အခန်း (၁၀၇၂-၁၀၇၄)

အခန်း (၁၀၇၂) တစ်ယောက်က ရိုက်သတ်ခံရပြီး၊ တစ်ဖွဲ့ကို လှုပ်ရှားမှု တစ်ခုတည်းဖြင့် သုတ်သင်ခြင်း

ဤအခြေအနေသည် ဝေ့မိသားစုခေါင်းဆောင်နှင့် ဆင်တူသည်။ သူသည် အခြားလူတစ်ဦး၏လက်အောက်ခံဖြစ်နေကြောင်း မည်သူမျှ မသိခဲ့ကြပေ။ ဤဖြစ်စဉ်သည် လူအများကို ထိတ်လန့်ဖွယ် ခံစားချက်မျိုး ပေးစွမ်းစေသည်။ ဝေ့မိသားစု ခေါင်းဆောင်နှင့် လျို့မိသားစု ဘိုးဘေးကြီးတို့သည် ၎င်းတို့၏ကိုယ်ပိုင် အခြေခံအုတ်မြစ်ကို ထူထောင်ခဲ့ကြသော်လည်း ၎င်းတို့သည် အခြားလူများ လက်ထဲရှိ နယ်ရုပ်များဖြစ်ကြသည်။ ဤသည်မှာ အံ့ဩဖွယ်ရာအချက်ဖြစ်သည်။

ဤ "အရှင်" သည် မည်မျှ တန်ခိုးကြီးမားသည်ကို တွေးကြည့်၍ပင် သိနိုင်ရာ၊ ၎င်းနောက်ကွယ်တွင် အင်အားမည်မျှ သိုဝှက်ထားသည်ကို မည်သူမျှ သိနိုင်မည် မဟုတ်ပေ။ ချူးယွင်ဖန်း စိုးရိမ်မိသည့်အရာမှာ လျို့မိသားစု ဘိုးဘေးကြီးသည် သူ့ကို မည်သူမျှ ရှာမတွေ့မီက ကောင်းမွန်စွာ ပုန်းအောင်းနေခဲ့သော်လည်း ယခုအခါ ပွင့်လင်းမြင်သာစွာ ထွက်လာခဲ့သည်။ ဆိုလိုရင်မှာ၊ ဤ "အရှင်" သည် မကြာမီ ထွက်ပေါ်လာတော့မည်ပုံပေါ်သည်။ သူ့တွင် မည်သို့သော ရည်ရွယ်ချက်မျိုးရှိပါစေ၊ စိတ်ရှည်သည်းခံမှုများ ပျောက်ဆုံးသွားပုံပေါ်သည်။

"ဟမ်း၊ ခင်ဗျားလည်း ခင်ဗျားအရှင် စွန့်ပစ်လိုက်တဲ့ နယ်ရုပ်တစ်ခုပါ။ ပြည်ထောင်စုကို ခင်ဗျား သစ္စာဖောက်ရင် ခင်ဗျားရဲ့ လျို့မိသားစုက ပြည်ထောင်စုအတွက် ဘာကောင်းကျိုးပေးနိုင်မှာလဲ။ သူတို့တွေ အမြစ်ပြတ်အရှင်းခံရမှာပဲ" ချူးယွင်ဖန်းက အေးစက်စွာ ပြောလိုက်သည်။

"မင်း ဘာသိလို့လဲ၊ ကျုပ် အရှင်ရဲ့ ကြီးမြတ်မှုက မင်း နားလည်နိုင်တဲ့ အရာမဟုတ်ဘူး။ ပြည်ထောင်စုက လျို့မိသားစုကို ထိရဲလို့ကတော့ ခင်ဗျားတို့ကို အကြိမ်တစ်ရာ လက်စားချေပစ်မယ်" လျို့မိသားစု ဘိုးဘေးကြီးက အေးစက်စွာ ပြောလိုက်သည်။

"ပြည်ထောင်စုကြီး ပျက်စီးသွားတဲ့အခါ လျို့မိသားစုက လူသားတွေရဲ့ ဘုရင်ဖြစ်လာလိမ့်မယ်။ အဲဒီအချိန်ကြရင် ပြည်ထောင်စုက ကျုပ်အရှင်ရဲ့ ဦးဆောင်မှုအောက်မှာ ရှိနေလိမ့်မယ်"

"ခင်ဗျားက ကိုယ်ဘာတွေပြောလို့ ပြောနေမှန်းတောင် မသိပုံပဲ။ ခင်ဗျားက ဦးနှောက်ဆေးခံထားရတဲ့ သနားစရာလူပဲ" ချူးယွင်ဖန်းက လှောင်ပြောင်၍ ပြောလိုက်သည်။

နတ်အဆင့်များသည် အင်အားကြီး ပုဂ္ဂိုလ်များဖြစ်ကြ၍ ၎င်းတို့၏ အစွမ်းသတ္တိများ ကွဲပြားခြင်းသည် ပုံမှန်သာဖြစ်သည်။ သို့ရာတွင်၊ ဤနတ်အဆင့်များသည် အခြားလူများ၏ နယ်ရုပ်များဖြစ်သည်အထိ ဦးနှောက်ဆေးကြောခြင်းခံခဲ့ရသည်။ ဤသည်မှာ ရယ်ဖွယ်ရာကောင်းလှသည်။

"မင်း ဘာပြောလိုက်တယ်" ချူးယွင်ဖန်းသည် သူ၏ အဓိကအချက်ကို ထိမိသွားသကဲ့သို့ လျို့မိသားစု ဘိုးဘေးကြီးက ချက်ချင်းပင် ဒေါသထွက်သွားသည်။

ဘုံး

လျို့မိသားစု ဘိုးဘေးကြီးသည် ချက်ချင်းပင် ဒေါသထွက်လာ၍ ချူးယွင်ဖန်းဆီ ချီတက်လိုက်သည်။ လျို့မိသားစု ဘိုးဘေးကြီး၏ အနောက်တွင် ရပ်နေသော အဏ္ဏဝါမျိုးနွယ်စုများနှင့် နတ်ဆိုးများသည်လည်း ချူးယွင်ဖန်းထံ ခုန်အုပ်လိုက်ကြသည်။ နတ်အဆင့်တစ်ဒါဇင်ကျော်သည် တစ်ချိန်တည်းမှာပင် သူ့ထံ ခုန်အုပ်လာကြသည်။

ချူးမိသားစု ဘိုးဘေးကြီးနှင့် ချူးဟောက်ယွဲ့သည် ချက်ချင်းပင် တင်းမာလာ၍ ၎င်းတို့ခန္ဓာကိုယ်တွင်းရှိ နတ်စွမ်းအင်များ ပေါင်းစည်းသွားကာ ချူးယွင်ဖန်း၏ ဦးဆောင်မှုနောက်သို့ လိုက်ရန် အသင့်ဖြစ်နေကြသည်။

ချူးယွင်ဖန်းက ရုတ်တရက် ထပြောလိုက်သည်။

"ဝင်တိုက်ခိုက်ဖို့ မလိုပါဘူး၊ နယ်နိမိတ်မျဉ်းကို ထိန်းချုပ်ပြီး ကျွန်တော့် အနောက်ကိုပဲ စောင့်ကြပ်ပေးပါ"

ချူးယွင်ဖန်းသည် သူ့ထံသို့ ကြောက်မက်ဖွယ် တိုက်ခိုက်မှုများ ဆက်တိုက် ရောက်ရှိလာသောအခါ လှောင်ရယ်လိုက်သည်။ ၎င်းတို့ အသီးသီးသည် ကောင်းကင်နှင့် ကမ္ဘာမြေကြီးရှိ ကြောက်မက်ဖွယ် အငွေ့အသက်များ သယ်ဆောင်လာခဲ့ရာ၊ ချိုင့်ဝှမ်းတစ်ခုလုံး ပြင်းထန်စွာ တုန်ခါသွားစေသည်။ သဲများနှင့် ကျောက်တုံးများ လွင့်ပျံနေကာ ကမ္ဘာကြီး နိဂုံးချုပ်သွားသကဲ့သို့ တိမ်မည်းများ ဆင်းသက်လာသည်။

