လှံသိုင်းပညာတစ်မျိုး

ချူးယွင်ဖန်းသည် လှံကိုကိုင်လျက် ကွင်းပြင်သို့ လျှောက်သွားသည်။ ဝှက်ဖဲတစ်ခုအဖြစ် အသုံးပြုရန် ထူးချွန်ပြောင်မြောက်စွာ သင်ကြားပြသပေးမည်လားဆိုသည်ကိုသိချင်သည့် လူတိုင်း၏ မျက်လုံးများက သူ့ကို စောင့်ကြည့်နေကြသည်။

ထို့နောက် ချူးယွင်ဖန်း၏လက်ထဲမှ လှံကို ရုတ်တရက် ထိုးထွက်လာသည်ကို တွေ့လိုက်ရသည်။ အရှိန်က မနည်းလှဘဲ လှံက လေကိုဖြိုခွင်းပစ်လိုက်သည်။ သို့သော်လည်း အားလုံးက နောက်ဆက်တွဲကိုကြည့်ရန် စောင့်ကြည်‌့နေကြစဥ်တွင် ချူးယွင်ဖန်းက လှံကိုဖယ်လိုက်သည်ကို မြင်လိုက်ကြရသည်။

“ဒီတစ်ကွက်ထဲလား”

"ဒါဟာဟာသဖြစ်ရမယ်။ ဒါကြီးက သာမန်ဓားတစ်ချောင်းမှန်းသိသာပါတယ်။ ငါသင်ပြီးရင် ငါတောင်လုပ်နိုင်တယ်”

"ဟာဟားဟား၊ ချူးဟုန်ချိုင်က ချူးယွင်ဖန်းရဲ့ လှည့်စားမှုကို ခံရတော့မှာပဲ"

"ဟားဟားဟား၊ ဒါက ချူးယွင်ဖန်း ပြောတဲ့ဟာလား”

ချူးရှို့ကျဲနှင့် အခြားလူများသည် ချူးယွင်ဖန်း၏သင်ကြားမှုကိုမြင်သောအခါတွင်၊ ၎င်းတို့က သူ့ကို ရယ်မောလိုက်ကြသည်။ ထိုလှံက အလွန်စွမ်းအားကြီးပုံပေါ်သော်လည်း လှံပညာကို တစ်လခန့်သာသင်ယူထားသော ကိုရင်တစ်ပါးပင်လျှင် ထိုသို့သော စွမ်းအင်ဖြင့် ထိုးသွင်းနိုင်လောက်သည်။

ကြည့်ကောင်းတယ်၊ ဒါပေမယ့် ဘာအသုံးဝင်မှာလဲ။

ရန်သူကို တစ်ချက်တည်းနဲ့ အနိုင်ယူဖို့ သုံးလို့ရမှာလား။

ဤသည်က ရိုးရှင်းစွာပင် ဟာသတစ်ခုဖြစ်သည်။ လှံပညာများသည် လှုပ်ရှားမှုများစွာ လိုအပ်နေသေးသည်။ အင်အားကြီးမားစွာ ကွာခြားမှုမရှိပါက၊ ဤကဲ့သို့ ရယ်စရာကောင်းသော လှံနည်းပညာဖြင့် မည်သူမျှ ရှုံးနိမ့်မည်မဟုတ်ပေ။

ဤသည်က ရိုးရှင်းစွာပင် ဟာသတစ်ခုဖြစ်သည်။

ချူးရုန်ယန်က ပြင်းပြင်းထန်ထန် ရယ်မောရင်း သူ့ကျောကို တည့်တည့်ပင် မဆန့်နိုင်တော့ပေ။ ၎င်းသည် ချူးယွင်ဖန်း၏ ဝှက်ဖဲဖြစ်သည်။ ချူးဟုန်ချိုင်အောင်နိုင်စေရန် သူ၏စွမ်းအင်အားလုံးကို ဆုံးရှုံးသွားသည်အထိ ရယ်မောစေမည့် ဟာသများကို အသုံးပြုနေသလားဟုပင် သံသယဖြစ်ဖွယ်ကောင်း၏။

