ငါ့မျိုးရိုးနာမည်က ရွှီ… ငါ့မျိုးရိုးနာမည်က ဝမ် (ခ)

အသူရာချောက်နက်၏ အောက်ခြေတွင် တိတ်ဆိတ်ခြောက်ကပ်နေသော ပင်လယ်သုသာန်တစ်ခု ရှိသည်။

အကြွင်းမဲ့အမှောင်ထုနှင့် အဆုံးမဲ့သော ပင်လယ်ရေက အရာအားလုံးကို လွှမ်းခြုံထားသည်။

ဤနေရာက အထက်နယ်မြေနှင့် အောက်နယ်မြေကြားမှ စွန့်ပစ်ချောက်နက်တစ်ခု ဖြစ်သည်။

ရွှီချင်းသည် အရိုးခိုက်ခိုက်တုန်အောင် အေးစက်နေသော ပင်လယ်ရေထဲမှာ လွင့်မျောနေသည်။ သူ၏ ခြေဖဝါးအောက်တွင် ဧရာမရှေးဟောင်းသင်္ဘောပျက်တစ်စင်း၏ ယိုယွင်းဆွေးမြေ့နေသော အကြွင်းအကျန်အပိုင်းအစများ ရှိသည်။

ယင်းက ပင်လယ်ကြမ်းပြင်အောက်မှာ အိပ်စက်နေသော ဧရာမသားရဲတစ်ကောင်၏ အရိုးစုနှင့် ဆင်တူသည်။

အချိန်က ဤနေရာမှာ အေးခဲနေဟန် ရ၏။ ရေအောက်နေသားရဲများ၏ ရံဖန်ရံခါ ထုတ်လွှတ်လိုက်သော အေးစက်စက် အပြာရောင်အလင်းသည်သာ သင်္ဘောပေါ်မှာ ပြန့်ကျဲနေသော သစ်သားပရိဘောဂများကို ထွန်းလင်းပေးနေသည်။

ရွှီချင်း၏ အကြည့်က အပျက်အစီးများကြားထဲသို့ ဝင်ရောက်သွားသည်။

သူ၏ ပစ်မှတ်က ရေယာဉ်မှူး၏ အခန်း ဖြစ်သည်။

ထိုနေရာမှ သစ်သားစားပွဲ၏ ထောင့်တစ်နေရာတွင် တစ်ဝက်ခေါက်ချိုးထားသော မြေပုံစာရွက်တစ်ရွက် ရှိသည်။

မြေပုံက အဝါရောင်ဖြစ်ပြီး အစွန်းများက ယိုယွင်းဆွေးမြေ့နေသည်။ ယင်းက ပင်လယ်ရေအောက်မှာ နစ်မြုပ်နေသော သင်္ဘောတစ်စင်းကဲ့သို့ ရှေးကျမှုနှင့် အေးစက်မှုကို ထုတ်လွှတ်နေသည်။

သို့သော်လည်း မည်းမှောင်နေသော ဤယာဉ်မောင်းအခန်းထဲတွင် မြေပုံပေါ်မှ မင်ရည်အမှတ်အသားများက တုန်ခါနေပြီး ပင်လယ်လမ်းကြောင်းများနှင့် သန္တာကျောက်တန်းများကို ထူးဆန်းသော နည်းလမ်းဖြင့် ဖော်ပြနေသည်။ ယင်းတို့က လူးလွန့်လှုပ်ရှားနေလေရာ သက်ရှိတစ်ကောင်၏ သွေးကြောများနှင့် အလားသဏ္ဍာန်တူသည်။

ရွှီချင်းက အခန်းထဲသို့ လျှောက်ဝင်လာသည့်အခါ မြေပုံ၏ တုန်ခါမှုက ရုတ်တရက် ရပ်တန့်သွားသည်။

ထို့နောက် မြေပုံက ရုတ်တရက် အရည်ပျော်သွားပြီး ထွက်ပြေးရန် ကြိုးစားလိုက်သည်။

သို့သော်လည်း နောက်ကျသွားချေ၏။

ရွှီချင်းက ညာလက်ကို မြှောက်လိုက်ပြီး အကြမ်းပတမ်း ဝှေ့ယမ်းလိုက်သည်။

သံတုတ်တစ်ချောင်းက ဟင်းလင်းပြင်ထဲမှ ချက်ချင်း ပျံသန်းထွက်လာသည်။ ယင်းက မရပ်တန့်နိုင်သော အရှိန်အဟုန်ကို သယ်ဆောင်လျက် စားပွဲပေါ်မှ တစ်ဝက်ခေါက်ချိုးနေသော မြေပုံပေါ်သို့ အကြမ်းပတမ်း ထိုးစိုက်သွားသည်။

သို့ဖြစ်၍ မြေပုံသည် သစ်သားစားပွဲပေါ်မှာ မြဲမြံစွာ သံရိုက်ခံလိုက်ရသည်။

ထို့နောက် မြေပုံစက္ကူပေါ်မှ မင်ရည်အမှတ်အသားများက ပုံပျက်တွန့်လိမ်နေသော လူသားမျက်နှာတစ်ခုကို ဖွဲ့စည်းသွားသည်။ ၎င်းက ပါးစပ်ဟလိုက်ပြီး အော်ဟစ်ညည်းညူလိုက်သည်။ မျက်နှာက နာကျင်ရှုံ့မဲ့နေပြီး မျက်နှာပေါ်မှ မျဉ်းကြောင်းများက အရူးအမူး လူးလွန့်နေကြသည်။

