တောင်းပန်ပါတယ်၊ ခြင်တွေရှိနေလို့

ချန်ယင်းယင်း၏ ဧည့်ခန်းထဲမှ အခြေအနေမှာ အလွန်ပင် ထူးဆန်းနေသည်ဟု ဆိုရပေမည်။ ချန်ယင်းယင်း၊ ချန်ရွှယ့်နှင့် ရဲဖန်တို့အားလုံး တိတ်ဆိတ်နေကြပြီး ရဲရှင်းဟွေ့တစ်ဦးတည်းသာ အရာအားလုံးကို အလွန်စိတ်ဝင်တစားဖြင့် ကြည့်ရှုနေ၏။

ချန်ရွှယ့်သည် ရဲဖန်ကို ဒေါသနှင့် နာကျင်ဝမ်းနည်းမှုတို့ ရောနှောနေသော အကြည့်ဖြင့်ကြည့်နေပြီး ချန်ယင်းယင်းမှာမူ ရဲဖန်ကို စိတ်ပျက်ခြင်းနှင့် မျှော်လင့်ချက်ကင်းမဲ့ခြင်းတို့ဖြင့် ကြည့်နေသည်။ ရဲဖန်မှာမူ ချန်ယင်းယင်းကို ကြောင်တောင်တောင်အမူအရာဖြင့် ကြည့်နေသည်။ ဤအခိုက်အတန့်တွင် ရဲဖန်သည် အမှန်တကယ်ပင် အလွန်နားမလည်နိုင် ဖြစ်နေ၏။

သူနှင့် ချန်ယင်းယင်းတို့၏ ခံစားချက်များ၏ နက်ရှိုင်းမှုအရ သူတို့အချင်းချင်း လုံလောက်သောယုံကြည်မှုရှိသင့်သည်ဟု သူခံစားမိသော်လည်း သူမမျှော်လင့်ခဲ့မိသည်မှာ ယခုလောက်ထိ အခြေအနေကိုပင်။

အကယ်၍ ရဲရှင်းဟွေ့သာ သူ၏ဦးလေး ဘာတွေစဉ်းစားနေသည်ကို သိခဲ့လျှင် သူသည် "ဒါက ဇာတ်လိုက်အရှိန်အဝါ ဒါမှမဟုတ် စကြဝဠာရဲ့ ဆန္ဒကြောင့်ပဲ။" ဟု သေချာပေါက် တန်ပြန်ပြောဆိုလိမ့်မည်။

"မင်းသာ အမျိုးမျိုးသော ပြဿနာတွေကနေ လွတ်မြောက်ချင်ရင် မင်းရဲ့ ဇာတ်လိုက်အဆင့်အတန်းကို စွန့်လွှတ်ရမယ်။"

ဇာတ်လိုက်အဆင့်အတန်းမှ မည်သို့လွတ်မြောက်နိုင်မည်နည်။ ရဲရှင်းဟွေ့သည်လည်း သိလို၏။ သူသာ ဇာတ်လိုက်အဆင့်အတန်းမှ မည်သို့လွတ်မြောက်နိုင်သည်ကို သိခဲ့လျှင် သူသည် သူ့ကိုယ်သူအတွက် ဇာတ်လိုက်အဆင့်အတန်းကို မည်သို့ရယူနိုင်သည်ကိုလည်း သိသင့်သည်။

ဇာတ်လိုက်အရှိန်အဝါနှင့်ဆိုလျှင် အားနည်းဟန်ဆောင်၍ မျက်နှာရိုက်ခြင်း၊ လှပသောမိန်းကလေးများ တံခါးဝသို့ရောက်လာခြင်းနှင့် ဝက်အဖြစ်ဟန်ဆောင်၍ ကျားကိုစားခြင်းကဲ့သို့သော ဇာတ်လမ်းဇာတ်ကွက်အားလုံးသည် သူ့အလိုလို လိုက်ပါလာမည်ဖြစ်၏။

