အခန်း (၁၀၇၈-၁၀၈၀)

အခန်း (၁၀၇၈) ချူးယွင်ဖန်း အစုလိုက်အပြုံလိုက် သတ်ဖြတ်နေခြင်း

"ကျုပ်ကို သတ်မယ်တဲ့လား။ ဟားဟားဟား၊ ပြောနေတဲ့ပုံစံက မသိရင် လုပ်နိုင်မှာကြနေတာပဲ" ချူးယွင်ဖန်းက ဟက်ဟက်ပက်ပက် ရယ်မောလိုက်သည်။

"ခင်ဗျားတို့အဖွဲ့အစည်းက ကျုပ်ကို ခဏခဏ ဒုက္ခပေးပြီး ကျုပ်အသက်ကို အကြိမ်ကြိမ် အန္တရာယ်ပေးခဲ့တယ်။ ခင်ဗျားတို့အားလုံးကို မဖျက်ဆီးရင် ကျုပ်ရင်ထဲက အမုန်းတွေကို ဘယ်လိုလုပ် ဖြေဖျောက်နိုင်မှာလဲ"

ဤနတ်ကျွန်အဖွဲ့အစည်းသည် ချူးယွင်ဖန်းကို အကြိမ်ကြိမ် ဒုက္ခပေးရန် ကြိုးစားခဲ့ကြသည်။ သတ္တမမြောက် နတ်ကျွန် ပေါ်လာချိန်မှစ၍ ချူးယွင်ဖန်း၏ဘဝသည် အန္တရာယ်များနှင့် ပြည့်နှက်နေခဲ့သည်။ သတ္တမမြောက် နတ်ကျွန်ကို ထွက်ပြေးသွားစေရန်အတွက် ကျန်းမိသားစုကသာ နျူကလီးယားဗုံး အသုံးမပြုခဲ့ပါက ချူးယွင်ဖန်းသည် ပြင်းထန်သော တိုက်ပွဲတွင် ပါဝင်ဆင်နွှဲရနိုင်သည်။ လွတ်မြောက်နိုင်မည်ဟု ယုံကြည်သော်လည်း ထိုအချိန်က သူ၏ ကျင့်ကြံမှုသည် သတ္တမမြောက် နတ်ကျွန်ထက် များစွာ အားနည်းနေသည်။

"ဒီနေ့ မင်း သေရလိမ့်မယ်" ဘုရင်ယန်သည် ကျယ်လောင်စွာ အော်လိုက်သည်နှင့် သူ၏ခန္ဓာကိုယ်အတွင်းရှိ အရောင်အဝါများ ပွက်ပွက်ဆူလာသည်။

"အဲဒါမတိုင်ခင် နေရာကို အရင်ရှင်းရအောင်”

ချူးယွင်ဖန်း၏ အသံကျရောက်သွားသည်နှင့် သူသည် ရပ်တန့်နေသည့် နေရာမှ ရုတ်တရက် ပျောက်ကွယ်သွားခဲ့သည်။ အာရုံစူးစိုက်မှုအပြည့်ဖြင့် စောင့်ကြည့်နေကြသော နတ်ဆိုးများသည် ၎င်းတို့အရှေ့တွင် ချူးယွင်ဖန်း ပေါ်လာကြောင်း ရုတ်တရက် သိရှိလိုက်ရသည်။

ပုံရိပ်ကိုးသွယ်ရွေ့လျားခြင်း— ခြေတစ်လှမ်းဖြင့် ကောင်းကင်ဘုံသို့ တက်လှမ်းခြင်း

ချူးယွင်ဖန်း၏အနောက်တွင် မိုးကြိုးအတောင်ပံတစ်စုံ ဖြန့်ကျက်ထားသောကြောင့် သူ့ကို နတ်ဘုရားတစ်ပါးကဲ့သို့ ထင်မှတ်ရစေသည်။ သူသည် လက်ထဲတွင် မိုးကြိုးဓားကို ကိုင်ဆောင်ထားခဲ့သည်။ ဓားကို ဝှေ့ယမ်းလိုက်သည်နှင့် ကြောက်မက်ဖွယ် ဓားအလင်းတစ်ခု ချက်ချင်းပင် ထွက်ပေါ်လာသည်။

နတ်ဆိုးကျွမ်းကျင်သူတစ်ဦးသည် တုံ့ပြန်ချိန်ပင် မရလိုက်ပေ။ သူ့အရှေ့တွင် ဖန်တီးထားသော အတားအဆီးအလွှာများသည် စက္ကူတစ်ရွက်ကဲ့သို့ ချက်ခြင်းပင် ကွဲထွက်သွားလေသည်။ ဤနတ်အဆင့် နတ်ဆိုးသည် တုံ့ပြန်ရန်အချိန်ပင် မရလိုက်ဘဲ ချူးယွင်ဖန်း၏ဓားချက်ဖြင့် ထက်ပိုင်း ဖြတ်တောက်ခံလိုက်ရ၏။ သူသည် ချူးယွင်ဖန်း၏ဓားအလင်းရောင်ကို မတားဆီးနိုင်ခဲ့ပေ။

"ချီးပဲ" နဂါးဖြူသည် ဒေါသတကြီး အော်ဟစ်လိုက်သည်။ ဘုရင်ယန်ကို တိုက်ခိုက်တော့မည့် ချူးယွင်ဖန်းသည် ရုတ်တရက် လှည့်လာ၍ နတ်ဆိုးများကို တိုက်ခိုက်လိမ့်မည်ဟု သူ မထင်မှတ်ခဲ့ပေ။

ချူးယွင်ဖန်း၏ သဘောထားသည် စာအုပ်တစ်အုပ်ကို လှန်လှောခြင်းထက် မြန်ဆန်စွာ ပြောင်းလဲနေသည်။ နဂါးဖြူနှင့် ဘုရင်ယန်တို့သည် ဒေါသထွက်နေသော အမူအရာဖြင့် ချူးယွင်ဖန်း အနောက်သို့ လိုက်ပါကာ သူ့ကို တားဆီးရန် ကြိုးစားလိုက်ကြသည်။

"ခင်ဗျားတို့ အင်အားလောက်နဲ့ ကျုပ်ကို တားချင်တာလား" ချူးယွင်ဖန်းက လှောင်ရယ်လိုက်သည်။

ချူးယွင်ဖန်း၏ ခန္ဓာကိုယ်သည် တဖျပ်ဖျပ် လှုပ်ခတ်သွားပြီးနောက် ပုံရိပ်ကိုးခု ပေါ်ပေါက်လာသည်။ ၎င်းတို့ထဲရှိ တစ်ဦးချင်းစီသည် နတ်ဆိုးများထံ ဦးတည်နေကြသည်။

ပုံရိပ်ကိုးသွယ်ကိုယ်ပွါးရွေ့ရှားမှု နည်းစနစ်။

ချူးယွင်ဖန်းသည် ဤရွေ့ရှားမှု သိုင်းပညာကို နတ်ဘုရားကဲ့သို့သော အဆင့်အထိ ကျင့်ကြံခဲ့သည်။ ၎င်းသည် သိုင်းပညာရပ်တစ်ခုအဖြစ်မှ ကွဲထွက်သွားကာ နတ်အဆင့်သို့ မြင့်တက်သွားခဲ့သည်။ ချူးယွင်ဖန်း၏ အရှိန်အဟုန်သည် အလွန် မြန်ဆန်လှသည်။ ချူးယွင်ဖန်း၏ ပုံရိပ်ကိုးခုသည် ၎င်းတို့၏ တိုက်ခိုက်မှုများကို တစ်ပြိုင်နက်တည်း စတင်လိုက်ကြသည်။

