အခန်း (၁၁၂၃-၁၁၂၅)

အခန်း (၁၁၂၃) အနန္တနတ်ဆိုးတောင်တန်းရဲ့ မဟာနတ်ဆိုးဘုရင် သုံးပါးက အလကားပါ

ငွေလမင်းဘုရင်သည် ချူးယွင်ဖန်း၏မြှားချက်ဖြင့် အသတ်ခံခဲ့ရသည်။ ငွေရောင်လမင်း ဝံပုလွေများနှင့် ၎င်း၏လက်အောက်ခံ မျိုးနွယ်စုများရှိ ကျွမ်းကျင်သူများ ငေးငိုင်ကြသည်။ အနန္တနတ်ဆိုးတောင်တန်းတွင် ပြိုင်ဘက်ကင်းလုနီးပါး သန်မာခဲ့သော ငွေလမင်းဘုရင်သည် ချူးယွင်ဖန်း၏မြှားချက်ဖြင့် ထိုသို့ အသတ်ခံခဲ့ရသည်။

အနန္တနတ်ဆိုးတောင်တန်း၌ ငွေလမင်းဘုရင်၏ ခွန်အားနှင့် အဆင့်အတန်းတို့သည် ထူးချွန်လှသည်။ ငွေရောင်လမင်းဝံပုလွေများသည် အနန္တနတ်ဆိုးတောင်တန်း၏ တော်ဝင်မျိုးနွယ်သုံးခုအနက် တစ်ခုဖြစ်၍ သာမန်နတ်အဆင့်များထက်ပင် ပို၍ကြောက်မက်ဖွယ်ကောင်းသည်။ သို့သော်လည်း သူသည် မြှားတစ်ချက်ဖြင့် ဖျက်ဆီးခံခဲ့ရသည်။ ဤသည်မှာ ကျွမ်းကျင်သူများစွာအတွက် ကမ္ဘာကြီး တုန်လှုပ်သွားစေသည့် အခြေအနေတစ်ရပ်ဖြစ်သည်။ ဤဖြစ်စဉ်ဖြင့် အနန္တနတ်ဆိုးတောင်တန်းသည် အမှန်တကယ် ပြိုကျသွားနိုင်ကြောင်း ၎င်းတို့ကို သိရှိသွားစေသည်။

ငွေလမင်းဘုရင်၏ ဟန့်တားမှုမရှိဘဲ ချူးယွင်ဖန်း၏သုတ်သင်မှုများ အမှန်တကယ်စတင်လာခဲ့သည်။ စစ်လွန်းပျံယာဉ်များကဲ့သို့ ကြီးမားသော ကနဦး သတ္တဝါကြီးများသည် ချူးယွင်ဖန်းကို လုံးလုံးလျားလျား မတိုက်ခိုက်နိုင်ကြပေ။ ချူးယွင်ဖန်းသည် ၎င်းတို့၏ ခြေချောင်းများမျှပင် မရှည်လျားသော်လည်း ၎င်းတို့ကို မြက်ပင်များ ရိတ်သိမ်းနေသကဲ့သို့ အလွယ်တကူ သတ်ဖြတ်နိုင်ခဲ့သည်။

ချူးယွင်ဖန်း လက်ထဲရှိ မိုးကြိုးစွမ်းအင်ဖြင့် ဖန်တီးထားသော လေးရှည်သည် ဤစစ်သတ္တဝါကြီးများထံ မြှားချက်များဖြင့် အဆက်မပြတ် ပစ်ခတ်နေသည်။ မြှားတစ်စင်းစီဖြင့် တစ်ကောင်ပြီး တစ်ကောင် ပစ်ခတ်လိုက်ရာ၊ ၎င်းတို့၏ ပစ်မှတ်များကို မလွဲချော်ခဲ့ပေ။

ရာနှင့်ချီသော စစ်သတ္တဝါကြီးများသည် အချိန်တိုလေးအတွင်းမှာပင် ချူးယွင်ဖန်း၏လက်ချက်ဖြင့် သေဆုံးသွားခဲ့သည်။ ၎င်းတို့၏ကြီးမားသော အလောင်းများသည် မြေပြင်ပေါ်သို့ ပြုတ်ကျသွားခဲ့ရာ၊ တောင်တစ်စင်းကဲ့သို့ စုပုံလာလေ၏။ သို့သော် ချူးယွင်ဖန်း၏အမူအရာသည် လုံးလုံးလျားလျား မပြောင်းလဲဘဲ သူ၏မျက်လုံးများ အလွန်အေးစက်နေဆဲဖြစ်သည်။

ရုတ်တရက်ဆိုသလိုပင် နောက်ထပ်ပုံရိပ်နှစ်ခုသည် အဝေးတစ်နေရာမှ တုန်လှုပ်ချောက်ချားဖွယ် အရောင်အဝါများဖြင့် ပျံသန်းလာခဲ့သည်။ ၎င်းတို့သည် နဂါးတစ်ကောင်၊ ခြင်္သေ့တစ်ကောင်တို့နှင့် ဆင်တူသည်။ ထိုအခါ ချူးယွင်ဖန်း သတ်ဖြတ်နေသည့် နတ်ဆိုးကျွမ်းကျင်သူများ၏ စိတ်ဓာတ်အင်အားသည် အလွန်တိုးမြင့်လာခဲ့သည်။

၎င်းတို့နှစ်ဦးသည် နဂါးဘုရင်နှင့် ခြင်္သေ့ဘုရင်တို့မှလွဲလျှင် မည်သူဖြစ်မည်နည်း။ ၎င်းတို့နှစ်ယောက်စလုံးသည် ကနဦးတွင် အနန္တနတ်ဆိုးတောင်တန်း၌ မရှိခဲ့ကြပေ။ ၎င်းတို့သည် ပြည်ထောင်စုထံ နောက်ထပ်အသေအကျေတိုက်ခိုက်မှုများ ဘယ်သို့ဘယ်ပုံလုပ်ဆောင်ရမည်ကို အဏ္ဏဝါမျိုးနွယ်စုများနှင့် ဆွေးနွေးနေခဲ့သည်။ ပြည်ထောင်စုကို ပြင်းထန်သော ထိုးနှက်မှုများ မပြုလုပ်မီ ပြည်ထောင်စု၏ ပြင်းထန်သော ထိုးနှက်ချက်များ ရောက်ရှိလာမည်ဟု မည်သူသိမည်နည်း။

ပြည်ထောင်စုစစ်တပ်များသည် ၎င်းတို့၏ အနွယ်ဝင်များကို အစုလိုက်အပြုံလိုက် သတ်ဖြတ်နေကြောင်း တွေ့လိုက်ရသောအခါ ၎င်းတို့၏မျက်လုံးများ နီရဲလာခဲ့သည်။ မျိုးနွယ်စုသုံးခု၏ လက်ရွေးစင်အားလုံးနီးပါးသည် အနန္တနတ်ဆိုးတောင်တန်းတွင်ရှိနေကြသည်။ ထိုသို့ ကြီးမားကျယ်ပြန့်သော အစုလိုက်အပြုံလိုက် သတ်ဖြတ်မှုသည် ၎င်းတို့၏ နှလုံးသားကို အလွန်နာကျင်စေသည်။ ၎င်းတို့နှစ်ဦးစလုံးသည် ချူးယွင်ဖန်းကို ဒေါသတကြီး ဟိန်းဟောက်လိုက်သည်။

"မင်းကို သတ်ပစ်မယ်"

ခြင်္သေ့ဘုရင်သည် ကျယ်လောင်သော ဟိန်းဟောက်သံကို ထုတ်လွှတ်ပြီးနောက် ချူးယွင်ဖန်းကို တောင်တစ်စင်းကဲ့သို့ ခုန်အုပ်လိုက်သည်။ ချူးယွင်ဖန်းသည် တိုက်ခိုက်မှု၏ဗဟိုတွင်ရှိနေသော်လည်း အခြားနေရာများရှိ တိုက်ခိုက်မှုများသည် ချောမွေ့ခြင်းမရှိပေ။ တန်စီယုနှင့် အခြားသူများလျှင်ပင် အနန္တနတ်ဆိုးတောင်တန်း၏ နတ်အဆင့် အထွတ်အထိပ် ကျွမ်းကျင်သူများနှင့် ရောထွေးနေကြသည်။ နတ်အဆင့်ကျွမ်းကျင်သူများ၏ ဦးဆောင်မှုမပါဘဲ ပြည်ထောင်စု၏ ထိုးစစ်ဆင်မှုများ နှောင့်နှေးသွားခဲ့သည်။

