ကြောက်မက်ဖွယ်ရန်သူ

ဝှီ...

လင်းရှန်သည် မူးဝေခြင်းလှိုင်းတစ်ခုက သူ့ကို လွှမ်းမိုးလာသည်ကို ခံစားလိုက်ရသည်။

ဂျုံး ဂျုံး

မျက်လုံးများ ပြန်ဖွင့်လိုက်သောအခါ၊ ပထမဆုံးကြားလိုက်ရသည်မှာ ချန်ဆီရွှမ်၏ ထိတ်လန့်တကြားအော်သံဖြစ်သည်။

“လင်းရှန်....လင်းရှန်’’

သူ၏အမြင်အာရုံ ရှင်းလင်းလာသည်နှင့်အမျှ၊ ရထားလမ်းတစ်လျှောက် ပြေးလွှားနေသော ရင်းနှီးသည့်အသံက သူ့ကို နိုးကြားစေခဲ့သည်။

ချန်ဆီရွှမ်၏မျက်နှာသည် သူလဲကျသွားသည်ကိုမြင်သောအခါ ထိတ်လန့်ဖွယ်ဖြူဖျော့နေခဲ့သည်။ “ရှင်ဘာဖြစ်သွားတာလဲ’’

သူ၏နဖူးကို ပွတ်သပ်ရင်း လင်းရှန်က အလျင်စလိုမေးလိုက်သည်။

“ငါ ဘယ်လောက်ကြာ သတိလစ်နေခဲ့တာလဲ’’

သူမ၏ အမူယာ ကိုးရိုးကားရားဖြစ်သွားကာ ပြန်ဖြေလိုက်သည်၊၊

“ခဏလေးပါပဲ။ ရုတ်တရက် ရှင် သတိလစ်သွားတာ’’

လင်းရှန်သည် အာရုံကို ကီကီ ဆီသို့ လျင်မြန်စွာ ပြောင်းလဲလိုက်သည်။ သူမသည် ကြမ်းပြင်ပေါ်တွင် လဲလျောင်းနေပြီး၊ သူမ၏မျက်လုံးများသည် မင်ရောင်အမှောင်ထုထဲသို့ ထက်ဝက်ခန့် ဝါးမျိုခံလိုက်ရပြီး၊ စိတ်ထိတ်လန့်ဖွယ်ခံစားချက်တစ်ခုက သူ့အပေါ် ဖုံးလွှမ်းလာသည်။

ဝုန်းး

ဤအရာကို မစဥ်းစားနိုင်ခင် အဝေးမှ ရထားတွဲတစ်ခု၏ အမိုးပေါ်မှ ကျယ်လောင်သော တစ်ခုခုကျသံ ထွက်ပေါ်လာသည်။ ပြဿနာပေါ် ပြဿနာဆင့်လာသည်၊၊ ကီကီ၏အသက်သည် အန္တရာယ်ထဲကျရောက်နေပြီး၊ ယခုအခါ ရထားအမိုးတွင် တစ်ခုခု ထပ်မံဖြစ်ပေါ်နေသည်။

“သူမကို ဂရုစိုက်ပေးပါ’’

လင်းရှန်က ချန်ဆီရွှမ်ကို အမြန်ပြောလိုက်ပြီး၊ နောက်ဘက်ရထားတွဲများဆီသို့ အပြေးအလွှားသွားလိုက်သည်။

