ခြေအိတ်ဝယ်ရန် ဘီလီယံငါးထောင်

"ရှင်းဟွေ့၊ မင်းတို့ ဘယ်တုန်းက ပြန်ရောက်တာလဲ။"

ရဲရှင်းဟွေ့ ဂိမ်းခန်းသို့သွား၍ ခဏမျှဂိမ်းကစားရန် ပြင်ဆင်နေစဉ်မှာပင် ဇီးကွက်သည် သူ၏အခန်းထဲမှ ထွက်လာသည်။

"ငါတို့ မနေ့ညက ပြန်ရောက်တာ။ စကားမစပ်၊ မနေ့ညက မင်းဘာလုပ်နေလဲ။ ဘာလို့ အိမ်မှာမရှိတာလဲ။"

ဇီးကွက် ထိုစကားကိုကြားသော် ရှက်ရွံ့စွာဖြင့် သူ၏ခေါင်းကိုကုတ်လိုက်၏။

"အိုး။ မပြောပါနဲ့တော့။ ငါ အရင်က မင်းကို ပြောဖူးတယ်မလား၊ ငါ အချိန်ပိုင်းလုပ်တဲ့ ကားမောင်းသင်တန်းက ကျောင်းသားတွေ စုဆောင်းချင်နေတယ်လို့။ ငါ့မှာ ဒီမှာ သူငယ်ချင်းသိပ်မရှိတော့ သူငယ်ချင်းအပေါင်းအသင်းတွေ စုဆောင်းသွားတာ။"

ရဲရှင်းဟွေ့က ပြုံးလိုက်ပြီး ဇီးကွက်၏လည်ပင်းနှင့် မျက်နှာပေါ်မှ နှုတ်ခမ်းနီရာများကို ညွှန်ပြလိုက်သည်။

"မင်း သူငယ်ချင်းဖွဲ့တဲ့နည်းက တော်တော်ထူးခြားတာပဲ။"

"အလုပ်အတွက်ချည်းပါပဲ"

ဇီးကွက်က ပြုံးလိုက်ပြီးနောက် စကားလမ်းကြောင်းလွှဲကာ

"ဟမ်။ စကားမစပ်၊ ရှင်းချန်နဲ့ လောင်ရှူံးရော ဘယ်မှာလဲ"

"လောင်ရှူံးက အချစ်စစ်တွေ့သွားပြီ၊ ငါ့အစ်ကိုကတော့ တံခါးပိတ်ကျင့်ကြံနေတယ်။"

"ဘာတုန်းဟ။ လောင်ရှူံးက အချစ်စစ်တွေ့သွားပြီ ဟုတ်လား။ သူက ဂေး မဟုတ်ဘူးလား။"

"ဘာလဲ။ လောင်ရှူံးက ဂေးလား။"

ရဲရှင်းဟွေ့က ရှုပ်ထွေးသောမျက်နှာဖြင့် ကြည့်လိုက်သည်။

"ဟုတ်တယ်"

ဇီးကွက်က ခေါင်းညိတ်လိုက်ပြီးနောက်

"မင်းမသိဘူးလား၊ လောင်ရှူံးက တစ်ခါက မိန်းမလည်တစ်ယောက်ကြောင့် နာကျင်ခဲ့ဖူးတယ်။ အဲ့ဒီအချိန်ကတည်းက လောင်ရှူံးက မိန်းမတွေနဲ့ မနီးစပ်တော့ဘူး။ ဘလက်ဟတ်ကိုယ်ရံတော်ကုမ္ပဏီက ငါတို့ညီအစ်ကိုတွေ သူ့အတွက် မိန်းမတွေအများကြီး ရှာပေးခဲ့တယ်။ ဘယ်လောက်ပဲလှလှ သူကငြင်းတယ်။ သူက ငါတို့လို ယောက်ျားကြီးတွေနောက်ပဲလိုက်ပြီး နေ့တိုင်း တာဝန်အမျိုးမျိုး ထမ်းဆောင်နေတာ။ ဒါကြောင့် ငါတို့အားလုံးက သူ ဂေးလို့ထင်နေတာ၊ ဒါပေမဲ့ သူတကယ်ပဲ ရည်းစားရသွားလိမ့်မယ်လို့တော့ မထင်ထားခဲ့ဘူး။ ဒါက တကယ်ကို ကြည်နူးစရာပဲ။"