သို့သော် ချူးယွင်ဖန်းက မတူညီပေ။ သူသည် လမ်းကြောင်းရှိ အရာအားလုံးကို ဖြတ်ကျော်သွားခဲ့သည်။ ငွေလမင်းဘုရင်လျှင်ပင် သူ့ကို မတားဆီးနိုင်သည့်အပြင် အလွယ်တကူ ပစ်သတ်ခံခဲ့ရသည်။ ခြင်္သေ့ဘုရင်သည် ချက်ခြင်းဆိုသလိုပင် လက်သီးနှစ်ဖက်စလုံးဖြင့် ထိုးနှက်လာခဲ့သည်။ ထို့အပြင် ထူထပ်သည့် လက်ဝှေ့လက်အိတ်အလွှာတစ်ခုသည် သူ၏လက်ကို ရစ်ပတ်ထားခဲ့သည်။ ထိုလက်ဝှေ့လက်အိတ်များကို အလွန်လေးနက်သော အင်းကွက်များဖြင့် စီခြယ်ထားရာ၊ ၎င်းသည် အလွန် ရှားပါးသော မှော်လက်နက်တစ်ခုလည်း ဖြစ်ပုံပေါ်သည်။ ခြင်္သေ့ဘုရင်၏ ပြိုင်ဘက်ကင်းသော လက်သီးသိုင်းပညာဖြင့် ပေါင်းစပ်လိုက်သောအခါ မည်သူမျှ မတားဆီးနိုင်ပေ။

လက်သီးတစ်စုံသည် ကောင်းကင်နှင့် မြေကြီးကို ဖြိုချကာ ရာနှင့်ချီသော စက်လက်နက်များ အပိုင်းပိုင်း ဖြတ်တောက်လိုက်သည်။ ပြီးနောက် လက်သီးချက်များသည် ချူးယွင်ဖန်းဆီ ရုတ်တရက် ချီတက်လာသည်။ သို့သော် ယခုအချိန်တွင် ချူးယွင်ဖန်း၏ အရောင်အဝါများ ထွက်ပေါ်လာသည်။ ၎င်းသည် ကြောက်မက်ဖွယ် အရောင်အဝါများဖြစ်၍ ပင်လယ်ကဲ့သို့ ခက်ထန်သော စွမ်းအင်များ ပျံ့နှံ့လာခဲ့သည်။

ဘန်း

ချူးယွင်ဖန်းသည် လက်သီးတစ်ချက်ကို ပစ်လွှတ်လိုက်သည်။ ၎င်းသည် ရိုးရှင်းသော လက်သီးချက်ဖြစ်သော်လည်း ဒေါသများဖြင့် ပြည့်နှက်နေသော ခြင်္သေ့ဘုရင်၏လက်သီးချက်များကို တားဆီးလိုက်သည်။ ကြောက်မက်ဖွယ်ကောင်းသော ပေါက်ကွဲမှုလှိုင်းလုံးကြီးသည် မုန်တိုင်းပင်လယ်ကဲ့သို့ လွင့်ထွက်သွားလေသည်။

ခြင်္သေ့ဘုရင်သည် ချက်ချင်းဆိုသလိုပင် ကြောက်မက်ဖွယ် စွမ်းအင်များ သူ့ထံပြန်ရောက်လာကြောင်း ခံစားလိုက်ရသည်။ သူ၏လက်သီးချက်သည် သံမဏိအပိုင်းအစတစ်ခုပေါ် ရောက်ရှိသွားသကဲ့သို့ ထင်မှတ်ရစေကာ ချူးယွင်ဖန်း၏ ခန္ဓာကိုယ်ကို အနည်းငယ်မျှ လှုပ်ရှားအောင်ပင် မပြုလုပ်နိုင်ခဲ့ပေ။

"ဒါက ဘယ်လိုလုပ်ဖြစ်နိုင်မှာလဲ"

ခြင်္သေ့ဘုရင်သည် ဤဖြစ်စဉ်ကို မယုံကြည်နိုင်ဖြစ်နေသည်။ သူသည် သူ၏ ကြံ့ခိုင်သော ခန္ဓာကိုယ်ဖြင့် အမြဲတမ်း ကျော်ကြားခဲ့သူဖြစ်သည်။ သူ့၏ လက်သီးသိုင်းပညာနှင့်အတူ သူ့၏ ကျင့်ကြံမှုသည် ပြင်းထန်သော လမ်းကြောင်း၏ အထွတ်အထိပ်သို့ ရောက်ရှိခဲ့သည်။ အခြားသော ဘုရင်အဆင့် ကျွမ်းကျင်သူနှစ်ဦးလျှင်ပင် သူ့ကို ထိပ်တိုက် မတိုက်ခိုက်ဝံ့ဘဲ ခုခံရန်အတွက် အခြားနည်းလမ်းများကို အသုံးပြုခဲ့ရသည်။

သို့သော် ချူးယွင်ဖန်းသည် လုံးလုံးလျားလျား ကွဲပြားခြားနားနေသည်။ သူသည် ထိပ်တိုက်ရင်ဆိုင်နေသည့်အပြင် ကြောက်မက်ဖွယ်အကောင်းဆုံးအချက်မှာ သူ့တွင် အားနည်းချက်ဟူ၍ မရှိခဲ့ခြင်းဖြစ်သည်။ ပို၍တိကျစွာပြောရလျှင် ချူးယွင်ဖန်းသည် သူ၏အထက်တွင်ပင် ရှိနေနိုင်သည်။ တစ်ဖက်တွင် နဂါးဘုရင်သည်လည်း ချူးယွင်ဖန်းထံ ဟိန်းဟောက်လျက် ချီတက်နေပြီဖြစ်သည်။ သူ၏လက်ထဲတွင် ငွေရောင်စစ်ပုဆိန်တစ်စင်း ပေါ်ပေါက်လာပြီးနောက် အင်အားကြီးမားသော ပြကွက်တစ်ခုဖြင့် ချူးယွင်ဖန်း၏ ဦးတည်ရာသို့ ခုန်အုပ်လာခဲ့သည်။

ဘုံး

စစ်ပုဆိန်သည် ကောင်းကင်နှင့်မြေကြီးကိုပင် ထိုးဖောက်နိုင်ပုံပေါ်၍ ချူးယွင်ဖန်း၏နဖူးထံ ချက်ချင်း ဆင်းသက်လာသည်။ ချူးယွင်ဖန်းသည် ၎င်းကို လက်ဖဝါးဖြင့် ရိုက်ထုတ်လိုက်သည်။ ဤလက်ဖဝါးချက်သည် မှော်စွမ်းအင်များ ပါရှိနေပုံဖြင့် စစ်ပုဆိန်ကို ထိမိသွားလေသည်။ သတ္တုချင်းရိုက်ခတ်သံကဲ့သို့ ကျယ်လောင်သောအသံနှင့်အတူ နဂါးဘုရင်၏ဒေါသစိတ်သည် ရေအေးဖြင့် လောင်းချခံလိုက်ရပုံပေါ်သည်။

သူ၏ ဒေါသတကြီး တိုက်ခိုက်မှုကို ချူးယွင်ဖန်းက လက်ဖဝါးဖြင့် ပြန်လည်ရိုက်ခတ်လိုက်သည်။ ပို၍ကြောက်မက်ဖွယ်ကောင်းသော အချက်မှာ သူ၏ လက်ထဲရှိ စစ်ပုဆိန်သည် လွင့်ထွက်လုနီးပါးဖြစ်သွားသည်ဟု ခံစားလိုက်ရသည်။ ဤသည်မှာ အလွန် ကြောက်မက်ဖွယ်ကောင်းလှသည်။

