သမိုင်းတွင် အသက်အငယ်ဆုံး စီနီယာအဆင့် ဆေးပညာရှင်

ချူးယွင်ဖန်းသည် ကုန်းပုယီကို ခပ်ဖျော့ဖျော့ အပြုံးဖြင့် ကြည့်နေသည်။ ကုန်းပုယီသည် သူ့ကို စကားဆက်မပြောစေချင်ကြောင်း သိသာထင်ရှားသည်။ မည်သို့ပင်ဆိုစေကာမူ၊ သူသည် ဤအဆိပ်ဖြေဆေးကို ခက်ခက်ခဲခဲ တီထွင်ခဲ့သည်။ ချူးယွင်ဖန်းသာ အရာအားလုံးကို လူသိရှင်ကြားဖြစ်သည်အထိ ဆက်ပြောမည်ဆိုလျှင် ကောင်းမွန်မည် မဟုတ်ပေ။ ချူးယွင်ဖန်းသည် ထိုကဲ့သို့ မပြုလုပ်နိုင်သော်လည်း ကုန်းပုယီသည် သူကို ပြုလုပ်နိုင်သည်ဟု ထင်မှတ်နေသည်။

ထို့အတွက်ကြောင့် သူသည် ချူးယွင်ဖန်းကို စကားဆက်ပြောခွင့်မပြုခဲ့ပေ။ ချူးယွင်ဖန်းတွင် ၎င်းကို ပြုလုပ်နိုင်သည့် ခွန်အားမျိုးရှိနေပြီဖြစ်သောကြောင့် သူ့အတွက် အခက်တွေ့အောင် ဆက်လက်လုပ်ဆောင်ခြင်းသည် အဓိပ္ပါယ်မရှိပေ။ သို့သော် ချူးယွင်ဖန်းက မည်သူဖြစ်သည်ကို သူ သိချင်နေသည်။ ကုန်းပုယီသည် စီနီယာအဆင့် ဆေးပညာရှင် အကဲဖြတ်ချက်ကို ခံယူချိန်တွင် ကြောက်ရွံ့တုန်လှုပ်နေခဲ့ရသည်ကို သိထားရပေလိမ့်မည်။ သူသည် နောက်ဆုံးတွင် စာမေးပွဲကို ခက်ခက်ခဲခဲ အောင်မြင်ခဲ့လေသည်။ သူသည် ထိုအချိန်တွင် ကံတရားကို အနည်းနှင့် အများ အားကိုးခဲ့ရသည်။ အထူးတလည် ခွဲခြားရခက်ခဲသော ဆေးဖက်ဝင်ဆေးများ မရှိဝင်ခဲ့ခြင်းကြောင့် မဟုတ်ပါက၊ စာမေးပွဲကို အောင်မြင်ခဲ့မည် မဟုတ်ပေ။

ကုန်းပုယီသည် စမ်းသပ်မှုအားလုံးကို အလွယ်တကူ ပြီးမြောက်နိုင်ခဲ့သည့် ချူးယွင်ဖန်းကဲ့သို့ မဟုတ်ခဲ့ပေ။ ကျန်ရှိနေသော အကြီးအကဲ နှစ်ယောက်သည် ဆက်လက်စစ်ဆေးရန် မလိုအပ်တော့ပေ။ ချူးယွင်ဖန်းသည် မေးခွန်းသုံးခုကို မှန်ကန်စွာဖြေကြားခဲ့ပြီဖြစ်သောကြောင့် ထုံးစံအတိုင်း ဆက်လက် ပြုလုပ်ရန်မလိုအပ်ပေ။ လူအုပ်ကြီးသည် ချက်ချင်းဆိုသလိုပင် ရုတ်ရုတ်သဲသဲ ဖြစ်သွားလေသည်။ ၎င်းတို့အရှေ့တွင် အံ့ဖွယ်ဖြစ်ရပ်တစ်ခု ဖြစ်ပျက်သွားခြင်း မြင်တွေ့ခဲ့ရသည်။

"စီနီယာအဆင့် ဆေးပညာရှင်၊ သူ တကယ်ပဲ စီနီယာအဆင့် ဆေးပညာရှင် အကဲဖြတ်မှုကို အောင်သွားတယ်။ ဒါဆို အခု သူ့ကို ဘယ်လိုခေါ်ရမလဲ။ သခင်ကြီးချူး"