သူပြေးနေရင်း၊ ယန္တရားနှလုံးသားကို အသက်သွင်းလိုက်ပြီး၊ ကီကီ ပေးထားသော GK03 လျှပ်စစ်ဓားပုံကြမ်းကို ဆင့်ခေါ်လိုက်သည်။ လက်တစ်ချက်ဝှေ့ယမ်းလိုက်ရင်း၊ Type I တန်စတင်-တိုက်တေနီယမ် အလွိုင်းကို အသုံးပြု၍ ဓားကို စတင်တည်ဆောက်လိုက်သည်။ အချို့သော အဓိကပစ္စည်းများ မရှိသဖြင့်၊ သူသည် ချောမွတ်သော အနက်ရောင်ဓားရှည်တစ်လက်အဖြစ် ပုံစံတစ်ခုကို လျင်မြန်စွာ ဖန်တီးလိုက်သည်။ တစ်ချိန်တည်းမှာပင်၊ ကျည်အပြည့်ဖြည့်ထားသော အော်တိုရိုင်ဖယ်တစ်လက်ကို ကောက်ယူပြီး ဆူညံသံဖြစ်ပေါ်ရာသို့ အလျင်အမြန်သွားလိုက်သည်။

အသစ်ပြုလုပ်ထားသော ဓားလက်ကိုင်သည် သူ၏လက်ထဲတွင် နွေးထွေးနေဆဲဖြစ်ပြီး၊ ၎င်း၏အပူသည် သူ၏ရင်ထဲရှိ အရေးတကြီးခံစားချက်ကို ထင်ဟပ်နေသည်။ ကီကီ အခြေအနေဆိုးရွားနေပြီး၊ ထန်ဟိုင်သည် အပြင်တွင်ရှိနေဆဲဖြစ်ပြီး၊ ဖုတ်ကောင်လှိုင်းများလည်း ထိတ်လန့်ဖွယ်ရာ တိုးလာသည်၊၊ ဤအကျပ်အတည်းကို ယခုချက်ချင်း ဖြေရှင်းရမည်ဖြစ်သည်။

သူသည် ရထားတွဲအမှတ် ၅ ရှိ လို့ရှားရှားနှင့် လို့ဟွာကို အော်လိုက်သည်။

“လို့ဟွာ၊ ရှားရှား လက်နက်တွေကိုင်ထား၊၊ အဲဒီလူအိုကြီးနဲ့ ငါတို့က မပြီးသေးဘူး—သူ့ကို ရှင်းပစ်ရမယ်”

“အစ်ကိုလင်း၊ သတိထား’’

လို့ရှားရှား၏ ထိတ်လန့်စွာ သတိပေးလိုက်သည်၊၊ သူမသည် ရထားပြတင်းပေါက်ကို ညွှန်ပြလိုက်သည်။

ခွမ်း…

သူမစကားမဆုံးမီ၊ ကြီးမားဥ၍ ဖြူဖျော့သော လက်သည်းတစ်ခုက ရထားဘေးသို့ ရိုက်ချလာသည်။ တိုက်ခိုက်မှုကြောင့် ပြတင်းပေါက်များ ကွဲအက်သွားပြီး၊ ပြင်းထန်သော အားကြောင့် လို့ရှားရှားသည် ရထားတွဲအတွင်း လွင့်စင်သွားစေသည်။

လို့ဟွာက လျင်မြန်စွာတုံ့ပြန်လိုက်ပြီး၊ လက်တစ်ဖက်ဖြင့် သူ၏ညီမကို လေထဲတွင် ဖမ်းယူလိုက်သည်။

လင်းရှန်သည် သိုလှောင်စင်မြင့်တစ်ခုထဲသို့ လွင့်စင်သွားသည်။ သူထရပ်ရင်း၊ အကြည့်ကို ရထားနောက်ဖက်သို့ လှည့်လိုက်သည်။ ထိုနေရာတွင်၊ ကြီးမား၍ ဖြူဖျော့သည့် လူသားပုံစံတစ်ခုက ထိတ်လန့်ဖွယ်ပေါ်လာသည်—သူချက်ချင်းမှတ်မိနိုင်သော မွန်းစတားတစ်ကောင်ဖြစ်သည်။ သူ၏မျက်ဆံများ ထိတ်လန့်စွာ ကျုံ့သွားသည်။

အဖြူရောင်သတ္တဝါကြီး…

၎င်းသည် ကျိအန်းမြို့တွင် သူတွေ့ကြုံခဲ့ရသည့် တူညီသော သတ္တဝါဖြစ်သည်။ ၎င်းသည် ဤနေရာသို့ မည်သို့ရောက်လာသနည်း၊၊