ကြောက်မက်ဖွယ်ကောင်းသော စွမ်းအင်တစ်ခုသည် သူ့လက်မောင်းတစ်လျှောက် တိုးဝင်လာသောကြောင့် လက်မောင်းရှိ ကြွက်သားများ ကွဲအက်သွားခြင်းကို ခံစားရနိုင်သည်။ သူသည် ချက်ချင်းပင် ထိတ်လန့်သွားလေသည်။ သူသည် ခြင်္သေ့ဘုရင်ကဲ့သို့ ကိုယ်ခန္ဓာကျင့်ကြံမှုတွင် အထူးတလည် မကျွမ်းကျင်သော်လည်း ဦးချိုရှိ နဂါးမျိုးနွယ်ဝင်များ၏ ခန္ဓာကိုယ်သည် ကြံ့ခိုင်သန်မာကြသည်။ သူသည် ကိုယ်ခန္ဓာကျင့်ကြံမှုတွင် မကျွမ်းကျင်လှသော်လည်း သူ၏ ကိုယ်ခန္ဓာကျင့်ကြံမှုသည် မဆိုးရွားလှပေ။

ယခုမူကား နဂါးဘုရင်သည် အလွယ်တကူ တွန်းပို့ခံခဲ့ရသည်။ ထိုဖြစ်စဉ်သည် သူ့ကို အမှန်တကယ် ထိတ်လန့်သွားစေသည်။ သူနှင့် ခြင်္သေ့ဘုရင်တို့သည် တစ်ယောက်ကိုတစ်ယောက် လှည့်ကြည့်လိုက်သောအခါ ချက်ချင်းပင် အကြံတစ်ခုရရှိသွားသည်။ ၎င်းတို့နှစ်ဦးသည် ချူးယွင်ဖန်းကို ဘယ်သို့ ညာသို့ စတင်ဝန်းရံလိုက်သည်။ ချူးယွင်ဖန်းသည် ကိုင်တွယ်ရန် အလွန်ခက်ခဲသော ပြိုင်ဘက်ဖြစ်ကြောင်း ၎င်းတို့နှစ်ဦးစလုံး သိရှိသွားသောကြောင့် သူ့ကို ကိုင်တွယ်ဖြေရှင်းရာတွင် ပူးပေါင်းတိုက်ခိုက်ရန် ဆုံးဖြတ်လိုက်ကြသည်။

သို့သော် ချူးယွင်ဖန်းက ဂရုစိုက်ပုံမပေါ်ဘဲ နှစ်ဖက်စလုံးကို တစ်ပြိုင်နက်တည်း တိုက်ခိုက်လိုက်သည်။ သူသည် ကျွမ်းကျင်သူနှစ်ဦး၏ တိုက်ခိုက်မှုကို ရင်ဆိုင်ရာတွင် ထိတ်လန့်ခြင်းမရှိပေ။ ချူးယွင်ဖန်းသည် တစ်ဖက်တွင် ခြင်္သေ့ဘုရင်ကို ပြိုင်ဘက်ကင်းသော လက်သီးသိုင်းပညာဖြင့် တိုက်ခိုက်နေစဉ် ကျန်တစ်ဖက်တွင် နဂါးဘုရင်ကို တိုက်ခိုက်ရန် အံ့ဩဖွယ် ဓားသိုင်းပညာများကို ပစ်လွှတ်လိုက်သည်။ သူသည် လုံးလုံးလျားလျား အားနည်းချက် မရှိခဲ့ပေ။

ကောင်းကင်ယံရှိ ကျွမ်းကျင်သူ သုံးဦးကြားက တိုက်ပွဲသည် မရေတွက်နိုင်သော လူများ၏ အာရုံကို ဆွဲဆောင်သွားစေသောကြောင့် လူတိုင်း၏ မျက်လုံးများသည် ၎င်းတို့ဆီ ရောက်ရှိသွားကြသည်။ ဤကျွမ်းကျင်သူသုံးဦးကြားရှိ တိုက်ပွဲ၏ရလဒ်သည် စစ်ပွဲ၏ရလဒ်ကို တိုက်ရိုက် အကျိုးသက်ရောက်သွားမည်ကို ၎င်းတို့နားလည်ခဲ့ကြသည်။

"ချူးယွင်ဖန်း၊ ဒီနေ့ မင်းကို သင်္ဂြိုလ်စရာနေရာမရှိအောင် လုပ်ပစ်မယ်" နဂါးဘုရင်က ဒေါသတကြီး အော်ဟစ်လိုက်သည်။ သူ၏မျက်လုံးများ အလွန်နီရဲနေ၍ သူသည် ချူးယွင်ဖန်းကို အပိုင်းပိုင်း ဖြတ်တောက်ချင်နေပုံပေါ်ပေ။

တစ်ဖက်တွင် ခြင်္သေ့ဘုရင်သည်လည်း ထပ်တူ လုပ်ဆောင်နေသည်။ သူ၏ လက်သီးချက်များသည် ချူးယွင်ဖန်း၏ အရေးကြီးသော ခန္ဓာကိုယ်အစိတ်အပိုင်းများကို ချိန်ရွယ်နေ၍ အလွန်ကြောက်မက်ဖွယ်ကောင်းသော လက်သီးစွမ်းအင်များကို ဒုံးကျည်များကဲ့သို့ အဆက်မပြတ် ထုတ်လွှတ်နေသည်။ ချူးယွင်ဖန်းကို သတ်ဖြတ်ရန် ရည်ရွယ်နေခြင်းဖြစ်သည်မှာ သိသာထင်ရှားသည်။

"ခင်ဗျားက ကျုပ်ကို သတ်ချင်တယ်တဲ့လား၊ တကယ် လုပ်နိုင်မယ်ထင်လို့လား။ အနန္တနတ်ဆိုးတောင်တန်းရဲ့ ဘုရင်သုံးပါးက ဒီလောက်ပါပဲ။ ကျုပ် သွေးပူလေ့ကျင့်ခန်းလုပ်တာ ပြီးသွားပြီ။ ခင်ဗျားတို့ လုပ်နိုင်တာသာ ဒါအကုန်ပဲဆိုရင် သေရမယ့်လူက ခင်ဗျားတို့ ဖြစ်သွားလိမ့်မယ်" ချူးယွင်ဖန်းက ဟက်ဟက်ပက်ပက် ရယ်မောလိုက်သည်။

အခန်း (၁၁၂၄) ခြင်္သေ့ဘုရင်ကို သတ်ဖြတ်ခြင်း

"မင်းကများ ကျုပ်တို့ကို အထင်သေးရဲတယ်ပေါ့လေ" ခြင်္သေ့ဘုရင်၏ အသံသည် အနန္တနတ်ဆိုးတောင်တန်းတစ်လျှောက် ကျယ်လောင်သော မိုးခြိမ်းသံကဲ့သို့ ပဲ့တင်ထပ်သွားလေသည်။

"ငွေလမင်းဘုရင်လည်း ကျုပ်ကို မယုံခဲ့ဘူး၊ ဒါပေမယ့် သူလည်း ကျုပ်လက်ထဲမှာ သေသွားတာပဲလေ။ ခင်ဗျားတို့ရော ဘယ်လောက်ကြာကြာတောင့်ခံနိုင်မှာလဲ" ချူးယွင်ဖန်းက ကျယ်လောင်စွာ ပြောလိုက်သည်။

"ဘာ" ခြင်္သေ့ဘုရင်နှင့် နဂါးဘုရင်တို့၏ မျက်လုံးများတွင် အလွန်အမင်း ထိတ်လန့်တုန်လှုပ်နေသော အရိပ်အမြွက်များ လင်းလက်သွားကြသည်။

ငွေလမင်းဘုရင်သည် ၎င်းတို့နှင့် ဘေးချင်းယှဉ် ရပ်တည်နိုင်သော်လည်း ငွေလမင်းဘုရင်သည် သတ်ဖြတ်ရန် မဖြစ်နိုင်သူဟု မဆိုလိုပေ။ သို့သော်လည်း အနန္တနတ်ဆိုးတောင်တန်းသည် တိုက်ခိုက်ခံရသည်မှာ နာရီဝက်ပင်မပြည့်သေးသည့်အပြင် ၎င်းတို့သည် သတင်းရရှိသည်နှင့် ချက်ခြင်း ပြန်လာခဲ့ခြင်းဖြစ်သည်။ ငွေလမင်းဘုရင်သည် လူသားများကို တိုတောင်းသော နာရီဝက်မျှပင် မထိန်းထားနိုင်ခြင်း ဖြစ်လေသလော။