သို့သော် ချူးယွင်ဖန်းက မကြောက်ရွံ့ပေ။ သူ၏ခန္ဓာကိုယ်ထဲရှိ အရောင်အဝါများ ပွက်ပွက်ဆူလာ၍ ချီနှင့် သွေးများ ကောင်းကင်ပေါ်သို့ မြင့်တက်လာသည်။ သူသည် ဒါဇင်နှင့်ချီသော နတ်အဆင့်များကို ရင်ဆိုင်ရာတွင် အနည်းငယ်မျှ အားနည်းချက်မရှိခဲ့ပေ။ ချူးယွင်ဖန်းသည် သူ၏လက်သီးကို ကျစ်ကျစ်ဆုပ်၍ ခန္ဓာကိုယ်ထဲရှိ နတ်စွမ်းအင်အားလုံးကို ထုတ်လွှတ်လိုက်သည်။ သူ၏လက်သီးချက်သည် သူ့အနောက်တွင် ရွှေရောင်အဆင်းရှိသော အသူရကာယ်တစ်ပါးကို ဖြစ်ပေါ်စေခဲ့သည်။

ဘုံး

ချူးယွင်ဖန်း၏ လက်သီးချက်များ အထပ်ထပ်အခါခါ ပျံ့နှံ့လာ၍ လက်သီးချက်ရောက်ရှိသည့် နေရာတိုင်းသည် အလွန် တောက်ပသွားလေသည်။ အသူရကာယ်၏ လက်သီးစွမ်းအင်များ ဖြတ်သန်းသွားသည့် နေရာတိုင်းတွင် ဒါဇင်ချီသော နတ်အဆင့်များ၏ တိုက်ခိုက်မှုများ ပြိုကွဲသွားလေသည်။ နတ်အဆင့်များ ပြုလုပ်ခဲ့သည့် တိုက်ခိုက်မှုအားလုံး ပြန့်ကျဲသွားခဲ့သည်။ ကျွမ်းကျင်သူများ၏ ချီတက်မှုများ ရပ်တန့်သွားကာ ၎င်းတို့ထံ တုံ့ပြန်မှုလှိုင်းလုံးများ ဖြတ်သန်းလာကြောင်း ခံစားလိုက်ရသည်။

၎င်းတို့၏ ရင်ဘတ်ကို ထိုတုံ့ပြန်မှုများ ထိမှန်လာ၍ ပါးစပ်မှ သွေးများ အန်ထွက်လာသည်။ လျို့မိသားစု ဘိုးဘေးကြီးသည် ခဏတာ ထိတ်လန့်သွားပြီးနောက် သူ၏မျက်လုံးများတွင် မယုံကြည်နိုင်ဖြစ်နေသော အရိပ်အမြွက်များ ထွက်ပေါ်လာသည်။ ချူးယွင်ဖန်း၏ လက်သီးတစ်ချက်သည် ၎င်းတို့၏ ဤတစ်ဒါဇင်ကျော်သော နတ်အဆင့်များကို အားနည်းချက်မရှိဘဲ တိုက်ခိုက်နိုင်မည်ဟု သူ မထင်မှတ်ထားပုံပေါ်သည်။

"ကျုပ် ခင်ဗျားကို အရင်သတ်မယ်" ချူးယွင်ဖန်းက အော်ဟစ်လိုက်သည်။

ချူးယွင်ဖန်းသည် လျို့မိသားစု ဘိုးဘေးကြီး၏ အရှေ့သို့ မည်သည့်အချိန်က ရောက်ရှိသွားသည်ကို မည်သူမျှ မသိကြပေ။ လျို့မိသားစု ဘိုးဘေးကြီးသည် သူ၏ လက်သီးကို ကျစ်ကျစ်ဆုပ်၍ ဟိန်းဟောက်လိုက်သည်။

ဘန်း

ဤလက်သီးချက်သည် ချူးယွင်ဖန်း၏ခန္ဓာကိုယ်ပေါ်သို့ ကျရောက်သွားသော်လည်း သူသည် ၎င်းကို တစ်ချက်မျှ ဂရုမစိုက်ခဲ့ပေ။ လက်သီးချက်သည် သူ၏ခန္ဓာကိုယ်ထံ ကျရောက်လာသည်နှင့် ပြန့်ကျဲထွက်သွားသောကြောင့် သူ့ကို အနည်းငယ်မျှ မထိခိုက်နိုင်ပေ။

"အား”

လျို့မိသားစု ဘိုးဘေးကြီးသည် အဆက်မပြတ် နောက်ဆုတ်နေစဉ် စူးရှစွာ အော်ဟစ်လိုက်သည်။ ချူးယွင်ဖန်း၏ခန္ဓာကိုယ်ပေါ်သို့ သူ၏လက်သီးချက်များ ကျရောက်သွားသောအခါ ပို၍ပင် ကြောက်မက်ဖွယ်ကောင်းသော အင်အားတစ်ခုဖြင့် ရိုက်ခတ်ခံလိုက်ရသည်။ သူ့လက်မောင်းတစ်ခုလုံး ရိုက်ခတ်ခံရပြီးနောက် ကြွက်သားများ လုံးလုံးလျားလျား ကွဲအက်ကာ သွေးများ ချက်ချင်း စီးကျလာသည်။

သူသည် ချူးယွင်ဖန်းနှင့် မယှဉ်နိုင်မှန်း သိသွားသောကြောင့် ချက်ချင်းပင် ပြန်ဆုတ်သွားခဲ့သည်။ သို့သော် ချူးယွင်ဖန်းသည် သူ့ကို မည်သို့ကြောင့် လွှတ်ပေးလိုက်မည်နည်း။ ချူးယွင်ဖန်းသည် လျို့မိသားစု ဘိုးဘေးကြီး၏ အနောက်သို့ လိုက်ကာ သူ၏မျက်နှာကို ရိုက်နှက်လိုက်သည်။

လျို့မိသားစု ဘိုးဘေးကြီးသည် ချူးယွင်ဖန်း၏ ချီစုစည်းမှု လက်ဖြင့် ထိမှန်သွားခဲ့သည်။ သူ၏ခန္ဓာကိုယ်တစ်ခုလုံး ပြင်းထန်စွာ တုန်လှုပ်သွားပြီးနောက် သူ့ထံသို့ ကြောက်မက်ဖွယ် စွမ်းအားတစ်ခု ဖြတ်သန်းလာလေသည်။ နာကျင်စွာ အော်ဟစ်ပြီးနောက် လျို့မိသားစု ဘိုးဘေးကြီး၏ ခန္ဓာကိုယ်သည် ချက်ချင်းပင် အပိုင်းပိုင်းကွဲအက်ကာ ကောင်းကင်ယံတွင် ပြည့်နှက်နေသည့် သွေးခဲများအဖြစ်သို့ ပြောင်းလဲသွားခဲ့သည်။ သူသည် ဆိုးရွားဖွယ် သေဆုံးသွားခဲ့သည်။

လျို့မိသားစု ဘိုးဘေးကြီး၏ တန်ပြန်တိုက်ခိုက်မှုမှ ချူးယွင်ဖန်း၏ တစ်ချက်တည်း ရိုက်ခတ်သောဖြစ်စဉ်အထိ အရာအားလုံး မြန်ဆန်စွာ ဖြစ်ပျက်သွားခဲ့သည်။ ထိုနေရာတွင် ရောက်ရှိနေသည့် မည်သူမျှ အချိန်မီ မတုံ့ပြန်နိုင်သည်အထိ မြန်ဆန်လှသည်။ မြင်ကွင်းတစ်ခုလုံး တိတ်ဆိတ်ငြိမ်သက်သွားလေသည်။

