အခန်း (၁၁၁၇-၁၁၁၉)

အခန်း (၁၁၁၇) စစ်တပ်စေလွှတ်ပြီး အနန္တနတ်ဆိုးတောင်တန်းကို သုတ်သင်ရှင်းလင်းခြင်း

သမ္မတကြီးသည် ကနဦးတွင် ချူးယွင်ဖန်း ပေးအပ်ခဲ့သော နှလုံးသားကောင်းကင်ကာကွယ်ဆေးကို ယုံကြည်မှုသိပ်မရှိခဲ့ပေ။ သူသည် နောက်ဆုံး ရုန်းကန်မှုပြုလုပ်ရန် ကြိုးစားခြင်းဖြစ်သောကြောင့် အရေးကြီးဆုံး အခိုက်အတန့်တွင် ဆေးကို မျိုချလိုက်သည်။

မူလတွင် သူ၏ကိုယ်တွင်းအင်္ဂါများ ကွဲအက်ကာ သူ၏ အသက်ဓာတ်များ ပြတ်တောက်သွားသည်ဟု ခံစားလိုက်ရသည်။ သူ၏အသက်ဓာတ်များကို ဖြတ်တောက်လိုက်ပြီးနောက် သူ့ခန္ဓာကိုယ်အတွင်းမှ အသက်ဓာတ်များ ထွက်ပေါ်လာ၍ သူ့ကို ထောက်ပံ့ပေးထားမည်ဟု မည်သူသိမည်နည်း။ ဤအသက်ဓာတ်များသည် မများပြားလှသော်လည်း အလွန်ပြင်းထန်ပေသည်။ ဦးခေါင်းသို့မဟုတ် နှလုံးသားတစ်ခုလုံး ကွဲကြေသွားခြင်းမဟုတ်ပါက သေဆုံးနိုင်မည်မဟုတ်ပေ။

ယင်းဖြစ်စဉ်ကြောင့် ယခင် ချူးယွင်ဖန်းပြောခဲ့သည့်စကားကို သမ္မတကြီး သတိရသွားလေသည်။ ဒဏ်ရာသည် မည်မျှ ပြင်းထန်နေပါစေ ကုသ၍ရနိုင်သည်၊ သို့သော်လည်း တစ်ချိန်တည်းမှာပင် သူ၏ ကျင့်ကြံမှုများသည် ဗလာနတ္ထိအဖြစ် ပျောက်ကွယ်သွားနိုင်သည်။ သမ္မတကြီးသည် သူ၏စွမ်းအားများ တဖြည်းဖြည်း ပျောက်ကွယ်သွားသကဲ့သို့ ခံစားလိုက်ရသည်။ ပို၍တိကျစွာပြောရမည်ဆိုလျှင်၊ သူ၏ဆဲလ်များရှိ စွမ်းအင်များသည် တဖြည်းဖြည်း အသက်ဓာတ်အဖြစ် ပြောင်းလဲသွားပြီးနောက် သူ၏ဒဏ်ရာကို ပြုပြင်နေသည်။

သူသည် ဤသို့သောအခြေအနေမျိုးဖြင့် ရှင်သန်နိုင်ခဲ့သည်။ ချူးယွင်ဖန်း၏ ကျင့်ကြံမှုအဆင့်ဖြင့် သူသည် သမ္မတကြီး၏ အခြေအနေမှန်ကို မြင်တွေ့နိုင်သည်။ သမ္မတကြီး၏ အသက်ဓာတ်များသည် တည်ရှိနေဆဲဖြစ်၍ နှလုံးသားကောင်းကင်ကာကွယ်ဆေးသည် အကျိုးသက်ရောက်ခဲ့သည်မှာ သိသာထင်ရှားသည်။ ထို့ကြောင့် ချူးယွင်ဖန်းက သက်ပြင်းတစ်ချက်ချလိုက်သည်။

"ဟိုအဘိုးကြီးရော ဘယ်လိုလဲ၊ သမ္မတကြီး" ကျန်းယွမ်ပင်သည် အရာအားလုံးအဆင်ပြေကြောင်း သိရှိပြီးနောက် မေးမြန်းလိုက်သည်။

"ကျုပ် သူ့ကို မသတ်နိုင်ခဲ့ဘူး၊ သူ ထွက်ပြေးသွားပြီ" သမ္မတကြီးက ရုတ်တရက် သက်ပြင်းချလိုက်သည်။

ဤနတ်ဘုရားကို မသတ်ဖြတ်နိုင်ခဲ့ခြင်းသည် သူ နောင်တအရဆုံးအရာဖြစ်နိုင်သည်။ သူသည် ဤတိုက်ပွဲအတွက် အချိန်အတော်ကြာ ပြင်ဆင်ခဲ့သည့်အပြင် ထိုနတ်ဘုရားကို သတ်ရန် သူ၏အသက်ကိုပင် စွန့်စားခဲ့သည်။ ချူးယွင်ဖန်းသည် မြှားတစ်စင်းပစ်ခတ်၍ နတ်ဘုရားဆိုသူကို ပြင်းထန်စွာ ဒဏ်ရာရရှိရန်အတွက် သူ၏အတွင်းစွမ်းအင်များကိုပင် ကုန်ဆုံးခဲ့ရသည်။ ဤသည်မှာ ကောင်းမွန်သော စတင်မှုတစ်ခုဖြစ်သည်။

ဤသို့ဆိုလျှင်ပင် နတ်ဘုရားသည် လွတ်မြောက်နိုင်ခဲ့သည်။ သမ္မတကြီးသည် ယင်းဖြစ်စဉ်ကြောင့် ၎င်းတို့ကြားရှိ ကွာဟချက်ကို လေးလေးနက်နက် သဘောပေါက်သွားလေသည်။ ရွှေအမတေအဆင့်နှင့် နတ်အဆင့်အကြားက ကွာဟချက်သည် အလွန်ကြီးမားသည်။ သမ္မတကြီးသည် သူ၏တိုက်ခိုက်ရေးစွမ်းရည်ကို ထိုအဆင့်အထိ တွန်းအားပေးနိုင်ခဲ့သော်လည်း ၎င်းသည် စစ်မှန်သော ရွှေအမတေအဆင့်မဟုတ်ခဲ့ပေ။ ချူးယွင်ဖန်းသာ ကနဦးတွင် ဤနတ်ဘုရားကို မထိခိုက်နိုင်ခဲ့ပါက၊ အကျိုးဆက်များသည် တွေးကြည့်၍ပင် မရနိုင်ပေ။ အနိုင်ရရှိရန် အခွင့်အလမ်းဟူ၍ လုံးလုံးလျားလျားရှိနိုင်မည် မဟုတ်ပေ။

"ဒါပေမယ့် ကျုပ်တောင် ဒီလောက်ဒဏ်ရာရနေရင် သူလည်း ဒီထက်တော့ ပိုကောင်းနိုင်မှာမဟုတ်ဘူးဆိုတာ သေချာတယ်။ ကျုပ် သူ့ကို သတ်နိုင်လုနီးပါးပဲ" သမ္မတကြီး၏မျက်နှာတွင် စိတ်ဓာတ်ကျသည့် အမူအရာမျိုး ပေါ်ပေါက်လာပြီးနောက် ချူးယွင်ဖန်းကို လှည့်ကြည့်လိုက်သည်။

"ဘာပဲဖြစ်ဖြစ် မင်းမှာ အချိန်တွေ အများကြီးရှိပါတယ်။ သူ အနည်းဆုံး သုံးလလောက်တော့ ပေါ်လာမှာ မဟုတ်ဘူး"

"နားလည်ပါပြီ" ချူးယွင်ဖန်းက ပြောသည်။

သမ္မတကြီးသည် ချူးယွင်ဖန်းအတွက် သုံးလခန့် အချိန်ဆွဲပေးနိုင်ရန် သူ၏အသက်ကိုပင် အသုံးချလုနီးပါး ပြုလုပ်ခဲ့သည်။ သမ္မတကြီးက သူ၏အသက်ကို စွန့်စား၍ ဤနတ်ဘုရားကို ပြင်းပြင်းထန်ထန် ဒဏ်ရာရရှိစေခဲ့သည်အတွက် ဤရုတ်တရက်တိုက်ပွဲသည် နောက်ဆုံးတွင် ပြီးဆုံးသွားခဲ့သည်။