ဓားအလင်းရောင်သည် နတ်ဆိုးများ၏ ခံစစ်အတားအဆီးများကို ချက်ချင်း ဖြတ်ကျော်သွားလေ၏။ ၎င်းတို့၏ ခံစစ်အတားအဆီးများသည် ချူးယွင်ဖန်း၏ ဓားအလင်းရောင်ကို ရင်ဆိုင်ရာတွင် ထိုးနှက်ချက်တစ်ချက်ကိုပင် ခံနိုင်ရည်မရှိကြပေ။ နတ်ဆိုးကျွမ်းကျင်သူ ထက်ဝက်ကျော်သည် တခဏအတွင်းမှာပင် ပြင်းထန်စွာ ဒဏ်ရာရရှိခြင်း မဟုတ်ပါက သေဆုံးသွားကြသည်။

"သေစမ်း" နဂါးဖြူသည် ဒေါသတကြီး အော်ဟစ်လိုက်သည်။

ဤနတ်ဆိုးများသည် သာမန်နတ်ဆိုးများမဟုတ်ဘဲ နဂါးပျံတိုင်းပြည်၏ ထိပ်တန်းကျွမ်းကျင်သူများဖြစ်ကြသည်။ အရေအတွက်ထက်ဝက်ကျော်ကို တစ်ပြိုင်နက်တည်း ဆုံးရှုံးခြင်းသည် ၎င်းတို့တိုင်းပြည်အတွက် ကြီးမားသော ထိုးနှက်ချက်ဖြစ်ပေသည်။

သို့သော် ၎င်းတို့သည် ချူးယွင်ဖန်းနှင့်ယဉ်လျှင် အလွန်နှေးကွေးသောကြောင့် အသုံးမဝင်ခဲ့ပေ။ ၎င်းတို့သည် နတ်အဆင့်၏ အထွတ်အထိပ်သို့ရောက်ရှိနေကာ ၎င်းတို့၏စွမ်းအင်အားလုံးကို အသုံးပြုခဲ့သော်ငြား ချူးယွင်ဖန်း၏အရှိန်အဟုန်ကို မလိုက်နိုင်ကြသေးပေ။ ၎င်းတို့သည် ချူးယွင်ဖန်း၏ အစုလိုက်အပြုံလိုက် သတ်ဖြတ်နေသော အပြုအမူကိုသာ စောင့်ကြည့်နိုင်ခဲ့သည်။

ပုံရိပ်ကိုးခုသည် တစ်ခုတည်းအဖြစ်သို့ ပြန်လည်ရောက်ရှိခဲ့သည်။ ကျန်နတ်ဆိုးများသည် ချူးယွင်ဖန်း၏တိုက်ခိုက်မှုကို ရှောင်ရှားရန် ကြိုးစားလျက် ဘေးဘက်သို့ ဆုတ်ခွာသွားကြသည်။ ကျဆုံးသွားသော နတ်ဆိုးများသည် ထိုးနှက်ချက်တစ်ခုကိုပင် ခံနိုင်ရည်မရှိကြကြောင်း မြင်တွေ့ခဲ့ရသည်။ ၎င်းတို့သည် ယခုအခါ မည်သို့မျှ နိုးကြားစွာ မပြုမူဘဲ နေမည်နည်း။

သို့သော်လည်း ၎င်းတို့သည် ချူးယွင်ဖန်းကို လျှော့တွက်ခဲ့ကြသည်။ အရပ်ရပ်သို့ ပြေးခဲ့ကြသော်လည်း ၎င်းတို့သည် ချူးယွင်ဖန်း၏လက်မှ မည်သို့ လွတ်မြောက်နိုင်မည်နည်း။

ချူးယွင်ဖန်းသည် သူ့လက်ကို ဆန့်ထုတ်လိုက်သည်နှင့် သူ့ခန္ဓာကိုယ်မှ မရေတွက်နိုင်သော မိုးကြိုးသွားများ ထွက်ပေါ်လာသည်။ ၎င်းတို့သည် သူ၏အနောက်တွင် ဓားများ၊ လှံများ၊ ပုဆိန်များနှင့် အခြားသော လက်နက်များအဖြစ် ပြောင်းလဲသွားကြသည်။ လက်နက်များသည် အလွန်သိပ်သည်းစွာ ထူထပ်နေ၍ သူ့အနောက်တွင် တံတိုင်းကြီးတစ်ခု ဖွဲ့စည်းနေလေ၏။

လက်နက်ကြီးများ လွင့်စင်သွားသည်နှင့် ကြောက်မက်ဖွယ် လက်နက် ရွာသွန်းမှုများအဖြစ်သို့ ပြောင်းလဲသွားကြသည်။ အရပ်ရပ်သို့ ထွက်ပြေးနေသော နတ်ဆိုးများသည် ထိတ်လန့်တုန်လှုပ်သွား၍ ရောက်ရှိလာသော လက်နက်ကြီးများကို အနောက်လှည့်ကာ ခုခံတိုက်ခိုက်နေကြသည်။ သို့သော် ၎င်းတို့သည် အစွမ်းကုန်ကြိုးစားသော်လည်း ကျရောက်လာသည့် လက်နက် ရွာသွန်းမှုများကို မရပ်တန့်နိုင်ကြောင်း တွေ့ရှိလိုက်ရသည်။

လက်နက်တစ်ခု ပေါက်ကွဲသောအခါတိုင်း အဆုံးမဲ့ မိုးကြိုးစွမ်းအင်များကို ထုတ်လွှတ်နေသည်။ အဆက်မပြတ် ပေါက်ကွဲထွက်နေသော မိုးကြိုးစွမ်းအင်များသည် ၎င်းတို့ကို ပြာများအဖြစ်သို့ ပြောင်းလဲသွားစေ၏။ ၎င်းတို့၏ နတ်အဆင့် ကိုယ်ခန္ဓာများသည် ဤကြောက်မက်ဖွယ် မိုးကြိုးစွမ်းအင်ကို ရင်ဆိုင်ရသောအခါ လုံးလုံးလျားလျား အသုံးမဝင်ခဲ့ပေ။

ဘုံး

ဘုံး

ဘုံး

ကြောက်မက်ဖွယ် ပေါက်ကွဲသံတစ်ခု ထွက်ပေါ်လာခဲ့ရာ၊ ကမ္ဘာကြီးတစ်ခုလုံးကိုပင် တုန်လှုပ်သွားစေသည်။ ထိုအခါ အဆုံးမဲ့ ဖုန်မှုန့်လှိုင်းကြီးလုံးများ လွင့်စင်လာ၍ သဲများနှင့် ကျောက်တုံးများ လွင့်ပျံလာခဲ့ရာ၊ ကမ္ဘာကြီးပင် ပြိုလဲမည့်ဟန်ရှိသည်။ နဂါးဖြူသည် နာကျင်သော ဝေဒနာကို ရုတ်တရက် ခံစားလိုက်ရသည်။ ပြည်ထောင်စု၏ ကျွမ်းကျင်သူများကို အစုလိုက်အပြုံလိုက် သတ်ဖြတ်ရန် အမိန့်ပေးခဲ့သောအခါ အလားတူသော အခြေအနေမျိုး ကြုံတွေ့ရမည်ဟု မထင်မှတ်ခဲ့ပေ။

နဂါးဖြူသည် သူ၏စွမ်းအင်များကို ထုတ်လွှတ်ကာ အနက်ရောင်လှံကို ကိုင်ဆောင်လျက် ချူးယွင်ဖန်းထံ ချီတက်လိုက်သည်။ သူသည် နဂါးပျံတိုင်းပြည်၏ ထိပ်တန်းပုဂ္ဂိုလ်များထဲမှ တစ်ဦးဖြစ်သည်။ သူသည် ကျင့်ကြံမှုအရ၊ ချူးယွင်ဖန်း သတ်ဖြတ်ခဲ့သည့် နတ်ကုန်းမြေရှိ အင်အားစုသုံးခု၏ ခေါင်းဆောင်များထက်ပင် သန်မာပေသည်။

