နတ်ဆိုးဂူ၏ လျှို့ဝှက်ချက်များ

ကြားလိုက်ရသည့်စကားကြောင့် အားလုံး တုန်လှုပ်သွားပြန်၏။

ထိုအသွင်ပြောင်း ကောင်းကင်ဘုံ နတ်ဆိုးကျောက်ပြားက အမှန်တကယ် ဒူးထောက်ပြီး အကြံဉာဏ်တောင်းခံနေသတဲ့လား ။

လောထျန်းက စောနလေးတင်ပင် သူမဆီမှ ကောင်းကင်ဘုံ နတ်ဆိုးလမ်းစဉ်ကို တောင်းခဲ့သေးပါသည်။

သို့သော် အချိန်အနည်းငယ်လေး အတွင်းမှာပင် အခြေအနေက ပြောင်းပြန် ဖြစ်သွားသတဲ့လား ။

လောထျန်းသည်ပင် ၎င်းကိုကြည့်ကာ အံ့အားသင့်သွားရပါ၏။

" ငါတောင်...  ဘယ်လိုရသွားလဲ မသိပါဘူးဆို ၊ မင်းက ငါပြောတာ မယုံဘူးလား "

လောထျန်း ပြန်ပြောလိုက်သည်။

အမှန်တွင်လည်း သူ လိမ်ပြောနေခြင်း မဟုတ်ပါ ။

လောထျန်းမှာ နတ်ဆိုးခန္ဓာကိုယ်ကို စကျင့်ကြံသည့် အချိန်မှစ၍ ကျင့်စဉ်သုံးခုကိုသာ ကျင့်ကြံခဲ့ပါ၏။

ပထမတစ်ခုမှာ ဟူဒဟူ ပေးခဲ့သော သာမာန် နတ်ဆိုးခန္ဓာကိုယ်ကို ကျင့်ကြံနည်းပင် ။

ဒုတိယတစ်ခုမှာ မြေကမ္ဘာနတ်ဆိုးလမ်းစဉ်ဖြစ်ပြီး..

တတိယတစ်ခုမှာကား ယခု ကောင်းကင်ဘုံနတ်ဆိုးလမ်းစဉ်ပင် ။

ထိုသုံးမျိုးထဲမှ နှစ်မျိုးကိုလည်း သူ နတ်ဆိုးဂူမှသာ ရခဲ့ခြင်း ဖြစ်ပါသည်။

ထိုသို့သော အခြေအနေမျိုးတွင် သူ အခြားသူများအား မည်သို့ သင်ပေးရပါမည်နည်း ။

" ဟင်...  "

မိန်းမငယ်မှာလည်း ခေတ္တမျှ အံ့သြမှင်သက်နေပြီးမှ..

အစောက လောထျန်း ကျင့်ကြံသွားပုံကို ပြန်တွေးကြည့်လိုက်သည်။

အမှန်တွင်လည်း လောထျန်း ကျင့်ကြံသွားခဲ့သည့်နည်းက သူမပေးခဲ့သော ကောင်းကင်ဘုံနတ်ဆိုးလမ်းစဉ်ထဲမှ နည်းပါပင် ။

သို့သော်..  သူက ထိုနည်းကို ကျင့်ကြံရုံဖြင့် မျိုးဆက်တစ်ရာ နတ်ဆိုးဧကရာဇ်တစ်ယောက် မည်သို့ ဖြစ်လာခဲ့ပါသနည်း ။

သူမ မမြင်နိုင်သည့် တစ်စုံတစ်ခု ရှိရပေမည် ။

မိန်းမငယ်က ထိုသို့တွေးပြီး ဆုံးဖြတ်ချက်ချကာ အသက်ပြင်းပြင်းရှိုက်၍ ပြောလိုက်သည်။

" သခင်လေး ၊ ကျွန်မ တောင်းဆိုချင်တာ ရှိပါတယ် "

" ဘာတွေ တောင်းဆိုမလို့လဲ "