ပင်လယ်ရေသည် ရွှီချင်း၏ တမူထူးခြားသော အာဏာစက်ဥပဒေသအစွမ်းကို သယ်ဆောင်လျက် စားပွဲပေါ်မှာ သံရိုက်ခံထားရသော မြေပုံ၏ အတွင်းပိုင်းထဲသို့ စိမ့်ဝင်သွားပြီး ယိုယွင်းတိုက်စားလိုက်သည်။

မင်ရည်အမှတ်အသားများဖြင့် ဖွဲ့စည်းသွားသော မျက်နှာက အပြင်းအထန် ပုံပျက်တွန့်လိမ်သွားသည်။ ပင်လယ်လမ်းကြောင်းများနှင့် သန္တာကျောက်တန်းများကို ဖော်ပြနေသော မင်ရည်အစက်များက ပင်လယ်ရေထဲမှ မြေတီကောင်များသဖွယ် လူးလွန့်သွားကြသည်။

နောက်ဆုံးမှာတော့ စားပွဲပေါ်တွင် ညစ်ညမ်းပြီး ဖရိုဖရဲဖြစ်နေသော မင်ရည်အစွန်းအထင်းသာ ကျန်နေခဲ့သည်။ ယင်းက ပင်လယ်ရေ၏ တိုက်စားမှုအောက်မှာ တဖြည်းဖြည်း လွင့်ပြယ်သွားပြီး ထာဝရအမှောင်ထုနှင့် ပေါင်းစပ်သွားသည်။

ရွှီချင်း၏ မျက်နှာက စိတ်ခံစားချက်ကင်းမဲ့နေသည်။ သူက အနောက်လှည့်လိုက်ပြီး တိတ်ဆိတ်နေသော သင်္ဘောပျက်ထဲမှ ထွက်လျှောက်သွားသည်။ သူ၏ အနောက်တွင် ပင်လယ်၏ ထာဝရတိတ်ဆိတ်မှုသာ ကျန်နေခဲ့သည်။

…..

တိမ်ပင်လယ်နှင့် အင်မော်တယ်တောင်တန်းများထဲတွင်…

ဝိညာဉ်စွမ်းအင်က ထာဝရ တည်ရှိနေသည်။

တိမ်ပင်လယ်၏ အပေါ်တွင် အထီးကျန်တောင်တစ်လုံးက လွင့်မျောနေသည်။ အလွန်သိပ်သည်းသော ဝိညာဉ်စွမ်းအင်က တောင်၏ ဘေးပတ်ပတ်လည်မှာ မြူခိုးအသွင်ဖြင့် တစ်နှစ်ပတ်လုံး တည်ရှိနေသည်။

ကြိုးကြာများက အော်ဟစ်နေကြပြီး ထူးဆန်းသော ပန်းပင်များက ပွင့်လန်းနေကြသည်။ ကျောက်စိမ်းအဆောက်အဦးများကို တိမ်တိုက်များထဲမှာ မထင်မရှား မြင်တွေ့နိုင်သည်။

ယင်းက စိတ်ငြိမ်တာအိုဘုရားကျောင်းဖြစ်ပြီး အဆင့်နိမ့်ကြယ်တာရာစက်ဝန်းထဲမှာ တည်ရှိသည်။ ထိုနေရာက မရေမတွက်နိုင်သော ကျင့်ကြံသူများ အိမ်မက်မက်နေကြသော ကျင့်ကြံခြင်းနိဗ္ဗာန်ဘုံ ဖြစ်သည်။

ဤအခိုက်အတန့်မှာ ကြည်လင်သော ကောင်းကင်အောက်တွင် ကောင်းကင်ဘုံလေက တဟူးဟူး တိုက်ခတ်နေစဉ် ရွှီချင်းက အထီးကျန်တောင်၏ တောင်ထိပ်ပေါ်မှာ မတ်တတ်ရပ်နေသည်။

သူ၏ အနက်ရောင်ဝတ်စုံက လေထဲမှာ တဖျပ်ဖျပ်လှုပ်ခတ်နေပြီး သူ၏ ခရမ်းရောင်ဆံပင်ရှည်က ဘယ်ညာယိမ်းနွဲ့နေသည်။ သူ၏ တည်ရှိမှုက ဘေးပတ်ဝန်းကျင်မှ ဝိညာဉ်စွမ်းအင်နှင့် မလိုက်ဖက်ပေ။

သူက မိစ္ဆာတစ်ကောင်နှင့် ဆင်တူသည်။

ထို့ပြင် သူ၏ အေးစက်စက် အကြည့်က နူးညံ့သော တိမ်တိုက်များကို ဖောက်ထွင်းသွားပြီး တာအိုဘုရားကျောင်းပေါ်သို့ ကျရောက်သွားသည်။

တာအိုဘုရားကျောင်း၏ အတွင်းပိုင်းထဲတွင် ကန့်သတ်အစီအရင်များဖြင့် ပြည့်နှက်နေသော လျှို့ဝှက်ကျင့်ကြံခြင်းအခန်းတစ်ခန်း ရှိသည်။ ထိုနေရာမှာ ရွှမ်ထျန်းအစောင့်အရှောက်အဆောင်သုံးမျိုးကို ကိုးကွယ်ပူဇော်ထားသည်။

အဆောင်စက္ကူများသည် ရွှေမဟုတ်သလို ကျောက်စိမ်းလည်း မဟုတ်ချေ။ ယင်းတို့က ခပ်မှိန်မှိန် ဝိညာဉ်အလင်းရောင်ကို ထုတ်လွှတ်နေကြသည်။

အဆောင်စက္ကူတစ်ရွက်၏ ထောင့်တစ်နေရာတွင် အလွန်အမင်း သေးငယ်သော မှော်စာလုံးတစ်လုံး ရှိသည်။ မှော်စာလုံး၏ အတွင်းပိုင်းထဲမှာ မထင်ရှားသော မီးခိုးရောင်အမျှင်တန်းတစ်ခု ရှိသည်။

