ကြီးမြတ်သောဝေ့တိုင်းပြည်၊ မြို့ဝန်ကျုံးရှင်အိမ်တော်

ချူးယွင်ဖန်းသည် ဤအဆင့်အထိ ကျင့်ကြံပြီးနောက် ကိုယ်ခန္ဓာအဆင့်၏ အရေးကြီးမှုကို နားလည်လာခဲ့သည်။ ယင်းသည် ကျင့်ကြံမှုအားလုံး၏အစပျိုးမှုဖြစ်၍ အခြေခံအုတ်မြစ်၏ အရေးကြီးဆုံးအဆင့်ဖြစ်သည်။ လူအများအပြားသည် နောက်ပိုင်းအဆင့်များတွင် ရုပ်ခန္ဓာကိုယ်၏ ပြုပြင်မွမ်းမံမှုကို သိပ်ဂရုမစိုက်ကြပေ။ ၎င်းတို့သည် မကျင့်ကြံကြခြင်း မဟုတ်ဘဲ အရောင်အဝါများ စုဆောင်းခြင်းနှင့် နတ်အဆင့်သိုင်းပညာ စသည်တို့ကို ပို၍ အာရုံစိုက်ကြပေလိမ့်မည်။

သို့သော် ဤအရာအားလုံးကို တွေ့ကြုံပြီးနောက် ကျင့်ကြံမှုလမ်းစဉ်သည် ရေစီးကြောင်းကို ဆန်တက်နေသည့် လှေတစ်ဆင်းနှင့် ဆင်တူကြောင်း သူ နောက်ဆုံးတွင် နားလည်သွားခဲ့သည်။ ခန္ဓာကိုယ်သည် ပင်လယ်ပြင်ကို ဖြတ်ကူးနေသည့် လှေတစ်စင်းဖြစ်သည်။ ဓမ္မကာရသည် တစ်ဖက်ကမ်းကို ဖြတ်ကူးလိုပါက ခန္ဓာကိုယ်သည် အပြည့်အဝ အားကောင်းရပေလိမ့်မည်။ ပုပ်သိုးမည့် အရေခွံမျှသာဖြစ်လျှင်ပင် ၎င်းသည် ယခုအချိန် စွန့်ပစ်ရမည့်အရာ မဟုတ်သေးပေ။

ယခုအခါလည်း ချူးယွင်ဖန်း၏ ရုပ်ခန္ဓာသည် ပြန်လည်ကောင်းမွန်လုနီးပါးဖြစ်နေပြီဖြစ်သည်။ သူ့တွင် နတ်စွမ်းအင်များမရှိဘူးဟု ထင်မှတ်ရသော်လည်း သူသာ အမှန်တကယ် တိုက်ခိုက်ပါက သူ၏တိုက်ခိုက်ရေးစွမ်းအင်သည် နတ်အဆင့်အထွတ်အထိပ်သို့ နီးကပ်လာပေလိမ့်မည်။ တစ်နှစ်ပတ်လုံးကြာမြင့်ပြီးနောက် သူသည် အသိပညာတချို့ရရှိလာသည်။ သူသည် နတ်ဘုရား၏ နတ်အာရုံဖြင့် အကောက်ကြံခံခဲ့ရသော်လည်း ကံကောင်းထောက်မစွာဖြင့် နောက်ဆုံးအခိုက်အတန့်တွင် ဟင်းလင်းပြင်ပဋိပက္ခထဲသို့ မကျရောက်ခဲ့ဘဲ ဝိညာဉ်နယ်မြေထဲသို့ ကျရောက်လာသည်။

သို့သော် သူသည် တန်စီယုနှင့် လုံးလုံးလျားလျား အဆက်အသွယ်ပြတ်တောက်သွားသည်။ ပြီးခဲ့သောနှစ်တွင် သူသည် ပွင့်လင်းမြင်သာစွာသော်လည်းကောင်း လျှို့ဝှက်စွာသော်လည်းကောင်း စုံစမ်းနေခဲ့သော်လည်း သူမနှင့်ပတ်သက်သည့် သတင်းတစ်စုံတစ်ရာကိုမျှ မကြားသိခဲ့ရပေ။