ထိုစဉ်က ရဲရှင်းဟွေ့သည် စျေးပေါသောအဝတ်အစားများဝတ်ဆင်ကာ ပြိုင်ကားတစ်စီးဝယ်ရန် 4S ဆိုင်သို့ သွားခဲ့သည်။ ရဲရှင်းဟွေ့သည် မူလက အားနည်းဟန်ဆောင်၍ မျက်နှာရိုက်ခြင်းနှင့် ဝက်အဖြစ်ဟန်ဆောင်၍ ကျားကိုစားခြင်း မြင်ကွင်းတစ်ခုကို ဖန်တီးမည်ဟု တွေးထင်ခဲ့သော်လည်း မမျှော်လင့်ဘဲ သူပြိုင်ကားတစ်စီးဝယ်လိုသည်ဟု ပြောသောအခါ အရောင်းဝန်ထမ်းများသည် အလွန်အကျွံ စိတ်အားထက်သန်နေခဲ့ကြသည်။ ထိုအချိန်က ရဲရှင်းဟွေ့သည် ငွေပေးချေချိန်ကို တမင်ပင် နှောင့်နှေးခဲ့သော်လည်း ထိုသို့ဖြစ်နေသည့်တိုင် မည်သည့်အရောင်းဝန်ထမ်းကမှ သူ့ကိုလှောင်ပြောင်ရန် ထွက်မလာခဲ့ပေ။

ထိုအစား သူတို့သည် လက်ဖက်ရည်ငှဲ့ပေးခြင်းနှင့် နွေးထွေးမှုပေးခြင်းကဲ့သို့သော အမျိုးမျိုးသော ဝန်ဆောင်မှုများကို ပေးခဲ့ကြ၏။

ထိုအခိုက်အတန့်မှစ၍ ရဲရှင်းဟွေ့သည် သူ့တွင် ဇာတ်လိုက်အရှိန်အဝါမရှိကြောင်း သိရှိခဲ့သည်။ သူသာ ဇာတ်လိုက်အရှိန်အဝါရှိခဲ့ပါက သူသည် အမျိုးမျိုးသော မျက်နှာကြီးသော အရောင်းဝန်ထမ်းများ၏ အဆုံးမရှိလှောင်ပြောင်ခြင်းကို ခံခဲ့ရမည်ဖြစ်ပြီး မိန်းကလေးတစ်ဦးနှင့်အတူရှိသော သူဌေးသားတစ်ဦးသည်လည်း ကားဝယ်ရန်ရောက်လာကာ ရဲရှင်းဟွေ့၏ ဆင်းရဲသောဝတ်စားဆင်ယင်မှုကိုမြင်သောအခါ သူ့ကိုလည်း လှောင်ပြောင်လိမ့်မည်ဖြစ်သည်။

လူတိုင်းသည် အလားအလာမရှိသော ဤဖောက်သည် ရဲရှင်းဟွေ့ကို ဝန်ဆောင်မှုပေးရန် ငြင်းဆန်ကြမည်ဖြစ်ပြီး ထို့နောက် အလှဆုံး၊ နူးညံ့ပြီး စီနီယာများ၏ မကြာခဏအနိုင်ကျင့်ခြင်းခံရသော လှပသောအရောင်းဝန်ထမ်းတစ်ဦးက လွှဲပြောင်းယူရန် ရောက်ရှိလာမည်ဖြစ်သည်။

နောက်ဆုံးတွင် ရဲရှင်းဟွေ့သည် သူ၏ကတ်ကို ပွတ်ဆွဲကာ ကားကိုမောင်းထွက်သွားမည်ဖြစ်ပြီး လူတိုင်းက ကြောင်တောင်တောင်ဖြင့် ကြည့်ရှုနေစဉ်တွင် ဤမျက်နှာကြီးခြင်းမရှိသော လှပသောအရောင်းဝန်ထမ်းသည် သူ့အပေါ် ကြီးစွာသောနှစ်သက်မှု ဖြစ်ပေါ်လာမည်ဖြစ်သည်။

သို့သော် ဤအရာအားလုံးမှာ ရဲရှင်းဟွေ့၏ စိတ်ကူးယဉ်မှုသာ။ မျက်နှာကြီးသူများမရှိ၊ လှပသောအရောင်းဝန်ထမ်းများမရှိ၊ အားနည်းဟန်ဆောင်၍ မျက်နှာရိုက်ခြင်းမရှိ၊ ရဲရှင်းဟွေ့သည် ကားကို ချောချောမွေ့မွေ့ပင် မောင်းထွက်သွားခဲ့သည်။

ဤသည်မှာ ဇာတ်လိုက်အရှိန်အဝါမရှိခြင်း၏ ပြဿနာပင်။ သူသည် မည်သည့်နေရာတွင်မှ အားနည်းဟန်ပင်မဆောင်နိုင်ဘဲ သူ၏အစ်ကိုကြီး သို့မဟုတ် ဦးလေး၏ဘေးတွင်သာ နေ၍ ထိုခံစားချက်ကို ခံစားနိုင်၏။