ဇီးကွက်သည်လည်း လောင်ရှူံး အချစ်စစ်တွေ့သွားသည့်အတွက် အလွန်ပျော်ရွှင်နေ၏။ မည်သို့ပင်ဆိုစေကာမူ သူတို့သည် နှစ်ပေါင်းများစွာ သူငယ်ချင်းကောင်းများ ဖြစ်ခဲ့ကြသည်။

ထို့ပြင် သူသည် ယခုအခါ လောင်ရှူံး ဂေးမဟုတ်ကြောင်း သေချာသွားပြီဖြစ်သောကြောင့် လောင်ရှူံး တစ်နေ့နေ့တွင် သူ့ကို ရုတ်တရက် ဖွင့်ပြောလာမည်ကို စိုးရိမ်စရာမလိုတော့သလို ဆပ်ပြာကောက်ခြင်း သို့မဟုတ် ထိုကဲ့သို့သောအရာများကို သတိထားစရာမလိုတော့ပေ။

ဇီးကွက် ဘာစဉ်းစားနေသည်ကို ရဲရှင်းဟွေ့က မသိပေ။ အကယ်၍ သူ ဘာစဉ်းစားနေသည်ကို သိခဲ့လျှင် ရဲရှင်းဟွေ့က "လောင်ရှူံးက ဂေးမဟုတ်ပေမဲ့… သူ့ရည်းစားက ကူပဲ" ဟု ထပ်ပေါင်းပြောလိုက်မည်ဖြစ်သည်။

ဇီးကွက်က သူ၏ဖုန်းကိုထုတ်ကြည့်လိုက်ရာ အချိန်မိုးချုပ်နေပြီဖြစ်သောကြောင့်

"ကိုးနာရီကျော်နေပြီ။ ငါ ဈေးသွားဝယ်ပြီး ချက်ပြုတ်တော့မယ်"

ဤသို့ပြောပြီးနောက် ဇီးကွက်က ရဲရှင်းဟွေ့ကိုကြည့်ကာ "မင်း စားမှာလား" ဟု မေးလိုက်၏။

ဇီးကွက်သည် ရဲရှင်းဟွေ့ စားမည် မစားမည်ကို မသေချာပေ။ မည်သို့ပင်ဆိုစေကာမူ သူသည် ရဲအမည်ဖြင့် ညီအစ်ကိုနှစ်ဦးမှာ လူသားများမဟုတ်ဟု ယုံကြည်ထားသော်လည်း သူသည် နေ့စဉ် ပေါင်ပေါင်းအတွက် ချက်ပြုတ်နေကျဖြစ်နေသည်။

"စားမှာပေါ့။ ငါ့အတွက်လည်း တစ်ပွဲလုပ်ထား။"

ဇီးကွက် ဈေးဝယ်ထွက်သွားစဉ် ရဲရှင်းဟွေ့သည် ဂိမ်းခန်းသို့ လာခဲ့သည်။

ရဲရှင်းဟွေ့သည် ယခင်က ဂိမ်းညံ့ဖျင်းသော်လည်း စွဲလမ်းတတ်သော ကစားသမားမျိုးဖြစ်သော်လည်း ယခု သူသည် ဘုရင်အင်ဂျင်၏ ဂိမ်းကစားနိုင်စွမ်းကို ရရှိထားသော်ငြား သဘာဝကျကျ ဂိမ်းကစားခြင်းကို နှစ်သက်နေဆဲဖြစ်သည်။

ရဲရှင်းဟွေ့က မနေ့က ပေါင်ပေါင်းကစားခဲ့သော ကွန်ပျူတာကိုဖွင့်ကာ League of Legends ကို နှိပ်လိုက်ရာ စကားဝှက်မှာ ပေါင်ပေါင်း၏အကောင့်တွင် မှတ်သားထားသည်ကို တွေ့ရှိသောကြောင့် သူမ၏အကောင့်သို့ ဝင်ရောက်လိုက်သည်။

