အခန်း (၈၇၄-၈၇၆)

အခန်း (၈၇၄) သူ မလာဘူးဆိုရင် ကျုပ်က သူရဲ့တစ်မိသားစုလုံးကို အမြစ်ပြတ်သုတ်သင်ပစ်မယ်

ချူးယွင်ဖန်းသည် အထူးစစ်ဆင်ရေးဌာန၏ ဩဇာအာဏာကို ထူထောင်ထားခဲ့သောကြောင့် ၎င်းတို့၏ ရက်စက်ကြမ်းကြုတ်သော ခေါင်းဆောင်ကို မည်သူမျှ မထီမဲ့မြင်ပြုဝံ့ကြသကဲ့သို့ ၎င်းတို့ကိုလည်း မည်သူမျှ အထင်မသေးဝံ့ကြပေ။ ချူးယွင်ဖန်းသည် သူ၏လက်ထဲသို့ ရောက်ရှိလာသူအားလုံးကို ခံစားချက်မဲ့စွာ သုတ်သင်ရှင်းလင်းခဲ့သည်။

ဂိုဏ်းတစ်ခုကို တည်ထောင်ရန် ဆယ်စုနှစ်များ သို့မဟုတ် ရာစုနှစ်များပင် အချိန်ယူခဲ့ရသော်လည်း ချူးယွင်ဖန်းသည် ၎င်းကို အလွယ်တကူ ဖျက်ဆီးပစ်ခဲ့သည်။ သူသည် တိုတောင်းသော ညတစ်ညအတွင်း ပြုလုပ်ခြင်းဖြစ်သည်။ ဤကိစ္စများကို ဖြေရှင်းပြီးနောက် ချူးယွင်ဖန်းသည် နောက်ဆုံးတွင် သီးသန့်ကျင့်ကြံမှုကို စတင်ရန် အချိန်ရခဲ့သည်။ သူ့အတွက်၊ သူ့ခွန်အားထက် ပိုအရေးကြီးတာ ဘာမှမရှိပါဘူး။

သူသည် မွေးဖွားခြင်းနယ်မြေ အထွတ်အထိပ်အဆင့်သို့ ဝင်ရောက်လုနီးပါးဖြစ်နေသည်။ သူ နောက်ထပ်ပြုလုပ်ရန် လိုအပ်သောအရာသည် သူ့ခန္ဓာကိုယ်အတွင်းရှိ အလားအလာအားလုံးကို ဖွင့်လှစ်၍ ထိုအဆင့်ကို တက်လှမ်းရန်ဖြစ်သည်။ သို့သော်လည်း သူ လုံးလုံးလျားလျား အနားမယူနိုင်မီတွင် တန်မိသားစုက နတ်အဆင့် မွန်းစတား အတွင်းအူတိုင်နှင့် ၎င်းတို့ ပြင်ဆင်ထားသော ဆေးဖက်ဝင်အပင် အများအပြားကို ပေးပို့လာခဲ့သည်။ ချူးယွင်ဖန်းကို ၎င်းတို့ထံသို့ နတ်စွမ်းအင်ဖြည့်တင်းဆေးကို ကူညီ၍ ဖော်စပ်ပေးစေလိုခဲ့သည်။

အတွင်းအူတိုင်တွင် သွေးများ စွန်းထင်းနေ၍ ပြင်းထန်သော စွမ်းအားဖြင့် ထုတ်လွှင့်နေသည်။ တန်မိသားစုသည် ဤမွန်းစတားကို သတ်ဖြတ်ရန်အတွက် ၎င်းတို့၏ မျိုးနွယ်စုတစ်ခုလုံး၏ ခွန်အားကို စုဆောင်းခဲ့ကြောင်း သိသာထင်ရှားသည်။ ချူးမိသားစု ကြုံတွေ့ခဲ့ရသည့် ယခင်အခြေအနေများကို သုံးသပ်ကြည့်လျှင် တန်မိသားစု ကြုံတွေ့ခဲ့ရသော ဆုံးရှုံးမှုများသည် သေးငယ်မည် မဟုတ်ပေ။

တန်စီယုသည် ပါဝင်ပစ္စည်းများကို ပေးပို့ရန်အတွက် လိုက်ပါလာခြင်းမရှိပေ။ သူမသည် ထိုစစ်ဆင်ရေး၏ ခေါင်းဆောင်ဖြစ်ကြောင်း တန်မိသားစုက သတင်းပို့ခဲ့သည်။ သူမသည် တောနက်အတွင်းသို့ ဝင်ရောက်လာကာ နည်းပညာမြင့်လက်နက်များစွာကို အသုံးပြု၍ အန္တရာယ်များစွာနှင့် ရင်ဆိုင်ပြီးနောက် အောင်မြင်ခဲ့ခြင်းဖြစ်သည်။

တန်မိသားစုသည် ၎င်းတို့၏ လက်ရှိအင်အားဖြင့် နတ်အဆင့် ကျွမ်းကျင်သူကို ထိခိုက်အောင် မပြုလုပ်နိုင်သော်လည်း မိသားစုတစ်ခုလုံးသည် အတွင်းအူကိုရရှိရန် မည်သည့်ပေးဆပ်မှုကိုမဆို ပေးဆောင်ရန် ဆန္ဒရှိနေကြသည်။ ဤတစ်ကြိမ်တွင် ချူးယွင်ဖန်းသည် တန်စီယုအတွက် ဖော်စပ်ရသည့် ဆေးဖြစ်သောကြောင့် အလွန် လေးနက်နေခဲ့သည်။ သူသည် ကိုယ့်ကိုယ်ကို အကြွင်းမဲ့ ယုံကြည်မှုရှိသော်လည်း သတိထားရမည်ဖြစ်သည်။ သူသည် တစ်လလုံးလုံး အခန်းထဲက မထွက်လာခဲ့ပေ။ သူသည် နတ်စွမ်းအင်ဖြည့်တင်းဆေး ဖော်စပ်ပြီးသည့် တစ်လအကြာ၌ သီးသန့်ကျင့်ကြံမှုမှ ထွက်လာခဲ့သည်။

ချူးယွင်ဖန်းသည် နတ်စွမ်းအင်ဖြည့်တင်းဆေးကို တန်မိသားစု ကိုယ်စားလှယ်ထံသို့ လွှဲပေးပြီးနောက် ဟော့ရို့နန်က တင်းမာသော အမူအရာဖြင့် ချဉ်းကပ်လာခြင်းကို မြင်တွေ့လိုက်ရသည်။

"နောက်ဆုံးတော့ သီးသန့်ကျင့်ကြံမှုက ထွက်လာလို့တော်သေးတာပေါ့ ခေါင်းဆောင်ချူး"

ချူးယွင်ဖန်းက ဟော့ရို့နန်ကို လှည့်ကြည့်၍ မေးလိုက်သည်။

"ဘာဖြစ်လို့လဲ"

သူသည် ခန္ဒာကိုယ်အတွင်းရှိ အရှိန်အဟုန် ပြင်းထန်သော စွမ်းအင်များကို ခံစားနေရဆဲဖြစ်သည်။ သူ့တွင် အချိန်ပိုရလျှင် နောက်တစ်ကြိမ် ဆင့်ဖြတ်ကျော်နိုင်ပေလိမ့်မည်။ သူသည် အချိန်ပိုရရှိရန် ရုန်းကန်နေသော်လည်း အလျင်လိုခြင်းမရှိပေ။ မွေးဖွားခြင်းနယ်မြေအဆင့်၏ ရည်ရွယ်ချက်သည် သူ့အတွက် ခိုင်မာသည့် အုတ်မြစ်မျိုး ချမှတ်ရန်သာဖြစ်သည်။ အလွန် အလောကြီး၍ ချို့ယွင်းချက်တစ်ခုခုကို ဖန်တီးမိခဲ့လျှင် နောင်တွင် ၎င်းအတွက် ကြီးလေးသော အဖိုးအခကို ပေးဆောင်ရပေလိမ့်မည်။

"ပြီးခဲ့တဲ့လအတွင်း အထူးစစ်ဆင်ရေးဌာနရဲ့ လက်အောက်က ကြေးစားအဖွဲ့တွေနဲ့ လူထုခေါင်းဆောင်အဖွဲ့တွေအကုန်လုံး အကြိမ်ရာနဲ့ချီပြီး တိုက်ခိုက်ခြင်းခံခဲ့ရပါတယ်။ ထောင်နဲ့ချီတဲ့ သေဆုံးမှုနဲ့ ဒဏ်ရာရရှိမှု လူဦးရေက ထောင်နဲ့ချီနေပြီး ရှားပါးပစ္စည်းများ ဆယ်ဘီလီယံကျော် ခိုးယူခံခဲ့ရပါတယ်။ ဒီအတိုင်းဆက်သွားရင် ကျွန်မတို့ ဆုံးရှုံးမှုတွေ ကြီးမားလာလိမ့်မယ်" ဟော့ရို့နန်က ပြောလိုက်သည်။

