အခန်း (၉၆၇-၉၆၉)

အခန်း (၉၆၇) သုတ်သင်ခံရခြင်း၊ ပြည်ထောင်စုတစ်ခုလုံး တုန်လှုပ်မှု

ကျန်ရစ်သည့် ရာနှင့်ချီသော ကျွမ်းကျင်သူများသည် တိုက်ပွဲ အတွေ့အကြုံရှိသူများ ဖြစ်ကြသည်။ ၎င်းတို့သည် မရေတွက်နိုင်သော လူများစွာအနက် ထင်ပေါ်လာကာ မွေးဖွားခြင်းနယ်မြေအဆင့်သို့ တက်လှမ်းနိုင်ခဲ့သူများဖြစ်သည်။ ၎င်းတို့ထဲအနက် လူအများအပြားသည် ဒုစရိုက်လောကတွင် ရုန်းကန်ခဲ့ကြသည်။

၎င်းတို့၏ စိတ်ဓာတ်ကြံ့ခိုင်မှုသည် စိတ်ကူးယဉ်ကြည့်ရန် ခဲယဉ်းလှ၍ အများစုသည် သတ်ဖြတ်မှုများဖြင့် ယှဉ်ပါးသူများဖြစ်ကြသည်။ ယခုမူ ချူးယွင်ဖန်းသည် ၎င်းတို့အားလုံးကို တစ်ဦးတည်း သတ်ဖြတ်လိုက်ရာ၊ သူ့ဘက်မှ အသတ်ဖြတ်ခံရမည့် အရိပ်အယောင်ဟူ၍ မတွေ့ခဲ့ရပေ။

ချူးယွင်ဖန်း၏ခန္ဓာကိုယ်သည် အမှန်တကယ်ပင် နတ်စွမ်းအင် အတက်အကျများ မထုတ်လွှတ်ခဲ့သော်လည်း သူ၏ခန္ဓာကိုယ်သည် သန်မာလှသည်။ သူသည် ခန္ဓာကိုယ်၏စွမ်းအင်ကို အားကိုးရုံဖြင့် ထောင်ပေါင်းများစွာသော ကျွမ်းကျင်သူများကို သတ်နိုင်ခဲ့၍ ၎င်းတို့အားလုံးကို ပြန်ဆုတ်ခွာသည်အထိ တွန်းအားပေးခဲ့သည်။ ဝန်းရံတိုက်ခိုက်မှုသည် သူ၏အရှေ့တွင် အောင်မြင်မှုအတွက် လက္ခဏာမျှပင် မပြသခဲ့ပေ။

၎င်းတို့၏ တိုက်ခိုက်မှုများသည် သူ့အပေါ် မကျရောက်နိုင်ပေ။ ယခုတစ်ကြိမ်တွင် ချူးယွင်ဖန်းသည် သူ၏ အံ့ဩဖွယ် ရွေ့လျားမှုသိုင်းပညာများကို အမှန်တကယ် ပြသခဲ့သည်။ သူသည် ပုံရိပ်ကိုးသွယ်ကိုယ်ပွါးရွေ့ရှားမှု သိုင်းပညာ ပုံရိပ်ကိုးသွယ်ရွေ့လျားခြင်းနှင့် လေပြေတိုက်ခတ်ခြင်းတို့ကို အဆက်မပြတ် အသုံးပြုခဲ့သည်။

ချူးယွင်ဖန်းသည် ၎င်းတို့ကို တိုက်ခိုက်ရန်ပင် အခွင့်အရေး မပေးခဲ့သောကြောင့် ၎င်းတို့၏ တိုက်ခိုက်မှုအားလုံး လစ်ဟင်းသွားလေသည်။ ချူးယွင်ဖန်းသည် ဝိုင်းရံခံထားကြောင်း သိသာသော်လည်း ဝိုင်းခံထားရသည့် အသွင်အပြင်မျိုး မပြသခဲ့ပေ။ သူသည် မရေတွက်နိုင်သည့် တိုက်ခိုက်မှုများဖြင့် တစ်ပြိုင်နက်တည်း တိုက်ခိုက်ခံနေသော်လည်း စိမ်ပြေနပြေ လမ်းလျှောက်၍ တိုက်ခိုက်မှုအားလုံးကို ဖြေရှင်းခဲ့လေသည်။

ထို့အပြင် ၎င်းတို့၏ တိုက်ခိုက်မှုများသည် သူ၏တိုက်ခိုက်မှုများကို လုံးလုံးလျားလျား ရပ်တန့်နိုင်ခြင်း မရှိပေ။ သူသည် ခြံဝင်းတစ်ဝိုက်တွင် လမ်းလျှောက်နေပုံရ၍ ၎င်းတို့၏တိုက်ခိုက်မှုများကို ရှောင်တိမ်းကာ ၎င်းတို့ကို အလွယ်တကူ သတ်ဖြတ်နေခဲ့သည်။

ဤသည်မှာ ၎င်းတို့ကို ပြိုလဲသွားစေသည့် အဓိကအကြောင်းအရင်းဖြစ်သည်။ ၎င်းတို့သည် ချူးယွင်ဖန်းကို သတ်နိုင်မည့် မျှော်လင့်ချက်တစ်စုံတစ်ရာကိုပင် မမြင်နိုင်သည့်အပြင် ချူးယွင်ဖန်း၏ သတ်ဖြတ်မှုစွမ်းရည်သည် အလွန် အံ့မခန်းဖြစ်လှသည်။ ဤအတိုင်းသာ ဆက်သွားမည်ဆိုလျှင် ၎င်းတို့အားလုံး သိပ်မကြာမီ အဆုံးသတ်သွားနိုင်သည်။

သို့သော် ၎င်းတို့အားလုံး သဘောပေါက်သွားသည့်အချိန်တွင် ချူးယွင်ဖန်းသည် ၎င်းတို့၏ မူလလူအင်အား သုံးရာ သို့မဟုတ် နှစ်ရာကျော်ကို အချိန်တိုအတွင်း သတ်ဖြတ်ခဲ့သောကြောင့် လူတစ်ရာကျော်မျှသာ ကျန်ရှိတော့ကြောင်း သိလိုက်ရသည်။ မူလက လူသုံးရာကျော်ရှိခဲ့သော်လည်း ယခုအခါ တစ်ရာသာ ရပ်တည်နိုင်ခဲ့သည်။ ကျန်လူများအားလုံးသည် သွေးအိုင်ထဲတွင် လဲကျနေပြီဖြစ်သည်။

ဤလူများသည် အဆုံးတွင် တုံ့ပြန်လာသောကြောင့် ထွက်ပြေးချင်လာကြသည်။ ၎င်းတို့သည် ချူးယွင်ဖန်း၏အာရုံကို လွှဲပြောင်းရန် ကြိုးစားပြီးနောက် အရပ်ရပ်သို့ ထွက်ပြေးကြလေသည်။ သို့သော် သူ၏လိုက်လံ တိုက်ခိုက်မှုမှ မည်သို့မျှ လွတ်မြောက်နိုင်မည်နည်း။ ချူးယွင်ဖန်းသည် မြေပြင်ပေါ်ရှိ ကျောက်ခဲအနည်းငယ်ကို ပေါ့ပါးစွာ ကန်ထုတ်လိုက်ခြင်းဖြစ်သော်လည်း ၎င်းတို့အတွက်မူ ကြီးမားသောအမြောက်များဖြင့် ထိမှန်သကဲ့သို့ ခံစားလိုက်ရသည်။ ၎င်းတို့သည် ပွဲချင်းပြီး သေဆုံးသွားကြသည်။

လွတ်မြောက်ရန် ကြိုးစားခဲ့ကြသည့် လူပေါင်းရာကျော်သည် တစ်ခဏလေးအတွင်းမှာပင် တစ်ဦးတစ်ယောက်မျှ မကျန်ရစ်ဘဲ ဆိုးရွားစွာ သေဆုံးသွားကြသည်။ ဤအရာအားလုံးသည် အချိန်အတော် ကြာမြင့်သည်ဟု ထင်မှတ်ခဲ့ရသော်လည်း အမှန်တကယ်တွင် စက္ကန့်အနည်းငယ်သာ ကြာမြင့်ခဲ့သည်။

