အခြေတည်အဆင့်အတွက် စိတ်ဝိညာဥ်ရတနာ
Vol. 1 Ch. 7
ကျိယွမ်၏ မျက်လုံးသည် အခြားသူများမမြင်နိုင်သည့် အချက်အလက်များကို မြင်နိုင်စွမ်းရှိသည် ။
ခဏအတွင်း ဆေးညွှန်း၏ ပျောက်ဆုံးနေသော အပိုင်းများကို သူသိသွားသည် ။
ထို့နောက် ဆေးညွှန်းကို မည်သို့တိုးတက်အောင် ပြုလုပ်ရမည်ဆိုသည့် နည်းလမ်းတစ်ခုသည် ချက်ချင်းပင် သူ၏ စိတ်ထဲတွင် ပေါ်လာ၏ ။
သို့သော် ဤနည်းလမ်းသည် အကောင်းဆုံးသော ဖြေရှင်းနည်း မဟုတ်သေးချေ ။
နောက်တစ်နေ့တွင် သူသည် ထိုဆေးညွှန်းကို ထပ်မံကြည့်လျှင် တိုးတက်အောင် ပြုလုပ်ရန် နည်းလမ်းအသစ်ကို ထပ်မံတွေ့ရှိမည် ဖြစ်သည် ။
ထို့အပြင် တိုးတက်မှုနှင့် ထိရောက်မှုသည်လည်း ပို၍ပို၍ကောင်းမွန်လာမည် ဖြစ်သည် ။
သို့ရာတွင် သူသည် တစ်နေ့လျှင် တစ်ကြိမ်သာ ပစ္စည်းတစ်မျိုး၏ ဖုံးကွယ်ထားသော အချက်အလက်များကို မြင်နိုင်သည် ။
သူလေ့ကျင့်လျက်ရှိသော ခုနှစ်ရောင်ခြယ်မီးတောက်သန့်စင်နည်းစနစ်ကိုလည်း ဤနည်းအတိုင်း နေ့စဥ်ပြင်ဆင် လာခဲ့ခြင်းသည် ။
ထို့ကြောင့် သူက ကျန်းလင်းစုကို နည်းစနစ်က မပြည့်စုံသေးဟု သတိပေးခဲ့ခြင်းပင် ။
နေ့စဥ့်ပြုပြင်ထားသည်တောင်မှ ထိုနည်းစနစ်တွင် ကြီးမားသောချို့ယွင်းချက်များဆက်ရှိနေဆဲ ဖြစ်သည် ။
"ရွမ်စွမ်အင်ဆေးလုံအညွှန်းမှာ ချို့ယွင်းချက်တွေ ရှိနေတယ် "
ကျူးမြောင် ၏ မျက်လုံးများတွင် မျှော်လင့်ချက်များ ပြည့်နှက်လာသည် ။
"ကျေးဇူးပြု၍ လမ်းညွှန်ပေးပါ ဂိုဏ်းတူညီလေး ။"
ဆင်ခြေထောက်မြက်ကို စိမ်းလန်းခြင်းနွယ်ပင် နဲ့ အစားထိုးရမယ် ။"
"စိမ်းလန်းခြင်းနွယ်ပင်လား" ကျူးမြောင် အနည်းငယ် စိတ်ရှုပ်ထွေးသွားသည် ။
သူသည် ဆေးညွှန်း၏ ပျောက်ဆုံးနေသော အပိုင်းအကြောင်း မေးမြန်းလိုသော်လည်း ကျိယွမ်က ဆေးညွှန်းကိုပါ တိုက်ရိုက်ပြင်ဆင်နေသည် ။
သို့သော် ကျိယွမ် နှင့် နောက်ဆုံးအကြိမ်ဆွေးနွေးခဲ့စဥ်က ရလဒ်များကို သတိရလိုက်သည့်အခါ မကန့်ကွက်ရန်ဆုံးဖြတ်လိုက်သည် ။
ထိုအချိန်က ကျိယွမ်၏ အကြံဉာဏ်များက သူ့အား များစွာအကူအညီ ပေးခဲ့သည် ။
ထို့အပြင် သူသည် အကူအညီတောင်းခံသူ ဖြစ်သည့်အတွက် သူ၏တစ်ဖက်သူ၏စကားကို အရမ်းကာရော ငြင်းခုံနေရန် မသင့်တော်ချေ ။