ရွှီချင်းက ထိုအဆောင်စက္ကူကို ကြည့်လိုက်သည်။

“ ပုန်းအောင်းတဲ့ နည်းလမ်းတွေက ပိုပြီးအဆင့်မြင့်လာတာပဲ… မင်းက နိယာမတွေထဲမှာ လာပုန်းနေတယ်… ဒီလောကရဲ့ နိယာမတွေမရှိဘဲ အဲ့ဒါကို ဖျက်ဆီးလို့ မရဘူး ”

ရွှီချင်းက အဆောင်စက္ကူကို ပစ်မှတ်ထားလိုက်ပြီးနောက် အထီးကျန်တောင်၏ အပြင်သို့ ခြေလှမ်း လှမ်းလိုက်သည်။ သူ၏ ခြေဖဝါးအောက်မှ တိမ်ပင်လယ်က အလိုအလျောက် ရွေ့လျားသွားပြီး သိပ်သည်းသွားသည်။ ဤသည်မှာ သူက တိမ်တိုက်တံတားပေါ်မှာ လမ်းလျှောက်နေသည့်အလားပင်။ သူက လေဟာနယ်ကို ချက်ချင်း ဖြတ်သန်းသွားပြီး တာအိုဘုရားကျောင်း၏ လျှို့ဝှက်အခန်းအပြင်ဘက်မှ ကျောက်စိမ်းတံခါးအရှေ့သို့ ရောက်ရှိသွားသည်။

သူက တံခါးပေါ်မှ ရှုပ်ထွေးနက်နဲသော ကန့်သတ်အစီအရင်များကို လျစ်လျူရှုထားပြီး တံခါးကို တိုက်ရိုက် ဖြတ်သန်းသွားသည်။ ဤသည်မှာ သူက ရေကန့်လန့်ကာအလွှာကို ဖြတ်သန်းသွားသည့်အလားပင်။

စန္ဒကူးအမွှေးနံ့က လျှို့ဝှက်အခန်းထဲမှာ ပျံ့လွင့်နေသည်။ ဤနေရာတွင် ဝိညာဉ်စွမ်းအင်က အလွန်သိပ်သည်းလေရာ ယင်းက ငွေ့ရည်ဖွဲ့လုနီးပါးပင်။

ရွှီချင်းသည် လုံးဝ တုံ့ဆိုင်းမနေပေ။ သူက ညာလက်ညှိုးကို မြှောက်လိုက်သည်။ မှိန်ဖျော့သော အလင်းတန်းတစ်ခုက သူ၏ လက်ညှိုးထိပ်မှ ထွက်ပေါ်လာသည်။ ယင်းက အပ်တစ်ချောင်းသဖွယ် သေးငယ်သော်လည်း ဤအခန်းထဲမှ ဝိညာဉ်စွမ်းအင်ကို ဖရိုဖရဲဖြစ်သွားစေမည့် အဖျက်အစီးအရှိန်အဝါကို သယ်ဆောင်ထားသည်။

သို့သော်လည်း အလင်းတန်းက အဆောင်စက္ကူကို မတိုက်ခိုက်ပေ။ ယင်းအစား အလင်းတန်းက လျှို့ဝှက်အခန်း၏ အပေါ်မှာ လွင့်မျောနေသော သဏ္ဍာန်မဲ့ဝိညာဉ်စွမ်းအင်ကို နှောင့်ယှက်လိုက်သည်။ ဤသည်မှာ တည်ငြိမ်သော ကန်ရေပြင်ပေါ်သို့ ခဲပြုတ်ကျသွားသည့်အလားပင်။ ယင်းက ဥပဒေသမိုးကြိုးများကို လှုံ့ဆော်လိုက်သည်။

“ ဗုန်း ”

မည်သည့်သတိပေးမှုမှမရှိဘဲ ကျယ်လောင်သော ပေါက်ကွဲသံက ပဲ့တင်ထပ်သွားသည်။

ထွန်းလင်းတောက်ပသော အဖြူရောင်မိုးကြိုးသွားက ကောင်းကင်ဘုံတိုင်လုံးသဖွယ် ကမ္ဘာမြေပေါ်သို့ ဆင်းသက်လာသည်။ ယင်းက တာအိုဘုရားကျောင်း၏ မျက်နှာကြက်ကို ဖောက်ထွင်းသွားသည်။ ယင်းက ဘုရားကျောင်း၏ ကာကွယ်ရေးအစီအရင်အားလုံးကို လျစ်လျူရှုထားပြီး ကောင်းကင်ဘုံ၏ အမျက်ဒေါသစွမ်းအားကို သယ်ဆောင်လာသည်။

နောက်အခိုက်အတန့်မှာ အဖြူရောင်မိုးကြိုးသွားက ရွှမ်ထျန်းအစောင့်အရှောက်အဆောင်ကို ထိမှန်သွားသည်။

အတိအကျဆိုရသော် ယင်းက ထူးဆန်းသော မီးခိုးရောင်အမျှင်တန်းရှိသည့် အဆောင်ကို ထိမှန်သွားသည်။

အချိန်က ဤအခိုက်အတန့်မှာ ရပ်တန့်သွားဟန် ရ၏။

နောက်အခိုက်အတန့်မှာ အဆောင်စက္ကူက အဖြူရောင်အလင်း ထွန်းလင်းတောက်ပသွားသည်။

လျှပ်တစ်ပြက်အတွင်းမှာ ယင်းက မည်းတူးသွားပြီး အငွေ့ပျံသွားကာ ပျောက်ကွယ်သွားသည်။

မီးကျွမ်းနေသော စက္ကူအပိုင်းအစများက မရေမတွက်နိုင်သော ပိုးစုန်းကြူးများသဖွယ် အပြင်သို့ ပျံသန်းထွက်လာကြသည်။ ၎င်းတို့က ပေါက်ကွဲမှုအလယ်မှ ထွက်ပြေးလွတ်မြောက်ရန် အရူးအမူး ပျံသန်းလိုက်ကြသည်။