"သူက လမ်းတစ်လျှောက်မှာရှိတဲ့ အတားအဆီးတွေကို ဖြတ်ကျော်နိုင်ခဲ့တာပဲ၊၊ ဒီလိုမျိုး ပါရမီရှင်မျိုး ဝေ့တိုင်းပြည်မှာ ဘယ်အချိန်က ပေါ်လာခဲ့တာလဲ"

"ဒီစံနှုန်းနဲ့ဆိုရင် ဆေးပညာရှင်ဖြစ်ဖို့ ဘယ်လောက်ကြာမှာလဲ၊ ဘယ်လောက်မှ ကြာလိမ့်မယ်မထင်ဘူး"

လူတိုင်း ရုတ်ရုတ်သဲသဲဖြစ်သွားကြသည်။ လူအုပ်ထဲရှိနေသည့် ယဲ့ချောင်ရှင်သည်လည်း လုံးလုံးလျားလျား အံ့ဩသွားသည်။ သူမသည် ယခင်က ကြိုတင်ခန့်မှန်းချက်အချို့ရှိခဲ့သော်လည်း ချူးယွင်ဖန်းသည် စီနီယာအဆင့် ဆေးပညာရှင်တစ်ယောက် အမှန်တကယ်ဖြစ်လာသောအခါ သူမသည် ၎င်းကို အစစ်အမှန် မဟုတ်ဟု ခံစားနေမိဆဲဖြစ်သည်။ ချူးယွင်ဖန်းသည် သူမ သိထားသည့် အသက်အငယ်ဆုံး စီနီယာအဆင့် ဆေးပညာရှင်ဖြစ်ပေသည်။

ဤမျှ ထူးချွန်၍ ငယ်ရွယ်သော စီနီယာအဆင့် ဆေးပညာရှင်မဆိုနှင့် ငယ်ရွယ်သောစီနီယာအဆင့် ဆေးပညာရှင်ပင် မရှိခဲ့ဖူးပေ။ ထိုရုန်းရင်းဆန်ခတ်မှုကြားတွင် ချူးယွင်ဖန်းသည် သူ၏စီနီယာအဆင့် ဆေးပညာရှင်လက်မှတ်ကို ယူဆောင်ရန် ကုန်းပုယီနှင့် ထွက်ခွာသွားခဲ့သည်။ ချူးယွင်ဖန်းသည် မှတ်ပုံတင်မှုကိုလည်း ပြုလုပ်ရမည်ဖြစ်သည်။ ထိုအချိန်တွင် ကုန်းပုယီသည် ချူးယွင်ဖန်း၏ နောက်ကြောင်းရာဇဝင်ကို သိရှိသွားခဲ့သည်။ မှန်သည်၊ ထိုအရာအားလုံးကို အခြားလူများကသာ ကိုင်တွယ်ဖြေရှင်းရမည်ဖြစ်သောကြောင့် ချူးယွင်ဖန်းသည် စိတ်ရှည်ရှည် စောင့်ဆိုင်းရန်သာလိုအပ်သည်။

"မိတ်ဆွေ၊ ခင်ဗျားက တကယ့်ကို ငယ်ရွယ်ပြီး အလားအလာကောင်းတဲ့လူပဲ။ အမှန်အတိုင်း ပြောရရင် ခင်ဗျားလို ပါရမီရှင်မျိုး တစ်ခါမှ မတွေ့ဖူးဘူး" ဧည့်ခန်းထဲတွင်စောင့်နေသော ကုန်းပုယီက ထိုသို့ တိုက်ရိုက်ပြောလိုက်သည်။

ချူးယွင်ဖန်းက ခပ်ပါးပါး ပြုံးလိုက်သည်။ ဤကမ္ဘာကြီးတွင် သန်မာသူများသည် လေးစားခံရလေ့ရှိသည်။ ကုန်းပုယီသည် သူ၏ ခွန်အားကို လျှော့မတွက်ဝံ့နေသည်မှာ သိသာထင်ရှားသည်။ သို့သော် တကယ်တမ်းတွင်၊ ကုန်းပုယီသည် ချူးယွင်ဖန်းကို လျှော့တွက်နေဆဲဖြစ်သည်။ ချူးယွင်ဖန်း၏ နောက်ဆုံးကန့်သတ်ချက်ဟုသာ သူတွေးထင်နေသည့် ကျွမ်းကျင်မှုသည် အမှန်တကယ် ကျွမ်းကျင်မှုအဆင့်နှင့် ဝေးကွာနေကြောင်း သူ မသိခဲ့ပေ။