တန်စီယုသည် ကောင်းကင်အစောင့်အရှောက်ချိပ်ပိတ်ခြင်းဖွဲ့စည်းပုံ၏ အကာအကွယ်ပေးမှု ရှိနေသည့်အတွက် ချူးယွင်ဖန်းနှင့်မတူဘဲ ထိခိုက်ဒဏ်ရာရမှုမျိုးနှင့် ကြုံတွေ့ရမည်မဟုတ်ပေ။ အကယ်၍ တန်စီယုသာ အနီးအနားတွင်ရှိနေပါက၊ သူမ၏ ကျင့်ကြံမှုအရ မည်သည့်သတင်းမျှ မရရှိရန် မဖြစ်နိုင်ပေ။ တစ်ခုတည်းသော ဖြစ်နိုင်ချေမှာ တန်စီယုသည် ပို၍ ဝေးကွာသောနေရာတွင် ရောက်ရှိနေခြင်းဖြစ်ပေလိမ့်မည်၊ သို့သော် ချူးယွင်ဖန်းသည် အလျင်စလိုမဖြစ်မိပေ။

တန်စီယု၏ ကျင့်ကြံမှုသည် ရွှေအမတေအဆင့်နှင့် ခြေလှမ်းတစ်ဝက်သာ ဝေးကွာတော့သောကြောင့် သူမသည် မိမိကိုယ်ကို ကာကွယ်နိုင်သူဖြစ်သည်။ သူ ရရှိထားသော သတင်းများအရ၊ ဤနေရာသည် ဝိညာဉ်နယ်မြေဖြစ်သည်မှာ သေချာသည်။ သို့သော် ယင်းနေရာသည် သမ္မတကြီးပြောခဲ့သည့် နေရာမဟုတ်ဘဲ ကြီးမြတ်သောဝေ့တိုင်းပြည်ဟုခေါ်ဆိုသည့် နေရာမျိုးဖြစ်သည်။ ဝေ့တိုင်းပြည်သည် ကျယ်ပြောလှ၍ ၎င်း၏ နယ်မြေသည် သာမာန်ခေတ်၏ တရုတ်နိုင်ငံအရွယ်အစားထက်ပင် နှစ်ဆမျှ ကြီးမားပေသည်။ လူဦးရေသည်လည်း ဘီလီယံနှင့်ချီ၍ ကိန်းအောင်းလျက်ရှိသည်။

ဤနေရာတွင် သိုင်းပညာ အလွန်ထွန်းကားလှသည်။ သိုင်းပညာ ဖွံ့ဖြိုးတိုးတက်မှုသည် ပြည်ထောင်စုထက် အဆင့်တစ်ဆင့်မျှ မြင့်မား၍ ဤနေရာရှိ ဝိညာဉ်စွမ်းအင်သည်လည်း ခွန်းလွန်နယ်မြေထက် အဆများစွာ ကြွယ်ဝသည်။ ဤတိုင်းပြည်ရှိ လူအများစုသည် မရီးဒျန်သန့်စင်ခြင်း အထွတ်အထိပ်အဆင့်သို့ ရောက်ရှိနေကြသည်။ ၎င်းတို့သည် အနည်းငယ် လေ့ကျင့်ခြင်းဖြင့်၊ မွေးဖွားခြင်းနယ်မြေအဆင့်သို့ ဝင်ရောက်ရန် မခက်ခဲလှပေ။

ကြီးမြတ်သော ဝေ့တိုင်းပြည်တွင် မွေးဖွားခြင်းနယ်မြေအဆင့် ကျွမ်းကျင်သူအရေအတွက်သည် ပြည်ထောင်စုတစ်ခုလုံး စိတ်ကူးနိုင်သည်ထက် ကျော်လွန်နေသည်။ တစ်ချိန်က ပြည်ထောင်စုတွင် မြင့်မြတ်၍ တန်ခိုးကြီးမားခဲ့သော နတ်အဆင့်ကျွမ်းကျင်သူများသည် ဤနေရာတွင် အထူးအဆန်းမဟုတ်ပေ။ ကြီးမြတ်သောဝေ့တိုင်းပြည်တွင် နတ်အဆင့်များ၏ အဆင့်အတန်းသည် ပြည်ထောင်စုရှိ မွေးဖွားခြင်းနယ်မြေအဆင့်ကျွမ်းကျင်သူများ၏ အဆင့်အတန်းနှင့် ညီမျှသည်။ ၎င်းတို့သည် လေးစားခံရသူများဖြစ်သော်လည်း ၎င်းတို့၏အရေအတွက်သည် များပြားပေသည်။

ယေဘူယျအားဖြင့် ထင်ရှားကျော်ကြားသော ပုဂ္ဂိုလ်များအားလုံးသည်လည်း နတ်အဆင့်အထက်တွင် ရှိနေကြသည်။ သို့သော် နတ်အဆင့်ကျွမ်းကျင်သူတစ်ဦးတစ်ယောက်တိုင်းတွင် ကွဲပြားခြားနားမှုများရှိနေဆဲဖြစ်သည်။ သတ္တမမြောက်အဆင့်အောက်ရှိ ကျွမ်းကျင်သူများကို သာမန်ဟုသာ ယူဆနိုင်သော်လည်း သတ္တမမြောက်သို့ ရောက်ရှိလာသည်နှင့် ၎င်းတို့၏အဆင့်အတန်းများ တိုးတက်လာမည်ဖြစ်သည်။

