အိပ်ချင်ယောင်ဆောင်ခြင်း

ဆိုဖာပေါ်မှ ရဲထျန်းမင်မှာ ရဲနျဉ်၏စကားများကို ကြားသောအခါ သူ၏မျက်ခွံများမှာ အလိုအလျောက်ပင် အနည်းငယ် လှုပ်ရှားသွားသည်။

‘သေစမ်း… ဒါက အရမ်း ရက်စက်တာပဲ… ပြောတာနဲ့ လူသတ်တော့တာပဲ…’

‘ဒါက ဘယ်လို မိသားစုမျိုးလဲ… ရွေးချယ်မှု ၁ မှာ ငါ အပြင်ထွက်ပြီး ကြွားဝါလို့ရတယ်၊ (မိသားစုဝင်တွေကလွဲရင်) အရိုက်ခံရပြီး သေမှာကို စိတ်ပူစရာမလိုတော့ဘူးလို့ ပြောတာ မဆန်းတော့ဘူးပဲ… ဘယ်သူက ဒီမိသားစုကို ရန်စရဲ၊ ရန်ရှာရဲမှာလဲ…’

‘ငါကသခင်ကြီးရဲပဲကွ။ မင်းလိုကောင်က ငါ့ကိုဘာလုပ်နိုင်မှာမလို့လဲ… ဒီဘွဲ့အမည်က တကယ်ကို လိုက်ဖက်တာပဲ…’

အမှန်စင်စစ်… ရဲထျန်းမင်မှာ ခုနကတည်းက နိုးနေခဲ့ပြီး ယခု သူက အိပ်ချင်ယောင်ဆောင်နေခြင်း ဖြစ်သည်။

မူလက ဤကဲ့သို့ သတိလစ်သွားပြီးနောက် အပြင်ဘက်မှ နှောင့်ယှက်မှုမရှိဘဲ သူက နာရီအနည်းငယ်ကြာ သတိလစ်နေမည် ဖြစ်သော်လည်း စိတ်စွမ်းအား +၁၀ ဆုကြေးကြောင့် သူက စောစော နိုးလာခဲ့ခြင်း ဖြစ်သည်။

ရဲထျန်းမင်မှာ ဤမယုံကြည်ရသော စနစ်အကြောင်းကို တွေး၍ စိတ်ထဲမှ တရစပ် မြည်တွန်တောက်တီးနေမိသည်။

‘ဒါက… ငါ အရည်အချင်း ဆုကြေးရတိုင်း အရိုက်ခံရ၊ ဒါမှမဟုတ် သတိလစ်အောင် လုပ်ခံရမယ်ဆိုတဲ့ သဘောလား…’

သူ စိတ်ထဲမှ မြည်တွန်တောက်တီးနေစဉ်မှာပင် သူ၏ရှေ့မှ စနစ်က သတိပေးချက်တစ်ခု ပေးလာသည်။

[ တင်! စနစ်မှာ လက်ရှိ အဆင့်တစ်တွင် ရှိနေသဖြင့် အရာအားလုံးကို အိမ်ရှင်မှ ကိုယ်တိုင် ရယူရန် လိုအပ်ပါသည်…]

‘အဆင့် ၁ လား… အဆင့်မြှင့်လို့ ရမယ့်ပုံပဲ… ဒါဆို ကောင်းပါတယ်…’

…

ရဲနျဉ်က ယွင်ဝေ့ကို သတ်ရန် စဉ်းစားနေသည်ကို ကြားသောအခါ စုချင်းက ပြတ်ပြတ်သားသား ငြင်းဆိုလိုက်သည်။

"မလုပ်ရဘူး… တကယ်တော့ ဒီကိစ္စမှာ ယွင်ဝေ့က အမှားလုပ်တယ်လို့ ပြောလို့မရဘူး… ရဲချန်ကမှ အမှားလုပ်တဲ့သူ…"

ချက်ချင်းပင် စုချင်းက လူတိုင်းကို ထိုနှစ်က ဖြစ်ပျက်ခဲ့သည့် အမှန်တရားကို ပြောပြလိုက်သည်။

ယေဘုယျ ဇာတ်လမ်းမှာ ရဲချန်နှင့် စုချင်းတို့က လျှို့ဝှက်စွာ လက်ထပ်ခဲ့ကြခြင်း ဖြစ်သည်။