ဤတိုက်ပွဲရလဒ်သည် ပြည်ထောင်စုကို ထိတ်လန့်သွားစေသည်။ နတ်အဆင့်ညီလာခံ ကျင်းပနေစဉ်အတွင်း မီဒီယာအများအပြားသည် မြို့တော်တွင် စုရုံးနေကြသောကြောင့် မြို့တော်ကို တိုက်ခိုက်နေသည့် မရေတွက်နိုင်သော မွန်းစတားများ၏ ကြောက်မက်ဖွယ်မြင်ကွင်းကို မရည်ရွယ်ဘဲ တိုက်ရိုက်ထုတ်လွှင့်ခဲ့ကြသည်။

၎င်းသည် ယခုအချိန်အထိ နတ်ဆိုးများနှင့် အဏ္ဏဝါမျိုးနွယ်စုများ၏ ဒုတိယအကြီးမားဆုံးတိုက်ခိုက်မှုဖြစ်၍ ၎င်းတို့၏ပစ်မှတ်သည် မြို့တော်ဖြစ်သည်။ အကယ်၍ မရေတွက်နိုင်သောကျွမ်းကျင်သူများ သို့မဟုတ်၊ ချူးယွင်ဖန်းနှင့် သမ္မတကြီး၏ အံ့အားသင့်ဖွယ်စွမ်းအင်ကြောင့်သာမဟုတ်ပါက၊ မြို့တော်ကို တယ်လီပို့စနစ်ဖွဲ့စည်းပုံဖြင့် သတ်ဖြတ်သွားပေလိမ့်မည်။ မြို့တော်သည် ပြည်ထောင်စုတပ်မတော်တစ်ခုလုံး မတုံ့ပြန်နိုင်မီ သိမ်းပိုက်ခံရနိုင်သည်။

လူတိုင်း အလွန် အထိတ်တလန့်ဖြစ်သွားပြီးနောက် အလွန်ဒေါသထွက်သွားကြသည်။ နတ်ဆိုးများနှင့် အဏ္ဏဝါမျိုးနွယ်စုတို့သည် လူသားများကို သုတ်သင်ရန် အမှန်တကယ် စီစဉ်ခဲ့ကြသည်။ ဤအကြောင်းအရာနှင့် ပတ်သက်၍ ယုံမှာသံသယဖြစ်ရန် မလိုအပ်ပေ။ ယခုခေတ်၏ လူများသည် ပျက်စီးခြင်း၏ အရှိန်အဝါများ ချဉ်းကပ်လာကြောင်း ပထမဆုံးအကြိမ် ခံစားလိုက်ရသည်။ တခဏအတွင်းမှာပင် အင်တာနက်တစ်ခုလုံး ရုတ်ရုတ်သဲသဲဖြစ်သွားခဲ့သည်။

"လက်စားချေရမယ်။ နတ်ဆိုးတွေနဲ့ အဏ္ဏဝါမျိုးနွယ်စုတွေ မသေမချင်း ကျုပ်နှလုံးသား မသက်သာရာရမှာမဟုတ်ဘူး"

"ကျုပ်တို့တွေ အမြဲတမ်း သည်းခံနေလို့မဖြစ်ဘူး။ နျူကလီးယားဗုံးတွေအားလုံး ပစ်လွှတ်ရမယ်။ ဒင်းတို့က ကျုပ်တို့လူသားတွေကို ဖျက်ဆီးချင်နေမှတော့ ကျုပ်တို့လူသားတွေရဲ့ သွေးဆာမှုကိုလည်း ပြရတာပေါ့"

"ဒီအမျိုးယုတ်တွေကို သတ်ပစ်ရမယ်"

လူထု၏ စိတ်ခံစားချက်များသည် အချိန်အတော်ကြာသည်အထိ လှုပ်ရှားနေခဲ့သည်။ အသေးစိတ်အချက်အလက်များကို ပိုမိုထုတ်ဖော်ပြသလာသည်နှင့်အမျှ မွန်းစတားအများစုကို တားဆီးနိုင်ခဲ့သော်လည်း အသေအပျောက်များစွာရှိနေဆဲဖြစ်သည်။

ထိုမှတစ်ဆင့် သမ္မတကြီး ကွယ်လွန်သွားသည်ဟူသော သတင်းများ ပျံ့နှံ့လာခဲ့၏။ ပြည်ထောင်စုအတွင်း သမ္မတကြီး၏ အဆင့်အတန်းအရ မည်သို့သော ရုန်းရင်းဆန်ခတ်မျိုးဖြစ်ပေါ်သွားမည်ကို တွေးကြည့်၍ပင် သိနိုင်သည်။ မရေတွက်နိုင်သော လူများစွာသည် လက်စားချေရန် အော်ဟစ်သောင်းကျန်းနေကြသည်။ နတ်ဆိုးများနှင့် အဏ္ဏဝါမျိုးနွယ်စုများသည် လူသားမျိုးနွယ်ကို သုတ်သင်ရှင်းလင်းတော့မည်ဖြစ်သောကြောင့် ၎င်းတို့သည်လည်း မည်သည်ကိုမျှ ပူပန်နေရန် မလိုတော့ပေ။

"ဒင်းတို့ကို လက်စားချေရမယ်။ ဒင်းတို့က မြို့တော်ကို ကျူးကျော်လာမှတော့ ကျုပ်တို့ကလည်း အနန္တနတ်ဆိုးတောင်တန်းတဲ့ဆီ တောက်လျှောက် သတ်ဖြတ်ပစ်မယ်"

မရေတွက်နိုင်သော လူများစွာသည် ဒေါသတကြီး အော်ဟစ်နေကြသည်။ မြို့တော်၏ သမ္မတအိမ်တော်တွင် သမ္မတကြီးသည် အနောက်ဘက်ပန်းခြံတွင် အဖြူရောင် ၀တ်စုံဖြင့် ထိုင်နေခဲ့သည်။ ဖြူဖျော့နေသော မျက်နှာကြောင့်သာမဟုတ်ပါက၊ သူသည် သေရေးရှင်ရေးနှင့် တွေ့ကြုံပြီးနောက် ငရဲမှ လွတ်မြောက်ခဲ့သူဟု မည်သူမျှ ထင်မှတ်ကြမည် မဟုတ်ပေ။ သူ့ဘေးနားတွင်ရှိနေသူသည် ချူးယွင်ဖန်းမှလွဲ၍ အခြားလူမဟုတ်ပေ။

“ကျုပ်သာ ကိုယ်တိုင်ကိုယ်ကျ မကြုံခဲ့ရရင် တကယ် လွတ်မြောက်နိုင်ခဲ့တာကို ယုံတောင် ယုံမှာ မဟုတ်ဘူး” သမ္မတကြီးက အပြုံးဖြင့် ပြောလိုက်သည်။

သုံးရက်ကြာမြင့်ခဲ့သော်ငြားလည်း ၎င်းဖြစ်စဉ်သည် သူ့အတွက် ဆန်းသစ်သော အတွေ့အကြုံတစ်ခုအဖြစ်ရှိနေဆဲဖြစ်သည်။

"ဒီနှလုံးသားကောင်းကင်ကာကွယ်ဆေးက တကယ်ကို အစွမ်းထက်တာပဲ။ မင်းနဲ့ပတ်သက်တဲ့ အချက်အလက်တချို့ကို ကျုပ်အရင်က ဖတ်ဖူးတယ်။ မင်းက ဆေးမျိုးပေါင်းစုံကို ဖော်စပ်ခဲ့တာ၊ ကျုပ် ထင်တာမမှားဘူးဆိုရင် မင်း ဆေးပညာအမွေအနှစ်ကို ရရှိခဲ့တာပဲ"