သူသည် အနည်းငယ်မျှသာ သန်မာခြင်းဖြစ်သော်လည်း လူတိုင်းသည် နတ်အဆင့်၏ အထွတ်အထိပ်သို့ ရောက်ရှိနေကြသောကြောင့် အနည်းငယ်မျှ သန်မာခြင်းလျှင်ပင် အလွန်အမင်း အထင်ကြီးဖွယ်ကောင်းနေပြီဖြစ်သည်။

ဘုရင်ယန်၏ စွမ်းအင်သည်လည်း နဂါးဖြူအောက် အားနည်းခြင်း မဟုတ်ပေ။ သူသည်လည်း အနောက်မှ နီးကပ်စွာ လိုက်ပါသွား၍ ခုန်အုပ်လိုက်လေသည်။ သူ့မျက်လုံးများသည် အမုန်းအရိပ်အမြွက်များဖြင့် တဖျပ်ဖျပ် လှုပ်ခတ်နေသည်။

"ကောင်းတယ်" ချူးယွင်ဖန်းက ရယ်မောလိုက်သည်။ သူသည် လုံးလုံးလျားလျား မကြောက်ရွံ့ပေ။

သူ၏ အတွင်းစိတ်စွမ်းအင်များကို ထုတ်လွှတ်လိုက်ရာ၊ ၎င်းတို့သည် အလွန် ပြင်းထန်လှသည်။ ထိုအခါ သူ၏ တိုက်ပွဲစွမ်းအင်သည် အဆမတန် တိုးမြင့်လာခဲ့သည်။ သူသည် လက်သီးကို ကျစ်ကျစ်ဆုပ်၍ ထိုးနှက်လိုက်လေသည်။ သူ၏လက်သီးချက်မှ ကြောက်မက်ဖွယ် စွမ်းအင်များ ထွက်ပေါ်လာကာ အနက်ရောင် လှံကို ထိမှန်သွားခဲ့သည်။

သတ္တုအချင်းချင်း ထိခတ်သံကဲ့သို့သော ကြောက်မက်ဖွယ် ပေါက်ကွဲသံသည် ကမ္ဘာကြီးတစ်ခုလုံးကို တုန်လှုပ်စေခဲ့သည်။ နဂါးဖြူက သွေးများ အန်ထွက်လာသည်။ သူ၏လက်နှစ်ဖက်စလုံး တုန်ရင်နေသည့်အပြင် လက်မနှင့် လက်ညှိုးကြားရှိ နေရာတစ်ခုလုံး ပွင့်ထွက်သွား၍ သွေးများ စီးကျနေသည်။

သူသည် ဟိန်းဟောက်လျက် အလျင်စလို ဆုတ်ခွာလိုက်သည်။ သူသည် မိမိကိုယ်ကို အစွမ်းထက်၍ ပြိုင်ဘက်ကင်းသူဟု ထင်မှတ်ခဲ့သည်။ သူသည် နဂါးပျံတိုင်းပြည်၏ ထိပ်တန်းကျွမ်းကျင်သူများနက် တစ်ဦးဖြစ်သော်လည်း ယခုအခါ ချူးယွင်ဖန်းကြောင့် ထိုအခြေအနေသို့ တွန်းပို့ခံခဲ့ရသည်။ ဤသည်မှာ ဆိုးရွားဖွယ်ကောင်းလှသည်။

နဂါးဖြူသည် ဆုတ်ခွာနေစဉ် ပါးစပ်မှ သွေးများ အန်ထွက်နေသော်လည်း ချူးယွင်ဖန်းက သူ့ကို လွှတ်မပေးခဲ့ပေ။ ချူးယွင်ဖန်း၏ လက်သီးစွမ်းအင်များ အရှိန်အဟုန်ပြင်းထန်စွာ မြင့်တက်လာပြီးနောက် ကြောက်မက်ဖွယ် အသူရကာယ်အဖြစ် ပြောင်းလဲကာ ပြိုကျလာခဲ့သည်။ နဂါးဖြူသည် ၎င်းကို ထိပ်တိုက်ရင်ဆိုင်ရန်မှတစ်ပါး အခြားရွေးချယ်စရာမရှိပေ။

ဘန်း

နဂါးဖြူသည် အမြောက်ကျည်ကဲ့သို့ လွင့်ထွက်သွားကာ ပါးစပ်မှ သွေးများ အန်ထွက်သွားလေ၏။

အခန်း (၁၀၇၉) အတွင်းရေး ပဋိပက္ခတဲ့လား။ ဘုရင်ယန်ကို ခေါင်းဖြတ်ခြင်း

ချူးယွင်ဖန်း၏ လက်သီးချက်သည် ပြင်းထန်လွန်းလှသည်။ ၎င်းတို့၏ ကြံ့ခိုင်သည့် ခန္ဓာကိုယ်ဖြင့် နာမည်ကျော်ကြားသော နဂါးပျံတိုင်းပြည်၏ တော်ဝင်မျိုးနွယ်များလျှင် သူနှင့် မနှိုင်းယှဉ်နိုင်ပေ။ နဂါးဖြူသည် မီတာရာချီ အကွာသို့ လွင့်ပျံသန်းသွားခဲ့သည်။ သူသည် ကြယ်တံခွန်တစ်စင်းကဲ့သို့ တောင်ငယ်တစ်ခုပေါ် ပြင်းထန်စွာ ပြုတ်ကျသွားခဲ့ရာ၊ ၎င်းကို အပိုင်းပိုင်း ကွဲထွက်သွားစေ၏။

မြင်ကွင်းသည် အလွန်ကြောက်မက်ဖွယ်ကောင်းလှသည်။ ၎င်းတို့နှစ်ယောက်ကြားရှိ တိုက်ပွဲသည် အလွန် ပြင်းထန်၍ ကြောက်မက်ဖွယ်ကောင်းလှ၏။ ဤသည်မှာ ၎င်းတို့၏ လက်သီးချင်းယှဉ် ထိုးကြိတ်သော တိုက်ပွဲဖြစ်ခဲ့သည်။ နတ်အဆင့်အမြောက်အမြားကို တစ်ပြိုင်နက်တည်း တိုက်ခိုက်ခြင်းထက် ပို၍ပင် အစွမ်းထက်လှ၍ ကမ္ဘာမြေကြီး လှုပ်နေသည်ဟုပင် ဆိုနိုင်သည်။

"ချူးယွင်ဖန်း"

နဂါးဖြူသည် ဒဏ်ရာရရှိသွားသောကြောင့် ရုတ်တရက် ပေါက်ကွဲသွားသည့် သားရဲတစ်ကောင်ကဲ့သို့ ဆက်တိုက် ဟိန်းဟောက်လိုက်သည်။ သူသည် ရုန်းကန်၍ မတ်တပ်ထရပ်ကာ စစ်မြေပြင်မှ ထွက်ပြေးရန် ကြိုးစားလိုက်သည်။ ချူးယွင်ဖန်းကို သတ်ဖြတ်ချင်သော်လည်း ကနဦး တိုက်ခိုက်မှုသည် ၎င်းတို့ကြားရှိ ကွာဟချက်ကို နားလည်သွားစေသည်။ သူသည် ဤနေရာတွင် အချည်းနှီး မသေဆုံးချင်ပေ။