လျှို့ဝှက်အခန်းငယ်၏ ကျဉ်းမြောင်းသော လေဟာနယ်ထဲမှာ ၎င်းတို့က မိုးကြိုးမီးလျှံ၏ ဖျက်ဆီးမှုအောက်မှ လွတ်မြောက်ရန် ကြိုးစားလိုက်ကြသည်။

တလိပ်လိပ် မြှောက်တတ်နေသော မီးခိုးလုံးများကြားတွင် ဒီလော့ဇီ၏ မျက်နှာက မသဲမကွဲ ထွက်ပေါ်လာသည်။ ၎င်းက နာကျင်ရှုံ့မဲ့နေပြီး ရွှီချင်းကို အော်ပြောလိုက်သည်။

“ ရွှီချင်း… ငါမင်းကို ကျိန်စာတိုက်တယ် ”

ရွှီချင်းက မီးခိုးလုံးများကြားမှာ ပျောက်ကွယ်နေသော မျက်နှာကို အေးစက်စက် စိုက်ကြည့်နေသည်။ နောက်ဆုံးမှာ အဆောင်စက္ကူအားလုံးက အနက်ရောင်ပြာမှုန်အဖြစ် ပြောင်းလဲသွားပြီး အေးစက်စက်မြေပြင်ပေါ်မှာ ပြန့်ကျဲသွားကြသည်။

မွှေးပျံ့သော စန္ဒကူးရနံ့က ဤအခိုက်အတန့်မှာ မီးခိုးအနံ့ဖြင့် အစားထိုးခံလိုက်ရသည်။ မိုးကြိုးမီးလျှံ၏ ဖျက်ဆီးမှုအောက်မှာ သေခြင်းတိတ်ဆိတ်မှုသာလျှင် ကျန်ရှိနိုင်ပေသည်။

ရွှီချင်းက သူ၏ လက်ညှိုးကို ပြန်ရုပ်လိုက်သည်။ သူ၏ လက်ညှိုးထိပ်မှ မှိန်ဖျော့သော အလင်းရောင်က မှေးမှိန်သွားသည်။

သူက မြေပြင်ပေါ်မှ အနက်ရောင်ပြာမှုန်များကို တစ်ချက်ပင် မကြည့်ပေ။ သူက အနောက်လှည့်လိုက်ပြီး ဟင်းလင်းပြင်ထဲသို့ ဝင်ရောက်ပျောက်ကွယ်သွားသည်။

ဤအခိုက်အတန့်မှာ တာအိုဘုရားကျောင်း၏ သတိပေးအစီအရင်က အသက်ဝင်လာလေရာ တိတ်ဆိတ်ငြိမ်သက်နေသော အင်မော်တယ်တောင်တန်းက အုတ်အော်သောင်းတင်းဖြစ်သွားသည်။

…..

အမြစ်ဖြတ်ဖျက်ဆီးမှုက တစ်ကြိမ်ပြီးတစ်ကြိမ် ဖြစ်ပွားနေသည်။

တချို့လောကများက ဖရိုဖရဲဖြစ်နေပြီး တချို့လောကများက တိတ်ဆိတ်ငြိမ်းချမ်းနေသည်။

သို့သော်လည်း တူညီသည့်တစ်ချက်မှာ ထိုလောကများထဲမှ ဒီလော့ဇီ၏ ကိုယ်ပွားများက အမြစ်ဖြတ်ဖျက်ဆီးခံလိုက်ကြရသည်။

ဒီလော့ဇီ အသုံးပြုခဲ့သော လျှို့ဝှက်အတတ်ပညာက ၎င်းအတွက် အချိန်မဆွဲဆန့်ပေးနိုင်ရုံသာမက ယင်းက ၎င်း၏ အဆုံးသတ်ကံကြမ္မာလည်း ဖြစ်သည်။

၎င်းကို ထိုမျှအခြေအနေဆိုးဝါးစေသည်မှာ ရွှီချင်း၏ တမူထူးခြားသော အာဏာစက်ဥပဒေသကြောင့် ဖြစ်သည်။

အတိုင်းအတာတစ်ခုထိဆိုရသော် ရွှီချင်း၏ အာဏာစက်က ဒီလော့ဇီ၏ နတ်ဘုရားအခွင့်အာဏာကို သဘာဝအလျောက်တန်ပြန်နိုင်စွမ်း ရှိသည်။

ထို့ကြောင့် ပစ္စုပ္ပန်လောကတွင် အချိန်သုံးလကုန်ဆုံးသွားသည့်အခါ အဆုံးမဲ့ကျယ်ပြောသော ကြယ်တာရာကောင်းကင်ထဲမှ သေမျိုးလောကတစ်ခုတွင်…

စွန့်ပစ်ကျောက်တုံးတစ်တုံး၏ အေးစက်စက်အရိပ်အောက်မှ နောက်ဆုံးစက္ကူအပိုင်းအစက ရွှီချင်း၏ လက်ညှိုးမှ ထွက်ပေါ်လာသော အဖြူအနက်မီးတောက်ကြောင့် လောင်ကျွမ်းသွားသည်။

စက္ကူအပိုင်းအစက တိတ်တဆိတ် လောင်ကျွမ်းသွားပြီး နောက်ဆုံးမှာ ယင်းက မထင်မရှား အစိမ်းရောင်မီးခိုးငွေ့အဖြစ် ပြောင်းလဲသွားကာ လွင့်ပြယ်သွားသည်။

