အခန်း (၉၀၇-၉၀၉)

အခန်း (၉၀၇) နောက်ဆုံးတွင် သီးသန့်ကျင့်ကြံရာမှ ထွက်လာ၍ တစ်ဖက်တည်းဖြင့် နတ်စွမ်းအင်ကို ပြသခြင်း

စစ်မြေပြင်ကို အပိုင်းငါးပိုင်းခွဲခြမ်းထားကာ နတ်အဆင့် ကျွမ်းကျင်သူ ဆယ်ဦးကျော်သည် ခွန်းလွန်မြို့အထက်တွင် အပြင်းအထန် တိုက်ခိုက်နေကြသည်။ မြို့ထဲတွင် ရှိနေသူတိုင်း ကြောက်ရွံ့တုန်လှုပ်နေကြသည်။ သို့သော်လည်း မည်သည့်သတင်းကိုမျှ ထုတ်ပြန်ခဲ့ခြင်း မရှိသောကြောင့် မည်သည့် အကြောင်းအရာများ ဖြစ်ပျက်နေသည်ကို မည်သူမျှ မသိကြပေ။ ဆက်သွယ်ရေး အားလုံးကို လုံးလုံးလျားလျား ပိတ်ဆို့ထားကြသည်။ ၎င်းတို့သည် ဤကိစ္စရပ်အတွက် ကြိုတင်ပြင်ဆင်ထားကြသည်မှာ သိသာထင်ရှားသည်။

စစ်မြေပြင်၌ ချူးဟောက်ယွဲ့သည် အခက်ခဲဆုံး အခြေအနေနှင့် ကြုံတွေ့နေရသူဖြစ်သည်။ ဟွမ်မိသားစု ဘိုးဘေးကြီးနှင့် ချူးဟောက်ယွဲ့ကြားက ကွာဟချက်သည် ကြီးမားလွန်းလှသည်။ ဟွမ်မိသားစု ဘိုးဘေးကြီး သည် ၎င်း၏ အထွတ်အထိပ် အခြေအနေတွင် ရှိမနေသော်လည်း ချူးဟောက်ယွဲ့သည် တိုက်ပွဲအတွေ့အကြုံနှင့် ကျင့်ကြံမှုအဆင့် ကွာဟချက်တို့ကြောင့် လုံးလုံးလျားလျား ဖိနှိပ်ခံလိုက်ရသည်။

သူသည် ဤအဆင့်သို့ ရောက်ရှိလာခဲ့သည့်မှာ မကြာမြင့်သေးသောကြောင့် ချက်ခြင်းဆိုသလို ဖိနှိပ်ခံလိုက်ရလေသည်။ အခြေအနေကို သုံးသပ်ကြည့်လျှင် ဟွမ်မိသားစု ဘိုးဘေးကြီးသည် မကြာမီ သူ့ကို ဖြတ်ကျော်နိုင်ပေလိမ့်မည်။ ဤအခိုက်အတန့်တွင် နတ်အဆင့်၏ မတူညီသောအဆင့်များအကြားက ခြားနားချက်ကို အထူးစစ်ဆင်ရေးအဖွဲ့ဝင်များက နောက်ဆုံးတွင် သဘောပေါက်သွားကြသည်။

အခြားသော စစ်မြေပြင်တစ်ခုရှိ အပြာရောင်ပုံရိပ်ကို လူတိုင်း သတိပြုမိကြသည်။ ၎င်းသည် ချူးယွင်ဖန်းအနောက်တွင် တစ်နှစ်ပတ်လုံး လိုက်ပါလာသည့် မိုးကြိုးတောင်ပံသားရဲမှလွဲ၍ အခြားမဟုတ်ပေ။ အရေးအကြီးဆုံး အခိုက်အတန့်တွင် မိုးကြိုးတောင်ပံသားရဲပင် ပေါ်ပေါက်လာခဲ့သည်။ အခြေအနေသည် မည်မျှ ဆိုးရွားနေသည်ကို လူတိုင်း သိနိုင်သည်။ တစ်နည်းဆိုရသော် ယခုအချိန်တွင် ချူးယွင်ဖန်းကို ခုခံကာကွယ်မည့်လူမရှိပေ။ အခြေအနေသည် မည်မျှ အန္တရာယ်ရှိမည်ကို တွေးကြည့်ရန် လွယ်ကူလှသည်။

သွေးနီရောင် မျိုးစပ်မွန်းစတားသည် အလွန်ပြင်းထန်သော နတ်ဆိုးအရောင်အဝါများ သယ်ဆောင်လာသည်။ ၎င်းကို တွန်းအားပေး၍ မဖန်တီးနိုင်မီ မည်မျှသော လူသားများ၏ နာကြည်းမှုများကို ခံယူထားကြောင်း မည်သူတစ်ဦးတစ်ယောက်မျှ မသိသော်လည်း မိုးကြိုးတောင်ပံသားရဲသည် ၎င်းကို လုံးလုံးလျားလျား ဖိနှိပ်လိုက်သည်။ မိုးကြိုး စွမ်းအင်သည် ဤနတ်ဆိုးစွမ်းအင်ကို လွှမ်းမိုးထားသဖြင့် ၎င်းကို အနောက်သို့ ဆုတ်ခွာသွားစေသည်။

သို့သော်လည်း အထူးစစ်ဆင်ရေးတပ်ဖွဲ့ဝင်များ၏ စိတ်နှလုံးသားများ တင်းမာနေကြသည်။ ၎င်းတို့ဘက်၏ အခြေအနေသည် လုံးလုံးလျားလျား အားနည်းနေကြောင်း ၎င်းတို့အားလုံး မြင်တွေ့နိုင်သည်။ တန်စီယု သို့မဟုတ် မိုးကြိုးတောင်ပံသားရဲတို့က အသာစီးရနေလျှင်ပင် ၎င်းတို့နှစ်ဦးတည်းဖြင့် ဖြေရှင်းသွားနိုင်သည့် အရာ မဟုတ်ပေ။

ဤအန္တရာယ်ကြီးမားသော အခြေအနေမှ လွတ်မြောက်ရန် တစ်ခုတည်းသော နည်းလမ်းသည် ၎င်းတို့၏ ခေါင်းဆောင်က သီးသန့်ကျင့်ကြံမှုမှ ထွက်လာရန်ဖြစ်သည်။ သို့မှသာ ဤလွန်ကဲသော အားနည်းချက်ကို ပြောင်းလဲနိုင်ချေရှိပေလိမ့်မည်။ စစ်မြေပြင်၌ ရလဒ်များကို နောက်ဆုံးတွင် ဆုံးဖြတ်ခဲ့ကြသည်။ အထူးစစ်ဆင်ရေးအဖွဲ့ဝင်များသည် စက္ကန့်တိုင်းကို ရာစုနှစ်တစ်ခုကဲ့သို့ ခံစားနေရသည်။ တိုက်ပွဲ၏ရလဒ်ကို စက္ကန့်တိုင်းက အဆုံးအဖြတ်ပေးနိုင်သည်။

ပထမဦးဆုံး မတောင့်ခံထားနိုင်သူသည် ဟွမ်မိသားစု ဘိုးဘေးကြီး၏ တိုက်ခိုက်မှုကြောင့် လွင့်ပျံသွားသော ချူးဟောက်ယွဲ့ဖြစ်သည်။

ပြီးနောက် ဟွမ်မိသားစု ဘိုးဘေးကြီးက မရပ်တန့်ခဲ့ပေ။ သူသည် ချူးယွင်ဖန်းကို သတ်ဖြတ်လိုသောကြောင့် အထူးစစ်ဆင်ရေးဌာနဆီသို့ ပြေးဝင်သွားခဲ့သည်။