"ဥက္ကဌကုန်းကတော့ ကျုပ်ကို မြှောက်ပင့်နေပြန်ပြီ" ချူးယွင်ဖန်းက ပြောလိုက်သည်။

ကုန်းပုယီသည် ချူးယွင်ဖန်းကို လျှော့မတွက်ဝံ့ပေ။ စီနီယာအဆင့် ဆေးပညာရှင်တစ်ဦးသည် ဝေ့တိုင်းပြည်၏ ဆေးပညာရှင်အဖွဲ့အစည်းတွင် ဒေသဆိုင်ရာဌာနခွဲတစ်ခု၏ ဥက္ကဠဖြစ်လာနိုင်သည်။ သူသည် ဌာနချုပ်တွင်ရှိနေပါက၊ ရာထူးကြီးသော အကြီးအကဲတစ်ဦးပင် ဖြစ်လာနိုင်သည်။ ထို့အပြင် ချူးယွင်ဖန်းသည် အလွန်ငယ်ရွယ်နေသေးသည်။ သူသည် နှစ်နှစ်အတွင်း ကျွမ်းကျင်သော ဆေးပညာရှင်တစ်ဦးဖြစ်လာရန် အလားအလာရှိနိုင်သည်။ ထိုအချိန်တွင်၊ သူ၏ အခွင့်အာဏာသည် ကုန်းပုယီ၏ အထက်တွင် ရှိနေပေလိမ့်မည်။

"ကျုပ် မမေးရသေးဘူးပဲ၊ မိတ်ဆွေက ခုန်းလုံမြို့ကလား" ကုန်းပုယီက မေးလိုက်သည်။

"အိုး တကယ်တော့၊ ကျုပ်က ဂုဏ်သရေရှိ ချူးမိသားစုရဲ့ မိသားစုဝင်တစ်ယောက်ပါ" ချူးယွင်ဖန်းက မတိမကျ ပြောလိုက်သည်။

၎င်းသည် လျှို့ဝှက်ချက်မဟုတ်သည့်အပြင် အနှေးနှင့် အမြန် ပေါ်လွင်လာမည်ဖြစ်သောကြောင့် ချူးယွင်ဖန်းသည် ၎င်းအကြောင်းအရာကို မဖုံးကွယ်ထားခဲ့ပေ။

"ဒါဆို ခင်ဗျားက မြင့်မြတ်တဲ့မိသားစုက ဆင်းသက်လာတာပေါ့" ကုန်းပုယီက ရုတ်တရက် သဘောပေါက်သွားသည်။ ကြီးမြတ်သော ဝေ့တိုင်းပြည်၏စနစ်တွင် မြင့်မြတ်သော မိသားစုများသည် မြင့်မားသော အဆင့်အတန်းမျိုး ပိုင်ဆိုင်ထားကြသည်။ တစ်ချိန်တည်းမှာပင်၊ ၎င်းတို့သည် လူအများ စိတ်ကူးမယဉ်ဝံ့သည့် အင်အားကြီးသော ငွေကြေးအရင်းအမြစ်များကိုလည်း ပိုင်ဆိုင်ထားကြသည်။

"ချူးမိသားစုကနေ တိုက်ရိုက်ဆင်းသက်သူလို့တော့ ယူဆလို့မရဘူး။ ကျုပ်က အကိုင်းအခက်မိသားစုဝင်တစ်ယောက်ပါ" ချူးယွင်ဖန်းက ဘာသိဘာသာ ပြောလိုက်သည်။ သူကိုယ်တိုင်မဆိုနှင့် သူအစားထိုးဝင်ရောက်ခဲ့သော ချူးယွင်ဖန်းလျှင်ပင် မြို့ဝန်ကျုံးရှင်နှင့် ဆွေမျိုးဝေးတစ်ဦးဖြစ်သည်။

ချူးယွင်ဖန်းသည် ချူးမိသားစုမှ ဆင်းသက်လာသည့်အတွက် ဂုဏ်ယူလိုစိတ်မရှိကြောင်း တွေ့လိုက်ရသောအခါ ကုန်းပုယီသည် ၎င်းကို ပုံမှန်ဖြစ်စဥ်ဟုသာ ခံစားမိလိုက်သည်။ ချူးယွင်ဖန်း၏ ဆေးပညာတွင် လက်ရှိအောင်မြင်မှုများအရ၊ သူသည် မြို့ဝန်ကျုံးရှင်နှင့်ပင် တန်းတူရည်တူရှိနိုင်ပေသည်။