စကြာဝဠာ၏ လောကအားလုံးနှင့် ဒိုင်မန်းရှင်အားလုံးတွင် တည်ရှိနေသော စက္ကူအပိုင်းအစများနှင့် အဖြူရောင်အမှတ်အသားများက ဤအခိုက်အတန့်မှာ ထပ်ဆင့်လွှမ်းခြုံနေသော အော်သံနက်ကြီးကို ထုတ်လွှတ်လိုက်ကြသည်။ ဤသည်မှာ ၎င်းတို့က တူညီသော ဝိညာဉ်ရင်းမြစ်ထံမှ အမြစ်ဖြတ်ဖျက်ဆီးခြင်းကို တွေ့ကြုံလိုက်ရသည့်အလားပင်။

ထိုအသံများထဲမှာ သတ္ထုမြို့တော်ထဲမှ ဂီယာ၏ တဂျောက်ဂျောက်မြည်သံ၊ အသူရာချောက်နက်ထဲမှ မြေပုံစက္ကူ၏ တရှဲရှဲလောင်ကျွမ်းသံနှင့် အင်မော်တယ်တောင်တန်းထဲမှ အဆောင်စက္ကူ၏ ပေါက်ကွဲသံလည်း ပါဝင်ကြသည်။

မတူညီသော ညည်းညူသံများနှင့် ထိတ်လန့်ချောက်ချားဖွယ် အော်ဟစ်သံများက တခြားလောကများထဲမှ ဒီလော့ဇီ၏ ကိုယ်ပွားများ ဖျက်ဆီးခံနေရချိန်မှာလည်း ထွက်ပေါ်လာကြသည်။

ဤသည်မှာ သေဆုံးမှုက အဆုံးမဲ့စွာ ဖြစ်ပွားနေသည့်အလားပင်။ ယင်းက စိတ်ကူးမယဉ်နိုင်အောင် ထိတ်လန့်ဖွယ်ကောင်းသည်။

ဤအခိုက်အတန့်မှာ ရွှီချင်းက ဒီလော့ဇီ၏ နောက်ဆုံးကိုယ်ပွား အမြစ်ဖြတ်ဖျက်ဆီးခံလိုက်ရသော ဟင်းလင်းပြင်ပေါ်မှာ မတ်တတ်ရပ်နေသည်။ သူ၏ ခြေဖဝါးအောက်တွင် အလွန်သေးနုတ်သော စွန့်ပစ်ကျောက်တုံးရှိပြီး သူ၏ ဘေးပတ်ပတ်လည်တွင် ခရမ်းရောင်မီးအိမ်ကိုးခုက ထွန်းလင်းနေကြသည်။

ယင်းတို့က ဆရာသခင်ပိုင်ထံမှ သူလက်ဆောင်ရရှိခဲ့သော နတ်ဘုရားမျက်လုံးမီးအိမ်မှ ဖွဲ့စည်းသွားကြခြင်း မဟုတ်ပေ။ ယင်းအစား ဒီလော့ဇီ၏ ကိုယ်ပွားများကို သူလိုက်ဖမ်းနေစဉ်အတွင်း ဖွဲ့စည်းသွားခဲ့သော အမဲလိုက်မီးတောက်မီးလျှံများသာ ဖြစ်ကြသည်။

မီးတောက်၏ အလင်းရောင်အောက်မှာ ရွှီချင်း၏ အမူအရာက ပုံမှန်အတိုင်း တည်ငြိမ်နေသည်။ ဤသည်မှာ အစောနက သူ၏ တိုက်ခိုက်မှုက သူ၏ ဝတ်စုံပေါ်မှ ဖုန်တစ်မှုန်ကို ဖယ်ရှားလိုက်ရုံမျှသာ ဖြစ်သည့်အလားပင်။

သူက ဖြည်းညင်းစွာ ခေါင်းမော့လိုက်သည်။ အောက်ခြေမဲ့ဟန်ရသော သူ၏ ခရမ်းရောင်သူငယ်အိမ်များထဲမှ အေးစက်စက် သတ်ဖြတ်ခြင်းစိတ်ဆန္ဒက မပျောက်ကွယ်သွားသေးပေ။ ယင်းအစား သတ်ဖြတ်ခြင်းစိတ်ဆန္ဒက ပိုပြီးအားကောင်းလာသည်။

အဘယ့်ကြောင့်ဆိုသော် သူက သန်းပေါင်းများစွာသော အော်ဟစ်ညည်းညူသံများ၏ ဇစ်မြစ်နှင့် အဆုံးမဲ့ဒိုင်မန်းရှင်းစီးကြောင်း၏ အနက်ပိုင်းထဲမှာ တစ်စုံတစ်ခုကို ရှင်းရှင်းလင်းလင်း မြင်လိုက်ရသောကြောင့် ဖြစ်သည်။

ယင်းက ပြီးပြည့်စုံလုနီးပါး ပုန်းကွယ်နေသော လျှို့ဝှက်လမ်းကြောင်းတစ်ခု ဖြစ်သည်။ သို့သော်လည်း ကိုယ်ပွားအားလုံးက အမြစ်ဖြတ်ဖျက်ဆီးခံလိုက်ရပြီး ဝိညာဉ်ရင်းမြစ်က သုတ်သင်ခံလိုက်ရသည့်အခါ ထိုလမ်းကြောင်း၏ ပုန်းကွယ်မှုက ရှင်းလင်းစွာ ထွက်ပေါ်လာသည်။

“ စိတ်ဝင်စားစရာပဲ ”

ရွှီချင်းက တီးတိုးရေရွတ်လိုက်သည်။ သူလက်မြှောက်လိုက်သည့်အခါ ကြေးနီရောင်မီးအိမ်တစ်လုံးက သူ၏ အရှေ့မှာ ထွက်ပေါ်လာသည်။ ထို့နောက် သူက အရှေ့သို့ ခြေတစ်လှမ်း လှမ်းလိုက်သည်။

…..