စစ်တပ်ထဲသို့ ဝင်ခဲ့ပါက၊ ချက်ချင်းပင် စစ်ဗိုလ်ချုပ်တစ်ဦး ဖြစ်လာနိုင်သည်။ ဝေ့တိုင်းပြည်အတွက် အကျိုးဆောင်နိုင်မည်ဆိုလျှင် မြို့ဝန် သို့မဟုတ် ဝန်ကြီးကဲ့သို့သော ဘွဲ့ရာထူးမျိုးပင် အပ်နှင်းခံရနိုင်ပေလိမ့်မည်။ သတ္တမမြောက် နတ်အဆင့်အထက် ကျွမ်းကျင်သူများသည် တိုင်းပြည်တစ်ခုလုံး၏ အဆင့်အတန်းမြင့်မားသော အဓိကအင်အားစုများဖြစ်သည်။ နတ်အဆင့်အထွတ်အထိပ်သို့ ရောက်ရှိနေသူများ၏ တာဝန်ထမ်းဆောင်မူသည် အလွန်ရှားပါးသည်။ ကြီးမြတ်သောဝေ့တိုင်းပြည်အတွက် တာဝန်ထမ်းဆောင်ရန် ဆန္ဒရှိနေသရွေ့ ၎င်းတို့သည် မြို့ဝန်သို့မဟုတ် ဝန်ကြီးဘွဲ့ရာထူးမျိုး အပ်နှင်းခံရရန် အချိန်အတိုင်းအတာတစ်ခုသာ လိုအပ်ပေလိမ့်မည်။

ထိုသို့သော လူတစ်ဦး၏ ဖြစ်တည်မှုသည် ကြီးမားသော ခြိမ်းခြောက်နိုင်စွမ်းတစ်ခုဖြစ်သည်။ ၎င်းတို့သည် ဒေသတစ်ခုကို ဖြိုခွင်း၍ ကမ္ဘာကြီးကို တုန်လှုပ်နိုင်သည်အထိပင် သန်မာကြသည်။ နတ်အဆင့်အထွတ်အထိပ် ကျွမ်းကျင်သူများ၏ အထက်တွင် ရွှေအမတေ ခြေလှမ်းတစ်ဝက်အဆင့်များလည်းရှိနေသည်။ အဆိုပါ ကျွမ်းကျင်သူများသည် လွှတ်တော်တွင် လုံလောက်သော အကျိုးပြုမှုများ ပြုလုပ်ပါက၊ မြို့စားဘွဲ့ မျိုး ပေးအပ်ခံရမည်ဖြစ်သည်။ ၎င်းတို့သည် လွှတ်တော်တွင် မပါဝင်ခဲ့ပါက ဂိုဏ်းတစ်ခု တည်ထောင်နိုင်၍ ဒေသတစ်ခု၏ ဘိုးဘေးကြီးများ ဖြစ်လာနိုင်သည်။

ဝေ့တိုင်းပြည်တစ်ခုလုံးသည် ထိုသို့သောပုဂ္ဂိုလ်မျိုးကို သိုင်းပညာ အဆင့်အမြင့်ဆုံး ကျွမ်းကျင်သူဟုခေါ်ကြလေသည်။ ဤပုဂ္ဂိုလ်မျိုးသည် ကြီးမြတ်သောဝေ့တိုင်းပြည်အတွင်း၌ ရှားပါးလှသည်။ တိုင်းပြည်တစ်ခုလုံးတွင် ထိုသို့သောပုဂ္ဂိုလ်မျိုး အများအပြား မရှိကြပေ။ ခွန်းလွန်နယ်မြေရှိ လူအရေအတွက်ကဲ့သို့ မများပြားလှသော်လည်း ဧကရာဇ်လျှင်ပင် ဤပုဂ္ဂိုလ်များကို လေးလေးစားစား ဆက်ဆံရပေလိမ့်မည်။