စုမိသားစုနှင့် ယွင်မိသားစုမှာ စေ့စပ်ကြောင်းလမ်းမှုတစ်ခု ရှိနှင့်ပြီးသားဖြစ်သဖြင့် သဘာဝကျစွာပင် သူတို့က သဘောတူမည် မဟုတ်ချေ။

စုမိသားစုဘက်တွင် ရဲချန်က အစပိုင်းတွင် မလှုပ်ရှားခဲ့ပေ။ သူက ယွင်မိသားစုထံ တိုက်ရိုက်သွား၍ ခြိမ်းခြောက် ခြောက်လှန့်ခဲ့သည်။ ထိုအခါမှသာ ယွင်မိသားစုက စေ့စပ်ကြောင်းလမ်းမှုကို အစပြု၍ ဖျက်သိမ်းခဲ့ခြင်း ဖြစ်သည်။

ထိုအချိန်မှာပင် ယွင်ဝေ့က ရဲချန်ကို မုန်းတီးလာခဲ့ခြင်း ဖြစ်၏။

ထိုအချိန်က ယွင်မိသားစု၏ အကြီးအကဲ၊ ယွင်ဝေ့၏ဖခင်က ယွင်ဝေ့အား ရဲချန်ကို မရန်စရန် ပြောခဲ့သည်။ အဘယ်ကြောင့်ဆိုသော် ရဲချန်မှာ ရေကန်ထဲမှ သတ္တဝါတစ်ကောင် မဟုတ်ဘဲ ထိုသို့သောလူများကို မိတ်ဆွေဖွဲ့နိုင်သော်လည်း ရန်မစနိုင်သောကြောင့် ဖြစ်သည်။

နောက်ပိုင်းတွင် ရဲချန်က စုမိသားစုနှင့် စုမိသားစုနောက်ကွယ်မှ အင်အားစုများကို အနိုင်ယူပြီးနောက် ယွင်ဝေ့မှာ သူ၏ဖခင်စကားများ၏ အဓိပ္ပာယ်ကို နားလည်သွားသည်။

သူ့ဖခင်၏စကားကို မနာခံဘဲ ရဲချန်ကို ရန်မစခဲ့သည့်အတွက် သူက မိမိကိုယ်ကို ကံကောင်းသည်ဟု ထင်ခဲ့၏။

…

ရဲထျန်းမင်မှာလည်း ထိုဇာတ်လမ်းကို သေချာစွာ နားထောင်နေခဲ့သည်။

ထိုအချိန်တွင် ရဲရှင်းဟွေ့က လှည့်ကြည့်လိုက်ရာ ရဲထျန်းမင်၏ မျက်ခွံများ အနည်းငယ် လှုပ်ရှားနေသည်ကို မြင်လိုက်ရသည်။ ဤလူမှာ ကြာမြင့်စွာကတည်းက နိုးနေသင့်ပြီဖြစ်ကြောင်း သူ သိလိုက်၏။

'အင်း… ငါ သူ့ကို ခြောက်လှန့်ပြီး သူ့စိတ်ကို တုန်လှုပ်အောင် လုပ်နိုင်မလား ကြည့်ရမလား… မဟုတ်ဘူး… အသုံးမဝင်လောက်ဘူး… ငါ့အပေါ် သူရဲ့ နှစ်သက်မှုက အရမ်းနည်းနေသင့်တယ်… ဒါပေမဲ့… အဲဒါက ဘာဖြစ်လဲ… ရုပ်မြင်သံကြားစက်ရဲ့ အချက်ပြမှုအတွက် မဟုတ်ရင်တောင် ငါ သူ့ကို စနောက်လို့ရသေးတယ်…’

"အဟမ်း… အဟမ်း…" ရဲရှင်းဟွေ့က နှစ်ကြိမ် ချောင်းဆိုးလိုက်ပြီး လူတိုင်း သူ့ကို ကြည့်နေသည်ကို မြင်သောအခါ သူက ဆက်ပြောလိုက်၏။

"ငါတို့ ရဲထျန်းမင်ကို ဖမ်းမိပြီ… အဖေမပြန်လာခင် အခွင့်ကောင်းယူပြီး… သူ့ကို ရှင်းပစ်လိုက်ရမလား…"

ရဲရှင်းဟွေ့က သူ အမှန်တကယ် ရဲထျန်းမင်ကို သတ်ချင်နေဘိသကဲ့သို့ ယုတ်မာသော လေသံဖြင့် ပြောလိုက်သည်။

