အခန်း (၁၀၆၃-၁၀၆၅)

အခန်း (၁၀၆၃) သက်တံရောင်မြွေဝိညာဉ်ဘုရင်မကို သုတ်သင်ခြင်း၊ ပြိုင်ဘက်ကင်းမှု

လီမိသားစုဘိုးဘေးကြီးသည် အံ့အားသင့်သွားသည်။ ချူးယွင်ဖန်းသည် ကျားငမန်းဘုရင်ကို လက်သီးတစ်ချက်တည်းဖြင့် သတ်လိုက်သော အပြုအမူသည် သူ၏ ကမ္ဘာကြီးအပေါ်ထားရှိသော အမြင်များကို လုံးလုံးလျားလျား ပြောင်းလဲသွားစေသည်။ ချူးယွင်ဖန်း၏ စွမ်းအားသည် သဘာဝအားဖြင့် သူ့ထက်သာလွန်ပေသည်။

ဤအရာသည် လီမိသားစု ဘိုးဘေးကြီး ယခင်ကတည်းက သိရှိခဲ့သည့် အချက်ဖြစ်သည်။ ထိုအချိန်တွင် ကျန်းမိသားစု ဘိုးဘေးကြီးသည် သူနှင့် ခွန်အားခြင်း တူညီသည်ဟု ယူဆနိုင်သော်လည်း ကျန်းမိသားစု ဘိုးဘေးကြီးသည် ချူးယွင်ဖန်း၏လက်ထဲ၌ သေဆုံးသွားခဲ့သည်။

ထို့ကြောင့် ချူးယွင်ဖန်းသည် သူ့ထက် သန်မာနေခြင်းက သာမာန်ဖြစ်သည်။ သို့သော် သူ့စိတ်ထဲတွင် ချူးယွင်ဖန်းသည် အများဆုံးလျှင် ပဉ္စမမြောက် သို့မဟုတ် ဆဌမမြောက် နတ်အဆင့်တွင်သာ ရှိနေနိုင်သည်။ ဤသို့ဆိုလျှင်ပင် အလွန် အထင်ကြီးဖွယ်ကောင်းနေပြီဖြစ်သည်။ ချူးယွင်ဖန်းသည် ကျန်းမိသားစု ဘိုးဘေးကြီးကို သတ်ဖြတ်ပြီးသည်မှာ အလွန် မကြာသေးသောကြောင့် သတ္တမမြောက် နတ်အဆင့်အထိ ကျင့်ကြံနိုင်ခြင်းသည် အံ့ဖွယ်ဖြစ်ရပ်တစ်ခုဖြစ်သည်။

သို့သော် ချူးယွင်ဖန်း၏ လက်ရှိလုပ်ဆောင်ချက်များသည် မိမိ၏ယခင် ယူဆချက်များ မှားယွင်းနေကြောင်း ပြောပြနေသည်။ ချူးယွင်ဖန်း၏ ခွန်အားသည် ၎င်းတို့မျှော်လင့်ထားသည်ထက် ကျော်လွန်နေသည်။ သတ္တမမြောက် နတ်အဆင့်ကျွမ်းကျင်သူလျှင်ပင် ချူးယွင်ဖန်းနှင့် မယှဉ်ပြိုင်နိုင်ဘဲ လွင့်ပျံသွားခဲ့သည်။ ချူးယွင်ဖန်းသည် မည်မျှ အစွမ်းထက်လာသည်ကို တွေးကြည့်ရန် ခက်ခဲပေသည်။

ပျောက်ဆုံးသွားချိန်၌ သူသည် မည်သို့သော ကံကြမ္မာမျိုးနှင့် တွေ့ကြုံခဲ့ခြင်းဖြစ်သနည်း။ လီမိသားစု ဘိုးဘေးကြီးသည် ၎င်းကို စိတ်ကူးမယဉ်ဝံ့သော်လည်း မအံ့ဩမိပေ။ သူသည်လည်း ကံကြမ္မာအမျိုးမျိုးနှင့် ကြုံတွေ့ခဲ့ရ၍ ၎င်းကြုံကြိုက်မှုများကြောင့် သူ၏ ကျင့်ကြံမှုများ ခုန်ပျံကျော်လွှားကာ တိုးတက်လာခဲ့ရသည်။ တစ်ဖက်တွင်၊ သက်တံရောင်မြွေဝိညာဉ်ဘုရင်မ၏အမူအရာသည် ရုတ်တရက် လေးနက်လာသည်။ သူမသည် ယခင်က ချူးယွင်ဖန်းကို အလေးအနက်မထားခဲ့ပေ။

ပြည်ထောင်စု၏ နံပါတ်တစ်ကျွမ်းကျင်သူဟု ခေါ်တွင်ခံရသူသည် ကျားမရှိသည့် တောင်ပေါ်ရှိ မျောက်တစ်ကောင်သာဖြစ်သည်။ မည်သို့ဆိုသော် ပြည်ထောင်စုတွင် ကျွမ်းကျင်သူအများအပြား မရှိသောကြောင့်ဖြစ်သည်။ ဤသည်မှာ လူသိရှင်ကြား အသိအမှတ်ပြုထားသည့် အရာဖြစ်သည်။ ပြည်ထောင်စု၏ နံပါတ်တစ် ကျွမ်းကျင်သူသည် သူ၏နာမည်နှင့် ထိုက်တန်ရုံသာမကဘဲ ကောလဟာလများထက်ပင် ပို၍ ကြောက်မက်ဖွယ်ကောင်းမည်ဟု မည်သူ ထင်မည်နည်း။

"အခု ခင်ဗျား အလှည့်ပဲ" ချူးယွင်ဖန်းသည် သက်တံရောင်မြွေဝိညာဉ်ဘုရင်မကို ကြည့်လိုက်ပြီးနောက် သူ၏ အရောင်အဝါများ ထွက်ပေါ်လာသည်။ ၎င်းသည် ဆူနာမီကဲ့သို့ပင် ကြောက်မက်ဖွယ်ကောင်းလှသည်။

လီမိသားစု ဘိုးဘေးကြီးသည် သူ၏သွေးများ ပွက်ပွက်ဆူလာ၍ နှလုံးသားတစ်ခုလုံး ခံစားချက်များဖြင့် တစ်ဟုန်ထိုး ပြည့်နှက်လာသည်။ ချူးယွင်ဖန်းသည် အရေးကြီးသော အခိုက်အတန့်တွင် သူ၏အသက်ကို ကယ်တင်ခဲ့သည်။ ယခုအခါ အခြားလူများနှင့် ပြည်ထောင်စုကို ကယ်တင်ရန်အတွက် မျှော်လင့်ချက်များရှိနေပုံပေါ်သည်။

လီမိသားစု ဘိုးဘေးကြီးသည် တုံးအသူမဟုတ်ပေ။ အဏ္ဏဝါမျိုးနွယ်စုများသည် ဤဖြစ်ရပ်ပြီးဆုံးသည်နှင့် ပြည်ထောင်စုကို အကြီးအကျယ် တိုက်ခိုက်လာမည်ကို သူ သိနေသည်။ ထိုသိုမှ မဟုတ်လျှင် ပြည်ထောင်စုနှင့် လုံးလုံးလျားလျား ရန်ငြိုးဖွဲ့စေသည်အထိ အရဲစွန့်၍ ၎င်းတို့ကို အကောက်ကြံမည် မဟုတ်ပေ။