အထူးစစ်ဆင်ရေးဌာန၏ ကွပ်ကဲမှုအောက်တွင် ရှေ့ဆောင်အဖွဲ့များနှင့် လူထုခေါင်းဆောင် အဖွဲ့အစည်းများစွာရှိနေကြောင်း ချူးယွင်ဖန်း သတိရသွားသည်။ ဥပဒေစိုးမိုးရေးဌာနခွဲတစ်ခုအနေဖြင့် ၎င်းတို့ကို လေ့ကျင့်ပေးရန်အတွက် နှစ်စဉ်နှစ်တိုင်း ငွေကြေးများစွာ အကုန်ကျခံခဲ့ရသည်။ ၎င်းသည် လုံလောက်သော အရင်းအမြစ်များမရှိဘဲ လုပ်ဆောင်နိုင်သည့် စွမ်းဆောင်မှုတစ်ခု မဟုတ်ပေ။ အထူးစစ်ဆင်ရေးဌာနသည် ကုမ္ပဏီများစွာ၌ အစုရှယ်ယာများရှိနေ၍ မရေတွက်နိုင်သော ရှေ့ဆောင်အဖွဲ့များနှင့် ကြေးစားအဖွဲ့အစည်းများကိုပင် ထိန်းချုပ်ထားခဲ့သည်။ ဤအဖွဲ့များသည် အထူးစစ်ဆင်ရေးဌာနအတွက် မရှိမဖြစ် ၀င်ငွေအရင်းအမြစ်တစ်ခုဖြစ်သည်။

"ဒါကို ဘယ်သူလုပ်တာလဲဆိုတာ ခင်ဗျား သိရပြီလား။ ဒင်းတို့ ကျားသစ် နှလုံးသားနဲ့ အသည်းတွေကို စားခဲ့လို့ ကျုပ်ကို ဒီလိုကျောရဲလား" ချူးယွင်ဖန်းက အော်ဟစ်လိုက်သည်။

သူသည် မျိုးနွယ်စုများနှင့် ဂိုဏ်းခွဲများကို သုတ်သင်ရှင်းလင်းခဲ့သော်လည်း တစ်စုံတစ်ဦးသည် သူ့ကို ပြဿနာရှာဝံ့နေဆဲဖြစ်သည်။

"ကျွန်မတို့ သိထားပါပြီ၊ ခေါင်းဆောင်။ အဲဒါ မြို့စွန်နယ်မြေက မီးလျှံစစ်သည်ဂိုဏ်းရဲ့ လုပ်ရပ်ပါ" ဟော့ရို့နန်က ပြောလိုက်သည်။

ချူးယွင်ဖန်း၏ စိတ်ထဲတွင် မီးလျှံစစ်သည်ဂိုဏ်းနှင့် ပတ်သက်ဆက်နွယ်သော အချက်အလက်များ ထွက်ပေါ်လာသည်။ ထိုဂိုဏ်းသည် လူသားမျိုးနွယ်၏ အင်အားစုများထဲမှ တစ်ခုဖြစ်သည်။ ၎င်းတို့သည် နည်းပညာမြင့်လက်နက်များနှင့် ပတ်သက်၍ ပြည်ထောင်စု၏ မြင့်မြတ်သော မိသားစုကြီး ရှစ်ခုကို မယှဉ်နိုင်သော်လည်း ကျွမ်းကျင်သူအရေအတွက်အရ တူညီသော အဆင့်တွင်ရှိနေကြသည်။ မီးလျှံစစ်သည်ဂိုဏ်းတွင် အင်အားကြီး ကျွမ်းကျင်သူများစွာ ရှိနေသည်။

ဂိုဏ်းသည် မြို့စွန်နယ်မြေရှိ ရက်စက်ကြမ်းကြုတ်သော အင်အားစုတစ်ခုဖြစ်သည့်အပြင် လူများစွာကို အဆက်မပြတ် သတ်ဖြတ်ကာ ၎င်းတို့၏ ကုန်ပစ္စည်းများကို လုယက်လေ့ရှိသည်။ ၎င်းတို့သည် မကောင်းမှု အမျိုးမျိုးကို ပြုလုပ်ကြသူများဖြစ်၏။ မြို့စွန်နယ်မြေရှိ လူအချို့က ၎င်းတို့ကို အရှင်သခင်ဟုပင် ယူဆနေကြသည်။ ၎င်းတို့၏ဂိုဏ်းခေါင်းဆောင်သည် ဝါရင့်နတ်အဆင့် ကျွမ်းကျင်သူတစ်ဦးဖြစ်သည်။

၎င်းတို့၏ဂိုဏ်းခေါင်းဆောင်လျှင်ပင် မကောင်းမှုများပြုလုပ်ရန် ပြည်ထောင်စုထဲသို့ ဝင်ရောက်လာ၍ ပြည်ထောင်စုဥက္ကဋ္ဌက သူ့ကို လိုက်လံတိုက်ခိုက်ချိန်တွင် ထွက်ပြေးနိုင်ခဲ့သူဖြစ်သည်။ ဂိုဏ်းခေါင်းဆောင်က ထွက်ပြေးသွားခဲ့သော်လည်း သမ္မတသည် ပြည်ထောင်စု၏ နံပါတ်တစ် ကျွမ်းကျင်သူဖြစ်ကြောင်း လူတိုင်း သိထားသောကြောင့် သူ၏ ဩဇာအာဏာသည် ယုတ်လျော့ခြင်း မရှိပေ။ ထိုဂိုဏ်းခေါင်းဆောင်ကို သမ္မတ၏ ချုပ်ကိုင်မှုမှ လွတ်မြောက်နိုင်သည့် အံ့ဖွယ်ပုဂ္ဂိုလ်ဟုပင် အများစုက ယူဆနေကြသည်။

မီးလျှံစစ်သည်ဂိုဏ်းသည် အင်အားကြီးမားသော ဂိုဏ်းတစ်ခုဖြစ်သည်။ ၎င်းတို့ မြို့စွန်နယ်မြေများတွင် အခြေစိုက်အဖြစ် တည်ရှိကြသော်လည်း ဤဂိုဏ်း၏ဂုဏ်သတင်းကို ချူးယွင်ဖန်းလျှင်ပင် ကြားသိထားသည်။ ယခင်က ချူးယွင်ဖန်း ဖြေရှင်းခဲ့သည့် သွေးဆာသူများသည် မီးလျှံစစ်သည်ဂိုဏ်းနှင့် နှိုင်းယှဉ်လျှင် မပြောပါ့လောက်သူများဖြစ်ကြသည်။ မည်သို့ဆိုသော် မီးလျှံစစ်သည်ဂိုဏ်းသည် သွေးဆာသူများကို လက်တစ်ချောင်းတည်းဖြင့် အလွယ်တကူ ချေမှုန်းနိုင်သောကြောင့် ဖြစ်သည်။ ၎င်းတိူ့၏ အဆင့်အတန်းများသည် မတူညီကြပေ။ မီးလျှံစစ်သည်ဂိုဏ်းသည် မြို့စွန်နယ်မြေများတွင် သောင်းကျန်းနေကြသော်လည်း ပြည်ထောင်စု၏နယ်မြေများတွင် ပေါ့ပေါ့ဆဆ မလုပ်ဆောင်ဝံ့ကြပေ။

"ကျုပ် မမှားဘူးဆိုရင် အထူးစစ်ဆင်ရေးဌာနရဲ့ အချက်အလက်ဖိုင်တွေအရ မီးလျှံစစ်သည်ဂိုဏ်းနဲ့ မွန်းစတားဂိုဏ်းက နီးစပ်ကြတယ်လို့ ပြောခဲ့သလိုပဲ" ချူးယွင်ဖန်းက မေးလိုက်သည်။