ဤသည်မှာ မထင်မှတ်ဖွယ် ဖြစ်စဉ်တစ်ခုဖြစ်သည်။ ငွေလမင်းဘုရင်၏ အစွမ်းသတ္တိအရ ကမ္ဘာပေါ်တွင် သူနှင့် ယှဉ်ပြိုင်နိုင်သူဟူ၍ အများအပြား မရှိခဲ့ပေ။ ထို့အပြင် ငွေလမင်းဘုရင်ကို အချိန်တိုအတွင်း သတ်ဖြတ်ရန် လုံးလုံးလျားလျား မဖြစ်နိုင်ပေ။

သို့သော် ၎င်းတို့သည် စစ်မြေပြင်တွင် ငွေလမင်းဘုရင်ကို မတွေ့ခဲ့ကြပေ။ အရာအားလုံးသည် ချူးယွင်ဖန်းပြောခဲ့သည့်အတိုင်း ဖြစ်ပျက်သွားဟန်ရှိသောကြောင့် ၎င်းတို့နှစ်ဦးစလုံး အန္တရာယ်ကို ချက်ချင်း ခံစားလိုက်ရသည်။ သို့သော် ၎င်းတို့နှစ်ဦးစလုံး ထပ်မံ မစဉ်းစားနိုင်မီ ချူးယွင်ဖန်းက ရုတ်တရက် လှုပ်ရှားလိုက်သည်။ ပွက်ပွက်ဆူနေသော ကြောက်မက်ဖွယ် စွမ်းအင်များသည် သူ၏ခန္ဓာကိုယ်ထဲမှ ထွက်ပေါ်လာသည်။ ၎င်းသည် ချူးယွင်ဖန်း၏ ယခင် ထုတ်လွှတ်လိုက်သော စွမ်းအင်များကိုပင် ကျော်လွန်သွားခဲ့သည်။

ဘုရင်နှစ်ပါးသည် တစ်ယောက်ကို တစ်ယောက် လှည့်ကြည့်လိုက်ချိန်တွင် တစ်စုံတစ်ခု မှားယွင်းနေကြောင်း ချက်ချင်း သိရှိလိုက်ကြသည်။ ချူးယွင်ဖန်းသည် ဤတိုက်ပွဲတွင် သူ၏အင်အားကို ဖုံးကွယ်ထားဆဲဖြစ်သည်။ ဤအချက်ကိုကြည့်လျှင် သူ၏ခွန်အားအစစ်အမှန်သည် ၎င်းတို့နှစ်ဦးထက် သာလွန်နေပေလိမ့်မည်၊ ဤသည်မှာ ကြောက်မက်ဖွယ်အကောင်းဆုံးအရာဖြစ်သည်။

"သွားသေလိုက်"

ဘုရင်နှစ်ပါးသည် ဦးစွာ လှုပ်ရှားရန် ဆုံးဖြတ်လိုက်ကြသည်။ နဂါးဘုရင်သည် ကျယ်လောင်သော အော်ဟစ်သံနှင့်အတူ သူ၏ စစ်ပုဆိန်ကို ဝှေ့ယမ်းလိုက်သည်နှင့် မရေတွက်နိုင်သော နဂါးများအဖြစ်သို့ ပြောင်းလဲသွားခဲ့သည်။ ၎င်းတို့သည် လေထုထဲတွင် ပျံသန်းပြီးနောက် ချူးယွင်ဖန်းဆီ ချီတက်သွားကြသည်။ အရှိန်အဟုန်သည် ကောင်းကင်နှင့်မြေကြီးကို လှုပ်ခါသွားစေသောကြောင့် အလွန်ကြောက်မက်ဖွယ်ကောင်းလှသည်။ တစ်ချိန်တည်းမှာပင်၊ ခြင်္သေ့ဘုရင်သည်လည်း သူ၏လက်သီးတစ်စုံဖြင့် ချီတက်လိုက်သည်။ သူ၏လက်သီးစွမ်းအင်များသည် ကြောက်မက်ဖွယ်ခြင်္သေ့တစ်ကောင်အဖြစ် ပြောင်းလဲကာ ချူးယွင်ဖန်းထံ ခုန်အုပ်သွားခဲ့သည်။

"ကျုပ် ခင်ဗျားနဲ့ အရင် စလိုက်မယ်"

ချူးယွင်ဖန်းသည် ခြင်္သေ့ဘုရင်ကို သူ၏ပစ်မှတ်အဖြစ် ထားရှိလိုက်သည်။ သူသည် ဓားရှည်တစ်ချောင်းကို ပစ်လွှတ်လိုက်ရာ၊ ၎င်းသည် ရှည်လျားသော ဓားချီအဖြစ်သို့ ပြောင်းလဲသွားလေ၏။ ရုတ်တရက်ဆိုသလိုပင်၊ ခုတ်ချက်တစ်ချက်ဖြင့် ကောင်းကင်တစ်ခုလုံး နှစ်ပိုင်းကွဲထွက်သွားကာ ကောင်းကင်ယံရှိ နဂါးများအားလုံး ဗလာနတ္ထိအဖြစ် ပြောင်းလဲသွားခဲ့သည်။

ထိုအချိန်တွင် ချူးယွင်ဖန်း၏ တိုက်ခိုက်မှုများ အမှန်တကယ် စတင်နေပြီဖြစ်သည်။ သူသည် လျင်မြန်လွန်းသောကြောင့် မျက်စိတစ်မှိတ်အတွင်းမှာပင် နဂါးဘုရင်၏ တိုက်ခိုက်မှုများကို ချေဖျက်နိုင်ခဲ့သည်။ ပြီးနောက် သူသည် ခြင်္သေ့ဘုရင် ပစ်လွှတ်လိုက်သော ဧရာမ ခြင်္သေ့ကြီးကို ကိုင်တွယ်ရန်ပင် အချိန်ရရှိခဲ့သည်။

ချူးယွင်ဖန်းသည် အထင်အမြင်သေးစွာ ဆက်ဆံသင့်သူ မဟုတ်ပေ။ သူသည် လက်သီးတစ်ချက် ဝှေ့ယမ်းလိုက်သည်နှင့် သူ၏ခန္ဓာကိုယ်တစ်ခုလုံး ရွှေရောင်ငှက်ကြီးအဖြစ် ပြောင်းလဲသွားပုံပေါ်၏။ သူသည် ရုတ်တရက်ဆိုသလိုပင် ကောင်းကင်ကို ဖြတ်သန်းပြီးနောက် ခြင်္သေ့ကြီးကို ရိုက်ခတ်လိုက်သည်။

ဘုံး

တိုက်မိသွားသည့် အခိုက်အတန့်တွင် တောင်ကုန်းကြီးနှင့် ဆင်တူသော ခြင်္သေ့ကြီးသည် ရွှေရောင်ငှက်ကြီးကြောင့် ထက်ဝက် ဖြတ်တောက်သွားလေ၏။ ၎င်းခြင်္သေ့ကြီးသည် ထိုမှတစ်ဆင့် လေထုထဲတွင် ဝိညာဉ်စွမ်းအင်အဖြစ် ပြောင်းလဲပျောက်ကွယ်သွားခဲ့သည်။ ချူးယွင်ဖန်း ပစ်လွှတ်လိုက်သော ရွှေရောင်ငှက်ကြီး၏ အရှိန်အဟုန်သည် အနည်းငယ်မျှ လျော့နည်းသွားခြင်းမရှိဘဲ ခြင်္သေ့ဘုရင်ဆီ ရောက်ရှိသွားသည်။

"မဖြစ်နိုင်ဘူး"

