အခန်း (၉၁၆-၉၁၈)

အခန်း (၉၁၆) ဒီနေ့ကစပြီး ကျန်မိသားစုဆိုတာ ရှိတော့မှာ မဟုတ်ဘူး

ဤအပြောင်းအလဲများသည် ချက်ခြင်း ရောက်ရှိလာခြင်းဖြစ်သည်။ ကျူးပုဖျင်နှင့် အခြားလူများသည် အခက်တွေ့နေကြသော်လည်း ထိန်းချုပ်ထားနိုင်ဆဲဖြစ်သည်။ သို့သော် ကျွမ်းကျင်သူတစ်ဦး ထပ်မံ တိုးမြင့်လာခြင်းသည် စစ်မြေပြင်တစ်ခုလုံး၏ ချိန်ခွင်လျှာသည် လုံးလုံးလျားလျား ပျက်စီးသွားခဲ့သည်။

ကျန်းမိသားစု ဘိုးဘေးကြီးသည် တတိယမြောက် နတ်အဆင့် ကျွမ်းကျင်သူနှစ်ယောက်၏ ထိန်းချုပ်မှုအောက်တွင်မရှိတော့သောကြာင့် ကြုံတောင့်ကြုံခဲရရှိခဲ့သော ဤအခွင့်အရေးကို အသုံးချကာ နောက်ဆုံးတွင် သူ၏လက်များကို အနားပေးနိုင်ခဲ့သည်။ သူသည် ဘဝအဆုံးသတ်သူနည်းပညာကို မျက်စိတစ်မှိတ်အတွင်းမှာပင် သုံးကြိမ်ဆက်တိုက် ထိုးနှက်လိုက်သည်။

ထိုအခါ တန်စီယု၊ ချူးဟောက်ယွဲ့နှင့် မိုးကြိုးတောင်ပံသားရဲတို့သည် အလွန် ပြင်းထန်စွာ ဒဏ်ရာရရှိသွားကြသည်။ ၎င်းတို့သည် ခုတ်ပိုင်းခံရသောကြောင့် သွေးများ အန်ထွက်ကာ အလျင်စလို ဆုတ်ခွာသွားကြသည်။ ၎င်းတို့သည် ကံကောင်းထောက်မစွာဖြင့် တိုက်ခိုက်မှုများကို ရှောင်တိမ်းနိုင်ခဲ့သည်။ မဟုတ်လျှင် သွေးများအန်ထွက်ကာ အနောက်သို့ ဆုတ်ခွာသွားရသည်အထိ ရိုးရှင်းမည် မဟုတ်ပေ။

အချိန်တိုလေးအတွင်းမှာပင် နတ်အဆင့် ကျွမ်းကျင်သူငါးဦးသည် သွေးများ အန်ထွက်ရသည်အထိ ရိုက်နှက်ခံခဲ့လိုက်ရကာ အနောက်သို့ ဆုတ်ခွာသွားခဲ့ရသည်။ ၎င်းတို့ဘက်သို့ အလေးသာပုံရသည့် အခြေအနေသည် တစ်ခဏအတွင်း ပြိုကျသွားခဲ့သည်။ ၎င်းတို့သည် စိတ်ပိုင်းဆိုင်ရာအရ ပြင်ဆင်ထားသော်လည်း ကျန်းမိသားစု ဘိုးဘေးကြီး၏ ရက်စက်မှုသည် လူတိုင်းကို ထိတ်လန့်သွားစေဆဲဖြစ်သည်။

ထိုအဆင့်သို့ တက်လှမ်းခဲ့သော ကျွမ်းကျင်သူများသည် မည်မျှ ကြောက်မက်ဖွယ်ကောင်းခြင်းဖြစ်သနည်း။ ၎င်းတို့သည် အခွင့်အလမ်းအနည်းငယ်ကို ဆုပ်ကိုင်ထားသရွေ့ ဤချို့ယွင်းချက်ကို အောင်ပွဲအတွက် အခွင့်အရေးအဖြစ် ပြောင်းလဲနိုင်မည်ဖြစ်သည်။ ဤအခိုက်အတန့်တွင် ရုတ်တရက် ပေါ်ပေါက်လာသည့် ကျွမ်းကျင်သူ၏ပုံရိပ်ကို လူတိုင်း မြင်တွေ့သွားလေသည်။

"ဒါ တန်မိသားစု ဘိုးဘေးကြီးပဲ" လူအများက အံ့အားသင့်စွာ အော်ဟစ်လိုက်ကြသည်။

ထိုကျွမ်းကျင်သူသည် တန်မိသားစု ဘိုးဘေးကြီးမှလွဲ၍ အခြားလူ မဟုတ်ပေ။ ကျန်းမိသားစု ဘိုးဘေးကြီးသည် တန်မိသားစု ဘိုးဘေးကြီးကို သက်ရှိ ရုပ်သေးရုပ်အဖြစ် ဖန်တီးပြုလုပ်ထားခြင်းကို ထိုအချိန်မှသာ ၎င်းတို့ မှတ်မိသွားကြသည်။ ကျန်းမိသားစု ဘိုးဘေးကြီးသည် ပြည်ထောင်စု၏ ထိပ်တန်းကျွမ်းကျင်သူနှစ်ဦးဖြစ်သည့် နတ်နဂါးအကြီးအကဲနှင့် ကျူးပုဖျင်တို့ကို ကိုယ်တိုင် ဖိနှိပ်နိုင်ခဲ့သည်။ ထို့ကြောင့် ရုပ်သေးရုပ်အဖြစ် ပြုပြင်ခံထားရသော တန်မိသားစု ဘိုးဘေးကြီးသည် ကျန်းမိသားစု ဘိုးဘေးကြီးတို့၏ ဝှက်ဖဲဖြစ်ကြောင်း လူအများက မေ့လျော့သွားကြသည်။

တန်မိသားစု ဘိုးဘေးကြီးသည် ရုပ်သေးရုပ်အဖြစ် မပြုလုပ်ခံရမီ၊ တတိယမြောက် နတ်အဆင့် ကျွမ်းကျင်သူဖြစ်နေပြီဖြစ်သည်။ ကျင့်ကြံမှုအရ၊ သူသည် နတ်နဂါးအကြီးအကဲနှင့် ကျူးပုဖျင်တို့အောက် မနိမ့်ကျပေ။ ထိုအချိန်တွင် တန်မိသားစု ဘိုးဘေးကြီးက လှုပ်ရှားလိုက်ရာ၊ ကျန်နှစ်ဦးကို တစ်ဟုန်ထိုး ဒဏ်ရာရရှိစေကာ တိုက်ပွဲမှ ဆုတ်ခွာသွားအောင် ပြုလုပ်နိုင်ခဲ့သည်။

လူအများအပြားသည် ၎င်းတို့၏ ကျောရိုးတစ်လျှောက် အေးစက်သွားသကဲ့သို့ ခံစားလိုက်ရသည်။ ကျန်းမိသားစု ဘိုးဘေးကြီးသည် အလွန် လိမ္မာပါးနပ်သူဖြစ်သည်။ တန်မိသားစု ဘိုးဘေးကြီးကို ကနဦးကတည်းက လွှတ်ပေးခဲ့မည်ဆိုလျှင် ၎င်းတို့အားလုံး သတိလက်လွတ်ဖြစ်သွားမည် မဟုတ်သည့်အပြင် ၎င်းတို့ငါးဦးသည်လည်း ဤမျှမြန်မြန် ရှုံးနိမ့်သွားမည် မဟုတ်ပေ။

တန်စီယုသည် သက်ရှိရုပ်သေးရုပ်အဖြစ် ပြုပြင်ခံထားရသော သူမတို့မိသားစု၏ဘိုးဘေးကြီးကို ဝိရောဓိဖြစ်နေသော အကြည့်များဖြင့် ကြည့်လိုက်သည်။ သူမသည် ကနဦးတွင် တန်မိသားစုအတွင်း နိမ့်ပါးသော မိသားစုဝင်တစ်ဦးသာဖြစ်သော်လည်း တန်မိသားစု ဘိုးဘေးကြီး၏ ပုံပြင်များကို ကြားသိကာ မိသားစုအတွင်း ကြီးပြင်းလာသူဖြစ်သည်။