ချူးယွင်ဖန်းသည် မည်သည့်စကားမျှ ပြန်မပြောဘဲ ပြုံးရုံသာပြုံးလိုက်သည်။ ယခုအချိန်၌ သမ္မတကြီး၏ ခန္ဓာကိုယ်တွင် ကျင့်ကြံမှုစွမ်းအင်များ လုံးလုံးလျားလျား မရှိတော့ပေ။ သူ၏ ကျင့်ကြံမှုစွမ်းအင်များ ပျက်စီးသွားခဲ့သော်လည်း အကယ်၍ သမ္မတကြီးသည် ပျော့ပျောင်းသော ပန်းသီးဟု ထင်မှတ်ခဲ့ပါက၊ ၎င်းတို့အားလုံး အလွန် မှားယွင်းသွားပေလိမ့်မည်။ သူ့၏ ကျင့်ကြံမှုစွမ်းအင်များ ပျက်စီးသွားသော်လည်း သူ့ခန္ဓာကိုယ်၏ နှစ်ပေါင်းများစွာကြာ လေ့ကျင့်မှုကြောင့် သူ့ကို အလွန် ထူးခြားစေခဲ့သည်။

သူ၏ တိုက်ခိုက်ရေးစွမ်းအင်သည် အထွတ်အထိပ်အခြေအနေနှင့် မနှိုင်းယှဉ်နိုင်သော်လည်း သာမန်နတ်အဆင့်များကို သတ်ဖြတ်ခြင်းသည် သူ့အတွက် စားသောက်ခြင်းကဲ့သို့ပင် လွယ်ကူနေဆဲဖြစ်သည်။ ကျင့်ကြံမှုများ လုံးလုံးလျားလျား ဆုံးရှုံးသွားပုံပေါ်သော သူ၏အသွင်အပြင်ဖြင့် လှည့်စားခံလိုက်ရပါက၊ ထိုလူသည် သေခြင်းတရာနှင့် ဝေးကွာမည်မဟုတ်ပေ။ သမ္မတကြီးသည် မေးခွန်းများ ထပ်မမေးတော့ဘဲ သူ၏ ကနဦးသုံးသပ်ချက်ကိုသာ အတည်ပြုလိုက်သည်။

"ဒီဆေးရဲ့ အာနိသင်က အစွမ်းထက်ပေမယ့် သမ္မတကြီးရဲ့ ကျင့်ကြံမှုတွေ ပျက်စီးသွားရမှာကိုတော့ ကျွန်တော် စိုးရိမ်မိပါတယ်" ချူးယွင်ဖန်းက မြည်တမ်းလိုက်သည်။

"အသက်ရှင်နေရတာကိုပဲ ကျုပ်ကျေနပ်နေပါပြီ၊ ဘာပဲဖြစ်ဖြစ် သေခြင်းတရားကနေ လွတ်မြောက်နိုင်မှာမဟုတ်ဘူးလို့တောင် ကျုပ် ထင်ထားခဲ့တာလေ"

သမ္မတကြီးသည် အလွန် ပွင့်လင်းလှသည်။ သုံးရက်လောက်ကြာမြင့်ပြီးနောက် သူ၏ဒဏ်ရာများ လုံးလုံးလျားလျား သက်သာသွားခဲ့သည်။ အကယ်၍ သူ၏စွမ်းအင်အားလုံးကို ဆုံးရှုံးခဲ့ရခြင်းကြောင့် မဟုတ်ပါက၊ သေခြင်းတရားနှင့် တွေ့ကြုံခဲ့ရသည့်ဖြစ်စဉ်ကို မည်သူမျှ သိနိုင်မည်မဟုတ်ပေ။

ပြီးနောက် သမ္မတကြီးက မျက်ခုံးပင့်၍ ပြောလိုက်သည်။

“စစ်တပ်တွေရော အဆင်သင့်ဖြစ်ပြီလား”

"အဆင်သင့်ဖြစ်နေပါပြီ၊ ဒီတစ်ခါတော့ အနန္တနတ်ဆိုးတောင်တန်းကို ချုပ်ငြိမ်းမှဖြစ်မယ်။ နတ်ဆိုးတွေက အဏ္ဏဝါမျိုးနွယ်စုတွေနဲ့ အကြိမ်ပေါင်းများစွာ ပူးပေါင်းဆောင်ရွက်ပြီးပြီ။ ဒီအတိုင်းသာ ဆက်သွားနေမယ်ဆိုရင် ဒါက ပြည်ထောင်စုရဲ့ ဆူးညှောင့်ခလုတ်ဖြစ်လာမှာ သေချာတယ်။ အခု နတ်ဘုရားဆိုတဲ့လူ ဒဏ်ရာရနေတော့ နတ်ဆိုးတွေကို သုတ်သင်ဖို့ အချိန်တန်ပြီ" ချူးယွင်ဖန်းက ပြောလိုက်သည်။

ချူးယွင်ဖန်းနှင့် သမ္မတကြီးတို့သည် အနန္တနတ်ဆိုးတောင်တန်းဆီ စစ်တပ်များစေလွှတ်ရန် သဘောတူညီခဲ့ကြကြောင်း မည်သူမျှ မသိခဲ့ကြပေ။ ၎င်းတို့သည် နှစ်ပေါင်းများစွာ ပြည်ထောင်စုကို တစ်ရှိန်ထိုး နှောင့်ယှက်ခဲ့သော ပြဿနာကို ဖြေရှင်းလိုသည့်အပြင် နတ်ဘုရားဆိုသူ၏ လက်တစ်ဖက်ကိုလည်း ဖြတ်တောက်လိုကြသည်။

အခန်း (၁၁၁၈) အနန္တနတ်ဆိုးတောင်တန်းကို ထောင်ချီသော စစ်တပ်များ ချိန်ရွယ်ထားခြင်း

လက်ရှိ ပြည်ထောင်စုသည် နတ်ဆိုးများနှင့် အဏ္ဏဝါမျိုးနွယ်စုများကို တစ်ပြိုင်နက်တည်း ရင်ဆိုင်ရမည်ဖြစ်သောကြောင့် အလွန်ဒုက္ခရောက်ရသည့် အခြေအနေတစ်ခုဖြစ်ကြောင်း သက်သေပြနေသည်။ အထူးသဖြင့် အဏ္ဏဝါလူနွယ်စုများ၏နောက်ကွယ်တွင် လျှို့ဝှက်ဆန်းကြယ်သည့် နတ်ဘုရားဆိုသူရှိနေသောအခါ၊ ဤသည်မှာ ပြည်ထောင်စု၏ အခြေအနေကို ပို၍ ဆိုးရွားစေသည်။

အခုအခါ သမ္မတကြီးသည် ပြည်ထောင်စုအတွက် သုံးလခန့် အချိန်ဆွဲနိုင်ခဲ့သောကြောင့် ပြည်ထောင်စုသည် သုံးလအတွင်း အနန္တနတ်ဆိုးတောင်တန်းကို လုံးလုံးလျားလျား သုတ်သင်နိုင်မည်ဖြစ်သည်။ ပြည်ထောင်စု၏ အခြေခံအင်အားသည် နတ်ဆိုးများထက်သာလွန်နေပြီဖြစ်သည်။ ယခုကဲ့သို့ ၎င်းတို့၏ စွမ်းဆောင်ရည်မြင့် တိုက်ခိုက်ရေးစွမ်းအင်နှင့် နတ်ကုန်းမြေ၏ ကျွမ်းကျင်သူများအပြင် ချူးယွင်ဖန်း ဖော်စပ်ခဲ့သော နတ်စွမ်းအင်ဖြည့်တင်းဆေး အလုံးနှစ်ရာတို့ကို ပေါင်းထည့်လိုက်သောကြောင့် ယခုအခါ အကျိုးအမြတ်များကို ရိတ်သိမ်းရန် အချိန်ကျရောက်ပြီဖြစ်သည်။

နတ်အဆင့်ကျွမ်းကျင်သူ အယောက်နှစ်ရာကျော်သည် တစ်ဦးပြီး တစ်ဦး ပေါ်ထွန်းလာကြသည်။ ၎င်းတို့အားလုံးသည် ပထမမြောက် နတ်အဆင့်ကျွမ်းကျင်သူများဖြစ်ကြသော်လည်း သာမန်မွန်းစတားများကို သုတ်သင်ရန် လုံလောက်ကြသည်။ ၎င်းတို့တွင် နတ်အဆင့်ကျွမ်းကျင်သူ စုစုပေါင်း အယောက်နှစ်ရာကျော်ရှိနေသည်။ ပြည်ထောင်စုသည် မကြုံစဖူး အင်အားကြီးမားလာသည်ဟုပင် ဆိုနိုင်သည်။ ဤသည်မှာ နတ်ဆိုးများကို လုံးလုံးလျားလျား သုတ်သင်ရန် အခွင့်ကောင်းဖြစ်သည်။