ရဲထျန်းမင် ဤသို့ကြားသောအခါ သူက အလိုအလျောက် တံတွေးမျိုချလိုက်ပြီး စိတ်ထဲမှ ကျိန်ဆဲလိုက်သည်။ 'ဖာ့ခ်… ဒါ… ဒီသောက်ကျိုးနည်းက တကယ်ကြီး ငါ့ကို သတ်တော့မှာပဲ…’

ရုတ်တရက်… ရဲထျန်းမင်မှာ စိတ်ထဲမှ တောင်စဉ်ရေမရ တွေးတောနေမိတော့သည်။

သူ၏မိခင်မှာ ရဲနျန်ချန်ဖြစ်ပြီး ရဲရှင်းဟွေ့နှင့် ရဲလန်ယွဲ့တို့၏ မိခင်မှာ စုချင်းဟုခေါ်သော ထိုသူ ဖြစ်သင့်သည်။

ရုပ်ရှင်နှင့် တီဗီဇာတ်လမ်းတွဲများစွာတွင် ဤကဲ့သို့သော အခြေအနေမျိုးနှင့် ရင်ဆိုင်ရသည့်အခါ သူကဲ့သို့သောလူများမှာ အသတ်ခံရခြင်း သို့မဟုတ် အိမ်တွင် ခွဲခြားဆက်ဆံခံရပြီး ညစ်ပတ်သော အလုပ်အားလုံးကို ကိုယ်တိုင်လုပ်ရခြင်းတို့ ဖြစ်တတ်သည်။

ရဲဖန်မှာ ရဲရှင်းဟွေ့၏ အမူအရာ မှားနေသည်ကို မြင်လိုက်ပြီးနောက် ဆိုဖာပေါ်မှ ရဲထျန်းမင်ကို ကြည့်လိုက်၏။

ရဲထျန်းမင် အလိုအလျောက် တံတွေးမျိုချနေသည်ကို မြင်သောအခါ ဤကလေး နိုးနေပြီဖြစ်ကြောင်း သူ သိလိုက်သည်။

သဘာဝကျစွာပင် ဤအငယ်ဆုံးတူလေးနှင့် အဆက်အစပ်အရှိဆုံးသူမှာ ဒုက္ခပေးရသည်ကို နှစ်သက်သော ရဲဖန်ပင် ဖြစ်သည်။

"ဟားဟားဟား… ရှင်းဟွေ့ ပြောတာမှန်တယ်… စကားမစပ်… ရှောင်ဟာ့ရဲ့ အစာက အခုတလော ဘယ်လိုနေလဲ မသိဘူး… အလောင်းဖျောက်တဲ့ကိစ္စကို ရှောင်ဟာ့ဆီပဲ အပ်လိုက်မယ်… သူ လူ့အသား မစားရတာ ကြာပြီ… ရက်အနည်းငယ်ကြာရင် ခွေးပြိုင်ပွဲ ရှိတယ်… ရှောင်ဟာ့ရဲ့ အစာကို ပိုကောင်းအောင် လုပ်ပေးရမယ်…"

ရဲထျန်းမင်ကို ရှောင်ဟာ့မှာ ခွေးတစ်ကောင်ဖြစ်ကြောင်း သိစေရန် ရဲဖန်က နောက်ဆုံးစကားကို အထူးထပ်ထည့်လိုက်သည်။

တစ်ချိန်တည်းမှာပင် ရဲထျန်းမင်၏ စိတ်ထဲမှ စနစ်က နောက်တစ်ကြိမ် စတင်လည်ပတ်လာသည်။

[ တင်! ဘဝရွေးချယ်မှုများစတင်ပါပြီ…

ရွေးချယ်မှု ၁: ထ၍ ပြေးပြီး ဆုလာဘ် “အာကာသခုခံမှု +၁၀” ကို ရယူပါ…

မှတ်ချက်: ဤဆုလာဘ်ကို အထူးနည်းလမ်းဖြင့် ပေးအပ်မည် ဖြစ်သည်…

ရွေးချယ်မှု ၂: အိပ်ချင်ယောင် ဆက်ဆောင်ပြီး ဆုလာဘ် “ကျပန်းနတ်ဆိုးအိမ်မွေးတိရစ္ဆာန်” ကို ရယူပါ…

မှတ်ချက်: သင်က အိပ်ချင်ယောင်ဆောင်နေသောသူကို ဘယ်တော့မှ နှိုးနိုင်မည် မဟုတ်ပါ… ]

ဤရွေးချယ်မှုနှစ်ခုနှင့် ဆုလာဘ်များကို မြင်သောအခါ ရဲထျန်းမင်မှာ အတွေးနက်ထဲသို့ ကျရောက်သွားသည်။