"ဟုတ်ပါတယ်။ မွန်းစတားဂိုဏ်းက ခိုးယူရောင်းချတဲ့ ပစ္စည်းတွေကို ခိုးထုတ်ရာမှာ မီးလျှံစစ်သည်ဂိုဏ်းက မကြာခဏ ကူညီပေးလေ့ရှိပါတယ်။ သူတို့ဂိုဏ်းနှစ်ခုက နှစ်ပေါင်းများစွာကြာ တစ်ကျိတ်တည်းတစ်ဉာဏ်တည်း လှုပ်ရှားလာခဲ့တော့ သူတို့ကို မွန်းစတားဂိုဏ်းရဲ့ ညာလက်ရုံးလို့တောင် သတ်မှတ်လို့ရပါတယ်" ဟော့ရို့နန်က ဆိုသည်။

မွန်းစတားဂိုဏ်းသည် ပြည်ထောင်စု၏ အဆိုးရွားဆုံး ရန်သူတော်ကြီးဖြစ်ကြောင်း ချူးယွင်ဖန်း နားလည်ခဲ့သည်။ မွန်းစတားဂိုဏ်းနှင့် ပတ်သက်နေသည့် မည်သူတစ်ဦးတစ်ယောက်ကိုမဆို လွတ်ငြိမ်းချမ်းသာခွင့် မပေးဘဲ သေဒဏ်ချမှတ်သင့်သည်။

သို့သော် မီးလျှံစစ်သည်ဂိုဏ်းသည် ကွဲပြားခြားနားသည်။ ဂိုဏ်းသည် မြို့စွန်နယ်မြေများတွင် ထိန်းမနိုင်သိမ်းမရ ပြုမူလေ့ရှိသော နာမည်ဆိုးဖြင့် ကျော်ကြားသော်လည်း ၎င်းတို့သည် ပြည်ထောင်စု၏ အဓိကပစ်မှတ် မဟုတ်ပေ။ ပြည်ထောင်စုအတွင်းရှိ လူအများအပြားသည် မီးလျှံစစ်သည်ဂိုဏ်းနှင့် ပူးပေါင်းဆောင်ရွက်ခဲ့နိုင်ခြေရှိသည်။ မွန်းစတားဂိုဏ်းက မစွမ်းဆောင်နိုင်သော အရာများရှိသော်လည်း မီးလျှံစစ်သည်ဂိုဏ်းက ပြုလုပ်နိုင်ခဲ့သည်။

"မွန်းစတားဂိုဏ်းကို နှိမ်နင်းမှုနဲ့ပတ်သက်ပြီး ခေါင်းဆောင်ရဲ့အမိန့်ကို ကျွန်မတို့ လိုက်နာခဲ့ပါတယ်။ ပြီးခဲ့တဲ့လအတွင် ထူးခြားတဲ့ ရလဒ်တွေရခဲ့ပြီး မွန်းစတားဂိုဏ်းရဲ့ အခြေစိုက်စခန်းအများအပြားကို ဖျက်ဆီးနိုင်ခဲ့ပါတယ်။ ဒါ့အပြင် မီးလျှံစစ်သည်ဂိုဏ်းနဲ့ ပူးပေါင်းခဲ့တဲ့ ကုမ္ပဏီတချို့ကိုလည်း ကျွန်မတို့ ရှာဖွေခဲ့တော့ သူတို့ကိုလည်း ကျွန်မတို့ဘက်က ဖြေရှင်းခဲ့ပါတယ်" ဟော့ရို့နန်က တင်ပြလိုက်သည်။

"ဒါဆိုရင်တော့ သူတို့က ကျုပ်ကို လက်စားပြန်ချေခဲ့ပုံပဲ" ချူးယွင်ဖန်းသည် မီးလျှံစစ်သည်ဂိုဏ်း၏ ရည်ရွယ်ချက်ကို ချက်ချင်း နားလည်သွားသည်။ ပြည်ထောင်စုအတွင်း အထူးစစ်ဆင်ရေးဌာနက ဖျက်ဆီးခဲ့သည့် မီးလျှံစစ်သည်ဂိုဏ်း၏ အင်အားစုအရေအတွက်သည် ပြည်ထောင်စု၏ ပြင်ပတွင် ၎င်းတို့ ဖျက်ဆီးမည့် အထူးစစ်ဆင်ရေးဌာန၏ အင်အားစုအရေအတွက်ဖြစ်သည်။

ချူးယွင်ဖန်း၏ ဖြစ်တည်မှုသည် ဤအင်အားစုများကြားက ကာလကြာရှည်သော အပြန်အလှန် နားလည်မှုကို ပျက်ပြားစေခဲ့သည်။ မီးလျှံစစ်သည်ဂိုဏ်းသည် ပြည်ထောင်စုထဲတွင် မဟုတ်ဘဲ မြို့စွန်နယ်မြေမှဖြစ်သော်လည်း ဤကိစ္စကို သူ့ဘက်မှ လျစ်လျူရှုနိုင်သည်ဟု မဆိုလိုပေ။ အကယ်၍ ၎င်းတို့သာ အချိန်အတော်ကြာသည်အထိ ဤတိုက်ခိုက်ခံရမှုကို မဖြေရှင်းနိုင်ခဲ့လျှင် အထူးစစ်ဆင်ရေးဌာနသည် အထိတ်တလန့် ဖြစ်ကုန်ပေလိမ့်မည်။

ချူးယွင်ဖန်းက ရယ်မောလိုက်သည်။

"မီးလျှံစစ်သည်ဂိုဏ်းရဲ့ ဂိုဏ်းခေါင်းဆောင်ဆိုတော့ရော ဘာဖြစ်လဲ။ သူလည်း သူ့သက်တမ်းကို အခွင့်ကောင်းယူနေတဲ့ အဘိုးကြီးတစ်ယောက်သာသာပဲ။ ကျုပ်ကို လာတွေ့ဖို့ အမိန့်ထုတ်ပြန်လိုက်။ ကျုပ်နဲ့ ကစားဖို့ ရည်ရွယ်ထားတာလားဆိုတာ ကျုပ်တော့ သိချင်သေးတယ်"

"သူ လွယ်လွယ်နဲ့ အလျော့မပေးမှာကို ကျွန်မ စိုးရိမ်မိပါတယ် ခေါင်းဆောင်" ဟော့ရို့နန်က စိုးရိမ်စွာ ပြောလိုက်သည်။

"သူ မလာဘူးဆိုရင် သူ့မိသားစုတစ်ခုလုံးကို ကျုပ် သုတ်သင်ပစ်မယ်။ မီးလျှံစစ်သည်ဂိုဏ်းက သွေးအကြွေးတွေ အများကြီးရှိထားတော့ အများစုက သူတို့ကို သေစေချင်နေကြတာ။ အရင်က အဆုံးမဲ့ နတ်ဆိုးတောင်တန်းနှင့် အဏ္ဏဝါမျိုးနွယ်များကို ကိုင်တွယ်ဖြေရှင်းနေရလို့ မအားလပ်တာနဲ့ ပြည်ထောင်စုက သူတို့ကို အရေးမယူခဲ့တာ။ ဒီတော့ ထုံးစံအတိုင်း မီးလျှံစစ်သည်ဂိုဏ်းရဲ့ ဂိုဏ်းခေါင်းဆောင်ကို ကိုင်တွယ်ဖြေရှင်းဖို့လည်း အချိန်ဘယ်ရှိပါ့မလဲ"

"ဒါပေမယ့် ကျုပ်က မတူဘူး။ ကျုပ်မှာက အချိန်တွေ အများကြီးရှိတယ်"

အခန်း (၈၇၅) ခင်ဗျားကို သတ်မယ်လို့ပြောရင်

မြို့စွန်နယ်မြေမှရှိ မီးလျှံစစ်သည်ဂိုဏ်း၏ ဌာနချုပ်သည် အထပ်မြင့် အဆောက်အအုံများဖြင့် ပြည့်နှက်နေခဲ့ရာ၊ ၎င်းသည် ပြည်ထောင်စုမြို့တစ်ခုနှင့်ပင် ဆင်တူသည်။ သို့သော်လည်း ဤနေရာသည် အရပ်သားများဖြင့် ပြည့်နှက်နေမည့်အစား ဂိုဏ်း၏ အစွန်းရောက် တပည့်လက်သားများဖြင့် ပြည့်နှက်နေသည်။

မီးလျှံစစ်သည်ဂိုဏ်း၏ မီးတောက်ပုံသဏ္ဌာန်များကို နေရာအနှံ့တွင် ရေးထွင်းထား၍ ကောင်းကင်ကို ချိန်ရွယ်ထားသော ကြီးမားသော အမြောက်များစွာကို အဝေးမှ မြင်တွေ့နိုင်သည်။ ၎င်းအမြောက်များသည် ရံဖန်ရံခါတွင် ပတ်ဝန်းကျင်ရှိ ပျံသန်းနေသော သတ္တဝါများကို ပစ်ချခြင်း မဟုတ်လျှင် ၎င်းတို့ကို မောင်းထုတ်ခြင်းမျိုး ပြုလုပ်နေသည်။