ချူးမိသားစု ဘိုးဘေးကြီးနှင့် ချူးဟောက်ယွဲ့တို့သည် လုံးလုံးလျားလျား အံ့သြသွားကြသည်။ ၎င်းတို့သည် ထိုဖြစ်စဉ်မျိုးကို ယခင်က မြင်တွေ့ဖူးသော်လည်း လျို့မိသားစု ဘိုးဘေးကြီးကို တစ်ချက်တည်း ရိုက်သတ်လိုက်သော ချူးယွင်ဖန်း၏ လုပ်ရပ်သည် ၎င်းတို့ကို တုန်လှုပ်သွားစေသည်။

ယန်ဖေးယန်၊ ကျူးပုဖျင်နှင့် အခြားလူများသည် ကျန်းမိသားစု ဘိုးဘေးကြီးကို ချူးယွင်ဖန်း သတ်ဖြတ်သည့်အချိန်ကို သတိရသွားကြသည်။ သူသည် ထိုအချိန်တွင် အလွန် ကြိုးစား၍ တိုက်ခိုက်ခဲ့ရသည်။ ယခုကဲ့သို့ လျို့မိသားစု ဘိုးဘေးကြီးကို ယင်ကောင်တစ်ကောင် သတ်ဖြတ်သည့်နှယ် အလွယ်တကူ သတ်ဖြတ်နိုင်ခြင်းနှင့် မတူပေ။ ချူးယွင်ဖန်း၏ လက်ရှိစွမ်းဆောင်ရည်သည် ယခင်ကထက် ပိုမိုပြင်းထန်လာ၍ သူ၏ အသွင်ကူးပြောင်းမှုသည် မကြာသေးမီကမှ ဖြစ်ပေါ်သွားပုံရသည်။

"အတင့်ရဲလို့"

ချူးယွင်ဖန်းသည် သူ့ရှေ့တွင် လျို့မိသားစု ဘိုးဘေးကြီးကို သတ်ဖြတ်ခဲ့ကြောင်း ငွေနှင်းမြူက နောက်ဆုံးတွင် သဘောပေါက်သွားသည်။ သူသည် လျို့မိသားစု ဘိုးဘေးကြီးကို အမှန်တကယ် ဂရုမစိုက်သော်လည်း ချူးယွင်ဖန်း၏ လုပ်ရပ်များသည် သူ့ကို ရန်စနေခြင်းဖြစ်ကြောင်း သိသာထင်ရှားသည်။

"ခင်ဗျားအလှည့် ရောက်လာမှာပါ။ သေချင်နေရင်တောင် အလျင်လိုနေစရာ မလိုဘူး" ချူးယွင်ဖန်းက လှောင်ရယ်၍ ပြောလိုက်သည်။ သူသည် သူ၏လက်ကို မြင့်တင်လိုက်သည်နှင့် သူ၏အနောက်ဘက်တွင် မရေတွက်နိုင်သော မိုးကြိုးသွားများ ချက်ချင်း စုစည်းလာသည်။ ၎င်းတို့သည် တခဏချင်းမှာပင် ဓား၊ လှံ၊ ပုဆိန်များများအပါအဝင် ဆယ့်ရှစ်မျိုးသော လက်နက်များအဖြစ် ပြောင်းလဲသွားကြသည်။

ဘုံး

ဘုံး

ဘုံး

ပြင်းထန်သော မိုးခြိမ်းသံများ ဆက်တိုက်ထွက်ပေါ်လာပြီးနောက် ဤလက်နက်များအားလုံးကို ပစ်လွှတ်လိုက်ရာ၊ ၎င်းတို့သည် ဒါဇင်ချီသော အဏ္ဏဝါမျိုးနွယ်စုများနှင့် နတ်ဆိုး ကျွမ်းကျင်သူများထံ မုန်တိုင်းတစ်ခုကဲ့သို့ ရောက်ရှိလာသည်။ ထိုအခါ အဏ္ဏဝါမျိုးနွယ်စုများနှင့် နတ်ဆိုးများအားလုံး ထိန်းချုပ်ခံရ၍ တခဏချင်း သတ်ဖြတ်ခံလိုက်ရ၏။

အခန်း (၁၀၇၃) ထောင်ချောက်တဲ့လား၊ ဟာသပဲ။ ငွေနှင်းမြူ

လှုပ်ရှားမှုတစ်ခုတည်းဖြင့် နတ်အဆင့် နတ်ဆိုးများနှင့် အဏ္ဏဝါမျိုးနွယ်များအားလုံး သေဆုံးသွားလေသည်။ ၎င်းတို့သည် လျို့မိသားစု ဘိုးဘေးကြီး၏ အဆုံးသတ်နှင့် ထူးမခြားနားပေ။ နတ်အဆင့် ကျွမ်းကျင်သူများသည် စျေးထဲရှိ ဂေါ်ဖီထုပ်များနှင့် ဆင်တူသည်။ မည်သည့် အဆင့်တွင် ရှိနေပါစေ၊ ၎င်းတို့အားလုံးသည် မကွာခြားလှပေ။ ၎င်းတို့သည် ချူးယွင်ဖန်း၏ လက်ရှိတိုက်ခိုက်မှုနှင့် ရင်ဆိုင်ချိန်တွင် တစ်ချက်တည်းသော ထိုးနှက်ချက်ကိုပင် ခံနိုင်ရည်မရှိခဲ့ပေ။

နေရာတစ်ခုလုံး ခဏတာမျှ တိတ်ဆိတ်ငြိမ်သက်သွားခဲ့သည်။ ချူးမိသားစု ဘိုးဘေးကြီးနှင့် ချူးဟောက်ယွဲ့တို့အပါအဝင် လူတိုင်းသည် လုံးလုံးလျားလျား အံ့ဩမှင်သက်သွားကြသည်။ ၎င်းတို့သည် နောက်ဆုံးတွင် ချူးယွင်ဖန်း ယခင်က ပြောခဲ့သည့် စကားများကို နားလည်သွားကြသည်။

"သူတို့တွေက စစ်မှန်တဲ့ အင်အားကို နားမလည်ကြပါဘူး"

ယခုအခါ နတ်ဆိုးများနှင့် အဏ္ဏဝါမျိုးနွယ်စုဝင်များသာမကဘဲ ၎င်းတို့လျှင်ပင် အစစ်အမှန် အင်အားကို မသိကြပုံပေါ်ပေ။ ၎င်းတို့သည် နတ်အဆင့် ကျွမ်းကျင်သူများဖြစ်ကြသောကြောင့် ယုတ္တိကျကျပြောရလျှင် ၎င်းတို့အားလုံးသည် နတ်အဆင့် စွမ်းအင်များကို အကောင်းဆုံး နားလည်ထားသူများဖြစ်သင့်သည်။ သို့ရာတွင်၊ ၎င်းတို့၏ ကျင့်ကြံမှု အဆင့်သည် နိမ့်ပါးလွန်းကြောင်း ယခုအချိန်မှ သဘောပေါက်လာသည့်အပြင် နတ်အဆင့် ကျွမ်းကျင်သူများ မည်သည့်အတိုင်းအတာအထိ လုပ်ဆောင်နိုင်သည်ကို ၎င်းတို့ မသိခဲ့ပုံပေါ်ပေ။