ရွှေအမတေ ခြေလှမ်းတစ်ဝက်အဆင့်ကျွမ်းကျင်သူများ၏ အထက်တွင်ရှိနေသော ရွှေအမတေအဆင့်ကျွမ်းကျင်သူသည် အင်မော်တယ်များနှင့် ဆင်တူသည်။ အများအားဖြင့်၊ ၎င်းတို့သည် လျှို့ဝှက်ဆန်းကြယ်လွန်းသောကြောင့် ၎င်းတို့နှင့်ပတ်သက်သည့် ကောလာဟလအချို့သာ လူအများကြားတွင် ပျံ့နှံ့နေလေသည်။ လူနည်းစုသည် ၎င်းတို့ကို ကိုယ်တိုင်ပင် မမြင်ဖူးကြပေ။

ဤပုဂ္ဂိုလ်များသည် ကြီးမြတ်သောဝေ့တိုင်းပြည်တွင် ကမ္ဘာမြေပေါ်ရှိ နတ်ဘုရားများကဲ့သို့ပင်ဖြစ်နေသည်။ ၎င်းတို့၏ စကားလုံးများနှင့် လုပ်ဆောင်ချက်များသည် တိုင်းပြည်ရေးမူဝါဒကိုပင် လွှမ်းမိုးချုပ်ကိုင်နိုင်သည်။ ၎င်းတို့သည် မြစ်များနှင့် ပင်လယ်များ လွှမ်းမိုးရန်ပင် အမှန်တကယ် အစွမ်းအစရှိကြသည်။

ဤသည်မှာ သမ္မတကြီး ပြောခဲ့သည့်စကားများနှင့် ကိုက်ညီပေသည်။ ကြီးမြတ်သောဝေ့တိုင်းပြည်သည် သမ္မတကြီး၏ မွေးရပ်မြေမဟုတ်သော်လည်း ယေဘူယျအခြေအနေအရ အလားတူပင်ဖြစ်သည်။ ကြီးမြတ်သော ဝေ့တိုင်းပြည်သည် ဝိညာဉ်နယ်မြေတွင် တည်ရှိသည့် တစ်ခုတည်းသော တိုင်းပြည်မဟုတ်ကြောင်း သိသာထင်ရှားသည်။ သို့သော် ချူးယွင်ဖန်း၏ လက်ရှိအခြေအနေသည် ကြီးမြတ်သောဝေ့တိုင်းပြည်ကို ဖြတ်ကျော်၍ ကျယ်ပြန့်သော အပြင်လောကကို မြင်တွေ့နိုင်ရန် မလုံလောက်ပေ။

သို့သော်လည်း သူသည် လွန်ခဲ့သည့်တစ်နှစ်အတွင်း ဒဏ်ရာများမှ ပြန်လည်သက်သာလာခဲ့သည်။ သူ၏ မရီးဒျန်အချို့ကို ပြုပြင်နိုင်သရွေ့ သူ၏တိုက်ခိုက်ရေးစွမ်းအင်ကို ရွှေအမတေအဆင့် ခြေလှမ်းတစ်ဝက်အထိ ပြန်လည်ရရှိအောင် ပြုလုပ်ခြင်းသည် ပြဿနာမဟုတ်ပေ။ သို့သော် သူသာ ဤအရှိန်နှုန်းဖြင့် ဆက်သွားနေမည်ဆိုပါက သူ့၏ အထွတ်အထိပ်အခြေအနေသို့ ရောက်ရှိရန် နှစ်ပေါင်းများစွာ အချိန်ယူရပေလိမ့်မည်။ ဆေးများဖော်စပ်ခြင်းဖြင့်သာ အတိုတောင်းဆုံးအချိန်အတွင်း ပြန်လည်ကောင်းမွန်လာနိုင်သည်။ ထိုအချိန်သို့ရောက်ရှိလာသောအခါ သူသည် ကမ္ဘာပေါ်ရှိ မည်သည့်နေရာကိုမဆို သွားရောက်နိုင်မည်ဖြစ်သည်။

ခြေသံများက ချူးယွင်ဖန်း၏ အတွေးများကို ဝင်ရောက်နှောင့်ယှက်လိုက်သောအခါ သူ့ပတ်ဝန်းကျင်ရှိ ထူးဆန်းသောဖြစ်စဉ်များ သဲလွန်စမရှိစွာ ချက်ချင်း ပျောက်ကွယ်သွားခဲ့သည်။ ခဏအကြာတွင် အစေခံကဲ့သို့သော မိန်းကလေးငယ်တစ်ဦး ဝင်ရောက်လာ၍ သူ့ကို အရိုအသေပေးလိုက်သည်။

"သခင်လေးဖန်း၊ သခင်မကြီး စီစဉ်ပေးထားတဲ့ စီတုမိသားစုက အကြီးဆုံးသမီးနဲ့ ကြင်ဖက်တွေ့ဖို့အချိန် နီးကပ်နေပါပြီ။ သခင်မကြီးက မိဘအိမ်ကို ပြန်သွားမလည်ခင် သခင်လေးဖန်းကို နောက်မကျဖို့ သေချာ ညွှန်ကြားသွားပါတယ်"