သူမတို့၏ ဘိုးဘေးကြီးကို ရုပ်သေးရုပ်အဖြစ် အသုံးပြုနေခြင်းကို မြင်လိုက်ရသောအခါ ဝမ်းနည်းပူဆွေးမှုများ နာကြည်းမှုများဖြင့် ပြည့်နှက်လာခဲ့သည်။ ထိုအချိန်တွင် ချူးယွင်ဖန်းသည် စစ်မြေပြင်သို့ ရောက်ရှိနေပြီဖြစ်သည်။ သူသည် အချိန်မီ ရောက်နိုင်မည်ဟု ထင်မှတ်ခဲ့သော်လည်း နောက်ကျသွားမည်ဟု မည်သူသိမည်နည်း။

ကျန်းမိသားစု ဘိုးဘေးကြီး၏မျက်နှာတွင် နောင်တရနေသော အမူအရာမျိုးရှိနေသည်။ ချူးယွင်ဖန်းသည် အလွန် လျင်မြန်စွာ ရောက်ရှိလာခြင်းကြောင့်ဖြစ်သည်။ သို့မဟုတ်လျှင် သူသည် ဤလူများကို တစ်ဟုန်ထိုး ဖမ်းဆီးနိုင်ပေလိမ့်မည်။ သို့သော်လည်း ဤလူများ၏ ဝိုင်းရံမှုကို ခံရခြင်းထက် ဤဖြစ်စဉ်က ပို၍ ကောင်းမွန်ပေသည်။

"ကျန်တာတွေ မင်းလက်ကို အပ်လိုက်ပြီ။ ကျုပ်တို့တွေ ကုသဖို့အတွက် အနားယူတော့မယ်" ကျူးပုဖျင်က ချူးယွင်ဖန်းကို ကြည့်၍ ပြောလိုက်သည်။

အခြေအနေ တစ်ခုလုံးသည် ကနဦးကတည်းက ၎င်းတို့အတွက် အခွင့်မသာသော အခြေအနေတွင် ရှိနေခြင်းဖြစ်သည်။ လူအရေအတွက်သော်လည်းကောင်း ခွန်အားသော်လည်းကောင်း ၎င်းတို့သည် အစကတည်းက အားနည်းသောအခြေအနေတွင် ရှိနေခဲ့ကြသည်။ ဤသို့သော အခြေအနေမျိုးတွင် ယခုအချိန်အထိ တောင့်ခံနိုင်ခြင်းသည် အစွမ်းကုန် ကြိုးစားခဲ့ကြခြင်းဖြစ်သည်။ ချူးယွင်ဖန်းကြောင့်သာ မဟုတ်လျှင် ၎င်းတို့အားလုံး ရှုံးနိမ့်သွားပြီဖြစ်သည်။

"လာပြီး ပင်ပင်ပန်းပန်း ကူညီပေးတဲ့အတွက် ကျေးဇူးတင်ပါတယ်၊ ကျွန်တော် သေချာပေါက် ကျေးဇူးပြန်ဆပ်ပါ့မယ်" ချူးယွင်ဖန်းက ဆိုလိုက်သည်။

ပြီးနောက် ကောင်းကင်ယံမှ လူတိုင်း ပျံဆင်းလာကာ အထူးစစ်ဆင်ရေးဌာန အဆောက်အဦး၏ နေရာလွတ်များ၌ တင်ပျဉ်ခွေထိုင်ကာ ပြန်လည်ကုသနေကြသည်။ အထူးစစ်ဆင်ရေးဌာနရှိ လူများသည် ၎င်းတို့ကို မနှောင့်ယှက်ဝံ့ကြပေ။

တစ်ဦးပြီး တစ်ဦး ခေါင်းမော့ကာ ကောင်းကင်ကြီးကို မော့ကြည့်နေကြသည်။ လူနှစ်ဦးမဟုတ်ဘဲ သုံးဦးသည် မလှမ်းမကမ်းမှ အချင်းချင်း မျက်နှာချင်းဆိုင် ကြည့်နေကြသည်။

တန်မိသားစု ဘိုးဘေးကြီးအပေါ် ကျန်းမိသားစု ဘိုးဘေးကြီး၏ ထိန်းချုပ်မှုသည် အလွန် ဆန်းပြားရှုပ်ထွေးလှသည်။ တန်မိသားစု ဘိုးဘေးကြီးသည် သာမန်ရုပ်သေးများကဲ့သို့ တောင့်တင်း၍ ပျော့ပြောင်းခြင်း မရှိဘဲ ဆန့်ကျင်ဘက်အနေဖြင့် အလွန် လျင်မြန်လွန်းလှသည်။

"ချူးယွင်ဖန်း၊ အတိတ်မှာ ကျုပ် အထင်သေးခဲ့တဲ့ ပုရွက်ဆိတ်တစ်ကောင်က ကျုပ်ကို ဒီနေ့ ဒီအတိုင်းအတာအထိ တွန်းပို့နိုင်လိမ့်မယ်လို့ ကျုပ် မထင်ထားဘူး"

ကျန်းမိသားစု ဘိုးဘေးကြီးသည် စကားပြောနေစဉ် အလွန် စိတ်ခံစားလွယ်နေမိသည်။ သို့သော် သူ၏မျက်လုံးများ တောက်ပနေဆဲဖြစ်သောကြောင့် သူသည် စွမ်းအင်များ ပြန်လည် သက်သာလာမှုအတွက် အချိန်ဆွဲနေရန် ကြိုးစားနေပုံပေါ်သည်။ သူသည် နတ်အဆင့် ကျွမ်းကျင်သူငါးဦးကို အနိုင်ယူခဲ့သော်လည်း စွမ်းအင်များစွာကို အသုံးပြုခဲ့ရသည်။ သူ၏ ဤအသက်အရွယ်တွင် သူ၏ ပြန်လည် ကုသနိုင်စွမ်းသည် ငယ်ရွယ်စဉ်ကနှင့် နှိုင်းယှဉ်၍ မရနိုင်ပေ။

ချူးယွင်ဖန်းသည် ကျန်းမိသားစု ဘိုးဘေးကြီး၏ ရည်ရွယ်ချက်များကို နားလည်နိုင်သော်လည်း သူ ဂရုမစိုက်ခဲ့ပေ။ ကျန်းမိသားစု ဘိုးဘေးကြီးသည် သူ၏မျက်လုံးထဲတွင် လမ်းလျှောက်နေသော လူသေတစ်ယောက်သာဖြစ်သည်။

"မျှော်လင့်ထားတာပဲဖြစ်ဖြစ် မမျှော်လင့်ထားတာပဲဖြစ်ဖြစ် ဘာများ ကွာခြားလို့လဲ။ ခင်ဗျားပြောပုံအရ ခင်ဗျားတို့မိသားစုက ကျုပ်ကိုသတ်ဖို့ လူမလွှတ်ဖူးတဲ့အတိုင်းပဲ" ချူးယွင်ဖန်းက ဘာသိဘာသာ ပြောလိုက်သည်။

"ဒီနေ့ပြီးရင် ကျန်းမိသားစုဆိုတာ ရှိတော့မှာ မဟုတ်ဘူး။ ခင်ဗျားတို့မိသားစုတစ်ခုလုံးကို အမြစ်ပြတ်သုတ်သင်ပစ်မယ်။ မြင့်မြတ်တဲ့ မိသားစု ရှစ်ခုထဲက မိသားစုနှစ်ခုလုံး တစ်ညတည်းနဲ့ သုတ်သင်ခံလိမ့်မယ်။ ဒါကို ခင်ဗျား မမျှော်လင့်ထားဘူး မဟုတ်လား"

"စကားကြီး စကားကျယ်နဲ့ပါလား" ကျန်းမိသားစု ဘိုးဘေးကြီး၏ မျက်နှာအမူအရာ ပြောင်းလဲသွားသည်။ သူသည် အခြားအရာများကို ဂရုမစိုက်သော်လည်း သူ၏မိသားစုသည် သူ၏တစ်ခုတည်းသော တားမြစ်ချက်ဖြစ်သည်။

သူသည် ကျန်းမိသားစုကို ဗလာနတ္ထိအဖြစ်မှ ယခုအခြေအနေ ရောက်သည်အထိ ထူထောင်ခဲ့သူဖြစ်သည်။ သာမန်မိသားစုငယ်လေးအဖြစ်မှ လူထောင်ပေါင်းများစွာရှိသော မိသားစုကြီးတစ်ခု ဖြစ်လာသည်အထိ ချဲ့ထွင်ခဲ့ခြင်းဖြစ်သည်။ သူသည် ဘဝ၏ ကြိုးစားမှုအားလုံးကို မိသားစုထဲတွင် မြှုပ်နှံထားခဲ့ကာ မည်သူတစ်ဦးတစ်ယောက်ကိုမျှ သူ၏အကြံအစည်များကို ဖျက်ဆီးရန် ခွင့်မပြုနိုင်ပေ။

