အိန်ဂျယ်စီမံကိန်း
Vol. 4 Ch. 46
အနန္တရထားသည် ညအမှောင်ကို အမှီပြု၍ ပိုင်ဝမ်ဘူတာမှ တိတ်တဆိတ် ထွက်ခွာလာ၍ အရှေ့သို့ ဦးတည်သွားနေလေ၏။
ကီကီသည် လင်းရှန်ကို တစ်ချက်ကြည့်ကာ မေးလိုက်သည်၊ “ဘာလို့ ဒီလောက်အလျင်လိုနေတာလဲ၊ ကျွန်မတို့ ရှာမကြည့်ရသေးတဲ့ နေရာတွေ အများကြီးရှိသေးတယ်လေ”
“ထောက်ပံ့ရေးပစ္စည်းတွေက များပေမယ့် လောဘက ငါတို့ကို ဆုံးရှုံးမှုကြီးကြီးမားမား ဖြစ်လာနိုင်စေတယ်”
လင်းရှန်က အေးစက်စွာ ပြန်ဖြေသည်။
“ဒါ့အပြင် ထန်ဟိုင်ဟာ သေမသွားခဲ့ဘူး။ သူက ထပ်ပြီး ပြဿနာတက်လာနိုင်မှာကို ငါ စိုးရိမ်တယ်”
“မသေဘူးဟုတ်လား”
ကီကီ၏ မျက်ခုံးများ တွန့်ကွေးသွားသည်။
“ကျွန်မက ရှင်သူ့ကို သတ်လိုက်ပြီ ထင်တာ”
“ငါ မသတ်ခဲ့ဘူး...”
လင်းရှန်သည် နက်ရှိုင်းစွာ သက်ပြင်းချကာ သူမြင်တွေ့ခဲ့သည်များကို ပြန်ပြောပြသည်။
“ငါ ထင်တာက ထန်ဟိုင်မှာ တစ်နည်းနည်းနဲ့ စွမ်းအားရှိနေတယ်။ ငါတို့မြင်ခဲ့တာက သူ့ရဲ့ သန္ဓေပြောင်းစွမ်းအားတစ်ခုဖြစ်နိုင်တယ်”
လို့ရှားရှားနှင့် လို့ဟွာတို့ထံ လှည့်ကာ လင်းရှန်က မေးလိုက်သည်၊၊
“မင်းတို့နှစ်ယောက်က စွမ်းအားရှင်တွေအကြောင်း ဘယ်လောက်သိထားလဲ”
လို့ဟွာသည် ထိတ်လန့်သွားပုံရပြီး ခေါင်းကို အလျင်အမြန်ခါယမ်းသည်။
“ငါသိတာနည်းနည်းပဲ... တစ်နေ့မှာ ငါရုတ်တရက် အရမ်းသန်မာလာတာပဲ”
“အကို၊ မမှတ်မိဘူးလား”
လို့ရှားရှားက ဝင်ပြောသည်။
“ဖုန်းယူမင်က ပိုးကောင်ပုံစံပြောင်းပြီး နင့်ကို တိုက်ခိုက်တဲ့အခါ၊ နင့်ကို အဆင့်နိမ့်တယ်လို့ ပြောခဲ့တယ်လေ။ သူက ထူးဆန်းတဲ့ ပုံမှန်မဟုတ်တဲ့အရာတွေ ဒါမှမဟုတ် တခြားစွမ်းအားရှင်တွေကို သတ်တဲ့အခါ စွမ်းအားတွေ တိုးတက်လာတယ်လို့လည်း ပြောခဲ့တယ်”
လို့ဟွာသည် ခေါင်းကုတ်ကာ၊၊ “အခုမင်းပြောမှ သူအဲဒီလိုပြောခဲ့တာ သတိရတယ်”
“တကယ်လား”
ချန်ဆီရွှမ် သက်ပြင်းချလိုက်သည်။
“စွမ်းအားတွေ တိုးတက်နိုင်တာလား”
“တိုးတက်နိုင်သင့်တယ်”