လောထျန်း မေးလိုက်၏။

" ကျေးဇူးပြုပြီး ကျွန်မကို သခင်လေးရဲ့ဘေးမှာ နေခွင့်ပြုပါ ။ သခင်လေးက မျိုးဆက်တစ်ရာ နတ်ဆိုးဧကရာဇ် ခန္ဓာကိုယ်ကိုရအောင် ဘယ်လိုကျင့်ကြံလိုက်လဲ ကျွန်မ မသိသေးပေမယ့်..  အချိန်သာပေးရင် အဲ့ဒီလျှို့ဝှက်ချက်ကို ကျွန်မ သေချာပေါက် နားလည်နိုင်မှာပါ "

သူမ ထိုသို့ပြောကာ လောထျန်းအား စိုက်ကြည့်လိုက်သည်။

သို့သော် လောထျန်းက သူမကိုပြန်ကြည့်ပြီး ခေါင်းယမ်း၍ ပြန်ပြော၏။

" ငါ လက်မခံနိုင်ဘူး "

" ဟင်...  ဘာဖြစ်လို့လဲ "

မိန်းမငယ် အံ့အားသင့်သွားရသည်။

လောထျန်းက သူမ၏ တောင်းဆိုမှုကို ငြင်းလာလိမ့်မည်ဟု သူမအမှန်တကယ်ပင် ထင်မထားခဲ့ပါ ။

လောထျန်းက မျက်မှောင်ကြုံ့၍ ထပ်ပြော၏။

" မင်းက အရင်သဘောတူထားတဲ့ အပေးအယူကြောင့်သာ ငါ့ကို ကောင်းကင်ဘုံနတ်ဆိုးလမ်းစဉ် ပေးခဲ့တာလေ ။ အခု သဘောတူထားတာလဲ ပြီးသွားပြီဆိုတော့..  ငါက မင်းကိုဘာလို့ ဆက်ကူညီပေးရမှာလဲ "

အကယ်၍ ထို ကောင်းကင်ဘုံနတ်ဆိုးကျောက်ပြားက အစောတည်းကသာ ပုန်းမနေဘဲ သူ့ကို ကူညီပေးခဲ့ပါက သူသည်လည်း သူမကို ကူညီရန် တုန့်ဆိုင်းနေမည် မဟုတ်ပါချေ။

သူ့အား သာမာန်နတ်ဆိုးခန္ဓာကိုယ် ကျင့်ကြံနည်း ပေးခဲ့သည့် ဟူဒဟူကိုပင် လောထျန်းက မူလနတ်ဆိုးဆေးရည်များ ပြန်ပေးခဲ့သည် မဟုတ်ပါလား ။

ထိုသို့ပေးရခြင်းမှာလည်း ဟူဒဟူက သူ့အား မိတ်ဆွေတစ်ယောက်အဖြစ် စိတ်ရင်းနှင့် ဆက်ဆံခဲ့သောကြောင့်ပင် ။

သို့သော်.. ယခု ကောင်းကင်ဘုံ နတ်ဆိုးကျောက်ပြားနှင့်မူ အပေးအယူတစ်ခုသာ လုပ်ခဲ့ခြင်းဖြစ်ပါသည်။

ထိုစကားကို ကြားသောအခါ မိန်းမငယ် မျက်နှာအနည်းငယ် ပျက်သွားပြီး အသက်ပြင်းပြင်း ရှိုက်လိုက်၏။

" ဒါဆို... ကျွန်မကို ကူညီပေးတဲ့အတွက် ဘာပြန်လိုချင်လဲ "

လောထျန်းက သူမအား စိုက်ကြည့်ကာ ပြောသည်။

" မင်းသာ ငါ့အတွက် လျှို့ဝှက်ဒေသတစ်ခု ဖွင့်ပေးပြီး ငါ့လူတွေရဲ့ ခန္ဓာကိုယ်အစွမ်းကို တိုးတက်အောင် လုပ်ပေးမယ်ဆိုရင် ငါ့ဘက်ကလဲ မင်းကိုကူညီမယ် "

" ဒါက.... "