ဧည့်ခန်းထဲတွင် ရဲဖန်သည် ချန်ယင်းယင်းကိုကြည့်ကာ သူ၏မူလနူးညံ့သောလေသံသည် အနည်းငယ်အေးစက်လာပြီး

"ယင်းယင်း၊ ကိုယ်က ဒီလိုလူစားမျိုးလို့ မင်းတကယ်ထင်နေတာလား။"

ရဲဖန်၏ အမူအရာကိုမြင်သောအခါ ချန်ယင်းယင်းသည်လည်း တုံ့ဆိုင်းသွား၏။ သူမ သူ့ကိုရိုက်လိုက်သည့်အခိုက်အတန့်တွင် သူမသည် နောင်တရသွားခဲ့သည်။

ချန်ယင်းယင်း တောင်းပန်တော့မည်အပြုတွင် ဒေါသထွက်နေသော ချန်ရွှယ့်က ထပ်မံပြောဆိုလိုက်သည်။

"ရဲဖန်၊ ထွက်သွား။ နင်က အစ်မယင်းယင်းနားမှာ နေဖို့မထိုက်တန်ဘူး၊ ဒီလူယုတ်မာ။"

"ငါ အစ်မယင်းယင်းကို နင်မကောင်းဘူးလို့ အစကတည်းက ပြောခဲ့တယ်၊ အခုတော့ နင့်ရဲ့ပင်ကိုယ်သဘာဝကို နောက်ဆုံးတော့ ဖော်ထုတ်ပြလိုက်ပြီ။"

"မနက်ဖြန်၊ ငါ ဒီအကြောင်းကို ငါ့အဖေနဲ့ သူတို့ကိုပြောမယ်၊ ငါနင့်ကို ချန်မိသားစုကနေ ထွက်သွားအောင် သေချာပေါက်လုပ်မယ်။"

ချန်ရွှယ့်၏ စွပ်စွဲမှုများနှင့် ကျိန်ဆဲမှုများကို နားထောင်ရင်း ရဲဖန်သည် မလှုပ်မယှက်ဘဲ ချန်ယင်းယင်းကိုသာ ကြည့်နေဆဲဖြစ်သည်။ ယခု အကယ်၍ ချန်ယင်းယင်းသာ "ရှင်သွားသင့်တယ်။" ကဲ့သို့သော စကားကိုပြောမည်ဆိုပါက ရဲဖန်သည် မဆိုင်းမတွ ထွက်ခွာသွားမည်မှာ သေချာသည်။

ရဲဖန်သည် မလှုပ်မယှက်နေသော်လည်း ရဲရှင်းဟွေ့သည် မျက်မှောင်ကြုတ်ကာ ချန်ရွှယ့်ကို ကြည့်လိုက်၏။ ဤသည်ကိုမြင်သောအခါ ချန်ရွှယ့်သည် ရဲရှင်းဟွေ့ကို အနည်းငယ်မကျေမနပ်ဖြစ်ဟန်ဖြင့် ကြည့်ကာ

"နင်က......"

ချန်ရွှယ့် သူမ၏စကားမဆုံးမီမှာပင် "ဖြောင်း" ဟူသော အသံကျယ်တစ်ခုနှင့်အတူ ချန်ရွှယ့်သည် ရဲရှင်းဟွေ့၏ ရိုက်ချက်ဖြင့် အနီးအနားရှိ ဆိုဖာပေါ်သို့ လဲကျသွားသည်။ ချန်ရွှယ့်သည် သူမ၏ နီရဲနေပြီဖြစ်သော မျက်နှာကိုအုပ်ကိုင်ကာ လုံးဝမယုံကြည်နိုင်သော အကြည့်ဖြင့်ကြည့်နေ၏။

ရဲဖန်နှင့် ချန်ယင်းယင်းတို့မှာလည်း ရဲရှင်းဟွေ့ကို အနည်းငယ်နားမလည်နိုင်စွာဖြင့် ကြည့်နေကြသည်။

"နင်... နင်...."