အနန္တနတ်ဆိုးတောင်တန်းသည် အဏ္ဏဝါမျိုးနွယ်စုနှင့် ကွဲပြားခြားနားသည်။ အဏ္ဏဝါမျိုးနွယ်စုများသည် နှစ်ပေါင်းများစွာ ပြန့်ကျဲနေ၍ မညီညွတ်သော မျိုးနွယ်စုတစ်ခုဖြစ်သည်။ နတ်ဘုရားဆိုသူသည် အဏ္ဏဝါမျိုးနွယ်စုများကို ပေါင်းစည်းလိုက်သည့်အခါမှသာ ပြည်ထောင်စုကို အမှန်တကယ် ခြိမ်းခြောက်မှုဖြစ်လာလေသည်။

ပြီးနောက် အနန္တနတ်ဆိုးတောင်တန်းသည် ၎င်းတို့နှင့် ဆန့်ကျင်ဘက်ဖြစ်သည်။ ၎င်းသည် နတ်ဆိုးမျိုးနွယ်၏ စစ်မှန်သည့် အချက်အချာကျ တော်ဝင်နန်းတော်ဖြစ်သည်။ ခွန်းလွန်နယ်မြေတွင် ထောင်ပေါင်းများစွာသော မွန်းစတားများရှိနေသောကြောင့် ပြည်ထောင်စုသည် ၎င်းတို့အားလုံးကို ကိုယ်ပိုင်အင်အားဖြင့် သတ်ဖြတ်ရန် မဖြစ်နိုင်ပေ။

ထိုသို့ပြုလုပ်လျှင် အဓိပ္ပါယ်မဲ့နေပေလိမ့်မည်။ လူသားသိုင်းပညာ ဖွံ့ဖြိုးတိုးတက်မှုသည် ထိုမွန်းစတားများမပါရှိဘဲ မလုပ်ဆောင်နိုင်ပေ။ သို့သော် အနန္တနတ်ဆိုးတောင်တန်းသည် ပြည်ထောင်စုအတွက် ဆိုးရွားသော အကျိတ်ကြီးဖြစ်ခဲ့သည်။ ၎င်းတို့ ပျောက်ကွယ်သွားသည်နှင့် နတ်ဆိုးများသည်လည်း အဏ္ဏဝါမျိုးနွယ်စုများကဲ့သို့ ပြန့်ကျဲသွားပေလိမ့်မည်။ လူသားအခြေစိုက်မြို့များကို တိုက်ခိုက်ရန်အတွက် ဤမျှသော မွန်းစတားများစွာကို စုဆောင်းရန် မဖြစ်နိုင်ပေ။

၎င်းတို့သည် အနန္တနတ်ဆိုးတောင်တန်း၏ ဝင်ရောက်စွက်ဖက်မှုမရှိဘဲ၊ ပြည်ထောင်စုကို ခြိမ်းခြောက်နိုင်မည် မဟုတ်ပေ။ နတ်ဘုရားဆိုသူသည် ယခုအခါ အနီးအနားတွင် မရှိသောကြောင့် ၎င်းတို့ကို ဖယ်ရှားရန် အကောင်းဆုံး အခွင့်အရေးဖြစ်သည်။

"ဟုတ်တယ်။ အနန္တနတ်ဆိုးတောင်တန်းကို ဖိနှိပ်ဖို့ စိတ်ကူးထားတာကြာပြီ။ ကံမကောင်းစွာနဲ့ပဲ၊ ကျုပ်ရဲ့ အင်အားက သူတို့ကို လုံးလုံးလျားလျား ချေမှုန်းဖို့ မလုံလောက်သေးဘူး။ ဒါပေမယ့် မင်းကတော့ ခြားနားတယ်။ မင်းရဲ့ လက်ရှိ အင်အားက ကျုပ်ရဲ့ အထက်မှာရှိနေတော့ နတ်ဆိုးတွေထဲမှာ ရွှေအမတေအဆင့်ကျွမ်းကျင်သူ မရှိဘူးဆိုရင် ဘယ်သူမှ မင်းရဲ့ ပြိုင်ဘက်ဖြစ်နိုင်မှာ မဟုတ်ဘူး" သမ္မတကြီးက သက်ပြင်းချလိုက်သည်။

"ကျုပ်တို့နဲ့ ယှဉ်လိုက်ရင် နတ်ဆိုးတွေထဲမှာ အသန်မာဆုံး နတ်အဆင့်တွေက သေချာပေါက် ကျုပ်တို့ထက် သာလွန်တာပေါ့၊ ဒါပေမယ့် အခု ကျုပ်တို့က သူတို့ထက် ပိုပြီးသန်မာနေပြီဆိုတော့ အနန္တနတ်ဆိုးတောင်တန်းကို ဖျက်ဆီးဖို့ အချိန်တန်ပြီ"

"ဟုတ်ကဲ့ပါ သမ္မတကြီး" ချူးယွင်ဖန်းက ခေါင်းညိတ်လိုက်သည်။ သူသည် စိတ်ထဲတွင် မည်သည်ကိုမျှ မခံစားရပေ။ ဤသည်မှာ မျိုးစိတ်စစ်ပွဲတစ်ခုဖြစ်သည်။ ပြည်ထောင်စုသည် ဤလှုပ်ရှားမှုဖြင့် ခွန်းလွန်နယ်မြေကို လွှမ်းမိုးထားနိုင်ပေလိမ့်မည်။

စစ်အမိန့်စာများ ထုတ်လွှတ်လိုက်သည်နှင့်အမျှ ပြည်ထောင်စု၏ ထိပ်တန်းတပ်များ စတင်လှုပ်ရှားလာကြသည်။ ကမ္ဘာတစ်ဝှမ်းလုံးမှ လက်ရွေးစင်တပ်ဖွဲ့ဝင် သန်းပေါင်းများစွာကို စုစည်းပြီးနောက် မြို့တော်တွင် စုရုံးခဲ့ကြသည်။ မြို့တော်တွင် ကြီးမားသော တယ်လီပို့စနစ်ဖွဲ့စည်းပုံကို တပ်ဆင်ထားကြသည်။ နတ်ဆိုးများသည်သာ တယ်လီပို့စနစ်ဖွဲ့စည်းပုံ၏ အသုံးပြုနည်းကို သိရှိထားခြင်း မဟုတ်ကြပေ။ ပြည်ထောင်စုသည်လည်း ဤကဏ္ဍတွင် အားနည်းသူများ မဟုတ်ကြပေ။

သို့သော်လည်း တယ်လီပို့စနစ်ဖွဲ့စည်းပုံ၏ စွမ်းအင်သုံးစွဲမှုသည် ကြီးမားလှသည်။ ပုံမှန်အခြေအနေအရ၊ ပြည်ထောင်စုသည် စစ်တပ်များကို တယ်လီပို့ရန် တယ်လီပို့စနစ်ဖွဲ့စည်းပုံကို အသုံးပြုရန် ဆန္ဒကြရှိမည်မဟုတ်ပေ။ မည်သို့ပင်ဆိုစေကာမူ၊ စစ်သင်္ဘောများ၏ သယ်ယူပို့ဆောင်ရေး အရှိန်အဟုန်သည်လည်း အလွန်လျင်မြန်လှသည်။

သို့သော် ယခုအချိန်သည် ကွဲပြားခြားနားသည်။ ၎င်းသည် နတ်ဆိုးများကို ဖျက်ဆီးမည့် တိုက်ပွဲဖြစ်သည့်အပြင် နတ်ဆိုးများနှင့် အဏ္ဏဝါမျိုးနွယ်စုများ ပူးပေါင်း၍ မြို့တော်ကို တိုက်ခိုက်ခဲ့သည့်အတိုင်း ၎င်းတို့ကို သတိလက်လွတ်ဖြစ်စေရန် ရည်ရွယ်ခြင်းဖြစ်သည်။ ၎င်းတို့အားလုံး ထွက်ခွာခါနီးမှသာ ၎င်းတို့၏ ပစ်မှတ်သည် အနန္တနတ်ဆိုးတောင်တန်းဖြစ်ကြောင်း လူတိုင်းကို အသိပေးလိုက်ကြသည်။ တပ်မှူးအဆင့် စစ်သားများသာ ပစ်မှတ်ကို ကြိုသိရှိထားကြ၍ အခြားလူများသည် စုဝေးရန် စစ်တပ်အမိန့်စာသာရရှိခဲ့ကြသည်။