တပည့်များသည် ဤအရာများနှင့် ပတ်သက်၍ ကျင့်သားရနေသောကြောင့် ဤမြင်ကွင်းကို မအံ့ဩကြပေ။ ၎င်းတို့၏ ခန္ဓာကိုယ်တစ်ဝိုက်တွင် အယူသန်သော အရောင်အဝါများ ရှိနေသည်။ ဤသည်မှာ မီးလျှံစစ်သည်ဂိုဏ်း၏ ဌာနချုပ်ဖြစ်သည့်အပြင် ဂိုဏ်းရှိ တပည့်များ၏ဘေးကင်းရာ ကောင်းကင်ဘုံလည်းဖြစ်သည်။

ဤအခိုက်အတန့်တွင် မီးလျှံစစ်သည်ဂိုဏ်း ဌာနချုပ်ရှိ ပင်မခန်းမအတွင်း၌ လူသုံးယောက် မတ်တပ်ရပ်နေကြသည်။ ခေါင်းဆောင်သည် အသက်ငါးဆယ် သို့မဟုတ် ခြောက်ဆယ်ဝန်းကျင်ရှိ သက်လတ်ပိုင်းအရွယ် အမျိုးသားတစ်ဦးဖြစ်သည်။ သူသည် ထိုနေရာတွင် ထိုင်နေခဲ့သော်လည်း သူ့တွင် ပြင်းထန်သော အရိပ်အမြွက်များ ရှိနေသည်။

သူ၏ညာဘက်တွင် မီးလျှံစစ်သည်ဂိုဏ်း၏ ထူးခြားသော ဝတ်ရုံကို ဝတ်ဆင်ထားသော အဘိုးအိုတစ်ဦးသည် ရပ်နေခဲ့သည်။ သူ၏ အခြားတစ်ဖက်တွင် ခေါင်းစွပ်ဝတ်ရုံ ဝတ်ဆင်ထားသော လူတစ်ယောက်ရှိနေ၍ ၎င်းက မည်သူမည်ဝါဖြစ်သည်ကို သဲသဲကွဲကွဲ မမြင်နိုင်ပေ။

"ဒီတာဝန်ပြီးရင် ခင်ဗျားတို့ အကျိုးအမြတ်တွေ အများကြီး ရလာလိမ့်မယ်" ခေါင်းစွပ်ဝတ်ရုံ ဝတ်ဆင်ထားသောလူက သက်လတ်ပိုင်းအရွယ် အမျိုသားကို ကြည့်၍ ပြောလိုက်သည်။ သက်လတ်ပိုင်းအရွယ် အမျိုးသားသည် မီးလျှံစစ်သည်ဂိုဏ်း၏ ဂိုဏ်းခေါင်းဆောင်ဖြစ်သော်လည်း ခေါင်းစွပ်ဝတ်ရုံ ဝတ်ဆင်ထားသည့် အမျိုးသားက ဂရုစိုက်ပုံမပေါ်ပေ။

ထိုသို့ပြောပြီးနောက် ခေါင်းစွပ်ဝတ်ရုံနှင့် အမျိုးသားသည် အနောက်လှည့်၍ ဧည့်ခန်းမှ ထွက်သွားခဲ့သည်။ အချိန်အတော်ကြာပြီးနောက် ဂိုဏ်းခေါင်းဆောင်၏ နံဘေးရှိ မီးလျှံစစ်သည်ဂိုဏ်း၏ ပထမအကြီးအကဲဖြစ်သည့် အဘိုးအိုက နောက်ဆုံးတွင် ပြောလာသည်။

"ခေါင်းဆောင်၊ ဒီလူတွေက ကျွန်တော်တို့ကို အသုံးချချင်နေတာ သိသာတယ်။ ခေါင်းဆောင် သေချာ ဂရုစိုက်ရမယ်"

"ဒါပေါ့၊ ကျုပ် သိတာပေါ့" ဂိုဏ်းခေါင်းဆောင်က လှောင်ရယ်လိုက်သည်။

"အဲဒီလူတွေက ဉာဏ်ကောင်းသားပဲ။ သူတို့ရဲ့ လက်ရှိ အခြေအနေက သေခါနီးနေပြီလို့ ပြနေတာ"

ဂိုဏ်းခေါင်းဆောင်က မတ်တပ်ထရပ်၍ ပြောလိုက်သည်။

"ကျုပ် ချူးယွင်ဖန်းကို သင်ခန်းစာ သွားပေးလိုက်ဦးမယ်။ သူ လုပ်သင့်တာနဲ့ မလုပ်သင့်တာက ဘာတွေလဲဆိုတာကို ကျုပ် သင်ပေးလိုက်မယ်။ အခုခေတ် မျိုးဆက်သစ်တွေက စည်းမျဉ်းတွေကို မသိကြဘူး။ ဒါကြောင့် သူတို့ရဲ့ အကြီးအကဲတွေ အနေနဲ့ စည်းကမ်းတွေကို သင်ပေးရမှာပေါ့"

"ဒါက အမှန်ပဲ။ ဟိုတလောက မွန်းစတားဂိုဏ်းရဲ့ အခြေစိုက်စခန်းတော်တော်များများ ဖျက်ဆီးခံလိုက်ရပြီး သူတို့ရဲ့ အသက်သွေးကြောတွေလည်း တော်တော်လေး ပျက်စီးသွားတယ်။ ကျွန်တော်တို့တောင် ကြားထဲက ငြိစွန်းသွားသေးတယ်။ ဒီအထူးစစ်ဆင်ရေးဌာနရဲ့ ခေါင်းဆောင်အသစ်က တကယ်လည်း မောက်မာတာကိုး။ သူတစ်ယောက်တည်းနဲ့ ကမ္ဘာကြီးတစ်ခုလုံးကို တိုက်ခိုက်နိုင်မယ်လို့ ထင်နေတာလားပဲ" ပထမ အကြီးအကဲက ပြောလိုက်သည်။

"ဟုတ်တယ်။ ချူးယွင်ဖန်းက မျိုးနွယ်စုငယ်တွေ ဂိုဏ်းငယ်တွေရဲ့ လုပ်ငန်းစဉ်တွေနဲ့ပဲ ရင်းနှီးတာ။ ကျုပ်တို့ ဒီအဆင့်ထိ လိုက်နာခဲ့တဲ့ စည်းမျဉ်းတွေကို သူ နားမလည်ဘူး" ဂိုဏ်းခေါင်းဆောင်က ပြောသည်။

"ကျုပ်ကို ဘယ်သူမှ လွယ်လွယ်နဲ့ လှုပ်ရှားအောင် လုပ်နိုင်မှာ မဟုတ်ဘူး"

ဂိုဏ်းခေါင်းဆောင်သည် ဤအကြောင်းအရာနှင့် ပတ်သက်၍ အနှောင့်အယှက်မဖြစ်သည့်ဟန်ဖြင့် အလွန် တည်ငြိမ်နေသည်။ သူသည် အထူးစစ်ဆင်ရေးဌာန၏ ခေါင်းဆောင်အသစ်ဖြစ်လာသော လူငယ်ကို သင်ခန်းစာတစ်ခုပေးရန် ရည်ရွယ်ထားပြီဖြစ်သည်။ ယခုအခါ မျိုးနွယ်စုအားလုံးက သူ့ထံ အမျိုးမျိုးသော အကျိုးကျေးဇူးများ ပေးဆောင်ရန် လုပ်ဆောင်နေကြသောကြောင့် သူသည်လည်း ၎င်းဆုလာဘ်များကို ရိတ်သိမ်းရပေလိမ့်မည်။

သို့သော်လည်း အထူးစစ်ဆင်ရေးဌာနမှ ထုတ်ပြန်လာသော အမိန့်စာသည် သူ၏တည်ငြိမ်သော အမူအရာကို မကြာမီတွင် ပျက်စီးသွားစေသည်။ သူ မည်သည့်အချိန်ကမျှ အလေးအနက်မထားဖူးသော ချူးယွင်ဖန်းသည် သူ့ကို ခွန်းလွန်မြို့သို့ သွားရောက်ကာ ဤကိစ္စကို ရှင်းပြရန် အမိန့်ထုတ်ပြန်ထားသည်။ မဟုတ်ပါက ချူးယွင်ဖန်းသည် မီးလျှံစစ်သည်ဂိုဏ်းကို သုတ်သင်မည်ဖြစ်သည်။