မိန်းမငယ် အနည်းငယ် တွန့်ဆုတ်သွားပါသည်။

ထိုစဥ် လောထျန်းက စကားဆက်၏။

" ပြီးတော့ မင်းရဲ့ မေးခွန်းတွေကို တစ်လတစ်ကြိမ်ဖြေပေးပြီးတော့ ငါသိတာတွေ အကုန်ပြောပြမယ် "

ထိုစကားကို ကြားသည့်အချိန်တွင်မူ မိန်းမငယ်၏ မျက်လုံးများ အရောင်လက်သွားကြသည်။

" ကောင်းပါပြီ... ကျွန်မ သဘောတူတယ် "

ထိုစဥ် အနီးနားတွင် ရှိနေကြသူများအားလုံးမှာ အံ့သြတုန်လှုပ်ကုန်ကြ၏။

နတ်ဆိုးဂူတွင် နောက်ဆုံးကျန်ရှိနေသည့် နောက်ဆုံးနှင့် အရေးကြီးဆုံးသော ကောင်းကင်ဘုံ နတ်ဆိုးကျောက်ပြားကလည်း လောထျန်းလက်ထဲ ရောက်သွားပြန်သတဲ့လား..

သို့ဆိုလျှင်... နတ်ဆိုးဂူက ဖျက်ဆီးခံရသည်နှင့် ဘာခြားတော့မည်နည်း ။

ထိုတခဏ၌ အားလုံး စကားပင် မဟနိုင်ကြတော့ပါ ။

လောထျန်းမှာမူ တဖက်လူ သဘောတူလာသည်ကိုကြည့်ပြီး ပြုံးသွားပါ၏။

" ကောင်းတယ်.. ခုချိန်ကစပြီးတော့ ငါတို့က မိသားစုတွေ ဖြစ်သွားပြီ ။ ငါ့နာမည်က လောထျန်းပါ.. မင်းနာမည်ကရော "

လောထျန်း မေးလိုက်သည်။

မိန်းမငယ်က အနည်းငယ် မျက်မှောင်ကြုံ့၍ ပြန်ပြော၏။

" ကျွန်မကို မိုယွိလို့ ခေါ်လို့ရပါတယ် "

လောထျန်း ခေါင်းညိတ်လိုက်သည်။

" ကောင်းပါပြီ ။ မိုယွိ.. လောလောဆယ်တော့ ဒီမှာပဲ နားနားနေနေ နေလိုက်ဦး ။ နောက်နာရီနည်းနည်းကြာလို့ နတ်ဆိုးဂူ ပြန်ဖွင့်တဲ့အခါကျရင် ဒီကနေ ထွက်ကြမယ် "

မိုယွိက အံ့အားသင့်သွားဟန်ဖြင့် ပြန်မေးလာသည်။

" ဘာလို့ နာရီနဲ့ချီပြီး ကြာမှာလဲ "

လောထျန်း : " သူတို့ပြောတာတော့ နတ်ဆိုးဂူက နောက်ထပ်နာရီတွေအများကြီး ကြာပြီးမှ ပြန်ဖွင့်မှာဆို ။ အခုက ဘယ်သူမှ အပြင်ထွက်လို့မရဘူးတဲ့ "

မိုယွိ ခေါင်းယမ်းလိုက်၏။

" အဲ့ဒါက ပြဿနာမဟုတ်ပါဘူးရှင် "

သူမ ပြောပြောဆိုဆိုပင် လက်ဖြင့် အစီအမံများ လုပ်လိုက်သည်။

ဝုန်း..