ဤရယ်စရာကောင်းသောအချက်ကြောင့် ချူးဟုန်ချိုင်၏ အနိုင်ရမှုသည် ဟာသတစ်ခုဖြစ်လာသည်။

ချူးယွင်ဖန်း၏ ဆန့်ကျင်ဘက်တွင် ချူးဟုန်ချိုင်၏ မျက်လုံးများသည် အနည်းငယ်မှိန်းနေခဲ့သည်။ ခဏအကြာ၌ သူ့မျက်လုံးများ ကြည်လင်လာပြန်သည်။ ချူးယွင်ဖန်းသင်ပေးခဲ့သော လှည့်ကွက်ကို သူနားလည်ထားပြီဖြစ်သည်။

ချူးယွင်ဖန်းသည် လှံကို ရိုးရိုးရှင်းရှင်း ပစ်လိုက်ပုံရသော်လည်း အမှန်မှာ ထိုအချိန်တွင် ချူးယွင်ဖန်းသည် သူ၏ အစွမ်းထက်သော စိတ်စွမ်းအင်ကို အသုံးပြုပြီး ချူးဟုန်ချိုင်၏ စိတ်ထဲသို့ ဉာဏ်အလင်းပေးသည့်နည်းလမ်းကို အသုံးပြုကာ ဤလှုပ်ရှားမှုကို နားလည်မှုရှိလာစေရန် တွန်းအားပေးခဲ့သည်။

ဤသည်မှာ အလွန်အထင်ကြီးစရာကောင်းသော စွမ်းရည် တစ်နည်းအားဖြင့် ခွန်အားပေးသည့် နည်းလမ်းကောင်းတစ်ခုဖြစ်သည်။ ချူးဟုန်ချိုင်က အလွန်စိတ်လှုပ်ရှားနေသည်။ သူသည် အမြင်ကျဉ်းသူမဟုတ်ပေ။ ဉာဏ်အလင်းပြနည်းသည် ဒဏ္ဍာရီများတွင်သာ ရှိခဲ့သည်။ လူကြိုက်များသော စိတ်ကူးယဉ်ဝတ္ထုများထဲမှ ဇာတ်လမ်းတစ်ပုဒ်လည်းဖြစ်သည်။

အမှန်မှာ၊ ဉာဏ်အလင်းပေးသည့်နည်းလမ်းများသည် ၎င်းတို့လုပ်ဆောင်ခဲ့သော ပုဂ္ဂိုလ်အတွက် အလွန်မြင့်မားသောလိုအပ်ချက်များရှိသည်။ သာမာန်လူများလုပ်နိုင်သည့်အရာမဟုတ်ဟုပင် ပြော၍ရ၏။

မည်သူမဆို လုပ်နိုင်လျှင် လူတိုင်းကျင့်ကြံရန် လိုအပ်တော့မည်မဟုတ်ပေ။ ၎င်းတို့က ကျွမ်းကျင်သူများကို တစ်ယောက်ပြီးတစ်ယောက် အလင်းပြရန်သာ စောင့်မျှော်နေကြပေလိမ့်မည်။

ထို့ပြင် ဤဉာဏ်အလင်းပေးသည့်နည်းလမ်းသည် လူ့ခန္ဓာကိုယ်အတွက် အလွန်အန္တရာယ်ရှိသည်။

ကျွမ်းကျင်သူများပင်လျှင် ဤဉာဏ်အလင်းပြနည်းကို ၎င်းတို့ခန္ဓာကိုယ်အတွက် အလွန်အန္တရာယ်များသောကြောင့် အသုံးပြုခဲသည်။