"ချီးပဲ၊ ဒင်းက သူ့ကိုယ်သူ ဘယ်သူထင်နေတာလဲ။ ဒီကောင်တော့ သေကြောင်းကြံစည်နေတာပဲ" ဂိုဏ်းခေါင်းဆောင်သည် အလွန် ဒေါသထွက်နေသည်။ သူ ထုတ်လွှတ်လိုက်သည့် ကြောက်မက်ဖွယ် အရောင်အဝါသည် ပထမအကြီးအကဲကို အနားသို့ မကပ်ရဲသည်အထိ ဖြစ်စေခဲ့သည်။

"မိုက်မဲတဲ့ ကလေးပဲ။ ပြည်ထောင်စုဥက္ကဋ္ဌတောင် ကျုပ်ကို ဒီလိုစကားမျိုး မပြောဝံ့ဘူး။ ဒီကောင်က ရဲရင့်လွန်းတယ်"

ဂိုဏ်းခေါင်းဆောင်သည် လေထုကို သူ၏လက်ဖြင့် ဖြိုခွင်းလိုက်ရာ၊ ပေါက်ကွဲသံများ အဆက်မပြတ် ဖြစ်ပေါ်နေသည်။

"မီးလျှံစစ်သည်ဂိုဏ်းကို သုတ်သင်မယ်တဲ့လား သူ့မှာ ဒီလိုလုပ်ဖို့ စွမ်းရည်မျိုး ရှိမရှိဆိုတာ ကြည့်ချင်သေးတယ်။ ကျွမ်းကျင်သူတွေအားလုံးကို စုစည်းဖို့ အမိန့်ပေးလိုက်။ မြို့စွန်နယ်မြေမှာရှိတဲ့ အထူးစစ်ဆင်ရေးဌာနတွေရဲ့ လက်အောက်ခံတွေကို သုတ်သင်ပစ်မယ်"

သူ၏ ခေါင်းဆောင်ကို ဤအတိုင်းအတာအထိ ဒေါသထွက်စေရန်အတွက် အထူးစစ်ဆင်ရေးဌာနက မည်သို့သော အမိန့်မျိုး ထုတ်ပြန်ခဲ့သည်ကို ပထမအကြီးအကဲ မသိခဲ့ပေ။ သို့သော်လည်း မီးလျှံစစ်သည်ဂိုဏ်းသည် အထူးစစ်ဆင်ရေးဌာနနှင့် စစ်ပွဲတစ်ခု စတင်တော့မည်ကို သူနားလည်လိုက်သည်။ ဤအခြေအနေသည် ယခင်ကကဲ့သို့ သေးငယ်သော တိုက်ပွဲမျိုး မဟုတ်ပေ။

မကြာမီတွင် အထူးစစ်ဆင်ရေးဌာနက မီးလျှံစစ်သည်ဂိုဏ်းကို အမိန့်ထုတ်ပြန်ခဲ့သည်ဟူသော သတင်းသည် ပြည်ထောင်စု၏အဆင့်မြင့်အရာရှိများကြားတွင် ပျံ့နှံ့သွားခဲ့သည်။ ချူးယွင်ဖန်း၏ ရည်ရွယ်ချက်က သေချာမသိကြသောကြောင့် ၎င်းအားလုံးက အနည်းငယ်မျှ စိတ်ရှုပ်ထွေးနေကြသည်။

အထူးစစ်ဆင်ရေးဌာနသည် ချူးယွင်ဖန်း၏ သုတ်သင်ရှင်းလင်းမှုအပြီးတွင် ပြည်ထောင်စုအတွင်း ၎င်း၏ဩဇာအာဏာကို ပြန်လည်ထူထောင်နိုင်ခဲ့သည်။ သို့သော်လည်း မီးလျှံစစ်သည်ဂိုဏ်းသည် ပြည်ထောင်စုအတွင်းရှိ ဂိုဏ်းတစ်ခု မဟုတ်ခဲ့ပေ။ ထို့အပြင် မီးလျှံစစ်သည်ဂိုဏ်းသည် မြို့စွန်နယ်မြေများရှိ အပြင်းထန်ဆုံး ဂိုဏ်းများထဲမှ တစ်ခုဖြစ်ရာ၊ နှိုင်းယှဥ်ကြည့်လျှင် ၎င်းသည် နတ်နဂါးဗီလာကဲ့သို့ အင်အားစုဟောင်းများနှင့် တန်းတူအဆင့်တွင်ရှိနေသည်။

မီးလျှံစစ်သည်ဂိုဏ်း၏ ဂိုဏ်းခေါင်းဆောင်သည် ဝါရင့်နတ်အဆင့် ကျွမ်းကျင်သူဖြစ်၍ ချူးယွင်ဖန်းသည် ဂိုဏ်းခေါင်းဆောင်ကို လူချင်းတွေ့ဆုံရန် အမိန့်ပေးခဲ့သည်။ ချူးယွင်ဖန်းသည် ကိုယ့်ကိုယ်ကို ပြည်ထောင်စု၏ သမ္မတဟု ထင်နေခြင်းဖြစ်လေသလော။ သမ္မတကြီးလျှင်ပင် ထိုသို့ ပြုမူလိမ့်မည် မဟုတ်ပေ။

"သူ ရူးသွားပြီလား၊ သူ့အမိန့်ကို လူတိုင်းက နာခံရအောင် သူ့ကိုယ်သူ နတ်ဘုရားတစ်ပါးလို့ထင်နေတာလား"

"သူက မောက်မာလွန်းတယ်။ မီးလျှံစစ်သည်ဂိုဏ်းရဲ့ခေါင်းဆောင်က အရင်က သူသတ်ခဲ့တဲ့ တတိယမိကျောင်းမင်းသားနဲ့ တူတာ မဟုတ်ဘူး။ ဂိုဏ်းခေါင်းဆောင်က ဝါရင့် နတ်အဆင့်ကျွမ်းကျင်သူ တစ်ယောက်ပဲ။ သမ္မတတောင်မှ သူ့ကို ဘာမှ မလုပ်နိုင်ခဲ့ဘူး"

"ချူးယွင်ဖန်းတော့ ရူးသွားပြီ။ ဒီတစ်ခါတော့ သူတကယ် မျက်နှာကို အရိုက်ခံရတော့မယ်"

ချူးယွင်ဖန်းကို ရူးသွပ်သွားပြီဟု လူတိုင်းက ထင်နေကြသည်။ ဤသို့မှမဟုတ်လျှင် ထိုအပြုအမူမျိုးကို ပြုလုပ်မည် မဟုတ်ပေ။ သူသည် လူအများ၏အမြင်တွင် သွေးနထင်ရောက်နေသူ ဖြစ်သည်။ နတ်အဆင့် ကျွမ်းကျင်သူတို့သည် အလွန် အင်အားကြီးမားသော ပုဂ္ဂိုလ်များဖြစ်ပြသည်။ အထူးသဖြင့် မြို့စွန်နယ်မြေများရှိ ကျွမ်းကျင်သူများသည် နှစ်ပေါင်းများစွာကြာ ထိန်းမနိုင်သိမ်းမရ ပြုမူသူများဖြစ်၍ ပြည်ထောင်စုလျှင်ပင် ၎င်းတို့ကို ထိန်းချုပ်ရန် ခက်ခဲလှသည်။

ဂိုဏ်းခေါင်းဆောင်သည် ချူးယွင်ဖန်းကို တစ်သက်တာလုံး ခွန်းလွန်မြို့မှ မထွက်ခွာမိစေနှင့်ဟုပင် ကြွေးကြော်ခဲ့သည်။ မဟုတ်ပါက သူသည် ချူးယွင်ဖန်း၏ ဦးခေါင်းကို ခွဲထုတ်ပစ်ပေလိမ့်မည်။

"ဒီကလေးက အမွှေးတောင် စုံသေးတာ မဟုတ်ဘူး။ သူက နတ်အဆင့်ကို ဝင်ရောက်ခါစ ကျွမ်းကျင်သူ အသစ်ကို သတ်လိုက်နိုင်တာနဲ့ သူ့ကိုယ့်သူ ပြိုင်ဘက်ကင်းလို့ ထင်နေတာပဲ"

