အာမခံ

ရဲရှင်းဟွေ့: "???"

ကျောက်စိမ်းဘုရင်ပြောသည့်စကားကို ကြားပြီးနောက် ရဲရှင်းဟွေ့သည် သူ့ကို အနည်းငယ်လေးစားသွားသည်။

"သူက တကယ်ပဲ မြန်မာ့ကျောက်စိမ်းဘုရင်လို့ ခေါ်ထိုက်တာပဲ။ သေသွားရင်တောင် အမြတ်ထွက်အောင် လုပ်သွားသေးတယ်။ ဒီအာမခံရဲ့ အကျိုးခံစားခွင့်ရှိသူက ဘယ်သူဖြစ်မလဲတော့ မသိဘူး။"

ရဲရှင်းဟွေ့ စကားဆုံးသွားချိန်မှာပင် သူ့နောက်မှ ယန်ချွဲ၏အသံ ထွက်ပေါ်လာသည်။

"အဲ့ဒီပေါ်လစီမှာ အကျိုးခံစားခွင့်ရှိသူ မရှိဘူး။"

ရဲရှင်းဟွေ့ လှည့်ကြည့်လိုက်သောအခါ ယန်ချွဲ၊ ဝက်ဝံကန်း၊ ဖန်လုံနှင့် ချွေ့ယာကျဲတို့ အတူတကွ သူ့ဆီသို့ လျှောက်လာနေသည်ကို တွေ့လိုက်ရ၏။

"အကျိုးခံစားခွင့်ရှိသူမရှိဘူး ဟုတ်လား။ ဒါက ဘယ်လိုအာမခံမျိုးလဲ။"

ရဲရှင်းဟွေ့က သံသယကြီးစွာဖြင့် မေးလိုက်သည်။

ရဲရှင်းဟွေ့၏အမေးကိုကြားသောအခါ ယန်ချွဲ၏မျက်နှာထားသည် အနည်းငယ် တည်သွားသည်။

ယန်ချွဲက ရှင်းပြ၏။

"ဒီအာမခံလို့ခေါ်တာက တကယ်တော့ လူသတ်သမားကုမ္ပဏီတစ်ခုကို ပေးထားတာ။ အာမခံဝယ်ထားတဲ့သူ သေသွားရင်၊ လူသတ်သမားကုမ္ပဏီက အာမခံထားသူအတွက် ကလဲ့စားချေပေးလိမ့်မယ်။"

ထိုသို့ပြောပြီးနောက် ယန်ချွဲသည် မျက်နှာထားမပြောင်းလဲသော ရဲရှင်းချန်ကို တစ်ချက်လှမ်းကြည့်လိုက်ပြီး ဆက်ပြောသည်။

"လူသတ်သမားကုမ္ပဏီရဲ့ ဂုဏ်သိက္ခာအတွက် ပစ်မှတ်ကို မသတ်မချင်း သူတို့ရပ်မှာမဟုတ်ဘူး။"

ယန်ချွဲသည် ရဲရှင်းချန်၏လုံခြုံရေးအတွက် အနည်းငယ်စိုးရိမ်နေသော်လည်း ရဲရှင်းချန်၏အစွမ်းကို ကောင်းကောင်းသိသော ဝက်ဝံကန်းကတော့ စိတ်အေးလက်အေးပုံစံဖြစ်နေ၏။

အသတ်ခံရသော ကျောက်စိမ်းဘုရင်က အာမခံဝယ်ထားမှန်း သိလိုက်ရချိန်တွင် ဝက်ဝံကန်းသည် အနည်းငယ် စိုးရိမ်သွားခဲ့သော်လည်း ရဲရှင်းချန်သည် ဘယ်လောက်တောင် သဘာဝလွန်အစွမ်းရှိသည်ကို ပြန်စဉ်းစားမိသောအခါ စိတ်အေးသွားတော့သည်။

အကယ်၍ ယန်ချွဲသာ ရဲရှင်းချန်၏ စောစောကပြသခဲ့သော စွမ်းအားကို မြင်လိုက်ရမည်ဆိုလျှင် သူမသည် ရဲရှင်းချန်၏လုံခြုံရေးအတွက် စိုးရိမ်နေမည်မဟုတ်ဘဲ လူသတ်သမားကုမ္ပဏီအတွက်သာ ဝမ်းနည်းနေမိပေလိမ့်မည်။