ချန်ရွှယ့် စကားပြောသောအခါ သူမ၏ပါးစပ်သည် အနည်းငယ်ရွဲ့နေပြီး ထိုမျှသာမက သူမ၏စကားမဆုံးမီမှာပင် သွားနှစ်ချောင်းသည် သူမ၏ပါးစပ်ထဲမှ ထွက်ကျလာသည်။

ဤအခိုက်အတန့်တွင် ချန်ယင်းယင်းသည်လည်း သတိပြန်ဝင်လာ၏။

"ရှင်းဟွေ့၊ မင်းက ဘာလို့ ရှောင်ရွှယ့်ကို ရိုက်ရတာလဲ။"

ဤသည်ကိုကြားသောအခါ ရဲရှင်းဟွေ့သည် သူ အနေရခက်စွာခေါင်းကုတ်လိုက်ပြီးနောက် ရှက်ကိုးရှက်ကန်းရယ်မောကာ

"အဲ... ကျွန်တော် ခုနက အစ်မချန်ရွှယ့်ရဲ့ မျက်နှာပေါ်မှာ ခြင်တစ်ကောင်တွေ့လိုက်လို့၊ အမှတ်မထင် သတ်လိုက်ချင်စိတ်ပေါက်သွားတာ။ အဲ့ဒါနဲ့..."

ချန်ရွှယ့်: .......

ချန်ယင်းယင်း: .......

ရဲဖန်: .......

ဤအခိုက်အတန့်တွင် သူတို့သုံးဦးစလုံး၏ စိတ်ထဲတွင် အတွေးတစ်ခုတည်းသာရှိသည်။

"မင်းက ဒီထက်ပိုကောင်းတဲ့ ဆင်ခြေတစ်ခု ရှာမရတော့ဘူးလား။"

"အား..."

ချန်ရွှယ့်သည် ခဏတာ အရူးတစ်ယောက်ကဲ့သို့ အော်ဟစ်ပြီးနောက် ရဲရှင်းဟွေ့ထံသို့ သူနှင့်အတူသေဆုံးရန်ကဲ့သို့ အဆင်ခြင်မဲ့စွာ ပြေးဝင်သွားသည်။ ဤသည်ကိုမြင်သောအခါ ရဲရှင်းဟွေ့သည် လျင်မြန်စွာ ခြေလှမ်းနှစ်လှမ်းနောက်ဆုတ်လိုက်ရာ ချန်ရွှယ့် လွဲချော်သွား၏။

"ခဏနေဦး။ ကျွန်တော့်ဆီမှာ ဒီကိစ္စနဲ့ပတ်သက်ပြီး အရေးကြီးတဲ့ သက်သေရှိတယ်..."

ရဲရှင်းဟွေ့၏ စကားကြောင့် မြင်ကွင်းသည် ချက်ချင်းတိတ်ဆိတ်သွားသည်။

"ဟေး၊ ရှင်းဟွေ့။ မင်း နောက်တစ်ခါ ပြဿနာရှာနေပြန်ပြီလား။"

ရဲဖန်သည် မျက်လုံးများကိုကျဉ်းမြောင်းကာ ရဲရှင်းဟွေ့ကိုကြည့်လိုက်ပြီး သူ၏လေသံမှာ အလွန်မရင်းနှီးပေ၊ သူ့စိတ်ထဲတွင်မူ "အချိန်ရရင် သူ့ကို ကောင်းကောင်းသင်ခန်းစာပေးဖို့ လိုပုံပဲ၊ ပြဿနာရှာခြင်းရဲ့ အကျိုးဆက်ကို သိသွားအောင်လို့။" ဟု တွေးနေခဲ့သည်။

"ဦးလေး၊ ကျွန်တော် ပြဿနာရှာနေတာမဟုတ်ဘူး။ ဒီမှာက ဖိအားက အရမ်းများနေပြီး ဦးလေးက ကျွန်တော့်ကို စကားပြောခွင့်မပေးလို့ပါ။" ရဲရှင်းဟွေ့သည် ပခုံးတွန့်ပြရင်း သူ၏လေသံမှာ အလွန်စိတ်အနှောင့်အယှက်ဖြစ်ဖွယ်ကောင်းနေ၏။

"ကောင်းပြီ၊ မင်းမှာရှိတဲ့ သက်သေကို ထုတ်ပြ။"

ရဲဖန်သည် ရဲရှင်းဟွေ့က ထိုဗီလာတွင် အစောပိုင်းကတပ်ဆင်ထားသော ကင်မရာမှ ဗီဒီယိုမှတ်တမ်းကို ရရှိခဲ့သည်ဟု တွေးထင်ခဲ့သည်။ သို့သော် ရဲရှင်းဟွေ့က သူ၏ဖုန်းကိုထုတ်ကာ မတူညီသောရှုထောင့်များမှ ဗီဒီယိုများကို ဖွင့်ပြသောအခါ သူ၏မျက်နှာတစ်ခုလုံးသည် မည်းမှောင်သွား၏။