ပထမရွေးချယ်မှုမှာ အနည်းငယ် ရင်းနှီးသလို၊ အနည်းငယ် မရင်းနှီးသလို ဖြစ်နေသည်။

ယခင်က ခုခံမှု +၁၀ ရရှိခြင်းမှာ အရိုက်ခံရခြင်းကို ဆိုလိုပြီး စိတ်စွမ်းအား +၁၀ ရရှိခြင်းမှာ သတိလစ်အောင် လုပ်ခံရခြင်းကို ဆိုလိုသည်။

သို့သော် ဤတစ်ကြိမ်… သူ အာကာသခုခံမှု +၁၀ ကို မည်သို့ ရရှိမည်နည်း။

ဝင်ပေါက်တစ်ခု ဖန်တီးခြင်း သို့မဟုတ် အဆုံးမရှိ တယ်လီပို့တ်လုပ်ခွင့်ပြုခြင်းမျိုး ဖြစ်မည်လား။

မည်သို့ပင်ဖြစ်စေ ရဲထျန်းမင်မှာ ၎င်းကို မခံစားချင်တော့ပေ။

သို့သော် ဒုတိယဆုလာဘ်မှာ အနည်းငယ် ထူးဆန်းနေသည်။ ကျပန်းနတ်ဆိုးအိမ်မွေးတိရစ္ဆာန်လား။ နတ်ဆိုးအိမ်မွေးတိရစ္ဆာန်က မည်သည့်နေရာမှ ရောက်လာမည်နည်း။

အတန်ကြာ စဉ်းစားပြီးနောက် ရဲထျန်းမင်မှာ နောက်ဆုံးတွင် အိပ်ချင်ယောင် ဆက်ဆောင်ရန် ဆုံးဖြတ်လိုက်သည်။

အာကာသခုခံမှု ရရှိရန် မည်သည့်အရာကို ဖြတ်သန်းရမည်ကို သူ မသေချာပေ။ အဆိုးဆုံးရလဒ်မှာ သေဆုံးခြင်းပင် ဖြစ်နိုင်သော်လည်း ဒုတိယတစ်ခုမှာ ထိုမျှလောက် ဆိုးရွားမည် မဟုတ်ပေ။

…

ရဲထျန်းမင်မှာ အိပ်ချင်ယောင်ဆောင်နေဆဲဖြစ်သည်ကို မြင်သောအခါ ရဲရှင်းဟွေ့က မျက်မှောင်ကြုတ်လိုက်သည်။

သူ၏ မူလအစီအစဉ်မှာ အကယ်၍ ရဲထျန်းမင်က အိပ်ချင်ယောင်မဆောင်ခဲ့လျှင် သူ ယခင်က ရဲဖန်ကို ပြုလုပ်ခဲ့သကဲ့သို့ ဝင်ပေါက်နှစ်ခု ဖွင့်ပေးပြီး အဆုံးမရှိ ခုန်ပျံနေသော စက်များ လှိုင်းလုံးတစ်ခု ဖန်တီးပေးမည် ဖြစ်သည်။

သို့သော် သူ မမျှော်လင့်ခဲ့သည်မှာ ရဲထျန်းမင်က ဆက်လက် ဟန်ဆောင်နိုင်ခြင်း ဖြစ်သည်။

တစ်ချိန်တည်းမှာပင် အခြားသူများကလည်း ရဲထျန်းမင် အိပ်ချင်ယောင်ဆောင်နေသည်ကို ရှာဖွေတွေ့ရှိသွားကြသည်။

သဘာဝကျစွာပင် အခြားသူများမှာ ဒုက္ခပေးရသည်ကို နှစ်သက်သော ရဲရှင်းဟွေ့နှင့် ရဲဖန်ကဲ့သို့ ပျင်းရိခြင်း မရှိကြပေ။

စုချင်းက ရဲရှင်းဟွေ့၏ခေါင်းကို တစ်ချက် ပုတ်လိုက်ပြီးနောက် ရဲထျန်းမင်၏ ဘေးသို့ လာ၍

"ထျန်းမင် ဟုတ်တယ် မဟုတ်လား… စိတ်မပူပါနဲ့… ရှင်းဟွေ့နဲ့ တခြားသူတွေက မင်းနိုးနေတာကို သတိထားမိလို့ မင်းကို နောက်နေတာပါ… ဟန်ဆောင်နေစရာ မလိုပါဘူး…"