လျှို့ဝှက်လမ်းကြောင်းထဲတွင်…

အလွန်အားနည်းနေပြီး ကြိုးအဆုံးသို့ ရောက်နေသော ဒီလော့ဇီက ဧရာမမျက်နှာကြီးတစ်ခုအဖြစ် အသွင်ပြောင်းလဲလိုက်ပြီး လျှို့ဝှက်လမ်းကြောင်းထဲမှာ အရူးအမူး ပြေးနေသည်။

၎င်းက အမှန်တကယ် ကြောက်ရွံ့နေသည်။

၎င်း၏ နတ်ဘုရားစွမ်းအင်အခြေခံက နိမ့်ကျသွားသည့်အပြင် သေခြင်းအန္တရာယ်၏ ချဉ်းကပ်မှုက ၎င်းအား တုန်လှုပ်ချောက်ချားစေသည်။

“ မျှော်လင့်ချက်ရှိသေးတယ် ”

“ အတိတ်မှာ ဝမ်ကူးကုန်းမြေကို ငါမကောင်းကြံစည်ခဲ့တုန်းက ဒီလျှို့ဝှက်လမ်းကြောင်းကို ချန်ထားခဲ့တယ်… ဒီလမ်းကြောင်းက အနာဂတ် ရွှမ်ကမ္ဘာမြေဆီ ဦးတည်နေတယ်… ဒီကနေ ငါထွက်သွားနိုင်မယ်ဆိုရင် အချိန်အလုံအလောက်ဆွဲထားဖို့ အခွင့်အရေးရလိမ့်မယ် ”

ဒီလော့ဇီက ပိုပြီးမြန်ဆန်စွာ အရှိန်မြှင့်တင်လိုက်သည်။ ၎င်း၏ အစစ်အမှန်နတ်ဘုရားနယ်ပယ်ကြောင့် ၎င်းက လျှို့ဝှက်လမ်းကြောင်း၏ အဆုံးသတ်ဆီသို့ မျက်စိတစ်မှိတ်အတွင်း ရောက်ရှိသွားသည်။

လျှို့ဝှက်လမ်းကြောင်း၏ အဆုံးသတ်တွင် ကြေးမုံသဖွယ် ချိပ်တံဆိပ်တစ်ခု တည်ရှိသည်။

၎င်းက ကြေးမုံချိပ်တံဆိပ်မှတဆင့် အပြင်လောကကို မြင်တွေ့သွားသည်။ ထိုနေရာတွင် ကြောက်လန့်တုန်လှုပ်နေသော မျက်နှာဖြင့် ဖက်တီးတစ်ယောက် ရှိသည်။

ဒီလော့ဇီက ထိုဖက်တီးကို ဂရုမစိုက်ပေ။ ရွှေရောင်အလင်းက ၎င်း၏ မျက်လုံးထဲမှာ ထွန်းလင်းသွားပြီး ဧရာမမျက်နှာကြီးက ကြေးမုံချိပ်တံဆိပ်ထဲသို့ တန်းမတ်စွာ ဝင်ရောက်သွားသည်။

၎င်းချဉ်းကပ်သွားသည်နှင့် ကြေးမုံချိပ်တံဆိပ်က ၎င်းထံမှ ဖိအားကို မတောင့်ခံနိုင်ဟန် ရ၏။ သို့ဖြစ်၍ အလင်းရောင်က မှိတ်တုတ်မှိတ်တုတ် လင်းလက်သွားပြီး အက်ကွဲကြောင်းအများအပြားက ကြေးမုံချိပ်တံဆိပ်၏ မျက်နှာပြင်ပေါ်မှာ ထွက်ပေါ်လာကြသည်။

အခြားတစ်ဖက်မှ ကြည့်လျှင် ဧရာမမျက်နှာကြီးတစ်ခုက ဤအခိုက်အတန့်မှာ ကြေးမုံချိပ်တံဆိပ်၏ အောက်ခြေမှ တိုးထွက်လာနေကြောင်း ရှင်းလင်းစွာ မြင်ရလိမ့်မည်။

ဤသည်မှာ ကြေးမုံချိပ်တံဆိပ်၏ မျက်နှာပြင်က အလွှာပါးတစ်ခုဖြစ်သည့်အလားပင်။ အပြင်ဘက်သို့ တိုးထွက်လာနေသော ဧရာမမျက်နှာကြီးက အဆုံးမဲ့သော မိစ္ဆာအရှိန်အဝါကို သယ်ဆောင်လျက် ကြေးမုံချိပ်တံဆိပ်ကို ချိုးဖြတ်လိုက်သည်။

“ မျှော်လင့်ချက်က ငါ့ရဲ့ အရှေ့မှာ ”

လျှို့ဝှက်လမ်းကြောင်းထဲတွင် ဒီလော့ဇီက ကြုံးဝါးလိုက်ပြီး အစွမ်းကုန်သုံး၍ ချိပ်တံဆိပ်ကို ချိုးဖြတ်လိုက်သည်။

၎င်းအတွက်တော့ ဤချိပ်တံဆိပ်က ပျက်စီးလွယ်သော စက္ကူရွက်တစ်ရွက် ဖြစ်သည့်အလားပင်။ ယင်းကို ချိုးဖြတ်ခြင်းက ၎င်းအတွက် ခက်ခဲသောကိစ္စ မဟုတ်ပေ။ သို့ဖြစ်၍ ၎င်းလုပ်ဆောင်ရမည်မှာ အပြင်လောကသို့ ၎င်းရောက်သွားသည့်အခိုက် အစွမ်းကုန်သုံး၍ ထွက်ပြေးရန် ဖြစ်သည်။