ချူးယွင်ဖန်းသည် အလွန်ကြောက်မက်ဖွယ်ကောင်းသည်၊ သို့မဟုတ် လူသားများသည် အလွန်ကြောက်မက်ဖွယ်ကောင်းသည်ဟု ဆိုနိုင်သည်။ သူသည် အသက်နှစ်ဆယ်ကျော်သာရှိသေးသည်။ ဤအသက်အရွယ်သည် နဂါးပျံတိုင်းပြည်၏ တော်ဝင်မျိုးနွယ်များအတွက် ဥဥရန်ပင် အချိန်မလုံလောက်သော်လည်း ချူးယွင်ဖန်းသည် မယုံကြည်နိုင်ဖွယ်အဆင့်သို့ ကြီးထွားနေပြီဖြစ်သည်။

လူသားများသည် ၎င်းတို့မျှ မစွမ်းဆောင်နိုင်သော်လည်း ကျင့်ကြံမှုလမ်းကြောင်းကို လျှောက်လှမ်းသည့်အခါ မကြာခဏဆိုသလိုပင် အံ့ဩဖွယ် အောင်မြင်မှုများကို အချိန်တိုအတွင်း ရရှိနိုင်ကြသည်။ ၎င်းတို့၏ အရှိန်အဟုန်သည် သက်တမ်းရှည်သော နတ်ဆိုးများထက် များစွာ မြန်ဆန်လှသည်။ တစ်ဖက်တွင် ဘုရင်ယန် သည်လည်း ချူးယွင်ဖန်းဆီ အလျင်အမြန် ချီတက်လာ၍ အော်ဟစ်လိုက်သည်။

"နဂါးဖြူ၊ ခင်ဗျား အခု တကယ် ထွက်ပြေးမလို့လား။ သူက ခင်ဗျားကို လွှတ်ပေးမယ်တဲ့လား။ ကျုပ်တို့အတူ ပူးပေါင်းမှ သူ့ကို သတ်နိုင်မှာ"

နဂါးဖြူနှင့် နှိုင်းယှဉ်ပါက၊ ဘုရင်ယန်သည် ချူးယွင်ဖန်း၏ ရက်စက်ကြမ်းကြုတ်မှုကို ပို၍ နားလည်သည်။ နတ်ကျွန်များစွာသည် ချူးယွင်ဖန်း၏လက်ချက်ဖြင့် သေဆုံးသွားခဲ့၍ သူသည် ၎င်းတို့ကို မဆိုင်းမတွ သတ်ဖြတ်ခဲ့သည်။ ဤအချက်ကိုကြည့်လျှင် ချူးယွင်ဖန်းသည် နူးညံ့သိမ်မွေ့သူမဟုတ်ကြောင်း သိရှိနိုင်သည်။ ထို့ကြောင့် ဘုရင်ယန်သည် ထွက်ပြေးရန် မစဉ်းစားခဲ့ပေ။

'တကယ့်ဟာသပဲ'

ချူးယွင်ဖန်း ပြသခဲ့သည့်အမြန်နှုန်းကို ကြည့်ပါက သူသည် ၎င်းတို့နှစ်ဦးထက် များစွာမြန်ဆန်သည်။ သူ၏လက်မှ လွတ်မြောက်ခြင်းသည် ၎င်းတို့အတွက် မဖြစ်နိုင်သလောက်နီးပါးသာဖြစ်သည်။ ချူးယွင်ဖန်းသည် ပြင်းထန်စွာ ဒဏ်ရာရရှိခြင်း သို့မဟုတ် သေဆုံးခြင်းမရှိပါက ယနေ့တွင် မည်သူမျှ ထွက်ခွာနိုင်မည် မဟုတ်ပေ။ ဘုရင်ယန်သည် လက်သင်္ကေတတစ်ခုကို ပြုလုပ်လိုက်ရာ၊ ၎င်းသည် ချူးယွင်ဖန်းအပေါ်ပြိုကျလာသော တောင်ကြီးတစ်ခုအဖြစ် ချက်ချင်း ပြောင်းလဲသွားလေသည်။

“ထိုက်တောင်စည်း"

ဘုရင်ယန်သည် သူ့ကို တိုက်ခိုက်လာသောကြောင့် နဂါးဖြူကို ခေတ္တလက်လွှတ်ပေးရန်မှတစ်ပါး ရွေးချယ်စရာမရှိပေ၊ ပြီးနောက် ချူးယွင်ဖန်းက အော်ဟစ်လိုက်သည်။

"ခင်ဗျား ကျုပ်ကို ဒါနဲ့ တားချင်တာလား။ ကျုပ်ကို တားနိုင်မယ် ထင်နေတာလား"

ချူးယွင်ဖန်းသည် အော်ဟစ်ပြီးနောက် မြေပြင်ပေါ်မှ ခုန်လိုက်ရာ၊ သူ၏ခန္ဓာကိုယ်တစ်ခုလုံး လွင့်ထွက်သွားခဲ့၍ ပြိုကျလာသော တောင်ကြီးကို လက်သီးဖြင့် ထိုးနှက်လိုက်လေသည်။

ဘုံး

ဧရာမတောင်ကြီးသည် လေထုအလယ်တွင် ပေါက်ကွဲသွားပြီးနောက် ကောင်းကင်တွင် ပြည့်နှက်နေသော အလင်းတန်းများအဖြစ် ပြောင်းလဲသွားခဲ့သည်။ အမှန်မှာ၊ ၎င်းသည် ထိုက်တောင် အစစ်အမှန် မဟုတ်ဘဲ နတ်စွမ်းအင်ဖြင့် ဖန်တီးထားခြင်းသာဖြစ်သည်။

ဘုရင်ယန်သည် သူ၏နတ်စွမ်းအင်များ ပြန်လည်တုံ့ပြန်လာသောကြောင့် ရင်ဘတ်တစ်ခုလုံး မွန်းကြပ်လာသကဲ့သို့ ရုတ်တရက် ခံစားလိုက်ရသည်။ သူသည် ထိုက်တောင်စည်းကို ကျင့်ကြံပြီးကတည်းက ၎င်းဖြင့် လူတိုင်းကို ဖြတ်ကျော်နိုင်ခဲ့သည်။ သူ၏စည်းကို လက်သီးတစ်ချက်တည်းဖြင့် ဖောက်ခွဲနိုင်သော ချူးယွင်ဖန်းကဲ့သို့ လူမျိုး မဆိုထားနှင့် ၎င်းကို ရင်ဆိုင်ဝံ့သူသည် အနည်းငယ်မျှသာရှိသည်။

ဤအခိုက်အတန့်တွင် မိမိပင် ကြောက်ရွံ့ရသော နဂါးဖြူကို မည်သို့ကြောင့် လက်သီးတစ်ချက်ဖြင့် လွင့်ပျံသွားအောင် ပြုလုပ်နိုင်ခဲ့သည့်အကြောင်းရင်းကို သူ နောက်ဆုံးတွင် နားလည်သွားသည်။ ချူးယွင်ဖန်း၏ ကိုယ်ခန္ဓာကျင့်ကြံမှုသည် အလွန် ကြောက်မက်ဖွယ်ကောင်းခဲ့ရာ၊ သူသည် လူသားတစ်ဦးနှင့်ပင် မတူပေ။ ချူးယွင်ဖန်းသည် ထိုက်တောင်စည်းကို ဖျက်ဆီးပြီးနောက် မရပ်တန့်ခဲ့ပေ။ သူသည် လျှပ်စီးတစ်ခုကဲ့သို့ပင် ဘုရင်ယန်ထံ ချီတက်လိုက်သည်။

"ခင်ဗျားက အရင်သေချင်နေမှတော့ ကျုပ်ကလည်း ဖြည့်ဆည်းပေးရတာပေါ့"