စစ်မှန်သော ထိပ်တန်းကျွမ်းကျင်သူတစ်ဦးသည် ကမ္ဘာကြီးတစ်ခုလုံးကို ဇောက်ထိုးမိုးမျှော်ဖြစ်သည်အထိ ပြောင်းလဲစေနိုင်သည်။ ၎င်းတို့သည် တစ်ချိန်တည်းမှာပင် အနှောက်အယှက်မှန်သမျှကို ၎င်းတို့ကိုယ်တိုင် တည်ငြိမ်အောင် လုပ်ဆောင်နိုင်ကြသည်။ ၎င်းတို့သည် ပြည်ထောင်စုအတွင်းနှင့် အပြင်ဘက်ရှိ အနှောက်အယှက်အားလုံးကို တည်ငြိမ်အောင် ထိန်းချုပ်နိုင်သည့် ပြည်ထောင်စု၏ သမ္မတကြီးနှင့် ဆင်တူသည်။

ယခုမူကား ချူးယွင်ဖန်းသည် သမ္မတနှင့် အလွန် ဆင်တူပေသည်။ ငွေနှင်းမြူသည် ယခုအချိန်တွင် ပေါက်ကရအပြုအမူများ ဆက်လက်၍ မပြုလုပ်တော့ပေ။ သူသည် ချူးယွင်ဖန်း စွမ်းဆောင်နိုင်သည့် ကြောက်မက်ဖွယ် ဖိအားများကို ခံစားရနိုင်သည်။ ချူးယွင်ဖန်းသည် ရိုးရှင်းသော တိုက်ခိုက်မှုဖြင့် သတ္တမမြောက်နှင့် အဌမမြောက်ရှိ နတ်အဆင့် ကျွမ်းကျင်သူများအပြင် နတ်အဆင့် ကျွမ်းကျင်သူဒါဇင်ကျော်ကို သတ်ဖြတ်ခဲ့သည်။

ဤအဏ္ဏဝါမျိုးနွယ်စုဝင်များနှင့် နတ်ဆိုး ကျွမ်းကျင်သူများသည် သာမန်ပုဂ္ဂိုလ်များ မဟုတ်ကြပေ။ သာမာန်နတ်အဆင့် ကျွမ်းကျင်သူများသည် ဤစစ်ဆင်ရေးတွင် ပါဝင်ရန် အရည်အချင်းမပြည့်မီကြပေ။ ငွေနှင်းမြူသည် ချူးယွင်ဖန်းကို လေးနက်သော အမူအရာဖြင့် စိုက်ကြည့်လိုက်သည်။ သူ၏ခန္ဓာကိုယ်ရှိ နတ်စွမ်းအင်များအားလုံး သူ၏ပတ်ဝန်းကျင်တွင် ပျံ့လွင့်ကာ ကြောက်မက်ဖွယ် ဒီရေလှိုင်းများအဖြစ် ပြောင်းလဲသွားလေသည်။ သူ့ခန္ဓာကိုယ်ထဲရှိ ချီနှင့် သွေးများ တစ်ဟုန်ထိုး မြင့်တက်လာသည်။

သူသည် လေထုကို ဖမ်းဆုပ်လိုက်သည်နှင့် ချက်ချင်းပင် ထူးခြားဆန်းကြယ်သော ပုဆိန်တစ်စင်း ပေါ်ထွက်လာသည်။ ဤပုဆိန်သည် မှော်လက်နက်ဖြစ်ရာ၊ နှင်းများကဲ့သို့ ဖြူဆွတ်နေသည့် အရိုးများဖြင့် ပြုလုပ်ထားခဲ့သည်။ ပို၍ တိကျစွာပြောရလျှင် ၎င်းကို သူ သတ်ဖြတ်ခဲ့သည့် နတ်ဆိုးသားရဲတစ်ကောင်၏ အရိုးများဖြင့် ဖန်တီးခဲ့ခြင်းဖြစ်သည်။

၎င်းတို့သည် အရိုးများဖြစ်ကြသော်လည်း မည်သို့သော သတ္တုများထက်မဆို ပို၍ခိုင်ခံ့ပေသည်။ ငွေနှင်းမြူသည် မတူညီသော နယ်ပယ်တစ်ခုသို့ ဝင်ရောက်လာသကဲ့သို့ အခြားလူများနှင့် လုံးလုံးလျားလျား မတူညီကြောင်း ချူးမိသားစု ဘိုးဘေးကြီးနှင့် ချူးဟောက်ယွဲ့တို့ပင် ချက်ချင်း ပြောနိုင်သည်။ ၎င်းတို့သည် ချူးယွင်ဖန်းအပေါ် ယုံကြည်မှုရှိသော်လည်း စိုးရိမ်ပူပန်နေဆဲဖြစ်သည်။

ချူးယွင်ဖန်းသည် ငွေနှင်းမြူကို သေသေချာချာ လေ့လာစီစစ်၍ စိုက်ကြည့်နေသည်။ ငွေနှင်းမြူသည် အခြားလူများနှင့် မတူညီပေ။ သူသည် ထိုလူများထက် ပို၍ သန်မာသည့်အပြင် နဝမမြောက် နတ်အဆင့်သို့လည်း ရောက်ရှိနေသူဖြစ်သည်။ သူသည် နတ်အဆင့်၏ အထွတ်အထိပ်သို့ ရောက်ရှိရန် လက်တစ်လုံးခြားသာ လိုအပ်ကောင်း လိုအပ်နိုင်သည်။

လက်ရှိ ပြည်ထောင်စုတွင် မည်သူကမျှ သူနှင့် မတိုက်ခိုက်နိုင်သည့်အပြင် သူနှင့် ယှဉ်နိုင်သူကို ရှာတွေ့ရန်လည်း ခက်ခဲသည်ဟု ဆိုနိုင်သည်။ သို့သော် သူသည် ကံမကောင်းစွာဖြင့် ချူးယွင်ဖန်းနှင့် တွေ့ဆုံခဲ့ရသည်။ ငွေနှင်းမြူသည် သတိလက်လွတ် မပြုမူဝံ့ပေ။ သူ၏ ပုဆိန်သည် ချက်ခြင်းပင် စွမ်းအင်များဖြင့် ဆူပွက်လာသည်။ သူသည် ၎င်းကို ဝှေ့ယမ်းလိုက်သည်နှင့် သံသတ္တုအချင်းချင်း ရိုက်ခတ်သံများ ထွက်ပေါ်လာသည်။ ၎င်းပေါ်တွင် ရေးထွင်းထားသော ငွေရောင် ဝံပုလွေသည် ချက်ခြင်းဆိုသလိုပင် ခုန်ထွက်၍ ချူးယွင်ဖန်းထံ ချီတက်လိုက်သည်။

ငွေနှင်းမြူသည် သူ၏ စွမ်းအင်ကို မထိန်းချုပ်ခဲ့ပေ၊ ထိုသို့ ပြုလုပ်ခဲ့ပါက သူ့ကို စောင့်ကြိုနေသည့်အရာသည် သေခြင်းတရားဖြစ်ကြောင်း သူ သိနေသည်။ ၎င်းစွမ်းအင် ကျရောက်လာသည်နှင့်တစ်ပြိုင်နက် သေစေနိုင်သော တိုက်ခိုက်မှုတစ်ခုဖြစ်လာ၍ ထိုကြောက်မက်ဖွယ် တိုက်ခိုက်မှုသည် လေထုကိုပင် ပြိုပျက်သွားစေသည်။ ချိုင့်ဝှမ်းရှိ လေထုတစ်ခုလုံး ပြိုကျကာ ကြောက်မက်ဖွယ်ရာ ဆိုင်ကလုန်းမုန်တိုင်းအသွင် ပြောင်းလဲသွားကြောင်း အဝေးမှပင် မြင်တွေ့နိုင်သည်။

ထိုအချိန်တွင် ချူးယွင်ဖန်းသည် အရှေ့သို့ ခြေတစ်လှမ်းတိုးကာ ပြိုလဲတော့မည့် လေထုကို အံ့ဖွယ်နည်းလမ်းဖြင့် တည်ငြိမ်အောင် ထိန်းချုပ်လိုက်သည်။ ပြီးနောက် လက်ငါးချောင်းကို ကျစ်ကျစ်ဆုပ်လိုက်ရာ၊ သူ၏ခန္ဓာကိုယ်တစ်ခုလုံး ရွှေရောင်အလင်းတန်းများဖြင့် လင်းလက်သွားလေသည်။ သူ၏လက်သီးစွမ်းအင်များ စုစည်းသွားပြီးနောက် တခဏချင်းပင် ပြန့်ကျဲလာ၍ ရွှေရောင်အသူရကာယ်အဖြစ် ပြောင်းလဲသွားခဲ့သည်။