သက်တံရောင်မြွေဝိညာဉ်ဘုရင်မက စတင် လှုပ်ရှားလိုက်သည်။ သူမသည် အလွန်လျင်မြန်လှရာ၊ ခဏလေးအတွင်းမှာပင် ချူးယွင်ဖန်းရှေ့သို့ ရောက်ရှိနေပြီဖြစ်သည်။ သူမသည် အနက်ရောင် လျှပ်စီးတစ်ခုကဲ့သို့ ထင်မှတ်ရစေသည်။ ပြီးနောက် ကျယ်လောင်သော ပေါက်ကွဲသံကို ကြားလိုက်ရသည်။ ကြောက်မက်ဖွယ် မိုးကြိုးသွားအမျိုးမျိုးတို့သည် အချင်းချင်း ရောယှက်၍ ဆူပွက်လာကြ၏။ သူမ၏လက်ထဲတွင် ဓားတစ်ချောင်းပေါ်လာခဲ့ရာ၊ ၎င်းသည် အလွန် ပြင်းထန်သော ဓားအလင်းရောင်ကို သယ်ဆောင်လာ၍ ဓားသွားသည်လည်း ကျရောက်လာသည်။

ဘန်း

ဓားအလင်းရောင်သည် ချူးယွင်ဖန်း၏ ခန္ဓာကိုယ်ပေါ်သို့ ကျရောက်လာသည်။ ရုတ်တရက်၊ သတ္တုအချင်းချင်း ရိုက်ခတ်သံများ ထွက်လာ၍ ဓားအလင်းရောင်သည် ရွှေထည်တစ်ခုဖြင့် ထိမှန်သွားသကဲ့သို့ သူ၏ခန္ဓာကိုယ်ပေါ်တွင် မီးပွားစများ ထွက်ပေါ်လာစေသည်။ ဓားအလင်းရောင်တွင် သိပ်သည်းသော အနက်ရောင် အရောင်အဝါတစ်ခုရှိနေသည်။ ၎င်းသည် သက်တံရောင်မြွေဝိညာဉ်ဘုရင်မ၏ ခန္ဓာကိုယ်မှ ထုတ်ယူကာ သူမ၏ဓားတွင် ပေါင်းစပ်ထားသည့် ပြင်းထန်သော အဆိပ်ဖြစ်သည်။ နတ်အဆင့် ကျွမ်းကျင်သူလျှင်ပင် ၎င်းတို့ကို ထိမိပါက သေဆုံးသွားနိုင်သည်။ ၎င်းသည် အလွန် ကြောက်မက်ဖွယ်ကောင်းလှသည်။

သူမသည် ထို့အတွက်ကြောင့် ထွက်ပြေးရန် မရွေးချယ်ခဲ့ဘဲ ချူးယွင်ဖန်းကို တိုက်ခိုက်ရန် ယုံကြည်မှုရှိနေခြင်းဖြစ်သည်။ သို့သော် ချူးယွင်ဖန်းကို အနည်းငယ်မျှပင် ထိခိုက်နာကျင်အောင် မပြုလုပ်နိုင်လိမ့်မည်ဟု သူမ မမျှော်လင့်ခဲ့ပေ။ ၎င်းသည် ချူးယွင်ဖန်း၏ စွမ်းအင်အတားအဆီးကိုပင် မချိုးဖျက်နိုင်ခဲ့ပေ။ ဓားအလင်းရောင်သည် ချူးယွင်ဖန်း၏ ခန္ဓာကိုယ်ကို ထိမိလိုက်ချိန်တွင် ရွှေထည် သံထည်များကို ထိသွားသကဲ့သို့ ထင်မှတ်ရစေသည်၊ ဤသည်မှာ လုံးလုံးလျားလျား ထိတ်လန့်ဖွယ်ကောင်းသည်။

"ဘယ်လို ခန္ဓာကိုယ်မျိုးလဲဟ" သက်တံရောင်မြွေဝိညာဉ်ဘုရင်မသည် အလွန် တုန်လှုပ်သွားသည်။ အဏ္ဏဝါမျိုးနွယ်စု၏ နတ်အဆင့် မွန်းစတားများလျှင်ပင် သူမ၏ ဓားချက်ကို အလွယ်တကူ ရင်ဆိုင်နိုင်မည် မဟုတ်ပေ။ သို့သော် ချူးယွင်ဖန်းသည် ၎င်းကို တစ်နည်းနည်းဖြင့် ပြုလုပ်နိုင်ခဲ့သည်။

ချူးယွင်ဖန်းက သူမကို စိုက်ကြည့်လာသောအခါ ကြမ်းကြုတ်သော ရှေးဟောင်း သားရဲတစ်ကောင်က စိုက်ကြည့်နေသကဲ့သို့ ခံစားလိုက်ရသည်။ သူမ နောက်ကျောရှိ အမွေးအမှင်များ အဆုံးထိ ထောင်မတ်သွားကြောင်း ခံစားလိုက်ရသည်။

"သေစမ်း"

သက်တံရောင်မြွေဝိညာဉ်ဘုရင်မသည် ချက်ချင်းပင် လှုပ်ရှားရန် ဆုံးဖြတ်လိုက်သည်။ သူမ လက်ထဲရှိ ဓားရှည်သည် ယခင်ကကဲ့သို့ မထူးဆန်းတော့ဘဲ ၎င်းသည် ကောင်းကင်ကို မရေတွက်နိုင်သော ဓားအလင်းရောင်များဖြင့် ပြည့်နှက်လာစေသည်။ ၎င်းတို့တစ်ခုချင်းစီတွင် အလွန် ကြောက်မက်ဖွယ်ကောင်းသော စွမ်းအင်များပါရှိနေခဲ့ရာ၊ ကောင်းကင်ကို ဖြိုခွင်းကာ လွှမ်းခြုံသွားစေသည့် ဓားအရိပ်များအဖြစ် ပြောင်းလဲပြီးနောက် ချူးယွင်ဖန်း၏ ၎င်းအတွင်း၌ ဖုံးအုပ်သွားလေသည်။

သို့သော်လည်း ဤဓားအလင်းရောင်များ ချူးယွင်ဖန်းကို ထိမိလာသည့်အခိုက်အတန့်တွင် ကြောက်မက်ဖွယ် စွမ်းအင်ဖြင့် ဖိနှိပ်ခံရကာ ချက်ချင်းပင် ဗလာနတ္ထိအဖြစ်သို့ ပြောင်းလဲသွားခဲ့သည်။ သက်တံရောင်မြွေဝိညာဉ်ဘုရင်မသည် အနောက်သို့ ဆုတ်ခွာလိုက်သည်။ သူမ၏ ဆုတ်ခွာမှု အရှိန်အဟုန်သည် လျှပ်စီးကဲ့သို့ အလွန်မြန်ဆန်သည်။

သို့သော်လည်း ချူးယွင်ဖန်းသည် သူမထက် ပို၍ မြန်ဆန်သည်။ သူသည် မျက်စိတစ်မှိတ်အတွင်းမှာပင် သူမကို လိုက်မှီနေပြီဖြစ်သည်။ ပြီးနောက် ချူးယွင်ဖန်းသည် သူ၏လက်ကို မြှောက်တင်လိုက်သည်နှင့် မရေတွက်နိုင်သော မိုးကြိုးသွားများ ပေါင်းစည်းကာ ကြောက်မက်ဖွယ် မိုကြိုးလှံအဖြစ် ပြောင်းလဲသွားလေသည်။ လှံသည် လွှင့်ပစ်ခံရသကဲ့သို့ လေထုထဲသို့ ပျံသန်းသွားလေ၏။

လှံသည် လျှပ်စီးကြောင်းတစ်ခုသကဲ့သို့ ပြုတ်ကျသွားခဲ့သည်။ သက်တံရောင်မြွေဝိညာဉ်ဘုရင်မသည် ရှောင်တိမ်းချင်သော်လည်း ထိုအချိန်တွင် ကြောက်မက်ဖွယ် သတ်ဖြတ်ချင်စိတ်များက သူမကို ထိန်းချုပ်ထားသကဲ့သို့ ခံစားလိုက်ရသည်။ သူမသည် လွတ်မြောက်ရန် နည်းလမ်းမရှိသည့်အတွက် ဤကြောက်မက်ဖွယ် တိုက်ခိုက်မှုကို ထိပ်တိုက်ရင်ဆိုင်ရန်သာ ရွေးချယ်ခဲ့ရသည်။

