သမက်ဇာတ်လမ်းကို အချိန်မတိုင်မီ ဇာတ်သိမ်းစေခဲ့သော ရဲရှင်းဟွေ့

မီးဖိုချောင်ထဲတွင် ရဲရှင်းဟွေ့သည် သူ၏အဖေနှင့် သူ၏ဦးလေးငယ်တို့ တိုက်ခိုက်ခဲ့သည်ကို မသိခဲ့ပေ။ သူသည် လက်ရှိတွင် ဇီးကွက်နှင့် တိုက်ခိုက်နေ၏။

သူ၏မိသားစုအတွက် ပထမဆုံးအကြိမ် ချက်ပြုတ်ခြင်းဖြစ်သောကြောင့် ရဲရှင်းဟွေ့သည် ၎င်းကို လုံလောက်စွာခမ်းနားအောင် သေချာပြုလုပ်ခဲ့၏။

အကယ်၍ ပါဝင်ပစ္စည်းများမလုံလောက်ပါက သူသည် မီးလျှံဝင်ပေါက်ကို တိုက်ရိုက်ဖွင့်ကာ ဇီးကွက်ကို သွားဝယ်ခိုင်းသည်။

ဇီးကွက်သည် အစပိုင်းတွင် အနည်းငယ်တွန့်ဆုတ်နေခဲ့၏။ သို့သော် ရဲရှင်းဟွေ့၏ဓားသိုင်းကိုမြင်သောအခါ သူသည် လက်လျှော့လိုက်သည်။ ရဲရှင်းဟွေ့ ဓားအသုံးပြုပုံကိုမြင်ရုံဖြင့် သူ၏ချက်ပြုတ်နိုင်စွမ်းမှာ နောက်စရာမဟုတ်ကြောင်းကို သူသိ၏။

ရဲရှင်းဟွေ့ ချက်ပြုတ်နိုင်သည်ကို သိရှိသွားသောကြောင့်ပင် ဇီးကွက်မှာ ပို၍ပင်မကျေမနပ်ဖြစ်သွားသည်။

ဇီးကွက် မိသားစုစားဖိုမှူးဖြစ်လာရခြင်း၏အကြောင်းမှာ မိသားစုထဲတွင် သူတစ်ဦးတည်းသာ ချက်ပြုတ်နိုင်သည်ဟု သူယုံကြည်သောကြောင့် ဖြစ်၏။ ယခုအခါ ရဲရှင်းဟွေ့ ချက်ပြုတ်နိုင်သည်ကိုမြင်သော် သူလှည့်စားခံခဲ့ရသည်ဟု ခံစားမိသည်။

ဈေးဝယ်ရာမှ ပြန်ရောက်လာသော ဇီးကွက်က အနည်းငယ်မကျေမနပ်ဖြင့်

"ရှင်းဟွေ့၊ မင်းချက်ပြုတ်တတ်တာမဟုတ်ဘူးလား။ ဘာလို့ငါ့ကိုပဲ အမြဲလုပ်ခိုင်းနေရတာလဲ။ နေ့လယ်စာနဲ့ ညစာအချိန်တွေက မိန်းကလေးတွေမြူဆွယ်ဖို့ အကောင်းဆုံးအချိန်တွေဆိုတာ မင်းမသိဘူးလား။"

"ဒါကိုလည်း ခုနကလေးမှ ငါသင်ယူထားတာလေ။"

ရဲရှင်းဟွေ့က ဇီးကွက်ထံသို့လှည့်ကာ ဖြစ်ကတတ်ဆန်းပြောလိုက်၏။

"ပြီးခဲ့တဲ့ညကပဲ ငါထရပ်ကားတိုက်ခံရတဲ့ တာအိုရသေ့အိုတစ်ပါးကို တွေ့ခဲ့တယ်… ပြီးတော့ သူမသေခင်မှာ သူရဲ့ချက်ပြုတ်ရေးအတွေ့အကြုံအားလုံးကို ငါ့ကိုလက်ဆင့်ကမ်းပေးခဲ့တယ်။ အဲ့လိုနဲ့ ငါချက်ပြုတ်တတ်လာတာ။"

ဇီးကွက်: "..."