"ဒီနေ့ဟာ ကျုပ်တို့တွေ အနန္တနတ်ဆိုးတောင်တန်းကို နှိမ်နင်းတဲ့နေ့ပဲ၊ နှစ်ရာနဲ့ချီပြီး မရေတွက်နိုင်တဲ့ ဘိုးဘေးတွေက ကျုပ်တို့အတွက် တိုက်ပွဲဝင်ခဲ့ပြီး ကြီးမားတဲ့ နယ်မြေတစ်ခုကို သိမ်းပိုက်ခဲ့ကြတယ်။ ဒါပေမယ့် ဒီဖြစ်စဉ်အတွင်း ဘိုးဘေးတော်တော်များများရဲ့ သွေးတွေက စစ်မြေပြင်မှာ စွန်းထင်းခဲ့ကြတယ်၊ အခု နတ်ဆိုးတွေက မြို့တော်ကိုတောင် တိုက်ခိုက်ဖို့ ရဲဝံ့နေပြီ။ ဒါဟာ ကျုပ်တို့စစ်သားတွေအတွက် အရှက်ရစရာကိစ္စပဲ။ အခု ဒင်းတို့ရဲ့ သွေးတွေနဲ့ ကျုပ်တို့အရှက်တွေကို ဆေးကြောပစ်ရမယ်။ ခွန်းလွန်နယ်မြေရဲ့ ပိုင်ရှင်က ဘယ်သူလဲဆိုတာပြသပြီး ဒီနတ်ဆိုးတွေ ကြောက်လန့်သွားအောင် လုပ်ကြရအောင်"

စစ်တပ်သည် ၎င်းတို့၏ နောက်ဆုံး စည်းရုံးရေး အလယ်ဗဟို၌ရှိနေသည်။ မြို့တော်သည် လျှပ်တစ်ပြက် တိုက်ခိုက်ခံရသည့်အပြင် သမ္မတကြီးသည်လည်း ဒဏ်ရာအပြင်းအထန်ရရှိသွားခဲ့သည်။ နှစ်များစွာအတွင်း နတ်ဆိုးများကြောင့် လူပေါင်း မည်မျှသေဆုံးခဲ့၍ လူပေါင်း မည်မျှထိခိုက်ဒဏ်ရာရရှိခဲ့ခြင်းမဆိုနှင့် ဤဖြစ်စဉ်သည် စစ်တပ်အတွက် အရှက်ရစရာကိစ္စတစ်ခုဖြစ်သည်။ ယခုအခါ ၎င်းတို့သည် နတ်ဆိုးများကို လက်စားချေရန် စစ်ပွဲဆင်နွှဲတော့မည်ဖြစ်သည်။

၎င်းတို့သည် တပ်ဖွဲ့များကို အများအပြား စည်းရုံးရန်ပင် မလိုအပ်ပေ။ ဤနှစ်များတစ်လျှောက် နတ်ဆိုးများ ကျူးလွန်ခဲ့သော သွေးကြွေးများအကြောင်း လူတိုင်း သိရှိထားကြ၍ နတ်ဆိုးများသည် ၎င်းတို့၏ဘိုးဘေးများစွာကိုပင် သတ်ပစ်ခဲ့ကြသည်။ စစ်လွန်းပျံယာဉ်များသည် ရှေးဟောင်း တယ်လီပို့စနစ်ဖွဲ့စည်းပုံထဲသို့ တစ်စီးပြီး တစ်စီး ဝင်ရောက်သွားပြီးနောက် မြို့တော်မှ ပျောက်ကွယ်သွားလေသည်။ မည်သူမျှ စကားမပြောကြသော်လည်း ၎င်းတို့အားလုံး၏ သွေးများ ဆူပွက်နေသကဲ့သို့ ခံစားလိုက်ရသည်။ ကမ္ဘာကို တုန်လှုပ်စေမည့် တိုက်ပွဲတစ်ခု ဖြစ်ပွားတော့မည်ဖြစ်သည်။

၎င်းတို့သည် ပြည်ထောင်စုတပ်မတော်တွင် အတော်ဆုံး စစ်သားများဖြစ်သောကြောင့် စစ်တိုက်ခိုက်ရန် မကြောက်ရွံ့ကြပေ။ သောင်းနှင့်ချီသော တပ်ဖွဲ့များ၏ အဓိကတိုက်ပွဲဖြစ်၍ ဤသည်မှာ တစ်ဖက်မှ စေလွှတ်လိုက်သည့် တပ်ဖွဲ့ဝင်အရေအတွက်ဖြစ်သည်။ သာမန်ခေတ်တွင်သာဆိုလျှင် မထင်မှတ်ထားလောက်သည့် ကြောက်မက်ဖွယ် အရေအတွက်တစ်ခု ဖြစ်လာပေလိမ့်မည်။

၎င်းတို့အားလုံးသည် အကောင်းတကာ့အကောင်းဆုံး လက်ရွေးစင်စစ်သည်များ ဖြစ်နေကြခြင်းကို မဆိုနှင့် ဤသည်မှာ ခွန်းလွန်ခေတ်၌ပင် ရှားပါးသော စစ်ပွဲကြီးဖြစ်သည်။ ကျယ်ပြောလှသော ခွန်းလွန်နယ်မြေ၏ နက်ရှိုင်းသော တောင်တန်းများကြားတွင် တောင်တန်းသွယ်များစွာရှိနေသည်။ ၎င်းတို့ကို သဘာဝအတိုင်း ဖြစ်တည်နေခြင်းမဟုတ်ဘဲ အင်အားကြီး နတ်အဆင့် ကျင့်ကြံသူတစ်ဦးက နတ်စွမ်းအင်ဖြင့် ပြုလုပ်ထားခြင်းဖြစ်သည်။ ဤတောင်တန်းသွယ်များသည် အနန္တနတ်ဆိုးတောင်တန်း၏ အခြေစိုက်စခန်းဖြစ်သည်။

ဤတောင်တန်းများတွင် မရေတွက်နိုင်သော မွန်းစတားမျိုးနွယ်စုများစွာ နေထိုင်နေကြသည်။ လူအများ စိတ်ကူးထားသည်နှင့်မတူဘဲ၊ အနန္တနတ်ဆိုးတောင်တန်း၏ နေရာတိုင်းတွင် မြင့်မားသော အဆောက်အအုံများရှိနေ၍ လူသားအသွင် ပြောင်းလဲထားသော နတ်ဆိုးများစွာသည် ထိုနေရာများတွင် နေထိုင်နေကြ၏။

အနန္တနတ်ဆိုးတောင်တန်း၏ နက်ရှိုင်းသောနေရာတွင် မရေတွက်နိုင်သော လူသားများသည် ခြေချင်းချိတ်များဖြင့် အလုပ်လုပ်နေကြ၍ မြေအောက်ခန်းများတွင် ပို၍ပင် အကျဉ်းချခံရသူများစွာရှိနေသည်။ သို့သော် ၎င်းတို့သည် မှတ်ဉာဏ်များ ဖယ်ရှားခံထားရ၍ လမ်းလျှောက်နေသည့် အလောင်းကောင်များကဲ့သို့ ကျင့်ကြံရေးအခန်းများတွင် ကြီးပြင်းလာခဲ့ကြသည်။ ၎င်းတို့သည် ဆယ့်ရှစ်နှစ်အရွယ်သို့ ရောက်ရှိသောအခါ အနန္တနတ်ဆိုးတောင်တန်းရှိ အင်အားကြီးနတ်ဆိုးများ၏ စားပွဲပေါ်သို့ ပို့ဆောင်ခံရကာ ၎င်းတို့၏အရသာရှိ အစားအစာများဖြစ်လာပေလိမ့်မည်။