အစေခံမိန်းကလေးသည် စကားပြောနေစဉ် ချူးယွင်ဖန်းကို တိတ်တဆိတ် မော့ကြည့်လိုက်သည်။ ဤသခင်လေးသည် ဆွေမျိုးနီးစပ်မိသားစုများ၏ သခင်လေးများစွာထဲတွင် တစ်နှစ်ကျော်ကြာမျှ တိတ်တဆိတ် နေထိုင်ခဲ့သူဖြစ်၍ လူအများ၏အရှေ့တွင် လုံးလုံးလျားလျားနီပါးပင် မထွက်ပေါ်လာခဲ့ပေ။ သို့သော် သခင်မကြီးသည် သူ့အပေါ်တွင် အကြင်နာဆုံးဖြစ်သည့်အတွက် သူသည် အမွေဆက်ခံသူဖြစ်လာရန် ရေပန်းစားသော ကိုယ်စားလှယ်လောင်းတစ်ဦးဖြစ်ကြောင်း လူတိုင်း သိကြသည်။

သူသည် မည်သည့် စိတ်အားထက်သန်မှုမျှ မပြဘဲ နှိမ့်ချစွာ နေထိုင်နေသော်လည်း မြို့ဝန်ကျုံးရှင်သည် သခင်မကြီး၏ စကားကို အမြဲနားထောင်တတ်သူဖြစ်ကြောင်း လူတိုင်း သိကြသည်။ သခင်မကြီး၏ အကာအကွယ်ဖြင့်၊ မျက်နှာထွက်ပြလေ့ မရှိသော ဤသခင်လေးဖန်းသည် မြို့ဝန်ကျုံးရှင်၏ အမွေဆက်ခံသူဖြစ်လာရန် အခွင့်အလမ်း မြင့်မားလှသည်။

ထိုစကားများကို ကြားသောအခါ ချူးယွင်ဖန်းသည် ရယ်ရမဲ့မဲ့ ငိုရမဲ့မဲ့ဖြစ်စွာ ပြုံးနေလိုက်သည်။ ဤအကြောင်းအရာများကို ပြောရမည်ဆိုလျှင် ၎င်းတို့သည် လွန်ခဲ့သောတစ်နှစ်ခန့်က စတင်ခဲ့ခြင်းဖြစ်သည်။ ထိုအချိန်တွင် ချူးယွင်ဖန်းသည် ဝိညာဉ်နယ်မြေထဲသို့ မတော်တဆ ကျရောက်ခါစဖြစ်သည်။ သူသည် တစ်စုံတစ်ဦး၏ လုပ်ကြံသတ်ဖြတ်မှုကို ခံခဲ့ရသော လူငယ်တစ်ဦးနှင့် တွေ့ဆုံရန် မမျှော်လင့်ထားခဲ့ပေ။ ထိုလူငယ်သည် သူနှင့် ၇၀% မှ ၈၀% အထိ ဆင်တူသည့်အပြင်၊ သူ၏နာမည်သည်လည်း ချူးယွင်ဖန်းဖြစ်သည်။

ထိုမှတစ်ဆင့်သူသည် ထိုလူငယ်အဖြစ် အထင်လွဲမှားခံရကာ မြို့ဝန်ကျုံးရှင်၏ နေအိမ်သို့ ပြန်ကယ်တင်ခံခဲ့ရသည်။ မြို့ဝန်ကျုံးရှင်၏ မူလအမွေဆက်ခံသူသည် လုပ်ကြံသတ်ဖြတ်ခံခဲ့ရသည့်အတွက် သူ့တွင် အခြားသော အမွေဆက်ခံမည့် သားမရှိသောကြောင့် ချူးမိသားစု၏ အကိုင်းအခက်မိသားစုများထံမှ အမွေဆက်ခံသူအသစ်အတွက် ကိုယ်စားလှယ်လောင်းတစ်ဦး ရွေးချယ်ရန်မှတစ်ပါး အခြားရွေးချယ်စရာ မရှိခဲ့ရသည့်အကြောင်းကို ချူးယွင်ဖန်း နားလည်လာခဲ့သည်။ ချူးယွင်ဖန်းသည် မြို့ဝန်ကျုံးရှင်၏နေအိမ်တွင် ယနေ့အထိ ပြန်လည်နာလန်ထူလာနိုင်ရန် ထိုလူငယ်၏ ကိုယ်ရေးရာဇဝင်ကို အသုံးပြုခဲ့သည်။