မြို့ဝန်ကျုံးရှင်၏ မိသားစုဝင်တစ်ဦးဖြစ်ခြင်းသည် အခြားသူများအတွက် ဂုဏ်ယူဖွယ်ဖြစ်နိုင်သော်လည်း ချူးယွင်ဖန်းအတွက်မူ ၎င်းသည် မပြောပါ့လောက်ပေ။ နောင်တွင် ချူးယွင်ဖန်းသည် ဆေးပညာကျွမ်းကျင်သူဖြစ်လာပါက၊ သူ၏အဆင့်အတန်းသည် မြို့ဝန်ထက်သာလွန်မည်ဖြစ်သည့်အပြင် ထိုကျော်ကြားနေသော မင်းညီမင်းသားများနှင့်ပင် တန်းတူညီမျှဖြစ်လာပေလိမ့်မည်။ ဤသည်မှာ ဆေးပညာလမ်းကြောင်းပေါ်ရှိ လူတိုင်းတွင် ရှိသင့်ရှိထိုက်သည့် မာနဖြစ်သည်။

“ဪ ဒါနဲ့၊ ခင်ဗျားမှာ ကျုပ်ရဲ့ အာဒိကပ္ပဝိဉာဉ်ကို အမှတ်အသားလုပ်နိုင်တဲ့ အမိန့်ပေး မန္တန်မျိုးရှိလား။ တစ်ခုခုဆိုရင် ကျုပ် ခင်ဗျားကို ချက်ချင်း ဆက်သွယ်လို့ရတာပေါ့” ကုန်းပုယီက ဆိုသည်။

ဝိညာဉ်နယ်မြေတွင် ပြည်ထောင်စုကဲ့သို့ ကိုယ်ပိုင်ဆက်သွယ်ရေးစက်များ မရှိကြပေ။ သို့သော် သိုင်းပညာကို အခြေခံ၍ တီထွင်ထားသော အခြားစနစ်တစ်ခုရှိနေဆဲဖြစ်သည်။ ၎င်းသည် ကျွမ်းကျင်သူများကြား လက်ဆင့်ကမ်းထားသည့် ဆက်သွယ်ရေး မန္တန်တစ်ခုဖြစ်သည်။ မွေးဖွားခြင်းနယ်မြေအဆင့်အထက်ရှိ ကျွမ်းကျင်ပညာရှင်များသည် ၎င်းထဲသို့ အာဒိကပ္ပဝိဉာဉ်ကိုအပိုင်းအစတစ်ခုကို ထည့်သွင်းကာ မိုင်ထောင်ပေါင်းများစွာအကွာအဝေးမှ စာတိုများ ပေးပို့နိုင်ကြသည်။ ၎င်းသည် ပြည်ထောင်စုတွင် ဖုန်းခေါ်ဆိုခြင်းနှင့် ဆင်တူပေသည်။

"ရှိပါတယ်" ချူးယွင်ဖန်းက ပြောလိုက်သည်။

သူသည် အမိန့်ပေးမန္တန်ကို ထုတ်ယူလိုက်သည်။ သူသည် တစ်နှစ်ပတ်လုံးတွင် ချူးဟုန်ချိုင်ကိုသာ မိတ်ဆွေအဖြစ် အမှတ်အသားပြုလုပ်ခဲ့၍ ကုန်းပုယီသည် ဒုတိယမြောက်ဖြစ်သည်။ ကုန်းပုယီကို မိတ်ဆွေအဖြစ် အမှတ်အသားပြုလုပ်ပြီး သိပ်မကြာမီတွင် အကြီးအကဲရွှီသည် သက်သေခံကတ်ပြားတစ်ခုဖြင့် ရောက်ရှိလာသည်။ ၎င်းသည် "ချူးယွင်ဖန်း—စီနီယာအဆင့် ဆေးပညာရှင်" ဟူသော စာလုံးများပါရှိ၍ ထူးခြားသော သတ္တုမျိုးဖြင့် ပြုလုပ်ထားသည့် ကတ်ပြားတစ်ခုဖြစ်သည်။