ချူးယွင်ဖန်းသည် ကောင်းကင်ယံသို့ မြင့်မားစွာ ပျံသန်းသွားခဲ့သည်။ သူ၏ခြေထောက်ကို လျှပ်စီးတစ်ခုကဲ့သို့ လှုပ်ရှားလိုက်ရာ၊ သိုင်းပညာ စွမ်းအင်များ လေထုထဲတွင် ပုံဖော်ဖွဲ့စည်းလာကာ တုနှိုင်းမဲ့ ကြီးမားသော နှံကောင်ကြီးအဖြစ် ပြောင်းလဲသွားလေသည်။ သူ၏ခြေထောက်သည် ကမ္ဘာကြီးကိုပင် ဖြတ်တောက်နိုင်ပုံပေါ်သည်။ ထွက်ပေါ်လာသည့် စွမ်းအင်များသည် ကြောက်မက်ဖွယ်ကောင်းလှရာ၊ နေမင်း လမင်း တောင်တန်းများနှင့် မြစ်ချောင်းများကိုပင် မှေးမှိန်သွားစေ၏။

ထိုအချိန်တွင် ချူးယွင်ဖန်း အသုံးပြုခဲ့သည့် နတ်နှံကောင်ကန်ချက်သည် မွေးဖွားခြင်းနယ်မြေအဆင့်နှင့် လုံးလုံးလျားလျား ကွဲပြားလှသည်။ ၎င်းသည် အလွန်သာမန်ကျသော လှုပ်ရှားမှုတစ်ခုဖြစ်သော်လည်း စစ်မှန်သော ကျွမ်းကျင်သူတစ်ဦးသည် ပုပ်သိုးနေသော အရာတစ်ခုကို မှော်ဆန်သည့် အရာတစ်ခုအဖြစ် ပြောင်းလဲပစ်ရန် စွမ်းအင်များရှိကြရာ၊ လက်ရှိ ချူးယွင်ဖန်းသည်လည်း ထိုကဲ့သို့ပင်ဖြစ်သည်။ ဘုရင်ယန်သည် သူ၏နောက်ကျောရှိ အမွေးအမှင်များအားလုံး ထောင်မတ်သွားသကဲ့သို့ ခံစားလိုက်ရသည်။ သူသည် ဤတိုက်ခိုက်မှုကို မရှောင်တိမ်းပါက ထက်ဝက်ဖြတ်တောက်ခံရနိုင်သည်။

“ထိုက်တောင်စည်း ချည်နှောင်ခြင်း”

ဘုရင်ယန်သည် အန္တရာယ်ကို သတိပြုမိသောအခါ သူ၏ခန္ဓာကိုယ်အတွင်းရှိ နတ်စွမ်းအင်များ အရူးအမူး ဆော်ဩလာသည်။ သူ၏ အဖြူရောင်ဝတ်ရုံသည် စွမ်းအင်များဖြင့် ပြည့်နှက်နေ၍ သူ၏လက်သင်္ကေတသည် လျှပ်စီးကဲ့သို့ မြန်ဆန်လှရာ၊ လက်၏ နောက်ဆက်တွဲပုံရိပ်များသည် မမြင်နိုင်သလောက်ပင်ဖြစ်နေသည်။ ကြီးမားသော တောင်တန်းကြီးများသည် လေဖိအားနည်းရပ်ဝန်းမှ တစ်ခုပြီး တစ်ခု ထွက်ပေါ်လာကာ ချူးယွင်ဖန်း၏ ဦးတည်ရာသို့ စတင်ကျဆင်းလာပြန်သည်။

ချူးယွင်ဖန်းသည် ကျယ်လောင်စွာ အော်ဟစ်ပြီးနောက် လက်သီးဖြင့် ဝှေ့ယမ်းလိုက်သည်။ လက်သီးစွမ်းအင်သည် ကောင်းကင်နှင့် မြေကြီးကို တုန်လှုပ်သွားစေသည်။ ကြောက်မက်ဖွယ် လက်သီးစွမ်းအင်များသည် အရပ်ရပ်သို့ ပြန့်ကျဲသွားပြီးနောက် အရာအားလုံးကို ဖြိုခွဲပစ်လိုက်သည်။ ထိုတောင်တန်းကြီးများသည် သူ၏လက်သီးဖြင့် ထိုးဖောက်ခံလိုက်ရသည်။

ဘုံး

လက်သီး၏ စွမ်းအင်သည် နှေးကွေးသွားခြင်းမရှိဘဲ ဘုရင်ယန် အရှေ့သို့ ရောက်ရှိလာသည်။ ဘုရင်ယန်၏ ခန္ဓာကိုယ်မှ ပြင်းထန်သော အလင်းရောက်တစ်ခု ထွက်ပေါ်လာပြီးနောက် သူ့ကို အကာအကွယ်ပြုရန် သူ့အရှေ့တွင် အတားအဆီးတစ်ခုအဖြစ် ဖန်တီးလိုက်လေသည်။ သို့သော် ဤအတားအဆီးသည် အသုံးမဝင်ခဲ့ပေ။ ချူးယွင်ဖန်းသည် တစ်ချက်ထိုးနှက်ရုံဖြင့် အတားအဆီးကို ထိုးဖောက်ဝင်ရောက်သွားရာ၊ ဘုရင်ယန်၏ ခန္ဓာကိုယ်ပေါ်သို့ သူ၏လက်သီးချက်များ ကျရောက်လာသည်။

ဘုရင်ယန်သည် ချက်ချင်းပင် သွေးများ အန်ထွက်သွားလေသည်။ သူ့ခန္ဓာကိုယ်ထဲရှိ အရိုးများအားလုံး တစ်ခုပြီး တစ်ခု ကွဲထွက်သွားသကဲ့သို့ ခံစားလိုက်ရသည်။ ကြောက်မက်ဖွယ်ကောင်းသော လက်သီးစွမ်းအင်များ သူ့ခန္ဓာကိုယ်တစ်လျှောက် ပျံ့နှံ့သွားလေ၏။

ဘုံး

ဘုရင်ယန်သည် မြေကြီးပေါ်သို့ ပြင်းထန်စွာ ပြုတ်ကျသွားသောအခါ ကြီးမားသော တွင်းနက်ကြီးတစ်ခု ဖြစ်ပေါ်သွားစေသည်။ သူသည် မြေပြင်ပေါ်သို့ ပြုတ်ကျခဲ့ရသော်လည်း နဂါးဖြူကို သူ၏မျက်လုံးထောင့်မှ မြင်လိုက်ရသောအခါ ပေါက်ကွဲထွက်တော့မည်ကို ခံစားလိုက်ရသည်။ သူသည် နဂါးဖြူကို အလွန် နားချခဲ့သည့်အပြင် ပြန်လည်ကုသနိုင်ရန်အတွက်ပင် ချူးယွင်ဖန်းကို တားဆီးကာ အချိန်ဆွဲပေးခဲ့သည်။

သို့သော် နဂါးဖြူသည် ထွက်ပြေးရန်သာ စိတ်ပိုင်းဖြတ်ထားမည်ဟု မည်သူသိမည်နည်း။ နဂါးဖြူသည် သူ မြေပြင်ပေါ်သို့ ပြုတ်ကျသွားခြင်းကိုပင် ဂရုမစိုက်ဘဲ ချက်ချင်း လှည့်၍ထွက်ပြေးလေသည်။ နဂါးဖြူသည် သူ့ကို အကာအကွယ်တစ်ခုအဖြစ် အသုံးပြုခဲ့သည်။