ပေါင်ပေါင်း၏ဂိမ်း ID မှာ "လူ့အဖွဲ့အစည်းရဲ့ အစ်မတော် ပေါင်အာ" ဖြစ်၏။

ဤအမည်ကိုမြင်သော် ရဲရှင်းဟွေ့သည် ညည်းညူလိုသော်လည်း ဘယ်ကစ၍ ညည်းရမည်ကို မသိခဲ့ပေ။

ထို့နောက် သူက အဆင့်နှင့် နိုင်ပွဲနှုန်းကို ကြည့်လိုက်သည်။

"ဘာတုန်းဟ။ မာစတာအဆင့် ဟုတ်လား။ ကစားတာ ခဏလေးပဲရှိသေးတာကို။ မင်းက မာစတာတောင် ဖြစ်နေပြီလား။"

ရဲရှင်းဟွေ့သည် ပေါင်ပေါင်း ဤမျှလောက် အစွမ်းထက်လိမ့်မည်ဟု မမျှော်လင့်ထားခဲ့ပေ။ သူမ ဤမျှစွဲလမ်းနေသည်မှာ အံ့ဩစရာမရှိချေ။

ရဲရှင်းဟွေ့က သူ၏လက်များကို ပွတ်သပ်လိုက်သည်။ သူသည် သူ၏ဘဝနှစ်ခုစလုံးတွင် မာစတာအဆင့်ဂိမ်းကို တစ်ခါမျှ မကစားဖူးခဲ့ပေ။

အဆင့်သတ်မှတ်တန်းစီခြင်းကို နှိပ်လိုက်ပြီး ရဲရှင်းဟွေ့က တိုက်ရိုက် စတင်ရန် နှိပ်လိုက်သည်။

ဂိမ်းတစ်ပွဲကစားပြီး ဆယ်မိနစ်မျှသာအကြာတွင် ရဲရှင်းဟွေ့သည် နတ်ဘုရားတစ်ပါးကဲ့သို့ ဖြစ်နေလေပြီ။

ထိုအခါမှသာ ရဲရှင်းဟွေ့သည် League of Legends မှာ ဤကမ္ဘာတွင် ပေါ်ထွက်လာသည်မှာ အချိန်တိုအတွင်းသာရှိသေးပြီး မာစတာအဆင့်ကစားသမားများပင် ကျွမ်းကျင်မှုအလွန်နိမ့်ကျနေဆဲဖြစ်ကြောင်းကို သဘောပေါက်သွားသည်။

သူက "ပေါင်ပေါင်း ဒီလောက်အချိန်တိုအတွင်း မာစတာအဆင့်ကို ရောက်သွားတာ အံ့ဩစရာမရှိပါဘူး" ဟု သက်ပြင်းချလိုက်၏။

"ဟေ့။ နင် ငါ့အကောင့်နဲ့ ကစားနေတာလား။"

ထိုအခိုက်တွင် ရဲရှင်းဟွေ့၏နောက်မှ ပေါင်ပေါင်း၏အသံ ထွက်ပေါ်လာရာ သူ့ကို လန့်သွားစေသည်။

ရဲရှင်းဟွေ့က နောက်သို့လှည့်ကာ ကွန်ပျူတာကို ညွှန်ပြပြီး

"အတူတူကစားမလား"

"အင်း"

ပေါင်ပေါင်းက ခေါင်းညိတ်လိုက်ပြီး ရဲရှင်းဟွေ့၏နောက်တွင် ရပ်နေဆဲဖြစ်သည်။

အဓိပ္ပာယ်မှာ ထင်ရှားလှသည်။ ၎င်းမှာ သူမ၏နေရာဖြစ်သောကြောင့် ရဲရှင်းဟွေ့ ဘေးသို့သွားသင့်၏။

ရဲရှင်းဟွေ့က ပခုံးတွန့်လိုက်ပြီးနောက် သူမ၏ဘေးတွင်ထိုင်ကာ သူ၏အကောင့်သို့ ဝင်ရောက်လိုက်သည်။

ပေါင်ပေါင်းနှင့်အတူ အဆင့်သတ်မှတ်ဂိမ်းကစားနိုင်ရန် ရဲရှင်းဟွေ့က ဂျာဗစ်ကို သူ၏လက်ရှိအဆင့်ကို မာစတာသို့ တိုက်ရိုက်ပြောင်းခိုင်းလိုက်သည်။

