ဥမင်လိုဏ်ခေါင်း
Vol. 7 Ch. 97
တင်းကျန်းရီ၏ စကားများသည် အခြားသူသုံးဦးကို တုန်လှုပ်သွားစေပြီး ၎င်းတို့၏ မျက်နှာအမူအရာများ ချက်ချင်းပြောင်းလဲသွားသည်။ အခန်းထဲရှိ လေထုသည် လေးလံလာသည်။
သူတို့ မတုံ့ပြန်မီ ရုတ်တရက်၊ လင်းရှန်၏ အသံသည် တုံ့ပြန်ကိရိယာမှတစ်ဆင့် ထွက်ပေါ်လာသည်။
“ငါတို့ လာကယ်မယ်။ GF2 ဥမင်လိုဏ်ခေါင်းရဲ့ ဂိတ်ကို ဖွင့်ပေးပါ”
ထိုစကားများ ထွက်ပေါ်လာသည်နှင့်တစ်ပြိုင်နက်၊ ဓာတ်ခွဲခန်းထဲရှိ လူများသည် ထိုင်ရာမှ ထလာကြပြီး ၎င်းတို့၏ မျက်ဝန်းများတွင် မျှော်လင့်ချက်နှင့် စိတ်လှုပ်ရှားမှုများ ပြည့်နှက်သွားသည်။
“သူတို့ သဘောတူလိုက်ပြီ! ကျွန်မတို့ ကယ်တင်ခံရတော့မယ်”
“…ဒါရိုက်တာတင်းက တစ်ချိန်လုံး မှန်ကန်ခဲ့တာပဲ” ရှုဝမ်က မျက်နှာဖြူဖျော့စွာ ရေရွတ်သည်။
“သူမက နင့်ကို တားလိုက်တာ ကောင်းတယ်၊ မဟုတ်ရင် နင်က အရာအားလုံးကို ဖျက်ဆီးပစ်မိလိမ့်မယ်”
ကျိုးယန်က သူ၏ စိတ်သက်သာရာရမှုကို ဖုံးကွယ်မထားနိုင်ဘဲ ဆူပူလိုက်သည်။
သို့သော် တင်းကျန်းရီ၏ မျက်နှာ၌ ဘာအမူအရာမှ မရှိဘဲ ဆက်လက်တည်ငြိမ်နေသည်။ စကားပြောခြင်းဖြင့် အချိန်ဖြုန်းရန်မလိုပေ။ သူမသည် ချက်ချင်း စနစ်ထဲသို့ ဝင်ရောက်ကာ ဥမင်လိုဏ်ခေါင်းသို့ မြေအောက်လမ်းကြောင်းကို ဖွင့်လိုက်သည်။ တစ်ချိန်တည်းမှာပင်၊ သူမသည် ဆက်သွယ်ရေးကိရိယာထဲသို့ ပြောလိုင်သည်။
“အောက်သို့ဆင်းတဲ့ ဥမင်လိုဏ်ခေါင်းက ၃၁,၆၅၀ မီတာရှည်လျားပြီး၊ ၅၉.၅% နိမ့်လျှောရှိတယ်၊၊ အရန်စွမ်းအင်ထောက်ပံ့မှုက လျှပ်စစ်သံလိုက်ဘရိတ်စနစ်ကို ထောက်ပံ့ရန် မလုံလောက်ဘူး၊၊ ဒါကြောင့် ရှင်တို့က တစ်နာရီကို ၂၀ ကီလိုမီတာအောက် အမြန်နှုန်းထိန်းထားဖို့ လိုအပ်တယ်။ ဘရိတ်အုံတွေ အပူလွန်လာမှာကို ဂရုစိုက်ပါ၊၊ ဥမင်လိုဏ်ခေါင်းထဲက စောင့်ကြည့်အာရုံခံကိရိယာ ၁၂၇ ခုစလုံးမှာ မူမမှန်မှုမရှိကြောင်း ဖော်ပြထားပေမယ့်လည်း၊ မီးဖွင့်ပြီး သတိနဲ့ ဆက်သွားဖို့ အကြံပေးချင်ပါတယ်”