…

ကျောက်စိမ်းဘုရင် သေဆုံးသွားပြီးနောက် သူ၏လက်အောက်ငယ်သားများလည်း ထွက်ပြေးကုန်ကြကာ စုန့်ကျုံးနှင့် စုဟုန်သာ ကျန်ရစ်ခဲ့သည်။

ရဲရှင်းဟွေ့သည် သူ၏ခန္ဓာကိုယ်ထဲမှ လွင့်ထွက်သွားသော တီဗီကို ပြန်သိမ်းလိုက်ပြီးနောက် စုဟုန်ထံသို့ လျှောက်လာကာ ပြောလိုက်၏။

"ကောင်လေး၊ ရဲမျိုးနွယ်နာမည်နဲ့လူတွေက တော်တော်မိုက်တယ်ကွ။"

ထို့နောက် ရဲရှင်းဟွေ့က ရဲရှင်းချန်နှင့် ရဲလန်ယွဲ့ကို လက်ညှိုးထိုးပြပြီး

"တွေ့လား၊ ဒါတွေက ငါ့ညီနဲ့ညီမပဲ၊ သူတို့အားလုံးလည်း ရဲမျိုးနွယ်တွေပဲ။"

စုဟုန်ကတော့ ဘာမှမဖြစ်သော်လည်း စုန့်ကျုံးက ရဲလန်ယွဲ့ကို သေချာကြည့်လိုက်သောအခါ သူ တောင့်တင်းသွားသည်။

"မင်း..."

စုန့်ကျုံးက ရဲလန်ယွဲ့ကို လက်ညှိုးထိုးကာ ထိတ်လန့်နေသောအသံဖြင့် ပြောလိုက်သည်။

"မင်းက ရဲချန်ရဲ့သမီးလား။"

စုန့်ကျုံး၏စကားကိုကြားသောအခါ မောင်နှမသုံးယောက်လုံး စုန့်ကျုံးကို တစ်ပြိုင်နက်တည်း ကြည့်လိုက်ကြ၏။

"ကျွန်မကို သိလို့လား။"

ရဲလန်ယွဲ့က စုန့်ကျုံးကို ကြည့်ကာမေးလိုက်သည်။

"မသိပါဘူး။"

စုန့်ကျုံးက ခေါင်းခါပြပြီးနောက် ပြောသည်။

"ဒါပေမဲ့ မျိုးနွယ်စုရဲ့သခင်ကြီးဆီမှာ မင်းရဲ့ဓာတ်ပုံကို ငါမြင်ဖူးတယ်။"

အရင်က အနည်းငယ်အလှမ်းဝေးသောကြောင့် စုန့်ကျုံးသည် ရဲလန်ယွဲ့ကို မမှတ်မိခဲ့သော်လည်း ယခုလို အနီးကပ်ကြည့်လိုက်သောအခါ သူ၏ဇာတိမြို့မှ သခင်ကြီးထံတွင် သူမ၏ဓာတ်ပုံကို မြင်ဖူးသည်ဟု အမှတ်ရသွား၏။

ဤနေရာတွင်ပြောသော အဘိုးသခင်မှာ စုချင်း၏အဖေ၊ စုဟုန်၏အဘိုးဖြစ်သည်။

ဒဏ်ရာအပြည့်နှင့်ဖြစ်နေသော စုဟုန်သည် သူ့ရှေ့မှအမျိုးသမီးမှာ ရဲချန်၏သမီးဖြစ်ကြောင်း စုန့်ကျုံးပြောသည်ကိုကြားသောအခါ မှင်တက်သွားသည်။

ရဲမျိုးနွယ်နာမည်နှင့်လူကို ရန်ပြုလို့ရနိုင်သလား။ ရနိုင်တာပေါ့၊ ဒါပေမဲ့ ရဲချန်ကကော။ စုဟုန်မပြောနှင့်၊ စုမိသားစုတစ်ခုလုံးပင် ရန်မပြုနိုင်ပေ။