သို့သော်လည်း ချိပ်တံဆိပ်၏ အပြင်ဘက်သို့ ၎င်းရောက်တော့မည့်အချိန်…

ချိပ်တံဆိပ်အပြင်ဘက်မှ ကြောက်လန့်တုန်လှုပ်နေသော ဖက်တီး၏ အရှေ့တွင် ကြယ်အလင်းရောင်ဝဲကတော့တစ်ခုက ရုတ်တရက် ထွက်ပေါ်လာသည်။

ဝဲကတော့ထဲတွင် ကြယ်အလင်းရောင်ဖြင့် ဖွဲ့စည်းထားသော ဧရာမလက်ချောင်းတစ်ချောင်းက ရုတ်တရက် ဆန့်တန်းထွက်လာသည်။

ထိုလက်ချောင်းက ချိပ်တံဆိပ်ပေါ်သို့ တိုက်ရိုက် ကျဆင်းသွားသည်။

လက်ချောင်းကျဆင်းလာသည်နှင့် နွေဦးအင်မော်တယ်တစ်ပါး၏ အရှိန်အဝါက ကျယ်လောင်သော မြည်ဟိန်းသံနှင့်အတူ ဤလောကထဲမှ ကောင်းကင်ဘုံစိတ်ဆန္ဒကို အစားထိုးသွားသည်။

လက်ချောင်းက ဧရာမမျက်နှာကြီး၏ မျက်ခုံးနှစ်ခုကြားနေရာသို့ ဖိချလိုက်သည်။

ဒီလော့ဇီ၏ ခန္ဓာကိုယ်က တုန်ယင်သွားသည်။ ၎င်း၏ ကြုံးဝါးသံက အော်ဟစ်ညည်းညူသံအဖြစ် ပြောင်းလဲသွားသည်။ ဤအခိုက်အတန့်မှာ ၎င်း၏ အရှိန်အဝါက လုံးဝ ပြိုကွဲပျက်စီးသွားသည်။

“ နွေဦးအင်မော်တယ်… ”

“ ဒီနေရာမှာ ဘယ်လိုလုပ် နွေဦးအင်မော်တယ်တစ်ပါး ရှိနေတာလဲ… ”

“ ပြီးတော့… သူက သာမန်နွေဦးအင်မော်တယ်မဟုတ်ဘူး ”

ဒီလော့ဇီက နတ်ဘုရားသွေးကို အန်ထုတ်လိုက်ရပြီး ၎င်း၏ ဧရာမမျက်နှာကြီးက ချက်ချင်း ညှိုးခြောက်သွားသည်။ ၎င်းက ရုန်းကန်ချင်သည်။ သို့သော်လည်း ၎င်း၏ လက်ရှိအဆင့်ကြောင့် ထိုလက်ချောင်းအောက်မှာ ၎င်း၏ ကြိုးစားမှုမှန်သမျှက အချည်းနှီးဖြစ်သွားသည်။

၎င်းက အသက်သုံးခါရှူချိန်မျှသာ တောင့်ခံနိုင်ခဲ့သည်။ နောက်အခိုက်အတန့်မှာ ၎င်းက အနောက်သို့ လွင့်စင်သွားပြီး ချိပ်တံဆိပ်၏ အရှေ့မှာ တားဆီးခံလိုက်ရသည်။

ဒီလော့ဇီက နောက်တစ်ကြိမ် ထပ်ကြိုးစားရန် ပြင်လိုက်သည်။ သို့သော်လည်း ထိုအခိုက်အတန့်မှာ ၎င်း၏ ခန္ဓာကိုယ်နှင့် ဝိညာဉ်ကို အကြွင်းမဲ့အေးခဲသွားစေမည့် အအေးဓာတ်က ၎င်း၏ အနောက်မှ တိတ်တဆိတ် ချဉ်းနင်းဝင်ရောက်လာသည်။

၎င်းဘာမှမတုံ့ပြန်နိုင်မီ လက်တစ်ဖက်က ၎င်း၏ ဦးခေါင်းကို ဖမ်းဆုပ်လိုက်သည်။

“ မင်းကို ရှာတွေ့ပြီ ”

ဒီလော့ဇီ၏ ဝိညာဉ်က ဝုန်းခနဲ မြည်ဟိန်းသွားပြီး ၎င်းက ဒိုင်မန်းရှင်းအာဏာစက်ဥပဒေသဖြင့် တိုက်ရိုက် တိုက်ခိုက်ခံလိုက်ရသည်။ ထို့နောက် ၎င်းက အေးစက်စက်လက်ထဲမှာ ချုပ်နှောင်ခံလိုက်ရသည်။

တစ်ချိန်တည်းမှာ ရွှီချင်း၏ ပုံရိပ်က လျှို့ဝှက်လမ်းကြောင်းထဲမှာ ထွက်ပေါ်လာသည်။

သူက လက်တစ်ဖက်ဖြင့် ဒီလော့ဇီကို ဖမ်းဆုပ်ထားစဉ် ခရမ်းရောင်မီးအိမ်ကိုးခုက သူ၏ ဘေးပတ်ပတ်လည်မှာ လွင့်မျောနေကြသည်။ ထို့နောက် သူက ဒီလော့ဇီ ချိုးဖြတ်ရန် ကြိုးစားခဲ့သော ကြေးမုံချိပ်တံဆိပ်ကို ကြည့်လိုက်သည်။

ဤအခိုက်အတန့်မှာ ကြေးမုံချိပ်တံဆိပ်ပေါ်မှ အက်ကွဲကြောင်းများက အပြင်လောကမှ ကြယ်အလင်းရောင်၏ စွမ်းအားကြောင့် ပြန်ကောင်းမွန်သွားကြသည်။