"သေစမ်း။ သူ့ကို တားကြ။ ဒုံးကျည်အားလုံး ပစ်ကြ။ စက်လက်နက်တွေ ထွက်ခွာမယ်" ဟော့ရို့နန် ဟိန်းဟောက်လိုက်သည်နှင့် အထူးစစ်ဆင်ရေးဌာနအတွင်းမှ မြောက်မြားစွာသော ဒုံးကျည်များ ကျည်ဆန်မိုးများကဲ့သို့ ပျံ့နှံ့လာသည်

"ဟမ်း" ဟွမ်မိသားစု ဘိုးဘေးကြီး၏ လက်ထဲရှိ ဓားရှည်သည် သူ့အရှေ့ရှိ လေထုကို ခုတ်ပိုင်းလျက် အေးစက်စွာ သရော်လိုက်သည်။

ဒုံးကျည်များနှင့် အမြောက်ကျည်များ အားလုံးသည် သူ့ကို အနည်းငယ်မျှ မထိခိုက်နိုင်ဘဲ လေထုထဲတွင် ပေါက်ကွဲသွားခဲ့သည်။ နျူကလီးယားဗုံးမဟုတ်ပါက သူ့အဆင့်ရှိ ကျွမ်းကျင်သူတစ်ဦးကို ခြိမ်းခြောက်ရန် အလွန်ခက်ခဲမည်ဖြစ်သည်။

ဟွမ်မိသားစု ဘိုးဘေးကြီးသည် အရှေ့သို့ ချီတက်လိုက်သည်။ ကောင်းကင်ယံသို့ မြင့်တက်လာသော စက်လက်နက်များသည် သူ့ကို အချိန်မီ မတားဆီးနိုင်ပေ။ ဟွမ်မိသားစု ဘိုးဘေးကြီးသည် ၎င်းတို့ကို ကျော်ဖြတ်သွားခြင်းကိုသာ ကြည့်နေနိုင်ခဲ့သည်။

ရုတ်တရက်ဆိုသလိုပင် အဆောက်အဦးအတွင်းမှ ကြောက်မက်ဖွယ် အလင်းရောင်တစ်ခု ထွက်ပေါ်လာသည်။ မရေတွက်နိုင်သော ဝိညာဉ်စွမ်းအင်များသည် ထိုဦးတည်ချက်ဆီသို့ စုပြုံလာကြသည်။ ကြောက်မက်ဖွယ်ကောင်းသော စွမ်းအင်များသည် ခွန်းလွန်မြို့၏ ထက်ဝက်နီးပါးခန့်ကို လွှမ်းခြုံထားလိုက်သည်။

"ဒါက လူတစ်ယောက် နတ်အဆင့်ကို ဖြတ်ကျော်နေတဲ့ ဖြစ်စဉ်ပဲ။ ဒါပေမယ့် ဘာလို့ ဒီလောက်ထိ ပြင်းထန်နေရတာလဲ"

လူတိုင်းက အံ့ဩသွားကြရာ၊ အထူးသဖြင့် ဟွမ်မိသားစု ဘိုးဘေးကြီး လုံးလုံးလျားလျား အံ့ဩနေမိသည်။ သူသည် ကြောက်မက်ဖွယ်ကောင်းသော ဝိညာဉ်စွမ်းအင်များ၏ ဖိအားကို ပထမဦးဆုံး ခံစားရသူဖြစ်သည်။ နတ်အဆင့်သို့ ဖြတ်ကျော်ချိန်တွင် သူ ခေါ်ဆင့်ခဲ့သော စွမ်းအင်သည် ဤအတိုင်းအတာ၏ ဆယ်ပုံတစ်ပုံမျှပင် မရှိခဲ့ပေ။

ဤသည်မှာ တစ်စုံတစ်ဦး နတ်အဆင့်သို့ ဖြတ်ကျော်သောအခါ သဘာဝမှ ဖြစ်ပေါ်လာသော ဖြစ်စဉ်တစ်ခုဖြစ်သည်။ ထိုပုဂ္ဂိုလ်သည် အဆင့်ဖြတ်ကျော်ပြီးနောက် သဘာဝတရားနှင့် တစ်သားတည်းဖြစ်လာ၍ ဤဖြစ်စဉ်ကို ဖြစ်ပေါ်စေခြင်းဖြစ်သည်။

"သူ အဆင့်ဖြတ်ကျော်နေပြီ။ ဒီအချိန်ပဲ၊ ကျုပ်တို့ သူ့ကို ရှင်သန်ခွင့် ပြုလို့မဖြစ်ဘူး' ဟွမ်မိသားစု ဘိုးဘေးကြီးက ကြွေးကြော်လိုက်သည်။

ကောင်းကင်ယံရှိ ကျန်းမိသားစု ဘိုးဘေးကြီးသည်လည်း အော်ဟစ်လိုက်သည်။

"သူ့ကို တားကြ၊ ပြီးရင် သတ်ပစ်လိုက်"

မော့ပေသိုးနှင့် အခြားသော ကျွမ်းကျင်သူများအားလုံး အေးခဲတောင့်တင်းသွားကြသည်။ အနိုင် အရှုံးသည် ထိုအခိုက်အတန့်၌ အဆုံးအဖြတ်ပေးသွားမည်ကို ၎င်းတို့အားလုံး သိကြသည်။

ကံကောင်းထောက်မစွာဖြင့် ၎င်းတို့တွင် အချိန်ရှိသေးသောကြောင့် သူ့ကို တားဆီးနိုင်မည်ဖြစ်သည်။ ချူးယွင်ဖန်းသည် အဆင့် ဖြတ်ကျော်သွားသော်လည်း ထိုလုပ်ငန်းစဉ်ကို ပြီးမြောက်နိုင်ရန် အချိန်အနည်းငယ် ယူရဦးဖြစ်သည်။

သို့သော် ထိုအချိန်တွင် ၎င်းတို့ထက်ပင် ပိုမို မြန်ဆန်သော ပုံရိပ်တစ်ခု ရောက်ရှိလာသည်။ ၎င်းသည် အမှောင်ပုံရိပ်တစ်ခုဖြစ်၍ ခန္ဓာကိုယ်မှ တုန်လှုပ်ချောက်ချားဖွယ် နတ်ဆိုးစွမ်းအင်များ ထုတ်လွှတ်နေသည်။ ထိုစွမ်းအင်များသည် အဆောက်အဦးတစ်ခုလုံးကို ဖုံးလွှမ်းသွားလေသည်။

"အဲဒါ နတ်ဆိုးတွေပဲ။ သူတို့က ကျွမ်းကျင်သူတစ်ယောက်ကို လွှတ်လိုက်တာပဲ"

အထူးစစ်ဆင်ရေးအဖွဲ့ဝင်များသည် လုံးလုံးလျားလျား အံ့အားသင့်သွားကြသည်။ ဤကိစ္စတွင် နတ်ဆိုး ကျွမ်းကျင်သူတစ်ဦး ပါဝင်ပတ်သက်လာမည်ဟု ၎င်းတို့မျှော်လင့်ထားကြသည်။

ပြည်ထောင်စုအတွင်းနှင့် ပြင်ပဘက်ရှိ ကျွမ်းကျင်သူများ ပါ၀င်ပတ်သက်နေ၍ အဏ္ဏဝါမျိုးနွယ်နှင့် နတ်ဆိုးများလည်း ပါဝင်လာခဲ့သည်။ ဤအရာအားလုံးသည် ချူးယွင်ဖန်းကို သတ်ဖြတ်ရန်သာဖြစ်သည်။

"နတ်ဆိုးတွေတောင် ဝင်ပါလာပြီ"