ချူးယွင်ဖန်း၏ ခန္ဓာကိုယ်တွင် ဒဏ်ရာတစ်ခုမျှပင် မရှိခဲ့သည့်အပြင် သွေးတစ်စက်မျှပင် မစွန်းထင်ပေ။ သူသည် သူ၏ တိုက်ခိုက်ရေး စွမ်းအင် လုံးလုံးလျားလျား ဆုံးရှုံးသွားသူတစ်ဦးနှင့် ဆင်တူခြင်းမရှိဘဲ အပြင်ဘက်တွင် လျှောက်လည်နေသူတစ်ဦးကဲ့သို့ ဖြစ်နေသည်။

ပြီးနောက် သူသည် လမ်းလျှောက်လျက်ဖြင့် သူ၏ပန်းတိုင်ကို ရောက်ခဲ့ပုံပေါ်သည်။ ချူးယွင်ဖန်းသည် ဤလူများအားလုံးကို သတ်ဖြတ်ပြီးသည်နှင့် ကောင်းကင်ကို ပြုံးပြ၍ ဖီးနစ် မြက်ဆေးပင်ကို ဆက်လက်ရှာဖွေရန် ထွက်ခွာသွားခဲ့သည်။ ကောင်းကင်ယံရှိ ဂြိုလ်တုများသည် မြင်ကွင်းတစ်ခုလုံးကို မှတ်တမ်းတင်၍ အင်အားစု ခေါင်းဆောင်အသီးသီးထံ တင်ပြခဲ့လေသည်။

ချူးယွင်ဖန်းကို သတ်ဖြတ်ရန်အတွက် လူများ စေလွှတ်ခဲ့သည့် အဓိက အင်အားစု ခေါင်းဆောင်များ အလွန် ထိတ်လန့်သွားကြသည်။ ကံကောင်းထောက်မစွာဖြင့် ချူးယွင်ဖန်းသည် ထိုလူများ၏ နောက်ခံအကြောင်း မမေးမြန်းခဲ့ပေ၊ မဟုတ်ပါက ၎င်းတို့အားလုံး အမှန်တကယ် ဒုက္ခရောက်သွားပေလိမ့်မည်။ သူ၏ တိုက်ခိုက်ရေး စွမ်းအင်များ ဆုံးရှုံးသွားသည်ဟူသော ချူးယွင်ဖန်းသည် ဤမျှ ထိတ်လန့်ဖွယ်ကောင်းစေလိမ့်မည်ဟု မည်သူမျှ မမျှော်လင့်ထားပေ။

မွေးဖွားခြင်းနယ်မြေအဆင့် ထောင်ပေါင်းများစွာ သေဆုံးသွားခဲ့ရာ၊ ထောင်ပေါင်းများစွာသော ဝက်များလျှင်ပင် ထိုကဲ့သို့ အသတ်ဖြတ်ခံရမည် မဟုတ်ပေ။ ဤထိတ်လန့်ဖွယ်ကောင်းသော အစုလိုက်အပြုံလိုက် သတ်ဖြတ်မှုအပြီးတွင် ချူးယွင်ဖန်းသည် သူ၏တိုက်ခိုက်ရေးစွမ်းအင်များကို ဆုံးရှုံးသွားသည်ဟု အခိုင်အမာဆိုခဲ့သော်လည်း လုံးလုံးလျားလျား ဆုံးရှုံးသွားခြင်း မဟုတ်ကြောင်းကို လူအများက ရုတ်တရက် သိရှိလိုက်ရသည်။

ချူးယွင်ဖန်းသည် သူ၏ နတ်စွမ်းအင်များကို ဆုံးရှုံးခဲ့ရသော်လည်း သူ၏ ကိုယ်ခန္ဓာကြံ့ခိုင်မှုသည် နတ်အဆင့်တွင် ရှိနေဆဲဖြစ်သည်။ ထိုအဆင့်သို့ ရောက်ရှိပြီးနောက် သူ၏ စွမ်းအင်များသာ ထူးကဲလာခြင်း မဟုတ်ဘဲ သူ၏ ရုပ်ခန္ဓာသည်လည်း အလွန် မြင့်တက်လာခဲ့ရာ၊ ၎င်းသည် အသွင်အပြင် ပြောင်းလဲမှုမျိုးပင် ဖြစ်သည်။

ယခုမူကား ချူးယွင်ဖန်းသည် နတ်အဆင့် ကျွမ်းကျင်သူတစ်ဦ၏ ကြောက်မက်ဖွယ်ကောင်းသော ကိုယ်ခန္ဓာကြံ့ခိုင်မှုကို အမှန်တကယ် ပြသခဲ့သည်။ သို့သော် ၎င်းဖြစ်စဉ်ကြောင့် မျက်နှာ အမူအရာ အကျဉ်းတန်သွားသူ တချို့ရှိနေလေသည်။ သာမန်နတ်အဆင့် ကျွမ်းကျင်သူတစ်ဦးလျှင်ပင် ထောင်ပေါင်းများစွာသော မွေးဖွားခြင်းနယ်မြေအဆင့် ကျွမ်းကျင်သူများကို တစ်ဦးတည်း သတ်ဖြတ်နိုင်သည့် အရည်အချင်းမျိုးရှိမည် မဟုတ်ပေ။

အထူးသဖြင့် ၎င်းတို့ထဲရှိ လူအများအပြားသည် အဆင့်မြင့် စက်လက်နက်များ ဝတ်ဆင်၍ လက်နက်များ ကိုင်ဆောင်လာသောအခါ ပို၍ပင် ဖြစ်နိုင်မည် မဟုတ်ပေ။ ထိုအခြေအနေအောက်တွင် ၎င်းတို့ကဲ့သို့သော နတ်အဆင့်ကျွမ်းကျင်သူများလျှင်ပင် လုံးလုံးလျားလျား အန္တရာယ်ကင်းမဲ့မည် မဟုတ်ပေ။

ယခုမူ၊ ၎င်းတို့အားလုံးသည် ချူးယွင်ဖန်း၏လက်ထဲ၌ သေဆုံးသွားခဲ့သည်။ သူသည် မည်မျှ အစွမ်းထက်၍ ကြောက်မက်ဖွယ်ကောင်းသည်ကို တွေးကြည့်ရုံဖြင့် သိနိုင်သည်။ လူအရေအတွက်သည် သူ၏အရှေ့၌ အဓိပ္ပါယ်မဲ့နေသည်။ သူ့တွင် ကျင့်ကြံမှုများ ရှိနေသေးပါက ဤမွေးဖွားခြင်းနယ်မြေအဆင့် ထောင်ပေါင်းများစွာကို တစ်ချက်တည်းဖြင့် သတ်ပစ်နိုင်လိမ့်မည်ဟု လူအများက ခံစားနေရသည်။

"ဘယ်လောက် ဒီလောက်တောင် သန်မာနေရသေးတာလဲ။ ချူးယွင်ဖန်းက တိုက်ခိုက်ရေး စွမ်းအင်တွေ ဆုံးရှုံးသွားပြီဆိုတဲ့ အချက်အလက်တွေကို လုံးဝ ယုံကြည်လို့ မရဘူးထင်တယ်"

လူအများစုသည် ရေနက်ပိုင်း မိကျောင်းမျိုးနွယ်စုများနှင့် ပတ်သက်၍ စတင် အတွန့်တက်လာကြသည်။ အကယ်၍ ရေနက်ပိုင်း မိကျောင်းမျိုးနွယ်စုကသာ ထိုအချက်အလက်များကို မျက်စိစုံမှိတ်၍ မဖော်ပြခဲ့လျှင် ၎င်းတို့ဘက်မှ ဤမျှကြီးမားသော အမှားတစ်ခုကို ကျူးလွန်ခဲ့မည်ဖြစ်လေသလော။

စေလွှတ်ခံခဲ့ရသည့် မွေးဖွားခြင်းနယ်မြေအဆင့် ကျွမ်းကျင်သူများအနက် တစ်ယောက်မျှ ပြန်မလာခဲ့ကြပေ။ မွေးဖွားခြင်းနယ်မြေအဆင့် ကျွမ်းကျင်သူသည် ထိုအင်အားစုများအနက် ထိပ်တန်းကျွမ်းကျင်သူများ မဟုတ်ကြသော်လည်း ၎င်းတို့သည် အဓိကအင်အားစု၏ ကျောရိုးများဖြစ်ကြသည်။ ကျွမ်းကျင်သူ ထောင်ပေါင်းများစွာကို တစ်နေရာတည်းတွင် ဆုံးရှုံးခဲ့ရခြင်းသည် အမျိုးမျိုးသော အင်အားစုများကို အချိန်အတော်အကြာသည်အထိ နာကျင်ခံစားရစေရန် လုံလောက်ပေသည်။