မဖြစ်နိုင်ပေ… သူတို့သည် တစ်ထောင်ကီလိုမီတာကျော် ခရီးနှင်ခဲ့ပြီးဖြစ်သည်။ ဤအရာက သူတို့ကို ဤမျှအကွာဝေးကို မည်သို့လိုက်လံလာနိုင်သနည်း၊၊

“လို့ဟွာ၊ နောက်တစ်ကောင်ရှိသေးတယ်—ထန်ဟိုင်”

လင်းရှန်က သတိပေးလိုက်သည်။

ဖုတ်ကောင်လှိုင်းများ၊ ပြိုကျသောတံတား၊ ယခုမူ အဖြူရောင်သတ္တဝါကြီး—ဤအရာအားလုံးသည် တိုက်ဆိုင်မှုတစ်ခုလား၊ သို့မဟုတ် တစ်စုံတစ်ခုက ကြံစည်ထားသော အစီအစဉ်တစ်ခုလား၊၊ အကယ်၍ ၎င်းသည် မတော်တဆမဟုတ်ပါက၊ ထိုသို့ဖြစ်ပေါ်လာသည့် အကျိုးဆက်များသည် ကြောက်မက်ဖွယ်ဖြစ်ပေသည်။ ထန်ဟိုင်ကို ချက်ချင်း ဖယ်ရှားရမည်။

ပြန်ဆုတ်ရန် အချိန်မရှိသဖြင့်၊ လင်းရှန်သည် တိုက်ခိုက်ရန် ပြင်ဆင်လိုက်သည်။ သူသည် ရထားနောက်ဖက်ပလက်ဖောင်းကို ဖွင့်လိုက်သည်။

လို့ဟွာသည် လို့ရှားရှားကို ချထားပြီး၊ စက်သေနတ်တစ်လက်ကို ကောက်ယူကာ အသင့်နေရာယူလိုက်သည်။

ပလက်ဖောင်းဖွင့်လိုက်သောအခါ၊ အဖြူရောင်သတ္တဝါကြီးသည် ရထားခေါင်မိုးမှ ဇောက်ထိုးဆွဲနေသည်ကို မြင်လိုက်ရသည်။ ၎င်း၏ နစ်မြုပ်နေသော ကြောက်မက်ဖွယ်မျက်လုံးများက ရထားတွဲအတွင်းသို့ စူးစိုက်ကြည့်နေပြီး၊ အနီညိုရောင် ဟောင်းလောင်းပေါက်နေသော ပါးစပ်ကို ဖွင့်လိုက်သည်။

ဂရား…

ထိုသတ္တဝါသည် အမျိုးသမီးတစ်ဦး၏ မြင့်မားသော အော်သံအလား၊ နားကွဲလောက်အောင် စူးရှသောအသံတစ်ခုကို ထုတ်လွှတ်လိုက်ပြီး၊ လူတိုင်း၏နားစည်များကို နာကျင်စွာ တုန်ခါသွားစေသည်။

ထိုအခိုက်အတန့်တွင်၊ လင်းရှန်နှင့် လို့ဟွာသည် ၎င်းတို့တတ်နိုင်သမျှ အရာအားလုံးဖြင့် ပစ်ခတ်လိုက်သည်။

ဒိုင်း ဒက် ဒက် ဒက်

ဝူးးးဂါးး

သေနတ်ကျည်များသည် မွန်းစတားပေါ်သို့ မိုးရွာသလို ကျရောက်သွားသည်။ ကျည်ဆံများသည် ၎င်း၏သံမဏိအလား မျက်နှာကြောင့် ပြန်ကန်ထွက်သွားသော်လည်း၊ အချို့မှာ ၎င်း၏ဟောင်းလောင်းပေါက်နေသော ပါးစပ်အတွင်းကို သွေးထွက်အောင် ထိမှန်နိုင်ခဲ့သည်။