"ဒီစကားတစ်ခွန်းအတွက် မင်း ဒီနေ့ သေရလိမ့်မယ်။ ကျုပ်နဲ့ပတ်သက်နေသရွေ့ မင်းတို့အားလုံး သေကို သေရမယ်" ကျန်းမိသားစု ဘိုးဘေးကြီး၏ နတ်စွမ်းအင်များ ထွက်ပေါ်လာသည်။

"ကျုပ်က ဟိုလူတွေနဲ့ တူမယ်လို့ မင်း ထင်နေတာလား။ မကြာခင်မှာ စတုတ္ထမြောက် နတ်အဆင့် ကျွမ်းကျင်သူရဲ့ တန်ခိုးကို မင်း သိလာလိမ့်မယ်" ကျန်းမိသားစု ဘိုးဘေးကြီးက ဖြည်းညှင်းစွာ ပြောလိုက်သည်။ သူသည် အသုံးပြုခဲ့သော နတ်စွမ်းအင်များကို ပြန်လည်ကုသနေဆဲဖြစ်သည်။

ချူးယွင်ဖန်း၏ မျက်လုံးများ လျှပ်စီးကြောင်းကဲ့သို့ အေးစက်သွား၍ ဟစ်အော်လိုက်သည်။ "ခင်ဗျားမှာ အခွင့်အရေးရှိမှာ မဟုတ်ဘူး"

သူသည် တခဏအတွင်း လှုပ်ရှားလိုက်သည်။ သူ၏ စွမ်းအင်နှင့် သွေးများ အလွန်အမင်း ပျံ့နှံ့လာကာ ကောင်းကင်သို့ မြင့်တက်သွားပြီးနောက် ကြောက်မက်ဖွယ်ကောင်းသည့် စိတ်ဆန္ဒနှင့် တန်ခိုးအာနုဘော်တို့ ထွက်ပေါ်လာသည်။

တစ်ချိန်တည်းမှာပင် ဤအချိန်တစ်လျှောက်လုံး မတ်တပ်ရပ်နေသော တန်မိသားစု ဘိုးဘေးကြီးသည်လည်း လှုပ်ရှားလာသည်။ တန်မိသားစု ဘိုးဘေးကြီးထံမှ အံ့ဩဖွယ် စွမ်းအင်နှင့် သွေးများ ပွင့်ထွက်လာခဲ့သည်။ သူ၏လက်ဖဝါးချက်ဖြင့် ရိုက်ခတ်လိုက်သောအခါ မျက်စိတစ်မှိတ်အတွင်းမှာပင် ကမ္ဘာကြီးတစ်ခုလုံး ဆူပွက်သွားလေ၏။

"ယွင်ဖန်း သတိထားဦး၊ အဲဒါ ဝမ်တိုင်းပြည်ရဲ့ ကောင်းကင်ဖြိုဖျက်ခြင်း လက်ဖဝါးချက်" တန်စီယုက ထိတ်လန့်စွာဖြင့် အလျင်အမြန် အော်ဟစ်လိုက်သည်။

သူမသည် ဤနည်းပညာ၏ မူလဇစ်မြစ်ကို ချက်ချင်း သတိပြုမိလိုက်သည်။ ၎င်းသည် ကမ္ဘာတစ်ဝှမ်းလုံး၌ တိုက်ခိုက်ရာတွင် တန်မိသားစု ဘိုးဘေးကြီး အသုံးပြုခဲ့သည့် ထင်ရှားကျော်ကြားသော သိုင်းပညာဖြစ်သည့်အပြင် အလွန် အစွမ်းထက်လှသည်။ ချူးယွင်ဖန်းကမူ တစ်လက်မမျှ လှုပ်ရှားခြင်းမရှိဘဲ ထိုထိုးနှက်ချက်ကို သူ၏ကိုယ်ပေါ်သို့ ကျရောက်စေလိုက်သည်။

ဘန်း

ရိုက်ခတ်မှုသည် ကျယ်လောင်သော ပေါက်ကွဲသံနှင့်အတူ ချူးယွင်ဖန်းအပေါ် ကျရောက်လာသော်လည်း လုံးလုံးလျားလျား အသုံးမဝင်ခဲ့ပေ။ ၎င်းသည် သူ့ကို ရွေ့လျားသွားအောင်ပင် မပြုလုပ်နိုင်ခဲ့ပေ။ ဤအချိန်တွင် ချူးယွင်ဖန်းသည် သူ၏လှုပ်ရှားမှုကို ပြုလုပ်လိုက်လေသည်။ သူ၏လက်သည် အတားအဆီး အလင်းရောင်ဖြင့် တောက်ပလာကာ တန်မိသားစု ဘိုးဘေးကြီး၏ ခန္ဓာကိုယ်ကို ရိုက်နှက်လိုက်လေသည်၊ သို့သော်လည်း တန်မိသားစု ဘိုးဘေးကြီးသည် လွင့်ပျံသွားခြင်း မရှိပေ။

တန်မိသားစု ဘိုးဘေးကြီး၏ ခန္ဓာကိုယ်ပေါ်တွင် မရေတွက်နိုင်သော စည်းတံဆိပ် အင်းစာလုံးများ ပေါ်ပေါက်လာသည်။ ချူးယွင်ဖန်းသည် ချက်ချင်းဆိုသလိုပင် တန်မိသားစု ဘိုးဘေးကြီးကို စည်းတံဆိပ် ခတ်လိုက်ပြီဖြစ်သည်။ ဤသည်မှာ ဆေးဧကရာဇ်၏ မှတ်ဉာဏ်များရှိ ရှေးဟောင်းလူသားများကာလ၏ ချိပ်ပိတ်မှု နည်းပညာဖြစ်သည်။ သူသည် ကျန်းမိသားစု ဘိုးဘေးကြီးနှင့် တန်မိသားစု ဘိုးဘေးကြီး၏အလောင်းကြားရှိ ဆက်သွယ်မှုကို ချက်ချင်း ဖြတ်တောက်ကာ ကျန်းမိသားစု ဘိုးဘေးကြီး၏ ထိန်းချုပ်မှုမှ လွှတ်ပေးလိုက်ခြင်းဖြစ်သည်။

အခန်း (၉၁၇) ခင်ဗျား အရင်ကလည်း မလုပ်နိုင်သလို အခုလည်း မလုပ်နိုင်ဘူး

"ဘာ" ကျန်းမိသားစု ဘိုးဘေးကြီး၏ မျက်လုံးများ ပြူးကျယ်သွားသည်။ ကျန်းမိသားစု ဘိုးဘေးကြီးကဲ့သို့ လွန်စွာ မောက်မာသူတစ်ယောက်လျှင်ပင် ဤအချိန်တွင် ယုံကြည်မှုကင်းမဲ့နေသော အမူအရာမျိုး ထုတ်ဖော်ပြသလာသည်။

အခြားလူများ မသိသော်လည်း သူ၏ရုပ်သေးရုပ် ပြုလုပ်သော လျှို့ဝှက်နည်းပညာ၏ အစွမ်းထက်မှုကို သူ သိထားသည်။ ၎င်းသည် ရှေးဟောင်းလူသားများကာလ၏ ရုပ်သေးရုပ်ပြုလုပ်ခြင်း နည်းပညာဖြစ်၍ အပျက်အစီးများကြားမှ ရရှိခဲ့ခြင်းဖြစ်သည်။ သဘာဝအတိုင်း သူ့တွင် ဤရုပ်သေးတစ်ရုပ်သာ ရှိခြင်းမဟုတ်ပေ။ တန်မိသားစု ဘိုးဘေးကြီးသည် ၎င်းတို့အနက် အင်အားအကြီးဆုံးဖြစ်သည့်အပြင် တန်မိသားစု ဘိုးဘေးကြီးသည် သူ ရုပ်သေးရုပ်အဖြစ် ပြုလုပ်ဖူးသည့် တစ်ဦးတည်းသော နတ်အဆင့် ကျွမ်းကျင်သူလည်းဖြစ်သည်။