ဤသည်မှာ ဒုက္ခဆင်းရဲတွင်းတွင် နေထိုင်ခဲ့ရသည့် မရေတွက်နိုင်သော လူသားမျိုးနွယ်၏ ဆေးကြောရာနေရာဖြစ်သည်။ ဤနေရာသို့ မည်သူမျှ မရောက်နိုင်သည့်အပြင် ကျူးကျော်ခံရမည်ဟုပင် မည်သူမျှ မတွေးခဲ့မိပေ။ သို့သော် ယခုအခိုက်အတန့်တွင် တောင်တန်းသွယ်များ၏ အပြင်ဘက်တွင် စစ်လွန်းပျံယာဉ်တစ်စင်း ထွက်ပေါ်လာပြီးနောက် နောက်ထပ် စစ်လွန်းပျံယာဉ်များ တစ်စီးပြီးတစ်စီး ပေါ်လာခဲ့သည်။ စစ်လွန်းပျံယာဉ်များ၏ တံခါးပေါက်များ ပွင့်လာသောအခါ မရေတွက်နိုင်သော စက်လက်နက်များသည် ၎င်းတို့၏ အသိုက်အမြုံများမှ ထွက်လာသည့် ပျားများကဲ့သို့ ကောင်းကင်နှင့် မြေကြီးကိုပင် ဖုံးအုပ်သွားလေ၏။

ဤစစ်လွန်းပျံယာဉ်များသည် ကောင်းကင်တစ်ခုလုံးကို ဖုံးလွှမ်းနေသော ဧရာမသားရဲကြီးများနှင့် ဆင်တူသည်။ ဤသည်မှာ သွေးနီရောင်ကမ္ဘာဖြစ်၍ တောင်တန်းတစ်ခုလုံး လူသူဆိတ်ညံနေသည့်အပြင် အကန့်အသတ်မဲ့သော နတ်ဆိုးစွမ်းအင်များ အလွန်သိပ်သည်းလှရာ၊ ၎င်းကို သာမန်မျက်စိဖြင့် မြင်တွေ့နိုင်သည်။ ဤနေရာသို့ ရောက်ရှိလာသူတိုင်းသည် အလွန် စိတ်မသက်မသာဖြစ်ရပေလိမ့်မည်။

ချက်ချင်းဆိုသလိုပင် ရာနှင့်ချီသော နတ်အဆင့်များသည် လေဖိအားနည်းရပ်ဝန်းမှ ထွက်ပေါ်လာသည်။ ၎င်းတို့တစ်ဦးချင်းစီတွင် ပြင်းထန်သော အရောင်အဝါရှိများကြသည်။ ပြည်ထောင်စုသည် ၎င်း၏စစ်တပ်အားလုံးကို စုစည်း၍ တိုက်ပွဲ၏ရလဒ်ကို ဆုံးဖြတ်ရန် ရည်ရွယ်ထားကြသည်။

ချူးယွင်ဖန်းသည် တန်စီယုနှင့်အတူ အနက်ရောင်နဂါးဘုရင်ကို စီးနင်းကာ ပေါ်ပေါက်လာသည်။ အခြားတစ်ဖက်တွင် မိုးကြိုးတောင်ပံသားရဲသည်လည်း ၎င်း၏အတောင်ပံများကို ဖြန့်ကြက်ကာ လျှပ်စီးကဲ့သို့ မြန်ဆန်စွာ ပျံသန်းနေသည်။

အခန်း (၁၁၁၉) နျူကလီးယားဗုံးများက လမ်းဖွင့်ပေးနေ၍ စစ်ပွဲကြီး စတင်လာခြင်း

ပြည်ထောင်စုစစ်တပ်သည် အနန္တနတ်ဆိုးတောင်တန်း၏အပြင်ဘက်တွင် အံ့အားသင့်ဖွယ် အရှိန်အဟုန်ဖြင့် စုရုံးလိုက်ကြသည်။ ထိတ်လန့်တုန်လှုပ်ဖွယ် တိုက်ပွဲတစ်ခု ပေါ်ပေါက်တော့မည်ဖြစ်ရာ၊ ၎င်းသည် ကြီးမားကျယ်ပြန့်သော သက်ရောက်မှုဖြင့် ကမ္ဘာကြီးကို တုန်လှုပ်စေမည်ဖြစ်သည်။ ပြည်ထောင်စု၏ လက်စားချေမှုသည် ဤမျှမြန်ဆန်လိမ့်မည်ဟု နတ်ဆိုးများပင် မထင်မှတ်ခဲ့ပေ။ အဘယ်ကြောင့်ဆိုသော် ပြည်ထောင်စုသမိုင်းတွင် နတ်ဆိုးများကို လက်စားချေရန် ကြိုးပမ်းမှုဟူ၍ တစ်ခါမျှ မရှိခဲ့သောကြောင့်ဖြစ်သည်။

ပြည်ထောင်စုသည် ဤကဏ္ဍတွင် အလွန် ရှေးရိုးဆန်လှသည်။ ၎င်းတို့သည် အစပိုင်းတွင် လက်စားချေရန် စွမ်းရည်မရှိခြင်းဖြစ်သော်လည်း နောက်ပိုင်း၌ ၎င်းတို့တွင် ယုံကြည်မှုမရှိကြပေ။ နတ်ဆိုးများကဲ့သို့သော အင်အားစုကြီးကို မသတ်ဖြတ်နိုင်ပါက နောက်ဆက်တွဲဆိုးကျိုးများကို မှန်းဆ၍ပင် မရနိုင်ပေ။ သို့သော် ယခုအခါ အရာအားလုံး လုံးလုံးလျားလျား ခြားနားသွားပြီဖြစ်သည်။ ခေတ်ကာလ ပြောင်းလဲသွား၍ ပြည်ထောင်စု၏ အင်အားသည်လည်း တစ်ဟုန်ထိုး တိုးမြင့်လာသည်။

ပြည်ထောင်စုသည် ခွန်းလွန်နယ်မြေကို စူးစမ်းလေ့လာလျက် နတ်ဆိုးများကို ဆန့်ကျင်တိုက်ခိုက်ခဲ့သည်မှာ နှစ်ရာနှင့်ချီခဲ့ပြီဖြစ်သည်။ လူအသေအပျောက်သည် ဘီလီယံအရေအတွက် သို့မဟုတ် ဆယ်ဘီလီယံအရေအတွက်အထိရှိခဲ့ကြသည်။ လူသားများသည် သုတ်သင်ရှင်းလင်းခံရလုနီးပါးပင်ဖြစ်ခဲ့ရသည်။ ယခုအခါ နတ်ဆိုးများသည် သွေးဖြင့် ပေးဆပ်ရန် အချိန်တန်ပြီဖြစ်သည်။

ထိုကဲ့သို့ ကြီးမားသော လှုပ်ရှားမှုသည် နတ်ဆိုးများ၏ အာရုံကို သဘာဝအတိုင်း ဆွဲဆောင်သွားစေ၍ နတ်ဆိုးမျိုးနွယ်၏ စစ်လွန်းပျံယာဉ်များသည်လည်း လေထဲသို့ ပျံသန်းလာကြသည်။ ထိုအချိန်တွင် နျူကလီးယားဗုံးသင်္ကေတဖြစ်သည့် ထောင်နှင့်ချီသော ပဲ့ထိန်းဒုံးကျည်များသည် ကောင်းကင်ယံကို ဖြတ်သန်းသွားခဲ့ရာ၊ ၎င်းတို့အနောက်တွင် ကျန်ရစ်ခဲ့သည့် မီးတောက်ရှည်များသည် ကောင်းကင်ကိုပင် ဖုံးလွှမ်းသွားလေသည်။

"နျူကလီးယားဗုံး"

နတ်ဆိုးများထံမှ ဒေါသတကြီး အော်ဟစ်သံကို ကြားလိုက်ရသည်။ အကယ်၍ ယခင်က နျူကလီးယားလှိုင်းသည် ပြည်ထောင်စု၏နတ်အဆင့်များကို လုပ်ကြံရန် ကြံစည်ခဲ့ခြင်းကြောင့် နတ်ဆိုးများနှင့် အဏ္ဏဝါမျိုးနွယ်စုအတွက် သတိပေးချက်ဖြစ်မည်ဆိုလျှင် ယခုကျရောက်လာသည့် ထောင်ပေါင်းများစွာသော နျူကလီးယားဗုံးများသည် သတိပေးချက်ထက် ပိုမည်ဖြစ်သည်။