ပြောင်းလဲမှုများ ပြီးဆုံးပြီးနောက် ရဲရှင်းဟွေ့က

"ဂျာဗစ်၊ ဘီလီယံငါးထောင် ဘယ်တော့ရောက်မလဲ"

"သခင်၊ အကောင့်ထဲကို ဒီနေ့နေ့လယ်မှာ ရောက်ပါမယ်။"

"အင်း။"

…

နောက်နာရီအနည်းငယ်အတွင်း ရဲရှင်းဟွေ့သည် ပေါင်ပေါင်းနှင့်အတူ ဂိမ်းများကို ဆက်တိုက်ကစားခဲ့ပြီး နေ့လယ်တွင် ဇီးကွက်က သူတို့နှစ်ဦးကို ထမင်းစားရန်ခေါ်မှသာ ပြီးဆုံးသွားသည်။

ထိုအချိန်တွင်ပင် ရဲရှင်းဟွေ့ထံသို့ စာတစ်စောင်ရောက်လာ၏။ စာ၏အကြောင်းအရာမှာ ဘီလီယံငါးထောင် သူ၏အကောင့်သို့ ရောက်ရှိလာကြောင်းဖြစ်သည်။

"စွမ်းဆောင်ရည်က တော်တော်ကောင်းတာပဲ၊ နာရီအနည်းငယ်အတွင်း ပြီးသွားတယ်။ စကားမစပ် ပိုက်ဆံကို ခဝါချပြီးပြီလား။"

ရဲရှင်းဟွေ့၏မေးခွန်းကို ကြားပြီးနောက် ဂျာဗစ်၏အသံက ဖုန်းထဲမှ ထွက်ပေါ်လာသည်။

"စိတ်မပူပါနဲ့ သခင်၊ အရမ်းသန့်ရှင်းပါတယ်။"

"အင်း၊ ကောင်းတာပေါ့။"

…

ရဲရှင်းဟွေ့နှင့် ပေါင်ပေါင်းတို့သည် မီးဖိုချောင်သို့ ရောက်လာပြီး ရဲရှင်းဟွေ့က စားပွဲအပြည့်ခင်းကျင်းထားသော ဟင်းလျာများကို တွေ့လိုက်ရသည်။

နံရိုးချိုချဉ် ၊အိုးလိပ်ဝက်သား၊ ဝက်သားပြုတ်၊ ငါးပေါင်း၊ ငါးနံ့သာဝက်သားမျှင်ကြော်

စားပွဲပေါ်တွင် ဟင်းလျာများဖြင့် ပြည့်လုနီးပါးဖြစ်နေ၏။

"သေစမ်း။ ခင်ဗျား ပုံမှန်လည်း ဒီလောက်ကောင်းအောင် ချက်တာလား"

ရဲရှင်းဟွေ့က ဤမျှခမ်းနားသောစားသောက်ပွဲကို ကြည့်ကာ မေးလိုက်သည်။

"ဟားဟား"

ဇီးကွက်က ပြုံးလိုက်ပြီး

"လောင်ရှူံးနဲ့ ပေါင်ပေါင်းနဲ့အတူတူဆိုရင် သူတို့စားဖို့ လောက်မယ်လို့ မင်းထင်လို့လား"

ရဲရှင်းဟွေ့ - "..."

ရဲရှင်းဟွေ့သည် ဇီးကွက်၏စကားကို မငြင်းနိုင်ခဲ့ပေ။

ထမင်းစားနေစဉ်တွင် ပေါင်ပေါင်းသည် အလွန်တိတ်ဆိတ်နေပြီး ဖုန်းပွတ်ရင်း ထမင်းစားနေသည်။

ဇီးကွက်က ရဲရှင်းဟွေ့ကို ယာဉ်မောင်းလိုင်စင်စာမေးပွဲဖြေဆိုရန် တိုက်တွန်းနေ၏။

ရဲရှင်းဟွေ့တွင် ယာဉ်မောင်းလိုင်စင်မရှိသော်လည်း သူသည် ကားမောင်းနိုင်သည်။ ယာဉ်မောင်းလိုင်စင်အတွက်မူ ဂျာဗစ်ကိုသာ စီစဉ်ခိုင်းလိုက်လျှင်ရသည်။ ထိုအခါ စာမေးပွဲဖြေဆိုရန် မလိုအပ်တော့ပေ။