သူသည် တန်မိသားစု ဘိုးဘေးကြီးကို အသုံးချသည့်အချိန်တိုင်း မည်သည့်အခါမှ မကျရှုံးခဲ့ဖူးပေ။ ရုပ်သေးရုပ်နှင့် ဆက်နွှယ်မှု ပြတ်တောက်သွားခြင်းမဆိုနှင့် သူ၏အမိန့်ကို မနာခံသည့် ရုပ်သေးရုပ်ကိုပင် တစ်ခါမျှ မမြင်ခဲ့ဖူးပေ။ ဤသို့သော နည်းလမ်းမျိုးကို သူ တစ်ခါမျှ မမြင်တွေ့ဖူးပေ။

"ဘယ်လို ချိပ်ပိတ်တဲ့ နည်းပညာလဲ ဟ" ကျန်းမိသားစု ဘိုးဘေးကြီးသည် ချူးယွင်ဖန်းကို စူးရှစွာ စိုက်ကြည့်လိုက်သည်။

တစ်ဖက်တွင် ချူးယွင်ဖန်းက အမူမထားဘဲ ပြောလိုက်သည်။

"ကံကောင်းမှုတွေနဲ့ ကြုံတွေ့ဖူးတာ ခင်ဗျားတစ်ယောက်တည်းလို့ ထင်နေတာလား"

ပြည်ထောင်စု၏ ခေတ်မီတိုးတက်နေသော ဤခေတ်တွင် ထင်ရှားကျော်ကြားသည့် ကျွမ်းကျင်သူအားလုံးနီးပါးသည် ကံကြမ္မာနှင့် ကြုံကြိုက်မှုများစွာ ရှိခဲ့ကြသည်၊ ထို့ကြောင့်သာ မရေတွက်နိုင်သော လူများကြားရှိ ပြိုင်ဆိုင်မှုများတွင် ထင်ပေါ်နိုင်ခြင်းဖြစ်သည်။

ဆေးဧကရာဇ်၏ မှတ်ဉာဏ်များနှင့် နတ်ဘုရားဝိညာဉ်ကို ရရှိခဲ့ခြင်းသည် ချူးယွင်ဖန်း၏ အကြီးမားဆုံးသော ကံကြမ္မာ ကြုံကြိုက်မှုဖြစ်သည်။

ဤစည်းတံဆိပ်ခတ်ခြင်း နည်းပညာသည် ရှေးဟောင်းလူသားများကာလ၏ အလွန် အံ့ဖွယ်ကောင်းသော စည်းတံဆိပ်ခတ်ခြင်း နည်းပညာဖြစ်သည်။ ၎င်းသည် ကျန်းမိသားစု ဘိုးဘေးကြီးကဲ့သို့ အဆင့်တွင်ရှိနေသည့် လူမျိုးက ထိတွေ့နိုင်သောအရာမျိုး မဟုတ်ပေ။

ချူးယွင်ဖန်းသည် တန်မိသားစု ဘိုးဘေးကြီး၏ ခန္ဓာကိုယ်ကို တန်စီယုဘက်သို့ ညင်သာစွာ ပို့လိုက်သည်။ တန်စီယု၏ မျက်လုံးများသည် ကျေးဇူးတင်မှုများဖြင့် တောက်ပလာသော်လည်း သူမသည် အဆုံးတွင် ထိုသို့သာ ပြောလိုက်သည်။

"သတိထားနော်"

အခြားသော နတ်အဆင့် ကျွမ်းကျင်သူများက အံ့ဩသွားကြသည်။ ကျန်းမိသားစု ဘိုးဘေးကြီးသည် တန်မိသားစု ဘိုးဘေးကြီးကို ရုပ်သေးရုပ်အဖြစ် ပြုပြင်ထားကြောင်း သိရှိကတည်းက ၎င်းတို့အားလုံး ခေါင်းခဲနေကြသော်လည်း ထိုကိစ္စကို ကိုင်တွယ်ဖြေရှင်းရန် နည်းလမ်းကောင်းမျိုး မဖော်ထုတ်နိုင်ခဲ့ပေ။ ယခုမူ ချူးယွင်ဖန်းသည် ဤမျှ လွယ်ကူစွာ ဖြေရှင်းနိုင်ခဲ့သည်။ သူသည် စည်းတံဆိပ်တစ်ခုတည်းဖြင့် တန်မိသားစု ဘိုးဘေးကြီးကို ကျန်းမိသားစု ဘိုးဘေးကြီးဆီမှ ခွဲထုတ်လိုက်နိုင်သည်။

ချူးယွင်ဖန်းကမူ တစ်ဖက်လူ၏ ရုပ်သေးရုပ်အဖြစ် ပြောင်းလဲသွားသူသည် တန်မိသားစု ဘိုးဘေးကြီးမဟုတ်လျှင် ၎င်းကို လက်သီးတစ်ချက်ဖြင့် ချက်ချင်း တိုက်ခိုက် ဖျက်ဆီးပစ်လိုက်ပြီဖြစ်သည်။

"ခင်ဗျား အားကိုးနေတာက ဒါဆိုရင် လက်လျှော့လိုက်လို့ရပြီ။ ဒီနေ့ ခင်ဗျားကို ဘယ်သူမှ ကယ်နိုင်မှာ မဟုတ်ဘူး" ချူးယွင်ဖန်းက အေးစက်စွာ ပြောလိုက်သည်။

"မင်း ကျုပ် ရုပ်သေးရုပ်ကို ဖယ်ထုတ်နိုင်လိုက်တာကို ကိုယ့်ကိုယ်ကို ပြိုင်ဘက်ကင်းပြီလို့ ထင်နေတာလား။ ကျုပ်ရဲ့ ရုပ်သေးတစ်ရုပ်ကို ယူသွားမှတော့ မင်းကိုလည်း တစ်သားတည်းဖြစ်အောင် ပြန်လုပ်ပစ်ရတာပေါ့" ကျန်းမိသားစု ဘိုးဘေးကြီးသည် သူ၏ခန္ဓာကိုယ်မှ အကန့်အသတ်မဲ့ အရောင်အဝါများ ဖြာထွက်နေစဉ် ချူးယွင်ဖန်းကို အေးစက်စွာ စိုက်ကြည့်လိုက်သည်။

"လာပြီး စမ်းကြည့်လိုက်ပေါ့"

ချူးယွင်ဖန်းသည် ကျန်းမိသားစု ဘိုးဘေးကြီးကို စိုက်ကြည့်လိုက်သည်။ ကျန်းမိသားစု ဘိုးဘေးကြီးသည် ပြန်လည်နာလန်ထူရန် အချိန်ဆွဲနေသည့် ဖြစ်စဉ်ကို သူ ဂရုမစိုက်ပေ၊ မည်သို့ဆိုသော် အချိန်ကြာလာသည်နှင့်အမျှ သူ၏ မွေးဖွားခြင်းနယ်မြေ ချီစွမ်းအင်နှင့် စိတ်စွမ်းအင်များ ပေါင်းစပ်လာကာ နတ်စွမ်းအဖြစ်သို့ ပြောင်းလဲသွားပေလိမ့်မည်။ တစ်နည်းအားဖြင့်ဆိုသော် အချိန်ဆွဲခြင်းသည်လည်း သူ့အတွက် အကျိုးရှိလှသည်။

ကျန်းမိသားစု ဘိုးဘေးကြီး၏ ခွန်အားသည် အကန့်အသတ်ရှိသော်လည်း ချူးယွင်ဖန်း၏ ခွန်အားသည် အဆက်မပြတ် အားကောင်းသန်မာလာသည်။ နတ်စွမ်းအင်ဖြည့်တင်းဆေး၏ ဆေးဖက်ဝင် အာနိသင်များသည် ဆက်လက် ပျံ့နှံ့နေဆဲဖြစ်သည်။

နောက်ဆုံးတွင် ကျန်းမိသားစု ဘိုးဘေးကြီးသည် ကြာကြာမထိန်းချုပ်နိုင်တော့ပေ။ သူသည် ကျယ်လောင်သော ဟောက်သံကို ထုတ်လွှတ်လိုက်ရာ လေထုတစ်ခုလုံးပင် တုန်ခါသွားလေသည်။ ကောင်းကင်ယံရှိ မရေတွက်နိုင်သော ကြယ်ပွင့်များသည် သူ၏ တန်ခိုးစွမ်းအင်ကို ထင်ဟပ်နေသကဲ့သို့ ပြင်းထန်သော အလင်းရောင်များဖြင့် ပွင့်လန်းနေကြသည်။