လင်းရှန်က သေချာတွေးကာ ပြောလိုက်သည်။ “အဆင့်ခွဲခြားမှုရှိတယ်ဆိုရင်၊ ဖုန်းယူမင်က အနိမ့်ဆုံးအဆင့်မှာ မဟုတ်ခဲ့ဘူး။ သူက မယုံနိုင်လောက်အောင် သန်မာခဲ့ပြီး ငါတို့သုံးယောက်က စွမ်းအားရှင်တွေဖြစ်နေတာကို သိရက်နဲ့ မကြောက်ခဲ့ဘူး။ ဒါက သူ့ရဲ့စွမ်းအားကို ယုံကြည်နေတယ်ဆိုတာ ပြတယ်”
ကီကီသည် ပုံမှန်ထက် တိတ်ဆိတ်နေသည်ကို သတိပြုမိရာ၊ လင်းရှန်က မျက်လုံးပင့်ကြည့်လိုက်ရာ သူမက သူ့ကို မသက်မသာပြုံးကာ ထူးဆန်းသောအမူအရာဖြင့် ကြည့်နေသည်။
“တစ်ခုခုသိရင် ပြောစမ်းပါဟ”
လင်းရှန်က တောင်းဆိုလိုက်သည်။ သူမပြုံးနေသည့်အခါ အံ့ဩဖွယ်ရာ ထုတ်ဖော်ပြလေ့ရှိကြောင်း သူ သိထားသည်။
“တကယ်ပဲ ကျွန်မက စွမ်းအားတွေ ဘယ်လိုတိုးတက်လာတယ်ဆိုတာ သိတယ်၊ ပြီးတော့ အမျိုးအစားတွေ အများကြီးရှိတယ်လို့ ပြောရင်၊ ရှင်စိတ်ဝင်စားလား”
ကီကီက ပေါ့ပေါ့ပါးပါးဟန်နှင့် စလိုက်သည်။
အခန်းထဲတွင် တိတ်ဆိတ်သွားပြီး အားလုံး၏ အံ့သြနေသောအကြည့်များသည် ကီကီထံသို့ ရောက်သွားသည်။
လင်းရှန်က မျက်ခုံးတွန့်ချိုးသွားကာ “မင်းဘာလိုချင်တာလဲ”
ကီကီသည် ပြုံးကာ သူ့အနီးသို့ ကိုင်းညွတ်လျက် တစ်စုံတစ်ရာကို တိုးတိုးပြောလိုက်သည်။ လင်းရှန်သည် ချက်ချင်း နဖူးကို ပွတ်သပ်လျက် စိတ်ညစ်စွာ ပြောသည်။
“ကောင်းပြီလေ၊ ငါ သဘောတူတယ်”
“အိုကေ…ရှင်ကတိပေးခဲ့ပြီးပြီနော်”
ကီကီက ကျေနပ်စွာ ပြောကာ သူမ၏ရှင်းပြချက်ကို စတင်လိုက်သည်။
“ပထမဆုံး”
သူမက လက်တစ်ချောင်းထောင်ကာ “ပထမဆုံး ဝင်ရိုးစွန်းညပြီးတော့၊ ကမ္ဘာတဝှမ်းက သန္ဓေပြောင်းလူသားတွေရဲ့ ဖြစ်ရပ်ပေါင်း တစ်သောင်းကျော်ကို မှတ်တမ်းတင်ခဲ့တယ်၊၊ ဒါပေမဲ့ အဲ့မှတ်တမ်းက ကပ်ဘေးပြီးနောက် ဒေတာတွေရဲ့ တစ်စိတ်တစ်ပိုင်းပဲ။ ကမ္ဘာပျက်ကပ်နေ့ပြီးနောက်၊ ဖက်ဒရယ်အစိုးရက အိန်ဂျယ်စီမံကိန်းလို့ ခေါ်တဲ့ အထူးသုတေသနဌာနကို အလျင်အမြန် တည်ထောင်ခဲ့တယ်။ သူ့ရဲ့ရည်ရွယ်ချက်က သန္ဓေပြောင်းမှုတွေကို လေ့လာဖို့နဲ့ သူတို့ရဲ့စွမ်းအားတွေကို အသုံးပြုပြီး တွင်းနက်တွေရဲ့ လျှို့ဝှက်ချက်ကို ဖော်ထုတ်ကာ ကမ္ဘာကို ကယ်တင်ဖို့ပဲ”