GF2 ဥမင်လိုဏ်ခေါင်းဂိတ်သည် ပွင့်လာသည်နှင့် အနန္တရထားသည် ရှေ့သို့လှုပ်ရှားလာသည်။ လင်းရှန်နှင့် ချန်ဆီရွှမ်သည် ထိန်းချုပ်ခန်းအတွင်း ရပ်ကာ၊ တင်းကျန်းရီ၏ ညွှန်ကြားချက်များကို အာရုံစိုက်နားထောင်နေသည်၊၊
“မင်းက တင်းကျန်းရီလား”
လင်းရှန်က ထိန်းချုပ်ကိရိယာများကို ချိန်ညှိရင်း မေးသည်။
“ဟုတ်ပါတယ်”
“ဒါက အနန္တရထားပါ။ ငါက ရထားခေါင်းဆောင် လင်းရှန်ပါ”
“တွေ့ရတာ ဝမ်းသာပါတယ်၊ မစ္စတာလင်း”
လင်းရှန်သည် အဓိကအချက်ကို တိုက်ရိုက်မေးလိုက်သည်၊၊
“မြေအောက်သတ္တဝါတွေကို ဘယ်နေရာမှာ တွေ့ခဲ့တာလဲ”
“အလွှာ ၁၀၆ မှာ။ အလွှာ ၁၀၀ အောက်က အားလုံးက မပြီးစီးသေးတဲ့ ဆောက်လုပ်ရေးနယ်မြေတွေပါ။ ဓာတ်လှေကား နံပါတ် ၃ က အလွှာ ၉၅ အထိ ရောက်ဖူးတယ်၊ ဒါပေမယ့် အလွှာ ၈၉ အောက်မှာ ဆက်သွယ်မှု ပြတ်တောက်သွားတယ်။ အလွှာ ၆၅ ကုန်စည်ပို့ဆောင်ရေးရထားဂိတ်မှာ ရပ်ထားဖို့ အကြံပြုပါတယ်—အဲဒီကနေ ကုန်စည်ဓာတ်လှေကားကို သုံးပြီး ရှင့်ရထားပေါ်ကို ထောက်ပံ့ရေးပစ္စည်းတွေ တင်နိုင်တယ်”
“နားလည်ပြီ။ အလွှာ ၅၂ က မင်းတို့ရဲ့ တည်နေရာ အတိကျက ဘယ်မှာလဲ”
“F13 နယ်မြေ။ ဓာတ်လှေကားကထွက်ရင် K2 နယ်မြေမှာ ရောက်မယ်၊ အဲဒီမှာ ဖုတ်ကောင်တချို့ ရှိတယ်။ လမ်းကြောင်းအပြင်မှာ ဇုန်မြေပုံတင်ထားတယ်။ ဓာတ်လှေကားကို ရောက်တဲ့အခါ၊ ဗီဒီယိုဖိုင်တစ်ခု ပို့ပေးပြီး လမ်းညွှန်ပေးမယ်။ အကွာအဝေးအနေနဲ့၊ မီတာ ၁,၉၀၀ လောက်ပဲ”
“ကောင်းပြီလေ”
သတင်းအချက်အလက်များသည် ရှင်းလင်းပြီး တိကျသည်။ လင်းရှန်သည် ချန်ဆီရွှမ်အား ထိုင်ရန် အချက်ပြပြီး၊ ရထားကို ဥမင်လိုဏ်ခေါင်းထဲသို့ အရှိန်မြှင့်ကာ မြေအောက်သို့ ဆင်းသွားသည်။
ဂျုံး… ဂျုံး…ကလန်
အနန္တရထားသည် အောက်သို့ ချောမွေ့စွာ ဆင်းသွားပြီး၊ သတ္တုဘီးများသည် ရထားလမ်းများပေါ်တွင် ကျယ်လောင်စွာ မြည်ဟည်းနေသည်။ ရှေ့တွင် ဥမင်လိုဏ်ခေါင်းသည် အမှောင်ထဲသို့ ဆန့်တန်းနေပြီး၊ ရထားရှေ့မီးများကြောင့် လင်းထိန်နေသည်။