ကြေးမုံချိပ်တံဆိပ်ကို စိုက်ကြည့်နေရင်း ရွှီချင်းက မျက်လုံးမှေးကျဉ်းလိုက်ပြီး အရှေ့သို့ လျှောက်သွားသည်။

သူချဉ်းကပ်သွားသည်နှင့် ကြေးမုံချိပ်တံဆိပ်က အပြင်းအထန် တုန်ယင်သွားပြီး ယင်း၏ စွမ်းအင်လှိုင်းများက ပရမ်းပတာ လှုပ်ခတ်သွားသည်။ ရွှီချင်းက ဖြည်းညင်းစွာ လမ်းလျှောက်နေသော်လည်း ကြေးမုံချိပ်တံဆိပ်က ယင်း၏ နောက်ဆုံးအကန့်အသတ်သို့ ရောက်ရှိသွားပုံပေါ်သည်။

ချိပ်တံဆိပ်၏ အပြင်ဘက်တွင် ဝဲကတော့ထဲမှ ဆန့်တန်းထွက်လာသော လက်ချောင်းက အစတွင် ဖြည်းညင်းစွာ ပျောက်ကွယ်သွားနေသည်။ ဤသည်မှာ အရာအားလုံးက ပြီးဆုံးသွားတော့မည့်အလားပင်။

သို့သော်လည်း နောက်အခိုက်အတန့်မှာ ဝဲကတော့ထဲမှ ကြယ်အလင်းရောင်က ရုတ်တရက် ရပ်တန့်သွားသည်။ တစ်ချိန်တည်းမှာ တစ်ခါမှမဖြစ်ပေါ်ဖူးသော တည်ကြည်လေးနက်မှုက ဝဲကတော့ထဲမှာ စုစည်းသွားပြီး အေးစက်စက် မျက်လုံးတစ်စုံအဖြစ် ပြောင်းလဲသွားသည်။

“ ရပ်လိုက် ”

တိုးညင်းသော အသံက ဝဲကတော့ထဲမှ ပျံ့လွင့်လာပြီး ချိပ်တံဆိပ်အတွင်းသို့ ဝင်ရောက်သွားသည်။

ထိုအသံကို ကြားသည့်အခါ ရွှီချင်းက ချိပ်တံဆိပ်၏ အစွန်းတစ်ဖက်မှာ ရပ်တန့်လိုက်သည်။ သူက ခေါင်းမော့လိုက်ပြီး ကြေးမုံချိပ်တံဆိပ်၏ အပြင်လောကကို ကြည့်လိုက်သည်။

သူ၏ အကြည့်က ဖက်တီးကောင်လေးပေါ်သို့ အရင်ဆုံး ကျရောက်သွားသည်။ ထို့နောက် သူက သူ၏ အရှေ့မှ ကြယ်အလင်းရောင်ဝဲကတော့ကို ကြည့်လိုက်သည်။

ထိုအကြည့်နှင့်အတူ သူက ဆံဖြူကျင့်ကြံသူတစ်ဦးကို မြင်တွေ့သွားသည်။ အလွန်အားကောင်းသော သတ်ဖြတ်ခြင်းစိတ်ဆန္ဒက ဆံဖြူကျင့်ကြံသူထံမှ ထွက်ပေါ်နေပြီး သူ၏ ကျင့်ကြံခြင်းအခြေခံက နွေဦးအင်မော်တယ်အဆင့်မှာ ဖြစ်သည်။

“ စိတ်ဝင်စားစရာပဲ… ဒီလော့ဇီကို သုံးလကြာအောင် ငါလိုက်ဖမ်းခဲ့ပြီး သူ့ရဲ့ ကိုယ်ပွားသန်းချီကို အမြစ်ဖြတ်ဖျက်ဆီးခဲ့တယ်… ဒါပေမဲ့ သူ့ရဲ့ မူလခန္ဓာကိုယ်က အပြင်လောကဆီ ဦးတည်နေတဲ့ ဒီလျှို့ဝှက်လမ်းကြောင်းကို ပြင်ဆင်ထားလိမ့်မယ်လို့ ငါမမျှော်လင့်ထားခဲ့ဘူး ”

“ ပိုပြီးစိတ်ဝင်စားဖို့ကောင်းတာက… ဒီမရင်းနှီးတဲ့ လောကမှာ ငါနဲ့ အမျိုးအစားတူတဲ့ တာအိုရောင်းရင်းတစ်ယောက် ရှိနေတယ် ”

ရွှီချင်းက တည်ငြိမ်စွာ ပြောသည်။ ထို့နောက် သူက အနောက်လှည့်လိုက်ပြီး သူ့လက်ထဲမှ ဒီလော့ဇီကို ဖမ်းဆုပ်လျက် ပြန်ထွက်သွားသည်။ သူက ကြေးမုံချိပ်တံဆိပ်ကို အတင်းအကျပ် မချိုးဖြတ်ခဲ့ပေ။ အဘယ့်ကြောင့်ဆိုသော် ယင်းက သူ၏ လောက မဟုတ်ပေ။

သို့သော်လည်း ခြေလှမ်းအနည်းငယ် လျှောက်ပြီးနောက် ရွှီချင်း၏ အသံက အပြင်လောကဆီသို့ ပျံ့လွင့်သွားသည်။

“ ငါ့မျိုးရိုးနာမည်က ရွှီ ”

“ ငါ့မျိုးရိုးနာမည်က ဝမ် ”

အသံတစ်သံက ကြေးမုံချိပ်တံဆိပ်၏ အပြင်ဘက်မှ ပဲ့တင်ထပ်လာသည်။