“နင် ဒါကို ဘယ်လိုသိတာလဲ”
ချန်ဆီရွှမ်က အံ့ဩစွာ မေးသည်။
ကီကီက ဂုဏ်ယူစွာ ပြုံးကာ၊ “ဖက်ဒရယ်အစိုးရရဲ့ အင်တာနက်ကို ဟက်ခ်ဖို့ဆိုတာ သိပ်မခက်ပါဘူး။ ပြီးတော့ ကမ္ဘာပျက်ကပ်ကြီးမှာ ဘယ်သူက ငါ့ကို တားမှာလဲ”
“ဆက်ပြော”
လင်းရှန်က သူမ၏စူးရှသောအကြည့်ဖြင့် စိုက်ကြည့်လိုက်သည်၊၊ သူမသည် လိမ္မာပါးနပ်သော ကော်ပိုရေးရှင်း၏ ဆက်ခံသူ ဟုတ်သည် ဖြစ်စေ၊ မဟုတ်သည် ဖြစ်စေ၊ ဝင်ရိုးစွန်းညပြီးနောက် ကယ်ဆယ်ရေးရဟတ်ယာဉ်ကို ရယူနိုင်ခဲ့သည်မှာ တိုက်ဆိုင်မှုမဟုတ်ကြောင်း သူ သံသယရှိနေသည်။
ကီကီက လည်ချောင်းရှင်းလိုက်သည်။
“ဖက်ဒရယ်စီမံကိန်းက အသက်ရှင်ကျန်ရစ်တဲ့ ထိပ်တန်းသိပ္ပံပညာရှင်များကို စုစည်းခဲ့တယ်။ သူတို့ရဲ့ သုတေသနအရ ဝင်ရိုးစွန်းညမှာ ဖုတ်ကောင်တွေအဖြစ် မပြောင်းလဲသွားတဲ့ အသက်ရှင်ကျန်ရစ်သူများအားလုံးမှာ ဗီဇလွှမ်းမိုးမှုကို တွန်းလှန်နိုင်တဲ့ ဘုံစွမ်းအားတစ်မျိုးရှိကြောင်း တွေ့ရှိခဲ့တယ်။ အာ့အရာကို ဝိညာဉ်လှိုင်းတန်ဖိုးလို့ အမည်ပေးခဲ့တယ်။ အားနည်းတဲ့ အမျိုးသမီးတွေနဲ့ ကလေးတွေတောင်မှ အနည်းဆုံး ၁ ရှိတယ်။ ဆန့်ကျင်ဘက်အနေနဲ့၊ ဖုတ်ကောင်တွေနှင့် ကြောက်မက်ဖွယ်သတ္တဝါတွေမှာတော့ သုညအောက် အနှုတ်တန်ဖိုးရှိတယ်”
“အစပိုင်းမှာ ဒါကို ရွေးချယ်စရာယန္တရားတစ်ခုလို့ ထင်ခဲ့ကြပေမယ့် ပုံစံအမှန်ကို မတွေ့ရှိခဲ့တာကြောင့် အဲ့ဒီအရာကို အသက်ရှင်ကျန်ရစ်သူများ၏ “အသက်စွမ်းအင်”လို့ နာမည်ပေးခဲ့ကြတယ်”
“စိတ်ဝင်စားစရာကောင်းတာကတစ်ခုက…” ကီကီက ဆက်ပြောသည်။
“စွမ်းအားရှင်တွေနဲ့ ရုပ်ပိုင်းဆိုင်ရာ သန်မာသူများအားလုံးရဲ့ ဝိညာဉ်လှိုင်းတန်ဖိုးတွေက သိသိသာသာ မြင့်မားနေတယ်။ အိန်ဂျယ်စီမံကိန်းက စွမ်းအားအမျိုးအစား ၃၄ မျိုးကို ခွဲခြားသတ်မှတ်ပြီး သူတို့ကို လုပ်ဆောင်နိုင်စွမ်းနှင့် ဖျက်ဆီးနိုင်စွမ်းအားအပေါ် အခြေခံ၍ အကဲဖြတ်ခဲ့တယ်။ ပညာရှင်တွေ အချက်လက်တွေကို ဝိညာဉ်လှိုင်းတန်ဖိုးတွေနဲ့ နှိုင်းယှဉ်ပြီး အပြုသဘောဆောင်တဲ့ ဆက်စပ်မှုကို တွေ့ရှိခဲ့တယ်”