ဘုံး

ကြောက်မက်ဖွယ် မိုးကြိုးလှံသည် သက်တံရောင်မြွေဝိညာဉ်ဘုရင်မ၏ ခန္ဓာကိုယ်ကို ထိမှန်သွားသည်။ သူမ၏ ခန္ဓာကိုယ်တစ်ဝိုက်ရှိ အတားအဆီးသည် တိုက်ခိုက်မှုကို ခံနိုင်ရည်မရှိခဲ့ဘဲ ချက်ချင်းပင် ပျက်စီးသွားခဲ့သည်။ သူမသည် မည်သည့်ခံနိုင်မှုမျှ မပြုလုပ်နိုင်ဘဲ မြေပြင်ပေါ်တွင် လှံဖြင့် ထိုးစိုက်ခံလိုက်ရသည်။

ဤအရာအားလုံးသည် လျင်မြန်လွန်းသဖြင့် ဝိညာဉ်ရေးအာရုံများကို အသုံးပြုနေသည့် လီမိသားစု ဘိုးဘေးကြီးလျှင်ပင် ၎င်းတို့၏တိုက်ပွဲအရှိန်ကို လိုက်မမှီနိုင်တော့ပေ။ လှံသည် သက်တံရောင်မြွေဝိညာဉ်ဘုရင်မကို မြေပြင်ပေါ်တွင် ထိုးစိုက်လိုက်ချိန်မှသာ ရလဒ်ကို မြင်တွေ့လိုက်ရသည်။

သူသည် အသက်ပြင်းပြင်းရှူမိသွားသည်။ လှံသည် သက်တံရောင်မြွေဝိညာဉ်ဘုရင်မ၏ နှလုံးသားကို ထိုးဖောက်ဝင်ရောက်သွားကြောင်း ရှင်းလင်းစွာ မြင်တွေ့ခဲ့ရသည်။ အဆုံးတွင် နတ်အဆင့် ကျွမ်းကျင်သူလျှင် သေမျိုးတစ်ဦးဖြစ်၏။ ၎င်းတို့၏ နှလုံးသားသည် ထိုးဖောက်ခံလိုက်ရပါက သေဆုံးသွားပေလိမ့်မည်။ မျှော်လင့်ထားသည့်အတိုင်း သက်တံရောင်မြွေဝိညာဉ်ဘုရင်မသည် ပြင်းထန်စွာ ပင့်သက်ရှိုက်ပြီးနောက် သေဆုံးသွားခဲ့သည်။

အရာအားလုံး ပြီးဆုံးသွားခဲ့ရာ၊ လီမိသားစု ဘိုးဘေးကြီးသည် လှပသော အိမ်မက်တစ်ခုကဲ့သို့ ဖြစ်နေသော အခြေအနေကို မည်သည့်အခါ မမျှော်လင့်ထားဟန်ဖြင့် သူ့မျက်နှာပေါ်တွင် မယုံကြည်နိုင်ဖြစ်နေသည့် အကြည့်များရှိနေသည်။ သူသည် သေခါနီးဖြစ်နေသည့်အချိန်တွင် ကိုယ့်ကိုယ်ကို သေလူဟု ထင်မှတ်ခဲ့သည်။ ချူးယွင်ဖန်းသည် ရုတ်တရက် ပေါ်ပေါက်လာ၍ သူ့ကို ကယ်တင်လိမ့်မည်ကို မည်သူသိမည်နည်း။

ချူးယွင်ဖန်းသည် ကျားငမန်းဘုရင်နှင့် သက်တံရောင်မြွေဝိညာဉ်ဘုရင်မတို့ကို လျှပ်စီးကဲ့သို့ အမြန်နှုန်းဖြင့် သတ်ပစ်ခဲ့သည်။ လုပ်ငန်းစဉ်တစ်ခုလုံးသည် အလွန်မြန်ဆန်ခဲ့ရာ၊ ၎င်းတို့နှစ်ဦးကို လုံးလုံးလျားလျား သုတ်သင်ရှင်းလင်းရန် အချိန်ခဏသာ လိုအပ်ခဲ့သည်။

၎င်းတို့နှစ်ဦးစလုံးသည် ပြည်ထောင်စုအတွင်း မငြိမ်မသက်ဖြစ်စေသည့် ကိစ္စရပ်များကို လုပ်ဆောင်နိုင်သော်လည်း ချူးယွင်ဖန်း၏လက်ထဲတွင် အသံပင်မထွက်ဘဲ သေဆုံးသွားခဲ့သည်။ ၎င်းတို့သည် အရေးမပါသော နောက်လိုက်နှစ်ဦးနှင့်ပင် ဆင်တူသည်။ ထိုအချိန်တွင် ချူးယွင်ဖန်းသည် လီမိသားစု ဘိုးဘေးကြီး၏အမြင်၌ နတ်ဘုရားတစ်ပါးကဲ့သို့ ပြိုင်ဘက်ကင်းနေသည်။

အခန်း (၁၀၆၄) အင်တာနက်ပေါ်တွင် ပြဿနာရှာခြင်း

ချူးယွင်ဖန်းသည် အဏ္ဏဝါမျိုးနွယ်စု၏ နတ်အဆင့် ကျွမ်းကျင်သူနှစ်ဦးကို အလွယ်တကူ သတ်ပြီးသည်နှင့် ၎င်းတို့၏အလောင်းများကို ဓာတ်ပုံရိုက်ယူ၍ အင်တာနက်ပေါ်သို့ တင်လိုက်သည်။

"ကျုပ် ပြန်လာပြီ၊ မျိုးမစစ်ကောင်တွေ။ အဆင်သင့်ဖြစ်ကြပြီလား" ဟူသည့် စာတန်းတစ်ခုသာ ပါရှိခဲ့သည်။ ချူးယွင်ဖန်းသည် ဤဓာတ်ပုံများကို တင်ပြီးနောက် လီမိသားစု ဘိုးဘေးကြီးဘက်သို့ လှည့်ကြည့်လိုက်သည်။

"ကျုပ် အသက်ကို ကယ်တင်ပေးတဲ့အတွက် ကျေးဇူးတင်ပါတယ်၊ ခေါင်းဆောင်ချူး" လီမိသားစု ဘိုးဘွားကြီးက လေးလေးနက်နက် ဦးညွှတ်၍ ပြောလိုက်သည်။ သူသည် သေခြင်းတရားမှ လွတ်မြောက်လာသကဲ့သို့ ခံစားနေရ၍ တုန်လှုပ်နေဆဲဖြစ်သည်။

ကျားငမန်းဘုရင် သို့မဟုတ် သက်တံရောင်မြွေဝိညာဉ်ဘုရင်မဖြစ်ပါစေ၊ ၎င်းတို့တို့နှစ်ဦးသည် သူ၏အသက်ကို အလွယ်တကူ နှုတ်ယူသွားနိုင်သည်။

"ကျုပ်ကို ကျေးဇူးတင်နေစရာ မလိုပါဘူး။ ဒါက အသေးအမွှားကိစ္စပါ" ချူးယွင်ဖန်းက ပြောသည်။

ချူးယွင်ဖန်း၏ အဖြေသည် လီမိသားစု ဘိုးဘေးကြီးကို ဆွံ့အသွားစေသောကြောင့် သူသည် သူ၏ နှုတ်ခမ်းများကို တင်းတင်းစေ့လိုက်သည်။ ၎င်းတို့နှစ်ဦးသည် သူ့အသက်ကို အမှန်တကယ် သေဆုံးသွားစေနိုင်သည့် ရန်သူများဖြစ်ခဲ့သော်လည်း ချူးယွင်ဖန်းအတွက်မူ လက်ညှိုးတစ်ချောင်း လှုပ်ရှားခြင်းသကဲ့သို့ လွယ်ကူခဲ့သည်။ သူသည် ကျွမ်းကျင်သူနှစ်ဦးကို အလွယ်တကူ သတ်ပစ်လိုက်သည်။ လီမိသားစု ဘိုးဘေးကြီးသည် ပြောစရာများ ပျောက်ရှနေသည်။