အဖြူရောင်သတ္တဝါကြီးသည် ဒေါသတကြီး ဟိန်းဟောက်လိုက်ပြီး၊ ကြောက်မက်ဖွယ်လက်တစ်ဖက်ကို ရထားတွဲအတွင်းသို့ ဆန့်ထုတ်ကာ၊ လက်လှမ်းမီနိုင်သမျှ အရာအားလုံးကို မျက်ကန်းတစ်ကောင်အလား လှည့်ပတ်ရိုက်ခတ်လိုက်သည်။

ချွမ်..ဝုန်း

ကိရိယာများနှင့် ပစ္စည်းများသည် နေရာအနှံ့ ဖရိုဖရဲ ဖြစ်သွားသည်။

“ကျား…’’

လို့ဟွာသည် သံချောင်းတစ်ချောင်းကို လက်နှစ်ဖက်ဖြင့် ဆုပ်ကိုင်ကာ၊ မွန်းစတား၏လက်သည်းပေါ်သို့ အားပြင်းစွာ စိုက်ချလိုက်သည်။ သူ့၏ခွန်အားသည် အလွန်ကြီးမားလှပြီး၊ သံချောင်းသည် ကွေးညွှတ်သွားသည်။

ထန်..

သံချောင်းသည် အဖြူရောင်သတ္တဝါကြီး၏ လက်ကို ထိုးဖောက်လိုက်ပြီး၊ ၎င်းကို ရထားတွဲကြမ်းပြင်တွင် တံစို့ထိုးထားလိုက်သည်။ လို့ဟွာ၏ တိုက်ခိုက်မှုသည် အလွန်အားပြင်းလှပြီး၊ ရထားတွဲကြမ်းပြင်ကိုပါ ဖောက်ထွက်သွားသည်။

လို့ဟွာ၏ မယုံနိုင်လောက်သည့် ခွန်အားကို မြင်လိုက်ရသောအခါ၊ လင်းရှန် ထိတ်လန့်သွားသည်၊၊ သို့သော် တွန့်ဆုတ်နေရန် အချိန်မရှိပေ။ သူသည် GK03 လျှပ်စစ်ဓားကို မြှောက်ကာ တိုက်ပွဲကို အဆုံးသတ်ရန် အဆင်သင့်ဖြစ်လျက် ရှေ့သို့ �ပြေးဝင်လိုက်သည်၊၊

လို့ဟွာ၏ စွမ်းအားပြသမှုကို ကြည့်ရင်း၊ လင်းရှန်သည် သူ၏သွားဖုံးများတွင် ယားယံမှုတစ်ခုကို ခံစားလိုက်ရသည်—အံ့အားသင့်မှုနှင့် စိတ်မသက်မသာဖြစ်မှု၏ လက္ခဏာတစ်ခုဖြစ်သည်။ အကယ်၍ ထိုသူသည် ပို၍ဆင့်ကဲပြောင်းလဲလာပါက မည်မျှသန်မာလာနိုင်မည်နည်း၊၊

သို့သော်၊ လင်းရှန်သည် မျှော်လင့်ချက်တစ်ခုကို ခံစားလိုက်ရသည်။ ယခင်က အနီရောင်ကင်းခြေများမွန်းစတားနှင့် တိုက်ပွဲတွင် ခံစားခဲ့ရသည့် အကူအညီမဲ့မှုကို ယခုအခါ မခံစားရတော့ပေ။

တိုက်ပွဲထဲသို့ ဝင်ရောက်ရန် ပြင်ဆင်နေစဉ်၊ ကုတ်ခြစ်သံတစ်ခုကို ကြားလိုက်ရသည်။ သူလှည့်ကြည့်လိုက်သောအခါ၊ ထန်ဟိုင်သည် မည်သို့မည်ပုံ ပြန်လည်ပေါ်ထွက်လာပြီး၊ ရထားဘေးတစ်လျှောက် လျင်မြန်စွာ ပြေးလာကာ ရထားထိပ်ရှိ ရှေ့ဘက်တွဲများဆီသို့ ဦးတည်နေသည်ကို မြင်လိုက်ရသည်။