ထိုလှုပ်ရှားမှုသည် ချူးယွင်ဖန်း၏စိတ်ထဲတွင် လုံးဝပေါက်ကွဲသွားခဲ့သည်။ ချူးဟုန်ချိုင်သည် ဤလှုပ်ရှားမှုကို အမှန်တကယ် ကျင့်ကြံလိုက်သည်နှင့် ၎င်း၏စွမ်းအားသည် အကန့်အသတ်မဲ့ဖြစ်မည်ကို သေချာပေါက် နားလည်နိုင်သည်။

ချူးဟုန်ချိုင်က ရင်ထဲ အလွန်ထိမိသွားရသည်။ အစ်ကိုဖန်းက နောက်ဆုံးအချိန်က သူ့ကို ကယ်တင်ခဲ့ရုံသာမက ယခုလည်း သူ့အတွက် အလွန်အန္တရာယ်များသော နည်းလမ်းကိုသင်ကြားပေးခဲ့သည်။ ချူးယွင်ဖန်းက ပြန်ပေးလာသည့် လှံကို သူဆုပ်ကိုင်လိုက်သည်။

သူအနိုင်ရရမည်၊ သို့မဟုတ်ပါက ချူးယွင်ဖန်းကို အားလုံးက အထင်သေးသွားကြပေလိမ့်မည်။

သို့သော် ချူးယွင်ဖန်းအတွက်၊ ဤဉာဏ်အလင်းပေးနည်းသည် သူ့ခန္ဓာကိုယ်ကို မထိခိုက်စေကြောင်း သူမသိပေ။ သာမာန်လူများအတွက် မှန်ကန်သောနည်းလမ်းမရှိသောကြောင့် ၎င်းတို့၏ခန္ဓာကိုယ်ကို ထိခိုက်စေသည်မှန်သော်လည်း ချူးယွင်ဖန်းသည် ဧကရာဇ်တိုက်ပွဲစာအုပ်၌ ဉာဏ်အလင်းပေးသည့်နည်းလမ်းတစ်ခုထက်မကရှိကြောင်း တွေ့ရှိခဲ့သည်။ မတူညီသော ဂိုဏ်းများနှင့် မျိုးနွယ်စုများမှ နည်းလမ်းမျိုးစုံရှိသည်ဖြစ်ရာ ၎င်းတို့အားလုံးသည် ကွဲပြားခြားနား၍ လက်ရာမြောက်သည်။

၎င်းသည် သူ၏ စိတ်စွမ်းအင်ကို များစွာသုံးစွဲသော်လည်း နတ်ဘုရာစိတ်ဝိဉာဥ်ဖြင့်မူ အသုံးပြုရန် ပိုမိုလွယ်ကူသည်။ အဆိုပါနည်းပညာကို ချူးဟုန်ချိုင်၏စိတ်ထဲသို့ တစ်ကြိမ်တည်းထည့်သွင်းနိုင်သည်။

ချူးယွင်ဖန်းလည်း လျှို့ဝှက်စွာ အံ့အားသင့်သွားသည်။ အကယ်၍ သူသည် ပုံမှန်အခြေအနေတွင်ရှိနေပါက၊ ဤဉာဏ်အလင်းပြနည်းကို အသုံးပြုရန် လွယ်ကူမည်မဟုတ်ပေ။ သို့သော် နတ်ဘုရားစိတ်ဝိဉာဥ်၏ ပူးပေါင်းဆောင်ရွက်မှုဖြင့် အရာအားလုံးသည် ပိုမိုရိုးရှင်းပါသည်။

တကယ်တမ်းတွင် သူ့စွမ်းအင်ကိုများများစားစားအသုံးမပြုပေ။

"ဒါဆို လုံလောက်ပါပြီ။ မင်း အခုပဲ သွားလို့ရပြီ"

ချူးယွင်ဖန်းက ချူးရှို့ကျဲအဖွဲ့၏ လှောင်ပြောင်မှုကို လျစ်လျူရှုကာ ရယ်မောရင်း ပြောသည်။