"ဘာပဲဖြစ်ဖြစ် ကျုပ်အသက်ကို ကယ်တင်ပေးတဲ့အတွက် ကျေးဇူးတင်ပါတယ် ခေါင်းဆောင်ချူး။ အနာဂတ်မှာ ခင်ဗျား အကူအညီလိုအပ်လို့ ကျုပ်ရဲ့ အသက်တစ်သောင်းလောက် ကုန်ဆုံးရမယ်ဆိုရင်တောင် ငရဲပြည်နဲ့ ရေနက်ထဲကို ဖြတ်သန်းဖို့ အသင့်ပါပဲ" လီမိသားစု ဘိုးဘေးကြီးက လေးနက်စွာ ကတိပြုလိုက်သည်။

"ပြည်ထောင်စုတပ်မတော် စစ်ကူတွေရောက်လာပြီလား"

သူ၏ ဉာဏ်ရည်အရ၊ ပြည်ထောင်စုသည် ငြိမ်သက်စွာ ထိုင်ကြည့်မနေဘဲ ဤနေရာတွင် ပိတ်မိနေသည့် ကျွမ်းကျင်သူများစွာကို ကယ်တင်ရန် စစ်တပ်ကြီးတစ်ခုကို စေလွှတ်ကြမည်ဟု ခန့်မှန်းရန် မခက်ခဲပေ။ ဤသည်မှာ ဖြစ်နိုင်ခြေအရှိဆုံးဖြစ်သည်။ ပြည်ထောင်စုသည် ထိပ်တန်းကျွမ်းကျင်သူ အရေအတွက်အရ၊ အနန္တနတ်ဆိုးတောင်တန်းနှင့် အဏ္ဏဝါလူမျိုးတို့ဖြင့် နှိုင်းယှဉ်၍မရပေ။ သို့သော် စစ်တပ်ခွန်အားသည် အနန္တနတ်ဆိုးတောင်တန်းနှင့် အဏ္ဏဝါမျိုးနွယ်စု၏ အထက်တွင် ရှိနေသည်။

"ဟုတ်တယ်။ ပြည်ထောင်စုတပ်မတော်က အပြင်မှာ ရောက်နေကြတယ်၊ ဒါပေမယ့် အနန္တနတ်ဆိုးတောင်တန်းနဲ့ အဏ္ဏဝါမျိုးနွယ်စုတွေက သူတို့ကို တားဆီးဖို့ အသည်းအသန် ကြိုးစားနေကြတယ်။ ပြည်ထောင်စုတပ်မတော်က ကာကွယ်ရေးစည်းကို မဖြတ်နိုင်တဲ့အတွက် ဒီမှာ ကူညီဖို့ ကျုပ် တစ်ယောက်တည်း ရောက်လာတာ" ချူးယွင်ဖန်းက ပြောသည်။

လီမိသားစု ဘိုးဘေးကြီးက ခေါင်းညိတ်လိုက်သည်။ အနန္တနတ်ဆိုးတောင်တန်းနှင့် အဏ္ဏဝါမျိုးနွယ်များသည် အပျက်အစီးများအတွင်းရှိ ကျွမ်းကျင်သူများကို သတ်ဖြတ်ရန်အတွက် အစွမ်းကုန် လုပ်ဆောင်ကြမည်ကို သူ သိမြင်နိုင်သည်။ ၎င်းတို့သည် လမ်းတစ်ဝက်တွင် လွယ်တကူ လက်လျော့သွားရန် မဖြစ်နိုင်ပေ။

"လုံလောက်ပါတယ်။ ခင်ဗျား တစ်ယောက်တည်းက ထောင်နဲ့ချီတဲ့ စစ်သားတွေလိုပါပဲ၊ ခေါင်းဆောင်ချူး" လီမိသားစု ဘိုးဘေးကြီးက ပြောလိုက်သည်။

"နောက်မှ ဆက်ပြောရအောင်။ တခြားသူတွေရော အခြေအနေ ဘယ်လိုရှိလဲ ခင်ဗျား သိလား" ချူးယွင်ဖန်းက မေးလိုက်သည်။

"ကျုပ်တို့ အတူတူ လာကြတာ မဟုတ်တော့ ကျုပ်လည်း မသိဘူး။ နောက်ပိုင်းမှာ အသက်အတွက် ပြေးလွှားနေရတော့ လူစုကွဲသွားကြတာနဲ့ အဆက်အသွယ်လည်း မလုပ်ဖြစ်တော့ဘူး" လီမိသားစု ဘိုးဘေးကြီးက ခါးသီးစွာ ပြုံး၍ ပြောလိုက်သည်။ ၎င်းတို့သည် ထိုအချိန်က အသက်ရှင်ရေးအတွက် ထွက်ပြေးနေရသောကြောင့် အခြားလူများကို ဂရုစိုက်ရန် မည်သို့မျှ အချိန်ရမည်နည်း။

အချင်းချင်းစုစည်းရန် မကြိုးစားခဲ့ခြင်း မဟုတ်သော်လည်း အသုံးမဝင်ခဲ့ပေ။ အနန္တနတ်ဆိုးတောင်တန်းနှင့် အဏ္ဏဝါမျိုးနွယ်စု၏ ကျွမ်းကျင်သူများသည် ၎င်းတို့ထက် အရေအတွက်နှင့် အရည်အသွေးများ ပိုမိုမြင့်မားကြသောကြောင့် ၎င်းတို့အားလုံး လူစုကွဲသွားကြသည်။ အဏ္ဏဝါမျိုးနွယ်စုနှင့် အနန္တနတ်ဆိုးတောင်တန်းတို့သည် ၎င်းတို့ကို အတူတကွ မစုဝေးစေချင်သည်မှာ သိသာထင်ရှားသည်။ ၎င်းတို့ကို ခွဲထုတ်ပြီးနောက် တစ်ယောက်ချင်းစီ သတ်ဖြတ်ချင်နေကြသည်။ ချူးယွင်ဖန်း၏အမူအရာသည် အလွန် လေးနက်လာသည်။ အခြေအနေသည် သူ ထင်ထားသည်ထက် ပို၍ ဆိုးရွားနေသည်။

"ဒါပေမယ့် ချူးဟောက်ယွဲ့နဲ့ တခြားသူတွေကို လမ်းမှာ စုံဖူးတယ်။ သူတို့တွေ ဟိုဘက်ကို ထွက်ပြေးသွားကြတယ်။ အဲ့ဒီ့ဘက်ကို လိုက်သွားရင် တွေ့ဖို့ မျှော်လင့်ချက်ရှိလောက်တယ်" လီမိသားစု ဘိုးဘေးကြီးက ညွှန်ပြလိုက်သည်။

"အခု ကျုပ် သိချင်တာက ခင်ဗျားတို့ကို ဒီကို ခေါ်လာတာ လျို့မိသားစု ဘိုးဘေးကြီးလား" ချူးယွင်ဖန်းက မေးလိုက်သည်။

"ဟုတ်တယ်။ အဲ့ဒီ့သောက်ကျိုးနည်း သစ္စာဖောက်ကောင်" လီမိသားစု ဘိုဘေးကြီးက အံကြိတ်လိုက်သည်။ သူသည် မည်သို့ သစ္စာဖောက်ခံလိုက်ရသည်ကို စဉ်းစားမိသောအခါ လျို့မိသားစု ဘိုးဘေးကြီးကို အပိုင်းပိုင်း ဖြတ်တောက်ချင်နေမိသည်။