ထိုအချိန်တွင် အကန့်အသတ်မဲ့သော သဘာဝတရား၏ ဝိညာဉ်စွမ်းအင်များသည် အပြင်းအထန် စုစည်းလာကြသည်။ ၎င်းတို့သည် သာမန်မျက်စိဖြင့် မြင်တွေ့နိုင်သော အရှိန်အဟုန်ဖြင့် သူ၏လက်ထဲသို့ စုစည်းလာကာ ကြောက်မက်ဖွယ်ကောင်းသော ဓားရှည်တစ်ခု ဖြစ်ပေါ်လာစေသည်။

"ဘယ်လိုနည်းမျိုးလဲ ဟ။ ကျန်းမိသားစု ဘိုးဘေးကြီးက ခွန်းလွန်မြို့က မြေပြင်အမှတ်အသား လမ်းကြောင်းရဲ့ စွမ်းအင်ကို သုံးချင်သလို သုံးနိုင်နေတာလား

"ထင်တဲ့အတိုင်းပဲ ကျန်းမိသားစု ဘိုးဘေးကြီးကို ဖြေရှင်းတာ ဒီလောက်တော့ မလွယ်လောက်ဘူး"

"ဒါက တကယ့်ကို သူမတူထူးခြားတဲ့ တိုက်ပွဲပဲ။ နတ်အဆင့် ကျွမ်းကျင်သူတွေရဲ့ အထွတ်အထိပ်အဆင့်ကိုတောင် ကျော်လွန်နေပြီ"

"ဒါဟာ နတ်အဆင့်ရဲ့ စွမ်းအင် အစစ်အမှန်ပဲ။ သဘာဝတရားရဲ့ စွမ်းအားကို ချေးငှားတယ်ဆိုတာ လူတစ်ယောက်ရဲ့ စွမ်းအင်နဲ့ မကန့်သတ်ထားဘူး။ လူသားတွေရဲ့ စွမ်းအင်က ကန့်သတ်ချက်ရှိတယ်ဆိုပေမယ့် သဘာဝတရားရဲ့ စွမ်းအားက အဆုံးမဲ့တယ်"

မရေတွက်နိုင်သော အထူးစစ်ဆင်ရေးအဖွဲ့ဝင်များသည် ကျန်းမိသားစု ဘိုးဘေးကြီး၏နည်းလမ်းများကြောင့် ထိတ်လန့်သွားကြသည်။ လူတစ်ဦး၏ သိုင်းပညာအတွင်း သဘာဝတရား၏ စွမ်းအင်များကို ချုပ်ကိုင်ထားနိုင်ခြင်းသည် အလွန်ကြောက်မက်ဖွယ်ကောင်းသော သိုင်းပညာတစ်ခုဖြစ်သည်။ ဓားရှည်သည် ပိုမိုတောက်ပလာသည်နှင့်အမျှ တစ်ချိန်တည်းမှာပင် ပိုပို၍ လေးလံလာသည်။ ၎င်းအနက် မည်မျှ ကြောက်မက်ဖွယ် စွမ်းအင်များရှိနေသည်ကို မည်သူမျှ မသိနိုင်ပေ။

ဘုံး

ဓားရှည်သည် ရုတ်တရက် ဆင်းသက်လာ၍ ၎င်းအတွင်းရှိ ကြောက်မက်ဖွယ် စွမ်းအင်များ ချက်ချင်း ပေါက်ထွက်လာသည်။ ၎င်းသည် ကောင်းကင်ကြီးကို အပိုင်းပိုင်း ခွဲထုတ်လိုက်သကဲ့သို့ အလွန် ကြောက်မက်ဖွယ်ကောင်းလှသည်။ အထူးစစ်ဆင်ရေးဌာနတွင်ရှိနေသော ကျွမ်းကျင်သူများစွာသည် ဤဓါးချက်၏ အံ့အားသင့်ဖွယ်စွမ်းအင်ကို ခံစားလိုက်ရသည်။ ၎င်းတို့အားလုံး မလှုပ်ရှားနိုင်တော့ဘဲ ဒီဓားချက်၏ စွမ်းအင်ကြောင့် မှင်သက်သွားကြသည်။

ဓါးချက် ဆင်းသက်ခါနီးတွင် ချူးယွင်ဖန်း၏ ခန္ဓာကိုယ်ရှိ ဆူပွက်နေသော သွေးများ အရှိန်အဟုန်ဖြင့် ပျံ့နှံ့လာပြီးနောက် ကြောက်မက်ဖွယ် စွမ်းအားတစ်ခုသည် ကောင်းကင်ယံသို့ ချက်ချင်း မြင့်တက်သွားသည်။ ချူးယွင်ဖန်းသည် စတင်လှုပ်ရှားလိုက်သည်။ သူက မြန်ဆန်ပုံမပေါ်သော်လည်း အမှန်တကယ် မြန်ဆန်လှသည်။ သူသည် တခဏချင်းမှာပင် သူ၏လက်ငါးချောင်းကို ကျစ်ကျစ်ဆုပ်၍ သူ၏လက်သီးတစ်ချက်ကို ရိုးရှင်းစွာ ဝှေ့ယမ်းလိုက်သည်။ တောက်ပလှသော လက်သီးစွမ်းအင်သည် ဧရာမ အသူရကာယ်တစ်ပါးအဖြစ် ပြောင်းလဲကာ သဘာဝတရား၏ စွမ်းအင်များဖြင့် ပြည့်နှက်နေသော ဓားသွားကို ထိမိသွားသည်။

ဘုံး

၎င်းသည် အလွန် ပြင်းထန်သော ရိုက်ခတ်မှုဖြစ်၍ တောက်လောင်သော နေမင်းကြီး ပေါက်ကွဲသွားသကဲ့သို့ ထင်မှတ်ရစေသည်။ ထိုကြောက်မက်ဖွယ် စွမ်းအင်များသည် လူအများအပြားကို ကြောက်ရွံ့တုန်လှုပ်သွားစေ၏။ အလင်းရောင်သည် အရာအားလုံးကို ဖုံးလွှမ်းသွားကာ ထိုအချိန်တွင် လူတိုင်း၏ အမြင်အာရုံ လုပ်ဆောင်နိုင်စွမ်းများ ဆုံးရှုံးသွားကြသည်။

အမြင်အာရုံများ ပြန်ရလာသောအခါ အသူရကာယ်၏ ကြီးမားသော လက်သီးချက်သည် ဓါးသွားကို ထိမှန်သွားကြောင်း တွေ့လိုက်ရ၍ မဆုတ်သာ မတိုးသာသော အခြေအနေတွင် ရှိနေကြသည်။ ပြီးနောက် အသူရကာယ်သည် သက်ရှိနတ်ဘုရားတစ်ပါးကဲ့သို့ ရွှေရောင်အလင်းတန်းများဖြင့် ထွန်းတောက်နေသည်ကို လူတိုင်း မြင်တွေ့လိုက်ရသည်။ ခဏတာ သရေကျနေပြီးနောက် ဓားသည် လက်သီးချက်၏ စွမ်းအင်ကို မတားဆီးနိုင်ဘဲ စတင် အက်ကွဲလာလေသည်။

ဘန်း

ဓားသည် ကျယ်လောင်သော ပေါက်ကွဲသံနှင့်အတူ ကောင်းကင်ယံတွင် ပြည့်နှက်သွားသော အလင်းရောင်များအဖြစ် ပြောင်းလဲပြီးနောက် သဲလွန်စမရှိစွာ ပျောက်ကွယ်သွားခဲ့သည်။ ကျန်းမိသားစု ဘိုးဘေးကြီး၏ မျက်နှာအမူအရာ ဖျော့တော့သွားလေသည်။ ဤဓားသည် သူ့စိတ်နှင့် ချိတ်ဆက်ထားသောကြောင့် ၎င်း၏စွမ်းအင်ကို ဤအဆင့်အထိ မြှင့်တင်နိုင်ခဲ့ခြင်းဖြစ်သည်။ သာမာန်တတိယမြောက် နတ်အဆင့် ကျွမ်းကျင်သူလျှင်ပင် မရှောင်တိမ်းနိုင်ပါက ဤဓားသွားဖြင့် ခုတ်ပိုင်းခံရပေလိမ့်မည်။

ဤသည်မှာ စတုတ္ထမြောက် နတ်အဆင့်သို့ ဖြတ်ကျော်ပြီးနောက် သူ နားလည်ထားခဲ့သည့် လေးနက်သော ဆက်သွယ်မှုတစ်ခုဖြစ်သည်။ သို့သော် ချူးယွင်ဖန်း၏ ထိုးနှက်ချက်ကြောင့် ကျိုးကြေသွားမည်ဟု မည်သူ သိသနည်း။