ဤထောင်ပေါင်းများစွာသော နျူကလီးယားဗုံးများသာ နတ်ဆိုးများကို ထိမှန်ခဲ့ပါက ၎င်းတို့အားလုံး ပြီးဆုံးသွားပေလိမ့်မည်။ နျူကလီးယားဗုံးများသည် ခွန်းလွန်ခေတ်တွင်ပင် ၎င်းတို့၏ ကြောက်မက်ဖွယ် စွမ်းအင်ကြောင့် လူသတ်လက်နက်ကြီးဖြစ်ကြသည်။ ကျရောက်လာမည့် ထောင်ပေါင်းများစွာသော စွမ်းအင်သည် အလွန်ကြောက်မက်ဖွယ်ကောင်းမည်ကို ပြောရန်ပင် မလိုအပ်ပေ။

သို့သော်လည်း အနန္တနတ်ဆိုးတောင်တန်းသည် လုံးလုံးလျားလျား အငိုက်မိသွားကြသည်။ ၎င်းတို့သည် နတ်ဆိုးမျိုးနွယ်တစ်ခုလုံး၏ အခြေစိုက်နေရာဖြစ်၍ ခံစစ်ပိုင်းတွင် လူသားမျိုးနွယ်၏မြို့တော်ထက်ပင် ပို၍မြင့်မားပေသည်။ ချက်ချင်းဆိုသလိုပင် ဒုံးကျည်များ၊ လေဆာရောင်ခြည်များနှင့် နတ်ဆိုးမျိုးနွယ်၏ ကျွမ်းကျင်သူ အသီးသီးတို့သည် နျူကလီးယားဗုံးထောင်ပေါင်းများစွာကို ကြားဖြတ်ဟန့်တားရန် တစ်ပြိုင်နက်တည်း လုပ်ဆောင်လိုက်ကြသည်။

ဘုံး၊ ဘုံး၊ ဘုံး

ပေါက်ကွဲသံများ ဆက်တိုက်ထွက်ပေါ်လာပြီးနောက် ကောင်းကင်တစ်ခုလုံးကို အဆုံးမဲ့အလင်းရောင်များဖြင့် လွှမ်းခြုံသွားလေသည်။ ထောင်နှင့်ချီသော နျူကလီးယားဗုံးများစွာသည် ကမ္ဘာ၏အဆုံးသတ်ကဲ့သို့ တောင်တစ်ခုလုံးကို တခဏချင်း ဖုံးလွှမ်းသွားလေ၏။ ချူးယွင်ဖန်းသည် ကောင်းကင်တွင် မြင့်မားစွာ ပျံသန်းနေသော်လည်း လေထု၏တုန်ခါမှုကို ခံစားရဆဲဖြစ်သည်။ လူပေါင်းများစွာ တိုက်ရိုက် မကြည့်ဝံ့သည့် နျူကလီးယားပေါက်ကွဲမှု၏ အလင်းရောင်သည် သူ့အတွက် ပြဿနာမဟုတ်ပေ။

ဤသည်မှာ လွန်ခဲ့သည့် နှစ်အနည်းငယ်အတွင်း စစ်တပ်ကို ဦးဆောင်ခဲ့သည့် သူ၏ ပထမဆုံးအကြိမ် မဟုတ်သောကြောင့် နျူကလီးယားဗုံးများကို လမ်းဖွင့်ရန် အသုံးပြုခြင်းသည် ပြည်ထောင်စုတွင် အသုံးပြုလေ့ရှိသည့် နည်းလမ်းဖြစ်ကြောင်း သဘာဝကျကျ နားလည်ထားသည်။ ခက်ခဲသော ပြိုင်ဘက်များနှင့် ရင်ဆိုင်ရသောအခါ လမ်းဖွင့်ရန် နျူကလီးယားဗုံးများ အသုံးပြုခြင်းသည် အသေအပျောက် အရေအတွက် လျှော့ချနိုင်သည့် တိုက်ရိုက်နည်းလမ်းဖြစ်သည်။

ထောင်ပေါင်းများစွာသော နျူကလီးယားဗုံးများဖြင့် ဖောက်ခွဲရှင်းလင်းပြီးနောက် ကျန်လုပ်ငန်းစဉ်သည် ၎င်းတို့အပေါ်တွင်သာ မူတည်သည်။ ထောင်ပေါင်းများစွာသော နျူကလီးယားဗုံးအများစုသည် ကြားဖြတ်ဟန့်တားခံရ၍ ၎င်းတို့အနက် ရာဂဏန်းမျှသာ အနန္တနတ်ဆိုးတောင်တန်းပေါ်သို့ ကျရောက်နိုင်ခဲ့ကြောင်း ချူးယွင်ဖန်း၏ နတ်အာရုံဖြင့် သိရှိနိုင်ခဲ့သည်။

သို့သော်လည်း ဤရာချီသော နျူကလီးယားဗုံးများသည် နတ်ဆိုးများ၏ ကာကွယ်ရေးစနစ်ကို တုန်လှုပ်စေရန် လုံလောက်သည်။ အနန္တနတ်ဆိုးတောင်တန်းတွင် မရေတွက်နိုင်သော အတားအဆီးများနှင့် ဖွဲ့စည်းပုံများစွာရှိနေ၍ တောင်ပေါ်တွင် နေထိုင်သူများပင် အတားအဆီး မည်မျှရှိသည်ကို အတိအကျ သိနိုင်မည်မဟုတ်ရာ၊ ၎င်းတို့သည် ခံစစ်အတားအဆီးနှင့် ဖွဲ့စည်းပုံ အရေအတွက်ကို နှစ်များတစ်လျှောက် အဆက်မပြတ် တိုးမြှင့်ခဲ့ကြသည်။

အထူးသဖြင့် ခွန်းလွန်နယ်မြေအတွင်း လူသားများ ဝင်ရောက်လာပြီးနောက် နတ်ဆိုးများသည် လူသတ်လက်နက်မျိုးစုံကို အသုံးပြုခြင်းမှ ကာကွယ်ရန်အတွက် ၎င်း၏ကာကွယ်ရေးစနစ်ကို အဆက်မပြတ် မြှင့်တင်နေကြသည်။ သို့သော် ရာနှင့်ချီသော နျူကလီးယားဗုံးများသည် ခံစစ်အတားအဆီးပေါ် ကျရောက်လာသောအခါ မည်မျှသော ခံစစ်အတားအဆီးများ ချက်ချင်းပျက်စီးသွားမည်ကို မသိနိုင်ကြပေ။

တောင်ပေါ်ရှိ စစ်လွန်းပျံယာဉ်များစွာသည် လေထုထဲတွင် အငွေ့ပျံသွားကြောင်းကိုပင် ချူးယွင်ဖန်း မြင်တွေ့နိုင်သည်။ နောက်ဆက်တွဲ သက်ရောက်လာသော စွမ်းအင်များပင် အနန္တနတ်ဆိုးတောင်ကို ဖြတ်သန်းသွားလေသည်။ တောင်ထိပ်အများအပြားသည် မြေပြင်ပေါ်သို့ ပြိုကျသွား၍ မရေတွက်နိုင်သော အထပ်မြင့် အဆောက်အအုံများလည်း ပြိုလဲသွားခဲ့သည်။ ၎င်းသည် ကြောက်မက်ဖွယ်ကောင်းသည့် ကမ္ဘာအဆုံးသတ် မြင်ကွင်းတစ်ခုကဲ့သို့ ထင်မှတ်ရစေသည်။

သို့သော် ချူးယွင်ဖန်းသည် ဤဖြစ်စဉ်သည် ပြီးဆုံးရန် အလွန် ဝေးကွာသေးကြောင်း သိရှိထားသည်။ အကယ်၍ နတ်ဆိုးများကိုသာ အလွယ်တကူ ဖျက်ဆီးနိုင်ပါက၊ ပြည်ထောင်စုသည် ၎င်းတို့ကို နျူကလီးယားဗုံးများဖြင့် ဖျက်ဆီးပြီးပြီဖြစ်သည်။ တိုက်ပွဲအစစ်အမှန်သည် မကြာမီတွင် ရောက်ရှိလာတော့မည်ဖြစ်သည်။