ဘုံး

ငွေရောင်ဝံပုလွေနှင့် ရွှေရောင်အသူရကာယ်တို့သည် ကောင်းကင်ယံတွင် တိုက်မိသွားကြသည်။ တခဏချင်းမှာပင် ပြင်းထန်သော လှိုင်းလုံးကြီးများဖြစ်ပေါ်လာ၍ ချိုင့်ဝှမ်းကို ပြိုကျလုနီးပါးဖြစ်သွားစေသည်။ ချူးမိသားစု ဘိုးဘေးကြီးနှင့် ချူးဟောက်ယွဲ့တို့သည် အနားတွင် မနေဝံ့တော့ဘဲ အနောက်သို့ ဆုတ်ခွာသွားကြသည်။ ၎င်းတို့သည် နတ်အဆင့် ကျွမ်းကျင်သူများဖြစ်ကြသော်လည်း တိုက်ပွဲ၏ နောက်ဆက်တွဲ ရလဒ်သည် ၎င်းတို့အပေါ် ကြီးမားသော ဖိအားတစ်ခုဖြစ်စေခဲ့သည်။

၎င်းတို့၏ ဒဏ်ရာများသည် ပြင်းထန်နေပြီဖြစ်သောကြောင့် ကြောက်မက်ဖွယ် လှိုင်းလုံးများ၏ ဖိအားကို မခံနိုင်ကြပေ။ ကောင်းကင်ယံရှိ ငွေရောင်ဝံပုလွေသည် ၎င်း၏မေးရိုးကို ဖွင့်ဟကာ ရွှေရောင်အသူရကာယ်ကို မျိုချရန် ကြိုးစားလိုက်သည်။ သို့သော် ရွှေရောင်အသူရကာယ်၏ လက်သီးသည် ၎င်း၏ ပါးစပ်ထဲသို့ ရောက်ရှိလာကာ ငွေရောင်ဝံပုလွေကို ထိုးဖောက်သွားခဲ့သည်။

"မင်းက ဘယ်လိုလုပ် ဒီလောက် သန်မာနေတာလဲ"

ငွေနှင်းမြူသည် ၎င်းဖြစ်စဉ်ကို မယုံနိုင်ဖြစ်နေသည်။ ချူးယွင်ဖန်းသည် သူ၏ သိုင်းပညာဖြင့် ပြုလုပ်ထားသော စွမ်းအင်များကို လက်သီးတစ်ချက်တည်းဖြင့် ဖြိုခွင်းပစ်လိုက်သည်။ သူသည် ချူးယွင်ဖန်းကို မည်သည့်ခြိမ်းခြောက်မှုမှ မပြုလုပ်နိုင်ခဲ့ပေ။ သို့သော်လည်း သူ့တွင် စဉ်းစားရန်အတွက် အချိန်များစွာ မရှိပေ။ ချူးယွင်ဖန်း၏ လက်သီးချက် အရှိန်အဟုန်သည် မနှေးကွေးသွားခဲ့ပေ။ ရွှေရောင်အသူရကာယ်သည် ငွေရောင်ဝံပုလွေကို ထိုးဖောက်ဝင်ရောက်ပြီးနောက် သူ၏ ဦးတည်ရာသို့ ဆက်လက် ရောက်ရှိလာသည်။

"အား"

"သွားသေလိုက်" ငွေနှင်းမြူက ဟိန်းဟောက်လိုက်သည်။ သူ၏ခန္ဓာကိုယ်ရှိ အရောင်အဝါများအားလုံး မြင့်တက်လာကာ သူ့ကိုဝိုင်းရံထားသည့် ငွေရောင်ဝံပုလွေတစ်ကောင်အဖြစ် ပြောင်းလဲသွားပြီးနောက် ၎င်းသည် ရွှေရောင်အသူရကာယ်ထံ ချီတက်လာသည်။

ဘုံး

၎င်းတို့အချင်းချင်း ထိမိလိုက်သည်နှင့် ငွေရောင်ဝံပုလွေသည် လုံးလုံးလျားလျား မခုခံနိုင်ဘဲ အပိုင်းပိုင်း ကွဲထွက်သွားလေသည်။

ဘုံး

ငွေနှင်းမြူသည် ဤအခိုက်အတန့်တွင် နောက်ပြန်ဆုတ်ရန် နောက်ကျနေပြီဖြစ်သည်။ သူသည် လက်သီးချက်ကို ထိပ်တိုက်ရင်ဆိုရုံသာ တတ်နိုင်သည်။ ကြောက်မက်ဖွယ် တိုက်ခိုက်မှုသည် ကမ္ဘာမြေကို အင်္ဂါဂြိုဟ် ရုတ်တရက် ရိုက်ခတ်လာသကဲ့သို့ ထင်မှတ်ရစေသည်။ ငွေနှင်းမြူသည် အရှိန်အဟုန် ပြင်းထန်စွာ ဆုတ်ခွာသွားပြီးနောက် သူ့ရင်ဘတ်မှ သွေးများ လွင့်စဉ်လာသည်။ သူသည် ပြင်းထန်သော ထိုးနှက်မှုဒဏ်ကို ခံစားလိုက်ရသောကြောင့် ဆက်တိုက် ယိမ်းယိုင်နေခဲ့သည်။ သူ၏ပါးစပ်ထောင့်မှ သွေးများ စီးကျနေ၍ မြင်ကွင်းသည် အလွန်ကြောက်မက်ဖွယ်ကောင်းသည်။

"မင်းက ဘာလို့ဒီလောက်သန်မာနေတာလဲ" ငွေနှင်းမြူသည် ဆက်လက် ဟိန်းဟောက်နေခဲ့သည်။ သူ၏ သွေးများ ချီများနှင့် သူ၏ကိုယ်တွင်းအင်္ဂါများ တုန်ယင်နေသကဲ့သို့ ခံစားနေရသည်။

ချူးယွင်ဖန်းသည် တိုက်ခိုက်မှုတစ်ခုတည်းဖြင့် သူ့ကို ချေမှုန်းလိုက်သည်။

"ခင်ဗျားက ကျုပ်ကို တိုက်ခိုက်ဖို့ ရှောင်လွှဲလို့ မရနိုင်တဲ့ ထောင်ချောက်တစ်ခု တည်ဆောက်ချင်ထားတယ်တဲ့လား။ ရယ်စရာကောင်းလိုက်တာ။ စစ်မှန်တဲ့ ခွန်အားက ဘာလဲဆိုတာ ခင်ဗျား မသိဘူးပဲ" ချူးယွင်ဖန်းက လှောင်ရယ်ကာ ပြောလိုက်သည်။

ငွေနှင်းမြူ၏ ပြီးပြည့်စုံသော ကျော့ကွင်းသည် သူ၏မျက်လုံးထဲတွင် ဟာသတစ်ခုမျှသာဖြစ်သည်။ ချူးယွင်ဖန်းသည် နတ်ကုန်းမြေ၌ ရာနှင့်ချီသော နတ်အဆင့် ကျွမ်းကျင်သူများ၏ ဝိုင်းရံမှုကို ကြုံတွေ့ခဲ့ရသည်။ ထိုမြင်ကွင်းမျိုးသည် ကမ္ဘာကြီးကို ဖျက်ဆီးနိုင်သည့် ကြောက်မက်ဖွယ် စွမ်းအားတစ်ခုဖြစ်သည်။ ထို့ကြောင့် ဤဝိုင်းရံတိုက်ခိုက်မှုသည် ကလေးကစားစရာမျှသာဖြစ်သည်။