ဂိုဏ်းခေါင်းဆောင်၏ စကားသည် ပြည်ထောင်စုတစ်ခုလုံး ပျံ့နှံ့သွားသည်။ အထူးစစ်ဆင်ရေးဌာနများအပေါ် မီးလျှံစစ်သည်ဂိုဏ်း၏ တိုက်ခိုက်မှုများသည် ပိုပို၍ များပြားလာ၍ ဤအင်အားစုကြီးနှစ်ခုသည် တိုက်ပွဲဖြစ်ပွားတော့မည်ဟု ထင်မှတ်ရစေသည်။ ဤမီးပွားသည် နောက်ဆုံးတွင် တောက်လောင်သွားကာ အင်တာနက်ပေါ်၌ လူအများ၏ ထင်မြင်ယူဆချက် လှိုင်းလုံးကြီးများ ဖြစ်ပေါ်လာစေသည်။ ချူးယွင်ဖန်းသည် အင်အားစုမျိုးမျိုး၏ အကူအညီဖြင့် မုန်တိုင်း၏ရှေ့ဆုံးသို့ တွန်းပို့ခံရပြန်သည်။

သံသယ အမျိုးမျိုးကို ရင်ဆိုင်နေရသော အဓိက ဇာတ်ကောင်သည် နှုတ်ဆိတ်နေခဲ့သည်။ ချူးယွင်ဖန်း၏ အမိန့်ကို ထုတ်ပြန်ပြီး သုံးရက်အကြာတွင် စစ်တပ်ကြီးတစ်ခုသည် မီးလျှံစစ်သည်ဂိုဏ်း၏ ဌာနချုပ်ရှိရာသို့ လျှပ်စီးကဲ့သို့သော အရှိန်အဟုန်ဖြင့် ချီတက်လိုက်သည်။

ဒါဇင်နှင့်ချီသော စစ်သင်္ဘောများအပြင် ထောင်နှင့်ချီသော စက်တပ်များ ဝိုင်းအုံလာကြသည်။ ဤအခိုက်အတန့်တွင် မီးလျှံစစ်သည်ဂိုဏ်းကို သုတ်သင်ရန် ရည်ရွယ်သည်ဟု ပြောခဲ့သော ချူးယွင်ဖန်းသည် နောက်ပြောင်နေခြင်းမဟုတ်ကြောင်း လူတိုင်းက သဘောပေါက်သွားကြသည်။ သူသည် ဂိုဏ်းတစ်ခုလုံးကို အမှန်တကယ် သုတ်သင်ရန် ရည်ရွယ်ခဲ့သည်။

အခန်း (၈၇၆) ဧရာမ လူသတ်လက်နက်ဖြင့် သတ်ဖြတ်ခြင်း

ဤအခိုက်အတန့်တွင် ယခင်က လှောင်ပြောင်သော စကားလုံးများ အားလုံး ဗလာနတ္ထိအဖြစ်သို့ ပြောင်းလဲသွားခဲ့သည်။ ချူးယွင်ဖန်းသည် အမှန်တကယ် အလေးအနက်ထား၍ ပြောခဲ့လိမ့်မည်ဟု မည်သူမျှ မမျှော်လင့်ခဲ့ပေ။ ကနဦးတွင် ချူးယွင်ဖန်းက ဂိုဏ်းများနှင့် မျိုးနွယ်စုများကို သုတ်သင်လိုက်သောအခါ အလွန် ရက်စက်ကြမ်းကြုတ်လှပြီဟု လူအများက ထင်မှတ်ခဲ့ကြသည်။

ယခု ဤလှိုင်းလုံးကြီးက ပို၍ပင် ပြင်းထန်လိမ့်မည်ဟု မည်သူက ထင်မှတ်မည်နည်း။ ချူးယွင်ဖန်းသည် စစ်တပ်တစ်ခုကို ငှားရမ်းခဲ့ပုံရသည်။ ဤအတိုင်းအတာအဆင့်တပ်ရင်းမျိုးသည် အထူးစစ်ဆင်ရေးဌာနက စုစည်းနိုင်သည့်အရာ မဟုတ်ပေ။ ထောင်ပေါင်းများစွာသော စက်လက်နက်များကြားတွင် ချူးယွင်ဖန်း၏ မိုးကြိုးအတောင်ပံများ အဆက်မပြတ် လှုပ်ခတ်နေသည်။ သူသည် အေးစက်စက် အမူအရာဖြင့် ရန်သူတော်ကြီးကို ရင်ဆိုင်နေသကဲ့သို့ အဝေးရှိ မီးလျှံစစ်သည်ဂိုဏ်း၏ ဌာနချုပ်ကို လှမ်းကြည့်နေသည်။

အထူးစစ်ဆင်ရေးဌာနသည် ကိုယ့်ကိုယ်ကို အလွန်အမင်း အထင်ကြီးနေသည်ဟု လူတိုင်းက ထင်မှတ်နေကြသည်။ ချူးယွင်ဖန်းသည် မြို့စောင့်တပ်ရင်းကို အမှန်တကယ် ငှားရမ်းနိုင်မည်ဟု မည်သူမျှ မထင်မှတ်ခဲ့ပေ။ ပုံမှန်အားဖြင့် အလွန်အရေးကြီးသော ကိစ္စမျိုးမဟုတ်ပါက မြို့စောင့်တပ်ရင်းကို စေလွှတ်ကြမည် မဟုတ်ပေ။ မြို့စောင့်တပ်ရင်းကို စေလွှတ်လိုက်သည်နှင့် ဤသည်မှာ ကြီးကျယ်ခမ်းနားသော တိုက်ပွဲကြီးဖြစ်ပေလိမ့်မည်။

နတ်အဆင့် ကျွမ်းကျင်သူတစ်ဦးကို မြှင့်တင်ပေးစေသည့် အင်အားစုကို ဖျက်ဆီးခြင်းသည် အဓိကဖြစ်ရပ်တစ်ခုဖြစ်ကြောင်း ယုံမှားသံသယဖြစ်ရန် မလိုပေ။

"ဒင်းကများ အတင့်ရဲလို့..."

ချူးယွင်ဖန်းသည် မီးလျှံစစ်သည်ဂိုဏ်းကို ချေမှုန်းရန်အတွက် မြို့စောင့်တပ်ရင်းတစ်ခုကို ငှားရမ်းခဲ့ကြောင်း ခေါင်းဆောင်ကြီးများ ကြားသိရသောအခါ ၎င်းတို့အားလုံး ထိတ်လန့်သွားကြသည်။ ဤသို့သော အခြေအနေမျိုးနှင့် မကြုံခဲ့ရသည်မှာ ကြာမြင့်ပြီဖြစ်သည်။

ပြည်ထောင်စု၏ အင်အားဖြင့်ဆိုလျှင် မျိုးနွယ်စုတစ်ခု၏ အမွေအနှစ်များကို ဖျက်ဆီးရန် လွယ်ကူလွန်းလှသည်။ သို့သော်လည်း မျိုးနွယ်စုအသီးသီး၏ ပေါင်းစပ်စွမ်းအင်သည် သေးငယ်သော ကိစ္စမဟုတ်ပေ။ ဤသည်မှာ ပြည်ထောင်စုကို အမြဲတစေ နိုးကြားနေစေခြင်းဖြစ်သည်။ နှစ်ဦးနှစ်ဖက်စလုံးသည် ဟန်ချက်ညီအောင် ဖွဲ့စည်းထားသောကြောင့် ဤချိန်ခွင်လျှာကို ချိုးဖျက်ရန် လွယ်ကူမည် မဟုတ်ပေ။ မြို့စောင့်တပ်ရင်းကို အကူအညီတောင်းခြင်းသည် အင်အားစုများစွာ လက်ခံနိုင်သည့် အဓိကစည်းမျဉ်းကို ချိုးဖျက်စေခဲ့သည်။

"ချူးယွင်ဖန်းတော့ ရူးနေပြီ၊ လူထုဝေဖန်မှုတွေရဲ့ ပစ်မှတ်ဖြစ်လာဖို့ ကြိုးစားနေတာလား"

"သူ တကယ် ရူးသွားပြီ။ လုံးဝကို ရူးသွားတာ။ ဒါနဲ့ စစ်တပ်ကလည်း ဘာလို့ သူ့လိုမျိုး အရူးလိုက်လုပ်နေရတာလဲ"

သတင်းမျိုးစုံသည် ပြည်ထောင်စု၏ အထက်အရာရှိများကြားတွင် လျှင်မြန်စွာ ပျံ့နှံ့လာသည်။ ကျောက်တုံးကြီးတစ်လုံးကို ငြိမ်သက်နေသော ရေကန်ထဲသို့ ပစ်ချလိုက်ကဲ့သို့ ရေကန်သည် ရုတ်တရက် ဂယက်ထသွားလေသည်။