"အတင့်ရဲရဲ့..." ကျူးပုဖျင်သည် ချက်ခြင်းပင် အလွန် ဒေါသထွက်သွားသည်။ ဤကိစ္စက ၎င်းတို့ ထင်ထားသည်ထက် ပို၍ ရှုပ်ထွေးလှသည်။

ကျန်းမိသားစု ဘိုးဘေးကြီး ဤနတ်ဆိုး ကျွမ်းကျင်သူကို ဖိတ်ခေါ်ခဲ့ခြင်းဖြစ်စေ၊ မဖိတ်ခေါ်ခဲ့ခြင်းသည်ဖြစ်စေ၊ ၎င်းတို့ ရောက်ရှိလာမှုသည် ချူးယွင်ဖန်းကို သတိပြုမိလာကြောင်း အချက်ပြနေခြင်းဖြစ်သည်။

ချူးယွင်ဖန်းသည် ၎င်းတို့ လျစ်လျူရှုနိုင်သူမဟုတ်ကြောင်း သိသာထင်ရှားသည်။ သူ၏ အလင်းရောင်သည် ထွန်းတောက်လွန်းလှရာ နတ်ဆိုးများပင် သူ့ကို ကြောက်ရွံ့လာကြသည်။ ၎င်းတို့သည် သူ့ကိုသတ်ဖြတ်ရန် ဤတစ်သက်တွင် တစ်ခါသာ ရရှိသော အခွင့်အရေးကို အသုံးချချင်နေကြသည်။

ချူးယွင်ဖန်းသည် သာမာန်အခြေအနေအရ ခွန်းလွန်မြို့တွင်းရှိ မြို့စောင့်တပ်၏ အကာအကွယ်နှင့် သူ၏ ပြင်းထန်သော အင်အားဖြင့် နေထိုင်နေသမျှ၊ နတ်ဆိုးအနည်းငယ် ရောက်လာလျှင်ပင် ၎င်းတို့အားလုံး သေကြေပျက်စီးမည်မှာ သေချာသည်။ နတ်ဆိုးများသည် ဤအချိန်မှသာ ချူးယွင်ဖန်းကို သတ်ဖြတ်ရန်အတွက် ပြည်ထောင်စု၏ ပြည်တွင်းပဋိပက္ခများကို အသုံးချနိုင်ကြသည်။ လူအချို့သည် အရိပ်၏ ပုံသဏ္ဌာန်အစစ်အမှန်ကို မြင်တွေ့လိုက်ကြသည်။ ၎င်းသည် အမြီးခြောက်ချောင်းပါရှိသော မြေခွေးတစ်ကောင်ဖြစ်၍ ၎င်း၏ခန္ဓာကိုယ်တစ်ခုလုံးသည် မီးတောက်များဖြင့် တောက်လောင်နေသည်။

ဤမွန်းစတား၏ မှတ်တမ်းများကို ပြည်ထောင်စုအတွင်း၌ စာတမ်းပြုစုထားကြ၍ ၎င်းသည် အမြီးခြောက်ချောင်း ငရဲမီးတောက် မြေခွေးဖြစ်သည်။ ဤမွန်းစတားသည် ကိုယ့်ကိုယ်ကို ဖုံးကွယ်ရာတွင် အလွန် ကျွမ်းကျင်လှသည်။ နတ်အဆင့်များလျှင်ပင် ယင်းကို အာရုံခံနိုင်မည်မဟုတ်ပေ။ ကျွမ်းကျင်သူများစွာရှိနေသော်လည်း ၎င်းတို့အနီးတွင် ပုန်းအောင်းနေသော အမြီးခြောက်ချောင်း ငရဲမီးတောက် မြေခွေးရှိခြင်းကို မည်သူမျှ မသိခဲ့ကြပေ။

၎င်းသည် ချူးယွင်ဖန်းကို လုပ်ကြံသတ်ဖြတ်ရန်အတွက် ဤအခွင့်အရေးကို စောင့်မျှော်နေခဲ့သည်မှာ သိသာထင်ရှားသည်။ လုပ်ကြံမှုတွင် ထိုမြေခွေးက သူ့ထက် သန်မာနေကြောင်း သိနေသည့်အတွက် ဟွမ်မိသားစု ဘိုးဘေးကြီးက ရပ်တန့်သွားသည်။ ဟွမ်မိသားစု ဘိုးဘေးကြီး၏ မျက်လုံးများတွင် လောဘဇောများဖြင့် ပြည့်နှက်နေစဉ် ထိုမြေခွေးကို နတ်အာရုံဖြင့် စိုက်ကြည့်လိုက်သည်။

နတ်အဆင့် အမြီးခြောက်ချောင်း ငရဲမီးတောက် မြေခွေးသည် သေဆုံးသည်ဖြစ်စေ၊ ရှင်သန်သည်ဖြစ်စေ ၎င်း၏တန်ဖိုးသည် တိုင်းတာ၍ မရနိုင်ပေ။ အထူးစစ်ဆင်ရေးတပ်ဖွဲ့ဝင်များက စိတ်ပျက်လက်ပျက်ဖြစ်ခါနီးတွင် အဆောက်အဦးအတွင်းမှ ဧရာမ လက်ကြီးတစ်ခု ရုတ်တရက် ထွက်ပေါ်လာ၍ မြေခွေးကို ဖမ်းဆုပ်ကာ ၎င်း၏ဦးခေါင်းကို တင်းကြပ်စွာ ဖိညှစ်ထားလိုက်သည်။

ပြီးနောက် လှောင်ရယ်သံတစ်ခုကို ကြားလိုက်ရသည်။

"ကျုပ်ကို သတ်ဖို့၊ ဒီလောက် ခမ်းနားတဲ့ တပ်ဖွဲ့ကြီးကို လွှတ်လိုက်တာကိုး။ ဒါလည်း ကောင်းသားပဲ။ တစ်ယောက်မှ ဒီနေရာကနေ ထွက်သွားဖို့ မစဉ်းစားကြနဲ့၊ အတူသေကြပေါ့"

အခန်း (၉၀၈) လက်တစ်ဖက်တည်းဖြင့် ကြောက်မက်ဖွယ် တိုက်ခိုက်မှု

ထိုအသံသည် လူတိုင်း၏အာရုံကို စွဲဆောင်သွားစေသည်။ စစ်မြေပြင်ရှိ နတ်အဆင့် ကျွမ်းကျင်သူများလျှင်ပင် လှည့်ကြည့်လိုက်မိသည်။ ဧရာမလက်ကြီးသည် အမြီးခြောက်ချောင်း ငရဲမီးတောက် မြေခွေးကို ဖိထားကြောင်း မြင်တွေ့လိုက်သောအခါ ၎င်းတို့အားလုံး ပင့်သက်ရှိုက်မိသွားကြသည်။

မြေခွေးသည် လုပ်ကြံသတ်ဖြတ်မှုတွင်သာ ကျွမ်းကျင်၍ တိုက်ရိုက်တိုက်ခိုက်မှုတွင် မကျွမ်းကျင်သော်လည်း ၎င်းသည် နတ်အဆင့်သို့ ဝင်ရောက်နေပြီဖြစ်သည်။ ဤအဆင့်ရှိ ကျွမ်းကျင်သူတွင် ချို့ယွင်းချက်တစ်ခုခုရှိခဲ့လျှင်ပင် အားနည်းမည် မဟုတ်ပေ၊ မည်သို့ဆိုသော် ကဏ္ဍပေါင်းစုံရှိ ၎င်းတို့၏ အရည်အချင်းများသည် နတ်အဆင့်သို့ တက်လှမ်းပြီးသည်နှင့် တိုးမြင့်လာပေလိမ့်မည်။