“ကောင်းပြီ” ချူးဟုန်ချိုင်က ခေါင်းညိတ်ပြပြီး ချူးရုန်ယန်ဘက်လှည့်လိုက်၏။

"ချူးရုန်ယန်လာ၊ မင်းရဲ့ ကြွက်သားနဲ့ အရိုးတွေကို ဖြေလျော့ပေးမယ်။"

"မင်းကများ" ချူးရုန်ယန်က သူ့နောက်ကျောကို တည့်တည့်မတ်မတ်ပြန်ရပ်၍ ပြောလိုက်သည်။

၎င်းတို့နှစ်ဦးက ပျံလွှားကဲ့သို့ ပေါ့ပါးစွာဖြင့် အဝေးမှ မျက်နှာချင်းဆိုင်လိုက်ကြသည်။ ၎င်းတို့ခန္ဓာကိုယ်ထဲမှ ချီစွမ်းအင်များထွက်လာသောအခါ နှစ်ဦးလုံးသည် မွေးဖွားခြင်းနယ်မြေအဆင့်တွင်ရှိကြသော်ကြောင့် ၎င်းတို့၏ ချီစွမ်းအင်ကလည်း အလွန် အံ့ဖွယ်ကောင်းသည်။

ဝိညာဉ်နယ်မြေတွင် မွေးဖွားခြင်းနယ်မြေအဆင့် ကျွမ်းကျင်သူများစွာရှိသော်လည်း လူတိုင်းက မွေးဖွားခြင်းနယ်မြေအဆင့် ကျွမ်းကျင်သူများမဟုတ်တကြပေ။ သာမန်လူများသည် အဆင့်မြင့်အဆင့်အထက်တွင်သာရှိကြသည်။ သာမန်လူများကြားတွင်ပင် မွေးဖွားခြင်းနယ်မြေအဆင့် ကျွမ်းကျင်သူများက ထူးချွန်ကြသည်။

ထိုကဲ့သို့သော မွေးဖွားခြင်းနယ်မြေအဆင့်လူငယ်များကိုမဆိုပေနှင့်။

မြို့စားကျုံးရှင်၏အိမ်သူအိမ်သားအများအပြားသည် သခင်ငယ်နှစ်ဦးကြား ရန်ပွဲအား စိတ်လှုပ်ရှားစွာ စောင့်ကြည့်နေကြသည်။

"ချူးရုန်ယန်" ချူးဟုန်ချိုင်၏လှံသည် ချက်ခြင်းဆိုသလိုပင် ချူးရုန်ယန်၏ ဦးတည်ရာဆီသို့ ပြေးသွားခဲ့သည်။

တစ်ဖက်တွင် ချူးရုန်ယန်သည် အေးစက်စွာ ရယ်မောလျက် နောက်ကျောမှ ဓားသွားနှစ်ချောင်းကို ဆွဲထုတ်လိုက်သည်။ ထို့နောက် သူသည် ချူးဟုန်ချိုင်နှင့် စတင်တိုက်ခိုက်ခဲ့သည်။

ဘမ်း ဘမ်း ဘမ်း

မွေးဖွားခြင်းနယ်မြေအဆင့်နှစ်ဦး အပြန်အလှန်ထိုးနှက်ကြသောအခါ တိုက်ခိုက်မှုတိုင်းက လေထုထဲတွင် ပေါက်ကွဲနေသည့် ဒုံးကျည်တစ်ခုကဲ့သို့ အလွန်ကြောက်မက်ဖွယ်ကောင်းသည်။

သို့သော် ချူးဟုန်ချိုင်သည် ချူးရုန်ယန်၏ပွဲမဟုတ်ကြောင်း လူတိုင်းသဘောပေါက်ရန် အချိန်ကြာကြာမပေးခဲ့ပေ။ ချူးဟုန်ချိုင်နှင့် ချူးရုန်ယန်သည် ခွန်အားနှင့်ပတ်သက်ပြီး အချင်းချင်းတန်းတူဖြစ်ကြောင်း အပြင်ထွက်ကောလဟာလများကဆိုသည်။ ချူးရုန်ယန်၏ ခွန်အားသည် ချူးဟုန်ချိုင်ထက် မြင့်မားသော အဆင့်တစ်ခုထက် သိသိသာသာ ပိုများနေသည်။