မကောင်းတော့ဘူး…

လင်းရှန်၏မျက်နှာအမူယာသည် မည်းမှောင်သွားသည်။ ထိုအချိန်တွင်၊ သံချောင်းဖြင့် တံစို့ထိုးခံထားရသော အဖြူရောင်သတ္တဝါကြီးသည် ထိုသံချောင်းကို ဆွဲထုတ်လိုက်ပြီး၊ အော်သံသည် လေထုထဲတွင် ပြည့်နှက်သွားသည်။

“ငါ့ကို ကာပေးထား”

လင်းရှန်က အခွင့်အရေးကို ဆုပ်ကိုင်လျက် ရထားနောက်ဖက်သို့ အပြေးအလွှားသွားရင်း အော်လိုက်သည်။

လင်းရှန်သည် ထန်ဟိုင်နောက်ကို လိုက်သွားနေကြောင်း သိရှိလိုက်သောအခါ၊ လို့ဟွာသည် ချက်ချင်းပင် သူ၏သေနတ်ကို မြှောက်ကာ၊ အဖြူရောင်သတ္တဝါကြီး၏ ကြောက်မက်ဖွယ်မျက်နှာကို ဦးတည်ပြီး နောက်ထပ် ကျည်ဆံများကို ပစ်လွှတ်လိုက်သည်၊၊

လင်းရှန်သည် မွန်းစတား၏လှုပ်ရှားနေသော လက်ကို သွက်လက်စွာ ရှောင်တိမ်းကာ၊ ရထားနောက်ဖက်ရှိ ဖွင့်ထားသော ကုန်တွဲပေါ်သို့ ခုန်တက်လိုက်သည်။ သူ အပေါ်မရောက်ခင် လေပြင်းတစ်ခုသည် သူ၏နားထဲတွင် ဟူးခနဲ ဖြတ်သန်းသွားသည်။ ဗီဇအလျောက်၊ သူသည် ရေခဲဒိုင်းကာတစ်ခုကို သူ၏နောက်တွင် ဖန်တီးလိုက်ပြီး၊ ပျက်စီးနေသော ဂျစ်ကားတစ်စီး၏ နောက်ဖက်သို့ ခုန်ဆင်းလိုက်သည်။

ဘန်း..

အဖြူရောင်သတ္တဝါကြီး၏ ကြီးမားသော လက်မောင်းသည် ရေခဲဒိုင်းကာကို ချိုးဖျက်ပြီး၊ ဂျစ်ကား၏ ရှေ့ဖုံးကို ရိုက်ချလိုက်သည်။ သံကြိုးများ ပြတ်ထွက်သွားပြီး၊ ကားသည် ရထားတွဲဘေးမှ အန္တရာယ်ကြီးစွာ တွဲလောင်းကျလျက်၊ လျှပ်စစ်တိုင်တစ်ခုနှင့် ဝင်ရိုက်မိပြီး၊ လမ်းဘေးအောက်သို့ ပြုတ်ကျသွားသည်။

“ဖာခ့်....”

လင်းရှန် အသံတိတ်ဖြင့် ကျိန်ဆဲလိုက်သည်။ ထိုဂျစ်ကားများသည် ခက်ခက်ခဲခဲ ရယူထားရသော ပစ္စည်းများဖြစ်ပြီး၊ ယခုအခါ ၎င်းတို့ကို ရင်းမြစ်များအတွက် ဝါးမျိုရန်အခွင့်အရေးပင် မရှိတော့ပေ။

“လို့ဟွာ၊ ဒါကို တားထားပေး..ငါ ထန်ဟိုင်နောက်လိုက်မယ်’’

လင်းရှန်သည် အပြင်မှလေပြင်းကို ဆန့်ကျင်ကာ အော်လိုက်သည်။

‘’ရတယ်’’