ဇီးကွက်သည် ရဲရှင်းဟွေ့၏အရှက်မရှိမှုကြောင့် စကားမပြောနိုင်ဖြစ်သွား၏။ ရဲရှင်းဟွေ့သည် ဇီးကွက် ဝယ်လာခဲ့သော ပါဝင်ပစ္စည်းများကိုယူကာ ချက်ပြုတ်စပြုလိုက်သည်။ ဇီးကွက်မှာမူ တိတ်တဆိတ်ကြည့်နေရုံသာ တတ်နိုင်ခဲ့၏။

မကြာမီမှာပင် ဟင်းလျာများမှာ တစ်ပွဲပြီးတစ်ပွဲ တည်ခင်းလာပြီးနောက် အဖုံးများဖြင့် ဖုံးအုပ်ထားသည်။

အကယ်၍ မဖုံးအုပ်ထားပါက ဟင်းလျာများမှ ရွှေရောင်အလင်းများ ထွက်လာမည်မဟုတ်ပေ။ ဖုံးအုပ်ထားပြီးနောက် ဟင်းလျာများ၏အပူချိန်နှင့် လတ်ဆတ်မှုမှာ တံဆိပ်ခတ်ထားသကဲ့သို့ ဖြစ်နေပေလိမ့်မည်။ သူတို့မဖော်သရွေ့ သူ၏နည်းပညာသည် ဟင်းလျာများကို အချိန်အတန်ကြာသည်အထိ အတူတူဖြစ်နေစေမည်ဖြစ်သည်။

မီးဖိုချောင်ထဲမှမွှေးရနံ့သည် ဧည့်ခန်းသို့ လျင်မြန်စွာ ပျံ့နှံ့သွား၏။ ပေါင်ပေါင်းက နှာရှုံ့လိုက်ပြီး

"ဇီးကွက်က အရသာရှိတဲ့အစားအစာတွေ လုပ်ထားတယ်။"

အလွန်ကြွယ်ဝသောချက်ပြုတ်ရေးအတွေ့အကြုံရှိသော စုချန်နှင့် ယန်အန်နာတို့သည် လေထဲမှမွှေးရနံ့ကို ရှူရှိုက်လိုက်ပြီး ခေါင်းညိတ်လိုက်ကြ၏။

စုချန်က ရယ်မောကာ

"ဟားဟားဟား… ဇီးကွက်ကိုထားခဲ့တာ တကယ်ပဲမှန်ကန်တဲ့ဆုံးဖြတ်ချက်ပဲ။"

ဧည့်ခန်းထဲမှဆိုဖာပေါ်တွင် တစ်ဖန်ပြန်ထိုင်နေသော ရဲချန်သည်လည်း

"ဒါပေါ့၊ ဘယ်သူက လူကိုရွေးခဲ့လဲဆိုတာ မင်းမတွေ့ဘူးလား။"

အမှန်တကယ်တွင် ရဲချန်နှင့် စုချန်တို့သည် ဇီးကွက်နှင့် ဝက်ဝံကန်းကို နေခိုင်းစဉ်ကတည်းက စဉ်းစားပြီးဖြစ်သည်။ မည်သို့ပင်ဖြစ်စေ သူတို့အပြင်ထွက်၍ ပျော်ပါးလျှင်ပင် သူတို့၏သားများကို အိမ်တွင်ဗိုက်ဆာစေ၍မဖြစ်ပေ။ သို့ဖြစ်၍ အထူးစားဖိုမှူးလက်မှတ်ရှိသော ဇီးကွက်မှာ အကောင်းဆုံးရွေးချယ်မှုဖြစ်လာခဲ့၏။