တစ်ဖက်တွင် နဂါးဖြူ၏ အတွေးများသည် ပို၍ရိုးရှင်းလှသည်။ ချူးယွင်ဖန်းသည် ၎င်းတို့နှစ်ဦးသား အတူတူ ပူးပေါင်းရန်ပင် ဖြေရှင်းနိုင်မည့်လူနှင့် ဆင်တူလေသလော။ ချူးယွင်ဖန်းသည် အခြားအဆင့်၏ ဖြစ်တည်မှုသို့ ရောက်ရှိနေကြောင်း သိသာထင်ရှားသည်။ ထို့ကြောင့် သူသည် အချိန်မဖြုန်းတော့ပေ။ သူ၏ကျိုးပဲ့နေသော ခန္ဓာကိုယ်ကို ချက်ချင်း ရုန်းကန်၍ အပျက်အစီးများထံမှ ထွက်ပြေးလေသည်။

ချူးယွင်ဖန်းသည် ၎င်းတို့နှစ်ဦး၏ စည်းလုံးမှုမရှိသော အပြုအမူကို မြင်လိုက်ရသောအခါ လှောင်ရယ်လိုက်၏။ သို့သော် အရာအားလုံးသည် မထူးဆန်းလှပေ။ ဘုရင်ယန်နှင့် နဂါးဖြူတို့သည် မူလတွင် တစ်ဦးနှင့် တစ်ဦး ရန်လိုနေသော်လည်း ဖိအားများအောက်တွင် တုံ့ဆိုင်းစွာ ပူးပေါင်းခဲ့ကြသည်။

တစ်ဦးသည် အခွင့်အရေးရှိသည်နှင့် တစ်ဖက်လူကို တုံ့ဆိုင်းမနေဘဲ ချက်ချင်းပင် စတေးပစ်ပေလိမ့်မည်။ ချူးယွင်ဖန်းသည် သူ၏ ခွန်အားကို မထိန်းချုပ်ခဲ့ပေ။ လက်မောင်းကို မြောက်တင်လိုက်သည်နှင့် သူ၏လက်ထဲတွင် မိုးကြိုးလှံတစ်ခု ပေါ်ပေါက်လာသည်၊ ပြီးနောက် သူသည် ၎င်းကို ပစ်လွှတ်လိုက်၏။

မိုးကြိုးလှံသည် လျှပ်စီးကဲ့သို့သော အလျင်ဖြင့် ဘုရင်ယန်ဆီ ရောက်ရှိသွားခဲ့သည်။ ဘုရင်ယန် သည် ရှောင်တိမ်းရန်ပင် အချိန်မရှိသောကြောင့် ချူးယွင်ဖန်း၏နတ်အာရုံဖြင့် ပိတ်လှောင်ခံလိုက်ရသည်။ လှံသည် ဘုရင်ယန်ကို မြေပြင်တွင် ထိုးစိုက်လိုက်ရာ၊ သူသည် မတ်တပ်ရပ်ရန် ရုန်းကန်နေလေ၏။

အခန်း (၁၀၈၀) နဂါးဖြူကို သုတ်သင်၍ ဗြဟ္မာသစ်ပင်ကို ရယူခြင်း

ချူးယွင်ဖန်းသည် ပေါ့ပေါ့တန်တန် တိုက်ခိုက်မှုဖြင့် ဘုရင်ယန်ကို မြေပြင်တွင် ချက်ချင်း ထိုးစိုက်လိုက်ပြီးနောက် နဂါးဖြူနောက်သို့ လိုက်သွားလေသည်။ ချူးယွင်ဖန်း၏ နောက်ကျောတွင် မိုးကြိုးတောင်ပံများ လှုပ်ခတ်နေရာ၊ သူသည် လျှပ်စီးကဲ့သို့ပင် လျင်မြန်လှသည်။ သူသည် မျက်စိတစ်မှိတ်အတွင်းမှာပင် နဂါးဖြူအနောက်သို့ ရောက်ရှိသွားသည်။

နဂါးဖြူသည် အံ့အားသင့်သွားခဲ့သည်။ ချူးယွင်ဖန်းသည် စက္ကန့်ပိုင်းအတွင်း သူ့ကို လိုက်မှီလာမည်ဟု မမျှော်လင့်ထားခဲ့ပေ။ ဘုရင်ယန်သည် ချူးယွင်ဖန်း အမီမလိုက်နိုင်စေရန် သူ့အတွက် အတန်ကြာ အချိန်ဆွဲနိုင်မည်ဟုသော မျှော်လင့်ချက်ဖြင့် ဘုရင်ယန်နှင့် ပူးပေါင်းရန် အခွင့်အရေးကို စွန့်လွှတ်ခဲ့သည်။ အရာရာတိုင်းသည် အချည်းနှီးဖြစ်သွားမည်ဟု မည်သူသိမည်နည်း။ ဤသည်မှာ အောင်မြင်ရန် မဖြစ်နိုင်သော အကြောင်းအရာတစ်ခုဖြစ်သည်။

"အား"

နဂါးဖြူသည် ဟိန်းဟောက်လိုက်သည်နှင့် သူ့၏ခန္ဓာကိုယ်တစ်ခုလုံး တောက်ပလာသည်။ သူသည် ချူးယွင်ဖန်းကို လက်သီးဖြင့် ထိုးနှက်လိုက်သောအခါ ကြောက်မက်ဖွယ် လက်သီးစွမ်းအင်များ ထွက်ပေါ်လာသည်။ သူ့ခန္ဓာကိုယ်ရှိ ချီနှင့် သွေးများအားလုံးကို စုစည်းပြီးနောက် ၎င်းကို နတ်စွမ်းအင်အဖြစ် ပြောင်းလဲ၍ ချူးယွင်ဖန်းကို တိုက်ခိုက်လိုက်သည်။

ဤကဲ့သို့ ကြောက်မက်ဖွယ် လက်သီးချက်ကို သာမန်နတ်အဆင့် အထွတ်အထိပ်တစ်ဦးပင် သေဆုံးသွားနိုင်သောကြောင့် ထိပ်တိုက်ရင်ဆိုင်ဝံ့မည် မဟုတ်ပေ။ သို့သော် ချူးယွင်ဖန်းက ဂရုမစိုက်ပေ။ ဤလက်သီးချက်သည် ချူးယွင်ဖန်း၏ ခန္ဓာကိုယ်ပေါ် ကျရောက်လာသောအခါ သတ္တုအချင်းချင်း ရိုက်ခတ်သံများ ထွက်ပေါ်လာသည်။ သို့သော် ၎င်းသည် ချူးယွင်ဖန်းကို မတားနိုင်ဘဲ ၎င်းမှ ပြန်လည်တုံ့ပြန်လာသော စွမ်းအင်သည် သူ၏ခန္ဓာကိုယ်တစ်ခုလုံးကို တုန်လှုပ်သွားစေသည်။

အလွန်ကြောက်မက်ဖွယ်ကောင်းလှ၏။ နဂါးဖြူ၏မျက်နှာတွင် ကြောက်ရွံ့မှုအရိပ်အမြွက်များ ပြသနေသည်။ ချူးယွင်ဖန်းကို မထီမဲ့မြင်ပြုမူခြင်းမဆိုနှင့် ယခင်က အစွမ်းထက်သော အရောင်အဝါများပင် မရှိတော့ပေ။ ချူးယွင်ဖန်း၏ ခွန်အားသည် သူ၏အထက်တွင် ရှိနေကြောင်း လှုပ်ရှားမှု အနည်းငယ်ဖြင့်ပင် ခံစားရနိုင်သည်။ ထိုကြောက်မက်ဖွယ် ခွန်အားသည် သူ့ကို ချေမှုန်းရန် လုံလောက်နေသည်။