လက်ရှိမိသားစုခေါင်းဆောင်ဖြစ်သော စုဟုန်၏အဖေသည် ထိုစဉ်က ရဲချန်၏လက်ချက်ဖြင့် သေခဲ့ရသည်။ အကယ်၍ စုချင်းနှင့် ဆွေမျိုးတော်စပ်မှုမရှိခဲ့လျှင် သူသည် စုမိသားစု၏သားအကြီးဆုံးဆိုသည့်ဘွဲ့ကို ရနိုင်မည်လားဆိုသည်မှာ ပြောရခက်၏။

စုဟုန်သည်လည်း သူ ဒီနှစ်တွေအတွင်း ရန်ပြုမိသည့် ပထမဆုံး ရဲမျိုးနွယ်မိသားစုက သူ ဘယ်တော့မှ မရန်ပြုသင့်သည့် မိသားစုဖြစ်နေလိမ့်မည်ဟု မမျှော်လင့်ထားခဲ့ပေ။

ထိုသို့စဉ်းစားမိသောအခါ စုဟုန်သည် စုမိသားစု၏သားအကြီးဆုံးဆိုသည့် မျက်နှာကိုပင် ဂရုမစိုက်နိုင်တော့ပေ။ သူသည် တစ်ကိုယ်လုံးမှ နာကျင်မှုကို ကြိတ်မှိတ်ခံကာ ရဲရှင်းဟွေ့ရှေ့တွင် ဒူးထောက်ချလိုက်၏။

"တစ်ဝမ်းကွဲအစ်ကို၊ ကျွန်တော်မှားသွားပါတယ်။ ကျွန်တော်တို့ရဲ့ ဆွေမျိုးတော်စပ်မှုကို ထောက်ထားပြီး ကျွန်တော့်ကို ခွင့်လွှတ်ပေးပါ။"

စုဟုန်သည် ရဲရှင်းချန်၏ ရက်စက်မှုကို ကိုယ်တိုင်မြင်တွေ့ခဲ့ရသည်။ သူက မျက်တောင်တစ်ချက်မခတ်ဘဲ လူသတ်နိုင်သူဖြစ်သည်။ အကယ်၍ ဒီနေ့ ဒီကိစ္စကို ကောင်းကောင်းမကိုင်တွယ်နိုင်ခဲ့လျှင် သူ ဒီနေရာမှာ သေမှာသေချာ၏။

ရဲရှင်းဟွေ့သည် စုဟုန်၏တောင်းပန်မှုကို လုံးဝလျစ်လျူရှုထားသည်။ သူသည် စောစောက သေနတ်နှင့်အပစ်ခံရပြီး သေလုနီးပါးဖြစ်ခဲ့ရာ ထိုဘုမသိဘမသိကောင်လေး စုဟုန်ကို ဒီနေ့ လွှတ်ပေးစရာအကြောင်းမရှိပေ။

ရဲရှင်းဟွေ့က ဘာမှပြန်မပြောသည်ကိုမြင်သောအခါ စုဟုန်သည် ဘေးနားမှ စုန့်ကျုံးကို မျှော်လင့်ချက်မဲ့စွာ ကြည့်လိုက်ပြီး သူ့အတွက် နည်းလမ်းတစ်ခုစဉ်းစားပေးရန် အကူအညီတောင်းလိုက်သည်။

စုဟုန်၏ တိုးလျှိုးတောင်းပန်နေသော မျက်လုံးများကိုမြင်သောအခါ စုန့်ကျုံးသည် ခဏတိတ်ဆိတ်သွားပြီးနောက် စုဟုန်ကို တိုက်ခိုက်လိုက်၏။

စုဟုန်လည်း အနည်းငယ်ကြောင်သွားသည်။

"ငါက မင်းကို တောင်းပန်ဖို့ နည်းလမ်းရှာခိုင်းတာလေ၊ မင်းက ဘာလို့ ငါ့ကို လာထိုးနေရတာလဲ။"

စုန့်ကျုံးသည် စုဟုန် ဘာစဉ်းစားနေသည်ကို သိနိုင်မည်မဟုတ်ပေ။

စုန့်ကျုံး ယခုစဉ်းစားနေသည်မှာ စုဟုန်ကို အရင်ဆုံး အပြင်းအထန်ရိုက်နှက်ပြီး သူ့ရှေ့မှ ရဲရှင်းဟွေ့ကို ဒေါသဖြေစေရန်ဖြစ်သည်။ ထိုသို့လုပ်မှသာ စုဟုန်၏အသက်ကို ကယ်တင်နိုင်မည့် အခွင့်အရေးရှိပေမည်။