“အနှစ်ချုပ်လိုက်ရင် ဝိညာဉ်လှိုင်းတန်ဖိုးက အသက်စွမ်းအင် ဒါမှမဟုတ် ညအမှောင်ထုကို တွန်းလှန်နိုင်တဲ့စွမ်းရည်ကို ကိုယ်စားပြုတယ်။ လူတစ်ဦးက ပိုသန်မာလေ၊ သူ့ရဲ့ တန်ဖိုးတွေက ပိုပြီးမြင့်မားလေပဲ”
“ဒါက ပထမအချက်ပဲ”
ကီကီက လက်ချောင်းနှစ်ချောင်းထောင်ကာ ပြောသည်။
“ဒုတိယအရေးကြီးတဲ့ တွေ့ရှိချက်မှာ စွမ်းအားတွေက တိုးတက်နိုင်တယ်ဆိုတဲ့အချက်ပဲ၊၊ အချို့မှတ်တမ်းတွေမှာ အဆင့် ၃ သို့မဟုတ် အဆင့် ၄ထက် ကျော်လွန်တဲ့ တန်ဖိုးများရှိသူတွေကို အစောပိုင်းထဲက တွေ့ရှိခဲ့ကြတယ်”
“အဆင့် ၃၊ အဆင့် ၄ ”
လင်းရှန် မျက်ခုံးတွန့်သွားသည်။
“မင်း တစ်ခုခုကို ချန်ထားနေတာလား”
ကီကီက ပခုံးတွန့်ကာ “ကျွန်မက ဒေတာတွေကို ခြုံငုံကြည့်ခဲ့တာပဲ။ ဒါပေမယ့် အကျဉ်းအားဖြင့်ပြောရရင်၊ သုတေသီတွေက ဝိညာဉ်လှိုင်းတန်ဖိုး၊ ရုပ်ပိုင်းဆိုင်ရာခွန်အား၊ စွမ်းအင်ထုတ်လွှတ်မှု၊ ဖျက်ဆီးနိုင်စွမ်းနှင့် ဇီဝဆိုင်ရာ သေစေနိုင်မှုတို့ကို အခြေခံ၍ အလေးထားအကဲဖြတ်စနစ်တစ်ခုကို ဖန်တီးခဲ့တယ်။ အကြမ်းဖျင်းပြောရရင်၊
သာမန်လူသားများနှင့် အဆင့်နိမ့်စွမ်းအားရှင်များသည် ရင်းမြစ်အဆင့်အတွင်းသို့ ကျရောက်ပြီး ဝိညာဉ်လှိုင်းတန်ဖိုးများသည် ၁ မှ ၁၀၀ အထိရှိသည်။
အဆင့် ၃ ကို သန်မာအဆင့်လို့ ခေါ်ပြီး၊ သူတို့က လူသားကန့်သတ်ချက်တွေကို ကျော်လွန်သူတွေပဲ။ သူတို့ကို ကြီးမားတဲ့လက်နက်တွေမပါဘဲ သတ်ဖြတ်ဖို့က မဖြစ်နိုင်သလောက်ပဲ။ သူတို့ရဲ့ ဝိညာဉ်လှိုင်းတန်ဖိုးတွေကက ၅၀၀ ကနေ ၁,၀၀၀ အတွင်းရှိတယ်”
အခန်းထဲ၌ တိတ်ဆိတ်သွားပြီး အားလုံးသည် အသေးစိတ်အချက်များက်ု စဉ်းစားနေကြသည်။