ချူးယွင်ဖန်း၏ အေးစက်စက်အသံက သူ၏နားထဲသို့ ရောက်ရှိလာသည်။

"ကမ္ဘာကြီးကို ချုပ်ကိုင်နိုင်မယ်လို့ ခင်ဗျား တကယ် ထင်နေတာလား။ စတုတ္ထမြောက် နတ်အဆင့်ကို ခင်ဗျား ရောက်နိုင်ပေမယ့် ဒီလိုအရာမျိုး ခင်ဗျား စွမ်းဆောင်နိုင်မှာ မဟုတ်ဘူး"

ထိုမှတစ်ဆင့် ချူးယွင်ဖန်း၏ ခန္ဓာကိုယ်မှ ကြောက်မက်ဖွယ် အရောင်အဝါ ထွက်ပေါ်လာကာ ကောင်းကင်ယံသို့ မြင့်တက်သွားလေသည်။ ရွှေရောင်အလင်းတန်းတစ်ခုသည် အရှိန်အဟုန် ပြင်းထန်စွာ ဖြတ်သန်းသွားခဲ့ရာ၊ ၎င်းသည် ရွှေရောင်ငှက်ကြီးတစ်ကောင်ဖြစ်ကြောင်း ဇဝေဇဝါ မြင်တွေ့နိုင်သည်။

ဤသည်မှာ ချူးယွင်ဖန်း၏ ဂဠုန်အပိုင်းဖြစ်၍ သူ၏လက်သီးချက် အရှိန်အဟုန်သည် တုနှိုင်းမဲ့လှသည်။ ကျန်းမိသားစု ဘိုးဘေးကြီးသည် သူ၏ဓားကို ဝှေ့ယမ်းရုံမျှ ပြုလုပ်နိုင်ခဲ့သော်လည်း ရွှေရောင်ငှက်ကြီးသည် ၎င်းကို လုံးလုံးလျားလျား ဖျက်ဆီးပစ်လိုက်သည်။ ပြီးနောက် လက်သီးချက်သည် သူ့ခန္ဓာကိုယ်သို့ ထိမှန်သွားလေ၏။

ဘန်း

ကျန်းမိသားစု ဘိုးဘေးကြီးသည် ခြေလှမ်းတစ်ထောင်ကျော်မျှ လွင့်ပျံပြီးမှသာ တည်ငြိမ်အောင် ထိန်းချုပ်နိုင်ခဲ့သည်။ သို့သော် သူသည် ပါးစပ်မှ သွေးများ အန်ထွက်သွားလေသည်။ ကျန်းမိသားစု ဘိုးဘေးကြီးသည် လက်သီးချက် တစ်ချက်ဖြင့် ပြင်းထန်စွာ ဒဏ်ရာရရှိသွားခဲ့သည်။

အခန်း (၉၁၈) ခင်ဗျားက ဒီလောက်ပါပဲ

နေရာတစ်ခုလုံး အလွန် တိတ်ဆိတ်သွားကြရာ၊ လူတိုင်းက အံ့ဩထိတ်လန့်၍ အနည်းငယ် မှင်သက်သွားကြသည်။ ကျန်းမိသားစု ဘိုးဘေးကြီးသည် အလွန် အင်အားကြီးမားမှုနှင့်ပတ်သက်၍ ယုံမှားသံသယဖြစ်ရန် မလိုပေ။ သို့သော် သူသည် လက်သီးချက်တစ်ချက်ကြောင့် ဒဏ်ရာအပြင်းအထန်ရရှိသွားကာ သွေးများ အန်ထွက်ရသည့်အခြေအနေထိ ရောက်ရှိခဲ့ရသည်။

"ထင်ထားတဲ့အတိုင်း ချူးယွင်ဖန်းက နတ်အဆင့်ကို တက်လှမ်းပြီးတဲ့နောက် တော်တော် ကြောက်စရာကောင်းအောင် သန်မာလာတာပဲ" ချူးဟောက်ယွဲ့က ညည်းညူမိသွားသည်။

သူနှင့် ချူးယွင်ဖန်းတို့သည် နတ်အဆင့်သို့ တစ်ချိန်တည်းဖြစ်လုနီးပါး ဝင်ရောက်ခဲ့ကြသည်။ ၎င်းတို့ကြားရှိ ကွာခြားချက်က လအနည်းငယ်မျှသာဖြစ်သည်။ ဤအချိန်ကွာခြားချက်သည် ဤအဆင့်သို့ တစ်ပြိုင်နက်တည်း တက်လှမ်းခြင်းဖြစ်သည်ဟု ယူဆနိုင်သည်။ သို့သော် နှစ်ဖက်အကြားရှိ ခွန်အားကွာခြားချက်သည် ကောင်းကင်နှင့် မြေကြီးကဲ့သို့ဖြစ်နေသည်။

ချူးယွင်ဖန်းသည် နတ်အဆင့်သို့ မတက်လှမ်းခဲ့လျှင်ပင် ချူးယွင်ဖန်းနှင့် မယှဉ်ပြိုင်နိုင်ကြောင်း သူ သိနေသည်။ သို့သော် ချူးယွင်ဖန်းသည် ဤအဆင့်သို့ တက်လှမ်းပြီးနောက် ဤမျှ သန်မာအားကောင်းလာလိမ့်မည်ဟု သူ မထင်မှတ်ထားခဲ့ပေ။ သူသည်လည်း နတ်အဆင့်တွင် ရှိနေသော်လည်း ကျန်းမိသားစု ဘိုးဘေးကြီး၏ ထိုးနှက်ချက် တစ်ချက်ကိုပင် မခံနိုင်ခဲ့ပေ။ တစ်ဖက်တွင်မူ ချူးယွင်ဖန်း၏ ပေါ့လျော့သော တိုက်ခိုက်မှုသည် ကျန်းမိသားစု ဘိုးဘေးကြီးကို ပြင်းထန်စွာ ဒဏ်ရာရရှိသွားစေခဲ့သည်။ ၎င်းတို့ နှစ်ဦး၏ ကျင့်ကြံအဆင့်များသည် တူညီမှု မရှိကြပေ။

"အနည်းဆုံးတော့ ကျုပ်တို့တွေ လူမှားပြီး မထောက်ပံ့မိဘူးပေါ့။ ပြည်ထောင်စုမှာ နောက်ထပ် ထိပ်တန်း ကျွမ်းကျင်သူတစ်ယောက် ရှိလာတော့မယ်" ကျူးပုဖျင်က စကားပြောနေစဉ် ရယ်မောလိုက်သည်။ သို့သော် ရယ်မောနေစဉ် ဒဏ်ရာများကို ဆွဲဆန့်မိသောကြောင့် သူ၏မျက်နှာအမူအရာ အဆက်မပြတ် တွန့်လိမ်သွားလေသည်။

"ဒင်းကို အသေ ရိုက်သတ်ပစ်လိုက်၊ အဆင့်ဖြတ်ကျော်သွားတာနဲ့ ကျုပ်တို့ကို လာပြီးအနိုင်ကျင့်လို့ မရဘူးဆိုတာကို အဲဒီအဘိုးကြီး သိသွားအောင် လုပ်လိုက်"

လူတိုင်းတွင် ကိုယ့်အတွေးကိုယ်စီရှိကြသော်လည်း အားလုံးက ချူးယွင်ဖန်း၏ တိုက်ခိုက်ရေးစွမ်းရည်ကို အကဲဖြတ်နေကြသည်။ အခြားလူများမဆိုနှင့် ကျန်းမိသားစု ဘိုးဘေးကြီးလျှင်ပင် အလွန် တုန်လှုပ်သွားခဲ့သည်။ သူသည် မှော်လက်နက်အဆင့်ရှိ ချပ်ဝတ်တန်ဆာကို ဝတ်ဆင်ထားသောကြောင့် သာမာန်အခြေအနေအရ မည်သူက မည်မျှပင် တိုက်ခိုက်နေပါစေ သူ့ကို ထိခိုက်အောင် မလုပ်ဆောင်နိုင်ပေ။

ယခင်ကဲ့သို့ပင် နတ်အဆင့် ကျွမ်းကျင်သူငါးဦး၏ ဝိုင်းရံမှုကို ခံထားရသည့်တိုင် ဒဏ်ရာအနာတရမရှိဘဲ ပြန်ထွက်လာနိုင်သည့်အပြင် အခြေအနေ ဆိုးယုတ်ပုံပင်မပေါ်ခဲ့ပေ။ ထိုအရာအားလုံးသည် ဤချပ်ဝတ်တန်ဆာ၏ ခံစစ်စွမ်းရည်ကြောင့်ဖြစ်သည်။ ထိုလူများ၏ တိုက်ခိုက်မှုများသည် သံချပ်ကာ၏ ခုခံမှုကိုပင် မချိုးဖျက်နိုင်ခဲ့ပေ။