'ဟွန်း… မင်းက ငါ့ကို ဟန်မဆောင်နဲ့လို့ တောင်းဆိုရုံနဲ့ ငါ ဟန်မဆောင်တော့မှာလား… ငါ့ဆုလာဘ် မရောက်သေးဘူး…’ ဟု ရဲထျန်းမင်က စိတ်ထဲမှ တွေးလိုက်သည်။

"အမေ… အမေက အိပ်ချင်ယောင်ဆောင်နေတဲ့သူကို ဘယ်တော့မှ နှိုးနိုင်မှာ မဟုတ်ဘူး… ကျွန်တော့်ကို ထားလိုက်ပါ…"

ထိုအချိန်တွင် ရဲရှင်းဟွေ့က ဘေးသို့ ရောက်လာပြီး သူ၏ စိတ်အာရုံက တောင်တန်းနှင့် မြစ်ချောင်းများမြေပုံထဲသို့ ဝင်ရောက်သွား၏။ ထို့နောက် သူက ရှောင်စစ်ကို တောင်တန်းနှင့် မြစ်ချောင်းများမြေပုံထဲမှ ထုတ်ယူလိုက်သည်။

ရှောင်စစ်မှာ ယခုအခါ ကျင့်ကြံခြင်းစတင်နေပြီဖြစ်ပြီး သူ၏ကိုယ်လုံးမှာ အတော်လေး ကြီးမားလာသည်။ အိမ်၏ ဧည့်ခန်းမှာ ကြီးမားပြီး မြင့်မားခြင်းမရှိခဲ့လျှင် ရှောင်စစ်မှာ အိမ်ကို ဖျက်ဆီးပစ်နိုင်ပေသည်။

ရှောင်စစ်က ဦးစွာ အရေပြားအမှုန်အသွင်ပြောင်းစွမ်းရည်ကို အသုံးပြု၍ သူ၏ခန္ဓာကိုယ်ကို သေးငယ်အောင် ပြောင်းလဲလိုက်ပြီးနောက် ရဲရှင်းဟွေ့အား "သူဌေး… ကျွန်တော် ဘာလုပ်ပေးရမလဲ…" ဟု မေးလိုက်သည်။

ရဲရှင်းဟွေ့က ဆိုဖာပေါ်မှ ရဲထျန်းမင်ကို ညွှန်ပြ၍ "ဒီမှာ ဒဏ်ရာရနေတဲ့သူတစ်ယောက် ရှိတယ်… သူ့ကို ကောင်းကောင်း ကုသပေးပါ…" ဟု ဆို၏။

"အိုး… ဒါလား… ကျွန်တော် ဒါနဲ့ ရင်းနှီးတယ်…"

ထိုစဉ်က ရှောင်စစ်နှင့် ရှောင်ဟာ့တို့မှာ ယခင်နဂါးဘုရင်ကို ကယ်တင်ခဲ့ကြပြီး သူတို့ ကယ်တင်ခဲ့ပုံမှာ အလွန်ရိုးရှင်းသည်။ ဝိညာဉ်ဆေးပင်များ သို့မဟုတ် တစ်ခုခုကို ရယူ၍ သူတို့၏ပါးစပ်ထဲတွင် ဝါးပြီးနောက် ဒဏ်ရာရသူ၏ ပါးစပ်ထဲသို့ ထည့်ပေးလိုက်ရုံသာ ဖြစ်သည်။

"ဒါပေမဲ့ သူဌေး… ကျွန်တော် အရင် ဆေးသွားယူရဦးမယ်…"

"မလိုဘူး… မင်းရဲ့တံတွေးက အကောင်းဆုံး ကုသဆေးပဲ… လုပ်လိုက်တော့…"

"ဒါဆို ကျွန်တော်က အရမ်း အစွမ်းထက်တာပေါ့…" ဟု ရှောင်စစ်က သဘောပေါက်သွားသည်။ သူက အဘိုးအိုကို ကယ်တင်ခဲ့သည်မှာ ဝိညာဉ်ဆေးပင်များကြောင့် မဟုတ်ဘဲ သူ၏ကိုယ်ပိုင် တံတွေးကြောင့်ဖြစ်ကြောင်း ပေါ်ထွက်လာသည်။

ဤသို့တွေးမိသောအခါ ရှောင်စစ်က သူ၏ကြီးမားသော လျှာကို ထုတ်၍ ရဲထျန်းမင်၏ မျက်နှာကို လျက်လိုက်သည်။