၎င်းတို့သည် မြေခွေးနှင့် ရင်ဆိုင်ရသောအခါ မြန်ဆန်လွန်းသောကြောင့် ကိုင်တွယ်ရခက်သည်ဟု ထင်မှတ်ကြသည်။ အထူးသဖြင့် ၎င်းသည် ပုန်းအောင်း၍ တိုက်ခိုက်တတ်သောကြောင့် ခုခံကာကွယ်ရန် ခက်ခဲလှစေသည်။ ထိုအခြေအနေတွင် ဟွမ်မိသားစု ဘိုးဘေးကြီးလျှင်ပင် မြေခွေး၏ အံ့အားသင့်ဖွယ်ရာ တိုက်ခိုက်နိုင်စွမ်းကို ယုံကြည်သောကြောင့် ရပ်တန့်သွားခြင်းဖြစ်သည်။ ချူးယွင်ဖန်းသည် လွတ်မြောက်နိုင်မည် မဟုတ်ပေ။

သို့သော် မြေခွေးက မတိုက်ခိုက်နိုင်မီ ၎င်းကို ဧရာမ လက်ကြီးက မြေပေါ်သို့ ဖိထားလိုက်သည်။ မြေခွေးသည် ကောင်းကင်၌ တိုက်ခိုက်နေသော ဧရာမ မိကျောင်းကြီးထက် များစွာသေးငယ်သော်လည်း ၎င်းသည် ဆယ့်ခြောက်ပေကျော် မြင့်မားဆဲဖြစ်သည်။ သို့သော် စွမ်းအင်ဖြင့် စုစည်းထားသော ဧရာမ လက်ကြီးသည် မြေခွေးကို ဖိနှိပ်ထားခဲ့သည်။ ဤပြောင်းလဲမှုများသည် မှုန်ပျပျဖြစ်နေသကဲ့သို့ မြန်ဆန်လွန်းလှသည်။

မြေခွေးသည် အလွန် ဒေါသထွက်ကာ ကောင်းကင်ယံတွင် ပြည့်နှက်သွားသော မီးတောက်များအဖြစ်သို့ ပြောင်းလဲသွားကာ အထူးစစ်ဆင်ရေးဌာနတစ်ခုလုံးကို လောင်ကျွမ်းသွားစေတော့သည်။ ၎င်းသည် ဤအတိုင်းအတာအထိ အနိုင်ကျင့်ခြင်း မခံခဲ့ရသည့်အတွက် အလွန် ဒေါသထွက်သွားလေသည်။ အဆုံးမဲ့သော အမှောင် မီးတောက်များသည် သူ့အပေါ်ကို ဖိနှိပ်ထားသည့် ဧရာမ လက်ကြီးကို လောင်ကျွမ်းတော့မည်ဖြစ်သည်။

ထိုအချိန်တွင် ၎င်းမြေခွေးသည် ဒုတိယမြောက် နတ်အဆင့်သို့ ရောက်ရှိနေပြီဖြစ်ကြောင်း အခြားသော နတ်အဆင့် ကျွမ်းကျင်သူများက သိရှိသွားကြသည်။

ထိုကဲ့သို့ ကျင့်ကြံမှုဖြင့်ဆိုလျှင် ကျန်းမိသားစု ဘိုးဘေးကြီးမှလွဲ၍ ဤနေရာတွင် ရှိနေသူတိုင်း လျှပ်တစ်ပြက် တိုက်ခိုက်ခံရပါက ပြင်းထန်စွာ ဒဏ်ရာ ရရှိသွားပေလိမ့်မည်။ မြေခွေးသည် အမှန်တကယ်ပင် လူသား-နတ်ဆိုး စစ်မြေပြင်မှ လုပ်ကြံသတ်ဖြတ်သူဖြစ်၍ အလွန်ကြောက်မက်ဖွယ် ကောင်းလှသည်။

သို့သော် ၎င်းသည် မည်မျှသော ဝိညာဉ်စွမ်းအင်များ ထုတ်လွှတ်စေကာမူ ဧရာမ လက်ကြီးကို မလောင်ကျွမ်းစေနိုင်ကြောင်း ချက်ခြင်း သဘောပေါက်လိုက်သည်။ ထိုဧရာမ လက်ကြီးသည် နတ်တောင်တန်းတစ်ခုကဲ့သို့ မြေခွေးကို အောက်သို့ တင်းကျပ်စွာ ဖိနှိပ်ထားသည်။ မြေခွေးက အလွန်ဂုဏ်ယူလှသော အနက်ရောင် မီးတောက်များသည် ဧရာမ လက်ကြီးနှင့် ဆန့်ကျင်ရာတွင် လုံးလုံးလျားလျား အသုံးမဝင်ပေ။

ဧရာမ လက်ကြီးသည် ရုတ်တရက် မြင့်တက်လာသောကြောင့် မြေခွေးက အလွန် ပျော်ရွှင်သွားသည်။ နောက်ဆုံးတွင် လွတ်မြောက်ရန် အခွင့်အရေး ရခဲ့ပြီဖြစ်သည်။

၎င်းသည် ချက်ချင်းပင် အနက်ရောင် အသွင်အပြင်သို့ ပြောင်းလဲကာ သဲလွန်စမရှိဘဲ ပျောက်ကွယ်သွားခဲ့သည်။ သို့သော်လည်း ဧရာမ လက်ကြီးသည် ပိုမိုမြန်ဆန်စွာ တုံ့ပြန်၍ ရွှေရောင်မိုးကြိုးအဖြစ်သို့ ပြောင်းလဲကာ အမှောင်ပုံရိပ်ဆီ ထုချလိုက်သည်။

ဘန်း

လက်ကြီးသည် မြေခွေး၏ ခန္ဓာကိုယ်ကို ထုရိုက်လိုက်သောအခါ ပေဒါဇင်ခန့်မြင့်မားသော ဖုန်တိမ်တိုက်များ ဖြစ်ပေါ်သွားစေသည်။ အထူးစစ်ဆင်ရေးဌာန အဆောက်အဦး၏ မြေပြင်များ အက်ကွဲသွားလေ၏။ မြေပြင်ကို ထူးခြားသော ဘိလပ်မြေမျိုးဖြင့် ပြုလုပ်ထားသောကြောင့် ဒုံးကျည်များ အသုံးပြု၍ ဖောက်ခွဲလျှင်ပင် မထိခိုက်နိုင်သော်လည်း ယခုအခါ အပိုင်းပိုင်း ကွဲအက်သွားခဲ့သည်။ ဧရာမ လက်ကြီးက မည်မျှ အင်အားကြီးမားသည်ကို တွေးကြည့်နိုင်ပေသည်။ မြေခွေးသည် အဝေးသို့ ထွက်ပြေးရန် ရုန်းကန်ခဲ့သော်လည်း လက်ကြီးက တစ်ဖန် ရိုက်နှက်လာသည်။

ဘန်း

မြေခွေးက မြေပြင်ပေါ်သို့ ပြန်ကျသွားကာ ၎င်း၏ ခန္ဓာကိုယ်ထဲက အရိုးများအားလုံး ကျိုးကြေသွားသကဲ့သို့ ထင်မှတ်ရစေသည်။ ကြောက်မက်ဖွယ်ကောင်းသော ရိုက်ခတ်မှုသည် ၎င်းကို မူးမော်သွားစေသည်။ ထိုမြေခွေးသည် ဒေါသတကြီး ဟိန်းဟောက်လိုက်သည်။ လူသား-နတ်ဆိုး စစ်မြေပြင်ကို လွှမ်းမိုးထားခဲ့သော နတ်အဆင့် ကျွမ်းကျင်သူတစ်ဦးအနေဖြင့် ၎င်းသည် မည်သည့်အခါမျှ အရှုံးမပေးဘဲ ကောင်းကင်ယံသို့ ပျံသန်းသွားပြန်သည်။ သို့သော် ဧရာမ လက်ကြီးသည် နောက်တစ်ကြိမ် ရိုက်နှက်လာသည်။