ထိုအခိုက်မှာပင် ကျူးမြောင်သည် တစ်စုံတစ်ခုကြောင့် မျက်မှောင်ကျုံ့သွား၏ ။
"ဂိုဏ်းတူညီလေး ကျိယွမ် ၊ ခဏစောင့်လောက်၊ ငါ့ဆီ သတင်းတစ်ခု ဝင်လာလို့"
"စာပို့လိုက်တာလား"
ကျိယွမ်က အလေးအနက် မထားနေပါ ။။
"အားမနာပါနဲ့ ၊ ပြောပါ"
ကျင့်ကြံခြင်းလောကတွင် ဖုန်းများ မရှိသော်လည်း သတင်းပို့သည့် အဆောင်များ ရှိသည် ။
ကျင့်ကြံသူများသည် သတင်းပို့အဆောင်များများမှတစ်ဆင့် အချင်းချင်း ဆက်သွယ်နိုင်သည် ။
သို့သော် သတင်းပို့အဆောင်များတွင် အကွာအဝေး ကန့်သတ်ချက်များ ရှိပြီး ပို့ရသည် အကွာအဝေးပေါ်မူတည်၍ ကုန်ကျစရိတ် ပိုများသည် ။
ထို့အပြင် လျှို့ဝှက်နယ်မြေများသို့ ဝင်ရောက်ပါက ၎င်းတို့သည် အကျိုးသက်ရောက်မှု မရှိတော့ပေ ။
ထို့အပြင် ကျင့်ကြံသူအားလုံးသည် ၎င်းတို့ကို အသုံးပြုရန် မတတ်နိုင်ကြချေ ။
"ဘာကိစ္စလဲ ဂိုဏ်းတူညီလေး" ကျူးမြောင်က အသံကိုအနည်းငယ်နှိမ့်ပြီး သတင်းပို့လိုက်သည် ။
"ဆေးညွှန်း အပြည့်အစုံ ရှာတွေ့ပြီလား?"
"မလိုအပ်တော့ဘူး ၊ စိတ်မပူနဲ့တော့ ။"
ကျုးမြောင်က အနည်းငယ်စိတ်အနှောင့်အယှက်ဖြစ်သွားပုံရသည် ။
သူက သတင်းပို့ခြင်းကို ဖြတ်တောက်လိုက်ပြီး ကျိယွမ်ကို ပြန်လည်စကားဆက်လိုက်သည် ။
"ကျေးဇူးပြုပြီး ဆက်ပြောပေးပါဦး"
"လိုအပ်နေတဲ့ ပစ္စည်းက ကျောက်ကြေဆေးပဲ ၊ ဒါပေမဲ့ ကျောက်ကျေဆေးက ယန်ဓာတ်အရမ်းပြင်းထန်တော့ သိပ်မသင့်တော်ဘူး ။ ပိုကောင်းချင်ရင် ရလဒ်များအတွက် ကျောက်ကြေဆေးအစား မြင်းခွာငါ့ရှဥ့်သွား ဆေးနဲ့ အစားထိုးလိုက်"
ကျိယွမ်က စကားဆုံးသည်နှင့် လက်ကို ဆန့်တန်းလိုက်သည် ။
"အခြေတည်အဆင့် စိတ်ဝိညာဥ်ရတနာ "
ကျူးမြောင်သည် ကျိယွမ်၏ စကားများကို ဆက်လက်စဉ်းစားနေဆဲဖြစ်ပြီး ကျိယွမ် က ပစ္စည်းတောင်းသည်ကို ကြားလိုက်ရသည့်အခါမှ သူသည် ကျောက်စိမ်းဝါးဆစ်တစ်ခုကို လျင်မြန်စွာ ထုတ်ယူလိုက်သည် ။
ကျောက်စိမ်းဝါးတုတ်သည် ခရမ်းရောင်တောက်ပနေပြီး ခရမ်းရောင်ကျောက်မျက်ရတနာတစ်ခုအလား ချောမွတ်နေ၏ ။ အဆစ်များတွင် အဖြူရောင် အနည်းငယ် ပါရှိသည် ။