ပြည်ထောင်စုတပ်မတော်သည် အပြည့်အဝ ပြင်ဆင်ထားကြ၍ နျူကလီးယားဗုံးများ ပျောက်ကွယ်သွားမည့်အချိန်ကို စောင့်ဆိုင်းနေကြသည်။ တစ်ချိန်တည်းမှာပင် ကျန်တပ်သားများစွာသည် တပ်ဖွဲ့အတွင်း တယ်လီပို့စနစ်ဖြင့် ဝင်ရောက်ရန် စောင့်ဆိုင်းနေကြသည်။

ရုတ်တရက်ဆိုသလိုပင် မီတာ ၁၀၀၀၀ ခန့်ရှည်လျားလှသော ဧရာမလွန်းပျံယာဉ်ကြီးသည် ကောင်းကင်ယံ၌ ပေါ်ပေါက်လာသည်။ ၎င်းသည် အလင်းရောင်အားလုံးကို ပိတ်ဆို့ထားသည့် တိမ်တိုက်ကြီးတစ်ခုကဲ့သို့ဖြစ်နေသည်။ ဤသည်မှာ လူသားတို့၏ ဝှက်ဖဲဖြစ်၍ ချူးယွင်ဖန်းသည် ၎င်းနှင့်ပတ်သက်၍ ကျောင်းတက်ကတည်းက သိရှိထားခဲ့သည်။ ၎င်းသည် လူသားနည်းပညာ၏ အထွတ်အထိပ်ဖြစ်သည့် ကြယ်ဖျက်ဆီးသူဖြစ်သည်။

ဤစစ်လွန်းပျံကြီးသည် ကြယ်တာရာစစ်ပွဲအတွက် တီထွင်ဖန်တီးထားခြင်းဖြစ်၍ တစ်နှစ်ပတ်လုံး အာကာသအတွင်း၌ တိုက်ပွဲဝင်နေခဲ့သည်။ ချူးယွင်ဖန်းလျှင်ပင် ၎င်း၏အမည်ကို ကြားဖူးရုံသာ ကြားဖူးထား၍ လူကိုယ်တိုင်ပင် မမြင်တွေ့ဖူးပေ။ ထိုကဲ့သို့သော ဧရာမစစ်လွန်းပျံယာဉ်ကြီးတစ်စင်း၏ ကုန်ကျစရိတ်သည် ပြည်ထောင်စုဒေါ်လာ တစ်ထရီလီယံကျော်မျှ တန်ကြေးရှိသည်။ ပြည်ထောင်စု၏ ခိုင်မာသော ငွေကြေးအရင်းအမြစ်ဖြင့်ပင် ၎င်းကို အများအပြား ထုတ်လုပ်ရန် မတတ်နိုင်သောကြောင့် အရေအတွက် အနည်းငယ်သာရှိကြသည်။

ယခုမူ ဤနေရာတွင် တစ်ခုရှိနေပြီဖြစ်သည်။ ရုတ်တရက်ဆိုသလိုပင် ထိုအချိန်တွင် မီတာရာနှင့်ချီ ကျယ်ပြန့်သော လေဆာရောင်ခြည်ကြီးတစ်ခု ကြယ်ဖျက်ဆီးသူထံမှ ထွက်ပေါ်လာသည်။ ၎င်းသည် တခဏချင်းမှာပင် အနန္တနတ်ဆိုးတောင်တန်းထဲသို့ ရောက်ရှိသွားကာ တောင်ထိပ်များစွာကို ပြိုလဲသွားစေသည်။

ထိုလေဆာရောင်ခြည်ကို မြင်တွေ့လိုက်သောအခါ နတ်အဆင့်ကျွမ်းကျင်သူများစွာ၏ မျက်နှာအမူအရာများ ပြောင်းလဲသွားကြသည်။ ၎င်းတို့သာ ထိုလေဆာရောင်ခြည်ဖြင့် အပစ်ခံခဲ့ရပါက အဆုံးသတ်သွားပေလိမ့်မည်။ ကနဦး စမ်းသပ်မှုပြီးဆုံးသည်နှင့် ကြယ်ဖျက်ဆီးသူပေါ်ရှိ ကျန်ရစ်သော ရောင်ခြည်များကို ပစ်လွှတ်လိုက်ကြသည်။ လေဆာများ၊ ဒုံးကျည်များနှင့် အမြောက်များကို တစ်ပြိုင်နက်တည်း ပစ်ခတ်လိုက်ကြသည်။ ကြယ်ဖျက်ဆီးသူ၏ ပစ်ခတ်မှုစွမ်းအင်သည် ထိပ်တန်းစစ်တပ်နှင့်ပင် နှိုင်းယှဉ်နိုင်သည်။

၎င်းသည် အမှန်တကယ် ရွေ့လျားနေသည် လက်နက်တိုက်ကြီးဖြစ်ပေသည်။ နတ်ကုန်းမြေရှိ ကျွမ်းကျင်သူများ၏ မျက်နှာများ ဖျော့တော့သွားကြသည်။ ဤအချိန်တွင် ၎င်းတို့သည် အလွန်ကံကောင်းသည်ဟု ခံစားနေရသည်။ ချူးယွင်ဖန်း၏တောင်းဆိုချက်ကို သဘောမတူခဲ့ပါက၊ ၎င်းတို့သည် ထိုကဲ့သို့ စစ်လွန်းပျံယာဉ်ဖြင့် နှုတ်ဆက်ခံရပေလိမ့်မည်။

ကြယ်ဖျက်ဆီးသူသည် ၎င်း၏ တိုက်ခိုက်မှုကို စတင်ပြီးနောက် စစ်တပ်သည်လည်း စတင် လှုပ်ရှားလိုက်သည်။ စစ်လွန်းပျံယာဉ်များသည် ၎င်းတို့၏ အပြင်းထန်ဆုံးသော ပစ်ခတ်မှုစွမ်းအင်ဖြင့် အကြိမ်ကြိမ် ပစ်ခတ်လာကြသည်။ ၎င်းတို့သည် အနန္တနတ်ဆိုးတောင်တန်းတစ်ခုလုံးကို တစ်ခါတည်း ဖြိုချပစ်တော့မည့်ဟန်ရှိသည်

ဤတိုက်ခိုက်မှုများသည် ကြောက်မက်ဖွယ်ကောင်းသော်လည်း အများစုကို အတားအဆီးအလွှာများဖြင့် ပိတ်ဆို့ထားကြောင်း ချူးယွင်ဖန်း၏အမြင်အာရုံဖြင့် တွေ့မြင်နိုင်သည်။ မှန်ကန်စွာပြောရမည်ဆိုလျှင် ရှေ့တန်းတပ်၏ တိုက်ခိုက်မှုသည် မရေတွက်နိုင်သည့် အတားအဆီးအလွှာများကို ဖြတ်ကျော်ရန်ဖြစ်၍ အဆုံးတွင်သာ အမှန်တကယ် တိုက်ခိုက်ကြဖြစ်သည်။

အကြိမ်ပေါင်းများစွာ ဗုံးကြဲတိုက်ခိုက်ပြီးနောက် အနန္တနတ်ဆိုးတောင်တန်း၏ စွမ်းအင်အကာအရံများအားလုံးနီးပါး ပျက်စီးသွားခဲ့ရာ၊ တောင်တန်းပေါ်ရှိ နတ်ဆိုးတပ်များနှင့် ကာကွယ်ရေးစနစ်များသည်လည်း ပြန်လည်တိုက်ခိုက်လာကြသည်။

နှစ်ဦးနှစ်ဘက်ကြားက တိုက်ပွဲသည် အမှန်တကယ် စတင်နေပြီဖြစ်သည်။ ပြည်ထောင်စုစစ်တပ်သည် အနန္တနတ်ဆိုးတောင်တန်းဆီ အမှန်တကယ် စတင်ချီတက်နေသည်။ မရေတွက်နိုင်သည့် သန်းပေါင်းများစွာသော စက်လက်နက်များသည် ကောင်းကင်ယံတွင် ပျံဝဲသွားပြီးနောက် တောင်ပေါ်သို့ ဆင်းသက်သွားကြသည်။ စစ်တပ်ဖွဲ့စည်းပုံမှ အင်အားကြီး အရောင်အဝါများ ထွက်ပေါ်လာသည့်အပြင် နတ်အဆင့်များကိုယ်တိုင် ခေါင်းဆောင်၍ ဦးစွာတိုက်ခိုက်လိုက်ကြသည်။