ဘန်း

ဘန်း

ဘန်း

မြေခွေးသည် အကြိမ်ပေါင်းများသွာ ထွက်ပြေးရန် ကြိုးစားခဲ့သော်လည်း ဧရာမ လက်ကြီးသည် ၎င်းကို ဆက်လက် ရိုက်နှက်နေဆဲဖြစ်သည်။ မြေခွေးသည် ထိုဧရာမ လက်ကြီးဆီမှ မလွတ်မြောက်နိုင်ပေ။

မြေခွေးသည် နောက်ဆုံးအကြိမ် ရိုက်နှက်ခံရသောအခါ ၎င်း၏ အနီးတစ်ဝိုက်တွင် ကြီးမားသော တွင်းကြီးတစ်ခု ဖြစ်ပေါ်လေ၏။ မြေခွေးသည် ထိုအချိန်တွင် ၎င်း၏ ယခင်က နတ်ဆိုး အရောင်အဝါများ မရှိတော့ပေ။ ၎င်းသည် ကြီးမြတ်သော နတ်ဆိုးတစ်ကောင်ကဲ့သို့ ထင်မှတ်ရသော်လည်း ၎င်း၏သွေးများက ခန္ဓာကိုယ်တစ်ခုလုံးကို လွှမ်းခြုံနေခဲ့သည်။

၎င်း၏အမွေးများမှ သွေးများစိမ့်ထွက်ကာ ခြေလေးချောင်းစလုံးသည် ထပ်ခါတလဲလဲ ပြုတ်ကျမှုကြောင့် ကျိုးကြေသွားခဲ့ရာ၊ အလွန် ဆိုးရွားဖွယ် အခြေအနေတွင် ရှိနေသည်။ ၎င်း၏အမွေးများ ကျွတ်ထွက်ကုန်ကြ၍ အချို့နေရာများတွင် အရိုးများကိုပင် မြင်တွေ့နိုင်သည်။ မြေခွေးသည် မည်သို့သော တိုက်ခိုက်မှုမျိုး ခံစားခဲ့ရသည်ကို စိတ်ကူးကြည့်၍ပင် သိနိုင်သည်။

ဤဧရာမ လက်ကြီး၏ ပိုင်ရှင်သည် မည်သူဖြစ်သည်ကို သိနေသည့်အတွက် လူတိုင်းက ပင့်သက်ရှိုက်လိုက်ကြသည်။ ၎င်းသည် ချူးယွင်ဖန်းဖြစ်သည်။ ချူးယွင်ဖန်းက မည်မျှ အစွမ်းထက်သည်ကို ၎င်းတို့ သိထားသော်လည်း သူ့ကို လျှော့တွက်ထားမိပုံပေါ်သည်။ သူသည် ရုပ်ပိုင်းဆိုင်ရာအရ ရောက်မလာခဲ့သော်လည်း စွမ်းအင် စုစည်းမှု လက်ကြီးနှင့်ပင် ဒဏ်ရာ ပြင်းပြင်းထန်ထန် ရရှိအောင် ပြုလုပ်နိုင်ခဲ့သည်။ ချူးယွင်ဖန်းသည် သူ၏ နာခံမှုမရှိသော အိမ်မွေးတိရစ္ဆာန်ကို ပေါ့ပေါ့တန်တန် ဆုံးမနေသကဲ့သို့ဖြစ်နေသည်။ ဒါဇင်နှင့်ချီသော ရိုက်နှက်မှုဖြင့် လူသား-နတ်ဆိုး စစ်မြေပြင်တွင် လူအများအပြား ရွံမုန်းခဲ့သော မြေခွေးကို ဤကဲ့သို့ ဆိုးရွားသော အခြေအနေသို့ ရောက်ရှိသွားစေသည်။

ချူးယွင်ဖန်းသည် ဤစွမ်းအင် စုစည်း တိုက်ခိုက်မှု နည်းပညာကို မည်သို့အသုံးပြုရမည်ကို သိရှိထားသည်။ ဤသည်မှာ အခြေခံ ပညာရပ်တစ်ခုဖြစ်သော်လည်း ၎င်းကို ဤအတိုင်းအတာအထိ အသုံးပြု၍ ဒုတိယမြောက် နတ်အဆင့်နတ်ဆိုးကို အနိုင်ယူခြင်းသည် စိတ်ကူးမယဉ်နိုင်သော အံ့ဖွယ်တစ်ခုဖြစ်သည်။ ချူးယွင်ဖန်းသည် ဤကဲ့သို့ သန်မာနေပါက သူအမှန်တကယ် ထွက်ပေါ်လာသောအခါ မည်မျှသန်မာမည်နည်း။

"မဖြစ်ဘူး၊ ကျုပ်တို့ သူ့ကို ထပ်ပြီး အဆင့်ဖြတ်ကျော်ခွင့်ပေးလို့ မဖြစ်ဘူး"

ဟွမ်မိသားစု ဘိုးဘေးကြီးသည် အန္တရာယ်ကို ချက်ချင်း ခံစားလိုက်ရသည်။ သူသည် ကနဦးတွင် မြေခွေးက ချူးယွင်ဖန်းကို ပြင်းပြင်းထန်ထန် ဒဏ်ရာရစေနိုင်မည်ဟု ထင်မှတ်ခဲ့သောကြောင့် ဝင်မစွက်ဖက်ခဲ့ခြင်းဖြစ်သည်။ သို့သော် သူ၏ယခင် ခန့်မှန်းချက်သည် အလွန် ယုံကြည်မှုလွန်ကဲနေကြောင်း ယခု သဘောပေါက်သွားလေသည်။

ဟွမ်မိသားစု ဘိုးဘေးကြီးသည် အထူးစစ်ဆင်ရေးဌာနအတွင်းသို့ ချက်ချင်း ပျံသန်းသွားခဲ့သည်။ သူသည် ဓားသွားဖြင့် ခုတ်ထစ်လိုက်ရာ၊ ၎င်း၏အလင်းရောင်သည် အထူးစစ်ဆင်ရေးဌာန၏ နက်ရှိုင်းရာ အရပ်သို့ လွင့်ပျံသွားလေ၏။

ကြောက်မက်ဖွယ် ဓားသွားအလင်းရောင်သည် အရာအားလုံးကို ချက်ချင်း ဖြတ်သန်းသွားခဲ့ရာ အထူးစစ်ဆင်ရေးဌာနကို ထက်ပိုင်း ခွဲထုတ်လိုက်သကဲ့သို့ ထင်မှတ်ရစေသည်။ ရုတ်တရက်ဆိုသလို စွမ်းအင်ဖြင့် ဖန်တီးထားသော ဧရာမ လက်ကြီးသည် နောက်တစ်ကြိမ် ရွေ့လျားလာ၍ ဓားသွားအလင်းရောင်ကို ပိတ်ဆို့လိုက်သည်။ ဓားသွားအလင်းရောင်သည် စွမ်းအင် စုစည်းမှု လက်ကြီးကို ထိမှန်ကာ တစ်လက်မစီ ကြေမွသွားလေသည်။ ကောင်းကင်ယံတွင် ပြန့်ကျဲနေသော ဓားအလင်းရောင်သည် အလွန် လှပသော်လည်း အလွန် အန္တရာယ်များလှသည်။

"အသေးအဖွဲ့ လှည့်ကွက်လောက်နဲ့" အထင်အမြင်သေးမှုများနှင့် ပြည့်နှက်နေသော ချူးယွင်ဖန်း၏ လေသံသည် အထူးစစ်ဆင်ရေးဌာနအတွင်း ပဲ့တင်ထပ်သွားခဲ့သည်။ ချူးယွင်ဖန်းသည် ထိတ်လန့်တုန်လှုပ်ဖွယ်ရာ အသွင်ပြောင်းလဲမှုကို ကျော်ဖြတ်နေသော်လည်း ကောင်းကင်ယံရှိ ဖြစ်စဉ်သည် အံ့ဩဖွယ် အရှိန်အဟုန်ဖြင့် ဖြန့်ကြက်နေဆဲဖြစ်သည်။