“အဆင့်လေးကို သားရဲအဆင့်လို့ ခေါ်ပြီး၊ အဲ့အဆင့်ကို ဒေသတစ်ခုလုံးအတွက် ကြီးမားတဲ့ခြိမ်းခြောက်မှုအဖြစ် သတ်မှတ်ခံတယ်။ ၎င်းကို ဖိနှိပ်ရန် လေးလံသော စစ်ရေးအင်အား၊ တင့်ကားတွေနဲ့ သံချပ်ကာလက်နက်တွေ လိုအပ်တယ်။ သူ့ရဲ့ ဝိညာဉ်လှိုင်းတန်ဖိုးင ၁,၀၀၀ မှ ၃,၀၀၀ အထိ တိုက်ခိုက်နိုင်စွမ်းရှိတယ်” ကီကီက ရှင်းပြသည်။
“ပျက်စီးခြင်းအဆင့်အထက်ကတော့ အသေးစိတ်ဒေတာမရှိဘူး။အဲ့အဆင့်တွေက ထပ်ကိန်းတိုးတက်မှုအပေါ် အခြေခံထားသော သီအိုရီဆိုင်ရာ ခန့်မှန်းချက်တွေပဲ”
လို့ရှားရှားက သိချင်စိတ်ပြည့်လျှံသော မျက်လုံးများဖြင့် မေးလိုက်သည်၊၊
“အစ်မကီကီ၊ စွမ်းအားတွေက ဘယ်လိုတိုးတက်လာတာလဲ”
“အင်း... လူတိုင်းမျှော်လင့်ထားသလို မဟုတ်ဘူး”
ကီကီ၏ အမူအရာသည် ရှုပ်ထွေးလာသည်။ “လျှို့ဝှက်အစီရင်ခံစာတွေမှာ ငါမြင်ခဲ့တာက အဆင့် ၂ နှင့်အထက် စွမ်းအားရှင်တွေဟာ တိုက်ခိုက်မှုကနေ တဆင့် ဝိညာဉ်လှိုင်းတန်ဖိုးကို တိုးမြှင့်နိုင်တယ်လို့ ဖော်ပြထားတယ်။ အထူးသဖြင့် ထူးဆန်းတဲ့အရာတွေ ဒါမှမဟုတ် တခြားစွမ်းအားရှင်တွေကို အနိုင်ယူတဲ့အခါပဲ။ ဒါပေမယ့် ဒါက အစောပိုင်းအစီရင်ခံစာတွေကမို့ အသေးစိတ်က နည်းနည်းပါးပါးပဲ ရှိတယ်”
“အဆင့် ၂ နှင့်အထက်လား”
လင်းရှန်၏ အကြည့်များ စူးရှလာသည်။
“အဆင့် ၁ ကရော”
“အိုး”
ကီကီက သူ့ကို ရယ်ပြီး ကြည့်သည်။
“အခု ရှင်က မှန်ကန်တဲ့မေးခွန်းကို မေးလိုက်ပြီ”
သူမသည် တည်ကြည်သောအမူအရာဖြင့် အခန်းထဲတွင် လှည့်လျှောက်ရင်း ပြောသည်။
“ဒါက အထူးဆန်းဆုံးအပိုင်းပဲ။ သုတေသနဌာနက ရင်းမြစ်အဆင့်စွမ်းအားတွေဟာ မတည်ငြိမ်ဘူးဆိုတာ တွေ့ရှိခဲ့တယ်။ ဒီအဆင့်မှာရှိတဲ့ စွမ်းအားရှင်တွေဟာ တိုးတက်ဖို့အတွက် တစ်ခုခုကို လိုအပ်တယ်—ဖြစ်ရပ်တစ်ခု၊ ထုံးတမ်းစဥ်လာတစ်ခု၊ ဒါမှမဟုတ် စိတ်ခံစားမှုပြောင်းလဲမှုတစ်ခုပေါ့။ အာရုဏ်ဦးစီမံကိန်းက စစ်မှန်တဲ့ပြောင်းလဲမှု ဒါမှမဟုတ် အပြည့်အဝတိုးတက်မှုဟာ အဆင့် ၂ မှာသာ စတင်တယ်လို့ သီအိုရီထုတ်ခဲ့တယ်။ ဒါကြောင့် သူတို့က ဒါကို တိုးတက်မှုအဆင့် ဒါမှမဟုတ် ဖြတ်ကျော်အဆင့်လို့ ခေါ်တယ်”