ထို့အပြင် ငွေနှင်းမြူ၏ စွမ်းအားသည် နတ်ကုန်းမြေရှိ အင်အားစုကြီးသုံးခု၏ ခေါင်းဆောင်များထက် အနည်းငယ် အားနည်းပေသည်။ ငွေနှင်းမြူသည် အလွန်ဒေါသထွက်နေသည်၊ သူသည် ချူးယွင်ဖန်း၏ လက်သီးတစ်ချက်တည်းဖြင့် ဒဏ်ရာရှိခဲ့သည်။ ထို့ကြောင့် သူ့ခန္ဓာကိုယ်ထဲရှိ နတ်စွမ်းအင်အားလုံးကို စုစည်းရန်မှတစ်ပါး ရွေးချယ်စရာမရှိပေ။ သူသည် ကျယ်လောင်သော ဟိန်းဟောက်သံနှင့်အတူ သူ၏လက်ထဲရှိ ပုဆိန်ဖြင့် တိုက်ခိုက်လိုက်ပြန်သည်။

ချူးယွင်ဖန်းသည် ထိုအချိန်တွင် ကမ္ဘာပေါ်ရှိ ဝိညာဉ်စွမ်းအင်အားလုံးက သူ့ကို ငြင်းပယ်နေသကဲ့သို့ ခံစားလိုက်ရသည်၊ ငွေနှင်းမြူသည် သူ့ကို ရုန်းမရအောင် ပိတ်လှောင်ထားခဲ့သည်။ သို့သော် အရှေ့သို့ ခြေတစ်လှမ်း လှမ်းလိုက်ရုံဖြင့် ပိတ်ဆို့မှုများ လုံးလုံးလျားလျား ပြိုကျသွားလေသည်။

ဘုံး

ချူးယွင်ဖန်းသည် ရွှေရောင်ငှက်အသွင် ပြောင်းလဲပြီးနောက် ဟင်းလင်းပြင်ကို ဖြတ်သန်းကာ ပုဆိန်တိုက်ခိုက်မှုကို တားဆီးလိုက်သည်။

ဘန်း

ပုဆိန်သည် ငွေနှင်းမြူ၏လက်ထဲမှ လွင့်ပျံထွက်သွား၍ လေထုထဲတွင် ကွဲအက်သွားလေ၏။ ငွေနှင်းမြူသည်လည်း ရွှေရောင်ငှက်ကြီးဖြင့် ထိမှန်သွားပြီးနောက် ခန္ဓာကိုယ်တစ်ခုလုံး ပေါက်ကွဲသွားခဲ့သည်။ သူသည် ပွဲချင်းပြီး သေဆုံးသွားလေ၏။

အခန်း (၁၀၇၄) ရိုက်နှက်ခံရမှုကြောင့် ၎င်းတို့၏ မျက်နှာများ ရောင်ရမ်းနေခြင်း

“တစ်ချက်တည်း ထိုးတာကိုတောင် မခံနိုင်ကြဘူး”

ငွေနှင်းမြူကို သတ်ဖြတ်ခြင်းသည် ချူးယွင်ဖန်းအတွက် ဂုဏ်ယူစရာ မဟုတ်ပေ။ ယခင်အချိန်ကဆိုလျှင် အလွန် ကြိုးစားခဲ့ရမည်ဖြစ်သော်လည်း ယခုအခါ ငွေနှင်းမြူကို စက္ကန့်အနည်းငယ်အတွင်း သတ်ဖြတ်နိုင်ပြီဖြစ်သည်။ ချူးယွင်ဖန်း၏ ခွန်အားသည် ဝိညာဉ်ကျောက်မိုင်းအတွင်းရှိ နဂါးဝိညာဉ်ကို စုပ်ယူပြီးနောက် အလွန်တိုးတက်လာသည်။ ယခင်ကနှင့် နှိုင်းယှဉ်လျှင် အလွန် ကြီးကျယ်ခမ်းနားစွာ ပြောင်းလဲသွားပြီဖြစ်သည်။

“သူ လုပ်နိုင်ခဲ့တယ်…”

ယန်ဖေးယန်၊ ကျူးပုဖျင်နှင့် ချိုင့်ဝှမ်းရှိ အခြားလူများသည် လုံးလုံးလျားလျား မယုံနိုင်ဖြစ်နေပုံရသည်။ ချူးယွင်ဖန်းကို ယုံကြည်မှုအရှိဆုံး ယန်ဖေးယန်လျှင်ပင် ချူးယွင်ဖန်းသည် ငွေနှင်းမြူကို အလွယ်တကူသတ်ပစ်နိုင်မည်ဟု မထင်မှတ်ထားခဲ့ပေ။

"အံ့သြစရာပဲ။ ဖေးယန်၊ မင်းရဲ့မြေးက နဂါးတစ်ကောင်ဖြစ်လာပြီ" ကျူးပုဖျင်က ယန်ဖေးယန် ကို ကြည့်၍ ပြောလိုက်သည်။ သူသည် အနည်းငယ်မျှ မနာလိုဖြစ်နေမိသည်။ သူ၏ မျိုးဆက်ရှိ လူငယ်များသည် ချူးယွင်ဖန်းနှင့် နှိုင်းယှဥ်မည်ဆိုလျှင် မပြောပါ့လောက်သည့်အပြင် အမှိုက်များဟုပင် ဆိုနိုင်သည်။

၎င်းတို့၏ အသက်အရွယ်တွင် အလားအလာရှိသော ဂျူနီယာတစ်ယောက်ရှိခြင်းထက် မည်သည့်ကမျှ ပို၍ ကျေနပ်ဖွယ်ကောင်းမည် မဟုတ်ပေ။ ယန်ဖေးယန်သည် ပြုံး၍သာ ခေါင်းညိတ်လိုက်သည်။ ချူးယွင်ဖန်းသည် ခဏအကြာတွင် ချိုင့်ဝှမ်းထဲသို့ ဆင်းသက်လာသည်။

"ချူးယွင်ဖန်းရေ၊ မင်းကြောင့်သာ မဟုတ်ရင် ဒီကပ်ဆိုးကြီးကနေ မလွတ်မြောက်နိုင်မှာကို ကျုပ် စိုးရိမ်မိတယ်" ကျူးပုဖျင်က ကျေးဇူးတင်စွာ ပြောလိုက်သည်။

"ဘာမှမဖြစ်ပါဘူး၊ ကျွန်တော်က လုပ်သင့် လုပ်ထိုက်တာကိုပဲ လုပ်ခဲ့တာပါ" ချူးယွင်ဖန်းက ပြောလိုက်သည်။

"ယွင်ဖန်း၊ မင်း ကျုပ်တို့လူအိုကြီးတွေ အတွက် စိတ်ပူစရာ မလိုဘူး။ မင်း ငွေနှင်းမြူကို သတ်ပြီးပြီဆိုတော့ ကျုပ်တို့တွေ ဘာအန္တရာယ်မှ မရှိတော့ဘူး။ မင်း ဟိုကလေးမ စီယုကိုသာ အမြန်သွားကယ်ချေ" ယန်ဖေးယန်က ပြောလာသည်။

"စီယု ဘယ်မှာလဲဆိုတာ အဘိုး သိတယ်လား" ချူးယွင်ဖန်းက မေးလိုက်သည်။

"ဟုတ်တယ်၊ အဘိုးတို့တွေ အစတုန်းက အတူတူ လှုပ်ရှားနေကြပေမယ့် နောက်တော့ လူစုကွဲသွားတာ။ ဒါပေမယ့် သူ ဘယ်မှာလဲဆိုတာတော့ အဘိုး သိတယ်။ သူ ဒီလျှို့ဝှက်မြေရဲ့ အနက်ရှိုင်းဆုံး နေရာမှာရှိနေပြီး ဗြဟ္မာသစ်ပင်ရဲ့ ဦးတည်ရာကို သွားနေတယ်" ယန်ဖေးယန်က ပြောသည်။