နောက်ပိုင်းတွင် ကလဲ့စားချေသည်ဖြစ်စေ၊ သည်းခံသည်ဖြစ်စေ ယခုအရေးကြီးဆုံးမှာ အသက်ရှင်ဖို့ပင်။

ထို့အပြင် နောက်ဆုံးတွင် စုဟုန် အသတ်ခံရလျှင်တောင် သူ့အတွက် စိတ်သက်သာရာရစေမည်ဖြစ်သည်။

တရုတ်ပြည်မှ မြန်မာပြည်သို့ တစ်လမ်းလုံး စုန့်ကျုံးသည် စုဟုန်ကြောင့် ဒုက္ခများစွာခံစားခဲ့ရသည်ဟု ဆိုနိုင်သည်။

စုန့်ကျုံးသည် လုံးဝအားမလျှော့ဘဲ တစ်ချက်ထိုးလိုက်ရာ စုဟုန်၏လက်တစ်ဖက်သည် ပုံစံမမှန်ဘဲ လိမ်ကောက်သွားပြီး ကျိုးသွားသည်မှာ ထင်ရှားနေ၏။

"အား..."

စုဟုန်သည် နာကျင်စွာ အော်ဟစ်လိုက်သည်။

စုဟုန်၏အော်သံကိုကြားသောအခါ စုန့်ကျုံးသည် ပို၍ပင် စိတ်သက်သာရာရသွား၏။

အရင်က ကျောက်စိမ်းဘုရင်၏ညီငယ်နောက်လိုက်ပြီး စုဟုန်ကို ဝိုင်းကန်ရသည်မှာ ပျော်စရာကောင်းခဲ့သော်လည်း ယခုလို စုဟုန်ကို အော်ဟစ်သည်အထိ ရိုက်နှက်ရသလောက် စိတ်လှုပ်ရှားစရာမကောင်းသည်မှာ သေချာသည်။

…

ရဲရှင်းဟွေ့သည် ဤမြင်ကွင်းကိုမြင်သောအခါ မတားဆီးဘဲ တိတ်တဆိတ် ကြည့်နေခဲ့သည်။

မိနစ်အနည်းငယ်ကြာသောအခါ စုန့်ကျုံးသည် နောက်ဆုံးတွင် စုဟုန်၏ခြေလက်လေးဖက်လုံးကို ချိုးပစ်လိုက်၏။ ထို့နောက် သူက ရဲရှင်းဟွေ့ကို ရိုသေစွာပြောလိုက်သည်။

"သခင်လေးရဲ၊ ဒီလောက်ဆို ကျေနပ်ရဲ့လား။ ကျေနပ်မှုမရှိသေးရင်လည်း ကျွန်တော် ဘာမှမပြောတော့ပါဘူး။ စီရင်လိုက်ပါ။"

ရဲရှင်းဟွေ့သည် သတိလစ်သွားသော စုဟုန်ကို တစ်ချက်ကြည့်လိုက်ပြီး ပြုံးကာပြောလိုက်၏။

"ငါ တော်တော်လေး ကျေနပ်သွားပြီ။"

ရဲရှင်းဟွေ့၏စကားကိုကြားပြီးနောက် စုန့်ကျုံးလည်း သက်ပြင်းတစ်ချက်ချလိုက်နိုင်သည်။

စုဟုန်၏ ကြေကွဲစရာအခြေအနေကို မြင်ပြီးနောက် ရဲရှင်းဟွေ့၏ မူလလူသတ်ချင်စိတ်သည် များစွာလျော့ကျသွားသည်။

သူ စုဟုန်ကို လွှတ်ပေးရခြင်းမှာ အကြောင်းရင်းနှစ်ခုရှိ၏။ တစ်ခုမှာ စုဟုန်သည် သူ့အမေ၏တူဖြစ်နေသောကြောင့်ဖြစ်သည်။ ဒုတိယနှင့် အရေးကြီးဆုံးအကြောင်းရင်းမှာ ရဲရှင်းဟွေ့က ဒီဘုမသိဘမသိကောင်လေး သူ့ကိုပြန်ကလဲ့စားချေမည်ဟု မျှော်လင့်နေခြင်းကြောင့်ပင်။