ရထားသည် လျင်မြန်စွာ ဆင်းသွားသည်နှင့်အမျှ၊ ရထားပေါ်ရှိလူတိုင်းသည် ၎င်းတို့၏ နားထဲတွင် ဖိအားတက်လာသည်ကို ခံစားရသည်။
“သေချာကိုင်ထားကြ”
လင်းရှန်က အနောက်သို့ လှမ်းအော်လိုက်သည်၊၊
လင်းရှန်သည် ဘရိတ်များကို အဆက်မပြတ် ချိန်ညှိပြီး၊ ရထားသည် လမ်းကြောင်းမှ မချော်ထွက်သွားရန်နှင့် ထိန်းမရဘဲ လည်ပတ်မသွားရန် သေချာအောင်လုပ်နေသည်။
အဝါရောင်အောက်ခံနှင့် ရေးထားသော ဆိုင်းဘုတ်များကို ဖြတ်သန်းသွားသည်။
[အဆင့် ၁၀၊ -၆၅ မီတာ]
[အဆင့် ၃၀၊ -၁၇၅ မီတာ]
[အဆင့် ၅၀၊ -၂၅၅ မီတာ]
[အဆင့် ၆၀၊ -၃၀၁ မီတာ]
ရထားသည် အနက်ရောင်တွင်းနက်ထဲသို့ လှည့်ပတ်ဆင်းသွားပြီး၊ ရိုလာကိုစတာကဲ့သို့ ရွေ့လျားနေသည်။ မြေအောက်ထဲသို့ နက်ရှိုင်းစွာ ဝင်ရောက်လာသည်နှင့်အမျှ၊ စိုစွတ်ပြီး ထိုင်းမှိုင်းသော အနံ့တစ်ခုသည် လေထုထဲတွင် ပြည့်နှက်လာသည်။
နောက်ဆုံးတွင်၊ တဖြည်းဖြည်းချင်း လျှောဆင်းပြီးနောက်၊ ရထားသည် အဆင့် ၆၅ ကုန်စည်ပို့ဆောင်ရေးရထားဂိတ်သို့ ရောက်ရှိလာသည်။
[အဆင့် ၆၅၊ -၃၂၅ မီတာ]
ဝူးးးး—
အနန္တရထား၏ ပူချစ်နေသော ဘီးများသည် အငွေ့များထုတ်လွှတ်ပြီး၊ မှောင်မည်းနေသော ဘူတာတစ်ခုတွင် ရပ်တန့်သွားသည်။
အက်ကွဲနေသော ရထားပြတင်းပေါက်များအပြင်ဘက်တွင်၊ ပျက်စီးနေသော မီးများသည် ဘူတာရုံထဲတွင် ထူးဆန်းသော မီးပွားများကို ဖန်တီးနေသည်။
ချန်ဆီရွှမ်၊ ကီကီနှင့် ရှားရှားတို့သည် ပြတင်းပေါက်တွင် စုဝေးကာ အပြင်သို့ လှမ်းကြည့်နေကြသည်။
ကြီးမားသော ကုန်စည်ဘူတာတစ်ခုသည် ၎င်းတို့ရှေ့တွင် ရှိနေပြီး၊ ကရိန်းများနှင့် သယ်ယူပို့ဆောင်ရေးကြိုးများဖြင့် တပ်ဆင်ထားသည်။ သို့သော် ဤနေရာတွင် ကြောက်မက်ဖွယ်ရာ တစ်ခုခု ဖြစ်ပွားခဲ့သည်—အမဲရောင်သွေးကွက်များသည် နံရံများနှင့် ကြမ်းပြင်များပေါ်တွင် ပက်ဖျန်းနေပြီး၊ ဖျက်ဆီးခံရသော အလောင်းများသည် တင်ဆောင်ရာနေရာတစ်လျှောက် ပြန့်ကျဲနေသည်။