"ဒါက ခရမ်းရောင်ကျောက်စိမ်းဝါးပဲ ၊အဆင့် ၈ သန္ဓေတည်ခြင်း စိတ်ဝိညာဥ်ပစ္စည်းဖြစ်တယ် ။"
အခြေတည်စိတ်ဝိညာဥ်ရတနာများတွင် အဆင့်များ ရှိသည် ။
၎င်းတို့ကို အောက်ခြေအဆင့် သုံးဆင့်၊ အလယ်အဆင့် သုံးဆင့်နှင့် ထိပ်တန်းအဆင့် သုံးဆင့်ဟူ၍ ခွဲခြားထားသည် ။
ထိပ်တန်းအဆင့် သုံးဆင့်ထက် ပို၍မြင့်မားသော အဆင့်များ ရှိသည်ဟုလည်း ပြောကြသည် ။သို့သော် မည်သူကမျှ မမြင်ဖူးကြပေ။
စိတ်ဝိညာဥ်ရတနာ၏ အဆင့်မြင့်မားလေလေ သန္ဓေတည်အဆင့်အတွက် သက်ရောက်မှုကောင်းမွန်လေလေဖြစ်ပြီး အလားအလာလည်း ပိုမိုကောင်းမွန်သည် ။
သို့သော် အတိအကျတော့ မရှိပေ ။တစ်ခါတရံ အနိမ့်ဆုံးအဆင့် ရတနာကိုသုံးပြီး အကောင်းဆုံးရလဒ်ပိုင်ဆိုင်သွားသူများလည်း ရှိတတ်သည် ။
ထို့ကြောင့် အခြေတည်စိတ်ဝိညာဥ်ရတနာတိုင်းသည် တန်ဖိုးမဖြတ်နိုင်သော ပစ္စည်းများ ဖြစ်၏ ။
အဆင့် ၈ သည် အခြေတည်စိတ်ဝိညာဥ်ရတနာများ၏ အနိမ့်ဆုံးအဆင့် သုံးဆင့်အနက်မှ တစ်ခု ဖြစ်သည် ။
ရတနာများက တန်ဖိုးကြီးလွန်းသဖြင့် ရှန်ကွမ်းဂိုဏ်း၏ သာမန်တပည့်အများစုသည် ၎င်းတို့၏ စုဆောင်းငွေများ အကုန်သုံးမည်ဆိုလျှင်တောင် သည့်တိုင် ခရမ်းရောင်ကျောက်သိမ်းဝါး တစ်ခုကို မတတ်နိုင်ကြပေ ။
ဤအချက်ကပင် ကျူးမြောင်၏ ချမ်းသာကြွယ်ဝမှုကို ပြသနေ၏ ။
လက်ရင်းတပည့်များနှင့် သာမန် တပည့်များကြားမှ ကွာခြားချက်က ကြီးမားလွန်းလှသည် ။
ဆိုသည်တိုင် ကျုးမြောင်ကိုယ်တိုင် ပင် ခရမ်းရောင်ကျောက်စိမ်း ကို စွန့်လွှတ်ရသည့်အား အနည်းငယ် နာကျင်သလို ခံစားရသည် ။
ကျူးမြောင် ကျိယွမ်ကို အကြံပေးလိုက်သည် ။
"ခရမ်းရောင်ကျောက်စိမ်းဝါးက နည်းနည်း အဆင့်နိမ့်နေတယ် ။ ဂိုဏ်းတူညီလေးအနေနဲ့ ဆန္ဒမစောသင့်ဘူး ။ စိတ်ဝိညာဥ်ကျောက်တုံးတွေ ထပ်စုလိုက် ၊ ပြီးမှ ဒီရတနာနဲ့ပေါင်းပြီး အဆင့်ပိုမြင့်တဲ့ စိတ်ဝိညာဥ်ရတနာနဲ့ လဲရင် ပိုကောင်းမယ် "
ခရမ်းရောင်ကျောက်စိမ်းဝါး သာမန်ချီအဆင့်တပည့်များအတွက် ရှားပါးသော်လည်း လက်ရင်းတပည့်များအတွက်မူ အနည်းငယ် မလုံလောက်ပေ ။
ဥပမာအားဖြင့် ကျူးမြောင်သည် သူ၏အခြေတည်အဆင့်အတွက် အလယ်အဆင့်ရှိသော အဆင့် ၅ နဂါးအုပ်စိုးသူမျက်လုံး ကို အသုံးပြုခံ၏ ။