"မဖြစ်ဘူး၊ သူတို့ဒီလို ပေါက်ကရလျှောက်လုပ်နေတာကို ခွင့်ပြုထားလို့ မဖြစ်ဘူး"

"တပ်မတော်က နိုင်ငံတော်ရဲ့ ပြည်သူပိုင် လက်နက်ပဲ၊ ဒါကို ပုဂ္ဂလိကကိစ္စမျိုးအတွက် မသုံးခိုင်းသင့်ဘူး"

တပ်ဖွဲ့အများအပြား၏ ခေါင်းဆောင်များသည် ဤသို့ ဆက်သွားရန် မဖြစ်နိုင်ကြောင်း သဘောပေါက်သွားသည်။ ၎င်းတို့သည် အထူးစစ်ဆင်ရေးဌာနနှင့် မီးလျှံစစ်သည်ဂိုဏ်း၏ ပဋိပက္ခကြားတွင် လောင်စာထည့်ခဲ့သူများဖြစ်သော်လည်း ချူးယွင်ဖန်းသည် ဤမျှ ရက်စက်ကြမ်းကြုတ်၍ ပုံမှန်လမ်းစဉ်အတိုင်း မလိုက်နာသူဖြစ်မည်ဟု မည်သူမျှ မထင်ခဲ့ပေ။

အထူးစစ်ဆင်ရေးဌာနနှင့် မီးလျှံစစ်သည်၏ဂိုဏ်းတို့သည် နှစ်ဦးနှစ်ဖက်စလုံး အကြီးအကျယ် ထိခိုက်နစ်နာသည်အထိ အသေအကျေ တိုက်ခိုက်လိမ့်မည်ဟု မည်သူမျှ မထင်မှတ်ခဲ့ကြပေ။ ၎င်းတို့၏အကြံအစည်အားလုံးသည် အချည်းနှီးဖြစ်ခဲ့ရသည်။

"ချူးယွင်ဖန်း၊ မင်းကများ အတင့်ရဲ့လို့"

နတ်အဆင့်၏ ကြောက်မက်ဖွယ် အရောင်အဝါကို ထုတ်လွှတ်လိုက်ရာ၊ ၎င်းသည် မည်သို့သော မွေးဖွားခြင်းနယ်မြေအဆင့် ကျွမ်းကျင်သူထက်မဆို ပို၍ ကြောက်မက်ဖွယ်ကောင်းလှသည်။ ဤကြောက်မက်ဖွယ် စွမ်းအင်ကို ထုတ်လွှတ်လိုက်ခြင်းကြောင့် စစ်တပ်၏ ပြင်းထန်သော စက်လက်နက်များ စတင် ယိမ်းယိုင်သွားစေသည်။ အရောင်အဝါတစ်ခုတည်းက တပ်မတော်၏ ချီတက်မှုကို ထိခိုက်စေခဲ့သည်။

နတ်အဆင့် ကျွမ်းကျင်သူမှလွဲလျှင် ဤသို့သော စွမ်းအင်ကို အခြားမည်သူမျှ ပိုင်ဆိုင်နိုင်မည် မဟုတ်ပေ။ မျှော်လင့်ထားသည့်အတိုင်း သက်လတ်ပိုင်းအရွယ် အမျိုးသားတစ်ဦး ပျံသန်းလာ၍ မီးလျှံစစ်သည်ဂိုဏ်း၏ ဌာနချုပ်အထက်တွင် ပျံဝဲနေခဲ့သည်။

"ချူးယွင်ဖန်း၊ ခင်ဗျား စစ်တပ်ကို စုစည်းရဲတယ်ပေါ့လေ။ ဒါက ဘာကိုဆိုလိုတယ်ဆိုတာ ခင်ဗျား သိရဲ့လား"

မီးလျှံစစ်သည်ဂိုဏ်း၏ ဂိုဏ်းခေါင်းဆောင်သည် ချူးယွင်ဖန်းကို ထိတ်လန့်စိတ်များ ဒေါသစိတ်များဖြင့် စိုက်ကြည့်နေသည်။ ချူးယွင်ဖန်းကို ညွှန်နေသော လက်ချောင်းသည် အနည်းငယ်ပင် တုန်ရီနေသည်။

ချူးယွင်ဖန်းသည် သူ့ကို ထိခိုက်အောင် မပြုလုပ်နိုင်သည့်အပြင် အရာအားလုံးသည် သူ၏ထိန်းချုပ်မှုအောက်တွင် ရှိနေသည်ဟု သူမှတ်ထင်ခဲ့သည်။ သူ၏ဂိုဏ်းသည် ကြီးမားကျယ်ပြန့်သော မြို့စွန်နယ်မြေတွင် အခြေစိုက်ထားသောကြောင့် ချူးယွင်ဖန်းကို ဆုံးရှုံးမှု အများအပြား ဖြစ်သွားစေလောက်သည်ဟု ထင်မှတ်ထားသည်။ ချူးယွင်ဖန်းသည် သူ၏အစီအစဉ်အတိုင်း မလိုက်နာဘဲ လူသတ်လက်နက်ကို ထုတ်သုံးမည်ဟု မည်သူသိသနည်း။

၎င်းသည် ကတ်ကစားနေခြင်းနှင့် ဆင်တူသော်လည်း ကစားပွဲအစ၌ပင် မည်သူက ၎င်းတို့၏ ဘုရင်လေးပါးလုံးကို ထုတ်သုံး၍ ကစားကြသနည်း။ ဂိုဏ်းခေါင်းဆောင်ရဲ့ လက်ရှိအခြေအနေကို ဖော်ပြရန် စကားလုံးများရှိလျှင် "ခင်ဗျားရူးနေသလား" ဟုသာ ဖြစ်ပေလိမ့်မည်။

"သိတာပေါ့။ ခင်ဗျားလို ဆိုးယုတ်တဲ့ ဖြစ်တည်မှုကို ရှင်းပစ်သင့်နေတာကြာပြီ။ နှစ်တွေကြာကြီး မွန်းစတားဂိုဏ်းကို မကောင်းတဲ့လုပ်ရပ်တွေ လုပ်ဖို့ ဘယ်လောက်အထိ ကူညီပေးခဲ့တယ်ဆိုတာ ခင်ဗျားကိုယ်ခင်ဗျား အသိဆုံး။ ခင်ဗျားကို ဘယ်သူကမှ လက်စားမချေချင်လို့ မဟုတ်ဘူး၊ အချိန် မကျသေးလို့သာကို ဘယ်သူမှ မလှုပ်ရှားသေးတာ" ချူးယွင်ဖန်းက ဘာသိဘာသာ ပြောလိုက်သည်။ အမှန်တကယ်ပင် ဂိုဏ်းခေါင်းဆောင်၏ ဒေါသကို ချူးယွင်ဖန်း နားလည်ခဲ့သည်။

"ခင်ဗျားရဲ့ဂိုဏ်းတစ်ခုလုံးကို သုတ်သင်မယ်လို့ပြောရင် တကယ် သုတ်သင်မယ်ဆိုတာကို ခင်ဗျား သိထား"

ချူးယွင်ဖန်းသည် ယခင်ကတည်းက ထိုသို့ပြုလုပ်ရန် စီစဉ်နေခဲ့ခြင်းဖြစ်သည်။ သူသည် ဤစစ်သားများကို ကျူးပုဖျင်ထံမှ ချေးယူခဲ့ခြင်းဖြစ်သည်။ ထိုကဲ့သို့ တပ်သားအများအပြားကို ရာထူးကြီး ပုဂ္ဂိုလ်တစ်ဦး၏ လက်မှတ်မပါဘဲ စုစည်းရန် မဖြစ်နိုင်ပေ။ ဤသည်မှာ တားမြစ်ချက်မျိုးဖြစ်၍ အစိုးရလျှင်ပင် ဤစည်းမျဉ်းကို အလွယ်တကူ ဖြတ်ကျော်ရန် ဆန္ဒမရှိကြောင်း သူ သိထားသည်။ ချူးယွင်ဖန်းနှင့် ပူးပေါင်းရန် ၎င်းတို့ သဘောတူခဲ့ရသည့် အကြောင်းရင်းသည် ပြီးခဲ့သည့်နှစ်များအတွင်း မီးလျှံစစ်သည်ဂိုဏ်းက ပို၍ မောက်မာလာခြင်းကြောင့် ဖြစ်သည်။ မွန်းစတားဂိုဏ်းနှင့် မီးလျှံစစ်သည်ဂိုဏ်း၏ ပူးပေါင်းဆောင်ရွက်မှုသည် ပိုမို နက်ရှိုင်းလာကာ ယခုအခါ ပြည်ထောင်စုအတွက် ကြီးမားသော ခြိမ်းခြောက်မှုတစ်ခုဖြစ်လာသည်။