ပိတ်ထားသော မြေအောက်နေရာ၏ ဖိအားများသော လေထုသည် ၎င်းတို့အပေါ် ဖိစီးလာသည်။
မြေမျက်နှာပြင်အောက် ၃၂၅ မီတာတွင်၊ ဤမြို့တွင် သောင်းနှင့်ချီသော ဖုတ်ကောင်များနှင့် အမည်မသိ မြေအောက်သတ္တဝါများရှိနေသည်ကို သိရှိထားခြင်းသည် ၎င်းတို့၏ ကျောရိုးတစ်လျှောက် အေးစိမ့်သွားစေသည်၊၊
ချန်ဆီရွှမ်သည် လင်းရှန်ဘက်သို့ လှည့်ကာ၊ သူမ၏ မျက်နှာသည် စိတ်မသက်မသာဖြစ်နေသည်။
“ဘာအစီစဥ်ရှိလဲ”
“ငါတို့ လူခွဲလိုက်မယ်”
လင်းရှန်သည် ၎င်းတို့အနောက်ရှိ ဥမင်လိုဏ်ခေါင်းကို ညွှန်ပြလိုက်သည်။
“ဒါက ငါတို့ရဲ့ တစ်ခုတည်းသော ထွက်ပေါက်လမ်းကြောင်းပဲ။ တစ်ခုခု ဖြစ်သွားရင်၊ ရထားကို ဆုံးရှုံးရမယ်၊ ဒါဆိုရင် ငါတို့ လက်ဗလာနဲ့ ထွက်တိုက်ရလိမ့်မယ်။ ဒါက ရွေးချယ်စရာ မဟုတ်ဘူး”
“ရှားရှား၊ ဆီရွှမ်—မင်းတို့နှစ်ယောက် နောက်မှာကျန်ပြီး ရထားကို စောင့်ကြည့်ထားကြပါ။ တစ်ခုခုက ငါတို့ရဲ့ ဆုတ်ခွာလမ်းကို ဖြတ်တောက်ဖို့ ကြိုးစားရင်၊ တားဆီးကြ”
“ဒီအချိန်မှာ၊ ကီကီ၊ လို့ဟွာနဲ့ ငါက အလွှာ ၅၂ ကို သွားပြီး သူတို့ကို ကယ်ထုတ်မယ်။ ပြန်ရောက်တဲ့အခါ၊ အခြေအနေကို အကဲဖြတ်ပြီး ဘယ်နယ်မြေတွေကို ထောက်ပံ့ရေးပစ္စည်းရှာမလဲဆိုတာ ဆုံးဖြတ်မယ်”
မြေအောက်မြို့သည် ကြီးမားလှသည်။ ဘာမှမသိရပဲ ရှာဖွေခြင်းသည် အဓိပ္ပာယ်မရှိပေ။ ၎င်းတို့တွင် အချိန်အကန့်အသတ်ရှိသည်—သတင်းအချက်အလက်များကို ဦးစွာလုံခြုံအောင်လုပ်ရန် အရေးကြီးသည်။
ချန်ဆီရွှမ်နှင့် ရှားရှားတို့တွင် စွမ်းအားမရှိသလို၊ ရုပ်ပိုင်းဆိုင်ရာတွင် အခြားသူများနှင့် တန်းတူမရှိပေ။ ရထားကို ကာကွယ်ရန် နောက်တွင်ကျန်နေခြင်းသည် ပို၍လုံခြုံသော ရွေးချယ်မှုဖြစ်သည်။
လင်းရှန်၊ လို့ဟွာနှင့် ကီကီတို့သည် လက်နက်များကို အပြည့်အဝတပ်ဆင်ထားသည်။
လင်းရှန်: GK03 လျှပ်စစ်ဓား၊ စက်သေနတ်ငယ်နှင့် ပစ္စတိုတစ်လက်။
ကီကီ: အလိုအလျောက်ရိုင်ဖယ်။
လို့ဟွာ: အပေါ့စား စက်သေနတ်နှင့် အပိုကျည်ဆန်များ။