"သူ့ဆီက သတင်းရလို့ ကျုပ်တို့တွေ ဒီကိုရောက်လာခဲ့တာ။ ဒါက ထောင်ချောက်တစ်ခုဖြစ်နေမယ်မယ်လို့ ဘယ်သူ သိမှာလဲ။ သူက ပြည်ထောင်စုကို သစ္စာဖောက်ပြီး အဏ္ဏဝါမျိုးနွယ်စု၊ အနန္တနတ်ဆိုးတောင်တန်းနဲ့ ပူးပေါင်းခဲ့တာ" ပြီးနောက် လီမိသားစု ဘိုးဘေးကြီးသည် ချူးယွင်ဖန်းထံ အဖြစ်အပျက်များကို ပြောပြလိုက်သည်။

ထိုနေ့တွင် လျို့မိသားစု ဘိုးဘေးကြီးသည် ဤအပျက်အစီးများကို ရှာဖွေတွေ့ရှိခဲ့၍ ပြည်ထောင်စုအတွင်းနှင့် ပြင်ပဘက်ရှိ ကျွမ်းကျင်သူများစွာကို စုစည်းရန် ဖိတ်ကြားခဲ့သည်။ ၎င်းသည် ထောင်ချောက်ဖြစ်လာမည်ဟု မည်သူသိမည်နည်း။ သို့မဟုတ် လျို့မိသားစု ဘ်ုးဘေးကြီးသည် ၎င်းတို့ကို လိမ်ညာမည်ဟု မည်သူမျှ မထင်မှတ်ခဲ့ပေ။ သူသည် ပြည်ထောင်စုတစ်ခုလုံးတွင် လူသိများသည့်အပြင် မရေတွက်နိုင်သည့် ပြောင်မြောက်သော အကျိုးပြုမှုများကို ပြုလုပ်ခဲ့သူဖြစ်သည်။ ထိုသို့သော ပုဂ္ဂိုလ်မျိုးက ပြည်ထောင်စုကို သစ္စာဖောက်ရန် ရွေးချယ်လိမ့်မည်ဟု မည်သူမျှ မထင်မှတ်ခဲ့ပေ။

'ငါ ထင်ထားတာ မှန်နေတာပဲ' ချူးယွင်ဖန်းက တွေးလိုက်သည်။ ကံကောင်းထောက်မစွာဖြင့် ဤနေရာသို့ မရောက်လာမီ လျို့မိသားစုကို အပြည့်အစုံ စုံစမ်းစစ်ဆေး အမိန့်ပေးထားပြီးသားဖြစ်သည်။ မကြာမီတွင် ပြဿနာများ မည်မျှ ရှိနေသည်ကို သိရှိလာပေလိမ့်မည်။

"ဒါဆိုရင် ဆက်မပြောတော့ဘူး။ ခင်ဗျား ဒီကနေ အရင်သွားနှင့်၊ ဒါပေမယ့် အပြင်ဘက်မှာ အဏ္ဏဝါသားရဲတွေနဲ့ အနန္တနတ်ဆိုးတောင်တွေက မွန်းစတားတွေရှိနေတယ်။ သတိထားပါ" ချူးယွင်ဖန်းက ပြောလိုက်သည်။

လီမိသားစု ဘိုးဘေးကြီး ခေါင်းညိတ်ပြီးနောက် မည်သည့်စကားမျှ ဆက်မပြောတော့ပေ။ သူ၏ လက်ရှိအခြေအနေကို သူ ကောင်းကောင်းသိနေသည်။ သူသည် အနည်းငယ် ပြန်လည်သက်သာလာသော်လည်း သူ၏အထွတ်အထိပ် အခြေအနေသို့ မရောက်ရှိသေးပေ။ သူသာ ဆက်လက် တိုက်ပွဲဝင်မည်ဆိုလျှင် အလွန် နွမ်းနယ်သွားနိုင်သည်။

သို့သော် သာမာန်သားရဲများသာဖြစ်လျှင် သူ မကြောက်ရွံ့ပေ။ နတ်အဆင့် မွေးဖွားခြင်းနယ်မြေအဆင့်နှင့် မရီးဒျန်အဆင့် မွန်းစတားတို့၏ ကွာခြားချက်သည် ကြီးမားလွန်းလှသည်။ သူ့ဘက်မှ သတိထားနေသရွေ့ ဖရိုဖရဲစစ်မြေပြင်တွင်ရှိနေလျှင်ပင် သူ ကောင်းကောင်း ရှင်သန်နိုင်သည်။ ချူးယွင်ဖန်းသည် လီမိသားစု ဘိုးဘေးကြီးကို နှုတ်ဆက်ပြီးနောက် ညွှန်ပြသည့် လမ်းကြောင်းအတိုင်း ချက်ချင်း ပျံသန်းသွားခဲ့သည်။

ထိုအချိန်တွင် အင်တာနက်ပေါ်တွင် ရုတ်ရုတ်သဲသဲများ ဖြစ်ပွားနေသည်။ ချူးယွင်ဖန်း တင်ခဲ့သည့် ဓာတ်ပုံနှစ်ပုံသည် အဏ္ဏဝါမျိုးနွယ်စုရှိ ပြိုင်ဘက်ကင်း ကျွမ်းကျင်သူနှစ်ဦး၏ ဓာတ်ပုံများဖြစ်သည်မှာ သေချာသည်။ တစ်ဦးသည် တိုက်ခိုက်မှုကြောင့် သေဆုံးသွား၍ ကျန်တစ်ဦးသည် မိုးကြိုးလှံဖြင့် မြေပြင်တွင် ထိုးစိုက်ခံလိုက်ရသည်။

ဤဓာတ်ပုံနှစ်ပုံ ထွက်ပေါ်လာသည်နှင့် ချက်ခြင်းပင် အုံကြွမှုများ ဖြစ်သွားလေသည်။ ဤကျွမ်းကျင်သူနှစ်ဦးသည် လွန်ခဲ့သည့် ရက်အနည်းငယ်အတွင်း လူသားတို့၏ ကြေကွဲဖွယ် အခြေအနေအမျိုးမျိုး၏ ဓာတ်ပုံနှင့် ဗီဒီယိုများကို အဆက်မပြတ် ထုတ်လွှင့်နေခဲ့သည်။ ၎င်းတို့သည် အိမ်ထောင်စုတစ်ခု၏ အမည်ဖြစ်လာသည်မှာ ကြာမြင့်ပြီဖြစ်သည်။ လူများစွာသည် ၎င်းတို့ကို မုန်းတီးနေကြသော်လည်း အခြားရွေးချယ်စရာမရှိပေ။

သတ္တမမြောက် နတ်အဆင့်သည် လက်ရှိပြည်ထောင်စုတွင် ၎င်းတို့မကိုင်တွယ်နိုင်သော ဒဏ္ဍာရီလာအဆင့် ကျွမ်းကျင်သူဖြစ်သည်။ ထိုသို့သော ကျွမ်းကျင်သူနှစ်ဦးမဆိုနှင့် တစ်ဦးတည်းကပင် ပြည်ထောင်စုကို ဇောက်ထိုးမိုးမျှော် ပြုလုပ်ပစ်ရန် လုံလောက်ပေသည်။

သို့သော် ယခုအချိန်တွင် ၎င်းတို့နှစ်ဦးသည် တစ်ဦးပြီး တစ်ဦး သေဆုံးသွားကြသည်။ ထို့ကြောင့် ဓာတ်ပုံများကို တင်လိုက်သောအခါ ချက်ချင်းဆိုသလိုပင် ရုတ်ရုတ်သဲသဲ ဖြစ်သွားလေသည်။ လူသားများ စိတ်ဓာတ်အင်အားများ မြင့်တက်လာကြသည်။ မရေတွက်နိုင်သော လူများသည် အလွန်စိတ်ကျေနပ်စွာ ကြည့်ရှု၍ အလွန်ပျော်ရွှင်နေကြသည်။ ၎င်းတို့သည် မောက်မာ၍ မုန်းစရာကောင်းသော ဤမျက်နှာနှစ်ခုကို မြင်တွေ့ရသည်မှာ ငြီးငွေ့နေပြီဖြစ်သည်။ သို့သော် ၎င်းတို့၏ မယုံသင်္ကာဖြစ်မှုများကို ထုတ်ဖော်နေသူများအပြင် မဖြစ်နိုင်ဘူးဟု ယူဆနေသူများလည်းရှိနေသည်။