"မှန်တယ်၊ ကျုပ်တို့မှာ ဘာအန္တရာယ်မှ မရှိလောက်တော့ဘူး။ အဏ္ဏဝါမျိုးနွယ်စုတွေနဲ့ နတ်ဆိုးတွေမှာ ကျွမ်းကျင်သူတွေ အများကြီးရှိပေမယ့် အများစုက ဗြဟ္မာသစ်ပင်ရှိတဲ့ နေရာကို အာရုံစိုက်နေလောက်တယ်" ကျူးပုဖျင်က ပြောလေသည်။

"ဟုတ်တယ်။ အခု စီယု ဘယ်မှာလဲဆိုတာ သိပြီဆိုတော့ မင်း သူ့ဆီ ချက်ချင်း သွားသင့်တယ်။ ကျုပ်တို့က အဖွဲ့လိုက်ဆိုတော့ အဆင်ပြေမှာပါ" ချူးမိသားစု ဘိုးဘေးကြီးက ဆက်ပြောလိုက်သည်။

"ဒီအစီအစဉ်က ကောင်းပါတယ်။ ဒါဆိုရင် ဒီမှာ မနေတော့ဘဲ မြန်မြန် ထွက်သွားကြပါ" ချူးယွင်ဖန်းက ပြောလ်ုက်သည်။

“ကောင်းပြီ"

အားလုံးက အလျင်အမြန် ခေါင်းညိတ်လိုက်ကြသည်။ ၎င်းတို့သည် ဤနေရာတွင် ဆက်နေထိုင်ရန် အမှန်တကယ် မသင့်တော်ပေ။ လူတိုင်းသည် ချူးယွင်ဖန်းအတွက် လမ်းညွှန်လိုက်ကြသည်။ သူသည် ကုသဆေးအချို့ကို ချန်ရစ်ပြီးနောက် အပျက်အစီး၏ အနက်ရှိုင်းဆုံးနေရာဆီသို့ ပျံသန်းသွားခဲ့သည်။

တစ်ချိန်တည်းမှာပင်၊ အင်တာနက်ပေါ်တွင် ချူးယွင်ဖန်းအကြောင်း ဆွေးနွေးမှုများ ပိုမိုပြင်းထန်လာသည်။ လူအများအပြားသည် ချူးယွင်ဖန်းတစ်ခုခုဖြစ်သွားမည်ကို စိုးရိမ်နေကြသည်။ မည်သို့ပင်ဆိုစေကာမူ ချိုင့်ဝှမ်းရှိ အဖြစ်အပျက်သည် ထောင်ချောက်တစ်ခုဖြစ်ကြောင်း သိသာထင်ရှားသည်။ ချူးယွင်ဖန်းသာ ထိုထောင်ချောက်အတွင်း ပြုတ်ကျသွားပါက ကိုယ့်သေတွင်းကိုယ်တူးနေသကဲ့သို့ ဖြစ်သွားပေလိမ့်မည်။

"ချူးယွင်ဖန်းသာ အဲ့ဒီ့ကို သွားမယ်ဆိုရင် သေခြင်းတရားကနေ မလွတ်မြောက်နိုင်မှာကို စိုးရိမ်မိတယ်"

"ဟာ၊ သူ့ကို သွားစေချင်ပေမယ့် သွားလည်း မသွားစေချင်ဘူး။ ဒွိဟဖြစ်လွန်းတယ်"

"ကြီးမြတ်ခြင်းချူးက အင်အားကြီးပေမယ့် ဒါက ထောင်ချောက်တစ်ခုဆိုတာ အသိသာကြီး။ ဒီတော့ သူဆိုရင်တောင် ဒီကိစ္စကို ကိုင်တွယ်ရ ခက်ခဲလိမ့်မယ်"

တစ်ချိန်တည်းမှာပင်၊ အဏ္ဏဝါမျိုးနွယ်စုဝင်များနှင့် နတ်ဆိုးများသည် အင်တာနက်ပေါ်တွင် ပြဿနာများ ဖြစ်ပွားစေရန် လှုံ့ဆော်နေကြသည်။

"ချူးယွင်ဖန်းတော့ သေပြီပဲ။ ဟားဟား၊ ငွေနှင်းမြူက ငွေလမင်းတိုင်းပြည်ရဲ့ စစ်ဗိုလ်ချုပ်လေ၊ သူ ဘယ်လိုလုပ် လွတ်မြောက်နိုင်မှာလဲ"

"သေချာတာပေါ့၊ ဒါပေမယ့် သူ မသွားရဲလောက်ဘူး ထင်တယ်နော်။ ဟားဟားဟား"

"ကျုပ်လည်း အဲ့လိုပဲ ထင်တယ်။ သူ မသွားရဲလောက်ပါဘူး"

ဤလူများက ခုန်ပေါက် သောင်းကျန်းနေကြစဉ် ချူးယွင်ဖန်း၏အကောင့်တွင် စကားလုံးအနည်းငယ် ထပ်မံ ပေါ်ပေါက်လာပြန်သည်။

“ဒီမှာ ခင်ဗျားတို့ရဲ့ စစ်ဗိုလ်ချုပ်”

ပြီးနောက် ဓာတ်ပုံများ ဆက်တိုက်တင်လိုက်လေသည်။ မြေပြင်၌ အဏ္ဏဝါမျိုးနွယ်စုဝင်များနှင့် နတ်ဆိုးများ၏ အလောင်းများဖြင့် ပြည့်နှက်နေသည်။ ခဏတာ တိတ်ဆိတ်သွားပြီးနောက် အင်တာနက်တစ်ခုလုံး ဗလောင်ဆူသွားပြန်သည်။ လူသားများသည် ဓာတ်ပုံများအတွက် အားပေးအားမြှောက် ပြုလုပ်နေကြသည်။

၎င်းတို့သည် ထိုနေရာသို့ ချူးယွင်ဖန်း သွားရောက်ခဲ့လျှင် ထောင်ချောက်ထဲသို့ ကျရောက်သွားမည်ကို ယခင်က စိုးရိမ်ခဲ့ကြသည်။ ယခုမူ သူသည် သွားရောက်ခဲ့ရုံသာမကဘဲ ဝန်းရံတိုက်ခိုက်မှုကိုလည်း ဖြတ်ကျော်နိုင်ခဲ့သည်။ မြေပြင်ရှိ အလောင်းများကို ကြည့်ခြင်းအားဖြင့် တိုက်ပွဲ၏ ရလဒ်သည် ရှင်းလင်းလှသည်။ မည်သူက အနိုင်ရရှိ၍ မည်သူက ရှုံးနိမ့်သွားသည်မှာ သိသာထင်ရှားသည်။ ချူးယွင်ဖန်းသည် တစ်ဖန်အနိုင်ရ၍ ထောင်ချောက် ပြုလုပ်ခဲ့သော အဏ္ဏဝါမျိုးနွယ်စုဝင်များနှင့် နတ်ဆိုးများ သေဆုံးသွားကာ ၎င်းတို့၏ သွေးများသည် မြစ်တစ်စင်းကဲ့သို့ စီးဆင်းခဲ့ရသည်။

"ဟာဟားဟား။ ကြီးမြတ်ခြင်းချူးကတော့ မျှော်လင့်ထားတဲ့အတိုင်းပဲ။ အရင်က ကျုပ်တို့ရဲ့ စိုးရိမ်မှုတွေက လုံးဝ မလိုအပ်တာတွေပဲ။ သူ့မျက်လုံးထဲမှာတော့ ဒီအဏ္ဏဝါမျိုးနွယ်ဝင်တွေနဲ့ နတ်ဆိုးတွေက ရွှံ့ရုပ်သာသာပဲရှိတာ"