"မဟုတ်ဘူး၊ သူ့ကိုယ်ခန္ဓာကျင့်ကြံမှုအရ အင်အားကြီး နျူကလီယားဗုံးမျိုး သုံးတာမျိုး မဟုတ်ဘဲ သာမာန် ဒုံးကျည်တွေနဲ့သာဆိုရင် ဒီအတိုင်း မတ်တပ်ရပ်နေပြီး ပစ်ခိုင်းရင်တောင် သူ့ကို ထိခိုက်နိုင်မှာ မဟုတ်ဘူး။ ဒါ့အပြင် မွေးဖွားခြင်းနယ်မြေအဆင့်တွေက သူ့အပေါ် သက်ရောက်မှု မရှိနိုင်ဘူး။ သူ့ကို နတ်အဆင့်တွေပဲ သတ်နိုင်လောက်တယ်"

ထိုအချိန်တွင် နတ်အဆင့် ကျွမ်းကျင်သူကသာ ချူးယွင်ဖန်းကို သတ်ဖြတ်နိုင်လိမ့်မည်ဟု လူအများက ကောက်ချက်ချလိုက်ကြသည်။ သို့သော် ၎င်းတို့သည် စောင့်ဆိုင်းရန်သာ တတ်နိုင်ကြတော့သည်။ အဆုံးတွငိ နတ်အဆင့် ကျွမ်းကျင်သူများသည် မွေးဖွားခြင်းနယ်မြေအဆင့်နှင့် ကွဲပြားလှသည်။ ၎င်းတို့သည် လှုပ်ရှားနိုင်သည်ဟု ဆိုလျှင် အမှန်တကယ် လှုပ်ရှားနိုင်ပေလိမ့်မည်။ နတ်အဆင့် ကျွမ်းကျင်သူများသည် မြို့စွန်နယ်မြေများတွင် ဂိုဏ်းကြီးများ တည်ထောင်နိုင်သည်အထိ သာလွန်သူများဖြစ်ကြသည်။

ချူးယွင်ဖန်းသည် တိုက်ပွဲအပြီးတွင် စစ်ပွဲ၏ ဓာတ်ပုံအချို့ကိုယူ၍ ရိုးရှင်းသော ခေါင်းစဉ်တစ်ခု ရေးသားကာ အင်တာနက်ပေါ်တွင် တင်ခဲ့သည်။

"ဒါက တစ်ထရီလီလျံဆုကြေးငွေအတွက် ခင်ဗျားတို့ လုပ်နိုင်တာ အကုန်ပဲလား။ ကျုပ်လို အကြာကြီး မတောင့်ခံနိုင်တဲ့လူတောင် ခင်ဗျားတို့တွေကို ဒီလောက် အားနည်းနေမယ်လို့ မထင်ထားဘူး"

ရုတ်တရက် ကျရောက်လာသည့် ကျောက်တုံးတစ်ခုသည် ထောင်သောင်းချီသော လှိုင်းဂယက်များကို ဖြစ်ပေါ်သွားစေသည်။ လူများစွာသည် ကနဦးတွင် ချူးယွင်ဖန်းအတွက် စိုးရိမ်နေကြဆဲဖြစ်သော်လည်း မျက်စိတစ်မှိတ်အတွင်းမှာပင် ဤမျှ ထိတ်လန့်ဖွယ်ကောင်းသော တိုက်ပွဲမှတ်တမ်းမျိုးကို ထုတ်ဖော်ပြသလိမ့်မည်ဟု မည်သူ သိမည်နည်း။ ချူးယွင်ဖန်းသည် အခြေအနေ၏ တစ်စိတ်တစ်ပိုင်းမျှကိုသာ ဖော်ပြခဲ့သော်လည်း တိုက်ပွဲဖြစ်စဉ်တစ်ခုလုံးသည် အင်တာနက်ပေါ်တွင် လျင်မြန်စွာ ပျံ့နှံ့သွားခဲ့သည်။

...

သူသည် ထောင်ပေါင်းများစွာသော မွေးဖွားခြင်းနယ်မြေအဆင့် ကျွမ်းကျင်သူအားလုံးကို တစ်ဦးတည်း သတ်ဖြတ်ခဲ့သည်။ ချူးယွင်ဖန်း၏စကားများအရ သူသည် အထွတ်အထိပ်အခြေအနေတွင် ရှိမနေသော်လည်း ဤလူပြက်များက အလွယ်တကူ ရန်ဆွနိုင်သူ မဟုတ်သေးကြောင်း လှုံ့ဆော်၍ ပြောနေခြင်းနှင့် ဆင်တူပေသည်။

လူအများအပြားက နှုတ်ဆိတ်သွားကြရာ၊ အထူးသဖြင့် ချူးယွင်ဖန်းကို သတ်ဖြတ်ချင်သူများအားလုံး တိတ်ဆိတ်သွားလေ၏။ ထိုအခိုက်အတန့်တွင် တစ်စုံတစ်ယောက်က ပြောလာခဲ့သည်။

"ခင်ဗျား သတ်လိုက်တဲ့ လူတွေက မွေးဖွားခြင်းနယ်မြေအဆင့် ကျွမ်းကျင်သူတွေပါ။ ဒုက္ခိတတစ်ယောက်ကများ မောက်မာပြနေရတယ်လို့၊ ကျုပ် ခင်ဗျားကို သတ်ပြမယ်"

အခန်း (၉၆၈) ကျုပ်ကို လာသတ်မယ့်အချိန်ကို စောင့်နေမယ်

အဆုံးတွင် တစ်စုံတစ်ယောက်က တိတ်ဆိတ်မှု ဖြိုခွင်း၍ ပြောလာသည်။ ဤသည် သာမန်လူတစ်ဦး မဟုတ်ပေ။ ဤကြောက်မက်ဖွယ် တိုက်ပွဲအပြီးနောက် မည်သည့် မွေးဖွားခြင်းနယ်မြေအဆင့် ကျွမ်းကျင်သူကမျှ ချူးယွင်ဖန်းကို သတ်ဖြတ်နိုင်သည်ဟု မပြောဝံ့ကြပေ။ သူ့တွင် နတ်စွမ်းအင်များမရှိလျှင်ပင် နတ်အဆင့် ကျွမ်းကျင်သူကို သာမန်လူများက သတ်ဖြတ်နိုင်မည် မဟုတ်ပေ။

အထူးသဖြင့် နတ်အဆင့် ကျွမ်းကျင်သူများစွာတို့သည် ချူးယွင်ဖန်းကို သတ်ချင်သည်ဖြစ်စေ မသတ်ချင်သည်ဖြစ်စေ ထိုမွေးဖွားခြင်းနယ်မြေအဆင့် ကျွမ်းကျင်သူများသည် ကိုယ့်ကိုယ်ကို သိက္ခာချ၍ သေခြင်းတရားကို ရှာဖွေနေကြသူများဟု ထုတ်ပြောလာကြသည်။ ချူးယွင်ဖန်းသည် သူ၏တိုက်ခိုက်ရေး စွမ်းအင်များကို ဆုံးရှုံးသွား၍ ဝိုင်းရံတိုက်ခိုက်ခံနေရကြောင်း မြင်လိုက်ရသောအခါ မည်သည့်ဘက်တွင် ရှိနေသူများဖြစ်ပါစေ သူ့အတွက် စိတ်မကောင်းဖြစ်မိကြသည်။

ခွန်းလွန်နယ်မြေတွင် နတ်အဆင့် ကျွမ်းကျင်သူများသည် သက်ရှိအားလုံးထက် သာလွန်သူများဖြစ်သည်။ ဤသည်မှာ နတ်အဆင့်ကျွမ်းကျင်သူများစွာ တည်ဆောက်ခဲ့သည့် ဂုဏ်သတင်းများဖြစ်သည်။

