလုံး အလွန် စိတ်လှုပ်ရှားနေကြသည်။ ၎င်းတို့အတွက် မျှော်လင့်ချက်အသစ်တစ်ခုရှိနေသောကြောင့် ချူးယွင်ဖန်းက ဆေးဖော်စပ်ချင်သောအခါ သူ လိုအပ်သည့် ဆေးဖက်ဝင်ပစ္စည်းများကို အမြန်ပို့ဆောင်နေကြသည်။

ထိုအချိန်က ချူးယွင်ဖန်းသည် ထိုသို့ ကောင်းမွန်သော ဆက်ဆံမှုကို မရရှိခဲ့ပေ။ တစ်ချိန်တည်းမှာပင် သူ၏ ခွန်အားသည် ချူးချင်ရွှမ်ထက် အဆမတန် အားနည်းသော်လည်း ၎င်းသည် ချူးယွင်ဖန်း၏ ကြိုးစားအားထုတ်မှု အဓိပ္ပါယ်သာ မဟုတ်လေသလော။ ဤသည်မှာ သူ့မိသားစု၏ ဘဝများကို ပိုမို သက်သောင့်သက်သာဖြစ်သွားစေနိုင်သည်။ ချူးယွင်ဖန်း၏ ခန့်မှန်းချက်အရ အမှားအယွင်းမရှိသရွေ့ ချူးချင်ရွှမ်သည် ကောလိပ်ဝင်ခွင့်စာမေးပွဲများတွင် အမှတ်အများဆုံးဖြစ်မည်မှာ သေချာသည်။ မှန်ကန်စွာပြောရမည်ဆိုလျှင် ချူးချင်ရွှမ်ကသာ မွန်းစတားအစစ်အမှန်ဖြစ်သည်။

ချူးချင်ရွှမ်သည် ချူးယွင်ဖန်းနှင့် ချူးမိသားစုတို့၏ ပံ့ပိုးမှုဖြင့် ချူးယွင်ဖန်းကဲ့သို့သော မွန်းသတားမျိုးကို မမှီနိုင်သော်လည်း ထိုအချိန်က ချူးဟောက်ယွဲ့ကို ကျော်ဖြတ်ရန် ပြဿနာမရှိပေ။

ထို့အပြင် ချူးယွင်ဖန်းသည် သူ့မိဘများအတွက် ဆေးလုံးများ ပြုလုပ်ပေးခဲ့သည်။ ချူးဝမ်ချန်းနှင့် ယန်ယာ့ယွင်တို့ နှစ်ဦးစလုံးသည် မရီးဒျန်သန့်စင်ခြင်း အထွတ်အထိပ်အဆင့်တွင် တစ်နှစ်ကျော်ကြာ ပိတ်မိနေကြ၍ ၎င်းတို့၏ စုဆောင်းမှုသည်လည်း အလွန်နက်နဲလှသည်။

ချူးယွင်ဖန်း၏အကူအညီဖြင့် မွေးဖွားခြင်းနယ်မြေအဆင့် ဆေးလုံးကို သောက်သုံးပြီးနောက်၎င်းတို့၏ ရန်နှင့် တုမရီးဒျန်ကို ဖွင့်၍ ကောင်းကင်နှင့် မြေကြီးကို တံတားကို ဖွင့်လှစ်ကာ မွေးဖွားခြင်းနယ်မြေအဆင့်သို့ ဝင်ရောက်ခဲ့ကြသည်။ ချူးယွင်ဖန်းသည် သူ့မိဘများ၏ မရီးဒျန်များကို သန့်စင်ခြင်း၊ ၎င်းတို့၏ ကိုယ်လုံးကိုယ်ထည်ကို ပြောင်းလဲခြင်းနှင့် ၎င်းတို့၏ အရည်အချင်းများကို တိုးတက်စေရန်အတွက် ရှေးဟောင်းလူသားများကာလ၏ မရီးဒျန်သန့်စင်ခြင်း နည်းလမ်းကိုပင် အသုံးပြုခဲ့သည်။ ယင်းသည် ၎င်းတို့၏ ကျင့်ကြံမှုကို အချိန်တိုအတွင်း ခုန်ပျံကျော်လွှား၍ တိုးတက်လာစေရန် အာမခံနိုင်သည်။