ယခုမူ ချူးယွင်ဖန်းသည် သူ၏ ချပ်ဝတ်တန်ဆာကို လက်သီးတစ်ချက်ဖြင့် ချိုးဖျက်ပစ်လိုက်သည်။ သူသည် ချပ်ဝတ်တန်ဆာ ချိုင့်ဝင်သွားကြောင်း ခံစားလိုက်ရသောကြောင့် လက်သီးချက်က သူ့ကို ဒဏ်ရာရရှိစေခဲ့ခြင်းဖြစ်သည်။ တစ်နည်းဆိုရသော် ချူးယွင်ဖန်း၏ အလွန်ပြင်းထန် လက်သီးစွမ်းအင်သည် သက်သေဖြစ်သည်။

သူသည် ချူးယွင်ဖန်း၏ ပြင်းထန်သော ကြံ့ခိုင်မှုနှင့် ရုပ်ပိုင်းဆိုင်ရာ အရည်အသွေးများအပေါ် အလွန် လေးနက်စွာ ကြောက်ရွံ့မိသွားသည်။ အခြားမဆိုနှင့် ချူးယွင်ဖန်း၏ ကြောက်မက်ဖွယ်ကောင်းသော ကာယကြံ့ခိုင်မှုတစ်ခုတည်းက သန်မာသော ရန်သူပေါင်းများစွာကို သုတ်သင်ရှင်းလင်းရန် လုံလောက်ပေသည်။ ချူးယွင်ဖန်းနှင့် ဤကဲ့သို့ တိုက်ခိုက်ခြင်း၏ အကျိုးဆက်ကို ခန့်မှန်းကြည့်၍ပင် သိနိုင်သည်။

"ချူးယွင်ဖန်း၊ မင်း ကျုပ်ရဲ့ မိသားစုဝင်တွေ အများကြီးကို သတ်ပစ်ခဲ့တယ်။ ဒီနေ့မှာ သွေးကြွေးနဲ့ မင်း ပေးဆပ်ရလိမ့်မယ်" ကျန်းမိသားစု ဘိုးဘေးကြီးက အော်ဟစ်လိုက်သည်။

ချူးယွင်ဖန်းက သူ့ကို အေးစက်စွာ ကြည့်ရုံသာ ကြည့်နေ၍ မည်သည့်စကားမျှ ပြန်မပြောခဲ့ပေ။ ဤလူများသည် အင်အားကြီးမား၍ မြင့်မားသော ရာထူးအဆင့်အတန်းတွင် တည်ရှိခဲ့သည်မှာ ကြာမြင့်ပြီဖြစ်၍ မိမိကို ကြိမ်ဖန်များစွာ သတ်ဖြတ်ရန် ကြိုးပမ်းခဲ့ခြင်းနှင့် ပတ်သက်၍ အားလုံးကို မေ့လျော့သွားကြသည်။

"ခင်ဗျားကလား။ ခင်ဗျားက အဲ့လောက်လည်း မဟုတ်ပါဘူး"

ချူးယွင်ဖန်းသည် အချိန်အတော်ကြာတွင် သူ၏ နှုတ်ခမ်းကို ဖွင့်ဟကာ ထိုစကားများကို ဆိုသည်။ သူ၏ခန္ဓာကိုယ်အတွင်းရှိ မွေးဖွားခြင်းနယ်မြေအဆင့် စွမ်းအင်များသည် နတ်စွမ်းအင်အဖြစ်သို့ ပြောင်းလဲနေဆဲဖြစ်သည်။ အကယ်၍ သာမန်လူတစ်ဦးသာဖြစ်ခဲ့ပါက ၎င်းတို့၏ ချီစွမ်းအင်အားလုံးသည် ယခုအချိန်တွင် နတ်စွမ်းအင်အဖြစ်သို့ ပြောင်းလဲသွားပြီသော်လည်း ချူးယွင်ဖန်း၏ ချီစွမ်းအင်သည် တူညီသော အဆင့်တွင်ရှိလူများထက် အနည်းဆုံးလျှင် ဆယ်ဆ သို့မဟုတ် ဒါဇင်ပေါင်းများစွာ များပြားလှသည်။ ထို့ကြောင့် သူ၏အသွင်ပြောင်းလဲသော အချိန်သည် သာမန်လူများထက် ပို၍ ကြာမြင့်ပေသည်။

ကျန်းမိသားစု ဘိုးဘေးကြီးသည် ချူးယွင်ဖန်း၏စကားများရှိ အထင်အမြင်သေးမှုများကို ခံစားရနိုင်သည်။ သူ၏မျက်နှာသည် ချက်ချင်းပင် ဒေါသကြောင့် နီရဲလာ၍ ကျယ်လောင်စွာ အော်ဟစ်လိုက်လေသည်။

"သဘာဝတရား၏ စွမ်းအားကို ချေးငှားခြင်း၊ ဝိဇ္ဇာကိုယ်ခန္ဓာ"

ထိုအချိန်တွင် ကျန်းမိသားစု ဘိုးဘေးကြီးသည် စည်းတံဆိပ်တစ်ခုကို လက်ဖြင့် ဖန်တီးပြုလုပ်လိုက်သည်။ ရုတ်တရက်ဆိုသလိုပင် ဟင်းလင်းပြင်ထဲတွင် နားမလည်နိုင်သော စွမ်းအင်များ စုစည်းနေသကဲ့သို့ လေများ တိမ်တိုက်များနှင့် မြေကြီးများ လှုပ်ခတ်လာခြင်းကို လူတိုင်း ခံစားလိုက်ရသည်။ နားမလည်နိုင်သော ဤစွမ်းအင်များ စုစည်းလာသည်နှင့် ကောင်းကင်ယံတွင် ပြည့်လျှံနေသော ရွှေရောင် အလင်းတန်းတစ်ခုအဖြစ် ပြောင်းလဲသွားကာ ကျန်းမိသားစု ဘိုးဘေးကြီး၏ ခန္ဓာကိုယ်ထဲသို့ စိမ့်ဝင်သွားလေသည်။

ကျန်းမိသားစု ဘိုးဘေးကြီး၏ ခန္ဓာကိုယ်သည် လူတိုင်း၏ စောင့်ကြည့်နေသော မျက်လုံးများအောက်တွင် ဆယ်ပေပြည့်သည်အထိ မြင့်မားလာ၍ ရုတ်တရက် ထွားကျိုင်းလာသည်။ သူ၏ကြွက်သားများ ဖောင်းပွလာပြီးနောက် အရေပြားများပေါ်တွင် ရွှေရောင်အလင်းတန်းများ ဖြာထွက်နေခြင်းကြောင့် သူ့ကို သက်ရှိ ဝိဇ္ဇာကြီးတစ်ပါးကဲ့သို့ ထင်မှတ်ရစေသည်။ ဝိဇ္ဇာ၏မျက်လုံးများတွင် ဒေါသများနှင့် ပြည့်နှက်သွားသောအခါ ကောင်းကင်နှင့်မြေကြီးပင် တုန်လှုပ်သွားလေသည်။

“အဲဒါက နတ်အဆင့် ပေးသနားမှု မန္တန်လား” ကျွမ်းကျင်သူများက လုံးလုံးလျားလျား အံ့ဩသွားကြသည်။ ၎င်းတို့သည် ဤသိုင်းပညာ၏ ဇာစ်မြစ်ကို အသိအမှတ်ပြုလိုက်ကြသည်။ ပြည်ထောင်စုသည် အရည်အသွေးပြည့်ဝသော ပညာရေးအပေါ် အလေးထားဆောင်ရွက်ခဲ့ကြသည်။ ဤအဆင့်ထိ ကျင့်ကြံနိုင်သူများသည် ကျင့်ကြံမှုတွင် ထူးချွန်ရုံသာမကဘဲ အခြားကဏ္ဍများတွင်ပါ ကျွမ်းကျင်ကြသူများဖြစ်သည်။