၎င်းသည် ဆေးပညာအစည်းအရုံး၏ အထူးနည်းလမ်းဖြင့် ပြုလုပ်ထားသော အထောက်အထားကတ်ပြားဖြစ်သည်။ မည်သူမျှ တုပ၍မရသကဲ့သို့ မည်သူမျှလည်း တုပဝံ့မည် မဟုတ်ပေ။ ပြုလုပ်ဝံ့ပါက၊ ၎င်းတို့သည် ဆေးပညာအစည်းအရုံးတစ်ခုလုံး၏ လိုက်လံဖမ်းဆီးခြင်းကို ခံရပေလိမ့်မည်။ ချူးယွင်ဖန်းက သက်သေခံကတ်ပြားကို သိမ်းဆည်းပြီးနောက်၊ ကုန်းပုယီသည် သူ့ကို ထမင်းအတူစားရန် ဖိတ်ကြားလိုခဲ့သည်။ သူသည် အကန့်အသတ်မဲ့သော အနာဂတ်မျိုးရှိသည့် ဤလူငယ်ပါရမီရှင်ကို ချည်နှောင်ချင်ခဲ့သည်၊ သို့သော်လည်း ချူးယွင်ဖန်းသည် ထိုအရာများကို စိတ်မဝင်စားသောကြောင့် တိုက်ရိုက်ငြင်းဆိုခဲ့သည်။

ချူးယွင်ဖန်းထွက်သွားပြီး သိပ်မကြာမီတွင် ကုန်းပုယီက အကြီးအကဲရွှီကို ပြောလိုက်သည်။

"ချူးယွင်ဖန်းနဲ့ ပတ်သတ်တာမှန်သမျှ အကုန်စုံစမ်းထား၊ အထူးသဖြင့် သူ့နောက်ကွယ်က ဂိုဏ်းကို စုံစမ်းထား"

ချူးယွင်ဖန်းသည် ကနဦးတွင် မြို့ဝန်ကျုံးရှင်၏မိသားစုမှဖြစ်ကြောင်းသာ ပြောကြားခဲ့သည်။ သို့သော် ချူးယွင်ဖန်းသည် မြို့ဝန်ကျုံးရှင်မိသားစုတွင် သာမန်အကိုင်းအခက် မိသားစုဝင်တစ်ယောက်သာဖြစ်သည်။ ထို့အပြင် အရေးအကြီးဆုံးအချက်သည်၊ မြို့ဝန်ကျုံးရှင်မိသားစုသည် ဆေးပညာလမ်းကြောင်းနှင့် ဆက်စပ်မှုမရှိခဲ့ပေ။ ချူးယွင်ဖန်းကဲ့သို့သော ပါရမီရှင်တစ်ဦးကို ပြုစုပျိုးထောင်ရန် မဖြစ်နိုင်ပေ။

ဖြစ်နိုင်ခြေတစ်ခုသာရှိသည်၊ ဤသည်မှာ ချူးယွင်ဖန်း၏နောက်ကွယ်မှာ ကျွမ်းကျင်သူတစ်ဦးရှိနေပေလိမ့်မည်။ ဤကျွမ်းကျင်သူသည် ဆေးပညာကျွမ်းကျင်သူဖြစ်ရန်ပင် ဖြစ်နိုင်ချေများပြားသည်။ ကုန်းပုယီသည် ၎င်းကို အဖြေရှာမရပါက၊ အိပ်မပျော် စားမဝင်နိုင်ဖြစ်နေပေလိမ့်မည်။

ချူးယွင်ဖန်းသည် ဆေးပညာအစည်းအရုံးမှ ထွက်ခွာသွားသော်လည်း မြို့ဝန်ကျုံးရှင်၏အိမ်တော်သို့ မပြန်ခဲ့ဘဲ မြို့၏ဆေးပညာဆိုင်ရာ လမ်းမဆီသို့ ဦးတည်သွားခဲ့သည်။ ဤလမ်းမတွင် ဆေးမျိုးစုံရောင်းချနေသည့် ဆိုင်များစွာရှိနေသည်။ ချူးယွင်ဖန်းသည် လမ်းလျှောက်နေစဥ် ပတ်ဝန်းကျင်သို့ လှည့်ပတ်ကြည့်ရှု့နေခဲ့ရာ၊ မကြာမီ လမ်းထောင့်ရှိ အိမ်ခြံမြေ အကျိုးတော်ဆောင်သို့ ရောက်ရှိလာလေသည်။ ဤသည်မှာ သူ့အတွက် အသစ်စက်စက် စတင်မှုတစ်ခု ဖြစ်လာပေလိမ့်မည်။