တိုက်ပွဲစတင်သည်နှင့် တပြိုင်နက် ချူးဟုန်ချိုင်သည် အင်အားနည်းနေပြီဖြစ်သည်။ သူ၏လှံကို လုံးလုံးလျားလျား ဖြိုခွဲခံလိုက်ရကာ ချူးရုန်ယန်၏ဓားနှစ်ချောင်းက ကြီးစိုးသွားသည်။

လှံသည် အဓိကတိုက်ခိုက်မှုဖြစ်သည်၊ သို့သော် ၎င်း၏လှုပ်ရှားမှုများသည် အထိန်းအကွပ်မရှိပေ။ ခံစစ်ပိုင်းတွင်မူ အနည်းငယ် အားနည်း၏။ ခံစစ်ကို တိုက်စစ်ဖြင့် အစားထိုးခြင်းသည် လှံနည်းပညာ၏ အနှစ်သာရဖြစ်သည်။ ချူးဟုန်ချိုင်ဖိနှိပ်ခံရပြီးနောက်တွင် သူ၏ သိုင်းကွက်များမှ ထက်ဝက်ခန့်ကိုသာအသုံးပြုနိုင်သည်။ ဤသည်မှာ ကြောက်စရာအကောင်းဆုံးအပိုင်းဖြစ်သည်။ သူ၏ ခွန်အားသည် ချူးရုန်ယန်ထက် ညံ့ဖျင်းနေသည်ကိုတွေးကာ အတန်ငယ်စိတ်မကောင်းဖြစ်မိသည်။

ချူးဟုန်ချိုင်သည် ယခင်က ချူးယွင်ဖန်းပြောခဲ့သည့်စကားက အဓိပ္ပါယ်ရှိကြောင်း ယခုမသာ သဘောပေါက်သွားခဲ့သည်။ အစ်ကိုဖန်းက သူ့ကိုကူညီရန် ကြိုးစားနေသည်ဟု ထင်ခဲ့ခြင်းဖြစ်ရာ ယခုမူ အစ်ကိုဖန်းက တစ်စုံတစ်ခုကို ရှာဖွေတွေ့ရှိခဲ့ခြင်းဖြစ်ကြောင်း သူသဘောပေါက်နားလည်သွားသည်။

"ငရဲကိုသွား” ချူးရုန်ယန်က သူ့ဓားနှစ်ချောင်းကို ခုတ်လှဲရင်း ရယ်မောလိုက်သည်။

"ဘယ်လို တလွဲအကွက်တွေလဲ။ ဟာသပဲ။ မင်းက ဘယ်လိုလုပ်လုပ် ရှုံးမှာပဲကွ”

ချူးရုန်ယန်များများတိုက်လေလေ၊ သူပို၍ ဂရုမစိုက်လေလေဖြစ်သည်။ ချူးဟုန်ချိုင်ကိုအနိုင်ယူပြီးနောက် ချူးယွင်ဖန်းနှင့် ပြဿနာရှာရန် စီစဉ်ခဲ့ထားကာ သခင်ငယ်ကျဲကို စော်ကားခြင်း၏ အကျိုးဆက်များကို သင်ပေးမည်ဟုတွေးထားသည်။

ဤအခိုက်အတန့်တွင် ချောင်ပိတ်တိုက်ခိုက်နေရပြီဖြစ်သော ချူးဟုန်ချိုင်သည် ဆုံးဖြတ်ချက်များပြည့်နေသော မျက်လုံးများဖြင့် ရုတ်တရက် ကျယ်လောင်စွာအော်လိုက်သည်။

“တိမ်ဖြိုခွင်းခြင်း”