"အင်း "
ကျိယွမ်က ခရမ်းရောင်ကျောက်စိမ်းဝါးကို ယူပြီး ခေါင်းညိတ်လိုက်သည် ။
သူ၏ အခြေတည်အဆင့်အတွက် ခရမ်းရောင်ကျောက်စိမ်းဝါးကို အသုံးပြုရန် စိတ်ကူးမရှိပါ ။
သို့သော် အနာဂတ်တွင် ၎င်းကိုစိတ်ဝိညာဥ်ကျောက်တုံးများဖြင့် လဲလှယ်နိုင်သဖြင့် အလကားတော့မဖြစ်ပေ ။
သူသည် ကျိစယ်တောင်ထွတ်၏ လက်ရင်းတပည့် ဖြစ်သော်လည်း သူ၏ဘဝမှာကား --
တကယ်ကို ဆင်းရဲသည် ။
အခြားသော တောက်ထွတ်သခင်များ၏ လက်ရင်းတပည့်များနှင့် နှိုင်းယှဉ်ပါက ကွာခြားချက်က သိသာထင်ရှားသည် ။
"အင်း...ဂိုဏ်းတူညီလေး "
ကျူးမြောင်သည် ကိစ္စတစ်ခုကို စဉ်းစားမိသွားသဖြင့် ကျိယွမ်းအား သူ၏ထင်မြင်ချက်ကို ပြောမိသည် ။
"မင်းရဲ့ဆရာကိုသာ မစော်ကားခဲ့ရင် အခုလောက်ဆို အလယ်အလတ်အဆင့် ဒါမှမဟုတ် ထိပ်တန်းအဆင့် ရတနာတစ်ခုခု ရပြီး အခြေတည်အဆင့်ကို သေချာပေါက် ရောက်နေမှာ ၊ အခြေအနေတစ်ခုမှာ တောင်ထွတ်သခင်ကို တောင်းပန်ကြည့်ပါလား "
သို့သော် ကျူးမြောင်စကားများထဲ၌ လေးစားမှု အနည်းငယ် ပါဝင်နေသည် ။
ကျိစယ်တောင်ထွတ်သခင်ကိုပင် မလေးမစားပြုရဲသော ကျယွမ်သည် တကအမှန်ပင် ရဲရင့်လှသည်ဟု သူထင်မြင်မိသည် ။
ရှန်ကွမ်းဂိုဏ်း၏ ဂိုဏ်းချုပ်ပင် ကျိစယ်တောင်ထွတ်သခင်ကို အလေးထားရသည်ကို အားလုံးသိကြ၏ ။
ရှန်ကွမ်းဂိုဏ်းတွင် မူလက တောင်ထွန်လေးခုသာ ရှိခဲ့သော်လည်း ရွမ်ယူချမ်းရောက်ရှိလာပြီးနောက်တွင် ပဉ္စမမြောက်တောင်ထိပ်ဖြစ်သော ကျိစယ်တောင်ထွတ်ကို ထပ်မံတည်ထောင်ပေးခဲ့ကြောင်း သူ၏ဆရာထံမှ ကျူးမြောင်ကြားဖူးသည် ။
ထိုတောင်ထွတ်၏ သက်တမ်းမှာ နှစ်ပေါင်း တစ်ထောင် ကြာခဲ့လေပြီ ။
ကျိစယ်တောင်ထွတ်သခင်သည် နှစ်ပေါင်း တစ်ထောင်သက်တမ်းရှိပြီဟု ဆိုလိုသည်မဟူတ်ပါလား ။
အနည်းဆုံး စိတ်ဝိညာဥ်သန္ဓေတည်ခြင်းအဆင့် ကျင့်ကြံသူများသာ သက်တမ်းထောင်ကျော်အောင်နေနိုင်သည် ။
ထိုကဲ့သို့သော စွမ်းအားကြီးမားသည့် ပုဂ္ဂိုလ်သည် ကြီးမြတ်သော ရှန်မင်းဆက်တစ်ခုလုံးကိုပင် လွှမ်းမိုးနိုင်၏ ။
ကျိယွမ်အနေဖြင့် ရွမ်ယူချမ်း ထံတွင် သင်ကြားခွင့်ရခြင်းသည် ရွှေရောင်ပေါင်တံတစ်ဖက်ကို ဖက်ခွင့်ရထားသကဲ့သို့ ဖြစ်သည် ။