ခြင်္သေ့ဘုရင်သည် ကျယ်လောင်စွာ ဟိန်းဟောက်လိုက်သည်။ ချူးယွင်ဖန်းသည် သူ၏ ပြင်းထန်သော တိုက်ခိုက်မှုကို အလွယ်တကူ ချိုးဖျက်နိုင်ခဲ့သည်။ ဤဖြစ်စဉ်သည် သူ့ကို အလွန်တရာ အရှက်ရစေသည်။ သို့သော် သူ့တွင် အခြားရွေးချယ်စရာမရှိပေ။ သူသည် ရွှေရောင်ငှက်ကြီးကို ဒုံးကျည်တစ်ခုကဲ့သို့ ထိုးနှက်လျက် ချီတက်လိုက်သည်။

ဘန်း

နောက်ဆုံးတွင် အချင်းချင်း တိုက်မိသွားသောအခါ ကြောက်မက်ဖွယ်ကောင်းသော ရိုက်ခတ်မှုများ ဖြစ်ပေါ်သွားလေ၏။ ရိုက်ခတ်မှုသည် ကြယ်တံခွန်တစ်စင်း ကမ္ဘာမြေကို သက်ရောက်လာကဲ့သို့ တခဏချင်းပင် ပေါက်ကွဲသွားခဲ့သည်။ ၎င်းသည် နေရာအရပ်ရပ်သို့ ပျံ့နှံ့သွားသော ကြောက်မက်ဖွယ် ဒီရေလှိုင်းများ ဖြစ်ပေါ်သွားစေ၏။ အနန္တနတ်ဆိုးတောင်တန်းသော်လည်းကောင်း ပြည်ထောင်စုစစ်တပ်သော်လည်းကောင်း အချိန်မီ မရှောင်တိမ်းနိုင်ပါက ၎င်းအတွင်းသို့ စုပ်ယူခံလိုက်ရသည်။

၎င်းအတွင်း ကျရောက်သွားသူတိုင်းသည် သွေးမြူများအဖြစ်သို့ ပြောင်းလဲသွားပေလိမ့်မည်။ ဤရိုက်ခတ်မှုပြီးဆုံးသည်နှင့် ခြင်္သေ့ဘုရင်ဆီမှ ဆိုးရွားဖွယ် အော်ဟစ်သံများ ထွက်ပေါ်လာသည်။ လူအများက လှမ်းကြည့်လိုက်သောအခါ ခြင်္သေ့ဘုရင်၏လက်များသည် သွေးများဖြင့် စိုရွှဲနေသည်။ သူ၏လက်ပေါ်ရှိ လက်အိတ်များ လုံးလုံးလျားလျား ပျက်စီးသွားလေသည်။ ဤမှော်လက်နက်၏ အရည်အသွေးသည် အလွန်မြင့်မားပုံပေါ်သော်လည်း ခြင်္သေ့ဘုရင်၏လက်များကို မကာကွယ်နိုင်ခဲ့ပေ။

ချူးယွင်ဖန်းသည် ခြင်္သေ့ဘုရင်၏လက်များကို လက်သီးတစ်ချက်တည်းဖြင့် အပိုင်းပိုင်းဖြစ်အောင် ပြုလုပ်လိုက်သည်။ ခြင်္သေ့ဘုရင်၏လက်များသည် မည်ကဲ့သို့ ကြောက်မက်ဖွယ်ကောင်းသော တိုက်ခိုက်မှုမျိုးဖြင့် ကြုံတွေ့ခဲ့ရသည်ကို မည်သူမျှ စိတ်ကူးနိုင်မည် မဟုတ်ပေ။ ခြင်္သေ့ဘုရင်သည် သူ၏ခန္ဓာကိုယ်ကို ကာကွယ်ရန် ကြိုးစားလျက် ဆက်တိုက် အော်ဟစ်ကာ ဆုတ်ခွာသွားခဲ့သည်။ သို့သော်လည်း ကနဦး ရိုက်ခတ်မှုသည် သူ၏ကြွက်သားများကို ကျိုးကြေလုနီးပါး ခံစားရစေသည်။ ချူးယွင်ဖန်း၏ ခွန်အားသည် အမှန်တကယ် ခုခံရန် ခက်ခဲလိမ့်မည်ဟု သူ မထင်မှတ်ထားပေ။

"ဘယ်လိုလုပ်ဖြစ်နိုင်မှာလဲ။ ဒါက ရွှေအမတေ ခြေလှမ်းတစ်ဝက်အဆင့်ရဲ့ တိုက်ခိုက်ရေး ခွန်အားပဲ။ မင်းက နတ်အဆင့်ရဲ့ အထွတ်အထိပ်ကိုတောင် မရောက်သေးဘဲနဲ့ ဒီအဆင့်ကို ဘယ်လိုလုပ် ရောက်နိုင်ရတာလဲ"

ခြင်္သေ့ဘုရင်သည် ဗဟုသုတရှိသူဖြစ်သောကြောင့် ချူးယွင်ဖန်း၏ လက်ရှိအခြေအနေကို သူ ချက်ချင်း သတိထားမိသွားသည်။ သူသည် မယုံကြည်နိုင်ဖွယ်ကောင်းသည်ဟု ခံစားနေမိသည်။ သူသည် ရွှေအမတေအဆင့်နှင့်ပတ်သက်သော အချို့အရာများကို အဖြေရှာရန် နှစ်ပေါင်းများစွာကြာ ကြိုးစားနေခဲ့သော်လည်း မည်သည့်အခါမျှ မလုပ်ဆောင်နိုင်ခဲ့ပေ။ ဤဖြစ်စဉ်သည် မဖြစ်နိုင်လွန်းလှ၏။ ထိုသို့လုပ်နိုင်သူသည် နတ်အဆင့် အထွတ်အထိပ်တွင် ရောက်ရှိနေသူများ၌ပင် အလွန်နည်းပါးလှသည်။ ထိုမျဉ်းကြောင်းကို မဖြတ်သန်းနိုင်ပါက မဖြတ်သန်းနိုင်သူဟု ခေါ်ဆိုရမည်ဖြစ်သည်၊ သို့သော် ချူးယွင်ဖန်းသည် ထိုသို့ စွမ်းဆောင်နိုင်ခဲ့သည်။

"ဟုတ်တယ်၊ ဒါက ရွှေအမတေအဆင့်။ ခင်ဗျားက တော်တော်လေး ဗဟုသုတကြွယ်ဝပုံပဲ"

ချူးယွင်ဖန်းက ဟက်ဟက်ပက်ပက် ရယ်မောလိုက်သည်။ သူသည် ခြင်္သေ့ဘုရင်ကို ပြန်လည်ကုသရန် အခွင့်အရေးပေးမည် မဟုတ်ပေ။ သူသည် ခြင်္သေ့ဘုရင် အရှေ့တွင် ချက်ခြင်းဆိုသလိုပင် ရောက်ရှိနေပြီဖြစ်သည်။ ပြီးနောက် လက်သီးဖြင့် သာမန်ကာလျှံကာ ထိုးနှက်လိုက်သည်။ ခြင်္သေ့ဘုရင်သည် ထိတ်လန့်သွားသောကြောင့် ချက်ချင်း ပြန်လည်ဆုတ်ခွာသွားသည်။ သို့သော် သူ၏အလျင်သည် ချူးယွင်ဖန်း၏ အရှိန်အဟုန်နှင့် မည်သို့မျှ နှိုင်းယှဉ်နိုင်မည်နည်း။ သူသည် ချူးယွင်ဖန်း၏ ချီတက်မှုကို ရပ်တန့်ရန် သူ၏ ဒဏ်ရာရရှိပြီးသား လက်သီးများကိုသာ အသုံးပြုနိုင်ခဲ့သည်။

ချူးယွင်ဖန်း၏ သာမန်ကာလျှံကာ လက်သီးချက်တွင် ကြီးမားသော စွမ်းအင်များပါရှိနေသည်။ ထို့ကြောင့် ၎င်းတို့အချင်းချင်း ရိုက်ခတ်ပြီးနောက် ခြင်္သေ့ဘုရင်၏လက်သီးများသည်လည်း သွေးမြူများအဖြစ်သို့ ပြောင်းလဲသွားလေ၏။ ခြင်္သေ့ဘုရင်သည် နာကျင်စွာ အော်ဟစ်လိုက်သော်လည်း သူ၏နာကျင်မှုမှ ပြန်လည်မသက်သာမီ ချူးယွင်ဖန်း၏လက်သီးချက်သည် သူ့ရင်ဘတ်ပေါ်သို့ ကျရောက်နေပြီဖြစ်သည်။