သူ့သည် ယခင်ကကဲ့သို့ မြင့်မား၍ ခွန်အားကြီးမားသော ခံစားချက်မျိုး မရှိတော့ပေ။ နဂါးဖြူသည် အာရုံများ ပြန်ကပ်လာချိန် ချူးယွင်ဖန်းက သူ၏အရှေ့တွင် ရှိနေပြီဖြစ်သည်။ ချူးယွင်ဖန်းသည် အပိုလှုပ်ရှားမှုများ မပြုလုပ်ခဲ့ပေ။ သူသည် နဂါးဖြူကို လက်သီးဖြင့်သာ ထိုးနှက်လိုက်သည်။ နဂါးဖြူသည် လွင့်ပျံသွားခဲ့ရာ၊ နာကျင်မှုကြောင့် စူးရှစွာ အော်ဟစ်လျက် တောင်နံရံတစ်ခုနှင့် တိုက်မိသွားလေ၏။ သို့သော် ချူးယွင်ဖန်းသည် သူ့ကို အလွတ်မပေးဘဲ လက်သီးဖြင့် ထပ်မံထိုးနှက်လိုက်ပြန်သည်။

ဘန်း

ဘန်း

ဘန်း

ချူးယွင်ဖန်း၏ လက်သီးချက်များ နဂါးဖြူ၏ ခန္ဓာကိုယ်ပေါ်သို့ ကျရောက်သည့်အခါတိုင်း ကမ္ဘာမြေကို ဥက္ကာပျံဖြင့် ထိမှန်သွားသကဲ့သို့ ကြောက်မက်ဖွယ် ပေါက်ကွဲသံများ ဆက်တိုက်ဖြစ်ပေါ်နေ၏။ နဂါးဖြူသည် နောက်ဆုံးတွင် ဆက်လက်၍ မခုခံနိုင်တော့ပေ။ သူ၏လူသားပုံသဏ္ဌာန်ကိုပင် မထိန်းထားနိုင်ဘဲ မီတာသုံးရာကျော်ရှည်လျားသည့် နဂါးကြီးအဖြစ် ပြောင်းလဲသွားခဲ့သည်။

ထိုအချိန်တွင် နဂါးကြီး၏ ခန္ဓာကိုယ်ပေါ်ရှိ အကြေးခွံများ အပိုင်းပိုင်း ကွဲထွက်နေကာ အက်ကြောင်းများမှ သွေးများ စီးကျနေသည်။ ၎င်းဒဏ်ရာများသည် ချူးယွင်ဖန်း၏ တိုက်ခိုက်မှုကြောင့် ဖြစ်ပေါ်လာခြင်းဖြစ်သည်။ ကံကောင်းထောက်မစွာဖြင့် နတ်ဆိုးများ၏ ခန္ဓာကိုယ်သည် အလွန်သန်မာကြသည်။ ထိုနေရာတွင် သာမာန်လူတစ်ဦးသာဖြစ်ပါက အပိုင်းပိုင်း ပြတ်တောက်သွားပြီဖြစ်သည်။

"အား"

နဂါးပုံသဏ္ဌာန်အဖြစ် ပြောင်းလဲသွားသော နဂါးဖြူသည် ကျယ်လောင်စွာ ဟိန်းဟောက်၍ ၎င်း၏ သွေးရောင် မေးရိုးကြီးကို ဖွင့်ဟလိုက်သည်။ ၎င်းအတွင်းမှ ကြောက်မက်ဖွယ် စွမ်းအင်တစ်ခု ထွက်ပေါ်လာပြီးနောက် ကြီးမားသော နဂါးပုလဲအဖြစ် ပြောင်းလဲကာ ချူးယွင်ဖန်းဆီ ဦးတည်သွားလေသည်။

"ခင်ဗျားက နဂါးပုလဲထုတ်နိုင်တဲ့အထိ ကျင့်ကြံနိုင်ခဲ့တာလား" ချူးယွင်ဖန်းသည် နဂါးဖြူကို အံ့အားသင့်စွာ ကြည့်လိုက်သည်။

နဂါးအစစ်အမှန်များသာလျှင် နဂါးပုလဲထုတ်လုပ်နိုင်သည်အထိ ကျင့်ကြံနိုင်ကြသည်။ ၎င်းသည် နဂါးမျိုးနွယ်၏ စစ်မှန်သော မှော်လက်နက်ဖြစ်သည့်အပြင် အဆုံးမဲ့ အင်အားကြီးမားရှိသော ၎င်း၏မူလအရင်းအမြစ်လည်းဖြစ်ပေသည်။

သို့သော်လည်း စစ်မှန်သော နဂါးတစ်ကောင်ကသာ ထိုအရာကို ထုတ်လုပ်နိုင်မည်ဖြစ်သည်။ သာမာန်နဂါးများ၏သွေးသည် မသန့်စင်ပါက ၎င်းကို ထုတ်လုပ်နိုင်မည် မဟုတ်ပေ။ နဂါးဖြူသည် ကောင်းမွန်သော ကံကြမ္မာတစ်ခုနှင့် ကြုံတွေ့ခဲ့ပုံပေါ်သည်။ မဟုတ်လျှင် သူသည် ဒဏ္ဍာရီလာ နဂါးပုလဲကို မည်သို့မျှ ထုတ်လုပ်နိုင်မည်နည်း။

ထိုသို့ မြင်လိုက်သောအခါ ချူးယွင်ဖန်း၏ မျက်လုံးများ တောက်ပလာ၍ သူသည် လက်နှစ်ဖက်ကို ချက်ချင်း ဖြန့်ထုတ်လိုက်သည်။ ထိုအခါ ဤနဂါးပုလဲသည် ချူးယွင်ဖန်း၏ခန္ဓာကိုယ်ပေါ် ကျရောက်လာသည်။ ၎င်းသည် အများအားဖြင့် ဧရာမတောင်ကြီးကိုပင် အစိတ်စိတ်အမြွှာမြွှာ ကွဲကြေသွားနိုင်သည်။ ကံကောင်းထောက်မစွာဖြင့် ချူးယွင်ဖန်း၏ ကိုယ်ခန္ဓာကြံ့ခိုင်မှုသည် အလွန် သန်မာလှသည်။ မဟုတ်ပါက သူသည် ၎င်းကို ခံနိုင်ရည်ရှိမည် မဟုတ်ပေ။

ချူးယွင်ဖန်းသည် လက်ဖဝါးကို ဖြန့်ထုတ်ကာ နဂါးပုလဲကို လက်ထဲတွင် ဖမ်းဆုပ်ထားလိုက်သည်။ သူသည် နဂါးပုလဲကို ပြန်လည်ဆွဲယူရန် ကြိုးစားနေသည့် ကြီးမားသော ဆွဲငင်အားကို ခံစားလိုက်ရသည်။

"ဟား" ချူးယွင်ဖန်းသည် အေးစက်စွာ အော်ဟစ်လိုက်ပြီးနောက် နဂါးဖြူ၏ ကြီးမားသော ခန္ဓာကိုယ်ကို သူ၏လက်ဖဝါးဖြင့် ရိုက်ပုတ်လိုက်သည်။

"အား"

နဂါးဖြူသည် တောင်ထိပ်နှင့် ရိုက်ခတ်မိသွားသဖြင့် နာကျင်မှုကြောင့် ကျယ်လောင်စွာ အော်ဟစ်လိုက်လေသည်။ သူသည် မတ်တပ်ထရန် ရုန်းကန်ခဲ့သော်လည်း ချူးယွင်ဖန်းသည် သူ့ကို အခွင့်အရေးမပေးခဲ့ပေ။ ချူးယွင်ဖန်းသည် ချက်ချင်းဆိုသလိုပင် နတ်နှံကောင်ကန်ချက်ကို အသုံးပြုလိုက်ရာ၊ နဂါးဖြူ၏ခန္ဓာကိုယ်သည် ကြောက်မက်ဖွယ် အလင်းရောင်ကြောင့် ထက်ပိုင်းကွဲထွက်သွားခဲ့သည်။ ထိုအခါ ချူးယွင်ဖန်းသည် သူ့လက်ကို မြောက်တင်၍ လက်ထဲတွင် မိုးကြိုးစွမ်းအင်ကို စုစည်းလိုက်သည်။ ပြီးနောက် ၎င်းကို မိုးကြိုးလှံအဖြစ် ပြောင်းလဲ၍ ပစ်ချလိုက်သည်။