နှမြောစရာကောင်းသည်က ကျိယွမ်သည် ရဲရင့်သော်လည်း မတွေးခေါ်တတ်သူဖြစ်နေခြင်းပင် ။ သူက ရွမ်ယူချမ်း ကိုပင် ဒေါသထွက်စေခဲ့၏ ။
ထိုအချိန်မှစ၍ သူအား အရင်းအမြစ်များအားလုံး ဖြတ်တောက်ခံခဲ့ရသည် ။
တော်တော် သနားစရာကောင်းတဲ့ ဂိုဏ်းတူညီလေးပဲ ။
ကျူးမြောင်သာဆိုလျှင် သူ၏ဆရာဖြစ်သူ မကျေနပ်မချင်း အကြိမ်ကြိမ် ဝန်ချတောင်းပန်နေမည် ဖြစ်သည် ။
ကျိယွမ်ကတော့ တောင်းပန်ရန် ရည်ရွယ်ချက် လုံးဝရှိပုံမရခဲ့ချေ ။
ကျူးမြောင်၏ စကားကို ကြားလိုက်ရသည့်အခါ ကျိယွမ်၏ မျက်လုံးများ အနည်းငယ်လက်သွားသည် ။
"ကျွန်တော်မှ အမှားမလုပ်ခဲ့တာ ၊ ဘာလို့ တောင်းပန်ရမှာလဲ ၊ ဘာလဲ ဂိုဏ်းတူအစ်ကို ဆရာမကိုများ စိတ်ဝင်စားနေတာလား "
ကျူးမြောင်ခမျာ ငိုချင်သလိုလို ဖြစ်သွားရသည် ။ထို့အတူ ကျောရိုးတစ်လျှောက် စိမ့်သွား၏ ။ ကျိယွမ်၏ တုန့်ပြန်မှုက အန္တရာယ်ရှိသည်ဟု ခံစားရသည် ။
ညီအစ်ကိုရာ ငါကစေတနာနဲ့ပြောမိရုံလေးပါကွာ ၊ ဘာကြောင့် သေတွင်းထဲထိ ဆွဲချနေရတာလဲ ။
သူက ထိုကိစ္စကို မဆွေးနွေးရဲတော့ပါ ။
"ဂိုဏ်းတူညီလေးကျိယမ် ၊ဒါဆို ကိစ္စလေးရှိနေလို့ ဒီမှာပဲ ရပ်လိုက်ကြရအောင်"
ကျိယွမ်သည် ကျိစယ်တောင်ထွတ်၏ မာနကြီးပြီး အေးစက်သော နတ်သမီးအပေါ် ရိုင်းစိုင်းသည့် အပြုအမူများ ထပ်မံ ပြုလုပ်လာမှာကို သူစိုးရိမ်သည် ။
ထိုအထဲတွင် သူပါ ပါဝင်သွားပါက အဆုံးသတ်က ကောင်းမွန်လိမ့်မည် မဟုတ်ပေ ။
"အင်း "
ကျိယွမ်သည် ကျူးမြောင်ကို နှုတ်ဆက်စကားတောင် မပြောတောဘဲ သူ၏ မီးဖိုချောင်သုံးဓားကို ဆက်၍ဆွဲရင်း လမ်းလျှောက်သွားတော့သည် ။
ထိုအခါမှ ကျူးမြောင်ခမျာ စိတ်သက်သာရာ ရသွား၏ ။
တော်သေးတာပေါ့ ဘာမှမဖြစ်လို့။
ထိုအခိုက် စိုးရိမ်နေသော အသံတစ်သံက သူ၏နောက်မှ ထွက်ပေါ်လာသည် ။
"ဂိုဏ်းတူအစ်ကိုကြီး ရတနာကို လဲပစ်ပြီလား"
အစိမ်းရောင် ဝတ်စုံဝတ်ဆင်ထားပြီး ခါးတွင် ဗူးသီးခြောက်တစ်လုံး ချိတ်ဆွဲထားသော ရှုလန်ဟူက အရေးကြီးသုတ်ပြာ ရောက်လာသည် ။
သူက ဝါကျင့်သော စက္ကူစတစ်စကို ထုတ်ယူလိုက်သည် ။