ပြီးနောက် ဤလူများသည် ချူးယွင်ဖန်းကိုပင် ဝိုင်းရံတိုက်ခိုက်ရန် သတ္တိရှိကြသောကြောင့် ၎င်းတို့သည်လည်း တစ်နေ့တွင် ဝိုင်းရန်တိုက်ခိုက်ခံရရန် ဖြစ်နိုင်လေသလော။ ၎င်းတို့သည် အထွတ်အထိပ် အခြေအနေတွင်ရှိနေစဉ် မကြောက်ရွံ့ကြသော်လည်း အသက်ကြီး၍ ဖျားနာကာ မသေဆုံးသူဟူ၍ မည်သူရှိသနည်း။ အကယ်၍ ၎င်းတို့သာ တစ်နေ့နေ့တွင် အထွတ်အထိပ် အခြေအနေမှ ပြုတ်ကျလာသည့်အခါ ထိုကဲ့သို့ အနိုင်ကျင့်ခံရမည် မဟုတ်လေသလော။

ထို့ကြောင့် ချူးယွင်ဖန်းနှင့် မနီးစပ်သော နတ်အဆင့် ကျွမ်းကျင်သူများစွာက သူ့အတွက် ရပ်တည်ခြင်းသည် ရှားပါးလှပေသည်။ ၎င်းတို့၏ အဓိပ္ပါယ်သည် ရှင်းလင်းလှသည်။ ချူးယွင်ဖန်းသည် သေဆုံးနိုင်သော်လည်း နတ်အဆင့် ကျွမ်းကျင်သူ၏လက်၌သာ သေဆုံးနိုင်မည်ဖြစ်သည်။ မွေးဖွားခြင်းနယ်မြေအဆင့် ကျွမ်းကျင်သူများအတွက်မူ ၎င်းတို့ကို မေ့ထားခြင်းက ကောင်းပေလိမ့်မည်။

ချူးယွင်ဖန်းတစ်ယောက်တည်းက နတ်အဆင့် ကျွမ်းကျင်သူတစ်ဦးကို သတ်ဖြတ်ရန် လုံလောက်ပေသည်။ သူသည် အခြား မည်သူတစ်ဦးတစ်ယောက်ကိုမျှ ဝင်ရောက်စွက်ဖက်ခွင့်ပြုမည် မဟုတ်ပေ။ ထို့ကြောင့် ရဲဝံ့ပြောဆိုတတ်သူများကို လျင်မြန်စွာ သတိပြုမိသွားသည်။

"ဒါက မြို့စွန်နယ်မြေရဲ့ တစ္ဆေနှံကောင်ပဲ"

ဤပုဂ္ဂိုလ်သည် မည်သည်ကိုမျှ ဖုံးကွယ်မထားဘဲ ရပ်တည်လာသောကြောင့် လူတိုင်းက သူ့အထောက်အထားကို အမြန်အဆန် ဖော်ထုတ်လိုက်ကြသည်။ သူသည် နတ်အဆင့်တွင်ရှိနေသည့် အခြားသော ကျွမ်းကျင်သူတစ်ဦးဖြစ်သည်။

ယနေ့ခေတ်၏ ခေတ်မီ သတင်းအချက်အလက် လူ့အဖွဲ့အစည်းတွင် တစ္ဆေနှံကောင်၏ အချက်အလက်အချို့ကို လျင်မြန်စွာ ရှာဖွေတွေ့ရှိလိုက်ကြသည်။ သူသည် မြို့စွန်နယ်မြေ၏ နတ်အဆင့် ကျွမ်းကျင်သူဖြစ်သည်။ သို့သော်လည်း တစ္ဆေနှံကောင်သည် သာမာန်ကျွမ်းကျင်သူများနှင့်မတူဘဲ အဓိကဂိုဏ်းတစ်ခုကို မတည်ထောင်ခဲ့ပေ။ တစ္ဆေနှံကောင်သည် ကြေးစားတစ်ဦးဖြစ်ခဲ့သည်။

သူသည် သတ်ဖြတ်ခြင်း၊ မီးရှို့ခြင်း၊ စစ်ပွဲများစတင်ခြင်းစသည့် မကောင်းမှုမျိုးစုံကို ကျူးလွန်ခဲ့သူဖြစ်သည်။ တစ်စုံတစ်ဦးက ငွေကြေးဥစ္စာ ပေးချေလိုစိတ်ရှိသရွေ့ တစ္ဆေနှံကောင်ကို ငှားရမ်းနိုင်မည်ဖြစ်သည်။ သူ၏ ပြင်းထန်သော ကျင့်ကြံမှုအဆင့်ကြောင့် သူ့ကို အသန်မာဆုံး ကြေးစားတစ်ဦးဟုပင် ခေါ်နိုင်သည်။ သူသည် ပြည်ထောင်စု၏ အလိုရှိစာရင်းတွင် ပါဝင်နေသော်လည်း ကြီးမားသော ဂိုဏ်းတစ်ခုကို မတည်ထောင်နိုင်ခဲ့သောကြောင့် သူ၏ တည်နေရာကို မှန်းဆရန် မရခဲ့ပေ။ သူသည် သူ၏နတ်အဆင့် ခွန်အားဖြင့် ယနေ့တိုင်အောင် အလွန်လွတ်လပ်စွာ ရှင်သန်နေထိုင်ခဲ့သူဖြစ်သည်။

ဤသည်မှာ တစ္ဆေနှံကောင်က နတ်အဆင့်တွင်ရှိနေသည့် သန်မာသော ရန်သူများကို မနှိုးဆော်ဘဲ အမြဲတစေ သတိပြုနေထိုင်ခဲ့ကြောင့်ဖြစ်ပေသည်။ ယခုမူကား ချူးယွင်ဖန်းသည် သူ၏စွမ်းအင်အားလုံးကို ဆုံးရှုံးကာ အပြင်ဘက်တွင်ရှိနေကြောင်း မြင်လိုက်ရသောအခါ အသန်မာဆုံးသော ကြေးစားတစ်ဦးဟု ဆိုခဲ့သည့် တစ္ဆေနှံကောင်သည် အဆုံးတွင် အငြိမ်မနေနိုင်တော့ပေ။

"နောက်ဆုံးတော့ အငြိမ် မနေနိုင်တော့တဲ့ နတ်အဆင့်တစ်ယောက် ရှိလာပြီပေါ့။ ဒါပေမယ့်၊ တစ္ဆေနှံကောင်က တန်မိသားစု၊ ချူးမိသားစုနဲ့ တခြားအင်အားစုတွေကို မကြောက်ဘူးလား"

"ဘာများ ကြောက်စရာကောင်းလို့လဲ၊ သူက တစ်ယောက်တည်းလေ။ အချိန်ကျလာရင် မြို့စွန်နယ်မြေတွေမှာ ပုန်းနေနိုင်တာပဲကို၊ သူ့ကို ဘယ်သူက ဘာလုပ်နိုင်မှာမို့လို့လဲ"

"ဒါ့အပြင်၊ အင်အားတစ်ခုတည်းက ယွမ်တစ်ထရီလီယံကျော်ရှိတဲ့ ဆုကြေးငွေကို ပေးချေနိုင်မယ်လို့ ထင်နေတာလား။ ဒီထဲမှာ အင်အားစု ဘယ်နှစ်ခု ပါဝင်မယ်ဆိုတာ စိတ်ကူးလို့တောင် ရမှာမဟုတ်ဘူး။ ဒီအင်အားစုတွေရဲ့ အကာအကွယ်ကြောင့် ချူးမိသားစုနဲ့ တန်မိသားစုတွေ ဘယ်လောက်ပဲ ဒေါသထွက်နေပါစေ ဘာမှလုပ်နိုင်မှာ မဟုတ်ဘူး။ ဘာပဲဖြစ်ဖြစ် ချူးယွင်ဖန်းက သေရမှာပဲ"

တစ္ဆေနှံကောင်သည် အင်တာနက်ပေါ်ရှိ အများသူငှာ ထင်မြင်ချက်ကို ဂရုစိုက်ပုံမပေါ်ဘဲ တိုက်ရိုက် ပြောကြားလိုက်သည်။

"သူဂုဏ်ကျက်သရေနဲ့ ထင်ရှားနေတဲ့ အချိန်တုန်းက သူရဲကောင်းတွေ မရှိတာကြောင့် ဒီကောင်လေးက နာမည်ကြီးနေတာပါ၊ သူရဲ့ရွှေရောင် ဂုဏ်သတင်းကို ကျုပ် ချိုးဖျက်ပြမယ်"