ဝက်ဝံကန်းအတွက်မူ သူမှာ အပိုဆုတစ်ခုမျှသာဖြစ်သော်လည်း ပေါင်ပေါင်းက ဝက်ဝံကန်းမှာ သူမနှင့်အတူ နေ့စဉ်ဂိမ်းကောင်းကောင်းကစားပေးသည်ဟုဆိုရာ စုချန်ကို အလွန်ကျေနပ်စေသည်။

ဝက်ဝံကန်းသည် ရဲချန်နှင့် သူ၏ဇနီးဘာစဉ်းစားနေသည်ကို မသိပေ။ သူက ရယ်မောကာ နောက်ပြောင်လိုက်၏။

"ဇီးကွက်အိုက သူရဲ့အရင်ဘဝကိုစွန့်လွှတ်ပြီးတဲ့နောက် သူအတော်ဆုံးက မိန်းကလေးတွေမြူဆွယ်တာနဲ့ ချက်ပြုတ်တာပဲ။"

"ဇီးကွက်မဟုတ်ဘူး။"

ဝက်ဝံကန်းစကားဆုံးသည်နှင့် ရဲရှင်းချန်၏အသံသည် မီးဖိုချောင်တံခါးမှ ထွက်ပေါ်လာ၏။ လူအများအပြား မီးဖိုချောင်တံခါးဆီသို့ ကြည့်လိုက်ကြပြီး ရဲရှင်းချန်က သူ၏လက်မဖြင့် မီးဖိုချောင်ကိုညွှန်ပြကာ လူတိုင်းကို တစ်ချက်ကြည့်သင့်ကြောင်းကို ညွှန်ပြနေသည်ကို တွေ့လိုက်ရသည်။

ပထမဆုံးလျှောက်သွားသူများမှာ ရဲချန်နှင့် စုချန်တို့ဖြစ်၏။ လင်မယားနှစ်ဦးသည် မီးဖိုချောင်ထဲတွင် ချက်ပြုတ်နေသူမှာ ဇီးကွက်မဟုတ်ဘဲ ရဲရှင်းဟွေ့ဖြစ်သည်ကိုမြင်သောအခါ မှင်သက်သွားကြသည်။

"ဟင်။ ရှင်းဟွေ့က တကယ်ချက်တတ်တာလား။"

ရဲချန်သည် ပထမဆုံးတုံ့ပြန်သူဖြစ်၏။ ရဲချန်၏စကားကိုကြားသော် စုချန်၏မျက်နှာအမူအရာမှာ ပျော်ရွှင်မှုဖြင့်ပြည့်နှက်နေ၏။ သူမက ပြုံးလိုက်ပြီး

"ကောင်းပြီ။ ရှင်းဟွေ့ချက်ပြုတ်တတ်လိမ့်မယ်လို့ ငါမထင်ထားခဲ့ဘူး၊ ပြီးတော့ သူတော်တော်ကောင်းကောင်းလုပ်တတ်ပုံပဲ။"

စုချန် သူမ၏သား ချက်ပြုတ်နိုင်သည်ကိုမြင်သောအခါ သူမသည် ရဲရှင်းဟွေ့ မှော်ပညာလုပ်နိုင်ပြီး တံခါးပေါက်များဖွင့်နိုင်သည်ကိုမြင်ရသည်ထက်ပင် ပို၍အံ့ဩသွား၏။

ပန်းကန်များပေါ်တွင် ဟင်းလျာများတင်နေသော ရဲရှင်းဟွေ့သည် မီးဖိုချောင်တံခါးဝတွင် လူများစွာကြည့်နေသည်ကိုမြင်၏။ သူက ပြုံးလိုက်ပြီး

"မကြာခင်ပြီးတော့မယ်။ စားပွဲပြင်ထားလိုက်။"

ရဲရှင်းဟွေ့၏စကားကိုကြားသော် ပေါင်ပေါင်းနှင့် ဝက်ဝံကန်းတို့သည် ပထမဆုံးတုံ့ပြန်သူများဖြစ်ကြ၏။ သူတို့သည် စားပွဲဆီသို့ ချက်ချင်းပြေးသွားပြီး ပြင်ဆင်လိုက်ကြသည်။