နောက်အကြောင်းတစ်ခုသည် ယခင် ၎င်းတို့၏ မျောက်များကို ခြိမ်းခြောက်ရန်အတွက် ကြက်များပို သတ်ဖြတ်ခဲ့ခြင်းသည် မအောင်မြင်ခဲ့သောကြောင့် တခြားသော လှုပ်ရှားမှုများ ပြုလုပ်ရန် သတ္တိရှိသေးလားဟူ၍ အဓိပ္ပာယ်ဖြင့် ယခင်ထက်ပိုကြီးသော ကြက်တစ်ကောင်ကို သတ်ပစ်ရန် ရည်ရွယ်ခဲ့ခြင်းဖြစ်သည်။ ဤသည်မှာ မီးလျှံစစ်သည်ဂိုဏ်းက သတိလက်လွတ်ဖြစ်သွားရသည့် အကြောင်းရင်းလည်းဖြစ်သည်။

ချူးယွင်ဖန်း၏ တည်ငြိမ်သော အမူအရာကိုကြည့်နေသော ဂိုဏ်းခေါင်းဆောင်သည် ကနဦးကတည်းက လှည့်စားခံခဲ့ရကြောင်း ချက်ချင်းသဘောပေါက်သွားသည်။ ချူးယွင်ဖန်း၏ အမိန့်ပေးချက်သည် ဟာသတစ်ခုကဲ့သို့ ထင်ရသော်လည်း ၎င်းသည် လှုပ်ရှားမှုကို ဖုံးကွယ်ရန် ပရိယာယ်သာဖြစ်သည်။

ချူးယွင်ဖန်းသည် မည်သည့်အခါမှ ဆွေးနွေးတိုင်ပင်ရန် မရည်ရွယ်ခဲ့ပေ။ ဆန့်ကျင်ဘက်အနေဖြင့် သူသည် မီးလျှံစစ်သည်ဂိုဏ်းကို တစ်ချက်တည်းဖြင့် ဖမ်းဆီးချင်နေခဲ့သည်။ အမိန့်ထုတ်ပြန်ရသည့် အကြောင်းရင်းသည် ချူးယွင်ဖန်းက ပေါက်ကရပြောနေခြင်းဟု ထင်မှတ်စေရန်နှင့် ၎င်းတို့ကို အငိုက်မိစေရန်ဖြစ်သည်။

ချူးယွင်ဖန်းသည် ဤအချိန်ကို အခွင့်ကောင်းယူ၍ လူသတ်လက်နက်ကြီး ယူဆောင်လာလိမ့်မည်ဟု မည်သူက ထင်မှတ်မည်နည်း။ ချူးယွင်ဖန်းသည် ဖြောင့်မတ်ဟန်ဖြင့် အခြေအနေထဲသို့ လောင်စာထည့်နေသော ထိပ်တန်းပုဂ္ဂိုလ်များအားလုံးတွင် လှည့်စားခဲ့ခြင်းဖြစ်သည်။

"ခင်ဗျားရဲ့ စည်းမျဥ်းအတိုင်း ဘယ်သူက ကစားချင်မှာလဲ၊ ဒီနေ့မှာ ခင်ဗျားတို့ဂိုဏ်း လွတ်မြောက်မှာ မဟုတ်ဘူး။ ခင်ဗျားလက်မြှောက် အညံ့ခံမှာလား ဒါမှမဟုတ်ရင် ခင်ဗျားကို ကိုယ်တိုင် ဖြေရှင်းစေချင်သလား" ချူးယွင်ဖန်းက မေးလိုက်သည်။

"မျိုးမစစ်ကောင်"

ဂိုဏ်းခေါင်းဆောင်သည် ချူးယွင်ဖန်း၏ အစီအစဉ်ကို နားလည်လိုက်သည်။ မီးလျှံစစ်သည်ဂိုဏ်း၏ ဌာနချုပ်သည် ချဉ်းကပ်လာသော စစ်တပ်ကြီးကို ရပ်တန့်နိုင်မည် မဟုတ်ပေ။ မီးလျှံစစ်သည်ဂိုဏ်းသည် ထိုအချိန်တွင် ပြာပုံများအဖြစ်သို့ ပြောင်းလဲသွားမည်ဖြစ်၍ သူ၏ကြိုးစား အားထုတ်မှုအားလုံးသည်လည်း မီးခိုးငွေ့များအဖြစ်သို့ ပြောင်းလဲသွားမည်ဖြစ်သည်။

ထိုအချိန်တွင် ၎င်းတို့ ပြုလုပ်နိုင်သည့် တစ်ခုတည်းသော အရာသည် ခေါင်းဆောင်ကို ဖမ်းဆီးရန်ဖြစ်သည်။ ချူးယွင်ဖန်းကို ဖမ်းဆီးနိုင်မှသာလျှင် အရာအားလုံး အဆုံးသတ်ပေလိမ့်မည်။

"ဒါက ခင်ဗျားကိုယ်တိုင် လုပ်ခဲ့တဲ့အပြစ်ပဲ။ အခု ခင်ဗျားအသက်နဲ့ ပြန်ပေးဆပ်ဖို့ အချိန်ရောက်ပြီ"

"မင်းက သေကြောင်းကြံစည်နေတာပဲ" ဂိုဏ်းခေါင်းဆောင်သည် အလွန် ဒေါသထွက်သွားရာ၊ သူ၏ ကြောက်မက်ဖွယ် အငွေ့အသက်များက အခြေစိုက်စခန်းတစ်ခုလုံးကို ချက်ချင်း လွှမ်းခြုံသွားသည်။

မီးလျှံစစ်သည်ဂိုဏ်း၏ နောက်လိုက်များသည် ၎င်းတို့၏ဂိုဏ်းခေါင်းဆောင်ကို မြင်သောအခါ နတ်ဘုရားတစ်ပါးကို ကြည့်နေသကဲ့သို့ ဒူးထောက်လိုက်ကြသည်။ အဆုံးမဲ့သော ဦးနှောက်ဆေးကြောမှုအပြီး၌ ၎င်းတို့၏ဂိုဏ်းခေါင်းဆောင်သည် သက်ရှိနတ်ဘုရားဖြစ်ကြောင်း ယုံကြည်နေကြပြီဖြစ်သည်။

"ဓားပြတွေကို ဖမ်းဖို့ဆိုရင် ခေါင်းဆောင်ကို အရင်ဖမ်းဆီးရမယ်။ ကျုပ်လည်း အကြံတူနေတာနဲ့ အတော်ပဲ" ချူးယွင်ဖန်းသည် ဂိုဏ်းခေါင်းဆောင်ကို စိုက်ကြည့်လိုက်သည်။

ခွန်အားအရဆိုလျှင် မီးလျှံစစ်သည်ဂိုဏ်း၏ ခေါင်းဆောင်နှင့် ပန်းပွင့်လှုပ်ခတ်ခြင်းဂိုဏ်း၏ ဒုဂိုဏ်းခေါင်းဆောင်တို့၏ အစွမ်းအစသည် မတူညီကြပေ။ တတိယမိကျောင်းမင်းသားဆိုလျှင် ထည့်ပြောရန်ပင် မလိုအပ်ပေ။ သို့သော် ၎င်းတို့အားလုံးသည် ချူးယွင်ဖန်း၏အရှေ့တွင် အသုံးမဝင်ပေ။ ချူးယွင်ဖန်းသည် အရာအားလုံးကို နှိမ်နှင်းနိုင်သူဖြစ်သည်။

ဘုံး

ဂိုဏ်းခေါင်းဆောင်သည် ဦးစွာ လှုပ်ရှားလိုက်ရာ၊ သူသည် ကောင်းကင်ကို ပြည့်လျှံသွားစေသော သူ၏ နတ်အဆင့်စွမ်းရည်ကို အသက်သွင်းလိုက်သည်။ မရေတွက်နိုင်သော နေမင်းများ ထွက်ပေါ်လာသကဲ့သို့ မရေတွက်နိုင်သော မီးတောက်မီးလျှံများ ကောင်းကင်၌ ချက်ချင်း စုစည်းလာလေ၏။