သူသည် စောစောက သေနတ်နှင့်အပစ်ခံရပြီး သေလုနီးပါးဖြစ်ခဲ့ရာ ရဲရှင်းချန်နှင့် ရဲလန်ယွဲ့တို့၏ စိတ်ခံစားမှုများ သိသိသာသာ ပြောင်းလဲသွားစေခဲ့သည်။ တီဗီပွင့်လာသောအခါ ရဲရှင်းဟွေ့ ခဏကြည့်လိုက်ရာ လိုင်းတိုင်တန်ဖိုးသည် နှစ်တိုင်ခွဲအထိ တိုက်ရိုက်တိုးလာသည်ကို တွေ့လိုက်ရပြီး ယခင်ကထက် အမြင့်ဆုံးဟု ဆိုနိုင်၏။

ထို့ကြောင့် ကလဲ့စားချေလိုစိတ်ပြင်းပြပြီး ဦးနှောက်မရှိသော ဒီဘုမသိဘမသိကောင်လေး စုဟုန်ကို အသက်ရှင်ခွင့်ပေးထားရန် လိုအပ်၏။

…

ဤအဖြစ်အပျက်ကို ကြုံတွေ့ပြီးနောက် ရဲရှင်းဟွေ့သည် မိမိ၏ကိုယ်ပိုင်အစွမ်းသည်သာ အရေးကြီးကြောင်း ခံစားလိုက်ရသည်။

ကံကောင်းစွာပင် ယနေ့ သူ့အစ်ကိုနှင့်ညီမ အချိန်မီရောက်လာခဲ့သည်။ အကယ်၍ သူတို့ သုံးလေးစက္ကန့်နောက်ကျခဲ့လျှင် သူသည် ယခုအခါ အလောင်းတစ်လောင်းဖြစ်နေလောက်ပြီ။

ဤအကြောင်းကြောင့်ပင် ရဲရှင်းဟွေ့သည် တတ်နိုင်သမျှ ဒုက္ခလိုက်ရှာပြီး သူ၏ထူးခြားစွမ်းအင်ဖြစ်သော တီဗီကို အကောင်းဆုံးအသုံးချရန် ရည်ရွယ်လိုက်သည်။

သူ့အစ်ကို၏ မသေမျိုးဧကရာဇ်ကဲ့သို့သော စရိုက်နှင့်ဆိုလျှင် သူသည် မကြာမီ ကူယန်မှ ထွက်ခွာပြီး တစ်နိုင်ငံလုံးသို့ ခရီးလှည့်လည်ကာ အရင်းအမြစ်များရှာဖွေ၊ ရန်စွယ်များဆွဲဆောင်၊ ဂိုဏ်းများနှင့် မိသားစုများကို ဖျက်ဆီးပြီး သူ့ကိုတစ်ချက်မြင်ရုံနှင့် ချစ်ကြိုက်သွားမည့် မိန်းကလေးအမျိုးမျိုးနှင့် တွေ့ဆုံလိမ့်မည်ဟု ခန့်မှန်းရသည်။ ထို့ကြောင့် ရဲရှင်းဟွေ့အတွက် အချိန်သိပ်မကျန်တော့ပေ။

မီးဖိုချောင်ထဲတွင် ရဲချန်နှင့် စုချင်းတို့သည် ရဲရှင်းဟွေ့၏အသက်ကို မည်သို့ကယ်တင်ရမည်ကို ဆွေးနွေးနေကြစဉ် ရဲရှင်းဟွေ့ကကော ဘာလုပ်နေသနည်း။ သူသည် နေရာအမျိုးမျိုးပြောင်းကာ လိုင်းရှာနေခဲ့သည်။

ရဲရှင်းဟွေ့သည် သူ၏လက်တစ်ဖက်ကို ပြတင်းပေါက်အပြင်ဘက်သို့ ဆန့်တန်းထားပြီး သူ၏လက်ဖဝါးပေါ်တွင် အဖြူအမည်းလှိုင်းကျားများသာ ပြနေသော တီဗီလေးတစ်ခုက ပျံဝဲနေ၏။

×××××××××××××××