ချက်ချင်းမှာပင်... နတ်ဆိုးဂူ ထွက်ပေါက်ဘက်မှ မြည်သံကျယ်ကြီးတစ်ခု ပေါ်လာ၏။

" တံခါး ပွင့်သွားပြီ "

မိုယွိ ပြောလိုက်သည်။

လောထျန်းမှာ ခဏတာမျှ မှင်သက်နေပြီးမှ သဘောပေါက်သွားပါ၏။

" နတ်ဆိုးဂူ အဖွင့်အပိတ်ကို ထိန်းချုပ်တာ မင်းလား... "

မိုယွိက ခေါင်းညိတ်ပြ၍ ဆိုသည်။

" ဒါပေါ့ရှင်.. သခင်ကြီး ထွက်သွားပြီးကတည်းက ဒီနတ်ဆိုးဂူတစ်ခုလုံး ကျွန်မရဲ့ ထိန်းချုပ်မှုအောက်မှာပဲ ရှိနေတာ "

" မင်းရဲ့ သခင်ကြီးက ဘယ်သူလဲ "

လောထျန်း စိတ်ဝင်တစား ဆက်မေးလိုက်၏။

အခြားသူများလည်း အလွန်သိချင်စိတ် ဖြစ်သွားကာ အဖြေကို စိတ်ဝင်တစား နားထောင်နေကြသည်။

မိုယွိမှာမူ ထိုမေးခွန်းကြောင့် မျက်နှာသိသိသာသာပင် ပျက်သွား၏။

" ကျွန်မရဲ့ သခင်ကြီးက ရှေးဟောင်းနတ်ဆိုးကြီး မရှိတော့တဲ့နောက်မှာ ပထမဆုံးပေါ်လာတဲ့ ကောင်းကင်ဘုံနတ်ဆိုးပဲ "

ထိုအ​ဖြေကြောင့် အားလုံး ပါးစပ်အဟောင်းသား ဖြစ်ကုန်ကြသည်။

ထိုစဥ် သခင်မကြီးချင်းက အေးစက်စက်မေးလာ၏။

" သခင်မကြီး... သခင်မကြီးရဲ့ သခင်ကြီးက ဒီနတ်ဆိုးဂူကြောင့် ကောင်းကင်ဘုံနတ်ဆိုးတစ်ယောက် ဖြစ်လာတယ်ဆိုတာ အမှန်ပဲလား "

မိုယွိ အေးစက်စက် နှာခေါင်းရှုံ့လိုက်သည်။

" အဲ့ဒါ ဒီတိုင်း ကောလဟာလတစ်ခုပဲ ။ ငါ့သခင်ကြီး

က နတ်ဆိုးဂူကြောင့် ကောင်းကင်ဘုံနတ်ဆိုး ဖြစ်လာတာ မဟုတ်ဘူး ။ တကယ်က... သူ ကောင်းကင်ဘုံနတ်ဆိုးတစ်ပါး ဖြစ်လာပြီးမှ နောက်မျိုးဆက်သစ်တွေအတွက် လမ်းပြပေးရအောင်လို့ နတ်ဆိုးဂူကို တည်ထောင်ခဲ့တာ ။ သူက ကောင်းကင်ဘုံနတ်ဆိုးကျောက်ပြားတွေထဲမှာလဲ သူ့ဘဝတလျှောက် သင်ယူခဲ့ရတဲ့ အရာအားလုံးကို ရေးပြီး လူမှန်ကိုတွေ့တာနဲ့ ပေးဖို့စောင့်နေခဲ့တာ "

" ဒါပေမယ့်... နောက်လူတွေက သိပ်မသုံးမကျကြတော့ ကောင်းကင်ဘုံနတ်ဆိုးကျောက်ပြား တစ်ခုလုံးအပြည့်ကိုတောင် ဘယ်သူမှ မရခဲ့ကြဘူး "

ထိုစကားကြောင့် အားလုံး မျက်နှာများ နီသွားကြသည်။

" ဟို.. သခင်မကြီးမိုယွိ ၊ သခင်ကြီးက ခုထိ သက်ရှိထင်ရှား ရှိနေသေးလားဗျ "

တစ်ယောက်က မေး၏။

အားလုံးကလည်း မိုယွိအား စိတ်ဝင်တစား ကြည့်လိုက်ကြပြန်သည်။

သို့သော်... ထိုမေးခွန်းကို ကြားသည်နှင့် မိုယွိ၏ မျက်လုံးထဲတွင် အမုန်းတရား အငွေ့အသက်တို့ ပေါ်လာပါ၏။