ဘန်း

ခြင်္သေ့ဘုရင်သည် စူးရှစွာ အော်ဟစ်ပြီးနောက် ကြိုးပျက်သွားသော စွန်တစ်ခုကဲ့သို့ လွင့်ထွက်သွားခဲ့သည်။ သူသည် နောက်ဆုံးတွင် တောင်ထိပ်နှင့် ဝင်တိုက်မိသွားသောကြောင့် ရပ်တန့်သွားလေ၏။ ခြင်္သေ့ဘုရင်သည် ထိုအချိန်၌ သေဆုံးသွားပြီဖြစ်ကြောင်း လူတိုင်း သိမြင်နိုင်ကြသည်။ ချူးယွင်ဖန်း၏ ထိုးချက်ကြောင့် သူ၏ ရင်ဘတ်တစ်ခုလုံး ကွဲကြေသွားသည့်အပြင် သူ၏ အတွင်းအင်္ဂါများအားလုံးသည် သွေးမြူများအဖြစ်သို့ ပြောင်းလဲသွားလေ၏။ ဤအခြေအနေမျိုးတွင်၊ ကောင်းကင်ဘုံ၏ ကြီးကျယ်ခမ်းနားသော နတ်ဘုရားများလျှင်ပင် သူ့ကို ကယ်တင်နိုင်မည် မဟုတ်ပေ။

ဤသည်မှာ ရိုးရှင်းသော စွမ်းဆောင်မှုတစ်ခုဖြစ်သည်။ ချူးယွင်ဖန်းသည် အနန္တနတ်ဆိုးတောင်တန်း၏ နတ်ဆိုးဘုရင်သုံးပါးအနက် အခြားဘုရင်တစ်ပါးဖြစ်သည့် ခြင်္သေ့ဘုရင်ကို သတ်ဖြတ်ခဲ့သည်။ ဤဖြစ်စဉ်ကို မြင်လိုက်ရသောအခါ ပြည်ထောင်စု၏ စိတ်ဓာတ်အင်အားများ အလွန်အကျွံ တိုးတက်လာကြသည်။ ဤသည်မှာ အနန္တနတ်ဆိုးတောင်တန်းအတွက် ကြီးမားသော ထိုးနှက်ချက်ကြီးဖြစ်ပေသည်။ ၎င်းတို့အနက် အင်အားအကြီးဆုံး ဖြစ်တည်မှုဖြစ်သည့် ၎င်းတို့၏ဘုရင်သည် ချူးယွင်ဖန်း၏အရှေ့တွင် အလွန် အားနည်းနေခဲ့သည်။ ချူးယွင်ဖန်းသည် သူ့ကို အလွယ်တကူ သတ်ဖြတ်ခဲ့ရာ၊ ဤသည်မှာ ဒုတိယမြောက် ကျဆုံးသွားသော ဘုရင်ဖြစ်သည်။

အခန်း (၁၁၂၅) နဂါးဘုရင်ကို သတ်ဖြတ်ခြင်း

နတ်ဆိုးများတွင် ဘုရင်သုံးပါးသာရှိ၍ ချူးယွင်ဖန်းသည် ၎င်းတို့အနက် နှစ်ဦးကို အလွယ်တကူ သတ်ဖြတ်နိုင်ခဲ့သည်။ ဤအရာသည် အနန္တနတ်ဆိုးတောင်တန်း၏ စိတ်ဓာတ်အင်အားကို မည်မျှထိ ထိုးနှက်စေခဲ့သည်ကို စိတ်ကူးကြည့်ရန် လွယ်ကူသည်။ ၎င်းတို့ကိုယ်တိုင် မျက်စိဖြင့် မမြင်ခဲ့ရပါက၊ ၎င်းတို့၏ ဘုရင်သုံးပါးသည် ချူးယွင်ဖန်းအရှေ့တွင် ဤအားနည်းနေကြမည်ဟု တွေးကြည့်ဝံ့မည် မဟုတ်ပေ။

အခြားတစ်ဖက်တွင် နဂါးဘုရင်သည် ချူးယွင်ဖန်း၏ဓားချီကို ပိတ်ဆို့ခဲ့သော်လည်း သူ မတုံ့ပြန်နိုင်မီတွင် ချူးယွင်ဖန်းက ခြင်္သေ့ဘုရင်ကို အလွန်လျင်မြန်စွာ သတ်ဖြတ်ခဲ့ပြီဖြစ်သည်။ သူသည် ကျောရိုးတစ်လျှောက် အေးစက်သွားသကဲ့သို့ ခံစားလိုက်ရကာ ခန္ဓာကိုယ်ပေါ်ရှိ အမွေးအမှင်များ အဆုံးထိ ထောင်မတ်သွားလေသည်။ ငွေလမင်းဘုရင်သည် အဘယ်ကြောင့် ဤမျှ အချိန်တိုအတွင်း အဆုံးသတ်သွားသည်ကို သူ နောက်ဆုံးတွင် နားလည်သွားခဲ့သည်။

ငွေလမင်းဘုရင်သည် အလွန်အားနည်းသောကြောင့် မဟုတ်ဘဲ ချူးယွင်ဖန်းက အလွန်ကြောက်မက်ဖွယ်ကောင်းသောကြောင့်ဖြစ်၏။ မဟာဘုရင်သုံးပါး၏ ခွန်အားသည် အလားတူဖြစ်ကြသည်။ ၎င်းတို့အားလုံးသည် နတ်အဆင့် အထွတ်အထိပ်တွင်ရှိသူများအနက် လူသိများသော ပုဂ္ဂိုလ်များဖြစ်ကြသည်။ သို့သော်၊ ၎င်းတို့အနက် မည်သူကမျှ ရွှေအမတေတစ်ဝက်အဆင့်သို့ မဝင်ရောက်ခဲ့ကြပေ

ယခုမူ ခြင်္သေ့ဘုရင်သည် ချူးယွင်ဖန်းထံမှ ရိုးရှင်းသော လှုပ်ရှားမှုအချို့ကိုပင် မတားဆီးနိုင်ခဲ့ပေ။ အကယ်၍ သူသာ ခြင်္သေ့ဘုရင်နေရာတွင် ရှိနေခဲ့ပါက၊ ရလဒ်သည် အတူတူသာဖြစ်ပေလိမ့်မည်။ ဤအခိုက်အတန့်တွင် ချူးယွင်ဖန်းက သူ့ကို လှည့်ကြည့်လာသောအခါ နဂါးဘုရင်သည် ကြောက်မက်ဖွယ်ကောင်းသော သားရဲတစ်ကောင်က သူ့ကို စိုက်ကြည့်နေသည်ဟု ခံစားလိုက်ရသည်။

သူ၏ ပထမဆုံးတုံ့ပြန်မှုသည် ထွက်ပြေးရန်ဖြစ်သော်လည်း၊ ထိုမှတစ်ဆင့် သူသည် အနန္တနတ်ဆိုးတောင်တန်းတွင် ရှိနေကြောင်း ရုတ်တရက် သတိရသွားသည်။ သူသည် မည်သည့်နေရာသို့ ပြေးနိုင်မည်နည်း။ ဤသည်မှာ လူမျိုးတုံးသတ်ဖြတ်မှု စစ်ပွဲဖြစ်သည်။ ပြည်ထောင်စုသည် ဤနေရာရှိ မွန်းစတားအချို့ကို သတ်ဖြတ်ပြီးနောက် ပြန်သွားကြမည် မဟုတ်ပေ။ ၎င်းတို့၏ ရည်မှန်းချက်သည် အနန္တနတ်ဆိုးတောင်တန်းကို လုံးလုံးလျားလျား ချေမှုန်းရန်ဖြစ်သည်။ ဤသို့သော အခြေအနေမျိုး၌ သူသည် အစွမ်းကုန် တိုက်ခိုက်ရုံမှလွဲ၍ အခြားရွေးချယ်စရာ မရှိတော့ပေ။