စားပွဲပြင်ဆင်ပြီးဖြစ်ပြီး ဇီးကွက်က အဖုံးအုပ်ထားသောဟင်းလျာများကို သယ်ဆောင်ကာ စားပွဲပေါ်တွင် တင်ထားလိုက်၏။

လူတိုင်းသည် ဤဟင်းလျာများကို အဘယ်ကြောင့်ဖုံးအုပ်ထားသည်ကို အနည်းငယ်နားမလည်နိုင်ဖြစ်နေကြသည်။ သူတို့နားမလည်နိုင်ဖြစ်နေသော်လည်း မည်သူမျှမမေးခဲ့ပေ။

ရဲရှင်းဟွေ့က နောက်ဆုံးဟင်းပွဲကို စားပွဲပေါ်တွင်တင်ထားလိုက်ပြီးနောက်

"ဒီဟင်းပွဲတွေကို ခုမဖွင့်ကြနဲ့ဦး။ ကျွန်တော် ဦးလေးရဲဖန်ကို သွားခေါ်လိုက်ဦးမယ်။"

ထိုသို့ပြောပြီးနောက် ရဲရှင်းဟွေ့သည် တံခါးပေါက်တစ်ခုကိုဖွင့်ကာ လျှောက်ဝင်သွားသည်။

ရဲဖန်၏အိမ်၌ ထိုအချိန်တွင် ချန်ယင်းယင်း၏ဆွေမျိုးတစ်ဦးသည် သူမကို ဝေဖန်ရန် အစည်းအဝေးတစ်ခု ကျင်းပနေ၏။ ဝေဖန်ရေးအစည်းအဝေးတွင် အကြောင်းအရာနှစ်ခုရှိ၏။ တစ်ခုမှာ သူမကို ရဲဖန်နှင့်ကွာရှင်းပြီး သခင်လေးလုံနှင့် လက်ထပ်စေရန်ဖြစ်ပြီး နောက်တစ်ခုမှာ ချန်ရွှယ့် သတိလစ်သွားပြီး သူမ၏မျက်နှာကို နင်းခြေခံခဲ့ရခြင်းဖြစ်သည်။

ရဲဖန်သည် မူလကရှေ့သို့တိုးလိုသော်လည်း ချန်ယင်းယင်းက သူ့ကိုတားဆီးခဲ့သည်။ ချန်ယင်းယင်းသည် ယခုအခါ ရဲဖန်၏မိသားစုမှာ မည်သို့သောတည်ရှိမှုမျိုးဖြစ်ပြီး ရဲဖန်မှာ မည်သို့သောတည်ရှိမှုမျိုးဖြစ်သည်ကို သိရှိထား၏။ ချန်မိသားစုအတွက်မူ သူတို့မှာ သာမန်လူတစ်စုမျှသာဖြစ်သည်။ သို့ဖြစ်၍ သူမသည် အရာများကို သူမ၏ကိုယ်ပိုင်နည်းလမ်းဖြင့် ဖြေရှင်းလို၏။

သို့သော် သူမသည် အမှန်တကယ် သူမလိုချင်သောအရာကို ရရှိနိုင်ပါမည်လားဆိုလျှင်မူ မရနိုင်ပေ။ ချန်မိသားစု၏အခက်အခဲများကြောင့် အရာအားလုံးကို သူမကိုယ်တိုင်ဖြေရှင်းလိုသော ချန်ယင်းယင်းမှာ အနည်းငယ်စိုးရိမ်လာ၏။

အကယ်၍ ရဲရှင်းဟွေ့သာ သိရှိခဲ့ပါက သူသည် "အာ။ ဒါက သမက်ဇာတ်လမ်းရဲ့ ဇာတ်လိုက်မင်းသမီးပဲ။ သူဘာမှမရှိဘဲ သူ့ယောက်ျားကိုအကူအညီတောင်းရုံပဲလိုတာကို ခေါင်းမာနေတုန်းပဲ။" ဟု တစ်ဖန်ထပ်ညည်းညူပေလိမ့်မည်။