" ငါ့ရဲ့ သခင်ကြီးက ဟိုရှေးဟောင်းနတ်ဆိုးကြီးရဲ့ သတ်တာကို ခံခဲ့ရတာ ။ ဒါပေမယ့် သိပ်မကြာခင်မှာ ငါ အဲ့ကောင်ကြီးကို အပိုင်းပိုင်းဖြစ်အောင် ပြန်လုပ်မှာပါ "

မိုယွိ အံကြိတ်ကာ ပြောလိုက်သည်။

အားလုံးမှာ ကြားလိုက်ရသည့်စကားကြောင့် ပါးစပ်အဟောင်းသား ဖြစ်ပြီး တစ်ခွန်းမှလည်း ထပ်မဟရဲတော့ချေ။

နတ်ဆိုးဂူ၏ သခင်ကြီးက ရှေးဟောင်းနတ်ဆိုးကမ္ဘာတွင် အစွမ်းအထက်ဆုံးသော ရှေးဟောင်းနတ်ဆိုးကြီး၏ လက်ချက်ဖြင့် သေသွားရသတဲ့လား.. ။

ထို့ထက်ပို အရေးကြီးသည်မှာ မိုယွိ၏ စကားအတိုင်းဆိုပါက... ထိုရှေးဟောင်းနတ်ဆိုးကြီး အသက်ရှင်နေသေးဟန်ပါပင်..

ထိုကိစ္စသာ အပြင်သို့ သတင်းရောက်သွားပါက သူတို့ ရှေးဟောင်းနတ်ဆိုးကမ္ဘာတစ်ခုလုံး အထက်အောက် ပြောင်းပြန်ပင် ဖြစ်သွားမည်လား မသိပေ ။

သခင်မကြီးချင်းမှာ တစ်ခုခုထပ်မေးရန် ပြင်လိုက်သေးသော်လည်း.. ထိုစဥ်မှာပင် လူများစွာက နတ်ဆိုးဂူ ထွက်ပေါက်နားလေးသို့ ရောက်သွားကြလေပြီ ။

သူတို့ ထွက်ရန် ပြင်လိုက်စဥ်မှာပင်... ရုတ်တရက် အစွမ်းထက်သော အရောင်အဝါတစ်ခုက ထွက်ပေါက်အား လွှမ်းခြုံလာ၏။

နတ်ဆိုးဂူထဲတွင် ရှိနေကြသော လူများထဲမှ အစွမ်းအနည်းငယ် နိမ့်သူများဆိုလျှင် ထိုဖိအားကြောင့် နောက်သို့ လွင့်ထွက်သွားကြတော့သည်။

" ဒါ.... ကမ္ဘာသခင်ကြီးရဲ့ ဖိအားလား "

သခင်မကြီးချင်းက ဦးစွာ အသိဝင်လာကာ နတ်ဆိုးဂူ အပြင်ဘက်သို့ ချက်ချင်း မော့ကြည့်လိုက်သည်။

ထိုစဥ်... . လူရိပ်များစွာပင် လေထဲမှ ဆင်းသက်လာကြပါ၏။

လူအုပ်၏ ရှေ့ဆုံးမှ ဖိအားများကို ထုတ်လွှတ်နေသူမှာကား... ကမ္ဘာသခင်ကြီးပင်...

ထိုစဥ်တွင် ကမ္ဘာသခင်ကြီးက လောထျန်းအား ကြည့်လာသည်။

" ဟားဟား.. အပြင်ကမ္ဘာက သူခိုးကောင် ၊ ဒီ နတ်ဆိုးဂူထဲကို ရအောင်ခိုးဝင်လာနိုင်ခဲ့တဲ့အတွက် ငါ မင်းကိုတော့ ချီးကျူးပါတယ်။ ဒါပေမယ့် မင်းရောက်နေတာကို ငါ သိနေမယ်ဆိုတာတော့ မင်း ထင်မထားဘူးမဟုတ်လား "

ကမ္ဘာသခင်ကြီးက လှောင်ပြုံးဖြင့် ပြောလိုက်သည်။