သို့သော် ဤနေရာ၌ ပိုမိုပြင်းထန်သော ဖိအားများ၏ စုဝေးမှုကို လူတိုင်း ခံစားနိုင်သည်။ တုနှိုင်းမဲ့ ကျွမ်းကျင်သူတစ်ဦးသည် သူ၏ ချုပ်နှောင်မှုမှ လွတ်မြောက်တော့မည့်ပုံပေါ်သည်။

"သူ့ကို တားကြ" ကျန်းမိသားစု ဘိုးဘေးကြီးက ဟိန်းဟောက်လိုက်သည်။

ကျန်းမိသားစု ဘိုးဘေးကြီးလျှင်ပင် သူ၏စိတ်ထဲရှိ စိုးရိမ်ပူပန်မှုကို ဆက်လက် မထိန်းချုပ်နိုင်ပေ။

အခန်း (၉၀၉) သဘာဝလွန်ဖြစ်ရပ်၊ လုံလုံးလျားလျား အဆင့်တက်ခြင်း

ကျန်းမိသားစု ဘိုးဘေးကြီးသည် ကနဦးကကဲ့သို့ ယုံကြည်မှုမရှိတော့ဘဲ စိုးရိမ်လာခဲ့သည်။ သူသည် အခြေအနေကို ထိန်းချုပ်နိုင်ခြင်း ရှိမရှိနှင့် ပတ်သက်၍ မသေချာတော့ပေ။ ချူးယွင်ဖန်း ပြသခဲ့သော ခွန်အားသည် သူမျှော်မှန်းထားသည်ထက် များစွာကျော်လွန်နေခဲ့သည်။ သူသည် ချူးယွင်ဖန်းကို ဆက်လက် သန်မာခွင့် မပြုနိုင်ပေ။

သို့သော် ဤအချိန်တွင် တိုက်ပွဲ၏ အရေးကြီးဆုံးအချိန်ကို ရောက်ရှိနေပြီဖြစ်ကြောင်း နတ်နဂါးအကြီးအကဲနှင့် ကျူးပုဖျင်တို့က သတိထားမိသွားသည်။ ၎င်းတို့သည် ချူးယွင်ဖန်း၏ အဆင့်ဖြတ်ကျော်မှုတွင် ကျန်းမိသားစု ဘိုးဘေးကြီးကို ဝင်ရောက်စွက်ဖက်ခွင့် လုံးလုံးလျားလျား မပြုနိုင်ပေ။ မဟုတ်လျှင် ၎င်းတို့၏ ကြိုးစားအားထုတ်မှုအားလုံး အချည်းနှီး ဖြစ်သွားပေလိမ့်မည်။

ကျန်းမိသားစု ဘိုးဘေးကြီးကို ရပ်တန့်ရန်အတွက် ၎င်းတို့ တတ်နိုင်သမျှ လုပ်ဆောင်ခဲ့ကြသည်။ ကျန်းမိသားစု ဘိုးဘေးကြီးသည် ၎င်းတို့ထက် များစွာ သန်မာသော်လည်း သူ့ကို အချိန်အတော်ကြာ နှောင့်နှေးထားခဲ့နိုင်သည်။ အခြားစစ်မြေပြင်များရှိ ချူးမိသားစု ဘိုးဘေးကြီး၊ ချူးဟောက်ယွဲ့၊ တန်စီယုနှင့် မိုးကြိုးတောင်ပံသားရဲတို့အားလုံးသည်လည်း ချူးယွင်ဖန်းအတွက် အချိန်ဆွဲထားနိုင်ရန် အစွမ်းကုန် ကြိုးစားခဲ့ကြသည်။

ချူးယွင်ဖန်းသည် အဆင့်ဖြတ်ကျော်နေဆဲဖြစ်၍ ၎င်းမှ ဖန်တီးခဲ့သည့် ဖြစ်စဉ်သည် အလွန် ထိတ်လန့်ဖွယ်ကောင်းလှသည်။ သူ အဆင့်ဖြတ်ကျော်ပြီးသည်နှင့် မည်မျှ အစွမ်းထက်လာမည်ကို မှန်းဆ၍ မရနိုင်ပေ။ သူသည် တိုက်ပွဲအခြေအနေကို ပြောင်းလဲရန် အဓိက သော့ချက်ဖြစ်သည်။ ယခုအချိန် လှုပ်ရှားရန် အခွင့်အလမ်းရှိသည့် တစ်ဦးတည်းသော ပုဂ္ဂိုလ်သည် ဟွမ်မိသားစု ဘိုးဘေးကြီးဖြစ်သည်။

ဟွမ်မိသားစု ဘိုးဘေးကြီး၏ ဓားချက်သည် ချူးယွင်ဖန်းကို မထိခိုက်နိုင်ပေ။ ဟွမ်းမိသားစု ဘိုးဘေးကြီး၏ မျက်လုံးများမှ စူးရှသော အလင်းတန်းရောင်တစ်ခု လင်းလက်လာ၍ သူ၏လက်ထဲရှိ လက်နက်သည်လည်း ထပ်မံ ပေါက်ကွဲသွားပြန်သည်။

သူ၏ခန္ဓာကိုယ်အတွင်းရှိ နတ်စွမ်းအင်အားလုံး လောင်ကျွမ်းကာ အလွန်ကြီးမားသော နတ်အဆင့် စွမ်းအင်များအဖြစ် ပြောင်းလဲသွားလေသည်။ သူသည် မျက်စိတစ်မှိတ်အတွင်းမှာပင် အကြိမ်ပေါင်း ထောင်နှင့်ချီ၍ ခုတ်ပိုင်းပစ်လိုက်ပြီဖြစ်သည်။ ခုတ်ချက်တစ်ချက်စီတိုင်းတွင် သူ၏ ခွန်အားများ ပါဝင်နေ၍ ၎င်းတို့သည် ကမ္ဘာကြီးကိုပင် ဖျက်ဆီးနိုင်သည် စွမ်းအင်များ ပါရှိနေသည်။

နောက်ဆုံးတွင် ဤဓားအလင်းရောင်များ စုစည်းလာကာ ကြီးမားသော ဓားရှည်ကြီးအဖြစ်သို့ ပြောင်းလဲသွားခဲ့သည်။ ဓားအလင်းရောင်များသည် တစ်ခုနှင့်တစ်ခု ဖြတ်မျဉ်းများအဖြစ် ရောယှက်ကာ ကြောက်မက်ဖွယ်ကောင်းသော သက်တံရောင်အဖြစ် ပြောင်းလဲသွားလေသည်။ ဤတိုက်ခိုက်မှုကို မည်သူမျှ လျစ်လျူမရှုဝံ့ပေ။ ထိုတိုက်ခိုက်မှုသာ အထူးစစ်ဆင်ရေးဌာနထံ တိုက်ရိုက်ကျရောက်သွားပါက ဌာနတစ်ခုလုံး ပြာဖြစ်သွားပေလိမ့်မည်။

တတိယမြောက် နတ်အဆင့် ကျွမ်းကျင်သူ၏ တိုက်ခိုက်မှုသည် အလွန် ပြင်းထန်လှသည်။ ချူးယွင်ဖန်းသည် ဓားချက် ကျရောက်လာသောအခါ မည်သည့်နေရာတွင် ပုန်းနေပါစေ လွတ်မြောက်နိုင်လိမ့်မည် မဟုတ်ဟု လူတိုင်းက ထင်မှတ်နေကြသည်။