၎င်းတို့သည် အခြေခံအားဖြင့် အကျယ်တဝင့် ပညာသင်ယူပြီးနောက် စွမ်းရည်အမျိုးမျိုးရှိကြသော ပြည်ထောင်စု၏ လက်ရွေးစင်များဖြစ်ကြသည်။ ၎င်းတို့အားလုံးသည် ဤမန္တန်၏ မူလဇာစ်မြစ်ကို ပြန်သတိရသွားကြသည်။ မှန်ကန်စွာပြောရမည်ဆိုလျှင် ၎င်းနှင့်ပတ်သက်၍ရှည်လျားတဲ့ သမိုင်းကြောင်းတစ်ခု ရှိခဲ့ပါသည်။ ဤမန္တန်သည် ကပ်ဘေးဆိုးမဖြစ်မီ ရှေးခေတ်ကာလ၌ နေရာတိုင်းတွင် တွေ့ရလေ့ရှိသည်။ ၎င်းသည် လူအများကို လှည့်စားရာတွင် ဘာသာတရား အသီးသီးက အသုံးပြုလေ့ရှိသော လှည့်ကွက်တစ်ခုဖြစ်သည်။

မဟာ ကပ်ဘေးဆိုးကြီးအပြီးတွင် ဤအရာသည် တန်ဖိုးအနည်းငယ်သာ ရှိခဲ့သည်။ မည်သို့ဆိုသော် ဤခေတ်ရှိ လူများသည် နတ်ဘုရားများသည် သာမန်ထက် အင်အားကြီးမားသူများဖြစ်သည်ဟုသာ ယုံကြည်သောကြောင့် နတ်အနုပညာများအတွက် စျေးကွက်မရှိတော့ပေ။

သို့သော် ဤသည်မှာ သာမန်လူများ၏ အတွေးအခေါ်များသာ ဖြစ်သည်။ လက်တွေ့တွင် နတ်အဆင့် ပေးသနားမှု မန္တန်သည် ပျောက်ကွယ်သွားခြင်း မရှိကြောင်း ၎င်းတို့ကဲ့သို့ ပြည်ထောင်စု၏ အထက်တန်းလွှာများအနေဖြင့် သိထားကြသည်။ ၎င်းသည် မြို့စွန်နယ်မြေများရှိ ဂိုဏ်းကြီးများကြားတွင် အလွန်ရေပန်းစားခဲ့သည်။

၎င်းသည် မရီးဒျန်သန့်စင်ခြင်း သို့မဟုတ် မွေးဖွားခြင်းနယ်မြေအဆင့် ကျွမ်းကျင်သူများသာ အသုံးပြုသော သာမန်သိုင်းပညာတစ်ခုဖြစ်သည်။ မည်သည် နတ်အဆင့် ကျွမ်းကျင်သူကမျှ အသုံးပြုမည် မဟုတ်ပေ။ မည်သို့ဆိုသော် ၎င်းတို့ ဆင့်ခေါ်နိုင်သည့် ကြီးမြတ်သော နတ်ဘုရားများသည် ၎င်းတို့ထက် များစွာ အားနည်းသောကြောင့်ဖြစ်သည်။ ၎င်းသည် စိတ်ထား ကြည်လင်ပြတ်သားသော ကျွမ်းကျင်သူများအတွက် လုံးလုံးလျားလျား အသုံးမဝင်ကြပေ။

သို့သော် ကျန်းမိသားစု ဘိုးဘေးကြီး အသုံးပြုခဲ့သော မန္တန်သည် သိသိသာသာ ကွဲပြားနေသည်။ သူ၏ အပေါ်ပိုင်းခန္ဓာကိုယ်သည် ဝိဇ္ဇာတစ်ပါးကဲ့သို့ဖြစ်နေရာ၊ သူ၏ အရောင်အဝါများသည် အလွန် ပြင်းထန်လှသည်။ သူသည် ထိုပြင်းထန်သော အရောင်အဝါမျာကြောင့် အခြားလူတစ်ဦးအဖြစ်သို့ ချက်ချင်း ပြောင်းသွားပုံပေါ်သည်။

"သေလိုက်"

ကျန်းမိသားစု ဘိုးဘေးကြီး၏ မျက်လုံးများသည် သွေးနီရောင် အလင်းတန်းများဖြင့် လှုပ်ခတ်လာသောကြောင့် သူ၏ပတ်ဝန်းကျင်ရှိ ရွှေရောင် အရောင်အဝါနှင့် သိသာပြတ်သားစွာ ခြားနားထွက်ပေါ်လာစေသည်။ ၎င်းသည် သန့်စင်မြင့်မြတ်သော်လည်း ဖုံးကွယ်ရန် ခက်ခဲသော နတ်ဆိုး အရောင်အဝါများကဲ့သို့ ဖြစ်နေသည်။ သူသည် တခဏချင်းမှာပင် လှုပ်ရှားလိုက်သည်။ သူသည် လက်ထဲရှိ ဘဝအဆုံးသတ်သူကို မြှောက်တင်လိုက်ရာ၊ ကောင်းကင်ယံတွင် သတ်ဖြတ်ချင်စိတ်များ စုစည်း ဖြစ်ပေါ်သွားလေသည်။

ဤနေရာသည် နတ်အဆင့် ကျွမ်းကျင်သူများစွာ၏ တိုက်ပွဲကို ကြုံတွေ့ခဲ့ရသောကြောင့် ဤနေရာရှိ သတ်ဖြတ်ချင်စိတ်သည် အခြားနေရာများထက် များစွာ သာလွန်လှသည်။ ၎င်းသည် စစ်မြေပြင်တစ်ခုကဲ့သို့ဖြစ်နေသည်။ နတ်အဆင့် ကျွမ်းကျင်သူများဖြစ်သည့် ကျူးပုဖျင်နှင့် အခြားသူများလျှင်ပင် ဤတိုက်ခိုက်မှု၏ အန္တရာယ်ကို လွန်စွာခံစားရသည်။ ဤခုတ်ချက်သည် အောက်ဘက်ရှိ အထူးစစ်ဆင်ရေးဌာနကို လုံးလုံးလျားလျား ဖျက်ဆီးပစ်နိုင်သည်။

"ဟားဟား၊ ဒါကတော့ စိတ်ဝင်စားစရာကောင်းလာပြီပဲ"

ချူးယွင်ဖန်းသည် နောက်မဆုတ်ဘဲ အရှေ့သို့ ချီတက်၍ ကျယ်လောင်စွာ အော်ဟစ်လိုက်သည်။ သူသည်လည်း စတင်လှုပ်ရှားလိုက်သည်။ သူသည် ထိုအချိန်တွင် လက်ငါးချောင်းကို ကျစ်ကျစ်ဆုပ်ပြီးနောက် အသူရကာယ်တစ်ပါး ဖန်တီးကာ ဓါးချက်နှင့် ထိပ်တိုက်ရင်ဆိုင်လိုက်သည်။

ဘန်း

ရွှေထည်နှင့် သံသတ္တုများ တိုက်မိသကဲ့သို့ ကျယ်လောင်သော ပေါက်ကွဲသံတစ်ခု ထွက်ပေါ်လာသည်။ နှစ်ဦးနှစ်ဖက်၏ ရိုက်ခတ်မှုသည် နေရာအနှံ့သို့ မီးပွားများ ပျံ့လွင့်သွားစေသည်။ ဝိဇ္ဇာ၏အပေါ်ပိုင်း ကိုယ်ထည်ကို ရရှိပြီးနောက် ကျန်းမိသားစု ဘိုးဘေးကြီး၏ ကိုယ်ခန္ဓာကြံ့ခိုင်မှုသည် ပိုမို အားကောင်းလာခဲ့သည်။ သူသည် ပြင်းထန်သော တိုက်ခိုက်မှုအပြီးတွင် လှုပ်ရွေ့သွားခြင်းမရှိဘဲ ချူးယွင်ဖန်းကို အရူးအမူး ခုတ်ပိုင်းနေသည်။

ချူးယွင်ဖန်းသည် ပြိုင်ဘက်ကောင်းတစ်ယောက်ကို ရှာတွေ့ခဲ့သကဲ့သို့ သူ၏ခန္ဓာကိုယ်အတွင်းရှိ စွမ်းအင်နှင့် သွေးများကို လှုံ့ဆော်လိုက်ပြီးနောက် ကောင်းကင်ယံကို ပြည့်နှက်သွားစေသည့် လက်သီးအရိပ်များကို လွှတ်တင်လိုက်လေသည်။

ဘုံး ဘုံး ဘုံး

ထိတ်လန့်ဖွယ်ရာ တိုက်ခိုက်မှုများနှင့် ကြောက်မက်ဖွယ်ရာ လှိုင်းလုံးကြီးများသည် အရာအားလုံးကို နစ်မြုပ်သွားစေ၏။