ဤစကားများသည် ချူးယွင်ဖန်း၏ ထောက်ခံသူများစွာကို ပို၍ပင် ဒေါသထွက်သွားစေသည်။

"ဒါပေမယ့် ခင်ဗျားက အားနည်းသူတွေကို အနိုင်ကျင့်ပြီး သန်မာတဲ့လူတွေကို ကြောက်ရွံ့တဲ့ လူမျိုးပါပဲ။ ချူးယွင်ဖန်းမှာသာ ခွန်အား ရှိနေသေးရင် ခင်ဗျား ဒီလိုတောင် ပြောရဲပါ့မလား"

"ခင်ဗျားမှာ အရည်အချင်းရှိရင် ချူးယွင်ဖန်းရဲ့ ခွန်အားတွေ ပြန်ကောင်းလာတဲ့အထိ စောင့်ပြီး သူ့ကို ထပ်ရန်ဆွလို့ရတယ်"

"အသန်မာဆုံး ကြေးစားဆိုတဲ့လူကလည်း အရှက်မဲ့ချက်က လွန်ရော။ ဒီလို အပြုအမူမျိုးကို တကယ် မမျှော်လင့်ထားမိဘူး"

“ချီးပဲ၊ ပြည်ထောင်စုရဲ့ မျှော်လင့်ချက်ကို လူဘယ်နှစ်ယောက်က သတ်ပစ်ဖို့ စီစဉ်နေကြတာပါလိမ့်”

"လေပြင်းတွေက သစ်တောထဲက အထူးခြားဆုံးသစ်ပင်ကို ဖျက်ဆီးတော့မှာလား"

လူများစွာသည် ချူးယွင်ဖန်း၏ လုံခြုံရေးအတွက် စိုးရိမ်နေကြသော်လည်း အင်တာနက်ပေါ်တွင် အဆက်မပြတ် သောင်းကျန်းနေသူများလည်း ရှိနေသည်။ ချူးယွင်ဖန်းသည် စတင် ကျင့်ကြံစဉ်ကတည်းက လူပေါင်းများစွာကို စော်ကားခဲ့ဖူးရာ၊ ယခင် သူ၏ ခွန်အားကြောင့်သာ သူ့ကို မထိခိုက်နိုင်ကြခြင်းဖြစ်ပေသည်။

သို့သော် ယခုအခါ ကွဲပြားခြားနားသွားခဲ့သည်။ ကြာမြင့်စွာ စောင့်မျှော်ခဲ့သည့် ကံဆိုးမှုသည် နောက်ဆုံးတွင် သူ့အပေါ်သို့ ကျရောက်လာခဲ့သည်။ အင်တာနက်တစ်ခွင် ဗရုတ်သုတ်ခ ဖြစ်နေကြလေသည်။

"မတရားမှုကို ကျူးလွန်တဲ့လူတွေက ပျက်စီးရမှာပဲ။ ချူးယွင်ဖန်းက ကိုယ့်သေတွင်း ကိုယ်ရှာတာကို"

“ကောင်းကင်ဘုံက စောင့်ကြည့်နေမှာပဲ။ ဒီမကောင်းမှုပြုသူကို တစ်စုံတစ်ယောက်က လာဖြေရှင်းလိမ့်မယ်"

"ဆုကြေးငွေက ထရီလီလျံကျော်တောင်။ သူ့ရန်သူတွေက တစ်ကမ္ဘာလုံးမှာ ရှိနေလောက်တယ်။ ချူးယွင်ဖန်းရဲ့ ခေါင်းကို တွေ့ရဖို့ သိပ်မကြာလောက်တော့ဘူး ထင်တယ်"

နှစ်ဦးနှစ်ဖက်ထောက်ခံသူများသည် အင်တာနက်ပေါ်တွင် အပြင်းအထန် ငြင်းခုံနေကြသည်။ ၎င်းတို့၏ မတူညီသော ထောက်ခံမှုများကြောင့် ပဋိပက္ခများစွာရှိခဲ့သည်။ ချူးယွင်ဖန်းသည် တစ္ဆေနှံကောင်၏ ကြေငြာချက်ကို မြင်တွေ ့ပြီးနောက် တုံ့ပြန်မှုအနေဖြင့် စာတစ်ကြောင်းသာချန်ရစ်ထားခဲ့သည်။

"ခင်ဗျား လာသတ်မယ့်အချိန်ကို ကျုပ် စောင့်နေမယ်"

၎င်းသည် ဝါကျတိုမျှသာဖြစ်သော်လည်း အင်တာနက်တစ်ခုလုံးကို ပေါက်ကွဲသွားစေသည့် နျူကလီးယားဗုံးတစ်ခုနှင့် ဆင်တူသည်။ သူ၏တိုက်ခိုက်မှု စွမ်းအင်အားလုံးကို ဆုံးရှုံးခဲ့သည့် ချူးယွင်ဖန်းသည် နတ်အဆင့် ကျွမ်းကျင်သူတစ်ဦး၏ ခြိမ်းခြောက်မှုကို မကြောက်ရွံ့ခဲ့ဘဲ တိုက်ရိုက် ပြန်လည် ချေပလိုက်သည်။

သို့သော် ချူးယွင်ဖန်းကို သေစေလိုသည့် လူအများ၏အမြင်တွင်၊ ဤသည်မှာ သူ၏ ခေါင်းမာနေမှုသာဖြစ်သည်။ နောက်ဆုံးတွင် နတ်အဆင့်နှင့် မွေးဖွားခြင်းနယ်မြေအဆင့်တို့သည် ကွဲပြားခြားနားလှသည်။ နတ်စွမ်းအင် သို့မဟုတ် ချီစွမ်းအင်ပင်မရှိသော ချူးယွင်ဖန်းသည် မွေးဖွားခြင်းနယ်မြေအဆင့် အများအပြားကို သတ်ဖြတ်ခြင်းကဲ့သို့ တိုက်ပွဲမှတ်တမ်းမျိုးကို ထပ်မံ မပြုလုပ်နိုင်တော့ပေ။

"ကောင်းပြီ၊ ခင်ဗျားရဲ့ လည်ပင်းကို သန့်စင်ပြီး ကျုပ် လာသတ်မှာကို စောင့်နေလိုက်"

တစ္ဆေနှံကောင်သည် ထိုစာများကို မြင်လိုက်ရသောအခါ ချူးယွင်ဖန်းက သူ့ကို တမင်တကာ ရန်စနေမှန်း သိသော်လည်း အလွန်ဒေါသထွက်သွားဆဲဖြစ်သည်။ ချူးယွင်ဖန်းသည် သူ၏မျက်လုံးများတွင် ဒုက္ခိတတစ်ဦးသာဖြစ်သည်။ ချူးယွင်ဖန်းသည် တစ္ဆေနှံကောင်သည် သူ့ကို သတ်ချင်နေကြောင်း သိရှိပြီးနောက် ကြောက်ရွံ့တုန်လှုပ်၍ ပုန်းအောင်းခြင်း မပြုလုပ်သည့်အပြင် ရန်စ၍ လျစ်လျူရှုစွာ ဆက်ဆံခဲ့သည်။

မူလက တစ္ဆေနှံကောင်သည် ထရီလီလျံ ဆုကြေးငွေကိုသာ လိုချင်ခဲ့ခြင်းဖြစ်သည်။ ယွမ်တစ်ထရီလီလျံ၏ သွေးဆောင်မှုကို မည်သူမျှ ခုခံနိုင်စွမ်းမရှိကြပေ။ ယခုမူကား သူသည် ချူးယွင်ဖန်းအပေါ် သတ်ဖြတ်ချင်သည့် ရည်ရွယ်ချက်ပင် ရှိနေသည်။

ချူးယွင်ဖန်းသည် မီးတောင်ဝတစ်ခုမှ ခုန်ထွက်လာခဲ့သော်လည်း ဖီးနစ်မြက်ဆေးပင်ကို ယခုအချိန်ထိ ရှာမတွေ့သေးပေ။ မီးတောင်ထဲမှ ခုန်ထွက်လာသောအခါ သူ၏ပတ်ဝန်းကျင်တွင် လူများဖြင့် ပြည့်ကျပ်နေကြောင်း သိလိုက်ရသည်။ ထောင်နှင့်ချီ၍ ရှိနေခဲ့ရာ၊ အစောပိုင်းက ချူးယွင်ဖန်း သတ်ဖြတ်ခဲ့သည့် ရာပေါင်းများစွာသော မွေးဖွားခြင်းနယ်မြေအဆင့် ကျွမ်းကျင်သူများထက်ပင် များပြားလှပေသည်။