ဘုံး

နဂါးဖြူ၏ကိုယ်ခန္ဓာ အပေါ်ပိုင်းသည် တောင်တောင်ထိပ်တွင် ထိုးစိုက်ခံရကာ သူ၏နှလုံးသားသည် ထိုးဖောက်ခံလိုက်ရသည်။ သူ၏ အသက်ဓာတ်သည် နဂါးများကဲ့သို့ ပြင်းထန်သော်လည်း ဒဏ်ရာများကို မကုသနိုင်သောကြောင့် ချက်ခြင်း သေဆုံးသွားလေသည်။ နဂါးဖြူ သေဆုံးပြီးနောက် နဂါးပုလဲသည် ပိုင်ရှင်မဲ့သွားခဲ့ရသည်။ ချူးယွင်ဖန်းသည် ၎င်းပေါ်ရှိ ဝိညာဉ်ရေးအမှတ်အသားကို အလွယ်တကူ ဖျောက်ဖျက်ကာ ကိုယ်ပိုင်ပစ္စည်းအဖြစ် အသုံးပြုနိုင်သွားလေသည်။

နဂါးပုလဲများသည် ရှေးဟောင်းလူသားများကာလအတွင်း၌ပင် အလွန်ရှားပါးသော ရတနာများဖြစ်ကြသည်။ ၎င်းသည် သွေးနှောနဂါး၏ပုလဲသာဖြစ်ခဲ့သော်လည်း လက်ရှိ ချူးယွင်ဖန်းအတွက် အလွန်အဖိုးတန်ဆဲဖြစ်သည်။ ၎င်းသည် အလွန်အစွမ်းထက်သော မှော်လက်နက်အဖြစ် ဖန်တီးရန် လုံလောက်ပေသည်။ သို့သော် ချူးယွင်ဖန်းသည် ယခုအချိန်တွင် ၎င်းကို လက်နက်အဖြင့် ပြုလုပ်ရန် အချိန်မရှိပေ။ သူသည် နဂါးဖြူ၏အလောင်းကို သိမ်းဆည်းပြီးနောက် ဗြဟ္မာသစ်ပင်ရှိရာသို့ ပြန်လာခဲ့သည်။

ထိုအချိန်၌ ဗြဟ္မာသစ်ပင်၏ အတားအဆီးသည် အားနည်းသွား၍ အနက်ရောင်နဂါးဘုရင်သည် ၎င်းအတွင်းမှ ထွက်လာကာ နှုတ်ဆက်လိုက်သည်။

"အရှင့်ကို နှုတ်ဆက်ပါတယ်"

"အနက်ရောင်နဂါးဘုရင်" ချူးယွင်ဖန်းက ခေါင်းညိတ်လိုက်သည်။

"မင်း ကောင်းကောင်း လုပ်ဆောင်ခဲ့တယ်။ အချိန်ကျလာရင် မင်းကို ထူးခြားတဲ့ လျှို့ဝှက်သိုင်းပညာတစ်ခု ချီးမြှင့်ပေးမယ်"

ထိုသို့ကြားသောအခါ အနက်ရောင်နဂါးဘုရင်က အလွန် ဝမ်းသာသွားသည်။ ချူးယွင်ဖန်းသည် အံ့ဩဖွယ်ကောင်းသော အမွေအနှစ်မျိုး ပိုင်ဆိုင်ထားလိမ့်မည်ဟု သူ တွေးတောပြီးသားဖြစ်သည်။ ထိုသို့မှမဟုတ်ပါက သူသည် ဤအခြေအနေတွင် ရောက်ရှိနေမည် မဟုတ်ပေ။ ချူးယွင်ဖန်း၏ လမ်းညွှန်မှုကို ရနိုင်လျှင် ကျင့်ကြံမှုလမ်းကြောင်းပေါ်ရှိ သူ၏အချိန်များ လျော့နည်းနိုင်မည်ဖြစ်သည်။

နတ်ဆိုးများကို သစ္စာဖောက်၍ ပြည်ထောင်စုထဲသို့ ဝင်ရောက်လာခြင်းသည် ထိုက်တန်ပေသည်။ ထိုအချိန်တွင် ချူးယွင်ဖန်းသည် ဗြဟ္မာသစ်ပင်ကို လှည့်ကြည့်လိုက်သည်။ မြင့်မားသော ဤသစ်ပင်ကြီးရှေ့ရှိ တန်စီယု၏ အရောင်အဝါများသည် အင်မော်တယ်တစ်ပါးကဲ့သို့ တဖြည်းဖြည်း မြင့်တက်လာသည်။

ဤနှုန်းဖြင့်ဆိုလျှင် ဗြဟ္မာသစ်သီးကို စားသုံးခဲ့သော တန်စီယုသည် နတ်အဆင့်၏ အထွတ်အထိပ်သို့ ဖြတ်ကျော်ရန် လွယ်ကူသွားပေလိမ့်မည်။ ချူးယွင်ဖန်းသည် မထိန်းချုပ်နိုင်ဘဲ ရယ်လိုက်မိသည်။ လူတိုင်းသည် ဗြဟ္မာသစ်ပင်ကြောင့် လာရောက်ခဲ့ကြသော်လည်း အဆုံးတွင် တန်စီယုက ၎င်း၏ အသီးအပွင့်ကို ရရှိသွားမည်ဟု မည်သူမျှ မမျှော်လင့်ခဲ့ကြပေ။

သို့သော်လည်း ချူးယွင်ဖန်း၏ ရိတ်သိမ်းမှုသည်လည်း ပို၍ ကြီးမားလှသည်၊ အကြောင်းမှာ ဤဗြဟ္မာသစ်ပင်သည် အနှစ်တစ်ထောင်တွင် တစ်ကြိမ်သာ တွေ့ရှိနိုင်သော အံ့ဖွယ်ဖြစ်သည်။ ချူးယွင်ဖန်းသည် သူ၏လက်ကို ဝှေ့ယမ်းကာ တန်စီယုကို တောင်မြစ်ပန်းချီကားထဲသို့ ထားလိုက်ပြီးနောက် ထိုနေရာတွင် ဆက်လက် အဆင့်ဖြတ်ကျော်၍ ဗြဟ္မာသစ်သီး၏ စွမ်းအင်များကို ဖြည်းညှင်းစွာ ချေဖျက်စေခဲ့သည်။

ထို့နောက် ချီစွမ်းအင်ကို အသုံးပြုကာ ဧရာမလက်နှစ်ခုကို ဖန်တီးပြီးနောက် ဗြဟ္မာသစ်ပင်ကို မြေပြင်မှ ဆွဲထုတ်၍ တောင်မြစ်ပန်းချီကားထဲရှိ ဆေးဖက်ဝင်တောင်ပေါ်သို့ စိုက်ပျိုးလိုက်သည်။ မှန်သည်၊ ချူးယွင်ဖန်း မှန်းဆထားသည့်အတိုင်း ဗြဟ္မာသစ်ပင်သည် ငြင်းဆန်ခြင်း မရှိခဲ့ပေ။

ချူးယွင်ဖန်းသည် အနက်ရောင်နဂါးဘုရင်ကို ပြောလိုက်သည်။

"ဒီကနေ ထွက်သွားရအောင်"