"ဟုတ်တယ်။ ကျုပ်တို့တွေ သူတို့ကို လျော့တွက်ထားတာပဲ"

"အရင်က အဏ္ဏဝါမျိုးနွယ်ဝင်တွေနဲ့ နတ်ဆိုးတွေ မောက်မာနေကြတာ မဟုတ်ဘူးလား။ အခုရော ဘယ်လိုလဲ၊ ကြီးမြတ်ခြင်းချူးက သူတို့အားလုံးကို သတ်ပစ်လိုက်ပြီ"

အင်တာနက်တစ်ခုလုံးသည် ရွှင်မြူးမှုအခြေအနေတွင် တည်ရှိနေသည်။ မူလက အလွန်မောက်မာသော အဏ္ဏဝါမျိုးနွယ်စုများနှင့် နတ်ဆိုးများ၏ အကောင့်များသည် ရုတ်တရက် တိတ်ဆိတ်သွားကြသည်။ ယခင် ခုန်ပေါက် သောင်းကျန်းချိန်က ၎င်းတို့၏ မောက်မာ၍ ကြီးစိုးသော အပြုအမူများ မရှိတော့ပေ။ တချို့ကပင် အလွန် အံ့သြမှင်သက်နေကြသည်။

ချူးယွင်ဖန်းသည် မည်သို့ကြောင့် ဤမျှ အင်အားကြီးနေသည်ကို ၎င်းတို့ နားမလည်ကြပေ။ ဤဖြစ်စဉ်သည် ၎င်းတို့ ယခင်က သိရှိထားသည့် အကြောင်းအရာနှင့် လုံးလုံးလျားလျား မတူညီပေ။ ချူးယွင်ဖန်းသည် ၎င်းတို့ထင်ထားသည်ထက် အလွန် သန်မာနေသည်။

ချူးယွင်ဖန်းသည် ၎င်းတို့၏ မောက်မာမှုများကို ၎င်းတို့၏ မျက်နှာထံ အဖန်ဖန် ပြန်လည်ပစ်ပေါက်ခဲ့သောကြောင့် မည်သို့ပြုမူရမည်ကို မသိကြတော့ပေ။

၎င်းတို့၏ မောက်မာမှုများသည် ပြည်ထောင်စု၏ ကျွမ်းကျင်သူများကို သုတ်သင်ပစ်တော့မည်ဟူသော အချက်အပေါ်တွင် တည်ဆောက်ထားကြသည်။ သို့သော် ယခုအခါ အခြေအနေများ လုံးလုံးလျားလျား ပြောင်းပြန်ဖြစ်သွားလေသည်။ ၎င်းတို့၏မျှော်လင့်ချက်များကို ပုံအပ်ထားသည့် အဏ္ဏဝါမျိုးနွယ်စုများနှင့် နတ်ဆိုး ကျွမ်းကျင်သူများကို ချူးယွင်ဖန်းက သတ်ဖြတ်ခဲ့သည်။

ပြည်ထောင်စုအတွင်းရှိ လူတိုင်းသည် ကနဦးတွင် ထိတ်လန့်တုန်လှုပ်နေကြသည်။ ယခုအခါ အဏ္ဏဝါမျိုးနွယ်စုများနှင့် နတ်ဆိုးများ အထိတ်တလန့် ဖြစ်ရမည့်အလှည့်သို့ ရောက်ရှိလာသည်။ အထူးသဖြင့် ဤအဖြစ်အပျက်များကြားရှိ အချိန်ကာလသည် အလွန်တိုတောင်းလှသည်။ ချူးယွင်ဖန်းသည် နေ့တစ်ဝက်ပင် မပြည့်သေးဘဲ ကျွမ်းကျင်သူများစွာကို သတ်ဖြတ်ခဲ့ပြီးပြီဖြစ်သည်။ ကျဆုံးသွားသည့် နတ်အဆင့် ကျွမ်းကျင်သူ အရေအတွက်သည် အယောက် နှစ်ဆယ်ကျော်ရှိနေသည်။

ကျွမ်းကျင်သူများစွာရှိသည့် အဏ္ဏဝါမျိုးနွယ်စုများနှင့် နတ်ဆိုးများသည် ကျွမ်းကျင်သူများစွာကို တစ်ရှိုက်တည်း ဆုံးရှုံးလိုက်ရသည်။ အထူးသဖြင့် စတုတ္ထမြောက် နတ်အဆင့်ထက်ရှိနေသည့် ထူးချွန်သူများကို ဆုံးရှုံးခဲ့ရသည်။ ၎င်းတို့အားလုံးသည် သာလွန်ထူးကဲသော နတ်အဆင့် ကျွမ်းကျင်သူများဖြစ်ကြသည်။

ဤဆုံးရှုံးမှုသည် သာမန် နတ်အဆင့်ကျွမ်းကျင်သူ အယောက်လေးဆယ် ငါးဆယ်ကို ဆုံးရှုံးခြင်းထက်ပင် ကြီးမားပေသည်၊ အကြောင်းမှာ ဤအဆင့်ရှိ ကျွမ်းကျင်သူတစ်ဦးစီ၏ ဖွားမြင်မှုနောက်ကွယ်တွင် အဆိပ်ရှိ အင်းဆက်များကို မွေးမြူခြင်းသကဲ့သို့ သတ်ဖြတ်မှုများစွာ လိုက်ပါနေသောကြောင့်ဖြစ်သည်။ အဆိပ်ရှိ အင်းဆက် အရှင်ဘုရင်၏ ထောက်ခံမှုကို ရရှိသူသာလျှင် နတ်အဆင့်ဖြစ်လာမည်ဖြစ်သည်။

တခဏတာအတွင်း နတ်ဆိုးများနှင့် အဏ္ဏဝါမျိုးနွယ်ဝင်များအားလုံး နှုတ်ဆိတ်နေကြသည်။ ၎င်းတို့သည် ကနဦးတွင် ပြည်ထောင်စု၏ ကျွမ်းကျင်သူများကို သတ်ပစ်ကာ ပြည်ထောင်စု၏ မျှော်လင့်ချက်အားလုံးကို ဖျက်ဆီးပစ်ရန် ကြံစည်ခဲ့ကြသည်။ ယခုမူ ချူးယွင်ဖန်းသည် အဏ္ဏဝါမျိုးနွယ်စုများနှင့် နတ်ဆိုး ကျွမ်းကျင်သူများစွာကို ဆက်တိုက်သတ်ပစ်ခဲ့သည်။ ထိုနတ်အဆင့်များသည် မိမိတို့သက်ဆိုင်ရာ မျိုးနွယ်စုနှင့် တိုင်းပြည်များ၏ မဏ္ဍိုင်များဖြစ်ကြသောကြောင်း ၎င်းတို့၏မျက်နှာများ ပူထူနေသည်ဟု လူတိုင်း ခံစားနေရသည်။

ချူးယွင်ဖန်း၏ သတ်ဖြတ်မှုကို ခံရပြီးနောက် အဏ္ဏဝါမျိုးနွယ်ဝင်များနှင့် နတ်ဆိုးများ၏ မျိုးနွယ်စုအသီးသီးသည် ကောင်းကင်နှင့် မြေကြီးများ ပြိုကျသွားသကဲ့သို့ ခံစားလိုက်ရသည်။ ၎င်းတို့သည် အချိန်အတိုင်းအတာတစ်ခုထိ ဆွံ့အသွားကြသည်။ အင်တာနက်တစ်ခုလုံးသည် ရေခဲကမ္ဘာနှင့် မီးလျှံကမ္ဘာကြီးဖြစ်လာခဲ့လေသည်။ သို့သော် အခြေအနေသည် ယခင်ကနှင့် လုံးလုံးလျားလျား ကွဲပြားနေ၏။