လက်ရှိ ပြည်ထောင်စုတွင် ဤကျွမ်းကျင်သူနှစ်ဦးကို သတ်ပစ်ရန် မဆိုနှင့် ယှဉ်ပြိုင်နိုင်မည့် ဖြစ်တည်မှုပင် မရှိသင့်ပေ။ ပြည်ထောင်စုသည် အကျပ်ရိုက်လာသောကြောင့် ကိုယ့်ကိုယ်ကို နှစ်သိမ့်ရန် ဓာတ်ပုံအတု ပြုလုပ်လာကြသည်ဟု အင်တာနက်ပေါ်တွင် အကောင့်များရှိကြသည့် အနန္တနတ်ဆိုးတောင်တန်းနှင့် အဏ္ဏဝါမျိုးနွယ်စု ကျွမ်းကျင်သူများက လှောင်ရယ်နေကြသည်။ ၎င်းတို့သည် ကာလအတန်ကြာ မောက်မာနေကြသည်ဟု ဆိုနိုင်သည်။

သို့သော်လည်း ယင်းကဲ့သို့ ပြုလုပ်ထားသည့် သဲလွန်စများမရှိသောကြောင့် ၎င်းတို့သည် ဓာတ်ပုံအတုများ မဟုတ်ကြောင်းကို နည်းပညာကျွမ်းကျင်သူတစ်ဦးက လျင်မြန်စွာ ထောက်ပြခဲ့သည်။ သို့သော်လည်း အဏ္ဏဝါမျိုးနွယ်စုများနှင့် အနန္တနတ်ဆိုးတောင်တန်း၏ ကျွမ်းကျင်သူများက အလျှော့မပေးသေးပေ။ ဓာတ်ပုံများကို အတုမပြုလုပ်ထားသော်လည်း အကြောင်းအရာသည် အတုအပသာဖြစ်နိုင်သည်။ လူသားများသည် ကျွမ်းကျင်သူနှစ်ဦး၏ မော်ဒယ်အတုများကို ဖန်တီးခဲ့ကြခြင်း ဖြစ်နိုင်သည်။

ဤဓာတ်ပုံနှစ်ပုံ တင်ထားသည့် အကောင့်သည် ပြည်ထောင်စု၏ နံပါတ်တစ်ကျွမ်းကျင်သူ ချူးယွင်ဖန်း၏အကောင့် အမှန်တကယ်ဖြစ်နေကြောင်း တစ်စုံတစ်ဦးက သတိပြုထားမိချိန်မှသာ လူတိုင်း ရုတ်တရက် တိတ်ဆိတ်သွားကြသည်။

အခန်း (၁၀၆၅) အနန္တနတ်ဆိုးတောင်တန်း၏ မျက်နှာကို ဖြတ်ရိုက်ခြင်း

အစပိုင်းတွင် လူတိုင်း၏အာရုံစူးစိုက်မှုသည် ဤဓာတ်ပုံနှစ်ပုံ၏ စစ်မှန်မှုအပေါ်တွင်သာရှိခဲ့သည်။ ခဏအကြာတွင် ဓာတ်ပုံတင်သူသည် ချူးယွင်ဖန်းမှလွဲ၍ အခြားလူမဟုတ်ကြောင်း တစ်စုံတစ်ဦးက သတိပြုမိသွားသည်။ ချူးယွင်ဖန်းသည် လွန်ခဲ့သည့် လအနည်းငယ်တွင် မတော်တဆမှုတစ်ခုနှင့် ကြုံတွေ့ခဲ့သည်ဟူသော အချက်ကို ပြည်ထောင်စုက လက်ခံခဲ့ကြသည်။ သို့သော် သူသည် ပို့စ်အသစ်တစ်ခုကို ရုတ်တရက် တင်လိုက်သည်။

လူတိုင်း၏ ပထမဆုံးတုံ့ပြန်မှုသည် မယုံသင်္ကာဖြစ်ရန် ဖြစ်သော်လည်း တစ်ခုခု မှားယွင်းနေကြောင်း သိရှိလိုက်ရသည်၊ မည်သို့ဆိုသော် ဤအင်တာနက်ခေတ်တွင် အကောင့်များကို ခိုးယူနိုင်ခြင်း မရှိသောကြောင့်ဖြစ်သည်။ အကြောင်းပြချက်သည် ရိုးရှင်းလှ၏၊ အင်တာနက်သည် လူ့ဦးနှောက်နှင့် ချိတ်ဆက်ထားသောကြောင့် အကောင့်ပိုင်ရှင်ကသာ အကောင့်ထဲသို့ ဝင်ရောက်နိုင်သည်။

လူတစ်ဦး သေဆုံးပြီးသည်နှင့် ၎င်းတို့၏အကောင့်သို့ ဝင်ရောက်ရန် မဖြစ်နိုင်ပေ။ ထို့ကြောင့် အကောင့်တစ်ခုသည် အသုံးပြုခံနေရပါက ဖြစ်နိုင်ချေတစ်ခုသာရှိသည်။ ချူးယွင်ဖန်းသည် ဓာတ်ပုံများကို ကိုယ်တိုင် တင်နေခြင်းသည်။ ထိုသတင်းထွက်လာသည်နှင့် တစ်ပြိုင်နက် ရုန်းရင်းဆန်ခတ်များဖြစ်ပေါ်သွားလေသည်။ လူတချို့သည် သူ အသက်ရှင်နေသေးခြင်းကို မယုံကြည်ချင်ကြသော်လည်း မကြာမီမှာပင် အထူးစစ်ဆင်ရေးဌာနက ကောလာဟလများကို ချေပရန် ထွက်လာခဲ့ကြသည်။ ချူးယွင်ဖန်း၏အကောင့်ကို အသုံးပြုခဲ့သူသည် အမှန်တကယ်ပင် ချူးယွင်ဖန်းကိုယ်တိုင် ဖြစ်သည်။

ချူးယွင်ဖန်းသည် မသေဆုံးခဲ့ပေ။

ဤသတင်းသည် ပြည်ထောင်စုတစ်ခုလုံးကို ဆူနာမီကဲ့သို့ ပျံ့နှံ့သွားလေသည်။ အထူးသဖြင့် လွန်ခဲ့သော ရက်အနည်းငယ်တွင် အပျက်အစီးများအတွင်းရှိ တိုက်ပွဲ အခြေအနေကို လူတိုင်း အာရုံစိုက်နေကြသောအခါ၊ လူသားကျွမ်းကျင်သူအားလုံး ပျက်သုဉ်းသွားလျှင် ပြည်ထောင်စုအတွက် မည်သို့သော ဘေးအန္တရာယ်မျိုးဖြစ်လာမည်ကို လူတိုင်း နားလည်ကြလေ၏။

ပြည်ထောင်စုသည် စစ်မြေပြင်ကို ဖြတ်သန်းရန် နတ်အဆင့် ကျွမ်းကျင်သူများစွာကို အားမကိုးဘဲ အမျိုးမျိုးသော နည်းပညာမြင့်လက်နက်များကို အားကိုးထားသော်လည်း ခံတပ်ကို ထိန်းချုပ်ထားရန် နတ်အဆင့်ကျွမ်းကျင်သူ မရှိပါက အနန္တနတ်ဆိုးတောင်တန်း၊ အဏ္ဏဝါမျိုးနွယ်စုတို့နှင့် ထိပ်တိုက် ရင်ဆိုင်ရာတွင် လုံးလုံးလျားလျား အားနည်းသွားပေလိမ့်မည်။