ထို့ပြင်၊ ၎င်းတို့သည် ဓာတ်ငွေ့ကာမျက်နှာဖုံးများ တပ်ဆင်ထားသည်။ ပိတ်ထားသော မြေအောက်နယ်မြေတစ်ခုသည် လေထုညစ်ညမ်းမှုအတွက် ပြင်ဆင်ထားရပေမည်၊၊
“မင်းတို့ရဲ့ စွမ်းအားကို ဂရုစိုက်ပါ—ဖုတ်ကောင်တွေပေါ်မှာ စွမ်းအင်မဖြုန်းနဲ့”
လင်းရှန်က ညွှန်ကြားပြီးသည်နှင့် ရထားတံခါးကို ဖွင့်လိုက်သည်၊၊
“သိပါတယ်”
ကီကီက ပြုံးပြရင်း ပြောသည်။
“ရှင့်ကို ပြောတယ်လေ၊ ကျွန်မရဲ့ စွမ်းရည်က ပြောင်းလဲလာပြီ။ လွယ်လွယ်နဲ စွမ်းအင်မပြတ်လပ်တော့ဘူး ”
လင်းရှန် သူမကို ကြည့်လိုက်သည်။
“အခုဆို ဘယ်နှစ်ကြိမ် သုံးနိုင်လဲ”
“မသိဘူး၊ ဒါပေမယ့် အရင်ကထက် အများကြီး အားကောင်းတယ်”
“…အိုကေ။”
ကလစ်။
လင်းရှန်သည် ရထားမှ ဆင်းလိုက်သည်။
သူ၏ ဖိနပ်သည် ရေအိုင်တစ်ခုထဲသို့ နင်းမိသွားသည်—ကြမ်းပြင်သည် စိုစွတ်နေသည်။
“သတိထားကြဦး”
သူသည် ချန်ဆီရွှမ် အား ရထားတံခါးများကို လုံခြုံအောင်လုပ်ရန် အချက်ပြလိုက်သည်။
ပါးလျသောလေထုထဲတွင် ခြောက်သွေ့နေသော သွေးနံ့များ ထူထပ်စွာ ရှိနေပြီး၊ ရှားရှားနှင့် ချန်ဆီရွှမ် တို့သည် အနည်းငယ် ပျို့တတ်ချင်လာသည်။ ရထားတံခါးများ ပိတ်သွားသည်နှင့်၊ အနံ့ဆိုးများကို ပိတ်ဆို့လိုက်သည်။
သူတို့၏ လက်ကိုင်ရေဒီယိုများသည် အစိမ်းရောင်မီးများ လက်ခနဲဖြစ်နေပြီး၊ အနီးအနားဆက်သွယ်ရေးများ ဆက်လက်အလုပ်လုပ်နေကြောင်း အတည်ပြုလိုက်သည်။
လင်းရှန်သည် ယူချီမြို့တွင် ခေါင်းသုံးလုံးပင့်ကူမွန်းစတားနှင့် တိုက်ခိုက်ပြီးနောက် တစ်ခုခုကို သဘောပေါက်ခဲ့သည်။
သူတို့၏ ရေဒီယိုအချက်ပြမှုများသည် ထူးဆန်းသော သတ္တဝါများ အနီးတွင်ရှိသည့်အခါ အတက်အကျဖြစ်ပုံရသည်။
၎င်းသည် ပြီးပြည့်စုံသော ထောက်လှမ်းရေးစနစ်မဟုတ်သော်လည်း၊ ဖြစ်နိုင်ချေရှိသော သဘာဝလွန်ခြိမ်းခြောက်မှုများကို သတိပေးနိုင်သည်။
လက်နက်များကို နောက်တစ်ကြိမ်စစ်ဆေးပြီးသည်နှင့် သူတို့သည် အမှောင်ထဲသို့ ထွက်ခွာသွားသည်—စောင့်ကြိုနေသော ကြောက်မက်ဖွယ်ရာ အရာများဆီသို့။