"အခု မင်းအလှည့်ပဲ"

ချူးယွင်ဖန်းသည် နဂါးဘုရင်ကို စိုက်ကြည့်လိုက်သည်။ သူသည် ဘုရင်နှစ်ပါး၏တိုက်ခိုက်မှုကို တစ်ပြိုင်နက်တည်း ရင်ဆိုင်ခဲ့ရချိန်၌ပင် မကြောက်ရွံ့ခဲ့ပေ။ သူ၏အမြင်အရ နဂါးဘုရင်နှင့် ခြင်္သေ့ဘုရင်တို့သည် အလွန်အားကောင်းသော်လည်း ငွေလမင်းဘုရင်နှင့် အဆင့်တူမျှသာဖြစ်သည်။ ၎င်းတို့သည် သူနှင့် နှိုင်းယှဉ်ပါက အားနည်းလွန်းလှသည်။ ရွှေအမတေအဆင့် တိုက်ပွဲစွမ်းရည်အချို့ကို အမှန်တကယ် မဆုပ်ကိုင်ထားပါက၊ သူ့ကို အနိုင်ယူရန် အခွင့်အလမ်းမရှိနိုင်ပေ။

နဂါးဘုရင်သည် နောက်မဆုတ်ခဲ့ပေ။ သူ၏အနောက်တွင် အနန္တနတ်ဆိုးတောင်တန်းတစ်ခုလုံးရှိနေသောကြောင့် နောက်ဆုတ်ရန် နည်းလမ်းမရှိတော့ပေ။

"ချူးယွင်ဖန်း၊ ဒီနေ့ မင်း လုပ်ချင်တာလုပ်လို့ရမယ်လို့ ထင်နေတာလား၊ အရှင်ဘိုးဘေးကြီး ကျေးဇူးပြုပြီး ဒီအင်အားကြီးတဲ့ရန်သူကို သတ်ပေးပါ"

နဂါးဘုရင်က အော်ဟစ်လိုက်သည်နှင့် တစ်စုံတစ်ယောက်ကို ဆင့်ခေါ်နေသကဲ့သို့ အနန္တနတ်ဆိုးတောင်တန်း၏ နက်နဲသော ချိုင့်ဝှမ်းများမှ စစ်ခရာသံများ မြည်ဟစ်လာသည်။

"ဘယ်သူကို ဖိတ်ခေါ်ဖို့ ကြိုးစားနေတာလဲ၊ ခင်ဗျားကို ဘယ်သူမှ မကယ်နိုင်ဘူး" ချူးယွင်ဖန်းက လှောင်ရယ်လိုက်သည်။

တစ်စုံတစ်ဦးသည် နက်ရှိုင်းသော အိပ်စက်မှုမှ အတင်းအကြပ် လှုပ်နှိုးခံလိုက်ရသကဲ့သို့ အနန္တနတ်ဆိုးတောင်တန်းအတွင်းမှ အင်အားကြီး အရောင်အဝါတစ်ခု နိုးထလာကြောင်း ချူးယွင်ဖန်း ခံစားရနိုင်သည်။ အနန္တနတ်ဆိုးတောင်တန်း၏ စွမ်းအင် အစစ်အမှန် ရောက်ရှိလာတော့မည်ကို သူ သိနေသည်။ နတ်ဆိုးများသည် ခွန်းလွန်နယ်မြေတွင် နှစ်အတော်ကြာ အခြေချနေထိုင်ခဲ့သူများဖြစ်သောကြောင့် ၎င်းတို့တွင် မည်သို့မျှ ဝှက်ဖဲများ မရှိဘဲနေကြမည်နည်း။ ဤအရောင်အဝါသည် ပြင်းထန်လွန်းလှသဖြင့် ချူးယွင်ဖန်းလျှင်ပင် လှည့်ကြည့်လိုက်မိသည်။

"ဟားဟားဟား၊ ချူးယွင်ဖန်း၊ မင်းလုပ်ချင်တာ လုပ်လို့ရဦးတယ်လို့ ထင်နေတာလား။ ဘိုးဘေးကြီးသာ ဒီကို ရောက်လာရင် မင်း သေရလိမ့်မယ်" နဂါးဘုရင်က ရယ်မောလိုက်သည်။ နဂါးဘုရင်သည် ဘိုးဘေးကြီး တွေးမိသောအခါ သူ၏ ကျောရိုးကို ရှာတွေ့ခဲ့ပုံပေါ်သည်။

ချူးယွင်ဖန်းသည် ဤသို့ မခံစားရသည်မှာ ကြာမြင့်ပြီဖြစ်သည်။ တစ်ချိန်တည်းမှာပင် ခုခံနိုင်စွမ်းမရှိဘူးဟု ခံစားရသည်အထိ ကြောက်မက်ဖွယ်ကောင်းသည့်ရန်သူနှင့် မကြုံတွေ့ရသည်မှာ ကြာမြင့်ခဲ့ပြီဖြစ်သည်။

"အဲ့ဒါဘယ်သူလဲဆိုတာ ကျုပ် ဂရုမစိုက်ဘူး။ ကျုပ်ရှေ့မှာ ပေါ်လာဖို့ သတ္တိရှိရင် သတ်ပစ်ရမှာပဲ။ ဒါပေမယ့် အဲ့ဒါမတိုင်ခင် ခင်ဗျားကို အရင်သတ်ပစ်မယ်" ချူးယွင်ဖန်းက အော်ဟစ်လိုက်သည်။

သူသည် လှုပ်ရှားရန် အသင့်ဖြစ်နေပြီဖြစ်သည်။ ချူးယွင်ဖန်းသည် သူ့အနောက်ရှိ မိုးကြိုးအတောင်ပံများကို ဖြန့်ကြက်လိုက်သောအခါ သူ၏အရှိန်သည် မြန်ဆန်လွန်းသောကြောင့် လူအများအပြားက သူ့ကို ရှင်းရှင်းလင်းလင်းပင် မမြင်နိုင်ခဲ့ပေ။ ချူးယွင်ဖန်း မိုးကြိုးဓားတစ်ချောင်းကို လက်ထဲတွင် ကိုင်ဆောင်ထား၍ သူ ထုတ်လွှတ်လိုက်သော ဓားအလင်းရောင်သည် ပေရာနှင့်ချီရှည်လျားကြောင်းသာ မြင်တွေ့လိုက်ရသည်။ ၎င်းသည် ကောင်းကင်သို့ မြင့်တက်သွားကာ နဂါးဘုရင်ကို ခုတ်ချလာသည်။

နဂါးဘုရင်သည် ချူးယွင်ဖန်း၏အရှိန်အဟုန်နှင့် မယှဉ်နိုင်ခဲ့ပေ။ ၎င်းသည် သူ၏ ရွေ့လျားမှုအာရုံထက်ပင် ကျော်လွန်သွားခဲ့သည်။ နဂါးဘုရင်သည် ၎င်းကို တိုက်ခိုက်ရန် သူ၏ ဗီဇကိုသာ အားကိုးနိုင်ခဲ့ရ၍ စစ်ပုဆိန်ကို သူ့အရှေ့တွင် ပိတ်ဆို့ထားလိုက်သည်။ ဓားအလင်းရောင် ကျရောက်လာသည်နှင့် ၎င်းကို စစ်ပုဆိန်ဖြင့် တားဆီးလိုက်သည်။ သို့သော် လုံးလုံးလျားလျား တားဆီးနိုင်ခြင်း မရှိသောကြောင့် ဓားအလင်းရောင်သည် နဂါးဘုရင်၏ပခုံးရှိ အသားစိုင်များကို လှီးဖြတ်သွားခဲ့သည်။ သူ၏ခန္ဓာကိုယ်မှ သွေးများ လွင့်စဉ်လာခဲ့ရာ၊ ကောင်းကင်တစ်ခုလုံးပင် နီရဲစွာ စွန်းထင်သွားပုံပေါ်သည်။