ဤအရေးကြီးသော အခိုက်အတန့်တွင် ချူးယွင်ဖန်း ပြန်ရောက်လာခဲ့သည်။ ထို့အပြင် သူ ပြန်ရောက်လာသည်နှင့် ပြည်ထောင်စုက မုန်းတီးနေသော ကျွမ်းကျင်သူနှစ်ယောက်ကို ချက်ချင်းပင် သုတ်သင်ပစ်လိုက်သည်။ ချူးယွင်ဖန်း ပြန်ရောက်လာကြောင်း အတည်ပြုပြီး မကြာမီတွင် အထူးစစ်ဆေးရေးဌာနက နောက်ထပ် သတင်းတစ်ခုကို ကြေညာလာခဲ့သည်။

ယခင်က ချူးယွင်ဖန်း အန္တရာယ်နှင့် ကြုံတွေ့ခဲ့ခြင်းဟူသည်မှာ အမှန်တကယ် မဟုတ်ဘဲ နတ်ကုန်းမြေသို့ ရောက်ရှိသွားခြင်းဖြစ်သည်။ သူသည် နတ်ကုန်းမြေကို ပြည်ထောင်စုနှင့် လက်တွဲရန် အောင်မြင်စွာ စည်းရုံးနိုင်ခဲ့၍ ယခုအခါ စစ်မြေပြင်တွင် ပါဝင်တိုက်ခိုက်နေသည့် နတ်အဆင့် ကျွမ်းကျင်သူ အယောက် နှစ်ဆယ်ကျော်ကို ပြန်လည်ခေါ်ဆောင်လာခဲ့သည်။

၎င်းတို့သည် အနန္တနတ်ဆိုးတောင်တန်းနှင့် အဏ္ဏဝါမျိုးနွယ်စု၏ ပိတ်ဆို့မှုကို ဖြတ်သန်းရန် အချိန်တစ်ခုသာ လိုအပ်တော့သည်။ ဤကြေငြာချက် ထုတ်ပြန်ပြီးသည်နှင့် ပြည်ထောင်စုတစ်ခုလုံး ရုတ်ရုတ်သဲသဲ ဖြစ်သွားလေသည်။ အပျက်အစီးများရှိ စစ်မြေပြင်၌ ပြည်ထောင်စုသည် ပြုသမျှနုရသော အနေအထားတွင် ရောက်ရှိနေကြောင်း လူတိုင်းသိကြသည်။

ပြည်ထောင်စုသည် စစ်မြေပြင်ကို ကြီးကြပ်ရန် နတ်အဆင့်များ မရှိသောကြောင့် ပြုသမျှနုရသော အခြေအနေသို့ တွန်းပို့ခံလိုက်ရသည်။

ယခု ချူးယွင်ဖန်းသည် နတ်ကုန်းမြေမှ ကျွမ်းကျင်သူ အယောက်နှစ်ဆယ်ကျော်ကို ခေါ်ဆောင်လာသောကြောင့် အခြေအနေကို ပြောင်းပြန်လှန်ရန် လုံလောက်နေသည်။

ထို့အပြင် နတ်ကုန်းမြေသည် သတင်းအသစ်တစ်ခု မဟုတ်ပေ။ နတ်ကုန်းမြေသည် အလွန် အင်အားကြီး၍ ကျွမ်းကျင်သူများစွာရှိကြောင်း လူတိုင်း သိကြသည်။ ၎င်းတို့၏ ပူးပေါင်းပါဝင်မှုသည် ပြည်ထောင်စုကို အားကောင်းသွားစေမှာ သေချာသည်။ ထိုကဲ့သို့ ကြီးမားသော မဟာမိတ်အဖွဲ့ကို တည်ထောင်ခြင်းသည် ချူးယွင်ဖန်း၏ ဂုဏ်သတင်းကို အလွန်တိုးတက်စေ၍ ပြည်ထောင်စု၏ မျှော်လင့်ချက်များ ငြိမ်းသတ်ခံရခြင်းမှ လွတ်မြောက်သွားစေသည်။ ထိုကဲ့သို့သော အခြေအနေမျိုးတွင် အစောပိုင်းက သောင်းကျန်းနေခဲ့ကြသည့် အနန္တနတ်ဆိုးတောင်တန်းနှင့် အဏ္ဏဝါမျိုးနွယ်စု ကျွမ်းကျင်သူများအားလုံး အာရုံပျက်ပြားသည်အထိ အထိနာသွားပုံရသည်။

သေဆုံးသွားပြီဟု ထင်မှတ်ထားဖွယ်ရှိသည့် ချူးယွင်ဖန်းသည် ရုတ်တရက် ပေါ်ပေါက်လာသည့်အပြင် အဏ္ဏဝါမျိုးနွယ်စု၏ နတ်အဆင့် ကျွမ်းကျင်သူနှစ်ဦးကို ချက်ချင်း ဖယ်ရှားပစ်လိုက်မည်ဟု မည်သူမျှ မမျှော်လင့်ထားပေ။၎င်းတို့၏ ဦးခေါင်းပေါ်သို့ လေးလံသော တူတစ်ချောင်း ကျရောက်လာသကဲ့သို့ ခံစားလိုက်ရသည်။ သို့သော်လည်း ခဏတာ တိတ်ဆိတ်သွားပြီးနောက် အဏ္ဏဝါမျိုးနွယ်စုနှင့် အနန္တနတ်ဆိုးတောင်တန်း၏ ကျွမ်းကျင်သူများအားလုံး စတင် သောင်းကျန်းလာပြန်သည်။

"ပြည်ထောင်စုရဲ့ နံပါတ်တစ်လို့ ခေါ်တဲ့လူကလည်း ဒီထက်မပိုပါဘူး"

"သူက ကျားမရှိတဲ့နေရာမှာ ဘုရင်လို ဟန်ဆောင်နေတဲ့ မျောက်တစ်ကောင်ပါကွာ၊ အဏ္ဏဝါမျိုးနွယ်စုရဲ့ ထိပ်တန်းကျွမ်းကျင်သူတွေရှေ့မှာ ပေါ်လာရဲတာနဲ့ သေရလိမ့်မယ်"

"အခု သူ အပျက်အစီးတွေထဲ ရောက်သွားပြီဆိုတော့ သေချာပေါက် သေပြီပဲ။ လုံးဝ လွတ်နိုင်မှာ မဟုတ်ဘူး"

မရေတွက်နိုင်သော လူများစွာသည် ၎င်းတို့၏ ဤမောက်မာသော အပြုအမူများကို ဝေဖန်နေကြသော်လည်း အင်တာနက်နှင့် ပိုင်းခြားထားသောကြောင့် ၎င်းတို့ကို မည်သည့် ထိခိုက်မှုမျှ အမှန်တကယ် မလုပ်ဆောင်နိုင်ပေ။ အင်တာနက်ကို လူသားများက တီထွင်ထားသော်လည်း လူသားများထက် ဉာဏ်ရည် မနိမ့်ကျသော အဏ္ဏဝါမျိုးနွယ်စုဝင်များနှင့် နတ်ဆိုးအများအပြားရှိနေသည်။ ထို့ကြောင့် ထုံးစံအတိုင်း ၎င်းတို့သည်လည်း အင်တာနက်သို့ ဝင်ရောက်ရန် နည်းလမ်းရှာနိုင်ကြသည်။