သို့သော်လည်း မွေးဖွားခြင်းနယ်မြေအဆင့် ထောင်ပေါင်းများစွာကို တစ်ဦးတည်း သတ်ပစ်ခဲ့သည့် ချူးယွင်ဖန်း၏ ပြင်းထန်သော ဂုဏ်သတင်းကြောင့်၊ ဤထောင်ပေါင်းများစွာသော လူများအနက် မည်သူမျှ သူ့ကို ချဉ်းကပ်ဝံ့ခြင်းမရှိပေ။ ၎င်းသည် အဝေး၌သာ နေရဲကြသည်။

ချူးယွင်ဖန်းသည် ၎င်းတို့အားလုံး ဤနေရာတွင် ရှိမနေသည့်ဟန်ဖြင့် ၎င်းတို့ကို တစ်ချက်မျှပင် လှည့်မကြည့်ခဲ့ပေ။ ဤဖြစ်စဉ်သည် ၎င်းတို့ကို အလွန် စိတ်ညစ်သွားစေသည်။ ၎င်းတို့သည် ပြည်ထောင်စုအတွင်းနှင့် ပြင်ပတွင် အတန်ငယ် နာမည်ကျော်ကြား၍ ၎င်းတို့၏ ကိုယ်ပိုင်နယ်မြေများတွင် အုပ်စိုးသူများအဖြစ် သတ်မှတ်ခံခဲ့ရသည်။

ယခုမူကား ချူးယွင်ဖန်းသည် သူ၏တိုက်ခိုက်ရေးစွမ်းအင်ကို ဆုံးရှုံးသွားခဲ့သော်လည်း ၎င်းတို့ကို လျစ်လျူရှုဝံ့ဆဲဖြစ်သည်။ သို့သော် အဆုံးတွင် ၎င်းတို့က ယနေ့ဘာအတွက်ကြောင့် လာခဲ့ရသည်ကို အားလုံးသိကြသည့်အတွက် ၎င်းတို့၏ စိတ်မကျေနပ်မှုများကို ထိန်းထားနိုင်ခဲ့ကြသည်။

၎င်းတို့သည် အချိန်ကြာကြာ စောင့်ဆိုင်းရန် မလိုအပ်ခဲ့ပေ။ ခဏအကြာတွင် အလင်းတန်းတစ်ခု စီးနင်းလာသော လူတစ်ဦးသည် မီးတောင်ဝသို့ ရောက်ရှိလာခဲ့သည်။ ထိုလူသည် ချူးယွင်ဖန်းကို ငုံ့ကြည့်၍ ပြောလိုက်သည်။

"ချူးယွင်ဖန်း၊ သူတို့တွေက ခင်ဗျားကို ကြောက်ကြပေမယ့် ကျုပ် ခင်ဗျားကို သတ်ဖို့ ဒီကိုရောက်လာပြီ။ ခင်ဗျား ကိုယ့်ကိုယ်ကို သတ်သေမယ်ဆိုရင် ကျုပ် ခင်ဗျားရဲ့ အလောင်းကို ပကတိအတိုင်း ထားပေးမယ် ဘယ်လိုလဲ"

အခန်း (၉၆၉) တစ္ဆေနှံကောင်ကို စက္ကန့်ပိုင်းအတွင်း သတ်ဖြတ်ခြင်း

"ခင်ဗျားကလား" ချူးယွင်ဖန်းသည် သူ့အရှေ့ရှိ တစ္ဆေနှံကောင်ကို ကြည့်၍ လှောင်ရယ်လိုက်သည်။

တစ္ဆေနှံကောင်သည် ပိန်ပါးသောခန္ဓာကိုယ်ရှိသည့် လူလတ်ပိုင်းအရွယ် အမျိုးသားတစ်ဦးဖြစ်သည်။ သူသည် ရက်စက်ယုတ်မာသော အသွင်အပြင်ရှိ၍ ဆိုးယုတ်သော တစ္ဆေတစ်ကောင်နှင့် ဆင်တူသည်။ သူ၏ ကျင့်ကြံမှု နည်းစနစ်က အမျိုးသမီးဆန်သည့် ဘက်ဆီသို့ ဦးတည်နေခဲ့သည်။

"ကျုပ်သာ အထွတ်အထိပ် အဆင့််မှာ ရှိနေမယ်ဆိုရင် ခင်ဗျားဆိုတာ ဘယ်အဆင့်မှာရှိလဲ။ ခင်ဗျားလိုလူမျိုး ကျုပ်ရှေ့မှာ ပေါ်လာရဲရင် တစ်ချက်တည်းနဲ့ သတ်ပစ်ပြီးပြီ"

တစ္ဆေနှံကောင်၏ မျက်နှာတွင် ယုတ်မာရက်စက်သော အပြုံးတစ်ပွင့် ပေါ်လွင်လာပြီးနောက် ခက်ထန်စွာ ပြောလိုက်သည်။

"ခင်ဗျားက ဒီအချိန်မှာတောင် မောက်မာဝံ့တုန်းပါလား။ သေရမှာကို တကယ် မကြောက်ဘူးလား"

"ကျုပ် သေရမှာကို ကြောက်တာပေါ့။ ဒါပေမယ့် ခင်ဗျားက ကျုပ်ကို သတ်နိုင်မယ့်လူ မဟုတ်ဘူးဆိုတာ အသိသာကြီးပဲလေ" ချူးယွင်ဖန်းက တစ္ဆေနှံကောင်ကို စိုက်ကြည့်၍ ပြောလိုက်သည်။

တစ္ဆေနှံကောင်သည် ရယ်မော၍ ပြောလိုက်သည်။

"ချူးယွင်ဖန်း၊ ခင်ဗျားရဲ့နည်းလမ်းတွေကို ကျုပ် မသိဘူးလို့ ထင်နေတာလား။ ခင်ဗျားအချိန်ဆွဲဖို့ ကြိုးစားနေတာ မဟုတ်လား ဒါပေမယ့် အဲ့လိုဆိုရင်တောင် အသုံးမဝင်ဘူး။ ခင်ဗျား ဘယ်လို စစ်ကူမျိုးကိုပဲ မျှော်လင့်နေပါစေ၊ ဘယ်သူမှ ရောက်လာမှာ မဟုတ်ဘူး"

"ခင်ဗျားကို သေစေချင်တဲ့လူတွေက တစ်ယောက် နှစ်ယောက်ထက်မက ရှိနေတာ။ တစ်ယောက်တည်း မဟုတ်ဘူး။ ခင်ဗျားက လွန်ခဲ့တဲ့ နှစ်တွေမှာ လူတွေအများကြီးကို စော်ကားခဲ့ပြီး လူတွေအများကြီးရဲ့ လမ်းကြောင်းတွေကို ပိတ်ဆို့ခဲ့တာဆိုတော့ ဒီလိုအဆုံးသတ်ကို ခင်ဗျားမျှော်လင့်ထားသင့်တယ်" တစ္ဆေနှံကောင်က ဂုဏ်ယူစွာ ပြောလိုက်သည်။

အကယ်၍ ချူးယွင်ဖန်းသည် သူ၏အထွတ်အထိပ် အခြေအနေတွင် ရှိနေပါက တစ္ဆေနှံကောင်သည် အသန်မာဆုံး ကြေးစားအဖြစ် လူသိများလျှင်ပင် ချူးယွင်ဖန်း၏ အရှေ့တွင် ပေါ်ပေါက်လာပိုင်ခွင့် ရှိမည်မဟုတ်ပေ။ ချူးယွင်ဖန်း၏ ပင်ကိုစရိုက်အရ တစ္ဆေနှံကောင်သည် တစ်ချက်တည်းဖြင့် အသတ်ခံရဖွယ်ရှိသည်။ သူသည် ထိုအချိန်တွင် ချူးယွင်ဖန်းနှင့် ဝေးရာသို့ ပုန်းနေရန်သာ စိတ်အားထက်သန်နေပေလိမ့်မည်။ ယခုမူကား သူသည် ချူးယွင်ဖန်း၏အသက်ကို နှုတ်ယူရန်အတွက် ဤနေရာ၌ ရောက်ရှိနေသည်။ ဘဝသည် ယခုထက် မပိုခဲ့ပေ။