ရုတ်တရက်ဆိုသလိုပင် ဓားသွား ကျရောက်လာသည်နှင့် ရွှေရောင်အလင်းတန်းတစ်ခု ထွက်ပေါ်လာသည်။ ဧရာမ လက်သီးကြီးသည် လေဖိအားနည်းရပ်ဝန်းမှ ရုတ်တရက် ထွက်ပေါ်လာ၍ ဓားသွားဆီသို့ ရောက်ရှိသွားလေသည်။ လက်သီးစွမ်းအင်သည် ကြီးမားသော ရွှေရောင် ငှက်ကြီးအဖြစ် ပြောင်းလဲသွားခဲ့ရာ၊ ၎င်းသည် ကျယ်လောင်စွာ အော်ဟစ်ပြီးသည်နှင့် ကောင်းကင်ယံသို့ တစ်ဟုန်ထိုး ချီတက်ကာ ၎င်း၏လမ်းကြောင်းရှိ အရာအားလုံးကို ဖျက်ဆီးပစ်လိုက်သည်။

ဘုံး

ဓားသွားအလင်းရောင်နှင့် ရွှေရောင်ငှက်ကြီးသည် လေထုအလယ်တွင် တိုက်မိသွားကြသည်။ ကြောက်မက်ဖွယ် အင်အားသည် အရာခပ်သိမ်းကို ဖျက်ဆီးသွားစေကာ ပေရာနှင့်ချီ၍ ကျယ်ပြန့်သော လှိုင်းလုံးကြီးအဖြစ် ပြောင်းလဲသွားစေသည်။

ဘန်း

ဓားသွားအလင်းရောင်သည် ရွှေရောင်ငှက်ကြီး၏ တိုက်ခိုက်မှုကြောင့် ကွဲအက်သွားခဲ့သည်။ ၎င်းတိုက်ခိုက်မှုသည် ယခင်ကနှင့် ထူးမခြားနားပေ။ ၎င်း၏ ခွန်အားသည် မည်မျှပင် ပြင်းထန်နေပါစေ ဤရွှေရောင် ငှက်ကြီးကို ထိခိုက်အောင် မပြုလုပ်နိုင်ပေ။ ရွှေရောင်ငှက်ကြီး၏ အရှိန်အဟုန်သည် ဓားသွားအလင်းရောင်ကို ဖြိုခွဲပြီးနောက် ယုတ်လျော့သွားခြင်းမရှိဘဲ ဟွမ်မိသားစု ဘိုးဘေးကြီးကို ဆက်လက်တိုက်ခိုက်လိုက်လေသည်။

ဘန်း

ရွှေရောင်ငှက်ကြီး၏ အတောင်ပံသည် ဟွမ်မိသားစု ဘိုးဘေးကြီး၏ ရင်ဘတ်တွင် ဒဏ်ရာကြီးတစ်ခု ဖြစ်သွားသည်အထိ ဆုတ်ဖြဲပစ်လိုက်တယ်။ သွေးများ လွင့်စဉ်လာခဲ့ရာ၊ ဒဏ်ရာသည် အလွန်နက်နဲသောကြောင့် သူ၏အရိုးကို မြင်တွေ့နိုင်သည်။ ရွှေရောင်ငှက်ကြီးသည် လျှပ်စီးကြောင်းကဲ့သို့ မြန်ဆန်လှသည်။ ဟွမ်မိသားစု ဘိုးဘေးကြီးသည် သတိလက်လွတ်ဖြစ်သွားခဲ့ရာ၊ နောက်ဆုံးစက္ကန့်တွင် ရှောင်တိမ်းနိုင်ခဲ့သောကြောင့် လုံးလုံးလျားလျား ဆုတ်ဖြဲမခံရခြင်းဖြစ်သည်။

ရွှေရောင်ငှက်ကြီး၏ လက်ကျန်အင်အားသည် ထိုအချိန်တွင် ယုတ်လျော့လာ၍ ရွှေရောင်အလင်းတန်းအဖြစ်သို့ ပြောင်းလဲကာ ပျောက်ကွယ်သွားခဲ့သည်။ ဟွမ်မိသားစု ဘိုးဘေးကြီး သည် ပင့်သက်ရှိုက်နေမိသည်။ သူသည် လုံးလုံးလျားလျား မယုံကြည်နိုင်ဖြစ်နေသည်။ သူသည် ဤတိုက်ခိုက်မှုတွင် ကြီးမားသော ဆုံးရှုံးမှုကို ခံစားခဲ့ရသည်။ သူသည် ၎င်းတိုက်ခိုက်မှုတွင် သူ၏ ခွန်အားကို ထိန်းချုပ်ထားခြင်းမရှိဘဲ သူ၏စွမ်းအင်အားလုံးကို အသုံးပြုခဲ့ကြောင်း သေချာသည်။

သို့သော်လည်း တစ်ဖက်လူ၏ လက်သီးချက်နှင့် ထိခိုက်မိသည်နှင့် ချက်ချင်း ပြိုလဲကျကာ သူ၏ခန္ဓာကိုယ်တစ်ဝက်နီးပါးခန့် ထိခိုက်သွားလေသည်။ သူသည် အထဲသို့ မဝင်ရဲတော့ဘဲ ဘေးဘက်သို့ ဆုတ်ခွာသွားပြီးနောက် သူ၏ဒဏ်ရာများကို ကုသရန် အတွင်းပိုင်းစွမ်းအင်များကို ဖြန့်ကျက်နေခဲ့သည်။ အစောပိုင်းသင်ခန်းစာသည် ချူးယွင်ဖန်းကို လျှော့မတွက်သင့်ကြောင်း သင်ကြားပေးခဲ့ပုံပေါ်သည်။

"ဒါက ခေါင်းဆောင်ချူး တိုက်ခိုက်တာလား၊ ကြောက်ဖို့ကောင်းလိုက်တာ"

"ခေါင်းဆောင်က တကယ့်ကို အစွမ်းထက်တာပဲ"

"သိပ်ကောင်းတယ်၊ ခေါင်းဆောင်က အန္တရာယ်အရှိဆုံးအဆင့်ကို ကျော်သွားပြီ"

အထူးစစ်ဆင်ရေးတပ်ဖွဲ့ဝင်များ အားလုံးက အားပေးနေကြသည်။ ချူးယွင်ဖန်းသည် လက်ရှိအခြေအနေအရ အန္တရာယ်အရှိဆုံးအခြေအနေကို ကျော်ဖြတ်ကာ အံ့ဖွယ်နယ်ပယ်သို့ ရောက်ရှိနေပြီဖြစ်သည်။ ချူးယွင်ဖန်းသည် တစ်ချက် ထိုးနှက်ရုံဖြင့် ပြည်ထောင်စုတစ်ခွင်တွင် နာမည်ကျော်ကြားခဲ့သော ဟွမ်မိသားစု ဘိုးဘေးကြီးကို ပြင်းပြင်းထန်ထန် ဒဏ်ရာရရှိအောင် ပြုလုပ်နိုင်ခဲ့သည်။ ဤသည်မှာ မည်သို့သော တုန်လှုပ်ဖွယ် ခွန်အားမျိုးဖြစ်သနည်း။

အတိတ်က ၎င်းတို့သာဆိုလျှင် ထိုသို့သော ဖြစ်စဉ်မျိုးကို တွေးပင်တွေးဝံ့မည် မဟုတ်ပေ။ သို့သော် အချို့က အခြားအတွေးများ ရှိနေကြသည်။ ဤပုဂ္ဂိုလ်များသည် ပြည်ထောင်စုကို စော်ကားမိမည်ဆိုလျှင်ပင် ၎င်းတို့၏ ခေါင်းဆောင်ကို သတ်ဖြတ်ချင်ခြင်းက အံ့ဩဖွယ်မဟုတ်ပေ။ မည်သို့ဆိုသော် ဤသို့သော ပုဂ္ဂိုလ်မျိုးသည် ဖျက်စီးမှုအား ပြင်းထန်လွန်းသောကြောင့်ဖြစ်သည်။