ထိုအချိန်တွင် ချူးယွင်ဖန်းသည် အင်တာနက်တွင် ဇောက်ထိုးမိုးမျှော်ဖြစ်နေခြင်းကို မသိခဲ့ပေ၊ သူ့အတွက် ယခု အရေးကြီးဆုံးသည် ချူးဟောက်ယွဲ့နှင့် အခြားလူများကို ကယ်တင်ရန်ဖြစ်သည်။ သူ၏ နတ်အာရုံကို လုံးလုံးလျားလျား ထုတ်လွှတ်ခဲ့ပြီးနောက် ကျယ်ပြောလှသော ပတ်ဝန်းကျင်ရှိ နယ်မြေသည် သူ၏ ထိန်းချုပ်မှုအောက်တွင် ရောက်ရှိနေသည်။ သို့သော် အပျက်အစီးသည် တိုက်ငယ်တစ်ခု၏ အရွယ်အစားခန့်ရှိနေ၍ အလွန်ကြီးမားလှသည်။

သို့သော်လည်း ထို့ကြောင့်သာ ပြည်ထောင်စု၏ ကျွမ်းကျင်သူများ ထွက်ပြေးရန် နေရာရှိနေခြင်းဖြစ်သည်။ မဟုတ်လျှင် ထိုလူများ၏ လက်ထဲတွင် သေဆုံးသွားပေလိမ့်မည်။ သူသည် ၎င်းတို့ကို ရှာဖွေနေစဉ်တွင် အဝေးမှ ဝေဟင် မွန်းစတားနှစ်ကောင် ပျံသန်းလာသည်။ ဤမွန်းစတားနှစ်ကောင်သည် နတ်အဆင့်သို့ ရောက်ရှိနေပြီဖြစ်သည်။ ၎င်းတို့၏ ခန္ဓာကိုယ်များသည် တောင်ငယ်များကဲ့သို့ ကြီးမားပေသည်။

၎င်းတို့သည် မကြာမီတွင် ချူးယွင်ဖန်းကို တွေ့ရှိသွားသောကြောင့် ၎င်းတို့၏ မျက်လုံးများ တောက်ပလာခဲ့သည်။ ချူးယွင်ဖန်းကို ၎င်းတို့၏သားကောင်အဖြစ် မှတ်ယူလိုက်ကြ၍ လျှပ်စီးနှစ်စင်းကဲ့သို့ ချက်ချင်းဆိုသလိုပင် ခုန်အုပ်လာကြသည်။ ၎င်းတို့သည် အရွယ်အစား အလွန်ကြီးမားသော်လည်း အလွန် လျင်မြန်လှသည်။

"မင်းကို သတ်ပစ်မယ်"

ချူးယွင်ဖန်းသည် ဤပျံသန်းနေသော သားရဲနှစ်ကောင်ကို ရင်ဆိုင်ရသောအခါ ခေတ္တမျှ မရပ်တန့်ခဲ့ပေ။ သူသည် အရှေ့သို့ ခြေတစ်လှမ်း လှမ်းကာ ၎င်းတို့ကို နင်းချလိုက်သည်။

ဘုံး

ချူးယွင်ဖန်း၏ခြေထောက်သည် မွန်းစတားတစ်ကောင်၏ ခန္ဓာကိုယ်ပေါ်သို့ ကျရောက်သွားသည်။ ၎င်းသည် လျှပ်စီးဖြင့် ထိမှန်သွားသကဲ့သို့ ခံစားလိုက်ရသဖြင့် စူးရှစွာ အော်ဟစ်ပြီးနောက် ၎င်း၏ ခန္ဓာတစ်ခုလုံး ချက်ချင်းပင် ကွဲထွက်သွားလေ၏။ နတ်အဆင့် မွန်းစတားတစ်ကောင်၏ ခန္ဓာကိုယ်သည် အလွန်သန်မာသော်လည်း ချူးယွင်ဖန်းကို ပြန်တိုက်ခိုက်ရန် ခွန်အားမရှိပေ။ ၎င်းသည် ခြေတစ်ချက် လှမ်းရုံဖြင့် နှစ်ခြမ်းကွဲထွက်သွားလေသည်။

ကျန်တစ်ကောင်သည် ထိုမြင်ကွင်းကို မြင်သောအခါ ချက်ချင်းပင် ကြောက်လန့်သွားလေ၏။ ချူးယွင်ဖန်း၏ လက်ချက်မှ လွတ်မြောက်ရန်အတွက် ၎င်း၏ အတောင်ပံများကို အရူးအမူး လှုပ်ခတ်နေသည်။ သို့သော် ချူးယွင်ဖန်းသည် ၎င်းကို မည်သိုမျှ ထိုသို့ပြုလုပ်ရန် အခွင့်အရေးပေးမည်နည်း။ သူသည် လေထုကို ဖမ်းကိုင်လိုက်သည်နှင့် သူ၏လက်ထဲတွင် မိုးကြိုးစွမ်းအင်များ ထွက်ပေါ်လာသည်။ ၎င်းသည် ရုတ်တရက်ဆိုသလိုပင် မိုးကြိုးလှံအဖြစ် ပြောင်းလဲသွားခဲ့၍ ချူးယွင်ဖန်းသည် ပျံသန်းနေသော မွန်းစတားထံ ပစ်လွှတ်လိုက်လေ၏။

မွန်းစတားသည် မြေပြင်တွင် ထိုးစိုက်ခံလိုက်ရသောကြောင့် နာကျင်စွာ အော်ဟစ်နေသည်။ ၎င်းသည် အချိန်အတော်ကြာ ရုန်းကန်ပြီးနောက် အသက်ရှုရပ်၍ သေဆုံးသွားလေသည်။ ချူးယွင်ဖန်းသည် ၎င်းတို့ကို ဓာတ်ပုံရိုက်ပြီးနောက် အင်တာနက်ပေါ်သို့ တင်ရန် မမေ့လျော့ခဲ့ပေ။ စာတန်းသည် ခေါင်းလေးလုံးဟူသော စကားလုံးနှစ်လုံးသာ ပါဝင်ခဲ့သည်။

သူ၏စာလုံးများသည် အင်တာနက်တစ်ခုလုံးကို အကြီးအကျယ် တုန်လှုပ်သွားစေသည်။ အနန္တနတ်ဆိုးတောင်တန်းသည် တောင်ထိပ်တစ်ခုပေါ်တွင် ထိုးစိုက်သတ်ဖြတ်ခံထားရသည့် လူသားကျွမ်းကျင်သူတစ်ဦး၏ ဓာတ်ပုံကို မကြာသေးမီက တင်ခဲ့ကြသည်။ ၎င်းသည် တာအို၀တ်စုံ ဝတ်ဆင်ထားသည် အသက်ခြောက်ဆယ်ကျော် အဘိုးအိုတစ်ဦးဖြစ်သည်။ လူအချို့သည် ထိုအဘိုးအိုကို မြို့စွန်နယ်မြေရှိ နဂါးဖြူကျောင်းတိုက်၏ ဆရာတော်ဖြစ်ကြောင်း သတိထားမိသွားကြသည်။

နဂါးဖြူကျောင်းတိုက်သည် ပြည်ထောင်စုအတွင်းရှိ အင်အားစုတစ်ခု မဟုတ်သော်လည်း မြို့စွန်နယ်မြေများတွင် သြဇာကြီးမားကြ၍ အများအားဖြင့် ပြည်ထောင်စုနှင့် ဆက်ဆံရေး ကောင်းမွန်လေ့ရှိသည်။ ယခုမူကား၊ သူသည် တောင်ထိပ်တွင် ထိုးစိုက်ခံကာ အသတ်ခံလိုက်ရသည်။ အနန္တနတ်ဆိုးတောင်တန်းသည် လူသားများကို နှိုးဆွရန် ခုန်ပေါက်နေချိန် ချူးယွင်ဖန်း၏ ဓာတ်ပုံနှစ်ပုံသည် ၎င်းတို့၏ မျက်နှာကို ခပ်ကြမ်းကြမ်း ရိုက်နှက်လိုက်ခြင်းနှင့် ဆင်တူသည်။