ထိုသို့ပြုလုပ်ရာတွင် ကုန်ကျစရိတ်သည်လည်း အလွန် များပြားလှသည်။ ချူးယွင်ဖန်း၏ လက်ရှိ ကျင့်ကြံမှုဖြင့်ပင် သုံးရက်မျှ အနားယူခဲ့ရသည်။ သို့သော် ချူးယွင်ဖန်းသည် ဤအရာအားလုံးသည် ထိုက်တန်သည်ဟု ခံစားမိသည်၊ အထူးသဖြင့် သူ့မိဘများက အလွန် အသက်အရွယ် မကြီးရင့်သေးသောကြောင့်ဖြစ်သည်။ သာမာန်ခေတ်တွင်ဆိုလျှင် အသက်ငါးဆယ်ကျော်သူများသည် အငြိမ်းစားယူရန် ပြင်ဆင်နိုင်နေပြီဖြစ်သည်။ သို့သော်လည်း ၎င်းတို့သည် ဤခေတ်တွင် လူလတ်ပိုင်းအရွယ်သာရှိသေးသည်။ ထို့အပြင် ၎င်းတို့သည် မွေးဖွားခြင်းနယ်မြေအဆင့်သို့ ဝင်ရောက်လာကာ ၎င်းတို့၏ သက်တမ်းများကို တိုးမြှင့်ထားသောကြောင့် ယခုထက် တိုးတက်လာစေရန် အချိန်အလုံအလောက်ရှိမည်ဖြစ်သည်။ ၎င်းတို့၏ အနာဂတ် အလားအလာသည် အကန့်အသတ် မရှိလှပေ။

သူ့မိဘများသည် သူတစ်ပါးကို အမြဲကာကွယ်ရမည့်အစား မိမိကိုယ်ကို ကာကွယ်နိုင်ရန် မျှော်လင့်ထားသောကြောင့် ၎င်းတို့၏ ကျင့်ကြံမှုတွင် အထူးတလည် အလေးအနက်ထားနေကြသည်။ ချူးယွင်ဖန်း သင်ကြားပေးခဲ့သော ရှေးဟောင်း လူသားများကာလ၏ ထိပ်တန်း ကျင့်ကြံမှု နည်းစနစ်များနှင့်အတူ ၎င်းတို့၏ အနာဂတ် အလားအလာများသည် အကန့်အသတ်မဲ့လာခဲ့သည်။

မှန်ကန်စွာပြောရမည်ဆိုလျှင် အနာဂတ်တွင် အခွင့်အရေး မရှိခဲ့လျှင်ပင် ချူးယွင်ဖန်းသည် ၎င်းတို့နှစ်ဦးကို နတ်အဆင့်သို့ တက်လှမ်းနိုင်ရန် နည်းလမ်းရှာဖွေမည်ဖြစ်သည်။ စိတ်အပန်းပြေကာ ပြည့်စုံသောလသည် မျက်စိတစ်မှိတ်အတွင်းမှာပင် ဖြတ်သန်းသွားခဲ့သည်။ အင်အားစုသုံးခု၏ မဟာမိတ် အခမ်းအနားကို နောက်ဆုံးတွင် စတင်ခဲ့သည်။ အဖြစ်အပျက်များ နီးကပ်လာသည်နှင့်အမျှ အင်တာနက်ရှိ အရှိန်အဟုန်များသည် ပိုပို၍ ထိတ်လန့်ဖွယ်ကောင်းလာသည်။ တစ်လကျော်ကြာ အဝေးရောက်နေသည့် တန်စီယုသည်လည်း နောက်ဆုံးတွင် ချူးယွင်ဖန်းနှင့် အဆက်အသွယ် ပြုလုပ်လာသည်။

"ယွင်ဖန်း၊ ဟိုအကြီးအကဲတွေကို ချုပ်နှောင်ထားတဲ့နေရာကို ကျွန်မ ရှာတွေ့ပြီ။ ကျွန်မတို့ အချိန်မရွေး လှုပ်ရှားလို့ရတယ်"