လို့ဟွာသည် တွန့်ဆုတ်မနေဘဲ၊ သူ၏သေနတ်ဖြင့် ရှေ့သို့ တိုးဝင်လိုက်သည်၊၊ အဖြူရောင်သတ္တဝါကြီး၏ ဖမ်းဆုပ်လာသော လက်သည်းများကို ရှောင်တိမ်းရန် လိမ့်ထွက်ကာ ကျည်ကပ်ကို လဲလှယ်ပြီး၊ မွန်းစတား၏ ပါးစပ်နှင့် မျက်လုံးများကို အဆက်မပြတ် ပစ်ခတ်လိုက်သည်။

အခွင့်အရေးကို အရယူကာ လင်းရှန်သည် ရထားတွဲအမိုးပေါ်သို့ အပြေးအလွှားသွားပြီး၊ စွမ်းရည်သစ်တစ်ခုဖြစ်သည့် ပြန်လှည့်ရိုက်ချက်ကို အသက်သွင်းလိုက်သည်။

ဤစွမ်းရည်သည် Iron Guard 3 စစ်ရေးတိုက်ခိုက်ရေးသံချပ်ကာကို ဝါးမျိုခြင်းမှ ရရှိထားပြီး၊ ယခုအချိန်ထိ မစမ်းသပ်ရသေးပေ။ ယခုထက် ပိုကောင်းသောအချိန်မရှိတော့ပေ။

မီးခိုးရောင်အလင်းတန်းတစ်ခုဖြင့်၊ လင်းရှန်၏ခန္ဓာကိုယ်သည် အရိပ်တစ်ခုအဖြစ် ဝေဝါးသွားသည်။ တန်စတင်-တိုက်တေနီယမ် အလွိုင်းဖြင့် ဖန်တီးထားသော GK03 လျှပ်စစ်ဓားကို ဆုပ်ကိုင်လျက်၊ သူသည် စွမ်းအင်တစ်ခုဖြင့် ရှေ့သို့ ပြေးသွားသည်၊၊

ခရက်ရှ်…

ဆိုနစ်ဗုံးပေါက်ကွဲသံအလား အသံတစ်ခုက လေထုထဲတွင် ပြတ်သားစွာ ဖြတ်သန်းသွားသည်။ အဖြူရောင်သတ္တဝါကြီးသည် သူ့ကို တားဆီးရန် လက်သည်းကို လှုပ်ရှားလိုက်သော်လည်း၊ အရိပ်တစ်ခုကိုသာ ဖမ်းဆုပ်နိုင်ခဲ့သည်။ နောက်တစ်ခဏတွင်—

ရွှပ်…

မွန်းစတား၏လက်ဖဝါးတွင် နက်ရှိုင်းသော ဒေါင်လိုက်အကွဲကြောင်းတစ်ခု ပေါ်ထွက်လာသည်။ အသားနှင့် သွေးများသည် ပေါက်ကွဲထွက်လျက်၊ ရထားပေါ်တွင် အနီရောင်စွန်းထင်းသွားလေသည်။

လင်းရှန်သည် မွန်းစတားနောက်တွင် ပြန်လည်ပေါ်ထွက်လာပြီး၊ သူ၏အသက်ရှူသံများ ပြင်းထန်နေသော်လည်း၊ ယုံကြည်မှုသည် တဟုန်ထိုးတက်လာသည်။ ပြန်လှည့်ရိုက်ချက်ကို ပထမဆုံးအကြိမ်အသုံးပြုခြင်းသည် သူ၏မျှော်လင့်ချက်များကို ကျော်လွန်ခဲ့သည်။ ထိုတိုက်ခိုက်မှုသည် သူ့ကို သိသိသာသာ အားကုန်စေသော်လည်း၊ ၎င်း၏ဖျက်ဆီးနိုင်စွမ်းသည် သူယခင်က ပြုလုပ်ခဲ့သမျှထက် အဆပေါင်းများစွာ သာလွန်နေသည်။