ရှုထောင့်များအရ ရဲဖန်သည် ဤသည်မှာ ပြတင်းပေါက်အပြင်ဘက်မှ ရိုက်ကူးထားခြင်းဖြစ်ရမည်ကို သိပြီး လှုပ်ခါနေသောကင်မရာအရ ဤဗီဒီယိုကို မည်သို့ရိုက်ကူးခဲ့သည်ကိုလည်း သူသိသည်။ ၎င်းမှာ အစောပိုင်းက ပြတင်းပေါက်အပြင်ဘက်တွင် ဝဲပျံနေသော ကျီးကန်းပင်ဖြစ်သည်။

ရဲဖန်က ချန်ရွှယ့်ကိုကယ်တင်စဉ်က သူသည် ပြတင်းပေါက်အပြင်ဘက်ရှိ ဤအနက်ရောင်ကျီးကန်းကို သတိပြုမိပြီးဖြစ်၏။ သို့သော် ရဲရှင်းဟွေ့၏ အိမ်မွေးတိရစ္ဆာန်မှာ အဖြူရောင်ကျီးကန်းဖြစ်သည်ဟု တွေးထင်ကာ သူသည် ဤအနက်ရောင်ကျီးကန်းငယ်ကို တောရိုင်းကျီးကန်းတစ်ကောင်အဖြစ် ပယ်ချခဲ့သည်။

သူဘယ်တုန်းကမှ မမျှော်လင့်ခဲ့သည်မှာ ဤကျီးကန်းသည်လည်း ရဲရှင်းဟွေ့၏ အိမ်မွေးတိရစ္ဆာန်ဖြစ်နေခြင်းပင်။

"နောက်ဆို ငါ့ပတ်ဝန်းကျင်က ကျီးကန်းတွေကို ပိုပြီးဂရုစိုက်ဖို့ လိုပုံပဲ”

ရဲဖန်သည် သူ့ဘာသာသူ တွေးနေမိသည်။

ချန်ယင်းယင်း ဗီဒီယိုကိုကြည့်ပြီးနောက်တွင် သူမသည် ရဲဖန်ကို တောင်းပန်စိတ်အပြည့်ဖြင့် မျက်နှာဖြင့် ထပ်မံကြည့်လိုက်သည်။ ချန်ရွှယ့်မှာမူ သူမသည် ရဲရှင်းဟွေ့၏ဖုန်းကို လက်ညှိုးထိုးကာ ဒေါသတကြီးဖြင့်

"မဖြစ်နိုင်ဘူး။ ဒီဗီဒီယိုက အတုဖြစ်ရမယ်။"

ဤအခိုက်အတန့်တွင် ချန်ရွှယ့်သည် အကျိုးအကြောင်းမဆင်ခြင်နိုင်သော အခြေအနေတွင်ရှိနေပြီး ရဲဖန်အပေါ် သူမ၏အစွဲကြောင့်သာမက ရဲရှင်းဟွေ့၏ ခုနကရိုက်ချက်ကြောင့်လည်း ဖြစ်သည်။ ဤသည်ကိုမြင်သောအခါ ချန်ယင်းယင်းသည်လည်း သူမ၏ဝမ်းကွဲညီမအပေါ် အနည်းငယ်မကျေမနပ်ဖြစ်မိ၏။ အမှန်တရားများ ပေါ်လွင်နေသည့်တိုင် သူမသည် ရဲဖန်ကို အသရေဖျက်လိုနေဆဲဖြစ်သည်။

ချန်ရွှယ့်ကို လျစ်လျူရှုကာ ချန်ယင်းယင်းသည် ရဲဖန်ထံသို့သွားပြီး အလွန်ရိုးသားသောလေသံဖြင့် တောင်းပန်စပြုသည်။ ထို့နောက် သူမသည် တစ်စုံတစ်ခုကို ရုတ်တရက်သတိရသွားဟန်ဖြင့် အောက်ထပ်သို့ လျင်မြန်စွာပြေးဆင်းသွားပြီး သူမအစောပိုင်းက ပစ်ထုတ်ခဲ့သော လက်ကောက်ကို ပြန်လည်ရှာဖွေလို၏။

"အဲ့ဒီလက်ကောက်က..."

"မလိုတော့ပါဘူး။ လက်ကောက်က အမှိုက်ကားနဲ့ ပါသွားပြီ။"

ရဲရှင်းဟွေ့က သူမကို သတိပေးလိုက်သည်။

××××××××××