ဤလူများအနက် အပျော်ရွှင်ဆုံးသည် ဟော့ရို့နန်နှင့် အခြားလူများဖြစ်ကြသည်။ ၎င်းတို့သည် အထူးစစ်ဆင်ရေးဌာန၏ အဆင့်မြင့်အဖွဲ့ဝင်များဖြစ်ကြသောကြောင့် ချူးယွင်ဖန်းသာ တစ်ခုခုဖြစ်သွားခဲ့လျှင် ၎င်းတို့လည်း အဆင်ပြေလိမ့်မည် မဟုတ်ပေ။ ၎င်းတို့သည် နောက်ဆုံးတွင် သက်ပြင်းချနိုင်သွားပြီဖြစ်သည်။ ၎င်းတို့၏ခေါင်းဆောင်သည် နမော်နမဲ့နိုင်ပုံပေါက်သော်လည်း အမြဲတစေ အဆင်သင့် ပြင်ထားတက်သူဖြစ်ကြောင်း သက်သေပြခဲ့သည်။

ဤအချိန်၌ အမြီးခြောက်ချောင်း ငရဲမီးတောက် မြေခွေးသည် နောက်ဆုံးတွင် ထွက်ပြေးနိုင်မည့် ဟာကွက်တစ်ခုကို မြင်တွေ့လိုက်ရသည်။ ၎င်းသည် အနက်ရောင် မီးတောက်အဖြစ်သို့ ပြောင်းလဲကာ အဝေးသို့ ထွက်ပြေးသွားလေသည်။ ဤနေရာသည် အလွန် ကြောက်မက်ဖွယ်ကောင်းလှသည်။ သူသည် လူသား-နတ်ဆိုး တိုက်ပွဲတွင် နှစ်အတော်ကြာ ရှိခဲ့ဖူးရသော်လည်း ထိုကဲ့သို့ အန္တရာယ်များ၍ ကြောက်မက်ဖွယ်ကောင်းသော မြင်ကွင်းမျိုးကို တစ်ခါမျှ မကြုံခဲ့ဖူးပေ။

ထိုလူသည် လတ်တလောတွင် မပေါ်ပေါက်လာသေးသော်လည်း သူ၏နှလုံးသားတစ်ခုလုံး မြန်ဆန်စွာ ခုန်လှုပ်နေခြင်းကို ခံစားလိုက်ရသည်။ ၎င်းကို ပညာရှင်ကြီးတစ်ဦးနှင့် ရင်ဆိုင်နေရသကဲ့သို့ ခံစားရစေသည်။ မြေခွေးသည် အမိန့်ကို ကနဦး လက်ခံရရှိစဉ်က အဆုံးမဲ့နတ်ဆိုးတောင်တန်းမှ လူအချို့သည် ပွေးကျစ်စာတစ်ခုမှ တောင်တစ်စင်း ပြုလုပ်ရန် ကြိုးစားနေသည်ဟု သူ ထင်မှတ်ခဲ့သည်။ ငယ်ရွယ်သော လူသားတစ်ဦးသည် ၎င်းတို့နှင့် အဘယ်သို့ နှိုင်းယှဉ်နိုင်မည်နည်း။

နတ်ဆိုးမျိုးနွယ်စုထဲတွင် ကလေးငယ်တစ်ဦးအဖြစ်သာ သတ်မှတ်နိုင်သည့် အသက်နှစ်ဆယ်ထက်မပိုသော ဤလူသားသည် သူ့ကို အလွန် ထိတ်လန့်စေမည်ဟု မည်သူ သိမည်နည်း။ သို့သော်လည်း မြေခွေးသည် လွတ်မြောက်နိုင်ပြီဟု တွေးမိသောအခါ လေဖိအားနည်းရပ်ဝန်းမှ မိုးကြိုးသွားတစ်ခု ရုတ်တရက် ထွက်ပေါ်လာသည်။ ၎င်းသည် ရှည်လျားသော ကြာပွတ်တစ်ခုအဖြစ် ပြောင်းသွားကာ မြေခွေးကို ရိုက်နှက်လိုက်သည်။

ဘန်း

မြေခွေးသည် မြေပြင်ပေါ်သို့ လဲကျသည်အထိ အပြင်းအထန် ရိုက်ခတ်ခံရကာ နောက်ထပ်တွင်းကြီးတစ်ခု ဖြစ်ပေါ်သွားလေသည်။ ၎င်း၏ခန္ဓာကိုယ်တွင် ထိတ်လန့်ဖွယ် ဒဏ်ရာတစ်ခု ရှိနေလေသည်။ ၎င်းဒဏ်ရာသည် သူ၏အရိုးများကို မြင်တွေ့နိုင်သည်အထိ အလွန် နက်ရှိုင်းလှရာ၊ ၎င်း၏ခန္ဓာကိုယ်ပင် ထက်ဝက်ကွဲထွက်လုနီးပါး ဖြစ်သွားလေသည်။

တစ်ချက်တည်းဖြင့် ၎င်း၏ကျောရိုးများ လုံးလုံးလျားလျား ကွဲကြေသွား၍ တစ်လက်မမျှပင် မလှုပ်နိုင်တော့ပေ။ နတ်အဆင့်တွင် ရှိနေသော ၎င်း၏ ပြင်းထန်သော အသက်ဓာတ်ကြောင့်သာ မဟုတ်ပါက၊ ယခုအချိန်တွင် သေဆုံးပြီဖြစ်သည်

"နောက်တစ်ခါ ထွက်ပြေးဖို့လုပ်ရင် ခင်ဗျား သေရလိမ့်မယ်"

အထူးစစ်ဆင်ရေးဌာနအတွင်းမှ ထွက်လာသည့် ချူးယွင်ဖန်း၏ အေးစက်သော လေသံသည် မြေခွေးကို တုန်လှုပ်ခြောက်ခြားသွားစေသည်။ ထိုအသံသည် နတ်ဆိုးတစ်ကောင်၏ အသံကဲ့သို့ပင် ထင်မှတ်ရစေသည်။

'ချူးယွင်ဖန်းက လူမဟုတ်ဘူး'

တစ်ချိန်တည်းမှာပင်၊ ခွန်းလွန်မြို့၏ တစ်ဝက်ခန့်ကို လွှမ်းခြုံထားသော သဘာဝဖြစ်စဉ်သည် အထူးစစ်ဆင်ရေးဌာန၏ အဆောက်အအုံဆီသို့ လျင်မြန်စွာ ရွေ့လျားလာခဲ့ရာ၊ ၎င်းကို မည်သူမျှ မတားနိုင်ပေ။ မြို့တွင်းရှိ မရေတွက်နိုင်သော လူများသည် အရပ်ရပ်မှ ကြောက်မက်ဖွယ် ဖိအားများ၏ ဖိနှိပ်မှုကို ခံစားနေရသည်။ နောက်ဆုံးတွင် သဘာဝဖြစ်စဉ်သည် ဖြစ်ပေါ်ဖွဲ့စည်းလာ၍ ချူးယွင်ဖန်း၏ အဆင့်ဖြတ်ကျော်မှုသည်လည်း ပြီးဆုံးသွားခဲ့သည်။ ပုံရိပ်တစ်ခုသည် အထူးစစ်ဆင်ရေးဌာနအတွင်းမှ ဖြည်းညှင်းစွာ ထွက်လာလေ၏။