ကျိအန်းမြို့တွင်၊ ဤမွန်းစတားကို ဓားတိုဖြင့် ခုတ်ထစ်လျှင်ပင် ခြစ်ရာတစ်ခုပင် မဖြစ်ပေါ်ခဲ့ပေ။ ယခုအခါ၊ သူ၏စွမ်းရည်သစ်နှင့် လက်နက်ဖြင့်၊ သူသည် ၎င်း၏ကာကွယ်ရေးကို ထိုးဖောက်နိုင်ခဲ့ပြီဖြစ်သည်။

လို့ဟွာသည် လင်းရှန်၏ လျင်မြန်ပြီး သေစေနိုင်သော လှုပ်ရှားမှုကို ကြည့်ရင်း၊ သူ၏မျက်လုံးများ အံ့အားသင့်စွာ ပြူးကျယ်သွားသည်။

သို့သော်၊ အဖြူရောင်သတ္တဝါကြီးသည် အသံရှည်ဆွဲကာ ဟိန်းဟောက်လိုက်ပြီး၊ ၎င်း၏လက်မှ သံချောင်းကို ဆွဲထုတ်ကာ၊ လင်းရှန်ကို ဖမ်းရန် လှည့်လိုက်သည်။ ၎င်း၏ ကြီးမားသော အလေးချိန်သည် ရထားတွဲကို ဝန်ပိစေပြီး၊ ဘီးများကို ရထားလမ်းတစ်လျှောက် ကြိတ်မိစေကာ၊ ဆူညံသံဖြင့် မီးပွားများ လွင့်ထွက်သွားသည်။

“အကို’’

လို့ရှားရှားသည် နောက်ဆုံးတွင် လွတ်မြောက်လာပြီး၊ ရထားတွဲမှ ထွက်လာကာ လို့ဟွာထံ သံပိုက်လုံးတစ်ချောင်းကို ပစ်ပေးလိုက်သည်။

မောင်နှမနှစ်ဦးသည် အပေးအယူမျှနေသည်၊၊ လို့ဟွာသည် သံပိုက်လုံးကို ဖမ်းယူလိုက်ပြီး၊ သူ၏ခန္ဓာကိုယ်တွင် သွေးကြောများ ထင်ရှားလာသည်။ အားကြီးသော ဟိန်းဟောက်သံဖြင့်၊ သူသည် အဖြူရောင်သတ္တဝါကြီး၏ လွတ်နေသော ဘေးနံဘက်သို့ သံပိုက်လုံးကို ပစ်ပေါက်လိုက်သည်။

ဝှစ်…

သံပိုက်လုံးသည် ဒုံးကျည်တစ်ခုအလား လေထုကို ဖြတ်သန်းသွားသည်၊၊ မွန်းစတားကြီးသည် ဉာဏ်ရည်အချို့ရှိပုံရပြီး၊ အန္တရာယ်ကို ခံစားမိကာ၊ လင်းရှန်ကို လိုက်နေခြင်းအား ရပ်တန့်လိုက်သည်။ ၎င်းသည် ဟိန်းဟောက်သံဖြင့် လှည့်ပတ်လိုက်ပြီး၊ ၎င်း၏ ကြီးမားသော လက်သည်းကို မြှောက်လိုက်သည်။

ကလောင်…

အားပြင်းသော ဆုပ်ကိုင်မှုဖြင့်၊ ၎င်းသည် လေထဲရှိ အပူရှိန်ဖြင့် နီရဲနေသော သံပိုက်လုံးကို ဖမ်းယူလိုက်ပြီး၊ ၎င်း၏လက်သည်းဖြင့် ဖျက်ဆီးလိုက်ရာ မီးပွားများ လွင့်စင်ထွက်သွားသည်။ သံမဏိကို ထိခတ်သံသည် ပဲ့တင်ထွက်လာပြီး၊ အဖြူရောင်သတ္တဝါကြီးက ထပ်မံဟိန်းဟောက်လိုက်သည်။ ၎င်း၏ ရက်စက်ကြမ်းကြုတ်မှုသည် မလျော့ပါးသွားပေ။