ရဲဖန်သည် ချန်မိသားစု၏ရန်လိုမှုဒဏ်ကိုမခံနိုင်တော့ဘဲ အရေးယူရန်ပြင်ဆင်နေစဉ်မှာပင် တံခါးခေါက်သံထွက်ပေါ်လာ၏။ သူတံခါးဖွင့်လိုက်သောအခါ သူ၏တူဖြစ်သူ ရဲရှင်းဟွေ့ဖြစ်နေသည်ကို တွေ့ရှိခဲ့သည်။

"ရှင်းဟွေ့ ရောက်လာပြီ။"

ရဲရှင်းဟွေ့ကိုမြင်သော် ချန်ယင်းယင်းသည်လည်း နှုတ်ဆက်လိုက်၏။ ရဲရှင်းဟွေ့သည် အခြေအနေမကောင်းသည်ကိုမြင်ပြီး "ဘာဖြစ်နေကြတာလဲ။" ဟု မေးလိုက်သည်။

ရဲဖန် ထိုစကားကိုကြားသော် ဖြစ်ပျက်ခဲ့သည်ကိုပြောပြပြီး ရဲရှင်းဟွေ့ကို မျက်စိမှိတ်ပြလိုက်၏။ သူ၏ဦးလေး၏အမူအရာကိုမြင်သော် သူအရေးယူရမည့်အချိန်ရောက်ပြီဖြစ်ကြောင်းကို သူသိလိုက်သည်။

ရဲဖန် သူဆိုလိုရင်းကို သူနားလည်သည်ကိုမြင်သောအခါ သူ၏နှုတ်ခမ်းများပေါ်တွင် မှိန်ဖျော့သောအပြုံးတစ်ခု ပေါ်ပေါက်လာ၏။ သူအရေးမယူနိုင်သောကြောင့် သူ၏တူကို လုပ်ခိုင်းလိုက်မည်။

ရဲဖန်သည် ချန်ယင်းယင်းအား သူအရေးယူမည်မဟုတ်ဟု ကတိပေးခဲ့သော်လည်း သူ၏မိသားစုမှအခြားသူများ အရေးမယူနိုင်ဟု မပြောခဲ့ပေ။

ရဲရှင်းဟွေ့၏နည်းလမ်းအမျိုးမျိုးကိုထားဦး၊ သူ၏လက်ရှိငွေကြေးပိုင်ဆိုင်မှုများကိုအသုံးပြုရုံဖြင့် ချန်မိသားစုတစ်ခုလုံးကို အနိုင်ယူနိုင်သည်။

ရဲရှင်းဟွေ့က ချန်ယင်းယင်း၏ရှေ့တွင်ရပ်ကာ

"ခင်ဗျားတို့ ဒီလောက်ရန်လိုနေတာ မကောင်းဘူးနော်။"

"မင်းဘယ်သူလဲ။ မင်းမှာ ဒီမှာစကားပြောခွင့်ရှိလို့လား။"

"ဟုတ်တယ် ဟုတ်တယ်။ ဒါက ငါတို့ချန်မိသားစုရဲ့ကိစ္စ။ မင်းလိုအပြင်လူတစ်ယောက်နဲ့ ဘာဆိုင်လို့လဲ။"

"ဟင်။ ခဏလေး၊ ဒီကောင်လေး ရင်းနှီးနေသလိုပဲ။"

"တကယ်ရင်းနှီးနေသလိုပဲ။"

"ကြည့်ရတာ… သူက မွေးနေ့ပွဲမှာပေါ်လာတဲ့ ကောင်လေးပဲ။"

"သေစမ်း။ တကယ်ပဲသူပဲ…"

ထိုအချိန်တွင် ချန်ယင်းယင်း၏မိဘများမှာ ရှိမနေကြပေ။ သူတို့သည် သူတို့၏သမီး အတင်းအကျပ်ဖိအားပေးခံရသည်ကို မမြင်လိုသောကြောင့် မလာရောက်ခဲ့ခြင်းဖြစ်နိုင်သည်။ သို့သော် ချန်ယင်းယင်း၏မိဘများမရှိလျှင်ပင် ချန်မိသားစုမှာမူ ရဲရှင်းဟွေ့၏အသွင်အပြင်ကို အသိအမှတ်ပြုနေဆဲဖြစ်သည်။