"ဒါက ဒီနေ့ ကျွန်တော်ဈေးကွက်မှာ ဝယ်ယူခဲ့တဲ့ ဆေးညွှန်းပါ ။ လျှို့ဝှက်နယ်မြေထဲမှာ တွေ့ရှိခဲ့တဲ့ ရွမ်စွမ်းအင်ဆေးလုံး အညွှန်းနဲ့ ကိုက်ညီတယ် ၊ ဒါကြောင့် ကျွန်တော် ချက်ချင်းပဲ ဂိုဏ်းတူအစ်ကိုကြီးကိုနဲ့ ဆက်သွယ်လိုက်တာ ၊ ခုတော့ --" ။"
ရှုလန်ဟူသည် ဆေးညွှန်းကို ကျူးမြောင်ထံထံ ပေးလိုက်ရင်းမှ ခရမ်းရောင်ကျောက်စိမ်းဝါးပျောက်သွားသည်ကို သိလိုက်ရသည့်အခါ ဝမ်းနည်းကြေကွဲစွာဖြင့် ပြောလိုက်သည် ။
"ဂိုဏ်းတူအစ်ကို ကျွန်တော်တို့မှာ ဆေးညွှန်း ရှိပြီးသားပဲ ။ ဘာလို့ ကျိယွမ် နဲ့ လဲလိုက်တာလဲ ၊ သူက ကျွန်တော်တို့ရဲ့ ကောင်းကင်ဘုံဆေးဝါး တောင်ထွတ်ကတောင် မဟုတ်ဘူး ။ ဆေးညွှန်းနဲ့ ပတ်သက်ပြီး ဘယ်လို ကူညီနိုင်မှာလဲ ။သူ ဝေးဝေးမရောက်သေးဘူးထင်တယ် ။ ကျွန်တော် လိုက်ပြီး ရတနာကို ပြန်ယူလိုက်မယ်"
ရှုလန်ဟူက ကျူးမြောင်၏ မျက်နှာအရောင်ပြောင်းလာခြင်းကို မသတိထားမိဘဲ စကားအများကြီး ပြောနေတော့သည် ။
"ကျိယွမ်နဲ့ ငါ့ကြားက သဘောတူညီချက်ကို မင်းဝေဖန်နေစရာ အကြောင်းမရှိဘူး ၊ ပြီးတော့ ကျိယွမ်ကငါ့ကို ဘာမှမကူညီနိုင်ခဲ့လည်း ဘာဖြစ်လဲ ။ငါကိုယ်တိုင် ဆန္ဒရှိလို့ ပေးလိုက်တာ "
"ဂိုဏ်းတူအစ်ကို --ကျွန်တော် --"
ရှုလန်ဟူ ကြောက်လန့်သွား၏ ။
"ကျွန်တော်က အလကားဖြစ်သွားမှာကို စိုးရိမ်နေလို့ပါ ။ ကံကောင်းထောက်မလို့ ကျွန်တော် ဆေးညွှန်း အပြည့်အစုံ ရခဲ့တယ် ။ ဂိုဏ်းတူအစ်ကိုက ကျွန်တော့်အသက်ကို ကယ်တင်ခဲ့တဲ့ ကျေးဇူးရှင်ပါ ။ ဆေးညွှန်းကို လက်ခံပေးပါ ။"
သူက ကျိယွမ်အကြောင်းကို ထပ်မံ၍မပြောတော့ပေ ။သူ၏ အမြင်တွင် ကျိယွမ်သည် ဆေးညွှန်းကို မည်သို့နားမလည်နိုင်ဟု ယုံကြည်၏။
ကောင်းကင်ဘုံဆေးဝါးတောင်ထွတ်တွင် ဆေးပညာကို နှစ်ပေါင်း ၁၀ ကြာ လေ့လာခဲ့သည်သူများပင် ဆေးညွှန်းကို မဖြည့်စွတ်နိုင်သဖြင့် ကျိယွမ်အနေဖြင့် အကြံဉာဏ်ပေးနိုင်စရာ အကြောင်းမရှိချေ ။
ကျူးမြောင်က ဆေးညွှန်းကို ယူလိုက်ပြီး "အေးလေ ဂိုဏ်းတူညီလေးကျိယွမ်ပြောခဲ့တာနဲ့ နှိုင်းယှဉ်ကြည့်ရတာပေါ့ " ဟု ပြောလိုက်သည် ။
"ဒါက ဆေးပင်တွေ ဖြုန်းတီးရာရောက်တယ်"
မပြောတော့ဘူးဆိုပါမှ ရှုလန်ဟူက သူစိတ်ထဲတွင်ပြောမိပြန်၏ ။
----