"ခင်ဗျားရဲ့အကြီးမားဆုံးအမှားက ဒီနေရာကို တစ်ယောက်တည်း ရောက်လာခဲ့တာပဲ။ ကျုပ်က တိုက်ခိုက်ရေးစွမ်းအင်တွေ ဆုံးရှုံးသွားပေမယ့် ခင်ဗျားလို အမှိုက်သရိုက်တွေ နှိုင်းယှဥ်နိုင်တဲ့ လူမဟုတ်ဘူး" ချူးယွင်ဖန်းက ပြောလိုက်သည်။

တစ္ဆေနှံကောင်၏ မျက်နှာထက်ရှိ အပြုံးများ ပျောက်ကွယ်သွားသည်။ ချူးယွင်ဖန်း၏ အပြုအမူသည် သူ့ကို ဒေါသထွက်သွားစေသည်။ တစ္ဆေနှံကောင်သည် မျက်စိတစ်မှိတ်အတွင်းမှာပင် လှုပ်ရှားလိုက်သည်။ သူ၏ခန္ဓာကိုယ်သည် အလင်းတန်းတစ်ခုအဖြစ် ပြောင်းလဲသွားကာ ချူးယွင်ဖန်းကို လက်သီးဖြင့် ထိုးကြိတ်လိုက်သည်။

ကြီးမားကျယ်ပြန့်သည့် သမုဒ္ဒရာကဲ့သို့ သွန်းလောင်းလာသည့် အဆုံးမဲ့ နတ်စွမ်းအင်များ ဆူပွက်လာသည်။ လက်သီးချက်သည် အရှိန်အဟုန် ပြင်းထန်စွာ လွင့်ထွက်သွားပြီးနောက် သူ၏ လက်သီးစွမ်းအင်များ မြင့်မားလာ၍ ကြီးမားသော နှံကောင်တစ်ကောင်အဖြစ် ပြောင်းလဲသွားခဲ့သည်။ ဤနှံကောင်သည် သာမန် နှံကောင်များနှင့် မတူညီပေ။ ၎င်း၏ခန္ဓာကိုယ်တစ်ခုလုံးသည် အလွန် မည်းနက်နေ၍ အလင်းရောင်ဖျော့ဖျော့များ ထုတ်လွင့်နေသည်။

ဤသည်မှာ တစ္ဆေနှံကောင်ကို နာမည်ကျော်ကြားလာစေသည် သိုင်းပညာဖြစ်၍ သူ့အမည်ပြောင်၏ မူလအရင်းမြစ်ဖြစ်သည်။ တိုက်ပွဲကို အဝေးတစ်နေရာမှ ကြည့်နေသည့် မွေးဖွားခြင်းနယ်မြေအဆင့် ကျွမ်းကျင်သူအများအပြားသည် ကြောက်မက်ဖွယ် ဖိအားကို ချက်ချင်း ခံစားလိုက်ရသည်။ ၎င်းသည် မွေးဖွားခြင်းနယ်မြေအဆင့်ကို ကျော်လွန်နေသည့် ပြင်းထန်သော ဖိအားတစ်မျိုးဖြစ်သည်။ နတ်အဆင့် ကျွမ်းကျင်သူများသာလျှင် ဤသို့သော စွမ်းအင်ကို ထုတ်လွှတ်နိုင်မည်ဖြစ်သည်။

ဤဖိအားသည် ၎င်းတို့ကို မကြံဆနိုင်သည်အထိ ထိရောက်စေသည့်အပြင် ခုခံချင်သည့် အတွေးများကိုပင် ရပ်တန့်သွားစေသည်။ ဤသည်မှာ ပထမမြောက် နတ်အဆင့်၏ အထွတ်အထိပ်ဖြစ်ပေသည်။ အဆုံးမဲ့သော လေပြင်းများ တိုက်ခတ်လာ၍ ချူးယွင်ဖန်း၏အဝတ်အစားများကို ပြင်းထန်စွာ လွင့်ခတ်သွားစေသည်။ ချူးယွင်ဖန်းသည် တစ္ဆေနှံကောင်၏ ကျင့်ကြံမှုအဆင့်ကို ချက်ချင်းဆိုသလိုပင် အကဲဖြတ်လိုက်သည်။ ၎င်းသည် ပထမမြောက် နတ်အဆင့်၏ အထွတ်အထိပ်၌သာ ရှိနေသေးသည်။

ကနဦးတွင် သူ့ကိုသတ်ဖြတ်ရန်အတွက် ချူးယွင်ဖန်း၏ လက်သီးတစ်ချက်တည်းဖြင့် လုံလောက်သော်လည်း လက်ရှိတွင် ချူးယွင်ဖန်းသည် သူ၏ခန္ဓာကိုယ်ရှိ မိုးကြိုးစွမ်းအင်များကို ဖိနှိပ်ရန်အတွက် သူ၏နတ်စွမ်းအင်အားလုံးကို အသုံးပြုနေသည်။ ထို့ကြောင့် သူ၏စွမ်းအင်များကို အလွယ်တကူ မဆင့်ခေါ်နိုင်ပေ။

သူ့ပေါ်သို့ လက်သီးချက် ကျရောက်ခါနီးတွင် ချူးယွင်ဖန်းက စတင် လှုပ်ရှားလိုက်သည်။ သူသည် ခါးကို လှည့်၍ ကန်ထုတ်လိုက်သည်။ ဤကန်ချက်သည် နှံကောင် အကြီးစားတစ်ခုကဲ့သို့ ထင်မှတ်ရစေကာ အရာအားလုံးကို ဖြတ်သန်း ဖြိုခွင်းသွားလေသည်။ ၎င်းသည် နတ်နှံကောင်ကန်ချက်ဖြစ်သည်။

ချူးယွင်ဖန်းသည် ကမ္ဘာပေါ်ရှိ အညစ်အကြေးအားလုံးကို ကန်ချက်တစ်ချက်တည်းဖြင့် သုတ်သင်နိုင်သည့် ဧရာမ နှံကောင်တစ်ကောင်အဖြစ် ပြောင်းလဲသွားဟန်ရှိသည်။ နတ်စွမ်းအင်၏ အတက်အကျများ မရှိသော်လည်း ဤကန်ချက် နည်းပညာ၏ ထိန်းချုပ်မှုကို အားကိုးရုံဖြင့် သူ၏သိုင်းပညာ စွမ်းအင်များ စိမ့်ထွက်လာခဲ့သည်။ ဤသည်မှာ သိုင်းပညာကို လွန်ကဲစွာ နားလည်ထားမှသာလျှင် ဖြစ်ပေါ်လာနိုင်သည့် မြင်ကွင်းတစ်ခုဖြစ်သည်။

ဘုံး

မွေးဖွားခြင်းနယ်မြေအဆင့်အများစုသည် ၎င်းတို့၏မျက်စိရှေ့တွင် မှုန်ပျပျ ပုံရိပ်တစ်ခုကိုသာ မြင်တွေ့လိုက်ရသည်။ ဧရာမ နှံကောင်ကြီး နှစ်ကောင် တိုက်မိသွားသကဲ့သို့ ထင်မှတ်ရစေသည်။ ထိတ်လန့်ဖွယ် အကောင်းဆုံးအချက်မှာ ဤတိုက်ခတ်မှုသည် ခဏတာမျှသာ ကြာမြင့်ခဲ့၍ ရလဒ်ကို မကြာမီ ဆုံးဖြတ်လိုက်လေသည်။ ချူးယွင်ဖန်း၏ နှံကောင်သည် အလွန်ကြီးမားသည့် အနက်ရောင် သေမင်း နှံကောင်ကြီးကို ဓားစက်ကဲ့သို့ ထက်ပိုင်း ဖြတ်တောက်လိုက်သည်။

ဘုံး

ဧရာမ သေမင်း နှံကောင်ကြီးသည် အပိုင်းပိုင်း လွင့်ထွက်သွားခဲ့သည်။ ပြီးနောက် သူ၏ ခြေထောက်သည် တစ္ဆေနှံကောင်ထံသို့ ဖြတ်သန်းသွားလေ၏။