ရဲရှင်းဟွေ့သည် ဤလူများနှင့် ပတ်သက်လိုခြင်းမရှိပေ။ သူတို့သည် ချန်မိသားစု၏စည်းစိမ်ဥစ္စာအတွက်သာ ချန်ယင်းယင်းကို အတင်းအကျပ်ဖိအားပေးရန် ရောက်ရှိလာကြ၏။ အကယ်၍ ချန်မိသားစုသာ အလွန်ဆင်းရဲခဲ့ပါက သူတို့သည် ပြဿနာရှာရန် စိတ်ရှိဦးမည်မဟုတ်ပေ။

ရဲရှင်းဟွေ့က သူ၏ဖုန်းကို ထုတ်ယူကာ

"ဂျားဗစ်၊ နဂါးဘုရင်တစ်ပါးအနေနဲ့ ချန်မိသားစုရဲ့စက်မှုလုပ်ငန်းအားလုံးကို ဖျက်ဆီးလိုက်၊ သူတို့လိုချင်သလောက် အကြွေးတင်နိုင်အောင်။ ပြီးရင် ငါ့အဒေါ်ကို သူတို့ကိုဖြည်းဖြည်းချင်း ပြန်ဆပ်ခိုင်းလိုက်။"

ရဲရှင်းဟွေ့သည် သူလုပ်ခဲ့သောအရာမှာ ကောင်းမွန်သည်ဟု ခံစားမိ၏။ ၎င်းမှာ သူ၏ဦးလေး၏သမက်ဘဝကို အဆုံးသတ်ပေးခဲ့သောကြောင့်ဖြစ်သည်။ အကယ်၍ ရဲဖန်သာ သူကိုယ်တိုင်လုပ်ခဲ့မည်ဆိုလျှင် သူခန့်မှန်းသည်မှာ ထိုဇာတ်လမ်းဇာတ်ကွက်မှာ နောက်ထပ်စာလုံးပေါင်းသန်းပေါင်းများစွာ အသုံးပြုပေလိမ့်မည်။

ချန်မိသားစုကိုသာ ဒေဝါလီခံခိုင်းလိုက်။ ဒါဆိုဖြေရှင်းပြီးသားဖြစ်သွားလိမ့်မည်။

အကယ်၍ ထိုသခင်လေးလုံဟုခေါ်သောသူက ရဲတင်းနေသေးပါက ရဲရှင်းဟွေ့သည် လုံမိသားစုကိုပါ ဒေဝါလီခံခိုင်းရန် စီစဉ်ထား၏။

မည်သို့ပင်ဖြစ်စေ ရဲရှင်းဟွေ့သည် ဂျားဗစ်ကို နဂါးနတ်ဘုရားခန်းမကိုဟက်ခ်လုပ်ကာ လုပ်ဆောင်ခိုင်းသောကြောင့် သူ၏ဦးလေးမှာ အပြစ်လွှဲချခံရမည့်သူဖြစ်သည်။ ရဲရှင်းဟွေ့သည် သူလိုချင်သမျှကို လုပ်ဆောင်နိုင်၏။

မည်သို့ပင်ဖြစ်စေ သူတို့အားလုံးမှာ နိုင်ငံကြီးများ၏သမ္မတများ သို့မဟုတ် ခေါင်းဆောင်များကို ခြိမ်းခြောက်ရန်သွားမည့်လူများဖြစ်သည်။

အရာများမှာ အလွန်ရိုးရှင်းလွန်းပြီး ရဲရှင်းဟွေ့ ယခုအခါစဉ်းစားနေသောအရာအားလုံးမှာ ရှောင်ဟာ့ကို မည်သို့ထုတ်ပို့ရမည်ဟူသောအချက်ပင်။

×××××