တိုက်တွန်းမှု အရာမထင်သောအခါ ဇီးကွက်သည် စကားလမ်းကြောင်းသာ ပြောင်းနိုင်တော့သည်။

"ဒါ လူမှုစနစ်ဖောက်ပြန်တာ မဟုတ်ဘူးလား။"

ထိုအခိုက်တွင် ပေါင်ပေါင်း၏ ရုတ်တရက်ထွက်ပေါ်လာသောစကားကြောင့် ရဲရှင်းဟွေ့နှင့် ဇီးကွက်တို့သည် သူမကို ကြည့်လိုက်ကြသည်။

"လူမှုစနစ်ဖောက်ပြန်တာ ဟုတ်လား။ မင်း ဘယ်သူ့ကိုပြောနေတာလဲ"

ထိုစကားကိုကြားသော် ပေါင်ပေါင်းက သူမ၏မိုဘိုင်းဖုန်းကို ရဲရှင်းဟွေ့ထံသို့ ပေးလိုက်သည်။

ဖုန်းပေါ်မှ အကြောင်းအရာမှာ နိုင်ငံခြားမှ ပြန်လည်မျှဝေထားသော ပို့စ်တစ်ခုဖြစ်သည်။

ပို့စ်၏အကြောင်းအရာမှာ လျှို့ဝှက်ဆန်းကြယ်သော သူဌေးတစ်ဦးက ဘီလီယံငါးထောင်သုံးစွဲ၍ နာမည်ကြီးအနုပညာရှင်တစ်ဦး၏ ခြေအိတ်ကို ဝယ်ယူခဲ့ခြင်းဖြစ်သည်။

"ဖွီး… ဘယ်သူဌေးကများ ဦးနှောက်ထဲမှာ အပေါက်ဖြစ်နေလို့လဲ။ ဘီလီယံငါးထောင်နဲ့ ခြေအိတ်ဝယ်တယ်တဲ့။"

ရဲရှင်းဟွေ့၏စကားကိုကြားသော် ဇီးကွက်သည်လည်း ဖုန်းကိုယူ၍ ကြည့်လိုက်သည်။

"တကယ်ပဲ တော်တော်ထူးဆန်းတာပဲ"

ဇီးကွက်က သဘောတူစွာ ခေါင်းညိတ်လိုက်ပြီးနောက်

"ငါထင်တာတော့ ဒါက ငွေမည်းခဝါချတာဖြစ်မယ်။ ငါမှတ်မိသလောက်တော့ ဒီလေလံကုမ္ပဏီက နိုင်ငံတကာငွေမည်းခဝါချတဲ့ကုမ္ပဏီတစ်ခုနဲ့ ပူးပေါင်းလုပ်ဆောင်နေတာ။ ဒါပေမဲ့ ခြေအိတ်နဲ့ ငွေမည်းခဝါချတာမျိုးကိုတော့ ငါ ခုမှမြင်ဖူးတာပဲ။ ဒီငွေမည်းခဝါချတဲ့လူက တကယ်ပဲ လူမှုစနစ်ဖောက်ပြန်တဲ့ တစ်ယောက်များ ဖြစ်နေမလားပဲ။ ဟားဟားဟား။"

ဤသို့ပြောပြီးနောက် ဇီးကွက်သည် အားရပါးရ ရယ်မောလိုက်၏။

ရဲရှင်းဟွေ့ - "..."

ဘီလီယံငါးထောင်၊ ခြေအိတ်၊ ငွေကြေးခဝါချခြင်း၊ ရဲရှင်းဟွေ့သည် သူ၏ဘီလီယံငါးထောင်ကို ရုတ်တရက် စဉ်းစားမိသွားသည်။

‘သေစမ်း…! ဂျာဗစ်၊ မင်း နည်းနည်းပါးပါး စိတ်ချရတဲ့အလုပ်တစ်ခုခု လုပ်လို့မရဘူးလား။’

ရဲရှင်းဟွေ့သည် သူ၏စိတ်ထဲတွင် အော်ဟစ်လိုက်သည်။

×××××