ဘန်း

ရလဒ်သည် ကန်ချက် တစ်ခုတည်းဖြင့် အဆုံးဖြတ်ပြီးဖြစ်သည်။ ချူးယွင်ဖန်း၏ခြေထောက်သည် တစ္ဆေနှံကောင်၏လက်ကို ထိမှန်သွား၍ သူ၏လက်သည်လည်း ချက်ချင်းပင် ပေါက်ကွဲထွက်သွားသည်။ တိုက်ပွဲ၏ ရလဒ်ကို ချက်ချင်း ဆုံးဖြတ်လိုက်ပြီဖြသ်သည်။ ဤအခိုက်အတန့်တွင် လူတိုင်း ထိတ်လန့်သွား၍ ကမ္ဘာကြီးသည်လည်း အလွန် တိတ်ဆိတ် ငြိမ်သက်သွားလေသည်။

ထိုနေရာတွင် တိုက်ပွဲကို စောင့်ကြည့်နေကြသည့် မွေးဖွားခြင်းနယ်မြေအဆင့်များ ဖြစ်ပါစေ၊ ကောင်းကင်ယံရှိ ဂြိုလ်တုမှတစ်ဆင့် စောင့်ကြည့်နေသည့် အင်အားစုကြီးများ၏ ခေါင်းဆောင်များဖြစ်ပါစေ၊ ၎င်းတို့အားလုံး ပင့်သက်ရှိုက်မိသွားသည်။ ချူးယွင်ဖန်းသည် တိုက်ခိုက်ရေးစွမ်းအင်များ သို့မဟုတ် သူ၏ ကျင့်ကြံမှုများ ဆုံးရှုံးသွားခြင်းဖြစ်ပါစေ သူ၏ ခန္ဓာကိုယ်ကြံ့ခိုင်မှုသည် ကြောက်မက်ဖွယ် ကောင်းနေဆဲဖြစ်သည်။

"သူ့ရဲ့ ကိုယ်ခန္ဓာ ကျင့်ကြံမှုက အဲဒီအဆင့်ကိုတောင် ရောက်သွားပြီလား။ နတ်စွမ်းအင်မရှိဘဲနဲ့တောင် အစွမ်းထက်နေသေးတာပဲ" အင်အားစုကြီးတစ်ခု၏ ခေါင်းဆောင်တစ်ဦးသည် အခက်တွေ့စွာ ပြောလိုက်သည်။ ၎င်းတို့သည် ချူးယွင်ဖန်းကို လျှော့တွက်ခဲ့ကြကြောင်း ယခုအချိန်မှသာ သဘောပေါက်သွားကြသည်။

မွေးဖွားခြင်းနယ်မြေအဆင့် ကျွမ်းကျင်သူများသည် အလွန် ကြောက်လန့်သွားကြသည်။ ချူးယွင်ဖန်းသည် နတ်အဆင့် ကျွမ်းကျင်သူများကို အလိုရှိသရွေ့ သတ်ဖြတ်ခြင်းမဟုတ်ကြောင်း သိရှိသွားကြသည်။

"ခင်ဗျားက အားနည်းလွန်းတယ်။ ခင်ဗျား နာမည်ကျော်ကြားပြီး နတ်အဆင့်ကို ရောက်တာ တော်တော်ကြာပြီဆိုပေမယ့် နောက်ဆုံးတော့လည်း ခြေထောက်ပျော့ ပုစွန်တစ်ကောင်ပါပဲ" ချူးယွင်ဖန်းက ဘာသိဘာသာ ပြောလိုက်သည်။

တစ္ဆေနှံကောင်သည် ဦးခေါင်းမှ ခြေဖျားအထိ ချွေးစေးများဖြင့် ဖုံးလွှမ်းသွားလေသည်။ သူသည် ယခုအချိန်ထိ ကြောက်မက်ဖွယ်ကောင်းသော တိုက်မိမှုတွင် နစ်မြုပ်နေဆဲဖြစ်သည်။ ကန်ချက်တစ်ချက်သည် သူ၏လက်မောင်းကို ပေါက်ကွဲသွားစေသည်။

သို့သော် သူ့ခန္ဓာကိုယ်၏ အခြားသော အစိတ်အပိုင်းတစ်ခုဖြစ်ခဲ့လျှင်ပင် ယခုထက် ပို၍ ကောင်းမွန်လာမည် မဟုတ်ပေ။ ထိုသို့ စဉ်းစားမိသောအခါ ချက်ခြင်းပင် အတွေးတစ်ခု ဝင်လာခဲ့သည်။ ဤအခြေအနေတွင် ရှိနေသည့် ချူးယွင်ဖန်းသည် သူကိုင်တွယ်ဖြေရှင်းနိုင်သူ မဟုတ်ကြောင်း သိသာထင်ရှားသည်။

ဆုကြေးငွေသည် ရရှိရန် မလွယ်ကူကြောင်း ယခုအချိန်မှသာ သဘောပေါက်သွားခဲ့သည်။ သူသည် သူ၏ ခွန်အားကြောင့်သာမကဘဲ သတိရှိမှုကြောင့်လည်း နှစ်ပေါင်းများစွာကြာ ရှင်သန်နိုင်ခဲ့ခြင်းဖြစ်သည်။ ကမ္ဘာပေါ်တွင် သူဘက်မှ ရန်မဆွနိုင်သည့် ကျွမ်းကျင်သူများစွာ ရှိနေသည်။ ခွန်အားများ ဆုံးရှုံးသွားခဲ့သော ချူးယွင်ဖန်းသည် ထိုလူများထဲမှ တစ်ဦးဖြစ်သည်။ တစ္ဆေနှံကောင်သည် ချက်ချင်း တုံ့ပြန်လာ၍ အဝေးသို့ ထွက်ပြေးလေသည်။

"ထွက်ပြေးဖို့ ကြိုးစားနေတာလား၊ လွတ်နိုင်မယ်လို့ ထင်နေတာလား " ချူးယွင်ဖန်းသည် သူ၏ခြေထောက်များကို စောင့်နင်းလိုက်သည်နှင့် သူ၏ခန္ဓာကိုယ်သည် ကောင်းကင်ယံတွင် အမြောက်ကျည်ကဲ့သို့ လွင့်ထွက်သွား၍ တစ္ဆေနှံကောင်၏ အနောက်သို့ တိုက်ရိုက် လိုက်ပါသွားလေသည်။

ချူးယွင်ဖန်းသည် မျက်စိတစ်မှိတ်အတွင်းမှာပင် တစ္ဆေနှံကောင်ကို ဖမ်းမိသွားပြီဖြစ်သည်။

တစ္ဆေနှံကောင်သည် ချက်ချင်း ထိတ်လန့်သွား၍ သူ၏လက်တစ်ဖက်ကို ဝှေ့ယမ်းပစ်လိုက်သည်။ သူသည် တောင်တစ်ခုကို ဆွဲချ၍ ချူးယွင်ဖန်းထံ ပစ်ချလိုက်သည်။

"ကျုပ်ကို တားဖို့ကြိုးစားနေတာပေါ့လေ ဟုတ်လား။ တားလို့ရမယ် ထင်နေတာလား" ချူးယွင်ဖန်းသည် အော်ဟစ်ပြီးနောက် လက်သီးကို ကျစ်ကျစ်ဆုပ်၍ ဝှေ့ယမ်းပစ်လိုက်သည်။

ရုတ်တရက် ပြိုကျလာသည့် တောင်ထိပ်လျှင်ပင် ချက်ချင်း ပျက်စီးသွားခဲ့သည်။ ပြီးနောက် ချူးယွင်ဖန်း၏ အရှိန်အဟုန်သည် နှေးကွေးခြင်း မရှိဘဲ တစ္ဆေနှံကောင်၏ခန္ဓာကိုယ်ကို လက်သီးဖြင့် ထိုးနှက်လိုက်သည်။

ဘန်း

တစ္ဆေနှံကောင်သည် စူးရှစွာ အော်ဟစ်ပြီးနောက် သူ၏ခန္ဓာကိုယ်တစ်ခုလုံး ပေါက်ကွဲထွက်ကာ ပွဲချင်းပြီး သေဆုံးသွားလေ၏။ ဤအရာအားလုံးသည် အချိန်ကြာမြင့်ပုံရသော်လည်း တကယ်တမ်းတွင် အချိန်အနည်းငယ်မျှသာ ကြာမြင့်ခဲ့ရသည်။ ချူးယွင်ဖန်းသည် ထိုမှသာ ဖြေးဖြေးချင်း ဆင်းသက်လာခဲ့သည်။ ထိုအခါ သူသည် တိတ်ဆိတ်ငြိမ်သက်မှုကိုသာ ရင်ဆိုင်လိုက်ရလေ၏။