“ထုံးတမ်းစဥ်လာ”
အုပ်စုတစ်ခုလုံး တပြိုင်နက် တုံ့ပြန်လိုက်ကာ ၎င်းတို့၏အသံများတွင် မယုံကြည်နိုင်မှုများ ရောယှက်နေသည်။ ဤအသုံးအနှုန်းသည် အလွန်ဆန်းကြယ်သော သို့မဟုတ် ဘာသာရေးဆိုင်ရာ အဓိပ္ပာယ်သက်ရောက်နေသည်။
“အတိအကျပဲ”
ကီကီက ဆက်ပြောသည်။
“ဖုန်းယူမင်ကို ဥပမာယူရရင်၊ သူက အမျိုးအစား-၁၆ ခြေလက်အတုယူမှု ဒါမှမဟုတ် အမျိုးအစား-၂၁ မူမမှန်တဲ့ ကူးစက်မှု တစ်ခုဖြစ်တယ်လို့ ငါထင်တယ်။ ဒီနှစ်မျိုးစလုံးမှာ တိုးတက်မှုဟာ ထူးဆန်းတဲ့အရာတွေ ဒါမှမဟုတ် စွမ်းအားရှင်တွေကို သတ်ပြီး သန္ဓေပြောင်းခြေလက်တွေ ဒါမှမဟုတ် ခန္ဓာကိုယ်တွေမှတဆင့် အသားနဲ့သွေးကို စုပ်ယူတဲ့အခါ ဖြစ်ပေါ်တယ်။ ဒီလုပ်ငန်းစဉ်က တိုးတက်မှုကို ဖြစ်ပေါ်စေနိုင်တယ်”
သူမသည် ရပ်တန့်ပြီး လို့ဟွာထံ လှည့်ကာ၊ “ဒါပေမယ့် ရှင်လို လူတစ်ယောက်အတွက်ကတော့ ဒါက မတူဘူး။ ရှင်ရဲ့ ဖော်ပြချက်အရ၊ ရှင်က အမျိုးအစား-၃ ခန္ဓာကိုယ်မြှင့်တင်မှုစွမ်းအားရှင်ဖြစ်ရမယ်—ဒါက သာမန်အမျိုးအစားတစ်ခုပဲ။ ဒါပေမယ့် ဒီအမျိုးအစားက အဆင့် ၂ ကို တိုးတက်ဖို့အတွက် လုံးဝမတူတဲ့နည်းလမ်းတစ်ခု လိုအပ်တယ်။ အိန်ဂျယ်စီမံကိန်းက ဒီလမ်းကြောင်းအတွက် မပြီးပြတ်သေးတဲ့ အကဲဖြတ်မှုတွေ အများကြီးရှိတယ်။ ဖုန်းယူမင်ရဲ့နည်းလမ်းတွေက ရှင့်အတွက် လုံးဝအလုပ်မလုပ်ဘူး။ သူတို့ကို အခြားရွေးချယ်စရာတိုးတက်မှုလမ်းကြောင်းတွေလို့ သတ်မှတ်ထားတယ်”
“တကယ်လား”
လို့ရှားရှားက ထိတ်လန့်စွာ အော်လိုက်သည်။ “ဒါက ကြောက်စရာကောင်းလိုက်တာ”
“သေချာတော့ ဘယ်သိနိုင်မလဲ”
ကီကီက ပခုံးတွန့်လိုက်သည်။
“ဇီဝဗေဒ ဒါမှမဟုတ် ရူပဗေဒရှုထောင့်ကနေ—အင်း၊ ဒါကို မေ့လိုက်ပါ။ အဲဒီနယ်ပယ်တွေက အခုဆို မရှိသလောက်ပဲ။ ဒါကို ဘာသာရေးအဖြစ်ပဲ သဘောထားကြတာပေါ့”
“နောက်ထပ်တစ်ခုရှိသေးတယ်”
ကီကီက ထပ်ပြောသည်။