နဂါးဘုရင်သည် စူးရှစွာ အော်ဟစ်လိုက်သော်လည်း ချူးယွင်ဖန်းကို တန်ပြန်တိုက်ခိုက်ခြင်းမျိုး မပြုလုပ်ခဲ့ပေ။ သူသည် ထိုအချိန်တွင် ဆက်လက်တိုက်ပွဲဝင်ရန်ပင် အင်အားမရှိတော့ပေ။ သူသည် ချူးယွင်ဖန်း၏ အနည်းငယ်သော လှုပ်ရှားအပြီးတွင် ကြောက်မက်ဖွယ် အစစ်အမှန်ကို ခံစားမိခဲ့၍ ပြန်မခုခံနိုင်သည်အထိ ရိုက်နှက်ခံခဲ့ရသည်။

ဤအချိန်တွင် ဘိုးဘေးကြီးကို စောင့်ဆိုင်းခြင်းကသာ အကောင်းဆုံး ဖြေရှင်းချက်ဖြစ်ပေလိမ့်မည်။ သူသည် ချူးယွင်ဖန်း၏တိုက်ခိုက်မှုကို ရှောင်ရှားရန်အတွက် အနောက်သို့ဆုတ်ခွာရန် ကြိုးစားနေခဲ့သည်။ နဂါးဘုရင်၏ စိုးရိမ်စိတ်များ စတင် ကြီးမားလာသည်။ ဘိုးဘေးကြီးကို နိုးထစေမည့် လုပ်ငန်းစဉ်သည် ဤမျှရှုပ်ထွေးလိမ့်မည်ဟု သူ မထင်မှတ်ခဲ့ပေ။ အချိန်အတိုင်းအတာသည် မကြာမြင့်သေးသော်လည်း ချူးယွင်ဖန်းသည် အလွန်ကြောက်မက်ဖွယ်ကောင်းသည်ဟု ဆိုရမည်။ စက္ကန့်တိုင်းသည် ရာစုနှစ်တစ်ခုမျှ ရှည်လျားလွန်းသည်ဟု နဂါးဘုရင် ခံစားနေရသည်။

"ထွက်သွားဖို့ ကြိုးစားနေတာလား"

ချူးယွင်ဖန်းသည် ထုံးစံအတိုင်း နဂါးဘုရင်ကို လွတ်မြောက်ခွင့်ပြုမည် မဟုတ်ပေ။ နဂါးဘုရင်သည် ဤနှစ်များတစ်လျှောက် မရေတွက်နိုင်သော တိုက်ခိုက်မှုများ ပြုလုပ်ရန် စီစဉ်ခဲ့သည့်အပြင် လူပေါင်း သန်းရာနှင့်ချီ၍ သတ်ဖြတ်ခဲ့သည်။ သူသည် ပြည်ထောင်စု၏ အလိုရှိစာရင်း၌ ထိပ်ဆုံးတွင် ရှိနေသည်။

သို့သော်လည်း ယခင်က နဂါးဘုရင်ကို မည်သူမျှ ထိခိုက်အောင် မပြုလုပ်နိုင်ခဲ့ပေ။ သမ္မတကြီးလျှင် သူ၏ စွမ်းအင်နှင့် တန်းတူဖြစ်နေသောကြောင့် သူ့ကို မထိခိုက်နိုင်ခဲ့ပေ။ ယခုဆိုလျှင် ချူးယွင်ဖန်းသည် ဤမျှကောင်းမွန်သော အခွင့်အရေးကို ရရှိခဲ့သောကြောင့် သူ့ကို ထွက်ပြေးခွင့်ပြုမည် မဟုတ်ပေ။

ချူးယွင်ဖန်း၏ လက်ချောင်းထိပ်များမှ ဓားအလင်းရောင်များ ထွက်ပေါ်လာသည်။ ၎င်းဓားအလင်းရောင်များ လွင့်ထွက်သွားသည်နှင့် ကြောက်မက်ဖွယ် မုန်တိုင်းများအဖြစ် ပြောင်းလဲသွားလေသည်။ ၎င်းစွမ်းအင်များသည် ချူးယွင်ဖန်းကို ဗဟိုအဖြစ်ထားရှိကာ နဂါးဘုရင်ဆီသို့ ပျံသန်းသွားခဲ့သည်။

ဘုံး

ဘုံး

ဘုံး

ကျယ်လောင်သော ပေါက်ကွဲသံများနှင့်အတူ ချူးယွင်ဖန်း၏ရိုးရှင်းသော ဓားအလင်းရောင်သည် နဂါးဘုရင်၏ခန္ဓာကိုယ်ပေါ်တွင် ကြီးမားသော ဒဏ်ရာများ ကျန်ရစ်သွားစေသည်။ ဒဏ်ရာတစ်ခုချင်းစီသည် အလွန်နက်ရှိုင်းလွန်းသောကြောင့် အရိုးများကိုပင် မြင်တွေ့နိုင်သည်။ ချပ်ဝတ်တန်ဆာ၏ ကာကွယ်မှုကြောင့်သာ မဟုတ်ပါက၊ နဂါးဘုရင်သည် ချူးယွင်ဖန်း၏ ဓားအလင်းရောင်ဖြင့် အသားစိုင်များအဖြစ် ပြောင်းလဲသွားပေလိမ့်မည်။

နဂါးဘုရင်သည် ချူးယွင်ဖန်း၏ ဓားအလင်းရောင်များ မည်မျှအစွမ်းထက်သည်ကို ယခုအချိန်မှ အမှန်တကယ် ခံစားမိခဲ့သည်။ ၎င်းစွမ်းအင်များသည် ယခင်က မည်သူမျှ မရောက်ရှိဖူးသော အဆင့်သို့ ရောက်ရှိနေခဲ့သည်။ တစ်စုံတစ်ယောက်၏ ဓားအလင်းရောင်သည် ဤမျှ ကြောက်မက်ဖွယ်ကောင်းလိမ့်မည်ဟု သူ မည်သည့်အချိန်ကမျှ မတွေးခဲ့မိပေ။ ချူးယွင်ဖန်းသည် နတ်အဆင့် သိုင်းပညာ သို့မဟုတ် မှော်လက်နက်များကိုပင် အသုံးမပြုဘဲ အလွန်ကြောက်မက်ဖွယ်ကောင်းနေခဲ့သည်။

"ဘယ်သူလဲ။ အနန္တနတ်ဆိုးတောင်တန်းမှာ ဒီလောက် မိုက်ရိုင်းရိုင်းစိုင်းဖို့ သတ္တိရှိတယ်ပေါ့လေ"

ရုတ်တရက်ဆိုသလိုပင် အနန္တနတ်ဆိုးတောင်တန်း၏ နက်နဲသောနေရာမှ ကမ္ဘာတစ်ခုလုံးကို တုန်လှုပ်သွားစေမည့် ရှေးကျ၍ အလွန် ဒေါသထွက်နေသော ဟိန်းဟောက်သံများ ထွက်ပေါ်လာသည်။ နဂါးဘုရင်၏ မျက်နှာတွင် ရွှင်လန်းသော အကြည့်များ ချက်ချင်းပင် ပေါ်ပေါက်လာသည်။ သူ စောင့်မျှော်နေသော အခွင့်အရေးသည် နောက်ဆုံးတွင် ရောက်ရှိလာပြီဖြစ်သည်။ သူသည် ချူးယွင်ဖန်း၏ ဓားအလင်းဖြင့် ခုတ်ဖြတ်ခံရသောကြောင့် သွေးများထွက်နေခြင်းကိုပင် ဂရုမစိုက်နိုင်ပေ။

"ခင်ဗျား တကယ် ထွက်သွားနိုင်မယ်လို့ ထင်နေတာလား။ နုံအလိုက်တာ" ချူးယွင်ဖန်းက အေးစက်စွာ အော်ဟစ်ပြီးသည်နှင့် ဓားအလင်းရောင်များ လင်းလက်သွားလေသည်။ ထိုအခါ လွတ်မြောက်မည်ဟု ထင်မှတ်နေသော နဂါးဘုရင်သည် ဓားအလင်းရောင်ဖြင့် ခေါင်းဖြတ်ခံလိုက်ရသည်။