“သုတေသနဌာနက စွမ်းအားတိုးတက်မှုဟာ နှစ်ဖက်ဓါးသွားတစ်ခုလို့ ဆုံးဖြတ်ခဲ့တယ်။ ဆိုလိုတာက၊ စွမ်းအားရှင်တွေဟာ ဖုတ်ကောင်ကူးစက်မှုနဲ့ ဆင်တူတဲ့ အားနည်းချက်တွေ ရှိတယ်။ သတ်မှတ်ထားတဲ့ အခြေအနေမရှိရင်၊ သူတို့ဟာ စွမ်းအားရဲ့ ယိုယွင်းမှုကို ခံစားရနိုင်ပြီး တိုးတက်မှုအမှားတွေ ဒါမှမဟုတ် ဖုတ်ကောင်ဖြစ်သွားနိုင်တယ်။ တစ်ယောက်ယောက်ရဲ့ ဝိညာဉ်လှိုင်းတန်ဖိုးက ၁ အောက်ကို ကျဆင်းသွားတဲ့အခါ၊ ဒီအခြေအနေကို ယိုယွင်းမှုလို့ ခေါ်တယ်”
“ယိုယွင်းမှုလား”
“ထန်ဟိုင်ကရော”
လင်းရှန်က မေးသည်။
“ငါအခုမြင်ခဲ့တဲ့ အခြေအနေကို ဒေတာထဲမှာ မင်းမြင်ဖူးလား”
ကီကီက ခေါင်းညိတ်ကာ တည်ကြည်သောအမူအရာဖြင့် ပြောသည်။ “မြင်ဖူးရုံတင်မကဘူး၊ ထန်ဟိုင်က အမျိုးအစား-၃၂: မသေချာတဲ့ကူးစက်မှုနဲ့ ကိုက်ညီတယ်လို့ ငါသေချာတယ်။အဲ့ဒါက စိတ်ဝင်စားစရာပဲ”
ကီကီ၏ မျက်ခုံးများတွန့်သွားကာ ဆက်ရှင်းပြသည်။
“ဒီအမျိုးအစားက ရင်းမြစ်အဆင့်မှာ လုံးဝထောက်လှမ်းလို့မရလောက်အောင်ပဲ၊ ဘာလို့လဲဆိုတော့ သိသာတဲ့ ရုပ်ပိုင်းဆိုင်ရာ ဒါမှမဟုတ် စိတ်ပိုင်းဆိုင်ရာ ပြောင်းလဲမှုတွေ မရှိလို့ပဲ။ တစ်ခုတည်းသော ထူးခြားတဲ့လက္ခဏာက...”
“ဖုတ်ကောင်တွေက အလွယ်တကူ ထောက်လှမ်းလို့မရတာလား”
လင်းရှန်က အစောပိုင်းမြင်ကွင်းကို ပြန်သတိရရင်း ဝင်ပြောသည်။ သူ၏မျက်နှာသည် မှောင်မိုက်သွားသည်။
“အတိအကျပဲ”
ကီကီက အတည်ပြုသည်။
“ဒါပေမယ့် ဒီမှာ အဓိကကိစ္စရှိတယ်—ဒီအမျိုးအစားရဲ့စွမ်းအားက တိုးတက်ဖို့ အလွယ်ကူဆုံးတွေထဲက တစ်ခုပဲ”
“ဒါဆို ဖုတ်ကောင်ကိုက်ခံရရင် တိုးတက်လာတယ်လို့ ဆိုလိုတာလား”
လင်းရှန်က ထပ်မေးသည်၊၊
“ဟုတ်တယ်... ဒါပေမယ့် မဟုတ်တာလည်း ဖြစ်နိုင်တယ်”
ကီကီက မရေရာမှုအရိပ်အယောင်ဖြင့် ပြောလိုက်သည်။
“အကန့်အသတ်ရှိတဲ့ ဖြစ်ရပ်တွေအရ၊ တိုးတက်မှုက အာမခံမထားသလို သတ်မှတ်ထားတဲ့ ရလဒ်တစ်ခုနဲ့ မသက်ဆိုင်ဘူး။ တိုးတက်မှုအမှားတွေလည်း ဖြစ်ပေါ်နိုင်တယ်”